#وكر الأشتر

البارت السادس

البارت السادس
رواية ... وكر الاشتر
بقلمي .. نور سمو العراق

💔💔💔💔💔💔💔💔💔💔💔💔

وتختَصِرُ العمر َ ضمّةُ أُمّي
وقبلةُ أمّي.. ولمسةُ أمّي
واشراقة الحبّ في روحِ أمّي...

الف الف مبروك يا متابعيني فوز المنتخب العراقي كلنا فخر بخليجنا وبصرتنا ومدربنا وعدنانا ولوعبينا ❤️❤️❤️
الدنيا كلها بصره

................................................

سولين

اول ما اجت الاوراق بيدي اثار فضولي كل شي واحس مثل الحجاره الكبيره صعدت على صدري شعور بالحزن والكآبة سيطر عليه فجأة

وهذا الشي دائما يصير ويايه من ينذكر اسم امي او ينفتح موضوعها

ما استغربت من الاوراق ولا من هذا الملف لان هو كال فتحت قضية امج واريد اطلع برائتها كدام الكل وهذا الشي فرحني نسبيًا

صرت اگلب بالاوراق اثار انتباهي اكثر من شفت التقارير وصحة الاصابه وكذلك مدة المكوث بالمستشفى وهماتين تقرير من مستشفى بالخارج

رمشت بعيوني ممستوعبه يعني شنو معناها هاي معناها امي ما ماتت بسرعه امي ماتت بعد فترة وعانت من وجعها وألما

عقلي تشوش والاوراق حيرتني اكثر اكو اشياء ما اكدر احللها ولا اكدر افسرها مد افهم اي شي ولا دا استوعب

ما عندي سلاح الحيرتي ولا عندي وسيلة افرغ بيها حزني وطاقتي المكبوته غير الدموع بجيت بسرعه والدموع اخذت مجراها على خدي

رجعت الملف على الميز وظليت اباوع للاشتر محتاره مقهوره

رحت  نمت بصفه شفته نايم وأنفاسه منتظمة  صفنت بوجهه واني اغوص بتفكيري هو كل شي يعرف هو يعرف شنو الي صار ويه امي هو الوحيد الي يكدر يرضي فضولي ويروي تساؤلاتي

حطيت ايدي على خده وارجف جنت اتمنى اكعده وافهم منه اريد اعرف شنو المده المقامة امي شكد وماتت شلون ماتت وين تعالجت كلها تساؤلات براسي محد يكدر يرضي فضولي غيره

نمت من بين افكاري والدمعه سالكة على خدي شاكيه الهم بداخلي جنت فرحانه بس موضوع امي عكر كل مزاجيتي

وكل مره من اتذكرها وابجي عليها احلم بيها حلم اشوفها متعذبه اشوف دموعها على خدها متكدر تحجي ومتكدر تحجي

وهذا الشي يخليني إنهار نفسيًا لان اني جنت اصبر نفسي واكول يمكن تكون مرتاحة عند رب العالمين والله عوضها عن تعبها والمها وصبرها وغدرها عوضها بالجنه وريح روحها الطاهره

بس انصدم بالأحلام الي تبين ان امي مو بخير وممرتاحة انهار والدمعه تظل بعيني لان ما اشوف بيها حلم يريح بالي ويطمني عليها اشوفها بوجع وقهر وحزن

اكول يعني هي حتى عند رب العالمين ممرتاحة معقوله امي عندها ذنوب وذنبها عظيم حتى اشوفها بهيج حلم بشع

تظل احلام تراودني وافكار سيئة تستوطن دماغي ما اعرف شلون اتخلص منها وارتاح منها

فزيت من حلمي وارجف من الخوف والاذيه الي حصلتها من حلمي المعهود احس روحي ترجف وكل امل بالخير انكطع عندي

وحت توضيت وصليت والدموع مثل المطر باليلة سودة

حسيت بيه كعد درت وجهي عليه واني جنت اقره بسورة الفاتحة اهديها على روحها

عدل كعدته وهو يتمغط كال .. بيش ساعه
صية
جاوبته وكاتمة الهم بداخلي .. بالخمسه الصبح

نفخ بضجر كال .. وشعندج كاعده من الصبح ارجعي نامي حتى ترتاحين

بللت شفايفي بحيره وجريت. نفس ورجعت بجيت هو انتبه عليه وكف بسرعه بعد ما بعد الغطا عن نفسه واجه عليه بلهفه وسرعه

