شروط التنزيل : فوط★ + ماكس كمنتار ❤❤
عسلاتي مشكورييين لتعليقاتكم بين الفقرات😘😘
♨ تتمة الحلقة 183♨
👑 بقلمي ✍: #أناييس_مانو 👑
على كلامو رغات آية وبلحرارة ترمات فحضن امها تسلم فرحانة تردد
آية: "نجحت ا يما افرحيلي اونفا نجحت سايي "
رحمة: زيرتها بتعنيقة قوية: مبروك مبروك اكبدي الف مبروك نجاحك دوام فرحك نشاء الله
عالمنظر أذاك تزعزعو لحاضرين ولبنات طلقو حلوقهم يزغرتو ويعاودو لكبار يباركو ملبعد خلاوها بين امها واختها متناوبين يحضنو يمحشو ويباركو.. سخفو خليل فات قدامهم وبخفة خطفها منهم نوضها ترمات حضنتو طايرة مالفرحة.. زيرها بتعنيقة حميمية يبارك ويسلم على راسها بمعزة
خليل: نجحتي نجحتيلي ا صغرونة نجحتي نزيد نفتخر بيك كثر
آية: حمد الله ولفضل ليك ليكم كل بعد ربي سبحانو هههه
رحمة: سعدي بيك رفعتيلي راسي
أمنية: وديما ترفيعلنا روسنا نشاء الله
الكل: نشاء الله
توافدو بالدالة يباركو يهنؤوها بفرحة يخطفو فيها خطيف.. طبست لسهام عنقتها باركت ودعاتها بدوام النجاح مالقلب.. زادت لسلوى لاتصنع لامبالغة دارت الصواب فقط.. جروها لبنات مهى وهاجر عنقوها مالجهتين ينكزو يضحكو محيحين مشاركينها فرحتها
رحمة: شادة فخليل: ولدي ياك مأكد
خليل: بيانسير وهذي فيها تمسخير
سهام: ياك قالنا شافها بذات نفسي
الكاملة: وين وكيفاه شفتيها؟!
خليل: عند واحد معريفة خوه فلاكاديمي شافلي روحت ديراكت لليسي تأكد مالمدير وجيت بشرتكم
رحمة: يكثر خيرهم وخيرك سامحنا جريناك فلقوايل
خليل: حاشا.. وبلا مزية درت واجبي
أمنية: لا ماجراش على مرتو على من يجري ربي يغفرلك ا يماا.. ضحكو كل
سلوى: ماقلتيلناش بڨداه داتو
خليل: مهم داتو مايهمش بڨداه
آية: سي يهم يهم بزااف.. شحال جبتو شحال
مروة: تحل السييت
مهى: مام عندي.. دقيقة نشوفو ونقولولك
مهى مروة هاجر بتليفونات دخلو معلوماتها وعاودو معافرين مع الضغط عالنات الناس كل تضرب طلة تفقد المترشحين من قريب او بعيد.. آية وسطهم من تليفون لتليفون تحشي راسها تفقد وخليل يجبد فيها يكرر
خليل:"نجحتي هذا لمفيد افرحي اسح لمعدل مش هارب"
أمنية: وسوسها جبدتو ليها: يخي داتو؟!
خليل: اييه داتو واش ماكمش مأمنيني ؟!
أمنية: لا حاشا.. شفتك مكش.. تخالي: بڨداه داتو؟!
خليل: هنا لمندبة.. مش حابها تعرف درك.. اوموا تفرح زي الناس كل ومنبعد تعرف لمعدل
أمنية: شحقت: ماتقولش طايح؟!
هبط عينيه بأسف رعبها كثر خافت على ختها جرات تنوضها آية تعوجت ولصقت فبلاصتها ملهوفة تشوف معدلها..رغاو لبنات فرد وقت خرجتلهم النتيجة
مروة: ناجحة الف مبروك
هاجر: بتقدير جيد
مهى: جبتيه ب 14,80 ا حبيبة.. الف مبروك
آية: بصدمة: 14,80 بررك ؟!
خطفت تليفون تقرا وتعاود.. لبنات حماوها بالزغاريت الكبار يهنؤو رحمة يكبرو ويهللو.. ما آية يبست هكاك بالتليفون..تشوف ومكذبة عينيها.. تقرا ومش مصدقة وش خرجلها.. 14,80!! عدد ب4 شيفرات وفاصلة.. كان حد لفرحتها.. وزعزعة لنفسيتها.. أحلامها طارو أمنياتها تشتتو.. مجرد رقم وضع نهاية لتطلعات مستقبلها.. رقم كان حطامها.. بدات ترجف مخها يزنزن زيرت تليفون تنهج تنهج وطلقت رغية من اعماقها رغية ألم خسران والتحطم للا شي.. هولتهم بيها قصو هرج مصدومين فيها.. هزتها بالبكاء تغرد بالصوت
آية: ماتفرحوليش ماتزغتوش مانجحتش ماديتوش ب14 ماديتوش مانتساماش ديتو 14ماتسوى والو ماهيش خدمتي ا ربي سيدي
أمنية عافرت تشدها تنطرت منها تعرش
آية: بعدي مني بعددي قيلي ماتقيسنيش خليوني نندب على تعب عام كاامل فلخر 14.. 14 !! لعذاب لي تعذبتو لعفار السهر فلخر 14!!
خليل: جرا شدها ملور: 15 مش 14 ماتقلقيش روحك بالارقام
رحمة: قربتلها تركح: 14 اكثر او أقل مايهمش مهم ديتيه نجحتي وتعبك ماراحش باطل
آية: كيفاه ماراحش كيفاه14 ماندير بيها والو.. ضاع الميدسين ضاعت حياتي بززمررر 14
هزتها بشحيق والتفركيس قربو لبقية يعاونو خليل يشدها.. بعدتهم جاعرة دزت مهى شعرة وطاحت على سلوى.. عفست مروة وخبشت هاجر.. مجننة مش واعية قريب ضربت أمنية لكرشها.. رغااو كامل ورحمة بقلب يبكي دم خبات أمنية وراها وتلاحت لأية شدتها يديها وهاجر بدموع طبست لمتلها رجليها.. وتخلطت لحالة بنواح آية تصرعت وسطهم سهام زيرت امنية تغرد بالصوت..لكاملة تغوث يجيبو لينة.. خليل وحدو حاكمها من جذعها ومسبق بيدو بين سنيها لا بالهيجة ذيك تعض لسانها وتموت وسطهم.. من فرحة لغمة ولاو فندابات.. لخبر وصل للينة جات تجري وراها ممرضة ملحڨتلها بقية اللوزام.. خليل برك آية فلرض مفيكسيهالهم قامو باللازم اسعفوها دقائق ترخفت فحضنو لافضة اخر شحقاتها بغصة قبل ماتغيب عالوعي.. هزها خليل كاره لحالة لي ولات فيها طلعها لعرفتهم ولبقية يجرجرو وراه.. حطها فبلاصتها ركبلها سيروم ولينة تولات رحمة وامنية قاصتلهم
لينة: حبسي بكاء وساعفي روحك ا خالتي طلعتي ضغطك.. مام نتي ا صاحبتي لا بقيتي هك نمدلك دواء وماتقدريش ترضعي ولادك
أمنية: محضنة أمها: ماشفتيش حالتها ختي لمسكينة حتى لفرحة ماكملتهاش
(فرحة تدي لباك فرحة وفرحة تديه كيما متمني وتاعب فرحة مضاعفة 🥺 وياما نجحو بصح مافرحو ماحسو انهم داوه صح.. لمعدل يفرق عند لي تعب وقرا وكان رافع طموحاتو بزاف💔)
★★★★★★
لكاملة: كيتي صغيورة مش تالهيجة ذيك ستر ربي لحقتوها ما أذاتش روحها
خليل: هذا علاه حرقت الطريق نوصل قبل ماتشوف لمعدل ونتهول صرا لي خفت منو
رحمة: كبدت بكات سالو عينيها لاه عطاوها 14 عام كلو تجبد فلخر تلقاها 14
هاجر: ماتقوليش هك 14 بفاصلة قريب 15 حاجة مليحة.. كاين لي مداوهش مساكن
سهام: ايييه شوفو لوجه ربي حبسو بكاء به كي تنوض تشجعوها مش تزيدو تغبنوها كثر
مروة: عندك لحق.. يززيو مالبكاء مايفيد بوالو
سلوى: لا مكبرينها ا حفيظ تقول خلات.. 14 ولا أي رقم مهم نجحت بكاااو ما نوحتو على راسها
الكاملة: نخزتها: اشش بلاما تحرحريهم كثر
مهى: تماصي فذراعها: مافهمتش علاه هاجت نورمالمون تحمد ربي راه قريب 15.. غيرها يتمناو يلحقو لمعدل هذا
سلوى: شفتي هذوك الناس لي تحمد ربي وو
خليل: قاطعها معصب: مش وقت تنوض هرج خلاف عند راسها وهي مريضة فحالة.. أشر للباب: ساسعونا على وجه ربي
وحدة مازادت حرف ناضو بلوحدة خارجين لكاملة ساقت رحمة.. لينة ومروة خرجو امنية بالعفار.. ثواني فرغت البيت قفل لباب ملفتاح وزاد للدوش دوش بلخف وخرج بشورط ديراكت للسرير تمد حذاها قلبو مزعزع لحالها ذاك مسحلها آخر أثر للدموع.. وبقى حاضيها مرة يفقد السيروم مرة يديرلها كمادة لين فض السيروم فصلو من ذراعها.. جبدها ليه رڨدها فحضنو وغاس يدي غمضة معاها
لتحت.. لخبر انتشر بين العيلتين التليفونات ماسكتتش عيطو يفقدو حوالهم ها لي بارك لرحمة ها لي وصى امنية تشد حليها تحظي امها واختها.. حورية زهرة وشهد ماصبروش جاو وصلوهم.. تلمو فالصالون والرجال بقاو برا مع اسد شاهين وأمان لي مازال مش مأمن
أمان: خاوتي منكم صح تهولت على معدل14!
