#وكر الأشتر

بارت ١٦

بارت ١٦
رواية .. وكر الاشتر
بقامي .. نور سمو العراق

💔💔💔💔💔💔💔💔💔💔💔💔💔💔

ما نتحدث عنه اليوم هو عقوق من نوع آخر. لأن الظالم هنا ليس الابن إنه الأب. هذا الانسان الذى ترتبط صورته لدى الناس برمز العطاء والحماية وانكار الذات

......................
صفاء

جنت كاعد اباوع على البلازما وابن زهراء موتني كل شويه وصغد فوك راسي خبل مو طفل

واشتر ديصلي وزهراء بالمطبخ تسوي اكل وزينب راحت لامها

شويه واندك الباب رحت بسرعه فتحت الباب ما اشوف اله عامر وجهه مثل وجهه الجلب جنه نعال يروح فدوه للجلب على الاقل وفي مو مثل هذا العار

جان وجهه ممسوخه منه الرحمة وكالب خلقته وعاقد حواجبه وكله وسخ وشايل بيده طفل ما اشوف منه بس الملحف الابيض انصدمت من شفت الطفل بيده

كتله بغضب .. شتريد

حط الطفل بيدي وهو يكول .. هااك هذا ابنكم مو اخوك يخلف ويطلك ويشمر عليه ترا ما مفتح دار الايتام ببيتي هذا ابنكم ربو انتم اني زين عليه اربي جهالي

اخذته منه بغضب ورديت عليه .. شكد ما تستحي وما عندك خجل لك طفل بعده على صدر امه شصرفت عليه انت تظل هيج بخيل وعار

رد عليه وهو يكول .. شووف هي بنتي ما تريده تكول اريد انزوج خوما اظل اكعد اربي ابنع واكسر شبابي تريد تتزوج وهذا ابنكم هي دزته ان شاء الله يتربى بدلالكم

راح ركب سيارته شخطها وراح واني تخبلت دخلت بالطفل جان الاشتر هسه جاي يسلم وخلص صلاة

بسرعه التفت عليه وانظاره ظلت معلگة بالطفل الي بيدي كال باستغراب.. هذا شنووو ؟

تنهدت وجاوبته .. جابه عامر يكول هذا ابنكم ما نريده

وكف بكل غضب واخذ الطفل من ايدي جان وجهه اصفر بيه ابو صفار وحالته تعبانه ضمه الصدره وهو يبوس بيه رد بغضب .. لا يا عامر يا كلب الله ينتقم منك يا عار بسييطه وصلت حدها وياك اذا ما ندمت وخليتك تعفن بالسجن

اجت زهراء تركض كالت .. هاي شنو شنو هذا الصوت

تنهدت وجاوبتها .. هذا ابو سولين جاب الطفل يكول ما نريده ربوا انتم

اخذته من ايد الاشتر وهي تهز بيه تريد تسكته كالت .. عمري عمه اسكت هاي اني يمك يا الله شلون انطاها كلبها سولين تنطي الطفل لابوها

رد عليها الاشتر بهدوء وهو يكول ... لا مستحيل سولين ما تنطي هو نذل اخذه منها غصب عامر واعرفه واعرف سوالفه

تنهدت زهراء وهي تكول .. اوووف شلون هيج يسوي بيها وهي هسه جايبه هذا خطر على العالم شلون عايشين وياه اهله والله ما اعرف

اشتر لزم ايد ابنه وهو يكولها .. خويه شسوي اجيبله حليب مميه شسوي كولي حتى اجيب كل شي ما اعرف اني

مسحت على وجهه وهي تكول .. هو جوعان بس احنه ما لازم نجيب من كيفنه ونشربه لازم دكتور اخصائي بالأطفال هو يسجل اله حليب يناسب عمره وحالته

اخذ موبايله ورد عليها .. يله تمام خليني احجز هذا مستشفى اهلي معروف خوش مستشفى واخذه اني وياج اله

ابتسمت وخلته بحضن الاشتر كعد يلعب بيه ويحاول يسكته وهي جابت مي وظلت تشرب بيه بخاشوكة شويه هدء وسكت

باوعلي الاشتر وهو يكول .. خابر سولي كلها الطفل عدنه لا يظل بالها باليل ارجعه الها بس خلي اتخلص من عامر

ابتسمت وفرحت بداخلي يارب يهدي بالهم وسرهم وان شاء الله حبل الزعل ما يطول

فتحت موبايلي دا اتصل وهي اتصل تبجي وتنوح وتصرخ ولا فهمت منها شي

بعدها هديتها وفهمتها الوضع وكلتلها ان شاء الله ما يظل هواي هنا نجيبه الج بس هي وين تصبر ما اشوفها اله اجت

..............

