شروط التنزيل : فوط★ + ماكس كمنتار ❤❤
مابنتوش عندي فالأنستا انظمو عندي لتم نحطلكم الجديييد🔥 + فيديوات وصور تابعين لقصتنا💣 abonné "متابعة" follow لحسابي 👇👇👇
♨ تتمة الحلقة 178♨
👑 بقلمي ✍: #أناييس_مانو 👑
زربهم تنفضو ينفذو 5دقايق كان هازها وهي تتململ فاقدة امنية
امنية: كون خليتيها عندي وجبتيه هنا خير ماتهزها بالبكاء لاما يسكتها
أسد: وين نجيب ملتو وانت منشورة هك.. طار عقلك تتهمبلي عليا هنا
أمنية: قلتلك ماتبقاش تقولي هك.. ولا طار انا سبابو.. هات بنتي جااي حد مايشوفها مايقيسها.. هاااااتههاااا
آية: اشش بشوي على روحك وبلاما تفيقي الزوز بسيف رڨدو
أسد: هدنيها وبقاي حذاها حتى نولي
زرب خرج يهرول بزينة هازها بحرص قطعة من قش منمن بينها وبين صدرو به مهدنها.. دخلها للطبيب مع شافها سمى وبارك ماتسمع منو غير ماشاء الله ماشاء الله.. حسن خلقها بملامحها وعيونها يخطفو القلب والعقل.. تلف كون مافيقو أسد شاف خدمتو كون بقى يعبر فحلاوتها ويشكر
أمنية بقات على نار.. ها قاعدة ها واقفة.. قلبها تشوى مش منجمة فراقها.. آية ملازمتها دايرة جهدها به تمنعها مالخرجة
آية: باباها معاها ولينة ثانا.. تهدني رح تكون لباس
أمنية: مانهدنش وهي بعيدة.. نحبها عندي قدامي علاه مخرجها علاه
آية: داها للطبيب مش برا الدار.. شوي وتلقايها فحضنك يززي ماحرقتي عصابك
أمنية: مانقدرش بلا بيها مانقدرش.. كون يوجعها كون يغفلو عليها تتحرك يعميها
آية: بعيد الشر.. حبسي لفالات لمشوومة ذي
أمنية: نقولك بنتي.. تحرك هنا.. قلبي مش مهنيني.. روحي جيبيها تحرررركي
آية: شكون أنا؟! نووو جامي راجلك قالي مانتحركش.. مانروحش ونخليك وحدك
أمنية: مانيش رح نتكلى.. بصح بنتي لحمة بين يديهم مانهناش حتى تكون بين يدييا.. رووحي جيبيها بلاما تجهليني
آية: مانروحش ا نمي.. راجلك نرفوزي نخرج قدامو يفسدلي خليقتي
أمنية: دايرتو حساب وانا طززز فيا!! وا لخراا نعلبوو لي يعول عليييكم..
تخطاتها خارجة جات تمنعها نفضتها محذرة
أمنية: الصقي هناا تلحقيني نتفك بالشعرة.. سممممعععتتي
عطاتها شوفات قتالة وخرجت تجرجر ببينوار سارتلها شعرها مطلوڨ يلعب وراها.. سيغتات مقرطة ملغيغتها.. تنفخ ومهولة بوحدها هدت عليهم مع دايرين بزينة تنفضو مخلوعين.. وأسد جرالها يرعرع قبل مايوصلها
أسد: علاه خرجت شكون خلا مللتك تجييني
أمنية: جيت وحدي ندي بنتي
اسد: مازال ماكمللهاش زيدي لغرفتك ريحتك مانلقاهاش.. تحرركي
امنية: ماتحركش بلا بنتي
قاطعتهم زينة طلقت حلوقها للبكاء تفركس.. هولتهم هرولولها اسد جبد الطبيب ومنمن هزتها حشاتها فصدرها تمحش وتسكت.. حالة وفرات ماسكتت شحفتهم وصدعتهم.. رجعت للباياص جالسة شادة يديها تلهيها.. والطبيب كمل الفحوصات الاولية
جلسو مقابلين الطبيب.. زينة فحضنها راقدة اسد استفزو سكاتو لمطول وهو يقلب فشي ورق نتائج اولية
أسد: مطول عندك؟ وش بانلك هنينا؟
طبيب: احمم.. امورها بخير.. ماكانش حاجة تخوف مبدئيا.. نزيدو ناكدو ببقية الريزيلتا
أسد: وقتاه يخرجو؟
طبيب: منا لغدوة لوماكسيوم.. بويسك ماحناش فكلينيك ماكانش تجهيز مختص يسرعلنا المهمة
لينة: كاين سبيطار قريب تفرزهم فيه؟
طبيب: مايكونش كيما وين خدام.. لمتريال كل نوفال ومودار ديفلوبي بزااف على هنا
أسد: هات ملخر.. غدوة تعطينا اخر رد
الطبيب: بيانسير.. وطمنو كيما قلتلكم هي بخير ولون عينيها جينيكمون پوسيبل
امنية: اشرحلنا نفهمو وش عندها كثر
طبيب: بيانسير.. شوفو اختلاف تَلَوُّنِ القُزَحِيَّتين او Heterochromia.. اي heteros = مختلف وchroma= لون.. حالة سببها نقص أو زيادة صبغة لميلانين لمتحكمة فلون البشرة الشعر والعينين.. قادرة تكون وراثية حميدة او بسبب مرض خلل جيني.. او مكتسبة لسبب او لأخر
لينة: زينة عندها الوراثي الحميد بيانسير
طبيب: نشاء الله.. درك نشرح تفهمو كثر.. لون العين هو سمة موروثة تتأثر بأكثر من جين.. لجينات هذي تتعرض لطفرات فنفسها وفي الجينات المجاورة ليها.. العدد الفعلي للجينات لي تساهم في لون العين مش معروف حاليّاً، مي تقدم العلم خلانا نوصلو لستة جينات تحدد اللون البني والازرق.. وفي دراسات نظرية عرفو 16 جين مختلف يقدر يتخكم فلون العين في البشر.. المعلومة الاكيدة من بكري انو الجينين المتحكمين هما OCA2 وHERC2
أمنية: كاينين في الكروموسوم "15"
★★★★★★
طبيب: وي.. الكروموسوم 15 فيه من 600 إلى 700 جين لإنتاج البروتينات، واهمهم الجين (OCA2 وHERC2)، جين (OCA2) ينتج البروتين المسؤول عن صبغة الميلانين، والجين (HERC2) يتحكم في جين (OCA2) يضبط تحفيز او إيقاف إنتاج البروتين، درك البروتين هو لي يحدد كمية الميلانين لي تلحق للعين..
امنية: كمية كافية مالميلانين تمد عينين بنية.. وكمية قليلة خلاه تمد عيون زرقاء
طبيب: صح.. لأنو ماكانش صبغة زرقاء أو خضراء للعين.. عيوننا كامل فيها الميلانين البني غير القادر على انكسار الضوء.. اختلاف اللون علاقتو بتركيز وموقع الميلانين البني على طبقتين من القزحية.. كاين لي تتموقع لميلانين عندو فالطبقة الخلفية.. وكاين من تتركز فالطبقة الأمامية، لي عندو بزاف ميلانين عينيه بنية هذي مفروغ منها.. ولي ماعندوش ميلانين فالطبقة الأمامية من القزحية ينعكس الضوء ويعطيه عينين زرقاء..
أسد: هذي مفروزة.. بصح منين جاها لون الاخضر!!
طبيب: منك
أسد: كيفاه مني هذي؟!