أسد: هلا حنا نتملعبو هنا.. ماحكاولكش طفلة فحالة فغرفتها وانت مازلت حاير
أمان: بأسى: ربي يشفيها.. ويقنعها بيه
شاهين: كاتبة تديه بهكاك.. ماعندهاش ماندير
حسام: تصبر وفرات.. خليل مابانش
أسد: بقى حاضيها.. خاف تفيق كشما دير
جاد: بحيرة: للدرجة مقلقة من معدلها
أسد: فوق ماتتخيلو
جاسر: من حقها.. كون مش عارفة روحها تعبت وجاهدت تجيبو كثر ماتزعفش هك
أمان: حالها صعيب.. دعولها بالصبر
لكل: آميين
عند النساء.. رحمة معصبة بزوز خيمارات وجهها صفر حالتها حالة وغير الدمعة عالشافر.. قاعدة بين أمها وخالتها يصبرو فيها
حورية: توكلي على ربي وادعي لبنتك تشفى وتفوت لخلعة ذي
زهرة: وبركااي مابكيتي تمرضي وانت مكش ناقصة
سهام: من قبيل لا سكتت.. شوفو معاها بلاك تسمع منكم
لكاملة: طابو قلوبنا معاهم ديرو حل مادامكم هنا خففو عليهم اموا تفيق الصغيرة نتعاونو نسيوها
لكبار تولاو رحمة وسلوى غير تبحلق ناشطة بالاكشن تقول تتفرج فدراما جديدة.. لبنات مساميات فالفوتايات تولاو أمنية
مروة: زيماه حاسة روحك درك؟
هاجر: صافا شوي ؟
أمنية: كيفاه نكون صافا ويما وختي فحالة
شهد: ماتقوليش هك تسمع يماك تبكي كثر.. تقواي شوي ا حبيبة به تصبريهم
مروة: قلناهالها.. تغفلي عليها تلقايها تبكي بالساكت
شهد: درعتها تمسح دموعها: اشش حبسي بكاء.. وصبري ميمتك ماتشوف غير ليكم
أمنية: وماعندنا غير هي
هاجر: وخوك وينو ؟ ماشفتوش ملي رجع مع أسد وشاهين عرفو وش صرا
أمنية: مانعرف كان هنا.. تهمزت منعوها لبنات وشهد وقفت تقلب عليه فلخرجة عارضها أمان داخل سقساتو قالها داه مراد يدورو بيه بلوطو.. رجعت طمنتهم ما هاجر شدتها اللقوة تحرقت فبلاصتها غير من سماع اسمو
(جماعة نتمنى ماتشوفوش نتيجة لباك بزاوية ضيقة.. قلت لفوق كنت قادرة نخلطها ماتديهش تتهور ونقلبها تراجيديا.. خيرت اوسط لأمور داتو مي مش كيما حبت لأنها ماخدمت فالتعڨاب وزيد مشهد واقعي لبزاف مترشحين تحطمو ملڨري داوه.. ويبقى طعم وفرحة النجاح يتبدل عند كل بنادم كيفاه يتفاعل معاه 🥺💔)
★★★★★★
دخل لغرفتهم بحكم مالقاهاش مجمعة معاهم فالصالون توقع تكون تم.. شوي لقى البيت خاوية تلفت خارج منين سمع حس مالدروش راح ليه لباب محلول دزو ودخل فلمس انفوا هزت راسها لقاتو فوجهها شحقت ورجعت لور لااراديا زلڨت فماء سايح رغات وحبجت تشد فأي حاجة.. تقاص مرفقها فلافابو رغات للمرة الثانية وقبل ماتتقلب جبدها من ذراعها بقوة جابها مسندة عليه.. نهجت ترجف بكلها.. شد وجهها يفقد مخلوع
أمان: لباس؟! ماتضريتيش من كاش بلاصة
مهى: لا.. ستر ربي
أمان: تولهي منا وجاي
مهى: ماتدهش عليا هك تخلعني ما يصرالي والو
أمان: دخلت بشوي ماقصدتش نخلعك
مهى: اممم فات على خير
امان: حمد الله ماطحتيش.. وش كنت ديري
مهى: شي.. بردت روحي
أمان: توله من ذراعها مداوي: شبيك منا؟؟
مهى: شي.. احمم.. جيت تدوش دقيقة نوجدلك الحوايج
تسحبت خرجت تهرول للدريسنڨ جبدتلو قش.. لحقها لفتها ليه موسوس
أمان: شبيه ذراعك جاوبي
مهى: خبطتو فطابلة لتحت
أمان: وقتاه؟ صباح كنت لباس
مهى: بتعلثم: صراتلي قبيل شوي.. مش حاجة بلاما تكبرها وازرب دوش جهدك للفطور
أمان: مازال لحال.. امشي قدامي نهبطك للطبيبة لتحت تصوانيك.. لمح مرفقها: وتغطيك منا ببونصمون
مهى: غرغرو عينيها: ماتخافش مايوجعوش فيا
أمان: ماتكابريش نعرفك سونسيبل
حاوط حزامها وزادو متناقشين منين رفضت تنزل خلاها براحتها وضمدها ذراعها بنفسو
فات لوقت لحق لفطور.. حورية زهرة جاد وجاسر روحو.. لبقية دارو بطاولة وحدة به يفطرو.. لحقت لكاملة آخر وحدة قبل الآذان
سهام: جيتي وحدك ما ناضوش؟!
الكاملة: سي فاق خليل برك.. ماهوش نازل قال مافيهش مايفطر
سهام: صايم ا وخذي مايفطرش؟! لاه جيتي بلا بيه.. سخرت بكرسيها: نروح نجيبو ما
الكاملة: قاطعتها: رتاحي درتلو خاطرو بعثتلو فطورو لفوق
رحمة: وبنتي؟ مافقتش شفتيها ولالا؟!
