#وكر الأشتر

البارت ٢٢

البارت ٢٢
رواية ... وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔💔

اسوأ الناس في حياتنا هم من دخلوا من باب الثقة وخرجوا من باب الغدر .

............................

جاسم

بعد ما ابويه شاف المحادثة والكلام او بالاحرى المصايب الي بيها مصايب اختي كوثر انصدم وجن جنووونه... 

بلحظتها خفت عليه لا ينهار بس هو استجمع قووته ولزمها من شعرها وعتها حيل وصار يهز ويجر  براسها وهو لازمها من شعرها

وحاجاهه باعصاب وعيوووونه حمر من العصبية
ولج جلبة الظاهر ماعرفت اربيج زززين بس هسه لاااا راح اربيج من جد وجديد طايحة حظ عاااااار ولج شلون والله راح اتخبل عقلي راح يوكف مجاي اصددددك

وطاحلها راشديات وهي تصررخ وتتوسل بي وكعت بالكاع
وتزحف ليورا تحاول تشرد منه  وهو كطع سبحته عليها ويصيح بكل غضب ويدفر بيها

اجاهه صواب على وجهه بالسبحة شخط خدهه شخط و نزفت شفتها وانفردت الخرزات منها على ارضية  الصالة من قووة الضربة

ويه ما ضربها صررخت وايدهه على خدهه
ظلت تحجي وتبجي مااعليه والله مااعليه هااي جيهاان جيهان هي جانت تلعب بتليفووني وتراسل هي سوت هيج هي اصلا انطت الفلوس الصاحبها

ماكملت كلامها اجاهه كريم ودفرها بخاصرتها
وصاح عليها بعلوو صووته ولج بعدج بعدج تتهمين جيهاان بعدددج ولج موو انكشفتي على حقيقتج وبعدج تصيحين جيهان  مو هسه رسايل انتي وذيج ايات العار حتى تسوين سحوره وترجع الفلوس ولج انتي شنو من مله ولج بس كولش شنو القصرنه بيه حتى هيج تجازينه

هي ابتعدت عنه لازمه خاصرته وتتوسله بنظراتها الي تشع خووف ودموع ووجهه اختفت ملامحه بدقايق والدم ينزل من شفتها على حنجها وهي تتوجع

سحبها كريم من الكاع ودفعها عالتخم اجه ظهرها عالتخم عاطت ووكعت ورجع سحلها ودفعها يريد يحقق وياها وضربها راشدي حييل على خدها

اجت عمتي  ام احسن لزمته من ايده
وحاجته برجاء وتوسل لا يمه كافي اختك عووفها لخاطر الله خطية تقشمرت اخذ بيدها وصحح خطأها مو تضربها بعد انلعب عليها

ابوي جان يلتقط انفاسه عاط وهو واكف مكانه
سكتي ام حسن سكتي ولا كلمة انت اكيد تدرين بكل سوالفها وساكتة وحسابج بعدين محد سودنها غيرج محد خبلها غيرج حتى تربيه بعد ما عندها من وراج يا عار بسيطه سكتت عنجن هواي ما عرفت شلون اربيجن ولج نزلتن راسي اطمجن اليوم طم ادبسزيات كح ..

باوعتله خايفة لا والله اني خويه

عاااط بيهااا  انت شيطاان اخرررس شيطااان ولا تدافعيلها ولا تحلفين كلش واضح انت تعرفين بسوالفها بس بسيطة دبارجن يمي منا ورايح راح تشووفن ووجه جديد ماشايفاته صوجي اني متعاطف وياجن تف على شكولجن الزفره

كريم لازم كوثر من ايدهه ومثبتها وهي ملامحها المزوركة كلها توسل وخوف

كاللها بنتر وعصبية وينه بيته هذا السگط وشسمه وهسه تحجين احجييي لا اذبحج احجي

ظلت تهز برأسها ماادري صدكني ماادري والله

جابها براشدي صارت تختض وتصرخ وابويه اجه يمها
لزمها من چتفها وعصره حيل توجعت على اثره
وكاللها بنبرة كلها تهديد
جاوبي اخووج شسمه  وييينه  بيته احجي

ظلت تهز براسها بنفي ورفعت رجليها حضنتهم تحمي نفسها

مد ايده ابوي وضربها  على راسها وصار يدمغ بيها وهي مخليه راسها بين رجليهه

لزمها من شعرها ورفع راسها ليفوك وعاط بوجهه احجي ولج احجي لاتخليني انهيج اليوم لاتخليني الوث اديه بدمج

كالت بصوت واهن بابا والله والله ماكو شي ولاعندي شي ولااعرفه كله هالكلام تلفيق اني بريئة اني بنتكم صدكوني هي هاي جيهان السبب منها جان موبايلي بيدها واصلا حساب ايات متهكر

