اعقل مجنون

البارت الحادي عشر( الاخير)

أولئك الذين نراهم يرقصون يظنهم الذين لا يستطيعون سماع الموسيقى مجانين.

___________________

من بدأ يحجي حياته هو وصغير لحدما وصل لمرحلة معينة ،،
مر بمراحل الفصول الاربعة مرة يضحك ومرة عصبي ، ضرب الكرسي أكثر من مرة ، صرخ صرخات مفزوعة ،

ادهم دموعه نزلت ما سيطر عليها ، بس من وصل بالكلام للدكتور النفسي اللي علمه تفاصيل الجريمة وشلون يتهرب ويخلص منها ، جدحت عيونه وطلع منها نار ، كتشبيه ، شفت فهد المتمرد ، فهد المجرم ..

ادهم وجه سؤال أخير لفهد حتى نختم جلسة اليوم ونرجع للبيت ونستأنف الحديث بوقت لاحق.

أدهم : احجيلي شلون علمك تفاصيل الجريمة ؟ وخلاك تقتل ٣ اشخاص بدم بارد حتى لو كان عندك ثأر بايت وياهم مستحيل النفس تتجرأ على القتل بصورة بشعة اذا ماكنت مسويها مسبقاً...

فهد : كلتلك اخر شي فكرت بيه كلت لازم اقتلهم حتى ارتاح ومن قتلتهم فعلاً ارتاحيت..

أدهم : ممكن اسمع منك الحديث الدار بينكم..

فهد : تفاصيل مهمة هاي شلون تريدني احجيها..

أدهم : احجيلي يافهد اريد اوصل لشغلة معينة وكلش راح تفيدني بالعلاج..

فهد : ادهم انه ما راح اتعالج اعرف بنفسي.

ادهم : احجيلي وانه اقرر بس كمل خليني اسمع.

التفت ناحيتي جر نفس وكال مأشر علية

فهد : ففتي تعبت خليها وقت ثاني.

ادهم : لا ما تعبت جان كالت وهاي اخر مرة تجيبها وياك لان عندي اسئلة الك مارايدها تسمعها..

فهد : انه وفف ما بيناتنا اسرار..

ادهم : والاسرار بين المريض والدكتور ممنوع تطلع لأحد ثاني.

فهد : انت الغريب وففة دكتورتي..

ادهم : هيج صارت فهد ؟

فهد : لك جابتني من العراق لهنا وتريدني اكول لا شيخلصني بالليل.

ادهم : يعني خوف قصدك ؟

فهد : لا مو خوف ممكن نعتبره مجاملة.

ادهم : يلا يابه نعتبرها مجاملة بس كمل.

فهد : ادخن ؟

ادهم : دخن واحجي ماعندي اشكال.

فهد : شبيك بس تريد تخلص.

ادهم : فهد البنات وحدهم بالبيت واليوم ضيغم يتأخر واريد اجيب مسواك سيلين وصتني على شغلات اذا نسيت شي ترجعني بسببك.

فهد : حكمهن حكم بنات وضاح.

ادهم : شعبالك يابه كلشي ولا زعلهن..

فهد : اي وربي..

ادهم : ممكن نكمل يا اخوية العزيز؟

فهد : ممكن دكتور.

ادهم : تفضل.

فهد : زاد فضلك والله شبعان قبل شوية متغدي اذا اكو جاي عادي اشرب.

ادهم : فهد جاي ماكو هنا لا تسمع نرجع واشرب براحتك.

فهد : يلا هذا هو نفوت بالموضوع ، اسمع يابه من يوم اللي رحت بيه للدكتور وحجيتله الصار طبعا هو يكبرني ب ٤ سنوات بس لهذا صارت ألفة بيننا مو طبيعية.

ادهم : اي

فهد : نفس العقل .

ادهم : همم

فهد : تفكير واحد

ادهم : حلو

فهد : نوايا وحدة.

ادهم : وبلش التخطيط.

فهد : بالضبط.

ادهم : شلون أمن بيك ؟

فهد : سالفة طويلة كلش.

ادهم : اسمعها بعدين بس كولي شلون ساعدك..

فهد : شوف هو جان محارب من الدكاترة ويريدون يطلعوه من المكان لان كاشف ارواقه الهم عكس دكتور شاهين من جوة ليجوة جان يشتغل..

ادهم : اي دوم المسكين مأكول حقه.

فهد : اي مثلي ..

ادهم : الله يعين العراق عليكم كمل بوية كمل.

فهد : من حاربوه انه هواي ساعدته جان يحجيلي ونخطط سوى شلون يتخلص منهم واحد ورة الثاني.

ادهم : وبلشتوا تصفون الكفائات بالمصح.

فهد : ولا واحد كفوء طلعوا بس الحمارة.

ادهم : جيد كمل .

كعدت مقابيله وبديت افهمه وكان الحديث كالاتي...

فهد : اكو خمس طرق نكتب بيها الرسائل بدون ما يفهمها احد ، مثلا نستخدم كلمة سر هزلية تعبر عن جانب السخرية ، واستخدمنا شيفرة قيصر هذه اسهل واقرب للحروف العربية بالنسبة الية..