الكاملة: شفتها راقدة زي الآمانة.. خليها تشبع نوم منين تفيق ندورو بيها نرضيوها تفطر
بسماع الآذان حكمت بلاصتها خشعو حتى كمل قراو الدعاء ورحبت بالكل تشهي يفطرو
لغالبية ياكلو سدان جوع الصوم فقط.. رحمة وأمنية ينقبو بالهم مرفوع عند آية.. تولاتهم لكاملة بكلمات مطمنة مواسية.. وأسد حذاه أمنية يهز ويحطلها يشهي بلاما يسمع لكل
أسد: كولي
أمنية: هاني ناكل بشوية
أسد: شمن شوية.. كولي بزااف تدي شبعتك
أمنية: بجهدي.. ما حلاتلي حتى ماكلة
أسد: ها اللحم.. الحلو.. ياك تحبي طاجين حلو.. زيدي السلاطة ونقري من ومن تشبعي
أمنية: مُصِر توكلني
أسد: اممم.. لصحتك.. ماتنسايش عندك ولاد يرضعو منك.. بلا ماكلة ماديري حليب ماترضعي
أمنية: فيا حليب صافا ليوم ماتخافش
أسد: مابياش عليهم.. نهدر عليك ماترضعيش يتصبرو بحليب لولاد.. لمشكلة لا كثرو منو يوالفوه وينفرو صدرك.. نسوفريو كل ساعتها
أمنية: بخوف: بربي مانوصلوش ليها.. ولادي ماينفرونيش لا محال.. رح ناكل هاه
رجعت تاكل بنظام حريصة تسد حاجة ولادها خزرلها للحظات مزير المغرفة والفرشيطة ندم لي قنعها بالشكل اذاك وخلعها.. فلمس ربت على يدها خزرتلو تالفة تبسملها هامس
أسد: بصحتك كولي بالهناء والشفاء
أمنية: يسلمو وانت زادة
تبسمتلو وكملت ماكلة بشهية خير من قبل
لكاملة ماعجبهاش لجو هادي حد لكآبة رحبت بضيافها شهات مراد كبرت بشهد وحسام..مهم تهدر تنطق فالكل به تخرجهم مالجو هذاك
شمن جو!! هم وحدهم مغمومين.. عكس مراد كلا بالكانة ليه شحال من يوم ملي رجع لدارو يفطر وحدو او فكاش مطعم.. لفطور هذاك جاه عسل على قلبو.. مع طاح مقابل هاجر ياكل ويخزرلها لتحت لتحت.. كشفتو ذات مومنت حشمت حمارت وتلفتلها كيفاه تاكل ولات تنقب فصحنها تنقر برك.. لمحتها ختها نخزتها تحت الطابلة تهمس
مروة: شبيك؟!
هاجر: والو
مروة: كولي بركاي ماللعب فالصحن عيب قداهم يحسبو لماكلة ماعجبتكش
هاجر: ننن عجبتني بنينة تسخف
مروة: كولي مالا
هاجر: بالي عند آية.. نوض نفقدها لافاقت نفطر معاها خير
مروة: ترررصي.. وين نايحة راجلها معاها
هاجر: عضت شفتها: صح شومي نسيتو خلاه
مروة قلبت عينيها منها وكملت تاكل.. فحين تلفتت هي قابلها مراد عض شفتو.. صدمها حلت عينيها تاقة تبسم شطر وغمزها.. قلبها ضرب فالمية وتزنكو خدودها زربت هبطت راسها لصحنها تاكل تالفة محرجة ومازادتش هزت راسها خافت يديرلها جاست مقودة كثر
★★★★★★
فات الفطور وبعدو صلاة العشاء.. فاقت آية مرهوجة عينيها بسيف يتحلو.. رمشت تثبت هي وين لقات روحها فغرفتها.. مع تلفتت كورون قوي ضرب راسها.. أننت متوجعها سمعها خليل كان يحل فالبوفتاي جاها يجري قعد حذاها وشدلها وجهها
خليل: صحة النوم.. صافا؟!
آية: ببحة ريڨها ناشف: شششووية
خليل: بشوي تولي أحسن
آية: تولهت مالليل مخيم: وش صرا؟ شحال ليا راقدة هنا؟!
خليل: مش بزااف
آية: كيفاه مش بزاف مافطرتش وو.. تعداو صور وش صرا بين عينيها بدات ترجف: ليوم خرج لباك ياك؟
ماجاوبهاش جبدها ليه حط راسها على صدرو زادت رجفتها كثر وسألتو بغصة
آية: ديتو.. ديك الباك يخي؟
خليل: اممم.. ديتيه
آية: ب14 برك؟! دور راسو معصب لفتتو ليها: جاوبني
خليل: مايهمش مهم جبتوه ا بنتي
آية:تنطرت تبكي: ماتقوليش بنتي ماتقولهاش بابا وحدو لي يقولها.. بابا لي فنى عمرو يشقى علينا به نقراو وننجحو.. بابا لي شحف يوصي فيها ويعاود اقراو اضمنو مستقبلكم انجحو وكونو أطباء أرفعولي راسي.. بابا مات راح وخلانا يتامى ويما باركة علينا تنحيها من فمها وتوكلهالنا غير به نكبرو نقراو وننجحو
خليل: شد كتافها: وهاك نجحتي نجححتي بركااي ماتشائمتي
آية: تشاؤم !! نقولك طبيبة حلم بابا نكون طبيبة تقولي مهم نجحتي!! وش فايدة نجاح بلا امتياز.. وش فايدة 14 ماتلحقنيش للطب
خليل: ياك قريتي درت جهدك مالحقتيلوش هذا ماعطاك ربي رح تجهلي ا ديين رررربي
آية: ماجهلتش.. ندبت على زهري لمسود على تعبي.. عام كلو نجبد نجبد فلخر مانلحقش للميدسين.. علاه وش ذنبي درت فوق جهدي ياك شفتوني وشهدتو عليا كاااامل
خليل: ماهوش بيدك ماهووش ربي كتبلك تديه بهك.. لحقتي للميديسين ولالا ماهيش لافان دي مووند خيرها فغيرها وربي يعوضك بما خير منو.. رضاي بقسم ربي ويززي مالمتي روحك.. يزززي
تفلقت بالبكاء تنوح بصوت يقسم لقلب لزها لصدرو يطبطب ويواسي كشما تصبر.. شي كلما تتفكر حلمها لي مش رح يتحقق بلمعدل هذاك تتفسخ بلبكاء كثر.. تنخصصت شحقت غردت حتى بردت قلبها وغلبت ترخات بين يديه جهامة بلا روح ساهية فالفراغ.. هدنت حسبها رقدت طل لقاها هكاك تعصب وكره راسو هزها للدوش حطها فالبانيو وحل لماء دافي.. رجفت راجعة لوعيها خزرتلو دمعتها عالشافر طبسلها
خليل: مانبقاش نتفرج عليك ونتي تضيعي روحك بالنفسية ذي.. ندوشك ونجيبلك تاكلي وبعدها نهدرو فرغيلي قلبك
ماجاوبتوش هبطت راسها زفر منافري وراح جاب برودويات الدوش حطهم عالرخامة.. نحالها قشها وقشو بقى بالبوكسار دخل وراها وبدا يدوشها تقول بنتو
فالصالون.. النساء كل مجمع لاهيين بحديث خاص.. مهى وشهد مساميات يوتوتو
مهى: حسام ماعيطتلكش.. واش بايتين؟!
