رواية/فيـنـوس ♥♒
للكاتبه/sαℓeмα🔏
ــــــــــــــــــــــــــــــ
وفي عز انسجامه امعاهم شاف بنت كان يشوف فيها من الايام اللي فاتن ولافته انتباهه
وقف ماشيلها لكن مسكه واحد من الشباب : وين وين ...بتروح ؟
مهاب ضحك : تي وين انروح ياراجل توا كيف جيت ...انجيب حاجه نشربها وانجيك
ومشا مهاب متوجه للبنت اللي كانت واقفه ف جنب طاوله الاكل اللي جنب المطبخ وماسكه ف يدها كوب وتشرب وعاطيه بظهرها ....كانت لابسه قفطان قصير لونه اسود وطالقه شعرها
اول ماحست بمهاب قرب منها تلفتت بسرعه وشهقت : فجعتني يادعوه
مهاب ضحك : وانتي شن اديري هنا ياقطوسه كانك تنفجعي
البنت ضحكت بتنهيده وشيرتله بيدها بمعني فلوس : الله غالب الخبزه مره
مهاب شاف للكوب اللي ف يدها وقال : اممممم ...وبعدها شافلها وقال اكيده فيها خميره بزايد هضا عليش مره
البنت ضحكت وبعدها قالت : عطك دعوه ضحكتني
مهاب ابتسم ع جنب وقال : شن اسمك انتي ؟
البنت حطت خصلات شعرها ورا وذنها وقالت : اسمي ليال
مهاب اتكا ع الطاوله وشاف لقدامه : اممم حلو الاسم
ليال ضحكت وقالت بغرور : نعرف
مهاب رفع حاجبه وشافلها : حي علي ام الغرور
ليال ضحكت و رفعت الكوب اللي كان في يدها تبي تشرب منه بس مهاب خذاه منها وشرب منه وقال : مازلتي فرخه عليه هضا...معش تشربيه
ليال رفعت حاجبها وحطت يديها ف نصها : والله تبي تتحكم فيه وانا مازلت مانعرفش حتي اسمك
مهاب شاف قدامه وقال : اسمي مهاب
ليال اتكت نفسه ع الطاوله وقعدت تشوف قدامها وساكته
مهاب رشف خشمه وقال : حلو اسم مهاب حتي هو راه
ليال هزت راسها وشافتله : مش حلو
مهاب رفع حاجبه : والله ..... حلو وغصباً عن خشمك
ليال ربعت يديها وهي تشوف قدامها ومابتش تحكي
ومهاب قعد ساكت حتي هو
ثواني وبعدها قالت ليال : حلو اسم مهاب
مهاب ضحك وهز راسه يمين ويسار علي طريقة حكيها
وليال ضحكت حتي هي
مهاب شرب من الكوب اللي خذاه منها
ليال لفت جهة مهاب وقالت : باهي عطيني نشرب مش فرخه انا
مهاب رفع حاجبه وشافلها : كم عمرك ؟
ليال شقلبت عيونها : اليوم خشيت ال18 سنه
مهاب ابتسم : يعني اليوم عيد ميلادك
ليال هزت راسها بفرح وضحكه
مهاب كشر وقال : مازلتي فرخه
ليال قلبت وجهها واتكت ع الطاوله بنفتره
قعدوا ساكتين لثواني
وبعدها واحد من اصحاب مهاب ناداه
مهاب شيرله بيده : هيا جاي ....وشرب اخر رشفه كانت ف الكوب ومده لي ليال ...شافتله وبعدها شافت لمهاب لقاته يضحك ابتسمت ومهاب مشى
ليال بتمتمه وهي مبتسمه : مش اسمه بس حلو كله ع بعضه حلو
ــــــــــــــــــــــــــــــــ
ثـاني يـوم....💌
الساعه 9:30 ص ✨
نزلت جهان بسرعه من الدروج وهي ماسكه شنطتها وكبوطها وتعيط لمريم
: مريم مريم
مريم طلعت من الكوجينه : نعم
جهان قربت من طاولة الاكل اللي كان عليها فطورها قعدت تاكل بسرعه وهي واقفه : معقوله مانوضتينيش المحاضره قريب تبدا