أمنية: وراثيا نقتيلها لون عينين
أسد: وكيفاه يفسرو بضوء ما ضوء كيما كان يشرح ؟!
طبيب: ببساطة عندها عين مافيهاش ميلانين.. لونها ازرق.. وعين فيها شوية ميلانين مع طيف الضوء لأزرق.. بني مائل للصفرة على خلفية زرقاء عطاها لون أخضر
أسد: علاه مش خضر لزوز كيما تا خاوتها
لينة: عندها الهيتروكروميا وهم لا
اسد: رجعونا للروينة لولى اففف
طبيب: متبسم عرفو تلف: قلنا عيون مختلفة قادرة تكون ب3 اشكال:
تغاير تلون القزحيتين الكامل (Complete heterochromia) كل عين بلون زي، كيما بنتكم
تغاير تلون القزحيتين الجزئي (Partial heterochromia) جزء من القزحية لونًا مختلفًا عن لون القزحية السائد ففس العين.
تغاير تلون القزحيتين المركزي (Central heterochromia) يكون لون الحلقة الداخلية من مختلفً عن لون لحلقة الخارجية من القزحية.
امنية: عندها Complete heterochromia !
طبيب: وي مادام ولدت هك ماتخافو ماتقلقو
امنية: بصح خفت تكون مربوطة بمتلازمات يغيرو لوت العين
الطبيب: مادام ماظهرش عليا حتى مشكل صحي.. مابان عليها حتى عرض تسمى امر طبيعي حمييد
اسد: ولا بان عرض.. شمن عرض اسح ؟!
طبيب: متلازمة هورنر النادرة بزاف (سببها خلل في أعصاب الوجه) مع اختلاف لون لعين يتخلف حجم البؤبؤ وارتخاء فجفن العين.
متلازمة واردنبرغ من اعراضها فقدان حاسة السمع، وتغيرات في الشعر والبشرة وتغاير تلون القزحيتين.
متلازمة ستيرج ويبر يميزها ظهور وحمة أرجوانية اللون على الوجه منذ الولادة، سببها عادة مشكلات فبعض لأوعية الدموية.. النوبات والتشنجات من الأعراض الشاعة وأحيانًا تسبب اختلاف لون العينين.
متلازمة بري رمبيرج النادرة.. يميزها ظهور جانب من الوجه بجلد مجعد والجانب الآخر طبيعيًا بجلد غير مجعد.
أمنية: بنتي مافيهاش لأعراض هذو كل
أسد: اييه كون كشما كان عرفنا وجبنا طبيب مختص من الضربة لولى
طبيب: هذا علاه قلتلكم راهي لباس
أسد: وبقية الفحوصات وش دورهم مالا؟!
طبيب: روتينية به ياكدولكم تشخيصي لأولي
أمنية: نشاء الله يخرجو ملاح
اسد: آميين.. ممكن مع لوقت يتبدل لون عينيها؟
طبيب: علميا ممكن.. بويسك به يثبت لونهم يلزم ستة شهور أو سنة كاملة.. كيما كاپابل يلحق للمراهقة ويتبدل
أسد: يوليو زرق لزوز ولا خضر لزوز؟
طبيب: مانجزملكمش حاليا.. مالاساس حالتها نادرة.. وراثيا اللون البني هو السائد.. يعني لاكان واحد مالابوين لون عينيه بني ولادو يجيوهم اعين بنية.. مع احتمال بيبي عينيه زرق.. شرط يكون والد مالابوين عينيه زرق.. وفحالتكم.. الذكور لون عينين خضر كيف تاعم ا مسيو.. حيث الاخضر سائد على لون الازرق عند المدام.. لي قدر يتوازن مع اخضر تاعك فعينين البنت فقط
أمنية: بيانسير بويسك التوأم الحقيقي يتشاركو فلون عينين واحد
أسد: شد راسو ينفخ: خلاااص يزييونا من التفسير عِلم فعِلم نفختو رااس لواحد معاكم
ضحك الطبيب ولينة مامنمن خزرتلو مشتمة مع لمحها هربت عينيها لزينة..
★★★★★★
لفوق.. مهى رايحة جاي تلم فالدنيا.. خملت قش أختها وولدها ففاليزة.. لبست وستيكات روحها وهزت بوشات تخبي فيها تليفونها.. دخل امان عبرها ملفوق للتحت
أمان: واجدة سايي روحنا؟!
مهى: اييه.. وجدت من قبيل تستنى فيه علاه طولت؟
أمان: نوضت لوطو وصادفت أسد مع طبيب مصرفو وقفت معاهم جهد راح طلعتلك
مهى: طبيب دوزيام؟! زوز اطباء فعشية وحدة.. وش عند خوك؟؟
أمان: لمرتو وبنتو.. هو لباس حمد الله..
هز الفاليزة وسبقها محرص: ندور نلقاك ورايا ماتتعطليش لا نروح ونخليك
مهى: تهنى تلقاني.. اصلا واجدة مانسيت والو
لعبت عينيها عالدنيا مرتبة هزت راسها برضى وجات خارجة تم تم تفكرت رجعت للكوافاز جبدت مفتاح غرفتهم وخرجت قفلت لباب وحشات المفتاح فصاكها وهرولت وراه مهنية
نزلت لتحت لقاتو فالهوول صاهد مع الجماعة موقفينو يبحثو.. قلبت عينيها تنفخ وهدت عليه
مهى: قلتلك ماتتعطليش وانت واقف هنا تتوانس.. يله نزيدو تعطلنا بزااف
أمان: بعقلك 5د تكوني فالسبيطار
سهام: ولواه الفاليزة وين بايتين؟
أمان: لحتى بلاصة.. هذو دوزان سمرة وجواد
مهى: قشهم كون يحتاجوه.. وينو جواد؟
أمان: سبقنا ديجا.. خليل داه معاهم سيرين
مهى: وش نستناو حنا هنا.. بطينا كون يخرجوها قبل وصولنا
سهام: رح تخرج؟
مهى: اممم..
الكاملة: كون تهز صحتها تم فالحظى مش خير
سهام: وكيفاه خلاوها ياك خصها روپو
مهى: بغصة: سراج تفاهم مع الطبيبة تعها.. خصها روپو وي مي ماعندو مامرڨدها رقدة السبيطارات.. تروح لدار بابا ولا دارها نخدمها ومايخصها شي.. عن اذنكم
زربت خرجت بلا امان بقى متصنم بلاصتو نبرة صوتها مع كلامها يعبر عن غيضها مالكل هدرتها معاه زي ومعاه زي خلاف
سهام: شبيها محمولة عالروحة ماشبعتناش هدرة مامپا !!
الكاملة: نخزتها ترطب: البنت محيرة على ختها.. لاه نشدوها بللهدرة فمش وقتها خلي كي تروح ونفهمو منها كثر
أمان: كان بيها.. بقيتكم على خير يله سلام
بايعلهم وخرج يهرول بالفاليزة ذيك لاحها لور وركب شاحط لباب وديراكت ديمارا مجهد.. يكمد فأعصاب متفادي ينبشها حتى بداتو
مهى: تعطلت.. وش كانو يقولولك؟!
امان: مليحة ذي تنتنيها منبعد تسقسي عطات ريحة ولالا !!
مهى: وش نتنت وش درت؟ تبلاوني بعداا؟ وش قالولك درت واش قااالو قووول
امان: برعدة: ررربك مااقولو وااالو.. نتي لي تقود راسك مابقيتي تحشمي ماتحسبي لبشر.. ديك التنطيرة لي درتي ماتتعاودش.. هز صبعو يهدد: يما وماني تحترميهم لا مش لتربيتك.. قدر ليا انا ساااامعة
مهى: رغرغو عينيها: شمن تنطيرة؟! علاه تنبز فيا.. مالها تربيتي ماااالها.. سالو دموعها: وصلت بيك تجبد تربية يما ليا مانسمحلكش مانسمحلكككش ساااامع..