سولين

اصعب شي واني مجربته هو الفقدان الشخص من يفقد انسان عزيز عليه ينهار يتخبل ما يعرف شنو يسووي واني ضگت طعم الفقدان من زمان فقدت امي وظليت اعاني عليها واموت كل يوم الف موته

وما عندي الطاقه للفقد مره ثانيه اني الي مصار اسبوع عندي ما اعرف وين وداه عامر صرخت بوجهه امين بكل غضب نسيت حتى ان هو اخويه نسيت بالحظة غضب مني صرخت بيه حسيت ازرار العملية انفتحت ... لييييش لييش خليته ياااخذ ابني انت حقييير ما تفتهم يارررربي وين ابني

بجة بسرعه من غضبي وعصبيتي كال ... هو گلي ماخذه يشوفه ابوه شويه وارجعه لا تكعد سولين خطيه گوه نامت من الوجع

عطت بيه مره ثانية ... وانت صدكته ؟ انت شبيييك ليش هيج فاهي

عاطت بيه تسواهن .. كافي ولج كافي تلومين على الولد جااا هو شمدريي انوب تريد تسودن اخوها لخاطر فرخها لماصار يومين من اجه

وكفت واني اعرج ولازمة عمليتي گوة متحمله الوجع وجع لا يطاق منهاره مرعوبه واصرخ .. وين اروح وين امشي ياربي شوكت اخلص من عامر النذل

جانت افيان واكفه مرعوبه ومخطوف لونها وهي كل شويه وتتصل وترجع ةتكول .. رد رد عليه بسرعه

اني تخبلت ما اعرف شصار بيه وجليه صارت خيوط وحده تضرب بالثانيه بلعت ريكي بخوووف واتصلت بسرعه على صفاء اديه ما تعيني حتى الزم الموبايل

شويه وانفتح الخط كتله بصراخ ... صفااااء فددوه صفاء ابويه اخذ ابني ما ادري وين وداه فدوه راااح اموت راح انجلط خلي اشتر يشووف وين راح هذا عامر موتني ياربي شسوي راح اموت گلبي راح يوگف

رد عليه وهو .. على كيفج سولين اهدي اهدي هذا يمنا ابراهيم ابوج جابه النه

لحظة صمت مني حسيت الوطن العربي كله تكسر فوك راسي رمشت بعيوني ممستوعبه الي ديصير همست بصعووبه .. شنووو؟

جر نفس وزفره كال .. اي جابه عدنا وهسه هو هذا يمنه اجه وكال امة متريده وانتم طلكتوها اخذوا وفكونه شركم

شهكت برعب ... الله لا يوفقك يا عامر الله ينتقم منك الله يكسر خاطرك مثل ما كسرتني خاطري وسودنتي عساك بحرگة گلبي نفسه وادعي عليك ان شاء الله ربي يستجاب دعائي يا نذل

رد عليه صفاء وهو يكول .. على كيفج خويه هذا هو يمنه الطفل ما بيه شي

صرخت ودموعي مثل المطر .. شدكول صفاء طفل هذا حتى صحته مو زينه ياخذه يدربن بيه من مكان المكان انت تدري بگلبي شصار احس نار بصدري تسعر كل شي اسامحك عليه يعامر بس هاي سالفتك كسرتني نصين

قفلت الخط وكعدت على الجربايه لازمة بطني مدا اكدر حتى اوكف شهكت وحطيت اديه على وجهي وبجيت

بجيت متحسره على حالي شلون اب من بين الاباء ذلني وكسرني ما خله شي ما سواه بيه اااااااخ يارررربي تعبت تعبت والله شسوي

لزمتني افيان وهي تكول ... كافي لا تظلين تنوحين خلينه نخابر الاشتر يجيب الطفل ويجي

وكفت متعصبه وايدي سانده عمليتي... لاااا اني اروح اني اروح واجيب ابني منه حتى يعرف اني ابني مبايعته وابوي اخذه غصبا عني

جاوبتني افيان باستفزاز وخبث وهي تكول ... اي حتى تكسرين خاطره بلكي الله ويرجعج مووو

رفعت اصبعي بتهديد .... انجبي انتي مالج شغل ومو اني الي استعطف مشاعر الاشتر

تسواهن ردت عليه .. ولج يمه اكعدي انتي وينج و وين الظيم صدك جذب عمليتج بعدها خضره حتى حجي ما بيج تحجين

