فاق من حلم اليقظة اللي عاشو على يديها الصغار اللي يتلمسو في راسو فاق على وضعو مزال ما صرا والو كان يتخيل الواقع حبس عند سؤالها وهوا دخل وسط دوامة تأنيب الضمير او هذا انذار معلابالوش اللي يهمو انوهيا قدامو راها لباس مافاهم والو غير يشوف فيها متعنكشة فمازن اللي محملها بش تلحق لطولو وهيا تتلمس في وجهو بأنامل يديها اللي يعطوه الراحة و يفكروه بيها تلاح ديراكت جبدها ليه حضنها يبوس في راسها ويشم في ريحتها يتأكد انها بخير ومزالت معاه
ماهر:يا روحي لباس راكي بخير مصرالك والو راكي هنا (تلاح حط وجها بين يديه)عمرك تخلي بابا ليناار.... عمرك
لينار:خافت حستو مريض بقات غير تطمن فيه :بابي اشش راني هنا مصرالي والو راني وسط عايلتي حتى حاجة متصرالي يا بابي انا بنتك القوية
ومبعد شنفت عليه وربعت يديها
لينار:قاعد تديرلي هكذا بش تتهرب من الاجابة يخي اصلا نتا طول هكذا تديرلي سيناريو ساعة تقولي تلفون ساعة تتفكر خدمة ساعة تسكت عليا جامي سقسيتك نفس السؤال وشبعتني هدرة علااش من حقي نعرف
ماهر:نزلها من حجرو ووقف ماشي وهيا وراه
لينار:بابا راني نحكي جاوبني قولي وش اسمها اي حاجة بابا
ماهر حبس فآخر الدروج ودار شاف فيها
ماهر:ليناار تحبي تعرفي حوايج على ماماك....
لينار حركت راسها بايه ولمعة ترجي في عينيها
ماهر تبسم معاها: اوك نحكيلك كلشي عليها ولكن مش ليوم غير تفوت الحفلة نحكيلك كلشي اوك غدوة
لينار جرات ليه حظنت رجلو:قوول والله يا ربي واااي واخيرا رايحة نعرف ماما تهدر وتسوطي من الفرحة
حتى طارت فالسما ضربة وحدة من مازن كي هزها
مازن:اووباا واخيرا رايحين نعرفو شكون المكافحة اللي قبلت بخويا الشرير.. وخذيي غاضتني بصح كثر خيرها جابتلنا الزين هاذا (ونقر على خشمها )
لينار:اييه ومالا, بصح بابي ثاني ناس ملاح امازن والله ونتا عندك برك لا كي تجيب لمرا تنساني
مازن ضحك وحك نيفو:وهاذي فيها هدرة الزين
لينار تبسمت زعما خيرها هيا على المراا ولكن الفرحة متدومش ههه
مازن :هاا باينة نخيرها هيا عليك نتي عندك باباك
لينار ثم ثم شنفت :صااار هكذا صحاا معليش نزلني تشوو
مازن :لالا منزلش
لينار:قتللك نزلني وبدات تخبط فيه لصدرو لا نشكيك لبابا
مازن:الكور ابنتي احبسي ليميسكل تاع المرا حبسي وش تلقا كي تجي احبسي خلي رزق الناس
لينارمخها مركا error:اوو احبس تشوو ولمرا هادي علاه تشوف صدرك اصلا عيب تقعد بلا تريكو قدامها واشمن رزق تشوفو
مازن ضحك على هبالها :ههههه والله صح كي جاتك نحي التريكو عيب مالا نتي كيفاه جيتي للدنيا وهزلها حواجبو تاع جاوبي طراش
مكملش هبط حاجبو كانت الضربة فيه من ماهر اللي كروشاه للكرش بعدما تفرج تفرج على هبالهم وكي وصلت وين مخ بنتو يخماج تلاح فكهم هزها من مازن وخلاه يتوجع هز صبعو يهدد :اسمع اخويا مكلاه تخمجلي تخمام بنتي بالصوف اللي فالبطاطا اللي راها في ذاك الراس ننسا انك خويا ونقتلك
مازن يتوجع :خلااص اخويا طالبين سماحك هز عليا بنتك وروح كي تجي حبيبة القلب و تشوفو
ماهر:اوك جيبها برك... وشاف في لينار اللي مزالت تخمم: ليناار متعبيش مخك في تخمام عمك الله غالب مهبول
لينار:معليش مازن مسيكين نية يكبار ويتعلم و ضحكتلو ببراءة
سهى في تفاصيل وجهها شبه كبير طبعا بنتها نفس البراءة واللمعة في العينين آآآه ياربي وش يصبرني على فراقك
اما مازن كان ماشي ورجع على وراه :اينتي وينهي كلمة عمي هاا خويا شوي قدر كن جات ال دنيا الدنيا مرتي راهي هنا وبني راه في حجرها
ماهر ولينار: ههههههههههههه والله صح
مازن شنف::صح ومالا نتمسخرو
لينار:صحا عمي روح ترقد روح ضحكو في ثلاثة و جاو طالعين يتناقرو ويضحكو حتى حبسهم صوتها
