عصماء:نشوف فيك وليت متحشمش هاد ليامات..مرتك ضك تلقاها خامرة بالنوم ولا راهي تتفرج فكاش مسلسل منها من بنات جيلها
جان:هههه متدريش معرف
عصماء:علاه ني حاستك ضايع وتاعب؟
جان تنهد وشاف فيها:بيسك راني صح ضايع وتاعب ايما..مبقيتش جان اللي حتى وقت تعبو ميبينش تهديت من ضربتو..با..با كيفاه انا عشت الشي كاامل اللي فات نقنع روحي انو مكانش ولازم نوقف على روحي..يجي بعد السنين هادي كامل ويظهر قدامي..عادي بالعكس فرحت..مي علاه محبش يحكي عقلي رايح يهبل من التخمام كيفاه قنعنا بموتو وراح وخلانا علاه جامي خمم يحوس علينا قالك لعبة ما لعبة يعني مقدرش يتعب روحو برك شوي وكان لقانا اما هو نن راح وخلانا هرب بعيد وقت اللي حس روحو تعب ومهوش قادر لوش جاي..وشكون اللي خسر :انا ..انا ونتي..انا خسرت طفولتي وحياتي ونتي خسرتي شبابك وصغرك وربيتي ولدك وحدك وتحملتي هدرة الناس وقت اللي هو كان مريح بالو فالغربة..منيش قادر نقنع روحي بانو بريء برك خليه يحكلي علاه وكيفاه هدا مكان مطلبت والو علاه مخليين عقلي هابل بالتخمام
عصماء دموعها ويدان كل وش قال ولدها صحيح وبزاف عليه تشوفو هكا زيرت على يدو ووقفتو تمسح فدموعها :نوض وليدي نوض..هيا ضك يقولنا كلش.كيفاه,علاه,وين,كلشيي هيا معايا
وصل للدار مع الليل طلع لقا سليمة كي العادة فالصالة مجمعين غير شافت عينيه حمورة والمشية بسيف يمشيها وقفت ليه
سليمة:مااازن..وليدي شبيك؟؟
ماهر كان ساهي دار على عياطها قابلو خوه وحالتو وقف يجري ليه :وشبيك مازن وش صرا؟؟
مازن بصوت بارد وهادي:والو ..ني طالع لبيتي
جا ماشي حكمو ماهر من كتفو عيط عيطة وحدة من الوجيعة اللي حكمتو
مازن:اااااييي
ماهر جبد يدو بنطرة مخلوع من عيطة خوه وهز على تريكوه شوي شاف لي سيكاتريس :ماازن وش هدا(حكا غير بينو وبين مازن)
مازن جبد روحو:واااالووو الرب وااالو وشبيكم متفهمووووش
ماهر عرفو مكلوب دار للجماعة اللي غير تتفرج ومصدومة:خلاص اتهدنو مكاين والو انا ضك نشوفو
سليمة:وليدي اتهلا فخوك
نسيمة:مازن وليدي...
