وصل اصيل قدام واحد الريسطو فوسط المدينة معروف نوعا ما ... يلاه كيقلب الروايض ليمن باش يباركي وهي توقف حداه ونزلات الزاج ضاحكة ليه ..
قسم. الى مكنتيش باغي صورتك تصبح غدا فجورنالات نزلو نتغداو هنا هههه
اصيل : ( شاف لريسطو ورجع شاف فيها وتكا يدو على الزاج) ناخد اومبوغطي !
قسم : غيكون حسن ... ( شافتو سكت طموبيل غينزل ) اصييل .. مشهية واحد الحاجة ممنوعة علينا فالنظام الغدائي ديالنا ...
اصيل : ( كيهز سوارتو وتيليفونو ) شنو هي !
قسم : شوراما . ..
اصيل : ( شاف فيها وتبسم ) معرفتش واش غنلقاها هنا ولكن انا نشوف ليك .... شي حاجة اخرى !
قسم : لا صافي ....
رجعات مور طموبيلتو وباركات وبقات كتسنى تابان ليها نزل من طموبيل كيعوج فعنقو وماشي باتجاه باب الريسطو وهي متبعة ليه العين وعاضة على شفتها ... طولتو وتجريدة ظهرو من الخلف .. مشيييتو والهبة لي فيها .. العيون لي بداو يتلفتو ليه ولي متأكدة غيكونو غارقين فزرقة عينيه ... بقات عاضة على شفتها شادة على الفولون وكتزيد تأكد علاش هي نهار لول تعجبات بيه كتلة كاريزما كتمشى على اقدامها ...
مدة تابان ليها خارج ووما ليها بيديه تبعو وهي ديمارات وهو ركب زاد قدامها وبقات تابعاه تابان ليها خارج على المدينة ... طريق كلها وهي الابتسامة مبغاتش تجمع على فمها .. مرة مرة كطلع عينييها فالمراية وكتشوف على بريق كيبان فيهم ... علاش كيدير فيها هادشي كامل !!! علاش فاش كتكون معاه كتكون فرحانة بحال هاكا ؟ شنو كيقدم ليها ؟؟؟؟؟ ... بانليها غادي بحالا ماشي لمنطقتهم حتى شافتو قلب على ليسر وماشي فطريق طويلة تابان ليها دار سينيال ليسر ودخل فواحد البلاصة تاوصل لواحد الجرف ووقف .... بلاصة ماغريباش عليها .. بلاصة لي تايجي ليها خوها ملي كيبغي يرتاح .... كان جرف كيطل على البحر .... وقفات طموبيل ونزلات وخدات نفس عمييييق عمرات ريتها بالهوا دالبحر ... والريح كيضرب فيها رغم الشمس الا ان داك الجرف ديما تايكون الريح ... حل الباب ونزل تاهو وهي زادت كتشوف مع الطموبيل ديالو ...
قسم : زويييينة ( نزلات عينيها للروايض ضربات فيهم رجليها ويديها فجياب سروال ) نقدر نجرب !!!
مد ليها السوارت محرك راسو بالايجاب وهي تبسمات ليه ركبات كتجربها وتشوف ليزوبسيون وتسول وهو متكي على الزاج كيطل عليها ومعجب باهتمامها بامور كتخصو ... كتقلب فالإرباغ وكاع اومور سلاماتو ... وهو فقط كيشوف فيها مبتسم فلخر هزو ماكلتهم ومشاو حدا مقدمة السيارة وتكاو عليها كيتفرجو فالبحر وتياكلو وحاطين الما وكانيطات موراهم على الكاپو دطموبيل ... ..
قسم : ( كتمسح شفتها من جنب من لاصوص ) اممم شحال توووحشتها .... هادشي دلي فاست فود ممنوعين فالدار وباش نليفريو ليفرور كيلقى مشاكل باش يديخل للازون . . وحتى الى بغينا ناكلو برا هادشي ونقلبو على الريسطويات لي كايديروهم فيناهو الوقت .... ( ضورات راسها عند اصيل ) فخبارك مكنتش كنعرف نخوي وقيتة ليا ... بحال مثلا نجي لهاد البلاصة وناخد شوارما ونكلس شوية مع راسي كنشوف فالبحر ....
اصيل : ( كيشوف قدامو ) وعلاش !
قسم : كنت كنتفادى نجلس بوحدي .. رغم كنكون محتاجة وقيتة ليا .. فنفس الوقت مكنبغيش نكون بوحدي ... الى جيت لهنا بوحدي وخديت شوارما بحال هادي ... مغتكونش لذيذة بحال هاكا ! غتجيني باسلة .. وغالبا غنبكي تانشبع ونمشي لدارنا .. ماشي بحال يكون معايا شي واحد ...
اصيل : ماعندكش صحاب !
قسم : لااا ... كنت صغيرة بزاف فاش درت صديقة وكانت عندي عزيزة وملي طلعنا لاعدادي ماتت بالسرطان .... صافي من داك ساع مادرت حتى شي وحدة ... مكنبغي نربي الكبدة على تاشي وحدة وتمشي وتخليني ... حيت مور داك البنت ... مرضت بزاف من فراقها ... وضيعت عام دالقراية ... اكبر فوبيا عندي فحياتي .. هي نولف شي حد ويمشي ويخليني .... داكشي لي خلاني نبقى بعيدة ومانربي الكبدة على تاشي واحد من غير عائلتي ....
اصيل : وشنو بدل رأيك !
قسم : كان لابد واحد نهار مغيدخل شي واحد لحياتي .. ولي خلاني تعطلت بزاف راه نفس هاد المشكل ... كنت كنقلب على هاداك لي نكون مطمئنة وانا كنربي عليه الكبدة .. نكون مهنية من جيهتو انه عمرو غيخليني ...
اصيل: وباش غتكوني متأكدة .. مكتخافيش من الغدر !
قسم : الغدر كيبان فالعينين اصيل ... قادرة نميز الغدار من لي عاطي نيتو ... ( شافت فيه ) حيت انا فالعمر لي خديت فيه تجارب كتيرة .. كتخليني نعرف نحدد الناس لي نعطيهم نيتي ... ماشي مراهقة طايشة نتيق بشكون ماكان .. هادشي علاش نهار قلت لبابا كنبغي شي واحد .. قلتها وانا عارفاه مهني من جيهتي ومغايخافش عليا ..
اصيل بقى غير كيشوف فيها فلخر ضور راسو غير كيشوف فالبحر .... تاسمعها
قسم : فخبارك يقدر يجي خويا فاي لحظة ... هادي هي بلاصتو
اصيل : ( شاف عندها ) بصح !
قسم : سي .. ديما ملي كيكون مقلق ومبرزطاه شي حاجة ولا حتى فرحان كيجي لهنا ... ديما كنت كنسول راسي اش تايعجبو فهاد البلاصة ... ليوما شفتها بمنظور اخر ... صدقات زوييينة هااادئة ومريحة
اصيل : معارفش واش كتعرفيها من قبل ( كيمسح يدييه بكلينيكس بعد ماسالا سوندويتش ديالو ) ولكن كنت كنجي ليها بزاف انا والدري صاحبي كنصيدو هنايا نهار كنبغي نصيد بالصنارة ...
قسم : هادي هي طريقنا وماعمرنا تالاقينا ههه ... ( ضارت لكابو حطات تاهي الكاغيط دسندويتش لي كان فيديها وهزات منديل ورقي كتمسح يديها وهو ضور لراسو لعندها متبع معاها كلامها كيعجبو فاش كتكون كتهضر .. رغم انه قليل الكلام وماعندوش مع لي كيهضر بزاف الا انه هي مكيسخاش بيها تسكت واخا يتحكم عليه يسمع ليها حياتو كاملة كتعجبو طريقتها فالهضرة وصراحتها وعفوتيها ) ماعرفتش واش راه فالدار .. ولكن على الله يجي .... غاتكون صدفة زوينة وغيعجبو الحال الى تعرف عليك ....
حسات اصيل جرها من يديها جابها قدامو وبدا كيمسح ليها فمها لي كولو مجخطن بلاصوص وهي كتشوف جاتها الحشمة وهي كتخيل وجهها مجخطن وهو كيمسح جناب فمها مركز بعينيه مع شفايفها وهي عضات على شفتها بحشششمة كتخيل وجهها خايب قدامو .... ماعرفات كيفاش دير تصرف وهو كيمسح فمها بهدووووء وعينيه مركزين على شفايفها ... توترات وكتزيد تعضهم معارفاش اش كدير فيه بهاد الحركات .. وبدات كتلعب بعينيها كتحاول تشتت ليه الانتباه ...
قسم : ( بحشمة ) را ... راه حيت توحشتها .. ك .. كليت ..... بلا منحس ... وو نتا ... كتعجبك شاوارما ..؟ ا .. المداق د .. دياا ل ... لملوحة ..... !
اصيل : ( عينيه على شفايفها ) كاتعجبيني نت .... ( قسم وسعات عينيها وهو قرب ليها راسو وهي كلها يبسات مزيرة على يديها .... وباس بوسة خفيفة جنب شفتها مبغاش يغرق باش ميعاود نفس المنظر ديال قبيلة وبعد راسو كيشوف فيها ) كيعجني المداق دالحلو المالح ....
قسم : ااا .. ب بحال ... ( كتحاول تشتت الموضوع ودخل فموضوع واحد اخر وهو تركيزو غير عليها ) بحال ل بسطيلة !
اصيل : بحال شفايفك ولاصوص ....
قسم عضات على شفتها ولات ححححمرة وهو ولات كتجننو شخصيتها المخلطة بيت الجرأة والحشمة وشافت فيه كتمسح فمها ...
قسم : و. واش باقا فيا لاصوص فين !
كدوز كلينيكس على جناب شفايفها وهو حرك راسو بلا مبسم كيشوف فيها وهي كتسنى يبعد عينيه غير شوية باش تقدر تنفس .... كتسرط فريقها وهو فهمها توترات ورحمها شوية قالب الموضوع فنفس الوقت كايمشط بيدو شعرها لور لي كيطيح على عينيها بالريح ديال الجرف ... ..
اصيل : قلتي ليا خوك غيعجبو الحال ... واش نت هضرتي مع عائلتك عليا ! ...
قسم : ( حمدات الله لي قلب الموضوع عاد تتفسات ) لا ... غير بابا وخويا ... تقدر تقول اقرب الناس ليا .......
اصيل : وماماك !
قسم : تاااهي قرييبة ليا .. وتمنيت نمشي نقولها ليها ولكن ماما كتسبق الاحداث بزاف .. الى قلتها ليها غتلسسسقني دغيا تشوفك وغير تشوفك غتلسقني دغيا نتزوجو ... ماما مكرهاتش فوقاتش تزوجني دغيا ههههه مسكينة هازة الهم فاش كتشوفني كنرفض فكاع لي كيتقدمو ليا كتقول راه عمرني غنبغي نتزوج .. ديييما كتسمعني ديك الكاسيطة ديال بغيت نشوف ولادكم .. بغيت نربيهم ماحد فيا الجهد ههه الى قلتها ليها دابا غاااتزرب بزاف وحنا باقين غادين خطوة خطوة راك عارف .. ماشي بحال بابا و خويا منطقيين مغيفكروش بالعاطفة ....
اصيل : ( بقى شحال ساكت كيدوز يدو على شعرها واليد الاخرى معنقها من خصرها وهي قدامو كتشوف غير فالصدفات لي فتيشورت ديالو مقادراش تشوف لعينيه بزاف ) قسم ...( قسم علات راسها فيه ) مكنتصورش شي نهار تجي سلمى تقول ليا خويا راني مع شي واحد !!! مدخلش ليا لعقلي .... ماعرفتش الطريقة لي كيفكر بيها خوك ولكن مستحيل كنت نغياجي بحالو ....
قسم : انا راه معنديش عشرين عام ااصيل .... حتى انا عندي ختي قد ختك ... وكون تمشي عند خويا ولا باابا تقوليهم راني مع شي واحد غايقتلوها هي وياه .... عندنا البنت الصغيرة ماخصها تفكر فحتى شي حاجة منغير قرايتها ومستقبلها .. ومغتقدرش تحدد لي يصلاح ليها من لي لا .... و كون مشيت عند بابا ونا فعمري عشرين عام مكانش غايتصرف هاكا وكان غايسيفيط ليك لي يخليك عمرك ضور بساحتي .. ولكن و انا فهاد للاج وساليت كاع قرايتي وكنوجد ل مستقبلي يعني بحالا وصلت لداك المرحلة لي كايتسناوني نتزوج فيها وندير عائلة .... عارفيني الى ختاريت شي واحد دابا مغانختاروش باش نتفلى .... ومغانتخارش لي باغي غير يدوز لوقت .... غانختار واحد بعقلو تاهو نكملو آلافان الى توالمنا ... وعائلتي كاملة ماكتآمنش بداك الزواج التقليدي .. ديال مايتعرف عليها حتى يديها لدارو .. لا .. صراحة كايبغيونا اننا هاداك لي نديوه نبغيييوه ... نعيشو معاه ذكريات زوينين نعاودوهم لولادنا كيف ماتايعاودو لينا هما .. غير الشرط ديالهم هو منديروش هاد الشخص فحياتنا حتى نكونو وصلنا لواحد للاج معين لي كايعني تعقلنا وفتنا المراهقة ... وسالينا قرايتنا ....
اصيل : ماعرفتش ... راه واخا تكون فلاج ديالك مغادخلش لدماغي انايا .... كنخاف شي حد يستغلها ولا يضحك عليها .. راه دنيا كلها دياب على برا راني كانشوفهم بعينيا اش كايديرو ....
قسم : اصيل ... شفتي البنت لابغات دير شي حاجة راه غاديرها بغيتي ولا مابغيتيش .... فما احسن تكون مصاحب مع ختك ونهار تبغي شي واحد تجي تقولها ليك ... وتكون عارفو شكون وعارفها اش كدير ... ولا تكون قامعها ونهار تبغي شي واحد غتخبي عليك ..... ماحسن !
اصيل : راه واخا تبقاي تغني ليا تالصبح ... ماراكباااش عندي انا هاد الفكرة .... لي يقرب لختي راه نحيه ....
قسم : ياك !!!! هي تانا نعيط على لي ينحيك ؟
اصيل : انا عارف راس باغي معاك المعقول مغانستغلك مغانغدرك .... هي باش عرفت غاطيح فشي واحد يحافظ عليها !!!! مغانقدرش نجي ونتيق تانعرف مصارنو .....
قسم : واش باغي ختك هاداك لي غادي تدي حتى نهار عرسها وتشوفو بحال داكشي ديال شحال هادي !!! والى مابغاتوش ؟ .. مارتاحتش ليه . ماعجبوهاس افكارو ؟؟؟؟
اصيل : لا ... ماشي لداك درجة .. ولكن نهار يدخل من لباب ويجيب عائلتو نعرفهم .. ونعرفو هو وشكون وولدمن وشنو باغي .... تما غنعيطهم وقتهم ...فين يكتشفو عقلياتهم وتاخد راحتها فالاختيار .....
قسم : وراه نفس شي واقع معايا حتى انا ! .. كون بابا ماعرفكش نتا شكون ... وولد من ... وشنو باغي .... مكنتيش غاتلقاني واقفة معاك دابا وعاطني ناخد وقتي نتعرف عليك .... وخويا ملي قلت ليه بابا فخبارو رجع لور ... حيت عارف بابا فيه الكفاية مكيان لاش يدخل هو ....راه نفس شي غير الطرق كتختالف ....
اصيل :كيفاش باباك كايعرفني !؟؟؟
قسم : مهم ( شافت لجنب شحال وشافت فيه ) مزال ماعاودتش ليك هادشي .. ولكن جات الفرصة دابا باش تعرف .. بابا ملي هضرت ليه عليك ... قلب عليك شوية باش يطمن ... وملي عرف كنيتك .. لقى بلي جدك ... راه هو لي كان الرايس ديالو فاابحر فاش كان كايدوز العسكرية .. بابا التداريب دالعسكرية البحرية مادوزهوش فالمردسة بغا يدوزهم فالبحر مع صيادة .. وجدي لي هو باباه لي رباه كان كايعرف جدك ... وجاب بابا صغير يتعلم عندو ... وكان كايخرج هو و باباك نتا فنفس الباركو ... وباباك الله يرحمو و بابا كانو صحاب بزاف ...
اصيل : ( جمع حجبانو مصدوم ) واش داوية بصاااح نت ؟؟؟؟؟؟؟
قسم : اااه ابنادم .. هادشي راه عاودو ليا بابا ..... ونزيدك ، جدك ... راه هو لي سمى بابا الروكان ....
اصيل : جدي انا !!!!!
قسم : اااه .. جدك نتا .. ياك سميتو المختار الشريف ؟ وباباك سميتو حسن ! ( اصيل حرك راسو بآه ببطئ باقي مصدوم ) اوا راه هو الرايس لي علم بابا البحر . ... وحيت كان اول حاجة صيدها كانت هي القرش ... سما عليه الروكان ... بابا باقي عاقل على كولشي .... وقال ليا جا ديجا عندكم لدار هو وجود .. شحاااال هادي .. وقال ليا بقى عاقل عليك فاش شافك كتعطي لبيبرون لختك
اصيل بقى غير كايشوف فمحنى فالجنب كايحاول يتفكر شكون هاد السيد ...
قسم : حيت مور البحرية بابا بقى على علاقة باباك وكانو كايتلاقاو .... وراه هو وجدي الله يرحمو حضرو لعرس باباك وماماك كاع .... ومنبعد قال ليا بابا واحد نهار كان داني انا ل ليكول وجا هو وجود كان صغير لعندكهم لدار ومعاهم حتى باباك ....
اصيل غي كايحاول يعصر ذاكرتو وويتفكر ...تاعلا حجبانو بجوج فاش تفكر بلي باباه كان عند واحد صاحبو لاباااااس عليه ومعروف وكان ملي كايبان فالاخبار ولا الجرائد كاقوليه هدا راه صحابي ودوزنا البحر بجوج .... شوية بشوية تابدات تتسلل ليه الصورة فاش جاو عنهم واخا معاقلش على التفاصيل بزاف ولكن عااقل مزيان على داك الرجل الحنون لي كان دخل وحيد صباطو فالباب ... وكان جاب ليهم بزاف دليكادو ... عاقل حتى على فاش كلس معاه على طبلة ولقاه حاط كتوباتو كايحفظ وبدا كايسولو على قرايتو وكان اول شخص وآخر شخص من غير باباه لي يهتم لتفاصيل القراية ديالو ويسولو شنو باغي تكون ملي تكبر .... باقي عاقل على النظرة الحنونة لي دار فيه فاش كان ماشي وكيفاش لعب ليه فشعرو وهضرتو لي واخا يموت ماينسهاش وديما كاتجي لبالو .....