_ وهاي شلون يافهد فهمني.

فهد : يوليوس قيصر أول من استخدمها، قديما، وهي وسيلة لتشفير النصوص، تعد خوارزمية التشفير الخاصة بها من أبسط الخوارزميات بالنسبة للشفرات الأخرى، حيث يقوم المرء بتبديل الحرف المراد تشفيره بالحرف الثالث الذي يليه، أي إذا أردت تشفير حرف "أ" يجب عليك تبديله بحرف الثاء، وعادة ما تُستخدم معادلة رياضية كمفتاح لفك الشفرة ...

_ حلوو كمل..

فهد : إذا ردت تكتب "أنا سعيد" بشفرة قيصر، لازم تعيد توزيع الحروف الأبجدية العربية، وتستخدم الحرف الثالث لكل حرف ردت تشفره، لتنتهي جملة "أنا سعيد" بهذا الشكل في شفرة قيصر "ثيث ضقتز"..

_ لنفرض فرضاً اجى واحد يفوقنا بالدهاء وعرف الطريقة ، عندك طريقة ثانية نبدلها بيها..

فهد : اي عندك شفرة ديغراف هذه أكثرهم صعوبة واحتياج للتركيز، لأنك تلعب بالحروف أكثر من أنك تفك شفرة...

_ شلون يعني فهد فريت عقلي فر انت..

فهد : تكدر تلعب بالحروف طبقاً لقواعد وقوانين الشفرة، تُحدد لك الشفرة ما إن كنت تتعامل مع حرفين في نفس الصف، أو في نفس العمود أو ليسوا في نفس الصف ولا في نفس العمود كل على حسب الجدول الذي ملأته بالحروف، وعليه تختلف القواعد في كل حالة.

_ هذا هو اعتبره تم، بس فهد شنو معنى هذا الرمز ؟ ليش حافرة بالحايط وحتى بالملف الشخصي مالتك موجود..

فهد : هذا الرمز سبب وجودي هنا ، وسبب خسارتي لزوجتي وابني..

_ لا تحجي ولا تتذكر خليك منه هسه ، بس انت منتبه كل واحد من المرضى مسوي فد رمز معين او كلمة خاصة بيه وحتى مرات نشوفهم كاتبين عبارات غريبة.

فهد : مثل كلكم مجانين لا احد يفهمني.

_ انتم المرضى وليس انا..

فهد : الا لعنة الله على الظالمين..

_ ربي اني مسني الضر وانت ارحم الراحمين..

فهد : تخيل انك تعيش في مكان لا احد يصدقك فيه ، تخيل انك ما تفرق عندهم اذا كلت اني صاحي مو مريض ..

_ هذا المكان هو الجحيم.

فهد : كنت بخير لولا تدخلهم ..

_ هنا تنتهي حياتك...

فهد : كابوس اليقضة هذا المكان..

_ الخوف من المستقبل..

فهد : الممكن المجهول..

_ الطارق لا يعلم من بداخل المكان.

فهد : جرائم صغيرة تبدأ بخطوة من هذا المكان..

_ نرجع للجريمة شلون تريد اساعدك؟

فهد : تنطيني مبرر لكل افعالي اللي اسويها.

_ تتظاهر بالجنون ، اولا ، ثنين تتوظف بمكان يحميك من الدولة ، بمعنى تصير الدولة نفسها..

فهد : قصدك ادخل للسلك العكسري.

_ بالضبط

فهد : والله الصراحة ، الرغبة موجودة والدافع موجود بس شلون افوت لهيج مكان واوصل مراحل عالية ما اعرف ..

_ هسه الوضع مخربط بالعراق ومحتاجين للجيش بقوة واذا قدمت راح تنقبل حتى بدون شهادة اهم شي تسد الشرخ الصار عندهم.

فهد : صحيح بس ما اريد اصير جندي عادي اريد منصب.

_ هذا لازم عندك واسطة جبيرة كبل يخلوك بالمكان اللي تريده.

فهد : ضابط تحقيق مثلاً؟

_ وووو كلش حلو وهذا راح يسهل كل امورك..

فهد : شلون اكدر اقتل بدم بارد بدون ما يوجعني ضميري.

_ تخيل الموقف المريت بيه وراح تنفذ عليهم بكل سهولة.

مد ايده وضربنا كف بكف وكلت.

فهد : متفقين..

بعدها مثلت الشفاء ، شنو يطلبون مني اسويه ، صرت مطيع بشكل ، استخدموني ضد صديقي الدكتور اجيبلهم معلومات عنه ، وبالشفرات اتفقنا اني وياه شنو انطيهم وشنو ما انطي معلومات عنه، والنتيجة اني طلعت من المصح ، بشهادة اطباء مختومة بصحة عقلي وشفائي التام وبنفس الوقت الدكتور ترفع وتغير مكانه للأحسن..

