شروط التنزيل : فوط★ + ماكس كمنتار ❤❤
مرسي بزاااف على تعلليقاتكم فالبارت السابق😘 نحبكم وانتم مزهيينا بيهم 🥺❣️❣️❣️❣️
♨ تتمة الحلقة 187♨
👑 بقلمي ✍: #أناييس_مانو 👑
فاتو سويعات بلخف.. توجاد للعيد مايفضش سيرتو عند لبنات ڨد ماوجدو رواحهم يبانو مادارو والو.. حطة لعيد عندهم كثر مالعرس..
سارة دوشت جسور رضعتو رقداتو وخرجت تفقد سمرة بحكم مريضة مالازمش تتعب.. دخلت لقاتها فوق السرير بجواد هذاك وين كملتو تدواش تلبسلو بلعفار
سمرة: حبس مالتحرااك شوي
جواد: هاني حابس ازربي كمليلي حاب نخرج نلعب
سمرة: مادوشتكش به تزيد تخرج تندب لروحك.. ماكانش خرجة
سارة: بركاي مازييتي الطفل ناشط بسلامتو خليه يخرج يدور على روحو ياك غير هنا فالدار
جواد: قوليلها اطاطا ديري طريق حبابة نتي
لوحلها بوسة فالهواء طارت عليه امو بقرصة عوڨ ذي الذيب ماسارة ضحكت وزربت فكتو منها نزلتو للرض فركتلو بلاصة لقرصة ترضي بشلة بوسات
سارة: وخذي وجعتك؟ مازالت تحرق فيك؟
جواد: شوي مش بزاف
سمرة: اييه دحنيلو دحني كملولو تشراڨ لعين شافني مريضة مابقاش دايرلي حساب
سارة: حاشا.. وش حنا نفسدوهولك.. سخفني كي بقى يحلل فيك..قلت مايخرجش تفرزت ماراحش يخرج.. خزرت فجواد: زيد ا لفحل للفوتاي شعلTv ولا العب بلي جووي تاعك
جواد: مي بغيت ننزل لتحت جدو سليمان ولبقية متجمعين نسهر معاهم لاه حابسيني هنا.. مافهمتش!!
سمرة: اولا لمة كبار ماعندو مامڨعدك معاهم.. ثانيا هذا وان دوشت خلي روحك نظيف.. ثالثا مانيش حابستك كون جا مازال لحال نخليك تهبط مانشدكش.. كي راح لحال فوت نيشان لبلاصتك ترقد لا تفراج لا لعب.. امشي
جواد: هذي حڨررررة غدوة نقولها لجدودي
سمرة: بجهالة: تشكيني ليهم!! كملت على جدي.. تهمزت رايحتلو يبس مالخوف سبقت سارة بلوكاتها تهدن
سارة: تهدني ا ختي شبيك عالملايكة صغيير ماقصدش وش فهمتي.. بركاي مارعدتي عليه واقعدي
قعدتها تهدن وجواد مالشووك بقى واقف زي الصنم حتى رجعلها شاهد لعقل فاقت لواش دارتلو جرتو ليه تحضن وتمحش رجعتلو الدم لوجهو ولا لطبيعتو.. رغبها بخفوت
جواد: مافياش النوم.. تسمحيلي ننزل لجدو لتحت؟ نبقى تروكيل والله مانطيشن ماندير طوايش
سمرة: تشد بلاصة حذا باباك ولا بابا.. الطيرة لا.. تفاااهنا؟
جواد: داكووور.. وانا عند كلمتي.. نوعدك
باستلو لأخر مرة كموافقة منها وسيبتو هرول للأيباد تاعو هزو ونزل لتحت يجري فرحان
سارة: لاه دايرة الشي هذا كل فالطفل؟ رخفي عليه شوي ا ختي
سمرة: علابالي وش ندير.. ولدي ونعرفو لا لقى السايبة يهيج وينشط فوق لقياس
★★★★★★
سارة: ومالو.. يصيب غرضو يلعب يدير وش يحب دار جدو هذي
سمرة: بصح نبقاو ضياف..قد ما طولنا بللغيبة هنا مانبحش يغششكم ولا تشكيوني منو
سارة: لعفو.. عيب لا درناها صغار كل حركيين ناشطين هك.. هم حلاوة العيلة و زينة الدار بركاي مالفهامة الزايدة رح تغشيني منك هاه ولدك نحبوه وبلاصتو كبيرة عندنا كل
سمرة: فرحتيني وريحتيني.. ربي يفرحك
سارة: نشاء الله.. اييه قريب نسيت علاه جيتك ههههه نحتاجيني نعاونك تستيكي روحك.. غمزتها: ولا معولة على راجلك
سمرة: خلايا على معولة عليه هههه نأجللو فيها للنفاس ونشيطو مليح هههه
تفلقو بالضحك منبعد نوضتها للدوش تقابلو فوق 2 بونك وبداو تنتاف متعاونين مفوتينها توانيس سوجي ورا خوه..حتى كملو وجدتلها سارة لوازم الدوش خلاتها تتحمم وخرجت للبيت بلوقت دخلت حورية محملة بأكياس ورقية
حورية: نتي هنا وانا من قبيل نطبطب عليك فبيتك.. شكيتك تتدوش حتى قالهالي جواد انك هنا.. جيتكم بخيري
سارة: مرحبا.. وش هازة هذو.. هاتي نعاونك
هزت معاه أكياس وزادو لفوتاي قعدو حورية عير ردت النفس دورتهالها أسئلة
حورية: وينها سمرة؟ فالطوالات؟
سارة: ننن فالدوش تتدوش
حورية: بصحتها.. ونتي لاه مادوشتيش؟
