#وكر الأشتر

البارت الحادي عشر

البارت الحادي عشر
رواية .. وكر الاشتر
بقلمي..نور سمو العراق

💔💔💔💔💔💔💔💔💔💔💔💔💔

ها هنا ابي نقل شتاتي الى جحيم الاشتر

...........................

لحظات اشبه بسكرات الموت جنت بلحظة صمت واني اتنقل بنظراتي عليهم شلون يتجادلون وكلام ابويه الي كله سم وحقد وخبث بحيث يتمنى موتي

صفنت اني شمسويه اله حتى هيج يريد بس يتخلص مني ظليت حتى اشك بنفسي معقوله اني مو بنته معقوله اكو اب يحرض على قتل بنته من دمه ولحمة

والله صافنه ومحتاره بوصف ابويه حيل محتاره ومن ماتت امي تخبل بالزايد صار حيل طاغي ويستفرد بينه

الاشتر گله.. اذا ارمش ولكيتك بالزياره تفطس بيها

ابويه فتح الباب بس ما نزل ورجع حجه ويه الاشتر بهدوء... باجر الناس تاكل وجهي يكولون بنته انهزمت وما غسل عاره ولا كتلها هيج الجيران راح تطعن بعرضي

رد عليه ببرود.. نعال على جيرانك

جاوبه ابويه بعصبيه... انت بعدك صغير وما عايش بكد عمري وراح تعرف العار شنوو وبعدين راح تندم واني هي بنتي واريدها وما اريد ازوجها الك

رفع حاجب بصدمة مصطنعه... ما شاء الله طلعلك لسان والله انت رجال وبيك خير ذيج بنتك كاعده ليوره اخذها انت رجال طلعها من السياره

هو تعصب على الاشتر... مو من حقك تاخذ بنتي اني اريدها كتلك هاي لازم تنكتل هاي الناس باجر تاكل وجهي من وراها

سحب جكاره من باكيته وشغلها ويحجي والجكاره بين شفايفي... اي مو جاي اگلك هاي هي كاعده ليوره روح اخذها

رد على ابويه... بس اخذها اتشاهد على نفسي وانت تقره عليه الفاتحة

جاوبه وهو ينفخ الدخان من بين شفايفه وبكل برود... لا بالقران حتى الفاتحة ما اقراها وما تلحگ اصلا تتشاهد على نفسك

گله بگلب محروگ... شفت تكتلني

جاوبه بدون نفس.. همزين تعرف

بلل شفايفه ورد عليه.. زين مو لازم اخذها وتجي تاخذها من بيتي لو اني غلطان

ضحك بسخريه .. انت مو كد الثقه ولا تنسى السالفه العوجيه السويتها من ثقيت بيك وطيرت ابو الثقه على العموم ما عندي اي ثقه بيك والمدام بحمايتي وعصمتي وطلعت من عصمتك

انت واحد مريض نفسي حجايه تاخذك وحجايه توديك والبلبل الفتان ابو سعدون بس يدفعك تجي تركض مثل العربانه

واذا خايف من الفضيحة كلهم تزوجت وزوجتها من بيت جدها كهلان لان لحد الان حزنانين على امها المغدوره وهذا ابسط حل

جاوب ابويه.. ما اقتنعت بكلام

رفع اكتافه بعدم اهتمام..مو شرط

تعصب ابويه وهو يصيح... بتي تنطينيها شنو ناخذها هيج هي غلطت ولازم تتعاقب

نزل من السياره وهو لازم سلاحه وابويه تراجع خطوات خايفه منه بس شنو وجهه جان عصبي ومبين حاقد لزمة من ياخته وهو يحط المسدس براسه... افلش راسك ترا تعبتني ولعبت نفسي امشي وخر من وجهي لا احطك برگبتي

استسلم للامر الواقع ورد على الاشتر بحزم.. خوش دام هيج ورضيت بيها بعارها اخذها لا اني ابوها ولا هي بتي والبيت ما تعتبه اخاف على اخواتها منها التشرد من البيت وتنهزم هاي ساقطه وما تسوي سوايتها غير العاهره واذا انت ترضا بالعار اني مو مثلك وباجر اذا سامحتها اخواتها يتمادن وكل يوميه وحده تنهزم منهن

رد عليه بجمود.. الزم بناتك وكض كاعگ وسولين ما تدخل بيتك اصلا اني ما اخليها تجيك

جاوبه بعصبية.. خوش متبري منها اليوم الدين واذا دخلت بيتي اذبحها وادخل سجن

ضحك بغرور.. وتدخل سجن ؟ عجيب منو گلك اذا طخيتها راح تظل عايش حتى تدخل سجن قصدك تدخل گبر

