أبيلا_روحي❤️
الـحـلـقـة (47)
گـتـابـتـي #Koka_Saleh
:::::::::::::::::::::::::::::::::::::::::::::::::::::::::::::
في علاقات ما بتستاهل غير نِهاية وحدة، انا اسف اني بِيوم من الأيام شفتك مختلف🖤.
:::::::::::::::::::::::::❤️❤️::::::::::::::::::::::::::::
لايك قبل القراية وتعليق برأيكن بعد القراية 😍
::::::::::::::::::::::🌷🌷::::::::::::::::::::::::::::::::::
#في_الحلقة_السابقة
(عند هانيبال )
كان طول الوقت امقمعز جنب باته خايف عليه
وطول الوقت وهو ايشوف للتليفون ويرجى في مكالمة الأمير وهو علي نااار 🔥
وأخيرا جاته المكالمة
صبى بسرعة وركب في سيارته
هانيبال / السلام عليكم ورحمة الله وبركاته
الأمير / وعليكم السلام ورحمة الله وبركاته
هانيبال / هل وصل الرد
الأمير / نعم وصل الأن
هانيبال / ماذا كان ردهم اتمنى انهم وافقو ولن يأذو والدي
الأمير / لن يأذوه ولكن هناك شرط واحد فقط
هانيبال / ماهو ?
الأمير / تسليم البنت المسيحية الموجودة في منزلكم
هانيبال /???
::::::::::::::::::::::::::::💛💛:::::::::::::::::::::::::::
هانيبال / من تقصد
الأمير / قالو إنها فرنسية وإسمها أبيلا
هانيبال / ليست فرنسية هي ليبية
الأمير / انها تحمل الجنسية الفرنسية من أمها وأيضا تحمل الديانة المسيحية
هانيبال / هي أسلمت منذ اسابيع
الامير / لا يهم هم يريدونها وهذا هو شرطهم الوحيد لترك أبيك
هانيبال بسرعة / كيف يطالبون بزوجة عضو مهم من اعضاء تنظيم الدولة الإسلامية
الأمير / ماذا تقول ???
هانيبال / أنا من فترة جعلتها تسلم وتزوجتها
الأمير بعصبية / كيف تفعل هذا من دون الرجوع إلى الجماعة
هانيبال / كنت أريد الأجر لا اعلم أنهم يريدونها
الأمير /هكذا تغيرت الأمور سأتواصل معهم وأخبرهم بما حدث
هانيبال / أنتظر منك ردهم
سكر الأمير الخط وهانيبال حط يده علي قلبه اللي كان ايدق بسرعة من كثر الخوف
لأن حاليا حطوه بين نارين نار خوفه علي باته وإن ايديروله شيئ
ونار طلبهم الأبيلا اللي عارف إن مستحيل ايسلمها الهم
هانيبال كان عارف قانونهم اكويس إن زوجة أي عضو في التنظيم وخصوصا لو قعد مهم زيه ماحدش يقربها نهائي
حتى لو ايموت اتعامل معاملة زوجة شهيد يعني حتعامل أحسن معاملة
وللسبب هذا هو قال إن متزوجها عشان يقدر يبعدهم عليها ويحميها منهم
بس توا المشكلة اللي بدت عنده هي كيف بيقنع أبيلا تجوزه بعد اللي عرفاته عليه وبعد كرهها له 🥺
نزل من سيارته قمعز جنب باته وهو شارد وعقله مش امعاه ولا مع كل اللي مقمعزين 😞
/
/
(عند منار )
خذوها وبدو ايحققو امعاها وماكن قدامها إلا إنها تعترف لأن كل شيئ عندهم عليه أدلة ادينها 💃
/
/
( عند حسين )
اللي صار امعاه ماكان ساهل عليه
رغم ان حظه سمح وانكشفت بدري قبل ماادمرله عيلته بس وجعاته ان انضحك عليه 😞
وجعة الحب والمعزة اللي كان شايلهن الها في قلبه 💔
انكسر من جوا كسر صعب تبيله بيش يجبر ويبرا🥺
