كملو قضيتهم وخرجو من المول حاكمين طريقهم لدار عصماء بعدما كانت ايلين عيطت لجان وخبرتو باللي سبقتو وعمو سمير عندو خدمة عطاتو العنوان ورايح يلحق عليهم وحدو
سيليا:جان زعما امك يعجبوها وش شرينالها؟
جان:اكيد كلشي مليح وشباب يهووبل شكرودة كالم توا
سكتت وبقات شاردة فالطريق حاسة هاد الليلة رايحة تكون مليانة بالمفاجآت غير حبسو هزت راسها فالدار وتبسمت
سيليا:ههه الدار شابة حبيتها
جان: لعقوبة ليك تديري دارك وتكوني عيلتك فدار أحلى من هادي نشالله
سيليا:ان شاء الله (قالتها وداخلها يعييط من القهر اللي راها فيه مدام مارك وراها هي جامي تتهنا ولا تخمم تبني دار وعايلة او حتى تجيب ولاد وتعرضهم للخطر)
نزلو وهزو القضيان اللي جابوه ومشاو سيليا تشوف فالجاردة
سيليا:جااان حبيت الجاردان تهوووبل سيرتو هداك الركن (الجاردان كانت كلها عشب وشجيرات ورد وفي ركن كاين هاد الزاوية اللي فالفوطو)
جان:ههههه خلي مبعد نديرو فيها سهرة
سيليا:ايه علاه لالا
جان فتح الباب بمفتاحو ودخل اما سيليا وقفت عند الباب خايفة كيفاه تدير تالمون تربات فدومان بعيد على العباد متعرفش تتصرف مع الناس وسيرتو الكبار عندها فحياتها ايلين وسمير وصاي
جان بقا يشوف فيها يستناها تدخل مي و الو حتى نطق:هيا بايتة لثم؟هههه
سيليا فطنت من تخمامها وشافت فيه تبسمتلو وفاتت دخلت
"مازن يحكي"
ليوم وكي جات عندي وخبرتني مأمنتش كيفاه هدا شريكنا وخدام معانا من زمان يخدعنا ويغدرنا ومفهمتش اذا حنا اللي أغبياء لدرجة مقدرناش نفيقولو ومعرفناش لحساباتنا ولا انو درنا ثقة فناس متستاهلش خلاتنا نتساهلو معاهم ونأمنو عليهم رزقنا وكلشي وهادي سيليا مش الريح اللي يجي تحكي فيه يعني لازم نعطيها فرصة تفهمني لحقت عليها بزربة مي غير شفتها مع شكون تحضن وحالتها حالة قلبي شعل وهاد الشي مفهمتوش كي نشوفها مع جان وهو والف يحط يدو على كتفها نيراني تشعل ونحب نقتلو ونفس الشي ضك بالمختصر منتحملش غيري يشوف ويقرب ليها وشنو هدا مفهمتش ومعرفتش زعما يكون اعجاب برك ويفوت ولا يولي شي آخر الله اعلم
كالميت روحي وتحكمت فغشي وقربت ليهم وقتها عرفتني عليه ومع سمعت اسمو عرفتو "سمير"منقذها على حساب ماني متفكر حكايتها ترسخت في بالي بكل تفاصيلها وسلمت عليه وطلبت منها تجي لبيرويا حسيت بتخنزيرتو فيا وشفت خوف الاب على بنتو فيهم صح واااو علاقتهم روعة مبيناتهمش دم مي ارواحهم مترابطة تبسمتلو وفهمتو الحكاية وبلي راهي غير خدمة ورحت وخليتهم وقفت فبيرويا وبقيت نتفرج وتايه حتى لقيتها ورايا وغير قلتلها صدقتك جات بش تبدى خدمتها كنت مركز غير في اني حاب نشوف خدمتها وهي كانت هاكر حبيت نشوف مهارتها وبقيت نخمم غير فيها وغاب من بالي اني مداير فوطو لينار ويما سليمة معايا فونديكرون بيسي وهي غير فتحتو بدات تمتم وحدها وتحكي ووقتها عرفت انها فهمت بلي لينار عايشة وهي بنت ايلين صحبتها وقتها بدات تحكي وتعيط وتريكلامي على حق ايلين وتوصف فوجاعها اللي فاتت بيه غاضتني مرت خويا الحق يقال سوفرات بزاااف مي مام الاعصار اللي كان قدامي غاضني حسيتها تريكلامي على اختها من دمها ولحمها مش صحبتها غريبة هاد الدنيا كيفاه جمعتهم وحطتهم فطريق بعض وقت اللي كانت كل وحدة فيهم واقفة على رجل وحدة مي هوما سندو بعض وقدرو يوقفو على رجليهم مع ليام مي الكارثة ضك كيفاه نحل لحكاية ومنخليش ماهر يدمر كي تبعد عليه بنتو جريت وبقيت نحاول ونحلل وبسيييف وبعدما عطاتني صدمة قلب وجلطة دماغ خلاتني نحكيلها لحكاية اللي حكيتهالها هي نفسها اللي حكاهالي ماهر منقصت منها والو بيسك عرفتها شدت الصحيح ولازم نحكيلها كلشي باه توقف معايا ونقدر نقنعها وهدا اللي صرا اقتنعت بسيف وحاجة جبدتني لسيليا كثر مام كي سمعت كامل وش صرا وبعدما انهارت قدام عينيا رجعت قوات وكملت خدمتها مالقري كااامل وش سمعت وعرفت بقا في بالها تكشف كمال الكلب وتروح لهنا عرفت بلي هي من الجور اللي كي يقول شي يديرو ومام ويكون ضعيف وتاعب ينسى ضعفو ويتقوى باه يكمل وضك لازم نحسب حسابي انا تاني ونبدا نخدم علاجال الزوج هادوك باه نردهم لبعض ونهني هاديك البراءة الصغيرة
