#وكر الأشتر

المحطة الاخيره

اخر محطات الرواية
رواية ...وكر الاشتر
بقلمي ... نور سمو العراق

❤️❤️❤️❤️❤️❤️❤️❤️❤️❤️❤️❤️❤️

سالت الدماء الحارة على ذلك الاسفلت الساخن
وتطايرت اجسادهم الى اشلاء
وانتقلت  الارواح البريئة الى بارئها.. 
لكل منهم عائلة احباب وطموح واحلام
سالت هذه الدماء في اكثر بقع العالم قداسة
وكأنها بقعة لا ترتوي من جىيان  سيول الدماء فوق تربتها
منذ الازل..وكأنها عاشقة لدماهم بل وتتلذ بها

................

صفاء

جنت بحالة ذهول من الوضع الي صار حجيت ويه اشتر الي جان وجهه ما يتفسر حتى ما يعرف شنو يحجي جان متوتر منهار متدمر

لزمته ودرته عليه عطت بيه ... اشتر احجييي شبيك شبيهن البنات اتصلت عليهن

جاوبني وهو يكول برهبه واضحة على ملامح وجهه .. ما ادري صفاء ما ادري كلبي راااح يوكف صاير انفجار والبنات يخابرون عليهن وماكووو

انطاني الموبايل وهو يرجف كال .. اتصل بيهن اني حتى ما اعرف وين صارن الارقام

كعد على القنفه وروحه ترجف آخذت الموبايل واتصل ماكو محد يجاوب الموبايل يطلع خارج نطاق الخدمة

وكف وهو متعصب ... ولك شلووون انظل هيج ما نعرف وين ما وين لك راح انجلط

ركب السياره بسرعه وحت وراه بسيارتي ومصطفى ويانه هن راحن للسوك يشترن اغراض وصار الانفجار بنص السوك الي راحن اله اكيد هسه ماتن

ركضنه كلنه شفنه المكان مطوق والعالم تتصارخ كل واحد فاقد عزيز والنسوان مرعوبه ومنهاره وسيارات الاسعاف تنقل بالشهداء والجرحى

اول ما وصلنه وصار الانفجار الثاني  ما اكدر اوصف شعور الناس ولا اكدر اوصف الضجة الي صارت والرهبه صغرت بعيني الحياة  كرهت روحي  احس بخنكة احس ملك الموت محاصرنا عظيييم هذا اليوم

الرهبه والخوف وطلعان الروح والموت مثل الوحش الفتاك الي بهذا اليوم ما رحم لا كبير ولا صغير اخذ شكو كدامه مثل الأعصار مثل الزلزال

مصيبه ماكو منها مصيبه والاحبابه بخير لو يذبح قرابين لوجة الله وتعالى مراح يوفي حق هذا اليوم

انفجارين ممتالين واحد وره اللخ بحيث حتى الي نجى من الموت تهدد مره ثانيه ويمكن الي ما مات بالانفجار الاول يموت بالثاني

شفت مره تصرخ وبنتها ميته بين اديها شفت العجائب والمصايب جنت بدوامة بحالة صدمة

صرخت بصوت عالي واني ... اخووي اشترررر اخوي دخل للسوك

ردت ادخل طوقوا السوك وخلوا بس المسعفين واصحاب التكاتك هم يدخلون ينقلون الجرحى لان خافوا من انتحاري ثالث ما اشم بس ريحة الدم وما اسمع بس اصوات سلب الروح من الجسد

صرخت على الشرطي واني احجي وياه ... فدوووه الله يخليك اخوووي اخوي هنا الله يوفقك بس اريد اشوف خاف مات خاف صار بيه شي

جاوبني وهو يدفعني .. يابه وهروا منااا هاي روحكم هاي ارواحكم حرام عليكم هيج تسوون الي نفذ بروحه يطلع بروحة العزيزه ليش ترجعون ما تشوفون شلون الوضع متازم ما تشوفون هسه احنه عبالك بجبهه محاصرينه من كل الاتجاهات

حطيت ايدي على وجهي واصرخ اتصل بيه يطلع خارج نطاق الخدمة اتصل بسولين وافيان خارج نطاق الخدمة

لطمت على راسي .. ماتووو والله ماتووو ماكو هيج شي ليش ما يجاوبون

رد عليه واحد من الضباط وهو يكول .. الخدمة انفصلت كولوا يالله روحوا للمستشفيات شوفوا بلكي عوائلكم هناك

شفت مصطفى من بعيد اجه يركض وهو يكول ... وييينهم وينهم ماتوووا احجي ماتوا

حطيت ايدي على راسي ... ما ادري ما ادري ولك راح اموووت كلبي راح يوكف محد طلع من السوك عايش وهسه هم لا ويه الموتى ولا ويه العايشين وين نروح

مصطفى من عصبيته وانهياره لزم الموبايل وفلشه وتعارك ويه الشرطي لان ما يخليه يدخل جوه للسوك وهي الناس صايره لحم