أمان: شد فكها وجبدها: صوتك مايعلاش عليا.. وحاشا وش انا قليل تربية نجبد المرحومة نزيد عليها؟! نحكي على تربيتك لذاتك.. ماشفتيش راسك زيماه هدرتي ونفختي.. ررربب القمل لي وغد فراااسك نكب عليه ليصونس نحرقو.. ڨدي رووحك احسنللك
مهى: تشحق وتفرفط: سيبني بعععد مني.. حقااار كلكم حقاارين.. ضربولك فالكبدة اه ماهم عيلتك.. بصح ختي لمطيشة فالسبيطار جرة خوك ماتغيضكش.. انا لبارح عرشولي كل تحاماو فيا فمك ماحليتهش ضربت عليا ودرك تتفرع حاڨرني حسااابلك سايبة بلا مااالي.. راك غالط بابا خويا وجدي يحطولكم الحد كااااامل.. سيبني سييييب
بقات تفرفط تدز وهو شادها بيد يعارك يربرب جهلاتو ومافرصش اللوطو.. فلحظة سهو منه انحرفت بيهم للجهة لوخرى مالطريق.. فيقو كلاكسون قوي تلفت لقى كاميون مثقلة قاصدتهم.. يبس بدنو الصدمة شلتو.. ما مهى من خلعة الموت طلڨت حلوقها ترغي للرب لي خلقها.. تخض فيه وتضرب كشما تفيقو شي كان فعالم خلاف يشوف فموتهم بين عينيهم.. مافاق مالحقش يبعد لوطو ونهايتهم باينة.. يتصدمو فالكاميون هذيك يترحاو رحي
★★★★★★
فنفس لوقت فقصر سليمان.. حورية لحقها خبر خروج سمرة تهولت وهولت لخدامات لكل يتجارا يخمل الدنيا يسيق.. شي يوجد ماكلة سبيسيال ليها.. شي ينظف غرفتها حورية معاهن اليد باليد.. سارة كانت غافلة فالخبر خرجها لحس والحركة الزايدة.. طلت عليهم هاز جسور بعدما رضعتو يثاوب جاه النعاس
سارة: شبيكم تجاراو خير كشما صرا؟
حورية: خير خير.. سمرة مخرجينها مالسبيطار
سارة: بفرحة: بصح !! ها رحمتك ا ربي الف حمد وشكر لله
حورية: حمد الله.. نديعلها مالقلب تنوض بالسلامة كبدي سنين تسخف تجيب صغير دوزيام ماكتبلهاش ربي لدرك
سارة: لولاد رزق من ربي.. ڨد ماصبرت ربي جازاها ورزقها ببيبي خلاف
حورية: لعقوبة ليك تزيدي الثاني والثالث والعاشر.. تولديلنا بزااف عمارة داري بيك ا بنتي
سارة: آميين
حشمتها حمارت وجهها مليان رجع طماطم سخفت حورية ضحكت ودرعتها تمحش خدها
حورية: سعدي وفرحي بيك لحشمة والتبسيمة شحال يحليوك ها سعد حفيدي بيك هههه
سارة: ماني يزيني هههه فشلتيني بالحشمة
حورية:نفشلك؟ حشومة عليا.. اقعدي ترتاحي وخليني نشبعك تربيج هههه
طرڜقو بالضحك وصح قعدتها بقات رايحة جاية مرة تمدحها مرة توشحل او تشاورها.. مرة طل على جسور.. تمحش تلاغي او تسمي بسم الله وتبارك فيه.. لفرحة فرحتين سلامة سمرة وصحة جسور ماشية للأحسن بقدرة ربي ولا يبقى لوقت اطول برا الكوفوز بلاما ينقصلو هوا او يتخنق..
قلب الام خبيرها.. وقلب سهام زدح بقوة وتم تم تقبض تكوفت شادتو تتوجع.. خلعت لي دايرين بيها.. جراتلها آية لولى ولحقو لبقية
آية: شبيك خالتي؟
الكاملة: شادة قلبها.. أ وخذتي
آية: واجعك قلبك ؟ اه قوولي ا خالتي
الكاملة: شافتها تتغوصر وتنهج رغات: عيطو للاطباء عيطلوهم ازررربوو رح نتوخذو فيها
بالرعدة ذيك هولت الدنيا يارا فحطت ترغي تنده للخدامات للأطباء لولادها تعيط تالفة تسمي وفرات.. ما سهيلة سندت سهام تقعد فيه
سهيلة: تهززي شوي هك تنضري كثر
لارا: ترجف: كريز !! صارلتها كرييز؟ اه قولو
آية: تربت خدودها: خالتي باه حاسة اهدري معانا
الكاملة: ماتلزوهاش.. بغواث: وين الاطبااااء
آية: حلي عينيك شوفي فينا واهدري
سهام: تنهج: قلبي.. تقبض.. ضربة.. وحدة.. يحرق هنا.. وينهم ولادي
آية: خليل وأمان راحو لسمرة
سهام: تلهث: عيطولوهم يجييو.. جيبو.وولي ولادي
سهيلة: بخلعة: خلايا لمرأة رح تضيع من يدينا.. عيطو لولادها وينو اسد خبروه يلحقها
لكاملة هرولت لبرا تستنجد بالحراس يجيبو اسد وهي تعيطلو فتليفون مايردش
سهام:حد من ولادي فحالة.. جيبولي ولااادي
تفلقت بالبكاء مع ارتخاء تقلص قلبها برد بقى غير لوجع والنغصة من حدسها أنو ولادها فالريسك مكملة على حالتها.. تبكي وتعيط لولادها بالواحد تقول حد مات وخطفتو موتة غفلة منها..
أمنية هرجها صوت تليفون اسد يصون نساه حذاها.. تذمرت نكرت فاشلة تنوض تسكتو منين كثر تحاملت ووقفتلو لقات اسم لكاملة استغربت جات تهز تقطع لخط!! تحيرت هزتو وخرجت محضنة كرشها ماشية مع لحيط مسايسة روحها.. صوت الغواث الحس شي يتجاراو الهايلالة قايمة خلعوها.. قلبها قريب حبس.. بالحرارة ذيك مادراتش وقتاه وكيفاه لحقت للصالون ووقفت فنصها تشوف فيهم دايرين بسهام..لينة تفحص ممرضات خدامات من كل جهة.. لبقية يصبرو فيها شي يدمع شي حابس البكية مايهولهاش كثر.. جمدولها لماء فالركايب نطقت بحدة
أمنية: شبيها وش صراا؟
رحمة: تنطرلها: علاه نايضة من بلاصة كيفاه واصلة لهنا؟
أمنية: خليك مني مالها خالتي مالكم !!
الكاملة: قلبها تقبض قالت شي صاير مع ولادها
أمنية: مالخلعة جاتها دوخة شدت راسها بيد ترجف ونطقت بسيف: شكون؟! وأسسدد ويينو؟!