لينار غير تشوف فمازن ودموعها محصورين عمها وصاحبها وخوها وقدوتها مهدود هكا جامي شافتو ديراكت بداو دموعها يسيلو يعبرو على وجيعتها تولهت ليها الخدامة فاطمة اللي كانت جابت لسليمة الما وبقات تتفرج تلاحت ليها
فاطمة:اشش لينار بنتي عمك مبيه والو خلاص بلا دموع
ترمات فحضنها تشهق
لينار:شبييه عميمو مش مالف هكا..علاه يبكي؟
فاطمة:مكانش يبكي يا روحي راهو غير غلبان
لينار:مكانش منها عينيه حومر تاع بكا هدا مش عمي برك نعرفو مليح وبجميع حالاتو صرالو شي قلقو متأكدة
نسيمة قربت ليها:فاطمة جيبي ليما دواها شوفيها داخت وانا نشوف لينار
سليمة كانت قاعدة وحاطة يدها على راسها :اخخ يا ربي هون على هاد الولاد تعاب الدنيا ياااربي
نسيمة:اششت لينار مكاين والو مازن غدوة تلقايه رجع عادي ياك بنتي؟
هزتلها راسها بايه وبقات خانسة ليها تطيح فدميعاتها
طلعو لبيتو ودخلو للدوش فتح الما فالبانو يتعمر ونحالو تريكوه والثاني مسلملو روحو وغير قاعد وساهي
ماهر:وش درت فروحك اولد يما؟
مازن:غلطت وكان لازم نخلص
ماهر تنهد وشاف فيه يعرف خوه كيفاه مخدوم ميتحملش يظلم واحد متأكد صرالو شي كبير ليوم:خلاص هاو الماا واجد ادخل للبانو وقابلني تشوو
مازن:اخرج
ماهر:وراس يما ماني خارج ادخل وبلع
مازن:ماااهر قتلك اخرررررج
شاف فخوه بقلة صبر وخرج للشومبر يستناه يكمل ويحكي معاه زوج كلمات يفهم وش راه صاري
غير خرج عليه قعد فالبانو الما بارد اما مكانش حاس بيه شاف فيديه جسمو سيكاتريس ماليتو تنهد وقت جات صورتها بين عينيه دموعها والخيبة اللي شافها فيهم بدا يخبط فالما
مازن:كيفااه باه تقابلها منا وجاي؟؟....كيفاه بش تعاود تكسب ثقتها يا الحمااار..ناقصة هي؟؟ااه؟نااقصة هي باه تزيد عليها؟؟ناقصة باه تخليها تبكي و تخمم اكثر من الدموع والتخمام اللي هي فيهم؟؟..علاه متحكمتش فروحي علااه (ضربت يدو فحاشية البانو توجع)تستاهل يا مازن هاد الوجيعة..تستااااهل
وقف لبس شورت وححطط منشفة على كتافو وخرج قابلو قاعد على السرير مستنيه
طلع حاجبو فيه:وش تدير هنا؟
ماهر:نستنا فيك..ارواح هنا (يضرب بيدو على بلاصة قدامو على السرير)
قرب ليه وقعد
مازن:خيير وشبيك لصقت فيا؟
ماهر:وش صرالك ليوم؟
مازن شاف للفراغ ونطق بعد زمان:واالو
ماهر:كيفاه والو خارج من الخدمة عشية كاملة مبنتش وقلنا معليش ومبعد ترجع للدار آخر ليل مكلوب وتخليهم كامل يخافو عليك جاتك عادي؟؟.كيفاه والو هادي تاني منيش ليوم وين عرفتك اولد يما انطق وش صرا؟
تنهد من صميم قلبو ونطق
مازن:درت غلطة مع انسان قريب ليا وكان لازم نخلص ..برك
ماهر:انا اكثر واحد رايح يفهم معنى انك تأذي انسان قريب ليك قدامك ومتقدر تديرلو والو مي مش هدا هو الحل هل اللي اذيتو راهو يشوف فيك؟ لالا..هل كي تقابلو رايح تبين ضعفك وندمك؟لالا علابالي بمعنى الشي هدا وراني عايشو من سنين مالا بلاصة متبقى تبكي وتأذي روحك لازم تخدم باه تصلح غلطتك وترجع تقرب لهاد الانسان وتخليه يسامحك
مازن شاف فيه ونظرة الحيرة على وجهو:علاه مراكش تطبق فكلامك وتحاول ترجع مرتك ليك ولبنتها؟
ماهر:مش بيدي انا هاد الشي متمني مي منقدرش..مش اي شي نتمناوه نديوه