كتلها لج لو ماا اني شااهد عليج وبعدج تنكرين شنووو من بشر انت ماشبعتي كتل تردين بعد تنكتلين عاجبج الوضع يعني احترمي نفسج وجاوبي شنو هالصلافة

باوعتلي ودارت وجهه ظلت تباوع لعمتي وتحاجيهه عمه فدوة خليهم يعوفوني عمه عفية

ظلت تبجي عمتي وتكللها شبيدي عليج يمه فدوة كريم ارحم بحال اختك

عاط بيها ابووي سكتي انت سكككتي انت ساس البله لو ماانت تضمضميلهه ماجان طلعت عينها وتفرعنت وصارت تسوي بلاوي من ورانا

لزمها كريم من ملابسها ونتر بوجهه بتهديد تحجين لوولااا ولج احجي؟؟؟

صرخت هي ماعندي شي كررريم مااعندي والله ماعندي كافي مووتوني رحموا بحالي برووح ماما عوفوني ولج عمه لحكيلي

كاللها ماتحجين مووو لعد امشي وياي
لزمها من ملابسها وسحلها  وهي تصررخ وتتوسل

سحلها لحد  باب الغرفة وشمرها جوه سحب المفتاح  وقفل الباب وهي  صارت تضرب بالباب من جووه...

‌‌رفع شعره ليفوك وتنفس بتعب وعصبية

وابوي وجه كلامه لعمتي كاللها سمعي ام حسن هايه اذا مااعترفت فگرج اعاقبج نفس عقابها

بجت وكالتله عفوو عليك خوويه راح تموت البنية مو هيج كالوها اخذها بالسياسة هسه هيه تحجي وتعترف صدگني انوب تموت شتكول للناس كتلت بتي

كاللها عساها طبها مووت خلي تمووت ولج هاي راح تطين وجهنا كل هذا يطلع منها وانت ساكتة شمنتظرة حتى تحجين شمنتظره من طاح حظج

هزت راسها وعينها ماتخليها بعينه خويه مادري

راح صار يضرب ع الباب سمعي ولج نص ساعة الج اذا ماتحجين قسما بذات الله ادفنج بيدي والليلة اطلع روحج  احجي احسلج

سمعت صوتها تبجي جووه واحنه رحنه للصالة مصدومين بلي شفنا منها اليوم

وظلينا نتناقش مرت النص ساعة ورحنا طلعناها وبعدها بكل عين صلفة تنكر

ابوي خنكها من رڰبتها حيل هي هنا انكطع عنها الهوا وانجبرت  تحجي عن مكان واسم الولد الي اخذ الفلوس منها

كريم كاللها هسه تجين وياي تدلينه بيتهم

كالت مااندله بالضبط بس هو بالشارع الي كتلك عليه

رجع لزمها حييل وابوي كاللها والله اخسر عليج بس طلقة هسه تمشين ويانه وصاح على عمتي تجيبلها شال تلبسه وتغطي وجهه

كالت مااعرف مااعرررف

اجت عمتي جابت الشال ولفوها بي لف حتى وجهه

اخذناها سحل للسيارة طببها كريم  ورا واني  يمها ولزمتها قوي وابوي وكريم كدام وانطلقنه ندور على بيت الولد.. 

وبعد ماا وصلنا للشارع الي كالت عليه جبرها تأشرلنه على بيته هي ظلت مترددة

اندار الهه كريم وكاللها احسلج لتجذبين لان اذا نزلت هسه وطلع مو هو والله الليلة تباتين بالنجف

هي شهكت وكالت ذاك البيت الي ع اليمنى وبابه بيضه

هز راسه كريم وبعد مااندلينه البيت قررنه نسوي اللازم

.....

رحت للمختبر كالعاده من ارجع من الجامعه اخذلي ساعتين وبعدها اروح للمختبر هم اقضي وقت وانسى همي وهم احصل الي كم فلس اعين بيها نفسي

لان حياة الجامعه تتطلب مصرف وتتطلب اكل وشرب وخط استنساخات يعني هاي الأمور

بوست ابني وحظنته الصدري رضعته ساعتين كاملين العب وياه واشمة صار فتره ما اخلي تسواهن تاخذه وتطلع

اريد اشتر يتنازل ويجي يشوفه ببيتنا او يطلبه مني واني ما اقصر يعني مستحيل اخلي الطفل بعيد عن ابو واحرمة منه ما عندي هاي السالفه اهم شي حنية ابو اله

صار وقت دوامي بدلت ورحت خابرت على رانيا كالت ..اني بالمختبر

تنفست بارتياح المهم وجودها بالمختبر لان اني حيل استحي من ابوها واخوها

وصلت ودخلت سلمت على رانيا وابوها اخوها مجان موجود اطمئنيت نسبيًا ياربي ما اكدر اختنك بوجوده