رجع للسياره وهو يمشي بثقه واني ما عندي غير الدموع بهذا الوقت لان استنزفت كل طاقتي وابويه هد كل حصوني لبنيه تنبني شخصيتها وتستمد قوتها من ابوها واني ابويه دمرني وهاني كدام الغريب ونقل شتاتي اله جان مصر ياخذني ويقتلني حتى اكون عبره لاخواتي لان طلعت من البيت من دون علمه هو صح غلط بس هو جبرني على الطلعه

صعد بالصدر وساق بسرعه جنت مرعوبه والخوف هدر كل شي متبقي من طاقتي لزكت روحي بالكشن وابجي

همست بصوت خافت... وين ما خذني

سكت مجاوبني وتجاهل سؤالي رجعت جددت سؤالي.. ما اكدر اروح وياك انت وييين ماخذنيييي (حجيتها بعصبيه)

دار وجهه عليه بحركة سريعه و وجهه ينطق بغضب لزم مسدسه بالمگلوب وعاط بيه بصوت عالي سببلي رجفه بجسمي كال. تسكتييين لا افلش راسج بالمسدس ادبسزززز

بلعت ريكي بخوف وقلق عطت بيه بصوت... لا تغلط عليه لا دكوووول ادبسز اني مو ادبسز

رد عليه بتهديد... سدي حلگج لا اترسه رصاص و تأدبي لا اعرف شلون اادبج حيوووووووانه هذا اللسان اعرف شلون اكصه بس انطيني صبر

شديت على شفايفي والدموع ماليه وجهي .. لا تغلط عليه لا بالقران اكتل روحي وابليك بيه

خزرني بحددده خفت منه حيل لان وجهه قاسي والجرح الي بحاجبه رعبني كال بجمود... انجبيييي

غمضت عيوني بأسى اريد واحد ينقذني مستحيل اظل ويه هذا وهو اصلا منو حتى ما اعرفه انوب بس يغلط وهددني يفلش راسي بالمسدس ما بيه فرق عن ابويه هم باجر يموتني

وحتى اخذني صح ما قبل ابويه يقتلني بس ما امني واخذني مثل الكبش الفداء عبالك فصليه لا بدله لا عرس واصلا اني مو بنفسي بدله وعرس اصلا ما اتمنى البسهن لشخص ما احبه ومجبوره عليه

حسيت بدمار نفسي وانهيار عصبي تهديد واضح من ابويه وهذا اخذني حاصل فاصل وما اعرف مصيري وياه شنو ما عندي وسيله غير الدموع وصرت مثل بلاع الموس لا اكدر اروح ويه ابوي ولا اكدر اظل وياه

وخطيئتي لا تغتفر بس والله انسجنت ظلم ومو من حقهم هيج يسوون بيه صح غلطت عليه بس هم مالهم شغل اني جنت أمشي بأمان الله وهم اجوا عليه الله ينتقم منهم وشكد حقراء من اشتكيت على ابويه وعلى الاشتر كلت راح ينقذوني انوب بدون كل شي يكولي ادعاء كاذب وسلموني الهم واحد وين يروح وهو كله هموم ومصايب وماكو اي منفذ حتى واحد يخلص منهم

بديت رحلة جديده من حياتي رحلة ما اعرف شنو ضامتلي من ايام ومن احداث وهو وجهه ما يبشر بخير لا اهل لا حسب لا نسب هسه كون عنده اهل جان تطمنت بلكي واحد يساعدني بس هو كل شي ماكو راح يستفرد بيه ويطيح حظي

جان يسووق بسرعه ويخطف من بين السيارات بعدها وكف من دون سابق انذار كال.. اكعدي ليكدام

تفاجئت كتله.. ليش ؟

رد عليه .. بلا اسئلة ماصخه ما الي خلگ اكعد اشرح

تعصبت ونزلت من السياره  بس ما كعدت بيها عفته ومشيت خطوات مبتعده عنه صاح عليه من باب السياره بصوت غاضب.. ترجعين لا اكسر رجلج

تغافلت عنه وكملت خطوتين وما اسمع الا صوت الطلقه اخترق اذاني عطت بصوت عالي وكعدت على الارض واني اسد اذاني واصرخ ما توقعته يرمي عليه ابد ما توقعت

لحظات ومر عليه طيف ماما من سمعت صوت الرصاصه الي نهت حياتي وانعاد عليه نفس الموقف ظلت كاعده على الارض وساده اذاني واصرخ بصوت عالي وابجي والطم والهج بإسم امي

جان المكان شبه فارغ وخط سريع ما بي ناس

نزل بسرعه من السياره حسيت بي وكف على راسي رفعت عيوني الدامعه اله وگلبي يرجف من القهر والحزن والخوف باوعتله برجاء

شفته واكف مثل تمثال صلب عاكد حواجبه وشاد على شفايفه وسلاحة بيده صك على اسنانه كال.. ليش تجبريني ااذيج ليش انهزمتي مره ثانيه