كال بخوف وقلق .. سولينا بووويه شبيج ليش تبجين منو وياااج ؟

باوعتله برجفه.. شفت ملف امي

ظل مركز بنظراته عليه كال بعد ما سحب نفس وزفره  .. اي هذا ملف امج واني من زمان كتلج فتحت قضيتها

كمل كلامة بعد ما قطع اول سوال اليه كال .. قبل لا تسألين وتحجين اي شي خليني مركز بالقضية ولا توتريني لان ما ظل شي ان شاء الله واوصل لكل شي وراح تتفاجئين والله انتي بس اسكتي ولا تحجين شي ولا تسألين وشوفي شنو راح اسوي

عقدت حواجبي .. شقصدك اني نكديه وأسال هوايه وكل سوالفي تجيب النكد والح واسوي مشاكل

ابتسم ومسح وجهي بحب .. ههه لا مو هيج بس ما اريد تشغلين بالج اريد تفكرين بس بنفسج ودراست والنونو تمام ؟ وباقي الامور خليها عليه اني اتولى كل شي

تنهدت ...والله ما ادري ما اكدر اخليك بحالك وخاصه موضوع امي تنهار اعصابي بيه

نفخ بضجر كال ... خليني هالمره وصدكي متخسرين خلي الامور طبيعية وكل شي شفتي انسي بعدين كل شي يتوضح بس خليني اشتغل مثل الأوادم

تعصبت .. اشووو انت بس تتعصب عليه وكلامك مبطن عبالك اني عله على كلبك ومشاركتك بشغلك هاي اني لو مثل سالي جان شسويت بس هو اني حظ ما عندي وياك

ضحك كال .. ادري هي الهرمونات مو الها مده وتخلص اشو انتي هرموناتج طولت شسالفه

سكتت محجيت بس عاقده حواجبي وضايجة كل سالفه وشمرها على هرموناتي سوده عليه

تقرب مني حضني واني بعباية الصلاة كال .. لا تزعلين مني بس والله اني كل شي اسوي لمصلحتج كل شي لخاطرج بس اريدج ترضين وان شاء الله يارب ترضين

رفعت عيوني اله  وغيرت الموضوع .. انت تدري شعندي من سوالف اني اليوم متسوكة علاكة نفاق ودجل

كعد بحماس وتربع وهو يكول .. اي اي يله طلعي العلاكة وخلينه نشوف شبيها من اخبار

ابتسمت كتله ... انت تدري بساهر متزوج على مرته ام سجاد وسجاد سكير ويشرب عرك ؟

باوعلي باستغراب وهو يكول ... لا هاي شنو ولج محقق كونن ما يلحكج ولج منين عرفتي

ضحكت كتله .. ههه انت شايف علاكتي احسن من ملفاتك وملفات سالي الخبله بيها كل الدلائل والحقائق

ضحك كال .. شلون اكتشفتي ولج سولفيلي

عدلت كعدتي بحماس كتله .. هو اني شغلت برج المراقبه مالتي وشفت ام سجاد دخلت ابنها وسحلته بكتله وكالت ولك سكران منيلك فلوس وهو يكلها عندي دفتر اشتري اشتر ومرته بيهن هههههههههههه خرب متت ضحك

ابتسم بثقل على كلامي كال .. اي كملي بله

رديت عليه .. اي انوب ظليت اراقب وجان اسمع ساهر يخابر وهو يكلها ولج بت الكلب مدري كلها بت الكلب مدري بت النعال ما متاكده من هاي المفرده

ضحك كال .. ما شاء الله حيل دقيقه بنقل الخبر

كملت كلامي بحماس .. اي لعد شعبالك بس المهم هو غلط عليها وكلها مو كلتي تزوجني وبالسر شنو الغيرج هسه ليش تردين اعلن الزواج

يعني شنو الضاهر المسعده تريد يعلن الزواج بعد ما جان سري وهي اصلا قابله يتزوجها بالسر يمه من النسوان شلون برابيج

ضحك وهو يكول .. نسهلها عليها وان شاء الله احنه نعلن الموضوع ومبروك العمنه المجلوب

رفعت اديه باستنكار .. اني ما الي شغل ما اتدخل

كال .. وانتي منو كلج تدخلي لا بابا مالج شغل كل شي خلي عليه وانتي خلي اديج ورجليج بمي بارد

وكف وهو يدندن راح غسل وبدل واني بدلت ورحت للجامعه وهو اخذ الملف وراح لدوامة

.................................

