اعقل مجنون

البارت الثامن

اللذة سعادة المجانين
والسعادة لذة الحكماء

افلوطين

________________________

جنت احجي وياها واسمع صوت علي برى يصيح جدو بصوت عالي ، استغربت هاي شنو شبيه.

ايفين : ام علي من رخصتج عيني اروح اني ونحجي بوقت ثاني..

رواية : ماشي سلميلي ..

ايفين : الله يسلمج..

سديته و طلعت من الغرفة بأتجاه المطبخ باوعت علي يحجي ويلوح بيده بعصبية ودمه محروك ، عمو يوسف عاكد حاجبه ويستمعله ضايج ، وكفت اسمع وشي متوقع السمعته ما انصدمت لان عرفت هيج راح يصير حتى يرجعني..

يوسف : وشنو هسه ما بقى شي صاحي بالبيت؟

علي : للأسف لا كلشي تدمر وهو هم مأذي نفسه هواي .

من سمعت هيج تأذيت عليه رغم أذيتي وتعبي منه ، جريت نفس ورحت بأتجاههم من شفتهم يريدون يطلعون سويه صحت عمو...

ايفين : عمو لحظة اذا رحت انت راح يزيد بالاكثر فهد يريدني اني ..

علي : ممنوع توصلين اكعدي وسكتي جايزة من روحج انتِ..

ايفين : فهد ابوك محد يروضه غيري.

علي : غير تستقر اللبوة بابا ابوية سوه هيج حتى ترجعيله وعمي ادهم منع هالشي ، اذا رحتي معناها راح يتأجل السفر واصلا يلتغي خصوصا من عرف اني راح ادرس بدولة غير الدولة  البيها عمي ..

ايفين : اتركه يموت يعني؟

علي : ما يموت عوفينه هالمرة احنا نتصرف..

ايفين : ويرجع باليل يدمن السم واني بالكوة خليته يتركه..

علي : الشرب قصدج؟

ايفين : لا مهدئات ..

يوسف : يابه احنا خايفين عليج لا أكثر.

ايفين : عمو بالاصعب منها ماخفتوا عليه ومحد وصلني عفتوني وياه هسه خايفين منه من صار يحبني ويخاف علية ، خلوني وياه اني احلها وممنوع احد يوصل..

دخلت افوت حتى البس لحكني علي وكفني ولزمني من كتفي بثنين اديه كال..

علي : ايفين ايفين مو وياج باوعيلي.

ايفين : علي اي نقاش بهذا الموضوع ما اسمعه فهد ما اعوفه وحده ..

علي : تعوفيه حتى لو اعرف استعمل القوة وياج واتجاوز ابوية.

ايفين : ما الك دخل هذا الشي بيني وبين ابوك وخر علي لا تخليني اضوجك..

علي : ما اروح ايفين ما اروح ولا اسمحلج تروحين..

التفت على جده عاط بصوت عالي ، انصبغ وجهه احمر..

علي : جدو روحله خاف يسوي بروحه شي وانه لاحگك..

ايفين : علي ليش تلح علية وتجبرني على شي ماعاجبني وخر الله يخليك حبيبي انت..

لزم وجهي بثنين اديه وخلاني غصب اركز بعيونه من يحجي ..

نظراته وملامحه كلها مبينه خايف علية من صدك..رغم اعرف بهذا الشي بس هذا الموقف اكده اكثر..

بعدها تغيرت نبرته بهدوء كال..

علي : ايفين انه من جنت صغير ما شهدت تصرفات ابوية ويه أمي وما كدرت ادافع عنها ، بس هسه كاعد اشوف رواية بيج لهذا دمي يحترك  عليها و عليج على الاقل خليني اخلصج منه ..

ايفين : ولك علي هذا ابوك حرك الدنيا عليك لك خلاني اشاركه بالجرائم مالته حتى يرجعك لحضنه ، عرض حياة اختي للموت تخبلت بسببه وتطلكت وهزمها ، وبعدين خفاها وتهمها بشرفها عود مهزومه واخوك انجلط  بسببه وهذا كله علمود ترجعله وهسه يفهم صرت ضده يموت والله يموت..

علي : وانتِ عبالج من تحجين هيج راح اتعاطف وياه لو اصير لين بالعكس قسيتي كلبي بالزايد واخاف جان بية أمل واحد بالميه اخليج تروحيله هسه حتى هذا الواحد شلته..

نزلت ايدي بضعف وحجيت بتعب..

ايفين : علي علي ياعلي افهمني اني ماعندي احد غيره..

