اعقل مجنون

البارت الخامس

بين الجنون والعقل شعرة
وأنا اتمرجح عليها.
__________

كعدت ثاني يوم على صوته يم أذني.

فهد : يا ستار ... يا ستار

فزيت فتحت عيني باوعتله صفح ، حلكي ناشف كلت أكيد صاير شي لأن يحجي مخبوص..

ايفين : شكو فهد ؟ صاير شي ؟ أهلك بيهم شي ؟

أشر بايديه على شكل مسدس كبال وجهي وكال..

فهد : دخلنا يا عراق انذار تحزم جيشك الباسل جف غيرة والثاني نار ياستار ياستار .

ايفين : لا ياربي دخيلك هواي هيج والله هواي .. راسي راح ينفجر...

حجيتها وخليت راسي بين المخدة..

راح شغلها بالديجي وصعد الصوت وظل يغني ...

فهد : بالروح والدم أفديها هالكاع شحدة يطب بيها طلقات انه مخاويها للمنشار..

ضحك وكال..

فهد : مقصودة هاي على يوسف اذا طب غرفتي وعاد سالفة البارحة..

حجاها ضحك وكمل

فهد : وأشهك بارود بريتي على العوز صارت تربيتي.

جان اسمع صوت عمي يصيح من برة الغرفة..

يوسف : أبن الكلب أنت هم ضكت عوز من صغرك خاشوكة ذهب بحلكك ياتافه أريد أشوف هم الله يبارك بيك ، تنام على معزوفات وتكعد على معزوفات..

فتح الباب فهد ومد راسه صاح مستهزء..

فهد : مايفوت اي حاقد بيتي خطار، ياستار..

يوسف : وانت منو جاي لبيتك همزين بعدني ما متت وتتحكم منو يفوت ومنو يطلع..

فهد : يابه خوات مرتك ما أرتاحلهن واليوم اذا أجني أستلمهن دك طلقات ، أخليهن ياخذن عبيهن ويركضن يصيحن ياستار مو تكول فهد ما كال وفشلني..

يوسف : لا بارك الله بخلقتك أمشي من وجهي ، أخ ربي شنو مسوي جواك ورزقتني بواحد مثل فهد..

فهد : مش عاجبك طلكني يايوسف.

يوسف : لا ما عاجبني ولا راح تعجبني وفوكاها مكابلني وكاعد شوكت تلتحق وأخلص منك..

فهد : اذا ما عاجبك أسلوبي رجعلي دبدوبي..

جننه لعمي خلاه يسب بروحه وبفهد ، دخل للغرفة يضحك وسد الباب، باوعلي وكال..

فهد : ها كلبناها للخلقة..

ايفين : انت هم عندك احساس ومشاعر وتحس بينا بس اريد افتهم جاوبني ..

صفن بوجهي سوه روحه متأثر دنك راسه وخله كف ايده على كصته ، رجعت عدت عليه السؤال رفع عينه باوعلي حاصرته الضحكة..

ايفين : كملها الأغنية فهيدان أدري بيك فاصل من بيجي.

تقرب مني لزم ايدي وهمس بصوت ناصي..

فهد : يالدمج دمي ياليومج يومي .. ما اغفة بنومي .. أذكر تضحيتج .. يا افونه وصيتج .. ابنج تربيتج.. وماهد الشيلة..

ايفين : منو كالك اني جندي وياك لو على الجبهة واحامي للوطن حتى هيج تسمعني صبح وليل وحتى غزلك وطني..

فهد : احب توصلج الفكرة اذا التاريخ مايقرأ..

عطت بصوت ردت انجلط..

ايفين : وخر من وجهي تره راح اموت ..

عفته وكمت غيرت ملابسي حتى اطلع اسوي ريوك وانظف التفتت لكيته عاكد حاجبه..

ايفين : خير ياستار؟

ضحك وكال.

فهد : ميفوت اي حاقد بيتي خطار ، لج اليوم راح يجن خوات فردوس..

ايفين : وانت شعليك بيهن اطلع يم جماعتك علما تخلص الإجازة وتداوم ونرتاح كلنا ونفرح..

فهد : بر***** جذابة منو تبجي دم من اتأخر عليها اسبوع ما أنزل.

ايفين : غبية غبية أني أكلك اني وحدة غبية وبدون عقل وقمة بالسذاجة.

فهد : هاي من وين متعلمتها من عمج ادهم.

حجاها وكام مشى وصل يمي لزم وجهي بيديه ضحك وطبع قبلة متوحشة على خدي مسحتها بردني ضحك وكال.