كملت خدمة النهار هداك بسيف ومزال عندي نروح للمركز كي العادة نتفقد لحوال هزيت لوطو تاعي مع العشية ورحت للمركز تفقدت القضايا تاع ليوم وعرفت بلي لوطو اللي قاست لينار لقاوها عن طريق الماتريكيل مي كي راح جانير قالولو كراها واحد وكي عطاوه الهوية اللي كراها بيها ظهرت مزورة مي جانير كان فايق وقالي بلي ختو رسامة وتقرى فالتصميم ورايح يطلب منها تروح معاه الصباح عند هاد لاجونس تاع لي طوموبيل ويطلب منها ترسم وصف السيد صح عندنا رسامين معانا مي انا حاب نلقاه انا اللول بعيد عن القانون ونحاسبو بطريقتي بعدها نسلمو نشالله وانا داير ثقة غير فيه بيسك نحسو خويا وصحبي صح صغير مي فااايق بزاف وساعات نقول هاد الدومان مش تاعو مي معليش كلشي للوقت وبالمكتوب كملت وراق تانيين وخرجت مع وقت العشا مهدود عاللخر وعقلي في انو ضك لازم نحسب حساب لكلشي ومدام سيليا عرفت خططنا منا وجاي لازم يتبدلو وحساباتنا تتشدد ومبعد تفكرت بلي لينار نورمالمون ليوم تخرج مي ماهر معيطليش زعما كشما بيها الفكرة طيرتلي مخي وين جيت باه ندور طريقي للسبيطار لقيت تلفوني يصوني
مازن:الو
سليمة:اهلا وليدي لباس؟
مازن:لباس جدة نتي لباس؟لينار لباس؟جابها ماهر؟
سليمة:بشوي برك يا وليدي انا لباس ولينار نشالله تكون لباس ماهر مزال مجابهاش وقال بلاك غدوة ويخرجوها وراه معاها ونتا ارواح للدار نحتاجوك وكوبات ومخلاتنيش حتى نكمل نسقسيها علاه حكمو لينار مخي طار الواحد تاعب للخر ويزيدو البلاوي يطيحو عليه مفقتش كيفاه طرت باللوطو هاديك للدار وعقلي يحسب في ألف حساب حبست اللوطو قدام الفيلا ونزلت نجري قلبي وعقلي قريب يخرجو من بلايصهم دخلت و كانت الحالة كلها ظلمة وهدا الشي اللي جامي يصرا فالفيلا تاعنا ديما فيها الضو ويما سليمة تبقى هنا لتحت فالصالون حتى ندخلو كامل لهنا حسيت روحي نشوف قلبي يشطح دربوكة عند رجليا وعقلي قاعد يتحزم باه يروح يعاونو مي مقالش بسم الله لقيت الضو شعل وقابلني أجمل منظهر فالنهار المنحوس هدا قابلتني اميرتي وصغيرتي واقفة ومتسندة على ماهر بيسك رجلها مريضة و متقدرش توقف لهنا قوا اصراري نلقى اللي دار فيها هاد الشي ونحاسبو ثالث ومثلث بقيت تايه ومش مأمن حتى نطقت هي
لينار:اهلا عميمو الزين هههه متوحشتنيش؟
لهنا فطنت على روحي ومفقت غير وانا جريت ليها وهزيتها بين يديا نبوس ونعاود فرحان برجعتها لينا, ليلة بعيدة علينا خلاتنا نحسو الفيلا ظلام ومتسوى والو
مازن:هههه يا الستوتة توحشتك
لينار مزيرة عليه حتى هي:مام انا مازن الزوين ,قولي عجبتك المفاجأة؟
مازن:قصدك المفاجعة علابالك بلي شفت قلبي يشطح عند رجليا هههه وكملها في قلبو(ليوم كي مركبتولش مرض القلب والسكر ولاطونسيون نتي وخالتك معادش نمرض والله)
لينار:ههههههه مليحة هادي خليه يتحرك ويزهى شوي هههههه
مازن:ههههه يزهى يا روحي وهو معاكم نسيمة جات ليه
نسيمة:ولدي حط بنت خوك شو رجلها كيفاه ونتا معلقها هك
مازن لهنا تشوكا ومخو مركا ايرور وش صرا فهاد النهار يا ربي لعزيز شاف مع الباقي مش مصدومين ويتبسمو و مام لينار فهمت عليه وتوتتلو
لينار:ههه اششش عمو مبعد نحكيلك وش صرا متخافش
مازن::نشالله مالا هيا نحطك
ماهر:لالا رايحين نتعشاو هاتها معاك بيسك ني نشوف فيها فرحت بشوفتك كثر مني
لينار:ههه لالا والله والو بابي حبيبي نتا متهونش عليا نقلقك مي مازن معليش يحب لومبيونص والاكشن دونك درتلو رايو ههههه
مازن:والله صح؟تستكتي سينو ضك نطلقك تطيحي ونعتلك الاكشن تاع الصح كيفاه
هي هنا والو سكتت وخنست عندو كثر باه ميطيحهاش خلاتهم كامل يضحكو.... وهادي هي برجعتها رجعت الروح والفرحة للدار وبلاصتها ميعوضها حد
قعدو على الطابلة خيرات ربي محطوطة كلها وش تحب لينار كيما قالت نسيمة حتى مازن تشوكا
مازن:اوو وش هاد الخير كامل رايحين تديرو عرس
لينار:ايه جدة حبيبة قالتلتهم يطيبو علاجالي
مازن دار لسليمة:جدة تسما هكا نغير انا ولا كيفاه جامي درتولي كل وش نحب فرد نهار
لينار حكمتو من وذنو بيسك كانت قاعدة قدامو ودروتلو وجهو لنسيمة اللي اونفاص ليه:جدة هادي يا مازن اللي قالت ووصات جدة نسيمة وهدا الشي كامل علاجالي طبعا معزتي عندها ومعزتك مش كيف كيف
مازن:نن شوفو مخي ني حاسو حبس ورما روحو فالشربة فهموني منين جات المعزَة هادي ؟قصدي راهي ولات معاز وخرفان وقطوط وكلش بعد فهموني
ماهر:مازن كول املا كرشك ومبعد تفهمك شركة الاخبار اللي قدامك علابالي متخبيو ووالو على بعض بسلامتكم ودايرين فيها عصابة تسما مبعد تنقلك الاخبار متكسرلناش روسنا
سليمة:ههههه ايه الزوج هادو دايرين احلى عصابة
لهنا مازن تبسم مي مخو مهانهش ونطق لا اراديا ثم ثم
مازن:ياااااه احبسوو تشوفو