طلعت لكيت الدنيا محتركة ، لا الحال نفس الحال ولا الناس مثلما عفتهم ، النفسيات متغيرة والخلك ضيق ، اخوية مو نفسه ابوية بزعان مني وامي كذلك، دخلت للبيت شفت بنية سبحان اللي خالقها ومصورها ، جمال وروح حلوة ، ضحكت من شفتها هالكد ما شكلها مريح ، شمرت جنطتي بالكاع وسلمت جانت بوقتها تسوي سمج ، ردتلي الابتسامة وهمست بصوت ناعم..

ياسة : انت فهد صح ؟

عكدت حاجبي متسائل هاي طلعت تعرفني ، اني تصورت وحدة من صديقات نرمان وجاية لبيتنا ابد ما تصورتها بيوم هذه زوجتك..

فهد : اي صح وياج فهد يوسف عمران، انتِ منو ؟ اول مرة اشوفج.

ياسة : بس اني شايفتك كلش هواي ؟

عكدت حاجبي مستغرب.

فهد : اني شايفتني؟

ياسة : اي شايفتك ..

فهد : وين شايفتني وانتِ منو ؟

ياسة : اني جوارينكم بيت ابو سيلين ، وهسه صرت زوجة اخوك..

ضحكت..

فهد : بس ايمن صغير وينه وين الزواج وبعدين شوكت تزوج واخوه بيته مهجوم وبالمصح؟

ياسة : تصحيح للمعلومة اني زوجة أخوك الكبير ادهم.

من كالت هيج انضربت على راسي ضربة قاضية جانت، نترت بيها ودخلت جوة ، من يومها كعدتلها فد كعدة صرت افتعل المشاكل وياها خليت امي ما تطيقها ولا تطيق سيرتها وابوك كذلك ، صارت وياها مشاكل هواي ادت الى مرضها ، هنا شوية انسحبت كلت هي مو ذنبها هيج يصير بيها بالاخص من عرفت بيها حامل ، مو شعور بالذنب ولا احساس بالندم ، مجرد شي حسيته وحبيت اطبقه..

بعدها سمعت بالتفاصيل شلون انت رجعت وشلون تم الطلاق وعلى شنو اتفقتوا ، وهنا زاد حقدي عليك بالاكثر خصوصا من خابرتك وطلبت منك ترجع تحل مشكلتي وعاتبتك شلون تتزوج واني حياتي متهدمة ، بوقتها بررت وحجيت بس ماجنت اسمعك اريد اسمع الصوت اللي براسي اريدك تحجي اللي اريده انه..

وبعد فترة انت قررت تطلعهم من البصرة لبغداد وهي قررت تاخذ بنات اخوها ، وكمل كلشي ايمن اخذهم وراح لبغداد..

وتعرف باقي السالفة كلها من لما اجيت انه لحدما رجعتلك سيلين او بالاصح انت رجعتها..

ادهم : شلون دخلت للسلك العسكري وشلون نفذت عملية القتل؟

فهد : هاا هاي سالفتها سالفة بيوم رحت سكرت ، ونمت يم دولار كعدت بنصف الليل وطلبت منها شغلتين ..

دولار : شنو الشغلتين اللي تريدهم مني يا ابو علي ؟

فهد : اريدج تساعديني كولي تم..

دولار : اوك بس بشنو؟

فهد :انتقم منهم كلهم.

دولار : هجان هم ؟

فهد : اي هذا اول واحد..

دولار : وشلون ؟

فهد : اول خطوة اريد افوت للجيش..

دولار : هاي سهلة خليها علية ...

فهد : والشغلة الثانية تساعديني اعرف اخبار عن رواية ومكانها لان جزعت وانه ادور عنها ومالكيتلها اثر لا هي ولا ابني.

دولار : شغلة صعبة هاي خصوصاً ابوها تعرف مكانته ومنصبه مو ياهو الجان يكدر يوصللهم..

فهد : نفكرلها ونخطط ونوصل ان شاءالله.

دولار : تتدلل بكل خطوة اني وياك..

فهد : دولار ؟

دولار : نعم عيوني..

فهد : بيوم تبيعيني وتغدرين بية؟

دولار : ابيع الدنيا وما ابيعك..

فهد : كفو يابه..

ومن يومها صارت دولار ذراعي اليمين وبالف رجال وكفاتها ما تنسي ، اي شي اريده ارجعلها ، بعلاقاتها دخلت للسلك العسكري وترفعت ويوم بعد يوم صعدت لحدما وصلت مرحلة سيطرت ولزمت زمام الأمور بيدي،

والداير مدايري واثقين بية ثقة عمياء وانه العكس بعمري ما وثقت بواحد بيهم ، رحت للمنطقة القديمة اللي يسكنها عواد وجماعته ، خليت واحد يراقبهم اسبوع وكل تحركاتهم صارت يمي ، واخذتهم بسيارة وصار اللي صار ..

ادهم : احد ساعدك ؟

فهد : صديقي الدكتور.

ادهم : نفسه اللي علمك على الجريمة.

هز راسه فهد ب اي.

ادهم : وشلون وصل يمك؟

فهد : مو كلتلك ترك المصح وصار بمكان ارقى..