شهد: مانعرف.. ماهدرناش عالمبات فالدار
مهى: حتى تهدرو الافونص؟! باتو وفرات
شهد: لقرار مش ليا.. نسقسيه ونشوف
مهى: وش فيها كي نباتو.. داركم لاه نسقسيه زعما رح يعارض؟! نشك.. ضيقت عينيها: ماتكونيش نتي لي حابة تروحي عندكم أفيير الليلة
شهد: حشمت: ما أفيير ماوالو هههه.. هو لي مايحبش يبات فدار خلاف غير دارو
مهى: يروح ويخليك.. نباتو ساهرين نتوانسو كيما بكري.. توحشت نقرعجو لبعد نص الليل
شهد: تأنا.. مي نخاف يجري ورايا خويا كي نفكك منو يبات شايح هههه
مهى: غطات فمها تضحك: يديرها نتوقع منو كلش هههه
دخلت خدامة قصت توانيس لكل.. مرجعة خبر للكاملة بعثتها تفقد آية لا فاقت
خدامة: فاقت سايي ا لالة من شوي طلعنالها لعشاء
رحمة: بلهفة: بنتي فاقت ؟؟
خدامة: اييه ا مدام
رحمة مااستناتش خرجت تهرول طالعة ليها.. لكاملة صرفت لخدامة وناضت لبقية وراها طلعو لآية.. دخلو مزاحمين رحمة وأمنية جراولها لولين..
★★★★★★
ساماوها مالجهتين بعدما ناض خليل خلالهم لمجال.. رحمة خضنتها وأمنية مسحلها وجهها تبوس خدودها وراسها
أمنية: تكالميتي شوية ؟
رحمة: زيماه حاسة روحك ا بنتي؟!
خليل: شافها تحشات فيها كثر جاوب بدالها: خير من قبيل اطمني ا خالتي اطمنو كامل
الكاملة: حمد الله
سهام: سلاماك ا بنتك.. ماتعذبيش روحك ونساي لي فات
تحشات شهد بينهم حضنتها باستها تصبر
شهد: حمد الله على سلامتك.. ومبروك نجاحك عيشي فرحتك ا حبيبة وطيشي كلشي ورا ظهرك.. هممم
طبطبت عليها وسخر خلات لمجال لهاجر بركت قفازي قدامها وحضنتها بقوة تخالي وتواسي.. منظرهم رقق قلوب لحاضرين ما رحمة وامنية طاحو دموعهم زربو مسحوهم ومروة فرقتهم تحنات طيبت خاطرها.. كلمة على كلمة دارو جهدهم وهي غير ساكتة تخزر وفرات.. ماقدرت تهدر ماتتفاعل معاهم
لكاملة: كولي ا بنتي حظي راسك والبقاي خليه على ربي
رحمة: فوضي أمرك ليه يجبر بخاطرك
لكل: آمييين
خليل بشوفة مالكاملة فهمتو حمحمت مشيرة للبقية فهمو روسهم انسحبو خرجو.. بقات أمها واختها مع هاجر يشهيو ويوكلو ماتهناو حتى وكلوها وبقاو مونسينها يطيبو خاطرها
لتحت.. قعدو النساء بنفسية مرتاحة بعدما طمنو عليها.. حتى حرحرتهم سلوى بكلامها
سلوى: حالة فيهم بنات آخر زمان.. ماڨدهم لا عالزواج لا عالقراية.. كون ركزت فقرايتها وأجلها عرسها للصيف كون داتو بڨد ماحبت.. تحملت تعرس جابتها فراسها
سهام: وش دخل زواج وعرس فما كتبلها ربي ؟!
لكاملة: عجلتو ولا أجلتو.. قسم ربي وداتو بمعدل هذا
سلوى: بيناتنا برك.. كون قرات كثر تلقى كثر.. هانتم تشوفو جرات عالباك بزوز رجلين ( راجل) وفرطت فباك الصح حتى خابت درك
سهام: نتي تبداي بالهدرة لعوجة.. ومخي يتڨلب.. ماعندك كلمة حلوة ماتهدريش تزيدي عالبنت
سلوى: ماتسكتينيش.. حررة نهدر وش نحب وقت نحب وين مانحبب.. سمممعتي
لكاملة عرفتهم رح يتعاركو تدخلت تسكتتهم مارضاوش بقاو يتغالاو حتى رعدت عليهم وقصت السوجي مهدنة لوضع.. مروة معاهم هبطت راسها حشمانة بحال الدخيلة ندمت كي نزلت كون غير تبعت ختها وبقات لفوق.. مهى وشهد غاطسين فحديث خاص
شهد: جاتك ليغاڨل ولا ماركالك خويا
مهى: نننن مازال ماجاتش.. اسكتي اني حاكمة قلبي خايفة يكون دارها بيا
شهد: لاه خايفة ؟! هاربة معاه ولا درتوها بالدرڨة.. راجلك وبتتو ليالي حمرة سي نورمال تحملي شبيك.. حاشمة؟!
مهى:شمن حشمة نقولك خايفة تقول حشمة.. مانحبش نتزرب نحمل بكري هك كي غير تزوجنا.. ونتي جاتك ولا نزغرتلك الافونص هههه
شهد: جات وراحت سايي بلا شوهة هههه
مهى: دوماج وأنا تحمست نزغرت هههه
شهد: ياك روبلوتها فلعشية مابردتيش قلبك فالزغاريت
مهى: ننن مازال.. وتروبلت صح برياكسيون تاع آية.. الشوفة مابقى زغاريت مانفرحو
شهد: تشووكات مسكينة.. منا لغدوة تترخف ونفسيتها ترتاح وترجع تفرح نفرحو معاها
مهى: مست ذراعها: نشاء الله
شهد: ذراعك مازال يوجع؟!
مهى: مكمدة وجعها: شوية
شهد: تفقدتو بعطف: وخذي مغطيتو هك سير يوجع.. الدزة جاتك قوية مالا
مهى: اممم تخبطت فطابلة.. وقبيل فلافابو
شهد: وخذي.. بالشفاء حبيبة نشاء الله يرتاح بلخف
مهى: آميين
لكاملة: فهمتهم ملبعد: بنتي ذراعك مقسحك بزاف ؟
مهى: دمعو عينيها: شوي ا ماني
لكاملة: وخذي عليك.. امسحيها فينا ا بنتي.. حضرتي وشوفتي حالة لمغبونة ماكانتش فوعييها ماقصدتش تضرك
مهى: علابالي.. عاذرتها
سلوى: بلؤم: ايييه فوتيلها فوتي مرة بلا قصد الجاية تقصد ودير فيك لفاتكة
لكاملة: ماتشعليش النيران ا سلوى
سلوى: مسكم سلوى سلوى.. ماتحبوش كلمة لحق.. وتحبو تكبرو لأمور مليار ضرطة تقلبوها قنبلة.. مالكم غير هي تشوكات من معدلها ؟! غيرها حامد ربو وقانع وهي تهولت تضرب ودز .. ماخلات سلفتها ماخلات ضياف.. عيييب علييها عييييب
لكاملة: سلوووووى
★★★★★★
عطاتها شوفات قتالة سكتتها.. وناضت لمهى
لكاملة: نوضي نديك للطبيبة تفحص ذراعك
مهى: شافتو قبيل قالتلي لباس مرسي ا ماني
لكاملة: الله لا يكثر خير.. خوذي الراي ونوضي مانتهنى حتى نسمع بوذاني
نوضتها وجاو خارجين لقاو امان فلباب كابس وجهو.. عرفوه لحق وسمع لهدرة.. تنهدت لكاملة وداتهالو تحكي برزانة
لكاملة: مادير حتى شي فبالك.. صرا خير لبنات داكور ومرت عمك كي عادتها
أمان: قاطعها: لدرك مانطقت ماقلت كلمة خليني ساكت.. درع مهى: امشي نديك للسبيطار
مهى: تخلعت: لاه السبيطار.. لينة هنا و
أمان: ديري سكانار ساعتها نطمن عليك
جرها وخرج مكمد غشو.. جاراتو بسيف تلحق خطوات لكبار وفداخلها عجبها اهتمامو ومام جاست لكاملة اكدتلها انها عندها بلاصة بينهم وماهيش حاڨرتها كيما تفتن سلوى.. ركبو فلوطو وديمارا مجهد
أمان: علاه خبيتي عليا؟!
مهى: بتلعثم: ماخبيتش ق.ققلل
أمان: سي خبيتي والصح كذبتي.. دزتك مرت خويا دارت بدعة فذراعك ولفقتيها تخبطتي فطابلة ما طاابلة !!