إلى الآن مازال ماحد علم بالقصة بس كان ايفكر بعد يعلمو
كيف حيكون موقفه
وواجعته إن حيبان إن مضحكة قدام كل حد😞
/
/
الساعة 1 في الليل
(في حوش عمي منعم )
كانن البنات في المطبخ ايحطن في سحور للرجالة
جنة واستبرق وامعاها أبيلا وبنات ثانيات قريبات جنة
كل وحدة ادير في حاجة
اللي اتوتي في الصفر واللي اتحل في التن واتحط فيه في التباسي واللي اتقشر في الدحي واللي اتحط في الهريسة
واللي اتقصص في الخبزة واللي اتحط في الحلوة الطحينية
لعند ماوتن اصفر السحور
رنت جنة علي محمد وقاللها نبو 3 صفر سحور للرجالة
وكلم محمد الشباب وخشو بياخذو الصفر
وجنة واستبرق وأبيلا كل وحدة طلعت بسفرة في يدها من عند الباب الخلفي للمطبخ
محمد خذا السفرة من جنة وعامرية جا اصدافها مصعب وخذا منها الصفرة وهي اول ماشافاته وجها قعد حمر وانحرجت ومابتش اترفع عيونها فيه ☺️
أما أبيلا فكان حظها وبختها إن هانيبال هو اللي جا شورها
أبيلا من غير مااتحط عينها في عينه مدتله الصفرة وردت بتخش
هانيبال / أبيلا نبيك في موضوع مهم
أبيلا مالفتش ولا ردت عليه وكملت مشيتها شور المطبخ
هو حط الصفرة عالوطى ولحقها واول ما حست بيه وراها واينادي فيها
سرعت خطواتها وخشت للمطبخ لانها عارفة ومتأكدة إن مستحيل يحرج روحه وايخش وراها لان في المطبخ فيه بنات قريباته وهو طبعا ملتزم 🙄
بس فاجئها هانيبال إن خش وراها
هانيبال بنبرة صوت حادة / أبيلا تعالي نبيك
كل اللي في المطبخ انصدمن مالموقف وكل الأنظار قعدن شور أبيلا
أبيلا اتشوفلهن ومن غير مااتعدل عالنظرات وبكل قوة
أبيلا / وانا مانبيش نهكي امهاك 😏
هانيبال بعصبية / مش بجوك هي قتلك موضوع مهم وقرب بسرعة ومسكها من يدها بقوة وطلع بيها برا من عند الباب الخلفي
أبيلا فكت يده وهي متعصبة/ وجهتني 😡
هانييبال بعصبية / ليش اتحطي فيا في موقف محرج قتلك نبيك في موضوع مهم معناها نبيك
أبيلا بعصبية / وأنا كتلك مافيش بينا كلام
هانيبال قرب خطوتين / افهميني يابنت الناس انتي لازم اتوافقي علي زواجي منك
أبيلا ضحكت / تهلم 😏
هانيبال بعصبية / مانبيش نجوزك حبا فيك ولا في جمالك ولا عشان سواد عيونك انتي في خطر انتي لو مااجوزتينيش حتموتي بيش تفهمي حظرتك
أبيلا شافتله بنظرة حادة / الموت ارهم من زواجي منك
/
/
( في المطبخ )
طبعا الصدمة كانت واضحة عالوجوه قريبات هانيبال اللي في المطبخ
هانيبال الشخص الملتزم اللي عمره مارفع راسه فيهن حتى بالكذب
ايدير هكي 😱
الدوة كثرت ومسرع مابدى الخبر ينتشر لعند ما وصل الفطيمة
:
:
هانيبال /المنظمة اللي فيها باتك وامك ايدورو فيك ويبو يوصلولك عن طريق الجماعة اليوم الامير كلمني عشانك يبوني انسلمك الهم
أبيلا / ايوا قول انك انت بتسلمني الهم هشان مسيحية اصلا من اول ماجيت وانت كاره ديانتي توا هرفت وفهمت أنت هليش لهقتني الفرنسا وجبتني هنا هشان تبي اتسلمني الهم وتكسب ثقتهم أكثر