رنا

من بعد ما صارت العركة بينه وبين ام ايو آني اتاكدت السبب من وره هاي الحيه الحقيره كوثر العار شلووون هيج سوت شلون صار الها اسبوع تقنع بيه حتى اخذ جيهان ويايه

شلون قشمرتني جانت تكول احسها ممرتبه وهي زوجة كريم اريدها تترتب اريدها تفهم بالمكياج اخذيها وياج خليها تتعلم خطيه وام حسن هم وياها جانت تلح عليه حتى اخذ ويايه جيهان

ما جنت اعرف هيج هن ناصبات عليه كمين وخلتهن فشلنه بنص الصالون صرت مثل الحشره كدامهن ما اكدر احجي كلمة من وره جذبهن ونفاقهن وكلامهن الزور

اول ما طلعنه جيهان ما اتحملت وهي اصلا جانت دائما توكع ويغمى عليها اذا انقهرت حيل والموضوع اثر بيها

وكعت وامي وامي ظلينه نصرخ ونعيط نريد واحد يساعدنه والحمدلله الولد الي موجودين بالشارع ما قصروا شالها واحد منهم واخذنه بسيارته للمستشفى

وامي ظلت تبجي وبررت موقف جيهان وهي تشرح للولد الي صار وتحجي عن جذبهن وكلامهن بحق جيهان

وصلنه للمستشفى واخذوها بالطوارئ وسوو اللازم جان الضغط مصفر عندها والسكر هابط خطيه شلون قهرنها وكسرن خاطرها

اني صدك حيييل انقهرت وضجت وتعصبت بحيث اذا الزم وحده منهن الا اسكطها تسكط

اتصلت على كريم مجاوبني هو التحق لان كال اليوم اطلع لدوامي تنهدت ورجعت اتصلت بجاستن

اول ما فتح عليه خط واني انهرت عليه بعصبيه وغضب والدموع اخذت مجراها على خدي يريد يفهم اني شبيه شنو الصار بس ما انطيته مجال

كتله ... انتم صدك ناااس ما تستحون ما تخجلون ولك والله اليوم العب لعب اختك وعمتك هيج يسوون بيه يخلني اخذ امي وجيهان وانوب يدكن بيه الناقصه ويسحلن بيه الصالون صدك ما يستحن وصدك سوالفهن مال ناس طالعه من الطريق

هو عاط بيه بغضب وعصبيه كال .. انجبييي ولج شنو هالكلام ما مسموح تحجين على اختي وعمتي كافي حقد وغل

فتحت عيوني مصدومة من كلامة .. لا والله اني طلعت حاقده والغل تارس كلبي فوك عملة اختك بيه هي وعمتك هيج تحجي لك صرت هالكدوتني كدام العالم كلها

عاط بيه بانزعاج .. هسه غير تحجين شكو شنو الصار بعد شبيج بس تصيحين فهميني شكو شصاير وبدون غلط وتجاوز

جاوبته وكلبي احسه يرجف ... عمتك الشفيييه هي واختك المسعده قشمرني وخلني اخذ جيهان وياي للصالون وتالي هجمن عليه ايو وامه سحلنه سحل بالصالون وفضحنه فضيحة شفت شسون بيه

جاوبني ببرود .. وانتي شكو تاخذين جيهان وياج هي هاي ما تعرفين ما يجي من وراها بس المشاكل

ظليت صافنه ومصدومة من كلامه كتله .. انت تحجي صدك

رد عليه.. اي والله وبعدين عمتي وكوثر شمدريهن ايات وامها راح يجن للصالون هن من يوم يومهن ادبسزيات واخوي طلكها وما خلص منها وانتي تعرفيهن كلش زين بعد شكو تحشرين اختي وعمتي بالنص قابل ما تعرفين ايو وامها

جريت نفس بغضب .. بس عمتك واختك هن السبب السبب بكل شي شمدريهن هن بالصالون الي راح اروح اله اني هااا شمدريهن ؟

رد عليه ببرود .. يجوز صدفه

طفيت الموبايل بوجهه متعصبه منه ومن ساعة السوده الي عرفته بيها والقران قررت الا افسخ الخطوبه وانعل ساعة السودة العرفتني بيهم

خابرت على اخويه حارث اجه خطيه ظلينه يم جيهان وجهه صار اصفررر وشفايفها جفت بيض حقها محد يلومها ماكو هيج حقاره وخباثه انوب كدام امة محمد كلها

اتصلت بيه كريم باوعت للموبايل انزعجت من شفته طفيت الموبايل ومجاوبته رجع اتصل على حارث وحارث كذلك مجاوبه امي ما خلته حيل امي انقهرت على جيجي وشلون خلنها انهارت

وما لامت ايو وامها لا خلت اللوم على كوثر وام حسن

رجعنه للبيت وهي حتى ما تكدر تحجي وكريم حرك الموبايل بالاتصالات امي خطيه فتحت عليه خط وحجت اله عن كل شي وظلت تبجي

...........................