- جوج دولاد دخلو يدوزو امتحان ديال الماط .. و واحد فيهم نسى الكالكيلاتريس " الة حاسبة" ... و بجوج بيهم نجحو ... ولكن هداك لي نحح بلا الكالكيلاتريس لي تعاونو وتسهل عليه لحساب وتختصر ليه لوقت ... هاداك هو لي نجح ديال بصح .... هداك هو لي جابها بدراعو ديال بصح ... وهاداك هو لي فاااهم درس مزياااان ... وهداك هو لي مكاينة حتى شي حاجة غااتقضي عليه مور داك الامتحان لي تعلم يعتمد فيه على نفسو .... نهار غاتكبر ودير مستقبلك ... غاتكى على طموبيلتك كاتفرج فمشروعك ولا مقاولتك .... غاتكون فخور براسك ... ( اصيل كان صغير ومتبع معاه كايرمش بعينه وهو كايشوف نسخة مصغرة عليه كانو كايهضر مع اسد قبل تلاتين عام مليوح فالشارع وحيد ودنيا كحلة قدامو ) كون راااجل ... وكافح .. وتهلى فختك وفباباك ... و حمد الله لي بقات ليك رجل وحدة واقف عليها ... .. كاين لي عاش وهو ماعندوش بجوج .... وهي راه غايجي واحد النهار ... غاتبكي الدم باش غير تلاقاك ... وتسامح معاك ... ومغاتلقاكش ...ونهار تهزها فوق كتفك وديريها تحت التراب ... غاترتااح مزيان . . حيت غاتلقى راسك ماعمرك قدرتي تكرها وقلبك صافي من جيهتها ... ( لعب فشعرو ) بسلامة البطل ...
اصيل : ( شدو من يدو ) بقى معانا مزال شوية اعمي ....
اسد : ( هبط لمستواه وابتسم ) عندي بنيتة كاينة فليكول مابغيتش نتعطل عليها غاتقلب الدنيا .... المرة الجاية غانرجع ونجيبها معاياا تتعرف عليها ....
اصيل : ( شاف لارض شحال وشاف فيه ) واش صافي ! هي مغترجعش عندنا اعمي ! فين مشات ؟
اسد : سمع اولدي .... كاين جوج دالانواع دالوالدين .. نوع لااول كايخلينا نحاروبو الدنيا على قبل يعيش معانا فيها ..... ونوع التاني كايخلينا نحاربو دنيا على عقل حنا نقدرو نعيشو فيها ....وهاد نوع تاني منهم ماماك ... عمرك تكرهها واخا شنو مادارت .. حيت ملي غااتكبر غاتعرف انها خلاتك تكون اقوى واااحد فهاد ادنيا .. وبسبباها طلعتي راااجل ... بسببها تعلمتي ماتيق فحتى شي واحد وماتربي الكبدة تا على شي واحد .. الوالدين ادّارو فهاد دنيا باش يعطيونا دروس .. غير الطرق هي لي كتختلف .....
قسم كاتشوف فأصيل كيفاش كايشوف لجنب وملامحو كايتغيرو وعينيه حمارررو عرفاتو تفكر شي حاجة تاسمعاتو قال بنبرة هادئة
اصيل : كون راجل ..
قسم : ها ! .
اصيل : ( شاف فيها ) اخر حاجة قالها ليا باباك قبل مايمشي ....
قسم : ( شافت معاه ) واش تفكرتيه ؟
اصيل : اصلا عمرني نسيييتو ... داك السيد لي كان جا عندنا وهضر معايا هضرة لي كبرات معايا وكل مرة نتفكرها .... باقي عاقل غير ماعرفتش واش هو باباك .. مكنتبعش اخبار البورصة بزاف ... كنعرف الاسماعيلين .. ولكن راه مكنعرفش تفاصيل بزاف عمرني ضنيت راه نفسو داك السيد ... حتى فاش شفت تصويرتو ماعقلتش عليه .. وجهو راه مبقيتش عاقل عليه مزيان ولكن هضرتو عاااقل عليها .. .( شاف فيها ) عقلت على النهار لي جا هندنا هو وخوك .. وقال ليا مزال يجيب ليا بنتو نتعرف عليها .... ماوفاش هو بوعدو ولكن بنتو وفات بيها ....
قسم : شفتي على دنيا كيدايرة !!! ... ديجا من نهار اول مرة شفتك وفاش لقيت راسي تعقلت بيك كنت حاسة شي حاجة كانت تما كتجرني ليك ... يمكن هدا هو لي كيسميوه المكتاب ....
اصيل : ( باقي مصدوم كيشوف لجنب ) فشششكال والله ... غريب هادشي ... ( شاف فيها ) باباك قال ليك علاش كان جا عندنا داك نهار !
قسم بقات كترمش ومبغاتش تقوليه تفاديا للاحراج ..
قسم : قال زيارة لصاحبو وصافي ...
اصيل : اممم .. ( حرك راسو بالايجاب وعض على شفتوو وكيشوف غير لجنب مستغرب ل هاد الصدف ) والله مابغات دخل ليا عقلي
قسم : حتى انا فاش قالهاليا اول مرة تصدمت والله .. كان بكااااني صراحة ههه ... وداك نهار هو كان قال ليا نجي نقوليك انا شكون ومنبقاش نكدب عليييك وبلي الفوارق الاجتماعية ماخصهمش يكونو .... كنت حسيت فاش كنت عاودت ليه عليك اول مرة مكانش مرتاح وتعامل بصرامة معايا .... ولكن فاش عرفك شكون .... عاد حسيتو رتاح .... وقال ليا بلي مكيعرفش معدنك ولكن كيعرف جدك وباباك وعاقلة مزيان على واحد الجملة قالها ليا عجباتني وزادت طمنااااتني .. وهي ملي يكون النسل والاصل ثاابت منخافوش من الولد والحفيد كيفاش غايكون ... حيت كيفما كان الحال غيجر لللاصل ديالو والقالب غالب ... راه داكشي لي خلاه مطططمن وهو عارفني معاك وبغاني نكون انا وياك وموافق .. غير هو كان قال ليا مايوافق حتى يشوفنا بلي درنا خطوة لقدام فالمستقبل .. وغيفرح لاعرفك غاتبدا فمشروع جديد .....
اصيل : ( شاف عند قسم ) كنت مخلوع نتلاقاه .... فرحت ملي عرفتو نفس السيد ... حيت كنت كنتمنى نعاود نتلاقاه .... غير باش نقوليه كان عندك الحق ....
قسم : هانتا غتلاقاه وقوليه كاع اش باغي هههه ...
اصيل بقى يشوف شحال لجنب وخدا نفس عميييق وتبسم لهاد الدنيا كيفاش دايرة وشاف فقسم
اصيل : واش عارفة على راحة حسييت بيها دابا ولا معارفاش ؟ بحال شي جبل كبيير كان فوق كتافي وتزاح ...
قسم : ( بضحكة عجبها الحال ) علاش
اصيل : من ناحية عرفت باباك شكون .. صدق واحد السيد لي عزيز عليا وعندي بيه معرفة خاصة ... ومن ناحية اخرى كنت كنفكر فهاد القضية ديال هضرتي ل باباك عليا ودابا قلتي خوك يجي لهنا وعندو عادي انه يشوفنا بجوج .. كنقول هادو كيفاش كيفكرو !!!! .. كيفكرو بطريقة بعيييييدة على طريقتي فالتفكير .. يعني حسييت براسي بعييييد على عائلتك تا فطريقة لي كنشوفو بيها الامور .. منكدبكش عليك خديت داك النظرة ديال راهم أوووووپن ... وانا مغنعرفش نتعامل مع ناس بحال هاكا انا راني ولد الحومة ولد الشعععب نفسي حارة ... كنت كنقول دابا الى غير غرت على بنتهم من شي حد يقولو ليا نووو سينوغمال سي دييزااامي ههههه
قسم : شنو ؟؟؟ اصيييل ! واااش منيتك ! اويلي سينوووغمال ههههههه
اصيل : هه كندوي ديال بصح والله تاااااكنت هاز الهم .... كنقول كيفاش غادي نوولف الطريقة دالتفكير ديالهم وكيفاش نستحملها ... مي ملي عرفت باباك عارفني شكون .. يعني كون كنت فبلاصتو غنتصرف بنفس الطريقة وغنطمن على بنتي ... رتاحيت شوية ....
قسم : ههههه ضحكيتني واخا مافياش .. ياك قلتها ليك فلول قلت ليك متاخدش اححكااام مسبقة ونتا مكتعرفش الواحد ..... الغيرة على حاجتنا كتجري لينا فالدم .. فاش قلت ليك ولد عمي طراو ليه مشاكل البارح ومجاوبتش فتيليفون .. عارف شنو هو المشكل ! راه غير حيت جا عندنا واحد صديق العائلة يعزي ويمكن قال شي حاجة على ختي الصغيرة ولا شاف فيها ولا منعرف ... راه ريب ليه سنانو فجردة و صيفطوه بابا وعمامي لكلينيك .... ( اصيل علا حجبانو ) ماااعندناش حنا هاد سينوغمال . . راه ملي كنكونو فشي سواغي راه الا شاف فينا شي واحد انا وقدس راه تنكونو كنترعدو بالخلعة باش ميشوفوش بابا لا جود يصيفطوه للروضة ...
اصيل : ( تنهد من اعماق صدرو ) حمد الله ....
قسم : هههه علاش !
اصيل : ماعرفتش اقسم .. والله تاكنت هاز الهم .. حيت مغنلقاش راحتي فشي بلاصة الى ملقيتش فيها الرجال ..
قسم : ( ضرباتو لكتافو ) وماالنا كيييف بنا لييييك ...
اصيل : والله الا رتاحيت دابا ... راه خديت واحد نظرة فشكاااال فلول ....
قسم : راه قلتها ليك .. قلت ليييك راه غير مزال مكتعرفناش .. قلت ليك لادخلتي لدارنا غتبدل فكرتك ... حنا عائلة عندنا غير بعضياتنا ا اصيل وكنمووووتو على دمنا ... ولي تضرر فينا كنضررو كاملين ... نقتلو على بعضياتنا .. ونتا غادخل نسيب لبكر الاسماعيلي .. واش عرفتي مكانتك كيفاش غتكون ومعزتك راه غتكون خاصة ....
اصيل : ( تبسم ليها وضربها لنيفها ) ان شاء الله ..
قسم : كنتي ناز الهم ومعقد الامور على راسك على الخااااوي ههههه ... والله الا قالك الغيرة ... غابلاتي دخل وسطنا الا مكرهوك فريحة الغيييرة ومايجي منها ههه
اصيل : قسم..... ( شافت فيه ) عاوديلي على عائلتك كتر خليني ناخد فكرة قبل منتعرف عليهم .... صححي ليا الفكرة لي واخدها ......
قسم : ( تكات على جنب الطموبيل حداه ) ماعرفتش منين غانبدا ... راه تريكتي كايخصها سيمانة باش نكملها ههههه
اصيل : بداي ليا بلونطوغاج ديالك ونت طالعة .... باغي نعرف كولشي ....باش نهار نتلاقاهم نعرف كيفاش نتصرف ...
قيم : امممم .. بيمن نبدا ليك ... بابا راك كتعرفو هههه ولكن انهضر ليك شوية على طبعو ... بابا بقدر مكايبان صارم .. بقدر ما حنين .. تايموت على العائلة .. كيبغي ولادو ديما يكونو كابابل ... دماغو ديما فايق مكينعسش ومقابل كولشي وبحالا قلتي امور العائلة كلها على كتااااافو ...حيت هو لي بناها
اصيل : كيفاش ! ..
قسم : آآي اصيييل والله حتى هادشي طويل ....
اصيل : مستعد نسمع ليك تتلغدا فصباح .. غير هضري ...
قسم : ( طولات فيه الشوفة ورجعات كاتشوف فاابحر وكتكمل ليه هو مركز معاها ) بابا فلول ... كان عايش بووحدو .. حيت رباه واحد السيد .... مات وخلاه بوحدو .... يعني نتا لاكبرتي مع ختك .. هو راه كبر بوحدووو كاااع ....
اصيل : وعمامك ؟؟؟؟
قسم : عمامي حتى تزوج بماما عاد تجمع بيهم .... عمي عدنان الكبير هو شقيقو ... ولكن عمو سفيان وعمو يونس خوتو غير من ماماه .. ملي كان صغير مور ما مات جدي الله يرحمو يعني باباه لي ولدو ... جداتو ابتهال لي هي ماماه تزوجات ببابات عمي يونس وسفيان ودات بابا ولكن مداتش عمو عدنان خلاتو مع جداه وجدو ومنبعد داوه لالمانيا بعدوه عليها .... وبابا ملي كانت فعمرو عشر سنين هرب من هاديك الدار حيت كان طاح فالدروج ومرض فودنيه مابقاش كيسمع ... وهرب باش ميبقاش يحس بنظرات الشفقة تما وتاحد مكان كيفهمو ديجا ماعرفوش كيف يديرو يتواصلو معاه ... كان خلا عمو يونس و عمو سيفان صغااارين فاش هرب .. وعاش فزنقة شحاااال .. قال لينا كان كينعس غير فالمحطات وكيجمع بعد المرات دوك البينتات ديال الكارو وكيبيعهم ... وكل مرة واش كيدير ....تالنهار تلاقى بالسيد لي رباه .. كان مكيولدش هو ومرتو .. ورباو بابا ولكن مراتو دغيا ماتت بالسرطان .. عاش معاها غير شي عام وتوفات ... واخا هاكاك داك السيد متزوجش بقى وفي لمرتو وربى بابا بحال ولدو تا بابا كيشوفو بحال باه الحقيقي وعزيز عليه بزاااااف ... خرجو لبرا يقرا ادارة الاعمال .... وقراه لغة الشفايف .. وكان بااقي كيفهم الهضرة غير من خلال الشفايف كيقرا اش كيقول ليه الواحد ... راه تاولدني انا بشحاال عاد رد السمع ديالو ..... هاكاك كبر ومكانش كيعرف ماماه كاع بمرة مكانش كيمشي لداك دار .. قليييييل فاش كان كيمشي حيت تربى بعيد عليهم .. ممربيش عليهم الكبدة ولكن خوتو عندو عزاز ... حتال نهار توفات جداتو ابتهال ومشا حضر لجنازتها ودفنها بيديه عاد ارتاح ....
اصيل مصغر عينيه كيلاقي هادشي وهضرتو معاه .. مستحيل يكون هجر دارو وهرب غير هاكاك .. شي حاجة دارتها ليه ماماه .. حيت من خلال هضرتو قال ليه ملي ديرها فالتراب مغتكونش كتحس بالكره .. بحالا كان مجرررب .. ولكن لي معارفاش هو واش قسم معارفاش ..و لا مبغاش تقول ... وهي مكملة هضرتها ..
قسم : مور الموت عمو يونس تقرب من بابا كتر ... وفهاد الوقيتة بابا تعرف على ماما .... ماما كانت غير بنت حي شعععبي عايشة هي وجدة وتلاثة ديال خوالي صغر منها .. خالو اسماعيل وخالو مروان وخالو امين ... وجدة رقيية لي كنعاود ليك عليها .... باباها مات وهي باقا فالثانوية وهزات مسؤولية جدة وخوتها وهي صغيرة وخاصها تخرج تخدم عليهم ومكانت لقات حتى شي خدمة وخدمات نادلة فوحدة من ليغيسطو دلوطيل ديال بابا وبليل كانت كتقدم المغنين فالبيران ديال لوطيل ... واخا كانت وسط داك العالم كامل عرفات تحااافظ على راسها وعمرها خرجات الطريق ... وواحد نهار كانت محتاجة فلوس وكانت بغات تسرق من لاكيس دلغيسطو ديال بابا ولكن حصلوها قبل متهز الفلوس وبابا بقى راد معاها لبال ولكن مادات والو .. .... مهم تما هوما تعرفو ... وعاقبها بربعة دالولاد ..سميتهم قسم وجود ووسيم وقدس ههههه
اصيل : هه وايلي !
قسم : قال لينا بلي ملي شافها اول مرة عجباتو بزاااف وملي لقاها مسرقاتش واخا محتاجة وكانو قدامها الفرص ومقدارتش تسرق .... عجباتو كتر ... وملي عرف قصتها وبلي كافحات وخدمات على دارهم وكتخدم بليل ومحافضة على راسها عجباتو كككثر وكتر هههه قال معاها يدير حياتو .... قال ليا كانت دخلات ليه المرح لحياتو حيت كان عايش غير بوحدو ومكتائب وماماه كانت يالاه ماااتت وكان عايش باعاقة دالسمع وبلي ماما هي الوحيدة لي مكتارثاتش لداك الاعاقة .. ووقفات معاه فكل مراحل حياتو وقال بلي هي لي زينات حياتو ونهار تزوجها كان احسن نهار عندو ....هاهي قصة ماما وابابا وبزااف دالتفاصيل انا راه كنحاول نختصر ليك ههه
اصيل : اهاه!!
قسم : من بعد ماتزوجو بابا وماما .. كان عمو يونس وعمو سفيان باباهم دار سيزي .. وجراو عليهم من الدار ...وباباهم كانت جاتو كريز ومات .. تماك عمو سفيان مشا لكندا ... وعمو يونس تزوج بواحد سيدة وكان ساكن مع بابا فدار وحدة بينما جمع راسو من جديد حيت فلوسهم كلها كانت مشات.... ولكن دغيا طلق داك السيدة حيت مكانوش تفاهمو .... وتزوج بخالتو ارييييج لي كانت صاحبة ماما فنفس الوقت مديرة ديالو فالخدمة .... يعني عمامي راهم تاهوما كافحو وتعبو على هادشي لي وصلو ليه دابا ... ومن بعد ماتزاديت انا طبببعا الله يخليني ليهم حيت من نهار جيت وانا جايبة ليهم غير المصايب هههه .. رجع عمو عدنان من المانيا وقلب على بابا ولكن علاقتهم كانت ماشي تالهيه حيت عمو عدنان كان كيظن بلي بابا قلب عليه وبابا كذلك ههه يعني سوء فهم ههه ولكن دغيا تصلح داك السوء الفهم وتجمعو ورجع حتى عمو سفيان من كندا ... عمو عدنان تزوج خت خالتو اريج .... وعمو وسفيان تزوج خالتو حياة لي هي بنت خالة ماما .... وجداتو رقية تزوجات ببابات خالتو اريج ورتاج .... هو لي يلاه مات الله يحرمو ..والله يجعل البركة هههه قسمو الخبزة غير بييييناتهم ههههه
اصيل : هاااكداك ... دابا هادو هوما عمامك .. الكبير قلتي سميتو عدنان ؟ هو ولا باباك شكون كبير
قسم : هو .. عاد بابا .. عاد عمي يونس وعمي سفيان هو الصغير
اصيل : هاكداك ههه كنحاول نحفظ معاك سميات ... اهاه ... تصاور لي شفت كانو تاولاد عمامك بصح راه ماعرفتش شكون ولد شكون ....عرفت غير خوتك حيت كان زاحد المقال فيه غير نتوما ... وتصاور لوخرين مجموعين .. لي شفت كان العيد يمكن ... ماركزتش بزاف ... عيني كانت غير عليك تقريبا ....
