#وكر الأشتر

بارت ١٥

بارت ١٥
رواية ... وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔💔

" أنت لا تعرف معنى أن يبقى المرء صامدًا، يواصل مهامه اليومية وهو يتألم، يبتسم أمام الناس وفي قلبه سنين من البكاء، يتعامل مع الناس رغمًا عن رغبته في الهروب والأنعزال عن العالم، يسند الجميع وهو هش محطم تمامًا، ويدفعهم للأمل وهو غارق في حزنه وتعاسته ..

أن يواصل حياته رغمًا عن تعبه ومأساته
فـ كلما أراد الأعتراف بـ التعب أو فكر للحظة في الأنهيار
سمع صوت بداخله يقول " إياك أن تقول تعبت، نحن لا نملك رفاهية الأنهيار .."

....................................

صفاء

جنت اتمشى ويه اخوي الاشتر اني اعرفه هو من يضوج يحب يكون الوحده ما يحب احد يرافگة بس اني ما خليته لان هو اخوي وسندي لان بوقت المحنه والمصيبه هو ما خلاني وجان نعم الاخ ونعم السند

اعرف بيه مجروح وجرحة مرشوش ملح سوليين كسرته ودمرت كل شي اخووي من تعرف على سولين حسيت بيه صارت حياته حلوه صار يهتم للمستقبل صار يرجع من وكت حسيتها عائلته وتكون بيها

انصدم منها من غلطت عليه وحقه اني ما الومة اخووي مو مال واحد يغلط عليه وكدام منو كدام حارث والزبايل الي وياه واعرف هذا الي كسره اكثر وخلاه يطلگها

والي اعرفه اكثر اخوي كلش حقوود وما ينسى بسرعه ولا يسامح بحيث صار شكد مصطفى واكف وياه وساعده بقضية بنت ساهر وطلع براءة وجان واكفله مثل السيف بوجهه ساهر وامة

بس هو لحد الان حاقد عليه واحد لآن شكد يحاول يصالحة ويتودد اله بس هو ابد ما قبل ودائما يطرده ولو يتحجج ان عنده شغل ومن هاي السوالف ورغم هو شكد يحب مصطفى واصلا هو وصية امي الله يرحمها

وظل حاقد عليه وضاج منه وحتى ساهر وتحسين صار شكد سنين من ماتت رحيق وامي بس هو ما نسى ولا كلمة منهم ولا موقف ولا حرف

هو بطبعه حقوود وما ينسى بسرعه بس اني انصدمت يعني هيج يتصرف ويه سولين لان هو يحبها يموت عليها

دخلنه للبيت لكينه زهراء اختي جاي تسوي بالغدا ويمها زينب كاعده وتبجي هو تخبل منا هو متعصب ومتخبل انوب شاف زينب تبجي وهو عنده اخواته خط احمر كلها ... شكوووو زينب شبييج

وكفت وهي تبجي .. امي تريد تزوجني اخو صديقتها عمره ٤٤ سنه تكول خوش رجال وعنده فلوس وهو مطلك وعنده ثنين بنات

باوعلها بغضب وهو يكول .. شنووو هاي شبيها تخبلت من كل عقلها ازوج اختي لواحد شايب دخلي تاكل نعل وظلي هنا انتي اريد اشوف شلون تجي وتزوجج اله ؟

بجت زينب وردت عليه .. دكولي اذا متزوجي تخسرين كل شي صرفته عليج من اخذت ولفيتج من مزبلة اهلج لحد الان

جاوبه ببرود وهو يكول .. وشنوو جابريها على تربيتج لو على صرفها لو قابل هي ميته عليج ؟ اخذتج إنتي ومصطفى حتى تسكت رجلها لان عاجر وما تخلف الجايفه

كعد وجر نفس سحب باكيت الجكاير وهو يدخن كلها .. خويه هذا بيتج ازوجج تاج راسها وراس الخلفها اصلا هي لا تحبج ولا تحب مصطفى وانتي ومصطفى لو تفكرون شويه وتفتحون عقلكم راح تشوفون حقارتها هاي ظلمت امي وكسرت خاطرها حتى حرام عليكم تظلون عندها لان امي بگبرها ما راضيه عنكم وهي وصتني مصطفى ما يظل عند عمته الحقيره