سارة: زعما راجعة لغرفتي ندوش حتى دخلت رحرحت معاك هههه
حورية: رحرحي هههه كب تعطيلة فيها خيرة وفاه جيتكم إلا وجبتلكم لخير معايا
خلاتها مبهمة بفضول وطبست للأكياس تهز وتجبد مافيهم فوق الطابلة..سارة مالسيرپريز حلت فمها وعينيها طاقة.. ضحكت حورية وأشرتلها للحوايج
حورية: هذو ليك للعيد.. تصديرة اول عيد ليك معانا.. وهذو تاع بنتي سمرة..لقفاطن من نفس المودال بلعاني به ماتزعف حتى وحدة تقول لاه ماداتش زي تاع لوخرى.. يختلفو فلون برك تاعك فالازرق الملكي وتعها فالأخضر.. ها الصبابط ولبوشاط اسوختي معاهم.. مقاپط الشعر التيجان خيط الروح لإكسيسوارات لي يخرجو معاهم.. نسيت اللبس الداخلاني وداك العجب تعكم حاجة مانعرفلهاش وخفت ذوقي مايعجبكمش.. ومام يشريولكم رجالكم خير وخير هههه
سارة مالفرحة للحشمة غطات فمها بكف يدها تضيحك بلاحس درعتها حورية مكملة عليها بالطنز ولهدرة لي تحشم فرشتها بلڨدا.. كملت صوا صوا بسمرة خرجتلهم مدوشة منتعشة مع لقعدة شافت لقش تبريعة جداتها تلاحت عليها تمحش وتشكر منها من سارة بسيف سيبوها وتحملو عالحوايج يهزو يعبرو يكيلو عليهم طايرين بالفرحة.. عجبهم لكادو ماذوق حورية فننة جاهم عسل عالقلب
★★★★★★
ما فدار السعيد لجو ماتفهمو مفرح ولا كئيب.. الخدامة رايحين جاينين يتخادمو.. الضراير فالصالون كل وحدة متكية ففوتاي يتوانسو ليال نازل عليها الظيم كي روحلهم جاد بلا روزا وزهرة قلبها عند بنتها هازة همها كيفاه رح تعيد لعام هذا بلا بناتها تبانلها الدار غولة
ليال: طاب قلبي.. والله توحشتها اربي لاقيني بيها مابقيتش نتحمل فراقها
زهرة: اصبري صبرك ا ربي ا ختي ودعيلها يحفظها من كل شر
ليال: آميين يارب
زهرة: غبرت غبرة خايبة نشاء الله تكون لباس برك
ليال: نشاء الله.. دعيلها دعولها توليلنا راه كبدتي تشوات عليها
زهرة: اللطف عليك.. شدي روحك ماتعرفيش وقتاه طب عليك وتشبعي منها
ليال: ياريت.. توليلي برك مانزيد نطلب والو من ربي
زهرة: كلنا تحيرنا معاك عليها.. وين تكون اختفت زعما حتى مالقاهاش ولدك؟
ليال: لعالم ربي.. موالفة تسافر يبعثها لكاش خدمة ولا صفقة بصح جامي قطعت خبارها هك علينا.. هذا لي حارقلي قلبي زيد روح بلا أي خبر ليها كمل عليا
زهرة: ترجع باذن ربي توليلك وماتزيدش ندرڨ على عينيك خلاه
ليال: آميين.. نعزها كثر من زوز لوخرين تبقى بنتي لي ماجابتهاش كرشي وغلاوتها من غلاوة جاد ولد كرشي
قصتلهم مليكة لهدرة دخلت شابحة حزامها مڤفضة لقندورة ترد انفاسها بقوة.. فات طول قعدت بلت ريقها وتدخلت فلحوار
مليكة: تعزي لبنت ماقلناش لا مي ديرها بغلاوة ولدك هذا عجب كبيير.. وش جاب معزة بنت الناس لولدك كرشك ا مرت عمي الظاهر التخمام والصيام تلفولك لهدرة
ليال: ماشرفتش به يعييوني.. علابالي وش راني نقول.. والبنت بنتي كيما لولد ولدي.. عندك اعتراض احتفظي بيه لعمرررك
مليكة: لاه نعترض استغغر الله هدرنا وصافي
زهرة: مبدلة السوجي: ڨبالتي محزمة وش كنت ديري؟
مليكة: فكرتها تحرحرت بالنكير: نركض غادي وجاي مع التوجاد حارزة الخدامات شفتكم لي راقد راقد ولي طالس طالس شمرت على زنودي وسيڨاني نوقف عالحالة
زهرة: لا.. أصيلة وفحلة ماشاء الله من ديما نشكر ربي ونهني ولدي دا مرأة ونص
مليكة: هزت خشمها فالسماء داتها فروحها: فحلة ونعجبك قوليها لولدك مسو يتحزملي يعلق ينكر على كلش
زهرة: هذو الراجل قد ماكنت مليحة تنحطي عالجرح يبرا يدور يدور ويلقالك سبة ينغدد عليه
★★★★★★
ليال: هك طبعهم كل مايعجبهش لعجب
مليكة: شفتو.. بيناتنا ساعات يظلمو لفحلو فينا.. وساعات.. ياحبة عيني يديرو عين شافت وعين ماشفات.. غوجت فمها تمنشر: زي ولدي وولدك ا مرت عمي.. عاطينها غير لخدمة ولا روحو ياكلو ويضربو الطلسة مع نساهم فالدار.. اما به يهدرو معاهم ديرو هك ولا هك جاامي.. كيما لمعاونة فالدار.. شهر نحسبلهم وش خدمو ينعدو عالصباع
