كملو ياكلو لينار تفتحتلها الشهية من ورا وش دارت قاعدة تاكل و تستنا غير فالعيطة شوي وقت ويسمعو العيطة اللي دوات الدار
جان:آآآآآآآآآآآآآآآي ظهريييييييييييييييييي
وقفو يجري وجيهة الباب اولهم سمير لقاو جان مرمي فالارض على ظهرو ويعيط
جان:امااااااااا تكسسسسرت..ااي ظهرييي..اخووتي سيليا قربت تجري ليه
سيليا:لبااس مصرالك والو؟؟(تولهت للقيطان فالأرض عرفت خدايم شكون تبسمت و ثم ثم خبات الحبات اللي طيحت جان تحت الخزانة.)
سيليا:جان تقدر تنووض؟
جان :وشمن نووض ظهريييييييييي
لينار واقفة من بعيد تضحك بشوي
سمير وقفو بشوي::اياا وقف وشبيك طييحة صغيرة دارت فيك هكا
جان واقف ويتعوق وحدو:اييي ظهريي شوي وتعوقت وراح شبابي ومتزوجت معشت اييييي
سيليا:بركا متندب زي مرت الشهيد هاك لباس بيك
جان وسط وجيعتو خنزر فيها:لسانك طواال علابالك؟؟
سيليا:علاابلي هات الجديييد
سمير:ايا بركاو ما تتعاندو,عاونوه يدخل للصالون يريح جا فايت لقا لينار واقفة قدام ايلين اللي كانت تشوف فيه باسى عكس بنتها
ايلين:جان ياخي لبااس؟
جان شاف فلينار يتبسم:ايه لبااس بزاااف منعت( مدلها الكيس اللي كان فيدو) هاكي لييينوشة تحلية مع فيلم تحت عنوان "طيحة جان"
لينار تبسمتلو تبسيمة كبييرة:مرسيي عميمو جان سلامة راسك
سيليا ضحكت على شوفاتهم لبعض يبانو أعداء قربت لايلين:وش رايك تديريلو المسدة اللي موالفة تديريهالي فلندن؟
عصماء:ههه تاع ليليان؟؟
ايلين: ههه ايه تاع ماما
جان::تعملي مزيا راهو سطر مش نوورماال(كمل يمشي ويتعوج للصالون)ايييي ظهرييي
سمير:والله صدقت سيليا وشبيك تندب زي المطلقة؟
جان:يرحم والديك تعييش خليني نندب زي مرت الشهيد لا المطلقة راني شوي وتعوووقت
سمير:ههههههههه اوك اندب
ايلين راحت للكوزينة تديرلو المسدة (تتخدم بأعشاب والله معرف وش هوما مي المهم مفيدة للضربات هادو)وحاطة لينار فوق البوطاجي تتفرج فيها
لينار تاكل فالشيبس اللي جابو جان :ممم...ماما وش راكي تديري؟
ايلين تتبسم:هههه راني نخدم فواحد الوصفة تعلمتها على ماما جداتك ليليان الله يرحمها تعاون عمك جان مسيكين
لينار قلبت عينيها:هممم وش عليه
ايلين:هههه قوليلي شبيك مش عاجبك جان؟
لينار:ههه اوو شكون قال؟....نن عادي ميعجبني منعجبو
ايلين:امم ههه اوك......(شافت فيها شوي تتبسم ونطقت بتردد )قوليلي..