مريم : جهان انتي من قبل اتنوضي بروحك شن صايرلك الايام هذينه ....وبعدين امس كنك روحتي متأخر
جهان مشت تجري بتجاه المدخل تعدل ف شكلها ع المرايه وخذت طاقيتها الصوف اللي كانت ع الشماعه لبستها وقالت : انا قاعده انقولك متأخره ع المحاضره وانتي تهدرزيلي توا علي مرواحت امس
وخذت شنطتها وكبوطها وطلعت
مريم قعدت واقفه ف مكانها وتفكر و رافعه حواجبها بتعجب من اسلوب جهان الجديد ومن تصرفاتها المتغيره
ــــــــــــــــــــــــــــــــ
الساعه 1:12 م🌼
طلعت جهان وادم من المحاضره و مشوا للباركي وين مافي سيارة ادم
بعد ساعه 🕚
كانوا قدام شقة ادم كيف كل يوم ، بس الغريب اليوم انه ف حد قدام باب الشقه
جهان تشوف بستغراب للمرأه اللي واقفه قدام شقة ادم وتدق ع الباب وكانت عاطيتهم بظهرها
اما أدم ملامحه تملكهن الغضب ، وقدر يعرف هوية المرأه اللي قدام الباب
وكيف مايعرفهش وهي امه
أدم قدم خطوتين منها وهو يقول : ها ها نعم شن جايه تبي
جهان شافت لأدم باستغراب لكن اول ماالتفتت المرأه وشافتها جهان عرفتها وقربت من ادم بسرعه خايفه يصير نفس المره اللي فاتت
ام أدم : أدم الله يربحك خلينه نحكوا ....أدم ماتحرمنيش منك
أدم يشوفلها بأزدراء : تعرفي تقلبي وجهك من هنا ولا نقلبه لكي انا
وقرب أدم من باب الشقه بيفتحه ويخش لكن جهان مسكاته من يده
جهان قالت بترجي : اسمعلها شويه
أدم شاف لجهان بعقدت حواجب ونضرات كلها غضب وبعد يدها بقوه وفتح الباب وخش للشقه
جهان شافت لأم ادم اللي قربت منها وقالت: الله يربحك اقنعيه ...الله يربحك نبي ولدي يردلي انا نادمه
جهان هزت راسها وبدون ماتحكي لحقت ادم وخشت للشقه
لما خشت لقت أدم يمشي ويجي ف الممر وهو قريب يطربق من الاعصاب بمجرد ماخشت جهان قرب من الباب بسرعه وخبطه بقوه ولانه كان مش منتبه وخبط الباب بقوه انجرح من الحديده اللي ف الباب
جهان تشوفله وعيونها توسعن من الخوف وقاعده ف مكانها وخلاص
خش أدم لداره ، وجهان قعدت ف مكانها شويه وبعدها لحقاته حطت شنطتها ع السرير وشافت لأدم اللي عاطيها بظهره ويده تقطر ف قطرات صغيره من الدم ع الارض
مشت للكوجينه وخذت منها منديل وردت لأدم مسكت يده وكانت بتمسح الدم ، بس أدم نفض يده منها ومابش حتي يشوفلها
جهان بعدت من عليه وعيونها دموع وبسرعه ماقعدن الدموع هذينه ع خدودها وقعدت تبكي وكانت حتطلع من الدار بس ادم حضنها من لاوره
جهان تبكي وتشوف ليد أدم اللي مليانه دم ومحاوطتها
قربت يديها من يده تلمس فيها وتبكي وقالت : أدم
أدم زاد قربها منه وهو يقول : جهان ماتخلينيش زيها
ــــــــــــــــــــــــــــــــ
الساعه 1:30م 🌈
خش رضا للمستشفى بعدما كان ف استراحة ادم عشان يدوش ويغير ملابسه وحط حاجاته فيها ، خش للقسم اللي فيه مها وهو العنايه شاف للغرفه لقاها مفتوحه وفاضيه
حط في باله انه ممكن ايكونوا خذوا مها عشان صوره او تحاليل
شاف الممرضه المسؤوله ع مها جايه
رضا ابتسم : شن صار مها وين ؟!