زحفت على الارض وعصرت التراب بيدي همست بخوف والدموع تحرك خدي هزيت راسي بنفي.. لا والله  لا نزلت بس اشتم هواء انت تدخن واني عندي حساسه من الجكاير

جاوب بسخريه.. هااا كلتي حساسيه من الجكاير مو

هزيت راسي باي كعد كدامي ركبه ونص والسلاح بيده كال.. ليش ما تتقين الشر وتمشين عدل

واردف بحيره.. ولج شكد صادفت وشكد صادقت بس مثلج عرمة مشفت انتي شنوو ليش هيج وكحه

جاوبته بخوف وقلق وعيني عليه وساعه على مسدسه.. لا بالعباس مؤدبه بس يعني مثل مكتلك دا اشتم هوا من الدخان اختنكت

رفع حاجب وهو يتنهد ... احاول اصدكج عموما اصعدي بالصدر وبدون تهور وسوالف مال زعط فاااهمه

وكفت واني گوه امشي شلون نذل راد يكتلني شكد حقير يرمي عليه جان موتني انوب خفت منه بالزايد الله لا يوفقك ان شاء الله انت وابوي عساكم بالمرض حتى تعرفون شلون تذلونه

جنت امشي كدامه وهو وراي جان باب السياره مفتوح صعدت بالصدر فاتت سياره وكفت وهو يگوله.. هلا بالحبيب محتاج شي

رد عليه ... حبيبي ربي يوفقك لا ممحتاج شي جانت حاميه ودرتلها مي بردتها ( يقصد السياره)

بعدها صعد بالصدر وهو يسوق واني راسي حسيت حينفجر كد ما لزمني صداع طير مخي والموقف لحد الان راعبني

شويه و وصلنه وكف عند منطقه سكينه عباره عن شقق حلوه والمكان حيل حلو نزل بعد ما سفط سيارته بالكراج

لزم ايدي وهو يمشي واني كلي وسخ والصايه كلها تراب ونعالي وردي مال حمام وملابسي بيدي حالتي مال متسوليين اموت واعرف شعجب بيه

دخلنه للبيت جان حلو نوعا ما صاله وغرفة نوم وملحقات بس بيها اثاث ومرتبه

كعد على قنفه ومسح وجهه بتوتر جنت واكفه بكل ادب باوعلي اشرلي كال .. روحي اخذي راحتج بالغرفه

هو ما گال هيج واني اركض واقفل الباب واكو ميز سحلته وخليته على الباب حتى خاف اله نيه يدخل عليه ويغتصبني عاد ما يكدر

نمت على الجربايه بوسخي لان الحمام برا ولو اعفن ما اطلع من الغرفه واخلي يشوف طولي ما عندي قوه اقابله واحجي وياه ولا عندي طاقه وخايفه حييل وضايجة احس صدري يوجعني وگلبي يريد يطلع من القفص الصدري

دخلت بنوبة نحيب طويله وبعدها نمت من بعد يوم طويل وشاق ما انساه لو يصير عمري مية سنه

...........................

جيهان

رجع ابويه وجهه ما يتفسر وهو يروح منا ومنا خفت اساله عن سولين حتى السؤال نخاف منه ابويه ابد ما يتفاهم

لزمت افيان وحاجيتها.. لا تحجين وياه ولأ تسألين عن سولين الا هو يجاوب خاف نساله ويكتلنا خليني ادز امين هو يساله

كالت .. عساه بالموت هذا شوكت يموت طول وبعدين اكولج اني اريد اداوم فصلوني

فتحت عيوني مصدومة.. اشش لا تحجين هيج ابويه اذا سمع بيج تردين تداومين يموتج كتل

ردت بعصبية وعناد.. لو اعرف اموت بيده اداوم اداوم انوب حتى من مدرستي يريد يبطلني حتى اصير مدمغه اله

عفتها ورحت هي عنوديه واذا رادت شي تسوي تسوي دزيت امين على أبويه وسأله كله.. وين سولين بابا

رد عليه بعصبيه... لا تسأل عليها هاي الساقطه ام الشوارع سلمتها لرجلها وراحت وانت صير رجال وضب اخواتك من اني مموجود الزمهن بصونده وكتلهن خاف وحده تطلع تطب يدخلن زلم

جاوبه امين ببراءه... لا لا خاف ينهزمن مثل سوليين من ضربتها انت انهزمت واني مشتاق الها

شاله من تشيرته وهو ضعيف وناعم ظل يبجي من الخوف عاط بيه ورجليه تتلولح گله.. شوف لك سولين القندره تنساها مفهوم وإذا ذكرت اسمها على لسانك اشنقك واكتلك مثل ما كتلت امك ذيج العار

لزمته واني اتوسل بيه.. عوف امين خطيه مريض لا تخوفه هيج

نزله وتنهد كله... شوف لك صير رجال وعوف سوالف النسوان ولكيتلك شغل تشتغل ويه ابو سعدون هو مو عنده وكاله ويوزع حصه انت من تجي ناس تاخذ الحصه توديها بالعربانه مفهوم

