وئام العشق

البارت التاسع عشر

#وئام_العشق

بقلمي الكاتبه : هبه الساعدي ✍🏼

‏لَئِنْ كنتُ أخليتُ المكانَ الذي أرَى
فهَيهاتَ أنْ يَخلُو مكانُك من قَلبي
وكنتُ أظنّ الشّوْقَ للبُعْدِ وَحْدَهُ
ولم أدر ان الشوق للبعد والقرب

°°°°°°°°°°°°°°°°°°°°°

زينب : صعدت وكفت يم الباب الغرفه سمعت يسولفون ويا ابراهيم عن موضوع بس ما فهمت الموضوع شنو دكيت الباب صاحوا تفضل فتحت الباب دخلت عليهم

_ هلاو شباب تحبوني

احمد : عابت ام راس اذا ما نحبج المن نحب

زينب ضربته على كتفه " عفيه حميدان عفيه اني هم احبك كومات كومات وانت ابو ادم

ادهم : هههههه شعندي غيرج اني شكم زنوبه تعالي شو تعالي

زينب : فتحلي ايديه ورحت عليه اركض شمرت نفسي بحضنه وهو يدغدغ بيه واني اضحك وضحكتي صارت مسموعه صاح من جوا بابا

ابو ادهم : منو وياج ولج

زينب گوه احجي من الضحك " ادهم ادهم ههههههههههههههههههه هههههههههههههه ولك عوفني الحگولي هههههههه راح اموت هههههههههههه

ابراهيم : ولك عوفها شجاك تعالي كومي باع خدودها شلون صارن حمر

ادهم : اي جنهن فرط رمان ههههههه

ابراهيم : تعالي لـ حضني ، فتح ايديه

زينب : ههههه اجيت ضميت روحي بـحضنه وحضنته

ابراهيم : اوووف يا ضوه عيوني لو بس اعرف
ليش بنات يطلعن من حظن اهلهن اني بخير شلون راح طلعين من هل البيت ما اعرف والله بي كتله هل سريج الا اطيح حضه بيها ربية وتعبت وسهرت ويجي على حاضر استاذ سراج ياخذ ويطلع

ادهم : ههههههههه ترا مو اليوم تطلع من البيت بعد كدامها شهر وشويه

ابراهيم تنهد بـحزن " اووف صعبه يا خويه صعبه يفرغ البيت من صوتها ومن شقاها وزعلها وضحكتها مو بعد يدفر البيبان عليه منو يختل بالكنتور ويخلينا ندور عليه الا نلبي طلبات يلا يطلع

زينب دمعة عيوني " گلوله بطلت ما تريد تزوج تريد تبقى يم اخوانها مدلله

ابراهيم : ههههههههههه حبيبتي انتي تردين سراج يفجر البيت بينا بس ما تعرفين شلون هههههه حبيبتي انتي بنيتي اسمعي هسه انتي كبرتي وصرتي عروسه وبعد كم شهر تصيرين أم

احمد : أي وتصير الجنة تحت اقدامج والله وقت لـ مخابيل تصير الجنة تحت اقدامهم هههههههه ههههه .. يحجي ويهز بأيده ويضحك ما عاجبه

ادهم : ههههههه نجب هسه تعقل

ابراهيم : أثنينكم انجبو بنيتي تخبل ماكو مثلها

زينب بـخباثه وصوت عالي " باااابااااا تعال شوف احمد وادهم يضحكون عليه والله الا اكتلهم وانزلهم الك مدماين دشوف عيني يا اوس اوكف ولدك فلذات قلبك اموتهم اليوم

ابو ادهم واكف يم الدرج " ولكم تعالوا نزلوا يلا بسرعه

_ اخذت عودة الماسحه ودخلت عليهم لغرفة ابراهيم صار طفارهم مال والي كل واحد طفر بـجهه وابراهيم واكف يضحك علينا

ابراهيم : ما تصيرلكم جاره لا والله ابد

_ نزلوا ادهم واحمد يتراكضون برا واني وراهم بـعودة الماسحه صاروا يفترون داير مداير السياره واني وراهم اخر شي تعبت صحت بيهم كافي ولكم تعبت حتى الله ما يرضاها شايفين هاي ماسحه شطولها الا اكسر عليكم