زهرة: رجعنا لسيرة الهررج عالخدمة فالدار.. لاه محرحرينك هك مازالو عرايس جدد خلي يهناو منبعد ربي ورحمتو
مليكة: فاتو الشهر وتقوليلي عرايس! لكبيرة والدة ومعاودة والصغيرة لاحقة فالطريق لا حب ربي.. عضت لسانها بفقصة: ومازال تحبي يهناو لاه وش خصهم ياكل شابعين راحة ماكلة ورقاد شكون زييهم؟
ليال: ياك كاينين خداماات يطيبو يهزو يحطو يسيقو يديرو كلش.. شبيك هاترة بلبنات خدمو ولا الله لا خدمو.. حاجتهم هذييك
مليكة: تنطرت تعرش: والله لا حيالة هذي.. ماتصرا غير هنا.. حالينلهم العين لقاوها خابزة ضاربين حمل الدار بركل ونتم لاهيين بلحزن خليتو كلش فوق راسي مانيش بنادم فنصكم ماكمش سامعين بيا تأنا نحب نهنى نرتاح.. ويحن فيا ربي يعطيني ولد خلاف نتلهى بيه نتهنى مالشقى فالدار وهزان همها زي لغاشي كل
شوكاتهم شحقو وغطاو فامهم فاقت بروحها قعرت جد الحالة قدامها تخلخل وجهها ثانية وحدة مازادتهاش تم خرجت تجري هاربة من نظراتهم وفرشتها لي ماڨدها ڨد!!
لفوق فغرفة رانيا.. شهد رايحة جاية دوح بجود ترقد فيه معاونة رانيا.. لي متهاوشة مع بنتها فوق لفوتاي دوشتها ولبستلها وصلو للمان الشعر.. عندتلها سيرين وكلبت لا تلمو
سيرين: تلميهش خليهولي مطلوڨ ديما لم لم تحسب لا شعري.. حابة تلمي لمي تاعك تاعي نحبو مسيب مسبسب الريح يدي فيه
رانيا: شووف للشلعلع وقتااه كبرتي تمشي رايك ا فرررس
سيرين: مانيش لعلع ولا فرس
شهد: حابسة الضحكة: شلعلع مش لعلع
رانيا: ميق فشهد: صلحيلها نتي حفظيهالها
شهد: ماقلت والو سايي فرزوها بيناتكم
سيرين: شحقت: تتخلاي عليا ا طاطا.. شدت قلبها: باطل ا خواتشي اجرريو سكلوني رح يتحاماو فيا
رانيا: خبطتها بالمشط للراس: بلعيي بلا توويال زي مرة الشهييد لي يسمعك يقوول نڨدد فيك
سيرين: بلا نڨييح سكتت سايي هوووف
ربعت يديها تنفخ بفدة مش راضية تستلم.. ومالقاتش شكون يضرب عليها ويمنعها قبلت بأقل الأضرار.. رانيا بروح منتصرة مشطتلها بالنفحة ركبتلها سيغتات تلملها البيبي هيير.. الشعر لمتو كودشوفال خلاتو مسيب ولفتتها توصي
رانيا: انزلي لتحت لعند جداتك بقاي عندهم حتى نكملو ونعيطلك
سيرين: مضيقة عينيها: وش رح ديرو من ورايا؟ وش لي تكملو هممم؟!
★★★★★★
رانيا: شحال نسناسة ابن عمي.. عيشي سنك بركاي مالتحشية فأمور لكبار تعصبيني منك ندورلك السيستام وتعرفيني فالعقاب مانرحمش
مااستناتش اكتيفات مود القطة تستتلها
سيرين: بلاش العقاب حبابة ا مامي لاه تزيري هدرتي هدرة سمعتها وما عليا غير نفذ.. قلتي نهبط عند ڨغوند ماغ نهبط ونبقى عاقلة مانقلقهمش.. داكوور هك؟
هزتلها رانيا رلسها بايه شابحة وجهها صارمة زعما
سيرين: جوتام ا ماامي.. يلا مشيت.. بيزوو
تلاحت باستها وهرولت لشهد تجبد فيها طبستلها بجود باستو وباستها تخالي
سيرين: مانيش خوافة عويقلة برك.. مامي ونعرفها عقابها واعر تحرمني مالعب الشوكولا وبزاف حاجات.. مهم نحبها ونحبك ياك تحبيني ا طاطا
شهد:تهمس زيها: بيانسير نحب ا روحي
سيرين: عمو حسام لي روحك ماتكلحينيش.. وش كنت رح نقولك اييه تفكرت منبعد قوليلي وش درتو كاش صوان دوپو كاش ماسكات غدوووة ديريهملي دبري راسك تأنا تهلاو فيا مش مرأة كيفكم.. حسبتوني راجل ولا واش حتى حاڨريني ا ويلي
غمزتها وخرجت بزربة تجري.. خلات شهد بلاكة خطوط ماروكو نازيلنلها وسوست رانيا
رانيا: شبيك؟ كشما دارتلك؟
شهد: ها! والو.. هههه بنتك ستوتة كبيرة
رانيا: شفتيها..قبل كانت عاقلة تخاف وتحشم مي درك لقات ليستاع ودلال لعيلة فياقة.. بصح مش عليا نتفرغلها ونزيرها مليح ملييح
شهد: مادارت والو بركاي ماتحلفتي فيها.. خليها تنشط محليتلنا حياتنا بحلاوتها
رانيا: وانت لحلوة ا حبيبة.. بهزان جود هكاك نتمنالك تولدي عن قريب وتحلاي كثر
شهد: بحياء: نشاء الله..