ادهم : قصدك صار بالدولة؟

فهد : بالضبط.

ادهم : بس يافهد كل اللي حجيته ما يبرر جريمة القتل ، هذه نفس وغلط اللي سويته ابد مو وياك بهذا التصرف المفروض تترك الدولة تتكفل بعقابهم لو رب العالمين..

فهد : وانه الدولة..

بعدين رفع ايده مستهزء كال..

فهد : نقرالهم الفاتحة ، بسم الله الرحمن الرحيم..

غمض عينه خاشع وبعدين مسح وجهه.

فهد : الصار صار ولا على المجنون حرج..

ادهم : رواية شلون وصلت الها وبعدين غيرت رقمها ؟

فهد : عن طريق دولار راحت سوت علاقة وية عمك هاشم وهو مات بيها ، وبيوم بالليل جان نايم فتحت موبايله وجابت الرقم..

ادهم : شنو جان نوع التهديد المبطن يافهد ؟

فهد : ما هددتها تهديد صريح مجرد بعثت رسالة كتبت بيها..
( كـن مستعدا لتحـارب الذين حاربـت من أجلهـم )

ادهم : شنو جاوبتك هي ؟

فهد : بعبارة ثانية مال مثقفين كتبت.

(حين تفتقدني لا تتعب نفسك بالبحث عني فقط إسأل ضميرك ماذا فعل بي)

ادهم : لعد شلون عمي كال هددها فهد ..

فهد : كذاب جان استخدمه دليل ضدي ، بس عرفت شلون ابث الرعب بنفوسهم.

ادهم : نرجع للبيت شنو رأيك ؟

فهد : تعبت والله ياريت..

طلعنا من العيادة والهم تارس كلبي ، ما اعرف ليش ماحسيت براحة من حجى ، انتبه علية اجى يمي اخذ كف ايدي حضنه بكفه وخلاه على قلبه تقرب مني همس..

فهد : تلاگينه بحلم ضايع تشابك ايدنه بفرحة لهفتي ولهفة المجنون تشرح حالي وتوضحه..

ابتسمت ابتسامة كاذبة وهمست..

ايفين : مو تعبان صح ؟

فهد : كلشي لعيونج يهون بس اريدج تغفريلي الصار.

ايفين : نسيت كلشي بس ارجعلي مثل قبل..

فهد : مثل قبل متأكدة ؟

ايفين : لا فهد مو هيج قصدي الايام اللي عشناها مرتاحين بوقت ولادة حمودي وبعدها شوية هدأت علاقتنا.

فهد : راح اصير احسن وعد ..

ايفين : يارب ان شاءالله ، فهد سؤال جاوبني عليه بصراحة..

فهد : كولي ..

ايفين : منوصارت صديقتي بوقت زواج سيلين وخليتني أأمن بيها وافتح كام وياها ، دولار مو ؟

هز راسه ب اي ومشى كدامي متجاهل الخوض بالموضوع وتفاصيله...

بعدها صعدنا بالسيارة وصلنا لمكان التفت فهد على ادهم ..

فهد : نزلني هنا واكتبلي بورقة اذا ردت ارجع للمكان شنو ابلغ ابو التكسي.

ادهم : شعندك نازل امشي للبيت بعدين نطلع..

فهد : مخنوك وداعتك اريد اشتم هوى وبعدين ارجع.

ادهم : ماشي براحتك.

صف السيارة وطلع ورقة كتب بيها العنوان ونطاه لفهد ، الاخير نزل بعدما سلم ، وطلب مني اصعد يم عمو ليكدام ، نزلت وصعدت بمكانه وانطلقنا ظليت اباوع عليه بالمرايا الصفح شلون واكف يباوعلنا تنهدت ودموعي نزلت همس عمو.

ادهم : تحبيه؟

التفتت عليه.

ايفين : لفهد ؟

ادهم : اي

ايفين : مرات احبه ومرات اكرها مرات اعطف عليه ومرات احقد مشاعري مو سوى حسب المواقف والتصرفات اللي تبدر منه.

ادهم : ايفين راح اكولج شغلة بيني وبينج ما اريدها تطلع لبشر ..

ايفين : طبعا عمو اكيد ما تطلع ..

ادهم : لا سيلين ولا ملاك ولا نرمان ولا فهد..

ايفين : اي اي شنو عمو ظل بالي.

ادهم : للأسف بعد اللي سمعته اليوم ، فهد ما اله علاج نهائي بس راح اجبره يظل هنا وما يرجع بعد ، ندير بالنا عليه ونخلي كدام عيوننا ، ونراقبه ما ياخذ علاجات بكيفه ولا حبوب ولا غيرها وانتِ اذا شفتي اي نوع علاج دزيلي صورته حتى لو كال هذا مال وجع راس.