هزيت راسي برفض .. لا ارووح هسه اروح ما اكدر اعيش بعيده عن ابني واني اعرف هسه اشتر ما يرجعه الي لان يكول ابوج مو امان اليوم جابه اليه باجر ياخذه بغير مكان

فاني لازم اجيب ابني وبعد ما انام اظل سهرانه للصبح كاعده اباوع عليه ما اخلي لوحده ابد ومن انام اقفل الغرفه حتى لو انتن تدكن الباب ما افتحه الجن ابببد ابببد

غمتني تسواهن واني عاندت وابجي من كل گلبي عبالك ماخذين روحي

لبست بسرعه وتسواهن جابت تكسي واجت وهي تصيح .. شلوون بلوه طاحت على راسي عامر وبناته منين اتلگاها منجن من ابوجن الجلب ابن الجلب يله امشي اجت التكسي

طلعت امشي بحذر احس بطني تتكطع وادعي على عامر شلون بهذلني وخلاني بهيج موقف معفن

جانت شكو طسه بالمنطقه تهد حيلي وتكطع العملية تكطع بس اني راضيه بالأذية المهم اشوف ابني واجيبه

وصلت عند بيته نزلتني تسواهن بحذر نزلت دكيت الباب بسرعه وابجييي فتحت الباب زهراء من شافتني انصدمت كالت .. سولين شجابج لج مو هسه جبتي

تجاهلتها ودخلت والدمعه تطفر من عيني شفت الاشتر كاعد وحاط ايده على راسه ومبين مزعوج

والطفل جان على القنفه بصفه صفاء يلعب بيه ويبوس بيه صحت بصوت حنين .. ابنييي ابراهيم يمه

حسيت بيه رفع راسه اليه واني مشيت اعرج برجلي وايدي على بطني وحجابي مخربط كعدت على الارض ولزمت ايده شفته متغيير وجهه اصفر وذبلان ومخنطل همست بدموع شاكيه الهم بداخلي .. يمه ابراهيم

جان يباوعلي حسيته تعب تعبان حييل الله لا يوفقك يا عامر الله ينتقم منك على هالدكة الناقصه

حطيته بحضني وزهراء ساعدتني اكعد ظل يبجي يريد يرضع اني طبعا حتى جنت ما اكدر ارضعه من العمليه بس ما ادري شلون اجتني القوه واجيت لهنا مع العلم حتى الابرع جنت كوه اضربها من الوجع

بس ابني و موقف ابويه نساني كل الوجع وكل الالم شكول عليك يا عامر حسبي الله ونعم الوكيل

باوعت للاشتر جان صافن بفراغ وعاقد حواجبه ابد ما باوع عليه ولا حجه كلمة ولا اهتم الوجودي

ملامحة جامده وشفايفه مشدوده بقسووه وهااادى بلعت ريكي من شفته هيج ظليت صافنه عليه احس كلبه مغسول مني

وكف ومشه خطوات حجت اخته وهي تكول .. وين رايح خويه مو هاي سولين هنا

وكف من دون ما يدير وجهه كلها .. عندي شغل

بلعت ريكي والرجفه بصوتي كتله .. اني ما ادري جنت نايمه وهو اخذه مني كسر كلبي عليه واني مستحيل اصحي بابني لا تتهمني باطل

ظل على وكفته وضحك بسخريه كال .. ممتهمج

رديت بغصه ... اشتررر

جاوبني بكلام قاطع .. اخذي ابراهيم وياج اليوم عامر ما يبات بالبيت

طلع من البيت واني جنت مصدومة فشلانه منهاره بلعت ريكي وباوعت لزهراء همست .. ليش هييج

نزلت راسها وهي تكول .. ما تعرفينه يعني هو زوجي لحد الان يدك براسه

هزيت راسي برفض وكاتمة بگلبي .. بس اني مو زوجج

وكفت بعتب اجه صفاء اخذ مني الطفل كتله .. صفاء اخذني للبيت

رد عليه كال .. لا حجز اشتر غرفه خاصه بمستشفى اهلي متشوفين الطفل مريض و وجهه اصفر راح ارجعج للبيت واختي زينب وتسواهن تظل وياه

رفعت حاجب ومسحت دمعتي .. لا والله شنو اني جيرانكم هو غير ابني اني اروح وياه

رد عليه وهو يكول .. انتي مريضه ولمصلحتج

جاوبته بعنف .. مصلحتي ويه ابني واني اروح وياه

تنهد وسكت اخذنه بالسياره اخذوا هناك خلوله اوكسجين وانطوا علاج واني كذلك داروني لان عمليتي ظلت تنزف من وره عامر الزفت

........................