شفت سيارة الاشتر مركونه ركضت واني اعرفها شفت اللحم والدم تارس الجام مالتها شكيت القميص واني اصرررخ ... مااات اخوووي مات ياربي لااا والله هسه ارتاحينه هسه شفت باب الله ياربي دخيلك خليهم مكرمين بيهم شي بس كون ما ميتين ربي دخيلك

لزمت مصطفى واحجي وياه وهو يرجف يرجف اول مره اشوف اخوي مصطفى بهاي الحاله كتله ... مشينه خلي نروح للمستشفى بلكي نلگاهم هناك

تنفس بضيق وكعد على رجليه وهو يكول .. مجاي اكدر حتى امشي ولك ما ادري شبيه هسه مرتي واختها واخوووي مصيبه كون واحد منهم يطلع سالم يارب دخيلك والله اتوب توبه نصوحة بس لا تفجعني بإي واحد بيهم كمل فرحتي ياربي انت تعرف بالحال انت تعرف شنو الي عانيناه تعرف يارب لا تكسرني بداية شبابي

لزمته واني اهدي بيه .. كول يا الله بلكي يطلعون ما بيهم شي بلكي الله ويطلعون بخير وسلامة

بلع ريكة وهو يكول ..  شكد ما احاول اكون ايجابي من اتصل ويطلع خارج نطاق الخدمة افصل اتهستر افقد كل امل بداخلي والله مجاي استوعب شلون خليتها تروح كل بسببي اصريت تروح وتخلص شغلاتها

اني السبب بكل شي ياربي مستحيل لا يارب دخيلك

اخذته ورحت بيه ظلمت الدنيا وغاب نور الشمس وصارت ليلة مغيمة ومفجعة لاهالي الضحايا جانوا فرحانين بشغلاتهم وملابسهم ومشترياتهم وصاروا مكسورين مفجوعين  بسبب الانفجار الي صار وفقدهم احبابهم

اذا حل الظلام تكسرت الاماني واسودت الدنيا وراح الامل اليل يخوف يفقدني الثقه يفقدني الامل ماكو مكان الكاه بيهم الا ثلاجة الموتى

اول ما مشينه مسافه واتصل موبايلي من رقم غريب فتحته وكلبي يرجف ايقنت ان هذا الاتصال من المستشفى يكولون تعالو استلموا جثث موتاكم

خفت افتح خط وما تشجعت ومصطفى اخس من حالي بعدها فتحت خط وحسيت الموت حظرني ذقت سكرات الموت غمضت عيوني واني اسمع اول حرف من المتصل

سمعتها وهي تصرخ ... صفااااء صفاااء احجي فدوه اني سوليين احجي وياك

بلعت ريكي وجاوبتها بلهفه وخووووف ... هاااا سولين هااا بشريني انتم بخيير محد منكم بيه شي فدوه طمنيني احجييي

جاوبت وصوتها محشور من الصريخ ... صاار انفجار كدامنه امين انضرب برجله شظيه وو هاي افيان تت تخخ تخربطت وضاعت تلفوناتنه اتصلت عليك من المستشفى من الشرطي

بلعت ريكي .. زين بس حاجيني انتي وين بيا مستشفى حتى اجي عليكم هسه

جاوبتني .. احنه بب بم م مدينة الطب فدوه اخابر امي طمنها ما حافظه رقمها كلبي راح يوكف شفت العالم تموت والله شفتها تموووت راسي راح يطك من الرجع

بللت شفايفي بحيره .. يله تمام هسه جاااي يله لا تخافين ديري بالج على روحج وعلى اختج واخووج

مصطفى لزم ايدي وهو يكول .. هااا بشر شلونهم

جاوبته واني اسوق بسرعه ... لا الحمدلله ما بيهم شي افيان متخربطة وامين مضروب برجله شظايا

باوعلي والشحوب طاغي على ملامحه وهو يسال بشك .. متأكد ؟

جاوبته بسرعه .. والله لا تخاف

هز ايده وهو يصرخ بوجهي ... واشترررر شلووون وين صار اخوووي وين لا أله الا الله ياربي والله فرحنه وكمل فرحتنا لا تفجعنا باخوي

تنهدت واتصلت على تسواهن طمنتها ورحت عندهم ادور بالمستشفى على اخوي ماكو فص ملح وذاب

..................

جيهان

جنت ببيت عيالي خابرت على افيان كالت حتروح للسوك هي وسولين وصيتهن على شغلات وره ماكو نص ساعة من راحن وهو صار انفجار اني سمعته حسيت البيت اهتز جان السوك قريب على بيتنا

تخبلت بس مجنت اعرف بالسوك اجت حنان تركض وهي تكول .. الحكوو صار انفجار بالسوك ورايحة ضحايا وشهداء

عقدت حواجبي وكلبي احسه وكع بين رجليه .. يا سوك

جاوبتني ... لج سوك (؛... )

لطمت على خدي حييل ... عزاااا العزاني صخام الصخمني دهر صابني اخواتي واخوي امييين بالسوك يمه يمه بس لا ماتن

اتصل  عليهن اتصل ماكو  يمه احس حلكي نشف حتى ما اكدر ابلع ريكي يبس حلكي والطفل احسه تكطع ببطني