فافي

جيهان راحت للصالون ويه رنا واني ظليت بالبيت الوحدي يمه فديت نسيبي قبل كم يوم اجه لابوي ورزله كله ما اريد امين يشتغل بإي مكان واذا خليته اشتغل ما تلوم اله نفسك شنو كاسر ظهر الطفل من هسه واصلا هي هاي العالم الاكثريه مو زينه ويستغلون الطفل  مع احتراماتي للناس الطيبه

ابوي كله .. اني اشغل امييين شعني غيره هو قرة عيني ونظرها شلون اشغله هو هم طفل خطيه انقهر عليه اببد ما اشغله

الاشتر تعصب لان ابويه يجذب عليه كله ...انت لا تظل تخبن وتجذب عليه اني كتلك آميين بإي مكان ما يشتغل عود خلي يصير زلمة وشغله مو هسه مشغله وهو طفل كل شي ما يفهم واففففففهم كلامي دير بالك على ابنك الناس ما ترحم ويستغلوا

شكيت اني نسبي الكفو جان السبب بتكسير ابو سعدون وتعطيل كافة الاجهزية التنازليه عنده والضاهر السبب يخص امين لان بس اشتغل وياه ابو سعدون ما طول وانكتل وبعد حتى ما يطلع

اوووف فدوه النسيبي صكار الهتليه والسرسريه والمغضوب عليهم ولا الظالين

ظل بالي عند جيجي شو تاخرت الفاهيه بس لا ركعتها سياره

بعدها طردت الافكار السلبيه من بالي وخليت الايجابيات كلت يمكن عدلت حواجبها لو صبغت شعفتها الله اعلم

مصطفى طبعا هو صار من تعاركت ببيت جده وأمه موجوده لحد الان ما يخابرني  ولا يحجي وياي ههههه

يمكن صحى على روحة وكال هاي حيه ولسان اخاف انوب تهجم البيت على راسي وراس امي

والله عمي حقه بس عادي طبه مرض اروح اسمع اغنية اذا راحو شيصير ليروح خلي يطير اصلا حلو التغيير

ههههههه صار لازم نجدد ونغيير

ويه محجيت هيج وهو اتصل فرفرت شفايفي .. ابن الحلال بذكره

فتحت خط جاوبته بانزعاج .. الوووو

رد عليه.. هلا شلونج

جاوبته ... من الأخير شتريد عندي شغل وما فارغه

كال .. تمام راح اقفل الخط نحجي غير مره

رديت عليه بسرعه ... تعال تعال تعال اوكف كول شكو شرايد وبعدين شبيك ما تسال ولا تخابر ليكون وصلوا الك عني صوره سيئة

رد مصدوم.. صورة سيئة بس صورة وحده !! عجييب والله لج كولي صور ولج انتي شمسويه شمصخمة وملطمة شلون هيج تحجين ويه امي وشلون هيج تتخبلين وتتعاركين وتذبين تهايم على راسي ولج شوكت كلت عمي ساهر يكرهه مرته ويريد يتزوج عليها

تعصبت ورديت عليه .. تعال يابه تعال يا تهايم يا بطيخ وبعدين شكو بيها اذا شغلت بالهن بهيج تهمة ليش ما عندك روح رياضية وتتقبلها برحابة صدر وبعدين شلون اغيضها وهي غاضتني

جاوبني بدهشه وقهر .. وتذبيها براسي هسه كون حاجي هيج شي اكول يمكن ما تحملت وحجتها بس مال تالفين لا هاي واكفه

رديت عليه .. شكو بيها مو يكولون الصديق الحقيقي هو الي يكمل الجذبه وياك وما يفشلك انت عود ليش ما تصير هيييج

تنهد بقهر وهو يصبر نفسه كال .. افيااااان احتركت عشيرتي

جاوبته ... الي احتركت والظلت اني شدخلني شقابضه من عشيرتك

جر نفس وزفره كال .. زين ليش تطولين لسانج على امي تدرين حلفت ما تخطبج الي وكالت لو اني لو هي زين اني شلون بهاي الحاله شسوي صرت بين نارين واني كل شي ولا رضا الوالدين