كعدت زينب ولزمت ايده وهي تكول ... اتذكر اني انذكر كل شي سوو بامي وحتى هي جانت تحجي على امي حتى وهي ميته مخالصه منها ومن امها

جنت طفله اختل جوه البطانية ابجي حتى محد يحس بيه محتاره شلون اسكتها جنت اريد امي ما اريدها لان ما حسيت بيها ولا حسيت بأمومتها تنبع حقاره

جانت تخلي مصطفى يسكر يرافگ اصدقاء السوء مصطفى ضاع بسببها جانت ترضا عليه كل شي يسوي يطلع يدخل يديح يسكر يعربد يدخل ملاهي يجيب نسوان للبيت عادي عندها ما اتذكر بيوم من الايام حجت وياه وما رضت عليه بالعكس جانت فرحانه بالوضع

حتى جانت مرات منو تعرفها مو راحة ودايحة وصايعه تجيبها اله حتى تسيطر عليه خلته ما يرفض الها طلب لان كل شي يريده تسوي اله

جر نفس وزفره رد عليها.. ما تشوفي مستهتر ولحد الان ما يكدر يتخلص منها لان عدمت رجولته ما خلته اعتمد على نفسه دمرته ودمرت كل شي بيه زين وما خلته يتعلم على المخدرات هي واخوها وخالها السز

هسه انتي اذا تحبين امي ظلي هنااا واني ازوجج تاج راس هذا الشايب الجايبته وازوجج الي تردي واخليج تكملين دراستج لان بصراحة عندي الدراسه من اهم اولويات الحياة الما عنده شهادة ضايع بهاي الدنيا

هزت راسها بقبول وهي تكول .. اي هو اني حظل هنا ابد بعد ما ارجع الها ما اريدها اصلا هي مو امي واني شايفه عليها شغلات تخجل مستحيل اتقبلها ام وهي هاي سوالفها

وبعدين انتم اخواني وسندي وكل شي بهاي الدنيا ابيع الدنيا واشتريكم

فتح اديه الها واستدعاها لاحضانة ابتسمت والدموع تلمع بعيونها ركضت عليه وحضنته وهي تبجي وهو يمسح على راسها ويهدي بيها ..

ظلت تقريبا خمس دقايق تناشغ وتبجي واتصل موبايله هو رفع الموبايل وفتح خط بسرعه وكف مصدوم مذهول بعد زينب من حضنه وهو يكول .. تمام تمام جاااي هسه جايج

طلع بسرعه يركض واني ركضت وراه كتله .. خير شكوو اشتر احجي

بلل شفايفه بحيره .. سولين عندها ولاده تعال وياي محتاجك

ركبت وياه بسرعه وهو ما شاء الله سوه المستشفى شمرة عصا

.......................

سوليين

الانسان ما يحس بالضياع الا لما يكون تحت ضغط معين لو من يوكع بمصيبه تبين اله حجم الاشخاص وحجم الالم الي راح يتعايشه بعدم وجودهم

امي من راحت هوايه عانيت هوايه تعبت هوايه تدمرت وحتى من تزوجت الاشتر بس بعدين عرفت الاشتر هو السلام الي اجة من بعد امي هو العوض من رب العالمين

ربي عوضني بيه وما حسيت الا اليوم من ضربني ابوي واني حامل بطفل من اشتر ضربني وجتني الطلگة كطعت بطني

حسيت اني محتاجة اله روحي صارت بيه صرخت بعد ما شفت الدم .. خاله خاله خاااابري اشتر بسرعه خاااابري راح اموووت بطني راح اجيب ااااه يمه فدوه راح اموت

تسواهن جانت متخبله عليه لزمت ابوي وركعته بنفس الدولكة وهي تغلط عليه ... يا خسيس يا نذل تضرب البنيه وهي حااامل والله اخابر عليك رجلها اخلي اليوم يطيح حظك

رد عليها بغضب وهو يكول .. هههه رجلها يا رجل هذا طلكها بعد بنعال ما يعترف بيها مصدكة روحها اشتر يخليها على ذمته شبع منها وشمره عليه انوب حامل وعلي اشمرها هي وابنها والعن الخلفهم