الممرضه : مها حالتها تحسنت وفصلوا من عليها الاجهزه والتوبوات وحطوها ف غرفه عاديه
رضا توسعت الابتسامه ع وجهه : الحمدلله
الممرضه : توا قاعده ف الممر اللي بعد هضا الغرفه الثانيه
رضا هز راسه ومشا وين ماقالتله الممرضه
وصل للغرفه لقا الباب مفتوح ومع مها ممرضه ودكتور
خش رضا وحط الكيسه اللي فيها الحاجات الحلوه اللي تحبهن مها ع الكرسي وشاف لمها اللي كانت مقعمزه ع السرير وواضح ع وجهها الالم
رضا شافلها بفرح لانه اول مره اتقعمز بعد العمليه او اتحرك وشاف كيف حالتها بدت اتحسن
رضا ابتسم : مهوش
مها شافت لرضا وهي اتألم ومدت يدها مسكت ف يده وقالت : رضا
وشافت للدكتور وهو طالع وبعدها شافت للممرضه وقالت : رضا قوللها خلاص نبي نرقد معش نقدر ....واعره التقعميزه !
الممرضه شافت لمها بعقدت حواجب وضحكت : مازال شويه يادلوعة رضا
ضحك رضا والممرضه ، ومها ابتسمت وهي اتألم
طلعت الممرضه بعدما قالت لرضا مايخليهش اتغير وضعيتها او ترقد
كالعاده بدت مها تبكي وتنتحب كيف كل مره
رضا قعمز ع الأرض قدامها وحط يديه ع ركابها:شن فيه ياحبيبي!..ليش البكاء؟!
مها ببكاء :رايفت ع بابا وماما يارضا...نبي انعدي معاهم
رضا مسك يديها :وانا ياحلوتي وانا لمن بتخليني
مها ببكاء :انت ماتحبنيش
رضا سحب رجلها وحط باطن رجلها ع قلبه:متأكده انتي اني مانحبكش
مها هزت راسها وهيا تشوف ليديها
رضا: باه بحتي فيا
مها تمسح في دموعها بعبث :ليش
رضا :شوفيلي بس
مها رفعت عيونها وشافت لرضا واللمعه اللي تبرق من عيونه لكن سرعان ماتوسعوا عيونها لما حست بنبضات قلب رضا كيف زادن بسرعه جنونيه تحت رجلها وحست برجلها بطير من قوة النبض
رضا ابتسم : شفتي....انحبـك
قرب رجلهاا من وجهه وباسها ومها بتموت من الخجل
ورضا يضحك مانزلش عيونه من عليها
مها ضحكت:ماينجرحش كبريائك وانت تبوسلي في رجلي!
رضا ضحك وباسها مره ثانيه:لا بس ماتقوليش لحد
مها ضحكت بقوه ع كلامه ورضا ضحك لضحكتها
ــــــــــــــــــــــــــــــــ
في شقة أدم 🏠
كانت جهان امقعمزه ع الكنبه وف جنبها أدم ، ماسكه يده وتمسحله فيها من الدم
جهان سحبت يد أدم جهتها وقالت : أدم خلي يدك هكي
أدم تلفت بجسمه كله جهتها بحيث انه قعد امقابلها وحط يده ف حضنها
جهان كانت تمسح ف يده من الدم اللي جف عليها بالمنديل و ميه لانه أدم ماكانش عنده اي شي يتعلق بالاسعافات الاوليه او المستلزمات الطيبه البسيطه
أدم قرب يده الاخره من رأس جهان وقعد يمشي فيها ع شعرها وقال بضحكه : شنو ياعمري لازمها بلاتين ؟!