ناضت رانيا فقدت جود كان رڨد هزوتو منها حطتو فبلاصتو وتساماو فوق لفوتاي
رانيا: وجدتي حالك للعيد ولالهيناك معانا؟
شهد: سي وجدت.. تهليت بروحي لعشية وضربتها بتدويشة
رانيا: بصحتك مام انا نقيت ودوشت.. بقالي نعاود دوش خفيف
شهد: مام انا.. معولة غدوة صباح
رانيا: كيفي.. ايه ماقلتيليش وش جبتي الصباح من جهاز للعيد.. زعما عروسة جديدة
شهد: عرايس مانيش لعروسة لوحيدة.. مام نتي عروسة خمس وخموس عليك
رانيا: تسلميلي.. خفي عليا حشمتيني ا وعدي هههه
شهد: بصح واتاك هههه يطل راجلك ينقض عليك يكملك هههه
رانيا: ماخص.. غير يجي برك انا لي ننقض عليه ههههه
شهد: وحش كبير هههه ماشاء الله
رانيا: مش زوجي بو ولادي قرة عيني هههه
تسندو على كتاف بعض يعلقو مفروشين بضحك.. زمان قصو هبال ناضت شهد لغرفتها دقيقات رجعتلها ب4أكياس ورقية قعدت بحماس وفرثتلها كلشي قدامها تنعتلها
شهد: تصديرة ليا والدوزيام ليك فالپلوبيبي كولااغ تشهيتو عليك وجبت ليا فالغووزپيبي
رانيا: منك صح درتي هدرتي فبالك؟ كنت نتمسخر معاك برك الصباح قبل ماتخرجو لاه عذبتي روحك وشريتيلي صح ا خلايا
(لكنة لمليحة تتعامل بالمليح تلقى لمحبة ودلال ما لي محرحرة قبيحة تربع لعيب.. ودي غيركم تلقاو كل خير مش لعام مقلوعين وتحبو ناس تمدلكم نجمة مالسماء🌚 رايكم 👇 )
★★★★★★
شهد: عذابك راحة..كنت ملول معولة نشريلك معايا.. دايرة حسابك علابالي ماعندكش كيفاه تخرجي تشري
رانيا: تعيشي ا حبيبة تفكرتيني فوقت حد ماتفكرني.. ربي يفرحك ويخليك ليا ا حبيبة
تلاحت حضنتها تمحش تشكر وتعاود فرحانة وشهد عجبها لحال كي فرحتها
شهد: ويخليك مام نتي ليا.. تلبيس بالصحة نشاء الله يعجبك ذوقي
رانيا: سيير عجبني اللون برك رووعة.. مرسي اقلبي نردهالك بحاجة حلوة كيفك
شهد: مابيناتناش.. يله افقدي وش جبتلك وقيسي كلش نحب نشوفهم عليك
رانيا: نوضي نقيسو لزوز ونعتو لبعضانا
شهد: من عيوني.. رايك يهمني ما حسام قبيل زربني مانعرف جبت كلشي ولالا
رانيا: معليش مهم نسترو رواحنا بلي جبتي معذور راجلك كان فدورة خفيفة يكسيك وليتو تكسوي فيا مام أنا هههه
شهد: مانكرت لافيغيتي كي عرف ليك وسع بالو كثر ملي كان هههه
رانيا:ربي يحفظو ويخليه ليا ولد سلفي لعزيز لي بالو واسع بحر
ضحكت شهد ونوضتها بحماس هزو لحوايج وزادو لبيت التبدال.. لبسو قاسو دارو فاشن شاو لبعضاهم بالزهو التفدليك والضحك
نص ساعة كملو وخرجو لنفس الفوتاي شهد حاطة أكياسها حذاها يتفاهمو على پلان غدوة
رانيا: نسييو نوضو بكري
شهد: جوايه ماه؟
رانيا: مانعرف عليك.. انا ال6 نوض جهدي نوجد لجاد به يروح لصلاة لعيد وتولى لولاد
شهد: اييه ال6 مليحة.. مام نوض هكاك نوجد لراجلي نصرفو ونجي نعاونك فولادك.. جوود ليك وسيرين عليا هههه
رانيا: يعيشك ا حبيبة.. وربي يعينك من درك عليها
شهد: علاه شبيها؟!