انتفضت افيان من مكانها... شنووو انت شكد ظالم طفل هذا طفل وين بي حيل يدفع عربانه انت تريد تكسر ظهره من هسه واتوب مشغله يم هذا الشايب المنافق الدجال والله انت مجرم

هجم عليها وضربها على راسها بقوه حسيت بيها داخت من الضربه وعضت لسانها والدمع فيض حلكها مسحت الدم بكم ايدها وبدون اي ردة فعل حتى بدون صوت

ركضت عليها واني احضنها واحميها منه رفسها برجله وهو يغلط.. كح.. مثل امج لسانج هذا الطويل اذا ما كصيته اطلع جلب ابن جلب

عافته وراحت وهي تمشي بثقه ودمعه ما وكعت منها ظل يصيح ويغلط ومصر يشغل هالطفل حتى يحصل كم فلس من ابو سعدون الحيوان

خله وطلع وهو يصيح.. تعبت مليت جبت عمري اشتغل ومدللهم دلال ما مخلي عليهن عازه حاطهن مثل المي بالصينيه وهن كل وحده لسانها شطوله وناكرات وفكريات مستخسرات ابني يشتغل وينطيني فلوس كح،، مثل امهن جانت تشتغل وتعز عليه فلسها فلوس الحرام

بعد ما طلع لزمت امين وحضنته وبسته مسحت دموعه انوب صار عليه هم شكبره اني روحي ما متحملتها انوب صار عليه هم اخواني واني نفسيتي تعبانه وطالعه روحي شوكت ارتاح ومن راحت سولين حسيت بالمسؤولية تجاه اخواني وين راحت امي والله تعبت ومليت ليش ماتت واني بامس الحاجه الها

وكريم بعد ما اجه جان تجايتي وعكازتي محتاجته محتاجه انام على صدره مرتاحه واشكيله همي ومحد يطيب خاطري غيره ضايجه ضايجه حيل وحلمي سراب واركض وره وهم شوكت ارتاح شوكت تخلص من هاي الحياة الي ما شفت منها راحه من صغري لحد الان

........................

سولين

كعدت من النوم واني جنت تحت تاثير حلم حلمت بامي جانت عايشه وحاضنتنه واني اشكيلها واكولها عن الي صار بينه وعن كل شي سواه ابويه من بعد ما عافتنه

اول ما فزيت رجعت نمت واني اغمض عيوني اريد اعيش واقع الحلم ولا اكعد منه شكد جنت فرحانه حاولت انام ما اكدر تمنيت لو نايمه العمر كله ومكاعده شلون حلم حلو جنت بحظن امي حتى دا اشم ريحتها بيه

ظليت كاعده ما اعرف شكد نمت ولا اعرف ليش الساعه وهو وين وكفت حطيت اذاني على الباب واني اتنصت عليه بس ماكو شي كلت يمكن طالع

وخرت الميز وفتحت الباب باوعت يمنى يسرى ملكيته حمدت الله وسكرته من اشوفه تتوتر اعصابي ركضت للحمام دخلت سبحت بسرعه وطلعت اركض دخلت للغرفه دورت الجرارات لكيت مشط مشطت شعري وظفرته

كلت خلي ارجع اسد الباب واخلي الميز دا اريد اسده وهو صار بوجهي باوعلي كلي... صح النوم

جاوبته بخوف.. هااا اي الله يصيحيك

ابتسم باستهزاء.. شنو خبل ويصحيني جوعانه مو

هزيت راسي بنفي... لاااا

رد عليه ببرود .. يله راح اجيب عشا من تجوعين اكلي

خله وطلع حمدت الله وشكرته من طلع بلكي الله وبعد ما يجي ترا مو حاله هايه عبالك جني لعد مو جان مموجود منين دخل وهي اصلا بس غرفه وصاله وحمام  معقوله جان بالحمام عزاااا لا شنو ممعقوله مو سبحت مشفته

ظليت تقريبا ساعه وهو اجه خله الاكل بالصاله على الطاوله وطلع من دون ما يكول هذا الج جنت ميته جوع بس مكدرت اكل خفت كلت يمكن جايبه اله انوب اروح اتفشل بس والله جوعانه ميته جوع ولو ما الي نفس اكل

افتريت وكبريائي يفتر ويايه بعدها تهورت اخذتلي لفه اكلتها ورجعت نمت الله ذب عليه نوم كد ما تعبانه وراسي يوجعني موتني وعيوني ما اشوف بيهن كد ما بجيت ورمن وحتى كوه دا اشوف بيهن

نمت شويه حسيت بطكطه فتحت الباب ورجعت بسرعه دخلت  شفته كاعد هو واحد طويل وضعيف وياكلون اكل المطعم الجايه وهو يكوله... همزين المدام متعشيه طلعت مو سعلوه ماكله شويه