مازن:علاه مش بيدك..هادي عايلتك نتا فرقتها ونتا لازم تردها
ماهر وقف:مازن قتلك مش بيدي لازم نبقى هكا بعيد وخلاص...وضك ارقد ريح روحك وغدوة نشالله عندنا الاجتماع اللي سمانة نسناو فيه باه نأكدو شراكتنا وندرسو النقاط اللي لازم نحسنوهم في شراكتنا.. وندرسو ملفات المتدربين اللي قدمو عندنا ونختارو شكون يبقى معانا...يعني لازم تحضرو اوك؟
مازن:اوك
خرج قاصد شومبرة بنتو دخل لقا سليمة على راسها
ماهر:رقدت؟
سليمة:ايه بسيف
ماهر:اوك مرسي يما
سليمة:بلا مزيتي..قولي خوك وش حوالو وعلاه صرالو هكا؟
ماهر:ااا شي يما الزينة آفار عادية يامات ويرجع نورمال
سليمة:نتوما أدرى ببعضاكم نوصيكم برك تكونو سند لبعضاكم وليدي وتسند خوك وتنصحو وقت خيبتو وضعفو
ماهر:مهنية يا الحنينة يخليك ربي لينا برك هدا ما نطلبو
فالسبيطار رايحة جاية قدام غرفة الفحص الطبيب عندو ساعة لداخل ومزال مخرج وش راه يدير واحد لا عارف ...شوي ودارت لقاتو جاي يجري
جانير:يماااا..نووور
نور:جاانير (حضنو بعضاهم وقعدو)
نور تبكي:منيش قادرة يروح..صح مش مداير واجبوا ما مش وقتوو .مش وقتوو
جانير:مش بش يروح بالساهل متأكد اما يمكن بدا يخلص ثمن أغلاطو اللي دارها من قبل
ملاك:لولاد الطبيب خرج
جرات ليه نور:دكتور ممكن تفهمنا وش صرا؟
دكتور:هاد الشي طبيعي آنسة
نور::انعم كيفاش طبيعي هادي تاني انطق وشبيه؟
جانير:كالم توا نور.. دكتور فهمناا
دكتور:الشراب أثر على الكبد واضطرينا نستأصلو جزء منها هاد الشي بيسك عندو عمر وهو يشرب ويتعاطى يعني لو يبقى يشرب رايحين تخسروه هادي هي
صدمة وقليلة عمرهم كامل عايشين معاه معلابالهمش بلي يشرب
نوروقفت مسمرة والصدمة مرسومة على وجهها:كيفاه هادي تاني يشرب؟منين وكيفاه؟وعلاه؟اصلا كيفاه جامي شفناه؟
شافت فملاك اللي مش مصدومة يعني عارفة من قبل قربت تخبط على صدرها:ياااك هكااا ماما هكااا يشرب قدامك ومخليتو ..بااعث ولدو للغربة والريسك والشقا يخدم ويجيبلو مصروف باه يشري شراب ونتي ساكتتلو..هااين عليك ولدك ومخليتو يصرف على باباه باه يشرب ياااك؟؟
جانير صح كان مدمر من داخل وكلام ختو صحيح انو يشوف روحو آلة صرافة يستعمل فيه باباه باه يشري الشراب شي يغيض مي ختو اولى عندو قرب بعدها على يماه ومشا مخرجها
قاعدة على الكرسي وقرعة ما فيدها شعرها الشهب طايح عليها وهو بحداها غير يشوف زمان تنهد ونطق
جانير:علاه دايرة فروحك هكا من بكري علابالنا بيه ميسواش ونظن انا ونتي علابالنا بلي هو دار شي أكبر من قبل ياك؟الشي اللي دارو من قبل ميتغفرش يعني الشراب راهي تهمة قليلة فحق مجرم كيفو
نور:مي علاااه؟علاه ربي عطانا هكا عيلة؟ راني خايفة يجي نهار ويديرلنا نفس الشي نتا باعك صايي ني خايفة يديرهالي
جانير:آمبووسيبل نخليه يديرها نور هي مكان عندها حد اما نتي عندك انا,انا معاك للخر يا نور راني ببلاصتي فالدولة ومنا وجاي رايح غير نطلع فالقراد ويصير عندي بلاصة اكبر ومعارف يا روحي محال نخليه يغلط معاك
نور:اما وش ذنبها علاه كي عادت وحدها خلاها كانت حاسبتو باباها ياا زح
قاطعتهم كي عيطت