هانيبال الكلام قهرة أبيلا لافاهمته ولا حاسة بيه ولت بالدوامة اللي هو فيها ولا هي مصدقته أصلا 🤦♀️
مسكها بقوة وحطها عالساس وقرب منها
ايديه ماسكات ايديها من تحت ❤️
جسمه علي جسمها ❤️
ا عيونه في اعيونها ❤️
انفاسه اختلطن بأنفاسها❤️
أبيلا معش قدرت اتحرك مشاعرها اختلطن حب مع خوف
جسمها فشل بالكامل حتى عيونها اثبتن علي عيون هانيبال وهو حاط اعيونه في عيونها
هانيبال وهو ايشوفلها /انتي عارفة اكويس ليش جبتك هنا لأني انحبك وماعمري حبيت زي ماحبيتك ولا وحدة خشت القلبي غيرك مستحيل انخليك انتي ليا أنا وبس افهمي إن لو ايصيرلك شيئ مش حنقدر انعيش بعدك
أنحبك يا أنحبك أبيلا روحي ❤️
ومن غير تفكير من عقله لان في اللحظة هذي كان قلبه هو المتحكم فيه قرب منها وباسها بوسة طويييييلة علي شفايفها وأبيلا رغم كل الحقد اللي شايلته له بس هالمرة مشاعرها وقلبها هنا اللي تحكمن فيها وماقاومت بوسة هانيبال 😘
بس اللحظات الجميلة عمرهن مايكملن في الوقت هذا تحديدا افطيمة سمعت اللي صار وجت تجري بتعرف هانيبال شن يبي في أبيلا وكيف اجرأ وخش بالطريقة هذي
بس اللي شافاته كان صدمة قووووية 😱
افطيمة بعصبية / استغفر الله العظيم شنوووووووو هذا 😡
هانيبال بعد من ابيلا بسرعة ومعش عرف شن يحكي الموقف كان صاااااااعق
افطيمة بعصبية / اطلع برا واحسابك عند باتك يا هانيبال 😡
هانيبال نزل راسه ماقدرش ايرد ولا ايبرر الامه اي حاجة اصلا اللي شافاته ماعندش له أي تبرير
طلع بسرعة من غير مايحكي ولا كلمة
أبيلا منزلة راسها منحرجة مش عارفة ليش صار هكي
افطيمة بعصبية / انتي بعد اليوم مستحيل نرضى انخليك وسط اعيالي خليتي المدين منحرف تبيني انخليك لعند مانوعى في صبح نلقى ضنايا مسحيين زيك 😡
وخشت وسيبتها
الكلام خش القلب ابيلا زي الخنجر اللي ينغرص في وسط القلب
ماعبرتش الا بدموع سبقنها علي خدها لان في الحظة هذي حست إنها وحيدة بروحها في دنيا ماعندهش فيها ولا حد قلبه عليها ولا حد ايحبها حب حقيقي
لان اكثر اثنين ايحبوها واللي ممكن ايسامحوها لو غلطت واللي حيتقبلوها بأي وضع هي فيه الاثنين هذوما سيبوها في دنيا موحشة وغريبة 💔
معش قدرت اتخش للحوش وقعدت امقمعزة برا اتفكر شنو اللي حديره لان بعد كل اللي صار وجودها هنا حيكون مستحيييييل
/
/
مرن 4 أيام بسرعة مافيش فيهن جديد يذكر
لعند يوم أسبوع نجاح
(في الصبح)
العيلة كلها سمعت باللي صار مع منار وخلود
حسين ماكان قادر ايواجه حد اكتفى بأن حبس روحه في شقته لا راضي ايشوف حد ولا يبي يحكي مع حد 💔
أما حسن خاف علي خلود من ردة فعل خوتها من ثاني يوم القصة حجزلها طيارة علي تونس وطلع بيها
كان يبي يبعدها عاللي صار وتنساه وفي نفس الوقت يبي يبعدها علي هلها لعند يهدو وأهم شيئ ايعالجها مالإدمان ❤️
أما أبيلا كان وضعها من سيئ الأسوء افطيمة معش حكت امعاها وكل مااتشوفها تقعد تنظرلها في نظرات استحقار
وحقد وإنها مش قابلة وجودها في حوشها 💔