علي : عندج كلنا وياج وانه أولهم لو مو بعينج ؟

ايفين : لا حشا بعيني طبعاً والنعم منك بس هذا فهد ما اكدر اعوفه اعذرني..

علي : كولي احبه من الاخير..

ايفين : اي احبه ما اكذب..

علي : لعد تستاهلين الراح يصيرلج ومنا وجاي علي معليه بسوالفكم مو جهال انتوا وانه افاكك بيكم ويامصيبة تصير لازم تخابروني بيها..

ايفين : اقسى علية ميخالف بعدين تفهم وجهة نظري مو هسه..

علي : ما اريد افهمها ولا يعجبني افهمها اصلا..

ايفين : ياربي علاوي حبيبي الله يخليك ويحفظك لشبابك لا تفهمني غلط .

بأثناء الكلام دخل عمو يوسف دشداشته دم ويرجف التفتنا أثنينا مصدومين بصوت واحد كلنا..

_ شكو شنو صار؟

حجى بصوت يلهث..

يوسف : هذا شافني صدك تخبل بالزايد كلما يكلي اطلع وانه احجي يكسر بالجام ، اخر جامة كسرها نزفت ايديه ..

علي بدون ما يجاوب عافنه و طلع يركض اني بسرعة دخلت لبست عباتي وطلعت وراه امشي وبعدها اركض مثل المخبلة اتخيل اوردته تنزف وراح يموت وابجي ، وصلت للبيت حلكي ناشف اول ما دخلت الطرمة لكيتها ما بيها شي فتت للأستقبال وانصدم بالمنظر ماكو شي صاحي الأثاث الحلو اللي اختاريته بعناية كله متهشم قطع صغار ،

البلازمه متكسرة الطبلات التحفيات الستائر بالكاع ، طلعت منها دخلت للهول واشوفه كاعد مرتاج على الحايط فاتح رجليه وايديه فوك ركباته ينزفن دم ، علي كاعد يضمدهن وهو صافن على الفراغ الكدامه ، من شافني ميل راسه انكسرت عصبيته بدمعته همس بتعب .

فهد : هيج اهون عليج تسوين بية.؟

علي : خليني اكمل ضماد ايدك وبعدين تعاتبوا انتظرني اطلع ..

فهد : اسكت انت ..

علي : مقبولة منك يابه ..

فهد : ففتي تعالي..

التفت على علي اشرله براسه يتركه ، الاخير جر نفس وكال..

علي : خلصت ما ظل شي بينما تتعاتب اروح اجيبلك علاج من الصيدلية مال كزاز خاف يصير بيك شي ، لو الله يهديك تروح للمستشفى..

فهد : شفتها صرت زين مابيه شي بعد.

جر نفس وكص الشاش بالمكص ولزكه وكام ، وصل يمي همس بعصبية..

علي : ما اوصيج حضنيه وطبطبي عليه وانسي الصارلج كله انسي وضعيتج الشافج خالي بيها وانسي طفلج الثاني الراح بسببه وأستمري بالغلط فوك الغلط لحدما ييجي يوم نزورج بالاعياد نبلل القبر ونعلك البخور واذا خلانه ابويه نقرالج الفاتحة راح نقراها..

ظليت اباوعله ساكته كل حجيه صحيح بس ما أكدر اعوفه بهيج حال ، اتخيل يموت او يسوي شي بنفسه لو يأذي الحواليه ، فهد مثل الوحش واني المروض مالته بس اتركه يهيج على الناس..

فتحلي ايديه وهمس..

فهد : تعالي اشتاقيتلج..

رحتله دخلت بحضنه حضني بقوة شمني وكال...

فهد : مو بيدي الصار فقدت مو بيدي كلتلج ما أتحمل احجي الصارلي عبالج اسرار ضامها عليج  بس وداعة علاوي وحمودي اللي ماعندي اعز منهم غيرج انتِ ، وعيونج وجمالج فف ما سيطرت شفتج رواية ما شفت وجههج سمعت صوتها هي ، وردت ارجعلها ال ١٤ سنة من العذاب المريت بيه بس للأسف طلعته بيج..

ايفين : القهرني منك اتوسلك واكولك ابني راح اسقطه تكولي طبج مرض عيشي شعور الفقد العشته كأنما تريد تنتقم مني..

بعدني عنه بهدوء وكال..

فهد : مريض مخبل سرسري قاتل محتال مراوغ ابو نسوان من رواد الملاهي ، ماعندي رحمة ما أعرف التعاطف شنو ، احب اشوف المقابيلي يتألم واظل اتفرج عليه بدون ما أساعده ، بس ياففة احبج الج..