رانيا: شي.. مشركة مايعجبهاش لعجب برك غدوة توجديها وتشوفي بعينيك هههه
شهد: معليش تدلل.. أصلا لايقلها الدلال هههه
قاطعها لباب دق مرة وتفتح ديراكت دخلت مليكة زي زوبعة وقفت قدامهم لمو التبسيمة يبحلقولها زيماه محرشة مخنزرة
مليكة: مجمعين هنا ڨرڨر.. ماوراكمش توجاد للعيد؟
رانيا كنا متعاونين فالولاد
شهد: كشما مازال يندار نعاونوكم؟
مليكة: حذاقيتي روطار ا كنتي.. حمد الله مازلت صحيحة شابحة مسلاني وقفت على كلش.. وتتحججو بلولاد لي يسمع كلمة معينة يحسبهم 10 وهم غير زوز.. جييلكم جييل زبدة طايب وحدو لا تاع وقفة عالدار لا تاع زواج أصلا
رانيا: وقفتلها: عواشر عواشر هنينا مالهدرة لي تسمم لواحد.. بيك عالخدمة وش درتي! لخدامات دارو كلش
مليكة: شكون وقف عليهم حتى دارو كلش اكيد لا نتي لا هي ا لفحلة؟!
رانيا: مليكة ماكلاه تحشي لهدرة قبل مانطلع سقسيت وش مازال قالتلي خالتي زهرة مابقى والو وهناتني فارقتكم جيت نتوله بولاااادي.. دييجا لاه محرشة كشما دايرينلك؟ قلقناك بحاجة؟!
مليكة: حاشاااك.. الله لا يوصلك نتي وياها ديرو وتقلقوني.. وماني مقلقة ما محرشة جيت ندير الصواب نعرفكم لي عليكم فالدار هذي كل وحدة دير واجبها
شهد: اوكي فهمناك ا خالتي سايي قصو نقاش هنا.. خزرو فيها لزوز خلعوها بلعت ريقها:قلت تنعلو بليس زعما عواشر عواشر مانزعفوش بعضانا
رانيا: مابيناتناش الزعاف.. ياك ا مرت سلفي
مليكة: ديرو ماعليكم وكلمة ماتسمعوها مني.. مهم خليونا فالمفيد غدوة فيقو بكري زي لحرات مع رجالكم وجدوهم لصلاة لعيد
شهد: بحماس: درك برك كنا نهدرو فيها.. سيير نوضو بكري ماتخميش
مليكة: ملييح.. نصرفو رجالنا ونتعاونو مع لخدامات نركحو لي صالون ومضافة الرجال نكملو رابييد وندوروها نتهلاو فحالتنا
رانيا: فهمنا سايي غدوة يدينا من يدك فكلش
مليكة: نشاء الله
★★★★★★
تمعنت فوجوهم صافية نقية نضارة تنطق منهم نطق.. سخفت يكون تعها زيهم وتركح جمال يحط بالو معاها ويباتو كاش ليلة كيما كانو زمان.. مطت شفافها للحظات مترددة منبعد طرشڨت
مليكة: شفتكم تهليتو فوجوهكم لبياضة النقاوة شبحتوهم شبح.. بغيت تأنا ديرولي كاش ماسك ولا زوز نبياض ونشبح وجهي.. عضت لسانها زلڨ: مافياش تجاعيد وجلاود لقلقة برك ديما مزيرة وجهي زعما تفيدوني بكاش تخليطة ملي ديروها نعدل وجهي زي تعكم
فاجأتهم وصدمتهم من شهد بقات مبحرة عينيها..رانيا شدت ضحكتها بسيف وبلعطتها
رانيا: شفتي لقلقة وش دير شفتي.. هذا علاه لازمك تبطليها.. لقلقة دونجي عالمرأة ديرلها تجاعيد تكبرها قبل وقتها.. ولمرأة بلا جمال جماالها يعني تفقد ثقتها فنفسها ومام راجلها يحس روحو تغبن بيها وخلي مالتخمام لي ممكن يخممو من وراها
مليكة: ضربت فخذها: شمن تخمام ا كيتي !!
رانيا: مانعرف.. الرجال كل واحد وش يغنيلو راسو
شهد: فهمت لمقلب دعمت رانيا: تخمام كفس باينة.. وماتجي غير فالمرأة لمسكينة
مليكة: يعطيهم سكينة تبطهم.. فاقت رڨعتها: مش رجال كل.. لي يلعبو بذفاراتهم زي لكلاب برك
ضحكو لبنات وزادولها درعوها مالجهتين قعدوها تحت نكيرها تعيب الرجال وتسب.. رانيا ساماتها تزهرلها تحميلها البندير وشهد جابت لوازم خلطات طبيعية وماسكات دارو بمليكة خلط وطلس لوجهها رقبتها ويديها دايرينلها لخاطر وهي مزهيتهم لأول مرة تجمعو بنشاط وضحك.. تحسب أم وبناتها مش سلافات وكناين !!
فغرفة أمنية.. تلمت عندها اختها وأمها ياسين كي الخروف محشي وسطهم مجبد فوق فوتاي بتليفون وكيتمان يلعب بوبجي شغل مش تم.. مفوتين لوقت بالتوانيس
آية: لوحدة فيها تضربها بتدويشة الله الله تصح وترجع معطعطة زي النواارة
أمنية: الصح كل فالتدواش.. الراحة البيوضة الزين.. ولينا نهبلوو
رحمة: من بكري زينات خمس وخموس على بناتي.. فوتت وحد لأيام استهزيتو بحالتهم ولات حويلة بصح مزية فقتو وتهليتو فالحالة كون كشما قالو نسابي نعطيهم الحق
آية: تقرصت تخلخل وجهها: وش يقولولك ا خلايا؟!