جاسم

هسه رجعت من السنتر اتصلت بيه رنا كالت طلعت حامل ياربي شلون فرحت فرحة ما انطيها العزيز كلبي

وزعت على الشباب كراميات ورجعت للبيت فرحان بحمل رنا

دخلت جوه لكيت ام حسن تهوس وتركص فرحانه بحمل رنا وحنان مطنكره ليش ما اعرف

حضنت رنا وباركت الها وبستها وبست ايد ابوي جان كاعد يمنه وكوثر بالجامعه

جنه فرحانين وخابرت على كريم بشرته بحمل رنا واخيرا راح يصير عم انوب شلون فشله اني صرت ابو قبله وهو تزوج ثنين ولحد الان كل شي ماكو هههههه

ظلينه كاعده بين سالفه وضحكة وما نسمع الا الباب تربد تربد طلعت ام حسن بسرعه فتحته حتى ما لحكت اطلع افتح الباب

ويدخل عامر مدرعم وهو يصيح ويغلط .. هسه تدلوني وين ايار وبأي مكان بالبصره اريد ارجع اكتلها اموتها بيدي شلون عايشه شلوون والله عقلي ما يستوعب شلووون عايشه بيدي كتلتها

عاط بيه ابوي بغضب وزنكة من تشيرته .. ولك انت شتريد شتريد بس اريد افهم انت شنو من مله احمد ربك المره عايشه جان انت لحد الان خايس بالسجن يالمعفن

دك على صدره والخبال راكب راسه ... انييي انسحن انيييي اعفن بالسجن مووو اني مو اني شرييف مو اني نزيهه ما اقبل بالعيب ما اقبل بالعار وانتم تموتون على العااار ولكم يا نااااس يا عالم هاااي عاار عااار تعرفون شنو عار يعني لازم تموووت لازم هيج حق الله يكول والله هيج حق الله يكول

ضربه ابوووي بعصاته على راسه وشكفها عامر ... ولك موتتنه طلعتنا من طورنه ولك شوكت تصير ادمي عند عايلة ينحلف بيها وانت مثل الزمال محتار شتسوي ولك ما تگلي انت من يا مله مو حتى روحي طلعتها شيويلك وتصير ادمي

اشر على روحه ويحجي بغضب ... هاااا هسه اني صرت مو ادمي مووو والله انتم مو اوادم بسيطة اويره وين تروح لو تطير للسما هم اجيبها اجيبها والعن الخلفها

طلع من البيت وهو يتهدد ويكول ... اني الكم اني بسييطه اذا ما ربيتكم انتم اعدائي اذا واحد منكم دافع لايار هو عدوي

ابوي رد عليه .. والله ما مقهور بس على ايار لان تزوجت واحد عار مثلك الا انت المهتلف منو تقبل بيك

دار وجهه على ابوي وهو يكول ... انيييي عاااار انييي ولكم انتم كلكم عارات وترضون بالعار بس اني مو مثلكم اني شريف عفيف

طرده ابوي وما نسمع بس صوت السيارات العسكريه وسيارات الشرطه وهي طوقت بيتنه

طبعا عامر جانت بيه ريحة بانزين تكتل تطر الراس هو يبيع بانزين يهرب للاربيل مناك يتصدر الله يعلم وين تهريب يعني

وسيارته كلها ريحة بانزين بحيث اذا واحد صعد بيها ودخن يحترك لا محال

ظل واكف ويبلع بريكة وعيونه طلعت مترين عرف جايين عليه ظل محتار وين ينهزم و وين يروح

صاحوا بسماعة المناداة وهو يكول.. عامر سلم روحك من دون اي مشاجره انت مطلوب للدوله

ركض بسرعه وهم رموا عليه ظل محاصر طلع مسدسه ويريد يرمي عليهم بس للحسن الحظ حشر المسدس و وكع عامر بالفخ

نزلوا وحاصروا شمر المسدس واخذو منه وهم طاحوله دفرات ورفسات وبالدوكن وين اليوجعه وهو جان يصرخ ويصيح يكول .. والله مظلوم والله ما مسوي شي ليش تاخذوني بس اريد اعرف اني شنو الي مسووي يربي واحد منكم يجاوب