ملاك:نوور ,جاانيير راه فاق ارواحو شوفوه
مسحت دمعتها ووقفت
نور:من ليوم رايي اللي بش يمشي تبسمتلو تبسيمة باردة وتخطات ملاك وفاتت
وقفو عليه فالبيت الآلات دايرين بيه وقفت مقابلتو مربعة يديها
مجيد :خير متحزمة تقول باه تضربيني
نور:يارييت كان الضرب حل أما لا مهوش حل كيما نتا حاسبو
مجيد:وش قصدك يا لالة متنسايش انا شكون.راني باااباااك فااهمة؟بابااااك
نور:ههه وااو روعة أروع أب براافو عليك ..الاب اللي يشرب على حساب خدمة وليدو يبيعو للغربة والريسك باه يبلع الرهج والسم هدا هو الأب ياااك؟..الأب اللي باع بنت مرتو بيسك هي يتيمة وما ليها حد هادي هي الأبوة عندك صح؟؟
ملاك:نوور باباك هدا
نور:لا ميشرفنيش يكون بابا والهدرة اللي راني نهدر فيها كان لازم عليك نتي تقوليها مش انا
مجيد:نوور نوض ليك نكسرك
جانير تفرج فالفيلم مخلي ختو تفرغ قلبها غير نطق مجيد وقف ليه:رد بالك يا سي بابا..قلتها ونعاودها نور خط أحمر تخمم تقربلها ولا تضرها نهزها ونمشي ووالله معاد تشوفنا حتى فالمنام جرب زهرك
مجيد:آآآه على آخر عمري ولاو ولادي واقفين ويتهدو عليا
نور:منتهد ما نندب ..كلمة وحدة نقولها من ليوم انا نتولى مصروف البيت الشي اللي يمدو جانير والشي اللي نساهم بيه انا هو اللي يتصرف على حسابي انا يعني اي شي يخصكم نجيبو تحبو شي تطلبوه مني هكا نشوفو منين باش تشري الشراب
جانير:وانا مع نور اللي عندو اعتراض يتفضل(وخزر فيهم شوفتو الواعرة تاع اللي ينطق يحصل)
نور:معندهمش وصلني للدار عيشك عندي غدوة تقديم فشركة ولازم نوجد أوموراتي
ملاك:وانا نبقى معا باباكم هنا الطبيب قال لازم على الأقل 3أيام
جانير:خلاص ضك نتولى امور الخلاص
خرجو خلص جانير وركبت هي معاه فطاكسي ومشاو للدار
تجمعو كامل فالصالون بعدما طلعت عصماء هبطتهم
عصماء:شوفو ليوم لازم نهدرو هدرة كان لازم منها لبارح
سمير:ايه عندك حق لازم نهدر كلشي ليوم ..علاه وكيفاه خليتكم وشكون من مصلحتو يفرقنا كلشي رايح يبان بلي دي طاي
جان:تفضل سمعنا
تنهد من صميم قلبو ونطق
الحكاية#
في يوم من السنين الي فاتو قبل حوالي 27سنة سمير كان مزالو صغير وشاب وقتها كان بلا خدمة وكان كيما اي شاب من جيلو طايش ويحب يصرف مي معندوش يعني دورها للطريق الغالطة باه يدي مصروفو كان ديما يلعب افلامو ويفوتهم عادي مي مرة حتاج صوارد وهو في رهان قرب ليه واحد حاط الحطة وعادل روحو باينة فيه من الطبقة البورجوازية شاف فسمير وقالو معليش انا نسلفلك وبعدها ردلي دراهمي سمير قبل وقالو اوكي حسبها ساهلة دونك هداك السيد خلصلو وخرجو معاه
....:بون شوف انا ضك خلصتلك وبه تردلي نورمال مي نتا مزلت تحتاج يسما وش رايك تخدم معايا وتولي عندك اعتبارك ومالك وحدك
سمير:وشمن خدمة هادي؟؟
....:خدمتنا خدمة نتا برك قول قابل وانا نعطيك التفاصيل كاامل
سمير بالطيش ديراكت قالو :أوك قابل
وكيما كان الحال سمير خدم مع البوص عامين شحال من عملية تهريب دارها معاه وشحال من ناس تسرقو أملاكهم قدام عينيهم بسبتو