قسم :باركا عليك هههه ...هانتا انا تزاديت لولا كاع .... جاو من مورايا زياد واياد هوما توام .. وهوما ولاد عمي يونس .... زياد مزوج عندو بنيتة .. واياد مزال ... وبيلسان هي ختهم الصغيرة راه تقريبا قدها قد ختي قدس فايتها غير بشي شهورة .. الى عقلتي على تصاور دالعائلة راها زعرة وعينيها زرقين
اصيل : سي بانت ليا هاد البنت حيت ملي كنت كنقلب طلع ليا شي مقال مكتوب عليها شقراء الاسماعيلي ولا شي حاجة بحال هاكا ....
قسم : هي هاديك .. وقريبا الى كمل سيدي ربي هي الفيونصي ديال خويا جود ...
اصيل : اوو !!!! خوك سبقك ههه
قسم : ماسبقني ماسبقتو جينا قد قد هههه ...وعمو عدنان وخالتو رتاج حابو لينا تلاثة دالولاد الكبير هو لوؤي .. هو لي دار المشكل البارح ههه ... هو لي جا مور اياد وزياد ومور جود خويا.... وجوج خوتو صغر منو فصيل وانس .... وعمو سفيان وخالتو حياة جابو لينا سلطان هو اصغر واحد فلجينيراسيون لولة ديالنا هههه
اصيل : عرفتو ... كيلعب كورة ...
قسم : هووو هاداك
اصيل : الماتش لخر عجبي داك الولد ... عندو النفس ديال بصح وتيبان حار ...
قسم : ولاد عمامي كاملين هاكا وسلطان بحالا قلتي هو الضحوووكي ديالنا .. الجينيغاسيون لولة فيها انا وجود واياد وزياد و لوؤي وسلطان ... والجينيغاسيون التانية افتاتحاتها لينا بيلسان وتبعاتها قدس ختي الصغيرة و عاد فيصل ووسيم خويا و اية لي هي خت سلطان .. وعاد انس ... والجينيغاسيون الثالثة افتاتحاتها لينا بيان بنت زياد ... و واحد البيبي صغيور جاينا فطريق من عند خالتو حياة ....
اصيل : اووو .. مبروك عليكم ...
قسم : هادو هومااا حنا .... وملي غتعرف عليهم غتزيد تعرف كتر ... انا راه ماعنديش ما عز فهاد الدنيا كثر من عائلتي ... كنحسهم هوما كولشي بنسبة ليا .. داكشي علاش كتشوفني متحمسة وضاحكة وانا كنهضر عليهم ههه
اصيل : ههه لا حظت لااحظت ... طباعهم كيدايرة !
قسم : مممم شكون باغي تعرف ! ...
اصيل : كلهم ... ولكن بداي ليا بواليديك
قسم : امممم ...بابا راه هضرت ليك عليه وكتعرفو .... وماما منين غادي نبداها ليك ... شتي هي واحد الشخص لي ميكس بين خفة الدم و بين الحنانة وبين الصرامة وبين القلب البيض والقوة ....ماشي حيت ماما كنشكرها ليك ولكن اي حاجة كتسعدنا كاتسعدها تاهي.. ماما بحال داك ااقطة الشرسة على ولادها وعلى عائلتها .. ( ضحكات وهي كتفكر ) بابا كايعيط ليها مولات الشي هههه حيت هي لي لي جمعات العائلة كاملة وماتهدنات تازوجات عمامي كاملين ههه مكتعرفش الحسد ... كتبغي لخير لكولشي وكتبغي كوووولشي يكون مزيان ... ولاد عمامي كلهم بحال ولادها ... مكاينش شي وصف يوصفها كتر من انها لبووووؤة .....
اصيل : هادو هوما الامهات .... الى مكانوش غايكونو بحال هاكا غير بلا مايولدو
قسم وسعات عينيها ملي تفكرات ماماه ندمات كااااع علاش هضرات عليها خافت تكون جرحاتو و لا نبشات جروحو وهي تبدل ليه دغيا لهضرة
قسم : و عماااامي تاهوما ماابعادش بزاف على بابا فالطبع .... ناس شعبين وعزيز عليهم اللمة العائلية ومعقووولين وعنهم نيشان نيشان ..... عمو عدنان حنييين بزاااف فنفس الوقت بحال بابا صارم وصعيب والى تقلق صعييييب يتحزر هههه ... داخل سوق راسو لواحد درجة مكتصورش هو مكيعرفش يدخل فالحياة دعباد الله حدو ينصح وصافي .. تارأيو مكيعطيهش هههه مكيدخلش ومكيحملش لي يدخل فيه ... من غير لي معجباتوش شي حاجة ولا مرتاحش يقدر يقولها ... مريض بالقلب وخالتو رتاج هي دكتورة ديالو .. وهي مولات المدرسة لي غتقرا فيها سلمى ان شاء الله ....
اصيل : هااكدااك !
قسم : وي .. حيت عمو عدنان كان مريض بالقلب وكان تعرف على خالتو رتاج فالمصحة وهي لي دارت ليه العملية وبسبابها وبسبب الله سبحانو هو عايش دابا معانا وداكشي باش تزوجها ههه كيقول انها عطاتو حياة وعندهم قصة زوينة بزاف كاتعاودها لينا ماما .... وخالتو رتاج بحالو تاهي داخلة سوق راسها مرررحة ولاج ديالها مباينش عليها ... ضريفة وحنيييينة ومعقولة ... كتبغي بنادم الناجح فحياتو وصارمة من ناحية الدراسة والنقط ... و عمو يونس ... هدا عمو الجانتلمان ههههه العم الضريييف ديالنا ... مساااالم لواحد درجة مكتصورش هاادئ وهو اكثر واحد عندنا كالم فنفس الوقت تاهو مكااافح وكيموت على الخدمة وتحقيق الذات .... خالتو اريج بحالو .. سليتيست كتعجبها الموضة ... واخا هاكاك مراة شعبية ومعقولة وصريييحة بلا قيااااس ومكتعرفش تنافق ... عمو سفيان هو عمي الضحووووكي ديالنا وعمي الصغيير والبوكوص دالعائلة ... كوول فنفس الوقت مشتدد شوية هههه من صغري هو كيقوليا نهار ديري الحجاب تعزازي عليا كتر ... ومكيخليناش نقيسو حجبااانا ياويل يشوفنا نقصناهم ولا قاديناهم ... عندو نيشان نيشان ومكيعرفش تلاووووي .. مكينافق مكيزوق الهضرة كيعطيها نيشان فالوجه تقبلها ولا حطها .... وخالتو حياة تاهي ضرييييفة وضحوكية بحالو .. دكتورة الانجليزية فلافاك ... هي صغيرة فعيالات عمامي وباقين ديما كنشوفها هي الصغيرة منقدروش نشوفوها كبييرة هههه ... ماما وخالتو حياة ورتاج واريج بحال الا قلتي متقربات بزاف من بعضياااتهم صحاابااات كتر من انهم من عائلة وحدة .... ماعندهمش صحابات على برا هوما صحابات بعضياتهم ومعاهم حتى واحد عمو اخر منقدرش منعاودش ليك عليييه هههه غاضحكك سميتو ولكن سميتو اسبرو
اصيل : شنو سميتو ههه !
قسم : اسبرووو ...
اصيل : اش كيجيكم !
قسم : كان خدام عندنا وكان صديق ديال ماما فاش يلاه تزوجات بابا ... هو لي كان المتنفس ديالها ... كانت عندو سبعطاش لعام نهار تعرف على ماما .. واخا كان صغير عليها كان كايعرف يدير ليها عقلها ... العائلة كلها كتبغيه واخا دابا كبر باااقي على زفس الوجه لي عرفتو بيه ملي كنت صغيرة .... باقي كايموووت ب الخوف من بابا وفاش كايجي كايبدل لينا الجو فالدار ... توحشتو بلا قياس .... فلول كان غير صديق ماما .... ومع الوقت ولا صديق العائلة ديالنا كاملين خصوصا خالتو رتاج واريج وحياة ... وزاد عزاز كتر ملي واحد نهار كان مشكل فالخدمة ونقد بابا من الرصاص .. خداها هو عليه ... اجمل شخص تقدر تلاقا معاه ... قلبو بيض من الحليب ..... مفروح لواحد درجة مكتصورش .. نهار تشوفو اول مرة يجيك غرييب بسبب ستيل ديالو حيت عايش على برا وعايش الحمااااق ومكيتسوقش لبنادم .. ولكم ضريييف لواحد درجة مكتصورش وتااايقتل بالضضضحك ... مدة طويلة دابا مجا للمغرب وتوحشناه بلا قيااااااس .. اغلبهضرتنا غير ميساجات بسبب الفارق دالوقت وهو تقريبا خدام نهار كامل ... مرتو خت خالتو حياة ومزال ماجابش ليهم الله الوليدات ... ولكن عااايشييين كووول ... كنا كنتسناوه هاد العيد يجي وماكتابش ... وقال العام الجاي غايجي يكلس معانا بزاف .... اوا هاااادو هوما حنا ..... فردا فردا ههههه والى بغيتي القاسم المشترك بيناتهم . يعني عمامي وولادهم وعيااتهم .... هي العصبية هههه فينا عييييب واحد كاملين بينا اننا فوقيتة الغضب مستحييييل نتحكمو فغضبنا ..... خصوصا لا لانر كان كايقيس العائلة ..... بحال جميع العائلات وصافي كاتجينا النفس على بعضياتنا ....
اصيل : باقي واحد سيدة كنتسناك تعاودي ليا عليها هه جداتك ...
قسم :اااه ههههه ... الجدة الفريدة من نوعها ههه لي رباتنا بالبلغة و السمطة واتاي والمسمن والحرشة ... الجدة هي داك العنصر دالاصااالة فالعائلة باقا محافظة لينا على الاصول التقليدية المغربية كون مكانت هي ماكنا نعرفو والو ههههه معقولة تاهي .... فنفس الوقت حنينة وضريفة واخا صعييية شوية ههه وعندها واحد الراس بحال المعجم ديال الامثال المغربية كل نهار كنسمعو عندها شي مثل جديد ههه ....
اصيل : وخوالك فين عايشين ؟ تاهوما معاكم
قسم : لا هوما على برا ... حيت جدة زجدي الله يرحمو راه كانو عايشين فامريكا ... ولكن دابا منبعد الموت ماعرفتش واش جدة ااترجع ... ولكن خوالي باقين تما ... تاخوالي ضريييفيين وضحووكين وكوووول بزاف .. مغاتلقاش معاهم مشكل كاع قلييييييل فين كايجيو غير خالي مروان لي مقرب منا ...
اصيل : كانت فالصورة واحد السيدة اخرى دايرة الحجاب ...
قسم : خالتو حياة !
اصيل : هادي عرفتها كانت حدا عمك وولدها .. هادي كبيرة شوية
قسم : ااااه .. خالتو سارة لي هي بنت عم عمو يونس وعمو سفيان وتربات مع عمامي فاش كانت فدارهم .. واخا تزوجات بقات معانا على علاقة وقريبة لينا بزاف وتاهي قلبات كنيتها لااسماعيلي ولات وحدة منا عندها بنت سميتها ماجدة .... وراجلها عمران ..
اصيل :هاكداك .....دابا عرفت الكبار ... وطباع الغار كيداير ؟
قسم : انا راك كتعرفني ههه عاد اياد وزياد لي توام بحالا ماشي توام ... زياد شابه باباه بزاف عكس اياد .. اياد فصغرو كان كيحسابتنا فيه التوحد ههههه كالم لواحد درجة مكتصورش فنفس الوقت بقد ماهو كالم بقد ماهو عصبي .. بحال داك العاصفة لي كتكون هاااادية حتى كتنوض تقلب دنيا ههههه هاداك بحالا قلتي هو المثقف دالعائلة .. تايموت على القراية و البحوثات ... كتعجبو اللغة العربية الفصحى واللغة الايطالية واللغات الخرين وهو اكتر واحد كيتقن فينا اللغات من غير الدارجة طبعا ههههه لي ماعرفناش مالو معاها ههه.... داخل سوق العالم ديالو و قوقعتو مكيهتمش بالناس بزاف من غير عائلتو وعندو صاحب واحد .... عاد جود ... حود هو المنحوس ديال العائلة هههه خويا لي منهار تزاد وهو مسكين فالمصايب .... وماحدو كايكبر كايزيدو يكبرو معاه
اصيل : علاش ؟
قسم : ملي كان فعمرو ست سنين ولا سبع سنين هاكاك .... كان كااايطيير كيموت على الطموبيلات وواحد نهار حرك طموبيل دبابا بلا ميكون فيها ودخل فحيط وجاه ارتجاج دماغي ..
اصيل : واااايلي !!!!!
قسم : سي .... راه كون بحثتي بزاف غاتلقى مقالات على المرض ديالو ..... من داك ساع وهو من عملية لعملية ( اصيل كمش ملامحو ) واها كاع الترميمات لي دار للجمجمة ... بقات ليه واحد لاباغتي فدماغو من جهة ليسرية ماعندهاش الحق وقالو الابطاء بلي كاداوا مع الوقت ... يعني كترمم راسها ماحدو كاكبر .... هي لي خالقة ليه مشكل فحياتو انه ديما عندو النسيان ... وبعد مرات كايبغي بقول كلمة كدخل كلمة اخرى ولكن ملي فات ثناوية مابقاش عندو هاد المشكل ... بقى غير مشكل النسيان .. كايتسى الحوايج البساط بحال مثلا يحط سوارتو ويبقى يقلب ويرون دنيا ... يكلس فشي بلاصة يقدر ينسى تيليفونو .... وشحال من مرة كيفيق فالصباح ناسينا حنا شكون وناسي راسو .... يعني لابقى دماغو طاافي مدة د 12 ساعة هاكاك كاتمحى كولشي ...وكيبقى شحال باش يتذكر ... بعد مرات غير ثواني قلال ..ولكن لانعس بزاف ولا كان معصب يقدر يطول لامور تالربع ساعة عاد يتفكر .....
اصيل : اول مرة نسمع هادشي !!!!! شوكيتيني
قسم :وااييه ... ومع ذلك تعايشنا مع الامر عادي والله .... تالهنار لي غايجيب لينا كوشماغ لحياتنا هو فاش سقنا الخبار بلي ولا كيمشي لموناكو يلعب فالراليات .. حنا عارفين راسو على قد الحال وبابا ديما كيصيفط وراه لي كارد كايخاف تجيه شي نوبة وينسى طريقة السياقة .. وهو ماشي لينا لرااالي كاع .....
اصيل : ( باهتمام جامع حجبانو ) اهاه !؟
قسم : عامين وحنا معاه فالكوابيس كل ماصبح فموناكو حنا كنبقاو عالم بينا غير الله كنخااافووو يجينا خبارو ... تخيل انه من سبع سنين وحنا كنتعاملو معاه بحال البيضة نسمعوه مشا لرااالي ..... وديما فاش كيرجع كيدابز معاه بابا و لكن مكيسمعش .متمرد لاقصى درجة وراسو قاااااسح ....خصوصا ملي كان صغير دابا راه تعقل وولا كايخدم عقلو .....كان الى بغا يدير شي حاجة كييديرهااا مكيهموش طريقة باش ولا كيفاش .... متعلق بزاف بعالم السيااارت والسباقاات ... لدرجة كيصمم حتى الهياكل ددطموبيلات ... ولكن الرالي بحالا قلتي المتنفس ديالو لكن المرض ديالو هو لي مخلينا نحاربو ليه هاد الحلم وهادشي لي طفاه مؤخرا ... مور عماين ما دخل للرالي .... كاطرا لينا اقسح حااجة دوزناها فحياتنا مور الاكسيدون لولا ديالو هي ملي كنا كنتفرجو فسباق ديالو وطموبيل كولها كتلاح على جرف ... ( حزنو ملامحها وتعمو عينيها بدموع ) عمرني نسى داك نهار عمرو يتعااااود .... جا لمغرب فالكوبطير وشحال وهو كووومة .. شحال من عملية وشحال من تقرير وشحال من دراسة تندارت حدا راسو .. عاد فاق شوية .. ملي فاق كنكتشفو انه فقد ذااكرة داعواااااام .. كثر من عشر سنين لي نسى من حياااتو كاملة ... وهاديك لااكسيدون غير مزادت كملات على داك الارتجاج لول ورجعات الحالة مستعصية كتر .. يعني دابا معرض لخطر فاي لحظة ونوبات النسيان غير مزادو ليه وعندو واحد العرق هو لي فيه الخطر الى مشى شوية تنفخ ليه غيخلق مشكل كببير يقدر يدخلو فسكتة دماغية حياتو كاملة ( مسحات دمعتها لي ماعرفاتش كيدارت نزلات ) .....
اصىل : وملي عرف هادشي فيه هاد الريسك كامل علاش كيمشي !
قسم : ومعامن تهضر .... واخا هاكاك غير برا رجع لموناكو ... كان قرب يسكت القلب لبابا وماما .... الذاكرة مزال مرجعاتش ولكن تأضابطا معانا ... ربع سنين دابا هادي لي دازت دابا على داك لاكسيدون .. راه لاقلبتي اتلاقاها فالاخبار ...... ومؤخرا صافي عطى وعد لبابا باش ميرجعش لموناكو .. وبدا كيحاول يبني حياتو من جدييد واول خطوة دار هي انه بغا يتزوج ......
اصيل : مزيان غير ملي بعد من الخطر ...
قسم : ( تنهدات ) مرض خويا خاصو نهاااار الا بغيت نهضر فيه ومبغاااش كاع نتفكرو .... بليل فاش كنتفركو كيطير عليا نعاس ... مهم رغم مرضو هو ضحوكي شوووية ولكن عصبي كتاااار ههه وبكثر ماعصبي بكتر مكيرجع دغيا وقلبو بيض .. كيقلب دنيا على راسك وغدا يجي يعنقك ههه ... متهور شوية ولكن مؤخرا ولا كيضبط اومورو كتر ...ماحدو كايكبر ماحدو كيتبدل فعقليتو بزاف .. جود كنحسو بابا ماشي خويا .. واخا انا كبر منو عمرني حسبت بيه هو لي صغير ... مغيار على حااجتو بلا قياااس ... وتاهو كيموت على العائلة ... واقرب واحد ليا فخوتي .... ديما مفضل الغير على راسو وسخي بزاف صراحة ديما حاجتو ماشي ديالو ... الى كنت مقلق يسمع ليك .... كنت فرحان يفرح معاك ...جبدتيه راه مغاتلوم غير راسك هههه .... اما وسيم ... وسيم عكسو ... هاااادئ وكالم .. واخا عصبي تاهو شوية ولكن الهدوء غالب .. مكيهضرش بزاااف كاع من غير الى جبدتيه و هضرتي معاه عاد بجاوبك .... يمكن حيت باقي مراهق .... عايس فامريكا حاليا حيت تما كيقرا ... دابا راه معانا فهاد العطلة .... ضريف حتى هو وحنين و كيف كيقول بابا مكينفع مكيضر ههههه بعيييييد وداخل سوق راسو .. وماعندوش مع الهضرة الخاوية ومع التفلية ..... حدووووودي وعالمو عايش فيه بوحدو ... وقدس .. ختي المشاااغبة .... هي بحالي .. كنهضرو كنعبرو بزاف ... هي مختلفة عليا من ناحية الصحابات حيت هي عندها بزاف وكيعجبها تعيييش لراسها وتبروفيطي فالحياة والعائلة الكريمة ديالناا ممخلياهاش ههههه ديما معصبة علاش مكيخليوهاش تسافر مع صحاباتها وتعيش تاهي هههه مي واخا هاكاك ضريفة بزااااف وحنينة فنفس الوقت معقولة تاهي وماعزيزش عليها التخرويض يزاف ...