مهى: ماكذبتش تخبطت صح فالطابلة
أمان: بصح ماقلتيش دزززتك.. علاه دززك شكون سمحلها تدير فيك هك
مهى: ماكانتش فوعييها.. لمخلوقة تشوكات من معدلها تهولت هاجت علينا كامل ووو
بلعت ريقها وحكاتلو كلش مجبرة مصيرو يعرف وها هو عرف.. ماحكاتلوش قاسة لبلاء ومنها مايفهماش غالط.. بويسك من واقعة اختها ولا يعلق على هدرتها يقولها بركاي مالحساسية الزايدة وتهوال الأمور خليك رزينة وماتشديش فقلبك تكرهي لي دايرين بيك ومن وقتها خذات بنصيحتو به تقدر تتأقلم تعيش معاه هانية ومعاهم مرتاحة
لبنات عيات أمهم تعيط تفقدهم مروة هاملة تليفونها مركزة مع أمنية وشهد.. عكس هاجر مع قاست تليفون خلعتها آپال من أمها.. ردت بزربة اول ما غواثت عليها انسحبت مالنساء خرجت تهرول لبرا وقفت فالفيراندا حكاو وسمعت مالا يرضيها امها معصبة كي قعدو فطرو.. اضطرت تحكيلها حال آية مع قالتلها لكاملة حكمتهم يباتو رفضت حكمت السماء وصبت غضبها كلو فيها.. هاجر عيات تركح وتطرب معاها حتى قنعتها فلخر أمها وصاتها يحظيو روسهم وصباح يبكرو يروحو.. كوپات عليها متنهدة من عروش قلبها آخير لهدووء.. وصلها ميساج من يارا توشحل عليه رجعتلها وقلبوها ميساجات.. عيات ملوقفة مشات مهبطة راسها ماشايفة شي لجليسة تم قعدت مدية راحتها تقرعج.. مافاقتش حتى نطق مالفوتاي مقابلها
مراد: مع من تحكي حتى متبسمة هك
هاجر: تنفضت مخلوعة: بسم الله الرحمن الرحيم.. اعوذ بالله منك لا كنتِ جن
مراد: اِنس اِنس ربي يجيرنا منهم
هاجر: آميين.. وش دير هنا ؟
مراد: نفرز اموري بالتليفون.. انت لي وش ديري تم.. حبج مع من تهدري وتضحكي؟!
هاجر: غطات التليفون فصدرها: حاجة ماتخصكش.. باغدوون
مراد: مع تهمزت زايدة بلوكاها برجلو: اقعدي نهدرو كلمتين شبيك مرحوولة
هاجر: مانيش مرحولة وماعنديش هدرة معاك
مراد: انا عندي اقعدي تسمعيني
هاجر: مش بسيف.. نحي رجلك نفوت
مراد: بطنز: فجرابك نحي رجلي.. كملت عليا شكون تقبل تديني برجل ناقصة
هاجر: بعيد الشر.. ماقصدتش نفالي عليك
مراد: زيدي رضيني شوي
هاجر: ديتيها فروحك واقيلا
مراد: تبسم شطر: بزااف ارجعي اقعدي برك
هاجر: قعدت تنفخ: هانا قعدنا.. خير وش حاب تهدر ازرع ينبت
مراد: مع من كنت تضحكي اسح
هاجر: بنرفزة: مع اختك مع من فرأاايك
مراد: تأنا قلت سير مع ختي.. شكون فيهم اسح ؟!
هاجر: يوووه انت فارغ شغل تقرعج وانا ماعنديش معاك.. نوض احسن مايشوف حد ويفهمنا غاالط
مراد: الغلط هو هروبك مني ا بنت الناس من ديك الليلة هازة روحك تحسب شو واش درتلك ولا غلطت فيك.. ياك مابيننا غير لخير
هاجر: حشمها حمارت: اممم.. مي ماهزيتش روحي.. مش حابة نهدرو بلا سبة
مراد: نلقاو السبة ونديرو بيها علااه لا
هاجر: ببلاهة: نعم !!!
مراد: كيما صورلك مخك.. شوفي مادام ركحتي نپروفيتِ لوكازيون نفهمك.. شفتك وتلاقيت بعيلتك.. وتجمعنا شحال من مرة.. انتيريتيني لا قابلة نتعرفو على بعض ماتدري بالاك نكونو مكتبيين لبعضانا
هاجر: صدمها حلت فمها وعينيها طاقة: واشياااا ؟!!
جا يجاوبها عينو لمح جهامة تطل عليهم مالبوغتاي سرق شوفة سريعة ودقيقة عرف شكون.. تبسم شطر وكمل هدرتو محشم هاجر ماقدرتش تنطق بحرف.. عملها بالعاني داير البوووز للظل لي حاظيهم ورشقتلو يدوخهم لزوز.. من هاجر شدتها اللقوة ما ردت ما تزعزعت بقات غير تتغوصر.. فحين الجهامة ذيك انسحبت لداخل فالظلام كيفما جات راحت
★★★★★★
رجعت لكاملة على وراها متبسمة للوذنين بعدما شافتهم وسمعت حفيدها.. عجبها لحال وفرحت قالت فينالمون بدا يركح ويخمم فالزواج.. عملت خطوات وحبست تحكي مع روحها الفرحة تلفتلها عقلها بدات تخمملهم لبعيد
الكاملة: سعدي بولد الحبيب هاهو هداه ربي آخير وقرر يتزوج يدير الدار.. لا ولبنت عارفينها مننا وفينا.. خيار يدي وبربي مايغيبش.. لبنت مسرارة مفروحة توالمو سوا سوا.. هم الزوز فولة وتقسمت ماتليق ليه غير هي.. يا فرحتي بسيف شافها وحلات فعينيه.. بقى جوابها ونشاء الله تكون فايقة وتقول "ايه نتعارفو" ولدي فحل ولا سيبتو تكون سيبت سيد الرجال.. ننن ماتسيبوش ماديرهاش ماكانش بنت عاقلة ديرها وترفض ملول ولدي مقدود فحل بخدمتو ميسور حالو لحمد الله ومسرار ماتتغبن ماتتظلم معاه.. نشاء الله خير نشاء الله.. واسعدي عن قريب نزوج حفيد خلاف نتهنى عليه مالتلوهيط وبنات لحرام.. نرجع نشوف وش دارو فيها؟! لا ماكلاه خليهم يتفاهمو وبربي فيها تاويل لخير واقيلا نبكر المرة بتواجد لعرسهم هههه
ضحكت مالقلب وكملت طريقها للصالون
لبرا.. هاجر بسيف خرجت من تأثير المفاجأة وقاطعتو
هاجر: حبس حبس.. اهدر بشوي ماسمعتش كلش ومالحقتش نفهم
مراد: وش ماسمعتيش.. قلتلك شفتك وشفتيني سوا بالصدفة او بالقدر تلاقينا عقليتنا متقاربة علاه مانتعرفوش كثر كاپابل نكملو مع بعض
هاجر: مافهمتش آخر بارت.. كيفاه نكملو مع بعض؟!
مراد: فميز رايك كيفاه؟! باينة زواج
هاجر: بصدمة: نتزوجو؟! أنا وياك !!
مراد: وي.. لا كتب المكتوب.. شبيك مشوكية واش راني نهدر ونفهم فيك من قبيل!!
هاجر: تفاجأت مش تشوكيت.. كيفاه مالسماء للرض جاي تحكي معانا فالزواج.. تحملت ولا عجبتك لقيتني مناسبة ليك؟!
مراد: لا فيغيتي.. الزواج ماكانش يدور فراسي.. ومن موفمون خطبات وعراس ولاد عمي.. مع هدرات فاميلتي بديت نخمم فيه.. مش كاستيون تحملت عليه كون عيني نزوج درتها من شحال مانبقاش لدرك
هاجر: قاطعتو: ولاه مادرتيهاش وش حكمك؟
مراد: نزوج مع راسي!! باينة ماطحتش فلي تستاهل نكمل معاها حياتي
هاجر: حتى جيت انا.. بنتلك نستاهل؟!