احمد : أي اطول منج شايفها وانتي ما شايفج

_ ركضت ورا اريد الزمه وهو عيني بيب بيب ههههههه

ام ادهم : فضحتونا واحدكم مزوج وجهاله بـطوله وانت الثاني مستحق زواج عوفوها يلا

_ بهل اثناء ندك الباب سحبني احمد من شعري وطفر ورا البيت ركضت ورا

زينب اركض ورا واصيح " عبالك تشرد مني لا والله انت جبتها لنفسك جانت اكو سفيفه (يسحبون بيهل السيارات ) بالشباك سحبتها ربطت ايديه بيها وهو خربان ضحك خليت العوده بضهره وهو يمشي كدامي

زينب : شفت يول يوم الك ويوم عليك امشي كدامي لأبوك ينطي فديه يلا احررك ..شافنه ابراهيم ضحك

ابراهيم (بـضحك) : ههههههه كبر يول هذا الطول كله وجتفتك وجابتك وانتي الثانيه داعش استقر عيني

زينب : اكعد بسرعه اكعد

التفتت لأبراهيم " برهومي روح صيح بابا الله عليك

ابراهيم : شتردين منه

زينب : دروح الله عليك بسرعه

براهيم : استغفرالله عود نزوجها گلنه بلكت تعقل انوب تخبلت بزايد

دخل للبيت " حجي تعال بنتك فرع داعش تريدك هههههه

ابو ادهم : عيب بويه امشي صيحها

زينب : استاذ اوس تجي لو اكتل ابنك واشمره للبزازين

احمد : بـشرفج مو هيج لو تشمريني على الزبل ولا للبزازين

ابو ادهم طلع من جوا " هاي شمسويه بيك

احمد : ترا اكدر اطلع ايدي واكوم بس عاجبني امثل وياها هههههه عجبني الدور كلش

زينب : اسمع اوس جيب ٢ مليون احسن الك لو اكتل ابنك

احمد : نعال اطلبي ١٠ ملايين ابوي نايم على الفلوس أنطيني نص واخذي نص

ابو ادهم : لا بارك الله بيك هاي عود انت ابني

زينب : يلا طلع ١٠ ملايين

ابو ادهم : كتلي وشمري للذبان ياكلنه

زينب : شفت ابوك ما يحبك ولاگيك باب الجامع انت مو ابنهم ولأخونه هههههههه

احمد : اول مرا تحجي شغله براسها حظ هههههه

زينب : راح اعتقك لوجه الله اكسب بيك اجر
هههههه

ابو ادهم : خلصتوا يلا كومي انتي دخلي سلمي على عمج وعمتج ورجلج

احمد بصوت عالي " يبووووووووووووو نفضحت فليحه

ادهم : وسم وزقنبوت بطنك على هل صيحه

زينب : والله جفلني كبر على عقلك الفارغ

ابو ادهم : كوم فضحتنا منا العالم والله عيب بكبر ثور لا فهم ولا علم احترم من طاح حضك