تسواهن غمته... تف عليك وعلى خلقتك رجال نعال امداك من بين الزلم

اخذتني بعد ما لبست عبايتها هو صاح عليها كلها ... الا اطلكج

ردت عليه .. طلك وشوف اني على شني اهدد اخابر جحيم احسن

اخذتني واني اصرررخ احس الدنيا سودت بعيني والالم ما اكدر اطيقه ولا اكدر اتحمله روحي وگلبي يوجعني ابجي من الوجع احس سجاجين تكطع بامعائي وجع عندي اسفل بطني ودفع قوي بالرحم

وكعت بالكاع وابجي حيييل تخبلت الوجع سودني انهاريت بسرعه راحت اجرت تكسي ركبتني بيها طفلي لا عنده ملابس ولا اني عندي ملابس رحت بطرك روحي العزيزة

وصلنه للمستشفى جنت بحاجته روح تريده اهمس باسمة.. اشتر وينك اشتر راح اموووت اريدك تعال

همست بوجع ... ياربي دخيلك ياربي مدا اتحمل راح اموت يارب سهلي دخيلك يارب دخييلك راح امووت يمه وينج الحكيلي راح اموووت

وصلنه للمستشفى صرخت على تسواهن ... خابري خلي يجي مدا اتحمل حتى لو مطلكني اني راح اموت خليني اصفي حسابي خلي احجي وياه ابري الذمة ويبريني الذمة اوصي على ابني ما يتركة ولا يعوفه فدووه خاله فدووه

هي جانت تخابر وملهرفه وجهها مخطوف وتصبر بيه وبعدها اخذوني بالطوارئ

كالو عندها ولادة مبكرة لازم هسه بسرعه نسويلها عملية واازم زوجها يوقع على العمليه او ابوها

بعد اني ما طلعت ما عرفت منو وقع على عمليتي بس هم ظلوا يحجون ويايه غيروا ملابسي وشدولي الكانوله وضربوني ابرة بنج على اثرها دخلت بعالم ثاني

جنت بوقت ولادتي واني مشتاقه اله اريده يكون موجود وياي جنت اصرخ والدم ينزف من جبيني راسي صار نار حتى دخت ولا كدرت اشوف بعيوني من اثر الضربه الي اجت من عامر حتى حرام اكول عليه ابويه

.....................

......................

صفاء

بعد ما وصلنه للمستشفى دخل للطوارىء وهو ملهوف وايده ترجف الكة تسواهن واكفه صتح عليها بغضب .. تسواهن وين سولين

جاوبته بقلق...طالبين توقع على عمليتها لان صارت عندها ولادة مبكره من وره عامر الكلب ضرب البنيه براسها وخلاها تطلك اشتر شلون تعوفها عند عامر

تركها وراح وتغاضه عن باقي كلامها وكف عن الممرضه وفتح الها طاوله و وقع على العمليه

رجع عليها كلها .. عامر هسه بالبيت لو وين

رفعت اكتافها بعدم معرفه.. شمدريني بيه من دهر طكة مصيوب الجلوه لا يعيد ولا يستريح من طلعت المره عايشه لحد الان وهو متخبل يريد يمووت وكل شويه وهد على البنيات ورزلهن

سحب نفس وزفره تركها ومشه وهو يفرك باديه اجرى اتثال بسرعه وهو يكول ... كزاره روح لبيت اهم مدامتي جيب ابوها خلي عندك تمام

قفل الخط وهو يروح يمنى ويسرى و واضح الخوف على ملامحه ومقهور عليها مبين بس هو يكابر

رجع اتصل مره ثانية كال .. الووعايد جيبلي مليونين مدامتي بالمستشفى راح تجيب ونسيت اجيب فلوس توترت يله بسرعه تعالي

رجع باوعلي عض شفته وتركني ومشه مقهور منهار عليها وما عنده جرئة يقابلها ولا يشوفها

شويه واجه عايد جايب الفلوس وجاي انطاهم اله وظل يمنه انوب اجت تسواهن كلتله .. مجايبين لا ملابس للطفل ولا اي شي حتى الها مجايبه ملابس اجيت اركض من وره عامر الخسيس

اخذ من الفلوس وانطاهن الها كلها .. هسه صفاء ياخذج بسيارتي شوفي وين اكو مكان مفتح يبيع ملابس جيبيلها بسرعه او صفاء روح للبيت جيبلها ملابس لان هي ما خلت شي ما اشترته للطفل