سحله الضابط وهو يكول .. عود هناك بالسجن راح نكلك شمسوي تهرب بانزين مووو وخاطف طفل من امه وعليك تهمة شروع بقتل زوجتك امشيي ساقط كوااا.. ولك وتهمة تهريب السلاح ومخدرات

اخذوا رفسات وجلاليق وهو لحد الان يصيح ويلطم ولا يكعد ربطوا عيونه واديه وحطوه بالسياره وانطلقوا بيه

تنهدت براحة وابوي كذلك الي جان واكف ويحرض الشرطه عليه وهو يكلهم ... اييي بعد ايدي ييي بعد عمكم هيج اريدكم تسكطونه كوون ما تخلونه يمشي هذا العار الخبل موتوا سكطوا لعنوا ساعة السودة الي اجة بيها

من اخذوا ضحكت وابوي تنفس براحة وهو يكول .. دام هيج خلصنه منه طلي لوجهه الله تعالى هذا نذر اني ناذره من زمان راح بيها عامر اربعه ارهاب

طش الخبر عند الاقارب وهاي خلصنه من عامر ولازم ترجع ايار لبناتها بس لحظة تسواهن وين تروح؟

............................

افيان

من بعد ما انسجن عامر الله لا يذكره بالخير بتهمة تهريب البانزين للشام ومناك مدري وين يصدره لاسرائيل مدري وين دهر صاب ابوي كل سالفه عوجة لازم يمشي بيها المهم ما علينه منه المهم خلصنه والله خلصنه الحمدلله والشكر 

بس لحظه هو ابوي طلع كل شي مهرب حتى دكسن ههههه همزين ما هرب خلطاتي جان ظلن زبوناتي بالظيم جااا بعد وين يلكن مثل خلطتي

جانت سولين كاعده شويه صارت زينه بس ابنها مريض بي ابو صفار واني افتر عليها ساعه احطله ثومات ساعه اشتري لايت اضويله حتى ما يصير اصفر عادات العجايز متعلمتهن من زبوناتي

طلعت من المستشفى بعد ما ظلت بيه عشر ايام وتقريبا بده. يطيب من ابو صفار واستقرت حالته

خايفه على الطفل حيل لان بصراحة معتبرته حبل نجاة لاختي الحيه جااا اذا لا سامح الله فطس ومات بعد منو يرجع سولينه للاشتر هم لو اطكة بسحر عند ام عباس ما يرجع

باوعت لاختي جانت حزينه ومقهوره لان دمرت حياتها بيدها وتبجي عطت بيها بتذمر .. هااا عيني المسعده شبيج تتبكبكين هي جفصت انوب تسودنت عليه اني اخيط وهي تفتك

شهكت وهي تكول .. شفتي لاشتر شلون يعاملني شفتي شلون حتى ما يباوع بوجهي لج من يشوفني يدير وجهه يبتعد عني حتى ما يريد يطل بوجهي لهلدرجة اني كاسره كلبه وضالمته لج بالمستشفى يجي ابد ميباوعلي اتمنى منه النظره شفتي شكد خبيث

فرفرت شفايفي بقهر .. جااا ما تگلين لروحج غلطتي على الرجال بنص البيت وكدام حارث وكوثر زين طلكج طلكة وحده لو اني منه اطلكج طلاق خلعي وبالثلاث هم لو تنكحين غير واحد هم ما رجعج

بجت وهي تكول .. شكد خبيثه انتي تجرحين بيه بكلامج ترا هو هم غلطان ليش ما گلي عن ماما ليش ما طمني ترا اني صعب عليه اشوفه موجود من امي انكتلت ليش ما طمني

جاوبتها .. مو انتي نعال هو لو حاطه لسانج بحلكج وساكته وگالبه خلقتج جان ما هسه لازم ايدج ويبوس بيها ويطلب رضاج بس انتي وين اذا ما تطلعين لسانج عشر مترات ما ترتاحين اختي واعرفج بيج ديناصور يحوص

مسحت دمعتها بطرف اصبعها وبلعت ريكها .. بس اشتر مو هيج جان حنين حتى على اغلاطي ليش هيج تغير لج ما يباوع بوجهي مشفتي شلون لابسني مثل النعال

هزيت ايدي .. اكلج شو انتم عائلة تتعاملون بس بالنعايل شسالفتكم انتي تكليله نعال هو يعاملج مثل النعال شسالفتكم تحبون النعايل اعترفوا