لبست الابكوت وظليت اشتغل وياهم شغل بسيط واتعلم اكثر شي

بعدها دخل علي وهو يكول .. السلام عليكم

باوعتله انهبطت رديت عليه.. وعليكم السلام

نزع سترته ولبس الصدريه البيضه وهو يكول .. شلونهم الصبايا

همست بهدوء وصوت ناصي .. الحمدلله

واخته جاوبته .. الحمدلله بخير دنساعد بابا وهو فرحان بينا يكول كولش شاطرات وحبابات

ابتسم وهو يباوعلي كال .. اييي حبابات وشاطرات فعلا وابويه شيكول على سولين ؟

جاوبته رانيا وهي تكول .. كولش يمدح بيها يكول هادئة وشغلها نظيف وطريقتها بسحب الدم حلوه وما تاذي بشهادة اكثر

باوعلي وهو يكول ... اي هي ناعمه اكيد طريقتها مثلها ناعمة

ابتسمت بتوتر وقرف بصراحة ممتعوده واحد يتغزل بيه غير الاشتر جاوبته بثقل .. شكرا

عفته ورحت بسرعه سويت روحي ملتهيه بالتيوبات والكبات ودا اتعلم على اشياء جديده

خلصت من التحليلات ورحت كعدت بغرفة الاستراحة بعيدا عن رانيا وعن اخوها

طلعت موبايلي ودخلت على صورة الاشتر قربتها اكثر وجريت نفس عميق وزفرته ياربي مدا اكدر اتخطى كل ما احاول انساه يرجع بقووه بداخلي

المشكلة مو هنا المشكلة اني اتمنى يعاتبني اتمنى يحجي ويايه نتعاتب نوصل لفد نقطه اذا هو اتخطى اني ما تخطيت بس دا احاول ومحاولاتي باءت بالفشل

طلعت من حسابه ورجعت اتصفح خليت السماعه دا اسمع اغنية اكثر سؤال بغيبتك ينكالي يوميه شلونك بدون الفاركك شمسويه بيك الدنيا

بعدها رأسا تغيرت الاغنيه بنغمة موبايلي الجديده الي استمديتها من اشتر الي هي .. فعذبها حتى أذاب فؤادها

شفته هو المتصل ما ادري شصار بيه وكفت وكعت وفتريت وكلها واني مفاتحه خط ايدي ترجف كلبي يدك سريع عقلي طار ما اعرف شسوي

بلعت ريكي خلصت المكالمة واني مفاتحة خط رجع اتصل مره ثانية سحبت نفس عميق وهفيت على روحي فتحت خط وجاوبته بثبات .. مرحبا تفضل ؟

رد عليه .. مراحب يابه عندج وقت لو مشغوله حاب احجي وياج شويه

جاوبته .. لا لا ما عندي شي تفضل

جر نفس وزفره كال بغرور ... عبالي مشغوله كالو تشتغلين بمختبر

هزيت راسي بنفي .. لا ماكو ممشغوله اذا عندك شي تفضل

رد عليه.. ست سولين محكمتكم تأجلت اليوم الاحد القادم ان شاء الله لان الخميس نص دوام ما اعتقد تكمل القضيه وهم لازم الوالده تجي تنطي اقوالها بخصوص علاء وباقي الممرضات تنطي شهادة مبدئية لذلك الخميس تجي تصدق اقوالها والاحد تجي للمحكمة

جاوبته .. بس لحظة استاذ ويصدر القاضي الحكم ؟

رد .. لا طبعا هي محكمة تتاجل واكو كفاله واقوال وشهادات وجنايات وكذلك علاء ادعى الجنون وادعى ان هو مريض نفسي بمرض ثنائي القطب وعنده كتاب بهذا الشي

لذلك راح يتم نقله للطب العدلي وفحصة جنائيا من بعدها راح يتم تشخصيه اذا كان هو فعلا مجنون او يدعي الجنون

وكفت متعصبه ... هذا واحد جذاب لا مجنون ولا يعاني من مرض نفسي هذا فد واحد حقير خبيث ونذل يريد يهرب من العداله بعد ما دمر امي و وصلها للقتل

جاوبني ... اهدي اهدي لا تتعصبين ماكو يهرب من العداله استلموها القضية ناس اكفاء والطب العدلي راح يحدد اذا كان مجنون او لا ان شاء الله القضية الصالح الوالده