جاوبته .. تمام هسه اني اروح الوحدي بعد على شنو جايه تسواهن وياي اني اروح بسرعه واجي

عفتهم وطلعت اخذت سويج السياره منه وانطلقت للبيت حجيت ويه اخواتي هن يعرفن خطيه ما قصرن حظرن الي كل شي ورادن يجن وياي بس مقبلت هو اصلا اشتر ما يقبل

اول ما وصلت للمستشفى واجت تسواهن تركض كالت .. الممرضة اجت تريد ملابس للطفل لان سولين جابت

هو ركض عليها ملهوف وهو يكول .. بس احجيلي سولين شلونها كعدت من البنج لو بعدها

ردت عليه... لا بعدها مكاعده بس الطفل راح ياخذو للخدج

جاوبه بغصه ... اريد  صيحيلي الدكتوره

شويه واجت الدكتوره هي جانت غرفه خاصه سوالها العمليه بالخاص مو بالعام

راح هو والدكتور على صفحة واحنه طلعونه بره بالحديقه ظل تقريبا عشر دقايق وطلع

كال .. تعال صفاءتعال شوف ابني

ابتسمت وتقربت منه حتى نسيت ابارك اله .. مبروك يابه ان شاء الله يتربى بدلالك انت وامة

عقد حواجبه من كلت امه وبعدها دخلنه اني وياه شفناه من وره الجام جان صغيير واحمر وشعره اسود مبلل ومدبدب ويبجي يصرخ ضاج المستشفى ضج من دون الزعاطيط هههه من هسه عصبي على امه لان اخوي عاقل ههه

باوعت للاشتر واضحك .. ههههه شو هذا خبل باع شلون يصرخ

رد عليه الاشتر من دون ما يباوعلي وروحة هايمة بطفلة كال .. اشش ليش يبجي اخاف موجوع لو بيه شي خاف جوعان خلي اشوف الممرضه

اجت الممرضه وحجه وياها ردت عليه.. ما اعرف هو عصبي هههه ما بيه شي اصلا هسه يطلعه الك وتشوفه

جان متوتر وايده ترجف سكت مجاوبها دخلت وطلعته لفته بالملحف وانطته اله اخذه منها بحذر وهو يسمي بسم الله واني جنت فرحان وشارگ الضحكة من الطول للطول

مديت اصبعي اله وهو تمسك بيده كلها باصبعي وسكت ويباوع بعيونه ابو عيون مزرزه جااا اني مو سامع الطفل اول ما تجيبه امه مغمض شو هذا ابن اخوووي عيونه تتلاكط جنهن عيون تسواهن بصراحة ما رتاجيت اله مبين وكح هههه يشيل المنطقه هذا

حجيت بضحكة .. ابو ابراهيم شو ما ارتاحيت لإبراهيم مبين وكح وما ينجرع شوف شلون بباوع بعيونه

ابتسم وباسه بخده وراسه وبعدها اذن باذانة وضمه الصدره وهو يستنشق ريحته ويروي روحه بيه

همس .. بابا حبيبي ابراهيم نورت الدنيا ان شاء الله اشوفك احسن انسان ومن الصالحين يا روح ابووك نورت الدنيا بيك وروحي انتعشت بوجودك

اخذته منه الدكتوره ورجعته واجت تسواهن راحت وياها الممرضه

طلع من المستشفى شاف حارث اجه هو وامة ظل يباوعله بحقد وغضب كال .. هذا شعنده جاي الكلب

لزمت ايده .. على كيفك اشتر جايب امة مو جاي على سوليين

ضحك بسخريه وطلع من المستشفى رجع خابر على تسواهن كلها ... لا تحجين شي السولين كليلها ما اجة الاشتر

انصدمت فتحت عيوني مصدوم كتله .. ليش اشتر

رد عليه بهدوء بعد ما قفل الخط .. خليها تتأدب

حسيت اشتر حيل قاسي وياها وزعله مو هيين عليها بس يارب ما تجفص سولين اكثر وتزيد الطين بله

رجع اتصل على كزاره وهو يكول ... عامر وين صار حتى اجي اطيح صبغه

كمل كلامة وهو يكول ... وين انهزم يله وين يروح شوف قدم بلاغ للنزاهةة على عامر تهريب البانزين للشمال حتى يروح بيها اربعه ارهاب

قفل الخط وهو يسووق بجنون تكلم بجمود وهو يكول ... بسيطة

.................