ايفين : اجيت اليوم حتى احجي وياك وياريت يا سفاح ال عمران تتفهمني بدون صياح بدون تكسير بدون ما تطلع عقدك القديمة والجديدة علية ..

فهد : متقبلهن منج احجي بس قبل هذا نتفق على شي.

ايفين : وهو ؟

فهد.: اي شي تطلبيه مني تاخذين هاي العين قبل هاي بس مال تكوليلي فراك من هسه اكولج تحجين وتتعبين وبس ما راح انفذ ولا اسمحلج تعوفين بيتج مرة ثانية ، انه اطلع واتبهذل وهذا بيتج مملكتج.

ايفين : فهد وصلنا لطريق مسدود مستحيل اكدر اكمل بعد..

فهد : نفتحه مو مشكلة.

ايفين : فهد مو وقت شقى ترة صدك كاعد احجي وياك.

فهد : ففتي انتِ بكامل قواج العقلية والقلبية ؟

حجاها وعاكد حاجبه ميل راسه مستهزء..

ايفين : اي بكامل قواي العقلية .

فهد : والقلبية؟

ايفين : مو مشكلة ومو ضروري ادخل القلب بهيج مسائل.

فهد : لأن تعرفيه يموت على فهد ويعشقه وهو راح يفوز بس هذا عقلج التنكة شكد اكرها ياربي لو بس الله يهديج تخليني اغسله الج انه بخير.

ايفين : راح اعتبر نفسي ما سمعت ، واتجاوز شقاك ، بس كولي ليش هيج البيت متدمر ليش مو حرامات
شنو ما جايبه بتعب بالبوك جايبه فهمني..

فهد : وداعتج العندي والماعندي ذبيتهم على بيتج وبيت رواية وهسه فلست كلشي ماعندي غير الشدة ونص ..

ايفين : وهاي راح تعمر بيها البيت وتشتري اثاث جديد بسبب خبالك..

فهد : لا بسببج انتِ كلتلج بالموبايل اذا ما خليتيني اشوفج راح اسوي شي ما يعجبج وراح تأذيني ، بدال ما تجاوبيني تكومين تحضريني ، هذا اسلوب متحضر تعاملين بيه زوجج سر سعادتج..

ايفين : قصدك سر تعاستي ، وبعدين انت السويته قليل حتى ما تقبل بالحظر شتريد بسرعة اسامحك وكأنما شيء لم يكن.

فهد : الف مرة حجيت وكلت عوفي الفصحى عوفيها احجي لهجتنا شمحلاتها.

ايفين : فهد الضاهر اني غلطت من سمعت صوت نفسي واجيتك ، راجعة من وين ما اجيت وخلي سوالفك تفيدك..

ردت اكوم سحبني من ايدي حضني وقفل حضنه علية ، باسني من راسي وبكل مكان بوجهي ، ورجع حضني وهمس بأذني..

فهد : اخر فرصة هذه وما اريد غيرها وكلمة رجال اي كلمة تبدر مني او موقف اسويه ضدج انه اطلكج محكمة وسيد وطلاك نهائي مابيه رجعة..

ايفين : تترك النسوان ؟

فهد : اعوذ بالله منهن يامحلاها التوبة..

ايفين : ملاهي ماكو ؟

فهد : من باجر اصير من رواد الجامع ..

ايفين: مهدئات ممنوع..

فهد : حاضر ابويه انتِ.

ايفين : ترجع للبيت من وقت ورة التسعة ما تفوت.

فهد : مو رجال اللي يدخل تسعة وخمسة.

ايفين : لا تقلد ..

حجيتها وضربته على كتفه ، ضحك ورجع حضني..

فهد : صار صار صار لكلشي ترديه.

ايفين : تبطل تداهر ابوك وامك..

فهد : لا هذا هو بعد الصار بيه اليوم ما اداهره.

وخرت من حضنه باوعتله عاكدة حاجبي.

ايفين : شنو سويت ؟

فهد : ماسويت بس تصركع .

ايفين : اعرف مبين من اجه وجهها مخطوف ، شنو سويلته فهد تره حرام عليك..

فهد : ماسويت شي هو فات يهوبز يكولي على هاي سوايتك راح اطلك ايفين غيابي واسفرها هي وحمودي لأخوك وظل مثل الجلب وحدك هنا، انه هم ماقصرت وياه كسرتله شكو جامة بالبيت وهو ظل يتوسل ويكولي هذا تهديد فارغ ومن هالحجي ، تخيلي يريد يعيد الصارلي برواية وعلي..