تنفست باضطراب جاوبته ... إن شاء الله

دخل علي وهو. يكول .. ست سولين ممكن لحظه

حطيت ايدي على السماعه وجاوبته .. تمام هسه بس اخلص مكالمتي ان شاء الله اجي

جاوبني .. براحتج ست

رجعت للاشتر كتله .. العفو منك استاذ انشغلت شويه

جاوبني بحقد وهو يكول .. عاااادي بس شنووو هذا مديرج تشتغلين عنده ؟

حبيت اقهره جاوبته .. اي مديري هو كولش حباب وحتى بالشغل ما يضغط عليه

جر نفس وزفره كال ... اي تتهنون ان شاء الله

جاوبته .. شكرا محتاج بعد شي استاذ

رد عليه ... لا شكرا ممحتاج شي

قفل الخط بوجهي حتى بعدني ممكمله كلامي وهو مجاوبني اخر شي عابت عشتو انقهر صعدت الغيره الراسه بله نشوف يا اشتر شلون راح تخلص وياك

ظل شويه دا اطلع وهو رجع اتصل فتحت بسرعه جاوبته .. تفضل

كال .. اريد اجي اخذ ابراهيم عندي من ترجعين يجيبه الج صفاء

رديت عليه بغضب ... لا ما اكدر اول شي الطفل مريض وصغير ما اريده يتبهذل اذا تحب تشوفه تعال شوفه ببيتنا الكل موجود لا تخاف

جاوبني بغرور .. ومنين اخاف

عدلت شالي وجاوبته بتوتر .. ما ادري كول الروحك بس بالنسبه اليه ابني ما يطلع باب البيت خاف عليه هو طفل ترا مو عبالك رجال شواربه تارسه وجهه ونجماته على جتافه

ضحك بسخريه وهو يكول .. تمام جاي اشوفه

قفل الخط مره ثانيه من دون ذوق واني باوعلت للموبايل بقرف وسديته ظميته بجنطتي

طلعت لكيت علي واكف بضخامته وطول قامته وديسوي بالناظور و رانيا واكفه يمه

حجيت بصوت محرج .. العفو بس اجاني اتصال مهم اعتذر اذا تاخرت

رد عليه وهو يكول .. لا بابا براحتج عادي لا تتقيدين وخليج طبيعيه احنه هنا اصدقاء ماكو واحد اعلى من الثاني

جاوبته بلطف .. شكرا استاذ علي والله ما اعرف شلون اجازيكم فعلا انتو رحمة من رب العالمين

رانيا اجت حضنتني وهي تكول .. لا بالعكس والله انتي تنحبين وحبابه ومؤدبه وامينه ابد مو ايدج طويله وخليناج تحت الاختبار ونجحتي

ابتسمت.. الحمدلله احنه رغم كل شي بس عينه مليانه وماما ابد ما علمتنه ناخذ حق غيرنه

رد عليه وهو يكول .. ونعم منج

ابتسمت .. ابتسمت .. تسلم ونعم من اصلك بس انت طلبتني محتاج شي

باوعلي وصفن ثواني بعدها كال .. خليها غير مره بعدين نحجي

جاوبته .. براحتك تمام

ظليت بعد ساعتين وبعدها طلعت وصلتني رانيا بسيارتها همزين ما لزك هو يوصلني لان اني ما احب هيج وهم اخاف يشوفني الاشتر

هو صح احنه مفصولين بس اني لحد الان اخطر منه وكذلك اهتم لامره ما احب اخسره بصراحة ما اجذب عندي امل بيه لحد الان وما اريد اسوي شي غلط لخاطر ربي وامي وهم الخاطره

..................

افيان

جنه كاعدين بأمان الله صح عدنا مشاكل بداخلنه بس عادي قابل انظل مبومين  لازم نرفهه عن نفسنه

عاد اني رحت جبت كيكه وكتبت عليها اسم ابراهيم سويت اله عيد ميلاد صح هو عمره كم شهر بس عادي ماكو اشكال كل شهر نحتفل هو احنه نصدك نصير خالات ومنو من سويلينه ام جفصه

دنجتفل واني لازمته ومشغله الشمعه واغني كالو اليوم الكمر ميلاده وانت احلى من الكمر وزياده

كالت خالتي تسواهن وهي تدخن .. اكلج انتي مو خطبتج الجمعه مدري شوكت شو سكته يلفته لا حس ولا خبر

وكف واني اركص سولو اني وبرهومه واغني ... لا حس ولا خبر من زعل الكمر مو عادتك تغيب واحنه نص الشهر

ضربتني بنعالها الراكد بصفها وهي تكول .. وسم حتى سم مو احجي وياج

ماما صاحت عليه كالت .. اكلج صدك هي مو اجت شافتج شو بعد ماكو لا رد لا جواب شنو السالفه

جاوبتها .. والله يا عيني امه خابرتني تكول مموافقه سمعتج زباله ههههههههههه خرب شكد عار وصلت السالفه السمعتي

رجعت تسواهن ركعتني بفردة نعالها الثانيه وهي تكول .. وعلى شنو تتمضحكين امشي خلينه نروح خلينه نذبحها ونكفشها ونطيح حظها وصبغها