رحمة: يندبو منكم باينة يقولو عشمتهم.. شرطت وتشرطت وعلى واش؟! على قدرو وخوه
طرشقو بالضحك عاونتهم ماياسين عاطيهم بالظهر لا خبر
أمنية: كنت عارفتك رح تقولي هك هههه
رحمة: كلمة لحق تنقال.. ولا شكاو نسابي نقولهم عندكم الف حق.. بناتي وقريب ماعرفتكمش هههه
آية: وقتاه هذا هههه يخي ديما قايمين برواحنا
رحمة: شوف شكون تهدر.. نتي بعد نعرفك كيفاه تباتي وتصبح.. حابة نجس نبض راجلك وخايفة نحرحرو يفيض بيا زي لواد
أمنية: حاكمة كرشها: مايفيض مايشكيكش سلفي عاقل مسكين حاملها كيفما هي هههه
رحمة: مزية.. وحد لوقت قلت يشدني راس للراس يقولي غدرتوني رجعولي الشرط هههه
آية: بركاو ماضحكتو عليا مانيش بطوايشي للدرجة ذي بعد ا نمي
أمنية: اممم ماكيش صح هههه
★★★★★★
رحمة: زهرك مدية ولد ناس فحل ومتهلي فيك وراضي بهبالك وطوايشك
أمنية: شفتي زهرها يفلق لحجر تبارك الله سلفي كثر واحد حالم وصبوور فخاوتو
رحمة: عليها نبقى نوصي فيها ونكررش تهلاي فراجلك حذاقي تعيش لاباال ڥي معااه
آية: نفخت: هازتو فعينيا تهني على نسيبك لغالي
أمنية: ماتزعفيش هدرنا معاه الصح
آية: اممم لقيتوني ساكتة قلبتوها عليها.. ديجا بدلو السيرة.. خزرت فأمها: دوريها على بنتك كل مرة تخرج لنسيبي بخرجة مالقصب وبولادها رح يهبلوه لمسكيين
أمنية: شكون تبلاني خاطيتو اماما هههه مادرتلو والو
رحمة: نتي بعد تسكتي هههه كون ماحضرت وشفت بعينيا نصدقك.. راجلك ماتخلق منو مرتين فالدنيا.. حامل هبالك ودلالك وزادو ولادك هههه ربي يعينو وخلاه
أمنية: لعبتها غوبشت: يمااا !!
آية: شطحتلها حواجبها: شح مح تولاتك مام نتي هههه
أمنية: عجبك لحال همم.. ارواحي نعتلك
جبتدها مالكرومة طبستها وتلاحت عليها بالقريص دغديغ وبوسان وهي غير تتلوى تضحك وتكبش فأمهم زعما تدخلت تفك شابعة ضحك معاهم
فنفس لوقت مهى نزلت لتحت دور هنا ولهيه مالقات حتى حد من اهل الدار.. جات لأمنية مع وصلت للباب سمعت صواتهم والضحك يدها يبست عالبوانيي.. ماعرفتش تدخل ولا ترجع منين جات..قلبها وجعها تمنات تكون ختهم وتعيش الجو معاهم.. جات صورة أمها بين عينيها توحشتها وتمنات كون بقات حية راهي مش محرومة من حنانتها ولا حاسة بالنقص زي هك.. نسمة ريح دارت فالكولواغ فيقتها شهدت واستغفرت.. بلوقت اسمها لحق لمسامعها من بين الاصوات لمداخلة ذيك!! ذكروها! فقدوها؟ سقساو عليها!! يعني مش منسية كيما حست وعندها بلاصة بينهم.. لا شعوريا رجع قلبها يزدح ملفرحة وقررت تحل لباب.. دقت مرتين ورا بعض سمعت الإذن دخلت متبسمة متلهفة لجمعتهم لحلوة
مهى: هاكم كل هنا وانا نحوس عليكم لبرا بلوحدة هههه اهلا بيك ا خالتي وقتاه جيتي
رحمة: اهلين بيك ا بنتي جيت قبيل شوي
فاتت مهى نيشان سلمت عليها وقعدت جنبهم
آية: عمرك طويل طويييل.. قد لسان مليكة مرت خالي هههه آاااي.. عوڨت لقرصة امها
مهى:بلا تشبيه بلييغ هههه وقولي علاه عمري طويل
آية: درك برك كنا فسيرتك هههه
مهى: يخي بالخير برك
★★★★★★
أمنية: اممم بيانسير خير ماما فقدتك
رحمة: مابنتيليش ملي جيت.. سقسيتهم فاه غاطسة هذا.. قالو تتهلاي فروحك للعيد.. وهاك تبارك الله مضوية زي الڨمرة
مهى: عويناتك لملاح ا خالتي.. عيشك كي فقدتيني ويخليك ديما تفقديني
رحمة: نشاء الله.. جبدتها لصدرها بحنية: نفقدك وافقديني عيطيلي نتوانسو كشما حتجتي حد تشكيلو ولا تفرغيلو قلبك انا هنا وربي شاهد حرف لا نخرجو
مهى: تسلميلي.. ونعيطلك نتوانسو نزهيك مش نزيد عليك
رحمة: اش تزيدي تاع ناناك.. راك بغلاوة بناتي وماتحوزيش روحك منهم خلاه..كشما يديرلك ولد سهام قوليلي ونعتلو
أمنية: شبيك تحرحرتي ا يما هههه
آية: شفتي رح تدورها على رجالنا هههه
رحمة: مايحڨروكم مانتدخل نضرب عليكم.. ديجا اسكتو خليني مع ختكم.. تلفتت لمهى: لي تجيني من خاوتك ارواحي معانا لداري ونسوني.. وارواحي مام بلا بيهم هم نعرف الراجل يتبسل ساعات تقولو مرتو خرجني حوس بيا ديني عند ماليا يضربو جن حمر عريان يشطح بلا محارم
طرشقو لبنات بالضحك وتفرشو يتكاو على كتاف بعضاهم صوابها صواب يضحك لميت فقبرو..عجبها فاش شافتهم فرحانين زهات عالتعلاق والتمسخير شبعتهم ضحك
روحو الرجال لقاو لكاملة فوجوههم دايرتلهم باراج.. مشمرة قندورة شابحة لوقفة بعصاها وبصوت خافت تستفسر
الكاملة: ماطولتوش ڨبالتي قضيتو كلش؟
مراد:شوفي زيماه محملين تعرفي.. بلاما تشقاي تسقسي
الكاملة: ناناك.. ندير ڥيزيت لكلش ونعرف جبتو كلش ولالا
أسد: تهناي جبنا اللازم ولي سميتيه ڨاع
الكاملة: تطل على وش هاز: اممم.. فوتو كلكم قدامي للصالون نفقد وش جابتو طرا
مراد سبقهم صدم للصالون جاعر كي تجرجر معاهم حرث لاڥيل يقضي معاهم ها لي كسى مرتو ودللها.. ها لي شبع ولادو لبس وكساوي ماهو ماعندو حتى دخل شبع عفار باااااطل!!