اصيل : من تصاور لاحظت كتشبه لماماك .....
قسم: وي بزاااااف .. كولشي تيقولها .... تا فالطبع كيتشابهو ..عاد كاين لوؤي ... تقدر تقول عليه الديموقراطي دالعائلة ههههه طرااااان كيمشي نيييشان عههه عصبي بحالا رضعاتو خالتو رتاج ليصونص ... عنييييد ومغنااان والا بغا الحاجة كيوصل ليها .. قريب لخويا بزاف ... عرفتي المصطلح دالروووجلة .. هو لي يجي معاه .. يعني نهار توقف عليه تلقااه واااقف راجل معاك يموووت معاك ... مكيعرفش شنو هو الغدر ولا الكدوب .... وعاد كاين سلطان ... سلطان بحالا قلتي ديك العافية تحت التبن ! هو من برا غيبان ليك ضحووووكي وضارب الدنيا بركلة ولكن الى جبدو شي واحد راه بحالا قلب على خلا دار بوه ... مكتكملش لينا الكلسة الا مكانش معانا هو بالضحك وتقشاب ديالو ... فنفس الوقت هو ماشي بحالنا حنا دغيا كنعطيو نيتنا ودغيا كنعاودو اش عندنا هههه هو مكتعرفش اش تحت راسو مستحيل يعطيك راس الخيط ...... واخا الدومين ديالو ديما سارقو منا ولكن واخا هاكاك ديما واقف مع العائلة وديما حاضر فاي مناسبة يلغي كولشي ويجي كيجري .... العائلة ديما نامبر وان فالاولويات ديالنا .. عاد بيلسااان ... المتمردة ديال الاسماعيليين .... حمقة وعزيز عليها تعيش الحياة بحال ختي .... مكتآديش فنفس الوقت شرسة مع لي كيآديها .. مكتستلمش وعنيدة حتى هي ... مرة مرة كيخرج منها واحد الجانب عصبي دالاسماعليين .... كتبان من برا قاسحة وصعيبة ولكن لانبشتيها شوية من داخل تفيض بالبكا ودموع .. صباااارة ... وحمقة بلا قياااس هههه واية .... هي الحشوووومية ديال العائلة ديالنا .... مزال مكاتب ليها تمشى على الرجيلات ديالها ملي تزادت تزادت بمشكل فالعمود الفقري ومع الوقت جاها شلل فالنصف الاسفل من جسمها .. يعني رجليها مبقاوش كيتمشاو ومكتحركهمش .. ( اصيل كمش ملامحو ) وباقا كتحاول وعندنا امل مع الطب الفيزيائي والترويض .....
اصيل : واش هي لي كاينة فالتصاور دالعائلة ديالكم جالسة على كرسي ... باقا صغيرة وكتبان هادئة
قسم : هي هااااديك .. هاااادئة لواحد درجة مكتصورش .. بحال شي فرااااشة .... ديما فعينينا بحال شي طفلة مكتكبرش ... مكتعرفش شنو هي ترفع صوتها ديما كتهضر بشوية وتضحك بشوية .. ماعمرك تسمع حسسها ... بحال الطفلة تماما ......(تنهدات وضارت شافت فيه ) وهاااااادو هوما حنااااا ..... الاسماعليين ههههه
اصيل : زوين ... والله تا زوين تكون عندك عائلة متكامةل بحال هاكا
قسم : وعاد راه هاضرة ليك باختصار .. اما لاجيت نهضر على عائلتي عمرني نسالي ههه خاصك دخل وسطهم باش تعرفهم كتر ... وغاتبدل ليك جمييييع المفاهيم ...حيت حنا مكنبينوش حقيقتنا لصحافة .. صحافة كتهز غالقشرة لبرانية ديالنا اما بعضياتنا راحنا بحال كاااااع العائلات .. تناكرو ونتخاصمو ونتصالحو ....يعني بلا مدير فعقلك شي تصور واااااو .. راحنا عاااااادين وشعبيييين بحاااالك وبحال محيطك مكاينش لفرق ...دابا تتعرف عليهم وتوقف على كلامي ....
اصيل : ان شاء الله .... مامولفش العائلة ... جاتني عجب نسمع انه كاينة عائلة كبيرة قد هاكا متكاملين مع بعضياتهم !!!! اغلب العائلات لي كنعرف والمنطلق مني ... واحد كيحفر لواحد .. واحد حاسد واحد .. العمام حديث ولا حرج .....
قسم : لا لا حنا والله كبرنا هاكا .. كبرنا مجموووعين .. وعمامي يد وحدة وهوما لي صنعو هاد العائلة .. راه تا عائلة بابا وعائلة ماما وعائلة خالتو رتاج وخالتو اريج و عائلة خالتو حياة تاهوما دايرين بحال كيف قلتي .... تاهوما تحرمو من عائلاتهم و من داك الدفئ ومكيحملوهمش ... داكشي علاش حاولو يصنعو ليهم عائلة بالشكل لي مناسبهم ... و حنا واحد مكمل لاخور وكلنا كنموتو على دم الاسمااااعيلي وماباغين ندخلو تاشي واحد لي يشتتو .... وبابا ديما كايقول الاسماعللين هوما عائلة من لا عائلة له ......
اصيل : زوين هاكا والله ... العائلة شي حاجة مهمة فحياة الانسان هي المحيط لي كيصنع الانسان ... ناجح ولا فاشل .. راه هي المنطلق ...
قسم : وي عندك الحق ... داكشي علاش بابا وعمامي دائما تيدابزو معانا باش ملي نكونو فالجلسات العائلية نحطو تيليفونات ونبروفيتيو من بعضياتنا .. تايقولو لينا نتوما معارفينش قيمة العائلة حنا لي عارفينها حيت حنا لي افتقدناها ...
اصيل : عندهم الحق .....كون تعرفو قيمتها ماضيعو تاشي دقيقة مع ببعضياتكم
قسم : ( شافت لساعتها ورجعات شافت فيه ) تلهينا بالهضرة نسييييت كاع الوقت كيفاش داز ....
اصيل : ( شاف لساعة فتيليفونو ) طار الوقت ...
قسم : سمعتك غادي تخرج سلمى ... مانشدكش بزاف غتبقى كتسناك ... .ماسخيتش بالهضرة معاك وباغا نعرف حتى عليك نتا بزاف ....
اصيل : ملي تبغي تعرفي شي حاجة سولي ... ماعندي منخبع من الاساس .....ومكنعرفش نعاود ههه ....
قسم : نخليك دابا تمشي عند ختك .... ونكملو منبعد ... عاودت ليك كولشي بحال هاكا غير باش تزيد تتطمن وتعرف الجو كيفاش داير وباش نهار تتلاقى بيهم .. تعرف تتعامل ومتاخدش شي نظرة غالطة هههه راه شفتك غااالط بزاف داكشي باش حاولت نصحح ...
اصيل : وي درتيها مزيانة .. بدلت شحال من مفهوم فراسي ..... وكنت باغي نسمع عليكم ...
قسم : تانا باغة نسمع على عائلتك فالمرة الجاية
اصيل : عائلة وحدة عندي هي ختي سلمى ههه ماعندي حد انا ....
قسم : ههه ولكن نبغي نعرف علاش ماعندك حد هههه ... نتلاقوو غذا هنا نيت !
اصيل : ( علا حجبانو بجوج ) تاالغذا !
قسم : وفوقاش بغيتي !
اصيل : مزال نهار طويل
قسم : داك ساعة غايجي بابا يقصرو لينا ههههه خويت الدار بزاف مغيبغينيش نخرج .... غدا نتلاقاو هنا نييت نبعدو على بنادم حيت كنكون مامرتاحاش وحاضية الكاميرات دعباذ الله .. مابغيتش شي حد يخرج خبار عليا انا وياك قبل ما انا لي نعلن عليه .. حيت البرتوكول مغيرحمنيش وغتسمى علاقة غير شرعية وغيمشي ليا وسام ....
اصيل : مزال غتهضري ليا كتر على هاد البروتوكول ... بغيت نفهمو ..
قسم : الوقت قدامنا كلشي غتعرفو شوية بشوية ... ( قادات وقفتها ) ماسخيتش بالهضرة معاك ... شحال هادي ماهضرت قد هاكا ههههه كون كنت كنعطي هاد الطاقة فالاجتماعات كون زدت بشركة دبابا لقدام هههه
اصيل : ( وقف تاهو وبدا يحك فوق حاجبو كيشوف فيها ) فخبارك بلي انا مكنستحملش شي واحد يهضر معايا كتر من خمسة دقايق .... عكسك نت .. ( شاف فيها وهي مبتسمة فيه ) كنت فرحان ونا كنسمع ليك ... طريقة باش كتهضري بحالا كنتسنط لشي موسيقى عزيزة عليا هههه مابغيتكش تسكتي ....
قسم : خاصني نوطي هاد الكلمة لي قلتي باش نقولها لخويا لي تيقول ليا صوتك بحال الغيتار لي مقطعين ليه سلوكة ....
اصيل : ( جبدها من يدييها عنقها عندو وتاهي غمضات عينيها حاطة راسها على صدرو مستحلية عناقو وهو باس راسها ) مسخيتش بيك ....
قسم : ( تخشات فيه كتر ) تانا .. داز معاك صباح زوين بزاف ....
اصيل : غذا فصباح غانخرج لبحر .. فالعشية غانجي نتسناك هنايا .... ( جابها قدامو ) وشكرا ليك .....
قسم : ( علات حاجبها ) علاش شكرا !!!
اصيل : حيت درتي فيا تقة ... وحيت عاودتي ليا على عائلتكم بلا متقولي هذا براني ....
قسم : مدام هضرت لبابا عليك راه مبقيتيش بنسبة ليا براني اصيل .. وبالفرحات عليا تتعرف علينا كثر وترتاج لينا ورتاحو ليك ...
اصيا : غنحاول نكون قد المقام ... ( قرب لجبهتها باسها )
قسم : ( غمضات عينيها مستحلية قبلتو لي حساتها كلها احترام وبعد راسو وهي شافت فيه ) حتى اانا غنحاول نكون قد المقام ... شوية بشوية غانحيدو داك العوائق .. والطبقة الاجتماعية مغاتبقاش تبان ليك بمرة ملي تتعرف علينا كثر .. وكاع ديكشي لي خالعك غتلقاه مكاينش ... ( شدات فيديه ) وغتبقى يدي فيديك رغم كاع الضروف حتى ندير انا وياك مستقبلنا ...
اصيل : ( هز يديها لي شداتها فيديه وباسها بحب ) ان شاء الله ....
تبسمات ليه وطلقات منو ومشات .... كانت عندو رغبة كبيرة يجبدها يبوسهااا وهو يحبس راسو غير بزز تاني باش ميصيفطها لدارهم مجروحة ويخلق مشكل ومشات ركبات فطموبيلتها وهو مراقبها داير يدو فجيابو كيتفرج فيها راجعة مارشاريار وكدير ليه بايباي بيديها .. تاخرجات لطريق ومشات .. عاد تنهد ومشا لطموبيلتو وبقى شحال جالس فيها تيفكر ....
ماعرفش علاش حس براسو ارتاااح مور هضرتها .... كان واخد صورة غاالطة بزاف على هاد النسب ... كناس لاباس عليهم لداك درجة ....ظن انه كولشي عنهم عاااادي ... وصعيب يتفاهم مع عقليتهم وكون مارغبتو الكبيرة فقسم عمرو يزعم على هاد الخطوة ..... فنفس الوقت مزال مامطن كليا .. باش انه يدخل وسط عائلة كبيرة .. خاصو يحفظ طباعهم مزيان ويحاول مايخلقش شي مشكلل يزعزع استقرارهم خصوصا انه غايكون زوج البكر
ديالهم ... غير من تصاورهم و من هضرتها عليهم يقدر يميز هي شحال غالية عندهم ... يعني ارتباطو بقسم كيعني ارتباطو حتى بعائلتها ... رتاح كتر ملي عرفها بنت السيد لي هضرتو باقا ساكناه .... كان هاز الهم كيفاش يعرف براسو لباباها وكيفاش يقوليه انه ماعنديش الوالدين ولا العائلة .. وتزاح هم كبير على كتافو حيت ميحتاجاش دابا يعرف براسو .... ماعرفش علاش تشققات ابتسامة على شفاهو .. ابتسامة ديال الكتاف رتاحز من داك الحمل ... ورجع ديمارا ورجع مارشاريار مشا ... وحركات قسم وهي كتعاود ليه باقين قدام عينيه ... ماعرفش اش كدير فيه هاد البنت .. شنو هاد السحر لي كاتقرا عليييه لي كتخليه يتسطى على تفاصيلها لهاد درجة ....
اما قسم وصلات للقصر .. ودخلات لباركينغ باركات وتاهي الفرحة باينة فعينيها دخلات لقات الهدوووء وطلعات ديريكت لبيتها تلاحت على السرير على ظهرها ... وهزات تيليفونها شافت ساعة لقاتها قريب سبعة دالعشية و حيدات المود افيون وحطاتو على السرير وبقات تحسب بصبعانها
قسم : ثري ... تووو .. واااان ... زيرو ...
بدا يصوني و هزاتو
قسم : هاالاو ....
صفاء : اخيييرا .. اخيييرا .... واش عارفة شحال صونيت .. واش عارفة شحاااال من حاجة لغيييتها !!!
قسن : وغاتزيدي تلغي حيت هاد سيمانة انا باغا نرتااااح ...
صفاء : واش متأكدة امادموزيل ؟ واش معارفاش شحال اليوم فشهر ؟؟؟؟
قسم : شحال ؟
صفاء : مادمووزيل .. راه عندك العسكرية .... راه مم البارح وهوما كيعيييطو يأكدو .... واش ماقال ليك باباك والو !
قسم : ( وسعات عينيها فالسقف وناضت تكعدات بزربة ) فوووقاش ؟؟؟؟
صفاء : بعد غدا راه خاصك تكوني تما ... بقى ليك غير غدا وراني من البارح وانا كنصوني باش نصيفك ليك المصممة تاخد قياسك للبسة دالعسكرية حيت راك زدتي فالوزن هاد العام ... وغير غاترجعي غاتلتزمي بحمية صاااارمة راه وزنك خرج على السيطرة 72 كيلوغرام امادموزيل راه كااارثة كبيرة !!! بعد غدا خصك تكووووني فالميناء ....اعييد وأكرر ....
قسم : واااااات !!!!!! ( بدات كترد شعرها لور وناضت كتمشي وتجي ) مششششاااااات من بالي ...
صفاء : كون مجاوينتينيش دابا كون لقيتيني قدامك حيت شديت طريق جايا لعندك ...موسيو اسد راه كيخلصني باش ندير خدمتي ... ماشي باش نصوني ونلقى تيليفون طافي ....
قسم : صافي دابا اصفاء متفرعيش ليا راسي ( كتمشي وتجي وبدات تسوط ) ففففففف منين خرج ليا هاد السفر تاني .... شحال غنبقى ؟؟؟؟؟؟
صفاء : على حساب التداريب ... غالبا شهر وعشر ايام ...
قسم : هادي هي الدورة لخرا ياك !
صفاء : هي هااادي ... هاد الدورة لي بقات وتكوني كابيطين معترف بيها ... غير هو خاصك تردي بالك فهاد العام باش مايصدر منك تا خطأ وتا اكسيدون باش متعاودي العسكرية من زيرو ..... .
قسم : انا اصلا غانكمل فهاد دروة غير باش نحقق داكشي لي كان باغيه بابا وناخد الشارة ديالي وموراها غاناخد بوز من هاد الخدمة
صفاء : وخودي بعدا الشارة ديالك ويكون خير .. الا بقيتي هاكا كطفي عليا تيليفون راه مغنيدرو والو .... انا علمتك ... بعد غدا فالثمنية ديال الصباح غتكوني فالميناء .... المصممة دابا شوية وغتجي لعندك تاخد قياسات اللبسة العسكرية ديالك .... وديري فبااالك الحمية خاصك تبدايها .. ضروووري نرجعو لوزنك المثااالي لول ... 55 كيلوغرام ماخصكش تنزلي عليها .. واش غانبقاو ديما فليشوتينغ نريپاريو بالفوطو شوپ ....
قسم : صفاء .. كتهضري ونت نعارفاش ان عندي واحد جدة نهار درت هاد الوزن لي كتهضري عليه ولات تعيط ليا عود الند .... وماتنسايش راه تنكبر فلاج راه صعيب نبقى شادة فداك الوزن ...
صفاء :ماصعيب والو نت لي قابلتي الخدمة وهملتي السبور ديالك .... لاليست دليغوپا ديالك انا لي كانقادها ومع دالك شحال مرة كتاكلي فزنقة ..... واش عارفة شنو هي 72 كغ ولا مااعارفاش
قسم :راه فيا ميترو و خمسة وسبعين مااابيناش عليا بلا متتعقدييني دابا .....لي فيا مكفيني بهاد الخبار لي جيتني بيه ....
صفاء : واش كاتشوفي راسك فالمرايا ولا لا !!!! .... دابا ماعلينا ..... المصممة هاهي غاتجي تاخد اقياسات ... غاتجمعي حوايجك غدا وبعد غدااا تمنية .... تمنية
قسم : ( تنهدات ) داااااكوغ .. داكوغ ... داااااكوغ فهمنا .....فففففففف ( ضربات رجليها مع الارض ) على زززهر ....
صفاء : علاش ؟ ياك كتكوني فرحانة تمشي لتداريب ! علاش مقلقة دابا ...
قسم : جاتني على غفلة اصفاااء .. على غفلة ....ففففف .... صيفطي الستيليست انا غير فدار مغنخرجش .... ونقصي شوية من لهضرة ....كتمرضيني فراسي ....
صفاء : داكوغ مدموزيل ....ماااايكون غااااخطرك .... نسيفط ليك تادكتور حيت فليفوطو دالجنازة بانو ليا عندك شوية دليسيغن
قسم : واش اتبعدي مني ولا لا ...راني غابنادام نغلاض ونضعاف ويبانو لي سيغن وغانشيب كاع ..مريييضة نت .... سيري داوي غاليسغن ديالك واحي عندي
صفاء: على انا عي قسم الاسماعيلي؟ البرووووفايل ديال العائلة !!!! ......