اجه جدي هو يكول .. على كيفج بويه على كيفج ان شاء الله ماكو شي

جاوبته واني ابجي ... لا دا اتصل بيهن وماكووو يمه والله امي تموت شلون يربي كلبي راح يوكف كلبي محد ما اكدر اوكف على رجليه

كعدت على القنفه رجليه وحده تطك بالثانيه اجت كوثر وهي تكول .. هسه اخابر عليهن لا تخافين ان شاء الله ما بيهن شي كولي يا الله والله هسه يطلعن ما بيهن شي

كريم جان مو هنا باوعتله والدموع مثل المطر ... ما اكدر اريد واحد يصبرني اريد اصبر ما اكدر دا اتصل ومحد يجاوبني اكيد بيهن شي حتى ما يجاوبن

جدو كال .. يله بويه امشي خلي اخذج لاهلج خلي انشرف شنو الوضع

احس صارت ربكة بصدري .. فدوووه جدو شنو بيهم شي ماتووو يعني ماتو فدوه احجي والله بطني تكطعت من الخوف

جاوبني وهو يكول .. والله يا جدي ما بيهم شي لا تخافين انه كلبي بارد ومرتاح والله ودام هيج مستحيل يكون بيهم شي كولي واذكري ربج

حطيت ايدي على وجهي وبجيت حظني وهو يسكت بيه. وبعدها رحت لبست صايتي ورحت لبيت اهلي راحت ويايه ام حسن وكوثر

جانت ازدحامات والعالم مخبوصه كوه وصلنه لبيتنا اتصل بيهم ماكو رنا جانت عند اهلها اتصلت بيه وهي اريد تتطمن عن البنات بس اني ما عندي شي يطمنهم

وصلت لبيت اهلي ودخلت لكيت ماما تصرخ ومتخربطه وخاله تسواهن تصبر بيها وتريد تسكتها وماكو

حضنت ماما وابوس بيها واطمنها .. ماما لا تخافين والله ان شاء الله ما بيهم شي هن راحن متأخرات والانفجار صار قبل لا يوصلن اكيد والله بس انتي لا تخافين

هزت راسها بنفي وهي تكول وتصرخ .. لا يمه بناتي وابني راحووو ماتوا أني متأكده ماتوا ما يردون عليه محد منهم يجاوب يمه كلبي راح انجلط يمه منو يطمني عنهم شلون خليتهن يرحن

جاوبتها كوثر وهي تكول .. لا خاله والله ما بيهن شي واذا على الاتصال هو من يصير انفجار اكيد الشبكة تروح بس والله ما بيهن شي لا تخافين اصبري هسه يجون

بجت وردت عليها.. لا ما اكدر ما اصبر بناتي وابني انهجم بيتي بيتي انهجم فوك راسي يمه صاروا لحم يمه سوده عليه ما اكدر امشي ما اكدر اجي اركض عليكم اجي اشوف حالكم بيه لهفه بس رجليه ما تعيني

جا هسه اني كاعده بنص السوك كاعده بنص الانفجار يمه

شويه وصار الانفجار الثاني وجان هذا الانفجار بمثابة الكشه الى قسمت ضهر البعير

وهنا كل واحد منه همه كبير وافقد الامل بكل شي وزاد الطين بله صاروا الولد حارث وجدي وجاسم يروحون ويجون

انوب الاشتر اختفى نتصل بيه ماكو بعدين صار المغرب وظلم الرقت امي من شافت الوقت ظلم انهارت صارت تبجي وتلطم حيل

وتسواهن جكارتها ولابسه عبايتها مفتوحة وتوصل للركن وترجع وتغلط عليهن .. برابيج كح .. كلتلهن لا ترحن ازدحام روحن باجر بس منو تاخذ الحجي ريه لو سكينه بسيطه تجن لو ما تجن الا انعل ابو الخلفجن

من صار المغرب فقدنه الامل بس بين الحيره والدمعه واللهفه اتصل موبايل تسواهن وحجينه ويه صفاء الحمدلله طمنه عنهم

ظلينه نهلهل ونفرحنه امي كالت .. اريد اروح اروح الهن بناتي وابني

اخذها جدو هي وام حسن وتسواهن واني وكوثر ظلينه بالبيت لان ماكدرت اروح حامل واحس ظلت توكع عليه ما اعرف شنو. من الخوووف

لزمتها كلتلها بوجع .. كوثر بطني توجعني

سحبتني ومددتني كالت .. ارتاحي هاي من كثر الضغط مو كتلج ما بيهم شي الحمدلله ريحي نفسج

سكتت مجاوبتها بس والله شويه من راجعت دكتور نفسي شويه صارت زينه جانت شايله ابن سولين وتلعب بيه وتبوس بيه وهو هماتين تجاوب وياها ويضحك وفرحان

خطيه ما يعرف شصار بأهله اليوم بعدها عقدت حواجبي .. هو ليش الاشتر ما اتصل ولا حتى شفنه وين صار شسالفه وين يعني لحد الان حاقد على سولي حتى ما صدك جذب اتصل عليها وتطمن

............

