#وكر الأشتر

البارت ٢١

البارت ٢١
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔💔

‏في عمق كل كرب وكل إنطفاء
تجد الله يبعث لك ..
   خيطا رفيعًا من الفرحة،
كأن الله يعطيك...
   القوة لمواصلة أيامك،
والشعور بأن...
     الفرج قد اقترب
في عمق حزنك تجد أبوابا ..
قد فتحت لك...
    دون حول منك أو قوة،
دائمًا تجد الله معك ...
   يعطيك حتى يرضيك
ويبقى معك للأبد ...
   حين لا يبقى معك أحد،
   ستجد الأحد الصمد ..

........................

سولين

مرات يدخلون بحياتنا ناس نتمنى لو دخلوها من زمان قبل ما نوكع بهيج أعصار وزلزال يدمر حياتنا ناس طيبه وكلها غيره وفخر

بس اني مجرد رماد وبقايا انثى مهلوكة وقلبي لحد الان يعاني لحد الان ما تخطيت الاشتر بس تناسيته شويه وحفظت باقي كرامتي

باوعتله بثقه وهدوء ابتسمت بوجهه مجامله وقابلني بعقدة حاجب وكأنه مركز بيه يريد يعرف اني منو

كال بثقل ... السلام عليكم

جاوبته بصوت كوه يطلع.. وعليكم السلام تفضل

باوعت رانيا لمصدر الصوت وضحكت كالت ... هلا علي وعليكم السلام شنو اليوم جاينه

دخل بثقه  وغروروهو يتفحص الاسرنجات كال .. شنو يعني واذا اجيت  ميصير لو ميصير

جنت مترتره من وجوده وخجلانه ما اعرف ليش هيج حسيت باحساس الخوف والتوتر يمكن لان هسه مبتدئة وحسيت الشخص من معارفهم

جاوبته رانيا وهي تضحك كالت .. لا يصير ليش ما يصير ههه

باوعلي وقلص عيونه وهو يكول .. شنوو ما عرفتينه ؟

ابتسمت وهي تكول .. صديقتي سولين ويايه بالجامعه تريد تكتسب خبره وتستفاد لان هي خطيه مجانت تداوم عندها ظروف

مد ايده وهو يكول بهدوء ... اهلا وسهلا بيج

باوعت لايده هذا شنو هذا يريد الزم ايده واسلم عليه احنه ما عدنا هيج نسلم من بعيد ما نسلم بالايد

ابتسمت بتوتر ورديت عليه ... اهلا وسهلا بيك بس اعتذر منك اني ما اسلم بالايد

قبض على ايده وهو يكول... اهااا تمام اني جدا اسف 

ابتسمت بلطف .. لا بالعكس عادي

عفته ورحت وهو ظل يحجي ويه اخته جنت محتاره شنو اسوي عدلت الكبات مالت التحليل الي موجوده على الميز رتبتهن وسديت الحاسبه

رحت عدلت شالي وخابرت على ابني كالت افيان .. زين زين جنه صخل بس يرضع مميات كل شي ما بيه حيله حيل المطي

استغفرت ربي شكد اضوج من تحجي عليه خطيه طفل بريىء ليش هيج تكول بس هي طايحة حظ شترجه منها

قفلت الخط بعد ما وصيتها عليه اكثر من مره

طلعت شفت رانيا واخوها كاعدين يسولفون هو من شافني وكف وعدل قميصه جان بهيئة مرعبه نوعا ما طول بضخامة وكاريزما حلوه للامانه رغم هو مو حلو كشكل بس كهيئة

باوعلي وهو يكول .. اتشرفت بمعرفتج وشنو تحتاجين كولي اني هم مخلص  ماجستير بايلوجي وافتهم بهاي الشغلات شنو تحتاجين كولي لرانيا وان شاء الله ما اقصر اني هم اشتغل هنا العصر ان شاء الله هم اعلمج

ابتسمت .. اشكرك والله اكيد ما تقصر تسلم

طلع من المختبراول ما طلع حسيت براحه مو طبيعيه  حسيته خانكني

وتوافدت المراجعين جان ابو رانيا هو الي يحلل الدم احنه بس نحب وننطي كبات ونخلي الدم بتيوبات خاصه بيها

هم ممستفادين مني شي بس متعاطفين ويايه خطيه خاصه رانيا هي كلها تمدح بيها حتى رئاسة القسم معتمدين عليها اكثر مما معتمدين على القسم

كعدنه اني ورانيا جنه دنسولف هي طبعا متخرجة سابقا من كلية التمريض وتدرس اهلي تحليلات لان تريد تساعد ابوها بالمختبر اصلا هم عائلة كلهم تحليلات

خطيه راحت جابت الي لفه وعصير كالت .. اكلي انت ام وترضعين اكيد محتاجة تغذيه

باوعتلها لزمت ايدها بذهول .. رانيا انتي ليش هيج تتعاملين ويايه شنو السبب يعني والله دتغركيني بكرمج بحيث اكول اني شنو الي سويته بحياتي حتى ربي هيج يجازيني