قسم : انا اختي غااا قسم .. بروفايل دالعائلة بانجازاتي ماشس بوجهي ....
قطعات عليها وبقات كتمشي وتجي محاااملاش هاد المشية .. جلسات على الكرسي ديال نهاية السرير وبقات شادة تيليفونها ومعوجة شفايفها لتحت بحزن .. مبغاتش تمشي .. لقات راسها مزال باغا تجلس مع اصيل ... غير كتفكر شهر وعشر ايام غتبعد عليه كتزييييد تأزم ... عمرها متسوقات لشي سفر .... ولكن دابا كتحس بحالا غاتخلي قطعة منها موراها .. كتحس مزال باغا تشبع منو وهو ديااالها ......
تنهدات وبدات تصوني على باباها لي كان وصل لباركينغ ديال شركة دلاامار يلاه غينزل لقاها كتصوني وجاوب وهو خارج من طموبيل غادي جهة سانسور
اسد : قسوم ...
قسم : بابا ... صافا ! ... فينك
اسد : صافا احبيبتي .. راني طالع عند ماماك ...
قسم : ( بحزن ) بابا علاااش مافكرتينيييش فالدورة دالعسكرية ..... عندي بعد غدا وانا نسييييت كاع ....
اسد : ابنتي الى كنت انا لي غنفكرك .. المندجر ديالك شنو خدمتها ؟
قسم : ( عضات على شفتها مدة عاد نطقات بصوت منخفص ) طفيت عليها تيليفون ....
اسد : وعلاش لي طفي تيليفونك ؟ كاين شي واحد عندو التزامات مع الناس وكيطفي تيليفونو ؟
قسم : وراه كنت باغا نرتاااح شوية ابابا
اسد : ملي كنبغيو نرتاحو كنلعلمو المنادجر باش تعرف تجاوب الناس
قسم : صاافي منعاودش .. فففف بابا .. وااش ضروووري من هاد الدورة ؟؟؟؟؟ والا مامشيتش
اسد : غتعاودي من لول .... ولا غتبقاي ديما مضطرة يكون معاك الكابتن شاف فلاكابين ....
قسم : ( كتحك فشعرها و تسوط ) ففففف .. شهر وعشر ياااام بزااااااف
اسد : راه هادي اقصر مدة مشيتي فيها لتداريب .. راه كنتي كتمشي بالعام مالكي دابا ...
قسم : عععككزت والله ... ماافياااااش
اسد : وشنو دابا ؟ بسبب شهر وعشريام عكزتي فيهم غاضيعي التعب ديال تسع سنين !!!! بقات دورة وحدة وتهزي البادج ديالك ... وخودي نت عامين كاع رتاحي فيهم ....ماشي غا شهر ...
قسم : بصح ؟ ملي نسالي ناخد عطلة ؟؟؟؟؟
اسد : ( علا حاجبو باستغراب ) قسوم ؟؟؟؟ نت باغا عطلة ؟ ياك كنت كنننرغبك عليها ابنتي ... كنت كنططلب فيك تاخديها ... ؟؟؟ اش واقع دابا
قسم : والو .. ددابا كنحس براسي عيييت وبغيت نرتاح ...
اسد : ( بشك ) امممم .... فهمت ....جمعي حوايجك دوزي اخر دورة بقات ليك ... ويكون خير .....
قسم : وعلاش قلتيها بجال هاكا بحالا مامتيقنيش ؟
اسد : واحيت مااامتيقكش اصلا !
قسم : والله ابابا الى غير عيت وصااافي
اسد : ودابا انا ماقلت والو .. خليني راه وصلت لبيرو ...
قسم : سلم على ماما ..
قطع عليها ...وتلاحت على ناموسيتها قالبة شفايفها بحزن .... واسد حل الباب دالبيرو دلامار غير شافتو بحالا شافت المنقد ديالها ورجعات بكرسيها لور ووقفات استقبلاتو
لامار : جاااابك الله احبيبي ... جيتي فووووقتك ( عنقاااتو وهو طل براسو على البيرو لي عامر ضواسا ) ففففكني راني واحلة تالراسي ...
اسد بعدها وماشي بجيهة البيرو ديالها كلس فالكرسي وبدا يضور فراسو وشاف فيها
اسد : فين كنتي تاجمعتي هادشي كامل عليك !!!!
لامار : ( تلاحت على الفوطوي كترتاح وتتعوج فعنقها ) راك شششفتي شحتل تلهييينا ...كنت كنجي كيكون بالي مشغول كنبدا غير كنأجل وليوم كولشي تكب فوق راسي ...
اسد : ( شافها تكات وهو لي قدامو داكشي ) بان ليا فوق راسي انا هاد ساعة .... جي لهنا عاونيني .. نتي تروني وانا نوحل !
لامار : عيييييت .. ضهري عواج نرتاح شووية ونجي نعاونك .. فك بعدا غير هادوك ديال شهر خمسة وقعهم ...
اسد : جامع عليا غير المعكازات ( بدا يحل فالضواسا ) كليتي شي حاجة
لامار : ( متكية راسها لور ومغمضة عينيها ) وي تغديييت ...
اسد : ( كيقرا ويفيريفي ويهضر معاها ) قسم غتسافر بعد غدا ...
لامار : ( حلات عينيها وشافت فيه ) ياك السيمانة جايا عاد تخدم
اسد : عندها العسكرية
لامار : هاء دابا !
اسد : وراه كملات العام مالكم مضهشرين ...وجاي عندك باش تخوي غدا ... ساعة بان ليا موحال تسالي تا شنو كاين ليوم بقى غانخدمو الخدمة دغدا ...
لامار : علاش ؟؟؟؟
اسد : بغيت ندوز غدا معاك ومع ولادي ....
لامار ناضت من على الفوطوي ومشات لكرسي مقابلة معاه
لامار : وااش عرفتي شحال محتاجة شي بوز معاكم .... والله تاتوحشت نكلسو مع ولادنا هاااانيييين .... نهار واحد راه ماكافيش ....
اسد : اللهم نهار ولا والو كاع .. راه مغتشديهمش كتر من نهار .... قلت غذا ندوزوه معاهم .... نجلسو معاهم شوية نتحاورو نشوفو مخططاتهم .. شنو كايفكرو يديرو .... قلت نعرض عليهم لشي بلاصة بعيدة غير حنا وياهم ....
لامار : فكرة زويييينة والله ..
اسد : هي لاجيتي تعاونيني نساليو دغيا وتحيدي عليك خدمة دغدا باش تكوني مرتاحة ...
لامار : غذا ماعنديش شي حاجة اجتماع غنوجد دابا العناوين ديالو ونخليهم لسكريتيرة و تترأس المديرة العامة فبلاصتي ....
اسد : مزيان ... ( حط ضوسي وهز واحد اخر )
لامار : ساليتيه ؟؟؟؟ نعيا نخدم منوصلش لبروفيسيوناليطي ديالك نتااااا .. بروووفيسيووونيل
اسد : ( كيسني وكيشوف ليها ) نت ملي كتحلي ضوسي كيبداو يبانو ليك هنا المونطويات لي خاصك تشري والصبابط لي خارجين وكتشوفي فقدس عنداك تمشي طيح فالملعب وفقسم اش كدير وجود واش شرب دواه و وسيم شحال جاب ... سينوغمال تتعطلي ....
لامار : قلتي لدراري غنتجمعو غدا باش تاقسم تخوي نهارها ؟... اما لوخرين عارفاهم بيطالييين ....
اسد : لا ... ولكن عارف ماعندهم تاشي حاجة غدا تمنعهم ... وديجا قسم ولات كتعرف تلقى وقت لراسها ... تعلمات تطفي تيليفون تاهي ....
لامار : قسسسم !!!!! قسم كطفي تيليفون ؟؟ قسم تطغى هي ومكيطفاش تيليفونها .....
اسد : وهاد المرة تعلمات تطفيه ....
لامار : العجب .... كنعرفها تموووت على خدمتها والتزاماتها .... ومكاينشلي يعطلها عليهم( تكات على البيرو مربعة يديها ) اسد .. اش بالك تاهاد الليلة نتعشاو اونسومبل معاهم فشي بلاصة ! راه موحشة ولادي
اسد : لا ... هاد الليلة ديالي ....
لامار : ها !
اسد : مغنجلسوش فدار .... ( حط ضوسي وهز واحد اخر ) غنمشيو لوطيل ....
لامار : علاش ؟ راه الدار خاوية راه كولشي مشى
اسد : كاينين ولادك ... وانا توحشت مراتي ( هز راسو فيها ) داك البيت راه طلع ليا فراسي ! ....
لامار : ( جاتها الضحكة ) راه تانا توحشتك ....( بابتسامة حب فيه ) متصوووورش شحال
اسد : هي لاجيتي هنا حدايا توجدي العناوين ديال غدا ومضيعيش الوقت .. هادشي خصو يكمل ليوم ... يلاه سربي ....
لامار : هااااانا اسيدي هانا ... ( جرات الكرسي ديالها حداه ) كحز ولا نجلس على رجليك
اسد : غاضرگي عليا الضواسا مانا نقوليك اجي ...
كلسات حداه وبدات كتخدم ومرة مرة تشوف لعندو وتعض غلى شفايفها ملي كاكيون ساهي كايوقع .. بحالا كاتشوفو اول مرة ماشي عشرة سنييييين .. موال كايثيرها بخال اول مرة وكتسطى على تفاصيلو خصوصا ملي ككيون مركز مع شي حاجة وكايحك فحاحبو وبدوز لسانو غلى شفايفو ويحك فادلحيتو ... وهي تكي راسها على يديها فوق من البيرو كاتشوف فيه ...
لامار : اسااااد ... ( اساد جاوبها غير بممم ) ياك داك الديبو باقي صالح .... شنو فيها لالحتي تريكتنا تما واحد الشهر نشبع منك بلا مايقاطعونا مشاكلهم .
اسد : ( حط ضوسي وهز واحد اخر ) تاشحال هادي مكانوش الولاد احبي وكانو المشاكل ....
لامار : ( علات حاحبها ) بغيتي تقصد مشاكل كنديرهم انا !!!!!
اسد : مكديرهمش ولكن تابعينك ...
لامار : دبصح اسسد دابا بلا ضحك ... انا عاقلة شحال هادي كانو خوتك غير يورنوها كتسد غليهم تما هههه علاش عمرك سديتي على هاد الجيل ! ولا صافي هدوووك .. سالوهم ليك اسي الروكان هههه
اسد : ( هز ضوسي اخر تاني ) ماشي غير هدوووني .. انا حطيت يدي فوق راسي .. نقد انا على قيسارية دالولاد ؟ واخا نجيب العسكر مايقدوش عليهم ... هادوك راه مايصلاح ليهم لا ديبو لا دياب ... واش هاد ديبو ندير فيه لوؤي لي باه قلبو خدام بحجرة انا نحبسو تما هو الحجرة تحبس ليه فقلبو .. ولا ندير فيه سلطان لي مو غاتولد ليا بالخلعة قبل الوقت .. ولا جود لي راسو بحال البيضة انا نسد عليه نحل لقاه رجع عاقل على قريش فيه دفنو الكنوزا ديالهم ... واش هادو دياا الديپو ! هادو راه خصني معاهم شي حاجة كتررررر ... كااانت كاتنفع معاهم داك الجزيرة ملي كانو صغار نلوحهم لتما تايتعاقبو .... اما دابا راه لانفيتهم لتما نرجع موراهم لقاهم اغتصبو النص ديال عيلات الجزيرة وحملو ليا النص لاخور .....
لامار : هههههه ( رجعات كاتشوف لبيسي ) قنعتيني صراحة ههههه
اسد : مدي مدي ليا داك ضوسي من حداك والله يخرج عاقبتهم على خير .... حنا واحلين فهادو وسفيان فعالم موازي باقي كايولد ...
لامار بقات غير كضحك طلع ليها المورال ملي عرفات غدا غادوزو معاهم .... وهو خادم مرة كيخطف منها بوسات خفاف فاش كتكون ساهية ... ساعة قربات العشرة ديال لليل عاد سالاو ونزلو ديريكت لباركينغ باتجاه لاوطيل بعد ماعلمو رجاء انهم مغيباتوش فالدار ....
اما قسم بدلات حوايجها ... سورفيت خفيفة عبارة على سروال وپيل سماطي ديالو نايك مزير وجامع صدرها ... وبقات تمشي وتجي فالجناح ديالها شادة تيليفونها معارفة كيفاش دير تقولها لاصيل ....بغات تصوني وتراجعات خافت يكون خارج مع ختو تبرزطو ... ولكن لي فيها مامهنيها قالت تصوني على سلمى نيت بحجة تسول كيبقات وتشوف واش خارجين عاد تعلمو بلي غاتسافر ..... دوزات نمرتها وبدات كتصوني ...
سلمى كانت يلاه دخلات من برا وفرحانة من الخرجة الزوينة لي دازت معاه يلاه بدلات حوايجها وكتحاول دخل ففراشها معاونة رجليها وهي تسمع تيليفون وهزاتو من الشارج .. وهي تلقاها قسم وجلسات فرحانة وردات شعرها مور ودنيها وجاوبات
سلمى : الوووو .. مااادومزيييل ...
قسم : غاانقطع لابقيت كنسمع هاد الرسمية هادي ...
سلمى : هههه .. راه كتجيني فشكل نعيط ليك بسميتك و نتي كبييرة عليا ...
قسم : ااالا غير شرفيني شررفيني ... فين هاد كبييرة فين ...
سلمى : هههه لا ماقصدتش هاكاك و الله ... باااقااا صغيييييرة وووححلوة.... توحشتك والله
قسم : يتوحشك الخير ... اا (كتحك فشعرها ) .. فينك ؟
سلمى : فالدارر !
قسم : ااه .... بغييت غير نسول كيف بقات رجليك .. واش صافا ؟ كتاخدي دواك ؟
سلمى : لا صاافااا .. ملي سولتيني فرحت حسابني غتجي ههه ... مكتحرقنييش .. راه قال ليا خويا غنزيد غير هاد سيمانة وغنحيد الكبص ... نت لاباس اومورك مزيانة ؟؟ العائلة كولشي بخيير ؟؟؟ ( نزلتت شفايفها بحزن ) كاااع مابقيتي تجي تزورينا .. نرجع نقول لخويا يخرجني من للقراية باش تولي تجي !
قسم : ههه تعاودي ليا تمارة من زيرو ماشي حشومة .. ( كتحك فشعرها ماعرفات كيف دير تخرج من المعلومات بلا متفضح ) اا .. .. ياك كولشي لاباس ... خوك لاباس عليه ؟
سلمى : لاباااس عرفتي اااقسم يلاه خرجني شرا طموبيل جديدة وداني جيهة ديال عين دياب ...( قسم غمضات على عينيها حمدات الله لي بدات تعاود ليها راسها ) عررررفتي ... لقيتيني كنفكررر
قسم : فاش ؟
سلمى : فففشكل .. جاني خويا مبدل ... دابا انا مولفاه حنين معايا صراحة ... ولكن دابا كتر يعني ولا مكيزعفش عليا بزاف كنحس بيه ديما مورالو زوين .. شحال هادي كان كيدخل معصب وكيخرج دغيا ... دابا لا .....ديما كيدخل مهدن
قسم : وهادي حاجة مزيانة .. هضري وضحكي معاه وفوجي عليه تانتي
سلمى : لا ماشي لداك درجة ديال يضحك ويضهر نت عارفاه كيداير .. ولكن على الاقل مهدن مكيزعفش بزاف وكييدير ليا الخاطر ...جاب ليا ليا معاه شاورما قبيلة وخرجني ... خدا ليا كلاص واخا مكيهضرش بزاف ولكن دوزت خررررجة زوييينة ... عرفتي اقسم كنحس بيه فرحاااان والله مابايناش على زجهو ولكن باينة فتصرفاتو ... فررررحت فاش شفتو بحال هاكا ...معرفتش شنو بدلو ...
قسم : ( بقات شحال عاضة على شفتها فرحانة ورجعات جاوبات ) معرفتش ... يمكن الحوايج لي كانو كيعصبوه مبقاوش ..
سلمى : عرفتي شنو شكيت .. وخليييها بيناتنا هههه شكيت بلي ولا كيبغي شي وحدة
قسم : ( وسعات عينيها ملي سمعات كيبغي وقلبها تهز من بلاصتو ) زعما ؟؟؟؟
سلمى : اااه ... ومانعرف تاااني ....
قسم : وتادابا علاش مقلقة .. هادشي راه خاصو يفرحك انه ولا مهدن وصافا .... شنو مكان يكون سبب ماشي مهم ...
سلمى : على الله يبقى ديما هاكا كان كيطيرها مني بداك العصبية كاملة والزعاف ديالو ... قبيلة كنا انا وياه فواحد الكافب فلاكوط وواحد جوج ولاد كانو كيشوفو فيا كنت كنترعد كانقول دابا يقلب داك طبلة حمد لله مشافهمش ..واخا مهدن مكنتيقش فعصبيتو ملي كاينوض ...
قسم : هه اوا كيفما حاضيك حضيه تانتي ملي تبان ليك شي وحدة كتشوف فيه قلبي عليها الدنيا ههه
سلمى : ههههه عرفتي قبيلة مشيت لطواليطات نغسل يدي وهي دخل وحدة مورايا وقالت ليا واش هاداك خوك .. ( قسم علات حاجبها ) قتليها اه .. قالت ليا عرفتها من عينيكم كيتشابهو .. وقالت ليا خوك بوكوووص ... واش مزوج .. ماعرفت علاش قلت ليها اه ههههه ( قسم حسات بصدرها ضياق عليها ) مااحملتهااااش ... ماعرفتش انا ديما موالفة نسمع هاد خوك بوكوص هنا فالدرب ولكن ماحملتش تقال هاكا فوجهي وهي عامرة ماكياج ولابسة مزير وكالسة كتعووووج جاتني واحد الغيرة عليه مكتصورش كنت غنخشي وجهها فداك لافابو .. قلت ليها مزووج وعندو بنيييتة غافوتيه ... ههههه وهي تقوليا سعداتها ومشات هههههه
قسم : ( ضحكاتها واخا ماعجبهاش الامر ) وهاكاك ديما خرجي مع خوك حضيه .. ماتخليهش بوحدو يضورو بيه ...
سلمى : ياودي مصاب غاتكون بصح شي وحدة فحياتو تجي تحضيه راااسهااا ... حضيت انا تاراسي هههه
قسم : هههه ان شاء الله .. فيناهو دابا فالدار ؟ ز . زعما لانكون كنخلق شي مشكل الى لقاكي باقا كتهضري معايا
سلمى : غير وصلني وعيط ليه صاحبو وخرج عندو ....
قسم : اااه .. داااكووغ .. دونك نخلييك ترتاحي غتكوني يالاه دخلتي .. عيطت غير نطمن عليك .. لاحتاجيتي شي حاجة متردديش تعيطي صافي الغزيولة .. يلاه بسلامة المغيااارة ههه
سلمى : هههه شكرا بزاف على الاتصاااال ... حتى نت تهلااي فراااسك بزااااف .. والله تاكنحسك قريبة ليا لدرجة عاودت ليك كولشي بلا منحس ..