رد عليه ... اي صدك مبروك تزوجت بس شنو سالفتك لا هوسه لا هلهوله اموت واعرف هاي العروس ما عندها اهل لو بايعينها ماكو هيج زواج ابد

حسيت الحسره تكسرت بصدري وتفاجئت شلون صديقه يحجي هيج كلام وفعلا هو ممجذب حسيت نفسي باعوني وجنت سلعه رخيصه ما اشوف الا دموعي نزلت وادركت اني ابجي من دون شعور

هو رد عليه بعصبيه.. تأدب عايد لا اشگ حلكك شنو بايعيها هاي مرتي واهلها شيوخ
ضحك وهو يرد عليه.. شبيك اضحك وياك

رجع ياكل بهدوء متغاضي عن كلامه.. سولفلي الوكر شلونه ما لونه صار مده ما رايح وهم يحجون عليه احجي لا تخاف

رد عليه.. محد جاب طاريك بسوء بس وحده

جاوبه بسرعه.. عرفتها ماكو غيرها مياده الساقطه ام الزلم بله احجي شتحجي عني

رد عليه وهو يضحك... تكول الاشتر جان يعاكسني وطلب مني شغلات بس مقبلت ههههههه بس اني متت ضحك عليها مصدكه روحها

جاوبه.. شكد نغله لك هاي شبعوا بيها المنطقه ولا عبالك اني ابيع عليك شرف بس مياده تلعب نفسي منها جنها هايشه وريحتها خايسه لو وحده غيرها اروح الها بس مياده لا مستحيل غير هي السكن مال المنطقه من يجي تصعده

خرب ظل يفشر كبر ايع هذا شنو وين عايش باي مزبله

بعدها رد عليه.. اي والصراصير لاعبات جوله هاليام ماكو زاغور ما دخلن بيه

عقد حواجبه.. خرب ذن بله زايحاتها اكلك هن شسمهن الحقيقي

عايد.. ازهار وشوشو وها يحجن على سالي يكولن تدور سوالف + ١٨

ضحك وهو يجاوبه.. يرحلها فدوه يغارن منها لان حلوه ومثقفه حقهن يغارن منها سالي انثى بكل معنى الكلمة

صفنت اذا هيج يمدح بسالي وسالي حلوه.. لعد ما تزوجها شكو اجه عليه يمكن يحب سالي ويتزوجها واني هنا يدمغ عليه ما اعرف شنو اللغز من زواجي منه

رد عليه عايد... اوووف تجنن سالي بس شعرها يسوه عشر نسوان سالي جنها سيراميك الكاظم تلمع انوووب بيضه والعيون بويه من تصد اطيح جتيل

جاوبه بعدم قبول.. انجب وسد حلكك هو الجلب شكد ما يسمن ما يصير خروف وانت شكد احاول اعدلك ما تتعدل

ضحك وجاوبه.. ما تزوجتها اذا هيج

جاوبه .. لا بعدها صغيره سنه رابعه جامعه

صدك اني تعصبت وضجت صحت عليه .. لعد اني هسه نجحت من السادس شكو تزوجتني

هو تخبل وطفر من مكانه بسرعه اجه عليه يركض ردت اسد الباب هو دفعه ودخل جاوبته...شش شبيك

لزمني من ثوبي وسحبني حييل كال.. ولج شلون تتجرئي وتحجين بحظور صديقي انتي شنو من كله تحبين التكفخ

رديت عليه بلعثمة.. اا اي من مجذبه انت متناقض دكول جالي مدري سالي صغيره واني اصلا اصفر منها بخمس سنوات

عاط بيه.. اكفجخ هسه كاعد اسولف اني وصديقي شكو تحشرين نفسج بالنص انتي شنو ليش هيج عينج صلفه عليمن طالعه بت الكلب اذا بعد تجرأتي اشك حلكج سامعه

ابتعدت عنه كتله بغضب... لا تغلط

جاوبني... انجبي

جاوبته بعنااااد... ما انجب

عض شفته وعيونه تتنقل لوجهي بجرئة كال .. حلكج حلووو

حطيت ايدي على شفايفي بخوف ومشاعر الخوف سيطرت عليه ابتعدت شويه

ابتسم ابتسامه جانبيه وعيونه تتاملني وخله وطلع من الغرفه وهو يعدل بقميصه

بلعت ريكي بخوف وتذكرته من باسني اول مره عزا شلون ادبسز يباوع لشفايفي يمكن يريد يعيد السالفه لا توبه بعد ما استفزه ولا احجي اي شي نذل اكرهه انوب يغازل بجالي مدري سالي كدامي

عطشت ردت مي وهو بس يحجي ويه ذاك صديقه انطاه سوالف منطقه مدري شنوو جان صحت عليه... اكلك  تعال عطشت