جهان عقدت حواجبها : مستهتر ....عندك علم انه الجرح كبير
أدم ضحك بستفزاز : لا ماعنديش علم
جهان شافتله شويه وبعدها سكتت وهي تشوف ليده
مشت صبعها ع الجرح وقالت : أدم .....ليش ماتعطيش لامك فرصه ؟
أدم تأفأف وقدم ع الطاوله اللي قدامه وخذا باكوا الدخان من عليها وخذا طرف وحطه بين شفايفه وولعه بالولاعه اللي كانت ف جيبه
وشاف لجهان اللي مازالت تراجي ف اجابه منه
أدم حول السبسي من فمه : لانه مافيش سبب مقنع يخليها ادير هكي
جهان نزلت راسها وهي تلعب بأطراف بلوزتها وقالت بحزن : ممكن ظروفها !
أدم برم ع جهان ورفع راسها بيده : جهان ظروف شن هذينه مافيش اي ظروف ....بلعكس كانت اتعيش ف اخيار الخير
واتكا ع الكنبه وهو يمسح ع شعره ورد السبسي لفمه وطلع الدخان من فمه مع تنهيده وقال: معش تفتحيه الموضوع هضا
جهان شافت لأدم وعيونها دموع وقالت : انا انتمنى اني انكون مكانك
أدم نفخ الدخان اللي كان ف فمه وقال :حتى انا انتمنى اني انكون ف مكانك عادي
جهان شافتله وقالت بدهشه : يعني انت اتمنى انه امك اتكون ميته
أدم هز راسه بالموافقه وبعدها قرب من جهان شير بصبعه ع قلبها وقال : علي قد ماانتي اتحبي امك ياجهان علي قد ما أنا نكره المرأه هذي
جهان سكتت وهي تشوف ف الكره اللي ف عيونه
ــــــــــــــــــــــــــــــــ
الساعه 2:00م✨
ف احدى المجمعات التجاريه الكبيره ، كان مهاب يدور ف قسم المواد الغذائيه وهو ينفتر
مهاب ينفخ : تي وين هضا .....مش عارفه امي هذي اتحب الشحوره
وطلع نقاله ومسكه ف يد و اليد الاخره ماسك فيها السبسي اللي كيف ولعه ، وقعد يمشي وهو يشوف لنقاله يحاول يتصل ع امه
فجأه خبط ف حد
رفع راسه بستعجال : اسف اسف وعاود يشوف للنقال
وكمل طريقه لكن وقفه صوت : مهاب !
مهاب رفع راسه وشاف لمصدر الصوت وضحك بمفاجأه : انتي !
ليال ضحكت : انا اها
مهاب حط نقاله ف جيبه : يامحاسن الصدف والله ، شن اديري هنا
ليال : نشري ف حاجات للحوش ، انت شن ادير
مهاب ضحك وحط يده ع راسه من الخلف : انا امي اموصيتني ع حاجات من هنا لكن مالقيتهنش وتوا امروح
ليال باستغراب : تسكن قريب من هنا ؟
مهاب : لا والله
ليال هزت راسها : اها انا نسكن قريب ، خلاص انخليك توا باي
مهاب شير بيده وقاللها : سلام
ليال عطاته بظهرها ومشت
ومهاب كان حيمشي وبعدها اذكر حاجه مهمه رد عليها بسرعه
مهاب : هييييه
ليال انفجعت : وووه فجعتني يادعوه شن تبي؟!
مهاب ضحك : ديما منفجعه انتي
ليال فنصت بضحكه وقالت : شن تبي
مهاب ابتسامته توسعت : رقمك ومدلها نقاله
ليال رفعت حاجبها وقالت : شن تبي فيه !
مهاب ابتسم بعبط : بنديرله برواز ونعلقه ف داري
ليال ضمت يديها لصدرها وقالت بغرور : لكي الشرف من زيك يقعد رقمي امعلق ف دارك
مهاب ضحك بتفاجأ وفنص : حي علي البنت ....مغروره والله
ليال ضحكت
مهاب خبطها بنقال ع يدها وقال : اكتبي
ليال خذت منه النقال بنفتره وبدأت تكتب ف رقمها
#يتبع♥