جيهان ...

جانت الدنيا بعدهه ليل ظلام بظلام مثل حياتنا الي مااكتمل بيها النور.

اباوع لافيان جاي تشيل الكزيز من الكاع وتبجي ودموعها توكع على الدم الي جرى من سولين ومتلطخة بي الكاع .

واسمع صوت شهگاتها وهي تنظف الأرض تعصر بگلبي عصر ...

شميت ريحة الجكاير باوعت شفت عامر اجه باوعتله بنظرات كلها كره

بسببه سولين الله يعلم بحالها هسه من اخذتهه تسواهن للمستشفى لهسه اني گلبي نار عليها ماخلانه نروح وياهه وحبسنه بالبيت

افيان طبت للمطبخ وجابت وصلة نظفت الأرض وكملت وهو يباوعلها بمكر وترقب خفت من نظراته عبالك ناوي على شي

ادور بنظراته اريد اشوف ندم حزن قهرر على سولين والي سواه بيها ماكو حتى ذرة .

راحت افيان للغرفة وهو عبر المساحة الي بين باب الصالة وبين باب الغرفة بسررعة مثل ثعلب ماكر وجر المفتاح من الباب وخلاه وقفله عليها

فززيت من مكاني وكمت على حييلي وركضت بدون مااحدد وجهة اتوجه الها

بس هو لحكني ولزمني من ملابسي وسحبني حييل
صرررخت ولزمت اديه اريد اخلص نفسي منه بس هو اقوة مني

ووكعت على الارض وسحلني واسمع صوت افيان تصيح وتدك على الباب.

لزكت رووحي بالكاع وهو يسحل بيه صيحت
شتريد مني شترييددد وخررر وخررر ظاالم ظااالم
الله ينتقم منك.

ضربني على راسي بقوووة حسسيت راح افقد الوووعي

واسمع صوته ضعيف يوصلني
امشي اردج لرجلج كعدة هنااا ماكووو مااكوو افتهمتي ماكووو امشي وللج كوومي اذلج اخلي يدوسج برجله زعلانه لان ما سولف الها عن امها العار بت العار

كوومني لزمت راسي باوعت لروحي بملابس البيت وشال على راسي ماكو

الدنيا تفتر بيه من اثر ضربته وركباته احسها تزلغت من السحل واناششغ وابجي واصييح بصووت واهن وضعيف

ماروووح اتركني ماروووح مووو بكيفك والله انهزم واروح لامي

وهو مستمر يضرب على راسي وكل ضربة تشتت تفكيري

ويحجي وياي بحقارة ونبرة مسمومة ماترحين موو موو هيه بكيفج لازم ما لاكية الي يضبج تردين تصيرين كححح مثل امج ولج انت كححح ماتفيدين منوو يكلبج محرووكة ومتشووههة لاتفرحين محد يكلبج
محد يشتهيج ولا حتى يباوع عليج

ولج كريم زين منه تحملج كل هاي الفترة ومارجعج النه
تكومين انت تتعززين وتتعيقلين وتعوفينه خبلة انت

وصلني لحد السيارة يسحل بيه وملابس يسحلني من ورا رگبتي بحيث اختنگت وومن تركني وفتح الباب ركعت على رجليه وراسي نزلته للكاع صررت اكح بقووة واختنگت بلعابي

بعدي ما ملتقطة انفاسي ورجع سحلني صعدني للسيارة حتى رجلي انشحطت وتخرمشت وتجرحت وسد الباب عليه قووي

ورجع دار كعد بمكان السايق واني اكح اككح اختنكت انوب ريحة السيارة بنزين واني اجر نفس دخل كله بريتي اختنكت أكثر ولعبت نفسي اجيت اتقيء

حرك السيارة بسررعة واني اريد افتح الباب انزل
باوعلي ابتسم كال يله فتحي فتحي يله علوواه حتى توكعين وتتكسرين وارجع اني ادووس على راسج حدما تفطسين واخلص منج

مو بس اني اخلص منج لا والله حتى كريم يخلص يركصلها بچفية ويفررح ويروح يعرس ثالث يوم الفاتحة ياخذله وحدة صاحية مو مثلج محرووكة لاعبة رووحه منج

اني خفت والله يسوويها يقتلني هو قاتل وايده تعودت عالقتل وخرت ايدي بخووف وصرت اباوعله بخوف وهو مبتسم ابتسامة صفرة كريهة من بين شفافه الي محاوطهم شعر شواربه ولحيته الكثيف.