تبعتو ماشية مع أسد يتهادرو هازة معاه زوز ساشيات قضية معاونو.. تخلف أمان وخليل يتفاهمو مخفضين الصوت
أمان: سمعتيها قالت تڥيزيتي كلش
خليل: سكانار ا خويا.. ماتتهنى حتى تتأكد بعينيها
أمان: من واه تتأكد ا ##ي.. قلنالها جبنا كلش
خليل: هدرتنا حاجة والشوفة بعينيها حاجة خلاف.. فوت برك بلا نكير درك فيساع نكملو
أمان: عوول.. حسابلك تفوت بلخف.. لا ماسترش ربي تضرب وحد الساعتين مبركتنا قدامها على جال لاڥيزيت تعها ذي
خليل: ساعتين كاملين!! تحسب اوپيغاسيون
★★★★★★
أمان: هههه.. تجيك فالصبر.. قوي قلبك وفوت برك بلا نكير.. غمزو معاودلو نفص لفقصة
خليل: قحرلو: مش وقت طنننز.. ولافيها عذاب خلاف لواحد يسلت بجلدو
أمان: غمزو: فيدني انا خوك كيفاه لملصة؟
خليل: ضيق عينيه يخمم: نديرو رواحنا ماسمعناهاش ونهربو نيشان لغرفنا
أمان: ميق فيه: من نيتك؟
خليل: لا من ريتي وبقية احشائي..رص سنيه: بيانسير من نيتي.. ماعجبكش لحل تاعي الله لاعجلك.. ابقى رحرح انا هارب بجلدي
قلب الدورة يتسحب زي السراق وأمان شاف مع جنابو من ومن مالقاش حل بخلاف يلحقو ماراطاهش مشى يتختل زي لي عامل عملة.. خليل انفوا حس بجهامة وراه حبس ولفت وجهو شافو تبسم شطر يفقص فيه
خليل: درك عجبك لحل.. هممم
أمان: عجبني عجبني هات نمنعو برك
خليل: خفتِ تروحلها تشدك بلڨعدة حتى تطيب طرمتك ههههه
أمان: تتهاپى مش غير طيب.. انا خوك غير زيد لقدام لا فاقت بيها خلاااات
خليل: اييه صح.. لهربة تسلك أصلا مالازمش تبربش فلكش كاين حوايج بريڥي مايتشافوش
أمان: بفضول: وش شريتي وماشفتوش؟! يطللو عالساشيات: نعتلي نشووف
خليل: شاري الشعررر.. اش تشوف ا ##ي قلتلك حوايج بررريييڥي
هاجلو أمان بالتعلاق والهواش مُصر يشوف وش شاري ومخبيه عليه.. وهو حلف لا خلاه يشوف لصقو فبعض متهارشين هو منارفي وأمان ضاحك.. ماحبسهم غير صوت عزرريين لمعزززرن
شكون بخلافها لكاملة كبيرة الدار.. غير سمعوها تهزطو وتلفتو فرد وقت شافوها واقفة فباب الصالون مخنزرة
الكاملة: اشش دييرو عندكم؟ لاه ماجيتوش؟!
لزوز: لسانهم تعقدتو: هااا!!
