الساعه 9 في إحدى المطاعم"
كانت تبي تجمع اغراضها تبي تطلع من المطعم لين سمعت نقاش من شخصين يطالبون واصواتهم واصلتها طلعت ونزلت مع الدرج وعلى طول لفت وهي تسمع اللي يقول : هذي المديره وتفاهم معها ، لفت للجهه الثانيه وشافتهم وعرفتهم على طول كانوا كل مره يجون مطعمها ومب اول مره لهم وكانت تشوف الزباين من مكتبها إللي فوق اذا جات أحيانًا قالت بهدوء : شفيه
سيف لف بصوت خفيف لنيّاف : فيها منك
نيّاف صد وطلع ولحقه سيف ولف عليها النادل: يبون قهوه سعوديه فالمنيو !
عقدت حواجبها باستغراب كون ان مطعمها ايطالي وما عندهم خدمة ضيافه ابداً ولا حتى عندهم قهاوي بشكل عام ويطالبون بعد! لفت وابتسمت : يصير خير
ركبوا سيارتهم وسيف ببتسامه : النيه كانت قهوه وكلينا باستا
نيّاف : المطعم الوحيد اللي اجيهم باستمرار بس يقهروني انهم ماتغيروا للحين وماحطوا قهوه سعوديه
سيف : انت شايف المنيو كيف مختصر بس حق اكل وفكرة المطعم غريبه
نيّاف : تصدق متى حبيت ذا المطعم
سيف بسرعه : عشان شبيهتك اكيد!
ضحك باستهزاء نيّاف وهو يقول : اول مره المحها !
وكمل وهو يقول :جيته قبل سنتين بقضية وكنا نتتظر صاحب المتهم يجي واستغليت الوقت وطلبت رغم رعب الموظفين اللي فيه منا
سيف ضحك بتعجب: فاضي !! بعدين ليش توك تقول لي
نيّاف حرك : سالفة تافهه والقضايا المهمه واجد وكلمتك فيها و... وكملوا نقاشهم وهم متجهين لبيت نيّاف اللي مابقى شي ويجهز !
بغرفة شوق رفعت جوالها ترد على هناي : هلا والله باللي ناسينا
شوق تأففت :ابد لهيت شوي مع الاهل
هناي : شفيه صوتك
شوق : م فيني شي الا انتي وش صار معك
هناي تنهدت :على نفس الحال! من البيت للاوتيل للمطعم لباقي الشغل واحاول الملم الموضوع بدون م احتاج ولد العم
شوق عصبت :كريه هو وابوه
هناي ضحكت وبحزن : ضريبة اللي ماعنده اب واخ !
شوق حزنت زياده عليها : انا معك ماعليك ، وبتغيير للموضوع : بس ها كيف شغل المطعم
هناي ببتسامه : تخيلي معي فكرتنا الجباره اللي مسكناها لمدة سنتين بغيرها الليله
شوق : ليش
هناي :مدري في اشخاص يجونا باستمرار و كل ما اجي اشوفهم فا من زمان واحد منهم يطالب بقهوه سعوديه ووجهه مألوف ومحد كان يسمع طلبات الزباين وانا اجي من فتره لفتره ومحد قالي عن طلباتهم الل..
شوق قاطعتها :عسى ماشر مطعم ايطالي وقهوه سعوديه !
هناي بتفكير :بقلب المطعم مكس ايطالي سعودي هندي صيني
ضحكت شوق :هذا اللي يقولون عنه فاضي ويدور له شغله
هناي :عاد تصدقين القهوه السعوديه شي اساسي احنا حتى حلويات ماعندنا كله اكل! وين الفايده وش هالفكره الغبيه