ادهم : ولا يكبر ثول ليكول بعده زعطوط

احمد التفت عليه " الثور وياج شخصيا مرحبا

زينب : اهلا وسهلا تشرفنا ههههههه

ابو ادهم : امشي انتي كدامي وانت هم امشو سلموا على العالم صارلها بنص ساعه كاعدين

احمد (بـهمس) : منا لهنا سواهن نص ساعة

زينب : امشي وانت ساكت

احمد : اصلا اني مضلوم بهذا البيت ضالميني وضالمين مواهبي

ادهم : دمشي ابو المواهب المضلومه

_ دخلنا للاستقبال

ابو ادهم : اعذرونه يابه بس هاي هم هيج من هم صغار فاتين كلبنه بهاي سوالفهم

زينب بـخجل ومدنكه " سلام عليكم شلونك عمو

ابو صكر (بأبتسامه) : هلا هلا يبعد عمج تعالي تعالي هينه

زينب : رحت سلمت على عمتي وسراج وكعدت يم عمي وسراج يباوع ويضحك

سراج : اكلك ابراهيم ذولاك الجماعه اشو مداعرفهم شهل خجل

ابراهيم : اني هم متفاجئ صراحه ولا عبالك هذوله لقبل شويه هارجين الدنيا

ام صكر : عوفوها يولي شبيكم وياها خلوها براحتها باجر تزوج وتصير ام وهذني التصرفات كلهن يروحن وينحسب عليها كل تصرف يكولون مرت فلان هيج ومرت فلان هيج

سراج يهمس لأبراهيم : امي عبالها راح تعقل بعدين ما تدري هاي ما يصيرلها جاره

ابراهيم : ههههههه تفتهم من خليتها راسن بيت وحدها لان تفضحك وتفضحنا

سراج : اي والله ههههههه

ابو ادهم : يلا كومو شوفلنه الغده بساع

زينب : ماشي

_ اني طلعت دخل احمد مغسل ومبدل

احمد : السلام عليكم

الكل : وعليكم السلام

_ سلم على الكاعدين ابتعد شويه

ابراهيم باوعه مستغرب " خير شكو

احمد : دبتعد هسه

سراج : عنده حجايه

احمد بـهمس لسراج " تخطفني وتطلب من ابويه فديه

سراج : ليش

احمد : ابويه أستلم الورث وما يقبل ينطيني منهن

سراج (بـضحك) : ههههههههههههههههه فضحته للرجال

ابراهيم : من طاح حضك شبيك مكسر روح اشتغل وجيب مصروفك

سراج : اي صدك تفيد بالفواتح تعيط للنسوان هههههههه

احمد : خوش شغله والله انعي واذا يردن ابجي هم بس كل شي بسعره

ادهم : هههههههه ما يصيرله جاره ابد

زينب اساعد اميره بالمطبخ " عزا شكد عيب شوكت اجوي شوكت دخلوا ليش هيج ربي شمسويه اني وانحط بهيج مواقف بايخه

اميره (بـضحك) : هذا كله وشمسويه ههههههههه على فكره صورتكم من شباك المطبخ هههه

زينب : استلم استلم انتحر هسه من على كرسي ، صعدت على الكرسي

اميره : لا يمعوده على كيفج لا تتهورين انزلي هههههههههههه

زينب : اشو ما جاي احسج خايفه هههههههه

اميره : امشي طلعي مواعين من كاونتر بسرعه خلي نصب لولد هسه يصيحون وشيخلصنه من لسانهم

زينب : ماشي ماشي

اميره : واكف واكف ههههههه

زينب : شو صايره تحششين يول ههههههه

_ ضحكنا وبلشنا نصب ولولد ياخذون مواعين فرشنه السفره وكعدنا كلنا سويه

ابو صكر : تعبناكم بويه اليوم ليش مكلفين نفسكم

ابو ادهم : لا خويه اصلا مقصرين

_ كملنا غده وشلنه مواعين غسلناهم شويه وصاحوا عليه واني بالمطبخ اجاني احمد

احمد : تعالي يردوج بالاستقبال

زينب : جيت وراك امشي

_ دخلنا للاستقبال

ابو صكر : تعالي بعد ابوج كعدي حتى كلام كدامج يصير

كمل كلامه بـجديه وهدوء " عيني يا جماعة الخير الوضع تعرفون ما مستقر والاوضاع شوفون كل مجالها جاي تسوء من سوء الى اسوء وما يهون علينا نعوف مرية ابني وجنتي لا هي طايله للسمه ولا للكاع لأفضل نزوجهم بـأقرب وقت وهو اول وتالي لبنيه تزوج فـشنو رايكم بنهاية الشهر