ايفين : اذا ما تريد هذه المواقف تنعاد بيك ليش تسوي هيج مو راح تخبلني غير تدير بالك علينا حتى ما يتكرر الصارلك..

جر حسرة وكال..

فهد : شوفي مرات الحياة ترجع تحطك بنفس الموقف حتى تشوفك بعدك مطي لو تعلمت ؟ وهاي كدامج صرت مطي للمرة الثانية..

بعز بجينا والعتب انطلقت ضحكاتي وهو على صوت ضحكتي ضحك بصوت عالي ، دموعي كامت تنزل بضحك كال..

فهد : هذا قمة التطرف ..

ايفين : شنو تطرف ؟ من وين جبتها ..

فهد : سوالف سياسية هاي معليج منها..

ايفين : شو الا تحجيلي عاجبني اشوف جانب ثاني من شخصيتك.

فهد : وما يعجبج نحجي الا بوسط الهوسة ..

ايفين : نشتغل ونحجي..

فهد : عوفي كلشي وامشي نصعد تعبان صار ايام ما نايم.

ايفين : ونعوف الهوسة ؟

فهد : باجر اطلع عمال يشتغلون..

ايفين : اهوو فهد اني انظف ما اريد احد يفوت بيتي..

فهد : متريدين حاقد يفوت بيتج هههه..

ايفين : لاتضحك

فهد : شلون سالفة هاي لا تضحك لا تقلد صير سياسي محنك شبيج اليوم انتِ ؟

ايفين : انت شبيك ؟

فهد : فرحان برجعتج والله..

ايفين : بطل سوالف الجهال تكسر حتى تاخذ التريده..

فهد : هالمرة صدك فلتت الأمور من ايدي وكرهت كلشي.

سكت بعدها طلع موبايله واتصل على علي..

فهد : الو ، ها ام علي شلونج يابه ، علاوي وين ؟ ها يسبح ، ماشي ، لا ما اريد شي مهم عبالي طالع ردت اوصيه على عشا الكم والنا ، ها متعشين يله بالعافية على كلبكم ، تصبحون على خير ..

ايفين : اني اسوي ليش تكلف الولد..

فهد : ما مكلفة يابه عبالي طالع كلت بدربه يجيب صارلي يومين ما ماكل شي ولا نايم ..

ايفين : اسويلك هسه..

فهد : لا نطلع ونجيب اي شي ..

ايفين : براحتك

فهد : اجيب السويج وانزل انتظريني.

صعد الدرج سريع كل بايتين سوه ، صحت فهد التفت علية وكال..

فهد : عيونه .

ايفين : غير ملابسك بيهن تراب ودم.

فهد : من ارجع اسبح فد مره.

ايفين : شلون تطلع هيج ؟

فهد : متعلم يابه على الوصخ اعتبريني بالواجب..

ايفين : وين متعلم على الوصخ كل عمرك نظيف.

فهد : نظيف كلب قصدج ؟

ايفين : اصعد جيب السويج فهد..

ضحك وصعد يغني ، ثواني ونزل اخذ ايدي وطلعنا صعدنا بالسيارة وانطلق بينا  يغني ويصفك ولا كأنما ذاك الفهد الدخلت وشفته ، مرات احسه طفل مشاغب ، يعصب وبأقل شي يقنع ويرضى ، افترينا وبعدها نزل جاب  اكل وصعد ، مد ايده خلاه ليورة واخذ ايدي باسها لأول مرة يسويها صفنت عليه ، حس بيه التفت علية كال..

فهد : شبيها ففتي صفنت ..

ايفين : اللي وياك مو حقه صفنه تجيبه وصفنه توديه؟

فهد : ابسط مني ماكو بس انتوا ماتعرفون تعاملوني زين..

ايفين : هاي احنا؟

فهد : لا هاي انه بس لا تفتحين لسانج لخاطر خيل المادري منو..

ايفين : فهد .

فهد : عيونه وكلبه كولي.

التفتت ضربته على كتفه .

ايفين : ولك اطلع من ثوب الرقة والغزل ما يلوكلك.

التفت علية غمزلي وكال..

فهد : مو بله ؟

ايفين : اي طبعاً..

فهد : حتى انه كاره روحي وبالكوة متحملها بس شسوي اللي يريد المطي يتحمل ض******....

ايفين : فهدددد

فهد : ها يمعوده كلت شي غلط..

ايفين : منو مطي علية ؟

فهد : لا علية ..

ايفين : عبالي.

ضجت ودرت وجهي على الجامة ظل يتحارش ويحجي واني ساكتة اخر شي كال..