لينار:ايه مامي وش نقولك؟
ايلين:....تحبي باباك بزاف؟
لينار تبسمت تبسيمة كبييرة :ههه باااينة نحبوو عرااااام بابا هو بابي ورفيقي وحبيبي وكلشي ديما واقف معايا وجامي رفضلي طلب و كي نزعف ديما يراضيني وديما يخمم فراحتي..صراحة هو وعمو مازن كنت نحسهم اباء ليا في زوج ههه مازن هو بابا وشريكي في الخطط الشريرة سيرتو على ميرال وماهر هو بابا العاقل اللي ديما يسيي يعرشلنا ويعلمنا ههههه ويربينا ههههههه
ايلين باستها لراسها:ميرال كانت تقلقك بزاف؟
لينار دارت صبعها على فمها تخمم:همممم..هي مش بزاف يعني انا كنت ثم ثم نرد ضربتي صراحة جامي قلقتني بزاف مي كانت تقارن روحها بيك وتسيي تدي بلاصتك عندي وانا ديما نقصفها ومازن يهربني هههه قتلك عميمو مازن هو شريكي..وبابا كان ديما يعرشلنا ويسيي يكالمي الرهج تاع ميرال
ايلين تبسمت بسخرية يعني مخلي بنتها بعيدة عليها ويزيد يراضي ميرال كي تجرب ترد حقها
لينار:مي بابا ميحبهاش وهي تظل تلوح روحها علييه اووف شيطاانة معزززة
ايلين:هههههه ياعمري على بنتي وكي تزعععف
عصماء واقفة فالباب وتتفرج فيهم:ربي يدوم فرحكم ولمتكم بناتي الزينات
تبسمولها للزوج
ايلين/لينار:مرسييي
ايلين:خالتو المسدة واجدة
عصماء:مرسي حبيبتي عييناك
ايلين:ههه لالا مفيها والو مش خصارة فجان
مدتها لعصماء وهي هزت بنتها وراحو للصالون
قاعد وحدو فالزنزانة مع الظلام اللي فيها هادي حبس مش شومبرتو اللي ديما مضوية الظلمة اللي كانت طاغية خلات قلبو يوجعو لا اراديا قاعد ويخمم
ماهر:هه راهي بين يديك ضك؟..وفي حجرك؟..تبوسي فيها؟..وعلابالي نهار كامل ونتي هازتها...علابالي راكي من اللي يطلع النهار ونتي تشمي فريحتها..واناا..وانا اللي قاعد هنا متوحشكم وقلبي راه يبكي(طاحت دمعة على خدو..ايييه دمعة ماهر اللي بذل عمرو كامل يسيي يصلح حياتو ويعدل عيلتو مي ملقا والو كلما يقول تفكت تتربط كثر وكلشي يتقلب صح راجل مي الضر على الناس كامل وجاع القلب ميكمدو غير دموع العين):عينيك..توحشتهم ميي...متوحشتش الشي اللي كان فيهم الصباح كنتي تضحكي وعينيك كانو فارغين..البريق اللي كان فعينيك ويقول باللي ماهر نحببك كاين غايب...وحتى وقت تلوميني مكانش يهمني بيسك يقولو متلوم غير اللي يهمك ويعنيك مي حتى اللوم منطقتيييهش..قلتي رايح نخلص وملمتيش ومسقسيتيش علاش؟..علاه مخليتينيش نفهمك؟؟..(دور عينيه على البلاصة ربع حيوط وتاقة صغييييرة):انا هنا بين ربع حيوط وقلبي وكلشي فيا عندكم علابالي فرحانين مع بعضكم وبلاك راكم تلومو فيا اللي حرمتكم هاد الفرحة من كامل السنين اللي فاتو مي مش بقصدي ومش بيدي..راني محروق عليكم ونخاف يلحقو ليكم وتبعدو عليا نتو الزوج وتبقى حياتي مظلمة كيما هاد الظلمة اللي راني فيها ضك...علاه واحد مراه واقف معايا وماقال وش فات ماهر وواش اللي خلاه يدير هكا؟؟..مكاين ولا انسان نقدر نشرحلو ضعفي وموقفي ونكون متأكد رايح يعاونني...مكاين والو من غير طريق مظلم ابصر نهايتو وين رايحة توصلنا....خطفو النوم هكاك وهو قاعد ودمعتو على خدو وآآه من دمعة الراجل والى طاحت معناها راه رافد جبال ماهي جبال هموم
كانو على طابلة العشا تشوف فيه بنص عين وتاكل حتى تولهلها
مجيد:خيير راكي تصوري فيا من اللي قعدنا؟..ولا رحتي للرحلة يامات توحشتيني