جاوبتني بحقد وكره .. شكد خبيثه ومكروه تركصي على جروحي شوفيلي طريقه اصالحه بيها من دون ما افقد كرامتي

ضحكت بسخريه وصوت عالي .. والعباس حتى لو تفقدين كرامتج هم ما يباوع بوجهج انتي شايفه النساوين الي بشغله غير يطكن بالكاع من سالي وشيل ايدج

هااا لعلمج ترا هو يمكن متندم تزوجج بحيث بس اتيحت اله الفرصه گبل طلكج وركعج انتي وابنج ابو راس مصفح دفره

ردت عليه وهي تبجي... لا والله العب لعب بس يتزوج لو يرتبط كافي الي اجاني منه ترى هو هم عذبني وسحلني سحل وتحملت منه هواي شدعوه ما يتحمل كلمة مني يعني هو عنده احساس واني ما احس اصلا هو خبيث وما يستاهل تعبي وياااه

جاوبتها .. اذا هيج عوفي خلي يولي لا تفكرين بيه مو زين خلصتي منه

جرت نفس وهي تكول .. ما اگدر احببه اموت عليه ما نسى وكفاته وياي ترا هو عطل ابو سعدون لعلمج

عفتها ورحت هاي اختي فد وحده خبله مو صاحيه كل شويه وبجت عليه وره شويه وكعدت تذم بيه وكالت هو الغلطان هسه منو الغلطان ما ادري

جريت نفس وزفرته شكد مقهوره محتاجة لامي مقهوره عليها شوكت نلتقي كال اشتر ما ظل شي ان شاء الله الاسبوع الجاي نلتقي بيها ما ادري شلون راح اقابلها شلون ابوس ايدها اشمها احضنها اعتذر منها عن كل كلمة اذيتها بيها من دون قصد مني

اتصل بيه مصطفى فتحت خط .. نعم تفضل

جاوبني .. حضري نفسج راح تجي امي تخطبج

رديت عليه .. لا اغاتي مو هسه خلي ترجع امي وينصفها القاضي يالله بااي سلملي على امك وبعدين اكلك اني هاي الي مربيتك مع احتراماتي الها بس ما احبها يعني مستحيل اعيش وياها

جر نفس وهو يكول .. غير مربيتني يعني شلون ما اكدر اعيش من دونها

تعصبت ... جاااا شسويلك عساس شلون تربيه جانت شو مرافك امهات الملاهي وتشرب عرك من ربيتك اني صرت ادمي وتصوم وتصلي

جاوبني .. ترا ما صايم ولا مصلي مجرد تركت الشرب وتركت النسوان وما اروح للملاهي

رديت عليه.. اي العافيه بالتداريج صدك جذب اول الغيث قطره اول مره تبت من المنكرات وبعدين تكون من الصالحين القائمين ليلًا ونهارًا

جر نفس وزفره كال .. رايح عود من تصيرين ادميه خابريني

جاوبته .. تمام وانت عود من تصير زاهد عابد ارد عليك

قفلت الخط بوجهه شكد حقير انوب اني مو ادميه كل هالاخلاق والانسانيه ويكول مو ادميه جا الادميه شلون تصير شكد ما احاول اسوي ادمي ابد ما يصير اريده مثل نسيبي كون حتى جكاره ما يشرب

.........................

جيهان ... ٓ

بعدني ماجاي اكدر اسامحه ووجهي ثگيل عليه
وهو يدور يدور يحاول يتقرب مني يضحكني ويراضيني ويتودد ...بس والله صعب انسان قريب منج تالي يعرف كل شي ويطعنج هيج طعنه

بس اني وين قافلة وماجاي افك الي سواه بيه مو سهل ابد شون يضم عني هيج موضوع لا ومعتبر امي عار !! لييش هيج لييش ...

هي امي لو عار مجان تحملت عامر كل هالسنين على مودنا اني واخويه واخواتي لو عار جان تركتنا وراحت عاشت حياتها ...

هي ماما بعدها حلوة وصغيرة بس الضيم غير ملامحها وكبرها .. كله بسبب عامر الخسيس النذل فضحها وضربها واذاها وخلاها على كل لسان

كلما يحاول يتودد الي اتذكر امي وغلاوتها مااكدر
بعدني حاقدة عليه ....والله مو بيدي بس والله شي يبعدني عنه كلت يمكن من اشوف امي واتطمن اكدر اتجاوب وياه

اجه جايب المسواگ من طب اني ماحاجيتها
باوعلي بيده العلاليك
وظل صافن بوجهي واني كاعدة بالصالة عالقنفة وبيدي الريموت

كال هلووووو ؟
باوعت بوجهه جان مبتسم
خليت ودرت عالتلفزيون
خليت شعري ورا اذني وبعدها كلت هلو بصوت كوة ينسمع

كال اني راح اخلي العلاليك مال مسواك بالمطبخ عود انت رتبيهم بطريقتج الحلوة المرتبة ...اعرفج حلوه ومرتبه

وجهت الريموت على التلفزيون ومجاوبته ....