سولين

بعدنه هسه دخلنه للسوك وصار الانفجار الرعب الي شفته لو اعيش عمرين مراح اكدر انساه جنه نركض ونبجي الموبايلات والجنطه كلهم ضاعن ما ادري حتى وين صارن حتى ارواحنه نسيناهن

ما اشوف الا الدم ينزف من رجل امين حتى هو جان ما يدري شنو الوضع  ولا حاس بالوجع بس بعدها خنطل وظل ما يكدر يمشي وكع من طوله

ظليت اصرخ واجو اعل التكتك شالوه جان ويانه واحد ميت صاعد بالتكتك ومخه طالع افيان من شافته وهي ظلت تتقيى وتصرخ واتخربطت اريدها بس تكعد ماكو فاتحه عيونها وحتى ما تتنفس

ظليت محتاره اصرخ من الانسان الميت كدامي اصرخ من اختي الي انهبطت وما ادري ماتت مدري راح تموت واخوي مصوب برجله وحالته حاله

وصلنه للمستشفى واخذوهم للطوارى وكل شويه جايبين شهيد وكل شويه ناس تجي تعيط وتصرخ

ما ادري راسي متت ولعبت نفسي وبس ابجي امين ضمدوا رجله والحمدلله الوضع صار طبيعي عنده

وافيان كوه كاعده حتى ما تحجي مصدومة خطيه

ماكو موبايل اتصل منه خابرت من الشرطي خابرت على اشتر يطلع خارج نطاق الخدمة رجعت خابرت على صفاء حصلته الحمدلله طلبت منه بس يطمن امي واهلي

خطيه هو شويه ولكيته عندي بس من سالته عن اشتر سكت وراح بسرعه بس تطمن عليه هو مصطفى

خفت حيل واتخبلت ليش اشتر مو وياهم ليش ما اجه ليش ما تصل اعرفه اشتر مستحيل يتركني حتى لو بينه اي شي

اجت امي واهلي كلهم اتطمنوا عنه امي ما نشفت عيونها من الدموع ولازمتني وتبوس بيه وحاظنه امين

طلعت اني بروح مسلوبه والدموع مثل الشلال كلبي نغزني انصلت على صفاء  من موبايل امي اريد اعرف شنو اشتر وين ليش هيج ما اجه صاير بيه شي ليش كلبي يكول بيه شي ليش ما متطمنه

رد عليه صفاء كال بحزن.. هااا سولين

جاوبته بدموع ... اشتر وين

سكت ثواني ومجاوبني بلعت ريكي همست ... وين اشتر احجي صفاء

جاوبني وهو يكول ... اشتر ماكو اختفى

فتحت عيوني مصدومة مذهوله كلبي رجف ... شنوووو انت شتكول وين راح شلون اختفى هو وين راااح حتى اختفى

جاوبني بحزن وهو يكول ...راح وراج حتى يشوف شلونج اجه المكان الانفجار اجه وما لكاج وصار الانفجار الثاني وهو داخل السوك سيارته هسه وضعها كله دم ولحم ما اعرف شنو الوضع راح اتخبل سولين راح اتخبل

ما توازنت من كال هيج وكعت على الكاع مصدومة الموبايل عفته حتى الكلام اخر شي ما سمعته

وكفت واني اركض ادور بين الموتى ادور بين الجرحى ادور عليه جاي الخاطري جاي حتى يتطمن عليه تالي يحاصره الموت بالانفجار الثاني

كعدت بالقاووش العالم وين واني وين لكل مغيم عليه الحزن والحزن صابني وكسر خاطري

طلعت بسرعه ارجف الدموع تتطافر من عيوني مدا اكدر اصبر هو حب حياتي هو روحي اي اجه لخاطري دخل بحلك الموت جازف بروحه حتى يتطمن عني

خابرت صفاء اجه عليه جان عيونه حمر ويريد يبجي اصلا هو باجي منا لمن الله كايله بس

لزمت ايده واني اتوسل بيه ... فدووه صفاء فدوه وينه ماكو شي عنه ماكو خبر كلبي راح يوكف هذا ابو ابراهيم فدوه راح اموت والله

كال .. والله ماكو خبر ما خليت مستشفى يعتب عليه ولا خليت مكان حتى السوك رجعنه دخلنه اله ماكو اي شي يخصه بس سيارته موجوده

بلعت ريكي وبجيت .. شلون يربي ما اكدر اصبر

طلعت وياهم حتى ندور ما خلينه مركز ما حطينه اسمه ولا مستشفى صبح الصبح واحنه بعدنا

اني كلت مات لان مو معقوله لحد الان ماكو خبر عنه مستحيل ماكو هيج شي

ظليت اللطم وابجي ... يمه مااات والله مات اكيد لعد شلون هيج وين صار يربي دخيلك لااااا والله احبببه ما اكدر اعيش من دونه والله اصير حبابه وبعد ما احجي وياه بس رجعه اليه

والله بعد هذا هو بس كون يرجع والله حرام ابني يعيش يتيم يربي مثل ما رديت يوسف اليعقوب رد اشتر اليه ياربي يا حبيبي