ايفين : عمو احبطتني والحل يظل فهد هيج ؟

ادهم : ان شاءالله يتحسن بمعاملتنا اله وبضغط قوانين هاي الدولة راح يمشي عدل ، بس مال يتعالج مستحيل ، وانه وانتِ نتفق على شي ، اذا راد يرجع للعراق ممنوع توافقين كوليله انه ما ارجع للعراق ماعندي احد بيه ، اختي هنا عمو هنا وانت وابني ليش راجعين ، بضغط مني ومنج راح يوافق نتحمل تكسيره صياحه وعصبيته بس بالاخير راح يرضخ للأمر الواقع .

ايفين : قهرتني ياعمو جان عندي أمل.

ادهم : للأسف لا ماكو امل لو بداية عمره ١٥ ١٦ كان ممكن اعالجه بس بعدما عبر الاربعين جدا صعب وشبه مستحيل.

ايفين : الله يشافيه ماكو مستحيل يم رب العالمين.

ادهم : ونعم بالله بس هم مؤشر جيد تعاطفه وياج وتفاعله ويه الحدث اللي يحجيه.

ايفين : صحيح انتبهت عليه ماجان هيج قبل.

ادهم : نأمل خير ان شاءالله وبعدنا بالبداية نمشي بالعلاج ونشوف لابد يتطور العلم ونلكى طريقة نعالجه بيها..

ايفين : الله كريم.

ادهم : ونعم بالله يله يابه ننزل لان وصلنا..

ايفين : تمام ، عاشت ايدك يا اطيب عم بالدنيا

ادهم : ماسويت غير واجبي وهذا اخوية.

ايفين : صحيح بس مع ذلك شكرا.

ادهم : عفوا يابه

ايفين : عمو اريد منك شغلة اخيرة ..

ادهم : عيوني الج كولي.

ايفين : اريد فهد يشتغل وياك حتى يلتهي ويغير فكره من الاجرام والسلك العكسري بشي مفيد.

ادهم : موافق وبكل ممنونية ..

ايفين : شكرا عمنا الغالي.

ادهم : ما احب الشكر يله نزلي.

حسيت بشعور الراحة ، نزلنا ودخلنا للبيت لكيت ضيغم متمدد والجهال يكمزون فوك راسه ، ادلم وحمودي و وتين شافنه كال..

ضيغم : صدك جذب وين رحتوا وعفتولي القرودة..

ادهم : ليش وين امهاتهم؟

ضيغم : حلوو على اساس ما تدري سيلين وملاك هيج وقت وين يرحن.

ادهم : لا تكول للسوك؟

ضيغم : كالن ساعة ونرجع وهاي صارلهن ٤ ساعات..

ادهم : يعني من طلعنا ورانه طالعين؟

ضيغم : بالضبط وصرت الدادي مال جهالكم..

ادهم : يله الاجر على كد المشقة.

ضيغم : تعال اخذ بنتك وتحمل الأجر لو اكولك اخذ ابني هم عاجبني انام ساعة.

ادهم : شوف الاستغلالي ولك وين جنت انه قابل كاعد اتونس.

ضيغم : ولكم مضطهد انه وداعة ابني مضطهد..

ادهم : اهوو راح يبجي.

ضيغم : وبعدين شنو سويت كابلت فهد وحجالك قصة حياته اللي يعيد ويزيد بيها ..

ادهم : مو انت ماعندك احساس انه اتفاعل وياه بكل مشاعري.

ضيغم : من هذا الشيب تارس راسك ولك بطل طيبة وحنية مو راح تموت.

ادهم : اموت في سبيل اهلي ولا اعيش خاين العشرة

ضيغم : هاي لان ردت انام ساعة طلعت خاين العشرة ، هاك قرودتكم واللي يكعدني يا ويله اردحله ردح..

ادهم : على يا انغام؟

كام شمر الكوشة متوجه لغرفته ناطينه ظهره كال..

ضيغم : انغامي .

بعدها اصريت على عمو يصعد يرتاح واني اظل يم الاطفال ، طلب مني اغير ملابسي واغسل وهو يظل يمهم بعدها هو يصعد واني اخلي عيني عليهم ، وهذا الصار بالفعل ..

كملت ونزلت يمهم ربع ساعة واجوي البنات ، جايبيلي ملابس وعطور ومكياج وشغلات كلش حلوة فرحتني.

ايفين : هاي علمودي رايحين للسوك ؟

سيلين : اي هاي فكرة ملوكة..

ايفين : فدوة لعينها شكرا حبايبي.

ملاك : ماكو شكر بين الاخوات.

سيلين : شنو صار احجيلنا

جريت نفس وحجيتلهم الصار بالمختصر ، ملاك جانت كاعدة تستمع بعدين همست.

ملاك : اني مستغربة شلون جنتي عايشة وياه طبيعي وفهد وحش معروف بالعشيرة كلها.

ايفين : بالبداية ما جان خالني بباله بس اني دست على الجني وبعدها صحت بسم الله.

ملاك : شلون يعني ما فهمت.

