كَيْف يَا دَهْر
تَنطَفِئ بَيْن كفَّيْك الأماني وتخْمد الأحْلام ؟
كَيْف تَذوِي اَلقُلوب وَهِي ضِيَاء
ويعيش الظَّلَام وَهُو ظَلَام ؟
الاحـداث المتسلسلـه تـبدأ مـن بـارت 5
البـارتات الاولـى غـير مناسبـه لعـقول الـجميـع ، اقتضى التنبيـه .
اَلحُزن فِي القلْب اِستقَر أَكَان هذَا مَنزِلة ؟ أَمَّا سَاقُه القدر ؟! صَبرَت وماذَا جنيْتُ مِن الصَّبْر أبيْتُ اَلخُضوع لِلْحزْن وللضَّجر ؟
وَدعَت اَلقرِيب وَفِي لَيلَة تَجلَّى فِيهَا القهْر ظَهْر فلَا نَجَاة ولَا مفر !!
بَقيَت ثَابِت عزيز النَّفْس وأن عِشْتُ فِي اَلجحِيم ، أَودَع اَلحبِيب ويكرَّمني اَلرَّب اَلكرِيم ولَا اِخْضع لِلتَّقْييم سرتْ لِلْأمَام ولَا أُجَادِل اَلسقِيم ولَا اِلتفَت لِلْجرْح اَلقدِيم ، فـَ أنَا الكمَال لََا يَضرنِي غِيابك ولَا الهجْران ، بَقائِي أَمْر مهيب و وَداعك أَمْر قريب وأنَّ كُنْت أَنْت اَلحبِيب !
العراق | بغـــــداد
گاعدة على كرسي الدوار ، افر بنفسي وعقلي مدا يهدء من الـ تفكير ، الـ بعمري يفكرن بـ الحب بـ الزواج بـ الدراسة إلا أني أفكر بـ الفلوس شلون اگدر أصير بـ المستوى المادي الـ أحلم بي ؟ شلون اگدر أطور شغلي أكثر ؟!
عدلت گعدتـي ، ناديت الـ مُساعدة سلسبيل
- نعم ست
- جيبيلي چاي رأسي ياذيني ولا تخلين هواي شكر وإذا أكو قهوة بعد أحسن .
- حاضر
خمس دقايق واجت شايله الكوب خلته على الميز وطلعت ، مَسكتـه اشرب وبالي مشغول ما يَصفى الـ تفكير دايهلكني گمت من الكرسي افتر رايحه جايه لحد ماخلص الـ چاي ، صوت الاشعارات مستمره سويته صامت وخليته بجيبي على مزاجي ارد عليهم .
رفعت نظري على الـ ساعة بـ 12 الـ ظهر فتحت الباب طلعت افتر بـ ممرات المركز ، اتجهت لغرفه الميك اب بعدهن العرايس والماكيرات دايشتغلن ، افتر فوك راسهن أرقب بدون ما يحسن لحد ما انتبهت على وحده تاركه العروس وگاعده تتصفح بـ التليفون ، صرخت عليها بـ حديـة
- شنو داتسوين گومي على شغلج ماكو وقت لهاي سوالفچن لاتخلني حتى الـ نت افصله
- ست والله جاي اراسل أختي
- شعليه كملي شغلج ومحد يحجي عليج
الباقيات من سمعن صوتـي صارن يتراكضن بـ الشغل
محد يجر عدل الا بالعين الحمرة ، يعجبوني الولد شغلهم مضبوط
بقيت اتمشى لـ قسم البدكير و المناكير ولقسم المحجبات بس بنات يشتغلن ماكو ولد ، آخر شي قسم الوشوم اكو خاص للبنات واكو ولد ،
دخلت سلمت على شباب بس همه مبردين گلبي يشتغلون بكل ضمير وهدوء كُلشي يكملونـه على الساكت بدون صوت مو مثل الماكيرات شالعات گلبي بـ فهاوتهن
طلبت من الـ شباب ينادون المصور الخاص بـ المركز
وكفت فوك رأس الـ زبونة ، بلشت اشتغل بكل دقة وتركيز ، اهم شي سمعتي وسمعت المركز بـ كُل جهدي وتعبي اشتغل عليها ، فتحت شعري وعدلت قميصي الكاميرا گدامي تصور ، خلصت بعد ما حواجبها صاروا حسب الـ أريده
رفعت رأسي احجي بـ تحذير
- مو تنسى تنشر شغل اليوم ترا قبل لا انام ادخل للحساب واشوف الوضع ، طول ما اشتغل الـ تليفون ما وكف رج مخليته صامت ما اهتميت.