(قلب الأم ماكاتش ما أحن منو ربي يرحم أمهاتنا جميعا فالدنيا وفالآخرة 😘 )
★★★★★★
بلوقت دخل يجري سبقولو لخبر هولوه على أمو يلقاها أمنية فوجهو مسندتها رحمة تفيق فيها لا تتنشرلهم تم دايخة
منظرها رونلو حبال عقلو مادراش براسو به تبلى نسى وش جابو جراها اول وحدة يعارك جاهل
أسد: وش نوضك من بلاصتك وش مجيب قسااامك لهناا
أمنية: كبشت فيه تفتف وتفلي: لباس؟ ماصرا فيك والو ؟! ماكش موجوع مابيك والو؟! طمننيي
أسد: لباس ماتخافيش.. وهداي شبيك ترجفي
سندها يهدن فيها ويطمن سايقها للفوتاي وهي تالفة ماصدقت شافتو بخير
أمنية: عسلامتك.. حمد الله ربي ماشوانيش بيك.. سير لباس؟ ماتضرك حتى حاجة.. يماك قالت حد منكم بيه حاجة.. بكات وو عيطولك نسيت تليفونك عندي صونا بزااف جبتو لهنا
الكاملة: عيطتلك تجي ليماك.. سيب لمخلوقة شوف يماك اسح
سيبها لرحمة وجلس قفازي عند رجلين امو
أسد: يما لباس؟ شبيه قلبك؟ من وقتاه ضرك؟
سهام: تقبض مالخلعة عليكم.. حسيت صاير شي معاكم.. انت قدامي لباس.. خاوتك لا خبر منهم.. عيط افقدهم وطمنني
اسد: علاه وين راحو؟
لارا: للسبيطار.. بنت خالك رح تخرج
الكاملة: مش وقت هدرة عيطلهم اسح اززرب
نفذ خطف تليفونو من أمنية وتا لكاملة يعيط لخاوتو لزوز فرد وقت..
أسد: وشهد.. فقدتوها؟
الكاملة: ايه آية غير بدات يماك لبكاء عيطت لختك فقدتها وطمنتنا انها لباس
اسد: مايهزوش ليوم مانتفكش مع رببهم على زمررر تطياش التليفونات
سهيلة: عيط لسمرة ولا راجلها لاوصلولهم يطمنونا
أسد: نعيط نشاء الله يهزو برك
نفذ يعيطلهم كل مرة لزوز ونفس الشي لا رد.. حرقولو عصابو وعصاب الكل ماسهام طلعلها الضغط وبالحرارة رجعت تندب وتغرد بالجهد على ولادها على شوي تتجلط وتموتلهم تم
فلوقت اذاك.. غرفة الاستعجالات كانت معمرة برجال بن سالم وسراج شاد لبراهش خليل مع زوز أطباء صواناو أمان ومهى.. لزوز تحت الصدمة مازالو مش مأمنين انهم بخير.. مهى مبكشتها الصدمة الرجفة بقات حاكمتها.. امان شاد يدها مرة على مرة يفقدها ويكوراجيها.. لين كمملوهم الأطباء حمدولهم سلامتهم وخرجو.. وقتها برك لبقية توافدو يوشحلو.. جهاد قعد حذا بنتو حضنها وباس راسها
جهاد: بابا لباس؟ طمنيني عليك
ماجابتوش تخبات فصدرو تبكي فصمت عرفها من هزان كتافها.. حاوطها بزوز يدين يطبطب ولبقية كلمة على كلمة طيبو خاطرها لين هدات ومسحت دموعها معبرة لكل
جهاد: خف لوجاع شوي ولالا؟
مهى: شوية.. بقى ذراعي يوزوز منا برك
نعتتلو بلاصة فنص عظم الساعد.. هزو يصبر
جهاد: مازرق ماحمر.. سير مع اللز برك
خليل: ايه.. سترك ربي لا كسر لا شق.. جسمك يوزوز باقي محفز بالأدرينالين
جهاد: ها قالهالك.. تهدني بشوي يخف السطر ويحبس التوزويز
خليل: مازال مابداش تأثير الكالمونت لي عطاوكم شوي وقت تتكالماو وتنساو الوجع
سليمان: حمد الله جاتكم شلايط سلامات
حسام: ستركم ربي وحفظكم منها.. بسلامة نشاء الله
لزوز: الله يسلمك
سراج: ربي قدر ولطف.. شدو الهمة ونساو لاكسيدون ماديروهاش فبالكم تبقاو فالشووك
مهى: بغصة: صعيبة تروح مالبال
أمان: تنهد بوهن هاز هم حالتها ذيك:ماكانتش ساهلة ا صحيبي
سليمان: وش صرا بعد؟ وصلنا لقينا تالحماية مدخلينكم مالحقناش نسقسيو ونفهمو
مالقى مايجاوب خزرلها تلقائيا.. عرفتو رح يحطها فوجه المدفع يحملها الذنب كامل.. هربت عينيها منو وتخبات فبوها ترجف ميتة مالخلعة وغصة فقلبها قريب يحبس.. عزت بيها ولوهلة قتلو الندم.. كون جا بيدو يرجع لوقت لحادثة ماسكتتش يسكت مايعاندهاش ومايوصلوش للمواصل هذي..تنهد بكدة كبيرة وجاوبهم متبسم بالفن فوجوههم ما فالصح حالتو لداخل مايعلم بيها غير ربي سبحانو
★★★★★★
أمان: يا سيدي كنا جاينين مابينا ماعلينا توانيس وضحك غير قربنا للبلاصة ذيك نبشتني.. وانتم عارفين مالصغر هابل بيها ايا هارشتها حاط بالي مع الطريق ماندرى كيفاه ملنا للجهة لوخرى قصدنا الكاميون انا يبست مشوكي وهي توهلت بالرغي
حسام: يا لطييف الملطف خلعة وكليتوها
خليل: كمل كمل منبعد كيفاه درتو منعتو
أمان: ربي سبحانو طول فعمارنا ماكتبلناش موتة المشؤومة ذيك..من عز الصدمة خرجني منها ومدلي قوة وسرعة عجب.. بزربة دورت لفولون دعست بنزين حرقنا الطريق فوتنا قدام لكاميون وخرجنا للجهة لوخرى خبطنا فبيطون الپوطو تالطريسيتي..مزية ما رابش علينا والغاشي بالخلعة جراولنا ولي پومپيي راپييد دقيقات كانو تم جابونا لهنا بزربة
سليمان: ربي ستركم وعطاكم عمر جديد
جهاد: صح ربي مارضالناش نتشواو بيكم
حسام: منا وجاي لا توانيس لا هراش فنص الطريق.. تذرحو
سراج: الخلعة ذي تكتبلهم سير
أمان: ها باااينة.. عليا منا وجاي نركب نقفل فمي كلمة لا.. ضحكو ملطفين لجو مالغم
جهاد: دير مزية.. راني شاكك فيك انت لي نبشتها مش هي.. فرفش شعرها: ياك ا بابا هو لي بداك؟
أمان: خالي بلا حيالة زعما هي بنتك وانا البراني.. خرجت بمولد بلا حمص
سليمان: حاشا هههه هي بنتو و انت ولدي
خليل: اهاه بداات المحسوبيات وهزان لكتاف شوف ليك الحسب والنسب ا خاوتي ههه
ضحكو كامل.. من غير مهى بقات تبحلق فيه ممنونة ليه ماحكاش الصح ورحمها من اصابع التهام واللوم.. عشقت فالجاست تاعو وعمرها تنسالو الجميل هذاك.. شحال كبار فعينيها وشحال ندمت على تسرعها ولؤمها معاه
لبراهش لقاوها فرصة تسيبو من سراج بحال جراوي لكلاب هجمو على أمان ومهى تحضان وتمحاش.. وبركو فحضنهم يتفقدو حالتهم
جواد: خالتو صافا؟!
