ايلين
في نفس الوقت فالجزائر في فيلا صغيرة وسط المدينة فيلا متكونة من ثلاث طوابق واقف فشمبرتو والتلفون في يدو يحكي
....:كيفاه هذا الاوتال محجوز شووف تتفاهم معا مول الاوتال اي مبلغ يطلبو قابل المهم الحفلة تاع غدوة تكون في الاوتال هذا.....فهممممت.
الطرف الثاني:حاضر كلشي رايح يكون كيما تحب حضرتك
كوبى و مسح على وجهو بفدة وفجاة تبسم لا إراديا وقت جات صورتها بين عينيه كانت عبارة عن ملاك يغرق وسطو وقت يكون مهموم قعد على كرسي كان قريب ورد راسو للتالي يخمم ويحكي معا روحو :زعما نسيتيني ولا مزال متفكرتني مزالك تحبيني ولا عشقتي غيري فجأة تنرفز مستحيل يتخيل تكون معا انسان غيرو هيا ليه وهواا ليها مهما ضرها يبقى يحبها هههه ضحك على روحو وعلى هبالو كيفاه هاذي تبقى تحبني وانا: دمرتها بكيتها خطفتلها فرحتها ولكن هذا كان الحل الوحيد اللي نقدر نحميها بيه هههه او نحميهم بيها
دق دق تقعد شافها داخلة تجري هههه اكيد هاربة منو ويهد عليها هوا يجري من موراها تجري وتضحك وهوا وراها يجري ويعيط وجهو مبلبز بالمكياج هههه وش صرا جرات ليه وتخبات فحضنو جبدها ليه وحضنها زعما يخبي فيها.
ماهر:ههههه ضك فهمت راه صارية حاجة بصح وش هيا شاف فيها غارسة راسها فصدرو تبسم ومسح على راسها بحنية:ههه شبيك بنوتي وش درتيلو حتى راه جاي هاد عليا هكذا
مازن طرطق يعيط:واااش واش صرا يااو قول وش مصراش ومادارتش بنتك فيا نتا مخليتك هنا راقد وانا جاية تخربش فوجي ياااوو شوووف(يشاور بيدو لوجهو هههه على المكياج)شوف كيفاه دارت لوجهي ضك كامل البنات اللي يعرفوني يهربو اايماا زيني راح ضك يتشوه وجهي ونبقى ارمل بلا مراا.توله ليه لقاه ضام بنتو ليه ويضحك لتحت لتحت زاد صعر
مازن:ماااهر متهبلنيش هاتها لهون نطيش سماها نتهناو منها هاتها تلاح ليه يجبدها وهيا تعيط
لينار:اااا بابا عاوني متخلينيش مزلت تحتاجني قولو قولو بلي مزلت تحتاجني عمو مازن منزيدش نعاود والله منزيد خليني .....عيشك سامحني عيييشك..وعينيها تغرغرو بالدموع مطيشنيش بابا يحتاجني
مازن طلقها وجبد عليها غير شاف دموعها و شاف فماهر اللي طمنو بعينيه انو يقدر يحكي معاها
مازن:خلاص احبيبة ارواحي عندي ياك انا عمك اللي تحبيه
لينار:شافت فيه تسمح فدموعها بكفوف يديها جات كيووت :نجي بصح مترمينيش ونعطيك ديماكيون ينحيه متخافش متبقاش بلا مراا
مازن:اوك ارواحي برك
جرات ليه عنقتو تحضن وتبوس
لينار: سامحني
مازن :خلاص السماح غير نتي متبكيش صغرونة بصح علاه درتي فيا هكذا علاه
لينار تبسمت ببراءة
لينار:هههه كنت نلعب برك وزيد وجهك انقى من اي ورقة اياا جيت نجرب فيك عندك وجه هايل عمو
مازن:خمسة في عينيك خلاص شوي وطفرتيني فيه
كملوها في ثلاثة معا بعضاهم
ماهر/لينار/مازن:وقعدت بلا مراا ههههههه