حتى الوقت اللي فاتو عامين وهو وسط داك الظلام دخل نور الشمس لحياتو عصماء ..عصماء دخلت لحياتي وطيحتني فحبها كانت بريئة وطيبة بزاااف وقتها انا بلاما نخمم حطيت عليها العين وديت والديا لدارها نخطب والديها قبلو بيسك يعرفو والديا ناس ملاح بشوي بشوي بديت نفطن بلي لازم نبني عايلة صحيحة مدام ربي عطاني مراا صالحة لازم نصلح روحي ونبني روحي بالحلال فقت بلي كنت غارق فالحرام والظلاام ولازم نخرج وقتها رحت للبوص وقتلو حاب نخرج من هاد الدومان وقتها قالي اوك مي لازم ندفع غرامة قسيها ملايييين قتلو فالاحلام وتمردت وخرجت بقا ورايا وكل مرة يبعث رجالو ليا مي والو انا كنت مستهزء بقدرتو وقتها فاتو شهور وتزوجت بعصماء لهنا الحالة بدات تتزير ورجع يهددني بيها وبلي يقتلها لو منديرش وش يقولي ونرجعلو هنا انا بديت نخطط باه نطيحو وبقيت عام نخطط العام هدا جان نتا كنت رايح تجي للدنيا سمعت بلي كاين عملية كبيرة رايح يديرها وتسوى ملاييير وقررت نخربها وكيما كان الحال قضيت صوالحي ووجدت أوموري باه نفسدلو المهمة ونجحت وخربتها عليه مي اللي مدرتلوش حساب هو رجالو اللي كانو عاسين حسبت روحي نلت منهم كامل مي غدرني واحد وجا ورايا وفيق بيا البوص هبل وجنونو حضرو وخلاهم يهزوني ويعذبوني بزاف حتى نهار جاوني وفيدهم كارطونة فيها لبسة عصماء ولبسة بيبي صغير وقالي مرتك وولدك ماتو وعلى يدينا وضك قرر يا ترجع لينا يا نقتلوك وقتها تدمرت ومت وحييت كيفاه ولدي اللي مزال ما شفتو ,ولدي اللي كنت متحمس نشوفو ونحسبلو بالنهار والليل يجي لحياتي مات بسبة غبائي وطيشي فصغري..مات وخذا معاه أمو حبيبتي اللي خرجتني من ظلامي وبدلتني تشوكيت صح ودخلت فصدمة بقيت رافض ومحجوز نتعذب عندهم بسبب رفضي حتى نهار اللي هجمت البوليس على البلاصة وخرجوني حوست عليكم وملقيتكمش يعني محاو أثركم ونورمالمون بدلتي لقبك ل:كامل هنا رجعت لوالديا اللي سمعو بموتكم على أساس آكسيدون وانا رحت نداوي برا .وكي رحت عندهم بابا قالي لازم تخطب بنت صاحبي سينو تنسا بلي عندك باباك هو كان هدفو ينيسيني الغبن وبعدي عليكم مي كان غالط تزوجت ببنت صحب بابا وكانت بنت طيبة وحنينة بزااااف وجامي حاسبتني على تصرفاتي معاها ولا على اي شي هنا انا كي شفت بلي راني ظالمها هزيت روحي وسافرت لايطاليا وبديت نتبع فأثرو حالف ندي انتقامي ونحاسبو وبعد سنين وسنييين وصلت لولدو وقتها تعرفت على سيليا وايلين .........(حكالهوم وش صرا كي تلاقا سيليا وزيماه دخل مارك للحبس كنا من قبل هدرنا عليها لحكاية هادي)
سمير:دخلت مارك للحبس بيسك باباه كان مخفي آثارو ومخلي ولدو زعما يخلفوا ما الحقيقة انو البوص اللي كنت انا معاه مات وخلفو خوه اللي ربا مارك لما تيتم (هز راسو فيهم لقاهم شاهقين بالبكا كاامل )ايلين تبكي بيسك تأثرت بحكاية أنو بعد مرتو وولدو كيما صرالها هي وفي لحظة تفكرت ماهر وخممت بلي زعما مام هو عاش هاد الاحساس؟مي سكتت روحها بأنو هو محيسش ولو تهمو هي وبنتهم مخلاهمش يقيسوها
سيليا تبكي بيسك عرفت بلي سمير سوفرا باه لحق للنهار هداك وضك هي الوحيدة اللي علابالها بلي الخطر رجع لحياتهم ولازم تمنعو يعرف بلي سمير سباب دخولو الحبس وخراب أعمالو حي وفوقها رجع لعايلتو .