رفعت حاجب مستنكره كلامة وجاوبته بسخريه .. انت تعال ابو رضا الوالدين انت درضا ربك انوب ارضي والديك وامك ما تجاوزت عليها شدعوه تاخذ على روحها انوب مسولفتلك السالفه صوره وصوت

هسه هي مو وكفت بصفي وكالت والله ما اخليج تاخذين مصطفى اشو اني ما اجيت وحجيتلك بس انتم شفتوني فقيره وما احجي تردون تستغلوني

ودام هيج من هسه بدت المشاكل ويه امك ام قاط يله بااااي ان شاء الله تلكة الاحسن مني ولو اني ماكو احسن مني جمال ومال وحلال بس ميخالف تتهنه ان شاء الله بااااي راح اشتاقلك

صاح بيه وهو يكول .. دتعالي ادبسز اوكفييي شكد تلغين خلي افهمج

تعصبت ... اني ادبسز يا متستحي يا ابن الماما رووووح حظر من جميع الاتجاهات

قفل الخط وكعدت احظر بيه عباله يضحك عليه ما يدري بيه اني مثل الشط شايفه وعايفه

نفخت بضجر... ياربي هاي المطيه وين راحت ما طلعت شعفه تصبغها شلون اني اظل هيج اخلص عمري هيج يوم ادور على امين يوم على جيهان جني ام داخلة بالاربعين

خابرتها ماكو خابرت رنا كالت .. رجعنه للبيت باليل نجيبها اني وحارث

خفت من صوتها صوتها يدل ان اكو شي بس شنو ما ادري

.............................

سولين

رجعت من الجامعه قبل الاشتر هو كل مره هو يجيبني لببيت بس اليوم تاخر واجه اخذني صفاء تغدينه بالمطعم ورجعنا

دخلت للبيت هن ما عاجبهن وضعي يباوعلي بتك عين عبالك بايكة حلال ابوهن

وجان سجاد يباوعلي بنظرات سخيفه باوعتله بسخريه خرب بالحظ ما نعجب بيه الا سجاد ابن ساهر جنها ذبانة مكهربه

دخلت الغرفتي وقفلتها شويه واسمع ضجة وهوسه وكفت بسرعه باوعت من الباب جان شفت بنيه تشبه زينب واكفه ولابسه عبايه وعينها زركة وتبجي

و وجيهه تدفع بيها وتكلها .. امشي ولي امشي اطلعي لا تسويلنه مشاكل مالنه خلك روحي كعدي ببيت رجلج وانجبي

جاوبتها البنيه وتتوسل بيها ودموعها مثل الشلال ... فدوه بيبي ما اكدر والله موتني كتل كطعني تكطع ويكلي روحي المكطمة انتي منو الج انتي فد وحده مهتلفه

فدوه منو يرضا بحالي  هذا... اني عندي اخووو جايه اله جاي اذب حملي عليه جايه اشكي همي اله محد يسمعني غييره اكيد الاشتر ما يرضا بحالي

اني بسرعه طلعت وباوعت عليها البنيه باوعتلي وهي ترجف كلتلها بحده ... انتي منووو

ردت مرة ساهر .. انتي شدخلج الزمي كاعج وتوفي مشاكلنه لوحدنا

باوعتلها وتخصرت ... انتي لو تلزمين كاعج وترحين تلزمين رجلج وتشوفي شيلعب من وراج من احسن ما تتدخلين بالعالم

ارتعبت من كلامها وكأنها شاكة بشي وتاكد كالت ...شقصدج احجي شتقصدين شظامة عليه

رفعت حاجب بسخريه .. شضامة اني ؟؟؟ روحي شوفي زوجج شظام

رجعت باوعت للبنيه كلتلها .. منو انتي اني زوجت الاشتر اذا عندج شي احجيلي

باوعتلي مصدومة والدهشه على وجهها كالت ... زهراء اني زهراااء اخته

ابتسمت بفرحة ونشوه من كلامها الحمدلله هاي هي جايه لاخوها تقربت منها اخذت الطفل من ايدها وحضنتها كلتلها .. تفضلي يعمري البيت بيتج اخوج هسه يجي واكيد ما يرضا على حالج اليوم تشوفين اليوم شيسوي الاشتر وشلون يرجع حقج

ابتسمت من بين دموعها وبلعت حسرتها كالت .. تعبت

سحبتها من ايدها والابتسامة على وجهي باوعت الهن بحقد وعناد كلتلهن .. مدام اخوها موجود ماكو تعب مو هيج حبايب

باوعلي بقرف واني اخذتها ودخلت جوه انطيتها مي وغسلت الها وخليتها بدلت ملابسها وانطيتها ملابس مني