مراد: سقسي روحك تستاهلي ولالا وجاوبيني
هاجر: كيفاه نسقسي روحي بعدما هدرتيها دورت فكلمتك تتملعب بيااااا!!
مراد: كالم تواا.. وافهمي مليح قبل ماتتنارفاي كون ماشفتكش مقبولة بالنسبة علاه نعيي روحي بلهدرة معاك ؟!!
هاجر: كنا فنستاهل وليت مقبولة برك !! واش انت فايق بروحك وش تلبزز ولا داير مقلب فيا.. خزرت لجنابها: شكون لي يصور؟ حبسو بلا سماطة
مراد: شمن مقلب وتصوار.. نحكي سيريو بلا هبال ورويااات.. حلي مخك معانا نفهمو بعض هاجر: قولي علاه انا بالذات.. عجبتك؟
مراد: الاعجاب مش مقياس عندي آلاف لبنات عجبوني وماعقلتش لا هدرت مع وحدة منهم بجدية وفسوجي زواج
هاجر: تصدق دوخت معاك.. كلمة ناسبك؟ ماقلتيهاش.. نستاهلك؟ قلتيلي نسقسي روحي !! عجبتك قلت مش مقياس.. على أي أساس تحكي معايا فسوجي زواج فهمني!!
مراد: شكرولي فيك.. بنت حلال ومتربية.. شحال من نتلاقاو ماشفتش منك حاجة مش مليحة
هاجر: تحكي من نيتك ؟؟ هذو هو ردك !
مراد: ماعجبكش ؟
هاجر: بسخرية: وش بانلك ! بعقلك برك تزوج من وحدة شكروهالك الناس
مراد: قاطعها: عيلتي.. مش أي ناس
هاجر: هيه عيلتك.. عجبتهم مش شرط نعجبك ومادام ماقلتيهاش مانيش عاجبتك.. وتحكي على تربيتي وتصرفاتو وي حمد الله مربية من عند ربي ونعرف للصواب والقدر.. اما به تدي قرارك تكون معايا لأنهم دبرو عليك ولأني بنتلك ناس ملاح !! سيريو فيق وتفاهم مع روحك على معايير تخير بيهم الانسانة لي تبني عليها حياتك.. مش تدي اول وحدة تقابلك بعدما خدمتلك فكرة الزواج
★★★★★★
مراد: شكون قالك نتي اول وحدة ؟؟ لبنات عُراام ياما صادفوني ولدرك مازالو ماديهاش فروحك ثبت لرض شوي ا بنت الناس ماكلاه تلعبيها فاهمة وتلبزي فهدرتك
هاجر: حاشا عارفة قدر راسي.. ونصحتك مش نتفهم عليك بويسك من كلامك بنتلي مش راسي على بر
مراد: غلطانة فيا.. وعلى كل حال مرسي لكلامك.. ودرك وش نفهم من ردك نكملو ولا رافضة ملول ؟
رجع زربها بسؤال فلااش تلبكت وتبكشت ترمش تالفة.. عجبو حالها وسكاتها كون جات رافضة قالت لااا ملخر
مراد: شوفي هدرنا بزاف بالاك تخلطت عليك خممي بعقلك ونزيدو نهدرو مرة خلاف يخي!
ماردنش هربت عينيها نزلتهم وطلعت معاها حمورية توردو خدودها.. بلخف تبسم ولمها
مراد: غير قوليلي هذي.. زيماه نبانلك؟ واسكو نعجبك ولالا ؟!
هاجر: تنطرت ميتة بالحشمة: واقيلا عيطولي عن اذنك
مراد: حكمها قعدها يضحك: ماعيطوش ا الهرابة هههه اقعدي هههه
هاجر: ننن.. بعدلي نروح هدرنا بزاف و
مراد:نعجبك؟ نعجبكش؟! انطقي بوحدة منهم ريحيني ولا حرقيني
هاجر: غطات وجهها: يزززي بلييييز
مراد: نزللها يديها: هههه خلاص باصينا لكاستيون هذا.. نسقسيك غيرو تقدريلو.. وش حوال "بوسو شي سوسو" ؟
مع قالها ضحك وضحكها غطات فمها بلباقة وحشمة شي من الجملة شي منو.. ضحكو مالقلب وبتجاوبها معاه زاد خذا راحتو
مراد: رجعتو روحتو لتم وكليتو
هاجر: لا ماصحتلناش
مراد: دوماج.. بقى فبالي وماصحليش نضرب دورة تم
هاجر: تشقالو؟ أمپوسي وليلتها ماصدقتش نتلاقاوك تم
مراد: صدقي صدقي جيت وقعدنا تشاركنا فواش يبيع سوسو هههه ولا نسيتي
هاجر: مانسيتش هههه مرسي على السقايط هذووك
مراد: بصحتكم مش خسارة فيك.. عض شفتو مصحصح: فيكم
هاجر: بحشمة: سي خلصت بزاف ليلتها.. مكنتيش مضطر علاه كلفت راسك
مراد: خير ربي كاين حمد الله.. غير هك انا واحد مالناس مانخليش حاجة فقلبي.. قصدي تبانلي ناكل نلبس ندير حاجة نديرها بلا ضرب حساب للدورو.. الدراهم يجيو ويروحو.. وبنادم لا مادللش راسو شكون يدللو
كلامو دار طنن فدماغها ولااراديا تفكرت وش دارتلها يماها ليلتها.. وقبلها مرات بلا حساب شكات من فقرهم وقمعتها به ماتتماداش تبذر دراهم.. بلعت ريقها وجابتو بحسرة
هاجر: صح.. عندك حق فيها
مراد: كاين وكاين هدرت بصفة عامة برك.. خلينا مالهدرة ذي.. قوليلي عجبوك الشهيوات يخي؟
هاجر: بتبسيمة عريضة: بزااف جاو فوقتهم كانو فخاطري يسلمو ڨدما نشكرك مانوفيش
مراد: غمزها: اوفي بحاجة خلاف
هاجر: بحدة: واشييااا؟!
مراد: شي نهار عرضوني عندكم طيبيلي نتي لا شتى فنجان قهوة.. قابل مالقلب
هاجر: رجع حشمها: مرحبا الدار دارك
مراد: نشاء الله.. يكتب لمكتوب برك ويوم على يوم نهد عليكم ونشرط
هاجر: شدت ضحكتها: نشاء الله
مراد: ما قلتيليش وش تشفيرة الاسم
هاجر: ها !! شمن اسم ؟
مراد: غمزها: "بوسو شي سوسو "
هاجر: هذاك قصتو قصة هههه.. فلول بداو يبيعو بسبوسة وقلب لوز مقروط معسل تخدمهم مرأة لخوها يبيع.. بوسو للبسبوسة وسوسو لسلمى اسم لمرأة.. منبعد ماندري وش صرا دخل راجلها فلحكاية شارك خوها وكبروه ولاو يبيعو شهيوات بزاف.. وتشهرو باسم "بوسو شي سوسو" هههه مرة سمعت حبو يبدلوه لمرأة هاتجت على راجلها وخوها خذاتهم فلخر دارولنا غرضها وخلاوه هههه
مراد: جدودها واعرين ههههه
هاجر: قصدك جنونها هههه
مراد: سي كيف كيف هههه مهم بصحتهم لإسم جابلهم شهرة كبيرة.. وبصحتكم لماكلة.. غمزها: تنعاد ونذوقك منهم ومن غيرهم
★★★★★★
هاجر: نشاء الله.. احمم بطيت نوض خيرلي
مراد: مانسيتيش حاجة؟
هاجر: ها !!!
مراد: الفيس الانستا الواتساب.. بروفيلاتك به نبقاو على تواصل
هاجر: مُصِر ؟!