نورهدرت بصوت واطي:بلاك نتوحش الكلب تاع جارنا ومنتوحشكش نتا هزت راسها فيه:راني نشوف فيك وفالشهامة اللي فيك كشما نتعلم
ملاك:وش قصدك لالة؟؟
نور وقفت:شبعت بصحتكم
طلعت لبيتها ديراكت هزت تلفونها تعيطلو
جانير كان فالمركز رايح يرقد حتى يسمع تلفونو:وي؟
نور:اهلا
جانير:ههه لعجووز كي راكي؟
نور:راني بيان يا الشاايب ونتا؟
جانير:والله كنت لباس مي كي سمعت صوتك وليت نن
نور:هاهاها تقتل بالضحك علابالك؟
جانير:ايه جيبي الجديد
نور:ههههه ايا روح تقود خي مرييض
جانير:هههه خارج لييك
نور ديراكت ولا اراديا عقلها صورلها هدرة جان والموقف نفسو تعاود بين عينيها
"جانير:ايه صغير مش شايب كيفك مي صغرون تتقال لمول 5سنين مش نتيجي
جان:اا هنا بديت تزيد فالهدرة خلاص
سيليا:ههه خلاص نتوما الزوج وشبيكم قريب تلصقو
جان:ههه معليش منيش لايمو باين لسانو لمن خارج (شاف فنور اللي ربعت يديها لصدرها ووقفت بشموخ هازة حواجبها فيه)"
جانير:اوووهي وييين رحتييي؟؟
نور :ااه هاني..ههه ايه وش راك؟
جانير:حتى قريب نكوبي باه تقولي وش راك؟
نور:اووف نتا غالط اللي يعيطلك علابالك؟
جانير قلب صوتو سيريو:وشبيك؟
نور:والووو
جانير:نوور مش عليا تفوتيها وش كاين بابا كشما هدر معاك؟
نور تبسمت بفخر على تولاه خوها بيها مالقري هو الصغير مي ديما تحسو جناحها ومداير بليزير الأخ لكبير وأكثر:ههه ياعمري على خويا لعزيز..صراحة معرف مورالي برك هابط
جانير:وعلاش متعيطيش لبيشو تنقصلك الضغط ياك ديما وقت تكوني مقلقة تعيطيلها
نور:ههه المشكل معلاباليش وشبيا..المهم قولي اسع وش دارو فيها لي باترون تاعي حكا معاك مازن؟
جانير:ايه رانا نخدمو هداك جان خرج وبقى مسيو ماهر لازم يتحاكم
نور:واات؟؟وعلاه جان وش يكون حتى يخرجوه ويخليو مسيو ماهر
جانير:معرفتش مي الله يسهل عليه انا راني مع مازن دايرين البوسيبل باه نخرجوه
نور:نشالله مايكون فيها غير الخير مسيو ماهر بزاف ناس ملاح وسير رايحة تتفك عليه
جانير:ايه نشالله هاديك هي
كملو قصرو شوي جانير يسيي يخفف على أختو بيسك ماعندو غيرها فالدنيا هادي
مجمولين فالصالون جان متكسل على كرشو وعصماء تحطلو فالمسدة والباقي قاعدين يتفرجو فيه
ايلين:جان..كيفاه طحت؟؟
لينار ركبتها الخلعة بقات غير تشوف فيه وسيليا نفس الشي جان شاف فيهم كامل بالواحد يستناو اجابة
جان:معرف مي مع دخلت تعكلت فشي وطحت معرفتش وش هو
عصماء:اوو صبااح برك سيقت ولميت الدنيا فاه تعكلت؟؟
سيليا:اوو مي كي جيت نعاونك مكان والو كاين سير تعكلت فالطابي
جان:معرف المهم فاتت
سمير :ايلين..هزي بنتك وطلعيها ترقد صغيرة مش مليحة ليها السهرة
ايلين باستها ووقفت هازتها:صح مرسي عميمو..جان بالشفا عليك نشالله غدوة تفيق لباس
جان:مرسي ايلين..تصبحي على خير الشريرة الصغييرة
لينار حظنت ايلين بتملك:منيش شرييرة
جان:ههه اوك باااي
طلعت بيها لشومبرتها وريحت فوق السرير ربعو للزوج مقابلين بعض سبحان الله نسخة وحدة وحدة صغيرة ووحدة كبيرة
ايلين حاكمة يديها وتتفرج فيها:اييه بنتي حبيبتي وش راكي حابة تديري مع ماما ضك؟
لينار ضحكت:هههه ني حابة نرقد ونتي تلعبيلي بشعري..كنت ديما نتمنى الشي هدا
ايلين جبدتها لها حطتلها راسها على حجرها كيما طلبت غطاتها وبقات تمسح على شعرها
ايلين:تحبي نحكيلك حكاية؟
لينار:هههه اييه
ايلين:هه اوك:كان يا مكان في قديم الزمان ارنوبة صغيرة كانت تمشي فالغابة..