ضحكت وهي تكول .. يابه ترا هي لفه مجايبه الج مفطح وترا بعدين لا كرم ولا شي بس اني طبعي هيج ومدام انتي اجيتي ويانه اكيد كل مصاريفج علينه اذا جان على خط يوصلج ويجيبج او على اكل

جاوبتها بخجل وحزن .. بس اني عندي فلوس ما اقبل هيج تسوون وتخجلوني اريد اني من جيبي اشتري

ضربتني وردت بعدم اهتمام وهي تضحك.. اي عود بعدين من الله يفرجها عليج مطلوبه عزيمة اليه تاخذيني للزوراء وتسوين اكل بيت وتدلعيني اخر دلع ههههه

ضحكت ... هههههههه تمام اتدللي

ما اعرف ليش اثارني الفضول كلتلها ... بس ولو فضول مني اخوج هماتين مداوم بالسلك العسكري

ردت عليه وهي تكول ... لا بس ليش ؟

رفعت اكتافي بعدم معرفه... ما ادري بس حسيت شكله مال ضباط

ابتسمت ... لا هو هيج استايله

تنهدت بحيره .. زوجي جان محقق جنائي ما اعرف ليش من شفت اخوج تذكرته نفس الهيئة

ردت عليه وهي تكول ... اني مو كتلج انسي احنه شنو اتفقنه سولين

جريت نفس وزفرته.. هو نسيته اكيد بس ما اعرف والله ليش اجه على بالي من شفت اخوج

كالت .. لا اخويه گلبه طيب وسبورت وحنين كولش بحيث كلها تمدح بيه لو شايفه شكد مدارينه ويحبنه وعطوف علينه عكس الاشتر

ضحكت .. ههه عزااا هاي شنو ليش تحجين على الاشتر شعرفتي عنه يعني لهلدرجة اني موصله صورة سيئة عنه ترا هماتين يحب اخوانه واخواته وهم يحبوا

ابتسمت وهي تكول .. لا بس من حجيتيلي انقهرت مو من حقه هيج يعاملج جل من لا يخطأ وبعدين احنه مو معصومين على شنو هالتشدد اكو اغلاط اكبر من هيج والعالم تسامح

هزيت راسي برفض .. اني ترا هم مراضيه عن نفسي ميصير هيج اغلط بس جنت بحالة انهيار والله صعب واحد يعاني كدام الي يحبه والمقابل ما يطمنه بكلمة يعني صعب هو يعرف امي عايشه وما يطمني عليها

رانيا .. اي هو اغلاطه اكبر من اغلاطج وظلي ورايه وان شاء الله نرجعه وهو الممنون يبوس ايدج نخلي واذا مرجع انتي الف واحد يتمناج

ضحكت .. هههه لا بعد اني وياه نهينه كل شي بعد ما النه خط رجعه

بس تدرين شنو اني اتندم على هوايه شغلات صارت بالماضي جنت اله سيف ضد بيت جده وادافعله هو صح ممقصر ويدافعلي بس اني تحملت اكثر من طاقتي والغريب هو نكر كل شي وعبالك اني مجنت بيوم من الايام موجوده بحياته عبالك اني نكره

رانيا بتنهيده.. اي هم هيج الزلم يطيحون حظ البشر من ينلبسون يمشون عدل

بعدها غمزتلي وهي تكول .. بس اخويه مو هيج ههه

ابتسمت على كلامها كلتلها .. الله يخلي الكم ويحفظه ويحفظ جهاله

ردت عليه .. لا هو ما عنده اطفال متزوج ومنفصل

عقدت حواجبي .. يااا عزا ليش ؟

جاوبتني .. زوجته ميصير عندها اطفال وهي طلبت الانفصال لان ما تريد تظلمة وياها  اصرت على الطلاق رغم هو ما قبل بهذا الشي وانطاها كل حقوقها وابد ما اكل حقها وظلمها

جاوبتها .. شوفي اني ممصدق زواجي بالمحكمة بس اشتر دفع حقوقي للجامعه ترا هم طلعاته حلوه

رانيا وهي ترفع شعرها .. حلوه بس متعجرف وراسه يابس وهيج شخص يتعب بصراحة لان الزواج والحب تنازل تبادل بين الطرفين مو عجرفه وتكبر

تنهدت وسكت ما اعرف شنو اجاوب احس فعلا هيج اشتر كلامها صار ياثر بيه كملت ورجعتني للبيت انطتني اتعابي مقبلت اخذ بس هي اصرت

رحت للسوبر ماركت اشتريت حفاظات وحليب هماتين وشغلات لاخواني خلصت الفلوس الاخذتهم

رجعت للبيت اخذت ابراهيم الحضني صرت ابوس بيه واحظنه لحظات استغربت ورجعت شميت صدره وخدوده ما اعرف شصار بيه حسيت بهبطه قويه وبطني لوتني بلعت ريكي بصعوبه .. ابراهيم بيه عطر ابوو

رجعت شميته مره ثانيه والله فعلا بيه عطر ابوو مدا اتخيل شلته وركضت بسرعه لافيان صحت عليه .. تعالي شوووفي ابراهيم شبيه ؟

جاوبت بخوف .. يمه عزا شبيه انووب ؟

صدري يصعد وينزل كلتلها .. بيه عطر ابوو !!