ونفس الشيئ هانيبال معش قدر يوصل في أبيلا لأن مش قادر ايقابل أمه بعد اللي صار 😞
أما هدية الها 4 أيام مفتكة من علي بس محبوسة في الدار بروحها كان ايجيها اوكالها وشربها لعندها وموصي علي عليها الكل وكانت اتعامل احسن معاملة بس رغم هذا كله كانت مقهورة اللي صار امعاها مش ساهل
اذكرت كل اللي صار امعاها في كل حياتها وتمنت لو يوم واحد مع خوها ومراته وحتى لو يضربوها كل يوم حيكون افضل ماللي هي طاحت فيه 💔
:
:
(عند مصعب ومحمد في سيارة محمد)
محمد / قصدك هي نفسها منار اللي أنا قبل بنخطبها
مصعب / تخيل ولولايا نا راه انت صارلك زي ماصار الحسين توا 😎
محمد / تحكي من جدك
مصعب / والله نحكي من جدي بيش تعرفو بس اهمية يقعد عندكم خو صايع 🤣
محمد / لا حول ولا قوة الا بالله تعرف والله وجعني حسين شن صايرله توا
مصعب / قال عمي مسعود حابس روحه في شقته مايبيش يطلع ولا يبي يحكي مع حد
محمد / وانت كيف عرفتها إن هي نفسها
مصعب / لما سمعت اللي صار وعرفت اسمها ضربت في راسي هي دغري مشيت شور جنة قلتلها اوصفيها ليا بدت توصف فيها وبعدين قالتلي ان عندها الها صورة في فرحها لما ورتها ليا عرفتها انها هي
محمد نزل راسه وبصوت واطي/ اللهم لا شماته بس ربي خذا حقي منها بعد اللي داراته ليا من غير مااندير شيئ😞
مصعب / شن قلت
محمد / قتلك برمت علي عيلتنا بالواحد ونهايتها كانت عندنا
مصعب / مش هذا اللي حكيته بس حنمشيها لكي 🙄
محمد / خلاص انزل بنمشي انجيب حاجات ناقصات عشان الأسبوع اليوم ويبو اشوال دشيشة عشان العشاء
مصعب / خوذني امعاك امكسد
محمد / باهي سكر الباب
سكر مصعب الباب ومشو مع بعضهم
/
/
( عند عمي منعم وعمي مسعود )
عمي منعم / لنقنه وجعني حسين الكسرة واعرة
مسعود / والله حكيت امعاه قتله ولية والصبايا مالحد وغير عمتك اطق الاربعين انجيبلك غيرها
عمي منعم / ردبالك يامسعود تغلط الغلط هذا خلوه لعند ايتقبل الموضوع وينساها مااتجوزوه وهو مازال متأثر شن ذنبها بنت الناس اللي بتجيبوها له حيعيشها في جحيم وقلة ثقة واهمال
مسعود / صدقت صدقت نا من قهرتي عليه نا وامه قلناله هكي الدرجة كريمة بدت تبي ادورله
عمي منعم / هي كيف حالها كريمة شن قالولها غادي
مسعود تنهد / نفس الكلام اللي هنا وقالو لازم تبدى في جرعات الكيماوي بس هي بعد سمعت نجاح حلفت اتجي للعزاء وجعتها وقهرتني حتى نا
عمي منعم تنهد / ربي عالم باللي في قلبي غير الواحد شن بيقول غير الله يرحمها وهي ورجب ويجعل مأواهم الجنة
مسعود / اللهم أمين / ميتت رجب وراها الدواعش واضحة
عمي منعم بعصبية / من غيرهم يقطعو في الروس حسبي الله ونعم الوكيل فيهم لكن بإذن الله قتلته مش حتمشي هكي وحقه حناخذوه هو والناس البريئة اللي ايذبحو فيهم
مسعود / والله نا خايف عليك منهم بحت كم مرة جاك تهديد
عمي منعم / العمر واحد والروح وحدة وماايطلعها اللي خلقها
وكان متت علي ايديهم انموت شهيد (طوبى لمن قتلهم وقتلوه )