ميرال:مااهر( بصوت رقيق وفيه استعطاف)
ماهر كان وصل لراس الدروج دور ليها وهوا مزال هاز لينار :انعم وي ميرال
ميرال:قلت ليوم نرقد لينار ونبقى معاها طول الليل ونكون كيف امها مدام توحشتها
وطبعا لينار دائما في الجبهة
لينار:نتي قلتيها توحشت ماما متوحشتكش نتي مكان لاش تحشريني فبيتي
ماهر همسلها بشوي::لينار عيب متقوليش هكذا( ودور وجهو لميرال اللي الغاز طلعلها كن صابت تلاحت نتفتها ثم بعد)اا ميرال معليش اسمحيلها راها مقلقة برك المهم كثر خيرك بصح معليش ضك انا نبقى معاها
ميرال تبسمت تبسيمة صفرة تحاول تخبي غشها:لالا صحا معليش, صغيرة بصح انا قلت بلاك نعوضها
لينار هنا تنطرت من ماهر لمازن
لينار :مازن هزني
مازن :عمك ابنتي راني.. عمك
لينار:صحا عمو الزين هزني الله يرزقك بمرا زين ودين قريبا
مازن تلاح هزها يحضن ويسلم :هاا الهدرة الزينة بنت خويا العسل والله دعوة كيما هاذي كل صباح في وجهي و منزيدش آمييين يا ربي آآميين
ماهر:لينار علاه معجبكش حضني
لينار :لالا بابي الزين قلت راك غلبت وفي قلبها (يااو علابلي بلي بعد الزبلة هادي مازن يهربني منك مش نبقا عندك بش تلوحني ديراكت)
ماهر:اممم اوك
لينار وهيا في حضن ماهر طبعا بؤرة الامان تاعها وتوتت ي وذنو :عميمو كي نقول اجري تجري وبيا مش تطيشني وتروح وندعيلك بالمرا حتى ونحوسلك ثاني
مازن :اوك الزين (عندو المرا والروح تطلع ههههه)
لينار:مارسي ميرال بصح اللي راني نهدر عليها ماما مش اي واحد يجي يعوض بلاصتها ياك القطة عمرها تولي لبؤة هكذا نتي عمرك تلحقي ماما ماما مقامها بعييد بزاااف على مقامك
لينار:مازن اجري اجري
ويقلع مازن مش مستني حتى واحد ومش سامع لعياط ماهر اللي كسر الحيوط اللي يجي فايت من برا يسمعو ولكن ااا الهربة تسلك ضك بقا يجري وهي متعنكشة في رقبتو حتى لحقو لشمبرتها ودخلو وغلقو الباب
ماهر جرا وراهم شوي وعاود ولا لميرال لي لقاها تنوح في حجر نسيمة وسليمة تشوف فيها وتضحك لتحت لتحت طبعا عجبها القصف والوصف ماهي بنت الغالية والعزيز تعزها وتدللها ومترضالهاش الهلاك
ميرال:اهئ اهئ شفتيها يا خالتي شفتيها لسانها طوال قلت نعاونها غاضتني مزية قصفتني ونقصت من قيمتي اهئ اهئ في دارك نتهان يا خالتي ونتي ساكتة قولي حاجة للينار خليها تعقال وتحط من روحها شوي اهئ اهئ وهاذي يماها اللي راها تقارن فيا بيها وش حاطتها كانت ملاك وهيا كانت جنية الله لا تربحها وين ماكانت
ماهر سمع سمع لين ركبوه جنونو
ماهر:ميييييييييييييييرراااال متنسايش هاذيك شكون....مرتي وبنتي اللي راكي تحكي عليهم ومرتي انقى من انك تجبديها على لسانك وبنتي مش ناقصة حنانة حتى تجي نتي تعوضيها (هز صبعو في وجهها يهدد)راني فايق بلعبك نتي ويما متجيش نتي بنت لبارح تفوتيها عليا فهمتي والشي اللي في بالك نحيه مستحيل نعاود الزواج على مرتي وام بنتي فهمتي ديري كلامي حلق في وذنك
ميرال عطاتها للنواحات ونسيمة تسكت
نسيمة:اشش يا بنتي اشش ياخي تعرفي ولد خالتك كي توصل لبنتو يهبل خلاص ونتا يا ماهر وش من لعب راك تحكي عليه
ماهر دور ماشي ولا على بالو :يماا انا هدرت ونتي فهمتي منديروش النية فالهبال خير لينا كامل
نسيمة سكتت ولتات معا ميرال اصلا معندهاش رد راها هيا الغالطة
سليمة :ولدي ماهر عاوني نروح لبيتي عسرت
ماهر:اوك هيا يماا
ومشا عاونها داها لبيتها تمنالها ليلة سعيدة وطلع لشمبرتها فتح الباب بشوي لقاهم راقدين عاود غلقو ومشا لبيتو بدل وغسل عليه ورقد بعدما خمم في خدمتو وحفلة غدوة اللي رايحة تكون الفاصل و فيها هيا بكل تفاصيلها حتى شبع او بالاحرى غلب بيسك هوا عمرو يشبع منها