غمتني بثنين اديها وهي تكول .. طاح حظج كون هبطتيني عبالي مدري شكوو عبالي الولد بيه شي طلع بيه عطر ابووو هسه من اسب ابوج وابو اكو احد يلومني

عطت بيه بغضب .. انتي شبييج احجي اشتر اليوم جاينه وحاظن ابراهيم وبايسه احجي

ردت عليه بعدم اهتمام وقرف .. والله شفتج ما شفت ابوو

جنت مذهوله محتاره كلتلها .. تعالي اشتمي بيه عطر ابوو لو اني يتخيلي ؟

جاوبت بقهر .. ادري شكلولج عليه نهار كله حاظنه ابو واشمشم بيه شبيج انتي ؟

عفتها ورحت هاي خبله مو صاحيه بس والله عطر اشتر بيه كل شويه وارجع اشمه واحظنه ابوسه ياربي هذا منين اجاه العطر

بعدها صفنت ايييي ماكو غير تسواهن هي الي تاخذ ابني اله لان هو يعرفها شكيت بيها من البدايه تاخذه اله

ضجت حييل ليش هيج يتصرف برعونيه ليش ما يريد احس باهتمامه الطفله شنو هالخباثه والعجرفه وفعلا مثل مكالت رانيا متعجرف وخبيث شنو قصده بهاي الحركة

رحت على تسواهن كلتلها بهدوء وجمود .. ابني بعد لا تأخذي لأي مكان احسه مخنطل ومريض اني اخاف عليه ان شاء الله اذا صار عنده تلقيح او طبيب اني اخذه وشكرا تعبتج ويايه هوايه مقصرتي

عفتها ورحت من دون ما اسمع جوابها وحسستها ان اني عرفت هي تروح للاشتر وتظم عني

وهذا الشي شب النار بداخلي وخلاني اصير مدينة منكوبه يشتريله ويصرف ويجيب من دون علم مني ليش شنو الغايه من هذا كله ليش ما يريد يبين اهتمامه النه  بسيطة اشتر بسيطه

.................

صفاء

رحت على مصطفى خابرني ما اعرف شنو يريد هو غير حدد موعد للخطوبه شو انوب لغاه واجل الخطوبه

وصلت عنده لكيته واكف على الحسر يشمر جبس للنوراس الله على تفاهة مصطفى

لزمته .. هااا خير شرايد

رد عليه .. سلم بالاول ولو انت يهودي متعرف اداب السلام

ضحكت ... شكو احجي هههه

جاوبني ... اكلك اريد أسالك سؤال وتجاوبني بصراحة ؟

عقدت حواجبي .. سواليش؟ شكووو

تردد وبحيره كال .. انت شتعرف عن افيان ؟

جاوبته .. شعرف هي بنيه عصبيه بس مؤدبة واخلاق ومعتمده على نفسها

رد عليه وهو يتسائل .. ايدها طويله ؟

عقدت حواجبي وكشرت عن ملامحي .. شنو ايدها طويله ما فهمت

سحب نفس وزفره كال .. يعني اريد اعرف هي هم تمد ايدها على شي مو الها لان أمي سألت عليها بالمنطقه وكالو ايدها طويله بايگة فلوس ابوها وناطيتهن الواحد خلفه يشتغل بالبناء

جاوبته مصدوم من كلامه .. يابه شسالفه لا ماكو هيج كلام هن صح عصبيات ويجفصن بس ما يمدن ايدهن على شي مو الهن خاصه ان سولين جانت فلوس اشتر كدامها ما مدت ايدها فد يوم من الايام

نفخ بضجر وهو يكول.. ما ادري والله شكولك بس ما اعتقد اكو هيج كلام لان هي فلوس امها ما اخذتهن وهو ابوها دفعهن بس هي ورطته  يعني اعتقد هو ابوها جان يطلب  الخلفه فلوس على حد علمي بس انت من وصلك الكلام ؟

جاوب بملل وهو يكول .. مو مهم منو وصل بس ردت افهم

ضحكت.. والله لو افيان تعرف انت هيج تحجي عنها جان هسه اجتك وشمرتك من الجسر

جاوبني .. ترا اني ما اشك بيها واعرفها واحبها بس هي يعني ما اعرف شلون اوصفها وامي من عرفت بهذا الموضوع جن جنونها وما قبلت بهاي الزيجة

ضحكت بسخريه .. هسه غير تكول منو الي وصلك الكلام حتى واحد يعرف يتصرف

بلل شفايفه بحيره وهو يكول .. شسمه امي وصلته الي تكول سالت وهيج حجوا واني هم رحت سالت وهم نفس الكلام

جاوبته .. وانت شكو تسال انت تعرفها كلش زين ماكو داعي السوالك اصلا هي مو متلونه وعلى طبيعتها يعني عندها عادي مطلعه ايجابياتها وسلبياتها وما تتصنع