مهى:باستو: يا روح خالتو..لباس فيا خبيشات برك ماتخافش عليا
جواد: حمد الله.. وراسك يوجع بزاف ولالا؟
مهى: لا نقص السطر.. يسلملي حبيبة خالتو خايف عليا
جواد: كيفاه مانخافش عندي نتي خالتو كعبة وحدة
زرب حضنها مخبي دموعو لازها بقوة يشبع من ريحتها ريحة أمو.. ضرها قلبها عليه شدت لبكية تبوس فيه وتهمس تطمن.. راسها ببونصمون يدها للمعصم مضدة وشي جروح فذراعها من ڨزاز الامامي كي تكسر قاسها
سيرين على فخذ أمان تتحسس فحاجبو مخيط
سيرين: فيا وحة من هنا؟!
أمان: وحة ؟! باس خدها: جرح صغيور برك ا صغرونة
سيرين: مانيش صغرونة.. داعبت خدو:وخذي عليك..كيفاه داواك ماوجعوكش كي خيطوه؟
أمان: ننن.. ماتوجعتش
سيرين: شادة لبكية: مابكيتيش ولو شويتح؟ وخذي عليك كون خلاوني دخلت شبعت بكى فبلاصتك.. مانشتيش عليك ا عمو
كبشت فرقبتو زي الڨرادة تواسي فيه حضنها يطبطب ويبنن على راسها يهدن
امان: عيشلي البخانساس تعنا.. لباس ابنتي ماتبكيش هاني قدامك لباس وماتوجعت ماوالو اشش ماتبكيش هممم
سيرين: خزرتلو: بصح مخربش بزاف كثر من طاطا
أمان: داعب نيفها: بويسك حضنتها وخبيتها
سيرين: ها!! علاه؟!
أمان: به مايلحقهاش لقزاز يندبلها
سيرين: تسمى حميتيها وسكريفيت بروحك!!
أمان: فيا ولا فيها.. انا راجل قوي ونتحمل بصح طاطاك صغيورة
سيرين: شدتلو وجهو بزوز يدين عينيها برقو: بطل ا عمو.. انت بطلها بطلنا كلنا.. تهووبل اربي حتى ومبليسي بوقوص تهوووبل
حضنتو تمحش وتدعيلو بالشفاء تستت خلاتو غير يضحك تلفتلو لهدرة مع الكبار
★★★★★★
زمان طلعو الكبار والبراهش لسمرة طلو عليها خلاو امان ومهى يرتاحو.. كل حد فسريرو مقرم ضارب السكات يراجع الاحداث.. فجأة تحل لباب دخل اسد مدرم شاف حالتهم تملك جرا لخوه شدلو راسو يحرك ويفلي اصابتو
أسد: وش صرالك؟ كيفاه تبليسيت هك؟!
أمان: شلايط برك رولاكس واقعد نحكيلك
أسد: خليك مني احكي برك.. تلفت لمهى: اللطف ا ربي علاه حالتك حالة هك؟؟
ماجاوبتوش تحاشاتو نزلت راسها.. تلهى بخوه يقرر انطق ماتنطق.. حتى حكالو كلش.. خواو بيه رجليه زرب قعد حذاه
أسد: على سلامتكم حمد الله ربي ستركم جات خفيفة.. كشفو عليكم الأطباء لباس يخي
امان: اه جروح صغيرة برك حاجة ماتخوفش
أسد: بحدة: ناناك ابسط الامور قادرة تكبر لا قدر الله.. هذي اخر مرة تتوانسو وانت بالذات تركب ورا الفولون تشد فمك عينيك عالطريق مايعيلو لا هك ولا هك
امان: علابالي موالف نسوق ونهدر نورمال مكتبة من عند ربي برك
أسد: كلشي بيدو.. ومنعكم زاد فعماركم.. منا وجاي ترد بالك مليح معاك الزايد.. سيرتو مرتك ريسكي بعمرك مسؤول عن راسك.. مي هك من مسؤوليتك ومسؤوليتنا كامل...
سمع شحقة تلفت لقاها مغطية وجهها تدمع.. مد يدو رح يحضنها وفاق دورها ربت راسها
اسد: كوراج برك هاكم لباس عارف خلعة واعرة مي ربي شاف لحالكم ونجاكم.. حمدي ربي ويززي مالبكاء.. مايليقش بيك ا بنت دمي
كلامو زاد عليها تفلقت بالبكاء وتنطرت خارجة هاربة منو حشمانة وكارهة موقفها معاه.. زرب شدها وامان جبدها قعدها حذاها حضنها يرضي..
أسد فهم راسو خرج لبرا عيط للدار طمنهم وحكى مع امو.. لحق عليه خليل هدر معاها بلاما يحسسها بشي غمو لاكسيدون حتى يروحو.. دقايق كوپى رجعلو تليفونو
خليل: بسيف قبلتي وتكالمات.. وش صرا ورانا؟
أسد: لخلا لمخلي.. وزيد تسقسي.. من قبيل نعيطو لمللتكم حد مايجاوب.. جهلتووونا
خليل: تليفون نساوني فيه لبراهش فلوطو.. مع لاكسيدون تا خوك درولت مابقيت عاقل وسامع بشي.. وش صرا يما حكيلي
أسد: زيد معايا نطل على سمرة نحكيلك فالطريق..
ساقو طالعين لغرفتها معاودلو كل التفاصيل
لوقت دايز والمة فدار سليمان كبارت برجعة سمرة سالمة غانمة..حطوها ففوتاي فالصالون ساترينها بلحاف خفيف.. فحضور الرجال حمدولها سلامتها وخرجو لجلايس فالجنينة خلاو النساء براحتهم.. تجمعو على ذكر الله وصلاة عالنبي عليه والسلام يحمدو السلامة لسمرة ومهى.. لي قعدت تكمد خلعتها باقية موسوسة والرعبة لاتنحات منها.. رانيا وسارة متهلين فسمرة ها لي توكل ها لي تقعد وتكي.. حورية مقابلة ختها وليال يتوانسو.. مليكة ها معاها ها طالڨة وذن كشما تلڨط خبرية تشد بيها لوقت.. شهد مسامية مهى متحيرة لحالتها
شهد: مالك ساكتة اهدري نسيوك مافات
مهى: مافياش حيل.. خليني هك خير
شهد: حبيبة الشي كاتب من عند ربي وهاكم بخير ووسطنا سالمين.. نساي ماتبقايش مكمشة وهاز فقلبك تمرضي