اجت على بالي لالي مختفيه من تقرب الامتحانات تختفي من الوجود بيها حالة نفسيه مال قرايه
طلعت من المركز ، بلغت الحارس يجيب سيارتي من الكراج ، سلمت عليه وصعدت شغلتها ، الـ جو بدأ يصير بارد بداية الـ شتا بس ما أحس ببرودته لابسه قميص نص ردان وشعري طول الوقت ناثرته .
وصلت للجامعة وگفت قريب عليهـا انتظرها تطلع ، دزيتلها رساله ، ردت عشر دقايق أكون يمج
مليت من الگعده فتحت الباب ونزلت من الـ سيارة مخليـه أيدي بـ جيب البنطلون وعيونـي مثبتتها بـ إتجاه واحد رافعة رأسي ، العيون كلها صارت عليه مجموعه ضباط ما ادري شنو عدهم واكفين من جوا الـ جوا يباوعون غير مُزعجين أريد اشوف بحياتي ضابط ما عنده سوالف مُقرفـة ماكو غير القليل .
ما أحس ألا وأحد طبگ گدامي همس
- شلون جسم عارضه أزياء خوما عارضة
باوعت عليه من فوك ليجوا همست بـ استهزاء
- وين الزبالـة جاي عليه
بسرعه حرك سياره وطفر ، فزيت على صوت لالي الـ ضحكه تارسه وجهة من شافتني تقربت حضنتني
- ليش اتصل عليج ما تردين
- مشغولـة بـ المركز ما تشوفين ليش اجيتج گلبي رف عليج
دخلنا للمطعم نَزلوا الأكل تسولف بـ هدوء وفرحـة ما باقيلها غير القليل وتتخرج ، ابتسم لكُل كلمة تگولهـا كُل اليهمني أشوفها مرتاحـة
بـ طريق الرجعة الشارع فارغ زَدت السرعـة وفتحت الجامـة ، لزمت أيدي
- على كيفج يمعودة راح نطير
ضحگت
- شنو تخافين ؟! ، لعبتي الـ سرعـة
- الـ نبي عليج خففي أخاف من سياقتج
خففت الـ سرعـة و ألتفتت إلها
- شوكت تتخرجين حتى اخليج تشتغلين بالمركز وياي شو صارلج هواي تدرسين مو المفروض الـ سنه تتخرجين
- لا الـ صيدلة خمس سنوات بعد وراي سنه يلا اتخرج
- أي صح نسيت السنوات الـ تركتيهن ، ما بقى الج شي دكتورتـي
من تخلي شعرهـا ورا أذنها أعرفها توترت ، حجت بـ تردد
- احچي بس لا تزعلين مني لان وضعج مدا يعجبني وكل ما احجي تسكتيني
ما رديت
- شوكت تغيرين لبسج اخاف عليج الوضع مو شي ، هسه مو اني وياج مو مُحجبة بس لبسي مستور لبسج اوڤر اكو وحده بهالبرد لابسه قميص نص ردن صلوخ لو فستان حاز جسمج حز وبشرط فوگ الـ ركبة
زَفرت النفس بـ قلـة حيلـة
- الله يهدينـي
- أن شاء الله
هالموضوع متعبني وتضغط عليه يخنگ نفسي نَزلت اجيب عصاير الي والها ، دفعت الحساب ورجعت لكيتها داتلعب بـ تليفوني ، رفعت حاجبي وضحكت
- شنو دا تسوين تفتشين وراي
- تليفونج يطلع إتصال أكثر من مرة وهسه من شلته شفت الرقم نفسه متصل عليج 60 مكالمه شنو الـ سالفة أخاف صاير شي !!
سحبته منهـا وفتحته الرقم هواي متصل ومن الـ صبح ولحد هسه مستمر يتصل رجعت سديته وحركت الـ سيارة .
- ليش ما رديتي أخاف صار شي بـ المركز
هزيت راسي بـ نفي
- لا ما أتصل عود من يرجعون يتصلون أرد
بعدني ما مكمله حجايتي رجع رن
تاشرلي ردي
أخذت نفس ورديت كذب أذا اكول ما خفت وقلقت بـ حياتي محد متصل لهدرجه خفت على مركزي ! ماعندي شي غيره أخاف عليه .
اجاني صوت رجال
- السلام عليكم الماكيره زيتونـــة
- نعم تفضل
- محتاجيج بـ شغله شفنا شغلج وعجبنا وكذالك مدح العالم الج .