عصماء تبكي بيسك حست روحها خسرت عوام حياتها كااامل في الباطل كانت عايشة عذاب وهمي بسبة هبال ناس معندهمش ضمير شافت فجان ساكت شارد برك الدمعة حاصلة فعينو مي مش حاب يهبطها تنهدت من قلبها تعرف طبيعة ولدها جامي يبين ضعفو للناس حتى عايلتو جبدتو لحضنها باست راسو
عصماء:جاان وليدي cv؟
جان:ايه يما لباس.....ميي..اللي مفهمتوش انا ونتي كيفا منعنا
سمير هز راسو ونطق:ايه يا عصماء احكيلي وش صرا فيكم وكيفاه لحقو ليكم
لهنا عصماء شافت في ايلين تنهدت وتبسمت:الفضل كلو يرجع لجليل
ايلين هزت راسها بنطرة:كيفاااااه؟باااابااا؟؟؟
عصماء:ايه يا بنتي باباك
ايلين:مي كيفاه بابا وش دخلو ومنين عرف؟؟؟
عصماء:باباك لحق عليهم هاجمين للدار وقت خطفو سمير سمانة وهو عندهم,فذيك السمانة انا ولدت بجان اللي تزاد بعيد على باباه وكي رجعت للدار امك ختي الغالية وصاحبتي بقات معايا بيسك نفسيتي تهدت شي من النفاس وشي من غيبة سمير وخوفي عليه ومام هي كانت كي غير ولدتك كنتي بعمر 4شهور فالقماطة صغرونتي مي هكاك ولتات بيا بيسك شافتني تاعبة ومهدودة صح وباباك تاني كان يتفقدنا من وقت لوقت وفي نهار اللي روحت يماك هجمو علينا بالسلاح والعياط وفهمت غير نقتلوكم نقتلوكم وتلحقي راجلك لهنا فهمت بلي نتا مت وقتلوك مفهمتش وش صرا وعلاه هكا عباد يعرفو سمير ويخممو يقيسوه فعيلتو ولحقت بيهم قتلوه عرفتهم مش ساهلين تهديت وغير دموعي يسيلو وجان بين يديا بيبي نخمم كيفاه نربيه بلا أب قلبي كانت حرقتو حرقة نخمم فوليدي اللي تيتم في أول ايامو فهاد الدنيا اللي مرحمتوش مام وهو فالقماطة خرجونا وداونا للغابة وقتها كانت الدنيا عشية والظلام بدا يطيح وشوي شتا تهبط واقفين على الجرف وموجهين سلاحهم لينا انا اللي كنت هازة جان فيدي ونبكي برك نتمنا تصرا معجزة وتسلكنا ولهنا هجمو لا بوليس على البلاصة وتخلطت الدنيا بالرصاص انا مت بالخوف وعرفت بلي خلااص راحت حياتي وبش نموت أنا وولدي مي أنا مزلت فصدمتي وجليل جبدني وبدا يجر فيا نبعدو على الريسك وكي شافني مش قادرة هز عليا جان وبعدنا على ديك البلاصة ولحقنا للوطو تاع لا بوليس هزونا لداركم فاتو يومين وانا عندكم غير نرعش ونخمم فواش صرا نبكي على راجلي اللي مات مقتول ونبكي على ولدي اللي رايح يعيش يتيم ونبكي على روحي اللي تحطمت ونخمم كيفاه نربي وليدي,وانا بهاد الحال حتى جا جليل كي لقاني ريحت شوي هدر معايا انا وليليان(ام ايلين) وقالي بلي باش يعاوني نبدل كنيتي وكنية وليدي باه ميلحقوش لينا وباللي اللي فات لازم متعرفوهش نتو الولاد ولحكاية لازم تتغم بيناتنا حنا برك في ثلاثة ..وهدا اللي صرا لحكاية بقات سنييين مخبية بيني وبين ليليان وجليل