مهى: مش قادرة.. مش رح تفهمو ولا تحسو.. شفت لموت ا خوتي مووتنا كانت هنا.. قاست خشمها: تلفنا ماعرفنا وش نديرو.. خوك جمد وانا تصرعت بالرغي حتى جبدني ليه بيد وبلوخرى دور لفولون خرجنا للجهة لوخرى مع دخلنا فالحيط خباني ديراكت فصدرو
شهد: رغرغو عينيها: شفتي خويا اللدرع شحال قافز حرص عليك وسمح فراسو
★★★★★★
مهى: حمد الله ربي حفظو كون كشما تقاس عمري نسامح راسي
شهد: اللطف بعيد الشر عليكم لزوز.. لاه تلومي راسك ماعندكش يد فلي صار راه كاتبة من عند ربي
مهى: نزلو دموعها بحرقة: أنا السبة.. انا لي نبشتو هو كان هادن خازي بليس انا الجرة
غطات وجهها بكفوفها تتنخصص بلا صوت
شهد: حضنتها: اشش يززي مابكيت مهم انكم لباس وحفظكم ربي لينا..نوضي نديك تغسلي وتبدلي ترتاحي شوي ا حبيبة نووضي
نوضتها بالعفار طلعتها لغرفتها تهلات فيها
مليكة: كلاها فمها: ليامات هذو خلعة ورا اختها تكون بيكم عين
زهرة: ا حفييظ بسلامة روسهم مانشوفو بأسهم.. تفي من فمك ا مليكة
مليكة: تف تف.. مالي كذبت ولا فاليت.. حاشا راهم بنات الغالية وعزيزات عليا.. تاخذي برأيي ا خالتي حورية اطلڨي قرآن رقيهم وخرجي شي رزمة صدقة وزكاة نفس عليهم
ليال: الصدقة الصحيحة لا تتكال لا تبان.. ديرها فالستر منها لربها خير وخير
مليكة: تأنا قلت هك.. مهم تاخذ بالنصيحة
حورية: كان بيها.. اصلا فبالي من ضربة سمرة
سارة: ماتنسايش ولدي ا ماني خرجي بأسمو كشما ربي يشافيه ويحفظو كثر
حورية: فبالي حتى هو راه عزيزي ولد الغالي
ناضت متحمسة عيطت لسليمان وساقتو للبيرو تخبرو.. وهك كان الحال خرج فلمس عطى ماكتب ربي لجهاد فهمو يمدو لإمام وهو ادرى لمن محتاج كثر شي وأهل للصدقة
مع لحق المغرب روح أسد وخليل من غير امان ومهى شدوهم لكبار يفطرو.. لقاو لعيلة على الطابلة.. رماو السلامة زادو يغسلو كل هذا فين.. أسد فغرفة منمن دخل لقا امو معاها.. مونسين هازين هم بعض فات طول لسهام باس راسها
اسد: يما لباس شوي؟
سهام: بشوفتكم بخير نحمد ربي
أسد: كلنا بخير غير هناي وحظيلنا راسك
سهام: همم.. روحو حتى خوتك؟
اسد: خليل برك.. امان ومرتو شدوهم يفطرو
سهام: ماقالهاليش قبيل هدرنا ماقاليش؟ واش بايتين؟
أسد: مانعرف.. ويباتو شفيها دار جدي عادي
سهام: معلوم.. غير سقسيت ومحيرة على مرتو خرجت لعشية مش فحوالها بقيت هازة همها
أسد: ماتخميش وسط عيلتها يتهلاو فيها
قاطعو صوت لأذان.. سكتو خاشعين حتى فض قراو دعائه وهو طول يدعي لأفراد عيلتو كل هذا به مقيوس او مريض.. كمل مسح وجهو
أسد: نديك تفطري مع لعيلة
سهام: لا خليني معاكم هنا
أسد:ماجابولهاش عشاها يطول واقيلا.. نديك لبرا لفطور واجد خير
سهام: بغيت لمتكم حاب توزعني قولها ا ولد كرشي
امنية: ماتلزش عليها..خلي تفطر معانا
أسد: مانيش نلز.. وحاشا ا يما لا نزعم للشي هذاك.. يا لالة حابة لمتنا نهزوك على كتافنا.. نروح نغسل بلخف ونتي عيطيلهم عالعشاء
قالها لمنمن وزرب للدوش غسل وتوضى
فات فطور هادىء كثر من اي ليلة فاتت.. افراد بزاف ناقصين عالطابلة.. وترواح لبراهش نقص النشاط وحلاوة اللمة.. كلاو فصمت حتى مالتوأم حسهم مات.. مراد لخر نقر برك ووقف هو اول حد.. خلا امو هازة همو فقلبها.. غير كملو كامل وقفت لاحقتو حبستها لكاملة
الكاملة: نصلي العشاء ورايحة نوصل سمرة تروحي معايا؟
سهيلة: مانعرف.. مانيش فحوالي ليلة نخمم ونقولك
الكاملة: صيبي راحتك.. مانديكش بسيف
ماكثرتش هدرة جهدها اعلمتها به تدير الصواب معاها.. واقفت او عكست قرارها وهي حرة مش مجبرة.. خلاتها صاهدة تخمم وزادت لغرفة منمن طمنت عالكل وشيرت لأسد غير بعينيها تبعها للبيرو.. قعدو تحقق معاه كالعادة
الكاملة: صرا ماصرا فينا ليوم.. خلعة يماك مش هيينة.. ماصرا والو ليك او لخاوتك؟
أسد: خليل قدامك.. ولبقية كلمتوهم كلهم بخير
الكاملة: واثق من كلامك؟ نسمع انو تقاس حد فيكم وخبيتو عليا ناخضكم كل على بعضاكم وانت اولهم واكثر.. ساااامع
أسد: ررب رربي علاه حاطتني ديما فوجه لمدفع.. هاو ليك خليل هنا جيبيه حققي معاه انا تهديت ليوم مافياش ماتنتاقش معاك
الكاملة: وقف بلوكاتو بعصاها: تررص عندك اقععدد ماكملتش هدرة ماكاتش هرربة مني
رمى بدنو كيما كان ينفخ التعب هدو كلمة ورا اختها عاودلها مامخبيين.. تخلعت؟ اه اكيد.. توخذت؟ اممم حتى عيات.. دعات؟ بيانسير ماخلات ماقالت من حمد وشكر وماتهنات حتى عيطلها لأمان أپال فيديو.. كلمتو بغصة حابسة لبكية ما على لسانها غير "حمد الله ستركم ربي" حمد الله حفظكم لينا"
★★★★★★
سهيلة طابت وتحرقت ملي دقت فباب ولدها مافتحش قلبها ولا يغلي غلي.. لحقت بيها لارا هكاك فالباب
لارا: شبيك واقفة برا علاه مادخلتيش !!