جاوبتها بقرف .. ويع واني هسه اتعب روحي واجرح نفسي واكدر خاطري لخاطر ام صافي فشخة ويييع لا مو من اخلاقي

نفخت الدخان وكعدت كتله .. يله برهومه يله اتمنى وطفي شمعتك خلي امنيتك ان شاء الله امك وابوك يرجعون لان امك شيبت راسنه كد ما تنك مثل المطي ربك اشتغلت وانشغلت عنه جان بعدها لحد الان تنوح على ابوك

اخذته مني جيهان وهي تكول .. دجيبي الولد مو خبلتي الله يخبلج كون خليتي امنيته امه ترجع لابو وكبرتي كم شهر وسويتي عيد ميلاده قبل اشهر من ولادته كله حار بحار

ضحكت وكطعت الكيكة طلعت اودي الصاحبتي حوراء جااا اني احبه خوش بنيه سوالفها مختلطه من سوالفي على سوالف تسواهن وشويه من جيهان ومن عامر مكس مختلط وااااي حلوه هيج

اول ما طلعت واشوف مصطفى بوجهي كشرت عن ملامحي ويع شكد مكروه هو وامه دمروني تعبوا نفسيتي وين جنت وين صرت

كال بحقد .. انتي ليش حاضرتني اموت واعرف اني شسويت حتى تحظريني

جاوبته بحزن مصطنع .. سوده عليه ما تعرف شسوين متعيني عليك كل شي ممسوي

رد بجديه وغضب وهو يكول .. اي غير اعرف شمسوي اذا انتي هرموناتج تجي بالوقت الغلط مو عساس الجمعه خطبتنه

جاوبته بدراما وحزن ... اني مصطفى اني تشك بيه وابوگ فلوس ابويه وانطيهن لمدري منو صدك وكعت من عيني بعد ما جنت صاعد على حاجبي لك والله مصدومة مصدومة

تدري من البارحة لليوم اسمع اغنية اليسا مصدومة بكد ومش بنطق ومس عارفه ارد صدك جذب ولك صافي تشك بيه بواكة لك بعمري ما اخذت من واحد ودامك تمشي وره كلام امك مستحيل اقبل اتزوجك لان الرجال سند واله كلمته مو الماما تجيبه وتودي لا اعذرني مو استايلي هيج رجال

جاوبني بتلكى ... يااا امي يا سوالف يا فلوس يا بوگ انتي شتحجين هو اني گايلج انتي بايگة فلوس ابوج وناطيتهم ؟ يجوز سكران وحجيت بس الي انذكره اني هالفتره ابد ما سكرت

ضحكت بسخريه .. هم عوزها تكولي لا يابه شحدك تحجي خاف حظرتك من الموبايل لا بالقران احظرك حتى من حياتي

هو انت ما حجيت بس امك هاي جنها انسه منشن هي كالت شسوت بيه شافتني فقيره ومسكينه وما احجي وهي نزلت عليه بذيج الرزايل وطعنت حتى بشرفي وسمعتي

غير من الخجل غطيت وجهي بشالي من الكلام الحجته بحقي والدمعه بعيني دموعي عشره عشره نمت جفي على وجهي لا غدا لا عشا لا ريوك بس ابجي

حتى امي كالت .. ولج يمه ولج افونه فافي يالحلوه تروحلج فدوه انتي سمعتج زي الفل كولة اخوانه المصريين

انوب اليوم لان مقهورات عليه وشافن وجهي اصفر وبس ابجي راحن جابلي كيكه و سولي حفله واني حتى واهس مثل العالم ما عندي

اني اريد اعرف شغله وحده انتم عود ليش الفقير تستغلوا ليش تاكلوو شفتوني فقيره هيج تسوون بيه متعيني على روحي اي والله متعيني ماكو هيج حزن

انت بس حس بمعاناتي ماجره بدله وعازمه صديقاتي وحاجزه صالون  تاليها  امك تخرب الخطوبه بكل برود زين كارتات الدعوه الي طبعتهن وين اوديهن

انتظر الانتخابات واعدلهن واكتب انتخوا مرشحتكم فافي خلطه لو شلوون ؟ بس فهمني شلوون !

حط ايده على راسه وهو يفرك بيه بوجع كال... خرب غيرتج دخت راسي راسي راسي موتني شكد تحجي شكد تلغين ما تعبين انتي

فتحت حلكي مصدومة  وتخصرت... هااااا كلامي زعجك موو ما تحب الشكوى ييي عيني حقك تردون تاكلون حقي تردون تذبون عليه تهايم واني اسكت واتقبل كلامكم لا عيني لا لا گلبي له له لا له لا ما قبل ما تزوجك لو يطلع ابو من السجن

كال ... ابوج ليش دخل سجن

جاوبته بحزن .. بريئ متعيني عليه تهمه باطله

اخذ الكيكة من الصحن وياكل بيها كال .. دفتحي الحظر افتحي اليوم نرجع نتفق على كل شي