ويه ما ابجي وامسح بدموعي اتصل موبايل امي اخذته منها واتصلت عليه شكد مجاوب بعدين اتصل ويه اذان الفجر فتحت خط بسرعه جاني صوته المتعوب وهو يكول .. سي سوليين انتي بخير

صرخت بصوت عالي واني اكول ... اشتررر انت عدل انت عايش ما بيك شي فدوه طمني عنك حبيبي فدوه

جاوبني وهو يكول بتعب واضح على صوته .. اني بخير طمنيني عنج يرويحتي

بجيت بسرعه وشهكت ما كدرت اكمل مصطفى اخذ الموبايل مني وهو يحجي بلهفه ويه اشتر يكوله .. اشتر بس احجي انت بخير ما بيك شي طمني رحمة للكائنات مو حتى شيبت قبل عرسي

رجعت اخذت الموبايل خمطته منه واني احجي .. هااا اشتر انت وين احجي طمني يروحي

جاوب .. بالمستشفى مستشفى اهلي خاص

عقدت حواجبي .. شوداك للخاص يمعود

جاوبني .. والله ما اعرف كعدت لكيت نفسي بالمستشفى الظاهر قبطت المستشفيات الحكوميه

بجيت ومسحت دموعي ..المهم انت بخير

جاوبني وهو يكول .. كلت اذا سولين مو بخير يا ربي لا تكعدني ما احس بطعم الحياة من دونها مريتي هاي صح مطلكها بس ارجعها وغصبا على شواربي وشوارب اهلي كلهم

رديت عليه... اسم الله عليك يروحي بشرني بيك شي انت

جاوب .. ايدي شظايا وراسي خياطات اربعه ورجلي شظايا بس الحمدلله الوضع طبيعي لا تخاف حبيبتي

سحب الموبايل صفاءبغضب وهو يكول .. عاد مو وكت غزلكم خلونه نروح نشوفه

صدك رحنه لكيناه خطيه أيده مربوطة ورجله مجبسه وكذلك راسه مصمد سوده عليه صاير بيه فلك بس هو قوي و واكف على حيله

ابتسمت من شفته عبالك هلال العيد الحمدلله واخيرا شفته بعيوني واتطمنت وفرحت بشوفته

اخوانه حضنوا وتحمدوا اله بالسلامه واجن اخواته ورجل اخته الضابط سلموا عليه ظلينه كاعدين يمه

جانت نظراته عليه بس اني جنت خجلانه منه حيل ما اعرف ليش يمكن لان لحد الان منفصلين

بس تطمنت عنه رجعت للبيت وصلني صفاء لكيت اهلي كلهم هناك وابني من شافني ظل يريد يجيني ويضحك ويصفك باديه ابتسمت عليه يعمري شكد احبه والله زين ويعرفني من كد ما افتر حتى مرات افكر يمكن نساني بس الحمدلله طلع يعرفني امه الدم يحن ههههههه

لكيتهم ذابحين طلي بثواب وجهه الله تعالى على سلامتنا الحمدلله يارب الكل بخير وسلامه بس لحد الان غصه بداخلي بسبب الناس الي ماتت ماكدرت اتخطاهم لا  بيوم ولا باسبوع ولا اسبوعين

مرت الايام كدرت اتناسى وكدرت اصبر على الموضوع الي صار الحمدلله

.....................

افيان

من بعد الانفجار دخلت بحالة نفسيه فضيعه صح اني وكحه وعصبيه وسوالف ليلى علوي كلهن عندي بس بصراحة تاذيت حيل من شفت الولد ميت كدام عيوني والله فاجعه كسرتني كسر

بس خطيه مصطفى ما قصر وكف وياي وسندني جان دائما من يشوفني ضايجة وحزينه وافكر بهذا الموضوع ما يخليني الوحدي يطلعني يفر بيه المناطق كلها

صرت حتى اخاف اطلع اتجنب الازدحامات حتى العرس اجلته مو هسه اريد نفسيتي ترتاح يله

لان بصراحة حتى كوابيس دتصيرلي وشغلات تخوف احس صارت عندي تابعه من وره هذا الموضوع

لذلك اجلت موضوع لعرس وقررت اسوي بس عقد قران

بس هو ما قبل ظل يتردد موتني يريد يتزوج والله هسه اركعه بطابوكة هسه اني ويني وين العرس هي مال عرس صدك جذب غير اني مخبله صايره بيه حاله نفسيه مسودنه مو صاحيه

بعد سكتت فقيره متعيني على نفسي احجي وياه كلمة ياكلني ويشربني شسوي والله مو حاله هاي لازم اقوي نفسي ليش هيج فقيره ليش مطالعه على سولين وكحه

الحمدلله على كل حال يله اسايسه بلكي يمشي عدل

صدك هو اني من صار الانفجار جنت حاظرته ههههههههه خرب شكد حيه مثل اختي

خابرت على نسيبي سلمت عليه كتله على العرس يضغط على صافي حتى ياجله هو كال .. لا بعد ما ظل شي على الحجز ان شاء الله مال القاعه خلينه نفضها بخير وسلامه احسن

سكتت محجيت من الواجب احترام النسيب واحترام الحمه الكبير عيب هيج الاصول وحق الله يكول