نسيمة/سليمة/ماهر/لينار::واااش وش صرا؟؟
مازن:ميرال غايبة ليوم وينها ؟؟؟
ماهر:مازن نشاليك بالكسكاس تاع خالتي فاطمة(خدامة لثم فالدار وبيسك كبيرة يقادروها) شغل بلاصة ميرال تفرق معاك نتا وزيد ايه مهيش هنا روحت لدارها بيسك خالتي توحشتها زعما
مازن:قصدك راحت تتضايف في دارها وتروح عندنا يخي ههههههههه
لينار:هههههههه هي بالذات
فدار عصماء غير دخلو جات عصماء بالأحضان والبوس في جان بسيف باه طلقتو وشافت سيليا اللي كانت واقفة وراه وتتبسم بوحدها من حلاوة المنظر شافت فيها وابتسامة كبيرة مالية وجهها طمنت سيليا وبينتلها شحالها طيبة ورايحة تقدر تتعاون معاها
عصماء قربت لسيليا وجبدتها ليها تحضن وتسلم:مرحبا بيك بنتي العزيزة الزينة يا أهلا شرفتي داري
سيليا سلمت عليها ومشوكية كيفاه راهي تسلم وتحضن تقول راهم حباب من سنييييين :يعيشك خالتي ربي يخليك
عصماء بعدت عليها وحاسة بحشمتها حبت تخفف عليها الضغط والحشمة:هههه الله يبارك عليك يا بنتي الزين وزيدو الحشمة خرجتي تهوووبلي
سيليا:تبسمت وذابت فأرضها من الحشمة مي المقلوع تاع جان لازم يفسد اللحظة
جان:ههههه يما ربي يهديك هادي والحشمة خطان متوازيان لا يلتقان ههههه
سيليا خنزرت فيه وقبل ما تهدر نطقت عصماء
عصماء:بيانسير وليدي الزين كي تكون معا اللي مقلوع حشمة كيفك لازم تنحيها مي شوف الله يبارك مع العقال والرزان كيفاه ودارت حاكمتها من خدودها:ههههه مشاء الله عليها ربي يحفظك من العين بنتي الغزالة
سيليا:آمين ربي يخليك خالتي
جان:يما ني حاسك قصفتيني
وتزدم ايلين منهيه حاطة الطابلية تاع الكوزينة وخلات جان وسيليا مشوكيين هي ايلين مالفة تطيب مع سيليا في لندن منين كانو عايشين مي تكره تحطها ويديرو غير ماكلة تاع برا وحاجة خفيفة غداهم فالشركة والعشا مراات وين يطيبو بيسك كي يعودو مروحين يفوتو يشريو تسما لهنا صراتلهم صدمة سيليا شوي مشوكية مي جان ديراكت مخو صورلو العرس اللي قام فالكوزينة آخر مرة عيط وحدو
جان:نتييييييي وش ديري لثم والله يا ايلين نلقى الكويزين راحت فيها كيما المرة اللي فاتت تخلى منيش حاب نتعشى من برا راني توحشت ماكلة الدار يا زحي
ايلين قربت ليه:غير اسكت هاد المرة مصرا والو ومام المرة اللي فات مصرا والو نتا برك تشتي تزيد فيها
عصماء:هههه ايه يا جان ليوم وقفت عليها انا وعاونتني مسيكينة ومفسدتش الحالة
ايلين قربت باست سيليا اللي غير ساكتة ملقات وش تهدر :ههه وشبيك ساكتة مش من عادتك
سيليا:هههه معرف معرفتش وش نقول الأجواء المليانة تعرفيني منقدرش نهدر فيها تسما نسكت وخلاص
ايلين:نن متسكتيش هادي عايلتك انا تربيت مع هاد المرا خالتي عصماء كنت نحسها يما ومزالني للآن ونتي لازم تكوني مرتاحة وسطنا اوك؟
سيليا:اوك هههه دخلو جان وسيليا للصالون حطو لحوايج اللي شراوهم وراحو لعند عصماء وايلين للكوزينة ايلين جبدت سيليا ليها وحطتلها طابلية كيفها وقالتلها توجد السلاطة الحاجة الوحيدة الساهلة اللي تقدر تديرها وجان مهبلهم بتعليقاتو هادي هكا هاديك لالا حتى وجد كلشي وراحو للصالون يقصرو حتى يجي سمير ويتعشو مع بعض غير دخلو عصماء وايلين قعدو قدام بعض وجان مقابلهم وسيليا على يمينو حتى تولهت عصماء للأكياس اللي فالصالون باينين تاع شوبينغ
عصماء:تعمن هاد الحوايج؟
جان وسيليا شافو فبعض وتبسمو وناضو كل واحد هز حاجة وقربو ليها جان هو اللول عطاها الكادو تاعو كان بوات كبيرة مغلفة بالنوار ومكتوب فيها بالغوج لأغلى ما أملك "أمي"غير شافتو دموعها تلمو فعينيها
جان:يما حبسي حبسي مكلاه تبداي تبكي ضك هههه شوفي اسع ومبعد كي ميعجبوكش وابكي وتحبي حتى نعاونك هههههه
ايلين:هههه اي خالتي تحمست ازربي افتحيه عصماء بدات تفتح قابلوها لحوايج مزينين ومحطوطين بدات تهز بالحاجة وتشوف فيهم ودموعها طاحو من الفرحة هزت طقم الصلاة ومبعد البارفان ومبعد شافت بواط هزتها وحلتها ولهنا تصدمة كانت سنسلة وفيها ألماسة ولاحت عينيها لبوكي الورد فرحت من هاد العفسة وبقات تسلم عليه وهوما يضحكو عليهم حتى قربت سيليا وفي يديها بوات
سيليا:خالتي هادي مني بما أنو اول مرة نتعرفو ونتلاقاو نتمنى تبقالك ذكرى شابة مني عطاتلها البوات وعصماء حكمتها عليها بعدما
باستها وفتحتها وعينيها رجعو دمعو كانت كرة كريستال وفيها دلافين كريستالية تاني بزاااف شابة
عصماء جبدت سيليا ليها تحضن وتبوس:ربي يعيشك يا بنتي حبيتها بزااااف تعيشيلي