قاطعتها لينار:ووين هي ماماها علاه مهيش معاها؟؟
ايلين عقدت حواجبها شوي تصرفات لينار مش نورمال..يظهرلي غيابها أثر عليها بزاف قلبها تزير بسيف نطقت:امم ..ماماها راهي فالدار وهي بعثتها تلعب باه تنحي على بالها
لينار:اممم...ماما..
ايلين:انعم ياروحي؟
لينار:علاه..مجيتيش عندي؟؟من قبل؟؟
ايلين دمعتها جاتها وقلبها تزير:امم.احم..مامي خلي كي تكباري شوي ونهدرو الهدرة هادي ياك هاني معاك ضك؟
لينار:ايه..
كانت تمسحلها على شعرها حتى تولهت على جرحة صغيرة فراسها
ايلين:ليينار...شبيك مجروحة من راسك.؟؟؟
لينار تقعدت من كيف كانت راقدة وقعدت فحجرها محظنتها تقول رايحة تهرب:هههه.رايحة تتشوكاي شوي مي تالمون أنا قوية دهمتني لوطو ومنعت ههههه وهذا أثر بقا بيسك نحيت الشاش اللي كان محطوط على راسي ومام رجلي تكسرت مي هاني لباس ضك
ايلين تخلعت بدات تبوس فيها وتفتف في وجهها كيما مالفة تدير لسيليا:راكي لباس؟؟كيفاه ووقتاه صرا الشي هدا؟؟..وباباك وش داار؟؟شكون دارها؟
لينار:ماما خلاص متخافيش هاني قدامك..بابا مسيكين بقا معايا فالسبيطار ومام كي خرجنا بقا معايا فالدار وغاب على الخدمة
ايلين:وقتاه هادي؟؟
لينار:عندها وااحد ال20يوم هكاك
ايلين تفكرت كي غاب ماهر على الشركة وكيفاه حست هدوك ليام يعني احساسها ومنامها صح مي بنتها اللي تقاست زيرت عليها ودموعها يهبطو بالشوي:سمحيلي بيسك مكنتش معاك هاد المدة اللي فاتت مي منا وجاي منزيدش نبعد عليك متفاهمين؟
لينار:حاااضر
دخلت عليهم سيليا بشوي
سيليا:هااي
لينار:سييليوووش اهلاااا
قربت تتبسم بالشوي مع ايلين:مزال مرقدتو؟؟
ايلين:ايه مزال
سيليا قعدت قدامها باست لينار وحكمت يد ايلين:شبيك كنتي تبكي؟؟
ايلين:..كنتي علابالك بالحادث اللي صرالها؟
سيليا هبطت راسها:اييه..مازن قالي
ايلين تبسمت ببرود:ههه برااافو صحيتي وش مزال مخبي ثاني؟؟...سيليا شحال من مرة نقولك التخبية تاعك هادي نكرهااا..شحال من مرة نقولك علاه تحكمي كلشي ليك وحدك ومتحبيش تشاركينا.سواء مسألة تخصك ولا تخصنا علاه تحبي تتغبني وحدك؟؟
سيليا:بيسك منحبش عليكم
ايلين حكمت يدها مليح:وحنا منحبوش عليك لازم تعرفي الشي هدا
سيليا:علابالي..(تبسمو لبعضاهم وجبدتها ايلين عندها تحضن وتبوس)