فهد : تعرفين شنو معنى التطرف ؟

ايفين : ما اريد أعرف .

فهد : خل احجيلج لعد..

ايفين : احجي ويه روحك ما اسمع..

فهد : سدي اذنج وانه راح احجي ، اسمعي التطرف يا متطرفة ..

التفتت عليه باوعتله صفح ، ضحك وكال.

فهد : اساس التطرف والبلاء انتِ .

ايفين : شكو كسرت البيت وحركت الدنيا علية اذا اني بلاء.

فهد : وين اكدر بدونج والله جد ماعندي غيرج صفيت ايدي والحايط..

ايفين : ليش ودولار وين راحت..

فهد : عمي البنية راحت لفالها عوفيها حاطتها ابالج.

ايفين : وهاي شنو اخليها ببالي بس انصحها توب من صدك لخاطر بنتها خطية..

فهد : حنينة مرتي..

ايفين : انكط حنية اني.

فهد : والنعم ، هسه اسمعي التطرف هو قضية يومية حياتية تمتد جذورها في التكوين الهيكلي للأفكار..

ايفين : واني شعليه وما فهمت شي لهذا سد الموضوع..

فهد : ابسطه الج..

ايفين : فهد هذا مو شعر ولا اغنية ولازم انجبر اسمعها منك..

فهد : ابسط شي عن التطرف راح احجيه الج ..

ايفين : ساعة بيضة العجبني اسأل..

فهد : ترة الكاعد تسويه وياية تطرف بحد ذاته..

ايفين : والله ؟

فهد : والله .

ايفين : شلون بله ؟

فهد : هو شنو التطرف هو اتخاذ الفرد موقف متشدد يتسم بالقطيعة في استجابته للمواقف الأجتماعية الي تهمه..

ايفين : عشتو ويا مواقف اجتماعية تهمني واني قاطعتها.

فهد : بالبيئة اللي تعيشين بيها ما يعجبج لا الافكار ولا تنسجمين ويايه ولا عاجبج العجب هو هذا التطرف..

ايفين : يوصف روحه

فهد : انه هم متطرف بس تطرفي يختلف..

ايفين : شلون يعني ؟ حتى بهاي تختلف.

فهد : طبعاً ، تطرفي هو الخروج عن القواعد الفكرية والقيم والمعايير والأساليب السلوكية الشائعة بالمجتمع..

ايفين : فرحان فوكاها يحجي...

فهد :نعبر عنه بالعزلة والسلبية او الانسحاب التكتيكي من الموقف اذا ما عجبني اتناقش بيه..

ايفين : مثل هسه شلون عبرت سؤالي..

فهد : كله تكتيك وتخطيط ما نمشي هيج..

ايفين : هذا التطرف الكاعد تحجي عنه اكو اله أسس وقواعد لو انت سويته خاص بيك؟..

فهد : شوفي راح افهمج حالتي اللي محد كدر يشخصها لا دكتور ولا مصح ولا غيرهم وأول مرة راح أحجيلج حقيقة فهد وشلون هيج صار..

ايفين : يله اسمع .

فهد : بالبداية اجيت بنيت قيم ومعايير مختفلة عن البيئة والمجتمع العايش بيه.

ايفين : تمام.

فهد : بحيث وصل بية الحال أدافع عن أفكاري وعن معتقدي بعنف سواء بشكل فردي او سلوك جماعي منظم يعني اني وجماعة وياية يمثلون تفكيري ..

ايفين : وشنو الغاية والهدف من هذا الشي؟

فهد : ماكو غاية سوى تغيير سلوك معين ما عاجبني او فرض رأي حتى لو اضطرني هذا الشي أستخدام أساليب القوة..

ايفين : وهذا الفكر انت ما حصرته بس بداخل راسك لا فرضته فرض على المحيطين بيك وتعبتهم لحد الهلاك ومن ضمنهم اني.

جان يسوق ويباوعلي لمحات ويرجع ينتبه على طريقه..

فهد : باعي بالبداية جان مجرد فكر عادي تولد من حقد دفين بسبب الصارلي بس من دخلت للسلك العسكري ، تحول من مجرد فكر عادي الى سلوك ظاهري و عمل سياسي ..

ايفين : يعني جنت تستخدم هذا الشي بعملك هم مو بس ويه اهلك؟

فهد : مرات عديدة أستخدم العنف وأتخذه وسيلة احقق مبادئي اللي امنت بيها وتولدت بفكري ، وببعض الاحيان ، مو دائماً هالمرة تكرهيني.