كعدت تشكي من ظلم زوجها الها هو من ذول الفايخين وضابط وحيل مستهزء بيها ويشوفها من دون سند

بس اني وقتها ما عرفت هو زوجها شيصير منها بس اعتقدت هو يصير ابن زوج عمتها الي مربيتها لهذا السبب عمتها هاملتها واصلا عندها صاير اولاد وبعد استغنت عنها مو مثل ام ماهر

ظلت تسولف عن زوجها وكل ظلمة الها بس هي تحبه وتغار عليه شلون تحبه ما اعرف تكول هو زين بس مدري شبيه مرات يتخبل ويظل يعير بيه يمكن لان يشوفني وحيده هيج يستغل ضعفي ويهين بيه

كلتلها ... اخووج اشتر موجود وهو يموت عليجن ويحبجن ويتمنى اشوفجن هسه يجي واحجيله اله يشرح زوجج مثل ما شرح سوادي

صفنت هي وكالت .. منو سوااادي

ضحكت .. ههههه الله يرحمة هذا واحد جان جيرانه مات والاشتر شاكة بيه شرحة

عقدت حواجبها كالت .. شنو هو يشرح بشر ؟

هزيت ايدي .. خاب اندري شمدريني لا تاخذين بكلامي ترا مرات اني امسلت اخيط واخربط بالكلام

سمعت صوته من دخل وهو يصيح ... سوليناااا سولي ام هرمونات الحب وييينج اريد بوووسه مطلوبه ما توفين انتي

عضيت شفايفي  واني اكتم ضحكتي فضحنة ومشيت بسرعه وكفت كدامة حطيت ايدي على شفايفه وهو يوخر بيدي مصر يبوس

كتله ... شبييك لا عيب اختك عدنا

بعد ايدي عن شفايفه وهو يكول ... زينب ؟

هزيت راسي برفض .. لا زهراء خطيه تعال شوفها اجت عليك خصيصا

تركني بسرعه واني بصراحة الحيه البداخلي غارت شو لبسني شسالفه يله ميخالف خطيه اخته

ركض عليها ملهوف وهي وكفت خجلانه منه ومستحيه بحكم هي مشايفته من طفولتها

وكف وصدره يفح بغضب وعصبيه ومشاعر متلبده وحزن واضح على عيونه صعبه عليه يشوف اخته والبعيده عنه هيج مذلوله ومضروبه وهو الي تحتمي بيه الوادم

جانت تباوعله وتبجي وتنزل عينها ما عندها الجرئة حتى تتقرب منه وتحضنه وتشكيله همها جانت بعيده عنه وهو جان مهموم بيها

فتح اديه الها يستدعيها الحضنه تخلي كلها همها وحزنها على صدره جانت مثل الغزال المجروح ولكت من يداوي جرحها

شهكت شهكة وصلت لمسامعي وحسيتها شكت صدرها شك ركضت عليه بسرعه وحضنته وهو شدد على حضنته الها ويمسح براسها ويبوس بيها ويهديها

جانت ويه بحضرة صدره تشكي اله عن جور الزمان وعن الحزن الي توشحت بيه وهي باول سنين شبابها جانت تشكي بحسره وبكل شكوى منها هو تشتد اعصابه وتبرز شرايينه

باسها وهو يكول .. البيت هذا الج انتي والتوجع كلبج توجع اخووج وهاي حقوقج عليه دين

رفعت راسها وهو مسح دموعها كلها .. كافي والله ما ارجعج اله الا يبوس ايدج ورجلج وانه الاشتر

ردت عليه بحسره .. اخذ بنتي مني ما يقبل ينطيها اليه هو هم عنده ظهر بالدوله خاف متكدرله

ضحك بسخريه وهو يكول ... هسه لو يصير رئيس الوزراء اطيحلج حضه واجيب بنتج منه لا تخافين اليوم هي عندج

ابتسمت ومسحت دموعها كالت ... يعني اليوم تجيب بنتي منه بس فدوه لا تسوي وياه مشاكل اني اخاف انوب يصير شي هم ما اريد يتاذه اريد بس يتأدب

ضحك على كلامها كلها ... لا تخافين ابوسه واتفاهم وياه واجي

ابتسمت بحزن وهي تكول ... هي امة زينه حبابه بس هو خبيث هسه اكيد مخلي بنتي عندها لان ليوم عنده واجب

ابتسم وهو يكول .. هاي شنو اني صاير خال وما ادري بروحي بعدين شسمها حبيبة خالها

نزلت راسها وهي تكول .. سميتها رحيييق

فتحت عيونه مصدوم عبالك انصعق سكت ثواني وبعدها طلع بسررررعه حتى ما عرفت وين راح ولا لحكت عليه

نفخت بملل خطيه سوده عليه حتى ما اكل شي ولا شفته زين شلونه ما لونه تعبان بعد روحي احببه المدهور

..........................