سيليا تزير عليها:سامحتيني؟؟
ايلين:بهلوولة..وعلاه انا نقدر نزعف علييك؟؟..عييت نزير شوي مي والو..ههه قلبي مطاوعنيش نخليك مقلقة
لينار:هاااحي عليااا عندي أروع ام وخالة فالعالم كااااااامل
ايلين وسيليا ضحكو وجبدوها ليهم
ايلين:عيلتي هي نتوما خليكم ديما معايا وفرحانين اوك؟؟
لينار/سيليا:حاااضر هههه
رقدو في ثلاثة مع بعض ايلين وسيليا ووسطهم لينار اللي لصقت فايلين بيديها ورجليها
ايلين بقات تخمم فماهر وش راه يدير ضك والزنزانة اللي شافتها الصباح مش بلاصتو مالقري زعفانة عليه بيسك حرمها من بنتها وعيشها في كذبة كبييرة وموحال تسامحو عليها مي غاضتها حالتو
جان طلع لبيتو وقاعد متكسل ويشوف فالبلافون حتى سمع بابا شومبرتو يندق
جان:ادخل
دخل سمير وحدو وغلق الباب راح ليه جان:اهلا بابا..اقعد
قعد سمير فوق الفوتاي وجان قعد على سريرو مقابلو
جان:اييه وش راك؟
سمير:لباس وليدي الحمد الله
جان:الحمد الله(سكت وبقا يشوف فيه يلعب بيديه وكاين هدرة على لسانو):خير بابا وش حاب تهدر؟
سمير:اه؟..اا..صراحة ياولدي جيت نحكي معاك فموضوع
جان:خير نسمع فيك.........
فااتت ليلة بطولها على أبطالنا كل واحد فيهم كان يخمم بطريقة زي واحد يحسب وواحد يخطط وواحد يخمم وهي رايحة
صباح متلمين كامل على طابلة لفطور وهو آخر واحد دخل عليهم
جان:صباح الخير
كامل:صباح النور
شاف فسمير تبسلو وراح ريح قدام لينار:وش فكرونة لباس؟
لينار تبسمتلو شوي:الحمد الله ونتا....وش راه ظهرك ؟
جان مسح على راسها بحنية :الحمد الله مرسي كي سقسيتي
سيليا:امممم ليكيب وش رايكم نديرو فيها خرجة ليوم على شرف ليناار اللي شرفتنا بحظورها معانا
ايلين:هههه ايه علاه لالا نخرجو بنتي تدور شوي
جان:ايه..انا عندي خدمة نتوما اديو لوطو تاع سيليا وروحو بيسك لوطو تاعي نروح بيها
سمير:ايه مام أنا وعصماء نروحو معاكم..طبعا لا مرحبين بينا؟؟
ايلين/سيليا:بااينة نرحبوو وبزااف ثاني
عصماء:اوك مالا افطرو ونروحو
في دار عمراني ثاني كانو مجمولين على طابلة لفطور ووشمن فطور بغياب سبع الدار سليمة تشرب فالقهوة بسيف ونسيمة ثاني تشرب فالحليب وتخمم من جيهة فولدها ومن جيهة تخمم منا وجاي وش راه يستنى فيها
سليمة لقات الطابلة فارغة
سليمة:فاااطمة..