قسم : خوودي راحتك فوق ماتبغي تهضري هاهي نمرتي عندك ... هاڤ اكود نايت ...
قطعات تيليفون وبقات كتمشي وتجي وهضرة سلمى فرحاااااتها كتر خلاتها غير كتنقز فبلاصتها .. واش الامر بان عليه لهاد درجة !!! اكتر مكتبغيه الانثى هي تحس بان هاداك لي تتبغيه كيبادلها نفس الاحساس ... غمضات عينيها وهزات تيليفون كتكتب ليه مسج ..." ملي تكون ديسبونيبل صوني ليا بغيت نهضر معاك " ...
سيفطات الميساج بلا متعيط قالت غيكون مع صاحبو .. يلاه حطات تيليفون ماشية بجهة الكوافوز ديالها تمشط شعرها تابان ليها كيصوني .... ضحكات ومشات جاوباتو بزربة .....
قسم : اصيييل
اصيل : وي قسم .. ياك لاباس ؟؟؟
قسم : قلت غتكون مشغول داكشي علاش مبغيتش نصوني عليك ....
اصيل : راني فالقهووة مع الدري وصلني مسج وخرجت لبرا ..
قسم : ياكما برزطتك
اصيل : اشمن تبرزيط ... واش واقعة شي حاجة ؟ نجي عندك !!
قسم : لاا لا ماشي شي حاجة .. غير هوو .... فاش جيت دابا لدار ...
اصيل : ( خلعاتو ) وااادوي دغياااا
قسم : عيطات ليا صفاء .... و ... وعلماتني بلي .. خاصني نسافر ...
اصيل : نعام !!! فين ؟؟؟؟
قسم : عندي الدورة العسكرية ... هي اخر وحدة بقاتلي ونسالي ....
اصيل : ... فين غتمشي ليها ؟؟؟؟
قسم : اسبانيا ...
اصيل : وشحال غادوزي فيها !!!
قسم : شهر وعشر يام
اصيل : ( علا حاجبو ) شحاااال !!!!!
قسم : ( عضات على شفتها ) شهر وعشر ياااام ( اصيل بقى غير ساكت وهي كتسنى جوابو ) اصيل ؟؟؟ الو ... واش كتسمعني ؟؟؟ اصييل .....
اصيل : ( تنهد ) كنسمعك .... ا اش غادي نقولك ...( كايحك فلحيتو محاملش ) قرايتك راه هي لولا ... شهر وعشر يام بزاف صراحة ولكن ماشي مشكل ....
قسم : كنت ناسية كاااع ومشات من بالي ....
اصيل : فوقاش غتمشي ؟
قسم : بعد غدا ... تمنية دالصباح خاصني نكون فالميناء
اصيل :. وااايلي !!!!! ... ( بدا يبرد فشعرو لور )ماااعليش .... غدا نشوفك بكري شوية نشبع منك ....
قسم : نحاااول .. واخا منظنش .. حيت ملي غنمشي بعد غذا بابا غيبغي نكلس معاهم غدا ... مهم غنحاول نلقى وقيتة
اصيل : شنو دابا مغنشوفكش كاع ! تتحلمي نت لا !!!
قسم : هادشي لي عطى ولله .. راه انا محاملاش نمشي كاع .... كون حسابتني هاكا .. منوافقش نكون معاك تانسالي العسكرية هههههه
اصيل : شوفي قسم .. انا واخا تمشي حتى خمس سنين راه غنتسناك حتى تجي ... غذا الى لقيتي كيفاش غنبغي نشوفك صراحة .. الى مالقيتيش راه عائلتك ليها الاولوية ومستقبلك حتى هو ... متهزيش الهم بزاف ....
قسم : انا نشوف كيفاش ندير ونجي عندك ..
اصيل : كلسي مع عائلتك راك شهر وعشر يام مغاتشوفيهم ومنبعد انا لي غانجي تالعندك فينما كنت ....
قسم: غالبا نتشاوفو غدا الصباح حيت عائلتي كتجمع حتى الليل وبابا خدام فصباح ....ضرووري نتشاوفو قبل منسافر ... نخليك دابا ترجع عندك صاحبك بلا منشدك كتر ....
اصيل : انا نرجع لدار ونعاود نعيط ليك .. خلي تيليفونك شاعل باش ماتبيتيني فايق تاني .....
قسم : ههه داكوغ .... غنتسناك ....
قطعات عليه وحطات تيليفونها ومشات مشطات شعرها جمعاتو كوتشوفال لور وهي توسع عينيها فالمراية فاش شافت الزروقية فعنقها وعضات على شفتها
قسم : وييييلي على حاااااالة ....
هزات الكونسيلر وبدات كتخبي بيه ولكن باينة معيقة ...
قسم : اشنو غنلبس انا دابا فهادالصهد !!!!
بقات كتشوف كيدير تخبي .. وتحسسهم بيديها ... فايتة شايفاهم فماماها وشحال من مرة فعيلات عماماها ... ولكن تشوفهم فراسها كانت اول مرة!!!! شوية لقات راسها تبسمات وهي كتفكرو ... ماعرفاتش علاش بقوة ماخلعها عجبها !!!حسات بحالا فداك العنف بين ليها شحال هو باغيها ! وشحال رغبتو قوية فيها !!! ... لقات راسها كضحك كيف الهبيلة وماكذبوش لي قالو الحب كيحمق الواحد ... ومشات هزات الجاكيت ديال داك السيرفيت كانت خفيفة لبساتها طلعات ليه السنسلة تالفوق باش تخبع عنقها ... وهزات تيليفونها وخرجات من الجناح باتجاه جناح قدس .. حلات عليها الباب بانت ليها فالبالكون ومشات باتجاهها لقاتها هازة تيليفون كتميساجا ضاحكة
قسم : بووونسواغ ..
قدس : ( طلعات عينيها بزربة وخرجات من الديسكيسيون خلعاتها ) قسم .. خلللعتيني
قسم : ( علات حاجبها ) كاع داك دقان وجايا كنجر فرجليا وماسمعتي والو .. معامن كنتي ساهية ( كطل ليها على التيليفون ) كتهضري مع شي حد
قدس : غيير مع صحاباتي .... بابا وماما تعطلو
قسم : غيكونو باقين فالخدمة .. بغيت نزل نشرب قهوة لتحت ... تنزلي معايا تونسيني !
قدس : صافي نزلي انا غنلحق عليك .... نلبس غير حوايجي ( كانت غير بشروط قصير وسوتيام )
قسم : غنتسناك ....
قدس : اااه اقسم ( ضارت عندها قسم ) عيطي على جود يجي حتى هو .. بغيت نفهم هاد التزويجة لي تاطاحت من السما
قسم : ( عوجات معاها راسها ) واش ماعجباتكش ؟
قدس : لاااا ... ولكن بغيت نفهم ... ومن ناحية اخرى ايه ماعجبنيش الحال .. بيلي كنعاود ليها كولشي واسراري كاملين وديما كنهضرو ... علاش مقالتش ليا غتزوج بخويا .. علاش هاد تخبية كاملة !!!!!!
قسم : اومور كتخصهم مخصناش ندخلو اقدس
قدس : هاداك خوويا ... من حقي ندخل .. عيطي عليه يجي
قسم : ونزلي نزلي ..هداك بابا ومكيقدرش يدخلو لدار مع الحداش تجيبو ليك قسم ... الى تعطل غانعيط عليه ... وسيم هنا !
قدس :وسييم خرج قبيلة قاليا غاينزل لبحر يظير سورف ...
قسم : بليل ! المواج طالعة بزاف
قدس :واااكتعرفيه هو ديما مگلوب...
ومات ليها براسها ونزلات فدروج خرجات لجردة جهة لابيسين الكبير وكلسات والخادمة جابت ليها قهوتها وشدات تيليفونها كتسنى فقدس تنزل ....
عند جود ...
نازل فالدروج حاني راسو من السقف لقصير ... عريان من فوق لابس غير سروال دجين و سمطة دالبوكسر بيض كتبان وصدرو كامل عريان عامر صباغة و جيهة عنقو تاهي مطلية ... ولابس كاسكيط مرجعها لور باش ميتوسخش ليه شعرو وسروالو عامر صباغة .. تاوصل لعند جوج رجال كانو لتحت كيجمعو ماطيريالهم وكيبدلو حوايجهم ....
جود : اوووودي ماعندي منتسالكم ... يومين هي يوماين ...
الصباغ : لهلا يحاشمنا اسي جود ..
جود بدا يشوف مع الحيوط كانو مصبوغين بطريقة لي بغا ... منهار بدا الاصلاح فهاد الكاراج وهو مباغيش شي اجونص تكلف ليه باغي غير ناس بساط يخدم هو وياهم بلا مايجيب لي يبدا يتفلسف عليه بقرايتو .. قال صباغ عادي نتعاون معاه اما مول الشركة راه واااكل شارب ... وتا موالين الضووو و موالين الما وكولشي جاب غير الناس لي خدامين نهار بنهارو وطالبين معاشهم ....
خلاهم وخرج عند الكارد لبرا لي كان جاب ليه الحوايج وصرف ليه فلوس ايسپيس حيت مكيهزش معاه فلوس مصرفة ... هز عليه الفلوس وحوايجو .... ودخل ليه مد ليهم جوايات ديالهم ...
جود : سمحو لينا على العذاب ...
الصباغ : الله اودي ( حل الجوا وسع عينيه وشاف فصاحبو ورجع شاف فجود ) هادشي كتير اسي جود ...
جود : تا خدمتكم تستاهل بصحة .. حلال ...
صباغ 2 : لا حتاجيتي شي حاجة خراااا نمرتنا هاهي عندك نحضرو معاك فالحييين ... والله تاخدمنا بنيتنا ....
جود : راني عارف لي كاين ..
زاد معاهم لباب وودعهم تامشاو وشيفور وصلهم حيت طريق فين كاين الكاراج خارجة على المدينة .... وهو الكارد قرب عندو هاز فيديه قرعة دالما و جود حيد الكاسكيط ديالو وبدا الكارد كيخوي عليه وكيغسل عنقو من الصباغة ودرعانو ومور ودنيه عاد رجع وقف كيرد فشعرو السارد لوررر وكيمسح تا على وجهو و شعرو كامل كيقطر وضرب بيديه على كتف الكارد بمعنى شكرا ودخل لكاراج بدل حوايجو لبس شورط بيض سبور نايك وتيشورت كحلة ديالو وجلس على واحد كرسي لبس تقاشر وسبادرين .... وكيضور عينو شاف مع الارجاء كانت الارض كلها مفرشة بجورنال .. وباقي صطولا دصباغة تما .. علا عينيه لسسقف وبدا يبلاني بعينيه الديكور لي يقول غذا لصحاب الخشب لي غايجيو .. ورجع هز سوارتو وتيليفونو وخرج ماشي باتجاه طموبيلتو ...والكارد دخل طفا موراه الضو وجمع حوايجو وسد دوك الصطولا دصباغة وسد ليه الكاراج وتبعو ....
مشا ديريكت شاد طريق للدار كيحس فيه الموت ديال جوع .. ومحتاج شي سهرة يقاد فيها دماغو وبدا يصوني على لوؤي .. تاجاوبوو
لوؤي : الميكانيسيان
جود : وافين ... فيها شي حاجة هاد للليلة ولا والو
لوؤي : واقالو لينا غتزوج لا
جود : مال القصاير فيهم غا القحاب ! طالع لجد مي الخرا لراس باغي نشط شوية ...
لوؤي : والله مكرهت .. انا كتر منك .. ولكن راه خووووك واااحل .. لقيتيني مكرررره ..
جود : ياك لاباس
لوؤي : وا تلتيام دالكنازة وحنا حابسين الخدمة جا الواليد خرج لاداط دالافتتاح .. قالك دوزيام جوغ مور الذكرى الاربعينية ديال جدي ..
جود : وااايلي !
لوؤي : وااايه وباااقي بزاف ميدار قلت ليه كون خليتينا تانكملو عاد عطي لاداط قالك هو مامساليش منبعد غاايسافر للاطوغ وتخربيييق ... عرفتي تلفت والله ... واخا نخدم بليل ونهار مغنساليش اصاحبي .. مسحابليش غيزرب قد هاكدا ... حسابتو كنخدمو بالحجر ....
جود : واش نجي نعاونك ؟
لوؤي : مكندير والو دابا غا شاد كرسي وحاضيهم باش يطلقو يديهم الا مشيت غيخدمو على خاطرهم هادو هنا راه ممسوقينش راني غير واقف عليهم باش يزربو مكندير والو
جود : ان شاء الله كووولشي يوجد ... ملي تحتاج شي حاجة عيط .. انا غدا ندوز عندك
لوؤي : مشات ...
قطع على لوؤي وبدا غير كيتنهد مكيحملش يقصر بوحدو وديجا تاسلطان مزال ماجا من اكادير .... كيفكر كيف غيدوز هاد الليلة حيت باغي يدير كولشي الا يدخل لبيتو ويبقى يفكر .. مباغيش يفكر كاع كيحس براسو غيطرطق عليه وكايحرقو .. ماباقي لا يفكر لا يهز الهم خلاها فيد ليام تفكها كيف بغات ... كيشغل راسو باي حاجة .... وصل لللمنطقة باركا ونزل داخل هما يبانو ليه خواتاتو بعيييد جالسين قدام لابيسيين وقسم بدات كتشير ليه بيديها يقرب وهو وزاد عندهم كايضور سوارتو فيديه
قرب لعندهم لقاهم جالسات حاطين قهوة قدامهم ... وتلاح على لفوطوي من التعواج لي كيدير للعنق ديالو عرفوه مدعدع ...
قدس : شوية كنا غنعيطو ليييك
جود : ( حيد ليها القهوة من يديها كيشرب منها ) تووحشتوني ..
قدس : قققهوتي ... طلق ليا قهووتي
جود : رصاااي ( شرب منها وخسر سيفتو ) شششحال تموتو على سسكرر .. حللو هادشي ( مدها ليها )
قدس : ( كتشرب وتجنن فيه بحجبانها ) حيييت قسسستها بيييديااا ...
قسم : واباااااز ... ( شافت فجود وعلات معاه حجبانها بتساؤل ) مالك ! ماعجبتينيش ...
جود : ( علا يديه للخادمة لي واقفة بعيد عليه باش تجيب ليه قهوة وشاف فيها كيحك فشعرو ويتكسل ) والو غير دوزت نهار فالكاراج .. نوعا ما صافا ! فين مكم وراجلها ...
قسم : مكاين تاشي واااحد هاد ساعة .. كاينين غير حنا و وسيم مزال مطلع من البحر ...
جود : فين مشاو
قدس : كولشي رجعو فحالهم ... وبابا وماما مزال مجاو من الخدمة ...
جود : ( تكا مرجع راسو لور ) فاايناااالي ... شوية دالهدوووء ...
قسم : على مغول كيداير ... ( شافت لجنب ) هااا وسيم جا ...
بانت ليها الطموبيل تحطات والشيفور حل ليه الباب لور هو نازل شاد تيليفونو لابس غير شورط عريان من فوق عضلاتو الصغااررر باينين وشعرو الكيرلي باقي فااازك .. ولابس غير صندالة دالنايك ... غير علا عينيه بانو ليه مشى باتجاههم وكلس حدا جود
وسيم : راكم هنا ...
قسم : سورفيتي بالليل مخفتيش ! مواج عاليين دابا ..
وسيم : وراه هاديك هي المتعة
جود : ( شدو من قرفادتو طلع ليه وجهو لعندو ) كمااارتك على شوية غتنسى لياااا
وسيم : ( نتر وجهو ) طططلق .. نتا لي مكنلقاوكش انا راه كاين
قدس : انا بعدا ماشفتكش ...
قسم : تانا ماشفتكش
جود : وااشتي ....
وسيم : وا الدار كانت عاامرة ... مكنتش كنهبط ..
قسم : مكتعرفش بيوتنا فين جاااو ... كنا كنشوفوك ابيل فيديو فاش كنتي فامريكا كثر مكنشوفوك دابا لي راك حدانا ...
وسيم : ( هز تيليفون وكيهضر ) وراه ملي جيت وحنا مشغولييين .. انا براسي مالقيتش وقت نجلس معاكم .. نتوما كاينين بعدا ! ..
جود : ( حيد ليه تيليفون ) وووحط هدا وحنا هنا حداك دابا ....
جات الخادمة ببلاطو فيه قهوة لجود ورجاء موراها .. حطاتها ومشات ورجاء قربات عندهم
رجاء : بووونسواااغ لي مادموزيل ( شافت عند جود ووسيم ) بونسواغ لي موسيو .... تبغيو عشاكم هنا ولا لداخل ...
قسم : بونسواغ رجاء ... علاش فين هوما بابا وماما !
رجاء : موسيو اسد علمنا بلي مغيباتش هنا هو و مدام لامار .. دونك كاينين غير نتوما ...
قدس : هااء ؟؟؟ فييين مشاو ( رجاء غير كتبسم بمعنى راه ماعنديش هاد المعلومة )
جود : رجاء فيااا المووووت ديال الجوع ... بغيت طاجين ...
رجاء : حااااضر موسيو جووود
وسيم : تانا فيا جوع ... بغيت بحالو .. ديال الحوت
رجاء : حااضر بالكخوڤيت كيف كيعجبك .. ونتا اموسيو جود ...
جود : كييفما بغا يكون ... غييير سربيه
قدس : ( جاتها البكية قالبة شفايفها ) ولااا والاااااا ... ماتاكلوووش حداياااا ... ( دبلات فرجاء عينيها ) غييير هاد المرة عافاك !!!!!!
رجاء : نووو .. ديزولي مادموزيل ميمكنش ليا نعطيك بحال هاد الپلا فالعشا ... موجدين ليك لاصوپ ديالك ....
قدس : ( حزنو ملامحها ) فياااا جوع ..
رجاء : راه ميييمكنش امادموزيل
جود : آجيبي لبنت تاكل ...
رجاء : ماشي لخاطري اموسيو .. لاليست ديالهاا لي كتفرض عليا شنو تاكل وديجا راها فالريجيم ...
قدس : ياك ضعاافييييت مؤخرا ... ( شافت فجود ) ياااك ضعافيييت !!!
جود : ( كيشوف فيها ويطلع ويهبط ) انا من نهار عقلت عليك ونت بگرة مكتبدليش !
قسم غير ساكتة وكتشوف فيهم ضاحكة وهي مناكرة مع رجاء تجيب ليها تاهي طاجين
قدس : والله الا حرام عليك ارجاء هوما ياكلو حدايا طواجن وانا تحطي ليا داك لاصوپ فيها جوج معالق ....
وسيم : وحنا اختي كل نهار كنديرو السپور نت ضارباه بركلة سينوغمال يقطعو عليك الما والضو ....