سهيلة: نطبطب مايحلش.. مافهمتو هنا ولا خرج بلاما نشوفو
لارا: مانعرف.. عيطي فتليفونو تعرفي
تخطاتها لغرفتها دخلت بدلت لبس غوپ فولاغ بسميطات وخرجت تبربش فتليفونها لقات امها فرد بلاصة
لارا: مالقيتيهش؟
سهيلة: يصوني ومايهزش.. جابلي ربي هنا ومش حب يحل عليا لمڨلووع
لارا: باز ليه!! منين موالف؟! امپوسي سااا
سهيلة: لالا پوسيبل وربك كبير خوك هبل ورح يجيب اخرتي.. ملي جبدنا سيرة لبنت اذيك تنفض وسطنا هج بان فالفطور وعاود غبر
لارا: حتى نتي زودتيها مع دخل عرشتيلو مالك خالعة السيد ماخليتش رد نفس مامپا وطيرتيه غبر
سهيلة: شحوطتها: نتي بالذات تسكتي لسانك اذا شي نهار نقصو ا بلية واالد ضرة ولا عدوة تفووو شكوون بلاني بيك شكووون
لارا: تنطرت هاربة: ديريها نتي وراجلك اولدوناااي ودرك تشكاي وتبراي مني قال بلية قال.. حوجي مالي جبتها من عندي هههه
فحطت تتفاحج هاربة بصح وسهيلة وراها مجننة تريشها.. شوي فشلت ولارا سبقتها للدروج نزلت لتحت وعطاتها بجرية لكرسي فالجنينة بركت مستنية يروحو يوصلو سمرة
في سويسرا.. فجناح واحد من ارقى اوتيلات روزا شادة فوتاي.. كل مرة بوزيسيون شكل.. لملل قتلها يوم كلو وحدها.. فاقت مالقاش اثر لأمير.. فلول فرحة قالت تهنية منو وشيطانها حضر بدات تفتف من ومن على مهرب.. لين لقات وحد المسجل فوق طابلة تم خدمتو جاها صوتو.. بحال عزريين تملكها ترخفت تسمع وش فالتسجيل.. خبرها بخروج بلاما يحدد وقت رجعتو.. تواجدها فجناح معزول كليا عن بقية اللوتال.. ممنوع تحاول تهرب مأنو بفخاخ وكهرباء.. غلطة منها فغيابو تلحق للهواية.. حرص عليها وعاود مش تخويف كلامو صحيح.. وتاكدت اول ماحاولت تهرب من وحد لباب ضربها كورون كون مازربت بعدت يبست تم وتحرقت.. تناسات لهربة وفوتت نهار كيفما كان.. دوشت تلهات بحالتها تفقدت اثر اصابات بدنها.. رتاحو بقى لقلة برك.. خذات روپو رقدت وفاقت فيها الجوع مالقات مادير خدمت الTv قلبت كشما تتفرج ماعجبها والو.. طاحت صدفة فكرتون ماشا والدب.. تفكرت تايغر وهدوراتو جابلها الضحك.. ضحكت حتى تفرشت ودورتها دموع لين تعبت.. سيبت كلش وترمات فوق لفوتاي غفلها النعاس مافاقت لقاتها ظلمة ليل طاح ولفطور فاتها وهي لدرك بلا ماكلة.. بقات تتلوى مش مالجوع مولفة فأصعب ظروف حياتها تتحمل بلا اكل.. مي جاتها التغزيلة منو.. كل مرة معذبها بشكل او بآخر.. كون قتلها برصاصة اهوى من عذابها بالطرق شتى
فمطعم نفس لوتال.. جالس مع ذراعو ليمين و4 خلاف خدامين معاه.. هم يتعشاو وهو جهد فرق صيامو بماء وجي.. ترخى يحكي فسبب اجتماعهم (حوار بالالمانية)
أمير: العملية الجاية رح تكون بعد سمانة.. نوجدلها بلان تكتيكي بعدما تجيبولنا تفاصيل دقيقة
° أامر وحنا نفذو
• وش لمطلوب مننا؟
أمير: تفاصيل كل مرة على موقع المهمة
> مداخل ومخارج منطقة******
أمير: شحال بينها وبين اقرب اوطو روت.. لوقت والمسافة.. مواقع الجسور والانفاق.. شحال يلزم لابوليس به يطبو تم.. العصابات القريبة مالموقع وووو
بقى يذكر ويوزع فالمهام بينهم ذراعو ليمين جبد حقيبة كحلة عملية حطها فوق الطابلة حلها وهز تليفونات earpods لاسلكي وID لكل واحد منهم يلزموهم فالمهمة.. ضبطهم ووصلهم ببعض والهويات تحسبا لأي خلل يواجههم.. بعد نص ساعة ناض طلع لجناحو.. خلاهم يكملو عشاهم ضاربين الحطة تقول رجال اعمال.. مبعدين الشبهات لخدمتهم الحقيقية !!
★★★★★★
حبس السارفور فالباب جبد 100اورو مدهالو وصرفو زاد فرحان بيها.. فحين هو جبد لعيبة صغيرة من جيبو ركبها فقفل الباب الاكتروني نسخ لكود ماللعيبة للقفل تفتحل لباب دخل بالطابلة.. لعب عينيه مابانتلوش فجأة حس بيها وراه مع تلف لاحتلو بوكس للوجه.. هز راسو يحرك فكو لقاها محرحرة لحقتو الثاني زرب شد يدها لواها لور كابسها رغات متوجعة وكانتقام هزت رجلها رح تعطيه ركل بلوكاها برجلو يرعد
امير: رببك نتي ماتجييش بالمليح
روزا: بويسك انت ماتستاهلش لمليح
أمير: بلللعي
شرع يدو ونزل على رقبتها بحد ماضي ضربة وحدة لبلاصة حساسة تم شلها.. طاحت مالسماء للوطى بسيف تتفس عينيه محلولين طاقة.. زربها بالحركة ذي خلاها ترحي لداخل
امير: طبس لمستواها لاوي لسانو: شفتي طيرة ديينمك وين توصلك.. اللرض هذا حدك معايا.. هنا تحتي تترصي حتى تحكمي قدرك.. هز يدها يتحسس: يدك هذي كل مرة تطوليها عندي لا ماتربيتيش نكسرها او نقصها مالجدددر نرزيك بيها.. فرمشة عين كبس صبعيها وجعها درجة صفار وجهها خافت يكسرها.. تبسملها زي لبسيكوپات رخى يدها وداها لفمو باس كفها بقوة: شفتي يدك هذي تعجبني كون تبدل خدمتها معايا.. كاين معاملة خلاف نفضلها.. كون ترضيني نحل لأبواب لمقفولة كل فوجهك.. اما دوماج نتي شيطانة ومامعاكش الحنانة.. دوماج ا مشماشة خصك لي يشرملك يمششك حتى للعظم
رد يدها للرض ووقف يزفر للدوش خلاها مطيشة مكرزة ومافجهدها تحرك عظم!! قالت عليه بلييس! قالت تكرهو! لا احساسها جهتو اقوى من الف تعبير..
فدار سليمان.. تلمو لأحباب وصلو سمرة شافو مهى تملكو وتولاوها بالوحدة يوشحلو.. سيرتو سهام ورحمة عزت بيهم فوق لقياس.. سلوى لصقت فالرودة جابوها بسيف دارت لواجب وطيبت خاطر بنتها من اخر مرة.. شدت بلاصة حذا مليكة كل مرة تنطق وحدة منهم تعلق ولا تنكد الحالة.. آية ولارا لفرس لأختها ليهم بالمرصاد.. رحمة وسهيلة غير يسايسو ويعدلو متحلفات فبناتهم
سمرة: كثر خيركم وسامحونا شقيناكم فالظلمة
الكاملة: حاشا وش بيننا خير ولا شقوة.. ربي يشفيكم ابنتي وحنا نجوكم فالظلمة فالڨوايل مهم نطمو عليكم
سمرة: يسلمك الحّاجة كلكم عزة وصواب
حورية: معلوم.. ورانا عشرة سنين مش غير درك
سهيلة: ربي يجمعنا فساعات لخير ديما
الكاملة: آميين.. الا وينهم الفلالس تعكم
شهد: لبرا مع معز وياسين يلعبو
الكاملة: روحو خلاو الدار ظلمة علينا
حورية: لولاد عمارة الدار ونورها.. شفتي حالنا حنا بقينا شحال بلا بيهم شفتي
رحمة: مايتشبع منهم ماشاء الله ربيتو ولقيتو
فرحتهم وشي ضحك شي مدح مفوتينها بسيرة لولاد.. حورية تتربج بجسور والكاملة تعدد مواقف أشبالها.. رانيا مضحكتهم بقوالب جود مع بوه.. وهك حلات القعدة..
ما زوز عقارب مساميات توانيسهم غير سم
مليكة: وييلي علاه مايجيبوكش حقك وواجب عليهم.. جاية لبنتك تجي فوق خشمهم كامل
سلوى: شفتي ملبارح محيحة نجي حد ماكبر بيا.. شفتي طيحتي وصلتني للمذلة.. وليت ذليلة فآخر عمري لا راجل لا ولاد فظهري
مليكة: لاه وينو ولدك؟ يجيبك هو وطزز فيهم كامل
سلوى: ماهوش هنا.. كون جا كبدي يهزني على ظهرو لا شتى ويجيبني.. قلبي هذاك ولوحيد لي نشوف معاه
مليكة: متأثرة: شفتي لولاد شحال ملاح.. انا فالصغر مالتيش جهد جبت ولدي وحيدي قلت مهم ولدت ومانيش عرة الناس.. حتى كبرت عاد قلت ياندمايا كون غير جبتلو خو ولا اخت.. زوز ولا 5 غير من واحد فْرِيييد
سلوى: علاه الندمة كنت تهزي وطيحيهم؟!