هو اجه متعصب كال.. بت المطي بت الزمال شبيج كل شويه وعطتي متعرفين تدكين لباب واني اجي

رديت عليه بعصبيه.. كتلك لا تغلط مجرد ردت مي الحسين مات عطشان شنو بعد كاطع عليه المي عبالك يزيد ابن معاويه

جاوبني بغضب.. هسه افرك حلكج فوك ولج بت النعال خليني محترمج لخاطر ابوج وراد حق الصداقه

صفنت محترمني الخاطر ابويه هو طلع ابويه من الطهاره وهو يكول محترمج لخاطر ابوج يله مخابيل ما عليهم عتب

هزيت ايدي باستهزاء.. شلون صداقه وانت كل شويه مرزله

رد عليه.. مالج شغل اصدقاء بينه

كتله .. عطشانه

غمزلي.. ارويج

استغربت شنو يرويني جاوبته... اييي ارويني

ابتسم يروح عايد وارويج على طريقتي

تخصرت بعصبيه.. لا والله واني انتظر منا لمن يروح صديقك رويني هسه بسرعه ميته عطش

ظل يتنقل بوجهي وعيونه تنبض بإعجاب تنهد ورد عليه .. ما اريد ازعلج

طلع وبعدها جابلي بطل مي شمره عليه فجأة مكدرت الزمة وكع من ايدي بعد ما انضرب بيه واني تخبلت ردت اهجم بس كلت يكتلني اذا هيج والله يموتني سكتت

هو لحد الان يسولف ويه صديقه دكيت الباب ما اجه دكيته حيل ما اجه ضربت الباب بثنين اديه حيييل وهو اجه مثل الثور الهايج من شفته شردت وختلت وره الكنتور

هو جرني من ايدي ولواها كال.. تردين اكسرها شبيج انتي نعال بت النعال شبيج تخبلتي شتردين

جاوبته بخوف وقلق.. لا بس اريد اطلع اتوضى واريد اسالك هسه احنه شنو ليل صبح ظهر ويا اذان اذن

سحبني من ايده ودفعني على الجربايه  كال بتهديد.. من اكعد يم واحد تادبي وصيري عاقله نفس ما اريد ولج انتي شنوو خبله لو بيج خيط الا هو ابوج عامر قابل شتطلعين اية الله العظمى

جاوبته.. يعني هسه اني صرت مو زينه لان اريد اصلي عجيب والله بس بعد الله اعلم انتم شنو من مله تصلون تعبدون الله اعلم

رد عليه .. مالج شغل اصلي ما اصلي هذا مو شغلج انتي هنا تاكلين وتشربين وتسكتين

رديت عليه بغضب... لا والله شنووو بهيمه اكل واشرب وما اناقش ترا هاي مو حاله ليكون  متزوج صحبه واني ما اعرف

مسح وجهه بتوتر .. استغفر الله ياربي شلون تخلص وياج هاي اول يوم وهيج شكيتي حلكي من اخذج هناك شلون

جاوبته.. طلگني ولا تاخذني لأي مكان

ضحك ..ما دام مصره على الطلاق تحلمين اطلكج وبعد اذا صحتي عليه هنا ادفنج

شديت على شفايفي بغضب... شكد اكرهك

باوعلي من فوك ليجوه وهز ايده وطلع

ظليت امشي بالغرفه وافرك باديه لكافر الحقير انوب حتى اوقات الصلاه مكالهن وما يصلي يطبه مرض لا يصلي ان شاء الله جهنم وبئس المهاد شدخلني بيه

اذا هو سلاحه ويهدد واتوب نسوانه الصراصير ومياده وسالي تجمع عفطيه العراق شلون شله نكسه

احتاريت وين اتوضى والمكان صغير وهي غرفه وبس بطل المي رددت بداخلي .. الهي لا تؤاخذنا بما فعل السفهاء هذا انسان سفيه حرمني من صلاتي ان شاء الله كل ذنوبي عليك تتحمل ذنبي وكل سيئاتي انوب السانه ولغلطه ومن جنت عند اهلي مسوي ووحه مؤدب واخلاق وهو يغلط ويكعد يعتذر هسه استفرد بيه والغلط يتطاير مثل النعل

بعدها خله وطلع واطلع توضيت وصليت وريحتة الدخان تراسه الصاله ما اختنك وفطس ومات

....................