دا احجي واتعارك واهجم وشفت سيارة الاشتر اجت من بعير فتحت عيوني بدهشه .. يا عزا هذا نسيبي الكفو امشي روح لا يشوفني واكفه يمك وياهذ عليه نظره محلوه وانت سمعتك بالحضيض

عافني احجي الوحدي ورجع ياكل بالكيكه نزل الاشتر من السياره همست لمصطفى .. سلم عليه واحترمه حتى افتح عليك الحظر

جاوبني والكيكة غاص بيها .. ادللي مريتي

كشرت عن ملامحي منقرفه منه انوب مريتي شكد واثق من نفسه

نزل الاشتر بهيبته ولبسه الحلو الانيق احسن من مصطفى جنه ملابس عفتي يلبس اللوان فاقعه مو غامقه

سلم عليه مصطفى ومد ايده جانت ايده كلها كريم باوعله اشتر بقرف بس سلم عليه وبعدها طلع كنلكس من ايده ومسح بقايا الكريم وشمره عليه

مصطفى ابتعد شويه وهو يكول .. هاي شبيك ليش تتحارش بيه

جاوبه اشتر وهو يكول .. وانت شعندك واكف ويه نسيبتي ما تستحي لو كلش زحت الأخلاق ؟

مصطفى... لا بس اني غير خطبتها وهي حاظرتني اجيت اتفاهم وياها

اشتر ببرود .. من يصير بينكم شي رسمي بوقتها تجي وتتفاهم وياها مو هسه لازم الباب وتدك سوالف يله روح لبيتك ولا تجي بعد

عضيتله الشفه وكتله .. روح روح بعدين نتفاهم

عافنه وراح واشتر كال ... اريد اشوف ابراهيم اذا ممكن

جاوبته ... شنووو بس ممكن !!! الا ممكن وممكن تفضل تفضل نورت المنطقه بوجودك ابو ابراهيم نسيبي الغالي حتى لو مطلك اختي تظل اعز النسابه

دخل جوه وجبتله ابراهيم كتله اني اليوم مسويتله عيد ميلاد وهو فرحان عباله صدك ههههه

ظل يضحك عليه واخذه وهو يبوس بيه ويشمه بعدها راح كعد يم امي يلعب بيه ويبوسه وانطاه مصرف وراح وسويلينه البومة لحد الان مجايه المسعده

كون تجي وتشوفه الا تنجلط من الفرحة انوب صايره مثل زليخة اني اشم رائحة يوسف يوزريييف

وهاي جايتني ابراهيم بيه ريحة اشتر شكلولج حاظنته اشمشم بيه عتوي اني وما ادري بروحي والله يا الله

.......................

جيهان

صايره عندي لعبان نفس من كريم لا تطاق افكر شلون حبيته شلون تقبلته بحياتي

شنو الي جنت احس بيه مشوهه ومحد ياخذني !!! الله اكبر على ظيم ابوي الي قلل قيمتي وجان كل فتره بفتره يتنمر عليه خله نفسيتي تازمت واقبل بكل شي

يعني اكلتلي راشدي منه وكدام اخته الحيه والحقيره الحراميه بس لان كشفتها اله الله ان شاء الله ياخذ حقي منهم

والله اني ما احب انوح وانذكر واحجي جنت ساكته حتى لامي ما شكيت بس لافيان ما اريد اتعب امي اكثر ما هي تعبانه وتفكيرها عند سولين ومشاكلها

انوب اني اجي ازيد المصايب عليها جنت كاتمه بكلبي وروحي نار متسعره بيها كل ما اتذكر ضربني احس روحي تطلع واحس بذلة ويغمرني الحنين على حالي ونفسي

دخلت سبحت وهو صار يومين لا مخابر ولا عارفه اخبارهم اصلا ما اريد اعرف حتى اخبارهم شنووو

كملت طلعت من الحمام دا انشف بشعري بالغرفه وامشط بيه حسيت بخيال صار على الباب رفعت راسي شفته هو

باوعتله جان على وجهه علامات من الحزن والندم والقهر

تركته واكف بمكانه وكملت تمشيط شعري ما اهتميت الوجوده اصلا اجه كعد قريب مني  وجر نفس وهو يكول ... ما اعرف شحجي جيهان بس ما اعرف ! هه احس روحي مغدور من كل شي

ضاقت بيه الدنيا وما لكيت مكان ولا مأوى ولا ملجى غيرج اجي اشكي يمج واذب همومي عندج واروح

هه رجعت اتذكرت انتي زعلانه مني ومو من حقي اجي اشكيلج ولا اجي اخلي همومي عندج

ضربتج و واذيتج وانتي ما الج ذنب بكل الي صار السبب والذنب عند اختي

اختي الي غدرتني وباعتني واخذت تعبي وفرحتي وانطتها الواحد حقير واعدها بالزواج مدت ايدها على شي مو الها كسرتي جبيره يا جيهان جبيره