جيهان

رجعت من بيت عمتي وكل الحزن بداخلي والهم واضح على وجهي من شافتني افيان تخبلت كالت .. شبييج منو وياج منو ضربج احجي اليوم احرك الدنيا

رديت عليها بتعب .. كافي افيان تعبانه اريد انام لا تسألين شبيه

هي شلون تسكت ظلت تنك فوك راسي بس اني ما انطيتها اي جواب ولا حجيت وياها

جان كريم يتصل بيه اجاوبه على كد السؤال لان تعبت ولعبت نفسي وخاصه من بعد ما رنا تعاركت ويه جاسم من وراي وقررت تفسخ الخطوبه وراسها والف سيف الا تفسخ الخطوبه وحتى شمرت الحلقه

جان كريم. يحجي ويايه ويريد يعرف شنو سبب برودي كتله شويه مريضه بس هو مبين يعرف بالموضوع وعاجبه يسمعه مني

كل يوم هو يتصل ومرات يتصل اكثر من مره يتطمن عني ويسال بس اني باردة من ناحيته

صادف اليوم موعد نزوله جنت مبدله ومخليه شويه مكياج جنت حاسه راح يجي لان هو دائما اول ما يجي يجي اليه

صدك باليل اندك الباب وهو انطاني خبر بالموبايل كال راح اجي الكم فحظرت نفسي اكثر

فتحت اله الباب سلمت عليه كعدنه كال بهدوء .. احجيلي من البدايه شكو شنو الصار

جريت نفس وزفرته كتله .. انت تعرف كل شي اعتقد واني يا كريم تعقدت من كل شي لان بصراحة كلش مصخت السالفه

بلل شفايفه وجاوبني بجمود  .. اي ادري واعرف بكل شي ايات وامها ما عندي سلطة عليهن حجيت ويه ابوها وهو اصلا ما اله اي دور بحياتهن مخليهن براحتهن

وكفت متعصبه ... ترا الزود الاختك لان هي سبب الموضوع كله وهذا مو كلامي اني هذا كلام رنا هي كالت هي وام حسن خططن الكل شي

رفع حاجب بصدمة كال ... افااا انتي شتحجين

ضحكت بسخريه .. اي والله هذا الي صار اني اترزل وانهان وعمتي وبنتها تخرب فرحتهن والسبب اني بنظر عمتك واختك ترا هاي مو حاله وكريم اذا يظلن هيج اني اتصرف غير تصرف

صفن ثواني بعدها كمل بجبروت .. شنو يعني غير تصرف شتقصدين ؟

جاوبته بثقه ... ما اكدر اعيش وياهن

ابتسم ابتسامة جانبية وهو يكول .. ومنو كلج تعيشين وياهن اني بيتي الوحدي نعيش بيه الوحدنا وهذا قراري من البدايه

جاوبته .. وهيج يظلن يخبثن عليه ومحد يردهن

رد عليه ... عمتي مره جبيره خو ما اكعد احاسب بيها اني و اني ابن اخوها حاجيت ابوي وهو رزلها واختي اني حاسبتها وطيحت حظها وحلفت ان هي مو السبب وهم ما بررت الها ورزلتها وحملتها كل المسؤوليه

وبعدين هي هم تظل اختي وحيده محد الها ويتيمة خو ما اظل ادك عليها وكرها بروحها لخاطر فلان وعلان

وكفت مصدوم ... انييي يعني هيج ما الي خاطر حتى تكول فلان وعلان اني انكسرت انقهرت هيج تحجي وياي

رد عليه .. يعني شتردين اكلج مثلا مو كتلج اني حاسبتها وعاقبتها ورزلتها شتردين اكثر اذبحها حتى ترضين وهي تحلف تكول ما كايله ولا ادري بيهن يردن يرحن الها واني جانت نيتي صافيه ردت جيهان تغير جو ويه رنا وهذا كل الي صار شمدريني بايات تسحب لساني وتروح هي تسوي