واستمر يغلط ويفشر على امي وخواتي وحتى تسواهن ويدعي على ابن سولين

يكول كون يموت حتى تعرف النعمة الي رفستها برجليها عدل

كون يموت اني ماريد علة على گلبي ثانية كافي عليه سولين ام لسان لازم اكص لسانها الظاهر ماربيتها عدل

علما وصلنا للعمارة أني عيوني غوشت كووة اشووف بعيوني ...

نزل واجه فتح الباب الي يمي وكال تنزلين لو اسحلج وانزلج

ظليت افرك بعيوني واباوع الدنيا ليل ماكوو احد
خليت اديه على راسي وبعدني اريد انزل وانسحلت
من ايدي

وطببني للعمارة ويدفع بيه واني اصعد الدرج
كل بايتين اني اوكع وانچفي على وجهي والزم بالدرج واقوي رووحي

وصلنا لباب الشاقة دفعني وكعت يم الباب وصارت صوت عالي ويه ما اندفعت وهو ظل يدك بي
واني اسحب بدشداشتي واخلي اديه على راسي الم شعري الي تكفش شكد احس نفسي مهانة ومذلولة شعور مكرووه كلش

انفتحت الباب وطلع كريم يباوع دنك راسه ولمحني شافني كاعدة جووة يم الباب

درت وجهي منه وصارت غصة ببلعوومي اختنكت بيها وحسيت بمرارة بحلكي ورغبة بالصريخ والبچي

لحظات انصدم وصااح بصدمة جيييهااان
‏وكعد كرفص يمي واني استمريت ما اباوعله
‏ودايرة وجهي منه.

كاله عامر جبتها الك كريم هالمحروكة المشووهة هسه تصيرلك خداامة جوووة رجليك وانت لاتقصر وياها شوفهه العين الحمرة وطيح حظها لك هاايه عاار وامهااا عااار

باوعت لكريم وعيوني كلها دمووع لااراديا باوعتله
بعد ما جنت صاده وجهي منه

هو كريم جان يباوعلي ويتفحصني لزم اديه ويريد يفووتني جووه واني اسحب نفسي منه بضعف

ورا ما خلص كلامه عاامر كاام عليه كرريم يصيح بووجهه اسكت اسسسسكت مااكو غيرك عاار كل الي صار بسببك امشي منااا ماريد اشووف وجهك امشششي

رد عليه وهو يكوله ... الزم مرتك العاار

ما اشوف الا كريم ركعه ببوكس ممده بالكاع خلاه يزحف على الكاع وخله وانهزم والدم يصب من حلكة

دخل وهو يفح من غضبه وعصبيته كال .. شوكت الله يخلصنه من هذا العار الكلب والله هذا اذا واحد ما يلزمة ويدفنه بمكانه ما يمشي عدل

باوعلي باسى وقهر كعد مقابيلي وتنهد مسح على شعري بحزن واني ابجي وانوح كال بهدوء .. كافي حبيبتي كافي يروحي والله كل شي راح يتصلح

همست بحزن .. اختي سولين مو بخير ضربه وهي حامل واخذتها خاله للمستشفى خابر عليها فدوووه عقلي وگلبي وياها فدوه خابر خاف بيها شي

جر نفس واتصل على تسواهن شويه وجاوبته جنت اباوع الملامحة وانتظر منه جواب كلها .. أها الحمدلله ان شاء الله هسه جايكم اني وجيهان

قفل الخط وابتسم باس خدي كال .. جابت الحمدلله جابت ولد الحمدلله بصحة زينه والطفل هم بصحة زينه

لزمت ايده وابجي ... فدوه اخذني الها راحت والدمعه بعينها تبجي والدم يجري من راسها گلبي خطفته وياها ما اكدر اظل هنا وصورة اختي بعدها بعقلي

كال .. يله بدلي اخذج الها تدللين بس كون ترضين عليه

رحت بسرعه بدلت وغسلت واجيت اركض هو لبس قميصه كال ... اجيبها يمي اخليها هنا احنه نداريها ونداري طفلها لان مو معقول تظل يم عامر النذل