رنا

طلعت روحي من المصايب حارث متخبل على سولين منجن على سولي وكل شويه وتعارك هو وامي امي اخاف عليه دكوله لا كتلك هذا رجلها وهو يكول اكتله اكتله

بصراحة خطيب سولين مو هين والله مبين واحد داهيه واخاف على اخويه منه وخايفه لا يسويله شي مبين مجرم وراه ظهر مسنود منه الا ما يجي وهيج يقتحم بيتنا

ضايجه حيل خليت ورحت لبيت جدو كهلان كوثر هسه اجت من الجامعه كعدت كالت.. وييي الجامعه تعب والله تعب وهذا الدكتور قافل وكذا افهم عليه شكد اكره الاساتذه الشياب ميتحاجون وعبالهم عقلهم مثل عقلنه

ظلت تحجي وتحجي اجت حنان كالت ... ها كوثر حبيبتي اصبلج غدا

جاوبتها.. لا تغديت بالمطعم اني نعست حروح انام

جاوبتها.. واني اظل كاعده وحدي

ضحكت.. والله نعسانه وراسي حيل دياذيني يله عمري اكعدي ويه حنان وعمه ام حسن

تربعت وحطيت الهتفون باذاني... دنجبي واكلي نعل خليني اخابر كريم مشتاقتله

حنان ردت.. اي. والله كولنه مشتاقين اله البيت فارغ من دونه اذا حجيتي وياه حاجيني

خابرته محصلته خابرت ماكو كلت خلي اخابر جاستن على الاقل اتونس وياه خابرته رد عليه كال.. بالسنتر شلون جابولي بضاعه فستان احمر يلوك الجسمج

جاوبته.. هييي لا تتجاوز حدودك عيب عليك

رد عليه .. ظل عيب دهر صاب النسوان شكد حلوات انتي عدنا مو

جاوبته.. اي موجوده عندكم جيبلي وياك كيكه جاهزه

جاوبني.. اجيبلج نعال جاهز تردين

اجيت اتجاوز عليه بس اني محترمة قفلت الخط بوجهه ورحت

رحت دا ادور على حنان وسمعتها تحجي بالموبايل وهي دكوله.. مشتاقتلك والله ميته عليك مشتاقه من جنت اكعد يمك واشم عطرك انت بس انطيني فرصه وانت حتعرف شكد اني احبك

انصدمت صدمة عمري هاي شنو ويه منو دنحجي معقوله ويه جدو كهلان اي يمكن ويه جدو لعد ويه منو

سمعت صوت جدو وهو يصيح... وينجن ام حسن حنان تعالن

هي تلعثمت بسرعه وقفلت الخط واجت تركض باوعتلي انصدمت وبعدها طلعت وهي ترتب بدشداشته كلتله... هااا شيخ هسه نور البيت اهلا وسهلا بيك سوده عليه مبين تعبان بالي عندك

ضحك وهو يلزم ايدها.. ان شاء الله ما ينشغل بالج على غالي شنو وين ام حسن

جاوبته... نايمه تدخل تسبح محضره حمامك او تريد اني اسبحك تتدلل

انصدمت من جرئتها ونفاقها هاي شنو من مله سحبت نفسي وصرت وره باب المطبخ

رد عليها.. لا ما اريد اتعبج اني اسبح بس حضريلي غدا وخليني اخابر كريم بالي عنده

حضنته وهي ترد عليه وتتدلع .. عوفنه من كريم هسه مشتاقتلك انت من احجي وياك بس تسولف بولدك وبنتك ولأ كآن الي وجود

ضحك وحضنها رد عليها.. تغارين من ولدي بس ترا اني احبج وما افرق بينج وبينهم

حطت ايدها على لحيته وهي تغرز اصابعها بيها... لا تفرق متحبني وانت وعدتني تسفر امي على حسابك لمكه وما نفذت وعدك

سحب ايدها وباسها.. تتدللين انتي وامج

رفع راسها وهو يبوسها كلها.. تعالي للغرفه

اييع لعبت نفسي منهم شجابني هسه اني ..شايب وجاده ثلاثينيه  والموضوع مقرف

سبقها للغرفه وهي تنهدت ... شوكت تفطس وتموت واخلص منك اييع شايب مراهق

حطيت ايدي على راسي مصدومة متفاجئة شنو هاي صدك تحجي اذا معاجبه ليش حاضنته وتبوس بي ومن راح كعدت ادعي عليه يمه هاي شنو من مله كل صفه سيئة بيها عزاااا الله يبعدنا عنها ودا احس نفسي مسويه مصيبه

خابرت حارث وطفرت لاهلي عزا لا ما اتحمل هيج نماذج...

.................

بعد مرور اسبوعين

تقلبت على فراشي بملل وجزع تنفست بعدم ارتياح ما اعرف شد احس بس احس بوجع فضيع ولازمتني سخونة

هو لحد الان مموجود اثار عندي الشك هذا الرجال فضيع يتصل هواية يغلط ويفشر هوايه ومستفز حييل ويتأخر هوايه

شنو قصته شكد ما جنت اخاف منه تضاعف عندي الخوف اضعاف وما حسيت بأمان وياه رغم ابد ما اذاني ولا سوالي شي ولا اصلا باوع بوجهي وهذا الشي الوحيد الي مريحني ومطمني