بعدها كمل كلامه وهو يكول ... حيل فرحان اني اليوم لان ساهر سجنوه انلزم وعليه هواي دعاوي تهريب سلاح وبانزين وتهريب مخدرات ومتهم بقتل ام حارث يعني هذا هم جلب وتخلصنه منه

ضحكت بفرحة .. اي الحمدلله واخيرا الله خلصك منه وذاك تحسين شلونه

جاوبني .. حالته حاله تشوهه وكصو رجليه ثنينهن لان عنده سكر وصار عنده كنكري من الحرق يله الله يعينه والحمدلله على كل حال حوبة كل مظلوم ظلمة الله يوتقم من كل ظالم

رديت عليه.. الحمدلله على كل حال الله يشافي بس شيشافي هو صار نص ردن استغفر الله ياربي ربي لا تحسبها غيبه عليه لان من شفت الانفجار قررت اتوب

ضحك اشتر وهو يكول .. شيتوبج افيان ههه

ابتسمت .. والله قررت اتوب بس بعد شسوي ما ترهم ويه عباد الله التوبه يحبروني على. الغيبه

ظل يضحك وقتعني بالزواج والحمدلله مشت الامور طبيعية وكعدت احظر بملابس الزواجً

...............

سولين...

بعد مرور ايام واني بالي يمه اخذ حيز من تفكيري اكثر من قبل،  دعيت الله يحفظه لابنه ولگلبي

والله گلبي يوجعني عليه حييل ومابيدي شي اتمنى اروح واشوفه واطمن عليه بس صعبة كلش

اني مو على ذمته وهو بالنسبة الي غريب حتى لو ابو ابني بس يبقى طليقي ومحسوبين غربة اني وياه...

وهم الواجب يجبرني اطمن عليه حتى لو بالفون وهذا اضعف الايمان

اخذت التليفون ورحت على رقمه ودست اتصال
ثواني مو هوايه واجاني صوته تعبان

گلبي احسه توجع عليه اكثر

گال الو وانيى بس ساكتة واتنصت لأنفاسه

جنت مترددة احجي...  واخيرا نطقت
گتله شلونك ابو ابراهيم الحمدلله على السلامه

رد هلا والله الله يسلمج شلونج ام ابراهيم

كتله زينة اسأل عنك... عن صحتك شون صرت

كال هسه صرت زين... شنوو بالج يمي اني زين لتديرين بال...  ومشكورة على سؤالج واهتمامج

ظليت اتأتئ مااعرف شحچي

نقذني من الموقف والظاهر حس بيه اريد انهي الاتصال

كال شنو مناويه تبحبحيهه شويه

رديت بعدم معرفة شنو اشتر ماافتهمت عليك ابحبح شنو

رد يعني انت الظاهر عاجبج البعد ومرتاحة موو

لا انت امانطيت فرصة مو اجيتك واعتذرت وصديتني شنو اريد اسوي بعد

كال تعبان اني ومتأذي بدونچ سولين اريدج يمي فراگج هد حيلي الى متى...

جاوبته الموضوع يمك

سولين اني احبج لتظلين تبيعين ثگل

شنو تريد مني اكول

كولي تعال واخذني لو ماتريدين؟ 

ماريد شنو؟ 

اني متأكد واعرف كلش زين انت مو غبية وبنفس الوقت متأكد انت تتغابين كتلج هاي هيه خلي نرجع اني بهاي وكعتي وبهاي مرضتي محتاجيت علاج بكد مااحتاجيتج يمي

جاوبته واني مااقصر اكيد واذا تريد ترجعني اني ما ارفض
ونبلش صفحة جديدة...

كال هذا هو العصر اني جايب شيخ وجاي

رديت بسرعة بس انت مريض ومتعرض لحادث انفجار لازم تبقى بفراشك ترتاح

جاوب بفرحة لا والله مو من خابرتج كتلج صرت زين وفعلا من سمعت صوتج صرت زين وبعد صار هواي على الانفجار صرت حصان

ضحكت بصوت مسموع

رد اويلي هي هاي الضحكة اللي ادور عليها هايه الضحكة  دواي

غمضت مبتسمة وايد بيها الفون وايد على گلبي

كال ها هسهة شنو

سألته شنو

كال باختصار نرجع؟

رديت اي لخاطر ابراهيم

كال بزعل يعني بس لخاطر ابراهيم؟

ضحكت لخاطر حبنا همين

بصوت ناعس رد شون اني ويه بت عامر يابه جاي اني عود حضري نفسج وحسبي حساب جايب شيخ وجاي

ختمت المكالمة واني فرحانة حييل يكولي بحبحيهه وهو يبيع ثكل وميبحبح

وياه اني بغير عالم فعلا...

ورحت بدلت ملابسي
ولبست لابراهيم

طلعت لامي وحجيت الهه فرحت هوايه
وكالت اشتر خوش اشتر وكفاته هواي واحسن قرار هذا مال ترجعيله الله يسعدكم يووم

بوست اديها وهي اخذت ابراهيم مني
كالت لج هذا شلون راح افارگه

كتلها اخذج وياي  والله مراح تلحكين حتى تشتاقيله
ظلت تبوسه

وفلا ماجذب خبر اجه الاشتر وجايب وياه شيخ
وجو كهلان

وصاحوني ورجعنه عقدنا...  طول الوقت مبتسمة
واخير راح نرجع

واعدته بيني وبين نفسي احترمه واقدره وخاصة كدام الناس ومانزل من قيمته ابد..

