Part 13
ဂန်ဟန်ရဲ့ဆိုင်လေးမှာ လမ်းမကြီးပေါ်တွင်လက်ညှိုးထိုးမလွဲရှိနေသောအထပ်မြင့်တိုက်များကြားထဲတွင်ရှိသည်။တစ်သီးတစ်သန့်ဆန်ဆန်အဖြူရောင်တစ်ထပ်တိုက်ဖြင့်ဖွင့်လှစ်ထားသည့်ဆိုင်ကလေးဖြစ်သည်။ရှေ့မျက်နှာစာအားလုံးကိုမှန်ဘောင်များဖြင့်လုပ်ထားသောကြောင့် ဆိုင်ထဲရှိပိုးထည်လိပ်များနှင့်စင်ပေါ်တွင်သေသပ်စွာစီရီခင်းကျင်းထားသော ပိုးပုဆိုး၊ပိုးချိတ်ထဘီများကိုလဲတွေ့နိုင်သည်။ဆိုင်တွင်းခင်းကျင်းထားသောအပြင်အဆင်များကိုကြည့်ခြင်းဖြင့် အဖြူရောင်ကိုအသားပေးသုံးထားမှန်းသိသာသည်။ချိတ်နှင့်ပိုးရုံများကိုအလှပြခင်းကျင်းထားသည့်နံရံကပ်ဘီရိုမှအစ၊ကိုယ်လုံးပေါ်မှန်များနှင့်ပါကေးပေါ်တွင်ခင်းထားသော အမွှေးနုနုအဖြူရောင်ကော်ဇောလေးများပင်သက်သေ။
ဆိုင်ကိုအမြဲနေ့လည်မှလာတတ်သဖြင့် နေ့လည်စာကိုလဲဆိုင်ရောက်မှစားတတ်သည်။ဆိုင်ထဲဝင်သွားတော့ မန်နေဂျာအမကနေ့လည်စာစားဖို့ပုံမှန်နေ့တွေလိုပဲပြင်ဆင်ပေးထားသည်။ခြယ်ကတော့ ဆိုင်ထဲရှိအထည်အလိပ်များကို စိတ်ဝင်တစားနဲ့လိုက်ကြည့်နေသည်။
'ခြယ် နောက်မှကြည့် နေ့လည်စာစားကြမယ်'
'ဟိုစင်ပေါ်ကချိတ်ကလေးတွေလှတယ်နော်ဂန်ဟန်'
'အင်းဟုတ်တယ် အဲ့အပေါ်ကမင်္ဂလာဆောင်မယ့်သတို့သမီးတို့၊ပွဲတတ်တဲ့သူတွေအဝယ်များတယ် ထည်လဲထည်တော့ ပြီးရင်သွားကြည့်ကြမယ်လေ အခုတော့ထမင်းအရင်စားကြရအောင် ဗိုက်ဆာနေပီ'
ထမင်းစားပြီးနောက် ခြယ့်ကိုမန်နေဂျာအမနှင့်ဆိုင်ရှိဝန်ထမ်းကောင်မလေးများနှင့်မိတ်ဆက်ပေးသည်။
'ခြယ်ကဒီမှာဂန်ဟန်နဲ့အတူဆိုင်ကိုကူကြည့်ပေးမှာ။ဂန်ဟန်သူငယ်ချင်းမို့ အားလုံးတစ်ခုခုဆိုလဲခြယ့်ကိုကူညီပေးလိုက်ကြနော်'
'ရော့ဒီမှာ ခြယ့်အတွက်'
'အမ် ဘာဘူးလေးလဲ'
'ဖောက်ကြည့်လိုက်ပါ ဆိုင်ကိုပထမဆုံးရောက်တဲ့အထိမ်းအမှတ်အနေနဲ့ပေးတာ'
ခြယ်ကမြန်မာဝတ်စုံလေးတွေနဲ့လိုက်ဖက်သူမို့ ဆိုင်မှာအလုပ်လုပ်မယ်ကြားကြားချင်း ဆိုင်ကိုချက်ချင်းလှမ်းဆက်ကာ ပြင်ထားခိုင်းခြင်းဖြစ်သည်။