ليناار:بصح جيت تهبل المرة الجاية برك نديرلك غوج بوردو مش غوز هههه
ماهر:ليناار مكانش مرة جاية عيب تديري هكذا لعمك, مسيكين يفزد وجهو ويقعد بلا مرااا(يهدر وكأنو يقلد في مازن)هههههه ياك بنتي
مازن وقف زعما تنشع حط لينار في حجر ماهر وجا ماشي :هيه انا مزلت باير ومزلت مذقتش بنة الزواج امااا نتاا ومعنالو بعينيه على لينار شفناك وتعلمنا منك العزيز
ماهر:مازن بديت نتنارفا اخرج
مازن: صاي خرجت... ومشاا
الباب تسكر وماهر نزل عينيه على الكتلة الصغيرة اللي لصقت فيه شعرها داخل بعضو جمالها جمال رباني ورثاتو عن امها هههه نسخة مصغرة منها ياربي هيا الوحيدة اللي مصبرتني على بعدها ربي لا تشوفني فيها ضر غير خلص دعاء فقلبو تلاح هزها وتم نازل بيها لتحت بش يفطرو غير وصلو لراس دروج الطابق الاخير وين الكل كان ملموم على طابلة الفطور
لينار وتوتت في وذن ماهر:بابي هذيك المعزة اللي بحذا جدة وكتاه تروح
ماهر:اا وينا معزة....رجع يشوف منين يماه شافها طبعا شكون من غيرها بنت خالتو المسمومة
ماهر:منعرفش لينوش لكن بلاما نوصيك بلا مشاكل نتي بنتي الشاطرة وبنتي مديرش المشاكل
لينار:اوك اذا موصلتنيش منوصلهاش واذا حكات معايا كلمة خاطية الطريق وقتها ياويلها... واعذر من انذر
ماهر: هههههه والله صح كاسب مافيا ومعلاباليش علابالك
لينار شافت فيه بتبهليل :اييه ههههه وانا الرئيسة
ماهر:هههه راني نشوف امشي نفطرو وبلا مشاكل
لينار:انا قلت اللي عندي
تبسم على هبالها وتم نازل بيها تحت أعين الكل اللي كانو ملمومين على طابلة الفطور صبح عليهم كامل ومام لينار
ماهر/لينار:صباح الخير عليكم ,وزاد لجداتو سليمة باس راسها وهيا دعاتلو بالحفظ كالعادة وقعد جنبها ولينار باست جداتها حتى هيا وقعدت جنب ماهر وبحذاها مازن ومقابلين على الطرف الثاني للطابلة نسيمة(ام ماهر ومازن)وبجنبها المعزة(ههه على قول لينار)ميرال (بنت اخت نسيمة اللي حابة تزوجها لماهر ولينار فايقة لقوالبهم ودائما بالمرصاد)
نسيمة :وانا ولدي قالولك خدي فيه الشوك ولا كيفاه
سليمة :نسييمة خلينا نفطرو وضربت فيها تخنزيرة موت
ماهر:يماا نتي عارفة علاه راني هكذا ومتخلينيش نهدر قدام بنتي
لينار هبطت راسها معا الماكلة وكأنها مش موجودة ومازن ملطف الجو
مازن:اا ماهر حقا وش درت فيها معا حفلة غدوة
ماهر:الاوتال صار واجد مبعد نروح نتفقد فريق التحضير لازم كلشي يكون واجد
ميرال عسلت عينيها فماهر وحكات بنبرة استعطاف:ماهر وليد خالتي العزيز والله ضاق خاطري من الدار معليه نجي معاك
قبل مايرد كانت لينار فالجبهة :اييه الانسان كي يكون مش فدارو يضيق خاطرو مام انا مالفة تصرالي كي نروح عند صحاباتي نبات نتوحش دارنا....ونتي متوحشتيش دارك حتى قعدتي عندنا شهريين؟؟؟