رجاء : نعوضوه ليك الغدا ... ونت امادموزيل راه صفيطات المندجر ديالك لاليست جديدة فيها ليوما غير يوغورت مكاينش عندك العشا ....
قسم : داااكوغ ... عطلوه شوية مزال مافياش جوع ...
ومات ليهم رجاء ومشات وقدس كتشوف فجود وتلعب بعينيها
قدس : تخليوني ناااكل معاكم .. مغيشوفنا تاحد
وسيم : وصاافي الحلوووفة هنينا .. علاش هملتي سبور ؟ واش مابقيتيش كاتمشى للملعب ؟؟؟
قدس : الماتش أجلوه توفى واحد المدرب و اجلوه لينا قلت مانبقى نمشي نضبع لوقت تما .... التداريب نديرهم فالدار ....
قسم : هاء ؟؟؟؟ ياااك كتمووتي على الملعب !!!! العجب !
جود :كايصدعك شي حد تما ولا ؟؟؟؟؟؟
قدس : ( بقات تلعب بعينيها كطلب ااسلامة كيفاش دغيا طلعها ) لاااا .. شكون غايصدعني .. غير داك الكليكة طلعات ليا فراسي .. ملي يعيطو ليا راه دابا نمشي .. الماتش باقي ليه شي شهر و نص موحال يعيطو ليا دابا ....
وسيم : ماتحبسيش لونطخيمون ... غايجي الماتش تلقاي راسك متقلة .... ( ومات ليه بلا و شاف فيهم ) علاش بابا و ماما غيباتو برا ؟ كاين شي مشكل
جود : سي
وسيم : وااايلي!!!! شنو هو المشكل ...؟
جود : ( مد يدو لور طالقاه ورا ظهر وسيم ) هو حنا
قسم :بابا بقى ليه شوية ويتبرا منا هههه ... ندمناه هههههه
وسيم : اجي حقا نتا ( تقلب عند جود وقاد معاه الجلسة ) صيفطات لياا اية بنت عمي سفيان مسج صباح كتقول ليا مبروك على خوك وكدا !!! اش واقع ؟؟؟ امتى نتا قررتي تزوج ؟ قالت ليا غاتزوج ببيلسان راه شوكاتني اصاحبي حشمت نقوليها مفخباريش ! واش خوت حنا ولا شنو ...
جود : انا مزال مافهمت مالكم على هاد روبالة كاملة بحالا راني مجرجر العدول .. يلاه هضرنا ...
قدس : الحمد لله لي نتا لي افتتحتي الجلسة .... جود .. ( ضوراتو لعندها ) كيفاش درتي ليها ؟ انا عارفاك كنا كنذكرو ليك زواج كنتي كتبقى طنز عليييينا ... كيفاش دابا ؟؟؟؟ واش تفكرتي بيلسان ومباغيش تقول لينا !
وسيم : ( ضورو لعندو ) نتا راه مغتجيش وتفكر تتزوج غير هاكاك ! بين ليلة وضحاها ... غاتزوجو ... كيدرتو ليها؟؟؟؟
قدس : ( ضوراتو لعندها ) فوقاش قررتي د بصح ؟
جود : ( شاف عند قسم لي مربعة يديها شادة ضحكتها على هاد الاستنطاق لي دارو ليه ) جمعي عليا خوتك ولا راه غيجيو فداك لابيسين لهيه معاانقين..
قسم : ههههه بينااااتكم .. فك حريرتك مع خوتك باس تعلم تشاور ..
وسيم : دابا غير جاوبني .. امتى قررتو هادشي !
جود : ( تنهد ) ماشي بزاف غير مور كنازة جدي ....
وسيم : يعني عاد كيف ! .. واش طلبتيها لزواج هي فخبارها و وافقات ؟ ( جود حرك ليه راسو باه ) هااااكداك ... واخا ... تسنى واحد شوية ( جبد تيليفونو ودخل لانسطا و جود كيشوف معاه بانليه بلوكاها ورجع لواتساب بلوكاها تاتما وحط تيليفونو وشاف فيه ) اهاه كمل ...
جود : ( جاتو ضحكة ) علاش بلوكيتيها !
قسم : بلوكاهاا !!!
وسيم : ررربع سنيييين وهي فارعة ليا راااسي بجود .... نهار غتزوج بيه مخسراتش على ديلمي حتى ميساج تقوليا فيه راه طلبني لزواج ....
قدس : راه تانا ماقالت ليا والو ....
قسم : آ نعلو الشيطان ...
وسيم : شنو دابا ملي كانت مخاصمة معاه كنا كنبانو ليها .. على راس كل ساعة ملي جيت لمغرب وهي كتصيفط فلي ميساج .. فين هوا .. معامن هو .. اش كيدير ... صورو ليا ... ودابا لي تصالحو ولا ماعرت مال طاسيلة مهم .. ضربات الطم ... كطلع ليا الڤيو !!!! ..... كانت دايراني قنطرة تجيب خباراتو ولا كيفاش
جود : هنيونا من التبرهيش ... مزال مكايناش شي حاجة ثابتة باس تجي تقولها ليكم ...
قدس : واش هي قالتها وسط العائلة كاملة ومكاينة تاحاجة ثابتة !!!
جود : ( كيتنهد ) دابا مالقيتو فاش تضهرو تقاضاو ليكم المواضيع !!!
وسيم : فهمنا بعدا ... واش بصح صافي غتزوجو ؟؟؟؟؟ قررتي ؟؟؟
قدس : جاوبنا نيشان اجود ...
جود علا راسو لفوق كتنهد وقسم قربات عندهم
قسم : حشمو شوية ونتوما تكبيتو عليه ... ايييه قرر ... ملي قالو ليه بابا و ماما بلي راه كان خاطبها قبل ميدير لاكسيدون وبلي كان بيناتهم كولشي رسمي .. هو حشم قدام عمي وانه عطى الكلمة والبنت باقا كتبغيه ... قال يكمل ... وديجا اصلا .. بيلسان كتعجبو وباغيها ... يعني بحالا قلتو خطبة جديدة لنفس البنت ولكن الولد مبدل ... هادشي لي كاين ...
قدس : ( تبعات مع قسم ورجعات شافت فيه ) جووود ( نزل عينو فيها وهي تحزن ملامحها ) مالك مفرحانش ؟؟؟؟
جود : ( قاد جلستو وتبسم ليها) بالعكس فرحان .. راه غير حيت عيان ... علاش مالها مزويناش ؟
قدس : خويا واش بقات فالزين ! راه كولشي زيييين .. بقات واش نتا باغيها ؟؟؟؟
جود : وراه مغنبغيهاش فيومين .. المهم هو عاجباني ... والا كانت شي حاجة عاجباك كتبغيها من بعد ...
قدس : لا .. ماشي ديما .. شحال من حاجة كتعجبنا ومع الوقت كنملوووها .... وكنلوحوها ونقلبو على الجديد ... ولكن لي كنبغيييوها كيف ماكانت ... كتولي تعععجبنا .... واخا يكون مافيها ميتشااف والناس ميدخلوهاش من شتا .. لي كيبغيها رااه كتبانليه زوييينة .... ماتحكمش على اازين من للول ...
جود : ( جبد ليها نيفها ) منين جبتي هادشي اشنيولة ؟ هم ! وليتي تفهمي تانت ....
قدس : كنهضر بصح اجود عارفاك باغي تقلب ليا الهضرة .... راك خويا وكنعرفك .. وجهك ماعجبنيش ....
قسم : ( مصغرة فيه عينيها ) غير لبارح عاد كنتي صافا .. مالك دابا !!!
جود : ( كيدوز يدو على وجهو ) راه قلنا ليكم عيان ..
وسيم : جود ... واش نتا كتعرف بيلي مزيان ؟؟؟؟ ولا شفتي غا البروفيل ؟؟؟؟ راه كنعرفك نتا وكنعرف تا بيلي .. واش عارف فرق العقليات ولا معارفهمش ! ... واش معاشر بيلي ؟؟؟؟؟
جود : ( بدا كيرمش ويتفكرها صباح وهي كتكيف ورجع شاف فيه ) علاش كيف كتبان ليك نتا !
وسيم : شوف ... ( الجدية بانت فملامحو) بيلي راه بنت عمي .. وهاد العام لي مشيت فيه لامريكا تقربنا كتر سكنا اونسومبل وكنمشيو لقراية اونسومبل ونخرجو اونسومبل ....كنعرف عقليتها .... بيلي ضريييفة وحنينة .. كتووقف مع الواحد ... صريحة مكتنافقش ومكتزوقش .. كتجي لبنادم فاص واااضحة .. فيها بزااااف دالحوايج زوينين .. ولكن فنفس الوقت راه متحررة بلا قياس وانا كنعرفك نتا كيداير .. بيلي كيعجبها تلبس تخرج تسارى تسهر عندها صحااااب ولاد .... راه واليديها وخوتها ومقدروش يحكموها .... راها لدارت الحاجة فراسها كتوصل ليها ومكتخاف من حد .... ونتا كنعرفك كيداير وراحنا دم واحد انا براسي فاش نوض نتزوج راه مستحيل نديها بحال هاكا راه يا نقتلها يا تقتلني .... حنا معععقدييين .... منعرف مال ديلمنا كيدايرين مكنعرفوش حنا هاد التحررر الزايد على حدو فالعلاقات .... يعني فكر ... فكرررر مزيان .. وعاشرها عاد قرر ...
جود غير ساكت ماعرف مايقول غير كيضور لسانو على سنانو ... وكيلعب بتيلي فيديه ورجع شاف فيهم
جود : قلبو عليا هاد الموضوع ....
قسم : جود راه معجبتينيش .... ياكما تخاصمتو !
جود : واش باغيني نوض نمشي فحالي !
قدس : ( شداتو ) لا صااافي كككلس ... هاحنا ساكتين .. ولكن راه دبصح اجود معجبتيناش واش حنا ماشي خوتك ؟ قول لينا اش كاين ....
جود : ( عنقها تحت يدو وهي حطات راسها على كتفو ) راه مكاين والووو مزال ... صافي البنت عجباتني غنتوكلو على الله .... ملي نطلبوها من وليديها ومنعاودش الغلطة جوج دمرات داك ساعة نتعرف عليها على خاطري ونشوفو هادشي فين غيخرجنا .. ونهار نتأكد مزيان نخبرو الصحافة والبروتوكول .. دابا غير تهناو ... راني عارف اش كندير ....
وسيم : مهم ماضيعش حياتك بقرار متسرع ..راه الزواج مصير ماشي اللعب ...
جود : ( شاف فيه ) اجي عندي المشعكك اجي .. ( عنقو باليد الاخرى وكيشوف لقسم وهو معنق قدس و وسيم عندو ) شتي البرااههههش كبرووو ..
قدس : راه كبرنا هدا شحال .. غير نتوما لي مباغينش تشوفونا كبارين ....
وسيم : الحگرة اختي الحگرة ....
جود : دديبلوكي نتا البنت حشومة ...
وسيم : لااااا تمشي تخراااا ...
قسم : راه كانت قريبة ليك زعما وكنتو صحاااب
قدس : هدا راه مكايربي الكبدة على حد هههه
وسيم : كانت دايراني طريق ... ملي ولات معاه قلبات عليا .. وتمشي دابا تخرا ...
جود : ( ضربو بروسية خفيفة ) واشتي ... هاحنا غااانخسرووو دابا ....
قدس : هههه كتسب ليه خطيبتو وهو كيسمع هههه
وسيم : ( طلع راسو فيه ) وصراحة تصلاح ليك .. هي لي غتهد راسك القاسح ههههه ... وبربي اخويا تغاتشييبك .... هايا عقل عليها ....
جود : ( كيشوف معاهم مطول وتبسم ليهمبحنية ) عجباتكم تكون بيلسان مرت خوكم ! هم !!!
قدس : انا راه بيلي عندي عزيزة اصلا ... غير مفهمتش كيفاش درتو ليها وصافي ... اسيدي كون غير نتا مقتتنع بها .... حنا كيفما كانت هاد مراتك راه غنبغيوها من معزتك نتا
قسم : اوا هاااانتا شكون بحالك ... ( شافت فيه ) وانا متبغيوش ليا راجلي !
قدس : على هاد الراجل تزاد بعدا ولا مزال ؟؟؟؟
وسيم : ههه نتخيل العالم كامل مزوج ومنتخيلكش نت .... نت غاتبقاي هاكا حتى تكرمي ويحطك عمي عدنان فالمتحف عندو ....مومياء عازبة ....
جود : غاا حگرو فيها غتصدق هي لي سابقانا كاملين ...
قدس : مسسستحيل نتيقها هههه واخا نشوفها بعينيا فوق العمارية كتشير ليا منتيقش هههه
قسم : اويلي لهاد درجة كاااع !!!!! ..
قدس : واختي هدا لي باغاه نت فيه شي معاييير مزال متكتشفوش عند بنو البشر هههه شوفيه عند الجنون لعلى وعسى هههههه يكون سمتو بهقع ...
جود : ( بانو ليه جايبين العشا هو يدفعهم ) نووضو تكعدو علياااا .... ( قرب ليه طبلة والخادمات وصلو ) حطي اختي حطي ....
قسم : غاابشوية عليك ....
بدات تحط حداهم وجود دغيا قرب ليه طاجين حلو ... ووسيم حطو قدامو ديالو وقدس رجعات لور مربعة يديها كتشوف فرجاء لي واقفة عليهم مبتاسمة ... وتاهي مبتاسمة فيها الابتسامة الصفرة كتبين بلي راه ماعينيهاش فداك طواجن لي حدا خوتها ....مشاو الخدامات وجود دخل فداك طاحين طول وعرض بفورشيط ووسيم تاهو ... وقدس كتشوف معاهم وريوكها سالو عكس قسم لي غير مربعة يديها وكتفرج فيهم مبتسمة كيعجبها الحال فاش كتشوف خوتها مجموعين وهادئين .. وقدس شافت فرجاء .....
قدس : خالتو رجاء ... غير سيري جيبيلي داك لاصوپ .... غناكلها دابا ..
رجاء ومات براسها ومشات غير هي غبرات وقدس تلاحت حدا جود كتكحزووو لجنب وحيدات ليه الفورشيط من يدو
قدس : كوول بييييدك .... ( بدات كتاكل )
جود : هههه اري نوكلك انا .. طلقي ...
حيد ليها الفورشيط وهي فمها عامر كتمضع وبدا يدير دغمة عندو دغمة عندها وهي كتقوليه سربي قبل ماتجي رجاء وهو كايدكس فيها وكتنفخ على فمها ومرة مرة تحل فمها لوسيم تاهو يعطيها من طاجينو .. مرة من عندو مرة من عند جود وقسم كتمد ليها الما باش متوحل ليها ....
جود : وااابشوووية راه يدي هادي .. قربات تاكلني ... حسن عوان هدا لي غادي طيحي فيه نت خاصو يتقضى صباح وعشية ....
قدس : ( كتهضر وفمها عامر ) الثلاجة دبابا مكفياني ... ( شافت عند وسيم ) عطيني نتا داك صودا ياك مكتعجبكش ؟
وسيم : ( جر عندو كاسو ) لا باغييييها .....
قدس : مسسسموم .. جود طلب ليهم صودا و نشربها انا ...
قسم بقات غير كضحك تابانت ليهم رجاء جايا وهي تبعد قدس وكتسمح فمها واخا راه باااينة كلات .... ورجاء عاقت ومابيناتش وقدس كتكح وحلات ليها .....
قدس : ( شرباتت لما ) لحساااااسية ... ( كتحك ) غ غير لحسااسية ( قربات لعنق ج كتشم ) بارفانك يمكن دار ليا الحساسية ..
جود : ( كياكل ويعوج فراسو وهي كتشرب وتكح) ممم .. عندها حساسية دالما ....
دوزو عشاهم كولو ضحك ونكير ونبييش بيناتهم تاهزو الخادمات لعشا وجابو ليهم ديسير ... وقسم هزات تيليفون
قسم : ساعة طناش دليل .. بابا و ماما والله ماتسوقووو ليييينا تابأپيل ..
قدس : صوني عليهم ...
قسم : حشووومة ....
جود : ( كيعوج فعنقو ) نوضو تكعدو تنعسو ... ( شاف عد قدس ) طلعي جيبي ليا الپيسي ديالي ...
قدس : بعد مني والله مافيا لي يمشي تالتما ونرجع نزل ... لادخلت لدار مغنرجعش ....
جود : انا مزال مفهمتكش نت لاش لايقة ماتسخخري ماااتنفعي ... كون غا نعلو الشيطان داك اليلة لي جابوك لينا فيها والله ....
قدس : جاابووووني نزززيين حياتكم ... ماا شااااء الله عليااااا .....
وسيم : ( كيتفوه ) تانا غنطلع نعس .... مافيا لي ينزل مانا نجيبو ليك .....
قدس : ( ناض وسيم وهي شدات فيه ) صصبر نطلع معاااك ... تصبحو على خيييرررر ... ( عنقات وسيم ماشيين ديخانين بالنعاس )
جود : جججيبي ليا البيسي يهدييك الله اداك شنيولة ...
قدس : نوووووو .. مااافيااا لي ينزل ....
قسم : مالقيتي غا هاد المعكازة .... ( بقات ساكتة شحال تابانو ليها غبرو وشافت فيه ) مغطلعش تنعس
جود : مافياش .. كنت خارج نقصر ودراري مكاينينش غاتجيني ناقصة .... قلت نقصر مع واحد البروجي جديد على الله نساليه هاد العام ....
قسم : طموبيل !
جود : لا كاميو ...حابس الطموبيلات دابا ... خاصني الكاميوات باش ندخل مع الواليد راه كيتسناني ....كنت لقيت شي هياكل فلافيراي قبل من العيد .... راني كنصمم عليهم
قسم : الله يووووفق مزييااان والله دير خطوة لقدام ومزيان تميلونجي بين اش باغي بابا واش باغي نتا والله الا احسن مادرتي .... غير كنصعبو علينا الامور ماهي الطريق را وااااضحة قدامنا ومسرحها لينا سيدي ربي ...
جود : سي ...
قسم : قول ليا ( شداتو من يدو بحنية ) ماعجبتينيش اجود ....جود لي كان كيهضر على بيلسان البارح ... ماشي هو هذا دابا ...
جود : ( تنهد معمق وشاف فيها ) معرفتش اقسم والله ... معارفش نحدد الموقف ديالي بمرة .... كل مكنقول طريق هاهي واضحة قدامي كترون تاني عليا وتخليني واقف كنشوف منين ندوز ....
قسم : واش تناقشتو ؟ دازت شي حاجة بيناتكم !
جود : معرفتش واش نسميه نقاش .. ولا نسميه كنتعرفو على بعضياتنا ولا نسميه خصام معرفتش كيفاش نسمييه لي عارف هو خاصني نلقى حل لهاد العلاقة باش تزيد لقدام ...