رحنه واني جنت طايره من الفرح. وصلنه الفجر لان من رحنه جنه متاخرين ما قبلوا يدخلونه ولا رضوا ظلينه للصبح ردت بس اشوفها كال انسدت الردهه ماكو لازم تجون بالعشرة الصبح هيج قوانينهم هاي المستشفى

رجعنه للبيت كال كريم الصبح بالعشره اني اجيبج ظليت كاعده للعشره الصبح ولا نمت وخابرتها حجيت وياها جانت كوه تحجي حتى ما افهم منها

صارت بالتسعه ونص كعدت كريم حتى نروح وهو بين ما سبح وغسل اسنانه وبدل صارت بالعشره واني اتحطم تحطم من تاخيره

وصلنه هناك بالعشره ونص من وصلنه انطينه اسمها وراحت الممرضه شويه واجت كالت ... طلعت من ساعه هاي المريضه

احس الدنيا اسودت بعيني حسيت اجيت ابجي باوعت الكريم بقلة حيله وحسره

تنهد ورد عليه .. مالج شغل ان شاء الله بس اضبط اموري نروح لعامر واجيبها واجي بس لا تبجين

مسحت دموعي ورجعت وياه بخيبة امل وحسرة الدنيا كلها بيه

....................

افيان

عامر من اخذ جيهان لحد الان وهو ماكو اختفى مدري وين وله عساه لا اجي ولا شفنه جهرته

الله ينتقم منه ان شاء الله حوبتنه تبطي وما تخطي شلون حقير لعب باخواتي لعب ان شاء الله سياره تايهه انوب ما ادري حرام ادعي عليه لو لا بس هو نذل وخسيس كادر بس علينه انوب متخبل شلون امي طلعت عايشه

جنت على اتصال بيني وبين تسواهن كالت .. جابت ولد والحمدلله بخير

فرحت فرحة رغم المأساة احس فرحة من رحم الوجع واخيرا صرت خاله

افرح يبرهومي خالتك فافي خلطة على سن ورمح فديت ابراهيم ابن نسيبي الكفو

خابرت على نسيبي حتى ابشره رد عليه ببرود كال .. اااه جابت يله الحمدلله على السلامة

انصدمت بيه يااا عود هذا الكفو شبيه صدك جذب يعني حتى لو غلطت مو هيج عبالي حيفرح ينصدم اشو حتى متجاوب ويايه شسالفه خاف نسيبي مسحور حالته مو طبيعيه

ضجت حييل وحسيت الامل انقطع واني جنت لازكة لسولين ديري بالج على الفرخ هذا ورقه رابحة نهدد بيه الاشتر وتالي طلع حتى لابنه ما مهتم بعد بيمن نهدده يبووو اختي ولا هامته ام النعايل

شويه وكمت نظفت البيت ما خليت شي يعتب عليه لان تسواهن كالت راح نطلع خليت بخور ورتبت البيت

عامر مطمنه منه ما يجي يخاف من اشتر يكتله لان هو عار بس علينه كادر

وفعلا شويه واجن اختي كوه نزلت جانت الكانوله بيدها و وجهه اصفر وتسواهن لازمتها كوه وشايله الطفل

ركضت عليها اخذت الطفل منها ابوس بيه واحبه شحلاته يجنن راح اخذه اليه ايي بعد اهله مطلكين خو ما اخلي يعيش بنص عائلة متشتته

بست اختي تحمدت الها بالسلامة وكعدنه سوه حاضنته وابوس بيه يمه برهومة الحلوو يجنن هو مو يجنن بس بعيني يجنن بعد القرد بعين خالته غزال

ظلينه تقريبا خمس اربع ايام شويه سولين صارت زينه عامر ماكووو ابد

مرات تسواهن تاخذ الطفل وتروح للعياده تكول القحة واجي اريد اروح وياه ما تقبل تكول لا لوحدي ما يقبلون هناك ما يردونج تجين الزمي كاعج واكعدي يم اختج

استغربت من تجيب الطفل لا يبجي ولا بيه شي ولا بيه اثر لقاح هاي وين تاخذه اخت جحيم

كالت تسواهن رايحة للسوك اتسوك

رديت عليها .. منيلج فلوس انتي ولج

جاوبتني .. لج لجج البين كون يالادبسز عندي دزلي اخوي فلوس خوما اظل على ابوج الفكر ابو فالينه مزروفه

ضحكت عليها وهي راحت واني دخلت اسبح بعد ما شفت سولين نايمة وابنها نايم بصفها بكل هدوء و ولطف

................