هو هز راسه وطب للمطبخ ووراها طلع واني على نفس كعدتي

هو اجه كعد يمي كال باعي هاي بدربي شفتهم
ملابس اطفال عود اخذيهن لابن اختج فرحيها بيهم خطية

صدك اني رحتلها كذا مره واخذتلها شغلات ويايه

رمشت بعيوني واباوع للتلفزيون ...

اخذ الريموت من ايدي وخلاه عالطبلة
وسحب ايدي وعصرها باديه على خفيف ..

كال جيهان عفية لتسووين هيج موو اني احبج وكل هذا سوينا على مودكم وعلى مود امج وحفاظا على حياتها وسلامتها لان عامر شفتي لحد الان يتهدد ويهدد بقتلها

سحبت ايدي منه على كيف

لزم وجهي داره عليه ويباوعلي
كال مكافي زعل ترى والله ادري ملازم اسوي هيج بس هي صارت بعد ولاتتوقعين اني اسوي شي اضرج بي لا والله كله لمصلحتج انت وخواتج وامين  وجنت اريد اكلج من اول ما ماتت ردت احجي بس جنت مضغوط ما كدرت افصح بهذا السر

وامج مو عار لو عار ترا ما اخطبج ولا تقرب منج ويكولون الساس نداس والعرق دساس

بقيت ساكتة
كال زين احجي كلمة نطقي ميصير تعاقبيني بسكوتج طول اليوم حتى لصوتج اشتاقيت

تنهدت وكمت على حييلي كتله اروح ارتب المسواك بالمطبخ ....

هو هز راسه وعدل كعدته على القنفة ورجع ظهره

اني خليته ورحت للمطبخ عدلت المسواك وخليت كل شي بمكانه ورجعت للصالة ماشفته الظاهر طب للغرفة

رحت اباوع على ملابس الطفل الي جابهن لابن سولين
اخذتهن واباوعلهم مبتسمة شكد حلوات وصغار اوفرات  لونهم سمائي وياه حذاء صغير مال طفل حديث الولادة وجواريب كلهم نفس اللون كعدت اكلب بيهن

سمعت صوته يگح خليتهن كلهن بالعلاكة رجعتهن وكمت ...

وكف تقرب مني حضني وباس خدي بلعت ريكي وبجيت دارني عليه ومسح دموعي وهو يعتذر مني مجان مني بس الدموع والسكوت

...........................

سوليين

شويه حالتي تحسنت وصرت اكوم وامشي وكذلك ابراهيم صار زين اووف اسمه شكبره طبعا اني ردت اسمي غير اسم بس هذا لقب ابو مكدرت اغيره حبا ابو

جنه اليوم حيل فرحانين اشتر متصل بتسواهن وافيان وكاللهم اليوم اجيب ايار الكم لان هي متصله بيه وتريدنه بعد ما سمعت من اشتر ابويه دخل سجن

طبعا هو اشتر ميحجي ويايه اببد وحتى من انشر ما يشوف ستوريي ولا حتى يدخل عليه بس على فافي تواصله وكريم وتسواهن

خاله تسواهن ظلت يمنه تكول بعد اني على ذمة عويمر القذر وهم ما الي احد هناك جحيم وما يلفي للبيت المن ظاله

عاد هنا متونسه على افيان ام لسان وهم بعد صرت منكم وبيكم ما اكدر افاركم صرتن عبالك بناتي

جنه حيل فرحانين بيها ومونستنه حبابه حييل ولو هي من تكعد ترزل بينه ما تسكت لو يجي جدي من الگبور

جنت حيل فرحانه راح تجي امي ورايح يجيبها اشتر كال بالعشره باليل اجيبها

كلها التمت عدنا كريم جاب جيهان ظلت يمنه بس هو راح الدوامة واجت عمتي وحارث ورنا كلنه منتظرين امي والفرحة ما ساعيتنه