دمعت عيني وبلعت الغصه جاوبته ... ما ردتك تعاني ولا ردتك تعرف بالموضوع لان ما جنت اريد اخسرك خليت زمام الأمور بيد اخوك جاسم هو يتولى الامور

تعرف ليش ابتعدت عنك وانت سندي واختاريت اخوك لان ما جنت اريد العلاقه بيني وبينك تسيء وتاخذني بذنب اختك وعبالك اني احرظك عليها واني ما عندي دليل قاطع ضدها

تجرعت الوجع وحدي وشربت المر وحدي وتاليها اتجازه منك براسدي يطفي عيني ؟ ههه هذا الي جنت خايفه منه لهذا السبب ما جنت اريدك تعرف  لان اعرف تتهور وتتهمني باطل وصار مثل ما توقعت وما قصرت انت

لزم ايدي وهو يكول ... والله بعد اكسرها اذا مديتها عليج

مسحت دموعي جاوبته ... لا كريم انت صغرتني هوايه واستهزئت بيه حيل استهزئت بيه  تعبت منك والله ومن اهلك

مسح وجهي بحب وهو يكول .. اي والله حقج اني تعبتج واهلي هم بس وعد بعد محد يحجي وياج والله اطيح حظهم واصلا كوثر طاح حظها وابوي راح يزوجها واحد من معارفنا

وراح نرجع لبيتنا اني وياج بعيدا عن البيت القديم واريد واحد يندك بيج ابوي حتى حنان راح يطلكها لان طلعت تعرف بسوالف كوثر وساكته ورزل ام حسن وطيح حظها

نزلت عيوني... هذا مو موضوعي كريم اني ما اريد اي شي بعد تعبت والمشاكل بعد تعلك اكثر لان بصراحة بعد ما اني كشفت الكم الحقيقه كوثر مستحيل تحبني لا هي ولا ام حسن وحتى ابوك

حضني وهو يكول .. لا يحبوج المهم اني احبج

ضحكت بحزن .. هه حتى انت ما تحبني بسرعه تخليت عني وضربتني حتى ما فهمت مني ولا بررت موقفي بسرعه تهجمت عليه

جر نفس وزفره كال .. والله مو قصدي بس شفت حالتجن مو مال بنات عاقلات وضعجن مدري شلونه وغلطتي عليها وهي تبجي انهرت صارت حركتي بيج

ضحكت بسخريه.. ههه اي مو اني حايط نصيص عندك يوم تصربني يوم تعيرني باختي

رد عليه .. على كيفج لا تسويني كلش ترا اني احبج وتحملت هواي كلام من اهلي لخاطرج وجنت ارجع فورتات حتى اجمع الي كم فلس اسوي بيها الج العمليه

لا تنكرين اني هم احبج واتحملت الخاطرج لا تطلعيني صفر

بللت شفايفي جاوبته .. مو اطلعك صفر بس والله اني تعبت بعد ما اكدر اتحمل اي شي اريد انسان يحتويني

انت تعرف اني شكد احبك واحترمك واقدرك جنت احلم بكلمة منك بس بعدها طلعوك من عيني اهلك طلعوك من عيني انخلقت مشاكل اني بغنى عنها وما اكدر اتحملها

بهالاثناء دخلت امي وهي كاعده على عربانتها والحزن واضح على معالم وجهها سلمت على كريم

واني وكفت الها لزمتها واجيت كعدتها قريب مني كالت بجمود ممزوج بحزن وهي تكول .. كريم خاله عوف بنيتي بحالها هسه ما ترجع الك

جاوبها بتخوف وقلق وهو يكول .. ليش شكو شصاير ترا جل من لا يخطى والمشاكل تصير واني جيهان احبها ومحتويها ومخليها بعيوني

جاوبته امي والحزن بعيوني ... لا ما تروح وياك بنيتي اسويلها عمليه واسلمها الك كامله والكمال لله ما اريد واحد يفضل عليها حتى لو جان زوجها

وكف وهو متعصب كلها .. بس اني راضي بكل شي والعمليه اني اسويها

ردت عليه بحزن وهي تكول ... باجر عكبه تكلها اني سويت الج العمليه الرجال كل شي يحجي وكل شي يكول اني اريدها تجيك وما عليها قصور وهي رافعه راسها وما خجلانة ولا خايفه من شي تجي ومحد مفضل عليها غير ربها

مسح وجهه بتوتر وهو يكول .. بس اني ما مقصر وهذا الكلام مستحيل احجي ابد جيهان مرتي يعني قطعه مني واذا عيرتني اطلع عار على الزلم وما اسوالي فلس