جاوب بغضب .. اي بس انت ما تعرف امي شكد تلح وتدقق

رديت عليه .. عوفها

ضحك بخبث وهو يكول .. واعرف المال والحلال لمنو يمعود هاي ثروه لازم واحد يستثمرها هسه كون هي افيان بيها حظ تتماشه ويه الامور وتصف وياي حتى اكدر اثبت حقي منها واستارث كل املاكها

جاوبته .. ترا الطمع مو حلو

امزلي بضحكة وهو يكول .. لا حلووو بالعكس لعد هي مو طمعت بيه واخذتني من حظن امي خليني اطمع بيها واخذ املاكهاا هههههههههاي

هزيت ايدي هذا شبي بس خوش يفكر هي هاي ام ماهر تستاهل كل سالفه يسويها بيها مصطفى لان فعلا هي يتمته من امي وزرعت الحقد بداخله خليها تاكلها وشزرعت راح تجني

لزمت ايده ... وهسه شراح تسوي ؟

جاوبني ...هو اخطبها واجذب الموضوع قابل شسوي يعني من كل عقلك اعرف افيان هي حتى لو تطلع من جماعة الاربعين حرامي الي جانوا ويه علي بابا هم قابل بيها بس خلي اتزوجها

بقينه نسولف سوالف عامه كال اشتر بعده عند بيت جدي وشايل خشمه عليه واني ما اطخ راس حتى لو اخوي ترا ما صارت شربته حبايه كبسلة مو زرنيخ ليش هيج حاقد شصار عليه

هزيت ايدي بعدم رضا وركبت سيارتي ورحت عندي شغل ما فارغ لسوالف مصطفى التافهه

.......................

جيهان

صارت كوثر تجينه بيت فتره وفتره اني مهيئة الها كل وسائل الراحة بحيث ما مخليتها تحتاج شي وخادمتها مو حبا بيها لا تولي ما اعترف بيها بس اريد الزمها تعبت هاي اكثر من اسبوعين واني كل شي ما محصله منها

تتصل هي بس صوتها ممسموع واني من اريد اتصل اجيب التايهه يسمعني سابع جار هاي شلون هيج الها طاقة تخنك صوتها خنك والله عجيب زين الي تخابره شلون يسمعها وهي بس صوت انفاسها ينسمع

خلصت اتصال هي من تريد تكعد تنطي ظهرها للحايط حتى شنو من افوت ما اشوف شنو شتكتب او بمنو تراسل

جنت متوتره واريد بس اعرف بعدها انتبهت للحايط مال سيراميك المطبخ من واحد يكعد يبين لان تقريبا عبالك بيه مرايات بيه اطار اصفر بين السيراميكات هذا يبين شنو الي وره وكذلك يكون واضح

كلتلها .. كوثر حبيبتي تعالي اكعدي بالمطبخ اريد انظف الصاله

باوعتلي بقرف وراحت كعدت وهي لازمة موبايلها مو موبايل بداله ظليت افتر عليها شفتها فتحت الرمز بس رمز صعب مستحيل احفظه وكذلك باحرف انكليزيه

صرت احجي وياها الهيها حتى يطفى موبايلها وتكعد تكتب الرمز وفعلا صار مثل ما ردت صرت احجي وياها الهيها اسالها اكلها اكلج صدك هذا الثوب محلو كريم يقلد عليه وهي ترد عليه .. اي فعلا يلعب النفس انتي اصلا ما عندج ذوق

الهيها بالكلام واقبل بتجاوزها وارجع اسكت اخليها ترجع تكتب الرمز اخر شي ما حفظته لان انكليزي

بس حفظت تقريبا مكان الكيبورد وشنو تضغط على يا مكان

خابرت افيان وكلتلها انطيتها الاحرف الي تكتبهن كالت هي كلمة mother

بس يعني بيها اخطاء يعني اني مجاي تخلين الكلمه صح بله جربي اكتبي mother بلكي ينفتح

جاوبتها تمام ان شاء الله رجعت لكوثر لحد الان تراسل دخلت للحمام ظمت موبايلها هي كل مره من تريد تسبح او تروح للحمام تاخذ موبايلها وياها ابد ما تخلي بس هالمره مدري ليش

اني جنت خايفه ومتوتره هي مخليته بجنطتها وساحبه السحاب رحت سمعتها بعدها تسبح رجعت بحذر وهدوء واجيت فتحت السحاب وفتحت جنطتها لكيته طافي شحن خابت امالي وانسدت نفسي

خليته على الشحن بسرعه بده يشحن تقريبا صار بيه خمسه فتحته وبين ما نزلت التطبيقات والكيبورد طول شويه رحت جبت موبايلي انوب تاهت عليه شلون احوله للانكليزي وهو عربي

واثناء ما دا احاول افتحه واجت رساله مكتوب عليه بيستي مضمون الرساله .. حروح للكشافه بلكي ترجع الفلوس

حاولت حاولت صار ظليت اكتب حرف حرف ويطفى الموبايل وارجع اشغله واحوله واكتب حرف بعدني بنص الكلمه وهي طلعت من الحمام

هي شافتني وهي تخبلت انرعصت انجنت كالت ... وللللللج انتي شدتسووين شدتخربطين يا حقيره تفتشين بموبايلي ؟

بلعت ريكي بقلق وتوتر وخوف بعدها وجهتها وكلتلها .. اي افتش بموبايلج يااا ادبسز يا منحطه لج انتي شنو من بشر شنوو من مله اخذتي فلوس اخوج بكتيهن مني تاليها تنطيها الصاحبج الكوا...