سيليا:ههه آمين بلا مزية خالتي
بقاو يتفرجو فالحوايج ويقصرو حتى دق الباب
ايلين:سير عمو سمير
عصماء:اا مالا نوض نحط حيجابي وخرجت تجري
اما جان مشا للباب يفتح
فتح الباب قابلو سمير هاز قضيان فيدو خمس معاه وهز عليه القضيان
جان:عيب عليك يا عمي جاي لدارك وتعب في روحك
سمير:بلا مزيتي يا ولدي وزيد راهم غير ديسار وأمورات سهرة باه نسهرو ونديرو فيها قعدة
جان:هههه ايه عندك حق تفضل للصالون (كانو دخلو وماشيين ويحكيو فنفس الوقت )
دخل جان للكوزينة لقا ايلين وسيليا وعصماء حطت حيجابها وجدو الطابلة والعشا كلشي يشهي ماكلة لبلاد ويد أمو ليه شحال ما اقها تبسم برضا وفات للصالون يجيب سمير
جان:عمي ايا تتعشا كلشي واجد
سمير تقعد وقف:هيا يا ولدي
تبسملو جان وورالو الطريق يفوت
قاعدين فالصالون سينية تاي ومكسرات قدامهم ويحكيو
ماهر:هههههه مازن تشفى نهار ربينا حمامة وكي ماتت دفناها وصلينا عليها وقرينالها الفاتحة هههههههههه
مازن:ههههه يرحم باباك غير متفكرنيش البروبلام دفناها فالتراب اللي كان يبني بيه جارنا هههههه (هادي لحكاية درتها انا مع ولاد عمي كي كنت صغيرة ههههه)يامات ولقيناه داها ومعرف وين رماها مسكينة هههههه
لينار:ههههه يخي جايحين هههه مي غاضتني غير الحمامة مسكينة
ماهر شاف فيها بنص عين:احمم لينار خانوم اسمي باباك شوي قدر يا زيين
لينار:ههه ايه صح بابا ومام انا مقلت والو وتبسمتلو ابتسامة الغباء
ومبعد مازن رجع ضربة وحدة وجهو سيريو :اييه وضك احكيلنا كيفاه صرا هاد الحادث وكل تفصيل اي حاجة خلاتك تتوسوسي احكي كلش بالتفصيل الممل
ماهر والكل دخلو معاه فالمود السيريو:ايه احكي يا لينار رانا حابين نعرفو
لينار :اوك لحكاية هيا
Flash bak
خارجة من المدرسة وقت الغدا كي العادة خرجت وحدها مي وين جات باش تقطع الطريق قابلتها لوطو نوار حارقة الطريق جيهتها هي من الصدمة بقات بلاصتها ومفاقت بروحها غير مرمية فالطريق واللوطو بعيدة عليها صح الشوفة كانت مضببة عليها وهي هكاك لامن شافها وقرب يعاونها حتى تشوف فلي ضربها نزل وهو مزال مغطي وجهو قرب ليها وهو هاز تلفونو في وذنو
راجل:ايه بوص ضربتها وراهي في دمها
.....
راجل:لالا مماتتش راهي حية وشنو كلات ضربة صحيحة ...صحا اوك مبعد
Flash end
لينار:كمل هدرتو وراح ومبعد تلمو الناس والأستاذة تاعي شافتني وهكا عرفتني وعيطت لبابا نورمالمون والباقي عيطو للومبيلونص و هزوني الباقي منيش متفكرة
ماهر يحكي بصوت واطي ويرص في يديه لبعضهم الغش متمكن منو :مش قلنا تبقى بعيد؟ علاه مقرب.... وتظهر نتا اللي درتها غير تخلى ونلحق ليك ونقتللللك
مازن:ماهر علاه راك تهدر و حدك؟؟
ماهر:اححمم ايه راني نقول لازم نلقاو اللي دارها
مازن:كونك هاني نجيبو لحد رجليك
لينار:ههه ليكيب وشبيكم وليتو سيريو ؟؟
مازن:بيسك يا بنت خويا لعزيزة نتي خط أحمر واللي يقرب ليك ميمنعش
ماهر::قالها عمك واللي قاسك رايح يخلصها ثالث ومثلث كونك هاانية
مازن:اييه لينار حفظتي وجه الراجل الي كان يحكي فالتلون؟
لينار:لالا كان مغطيي وجهو وغير عينيه اللي يبانو
مازن::اوك نتي متبقايش تخممي صغرونة رانا معاك وواحد ميقيسك
ماهر وقف:ايا نطلعك لبيتك ترقدي
(شومبرة لينار)
نسيمة تنطرت منهيه :ايه استنى نجي معاك نبدللها باه ترقد آلاز ونبقى معاها بالليل كشما تسحق
ماهر:لالا مكلاه تعيي روحك يما انا نبقى معاها بلاما تجيبي ليلك نايضة
نسيمة:منحبكش تناقشني نتا بقيت معاها لبارح فالسبيطار سير راك عياان دوكا دونك روح ترقد
مازن قرب لسليمة :جدة الغالية ,سلومة لعزيزة ..قوليلي وش كاين ومن وكتاه يما الحنينة تحب بنت ابلين كاامل هااك
سليمة:ايه يا ولدي صح هادي بنت ايلين مي راهي بنت ماهر ثاني ونسيمة راهي حابة تتناسا انها بنت ايلين وتعاملها على أساس حفيدتها ومن دمها ولحمها سي بور سا راهي حابة تربح قلب لينار
مازن:امممم هكاا مالا
سليمة:ايه...قولي يا ولدي هاديك البنت اللي تلاقيتها وقالت أخت ايلين محوستش كيفاه ؟؟ياك عايلتها ماتت
مازن::كوني هانية جدة هاديك صح مش ختها بالدم مي أختها بالروح ومتبقايش تخممي فيهم بيسك تهبلي قبل وقتك... كيما راح يصرالي أنا
سليمة:ههههه ونتا علاه تهبل يا وليدي ؟ولا ني نشوف فيها خطفتلك قلبك؟؟
مازن تبسم وحك نيفو بحشمة:هههه علاه تخطفو هدا اسمحيلي ني طالع
سليمة:ههه ايه اهرب اهرب هههههههه كبرت ووليت تعشق وش نقولك يا ولدي ربي يسهل ويقضي بيناتكم بالخير وخلاص