مسعود / ربي يحميك واينجيك منهم وربي ان شاءلله ينصر الجيش عليهم ويطلعو من بلادنا اللي دموروها
عمي منعم / ان شاءلله
/
/
(عند هانيبال )
من 4 أيام وهو عايش في دوامة ولا ليلة من هال4 ليالي قدر يرقد فيها متريح
كل تفكيره كان في طلب الجماعة وكل مايتصل بالأمير ايقوله مازال ماردو عليا 🥺
هانيبال كل لحظة ايزيد خوفه عاللحظة اللي قبلها
بين نارين باته وحبيبته
في اللحظة هذي بس عرف إن طريقه كانت غلط واختياره الهم كان اخطر اختيار لان حاليا هالإختيار وصل فيه وهدد حياته وحياة هله وكل اللي ايحبهم في خطر بسببه
توا بس ردله عقله بعد غسيل الدماغ اللي داروه له واللي داروه الكل شاب قاعد امعاهم
مغرر بيهم وكل حد جوه بطريقة معينة 💔
/
/
( الساعة 7 المغرب )
في المزين
الكوافيرة / مشاءلله طالعة اتهبلي وواضح من فرحتك إنك واخذة حبيبك
إسراء وهي اتشوف الروحها في المراية / للدرجة هذي واضحة عليا الفرحة 😍
الكوافيرة / بككل حتى كل اللي في المزين يحكن فيها
إسراء ابتسمت / اصلا ماقبل حوتني خذيته
الكوافيرة / ربي ايكمل عليكم بالخير/ هي صبي عشان تلبسي الفيلو وانثبتلك طرحتك قبل ماايجو ياخذوك
إسراء صبت وهي فرحانة قلبها طاير من مكانه ومش امصدقة انها واخيرا قعدت حلاله وحتكمل عمرها امعاه 😍
(أنا لو خيروني حـ نختارك أنت فـِ ڪل مره والعمر الجاي وحـ تڪون أنت أعظم وأجمل اختياراتي)
/
/
(عند حذيفة)
حذيفة ايبخ في العطر
خو حذيفة / تي ساد كملت شيشة العطر عارفة بكم العطر هذا ازح
حذيفة / مش عطري وواخذه بفلوسي ايش دخلك
خو حذيفة / غير عشانك عريس لازم تقعد كل يوم بنتك مميزة
حذيفة بلمعة في عيونه / المهم اليوم
خوه/ فرحان
حذيفة ابتسم / فرحان هذي كلمة اصغيرة عالاحساس اللي حاس بيه في قلبي
خوه / ان شاءلله ربي ايهنيكم
حذيفة / ان شاءلله / هي ركبني عالكروسة بيش نطلع للجماعة برا
خوه / هي هي
فرحة حذيفة بإسراء نساته اللي صارله وان قعد عاجز
لأن فعلا العجز هو عجز القلب وحزنه هنا اللي ايخلن الشخص يفشل كليا ومش حيحس بطعمة الحياة حتى لو كل اللي جنبه من جميل ومت أفخم الحاجات
(أنا لا أحبٌّكِ أنتِ .. بَلْ أُحبُّ ما هو أكثر من ذلك ،
أُحبُّ وجودي .. الذي يتحققُ من خلالكِ."💛🌻 )
:
:
مرن الساعات علي حذيفة وإسراء وهما يرجو بس في اللحظة اللي بتجمعهم تحت سقف واحد بعد تعب ومعاناة كل هالسنين
وبعد مااجدد الأمل اللي فقدوه في كونهم ايكونو البعضهم ❤️
هلهم دارو الفرح مشترك وداروه الهم ليلة من أحلى الليالي
رغم إنهم كسرو عادة من عادات العيلة وتقاليدها الا انهم كانو فرحانيين باللي داروه لأن بسبب هالتقاليد كانو حيخسرو حذيفة 💔
وصلت إسراء للقاعة كانت طالعة جميلة مش بس بسبب المكياج وان ملامحهاا حلوة لاااا هي كانت ملامحها محلوة لأنها خذت حبيب قلبها كانت جميلة بإنتصارها هي وياه في الأخير ❤️
( بعد ساعة )
خش حذيفة للقاعة علي كروسته