ايفين : اول مرة اجى بيها اني انعجبت بيه بصورة مو طبيعية شكله حلو شخصيته تجنن اسلوبه هزلي واني بصراحة احب هيج نوع من الشخصيات ، كمت اكعد بالمكان اللي يكعد بيه ، من يحجي اشارك واناقش بس ماجان معبرني ابد ، جان معجب بسيلين بشكل سري  على اساس محد يعرف بس جان مفضوح بتصرفاته ، وكل يوم يجيب خطابة شكل علينا حتى يفتح الموضوع وية عمو ادهم والاخير جان مغلس تماما..

بيوم صار موقف خلاني شوية احقد عليه وبنفس الوقت احس على نفسي..

مرة جانوا واكفين هو وايمن يسولفون بالحديقة واني جنت استمع الهم ، هنا جان ايمن معجب بية ويلمح بس ابد ما خليته ابالي كل همي وهدفي شلون اجيب فهد .

فهد يحجي ويه ايمن يكوله

فهد : اذا واحد خطب وحدة مصرفها عليه لو على ابوها؟

ايمن : وليش تسأل شنو تريد تخطب ؟

فهد : لا هذا صديقي تراهنت وياه اكوله انت تصرف يكولي لا شعلية ابوها يصرف عليها..

اني جنت معجبة بيه بشكل مو طبيعي من كال ابوها يصرف عليها اني كلت بصوت مسموع خلاهم يلتفتون علية..

ايفين : ابوها يابعد ابوها انت.

فهد رفع حاجبه وغمزلي ، التفت لأيمن يهز ايده.

فهد : شبيها هاي؟

ايمن : ايفين طبي جوة شطلعج.

فهد : تتلصلص عاجبها بنت ******

ايمن :  لتفشر ابن الاوادم..

فهد : شوفها واكفة تتنسط علينا..

عاط ايمن بصوت..

ايمن : فوتي عاد..

دخلت ومنها ظليت افكر شلون اجذب نظره وليش ما يريدني شنو ناقصني اني احلى من سيلين واجمل من البنات اللي بعشيرتهم ، فكرت عنده حبيبة بعدين كلت لو عنده ليش حاط عينه على سيلين ، قنعت نفسي انو هو ابو نسوان ، وصار عندي دافع افوت غرفته واقتحم خصوصياته وبالفعل هيج سويت ، الماحسبت حسابه هو ذكائه مادريت مركب كاميرات بغرفته الا بعدما دخلت وفتشت وللأسف ما لكيت شي ، وما حصلت غير التهديد والوعيد ..

بيوم دخلتلي بنية على الفيس طلبت صداقتي اني جنت اوافق على كل من هب ودب واحب اكون علاقات على الرغم من تحذير سيلين المستمر الية ونصائح وتوجيهات عمو ادهم ، وللأسف جنت اضربها بعرض الحائط ،...

الزاد تمردي على نفسي ، حريتي اللي حصلتها بعد زواج سيلين الأول ، وابتعاد عمو ادهم بأنشغاله بحبه اللي ضاع وتفكيره المستمر بسبب تغيير سيلين المفاجئ من ناحيته..

كل هذه النقاط ساعدت فهد بالسيطرة علية وبلش يجمع عني معلومات لان اني جنت كتاب مفتوح واحجي عن حياتي هواي لهذه البنية اللي دزها الية واليوم اكشتفت هي نفسها دولار..

صارت ادلة هواي ضدي ، خوفي زاد ، تهديداته جانت واضحة وصريحة ، خفت منه وكرهته ، هنا بديت اميل لأيمن اكثر بالاخص من وعدني بزواج وفاتحني بموضوع حبه واعجابه بية ..

فكرت ايمن حباب ومتفهم وراح يتقبلني بعيوبي بس ما حسبت حساب لطبعه الصعب ونحوسيته بهذه الشغلة بالذات الا لما فهد كعد يحجيلي ويوصف ردة فعل اخوه اذا عرف زوجته مو بنت بيوت ، وفاقدة جزء من عذريتها ، ما صدكت بيه وظليت مستمرة وية ايمن ..

بعدها اخذني لمكان تعرف بيه سيلين واكيد انتِ هم سمعتي بيه.

ملاك : اي صحيح اتذكر هيج حادثة صارت.

ايفين : هناك شفت انواع الترهيب والتعذيب وكلشي يخطر ببالج شفته بس بدون ما يترك اي اثر علية ، غير الوشم اللي دزه لأخوانه مثل الرسالة خلاهم يفتهمون اللي صار بدون جهد منه..

علمني كم شغلة من لغة الجسد وشلون امثل على عمو ادهم لان يكشفني بكل الاحوال ، من شافني خايفة ويمكن افشل والمهمة تضيع منه ، نطاني كبسول اخذه يهبط الضغط عندي ويصير مثل الاغماء بهيج حالة عمو ادهم ماراح يلح علية بالسؤال واذا سواها سيلين راح تمنعه.

واستخدمني اداة حارب بيها عمو واختي

ما جنت اقبل وجان يذكرني بالراح يسويه ، صورني بأبشع حالاتي ، وماجان يرفله جفن اذا راد يأذيني ، ظالم بشكل..

ومن علن زواجنا وصرنا بغرفة وحدة جنا ننام على نفس السرير بس هو بجهة واني بجهة..