خلاها تهدر وحدها وتبخر لبيتو ديراكت دار دوش بقى غير بشورت شعرو طايح على عينيه وقطرات ماء نازلين مع رقبتو (احححححي عليا بقلاوة وليدي ههههه)مشا حكم بلاصتو هز تلفونو وبقا يكونيكتي هي كان يستنى سيليا تعيط ومبعد قال بلاك رقدت خلي هكا خير متسقسينيش على لينار ولا يدور وحدو من الفيس للانستا وخلاص
تعشات مع عايلتها وطلعت لبيتها حطت ترسم في تصاميمها اللي رايحة تقدمهم بعد يومين حتى صونا تلفونها غير شافت الاسم تبسمت بوحدها
نور:الوو
جانير::ختيييتو حبي وش راكي
نور:الشعععر متحشيليش بزوج كلمات هكا تخليني متوحشتك يا الكلب تفوت وتروح يامن عاش تتغرس ثم ومتعيط متقول ختي الوحيدة ما وااالو
جانير:ابابابابا بشوي ثقبتيلي وذني يااخاه وزيد راني نخدم ختي الغالية مرانش نلعب وتعرفي الدومان صعيب هادي هي مي راكي طول في بالي وقلبي يا الزينة تاعي
نور:امممم اوك راك لباس؟
جانير:هههه دخليو اللي يرضى بزوج كلمات ايه لباس ونولي طووب كي نسمع صوتك ختي الغالية ,وش راهي يما؟
نور تبسمت بانكسار هوما مايعيطو ميسقسو عليه وزيد بعثوه هو يخدم عليهم وهي قاعدة مع راجلها لا علاقة نطقت بسيف باه متحسسوش:ايه لباس جانيرو وزيد متوحشتك بزاااف
جانير:ههه علابالي وش كاين نور بلاما تخبي عليهم علابالي هامهم غير نبعثلهم قوت الشهر مي معليش يبقاو والديا
نور:جانيير والله ونلقا خدمة ونستقر فيها غير ندير المستحيل ونخرجك من ثم ونخليك تكمل قرايتك وتخدم وش تحب خويا لعزيز نصرف عليك انا ونخليك تدير وش تحب وتروح وين تحب وهوما تبقالهم غير الندامة يا الغالي تاعي
جانير:ههه تعيشيلي ختي الزينة وعلابالي باللي راكي ديما فكتافي وهدا يكفيني نتي برك اقراي قرايتك واخدمي علاجال روحك ومستقبلك يا زينة
نور:ان شاء الله .ايه كشما تسحق نجيبلك؟؟
جانير:احم بصراحة نسحقك نتي غدوة الصباح
نور:ياخي خير؟كشما بيك ؟مريض؟؟
جانير:لالا مش مريض غير لازمنا واحد يفهم فالرسم بيسك عدنا واحد لازم نلقاوه ومنعرفوش وجهو يعني لو تتصور ملامحو قدامنا تسهل علينا نجيبوه والشاف تاعي حاب يوصلو شخصيا اسع ومبعد يسلمو عليها منيش حاب الرسامين تاعنا يتدخلو ومتمني منك نتي تعاونيني وتحاولي ترسميه
نور:اممم ياخي تقولي متعرفيش ترسمي ؟؟
جانير:ههههه يا بنتي نضحك برك وزيد نتي أروع فنانة عرفتها ههه مهبولة نتي ختي الموهوبة تدير على ضحك خوها وزيد انا اللي منعرفش للرسم مش نتي أنا دائرة منعرفش نديرها
نور:هههههههه والله صح.خلاص مالا غدوة فوتلي نفطرو فالدار ونخرجو
جانير:متقوليش ليما وبابا بلي راني جاي زعما نديرها مفاجأة ومبعد ندير روحي رايح نوصلك لقرايتك فاهمة؟
نور:اوك متفاهمين
جانير:تصبحي على خير نورة الغالية ههههه
نور:نناك نورة. نووور..نووور اسمي ايا مالا باي اتهلى فروحك خويا الصغير
كوبات وهي تتسبم وتشوف فتلفونها فوطوه:تعيشلي يا الغالي تاعي ما عندي غيرك فالدنيا حطت تلفونها وكملت رسم مع أوراقها
قاعدة فشومبرتها على سريرها تسمع في حسها فاللدوش تغسل فيديها بعدما لبستلها وعاونتها قعدت بلاصتها وصوانالها ماهر جرح راسها شوي وقابلتها خارجة من الدوش تشوف فه وتتبسم تبسمتلها بدورها حتى هي
نسيمة قربت قعدت بحذاها بعدما كانت نص قاعدة:لينار
لينار:أنعم جدة
نسيمة:علابالي راكي تقولي وش سبة هاد التغير مي صدقيني راني ندير في جهدي باه ننسيك فاللي فات غلطت معاك من قبل بزاف يا بنتي اسمحيلي
لينار:وش هاد الهدرة جدة السماح وزيد نتي كبيرة ملازمش تطلب سماح مني عيشك كالم توا مكاين والو
نسيمة تبسمت بفخر بحفيدتها قربت ليها حضنتها مغرقتها فحنانة صدرها:سعدي وفخري بيك يا بنت كبيري عزيزي مشاء الله عليك اللسان والزين ههههه مي لسانك يا بنتي راه ساعات يتبرا منك
لينار:هههههه كااينة منها صح ههههههه
نسيمة:المهم يا بنتي راني حابة نقولك باللي من ليوم انا جداتك بالاسم والعمل أي شي تحتاجيه راني وراني ح ابتك تعتبريني كيما جداتك سليمة اوك؟
لينار:اوك جدة حبيبة مرسي على حنانتك
نسيمة:بلا مزية يا الغالية باست راسها بمعزة مفرغة قلبها من أي حقد ولا كره جيهة حفيدتها وكتلة البراءة اللي معاها نحات من بالها هي بنت شكون ولا عدوة شكون اللي يهمها مغلطتش معاها ومحتاجة وقفتها معاها ومحبتها وخلاص
قاعد فبيتو بعدما دار دوش مريح على سريرو نص رقدة هاز فوطوهم ويشوف فيها يمسح على وجهها بيدو والدمعة فعينو