سولين ...

صفنت مقهورة ليش هيج اشتر لااجه لاشاف ابنه
زين ليش هو شنوو ذنبه ياربي طفل مااشتاق يشووفه يطمن عليه

باوعت للطفل حبيبي شحلاته معليك من ابوك اني اصيرلك ام وابو

انتبهت تسواهن مكمطته حييل خطية
كمت حلحلته شويه

ورجعت غمضت عيوني احاول اغفى
وانسى القهر شوويه

فتحت عيوني على صوته شفته مطلع ايده من الگماط ويعضعض بأصابعه ويطلعهن ويبچي ويرجع يخليهن بحلگه يمص بيهن ...

ظليت اضحك وعلى هالحال هو يطلع اصابعه من يشوف مايجيه منهن حليب يبجي

تونست عليه ونسيت همي وحزني ثواني مو اكثر

حركت نفسي اريد اخذه ارضعه ، توجعت عمليتي
عضيت شفتي حييل وتقربت منه شويه واخذته

جنت وحدي بالغرفة لان تسواهن راحت للسوگ
وبقيت وحدي

ظليت ارضعه وهو يرضع بنهم جوعان حبيبي
اخذت ايده لزمت اصابعه شكد ناعمة

صرت احاجيه عمره خسارة ابوك مايجي يشووفك
احاجيه بقهر حييل مقهوورة حييل

ليش ماافكر بيه الاشتر توني جايبه وموزين عليه انقهر
اخخخ شكد گلبه حجر ...والله اني احبه وصح غلطت بس والله جنت مو بوعيي ليش هيج يعاقبني

رضعته ونومته بصفي ورجعت راسي عالمخدة وافكر بالاشتر وكل شويه اباوع للطفل واحاجي نفسي وافترض هسه لو ممتعاركين اني واشتر لو ممطلكين

جان هسه هو يمي وكل شوي يبوس ابنه ويحاجي ويساعدني بي ومايتركني لحظة وحدة اعرفه حنين وگلبه طيب

بس اني اخخخ مني واخخخ من لساني شوازاني وغلطت هالغلطة وحرمت نفسي من هاللحظات الحلوة احس گلبي معصور احس اني بحاجة الاشتر

بس هو هم غلطان شون يضم عليه هيج موضوع
ليش استكثر عليه الفرحة من اعرف امي عايشة

دخت واني افكر ونعست وغفيت واني على هالحال
كعدت مااعرف شكد نمت تمططت ولزمت عمليتي متوجعة

ذكرتني اوجاعي اني توني والدة بس ابني ووين
مااسمع صووته

رفعت راسي من المخدة وظليت اباوع يمنى ويسرى
مااكوو وووينه وووينه ياربي ويين صار

كوة كمت من الفراش امشي ولازمة عمليتي
طلعت من الغرفة للصالة اتوقع ابني عند تسواهن

شفتها كاعدة بالكاع ومددة رجليها وبصفها علاايك المسواك يمها وابني ماكو

كتلها ووينه الطفل ؟

باوعتلي متعجبة خايبة شمدريني غير عفته يمج

خففت حييل لزمت الحايط سألتها بصوت عالي لعد وووينه هوو هاا ويينه اخاف عند افيان

طلعت افيان من الحمام خير شبيكم

كتلها ويينه ابني عندج ابراهيم وينه

فتحت عيونها على اوسعها كالت لااا موو عندي قبل شويه طليت عليج شفتج نايمة وهو يمج نايم رحت للمطبخ انظف الطباخ بين ما تجي تسواهن تجيب المسواك ودخلت سبحت بعد ما ادري

طلع امين كال اني شفت بابا اخذه

انصدمت وصرت الطم على خدودي ...

نهاية البارت ... يتبع

كونوا انتم كونوا بخير ..... احبكم 💔

لا تنسوا التصويت والمشاركة بكم نكتمل

اعتذر من التاخير بموعد البارت لكن اجاني خطار اخرني ساعه كاملة💔🥺