فاقت الصباح على ضوء الشمس اللي تسلل للبيت,شومبرة صغيرة ومرتبة تقعدت في بلاصتها بحيث ميجيش ضوء الشمس فيها وسهات تخمم فين كانت ووين ولات حياتها من قبل وهاذ الحياة يعني لهاذ الدرجة هيا كانت سيئة معا الناس اللي حبتهم وعطاتهم ثقتها معقول غلطها كان انها حبت بصدق وأمنت للناس اللي دارتهم عيلتها وهم جازوها بالخديعة وجرح عمرو يداوا يقولو الجرح معا الوقت يبرا وليه دواه ولكن هنا رانا نهدرو على جرح القلب ومش اي قلب هاذا قلب ام مجروحة على كبدتها وطرف منها لحمتها اللي سرقوها منها طمعا فالمادة وكيما يقولو الضربة اللي توجعك تجيك من القريب.. تفكرت ضحكتو كلماتو ووعودو بحمايتها وفي الاخير خانها وكان هوا بذاتو مصدر لوجيعتها فطنت من سرحتها على دمعتين سالو على خدها اييه هاذو هوما الحل الوحيد اللي يقدر بيهم الانسان يعبر على وجيعتو ميي هيا وبسبتو خسرت القوة على البكا دموعها يجو غير وقت تتفكر لحمتها ولكن ميبقاوش بالعكس يتلمو ويخنقوها متقدرش تخرجهم مايسيل منهم كان دمعتين ;والباقي يخنقها اييه حتى الطريقة ليي اي انسان يعبر بيها عن حزنو هيا خسرتها..
" آآه منك يا دنيا قداشك ظالمة,ولكن هاذا المكتوب ومامنو مهرب "الجملة الوحيدة لي كانت تصبر بيها روحها وقت تجيها حالتها استغفرت ربها وناضت ماشية جيهة الدوش غير وقفت ندق باب بيتها
ايلين:اتفضل.
سيليا:صباااح الخير حبيبة (دخلت وبقات تشوف فيها تولهت لعينيها الحومر)جرات ليها حاكمة وجهها بين كفوف يديها :ايلين وشبيه وجهك علاه عينيك حومر كنتي تبكي ياك؟؟
ايلين تحكي بصوت مليان الم صوت انسانة مدمرة تماما مهما نوصف إحساسها الكلمات متكفيش:سييليا
سيليا:يا روح سيليا شبيك احكيلي اشكيلي همك بلاك ترتاحي شوي
ايلين:نفس الهم ونفس الجرح ونفس الوجاع راه في قلبي يا سيليا كل منقول والفت ونسيت نزيد نتفكر مستحيل ننسا..كيفاه ننسا عشق سنين كيفاه منتوجعش على ثمرة هذا الحب اللي ضحيت على جالو بكلشي هواا هواا دمرني يا سيليا في وقت اللي اعتبرتو الكتف اللي يسندني زاد رما كامل الهموم عليا وخلاني وحدي بلا كتف نتسند عليه وقت وجيعتي قتلني بالحياة ومسالش عليا, عاش
فرحتو على حساب وجيعتي وبكايا ( تبسمت وسط وجيعتها ابتسامة استهزاء بحالها)ههه ايه وش
يهمو فيا الناس ولا همها غير المادة والورث ,الاملاك كلهم مخممتش فيهم كان همي اني نعيش معا بنتي وراجلي حياة عادية تكون بسيطة وعادية وفي نفس الوقت حياة عائلية سعيدة بش نضمن تكبر بنتي في وسط ملائم ليها حبيتها تكبر ببرائتها ومتتسلبش منها كيما تسلبت من امها قلت نتقوى بيها فالتالي غدروني فيها وداوها مني ...خطفوها مني قبل منشوفها....قبل ما نشم ريحتها,تسع شهور وهيا في كرشي نحس بكل حركة منها لمساتها وسطي كانت تبعث فيا الامل ستنيتها على احر من جمر وهوما غير جات للدنيا....داوها مني داوهاااا...
سيليا: ايلين انا هنا معاك وديما اييه صح اللي فتي بيه مش ساهل لكن يقولو الضربة اللي متقتلش تقوي مدام ممتيش يعني نتي قويتي وانا هنا معاك ليوم راجعين للبلاد نجيبو حقك نوروه انو هوا غلط وقت تحدا ام الام في جال ولادها تولي غولة ايه وضك راه جايينو زوج غولات هوما انا ونتي ضك يشوف وتبسمت ابتسامة امل ملطفة الجو على صديقتها بيسك حتى هيا تتوجع لبكاها
ايلين تبسمت وسط قهرتها على هبال صحبتها واختها اللي عطاهلها ربي :ههه مهبولة ضك رجعتينا غولات خلاص
سيليا:مسحت دموع الين اللي كانو على خدودها بكل حنية:اييه هكذا الين نتي ماتليقلك غير الفرحة والضحك
ايلين تبسمت حتى هيا وتلاحت حظنتها:ربي يخلينا لبعضانا سليووش حبيبتي ومتنسايش انو مام انا هنا معاك وبش نعاونك تجيبي حقك
سيليا:ههه حقي نسيتو ملي راحتلي العزيزة مابقى عندي حتى حق فالدنيا هاذي وبالاخص منهم
ايلين:ربي حنين كريم وكيما كتبلنا نتجرحو جمعنا بالظروف وخلانا نكونو دوا لبعضانا
ضحكو لبعضاهم بمحبة وحكاو فرد وقت :ربي يخلينا لبعضانا ويدوم محبتنا نشالله ههههه
تفارقو بعدما كل وحدة فرغت همومها سيليا مشات لبيتها توجد روحها للرحلة وايلين تاني
الان وقت الرحلة رحلة البحث عن الحق وكشف الأسرار....والوجهة البلد حيث بدا كل
شيء الى الجزائر...