بس اول يوم صارلي مواقف وياه بس خلال هاي الاسبوعين حتى ما باوع بوجهي ولا حجه ويايه انوب مخلصتها اكل ونوم يجيب اكل من المطعم واكل وانام ماكو اي حركه

احسه غريب عني احسه هو بوادي واني بوادي واحس وجودي مزهرية بالنسبة اله لا نفع ولا دفع ودائما أسال نفسي شنو لمغزى من زواجي منه لا يدور حقوق ولا شي واصلا ما لافي مشايفته اربعه وعشرين ساعة يفتر خارج البيت

بس تقريبا اني مرتاحة وعدم وجودة مطمئن نسبيا بس احس نفسي بسجن كآبة فول محبوسة بين اربع حيطان وبالي عند اختي جيهان واخويه أمين

لحد الان مديروح مشهد قتل امي من بالي هذا مجرم هو وابوية قتلوا امي بدم بارد واني مستحيل اعيش وياه كارهته من غير الخوف والرعب الي يحاوطني بوجوده  اي هم اعتبره قاتل لان هو جان موجود من ابويه ضرب امي وما اعرف ليش ابويه قتلها وهو شعنده جان موجود

واني ما اكدر اظل عايشه هيج مكبوته واذا انتقمت منه راح انجح ؟ لا طبعا

واني متأكدة منه ما يقتلني مخليني اتعذب شويه شويه حياتي تدمرت بس دخل بيها هذا الرجال

من بين افكاري نمت وصحيت على صوت قوي بالبيبان هو طبعه من يفتح الباب يفتحه على كيف استغربت

طلعت اركض وباوعت من العين السحريه الي بالباب شفته واحد ضعيف يجي عمره بالعشرينات وجهه كل حب شباب و وجهه مزلغ وعيونه ناطه وشعره كفشه شكبرها جنها سيم مواعين

رجع ايدگ وهو يصيح.. الاشتر وينك يمعود دوحي سكران ودخل لبيتك وهسه حابسينه بالخرابه شلون اله جرئة ويدوس بيتك

استغربت يا بيت يا دوحي شو هو غير هذا بيته شنو السالفه جاوبته... منو انت والاشتر مموجود

رد عليه بذوبان.. منو انتي حلوه لو لا

جاوبته.. دنجب اني مرة الاشتر

جاوبني بصدمة... شنووو تزوج الاشتر خرب هسه العاشكاته بالمنطقه ينجن خخخخخخخخخخ الصراصير يتخبلن ومياده النغله تنتحر

هزيت ايدي وجاوبته.. اي مو هو براد بيت وينتحرن لخاطره شو لا خلقه ولا اخلاق

تنهد.. اي بس يحبنه لان هو شخصيته حلوه المدهور

تعصبت.. وهسه شتريد ترا دايخه ولعبانه نفسي

كال... خاف حامل

فتحت عيوني بعصبيه... شكد ادبسز امشي روح منا

جاوب باستهزاء.. ادري هي لتتزوج غير تحبل قابل شنو مخططاتها وره الزواج غير الحباله والحفاظات

جاوبته بدون نفس... دكافي كافي شكد تحجي الاشتر مو هنا عود من يجي اگله باگو اثاث البيت

ضحك ... خخخخخخخ ولج يا اثاث هو ماطور المي وعطلان بس احنه حبسناه لان داس بيت الاشتر بغيابه

انزعجت.. عود يجي واگوله يله روح

عفته ودخلت جوه ايع شنو هاي شنو هالعبان نفس هذا صدك يحجي شكو واحد تافهه مصادقه وعفطي شنو من بشر هذا

انتظرته ساعه ودخل وجهه بيه شهر صفر كعد بدون سلام وكلام

كعدت قريب منه كتله.. اجه عليك ولد ويكول واحد اسمه دوحي ساطي على بيتك

باوعلي وتنهد بدون ميجاوب

انتبهت على ايده مكتوب بيه اسم حاولت اقراه طلع ويايه اسم بنيه اسمها رحيق

رمشت بعيوني وحجيت بصوت عالي... رحييق

هو فز من مكانه كال.. شنووو

اشرت على ايده... هذا الاسم رحيق مووو

رفع كف ايده وهو يتفحصه جر نفس ونزل ايده وسحب جكاره من باكيته وهو يدخن

اردفت بسخريه... هم دايحه مثل مياده وجماعتها

فتح عيونه مصدوم وهو يباوعلي عبالك كفرت فز من مكانه ما حسيت روحي اله مخنوگه بيده وعيونه تتطافر شرار خفت منه حيل وشهكت واحس انفاسي طلعت بيده

نهاية البارت ... يتبع

كونوا انتم كونوا بخير... احبكم 💔

لا تنسوا التصويت والمشاركة بكم نكتمل 😍

واعتذر عن عدم النشر البارحه بسبب حالة وفاه صارت عندنا توفت اخت عمتي ام زوجي ورحت اديت الواجب وملحكت🥺💔