فتحت عيونها مصدومة مرعوبه كالت ... انتي شتحجيين يا فلوووس ولج نعال حشره تبوكيني لج بعدني ما دخلت بيتكم والله كتله كتله كريم ما اريد ادخل بيتكم هاي مرتك هي وحقوده عندها غايه وسالفه تريد توكعني بيها

اي والله عمي زين بس سويتني ما خذه منكم فلوس همزين ما ذبيتي عليه كوا.. وكلتي هذا صاحبج وجايبته للبيت وبليتيني بيه لج والله انتي اكبر ساقطه اي بعد تربية عويمر كل شي يطلع منج

صرخت بصوت عالي وهستيريا وهي تصييح .. جيبي الموبايل جيبيه ساقطه ادبسز تربية عامر بت الزانيه

رجعت خطوات بعناد وثبات .. ما انطي الج لو تموتين والله اليوم افضحج فضيحة يا عار يا زباله

هجمت عليه بعنف وصارت اقوه مني جرتني من شعري وهي تريد تاخذ الموبايل واني من القهر والعصبيه كفختها على راسها بكل قوه

حسيته داخت بس لحد الان مستقتله على الموبايل وتصرخ صريخ يجيب التايهه وتنطح وتزاكط مثل الثور الهايج

دفعتي دفعه قويه على اثرها وكعت على ارضية السيراميك احس ظهري تكسر لاجزاء صرخت بصوت عالي وهي ركضت عليه اخذت الموبايل ومستمره بالغلط والفشار

بهالاثناء دخل كريم وهو يشوف هاي المهزله عاط بينه بصوت عالي هز كيانه وهو يكووول ... شنوووو هااااي شبيجن صوتجن بالفرع واسمعه اجيت اركض عبالي احتركتن

بجت كوثر بسرعه وسبقتني بالشكوى وهي تكول ... هو هيج الواحد الي يجي عندكم هيج تحترموا وتقدروا شوف شسوت بيه شوف شلون ضربتني وشوهت وجهي وكسرت ايدي هاي واني خطار عندكم

هو باوعلها جانت شعفتها مكفشه و وجهه مشهوط وبيه دم متجمد

هو باوعلي وعقد حواجبه كال بغضب ... ليش ؟

اني مجنت اريد احجيله لان هو ميعرف بالموضوع ولا يعرف بالفلوس بس جاسم يعرف

هزيت راسي برفض وحجيت بصعوبة .. مؤ مؤدبه

ما اشوف الا اجاني راشدي منه عمى عيني بيها بحيث ظليت مصدومة مذهوله واختل توازني

ثبتت نفسي وحطيت ايدي على خدي واني منهاره شفتها رسمت ابتسامة شماته على شفايفها الخبيثه

رفع اصبعه بتهديد وهو يكول ... خطار هنا تحترميييي بس طلعتي انتي المؤ مؤدبه

ضحكت هي وكالت .. اي المشوهه صايره مره براسي

عاط بيها بصوت غلضب وهو يكول ... انجبييييي

جاوبته بغضب اني وبكل عصبية وايدي على خدي ... احترمها ؟؟ ليش احترمها لان باگت فلوسك وانطتهن الصاحبك لان حرمتني اسووي عمليه وحركت گلبي لا حاقده وخبيثه وغيوره لك والله ندمتني على الساعه الي تزوجتك بيها

عقد حواجبه وهو يكول .. شنووو يا فلوس انتي شتحجين

هي انخطف لونها وردت عليه ... يمعووود لا تصدكها هاي فد وحده سماويه مضيعه فلوسك الي انطيتهم الها تسوي عمليه وتريد تذبها براسي

صفن ثواني عبالك دخل بدوامة وهو يكول .. بس لحظة انتن شجاي تحجن شبيجن شكووووو وسم حتى سم شنوهالتهايم احجننن بسرعه

ضحكت بسخريه. ورديت عليه .. مراح احجي شي بس تكدر تخابر اخوك جاسم وهو راح يشوح الك الوضع كله وراح تفهم منه شكو ماكو وشصاير بغيابك و وين راحت الفلوس

ضرب الميز بكل غضب بقبضة ايده وهو يكول .... لا اخابر جاسم ولااااا شي هسه انتن ثنينجن تحجن لا بالقران هسه اكتلجن وادفنجن هناااا ثنينجن

هي هزت راسها برفض وترجف وتبجيييي.. والله مستعده احلف بالقران لا ماخذه فلوس ولا شايفه فلوس ومرتك جذابه وحاقده وحقيره وتريد تبيلني بلوه واني جنت اكلك ما اريد اروح وياك لان اني اعرف اوادم شنو