مليكة: بلهفة: لاا هالعار وهذي عملة تندار.. هذا ماعطاني ربي.. تأمني سخفت عالولاد شوفي المسلوتات هذو كل بززرو ولدو شوفي كيفاه زيانو وحلاو صغار حتى.. حييت تانا نولد واحد ولا زوز
آية: لحقت عالهدرة حطتهم كيسان الجي تكلاشي فلمس: شمن واحد ولا زوز.. الله يهديك ا مرت خالي منين يجيوك منين وانت فاللاج هذا سي تروطار.. لا غير خريتيييهم
شطحتلها حاجبها وزربت هربت قبل ماتصوت تسمع لكل وتقلب القفة عليها.. خلاتها تعارك وتغلي بوحدها رح تطرشق وسلوى تهدن فيها ماصابت تركحها ولاتطلق الضحكة لي كاتمتها
★★★★★★
خرجو مالدار رباعة يتجرجرو بالجلالب بعدما كلاو راس امهم ها لي تغمت ها لي تشهات ها لي بغات تضرب دورة ترحي ماكلة لفطور.. خرجتهم يبدلو هواء ومنها تكسل رجليها ليها شحال ماخرجت مامشات غير فالدار بدات تعجز قبل وقتها.. سايقتهم ف3 حذاها ستر واحد يخلفو بزربة حتى خرجو لطريق لكبيرة ضاوية كثر والحركة كثيرة غاشي بزاف مع جو رمضان الطرق تتغالى بالناس
نادية: بقاو حذايا وشدو فبعضاكم بي تعيل من ولا من نسلخها هنايا
مروة: واش دانا للسليخ تهناي ماندير والو
أسماء: بهمس: اهدري على راسك ماهي عارفة لبلوة لي مخرجتها معانا
مروة: قرصتها: بللعي ا فرس ختك اكبر منك ماحشمتيش تهدري فيها هك
نادية: لمحتهم: بركااو مالمناقرة شوفو ختكم زيماه عاقلة ماتندمونيش كي خرجتكم
خزرو لهاجر زيماه حاشية راسها فتليفونها تخنتب مش معاهم جملة.. جروها ينكرو لاحقين امهم
مروة: نحي الزمر من يدك
أسماء: شوفي قدامك لا طيح تتفرشيلنا هنا
مروة: لا تعرضتي فلرض عزرين مانوضك
أسماء: وعزرين ماسكت الغاشي يشبع ضحك عليك
هاجر: فهمت سايي بلا تاكلوني اففف
نزلت التليفون وركزت مع الطريق غير بدات تلمح الپلاسات وين يجمعو بلعادة فرمضان تلاحت على امها ترغب
هاجر:ماما وصلنا للپلاسات خلينا نروحو ناكلو لاكرييم والجي فرااش.. بلييييز
نادية: لاكرييم وجي خلاه ؟! ماكانش امشي للكراسى تالجنينة نقعدو نتنسمو لا تاكلو لا عندي به نخلص ماهدرتوش فالدار نعمل حسابي طفرت فيكم.. اممشيي
هاجر: ونتي لاه خارجة بلا دراهم شكون بقى يخرج مسلوت زي هك فالوقت هذا
نادية: شغل كاسبة بوونكة فالداار نغمر منها بالشكاير ونخرج نصرفهم عليكم نديرلك غرضك
هاجر: ماقلتش ديريلي غرضي واصرفي شكاير رغبتك فلاكرييم برك ا ماما لاه حامية عليا هك !!
نادية: خاطر شافيتك فيقتي بزاف ليامات هذو حابة تلبسي وتاكلي وتخرجي تقول بنت الباشا عمار ناسية باباك ڨدو ڨد روحو وريحة الفرنك مايدخلو يتحاسب معاه
هاجر: بزعاف: مانيش ناسية ماكبرت كرشي ماوالو خلاص ديريني ماهدرت ماتشريلي ماتقمعيني نعلبوو لي يشهى معاكم ديما ديرولي هك
نادية: ماعجبكش حالنا ا لالة شغل موالفة بالخرجات والماكلة برا !!
مروة: اشش وطي صوتك ا يماا رح تفضحينا قدان الغاشي
أسماء: شوفي لقراب زيماه يبحلقو واقيلا سمعوكم ديجا
نادية: خفضت صوتها محرشة: ماكنتوش تسمعو فالدرعة اختكم.. واقفة تحاسب فيا لاه ماجبتيش دراهم ولاه مكش صارفى علينا شغل لقيت فالدار وبخلتكم.. شووف جرة تهوالكم زربتوني خرجت بلا بوغتموني منين نجيبلكم دراهم نوكلكم منيييين ؟!
أسماء: بتسيتيت: تختخي صدرك بالاك تلقاي شي عشرين ولا خمسين الف يكفية يكفيو
نادية: شمن عشرين وخمسين حسابلك بزازلي يقطرو دراهم ؟!
مروة: علابالنا يقطرو حليب غير تفتفي وصايي بالاك تلقاي موالفة تخبي الصرب فعبونك زعما..شوفي ترا وراس لميمة تشوفي بالاك تلقاي صريفات
نفخت نادية من شوانط بناتها وتخبات فيهم تفتف لفوق لفوق بلاما تفضح راسها.. ماهاجر لمتصنمة من رد أمها معاها كمدت زعاف لين فاض بيها طرشقت فيهم
هاجر: نااكل السم يموتني تتهناو مني على پوو اكرييم نترخس هك مانيش ماكلة ناكل الرهج يرهجني بلاما تشقشي روحك تبربشي عالصوارد مابقيناش محتاجينهم
هربت منهم تهرول بلا وجهة باينة خلاتهم يعيطو ونادية تعارك وتتحلف فيها.. مع قربت لكراسى الجنينة لي لاصقة مع لپلاسات بركت فأول كرسي عارضها وبقات ترجف مالغصة حابسة لبكية بسيف لين وصلو..أمها بالفقصة مدت يدها لزندها رح تنوضها تلاحو خواتها يفكو مروة قحزتها لحافة الكرسي وساماتها فحين أسماء بركت أمها فالطرف لوخر وجات هي ومروة فالنص
نادية: تحاميتو اه تحاميتو اصبرو تروحو وناخضكم كلكم على بعضاكم
مروة: تطبطب على ختها: بركاي مالتحلاف والعراك ايما حاجة مامستاهلاش ونتي تهزي لحماان مليااار
أسماء: شفتيها.. كلمة زوز تتقلب علينا
نادية: قرصتها: دورتي عليا ا فرس وانا لي نقول اخر لعنقوود عمرها تفرط فيا
أسماء: تتنفض توحوح وتضحك: مادورتش العفو ا ربي ونتي يفرطو فيك الناس
حضنتها تهدر وتمحش تركح فيها بشوي هداتها وهدنت الحالة بداو يتوانسو عينيهم عالرايح والجاي والجوارين لحواسة.. هاجر وذن معاهم لغصة باقية تحرق لداخل غاضتها روحها بزاف من جاست أمها.. فأغلب لمواقف تقمعها وتنشعها لين تبكيها ساعات تشك واش بنتها بنت كرشها ولا غير ملڨطها من كاش سبيطار !!
.... يتبع
ماتبخلونيش بآراائكم ... خليو تعليقاتكم فكل حلقة ❤..
فضلا ★ vote للحلقات
اضغطو على رمز " ★" اسفل الحلقة❤
+
🥀 متابعة لحسابي
Anayiismanou