'ချည်သားလေး လှလိုက်တာအေးမယ့်ပုံလေးပဲ'
'ဟုတ်တယ် အဲ့တာဒီလမှထွက်ထားတဲ့အင်းလေးချည်ပန်းထိုးအဆင်လေး။ဟိုတစ်ခါဘုရားပေါ်မှာတွေ့တုန်းက ချည်ထည်လေးဝတ်ထားတာ ခြယ်နဲ့သိပ်လိုက်တာမှတ်မိလို့။ဒါလေးထွက်ကတည်းကပေးချင်နေခဲ့တာ၊အခုမှပဲကြုံတယ်'
ခြယ်ကတစ်ယုတစ်ယနှင့်အထည်လေးကိုဖြန့်ကြည့်ပြီး သဘောကျနေတော့ ရှက်သလိုလိုတောင်ဖြစ်မိသည်။နောက်တော့ဆိုင်ထဲကပိုးရုံနှင့်ဇာတွေလိုက်ပြတော့ စိတ်ဝင်တစားနဲ့ပြောသမျှကိုခေါင်းတညိတ်ညိတ်လုပ်ကာနားထောင်နေသည်။
'နောက်ကျရင် ခြယ်အားလုံးသိသွားမှာပါ ဖြေးဖြေးချင်းကြည့်ပေါ့ ဟုတ်ပီလား'
ဒီလိုနဲ့ညနေကျတော့အိမ်အပြန်ကိုလဲအလာတုန်းကအတိုင်း အတူရှိချင်သည်။
'ခြယ် ညနေကျရင်တူတူပြန်မယ်နော် ခြယ့်ကိုဝင်ပို့ခဲ့ပေးမယ်'
'အင်း ရတယ်လေ'
'ညနေကျအပင်ဆိုင်ဝင်ချင်လို့ ခြယ်လိုက်ခဲ့မလား'
'အပင်ဆိုင်ဟုတ်လား ဂန်ဟန်ဘာပင်ဝယ်စရာရှိလို့လဲ'
'ဒီတိုင်းပဲလေ ဆိုင်မှာဝင်ကြည့်ချင်တာပါ ဂန်ဟန်ကမသိပါဘူး ခြယ်ရွေးပေးပေါ့။အိမ်ထဲနဲ့ဆိုင်ထဲမှာထားဖို့ indoor plantလဲနည်းနည်းလောက်ကြည့်ချင်လို့'
အမှန်တော့ထိုဆိုင်လေးသည်ကိုယ်လိုအပင်စိုက်ဝါသနာမပါသည့်သူကိုတောင်သလောကျစေသည့်ဆိုင်ကလေးဖြစ်သည်။မေမေနှင့်တူသော သူမသာဆိုလျှင်လဲသဘောကျမည်ဖြစ်ကြောင်းသိသဖြင့်ခေါ်သွားချင်သည်။
'အင်း အင်း ခြယ်သေချာကြည့်ပေးမယ်။အိမ်ထဲစိုက်လို့ကောင်းတဲ့အပင်လေးတွေသိတယ်။ခြယ့်အိမ်မှာစိုက်ထားသလိုလေးတွေရော သဘောကျလား။နောက်ရက်ခြယ်ပျိုးထားတဲ့ marigoldအပင်လေးခွဲပြီး ယူလာခဲ့မယ် အိမ်မှာစိုက်ပေါ့။မနက်ကျလိုက်ကာလေးလှပ်ထား ဒါဆိုရပီ'
ခနအကြာတော့
'ဘန်ကောက်ကနေရောက်တဲ့စာရင်းတွေပါအမ'ဝန်ထမ်းညီမလေးကမ်းပေးသောစာအုပ်ယူကာ စာရင်းများကိုပြန်စစ်နေချိန် ကိုနောင်ရောက်လာသည်။
'အော်ကိုနောင်ပါလား လာဒီမှာထိုင်'
'မေမေလဲပါတယ်ကားထဲမှာဖုန်းပြောနေလို့။ပြီးရင်ဆင်းခဲ့မယ်တဲ့'
'ဟုတ်လား လမ်းကြုံလို့ဝင်လာတာလား'