وبسبب الفرحة اللي في عيونه والابتسامة المرسومة علي ملامحه
ونظرات الحب اللي ايشوف فيهن من بعيد الإسراء
ماحدش لاحظ الكروسة اللي عليها
الكل كانو مركزين علي فرحتهم ببعضهم وبس ❤️
إسراء ماراجتش ان يوصل فيها نزلت بفيلوها عليه طبستله ورفعلها طرحتها وباسها علي راسها قعدو تحت
ورقصو مع بعضهم وكانت فرحتهم واضحة في عيونهم ونظراتهم البعضهم ❤️
/
/
(الساعة 10 في مزرعة الحاج بدر )
تحديدا عند الحاج بدر
قاعد في داره امطلع صندوقه الحديد الخاص اللي ماحد يقدر يقربه حاطه قدامه وايشوفله ومتردد في فتحته
وبعد كم دقيقة مرن وهو ايبحت فيه قرب يده منه وافتحه بالمفتاح اللي في يده
وطلع منه رسائل جمال له 💔
كان جمال ايدز الباته في رسالة كل شهر
حتى بعد رجعته الليبيا وبعد قاطعوه مقاطعة نهائية كان ايدزله في الرسائل ماوقفهنش نهائي
بس غضب الحاج بدر عليه وزعلته منه خلنه يحتفظ بالرسائل من غير مايقراهن
كانن مجموعة كبيرة مالرسائل رسائل علي عدد شهور السنين اللي غابهن وكل رسالة كان جمال كاتب عليها تاريخها ويومها اللي دازها فيه
لأول مرة الحاج بدر ايحس بالذنب إن ماعطش روحه ولا فرصة ان يقرا كلام جمال
كان خايف ان الرسائل ايخلنه يضعف وايسامحه وعشان هكي مافكرش ولا مرة يقراهن
قلبه كان قاسي أقسى مالحجر وكل هالقساوة كان بس عشان يثبت قوته وجبروته قدام العيلة ويقعد هو كبيرهم
دمعن اعيونه أول مافتح اول رسالة كانت اول جملة فيها
(أبي الغالي وأمي الحبيبة )
أنا بخير هنا ماتنشغلو عليا لاني القيت روحي في المكان هذا
اكثر
نعرف أن أمي تبكي واجد لريافها علي وحتى نا رايفت عليها واجد ورايفت عليك ياباتي واجد رايفت علي نصايحك وعلي اتهديزتك السمحة ليا ونحن نشربو في الشاهي وامي احذانا اطيبلنا في خبزة التنور ورايفت حتى علي هزايبك
ورايفت علي خوتي ولعبنا للكارطة نحن وشباب العيلة
نا عارف انكم زعلانيين مني بس متأكد إن هالزعل مش حيطول الأيام اينسن واول ماانرد حنردو عيلة وحدة كيف قبل بإذن الله
ولدكم جمال اللي ايحبكم من جواجي قلبه من جوا ❤️
كمل قراية الرسالة ونزلن ادموعه بحرقة
ادموعه اللي طول الوقت داسهن لأن بالنسبة له ضعف وهو ماايحبش يضعف
كمل قراية الرسائل وهو متأثر وادموعه علي خده وقلبه واجعة
لأن ماكان متخيل إن يوم اللي بيقراهن بيقعد جمال ميت 🥺
(أصعب شيئ أنك تقرا كلام من شخص متوفي 💔)
/
/
وأخيرا جت اللحظة اللي يرجو فيها إسراء وحذيفة الهم زماااااااان
طلعو وزفوهم لعند حوشهم
ونزلو وخشو للحوش اللي كان كل شيئ فيه علي رغبة إسراء وكيف ماتبي
اول ماخشو قمعزت عالكنبة اللي في نص الصالة وحذيفة جا قدامها بكروسته
إسراء تنهدت / كنت فاقدة الأمل إني انخشله الحوش هذا ونا عروستك آخر فترة قعدت انفكر ان اكيدة حنجي فيه الزوجتك ضيفة وحنقعد انشوفله وانشوف الكل حاجة اخترتها وهي فيها وحدة غيري
حذيفة / كنت امعاهد روحي مافيش وحدة اتخشله غيرك
إسراء ابتسمت/ يعني ماكنتش تبي تجوز