ومرة دخل علية يبجي شايف ولد وابوه يشتريله ملابس ، كعد بالكاع يوصفلي شعوره شلون حس وشلون كلبه وجعه ، خصوصا هو ما يعرف ابنه سمين لو ضعيف لو طويل لو قصير وحتى ملامحه ما يعرفها..

بيومها طبطبت عليه ونيمته بحضني وبعدها تمت العلاقة بيننا...

قضيناها بين التقبل والنفور ، بين العذاب والاعتذار الى ان وصلت مرحلة بديت افكر شلون اروض هذا الوحش واغيره بدون مساعدة احد..

لجئت لليوتيوب وشفت هواي فديوات من ضمنهن دكتور وجه نصيحة انو هذا الانسان يكسر قلبه الطفل فقط وخصوصا اذا جان من دمه ، منا بلشت ما اخذ منع حمل وقررت اسوي طفل وصار ، بيومها تتذكر سيلين شنو صار جانت موجودة وراد يخليني اجهض غصب عني بس صار الحمدلله و ولدت على خير بعدها جر عدل وصار زين نوعا ما المهم محد يأذيه...

وهذا الصار كله..

ملاك : حرب هاي مو عيشة.

ايفين : دمار جنت انام وخايفة منه لا تجيه الحالة ويموتني ونادراً يغمضلي جفن مرتاحة..

ملاك : القادم افضل بحيل الله.

ايفين : اتأمل هذا الشي بوجود عمو وبركة رب العالمين.

سيلين : ايفين رجعي صلي حرامات هيج تتركين كل مرة.

ايفين : لا راح ارجع وعدت نفسي ما اقطعها بعد..

سيلين : يلا نبلش بالعشا ؟

ملاك : اي هم يلا الولد جاعوا من زمان تغدينا..

دخلنا للمطبخ وبلشنا نسوي عشا بعدين ضيغم صاح على ملاك راحتله وسيلين استغلت الوضع سألتني عن هجان ونرمان..

سيلين : كل مرة اريد اسألج وانسى ..

ايفين : شنو كولي ؟

سيلين : هجان ونرمان شلون اجوي سوية لبيت عمو يوسف الاعرفه جانت بس نرمان تروحلهم وهو حتى ما يسلم.

ايفين : بسبب علاوي بيوم النتائج الصبح اجوي..

سيلين : اي احجيلي.

ايفين : الكل مخبوص بالنتيجة مال علي وكاعدين على نار ، الصبح اندكت الباب راح عمي فتحها باوعت من الشباك نرمان وزوجها استغربت اول مرة يجوون بعد رجوعهم من السفر ، تلكيناهم وسألهم عمو اذا متريكين او لا جاوبه هجان..

هجان : اي عمي متريك بس نرمان ما اكلت..

بعدها دخلوا سويتلهم ريوك تريكت ويانا نرمان ، وبعدين اجتمعنا كلنا بالهول ننتظر فهد يطلع نتيجة علي ، وطلعت النتيجة وصار الدك والركص ما يتسولف واندمجوا صعب وفهد ولا كأنما جانوا بيوم على خلاف ومنها رجعت العلاقة بينهم وصارت مثل قبل واحسن بعد.

سيلين : علاقته بنرمان شلونها ؟

ايفين : ليش ما تحجيلج هي مو صديقتج ؟

سيلين : اتوقع تتحسس لان ملاك يمي عبالها راح اسولفلها لهذا كلما اسألها تكولي زينين وبخير بس ابد ما اتوقعها سعيدة..

ايفين : اي هي ابد مو سعيدة..

سيلين : ان شاءالله يتحس وضعهم.

ايفين : ان شاءالله

سيلين : ماحجتلج شي ؟

ايفين : ماكو غير الموقف اللي حجيته الج بيوم رأس السنة.

سيلين : الله يصلح الحال..

ايفين : امين..

سكتنا بعدما دخلت ملاك شايلة ادلم ..

كملنا العشا واندك جرس الباب ، طلع ضيغم فتحه ، دخل فهد يحجي بالموبايل اللي فهمته الاتصال وية علي ، بعدما سد الموبايل سألته.

ايفين : هذا علي؟

فهد : اي

حجاها عاكد حاجبه.

ايفين : خوماكو شي ؟

فهد : لا بس باجر سفرتهم وراح ياخذ امه وياه ويبقون اربع سنوات يلا يرجعون.

ايفين : وانت ضايج بسبب هالشي؟

فهد : راح يظل بالي عليهم شلون يتغربون بعيد عني ..

ايفين : علاوي رجال ما ينخاف عليه واكيد راح يخلي امه بعيونه.

فهد : اي الله كريم..

بعدها تركني وصاح.

فهد : ادهم انزل كافي نوم، ولك ادهم..

واكف يم الدرج ويصيح..

نزل ادهم يفرك بعيونه ، رفع ردن بلوزة موجه كلامه لفهد..

ادهم : يلا مادام رجعت وية وقت الصلاة امشي توضى وصلي.

فهد : ما اصلي هسه ..

ادهم : ليش؟

فهد : اريد اتعلم اللغه اول ..