مراد: لا غير رفضت الحق يبقى عندك
شافها ماعارضتش خطف تليفونها يبربش يبعث ميساج من عندها ليه.. حيرطت خايفة يدخل لكاش جهة يلقى ميساج ولا فوطو مقودين تهزت لبلاصة حذاه عساسة محرجة من قربهم هذاك قلبها يضرب فالألف وبدنها كون ماشدت روحها قوة راو فضحها قدامو
انفوا كمل نطرتلو التليفون وجرات هاربة
مراد: استنااااي حبسي ا هراابة هههه
هاجر: ننن قيلي بلا فضااائح هههه
دخلت تجري مالباب للدوش فالطابق الارضي دخلت وقفلت لباب وراه.. مع تلفتت تقابلها صورتها فالمراية.. خدودها حمر وجهها ينطق مالحشمة والفرحة السر نازل عليها تقول عروسة فعرسها !! قلبها يدق بقوة حطت يدها فوقو متبسمة ببلاهة مع انعكاسها
هاجر: ياخاااه شحال زعزعني.. طحت فيه طحت ا ربي.. الزين والحلاوة مسرار مايعرف غير يضحك.. واماا خيتي ضحكتو فتاانة.. ضحك وشبعني ضحكني ههههه.. ناري قلبي رح يحبس واقيلا كراشيت فيه.. شمن كراش واقيلا صيدو هههه دجاجة بكمونها الزين كاين.. العقلية كاينة.. الخدمة كاينة.. الكوور يفتتتتق.. خرجت عينيها: تأكد منو ديك لمرة تعرينا قصدي دخل عليا فغرفة خواتو بصدرو عريان احححح على بلاكة الشوكولا احححح نديه ونتشوى بيه.. ولات تنكز: دييتو دييتو داني داني وبالقسم لا خليتو خلاني.. طاح فالشبكة يا دلالي هههه مزية استفدت من حكايات لبنات.. نية آية وفشوش مهى وبراءة شهد هاححح عجبتو طيحتو الراجل يلا مابقيتش باااايغة يا خواتشي ههههه
ضربها جن دورتها تصفق بصباعيها وتشطح كتافها طايرة بتطورها عاهي فينالمون رح تكون انكوپل مع واحد فاق أحلامها وآمالها
فات لوقت والسهرية فضت تفرقو كل لغرفهم يرقدو.. أمنية فبلاصتها رضعت أحمد آخر حد وبقات تدوح بيه.. أسد مجبد حذاها حاظيها بعينين معسلين مفتناتو بفورمتها فنويزات حمرة على بشرتها البيضاء حليب تشهي داها غير عضان لسانو ولحيس شفتو التحية على شعرة ينقض يمششها.. بانلو ولدو بطى بنومو مارقدش وحرمو.. ماصبرش طل عليه
أسد: مارقدش؟
أمنية: اشش.. وطي صوتك
أسد: همس: لارقد هاتيه نحطو فبلاصتو
أمنية: ماغطس فنوم عميق..خلي يزيد شوي
أسد: ماغلبتيش ؟ فاتتو نهار معفر
أمنية: حمد الله هك ولا كثر.. كون لا قدر الله ماداتش مانعرف وش يصرا فيها
أسد: للدرجة ذي ختك قراية ؟
أمنية: لافيغيتي ماكانش قلبها حار هك.. لعام هذا زيرت روحها به تجيب معدل مليح يلحقها تكمل فالميدسين
أسد: الميدسين عدوة عندكم ولا كيفاه؟ نتي وياها مازال خوك مش بعيد يكون كيفكم
أمنية: ماعجبناكش؟! عيب ولا حرام لواحد يطمح يقرا ميدسين !!
أسد: ماقلتش عيب او حرام.. قلت ماتكبوش فحاجة صعيبة لمنال.. والميدسين مش ساهل ومايروحلو غير لي قاوي صح فراسو وكاپابل على عفار قراية 7سنين.. 7سنين مايعدها غير لفم ونتي قارية ومجربة فاهمة قصدي
أمنية: اممم.. بصح حلمها وتعبت به تحققو
أسد: ماكتبهولهاش ربي يعوضعها بما أحسن.. قال تعالى: "" عَسَى أَن تَكْرَهُواْ شَيْئًا وَهَوَ خَيْرٌ لَّكُمْ وَعسَىٰٓ أَن تُحِبُّو شَيْئًا وَهُوَ شَرٌّ لَّكُمْ وَ اللَّهُ يَعْلَمُ وَأَنْتُمْ لَا تَعْلَمُون "{البقرة216) صدق الله العظيم.. ربي ادرى بحكمتو ماشافلهاش فيه خير هناها منو..
أمنية: آميين ياربي.. مسكينة ماكتبلهاش تحقق أمنية بابا تبقالها كدة فقلبها
أسد: ومش غير هو لبرونش لمليح كاين بزاف تشوف وش عطاوها خيارات وطيح فما خير منو
أمنية: نشاء الله.. ولدي حبيبي رقد
أسد: بغيرة: هاتيه جاي نحطو فبلاصتو..
★★★★★★
أسد: داه حطو يرمرم: حبيبها !! جابتلي من يزاحمني حتى فالتربيجة تاعي ا ديين ربي
أمنية: سمعتو: حاشا انت حبيبي لول ولوحيد هههه
أسد:تحشى فبلاصتو: فاقو ماتصبرينيش بيها
أمنية: قحزت ليه تسيتت: ماغشيتكش نحكي صح.. ولادي فكفة وانت فكفة
أسد: والبقية ؟!
أمنية: وش جبدك فيهم حالف تشطيني ليلة
ضحكتلو بحلاوتها وتلاحت على وجهو تبوس استحلاها رخف روحو مستمتع.. وريحتها لاعبة على حواسو محركتلو غريزتو.. تم تم جبدها من رقبتها وغطس فشفافها يمص ويعجن خلطهم ببوسة قوية لاهبة وسيبهم خلاها تنهج بسيف ترد النفس
أمنية: قريب دوخت
أسد: فكرتيني فليامات لولى هههه كنت فراجيل مسة بوسة تلعب عليك الدوخة وتبداي تقراح "سيبي اصبر دخت عتقوني منو ا ربي سيدي" هههه
أمنية: حشمت: وقتاه ا نمي! جامي درت الدراما ذي
أسد: فوتتي الدراما بأميال هههه كل مرة تخرجيلي بخرجة هبال.. بصح خلاتك تدخلي القلب وتحتليه ديراكت.. ساعات تولي حطبة اربك مي تبقاي الزينة تاعي زينة قلبي
أمنية: رغرغو عينيها: تأنا حبيتك ونحبك ونبقى نحب قد لي فات وأكثر طول عمري
أسد: مهما صرا بيننا؟!
أمنية: مهما صرا.. نتزاعفو نورمال لي كوپل كل هك.. بصح مانكبرو مانتفرقو
أسد: بيانسير.. وماتفرقني عليك غير لموت ا عزززتي
تكاها وتكب فوقها بلاما يحصرها بثقلو حط شفافو على شفافها وحركهم منغمس فقبلتهم مع تفاعلت معاه سخن راسو وغطس فيها عطشان يرتوي منها ساحبها لليلة حميمية يبردو بيها نار شوقهم وعشقهم لكبييير
صباح يوم جديد.. اهدى ملي قبلو.. شي فاق ناشط شي متحمس شي ماشبعش نوم مودو مخسر!! فات روتيني صباحي وكسر عادتو وجود البنات هاجر لفرحة تنطق من وجهها وغير متبسمة ملازمة لكاملة تكسب رضاها.. مروة لازمت أمنية معاونتها فروتين صباحها مع أشبالها طايرة مالفرحة.. تضحك تلاغي معاهم شبعتهم بوسان هاترة مع شهد يخطفو فالولاد خطيف ماخلاوش الدالة لأمنية
خليل صبح روپوو ماخدمش فاق معطل فيق آية بقات بحالة البارح غير ساكتة وتشوف يسقسيها تجاوب بهزان راسها ايه او لا فقط!! داها للدوش يقضيو روتينهم الصباحي وبقى يهدر ويكرش يكوراجي فيها ويقنع به تخرج من بأسها ذاك وترجع لحيوتها وتفرح بنجاحها قاطعهم اتصال من مدير الليسي تعها حكاو خبرو بضرورة روحتهم ليه.. شكرو قطع لخط وعطاها تلميح كمحاولة للتخفيف عنها
خليل: كملي بلخف والبسي خارجين
آية: تايهة فالماء يسيح قدامها: امممم
خليل: هز راسها ليه: سمعتيني قلتلك خارجين.. تسقسي وين وعلاه مش تردي بـ "امممم !!!"