- اوك
ضحك بـ صوت
- نروح نلتقي مطعم علمود نتفق على الـ شغل والمبلغ ، شغلج مضبوط
- عندي مركز وتكدر تتفضل ما أطلع ولا اتفق بـ اي شي يخص العمل خـارج مركزي
- المطعم وكُلشي على حسابي
- عزيزي كلامك غير مقبول شنو اشتغل عندك اني !!
- هسه أي مطعم تحبين نتفق وبعرض خيالي
رديت بـ نرفزة وعَلت نبرة صوتـي
- ماعندي وقت أذا عندك شي المركز موجود مع الـ سلامة
غلقت المُكالمة وحتى ما انتظرت رده
- عجيب اول مره يجيني هيج طلب شنو هالجرائه
انداريت على لالي تباوع بـ وجهي بـ قلق
- شكو صاير شي ترا قلقت ردج اله محلو ابدد
- يريد نتفق على شغل بـ مطعم هاي سوالف الـ زلم ما تخلص
- صوجچ كم مره اگلج طگه العلج مالتج عوفيها ، لبسج غيري استري نفسج يا مراه حرام ونبي حرام
- اهوووو لالـــي كافي
وصلتها البيتها ورجعت متنرفزة واعصابي تلفانـة ،
دخلت الـ شقتي الفارغة مابيها غيري الـ مُرعبه من كمية الوحشة والهدوء
فتحت باب البلكونه صافنـة على المجمع كُل يوم نفس الأفكار تأكل بيه تدريجياً
بنيت نفسي بنفسي ضحيت بكُلشي أحبه يلا كدرت اوصل للعندي اليوم ، خسرت هواي بنيه بعمري تملك كل هالاملاك شي صعب و ملفت للانتباه ومثير للشكوك !!
سديت باب البلكونه مبتسمة ، لالي وجودها نعمة بـ حياتي بفضل الله وفضلها گدرت أكون أفضل
بنت عمتي الوحيده الـ أثق بيها ، عكس أمها الـ تكرهني تموت مني عدها استعداد اتشوف ملك الموت وما تشوفني
أتجهت لغرفتي سحبت الـ چداحه من الميز ، تلفوني يتصل كاميرا لالــي
ورثت الـ چكارة ورديت خليت الكاميرا من ناحية الـ سرير
- اگلج ، سكتت وصرخت
- ليش ما تطلعين وجهچ هااا هاااا رجعنا لسوالف قبل
تأفأفت و وجهت الكاميرا عليه ، كل نفس من الـ چكاره يحرك كل ذره نفس بـ صدري
- شنو تريدين لالي
- أريد تعوفين هاي سوالفج والله دا اموت وأشوفج هيج
- ماشي
- أستغفرررر اللـه
طفيت الكامره وحجيت
- لالــي روحي اريد انام تعبانة ، أمشي على قرايتج
- ماشي الله يهديج
سديته منها وشمرت روحي على الـ سرير مديت أيدي سحبت الجرار أخذت حبوب الكأبه جابرة نفسي على الـ نوم
فزيت بـ الـ 2 بـ اليل على صوت التليفون رقم يتصل من الـ تعب نسيت أطفي الـ شبكه ، غلقتـه ورجعت كملت نومتي
ما گعدت إلا على صوت أذان الـ ظهر كمزت من مكاني ركض أول مرة اتأخر وراي كومه شغل خاصه الـ جمعه و الخميس العرايس بشكل فضيع يلزمن سره لدرجه مرات اكعد اشتغل ويه الماكيرات علمود نخلص
دخلت للحمام سبحت وجففت شعري رفعتـه بـ كيتر مالي خلك اسشور فتحت الـ ثلاجه وطلعت جبن خليته على توست واكلته واني امشي ، أول ما وصلت شفت ازدحام العرايس وما ينرفزني غير اليجن ويه العروس كل وحده لسانها شطولة
خليت تلفون بجيب البنطلون وكفت اشتغل ويه البنات ، يهتز ضوجني بدون ما أشوف منو المتصل انطيته السلسبيل تخلي بـ جنطتي
اجتني مريه خبصتني فوگ رأسي
- كملـي جنتي أريد اطلع تأخرنا ورانا طريق مُحافظات
خليت أيدي على خصري ملتفتـه إلها
- يلا جيبيها خلِ اشتغل الها اني حجية الماكيرات ما يلحگن
خَلت الـ جو متوتر من ورا ملحتها وحجيها ، مدنگه أحضر الغراض الاريدهن اجت وحده گعدت على كرسي نداريت وانصدمت طفله گاعده على كرسي والمراه الخبصتني واكفه فوگ رأسها تخزر
- عفواً عيوني نادي العروس خل اكملها
لزمتها من كتفها بـ قوة لـ درجـة الطفلة اتأذت وتأشر بـ أيدها الثانية
- هاي العروس شبيج ما تشوفين
فتحت عيوني على وسعهن
- حجية تررا طفله شبيكم ما عدكم مي أكل مزوجينها شگد عمرها هسه يطلع 11 لو 10 ؟!!