ضحكت بسخريه ... اذا انتي هيج انطي موبايلج خلي يفتحه اذا انتي كل شويه واجتج رساله وكاتبلج الفلوس ما انطيها وطكي راسج بالحايط منو كلج اخذي فلوس اخوج محد ضربج على ايدج  وذيج تكتبلج حروح للسحاره تطلع الفلوس

صرخت بصوت عالي بوجهي وهي تكووول ... لا تجذبين لا تجذبييين ياربي هاي راح تخبلني وين اروح منج شلون انتحر حتى اخلص منج لج كرهتيني بساعة السودة الي اخذتي بيه اخووي حتى غربيتي عني

هو جان ساكت فجأة كلها ... افتحي الرمز وانطيني موبايلج

هي احسها ماعت روحها صارت ما تعرف حتى شنو تحجي جاوبته ... مابي شحن

كلها بهدوء وجمود .. انطينياه اني اشحنه

بلعت ريكها وصدرها يصعد وينزل تنفسها ضاق لزمت الموبايل وركعته بقووه بالحايط بحيث اجزاء صار كلتله بغضب .. تشك بيه تصدك كلام مرتك وتشك بيه هذا كسرته بله شتسوي

هو تخبل من تصرفها هجم عليها بسرعه وضربها لزمته واني انوسل بيه يعوفها كطعها تكطع وهو يغلط ويفشر عليها ... ادبسز حيوانه تكسرين الموبايل كدامي من دون احترام اليوم والله اذبحج اشرب من دمج

رجع جاب الموبايل مكسوره الجامه وطايح الكفر بس بعده يشتغل بيه روح الله يريد يفضحها حتى الموبايل ما عطله كولش

اخذها وراح باوعلي بغضب وهو يكول .. خابري واحد من اهلج يجي ياخذج بين ما اشوف حل لهالمصيبة

طلع هو وياها واني خابرت على خالتي تسواهن اجت اخذتني جنت ابجي وانوح والراشدي احسه حرك خدي طبع اصابعه بخدي والله بعد ما ارجع كرهته من وره المشاكل بعد ما اريده

.........................

سولين

اجت جيهان زعلانه من كريم وسولفت عن عركتها هي وكرثر الادبسز حيل انقهرت على جيهان لو متزوجه صفاء ولا هالضيم

خابرتني رانيا كالت .. تعالي لوحدج للمختبر واني اجي بعدين لان عندي شغله اكملها واجي

عاد اني بدلت ورحت لكيت بس عمو ابو رانيا كاعد بالمختبر ويسوي تحليلات سلمت عليه وكعدت  ارتب بالاغراض واسحب دم للمراجعين

هو كاعد على المكتب وديكتب بنتيجة التحليل واني ادخل للغرفه الثانيه اخلي التحليلات بجهاز وصرت اراقبهن واتعلم شويه شويه

جنت واكفه دا اباوع بالناظور حسيت بشخص ورايه درت وجهي وباوعت شفته وراي اخو رانيا الضخم

جان مرتب لابس كله اسود وستره رصاصي ابتسم بوجهي بادلته الابتسامه

كال.. شلونج ؟

بلعت ريكي بخوف .. الحمدلله تمام

وكف قريب مني وسند ايده على الميز كال .. شنو اشوفج محتاره

ضحكت .. هااا لا ههه بس دا احلل النسبة المؤيه يعني شويه صعب عليه

تقرب مني وبده يفهمني جان كولش قريب مني ابتعدت بسرعه خفت بصراحة كال .. ترا سهل ميحتاج شي بس انتي لازم تنتبهين وهيج يصير

ظل يعلمني جان حيل لطيف ويايه بس اني ما ادري مجنت اريده يمي احس دا اخون اشتر وهو مطلكني شلون هيج ما اعرف

كعدت بعيد عنه بس جنت احس بنظراته تخترقني حسيت عنده غايه وعنده كلام بداخله وعنده طلب بس مجان يريد يحجي بيه هسه يريد اتطمن من ناحيته يله

سرحت بخيالي ويه الاشتر

من جان حبيبي وروحي وكل شي من جان من اضوج ياخذني على جسر الجادريه اتونس اباوع للنوارس اشمر الهم جباس واعيش وياهم احلى شعور من جان ابود ينزع سترته ويلبسها اليه حسيت بحنيته وعطفه واول مره رجال يعطف عليه ويحبني ويقدرني

ومن جنت اتمرض ينجن عليه يتخبل يعالجني بيده يظل اليل كله سهران

رجعت بذاكرتي بيوم من الايام جنت بيها مسخنه ومريضه وفلاونزا هو جان يسويلي كمادات وجان كل شويه وكال ... السخوونه لايكتلج مسويه خدودج حمر

جنت اهذي كتله .. تحبنيي؟

رد عليه وهو يكول .. جنت شايل العالم كله باديه من التقيت بيج صفكت

ابتسمت .. هه حتى واني مريضه تعرف شلون تأثر عليه

كال بهيام .. احببج

رجعت الذاكرتي وين راح كل هالحب اشتر ليش هيج تغير المشكلة اني مدا اتخطاه

اتصل موبايلي من رقم غريب تفاجئت هذ الرقم لمنو فتحت خط بسرعه كتله .. الووو

رد عليه بهدوء وهو يكول ... الووو السلام عليكم

صفنت بصوته الي اميزه من الف صوت رجفت كلي جسمي كله ارتعش كتله .. هلاو وعليكم وعليكم السسس سلام