حذيفة / لما صار اللي صار عاهدت روحي اني حنعيش طول عمري عازب
إسراء ابتسمت / بس اهو توا انا وانت مع بعضنا مانقدرش نوصفلك فرحتي اني خذيتك
حذيفة مسك ايديها وهو مبتسم/ ولا فرحتي بيك توا
بس نزل راسه وشاف الكراعه ويده المبتورات واختفت ابتسامته
حذيفة / بس خذيتي نص راجل الحياة حتكون
إسراء حطت يدها علي فمه / خذيت راجل وسيد الرجالة لو تحكي هكي مرة ثانية أنا حنزعل
حذيفة / خايفك تندمي
إسراء / نندم لو ماخذيتكش / خلاص خلينا عايشين فرحتنا والله ماصدقت اللحظة هذي جت وبعدين اسبوع بس وبنسافروا وحدير العملية واترد زي قبل وأحسن
حذيفة ابتسم / ربي ايخليك ليا وربي ايقدرني ونسعدك العمر كله
إسراء /وايقدرني ونسعدك ونقعدلك نعم الزوجة
حذيفة / كان عليك الوضوء خلينا انصلو ركعتين شكر لله
إسراء / هي
صلو إسراء وحذيفة ودعو ان ربي يسعدهم في حياتهم وايكملو العمر مع بعضهم براحة وهناء
وغيرو دبشهم وتعشو وعاشو احلى ليلة مع بعضهم زي كل العرسان ❤️
(لا نهاية للحُب ؛ الحُب الذي ينتهي ليس حُب من البداية♥️🔐🥀)
/
/
(في حوش عمي منعم )
كملت سهرية الأسبوع وكل الناس اللي كانو في حوش عمي منعم روحوا وماقعدش في الحوش إلا عيت عمي منعم وامعاهم عامرية وأبيلا
خشو عمي منعم ومحمد ومصعب للحوش بعد فضى مالصبايا
قمعز عمي منعم عند حوض النعناع وهو ايشوفله والدمعة حابسها في عينه 🥺
قمعزو احذاه محمد ومصعب وجت من جوا افطيمة وهي مستعجلة بتحكي اللي شافاته العمي منعم لان هذا وين تقابلت امعاه
بس اول ماشافاته عند حوض النعناع سكتت
عمي منعم تنهد /الحوض هذا كان فاضي وكل مرة انفكر انقول بنجيبله شتلتين نعناع ونزرعهن فيه وبعدها ننسى لعند في يوم جانا رجب جايب عمتكم نجاح وجابولنا قهوة وشربناها نا وياه هنا وسألني ليش الحوض هذا بذات فاضي وقتله كل مرة بنجيبله شتلتين نعناع ننسى فيهن كمل فنجال قهوته امعاي وطلع مني
وروح عالمغرب بياخذ نجاح وجا جايبلي في يدة شتلتين النعناع وزرعهن ليا بيده فيه ولما جا بيطلع طلعت فلوس بنعطيه حقهن حلف عليهن وقالي خليه هدية مني ولما يطلع النعناع كل مااتشوفه اذكرني بيه
عمي منعم دمعته نزلت ومسحها دغري / كلامه عالنعناع كأن كان حاس إن بيموت 💔
محمد / كان انسان طيب والله ماعمره حسينا إن مش ولد عمتنا
عمي منعم بحزن / نجاح كانت تزعل لما انقولولها وهو اصغير مش ولدك اتقول هو ولد كبدي صح ماجبته لكن نا اللي ربيته كانت ديما اتقول لو اتصيرله حاجة انموت بعده وسبحان حكمة ربي ماقدرتش اتحمل فراقه ولحقاته 💔
افطيمة / عظم الله اجرك وربي ان شاءلله يرحمهم والله نجاح تريحت لو عاشت بعده راه قعدت طول عمرها مقهورة
عمي منعم / عارفها / ربي يجعلهم من أهل الجنة ويجمعنا بيهم في الفردوس الأعلى
الكل / اللهم أمين
افطيمة / منعم كان اتخش امعايا جوا نبيك في موضوع مهم
مصعب يضحك / وين ياحاجة قدامنا هكي معش فيه حشم
افطيمة بعصبية / مصعب اسكت را خيرلك