محتاره شلون اقابلها شلون ابوسها واحضنها شويه واجت ام حسن واجت وياها كوثر هن وجودهن مثل عدمهن بس عيارات يردن يسولهن حلاوة بجدر مخسوف

جان حارث مهتم بطفلي يلعب وياه ويبوسه واني جنت متوتره وخايفه اخاف يجي اشتر ويشوفه وتصير عركة خاصه هو يتخبل من حارث

عفته وطلعت برا اتمشى مقهوره حييل رغم فرحتي بأمي اشتر حيل هاملني وعادم وجودي بحيث حتى اتصلت عليه بالغلط مجاوبني ولا شاف اتصالي احس كرامتي انهانت شسوي صح غلطت بس والله ندمانه وهو هم الي سواه مو شويه

هاي اول مره ازعل منه وما يراضيني والله مره زعلت منه وهو ظل مصر اله يعرف شبيه وكتله ما بيه شي ظل يلح وكال .. مو بكيفج ما تكولين شبيج من كل عقلج اخليج تنامين والدمعه بعينج من كل عقلج انام وادري بيج مقهوره

يعني جان حيل حنين شنو الغيره عليه اسلوبي والله اغيره شيريد اسوي بس لا يسوي بيه هيج والله خاطري مكسور على امي شسوي يربي

مو جان يكولي يكلبي الاسود على الناس والابيض بس عليج وينك يا اشتر اشوو كلبك صار مثل الحجر عليه

سمعت ضجة جوه نزلت بسرعه شفت خالي بشار يصيح بلعت ريكي بخوف قلق امي مو وياه وعرفت هو الي مجان يريد نلتقي بامي

همست بصعوبه .. خالي

جان واكف وهو يصيح ويغلط .. شنووو هذا الاشتر كلش مصخهه شلون ياخذ اختي من بيتي ويجيبها البغداد والله اليوم العب لعب وين اختي طلعوها طلعوهااا

ردت عليه تسواهن وهي تكول.. وين هي اختك شايفينها احنه صدك انت ما تستحي ولك لوعت البنات وكسرت كلبهن وسويتلك مسرحيه لا ترضا الله ولا ترضا عباده انت لو بيك خير تحمي اختك بالعلن مو دافنها وتهدد من بعيد

جاوب بعصبيه وهو يكول .. اختي ما اريدها تلتقي بهاي العائلة ادفنها اعيشها بكيفي بس ما اريدهد ترجع لبنات عامر اتبره منها بس ترجع لهنا

شويه وانفتح الباب ودخل الاشتر الضاهر هم متعاركين وكايله جاينه لهذا السبب اشتر اجه هنا

دخل وهو متعصب كله .. اكلك اني شنووو حايط نصيص عندكم بكيفكم امشييي تعال منااا وروح مناااا هاااا شنو انت اصلا ومنو حتى تامرني ارجع اختك ولك اني هنا بالدولة اذا اكتب بيك مذكرة اعتقال اوديك وره الشمس

خالي رفع اصبعه بتهديد وهو يكوله ... منو سمحلك تاااخذ اختي من بيتي خليتك تحقق بقضيتها بس مو معناها تطيعها وتاخذها لبناتها

اشتر ضرب ايد خالي بغضب وهو يرد عليه ... نززززل ايدددك لا ترفعها بوجهييي فااهم اني مو لعبه بيدك ولا اخذ الاوامر منك واذا جنت محترمك وصاف وياك كله لخاطر النسبه الي بينه وهسه حتى النسابه كطعتها

وام اميين ترجع البناتها مثل ما هي تريد على مزاجها هيي مو على مزاجك انت واذا انت بيك خير تصف ويه بنات اختك ومو تحرم ام من ضناها

اشر على نفسه وهو يكول هذا انييي گلبي يتكطع على ابراهيم بس ما اكدر احرمة من امه

بجيت بسرعه شلون حنين عليه حتى وهو زعلان مني يكدر يحرمني من ابني ويكدر كل شي يسوي بس هو مو هيج موهيج ابد وهذا الي مخبلني عليه

خالي بشار رد عليه وهو يكول .. اذا رجعت لبناتها اني اتبره منها

كعد اشتر على الكرسي باريحيه وطلع باكيت جكايره سحب منها جكاره ودخن بعدها سحب موبايله واتصل وهو يكول .. الوور هلا عايد جيب ام سولين لبيت المدام بناتها ينتظرنها

نهاية البارت ..يتبع

كونوا انتم كونوا بخير... احبكم 💔

لا تنسوا التصويت والمشاركة بكم نكتمل 🥺