تنفست بقهر وسكتت مجاوبته

كال .. ديله كافي هسه خلينه نعتبر الموضوع الي صار سوء فهم وما نكبر الموضوع

انقهرت من كلامه اكثر ظليت اكل بشفايفي متوتره واحرك بالحلقه لثواني الشيطان ركب عقلي وهو يكولي انزعي الحلقه واشمريه عليه على شنو هالذل هذا وهو راضي بالغلط

بعدها تعوذت بالله من الشيطان الرجيم وسكتت

تبرب مني ولزم ايدي باسها كال .. جيهان ادري بيج زعلانه والموضوع كاسر خاطرج بس والله ما سكتت وحقج ارجعه الج بس خليني بعدين اتصرف لان هسه الكل ضدي واني خاطب بس من تزوج مالهم حق عندي

رفعت وجهي اله سالته .. شنو قصدك ؟

جر نفس وزفره سكت ومجاوب

بس حسيته محتار وحسيت بيه عليه لوم لان ماخذني واكيد ابو ما يقبل يحجي ويه اخته وهي تعرف شلون تتمسكن وشلون تتلون حتى يكونون وياها ضد كريم

......................

سولين

باليل جنه كاعدين اني وزهراء واجت زينب ويانه هي تحب اختها وعلاقتهد قويه بيها لهذا السبب اجت من سمعت بيها عدنه سوينه اكل واكلنه وجنت حيل مندمجة وياهن واصرف بالفلوس مال اشتر وارجع ليوره اوي فدووه حيه سبورتيه كلها بذخ تلافه

شويه وهو دخل جان شايل الطفله بيده جانت تجنن بيضه دبدوبه ولابسه بدله ورديه وقرديله بشعرها ورديه ولابسه بوت ابيض

من شافتها زهراء كمزت من مكانها فرحانه ركضت عليها واخذتها من ايده وهي تبوس بيها وتحظنها لصدرها وتشمها

بعدها اجت للاشتر ولزمت ايده رادت تبوسها بس هو سحب ايده وسحبها من راسها وباسها

كلتله بفرحة ... شكرا شكرا فدوه ما قصرت كلك غييره وفخر

ضحك بس مجاوبها صاح عليه كال .. سولين تعالي عندي موضوع وياج

رحت وراه كال ... شنو اخواتي بس لا ماتن جوع

تخصرت .. لا والله ليكون بس انت حاتم الطائي لا عمري تغدينه وتعشينه واكلنه كرزات وشربنه عصير اصلا وردن صارت وحدتهن تجنن

ابتسم كال .. والله كفوووو منج اصلا انتي فخررر

نزع القميص اخذته منه بعدها اخته صاحت .. اشتر ممكن احجي وياك شويه

رجع اخذ القميص لبسه وطلع الها كلتله بخوف ... تعاركت وياه لو انطاه الك من دون مشاكل

جاوبها ... لا هو لو لازمه اله اخلي سنونه بحلكة جان مموجود بالبيت بس امة وخطيه المره انطتها اله واصلا سولفتلي عن كل شي وحلفت بس الزمة افهمة ان الله حق

جرت نفس بخوف وحيره جانت مثل المخلوسه الظاهر رجلها خالسها وراعبها الهذا السبب هي جانت حيل خايفه

ظلينه كاعدين والبنات فرشت الهن نامن الصبح ما رحت للدوام بس هو راح ظلينه سوه سوينه اكل ومتونسات بعيدا عن وجيهه وجربزتها

ما نسمع بس هجوم صار وصياح برا طلعت بسرعه واشوف واحد ما اعرفه منو بس جان ضخم وشوارب وبس هو وبس

زهراء طلعت تركض من شافته رجعت خطوات وهي تكول ... أيسر

هو باوعلها وكلها .. ادبسز حشره ادا ما ربيتج دازه اخوج الشفيه ياخذ بنتي من بيتي والله اذا ما ندمتج وخليتج مثل النعال التايهه ما اطلع ايسر شنو ولج خايف من اخوووج يله بسررررعه جيبي البنيه لا ادوسج برجلي

بجت هي بسرعه كالت ... فدوووه لا تاخذها

عاط بيها بغضب وهو يكول ... جيبيها لا اشك حلكج وحلك الخلفج

هو ويه محجه هيج دخل الاشتر باوعله بهدوء وتقرب منه كله .. شتريييد

اشر للاشتر بسخريه وقرف وهو يكول ... انت منوووو ؟

جابه الاشتر ببوكس خلاه انشمر على القنفه وهو يكوله ... اني كسار راسك

نهاية البارت ... يتبع

كونوا انتم كونوا بخير .. احبكم 💔

لا تنسوا التصويت والمشاركة بكم نكتمل 😍