ميرال وجها صفار وخضار وزراق مالقات ماترد وماهر مشوكي من بلوة عمرو ههه واحلى بلوة لو كانت هياا هنا كانت عملت نفس الشيي هههه الله غالب بنتها اكيد تخرج ليها
نسيمة:لينار هاذي داري وهاذي بنت ختي وتتحسب دارها حتى هيا يعني بلا هدرة زايدة
لينار:وانا مقلتش العكس وختمتها بتبسيمة مكملة فطورها من نكشة ماهر ههههه تاع اسكتي...ونطق ملطف الجو
ماهر:يما حتى بنتي لينار مقالتش العكس وأما نتي ميرال منقدرش نديك معايا عندي خدمة منقدرش نبقى ندور بيك غدوة ونحي على بالك فاالحفلة وضك خلونا نكملو الفطور واحد فيهم مانطق كامل حطو روسهم معا الماكلة
كملو فطورهم ماهر ناض مشا للخدمة هوا ومازن ولينار مشات للمدرسة بعدما وصلوها معاهم امااا ميرال فبقات معا خالتها تشكيلها من تنبيزات لينار اللي كثرت و يتفاهمو على راسها ونسيمة حرباية بسبع ريسان وفضلت ميرال على بنت كبدتها ووقفت معاها وبداو يخططو بش يأذو لينار و يخليوها تخافهم بش ينفذو مخططاتهم براحتهم
وسليمة( جدات ماهر وام باباه)مشات لبيتها تصلي وتستغفر كالعادة هيا مراا كبيرة بعمر الثمانين ومبقالها فهاذ الحياة غير تصلي وتدعي ربي بحسن الخاتمة وتطلب المغفرة من ربها على اعمال راجلها اللي خلاها تكون شريكة فيها بالرغم منها,ولكن الندم مايجي كان وقت يفوت الحال
خلصت صلاتها طوات السجادة وقعدت على حاشية السرير تسبح وللحظة سهات تخمم ورجعت بيها الذاكرة للور ولاصعب ايام حياتها الأيام اللي سيطر فيها الطمع والجهل على القلوب و خلاهم يغلطو ويدمرو حياتهم بيديهم وما بقى يتردد في مسامعها غير هدرتو هدرتو اللي كانت نار تكوي فقلبها
"جدة قوليلو ميكوينيش بيها انا نحبها والله نحبها نهزها منا ونمشي متزيدوش تشوفو وجهي خيلونا نربيو بنتنا معا بعضانا علاه نبقاو هكذا علاااه ودموعو اللي حاكمهم شحال طاحو طاحو بنزول دمعات سليمة دلالة على انها ما تقدر تدير والو لا هيا لا غيرها يعني فقد الامل عايلتو رايحة تتشتت وهوا ماقادر يدير والو"حست بقلبها شعلت فيه النار وضميرها قاعد يلوم فيها حطت يدها على قلبها وضغطت عليه تكالمي في وجاعها
سليمة:يا ربي اغفرلي واغفرلو تحت التراب يا ربي حنا غلطنا وغلطة كبيرة اغفرلنا واكتبلي نلقاها ونرجعها لبنتها وراجلها ونرجع لولدي فرحتو وعايلتو ....آميييين
نرجعو لتحت وين الافاعي كانت ملمومة
نسيمة :فهمتي ضك خدمتك لازم غدوة نحطو لينار عند حدها راها تمادات بزاف
ميرال:ايه يا خالتي وبعدها نولي مرت ماهر رسمي (وتبسمت تبسيمة شر متخيلة انو خطتها رايحة تنجح ولكن القادم أعظم وربي هوا الوحيد العالم وش رايح يصرا)ياسعدي بيه حبيبي
نسيمة:اييهولازم تخدمي خدمتك غدوة على اكمل وجه مش تبقاي تحلمي برك لازم تكملي خدمتك وتبسمتلها ابتسامة شر نوايين على الاسوء