ايفين : احجي فهد اريد أعرفك أكثر احجي كلشي افتحلي كلبك ودواخلك..

فهد : ماشي ، اسمعي مرات نلجئ للأرهاب النفسي أو المادي أو الفكري ضد كل شخص سيئ يحاول يصير عقبة بتحقيق هذه المبادئ او الافكار اللي نؤمن بيها ، بس ولا يوم ظلمت شخص او اذيته اذا ما جان كلب ابن كلب ، طبعا احجيلج عن شغلي مو حياتي الخاصة..

ايفين : فهد ..

فهد : نعم.

ايفين : اني ما أعرفك.

فهد : شكو بيها حبيبتي نتعرف.

ايفين : بلشت اخاف منك أكثر.

فهد : والله ما أأذيج بعد وعد هذا .

ايفين : لا خفت من تفكيرك يعني انت ابد مو مثلنا تختلف اختلاف جذري ، انسان غريب ومبهم.

فهد : عقليتي هيج والظروف لعبت دور بتصنيعها..

ايفين : معليها الظروف يمكن لعبت دورها عشرين بالمية والباقي انت ولدته..

فهد : غلطانة انه ماجنت هيج جنت ابرئ طفل حالي حال ادهم وضيغم وهجان بس الصارلي غيرني حقدت على البشرية كلها واي شخص يحاول يأذيني انتقم منه.

ايفين : بس هذا غلط.

فهد : اعرف الصار صار ما اكدر ارجع الزمن واغير شي.

ايفين : وهسه اذا تأذيت من شخص هم راح تأذيه؟

فهد : لا أأذي نفسي مثلما اذيتها الايام الفاتت..

ايفين : فهد انت ماعندك طريقة تتعامل ويه مشاكلك وتحلها غير العنف ..

فهد : هذا التربيت علية وبمجال عملي تطور هذا الشي وتعمقت بيه يعني شلون تريديني اصير مثلكم واتصرف طبيعي.

ايفين : بس احنا مو متهمين عندك يافهد ولا احنا اللي أذيناك من جنت صغير انت كاعد تنتقم من كل شخص يحبك ويحاول يساعدك ويحتويك.

فهد : كلتلج انه مريض وفكري متطرف ، عندي غطرسة، اناني متملك ، عندي حب السيطرة ، ما أضعف ولا يرف كلبي على اي موقف بس عائلتي المقربة هاي منبع الإحساس عندي بيها اموت وبيها اعيش بيهم اضعف ووياهم اقوة ، ما تتخيلين من اخذوا مني علي ورواية شكد ضعفت و أقل موقف صار يبجيني مثل الطفل صرت ، وبسبب هالشي تولد عندي حقد ضد أدهم وكل ما يخص أدهم وحتى انتِ لاحج طشار بسبب قربج منه..

ايفين : بس اذيتك يافهد ما تغتفر عجبي على عمو أدهم وقلبه شكد واسع اللي تحمل كل الصار وعفى عنك وسامحك ويضحك وياك وما اعتقد يجاملك..

فهد : مرات الشخص الطيب واللي يغفر بسهولة يستاهل اللي يصيرله انه لو بدل أدهم واخوية مسوية بية هيج اقتله وما يرفلي جفن ، ولا بيوم أغفرله ولا راح أنسى مو عاد اسامحه بكل سهولة..

ايفين : يعني برأيك انت كفهد ، جنت تستحق السماح على السويته بيهم..

فهد : لا

ايفين : استغربت من سامحوك؟

فهد : طبعاً ..

ايفين : فهد

عاط بيه ..

فهد : الأكل برد بنت تمارة ومتت جوع صارلي يومين ما ماكل شي.

ايفين : حجى المتطرف..

فهد : اموت على تطرفج.

ايفين: ياطلابة الماتخلص.

فهد : حمودي المتطرف مشتاقله راح يبات يم يوسف مو ؟

ايفين : يوسف ولك اسمه يابه بابا ابوية ..

فهد : لا والله اسمه يوسف عمران .

ايفين : يمه يرادلك گلب

فهد : انزلي نتعشى وننام قبل لا نتعارك وترجعين لبيت حجي يوسف وارجع اكسر ما تبقى من البيت وترجعين ونرجع نروح نجيب عشا ونحجي بالتطرف وهم ازعلج وهم..

قاطعته بصوت عالي.

ايفين : بس فهد بس كلبي خلص يله انزل نتعشى وننام وننجب..

ضحك ونزل ، امشي واصيح صوجي سألته ، صوجي رجعت ، صوجي ما سمعت كلام علاوي صوجي.