'မဟုတ်ဘူးနောက်လအလှူသွားစရာရှိတော့ချုပ်ဖို့အစလေးဝင်ကြည့်မယ်လိုက်ပို့ပေးဆိုတာနဲ့လိုက်ပို့ပေးရတာ'
'ကိုနောင်ကိုမိတ်ဆက်ပေးရဦးမယ်။ဒါ ခြယ်တဲ့ ဂန်ဟန်သူငယ်ချင်း'
'ဟုတ်လား တွေ့ရတာဝမ်းသာပါတယ် ကျွန်တော်ခွန်နောင်ပါ'
'ဟုတ်ကဲ့ ကျွန်မကခြယ်ပါ'
'ဟောဟိုမှာ လာပါပီ၊အန်တီဆွေအကြိုက်တွေအသစ်ရောက်ထားတယ်။ရောင်းဖို့စာရင်းလုပ်နေတုန်းမလို့ ရောင်းတောင်မရောင်းရသေးဘူး။ဒီမှာ'
ဂန်ဟန်နဲ့ခြယ်ကခုံပေါ်တွင်တင်ထားသော ဇာပန်းထိုးအဆင်အသစ်များကိုတစ်ခုချင်းဖြန့်ပြသည်။
ပတ်ဝန်းကျင်ကိုအမြဲဂရုစိုက်တတ်သောအန်တီဆွေ့မျက်လုံးများက ခြယ့်ဆီသို့ရောက်သွားသည်။
'သမီးကဝန်ထမ်းအသစ်ထင်တယ်'
'ဟုတ်တော့ဟုတ်တယ် ဒါမယ့်ဂန်ဟန့်သူငယ်ချင်းပါ။ဂန်ဟန်ပျင်းလို့ဆိုင်မှာတစ်ခါတစ်လေလိုက်လာခိုင်းထားတာ'ဟုကြားထဲမှအမြန်ဖြေပေးလိုက်သည်။ခြယ့်လိုခပ်အေးအေးမိန်းကလေးနှင့်အန်တီဆွေလို အနည်းငယ်စပ်စပ်စုစုနိုင်ပုံနှင့်ဆို လျှောက်မေးနေလိမ့်မည်။
ပြောရင်းအထည်များကိုသာဆက်ရွေးနေသောကြောင့်တော်သေးသည်။
'အဖြူရောင် ချိတ်လေးပဲဝတ်တော့မယ်၊အလှူဆိုတော့ အဖြူလေးပေါ့။သမီးအန်တီဆွေတို့ပြန်တော့မယ်။သမီးမေကြီးကိုလဲပြောလိုက်ဦး ဆိုင်ကိုလာသွားတယ်လို့။အိမ်ကိုလဲလာလည်ကြပါဦးအန်တီဆွေဟင်းတွေရှယ်ချက်ထားမယ်'
'ဟုတ်အန်တီဆွေ မေကြီးကိုအန်တီဆွေလာတာပြောလိုက်ပါမယ်။လာမယ့်နေ့ကိုလည်းမေကြီးကိုဖုန်းဆက်ခိုင်းလိုက်မယ်'
အန်တီဆွေတို့ပြန်ပြီးသိပ်မကြာခင်ပဲ ဆိုင်ကနေပြန်လာခဲ့ကြပြီး အပင်ဆိုင်ရှိရာသို့ထွက်ခဲ့သည်။
'ဟိုရှေ့ဆိုရောက်ပြီ'
'ဂန်ဟန်ကပန်းပင်လေးတွေရောကြိုက်လား'
'ပန်းပင်လေးတွေလားသဘောကျပါတယ် ကိုယ်တိုင်မစိုက်တတ်ပေမယ့် မေမေကပန်းကြိုက်တယ်လေ ဂန်ဟန်ငယ်ငယ်တုန်းကနေတဲ့အိမ်မှာဆိုမေမေကပန်းပင်လေးတွေကို ခြံထဲမှာဘောင်လေးတွေခတ်ပြီးသေချာစိုက်တာ။မှတ်ဉာဏ်ထဲဝိုးတဝါးဆိုပေမယ့် မေမေပန်းပင်လေးတွေချစ်တာတော့မှတ်မိတယ်။မေမေကတော့မရှိတော့ပေမယ့် သူစိုက်ပျိုးခဲ့တဲ့ပန်းပင်လေးတွေကတော့အခုထိရှင်သန်ဖူးပွင့်နေကြတုန်းပဲ။အဲ့အိမ်ကပြင်ဦးလွင်မှာ။မေမေ့ကိုလွမ်းလို့ တစ်နှစ်တစ်ခါအဲ့အိမ်ကိုပြန်ဖြစ်တယ်'