وجان طلاقنه صحيح وكامله العدا وعقدنه من جديد كال ... ان شاء الله باليل اجي اخذج انتي وابني تنورين بيتنا يروحي

ابتسمت وحفيت وكطيت وسويت كل اللازم اشتريت ملابس من البيج اي والله بعد شنو اروح للسوك عمي اخاف

كتله عكب باجر ارجع لان عندي هواي شغلات اريد اخلصهن

وفعلا خلصتهن ورجعت من رجعت هو بطلني من مختبر علي وشغلني بمختبر كال هو مالتي بس يشتغل بيه صديقي واخته واشتغلت وياهم وادرس والامور جانت طبيعيه  الحمدلله وتصافينا اني وياه وما تعاتبنه ابد على كل شي صار ويانه من قبل

وظليت اراجع على رجلي كال الدكتور ينزاد الج تغيير مفصل وقررت اسوي العمليه بعد السنه الجايه لان هسه دراستي مهمه عندي وممستعجله على العمليه هي مو هلكد توجعني بس لان اعرج بيها اضوج

صرت اجمع فلوس التحليلات وكلت اسوي العمليه من فلوسي بس هو يكول فلوس المهر ما خلصتهن وان شاء الله انطيهم الج سوي عمليه

ادري بيه يضحك عليه ههه بس شسوي بعد احبه مو بيدي حتى جذبه احبه  وصلنه لهيج مرحله ههههه

.............

افيان

حنه ما سويت سويتها هيج بسيطه بالبيت لان بصراحة اتعب وما عندي صديقات هي بس تسواهن حتى حرامات اسوي الها حنه واخسر فلوس واني كرميده  طالعه على ابوي

بس سويت حنه على كد حالي عزمت بس اخواتي وموثر وعمتي ام حارث ورنا وتسواهن ركصنه شويه واحتفلنه ورحت نمت

كلتلهن بعد وره اسبوع العرس

تسواهن غمتني وهي تكول ... انهجم بيتج شهد الشمر اليوم الحنه وبعد اسبوع العرس شوف العياره عود هي طاكة ومعروفه

هزيت جتف .. اي عيني معروفه اني عندي براندات ومستحضرات كلها تعرفني جا مثلج ما يعرفونج غير ثنين بالركن هههه

عضت اصبعها وهي تتوعد اليه ... اكتلج اكتلج بسيطه ادزج لمصيفي مزوركة بنت المطي اني الج

ضحكت عليها وعفتها وره اسبوع صار العرس هم اجروا قاعتين قاعه للزلم وقاعه للنسوان

ومصطفى جان يكول .. لازم قاعه الكزاره جا ما تكفي القاعه

جنه نضحك عليه وبيوم العرس الصبح عايد خطب زينب اخت مصطفى لان هي اجت كعدت يم اخوها عافت عمتها لان عمتها من ماتت امها حاربت الكل وهم عافوها واخذوا حصصهم من الورث او بالاحرى بس مصطفى ورثها

رحت للصالون اني وتسواهن سولين مقبلت تروح والله شنو رجلها حاجز الها صالون مال اللطم كون وذيج الثانيه نفس الحاله

راحت وياي كوثر وتسواهن

حجزت بصالون راقي بس البدله جانت ردان ومستوره الحمدلله هو محد يدخل بس مصطفى

طلعت حييل حلوووه جنت متوتره وكل شويه واعيط بتسواهن وهي متحملتني على اعصابها على ساعه تكطع الماسكة على راسي وراس الخلفني

رجعت للبيت شفت ماما تبجي عليه كاعده بالعربانه بجيت ما تحملت حظنتها وهي ظلت تبوس بيه وتسكتني ما قبلت اخرب مكياجي

شويه واجت الزفه اخذونه ماما راحت ويانه جانت فرحانه وطالعه تجنن وتركص وتصفك وتسواهن تهلهل فضحتنه فضيحة

جان يوم كولش حلو

وسولين راكبه هي والاشتر  وشايله ابنها  وتركص بيه وتضحك وصوت الموسيقى والفرقه البصراويه الي جابها مصطفى العالم كلها تباوع علينه

جيهان هماتين هي وكريم وجاسم ورنا كل واحد بسيارته وكل واحد يكول الزود عندي

يمكن اول مره بحياتهم يتونسون بعرس كزاره هو ومرته جايين طامسه هي بالسياره وهو جنه رفش بصفها اختنكت من يمي شلون ينام وياها بيت ويوكع عليها زلزال مو رجال

....................

سولين

عرس افيان من اجمل الاعراس جانت طالعه تجنن وهي لابسه البدله البيضه مثل الملائكة ومصطفى طالع يجنن لابس طقم كله اسود بس الستره بيضه جان حيل حلو ومرتب وفرحان بيها وطالع من الجام يطك اصبع ويركص شلون حلوه

اشتر هماتين طالع فد شي حلو حييل لابس هم طقم اسود وستره بيجيه هم الاخوان كلهم مطقمين نفس الشي

وصفاء اسود بس الستره جوزيه مغيرين بس بالستره عيني عليهم بارده طالعين شكد حلوين ومرتبين

اني جنت لابسه فستان بلون سترة اشتر وحجاب لان بصراحة حبيت ما اضايق نفسي وانزع الحجاب والبسه هيج خربطه اشتريت فستان محجبات ولبسته وحجاب ومكياج صالون طلع حيل حلو

جانت القاعه مو مختلطه بس جانت الدخوليه تدخل افيان ومصطفى

وبعدها اني واشتر

وانوب صفاء هو واخواته زهراء وزينب

وفعلا جانت اجمل دخوليه تظم احن اخوه دخوليه لمت شملهم وجانت الاغنيه عن الاخوه كولش حلوه

ظلينه شويه هم جانوا تلاثتهم يركصون والمصوره تصور بيهم واني واخواتي وامي واخوات اشتر نركص ونضحك حيل تونسنه

طلعوا صفاء واشتر اخذ وياه ابراهيم شايله جان شايله ملبسه قاط اسود وستره بيضه ينافس عمه العريس ههه فدوه طالع يجنن

مدري حلو من صدك مدري القرد بعين امه غزال

عمتي ام حارث جانت تباوع النع فرحانه وهي تكول ... ربي يرزق حارث ببنت الحلال ويسعده واسويلكم عرس يجنن واعزم الكل

جاوبتها بفرحة وقلب صادق .. امين يارب ويسعده وينور طريقه

ظلت تباوع الكوثر وهي تكول .. هسه شبيها كوثر ليش وا ياخذها صدك جانت خبيثه بس صحت على روحها والي يعترف بخطاه الله ينصره والله صارت ادميه

همست .. الله كريم

باوعت لافيان جانت تركص وتهز ومصطفى مكابلها ويركص بالسيف لاعبين لعب لا ملو لا جلو يركصون ويرجعون ليوره

وهو كل شويه وباسها وحضنها وهي تتدلع عليه وعايفته تركص ويه تسواهن على ساعه يضربها ضربه قاضيه بالسيف يطير عنقها مثل فتوحات العرب قبل الاسلام

دخل اشتر مره ثانيه وهو يباوعلي ويبتسم حجه ويه صاحبة الدي جي وتغيرت الاغنيه الى رومانسيه عبالي لاليسا

مصطفى وافيان بسرعه من الردح والركص للوضع الرومانسي بسرعه سريعين الاشتعال

تشوفوهم تكولون بلابل حب

اشتر مد ايده اليه وسحبني اخذني للاستيج وحط ايده على خصري وهو يركص وياي برومانسية وعذوبه

همست .. وين ابراهيم

غمض عيونه وهو يكول .. بنات عامر مو مال رومانسيه عوفي ابراهيم يم عمه صفاء ما بيه شي

ضحكت وحطيت راسي على صدره اباوع لامي تبجي وعيونها كلها فرح فرحانه حييل بينه الحمدلله الي كدرنه نفرحها ونسعدها الف الحمدلله والشكر لله

رجعت اباوع لعيونه واني اردد بكلمات الاغنيه بحب وهو مبادلني الشعور

ويباوع لشفايفي كال .. مال ابوووسج

نزلت عيوني خجلانه رجع كال .. لا خطيه انقهرت على اب اهيم وحيد فريد ان شاء الله اليوم نسويله اخ

ضحكت .. لا ممنوع منا لمن اتخرج يله

سحب راسي وضمني وهو يحركني برومانسيه ويه نغمات ايقاع الاغنيه

جنت اردد

عا بالي حبيبي
عابالي تكاملني واسمك تحملني
بقلبك تخبيني من الدني تحميني
وتمحي من سنيني كل لحظة عشتا بلاك
عابالي تجرحني لحتى تصالحني
بلمسة حنونه بغمرة مجنونه
وما غمض عيوني الا انا وياك
عا بالي حبيبي

فعلا صار الي سند مو بس الي لكل اهلي حتى هواي حاول ويه ابوي بس ابوي ابد ما تصير اله جاره عاد شمره بالسجن وخلصنه منه

الحمدلله وفعلا قول الله تعالى : ( وعسى أن تكرهوا شيئا وهو خير لكم )

نهاية الرواية❤️

والى هنا نغلق اخر نوافذ هذه الرواية
التي جعلتكم  تبحرون في تفاصيلها من خلال اناملي
الشكر موصول اليكم احبتي
والشكر لكل من ساهم في وصول الرواية وتفاعل بها وصوت لها وساهم في نشرها
واخص بالشكر صديقاتي
نورا ورزان وهويدة
وكروب فراشات وورود
واخيرا احب ان اقدمي شكري  لابطال الرواية
الذين شاركونا معاناتهم ولحظات حياتهم بفرحها وحزنها بحلوها ومرها
وانتظروني برواية جديدة ستنال اعجابكم بأذن الله