ايلين تبكي:اهئ اهئ مي بابا كيفاه لحق لثم ووش دخلو فسوق المافيا تاني ومنين جاتو السلطة اللي يبدلك بيها اسمك وعلاه مخموش ينتقمو منو كيما انتقمو من عمو سمير وكيفاه عرف بيهم ولحق لعندك مع لابوليس مراني فااهمة وااالو اوووف اهئ اهئ
سيليا قربت حضنتها تهدي فيها عارفة هاد الشي صعيب وسي فري لحكاية غريبة وكاينة حلقة مفقودة لازم يلقاوها
جان كان كااالم فوق الحق وبسيف نطق كلمة:مدارو والو لعمي جليل بيسك كانت عندو حصانة
هزو روسهم فيه ملامح الاستفسار على وجوهم
الكل:كييفاه؟ووشمن حصانة؟؟
جان:وراه ناس يا اما من الدولة يا اما من المافيا يعني كان عندو سلطة في جهة من الجيهات يا الأمن الدولي والوطني يا كان جزء من المافيا وهادي اللي جامي تصرا يعني عمي جليل كان عندو بلاصة كبييرة في سلك الامن وكان جزء منهم
سمير:كاينة منها مي أنا كنت نعرف جليل ومكنتش نعرف أنو باباك يا ايلين ومكان عندو حتى دخل لا منا لا من هيه
جان:مش بشرط يكون كان مصرح بهاد الشي ..يعني مخلي هويتو سرية ومتخبي على الأنظار اي يخدم لتحت لتحت
عصماء:المهم عاونا ومتأكدة جليل كان معانا وفي طرفنا طرف الخير
سيليا:صراحة عقلي مش قادر يستوعب كيفاه صرا هاد الشي وعلاه بعدوكم وفالوقت اللي كنت نتا عايش علاه كذبو عليهم وعلاه كذبو عليك اونبليس نقدر نعرف لادات اللي هجمو فيها عليكم خالتي؟؟
عصماء:16/10/1992
سمير:نفسها لادات اللي زدمو لابوليس علينا
سيليا تبسمت على جنب وحكات بصوت واطي لروحها:وصلنا لطرف لخيط لازم نعرف سر هاد النهار باه نقدر نفهم وينهي الحلقة المفقودة
جان:يعني فنفس النهار ومالقري كنا عايشين لا بوليس مجمعوناش وتقصدو يبعدونا
عصماء/سمير:ايه يا ولدي
ايلين:اوووف راااسي
سيليا:جماعة وش رايكم نفرغو بالنا من هاد التخمام على كل اللي فات مات واللي صرا راه صرا علاه نبقاو نتحسرو وتقلقو فرواحكم نتوما رجعتو لبعضاكم بعد كامل هاد الوقت يعني لازم نفرحو ونديرو وليمة الله الله هياا افرحو شوية وخليونا نديرو فيها سهرة شابة ننحيو فيها على بالنا ونفرحو اللي رجعتو لبعضاكم بعد كامل هاد الوقت
ايلين:وانا رايي من راي سيليا عندها حق هيا نوضو
سمير شاف فيهم بفخر مهما صرا هادو يبقاو بنات روحو وطرف من قلبو :ههه عندكم حق وليداتي
جان وقف ودس يديه فجيوبو واقف بكل هيبة: هيا نخرجو للجاردان وقفو الكل مشاو سمير وقف قدام جان وضربو بدو ضربة خفيفة لظهرو وتبسملو تاع شد همتك وارتاح راني هنا