ماهر:اييييلين كنت باش نخسرها على شوي كنت بش نخسر آخر أمل يخليك تغفريلي غلطتي اللي درتها ...بنتنا يا حبي لبارح وانا نشوف فيها راقدة مسلمة حالتها حليلة حسيت الماضي يعاود فنفسو ,تخيلي نفس المنظر اللي عشتو من 5سنين ونتي مسلمة قدامي عاودت شفتو في بنتي قلبي كانت نارو قادية ولامن عارف بيها ..ليوم حسيت روحي ضعيييف ومعندي حتى فايدة فهاد الحياة عرفت اللي أنا وفي بعدك كنت عايش علاجالها وبيها عرفت بلي هي كانت الأكسجين تاعي فغيابك وغير حسيت باش نخسرها خسرت روحي وبقيت غير جثة واقفة فهمت احساس تخسر بنتك قطعة منك وندمت اللي عيشتك كامل هدا الوجع وجاعي دام نهار وقريب مت مي نتي ...نتي5 سنين ونتي تتعذبي وهاد الوجاع ياكل فقلبك وتحملتي ورجعتي أقوى نستعرف بيك قوية ومن نهار عرفتك قوية عندك الحق ترجعي تدي ثارك وحق كامل وش خليتك تعيشي ...علابالي لا سماح يغفرلي ولا حبي ليك رايح يغفرلي ولا أي شي رايح ينسيك فوش عشتي بسبتي مي نقولك اسمحيلي كلشي كان خارج على يدي وراني ندير فالبوسيبل باه نردك ونرجعلك لينار والله ما في نيتي نحرمك منها مي لازم خوفي عليكم أكبر من كلش كملها ببوسة على الفوطو ورقد محضنها لصدرو مستحلي ذكرياتو معاها اللي فاتو بين عينيه كامل من الحلوة والمرة وأجملهم وحمها بأميرتو وصغرونتو هبلتو وقتها وخلات اللي تخلفها وتهبلو
قاعدين على الطابلة بعدما حطو كلش سيليا دارت فوطو تخليها سوفونير للطابلة وهي وايلين مع عصماء
سيليا:خرج كلشي يهوووبل هههه
ايلين:هههه ايه ختيتو ومالا سلامة يديواتنا انا وخالتي عصماء هههه
عصماء كانت تسمعلهم وتضحك مي تركيزها على سيليا تشوف فعينيها اللي بحرهم مش غريب عليها ذاكرتها خانتها ومقدرتش تفكرها مليح مي لازم تتفكر حتى سمعو صوت سلام صوت تعرفو صوت قريب ليها بزااااف كيفاه هو هنا واسكو هي برك سمعتو ولا راه هنا صح دارت بالعرض البطئ تشوف فسيليا وايلين جراو ليه يعنقو وجان قرب ليها حضنها ليه
هزت راسها في جان ورجعت شافت فيه دار ليها بعدما كان عاطيها بظهرو وهنا كانت الصدمة هو ما غيرو:سميييير...سمييييييير هوما زوج عيطات عيطتهم وجات دايخة فحضن جان اللي خلع وايلين وسيليا جراو ليها مصدومين من حالتها
سمير كان واقف مشلول الصوت عرفو بقا يحبج على وجهها يشوفو بسك كانو الولاد مغطيينو مي قرب ليها وقابلو وجها تصدم وحواسو كامل تشلت وغابت منين وكيفاه هادي مرتو حبيبة قلبو وام ولدو اللي حسبها ماتت من اكثر من 26سنة كيفاه راهي حية للضك وهوما وسط دار وحدة من جديد قرب ليها حكما من يدها
سمير:عصمااء...عصاااء...افطني....عصمااااء
سيليا غير حاكمة فيد ايلين وتشوف مشوكية كيما حست هاد النهار كان مليان بالمفاجآة و هدا هو الصح آخر توقع دارتو فبالها يظهرو يعرفو بعضهم وعلى حساب هاد اللقاء علاقتهم مش غير معرفة صغيرة كاين حكاية كبيرة مخبية ورايحة تتكشف تصدمهم أكثر
جان يشوف من جيهة أمو حبيبة قلبو دايخة قدامو ومش داري وش بيها ومن جيهة الراجل اللي عرفو غير من ايلين حاكم أمو ويعيط تقول يعرفها من عوام وش هدا؟؟؟
سيليا شافتهم كامل دايخين ومصدومين تخطفت هزت كاس ماا وقربت رشتو على وجه عصماء باه تفطن ونفهمو الروينة اللي صايرة
سيليا:خاالتي خاالتي افطني
عصماء تحل فعينيها بالشوي :سمييير....رجعت
سمير حكم يدها وسلم عليها متناسي لولاد اللي معاهم:ايه يا روحي اييه هاني نتي اللي حسبتكم خليتوني
جان هبل كي شاف راجل غريب يبوس فيد أمو ويتعدا على حرمة باباه حكم يدو وبعدو عليها
جان:عميي وش هدا و ااش هبلللت؟؟؟وش راك ديير؟؟
ايلين قربت تكالميه بيسك بلاك فهمت لحكاية مي راهي مستنيتهم هوما يحكيو:جاان كالم توا خليهم يفهمونا وش كاين وهز خالتي من الارض
جان توله لحالتها عاونها توقف بعدما خفت عليها الدوخة تاع الصدمة وحطها قعدت مع الطابلة
مسحت على وجهها وشافت فيه
عصماء:جاان ..وليدي ....هدا با...بااا..ك باباك يا ولدي
سمير هز عينيه فجان ودمعتو طاحت ولدو حبيبو اللي خسرو من سنين راهو قدامو جرا جبدو لقلبو ديراكت يحضن ويسلم ودموعو يسيلو خلاو قلوب الباقي تتقطع
سيليا تبكي على حالة سمير اللي تعتبرو باباها وكان ديما يقولهم عوضتو غيبة مرتي وولدي مي راهم عايشين مرتو وولدو بأحسن حال قلبها قالها راحت بلاصتك وصايي رجعتي وحيدة كيما كنتي ايلين تفكرت حنانة باباها الغالي اللي كان يقبل يمسوه فعينو وميقيسوهش فيها كان مدللها وحاطها فعينيه وعلاه لالا وهي بنتو وحيدتو حبيبة قلبو الوحيدة مي الدنيا مخلاتلهاش فرحتها الوحيدة بيه وخطفتو منها كيما دارت لكل شي مليح فحياتها قربت حضنت صحبتها مستمتعين بحفاوة المنظر ومخليين دموعهم برك تعبر