هو يسمع ويضحك، دخلنا وصعدنا فوك تعشينا لان الطابق الجوة مابيه مكان نظيف نكدر نكعد بيه ، راح سبح واني نمت ، اجه يمي حجى وتغزل ماكعدت ايس مني ونام ، ثاني يوم طلع حتى يجيب عمال ، استغليت الفرصة اتصلت على عمو أدهم جاوبني..

أدهم : ياهله ام حمودي شلونج يابه ؟

ايفين : هلو عمو حبيبي بخير اذا انت بخير.

ادهم : شلون صرتي احسن ان شاءالله ؟

ايفين : الحمد لله احسن ، شنو عمو نايم لو راح تنام..

ضحك بهدوء وكال..

أدهم : لا راح أنام ليش ؟

ايفين : اي مو كاعد أكول صوتك نعسني بالكوة تحجي.

ادهم : والله يايابه تعبان اختج وبنت عمي اليوم حبوا يغيرون ستايلهم وطلعوا من الصبح وعافولي الجهال ، ولعبوا بحالي لعب ، تعرفين بعد شيسوون ،هسه صعدت ردت ارتاح وصعدت هي وبنتها مكابلاتني وكاعدات يمعودات اريد انام ماكو ماخذيني بالضحك والسوالف الحلوة مالتهم..

ايفين : فدوة لعمرك عمو الله يحفظكم ان شاءالله..

أدهم : يحفظ الجميع يابه ، كولي شنو عندج ؟

ايفين  : والله ياعمو شمدريك اريد احجي شي ،، أحتمال بس حابه اسلم..

ادهم : اعرفج تعلمين أدهم شلون يلعب ..

ايفين : لا العفو ، صحيح خابرتك علمود فهد.

ادهم : خلصت اوراقكم ماظل شي وتجون هنا .

ايفين : اي اعرف عمو بس اتصلت حتى ابلغك ، بتفاصيل أول مرة يحجيها بلكت تفيدك بالعلاج.

ادهم :مثل شنو ؟

وسردتله الأتذكره من حجينا ، سكت وكال..

ادهم : ومنو يكول راح يحجي ويه الدكتور نفس هذا الحجي اللي حجاه وياج ؟

ايفين : لان راح اشرف على علاجه رجلي على رجله هالمرة ..

ادهم : حلو راح يتحاصر البطل..

ايفين : كلتله اذا ما تعالجت ما ارجع وياك للعراق.

ادهم : وافق ؟

ايفين : ماعنده حل ثاني.

ادهم : احتمال اذا استدعى الأمر راح يفوت مصح .

ايفين : اهم شي يتعالج من صدك لان خوفني وصدمني ..

ادهم : تجون ويصير خير لا تفكرين هواي  وحاولي لا تحتكين بيه ورجعتج ما عجبتني تره بعدين احاسبج على كسرة لكلامي..

ايفين : عرفت رجعت؟

ادهم : هذا اللي هامج ؟

ايفين : لا طبعا اني هم خابرت حتى ابلغك برجوعي وهم اكولك على فهد بس علاوي سوه الواجب.

ادهم : منو كال علاوي حجالي.

ايفين : لعد شلون عرفت رجعت.

ادهم : مو هسه حجيتيلي حالة فهد والجديد الصار وياكم.

ايفين : اي صح والله ياعمو شكد ذكي ونبه.

ادهم : ديري بالج على نفسج بينما تجون.

ايفين : ان شاءالله سلملي على الكل.

ادهم : يوصل..

اجاني صوت سيلينه.

سيلين : تصبحين على حب حبيبتي وراحة بال.

ايفين : راح اجيج سيلينه.

سيلين : اي حبيبتي واخيرا.

ايفين : ياربي نرتاح من بعد تعب.

سيلين : امين ان شاءالله هنا حياتكم تتغير وتستقر.

ايفين : يارب يله اخذوا راحتكم تصبحون على خير.

سيلين : وانتِ من اهله..

نزلت جوة ورة شوية اجه فهد ، طلب مني اروح وياه لبيت عمو حتى العمال ينظفون براحتهم وياهم علاوي يشرف عليهم ، رحنا اني وياه لبيت عمو ، سلمنا وكعدنا ، اخذ حمودي بحضنه ولعب وياه ، اتصل ادهم على موبايل فهد ، يحجي وياه وفهد ، ساكت يستمع ويجاوب ب اي او ممم او تمام ، بعدها فتح المايك وصاح على عمو..

فهد : وياك ادهم..

اخذه عمو وحجى وياه.

ادهم : هله حجي شلونك حبيبي.