عصماء وقفت مع لبنات حتى جات عينها على الكرة الكريستالية اللي جابتهالها سيليا تبسمت وحكمت يد سيليا:يابنتي سبحان الله شوفي الكرة اللي جبتيها حسيتها تعبر علينا وكيفاه بعد كامل هاد الوقت تلمينا تعرفي وش تمنيت وقت شفتها لو انا تاني كنت مع راجلي عادي وواقفين سوا ورا ظهر ولدي مي سبحان الله الأقدار كتبت ليوم وبسبتكم تجمعنا ونرجعو نتلمو وكأنو هاد الكرة تمثلنا أب وأم وابن كيما باقي كااامل العايلات (باستها لخدها)رايحة نخليها عندي لآخر يوم فحياتي صحيتي يا بنتي
(وباست راسها )اييلييين (دارت ليها وهي كانت تشوف فيهم وعينيها مدمعين تأثرت صح بحكايتهم وكيفاه لبارح الصباح برك كان يشكي من وحشهم وحزنو عليهم وفليل هاهم معاه وراسمين أحلى عيلة ,قربتلها ووجها مليان فرحة ليهم)
عصماء جبدتهم لصدرها مغرقتهم حنانة:متخافوش يا بناتي عزيتكم من أول ماريتكم منك يا ايلين اللي نعرفك من وقت كنتي فالقماط ليك يا سيليا اللي عرفتك ليوم وأنا حاسة روحي نعرفك من سنين حبيتكم من قلبي وربي شاهد عليا وضك ونتوما كنتو بمثابة بنات راجلي وشايفين أمانكم فيه نوعدكم ندير جهدي ونحسسكم بلي راني بلاصة أمكم وأي شي تحتاجوه راني هنا
خرجو شادين الهمة ومتفائلين بوجود بعضاهم هنا كانو قاعدين فالجليسة حتى وقف جان وحكم سمير من يدو
جان:تفضل اوقف معايا دقيقة
سمير وقف معاه وكامل مستنيين وش رايح يدير؟
جان تلاح حضنو:وأخيرا رجعتلي يا بابا الغالي نوعدك موحال نخلي اي شي يقرب ليك منا وجاي ربي يخليكم ليا يا أروع عايلة
سمير جبدو ليه كثر:ويخليك ليا يا السبع تاعي نرفح بيك ونشوف ولادك يجريو قدامي
جان:ههه كي نلقاو المرا وساهلة
ضحكو عليه كامل وسيليا دموعها محصورين بسيف خوفها كل يوم يزيد وعديانهم كثرو مارك اللي هو أكبر خطر على حياتهم كامل اللي يعرف لينار وايلين ومش حابهم يعرفو ببعضاهم ربي يجيب اللي فيه الخير منا وجاي برك يا ربي
ايلين فرحانة بزااف للمتهم في دقيقة تفركت باباها وحنيتو عليها وأيام طفولتها اللي كانو اروع ايام حياتها وسط أمها وباباها اللي يقبل تمسووه فعينو ولا تقيسوه فشعرة من ايلين بالنسبة ليها كان أروع أب اما هادي هي الدنيا ديما تدي الناس اللي عزاز علينا وتخلينا نتعذبو ونسوفريو
قعدو مقصرين وشايخين لوقت موخر من الليل وهوما يحكيو ويضحكو كاين اللي من قلبو حال سمير وجان وعصماء وكاين اللي بسيف مخبي دموعو خايف الفرحة تضيع حال سيليا وكاين اللي متوحش يامو ومش حاب اي جزء من هاد الفرحة يجي نهار ويحس باحساسو حال ايلين اللي كانت هك
وصلت وبقات ساهر مع اوراقها توجد وتتفقدهم مرة أخرى غدوة نهار مهم بالنسبة ليها ولازم يتقبلو تصاميمها ويولي عندها خدمة هي تاني تعاون بيها خوها الصغير
بسيف كملت ورقدت على أوراقها