ادهم : ليش شعليها اللغة ؟

فهد : منو يكول توصل؟

ادهم : لك توصل لا تظل تجفص..

سحبه من ايده جبر خلاه يتوضى وتبعهم ضيغم وكفوا يصلون وعمو ادهم يحجي بصوت عالي حتى فهد يستمع ويردد وراه..

كملوا صلاتهم ، وبعدها فرشنا السفرة وتعشينا ، فهد طلب من ضيغم يكعدون برة على اساس وحدهم بعدين ادهم تبعهم ، وشوية شوية التمينا سوية ، اتصلوا على بيت عمو يوسف سلمنا عليهم بعدين حجينا وية ايمن  وتطمنا على زوجته وحجت وية ضيغم وظل يوصي بيها على حملها...

سدينا المكالمة وكعدوا يحجون بموضوع اليوم والي صار وفهد حرف الحوار الى ضحك وتصنيف..

بعدين التفت ضيغم عليه وسأله..

ضيغم : برأيك فهد شنو اقوى عدو للإنسان؟

فهد : نفسه ..

ضيغم : فعلاً بالاخص اذا ما كدر يسيطر عليه..

فهد : طبعاً.

ضيغم : وين تشوف المتعة بحياتك ؟ يعني بأي جانب..

فهد : من افهم الشي واتغابى عنه.

ضيغم : شلون يعني ؟

فهد : مرة قرأت مقولة تكول( قمة المتعة أن يراك البعض لا تفهم شئ .! مع أن إبليس يناديك، معلمي.

ضحكنا على طريقته بالكلام، بعدها طلب من ضيغم يغني ، راحت ملاك جابت الجيتار بطلب من ضيغم وصار يطربنا بالاغاني القديمة وجمال صوته ، بعدها فهد طلب منه يغني اغنية نور الزين ..

فهد : بشرفك اكو اغنية اسمها ترن رن رن .

ضيغم : اغنيتيش هاي ترن رن رن..

حجاها وضحك بعدها فهد كال..

فهد : اسمع هي بيها مسبة هيج اتذكر ، لابو الايام لابو ذاك حبك.
كون تشتاك ترجع وما اكلبك..

ضيغم : ما حافظها ولك هذا مو لوني بس سؤال ، هاي الاغنية تقصد بيها احد لو هيج غنيتها..

فهد : ترة اضرب روحي بحديدة واطلع الدم ، لاتسوي مشكلة بيني وبين ففة..

ضيغم : تحبها ؟؟

فهد : اكيد.

ضيغم : حتى اذا كبرت وراح جمالها ؟

فهد : ففة( كالعبق كلما قدم عتق )مثل العطر العتيق كلما تعتك كلما يزيد جمالها ..

ضحك ادهم وكال..

ادهم : جاي بويه صارت بيها عطور..

سيلين : صار هناسي..

ادهم : ئووخ قورباني سيلينة

سيلين : ترپەی دڵم

ادهم : خۆشمدەوێ ماڵەکەم 

فهد : هاي شكو ؟ سالمين.

ضحكت التفتت عليه..

ايفين : هاي يحجون باللغة الكردية ..

فهد : يعني تعرفين شنو كاعد يحجون ؟

ايفين : طبعاً ..

فهد : ترجمي خاف يفشرون علينا  ...

ضحكت..

ايفين : لا لا كاعد يتغازلون ..

فهد : اي وشنو بله يحجون.

ايفين : هناسي يعني ( نفسي )
ئووخ قورباني سيلينة( اووف فدوة )
ترپەی دڵم( نبض قلبي )
خۆشمدەوێ ماڵەکەم( احبچ يابعد بيتي)

التفت على ادهم كال..

فهد : انت ما تبطل غزلك الغريب العجيب هذا ؟

ادهم : حولت كردي حتى ما تبوك مني بعد..

فهد : لا ياالله كشفتني؟

ادهم : من زمان ومغلس عليك بمزاجي.

فهد : سؤال ادهم؟

ادهم : جواب ..

فهد : شنو يعنيلك الحب ؟

ابتسم وكال ...

ادهم : الحب ليس روايةً شرقيةً
بختامها يتزوَّجُ الأبطالُ
لكنه الإبحار دون سفينةٍ
وشعورنا ان الوصول محال
هُوَ أن تَظَلَّ على الأصابع رِعْشَةٌ
وعلى الشفاهْ المطبقات سُؤالُ
هو جدول الأحزان في أعماقنا
تنمو كروم حوله .. وغلالُ..
هُوَ هذه الأزماتُ تسحقُنا معاً ..
فنموت نحن .. وتزهر الآمال
نزار قباني

وبهيج انتهى اخر جزء من سلسلة جذبني فمك البني..

كل عام وانتوا بالف خير
رمضان كريم عليكم وعلى عوائلكم غوالي..

اكتبولي رأيكم بالسلسلة بأجزائها الثلاث🤍💚🤎

متابعة ممتعة هناسي..😌

يله قفلوا الابواب زين ولبيت الغريب 😉