هزت امي راسها برفض وهي تكول .. لاااا اذا مو انت اهلك اني اريدها تسوي العمليه من فلوسنه وان شاء الله جيهان راجعتلك باحسن حال حتى نفسيتها تتغير

دك صدره وهو يكول ... علاج جيهان على حسابي واني ممتعاجز منها

امي جاوبته .. ما اريد واحد يذلها ويقهرها وينزل دمعتها ولا اريد واحد يفضل عليها غير ربها ما اريدها تنهان مثلي ولا اريد واحد يعاملها مثل ما عامر عاملني

جاوبها بغضب وهو يكول .. تقارنيني بعامر

هزت راسها برفض .. نعالك ما يسواه عامر بس اريد بنتي تبني شخصيتها وتعيد صحتها وتسوي العمليه وترجع الك وان شاء الله خيير

هز راسه بقبول وهو يعض بشفته طلع من البيت وهو ضايج ومقهور من الكلام الي حجته امي

فرحت بكلامها ورجعت بستها ولست ايدها امي فعلا جنه جبرت بخاطري وكبرتني بعين نفسي وريحت نفسيتي حسيت نفسي غاليه الحمدلله الام نعمه

.................

سولين

من بعد ما اجه عمو كريم وحجه ويه امي ماما ما قبلت ترجع جيهان اله الا تسوي العمليه كولش فرحت بقرار ماما جان قرار صائب لان الرجال ما يتامن

وانكشفت كوثر انوب الحقيره بايكة فلوس اخوها وناطيتهم الصاحبها الله فضحها وطيح حظها

باع الفرق بينه وبينها رغم هي ربت بعائله انطتها الامان والثقه والراحة والسعاده وهم زلم مشوربه وهي ما خلت سالفه عوجه ومكسره ما سوتها

واحنه ابونه عامر الا ما خله سالفه عوجه ما سواها بس ما انجرفنه ولا طلعنه من الطريق ابونا الي ما محسوب على جنس ادم طلعنه وحدتنا اقوه من القوه واعتمدنا على روحنه رغم ابويه ما يدري عنه ولا فديوم شاف شنو محتاجين ورغم ظروفنه الصعبه بس عرفنا شلون نعتمد على نفسنا

تنهدت واستغفرت ربي بدلت ورحت للمختبر بعد ما نومت برهومه هو ابو صاير من اروح يجي يشوفه ماكو احقر من هيج خباثه وحقد ليش ما ادري على كلمة دا اتحاسب عليها لحد الان

وافيان تكول .. ديوبخج

ههههه ما طلع توبيخ طلع انتقام مسموم

بدلت وكشخت ورحت لبست قميص احمر وشال ابيض حذاء بيضه وبنطرون اسود خليت مكياج خفيف حيييل لان ماما متقبل تكول عيب

رحت ركبت للمختبر مخابرت رانيا تاخذني خطيه عيب منها ابتلت بلوه بيه

وصلت محد لكيته بس علي خفت حييل انخلست قررت ارجع بس هو صاح عليه كال .. تعالي عادي وين رايحه

جاوبته بخجل وتوتر ... هااا لا بس دا اسال عن رانيا ما هيه

جاوب .. هسه تجي لا تخافين

تنهدت وباوعتله بقلق .. لعد عمو وين ؟

رد عليه .. موجود بغرفة البينشنت

بللت شفايفي ... هااا تمام لعد اروح اشوفه

ضحك عليه لان خايفه ورجع يكمل شغله بكل هدوء

دخلت سلمت على عمو ولبست الابكوت وكعدت اسحب دم للمرضى

دخلت اخلي دم بتيوبات صاح عليه علي وهو يكول .. سولين تعالي بينشنت موجود

طلعت بسرعه انهبطت من شفته ورجعت خطوات كلبي جان باليسرى صار باليمنى همست بصوت رايح ... اا اشتر

تقرب مني وهو يكول بعد ما رفع حاجب وابتسامة خبيثه على شفايفه ... اييي اشتر

بلعت ريكي كتله .. تفضل محتاج شيي

جاوبني وهو يتفحص التيوب كال ... هممم اريد اسوي تحليل

بلعت ريكي بغصه .. تحليل شنو ؟

غمزلي وهو يكول .. اريد اشوف النسبه عندي شكد

عقدت حواجبي .. نسبة شنوو

ضحك بسخريه وهو يكول .. انتي مو محلله لو اني متوهم

جاوبته .. محلله

كال بغرور .. تحليل نسبه اشوف بعد بيها مجال اخلف غير ابراهيم

فهمت قصده كتله .. ما احلل هيج تحليل استحرم

تقرب مني وعض شفته كال ... اهااااا

نهاية البارت ... يتبع

كونوا انتم كونوا بخير ... احبكم 💔

لا تنسوا التصويت والمشاركة ❤️

نور سمو العراق