كال .. عرفتيني

جاوبته بعد ما بلعت ريكي بصعوبه .. ا استاذ اشتر

رد بسخريه .. ههه استاذ اشتر !!! المهم شلونج

جاوبته .. الحمدلله محتاج شي

جاوبني .. الخميس عندكم جلسه بالمحكمة بخصوص قضية الوالده وتم اعتقال علاء وزمرته بعد ما ثبتت عليهم التهمه والادلة الجنائية كلها جانت الصالح والدتج ست سولين

رديت عليه .. شكرا استاذ ان شاء الله الخميس حنكون هناك بالمحكمة ونعين محامي اذا تطلب الاشتر

كال باستغراب.. تطلب الاشتر ؟؟

هزيت راسي برفض وتلكى .. لا لا قصدي تطلب الامر

جاوب بغرور وهو يكول .. ميحتاج لان كل شي سويته حسب الاصول ومحامي الخاص عينته لوالدتج

جاوبته بنفس الغرور .. بصفتك منووو؟

جاوب بجمود .. بصفتي الوكيل الرسمي لهاي القضية

رديت.. اممم تمام شكرا ان شاء الله ما راح نبخس اتعابك وكل شي خسرته راح يوصل الك واحنه الممنونين

جاوبني ... ارباحي كلها اخذتها مقدما واذا خسرت ارباح اكللكم بس اني مستلم المبلغ مسبقا شكرا ست مقصرتي

ضحكت بضحكة جانبيه مو واضحة اله .. تمام اكيد ما اقصر

كال .. مع السلامة

رديت عليه .. مع ألف سلامة

قفلت الخط وارجف ومتوتره ما ادري شبيه من حجه ويايه حتى ما اكدر اجمع كلمتين على بعض بس الحمدلله ثبتت نفسي وحجيت بثبات

وكفت متوتره افتح الرقم مالته واسده وبعدين ظفته شفته مخلي صورته هو وابراهيم فتحت عيوني طلعن مترين من الصدمة عزااااا ابراهيم شوكت راح اله خرب شلون تسواهن لوتيه جانت تروح تاخذه اله واني يا غافلين الكم الله

صفنت بالصوره بحالميه شلون حلوين ثنين خطفوا قلبي ابتسمت تلقائيا واني اتلمس الصورة بكل حب ذول هم احباب قلبي

بس اني شنوو لازم اقوي نفسي مو ما صدكت اتصل بيه انجلبت ورجعت لا لازم اسوي روحي شخصيه قويه وممهتمه اله وهناك اقابله بالمحكمة بكل قوه وثبات واثبت اله اني ام ابراهيم ما يهزني جبل

اجه اخو رانيا باوعتله قفلت الموبايل كتله .. اسفه استاذ بس اجاني اتصال مهم وتأخرت شويه

جاوبني ... لا عادي بالعكس اخذي راحتج ولا تفكرين بهاي الاشياء

ابتسمت وتشكرت منه كتله .. شو رانيا تأخرت

جاوبني .. والله بصراحة كالت بالطريق يله لا تستحين هسه شويه وتجي

سكتت ورجعت اسحب دم ومشت الامور طبيعية شويه اجت رانيا ظليت احجي عليها لان تاخرت عليه واني اخاف لوحدي واتوتر من وجود اخوها وابوها واني لوحدي وياهم

........................

افيان

كاعده احف بالنسوان ومكسور ظهري ومصطفى كاعد يتغزل بيه شكد ما عنده ذوق ما يكول تعبانه

سديت الخط من عنده وبعدها اجت خاله تسواهن تحف وياي نسوان هي هم حفافتها حلوه

وجيهان مبومه كاعده يم ماما تفرج برجليها زعلانه كريم هاطرها براشدي بس عمي حقها جيهان بيت طركاعه كهلان ولا ينحبون

شويه وانصلت بيه ام مصطفى وهي تكول .. عمري نعتذر منكم الخطوبه مراح تتم لان سالنه عليج وطلعت سمعتج بالحضيض وكلها تحجي عليج وكالو سارقه مبلغ من ابوج ومنطيته ما اعرف لمنو وابوج مزين راسج فاني مستحيل ازوج ابني لهيج وحده

والي اطلبه منج للمره الاخيره تبتعدين من ابني مصطفى لان حيل مصختيها يا امي ما نريدج ولا نحبج لان سمعتج زباله

ضحكت بسخريه واصلا ممصدومة كلتلها .. براحتج بيبي

وبعدين انتي شدخلج جاي تزوجيني لو تزوجين سمعتي واكيد هاي الدراما الي هسه دتالفين بيها هي من سيناريوهاتج على عموم نحجي بهذا الموضوع اني ومصطفى من دون تدخل منج

قفلت الخط بوجهه بعدها انتبهت لا يا مصطفى يا متستحي واكول ذيج الايام مخلصها يسأل بيه عن اشياء تخص البناء مال البيت والخلفه واني سولفت اله المقتل كله اثاري طلع شاك بيه

اطلع نعال بت نعال اذا تزوجتك بسيطه رجعت ركعته حظر مدتة تطول ست اشهر اني يشك بيه مصيفي بسيطه!