ابو ادهم : يابه لبنيه بنيتكم انتم فصلوا واحنه نلبس براحتكم

ابراهيم : عمي اذا ما يصير زحمه عليك طلبت لا تردني

ابو صكر : گول وليدي ما عاش ليرد موش ابن اصول الي يردك

ابراهيم : محشوم عمي بس اني رايد اختي تكمل دراستها ما تبطل وهاي كدامكم كلكم

ابو صكر : بس احنه بتنواتنه ما يدرسن واذا اجت بنتنه بين اخواتها خاف تصير فتنه

سراج : بويه سمحلي اني من بعد اذنكم طبعا اني مرتي اصلا اخذتها وهي تدرس ومو حاب زوجتي تكون ما عدها شهاده باجر عگبه جهالي يفتخرون بـأمهم ويوصلون مثل ما ابوهم وامهم وصلوا واخذوا شهايد

_ بعيدا عن كونك شيخ عشيره لا تنسى اني بالجيش ولا سامح الله بـأي لحضه استشهد او يصير عليه شي منو الها ولجهالها غير شهادتها وظيفتها الكم العمر الطويل بس محد يدوم غير وجه الكريم

ابو صكر : ها هي الكم الي تردوا تكمل دراستها

ابو ادهم : ها هي شايفين كل الخير

ام صكر : خيه ام ادهم عيني تجين انتي والبنيه حتى تجهز بيتها لان صعبه اغراض بيت تجي من محافظات

ام ادهم : عادي خيه شوكت ما تردين احنه حاضرين حتى اذا ما كدرت اختها ومرت اخوها موجودات

ام صكر : على بركة الله

كملت بأبتسامه وحنان " وانتي شتگولين عروستنا اشو ساكته

زينب (بـخجل) : بكيفكم خاله

ام صكر : فدوه شلون طالعه خاله حلوه بحلكج

_ بعد ما اتفقوا غيرو الموضوع وبلشو يسولفون على الاوضاع وداعش والسياسه ومن هل الحجي

سراج : من رخصتكم بس رايد مريتي بـحجايه

ابو ادهم : أي بويه كومي ويا زوجج شوفي

زينب : اباوع على اخوتي لو بأيدهم ياكلون سراج وهو يأشرلهم ما اعرف شنو بس الظاهر لغز او هيج شي كمت ويا طلعنا للحديقه كعدنا على المرجوحه

سراج : محتاجه شي بعد شنو ما مكملته

زينب : هوايه سوالف لازم اكملهن شلون راح ادبرها ما ادري بين دوام وبين تجهيزات العرس

سراج : هاج الزمي هذني الفلوس جهزي بيهن الي ناقصج وشوفي يا يوم اخذج للانبار تجهزين لبيتج

زينب : ان شاء الله

سراج : ها ملاعيب العيد شلون

زينب (بأستغراب) : ملاعيب العيد شنو

سراج : ههههه هذني التحفيات وهاي السوالف ما ادري شنو يسموهن ههه

زينب : ههههههه حتى لفراش اني اريد اشتري منا ويا جهازي العرس ومن اكمل عود تعال اخذني هم ارتب البيت على ايدي وهم اجي اجهز لبيت

سراج : خوش فكره انتظري هنا هسه اجي

زينب : تمام انتظرك

_ طلع سراج برا شويه ودخل خله بأيدي فلوس بعد

سراج : هاج هاي مال الفراش وهسه نبقى على تلفون منا لحد ما تجين للانبار

زينب : تمام ها هي

سراج : يلا امشي ندخل ، دخلنا للستقبال

سراج : يلا بويه نتوكل نرفع الزحمه ونتوكل للانبار هم ورانا كومه شغل وتحضيرات

°°°°°°°°°°°°°°°°°°°°°

حبايبي ان شاء الله يعجبكم البارت وكل عام وانتم بالف خير وصحه وسلامه يارب ويحفظلكم الاهل واشوفكم بأعلى المراتب يارب 😍

💟البارت عيديه الكم 😅

💌لتنسون التصويت وتعليقات الحلوه من ايديكم الجميلات

وصدوك ليش تعليقاتكم قليله حتى مجاي توصل للألف 😒 تردون ازعل عليكم 😅😒

يوزر الانستا :  heba_alsaadi04

#هبه_الساعدي

☘️دمتم سالمين