- مو وقت نصايحج العريس منتظرها ، مو كُل الناس مرتاحـة مثلج
هزيت ايدي معاجبني الوضع وبلشت بيها كل ما اخلي لون الها اتكطع تكطع دموعها ويه كل لون اخلي لوجهه ، كسرتني ورجعتني سنين أخاف افكر بيها عفت كُلشي من أيدي واشرت لغير وحده تجي تكمل شغل بمكاني
اخذت جنطتي وصعدت بـ المصعد توترت والموضوع هزني واذاني شلون هيج ما يخافون من الله شوكت تختفي هاالنماذج
طلعت الـ چكاير وناديت سلسبيل تجيب الي چداحه
بس جابتها ورثتها ، ساعة كاملة بس صافنة خَلصت نص باكيت بدون ما احس على نفسي ، طفيت الـ جكاره وگمت أريد اشوف شكلها من راح تندثر برأئتها
وكفت قريب عليهن وكل شويه عيني تروح الها ،
طفله بريئه وجهة وجه طفلة جسدها جسد طفله اي معالم للانوثة ماكو شنو شافوا حتى يشوفوها مناسبه للزواج ؟! معقوله بشر وعدهم عقل ،
هاي لازم انغث كل أسبوع تجيني حالات أتعس منها
ظليت افتر على البنات واتأكد من شغلهن والولد خطية يركضون ركض علمود بس يلحكون يكملون
ساعه تقريباً واسمع المراه تحجي بـ علو صوتهـا اجه عريسج راعي بيتج تاج رأسنا يلا كومي تحظري راح ناخذج زفه من الـ صالون ، زفـة رنانة تحلم بيها كُل بايرة
خليت ايدي بـ جيوبي وطلعت برا أريد اشوفه هالعريس البدون عقل شلونه ؟
شويه واجت سيارة الـ زفه نزل منها واحد كبير بالعمر وكرشه كدامه ولابس دشداشه وعبايه من لهجتة مبين مُحافظات جنوبية ، يجوز علمود الـ طريق اجوي أخذوها زفة من الصالون
متت من الـ قهر وعيونـي تشوف هالطفله ويه هالشايب حتى يجوز يطلع أكبر من ابوها !! شنو زلم عدهم أهم شي شهواتهم أهم شي يمتعون نفسهم هاي اذا ما تطلع زوجه رابعة
دخلت والموقف بقى بـ بالي حاله حال كل موقف أخذ من حيلي ، رجعت صعدت لغرفتي أدور على تلفوني أريد احجي ويه كم واحد يطلبوني ويريدون دينهم
أول ما فتحت التليفون ونفس الرقم الـ أتصل البارحه هم متصل على كل البرامج وكُلش هواي ، المشكلة رقمي الخاص ما انطي لـ أي شخص فقط معارفي
اما الشغل ف أكو رقم خاص بالمركز والـ شباب بالاستعلامات مسؤولين عليه شلون كدروا يحصلون رقمي الخاص !
مستمر يتصل رديت
- ست زيتونـــة راح نجيج للمركز موجوده
- نعم
- بس فرغيلنا المكان نحجي وياج بشكل خاص
- عزيزي كافي ملحه اني موجوده تجي اهلا وسهلاً ما تجي بعد احسن لا تظل تتشرط وتتصل .