جان الصدمة قليلة فيه كيفاه بعدما كبر يعرف بلي معندوش أب فكتافو يدافع عليه وقت يغلط كيما باقي الولاد يعني ملازمش يغلط كبر بعقلية يعوض أمو وش فاتها وميعول على حتى واحد كبر يعرف غير القوة والدموع والتعب ممنوعين عندو تعب وتعب وتعب باه وصل هنا حتى يظهر باباه عايش ويخرج فوجهو بهاد الطريقة لو ماشي شخصيتو القوية اللي بناها حياتو كامل بلاك رايح يهبل بعد هاد الموقف مي مزالو مستحمل وواقف والو حركة لااا
سمير عايش اللحظة وغايس غير فحضن ولدو يشم فريحتو يشبع منها
عصماء قربت دموعها ويدان آخر شي توقعت تشوفو بعد عمر كامل يرجعو يتلمو راجلها وولدها حضنتهم للزوج لازة جان لصدرها تعطيه القوة وخلاص
سيليا محملتش من هاد المنظر شهقت بقوة وخرجت تجري خارجة هاربة من واقعها الأليم وضر قلبها اللي كان يبكي دم توحشت أمها وباباها اللي متعرفوش حتى تفكرت كيفاه اللي حسبتو باباها هو سباب عذابها حياتها كامل هو سباب وجيعتها وقهرتها مي شكون عالم بيها مقدرتش تبقى معاهم مش بيسك غارت نن بيسك تخنقت وحبت تشم هوا ترد بيه نفسها اللي راح باه ترجع تفرح معاهم بيسك بيانسير رايحة تكون فرحة كبيرة بعد هاد اللقاء الحماسي
خرجت للجاردان دموعها برك يعبرو قعدت على كرسي وهزت راسها للسما الدنيا ظلام والنجوم مزينين الحالة السماء هي أكثر بلاصة يرتاح فيها الانسان وقت يشوفها يحس بلي كامل همومو ميجيو والو مع صفائها وكبرها وبلي كيما كاين ظلام كاين نجوم وبيناتهم ظلام رايحة توصل ليهم متأكدة رايح يجي يوم وتسطع نجمتها وسط ظلمة حياتها وتكون فرحانة مع عايلتها هزت تلفونها تفكرت وش عرفت ليوم يعني علاه ليوم بالذات كلشي حب يتفضح ويبان وش هاد الصدفة ووش هاد القلوب اللي تبعد بين الام وبنتها بسبة الموت وتبعد بين الاب وولدو بسبتها تاني شافت فنمروه وحبت تعيط تسمع صوت لينار بلاك تخفف عليها احساس الذنب هدا اللي مخليها حارمة ايلين من فرحة بنتها مي.... لازم
قاعد يكونيكتي ويتفرج حتى صونى فيدو تبسم كي شاف اسمها لا اراديا فات بين عينيه أول مرة شافها كيفاه فاتت وخبطت فيه وكيفاه كانت حالتها كانت كيوت وقطة معرية على نيبانها مي مع ذلك مميزة وأسرتو من وقتها هز بشوق لسماع صوتها
مازن:أهلاا الزيين
سيليا تبسمت لا اراديا هو ديما هك مهبول ورايح يهبلها معاه:احم لينار راهي تم؟؟
مازن تقعد من بلاصتو كي سمعها حس بنبرة صوتها مهيااش يعني صايرة حاجة:وش بيك علاه راكي تبكي؟؟
سيليا تخلعت هزت راسها فالجاردان تدور فيه حسبتو يشوف فيها:وينك منين شفتني؟؟
مازن:ني راقد فبيتي مي بلاك عينيا وقل...عينيا عندك
سيليا:هههه جاوبني لينار وينهي؟
مازن:راقدة راح الحال تعرفي الصغار لازم يرقدو بكري
سيليا:ايه صح
مازن:ايه وعلاه راكي فاطنة مالا
سيليا:ههه نتا قلت الصغار
مازن:هاهاهاها وااو قولي و الله علاه نتي كبيرة؟؟
سيليا:ايه خليتلك الصغر ليييك
مازن:اممم فيك غير فمك نتي
كانت رايحة ترد حتى شافتو خارج من الباب مهدود ووجهو تاعب نطقت في وذنو وخلات نارو تغلي
سيليا:جااان (وكوبات) وجرات لعندو
جان شاف فيها وتبسم تبسيمة تاعبة ومتعبر على والو :وش ديري شكرودة
سيليا حكمتو من يدو وكركرتو للجليسة خلات الضو تاعها يشعل وقابلتو تحكي معاه وهو تااايه
سيليا:جاان ..لباس؟
جان شاف فيها وتبسم:ههه بلاااك..معرف ..بلاك لباس ..وبلاك لا
سيليا تنهدت بانكسار وقلبها ضرها لحالتو كيفاه هدا جان اللي كانت تشوف فيه كتف الأخ القوي اللي متهدو ريح ضك ملامحو متعبر لوالو مي لازم تعاونو :شوف علابالي صعيب عليك هاد الشي وبزااااف تاني ميي ..شوف للجزء الايجابي .يعني ظهر عندك أب تتسند عليه وتحس بالأمان ونتا معاه ...أب اسمك على اسمو وهاز دمو في عروقك ..أب كي تخدم يوقولو مشاء الله رفع راس باباه فلان ..علاابالي المشكل في الوقت اللي فات وكيفاه الظروف بعدتكم مي متأكدة كاينة سبة كبييرة صدقني هو كان ديما يحكي عليكم مي كان حاسبكم ميتين ونفس الشي نتوما يعني كاينة لعبة لازم تفهم الحكاية وتعرف وش كاين وتوقف مع باباك ويماك ..ههه لازم تفرح ضك وقت تتزوج وتجيب ولاد يكون عندهم جد حنين كيما عمو سمير الدنيا وما فيها صدقني.