جاتها تجري منهيه:انعم خالتي سليمة؟
سليمة:وين راه مازن؟
فاطمة:الصباح كي فقت مع ال7ملقيتوش يعني خرج قبل
سليمة:اوك مرسي
راحت فاطمة للكوزينة تكمل شغلها
سليمة تنهدت من أعماق قلبها:توحشتها الصغرونة الشهبة تاعي..هههه كن ضك راهي تضحك وتتمهبل..مي خلي على الأقل راهي فرحانة مع أمها
نسيمة:اممم.راهي فرحانة سير
سليمة:اييه فرحتيلها؟؟...مش على اساس علاقتك معاها تحسنت؟
نسيمة:ايه شفتينا نظلو كيف كيف
سليمة:خليك هكا وديما تفكري كلامي وكوني حنينة عليها كي تطيح بيك هي رايحة توقف عليك وتهز اسمك بنت البكري تاع نسيمة وما أدراك ماهر عمراني حفيدتنا الأولى الغالية رايحة تهز اسم العيلة وتعطيه حقو متأكدة
نسيمة:ايييه نشالله
في مركز الهمات الخاصة وفي رواق تحت الأرض جزء مخصص من المكرز تسمع غير فعياط وأنين الرجال وصوت السوط والما كيف يتكب لهنا ولهيه ..واقف وحاكملو راسو وغاطسو فالما البااااااارد مع الجليد مخليه يتخبط وحدو ..يجبدلو راسو ويعاود يردو وهو غير يعيط
.....:سمحليييي...هييي قااااتلي نخلللصك
مازن رجع غطسلو راسو فالماا:اييه هي خلصتك دراهم وانا هدا خلاصي ليك..شكوون نتا بااه تقرب على بنت خويا وتتجرأ تخمم تأذييييها(عاود جبدلو راسو)
....:لازم نصرف على عايلتي والله منعرفها وراني نااادم
مازن ردلو راسو فالما:عاايلتك تصرف عليييها الحلااااال تروح منك من الرجال وتحوس على خدمة..تتمرمد منك من الزوالي اللي كل يوم يبكر على خبزتو باه يوكل ولادو حلاال...وناادم؟!!ههههه النداامة تجي مع اللخر غلطت مع الانسان الغالط ..
كمل كلامو لقاه داخ جبدو ورماه للرض
مازن:ياحااارس هزوو جدوو عليا خيرمن نقتلو (مسح على راسو يكالمي روحو ونطق بصبعو يهدد فوجوهم)شووفو مليييح لوكان واحد منكم يخمم يرحمو رايح نخليه يسااميه .وديرو في بالكم باللي لازم يتمنى الموت وميلقاهاش ..هزوه منا لغرفة التعذيب الكهربائي
حبسو جانير:حظارات ماازن(مع التحية)
مازن:وي جانير؟
جانير:القائد راه يعيطلك
مازن:اوك ..
طلع لبيرو القائد فتح الباب ودخل دارلو التحية والقائد دارلو براسو ايه
مازن:قالو سحقيتني..
القائد:ايه..كاين مهمة لازم تستلموها ورايح نحطك نتا القائد عليهم
مازن:حااضر...مي وش هي المهمة؟
القائد:كاين انسان انتحل شخصية سياسية ويستعمل فاسمو في الأعمال الغير قانونية وقاعد يعاون فالارهاب فالتموين بالأسلحة والذخيرة ولازم تحبسوه
مازن:ايييه تخلطططت
القائد تبسملو:ههه خففت؟
مازن:ههههه خصاارة علييك قصدي تخلطت عليهم ديجا حاب نفرغ غشي مرسي كي عطيتني المهمة
القائد قرب ليه وربت على كتفو:وانا متأكد راك قدها كاين تسليم رايح يصرا بعد يومين ولازم تخربو الصفقة وتحكموه بالجرم المشهود
مازن:على حساب الشوفة رايح يكون فيها ارهااب ياك؟
القائد:ايه
مازن:ومراحش يكون كلشي ساهل سيير رايحين يفخخو البلاصة ويديرو البوسيبل باه منخربوش عليهم الحالة دونك نطلب منك سيدي توجدلي فرقة تفكيك القنابل وفئة قناصين وعملاء موهوبين عندنا ثقة بيهم والأهم تختارهم نتا بيسك الثقة مكانش فمجالنا واي تهاون يقدرو يتسربو معلومات وتفسد الخطة تاعنا