- اعصابج زيتونــة اعصابج التريدي يصير
غلقتـه بوجهة اتخبل من هيج نماذج ، اتصفح بصفحه المركز أشوف نشرهم شلونه والـ تفاعل هم شلونه كُلها دا تمدح بشغلنا الحمد لله
نص ساعه واندگ الباب صحت
- تفضل
دخل واحد عضلاته نافخ نفسه مظهره يلعب النفس من الضخامه أحسه شويه ويطگ دنك يلا كدر يفوت نخلة مو رجال اثنين حماية وكفوا بالباب
گمت على حيلي صرخت بـ حديـة
- هاي شكو منو سمح الكم ؟؟
سد الباب وأشر للحمايه يوكفون برا
- شنو هالمهزلة هاي !! ممنوع ينسد الباب يلا افتحه وممنوع أشخاص يشلون سلاح يدخلون للمركز
- ست زيتونه خلِ نتفاهم العرض أكيد يعجبج
- احجي شعندك ألك عشر دقايق دوختني بـ ملحتك
ضحك بصوت
- يعني مكذبوا من كالوا وكحة وصلفة وتعادل عشر زلم
رفعت حاجبي
- نعتذر عيني ست زيتونــة
- بقت ألك خمس دقايق
كعدت على كرسي وخليت رجل على رجل
گعد مُقابيلي
- تجين تشتغلين لـ بناتنا بـ البيت كُل أسبوع بمبلغ انتِ تحددي ، بس بشرط تجين وحدج مو اليشتغلن عندج
- أعتذر ما اشتغل هاي الـ سنة
- المبلغ انتِ تحددي ما نكدر نَثق بوحده غيرج محتاجين وحده مثلج قوية وگلبها قوي وانتِ افهمي المقصود
أبتسمت بـ استهزاء
- ليش شنو رايحه احارب شنو سالفتك انتَ !
_بس وافقي و شوفي بعينج وعيونج المبلغ انتِ تحددي وين أكو أحسن من هالعرض
- المنطقة وين
- ******
فتحت عيوني على وسعهن
- ما أدخل هالمنطقه مو عوزني مشاكل
- لا تخافين مأمنين الوضع الج
- يومين وارجعلك خبر تفضل هسه اطلع برا وهاي دخوليتك بعد لا تسويها وحمايتك ممنوع يدخلون
- بس وافقي وكُلشي تريدي يصير
طلع وسد الباب ورا ، أخذت نفس مترددة من كلامـه العرض مغري و خاصه حالياً محتاجته حتى أكبر مشروعي بس هاي المنطقه ما ادخلها ، يومين بس أفكر بدون ما اگول لـ أي شخص ولا أخذت رأي أحد
واخذت قراري أوفق المهم أخذ فلوس شعليه بيهم أهم شي مصلحتي !!
طلعت الرقم واتصلت عليه بسرعه جاوبني
- أهلاً ست زيتونــة
- هلا يلا موافقه بس مثل ماگلت المبلغ أني احدده بكيفي
- اليوم ب الـ 10 بالليل اجي اخذج
- تنفذون شروطي وعلى مزاجي محد بيكم يتحكم بيه
- من عيوني بس ترا مو بسيارتج تجين أني عود ادزلج جماعتي
- ليش ؟
- أفضل
- دزلي العنوان واني اجي
- ست بس ما نگدر من ضمن الأوامر احنا نوصلج واحنا نرجعج
- أشوف وين توصل وياكم
خلص وقت الـ دوام وبدوا يطلعون بس اني بقيت بالمركز وسلسبيل بقت تنظف و الاستعلامات دا يريدون يطلعون وكفت يمهم
- مو تنسون شباب اريد تتصلون ب الاعلاميه ***
تجي تسوي إعلان للمركز
- منو يگول تقبل
- يمعود من يشوفن تسوون الها اكرلك بـ بلاش وليزر بـ بلاش وجلسه تنظيف تجيكم ركض وتگعد تمدح بيكم وليش ما تقبل لعد شكو مخليه رقمها بالبايو
- خلِ أكتب شنو گلتي نسوي الها
- أكتب يلا اكرلك وتنظيف بشرة وليزر ازالة شعر شوفها شتريد سووا الها وعود من أرجع هم ادخل لحسابها اشوف شنو نشرت
- حاضر ست هسه اتصل عليها
- تمام
باوعت على نفسي بالمرايا المحاوطه الجدران داير مدايرها قميص أسود نص ردن وبنطلون گابوي شعري بُني ناثرته مكياج ما أحبه رغم اني ماكيره مخليه بس تنت من الملل
صارت ب الـ 10 ضبط صوت هورن وتليفوني يرن بسرعه طلعت ، سيارة سوده مُضللة فاتحين الباب الخلفي أثنين كاعدين بالصدر الورا فارغ .
نداريت على الحارس
- عمو عيوني اتفضل مفتاح سيارتي وديها لـ كراج العمارة الساكنة بيها
- حاضر ست
صعدت بـ الـ سيارة بكامل إرادتي بدون أي ضغط ما جنت أعرف شنو راح يصير ! ولا جنت أعرف شنو راح أشوف ، كُل بشر يغلط وهاي جانت غلطتي !!
يتبــــــــع ..