....................

صفاء

جنه كاعدين بالبيت القديم هذا البيت جانت دائما تجينه بيه تسواهن تجيب ابراهيم

بس صار مده ابد ما جابته واشتر اتصل عليها كلتله ... سولين شكت بالموضوع وما اكدر اجيبه الك بصراحة خليها شويه تبعد الشك عني واجيبه

كلها بهدوء .. اي هي شلونها وين تروح اشو تطلع من الجامعه من وكت وشفتها قبل فتره بمختبر بمنطقة...

جاوبته .. اي مو كتلك من زمان هاي بنيه صديقتها شغلتها وياها بمختبر حتى تستفاد لان سولين ما عندها خبره وهم يعلموها وهم ينطوها كم فلس

جر نفس وزفره كال ... اي وشنو بعد شصار مصار وياها شسولف شتحجي

تنهدت وهي تكول .. ما ادري بس تكول اخو صديقتي هو يعلمني وهو شخص كلش حباب ويحترمني ومتعاطف وياي

شمر الجكاره من ايده و وكف متعصب كلها .. منو هذا شسمه جيبلي عنوانه كااامل اريدج تجيبيلي كل معلومة عنه تمام

ردت عليه وهي تكول .. على كيفك هسه انت ليش تعصبت وبعدين ما اعرف عنه شي بس اسمه علي واعتقد كالت مخلص ماستر بايلوجي

حك طرف حاجبه وهو يكول .. تمام ان شاء الله نشوف شيصير بس انتي شتشوفيها تحجي بيه هوايه لو شنو

ضحكت تسواهن وهي تكول .. ما تحجي بيه بس بطلت تحجيك مثل قبل من جانت صارعتنه بيك واحنه نرزل بيها

جر نفس وزفره كال ... الله كريم ان شاء الله خير

عافتنه وراحت ظل هو متوتر وقلق كال.. اكلك هذا علي اشو نبص بالسالفه منين طلعلي من نعال عليه

ضحكت .. هههه ها شنو بدت الغيره

باوعلي بطرف عينه وهو يكول .. مو غيره بس يعني اني ما احب تحتك بغيري على العموم ان شاء الله خير

رديت عليه... رجعها

صفن ثواني بعدها جر نفس وزفره  مجاوبني وتركني وراح بس حسيت بحيرته وغيرته عليها

اني اخابرها دائما بس ما احجي الها اي شي عن موضوع اخويه لان اعرف هو ما يقبل اطلع اسراره فما جنت احجيلها

بس قررت اتواصل وياها واعرف منو هذا علي ومنو صديقتها رانيا وليش هيج متعاطفين وياها وهي اصلا مو خريجة

................

جاسم

من بعد ما اجه كريم وهو متعصب جاب كوثر وجهه يلطم ومضروبه وتبجي جان الموبايل بيده ابويه من شافها رزل كريم وظل يحجي عليه شلون هو مامن عنده اختي وهيج مسوي بيها

رد عليه كريم .. بنتك هاي فلشت الموبايل كدامي بس لان شكيت بيها وطلبت منها تفتح الرمز

ابوي هجم على كريم وهو يكول .. وانت شنوووو ومنو حتى تمد ايدك عليها اني هنا مسؤول اني احاسبها واادبها وكل شي اسوي انت روح المرتك وعوفها بحالها

بجت كوثر وهي تكول ... اي هي كله من وره مرته مرته هي السبب هي السبب بكل شي تهمتني بايكة فلوس كريم واني بحياتي ما ماده ايدي على شي

جاوبتها اني بغضب وعصبيه... لا انتي صدك بكتيهن واخذتيهن ما اعرف وين واذا انتي تردين تبرين ذمتج افتحي موبايل

عاطت بوجهي وهي تكول ... منييين افتحه منيين ترا ميصير هيج تسوون بيه عيب عليكم عييب والله عيب ترا اني اختكم وبعدين الموبايل تفلش شلون بعد افتحه

كريم تقدم بهدوء وهو يكول .. صح فلشتي بس بعده يشتغل هاج افتحي

صفنت ومتوتره وخايفه ابوي كلها .. افتحي بويه اذا ما عندج شي كريم وجاسم اتبره منهم ليوم الدين واحرمهم من الورث وكل شي يتحول باسمج

بلعت ريكها وهي تكول .. بس الموبايل ما يشتغل واني من القهر حتى الرمز نسيته

جبرها ابويه تفتح الموبايل ودخلنه على المحادثات هي جانت ترجف مثل السعفه الضاربها اعصار ترجف وتبجي استسلمت بعد اصرار من ابوي

دخلنه للمحادثه وعسانه ما دخلنه مصايب وبلاوي سوود

نهاية البارت ... يتبع

كونوا انتم كونوا بخير ... احبكم 💔

لا تنسوا التصويت والمشاركة بكم نكتمل ❤️

نور سمو العراق