مصعب / لا شكله الموضوع خطير خلوني انخش جوا خير مااديرو تحديد الكل 🤣
وخش مصعب ومحمد سحب روحه بشويش وخش ورا مصعب
عمي منعم / شن فيه ان شاءلله خير
افطيمة قمعزت احذاه / الموضوع ايخص هانيبال
عمي منعم / خير ان شاءلله شن داير
افطيمة حكتله اللي صار كله
عمي منعم الموضوع عصبه بكككل 😡
عمي منعم بعصبية / معقولة هكي هانيبال اللي ايخاف ربي ايدير هكي شن عقب للناس الصياع اللي مااتخاف ربي
افطيمة / نا من جيتها قتلك قعدتها غلط لبسها وحركاتها حدير فتنة وانت عندك شباب قتلي اعيالي يعرفو ربي ومش حيديرو شيئ غلط
عمي منعم بعصبية / كنت نحساب روحي مربيهم اكويس مش خاطرة في بالي ايصير هكي ومن هانيبال اخرى اللي ماعمره رفع وجه في وحدة
عمي منعم / استغفر الله العظيم استغفر الله العظيم / هو وين توا
افطيمة / ماعاد شفته من هذك اليوم
عمي منعم / بس امبدري كان برا في الخيمة مع الرجالة
افطيمة / نا سألت عليه محمد قالي ان ايبات عند واحد صاحبه له كم يوم شكله مش قادر ايجي وايحط وجه في وجي بعد اللي صار
عمي منعم بعصبية / غير ايجي والله احسابه امعايا عسير 😡
عمي منعم بشويش / بس هو رايدها بالحلال قال يبي يجوزها الكلام هذا صار اليوم اللي قبل ميتت حياة رجب
افطيمة بعصبية / معقولة انت اتوافق وحدة زيها تقعد كنتك شوف لبسها وشكلها وديانتها راعي مش مسلمة
عمي منعم / هذينا كلهم مش مهم البنت تبي تسلم وبالعكس نحن ناخذو اجرها القصة كلها في ان حتى مصعب يبيها ويبي يجوزها
افطيمة بصدمة وعصبية / شنووووو لا وحق الله البنت هذي يانا ياهي في هالحوش
علي طلعت أبيلا عليهم
أبيلا / أسفة اني كنت نسمع فيكم بس مافيش داهي ان ايصير هذا كله بسبيي أنا اساسا لا نبي مصهب ولا نبي هانيبال
أنا من بكرا نبيك اتشيلني الهوش جدي طالما أنا كاهدة هنا يبقى نقهد امهاهم هما أفضل ومهما كان هذي هيلتي
أنا جهزت شنطتي وياريت ياعمي منهم بكرا مالصبح اتشيلني الهم لان أنا مش هارفة مكانهم
وماراجتش حتى عمي منعم يحكي او افطيمة تعزقلها كلمة تقهرها خشت وخلتهم مع بعضهم
(أبيلا 💔)
/
/
(في مزرعة الحاج بدر )
أم بدر / عيسى ياعيسى
عيسى خش عليها من المربوعة
عيسى/ كنك شن فيه عليش صوتك عالي
أم بدر / عمي من بدري خاش الداره ومعش طلع ودقيت عليه ماردش عليا تحشمت انخش عليه خش شوفه راه تقعد صايرتله حاجة
عيسى / بالك راقد انتي عارفة باتي يرقد بدري
ام بدر / عارفته بس لو راقد راه لما دقيت فطنلي انت عارف باتك وكيف نومه خفيف واصلا هو مش عاجبني وضعه من لما قاللكم عدو ردو عمتي وهي مابتش
عيسى / خوفتيني عليه توا انخش انشوفه
فتح عيسى الباب وكان الحاج بدر طايح عالسرير وقدامه اوراق وفي يده ورقة
عيسى بخوف قرب منه بسرعة قعد ايحاول ايوعيه ايحاول ايحركه بس الحاج بدر مافيش ولا حركة 💔
#يتبع
أسفة عالتأخير وأسفة لو فيه لخبطة في الأسماء وأكيد رأيكن ايهمني 😉
گـتـابـتـي @Koka Saleh