آية: ببحة: علاه ؟
خليل: على جالك.. نخرجك تشمي هواء تغيري جو تتريڨل نفسيتك شوي.. اوكي
هزتلو راسها بايه داعب نيفها وهز المنشقة مسحلها كمل رجعلها بلاصتها.. وجرها من يدها خرجو للدريسنڨ طول قعدها قدام الكوافووز راح دقايق ورجع مدلها قشها وحط قشو حذاها بدا يتعرا ويلبس.. حشمها هربت عينيها وتلهات تلبس متفادية تسرق شوفات ليه تبسم لأول اشارات تأثر منها.. بقى مرة على مرة يهارشها ويداعبها لين كملو ريڨلو حالتهم هزو لوازمهم ونزلو لتحت
وصلو للصالون وقفها فالباب صبحو عليهم.. ورحمة بلهفة هرولتلها درعتها باست توشحل
رحمة: كبدتي لباس ؟ رتحتي شوي
آية: بصوت مذبال: اممم.. حمد الله
الكاملة: لا لباس وجهها ناير خير ملبارح
سهام: عسلامتك مزية خرجتي من 4حيوط هذوك وشوفناك بخير
رحمة: حمد الله.. تولهت منهم:واش خارجين؟
خليل: اممم
سهام: بفضول:: ويين رايحين؟!
رحمة: مهم خارجين مليح اخرجو فوجيو على رواحكم شوي
زربت صرفتهم مع الكاملة.. ركبو فلوطو وقلع مخليهم وراه صاهدين حتى بعدو عاد دخلو لحقو على مناقرة لكناين
سلوى: شحال تتفراي لولادك ا بن عمي
سهام: قلتيها بفمك ولادي.. عالاقل مانيش زيك تحشي خشمك فكل
سلوى: تتبالايني حاشا ماندخل نقول غير كلمة لحق.. بويسك عاشرتكم وعارفتكم تميلو وتفرزو وتنفخو لبنادم حتى وهو غالط
سهام: سلووووووى
لكاملة: خلاااص اسكتو مالكم على صباح ربي هايجين عالعراك زي ضرااير
رغاو لزوز: بعييييد الشررر
قلبت عينيها منهم وزادت مع رحمة لي بالها مرفوع تخمم فبنتها وتدعيلها تولي بحالة احسن ملي خرجت بيها
★★★★★★
خليل وصل قدام الليسي حبس تلفلها لقى عينيها مرغرغين سيب الفولون متنهد بقوة
خليل:رجعتي للبكاء؟ قلتلك نساي ماتزيديش تبكي
آية: علاه جبتني لهنا مالا
خليل: تهزي الرولوڥي تاعك
آية: مابغيتش.. ماننزلش رجعني للدار
خليل: والرولوڥي ؟!
آية: جيبو وحدك ولا خليه عندهم يشبعو بيه
خليل: شد يدها يقنع: الهروب ولا مرة كان حل.. تعلمي تواجهي مش تهربي.. ماصرا بأس لي يدخلك فدوامة التشاؤم هذي فيقي لعمرك
آية: مافياش جهد نشوف حوايج يوجعولي قلبي كثر ماهو موجوع.. عيشك افهمني
خليل: سكت زمان وجاوبها: براحتك مانضغطش عليك
سيبها ونوض لوطو قبل مايديماري سقساتو
آية: والرولوڥي !! ماتجيبوش
خليل: وش ديري بيه؟ ياك ماحبيتيش تعرفي علاماتك !!
شافها هربت عينيها متفادية ترد نفخ ورڨد لوطو
خليل: حابة تشوفي علاماتك ولالا؟
آية: بغصة: حابة
خليل: انزلي مالا
آية: مانن...
خليل: قاطعها: انزلي ماتخافيش رح ندخل معاك
خزرتلو بتردد قابلها بشوفات دافية عطاوها ثقة هزتلو راسها بإييه ونزلت.. زرب نزل سد لوطو ولحقها
دخلو حاظيين الغاشي ناجحين او راسبين حضرو وشي مجمع يبارك شي فرحان يصور وشي مصنم حابس الدمعة من وجهو تعرفو مانحجش.. منظرهم زعزعها تعطلت بمشيتها خاف ترجع على وراها شبك يدو فتعها وساڨها بخطوات سريعة للإدارة.. لقاو تلاميذ فالكورواغ مستنيين دالتهم يدخلو.. وقفو زيهم مامپا دقيقات عيطولهم دخلو استقبلهم المدير يبارك لأية ماتفاعلتش معاه تدخل خليل شكرو وجاوب أسئلتو.. منبعد استلمو الرولوڥي ووقعت
لمدير: مبرزك نجاحك ا بنتي نشاء الله تكملي فتخصص مليح تنححي فيه وتضمني مستقبلك
خليل: نشاء الله ربي يبارك فيك
لمدير: آميين.. تاع الصح فرحونا هي وبعض التلاميذ شفنا كشوفاتهم تفاجأة وفرحنالهم قريب كثر ملي ماجورااو.. تعرفو علاه؟
خليل: علاه ؟!
لمدبر: لأنهم فاقة توقعاتنا.. يعني لحق عام لخر تعهم زيرو رواحكم قراو ماشاء الله وداو الباك بأكثر ملي كانو يجيبو بشحال.. يعني مستواهم تحسن ولا فوور خلاه وهذو الفئة تفرحلهم وتتوقع يبينو مستقبل مليح لأنهم فداخلهم إرادة وهمة كبيرة توصلهم لمراتب اعلى وانجازات كبيرة
كلامو كيما نواه وصل لآية فيقها من عبوسها وهزلها كتافها لي نازلين بخيبة.. هزرت راسها لقاتو أقرب منها ومسح على راسها بطيبة
لمدير: افرحي بنجاحك ا بنتي ماتبقاش هك ماتبدليش الفرح بالغم.. ربي يدوم فرحك ويوفقك فقرايتك وحياتك ككل
آية: آمين يارب
حليل: يعطيك الصحة ا سي المدير
شكروه بالواقفة.. عاد خرجو هازلها الرولوڥي مذكرها بكلام المدير المشجع ملهيها بالهدرة
مع وصلو للساحة حبست لشوفة بنات شلتها لقديمة.. تخزرلهم كل واحد بحالة زي..
خليل: شبيك حبستي؟ تلفت لوين تخزر: تعرفيهم ؟
آية: كنت..
خليل: صحاباتك؟!
آية: كانو.. تنهدت: ودرك مابقاوش يله نخرجو
مامپا خطوتين حبسو هدو عليها بنات عرفتهم من زردة الفراش والحمام تعها.. حضنتها اولهم تسلم وتهني
سمية: مبروك نجاحك الف مبروك
فريال: درتي الهدة لمرة ذي وجبيته فووور
هدى: ماشاء الله ربي يبارك..ماتصوريش قداه فرحنا سيرتو كي جبنا معدلات متقاربة هههه
آية: تبسمت: مبروك ليكم كل كل.. شحال جبتو ؟
سمية: فينا وعلينا هههه
درعتها ولبقية تكوفو بيهم كل وحدة تمد معدلها ومنو جبدو نقاطهم يتوانسو سايقين آية
.... يتبع غدا لا لحقتو ل40★❤️
ماتبخلونيش بآراائكم ... خليو تعليقاتكم فكل حلقة ❤..
فضلا ★ vote للحلقات
اضغطو على رمز " ★" اسفل الحلقة❤
+
🥀 متابعة لحسابي
Anayiismanou