قسم : باغيها تزيد لقدام اجود ؟
جود : قسم .. كلكم مفاهمنيش واحد الحاجة ... انا راه نهار قلتو ليا راه كاينة واحد البنت خاطبها ... راه واخا كون عمرني شفتها واخا يقولو ليا ماعندها لا عينين لا ودنين لا فم لا لسان راه غانديها .... كيفما بغات تكون .. مهم هو ملي نحط راسي على المخدة يكون بالي هاني انه ماشي بسبابي شي وحدة مقهورة .... حنا ايييه عرفنا بنات بزاف ولكن عمرنا واعدنا شي وحدة بزواج ولا طمعناها .. البنت كانت صغيرة .... ربما عليا حلات عينيها .... خطبتها ورسمات معايا حياتها لبعيد وحلمات ..... خاصني نكمل ... خاصها تبقى فرحانة .....
قسم : ونتا !
جود : ميكهمش اقسم .. مع الوقت كولشي ان شاء الله غيتبدل ...
قسم : واش شفتي شي حاجة معجباتكش .. جود متخبعش عليا .. راني كنعرفك كتر مكتعرف راسك
جود : تقدري تقولي بحال هاكاك .. ملي كلست شوية فكرت مع راسي ... قلت نخطبها من واليديها عاد تتعرف عليها باش منعاودش تاني نفس الغلط الاول .. حتى الا بغيت نخرج انا وياها مغتجيش بحالا كنغدر العائلة يعني بخبااااررر واليديها وخوتها .. راني كبرت على نتخبى من شي واحد .... ولكن نهضر مع الواليد باش الصحافة والبروتوكول ميسيقوش الخباااار حتى لمنبعد فترة ....
قسم : يعني باغي تاخد فترة تعرف عليها كتر
جود : بحال هاكاك .. وفترة لي نقدر نأضابطيها معايا ... نعرف نصلح عيوبها ونصلح معاها عيوبي حتى انا .. راه تانا ماشي ملاك .... قلت داك الفترة غنكونو فيها اليز .. ناخد وقت ... باش تاهي فلخر مانصدمهاش بشي شخصية مكتعرفهاش .. باش تولف عقليتي .... راه انا نقدر نستحملها .. ولكن هي واش غتستحمل !
قسم : علاش ديما كتفكر غير فالغير اجود .. فوقاش غتولي تفكر فراسك
جود : انا اقسم واحد السيد لي عايش مشتت فهاد الحياة غير بعرق واحد .... راه كنحاول نبروفيتي منها وصافي ومنقدرش نتعمق فكاااااع الامور راه ماعنديش الراس لي يهز شي هم ولا شي تفكير .. انا راه كنهرب من التفيكر ب اي طريقة غير باش منمرض راسي ونبقى على الاقل غا عايش قدام واليديا ( قسم حمارو عينيها ) شاد ديما الحياة منين خفاااافت .... الا كانت هاد البنت كتبغيني ديال بصح كيف كتقولو كاملين .. راه غتبغي تبدل على قبلي .. ولكن الا فضلات تحرررها راه انا منقدرش نجيب ليا مراة بداك التحرر كامل .....
قسم : وهاكااا عجبتيني ... ( مسحات دمعتها بالهف ) هاكااا اه ... يعني الا لقيتي راسك مقادرش رجع لور .. وملي تلقى راسك كتبغيها ولا باغي تكمل معاها علم داك ساعة الصحافة نديرو ليك خطوبة وااااااعرة يسيق ليها العالم الخبار ههههه
جود : ان شاء الله .. يكون خير .... تاهي راه باقي بنوتة صغيرة شوية دالخاطر وشوية من هنا ومن لهيه وغتقاد ان شاء الله .... غانحاول معاها بجهدي كامل ....
قسم : جود ..قول ليا .... ملي كتسمع سمية بيلسان دابا... كتحس بلي شي حاجة ديالك ياك !
جود : وضروري .... فين كنسمع سميتها ولا نشوف تصاورها كنحسها شي حاجة كتخصني ... بحال شي حاجة خديتها ليا ولكن باقي خاصني نمونطيها وباقي بزااااف دالحوايج نقادهم فيها ... ولكن على الاقل سميتها مميزة بين السميات لوخرين هادشي لي كيخليني نرتاح وانا داير معاها هاد الخطوة ...
قسم : انا متأكدة غير شوية دالوقت فعلاقتكم وغتولي تموت عليها بحال الللول .. حيت راك فاقد غير داكرة القلب باقي فبلاصتو .. مدامك دغيا قدرتي تحسبها ديالك .. راه قلبك القديم باقي خدام عندك هههههه ( بدا كيفيبري ليها تيليفون فجيب ) مهم ... انا غادي نطلع دابا نعس ... زيد شوية وطلع حتى نتا نعس بكري تريگل نعاسك شوف ليسيغن كيفاش بداو يبانو فيك ... تبقى نتا ديما تخبي بنظاظر !...
جود : واش سميتي اميمة تي عيطيني بتيساع ... طلعي طلعي راه غادي يخرج ليك من جيب طلعي ...
قسم : ( وسعات عينيها وشافت لجيبها بانليها الضو دتيل كايبان ) راااه غا لالاغم
جود : امم لالاغم مع طناش دليل كتفيقك ديري قيام الليل ! ...
قسم : ( جاتها الضحكة ) تصبح على خير ....شحال فيك دتحكار تانتا متعرفش درر رايك مافاهمش ... بسلامة ..
جود : ( جرها من يديها ) ااااجي ... علاش كيصوني دابا ؟ هادي وقيتة د الهضرة !
قسم : جووود منيتك ؟؟؟ وقتاش بغيتيه يهضر معايا ؟؟؟؟
جود : طناش دليل هادي ... من الاحترام ميتصلش مور هاد الوقيتة هادي .... حيت الهضرة مور طناش دليل مافيها مايتسمع ..
قسم : يهدييييك الله راه انا لي صونيت ليه قتلو محتاجة نهضر معاه وقال ليا ملي يدخل لدار غيصوني ليا ويلاه دخل
جود : كيقصر !
قسم : واااش سووووقك ياه على بنادم نتا مكتقصصرش ؟؟؟؟؟
جود : وفاش باغا تهضري معاه !
قسم : واناااااري فاش كدخل .... راني مسااافرررة لا ؟؟؟؟
جود : فين مسافرة ؟
قسم : راه عندي العسكرية بعد غدا غنمشي
جود : وااايلي !!!!!! ياك تالشهر عشرة ؟
قسم : داباااا اشمن شهر عشرة .... راه غنكلس شهر ونص خلينا غنقولو ليه بسلااااامة ...
جود : بسلامة دابا ؟ تالغدا وقوليها ليه
قسم : ودابا نتا مالك ماالك
جود : ماعجبتنيش انا هاد الهضرة ديال طناش دليل ....
قسم : علاش زعما انا ملي غنطلع مغتعيطش نتا لبيلي !
جود : لا علاش غنعيط ليها دابا ! ....
قسم : ونتا هاداااك .... بعد مني ...
جود : ( هي ماشية هو كيهضر موراها ) الى قلل عليك احترامو. لا بدا يضسر عليك طفي عليه تيليفييون .. هاد الخرا اصلااا باينة فيه ضااسر مدام مصوني دابا ....
قسم : ( ضارت عندو ) رررراه انا لي غنخسسر معاك دابا ... فين شفتييه ضاسر كتعرفوووو ؟؟؟؟؟
جود : اجي هضري معاه هنا علاش طالعة لفوق !!!
قسم : والله تااعييييقتي ... مكتعرفش شنو هي الخصوصية ...
جود : مااحملتوش انا هاد خيييينا .....
قسم : انا حاااااملااااه ..كااااع لاتحملو. ....
مشات قسم وهو بقى كينتف فواحد المخدة تحت يدو فلخر لاحها على الفوطوي لاخر وطوا رجليه بجوج على طبلة وطوا درعانو تحت راسو وعلا راسو كيشوف فالنجوووم تاسمع شي خطوات صغار جايين باتجاهو و تكعد يشوف بانتليه قدس جايبة ليه بيسي حطاتو قدامو
قدس : شششد .. عزيز عليييك غااتعدبنا ....
جود : ( ضحك ليها ) نت راااااه الحووووب نت .... اجي عطي لخوك بوسة وطلعي ..
قدس : ( تحنات عندو بزربة باستو فخدو ومشات كتجري ) بسلااااامة ....
جود تنهد وناض تكعد هز البييسي ديالو حلو ومشا ديريكت لضوسي ديال البروجي لي بدا فيه .... وانغمس معااااه كيحاول يتلهى فحاجة وحدة باش ميبقاش يفكر بزاف .....
لفوق ...
دخلات قسم لجناحها وسدات الباب كتنهج .... شعلات تيليفون بانو ليه ثلاثة ديال ليزابيل ماجات فين توصل لبيتها تاكانت قطعات لابيل الرابعة .... وبدات كتعاود ليه ....تا جاوبها
قسم : اصيل ....
اصيل : على شوية غبدا نسب ..
قسم : راه كنت لتحت مع خويا ماااطلقني غا بزز ...
اصيل : صافا ؟
قسم : صافا والله بيخييير .... يلاه دخلتي ؟
اصيل : وي ( حيد تيشورت ديالو لاحو وخرج عريان لسطح كيشعل كارو ) يالاه دخلت ... مشيت دزت عند دراري علمتهم مغانخرجش غدا لبحر ...
قسم : صافي دونك الصباح انا معاك ... بابا وماما مكينيش غالبا مغيجيوش فصباح ...
اصيل : ( نفت الدخان ونفضو فطفاية حداه ) قولي ليا .. هاد العسكرية فين بالضبط !!! يعني فين غاتكوني ...الساحل لي قريب لطنجة !
قسم : سي ... هو نورمالمون العسكرية ديالي كاينة ف مونت-ألبانت حدا البرتغال انا خريجة ديال اسكويلا ناڤال ميليتار آرماذا ... ولكن مغانكلسش تما بزاف غير سيمانة وغانخرجو بالباطو .. التدريب كانخرجو ليه من طريفة ... يعني بين طاريفة وطنجة .. علاش ؟
اصيل : حيت شحال من مرة فاش كنخرجو من البحر ديال طنجة كتتلاقاو الباطويات دالعسكرية ... منشوفوكش فالمغرب نشفوك فالحدود .... وراه نقدر ندخل لطريفة .. معاش كتسالي !
قسم : واش كتقدر دخل لطريفة ؟
اصيل : وي حيت ااسيد لي خدامين معاه كنوصلو ليه بعد المرات حتى لطريفة كندخلو على حسابو هو ... انا صراحة مابقيتش معاهم فطنجة نزلت هنا حدايا لكازا .. ولكن ماعليش نرجع نطلع ...
قسم : راه مابغيتش نعدبك على والو حيت صعيييب باش نخرج من العسكرية .. راه بابا ومكيخليوهش يجي عندي ... ملي كنكونو فتدرايب ... راه مكنحيدوش اللبسة وممنوع نخرجو بيها ... راه كنبقى غير بين الباطو ولوطيل لي نازلين فيه والمدرسة فاش كنرجعو .... انا براسي كدوز عليا داك الفترة دالعسكرية كحلة ....
اصيل : اشوفي اداك بنت الاسماعيلي .... ندير معاك الحل لي بغيتي ... غاباش تقولي ليا شهر وعشريام مانشوفكش ... قاسحة شوية ....
قسم : واش انا كرهت ... راه كنت كندوز ثمن شهور والعام التاني ديالي راه دوزت عام دالعسكرية كنت كنتوحش دارنا و منقدرش نشوفهم وتيليفون كايسمحو لينا بجوج دالاتصالات فالنهار .... كنديرو ديپار ل مونت-لبان سيمانة فالمدرسة لداخل النظام صااارم كتر من العسكر ديال البرية .... راه تاحنا دالبحرية عندنا نفس النظام فااصرامة .... غاندوز سيمانة تما عاد غانرجعو لطاريفة راه من خمسة دصباح تالستة دالعشية وحنا غير فالباطو كنوصلو لوطيل مسخسخين باش نعسو ... كون لقيت انه عندي غير نهار واحد دالراحة كنت نقول ليك اجي فيه ....
اصيل : ( غير كاتنهد ) دابا هاد الدورة هادي كانت كتسناني تا نجي انا عاد يعيطو ليك عليها ولا كيفاش .... فين كانو شحال هادي
قسم : راه قلت ليك منحوسين ههههه
اصيل : واشتي دابا غاتخلينا مقطوعين ....
قسم : نتا غادي تلهى بالريسطو ديالك غااتنساني كاع
اصيل : ننساك فريسطو سميتو قسم !
قسم : ان شاء الله دغيا دوز .... غدا نشوفك بكري شوية قبل مايعيط ليا بباابا حيت نهار اللخر غايبغي ندوزو مع العائلة راك عارف .... دونك تسعود نتلاقاو صافي ! ولا تمنية !
اصيل : تمنية اقسم واش عندك فرض فالفيزيك !
قسم : ماعندي ماندير ليك .. تعلم تفيق بكري ....
اصيل : راه هدا اصيييل اقسم ماشي اجتماع ديال مجلس الادارة ...
قسم : اهاه نتسناو تالحداش يكون جا بابا ... اش بانلك !
اصيل : الالة بغيتيني نجي تا دابا راه غانجي ...
قسم : كون مكانش خويا شاد العسا لتحت كون قتليك اه ههههه والله لاخلاني نخرج .... وللاسف مغيقولش ليا سيينوووغمااال هههه
اصيل : هه غتبقاي شاداها عليا .... ( كينفت دخان ) دابا واش هاد شهر وعشر يام مافيهاش تخرشيش !
قسم : واااالو ...
اصيل : كيفاش غندوزو حنا دابا هاد المدة كاملة !
قسم : كيكنتي كدوزها قبل دوزها دابا ....
اصيل : ااه ساااهللة عندك ... سيري تنعسي سيري .... تالغدا ونشوفك ....
قسم : هههه داكوووغ ... جيبلي معاك مسمن
اصيل : وااخا.. شنو بغيتي اخر ...
قسم : وحرشة
اصيل : اهاه
قسم : و جبن ...
اصيل : اهاه
قسم : والعسل .... و .. ونتا ....
اصيل تنهد من اعمااااقو وعلا راسووو لفوووق كايتجنن عليها
اصيل : اااااه اقسم ... ونشد والديك ....
قسم : ههههه سييير تنعس سير .. تالغدا ان شاء الله ( يلاه غتقطع وهي تسمعو )
اصيل : قسم ..
قسم : امم !
اصيل : واش عارفة شحال غنتوحشك ؟
قسم عضات على شفتها وقلبها بدا يزدح تاني ..معدتها حساتها كترررعد ليهااا .. وحاولات تبقى شادة فراسها ونطقات بهمس و بأسف ....
قسم : حتى انا ....
اصيل : ( طفى الكارو وسكت مدة عاد هضر ) عمرني ماظنيت غندير لالاغم باش نفييق مع تمنية نشوف شي وحدة ... ( قسم غير ساكتة ماعىفات ماتقول وعاضة على شفتها ) ...سيري تنعسي ... غدا غاتلقايني تما فوق ماجيتي ....
قسم : ان شاء الله ... تصبح على خير
اصيل تنهد وقطع تيليفون وهي تلاحت على سرير حاطة يدها على قلبها مامولفاهش يعبر بزاف على رغبتو فيها .. اخر تعبير دار كان على شكل قبلة ولكن باش تسمعها وخا غا كلمة غانتوحشك حسات بكرشها كتلواااا ليها بااحماس .. ورجعات عضات المخدددة كضضصصحك ......
جا صبااااح جديد .....
سلطان وصل فيه مع سبعة دصباح لدار غير دخل مشا لبيتو دييريييكت تلاح نعس غير المدبرة ديالهم ولي بنسبة ليه " الدادا " ديالو هو اية لي حيدات ليه سبرديلتو و قاداتو ففراشو مزيان ... ولوؤي بات فالخدمة .. اما بيلسان باتت فايقة كتشوف لتيليفون واش غيصيفط شي مسج ولا يصوني مالقات منو والو وشعلات نتفليكس دايرة فيلم درامي شبععات معاه بكا وطاحت نعسات .... اياد ليلة كاملة كيكمي فجردة كيحس بصدرو تقييييل عليه وراااسو كترر وكيحس بنفس كتقطع ليه مكيعرفش اش واقع ليه بمرة وعلاش نفسو مزيرة قد هاكا ومحاااملش راسو .... ورجع نعل شيطان ودخل مشا ينعس ....
ساعة كانت سبعة ونص .... بدات لالاغم كتصوني عند قسم ....
طفاتها وناضت دغيا مصحصحة كلها حماس تمشي تشوفو .... دخلات لدوش خدات دوش وخرجات كتبروصي سنانها ، تاشوية سمعات تيليفونها كيصوني وخرجات بزربة و البروس ففمها حسابتها اصيل وهي تلقاه باباها .... كمشات حجبانها علاش باباها غيصوني فهاد الوقت يالاه غتجاوبو ... وهي تلقاه قطع ...عوجات شفتها لتحت مفاهماش وجات دايزة على طابل دونوي كتغسل فمها وتعاود وهي تلمح شي حاجة على طابل ... علات حاجبها وهزاتها ... كانت بطاقة بيضة .... ومكتوبة عليها " To my honey " ( الى عزيزتي ) ....
عند قدس ...
جالسة على سريرها حالة عينيها بزز خاسر فيها النعاس بسبب التيل لي صونا وقطع و الكاش زيو معالياها فوق راسها كتحك فيعينيها وكتحل فداك الجوا لي لقاتو حدا التيليفون مكتوبة عليه " to my little " (الى صغيرتي) ... علات حاجبها بايتغراب مافهماش وبدات كتحل الجوا .... وهي تقرا لفوق " دعوة " ...
عند وسيم ...
وسيم : انڤيطاسيون !!!!!!!
كان على سريرو وشعرو مربل وحال داك جوا لي كانت مكتوبة عليه " to my prince " ( الى أميري ) ...بعد ماصونا ليه تيل تاهو وقطع ليه .... وبدا كايقرا طانت دعوة لقضاء يوم بالكامل فاليخت " REQ-34001 " لي هو اليخث الخاص ديال باباه وماماه ولي عمرهم مشاو ليه ....
عند جود ....
كالس على الكرسي القصبي فالجردة لي بات ناعس عليه كايعوج فعنقو ... بعد ماصونا ليه تيل 3 دالمرات باش يلاه يفيق ليه .... مافهمش علاش اسد كايعيط ليه فهاد الوقت ملي حا يجاوب لقا البطاقة محطوطة حداه .... مكتوب عليها " to my cub " ( الى شبلي ) ... قراها ونزل عينيو لتحت باش يلقى فالتوقيع مكتوبة lamar&assad ......
بدا يضور راسو كايضحك وملامحو باقين مبوقين بالنعاس .... ولاح داك البطاقة وتكا راسو غلى داك الكرسي القصبي تا سمع خطوات جايين باتجاهو وعلا عننيه لقاه الشيفور الخاص بأسد ولامار ...
- بونجوغ موسيو جود .. الطموبيل واجدة ...... موسيو أسد ومادام لامار كايتسناوكم .....