جان شاف فيها تحكي ودموع فعينيها بلاك كانت تحكيلو فالشي اللي كانت حابة تعيشو فحياتها:علابالي كاين حكاية ورا هاد الشي مي تبقى صعيبة بعد هاد العمر
سيليا:ايه ونتا سمعت هاد الحكاية؟؟
جان:لا..خرجت ديراكت كي بعد عليا ومحبيت نسمع والو تخنقت
سيليا وقفت وجرتو من يدو:نووض ..نووض
جان:ويين
سيليا::للدار لازم تسمع باباك وتعرف وش صرا وتوقف مع باباك ويماك ولازم تعوضو كامل وش فاتكم ..جاان افرح بعد حياة كاملة ونتوما مفرقين ربي جمعكم تحت دار وحدة وخلاكم تكونو عايلة من جديد...قولي الصح مكنتش تتمنى يجي نهار كيما هدا؟مكنتش تتمنى يجي نهار وتظهر كنت عايش فكذبة ويظهر عندك أب يوقف فكتافك...أب تتسند عليه وقت تتعب من هم الدنيا
جان والو حرف لا غير يشوف فيها وفعينيها غارق فكمية القهر اللي فيهم :نتي متمنية هاد الشي؟
سيليا تنهدت وتبسمت بعدما مسحت دمعتها:أكيييد متمنيا يكون عندي اب فكتافي صح عمو سمير ديما حاسبنا بناتو مي مش كيما باباك تاع الصح مام بابا مات قبل ما نتزاد واللي حسبتو بابا عواااام من حياتي هو اللي دمرلي حياتي ...مي معليش مزلت متأملة بلي ربي رايح يعوضني وراني صابرة ونتا جا اليوم اللي عوضك ربي فيه النقص تاعك ولازم تحمدو وتعيشو بتفاصيلو يا جان
جان تبسملها وحضنها:معلاباليش كيفاه نردلك خيرك مي نحسك ختي الصغيرة مالقري لسانك أكبر من عمرك مي معليش ههههه
سيليا تبسمت وحضنتو عكس نفورها الدائم من الرجال برك حبت تتحسسو بلي الدنيا متحبسش وبلي حبابو ديما رايحين يكونو معاه ويمكن طفات شوي من ألمها وهي في حضنو بحال أخ وأخت .
كان قاعد وعايش اللحظة حتى عماتها فاللخر كلب وعقلو طار على آخر كلامها وش راهي تدير فهاد الوقت مع جان راجل أختها ولا والخوف اللي كان فصوتها خلاه يهبل وقف رمى الغطا بعيد عليه وبقا رايح جاي فبيتو يمسح على وجهو وينفخ بالقاوي
مازن:افففف....افففف..اففف.يااااربي وش هدا؟؟؟علاه راني مقلق تندب تهدر معامن حبت....اففف مي علاه فالوقت هدا وش راهم يديرو (فات بين عينيه كيما جان م الف يحط يدو على كتفها زاد هبالو)حكم طريقو لبيت خوه يفرغ غشو سينو يهببل الليلة الكلبة هادي
راقد في أمان الله حتى فطن على الزلزال اللي ضربو
ماهر:أستغفر الله وش صرا مع الليل؟؟
مازن رما الغطا للرض:والو وش رايح يصرا برك نتا كنت خامر بالرقاد .نوووض
ماهر تقعد ضارب فيه تخنزيرة حسو منها حاكم روحو بسيف باه ميقتلوش:علاه قالولك رايح نحارب؟؟ وراه الليل يا سي خرا طير ترقد لا نوض نشوهلك وجهك
مازن:الليل لماليه اصاحبي ونتا ما عندك لا مرا لازوج هيا مالا ونسني انا واسمعلي
ماهر حكمو من رقبتو ورقدو قدامو فالسرير رايح يخنقو:نتا هبلت مع الليل يااك ؟؟ااه؟؟وشمن فايدة فيك مع الليل قالو عليا متزوج بيك وناسيك ااه؟؟
مازن قلبو وجا فوقو يخنق:عزرييينك اييه متزوج بيا وضك تسمعلي سينو نفرغ غشي فيك خراا وزيد كن جا عندي مرتي منجيش نندب عليك (بقاو يشوفو فبعضاه وتفقلو بالضحك ضربة وحدة)
ماهر هبط مازن من عليه وجا قاعد قدامو وهو مربع رجليه:احكي اعاقبتي ترا وشبيك هابل مع الليل
مازن:شووف ماهر رايح نسقسيك...ضك كي تحب تخبي حاجة على عينين الناس كامل وتهبل كي تخمم بلي غيرك معاها وقريب ليها ونتا بعيد لا عالم وش راه صاري وكي تشوفها تغيب على الدنيا وحواسك كامل تتخدر وتسكت ونتا بعيد عليها عينيك يحبو غير يشوفوها..وقت تغمض عيونك متجي غير صورتها بين عينك ووقت تشوفها يديك ورجليك لا اراديا يدوك عندها ووقت تشوفها تاعبة وذابلة تحب تكون معاها وتعطيها قوتك ومترضالهاش الهم.... زعما وش هدا؟؟
ماهر حاكم ضحكتو بسيف وهو يشوف فيه يشعر وعايش اللحظة وفنفس الوقت فكرو فروحو كي كان بعمرو وطاح فحبيبة قلبو اللي ما غيرها سكنت القلب واستولات عليه تبسم ابتسامة عريضة ونطق:أولا يا خويا الغالي اللي تحكي عليها مش حاجة وانما طفلة ,ثاني شي هاد الشي اسمو الحب
مازن :تسما كيفاه زعما نحبها؟أوو وكتاه عرفتها حتى نحبها ؟زعما خطفتلي قلبي؟كيفاه دارتها وانا معنديش شهر عرفتها (كان يحكي بينو وبين روحو)
نطق ماهر وكأنو كان يقرا فأفكارو:كلشي ممكن مازن الحب معندوش عمر ولا وقت محدد يخليك تفهم وكتاه طحت فيه ولا كيفاه ,اللي نقولهولك ضك بلي لازم تحارب باه تكسب حبك وميتخطفش من بين عينيك وتبقى في ندامة
مازن:تبسم معاه وحضنو:رايح نحارب ونجيبها تزهيلكم الدار ههههه
ماهر:ايييه شكون مسودة السعد هادي؟؟
مازن:هههه نناك قول المزهرة مشاء الله وزهرها يكسر الحجر
ماهر:اممم كي شغل صح هيا انطق .