القائد تبسم بفخر بمازن:براافو عليها خيرتك نتا متخافش رايح ندير كل وش طلبت ونعين فئة موثوقة نخليكم تجتمعو ووتفاهمو على الخطة اللي رايحين تمشيو عليها فالمهمة
مازن دارلو التحية:مرييقلة مالا
جا رايح حبسو القائد كي نطق:وعندي ليك مفاجأة
مازن دار ليه يشوف باستغراب:وش هي؟
القائد وهو يتبسم:ههه العينات اللي جبتوهم من البلاصة التابعة لشركتكم وخلات خوك فالحبس نتائجها خرجو وقدرو يخليوه يتحاكم على برا وبهاد الشي تواصلت مع معارفي فالمحكمة وتقدمت المحاكمة تاع خوك لغدوة
مازن ضحك من الشق للشق:ويااا قاائد والله منعرف كيفاه نشكرك
القائد:هههه ايا روح بلا تبهليل نتا مميز عندنا وديما تدير البوسيبل علاجال بلادك هدا معروف صغير نقدمهولك
مازن تلاح ليه يحظن:مرسي مرسيي..صحييت تساالني عشاا متووول في عرسي نحطك نتا قدامي وتصور معايا ونتعشا معاك ونشطح معاك هااحي عليااا
القائد بعدو يضحك:هههههه ايا اسكت القى اللي تقبل بيك وساهلة
مازن:يااو قييو لقيتها وراهي قابلة بيااا
القائد تشوكا شوي:وااو اووه تحمست نعرف المهبولة اللي قبلت بيك..وديجا العرس تعرضني بلا مزيتك يا الفايق مش حتى نعاونك يخي حابس يخي
مازن حكا فقلبو(ياولدي تسمعك المهبولة تاعي توريك تكسرلك يدك نورمال):اا هيه قائد مالا نروح نوجد الدلائل
القائد:هههه اجري
خرج يجري ويصفر لقا جانير تلاح حظنوو
جانير:ههههه هات البشااارة
ماازن:المحاكمة غدوة والدلائل اللي معانا يعاونو ماهر يتحاكم على برا هههههه
جانير:اوووووووه طوووووب برااافو اجري نكملو اجرييي
مازن:ايه وكاين مهمة ثاني بعد يومين دير فبالك نتلاقاو غدوة نوجدو أومورنا
جانير:اممم اوك
خرج من المركز وراح ديراكت عند ماهر
قاعد وحدو مخو أفكار تدي و تجيب فيه حتى دخل عليه روس
مازن:اوووووولااا برووو
ماهر شاف فيه تبسم شوي وراح قرب ليه:وش خوو؟
مازن:جبتلك لخباار الشااابة
ماهر تبسم تبسيمة كبييرة:اييه انطق؟؟
مازن:احممم..المحاكمة اللي كانت منا على 5أيام تقدمت لغدوة يعني غدوة تخرج منا وتبقا غير تتحاكم على برا ومنا لهاداك الوقت نكون جبت دلائل تكفي كثر ونخرج ببرائتك
ماهر:هههه مي كيفاه درت الشي هدا كامل؟؟
مازن حط نيفو بكبرياء:احم احم سر المهنة ههههه
ماهر:ههه خلااك
مازن:ههه ايه المهم جبتلك لفطور وقش باه تبدل عليك (حكم يدو اللي كانت على الحديد)تحمل الليلة هادي برك خويا لعزيز مبقاش بزاف ويتصلح كلشي
ماهر:ان شاء الله مرسي مازن والله معرف كيفاه نشكرك
مازن:مبيناتناش وشبييك هداا؟؟...كي انا خوك منكونش معاك ونعاونك شكون يوقف معاك؟
ماهر:ههه مالقري جدي فرقنا من صغرنا كيف بعثك تقرى مي كي رجعت حنا متبدلناش على بعض
مازن:بيسك حنا من دم واحد ومعندناش غير بعضانا ولاد عيلة عمراني ديما ثابتين وواقفين بيسك رايحين يبقاو ديما ورا بعضاهم
ماهر:ايييهييييه البهلول ظهر يعرف يهدر شوي ونقول بدلووك
مازن:هههههه بااينة نعرف نهدر وشنو فالوقت الصح ههههه
دخل عليهم الحارس:مسيو مازن فتشنا الأومورات اللي جبتهم وجبناهم هام ليك
مازن حكم عليه كابة صغيرة وخلا الحارس يفتح الباب باه يمدها لماهر