الكاملة: ماتلعبوهاش ماسمعتونيش تحركو للصالون.. وانتم تسحبو زي السرارقة تقوول محمليين بالذهب مش حويجات.. تحررركو يللله
ملكتهم تنفضو وبلا عناد رجعو منين جاو بالنفيخ والترميم كارهين جد حياتهم.. دخلو ورا بعض قدامها تبعتهم محرحرة تعلق
الكاملة: هاربين لعزريينكم.. هممم
خليل: مادرنا والو به نهربو
الكاملة: اممم.. مانعرف شكون كانو قراب مالدروج
أمان: شمن دروج؟ وين جاو هذو؟ فاه تهدرو استغفر الله.. فات نيشان لفوتاي قعد خزر لأسد ومراد: هاكم هنا؟ وانا عييت مانحوس عليكم
أسد:هز حاجبو: تلفناالك زعما؟
أمان هزلو براسو ايه ومراد كلاه فمو رمرملو بفقصة
مراد: نتلفولك.. تشدك الدوخة الفشلة لعمى مهم تمنع مالحصلة ذي تفوو ماقفزتو ما ##ي وانا لي قريب تجلطت هنا.. قلت منعو شوي دورتو دورتو وطحتو فالحفرة.. مصيدة الصيادة الكااااملة
★★★★★★
أمان: تحت سنيه: اسكت ماتفكرنيش رحمبوك جدودها قاويين.. قفتنا فالدروج شعرة ومنعنا
أسد شافها قاصدتهم حمحم بقوة سكتهم قبل ماتسمعهم تاخذهم..قعدت معاه فنفس لفوتاي لبقية قدامها تشيرلهم بلواحد يمدلها بساشية تفتف تتأكد شراو مانعتتلهم ووصاتهم لمحت شي ساشيات مامدوهملهاش بحال أسد فهمتها طول ولعبتها نية شغل مافاقتلهمش
الكاملة: ملييح.. كلش مليح جبتو لمخير كيما نعتلكم يعطينا الصحة
مراد: هك كملنا يخي..تهمز: مالا انا نرووح
لكاملة: مڨعد وين رايح مازلنا ماهدرناش
مراد/أمان/خليل شحقو: مازالت فيها هدرة!!
لكاملة: معلووم.. عندنا هدورات بزاف شبيكم تڨلعتو تقول رح ناخذكم بطرايح
مراد: ننندب وجهي
أمان: نحطو خليييع
خليل: طبنا ا ماني طببببنا.. أجلي لهدرة لغدوة
أسد: حبو يقولو غلبو.. لا مش هدرة ايرجوون خليها لغدوة.. سيبيهم يروحو يريحو
الكاملة: كون مش لازمة مانشدكمش.. درك نفهمكم بلخف ماتتقلقوش.. احمم غدوة عيد وعقيقة ولاد خوكم.. فيها ذبايح وخدمة عراام نحبكم تكونو هنا كامل.. تعاونو وتوقفو عالحالة
خليل: تخلع: قصدك نذ*بحو حنا؟
أسد: مادام لولاد ولادي.. الذ*بيح عليا..تهنى
الكاملة: بصح يعاونوك.. خاوتك وولاد عمك يشاركوك ففرحتك.. مايتحشاوش لحراس فبلاصتهم.. حشووومة
أمان: على زوز كباش دورتوها معزة وبنتها.. غدوة نوض لسماهم بكري نذ*بحهم ونهنيكم
أسد زوز كباش تاع ناااناااك
الكاملة: ماهمش زوز
مراد: قاطعها مخلوع: هلا قداااه؟!
الكاملة: 5..
رعرعو فثلاثة: واشيييااا؟
أسد: كيما سمعتو.. لولد بزوز كباش والبنت بواحد
الكاملة: لقول النبي ﷺ : " مَن وُلِدَ له مولودٌ فأحبَّ أن ينسك عنه : شاتين عن الغلام ، وشاة عن الأنثى ، فليفعل " يعني 5غنم
أمان: كون زوز روامل ولا 3 وطبڨنا علينا
مراد: اييه صح.. نقصة عفار ويزكى لحم يجي بزااف كثر من تا5 غنم
الكاملة: بحدة: رح دوروهالنا تفلسييف؟ شكون فيكم الشييخ الإماام فاقه دينو تفتييو فالسنة بلا ڨدا جنيييتو
أسد: تهدني ا يما.. ونتم لاه محيرين قلتلكم نذ*بح وحدي خلااص فوتو النقطة ذي
تنفسو براحة ولكاملة سرباتلهم بقية لهدرة بشكل القائي ماخلاتلهمش مجال للنقاش بحال مدتلهم تعليماتها وماعليهم غير ينفذو.. سمعو حفظو مايتحفظ ناض أمان وخليل فرد وقت لوحولهم "تصبحو على خير" هزو قضيتهم وزربو خرجو هاربين هرييب
مراد لقاها سبة ينفذ زيهم تهمز لاحقهم شدتو لكاملة بهدرتها
الكاملة: توجاد وجدنا.. بصح اهل الدار ماتلموش كامل ماتعرف زيماه رح نفتو لعيد بلا بيهم
أسد: ماتتغبنيش منا لغدوة يدير ربي حل ماتعرفي وقتاه يطبو عليك بالواحد
الكاملة: نشاء الله.. خزرت فمراد: نحكي على أمك وخاوتك.. ماقالولكش وقتاه جايين؟
جا يرد توله من اسد يغمزلو طمنو بعينيه وجاوبها
مراد: جايين سيير.. وقتاه بعد مازال مابانتش غدوة ولا بعدو.. صباح ولا عشية.. لعلم لله
أسد: لمهم جايين لعيد هذا نعيدو مع بعضانا كامل
.... يتبع غدا لا طلعو الفوط✨ ا كبيداتي😘
ماتبخلونيش بآراائكم ... خليو تعليقاتكم فكل حلقة ❤..
فضلا ★ vote للحلقات
اضغطو على رمز " ★" اسفل الحلقة❤
+
🥀 متابعة لحسابي
Anayiismanou