يوسف : هله ابو مرايم شلونك يابه.

ادهم : الحمدلله اسأل عنك.

يوسف : تسأل عليك العافية خير كول شنو عندك ؟

ادهم : خابرت على أيمن وحجيت وياه راح يرجع يمكم .

يوسف : شلون اقتنع مو جان قافل؟

ادهم : هو قافل لسبب وحقه ، راد زوجته تولد يله يرجع بس من كلتله بعد هواي على موعد ولادتها وانتوا راح تظلون وحدكم خصوصاً من علاوي يسافر اقتنع واسبوع القادم هو يمكم بعدها يسافرون عائلة فهد..

يوسف : بيها الخير هو هذا حضي يرجع ابن يتغربون ثنين.

ادهم : لو الله يهديك وتجي هنا يمي انت وامي والله ترتاحون راحة العمر..

يوسف : يابه شغلي وبيتي ما اكدر اعوف كلشي واجي..

ادهم : براحتك حجي براحتك يله اروح اني لان حيل تعبان .

يوسف : الله وياك سلملي.

ادهم : يوصل تصبحون على خير.

يوسف : وانت من اهله..

مرت الايام وخلص الأسبوع الأول وعلى اساس نأثث البيت بس ادهم خابر فهد وحجى وياه كله الفلوس تفيدك من تسافر والبيت من ترجع اثثه ، اقتنع بعد معاناة

الايام مرت و فهد على اعصابه بس مسيطر اعرفه ما يعجبه يسافر بس انجبر مايكدر يحجي شي ، الأسبوع الثاني اجوي عائلة ايمن ، سلمنا عليهم سلام سريع ورجعنا لبيتنا ..

اجه موعد سفرنا ، حزمنا الجنط وأنطلقنا للمطار مودعين العراق واهل فهد ، بدموع حارة ، حلقت الطيارة بسماء العراق تاركين كل أثر وكل جرح عشناه وما معلوم اذا نرجع او نبقى هناك..

وصلنا من بعد تعب وأجهاد مو طبيعي بالاخص اول مرة اسافر وهيج مكان بعيد ، من وصلنا للمطار فهد اشترى شريحة أتصل على أدهم وبلغه بوصولنا ، كال انتظروا ربع ساعة احنا يمكم ، كعدنا  بصالة الأنتظار ، وفعلا ربع ساعة واتصل علينا ادهم كال اطلعوا ضيغم منتظركم برة..

طلعنا وكل ظننا جاي بتكسي تفاجئنا من شفناه جاي بسيارته ، ضحك فهد وترك الجنط ركضله حضنه بقوه وباركله.

فهد : ها ولك على الخير غير تبشرني رجعت تسوق .

ضيغم : ردت اسويها مفاجئة من تجون احله.

ايفين : على الخير ابو أدلم ، شلونك ؟

ضيغم : أهلا ام حمودي خير اللي يصيبج انتِ شلونج ..

ايفين : بخير الحمد لله.

صعدنا الجنط وصعدنا ، بالطريق ظلوا يحجون واني استمع فرحانه بالأخبار الحلوة.

فهد : عادي هسه تسوق رجعت رخصة السياقة؟

ضيغم : اي جنت حاط محامي معدل وذبيت فلوس قيامة يله صارت.

فهد : حتى هنا فلوس؟..

ضيغم : مو قصة حتى هنا بس شغلتي صعبة ومحامين طلبوا هواي عليها وانه كلفت اكثر من واحد وما ضبطت الأخير سبع سواها الية..

فهد : ها وهسه تكدر ترجع للسباق ؟

ضيغم : لا يابه يا سباق وين أكدر بعد ، بس اسوق عادي داخل المنطقة او خارجها بس اتعب اقصى شي اسوق ساعة غيرها رجلي تخدر و تأذيني.

فهد : شوية شوية ترجع يابطل.

حجاها وضربه على كتفه..

ضيغم : ان شاءالله

وصلنا كدام بيت يجنن رغم اني شايفته بالكاميرا ويه سيلين بس مو مثل الحقيقة عبالك رسم ويه الطبيعة التحيطه سبحان الله ، فهد اول مرة يشوف البيت لان بس اتصال يحجي وياهم ، شاف واجهة البيت ضحك وصاح بصوت عالي من خارج البيت.

فهد : ها لك ابو البني وينك وصلوا آل فهد ...

يتبع..

صباح الخير حبايبي.

بلكت اكدر اكتبلكم بارت هدية لأن تستاهلون والبارت الجاي نفوت بتفاصيل المصح..
🖤