الحارس فتح الباب وماهر قرب ليه يشد الكابة على مازن مي مازن جبدو ليه وحظنو بقوة:خليك خويا لكبير الواثق من روحو ديما وأرجع باه تبقى تنصح فيا وتوجهني أنا وبنتك
ماهر جبد خوه ليه بسيف حاكم الدمعة يضرب على كتافو:رايح نرجع متخاااافش
عطالو الكابة وودعو وخرج هو والحارس خلاوه يلبس وياكل وش جابلو مازن
مازن كي خرج من الزنزانة شاف محامي جان خارج ويحكي فالتلفون
مازن:مش على اساس موكلو خرج وش راه يدير هنا؟؟
نرجعو عند جان اللي كي خرج الصباح من الدار ديراكت عيطولو
جان:اييه؟
...:مسيو جان كيما وصيتني القائد تاع مازن عاونو وخلا المحاكمة تصرا غدوة اتحرك ولم شغالك
جان:اوك مرسي
كوبا عليه ركب لوطو حط الاوربودس وديمارا يستناه يرفد عليه شوي وهز
....:صباح الخير باترون
جان:صباح النور..وجدت وش قتلك؟
....:ايه كلشي واجد فوت عليا اديهم
جان:عندي شغل ضك نفريه ونجيك منا على ساعة هكاك
....:اوك نستنا فيك سيادة الهاكر
جان:ههه صحا شرييك
شوي ووقف قدام شركة نزل ودخل للاستقبال
جان:ديزولي معليش نعرف وين جا البيرو تاع المدير هنا؟
السريكيتار من بحة صوتو هزت راسها من البيسي بخطفة قابلها بزينو ورجولتو شوي وتغاشات لمت روحها بسيف تتبسملو:وي مسيو مرحبا بيك..معليش نعرف اذا عندك موعد معاه؟
جان:صراحة لاا مي تقدري تعطيلو وقوليلي جان كامل شريك في شركة M I L M حاب يشوفك وراني سير يقولك ابعثيه
السيكريتار:اوك مش خصارة نسيي
تبسم على جنب وبقا واقف يستناها تحكي معاه
سيكريتار:وي مسيو صباح الخير..كاين واحد اسمو جان كامل شريك في شركة M I L M حاب يشوفك
المدير عقد حواجبو ونطق:صحا خليه يدخل
سيكريتار:اوك مسيو
دارت لجان:مسيو جاان قالك تفضل تحكم السونسور اللي لهيه وتطلع للايطاج الثاني المكتب ال3من الرواق الثاني
جان:مرسي,جاا رايح رجع على صوتها
سيكريتار:بلا مزية مسيو جان..اسمك شباب
جان:هههه مرسي مدموزال راح وخلاها غارقة فيه
في روسطورون شيك وشابة قاعدين كامل ويتغداو بعدما فوتو نص نهارهم فالجاردان مخليين لينار تلعب ووايلين معاها وهوما يتفرجو فيهم
كانو يتغداو حتى وقف ليهم سارفور
سارفور:معليش نعرف وش تطلبو للتحلية
سمير:ايه وش تحبو لولاد
عصماء:انا منحبش حلاوات الغدا يكفي
سيليا:انا جيبلي لاكريم بذوق الفانيليا
ايلين:مام انا جيبلي مي بذوق الفراز..ونتي اميرتي؟
لينار:انا نحب بالشوكولا
ايلين تبسمت تشوف فيها وغارقة فعينيها اللي يفكروها بعينين محبوبها وعشيق قلبها لينار فيها شوية من طباعو فالنهار اللي فات وليوم بينتلها شحال راهي متعلقة بيه وتحبو وشحال ماهر دار واجبو كأب بالمليييح ههه وضك هاهي كيفو تعشق لاكريم بالشوكولا سبحان الله شحال تمنات وهي فكرشها يكبرو مع بعض وميتفرقوش كامل ويصبحو كل يوم نفس طاولة لفطور مي القدر عندو رأي آخر
قاعد فبيروه حتى يدخل عليه مساعدو وذراعو ليمين
....:بووووص بنت ماهر رجعت لأمها
البوص كان قاعد وقف مخلوع يضرب على البيرو:كيييييييفاااااه؟؟؟؟
....:بوص لبارح هزو ماهر وليوم الرجال اللي حاطهم على ايلين شافوها مع بنتها وناس ثانيين
البوص جاب الورق اللي كانو على بيروه للأرض كااامل يعيط:دبرليييي طرييييقة نحكي فيهاا مع مااااهر ..أزررررررب..