စကားပြောရင်းဆိုင်သို့ရောက်လာခဲ့ကြသည်။မိုးဖွဲလေးများကျနေသောကြောင့် 'ခြယ်ခနလေးမဆင်းနဲ့ဦး မိုးဖွဲတွေကျနေတယ်။'
ထီးကိုယူကာခြယ့်တံခါးဖက်စီသွားပြီးတံခါးဖွင့်ပေးလိုက်သည်။မိုးဖွဲလေးဆိုရုံသာရွာသော်လည်း ပုခုံးနှစ်ဖက်ကိုထိကပ်စေသောဤမိုးအား စိတ်ထဲမှကျေးဇူးတင်နေမိသည်။
အပင်ဆိုင်ဆိုသော်လည်း ရှေးခေတ်ပစ္စည်းလေးတွေ၊ပန်းချီလေးတွေဖြင့် တန်ဆာဆင်ထားသောကြောင့် ရောက်လာသူတိုင်းရဲ့စိတ်ကိုဆွဲဆောင်နိုင်သည်။အဝါရောင်အခန်းအပြင်အဆင်နှင့် အပင်လေးတွေ၏စိမ်းစိုမှုကပနံသင့်လျက်ရှိနေသည်။အပင်အကြောင်းဘာမှမသိသော မိမိစိတ်ကိုတောင်ဆွဲဆောင်နိုင်သည်ဆိုလျှင် ခြယ့်စိတ်ထဲမည်မျှသဘောကျနေမည်ကိုခန့်မှန်းနိုင်သည်။
'ဂန်ဟန် ဒီဆိုင်လေးကချစ်စရာကောင်းလိုက်တာ။ဒီဆိုင်ကိုနေ့တိုင်းတောင်လာလည်ချင်တယ်'
'နေ့တိုင်းတောင်လာလည်ချင်တယ်ဟုတ်လား။သိသားပဲ ခြယ့်ကိုဒီသာခေါ်လာရင်ပြန်ချင်တော့မှာမဟုတ်ဘူးလို့'
'ဟုတ်တယ် ခြယ်လဲနောက်ကျရင်ဒီလိုအပင်ဆိုင်လေးသေချာပေါက်ဖွင့်မှာ'
'အပင်ဆိုင်မဖွင့်ခင်အပင်ဆိုင်လောက်နီးနီးစိမ်းစိုသွားအောင်ဘာတွေစိုက်ရမလဲခြယ်ကပြောပြပေးမလား။ဂန်ဟန်ကစိုက်မယ်'
ရွက်နုလေးများထိုးထွက်နေသော အိုးလေးတစ်လုံးကိုအနားယူလာကာ 'ဂန်ဟန် ဒါလေးကဆိုင်မှာရောအိမ်မှာရော ဂန်ဟန်ကြိုက်တဲ့နေရာမှာစိုက်။ဆိုင်မှာစိုက်ရင်တော့ပိုကောင်းတယ်။ရွှေလာငွေလာပင်လေးမို့ ဆိုင်မှာဆိုပိုအဆင်ပြေတာပေါ့'
'ဟုတ်ကဲ့'
သူမပြောသောစကားတိုင်းကိုနာခံနေသကဲ့သို့။
'ခြယ်စိုက်စေချင်ရင်အဲ့တာလေးယူမယ်။နောက်အပင်တွေလဲရွေးပေးဦး'
'ဟုတ်သားပဲ။ပန်းပင်ပန်းပင် မေ့နေတာ။ဟိုသွားမယ်လာ'
ဆွဲခေါ်ရာနောက်သို့ပါသွားခဲ့ပြန်သည်။ခြယ်နဲ့တွေ့တော့ ဒီဆိုင်ကိုမရောက်ဖူးသည့်သူအလား အသစ်တစ်ဖန်ပင်ဖြစ်နေသည်။
'ရော့ ဒီအပင်လေးစိုက်'
'အော်ဒီအပင်လေးမြင်ဖူးတယ် ဒါခြယ့်အိမ်ကစားပွဲပေါ်မှာတင်ထားတဲ့ပန်းမဟုတ်လား'
'ဟုတ်တယ် marigoldလို့ခေါ်တယ်သူ့ကို။မြန်မာလိုဆိုထပ်တရာပန်းပေါ့။ဂန်ဟန်ကိုပြောပြဖူးလားမသိဘူး ဒီပန်းလေးတွေကပျော်ရွှင်ခြင်းကိုယူဆောင်လာပေးတဲ့ပန်းလေးတွေလေ။ဒီပန်းလေးတွေကိုသိပ်သဘောကျတာပဲ။ဖေဖေကအိမ်ကအပင်လေးကို ခြယ့်အသက်၁၈နှစ်ပြည့်တုန်းက လက်ဆောင်ပေးခဲ့ဖူးတာ။ဖေဖေကခြယ့်ရဲ့ကမ္ဘာကြီးလေ။ဒါကြောင့်ဒီအပင်လေးကိုလဲ သိပ်သဘောကျတာပေါ့။ခြယ့်အပင်လေးကိုလဲခွဲပေးမယ်။ရော့ဒါလေးလဲယူ'
'ဒါကိုအိမ်မှာစိုက်မယ်၊အခန်းထဲမှာစိုက်ထားလိုက်မယ်'
'ဂန်ဟန်သိလား ပထမဆုံးကားshowroomမှာဂန်ဟန်တွေ့တဲ့နေ့က ခြယ့်အိမ်မှာစိုက်ထားတဲ့အပင်လေးကအဖူးလေးတွေထွက်လာတယ်။'
'အင် ဆက်ပြောပါဦး'
'ဒုတိယအကြိမ်အိမ်အောက်မှာကားရပ်ပြီးနောက်ကနေလိုက်လာတဲ့နေ့ကျ အဖူးတွေကလဲတိုက်တိုက်ဆိုင်ဆိုင်ပွင့်နေကြတယ်'
'ခြယ်ကမှတ်မိတယ်ပေါ့'
'မှတ်မိတာပေါ့ စားပွဲပေါ်မှာအမြဲတင်ထားတဲ့အပင်လေးမို့ ပန်းပွင့်တာ၊ဖူးတာသေချာသိတယ်'
ခြယ့်နှုတ်ခမ်းပါးလေးတွေကတစ်ဆင့်ထွက်လာသောစကားများကိုနားထောင်ရင်းမျက်ဝန်းများကိုသာစိုက်ကြည့်နေမိသည်။
'ဂန်ဟန်ကအဲ့ဒီmarigoldပန်းလေးလို ခြယ့်ဘဝထဲပျော်ရွှင်မှုမဆိုတောင်ကံကောင်းခြင်းတွေတစ်ဖြည်းဖြည်းယူဆောင်လာပေးခဲ့တဲ့သူဖြစ်မယ်ထင်တယ်'
ကိုယ့်မျက်ဝန်းတွေကိုပြုံးပြုံးလေးစိုက်ကြည့်ကာအလေးအနက်ပြောနေသောသူမမျက်ဝန်းထဲတွင် မစိုသလောက်ဝမ်းနည်းရိပ်တို့သမ်းနေသည်ကိုသတိထားမိသည်။
'ဘာဖြစ်လို့ကံကောင်းမှုတွေယူလာတယ်လို့ခြယ်ကထင်ရတာလဲ'
'အော်ဒီလို ဂန်ဟန်နဲ့မတွေ့ခင်ကအထိခြယ်ကကံဆိုးနေခဲ့သလိုပဲအရာရာအဆင်မပြေဘူး။ပထမဆုံး ဈေးထဲမှာလူတွေကြပ်လို့တိုးရင်းမတော်တဆ ခြယ့်နားကပ်လေးတစ်ဖက်ကျပျောက်ခဲ့တယ်။နောက် လမ်းသွားရင်းစက်ဘီးတစ်စီးကဝင်တိုက်သွားလို့ တံတောင်ဆစ်နဲ့ခြေမျက်စိနား ပွန်းသွားတယ်။တတိယတစ်ခုက ခြယ့်မိထွေးကြောင့်။ဂန်ဟန်ယုံမလားတော့မသိပေမယ့် အဲ့ဒီပထမဆုံးကားshowroomမှာ တွေ့တဲ့နေ့ကတစ်ကယ်ပဲသူဌေးကခြယ့်ကိုကားလိုက်ဝယ်ပေးခဲ့တာပါ။အလုပ်ကိစ္စကြီးတစ်ခုခြယ့်ကြောင့်အောင်မြင်ခဲ့လို့ ကားတစ်စီးအလုပ်သွားအလုပ်ပြန်အဆင်ပြေအောင်ဝယ်ပေးမယ်လို့ပြောခဲ့တယ်။ခြယ့်အနေနဲ့ကူညီခဲ့ရတာဘာမှမပြောပလောက်လို့ အဲ့လိုတန်ဖိုးကြီးပစ္စည်းကိုခြယ် လက်မခံချင်လို့ငြင်းခဲ့တယ်။အဲ့တော့သူဌေးကတစ်ရက်အိမ်ကိုလိုက်လာပြီး ကားကိုလက်ခံဖို့လူကြီးတွေကိုပြောပေးမယ်ဆိုပြီးလာတာ ခြယ့်မိထွေးနဲ့တွေ့သွားပြီးသူကလက်ခံပါတယ်ဆိုပြီးသူဌေးကိုပြောလိုက်တယ်။အဲ့တာနဲ့မရပ်ပဲ ခြယ့်ကိုပါသူဌေးဆီကရတာနဲ့သူ့ကိုပေးဖို့ပြောတာပဲ။နောက်ဆုံး အလုပ်လဲထွက်ခဲ့ရတယ်။ဒါပေမယ့် အလုပ်ထွက်ခဲ့ရတာကတော့ ဂန်ဟန်နဲ့တွေ့ဖို့ဖြစ်လာသလိုပဲမို့ ကံဆိုးတာကနေကံကောင်းခြင်းပြောင်းလာတာပေါ့။ထပ်ပြီးကံကောင်းလာတဲ့အရာတွေက အလုပ်လဲရတဲ့အပြင်ညီမလေးတစ်ယောက်ရလိုက်သလိုပဲ။'
ခြယ်ပြောနေသောစကားလုံးတစ်ခုချင်းဆီရဲ့အဓိပ္ပာယ်အားဂရုတစိုက်နားထောင်နေသည့်မိမိကို ညီမလေးတစ်ယောက်ရလိုက်သလိုပဲဆိုသည့် စကားကြောင့် မျက်ခုံးများတောင် တွန့်သွားရသည်။ထိုမိန်းကလေးသည် မပြောရင်လဲမပြော ပြောပြန်ရင်လည်းတစ်ချက်တစ်ချက်နင့်ခနဲ။'ခြယ်ရေ ကိုယ်ကတော့ဘယ်လိုမှညီမလေးမလုပ်ချင်ပါဘူးနော်'လို့စိတ်ထဲတွင်ခွန်းတုံ့ပြန်လိုက်သည်။ပြီးမှ ဝမ်းနည်းရိပ်ပေါ်လာသည့်သူမကို ပန်းချီကားလေးတွေထောင်ထားသည့်နားသို့ မေ့မေ့ပျောက်ပျောက်ဖြစ်အောင် ဆွဲခေါ်သွားလိုက်သည်။
(အစကouoကနေတင်ပြီးတစ်ဖက်တစ်လှမ်းကနေကူဖို့လုပ်ပေမယ့်မအားတာရောတင်ဖို့မတင်တတ်တာတွေရောအပြင်စာဖတ်သူတွေဝင်ဖို့အဆင်မပြေမှာစိုးလို့ဒီကနေပဲဆက်တင်ပေးသွားပါမယ်။ဟိုကလှူဖို့ကလဲခင်အပြင်ကနေပဲလှူသွားလိုက်ပါမယ်🤍)
(အားတဲ့ချိန်တော့အပိုင်းသစ်ကိုမျှော်ရင်းအပိုင်းဟောင်းလေးတွေပြန်ဖတ်ချင်လဲရပါတယ်။ခင်အပိုင်းတိုင်းကိုထပ်ဖြည့်ထားတာလေးတွေရှိလို့။ဂတ်ဟန်နာမည်အရင်းလေးလဲထပ်ဖြည့်ထားပါတယ်)