فهد : غبية وحلوة ومجلوبة وذكية وتافهة .

ايفين : فهد؟

حجيتها بضجر.

فهد : عيون فهد..

ايفين : اريدك بيوم تكون جدي وياي.

فهد : يبوو ولج كلشي ما تستفادين اكوم اعطس واضر***** سوه..

ايفين : شبيك انت شبيك ، شو وخر مني.

دفعته اجه وراية لزمني من زندي متوسل اظل وما ازعل.

فهد : افونه ما شبعتي من فهد الجدي والعصبي والمؤذي ترى تغيرت علمودج منتبهة لو لا؟

أيفين : بس أنت كل يوم بحال تعبتني يوم زين وعشرة تأذيني ، مامعروف صدكك من كذبك تعبت.

فهد : يعني هسه صرت موزين بنظرج؟

ايفين : ما كلت هيج ماكلت لا تكولني شي ما كلته وعلى أثره تزعل..

فهد : اكولج حجي المثقفين هذا زيحيه من دماغج واحجي ويايه طبيعي ماشي عيني ..

ايفين : شنو كلت ؟

فهد : على اثره..

ايفين : ماشي فهد ماشي ، وخر اروح اسوي ريوك..

فهد : بس هاا ديري بالج علية وداريني زين ماشي.

ايفين : ماشي..

رحت للمطبخ سويت ريوك وحضرته رحت اصيحه لكيته كاعد ويه عمي بالهول اشرتله حتى ييجي ، هز راسه يعني استلم رسالتي ، رحت للمطبخ ثواني واجه وراية كعد تريك ويامحلانا جنا ،،
يضحك ويحشش علية واني ماعاجبني كالبة الوجه حسيت بدوخة وتعب ماعرف ليش.

بعدها كام وجان طبيعي كلش واني رفعت السفرة توني بلشت اغسل المواعين صاح بصوت عالي ايفين ، وكع كلبي من يكول ايفين بدون ففة يعني صاير شي قوي ،

بدون ما اغسل ايدي مسحتها بملابسي هي والزاهي البيها وركضتله للغرفة اول ما دخلت وكع كلبي من شفته واكف يم مكان الجرار البيه علاجه ،

باوعلي حك وجهه بعدها فركه حيل وهز راسه يمنه ويسره بصوت ناصي كال ايفين وبعدها عاااط بحدية.

فهد : علاجي ويييين ؟؟؟

هنا اختلف الوضع فهد البارحة وفهد الصبح مو نفسه هذا ، ليش اكدر احجي شي ظليت متبسمرة بمكاني عاد علية السؤال مرة ثانية وظليت ساكتة ، تقرب يمي وفكه ينبض بقوة وصلني لزم ايدي بقوة ولواها ورة ظهري همس بأذني مهدد..

فهد : لا عبالج مستخطيج وصرت زين وياج تمشيني على هواج وصرت تحت امرج لا غلطانة وستين غلطانة اذا شاقيتج وضحكتج هذا فضل مني عليج ولأن مزاجي يكولي هيج مو لأن انتِ تريدين هيج اصير..

ايفين : انت بالحالتين مأذيني هيج وله هيج ..

فهد : مو عاجبج بنت تمارة؟

ايفين : بنت وضاح اني والف مرة كلتلك ماعندي ام

فهد : شلون اجيتي لعد من الطبيعة..

ايفين: فهد وخر ايدي أذيتني.

فهد : اذا ما طلعتي العلاج وعرفت مكانه ازوعج دم.

ايفين : سويها واروح لعمو ادهم اعيش يمه عبالك ابقى وياك بالبيت.

فهد : اوووه ادهم رعبتيني الصراحة ، ليش هو وينه ادهم مو حاير بأختج والصار وياها؟

ايفين : بسببنا ثنينا صار بيهم هيج اني دمرت اختي وانت دمرت اخوك بسبب هذا السم التاخذة.

فهد : ها انه اخذ سم واخوية هيج صار بيه انتِ عليش طاوعتيني.

ايفين: لأن جنت تهددني.

فهد : بشنو جنت اهددج ؟

ايفين : تتذكر كلش زين بشنو جنت تهددني وشنو جنت تنطيني اتعاطاه غصب عني واسوي التريده بدوه مقاومتي..

فهد : حلوو جنتِ تخافين مني وتسمعين الكلام.

ايفين : للأسف اي.

فهد : وهسه؟شنو التغير؟

ايفين : هسه اخاف عليك أكثر من ما أخاف منك.

فهد : احساس جيد وجديد بالنسبة اليه ، بس باعي انه صبري اله حدود وياج ، وتعرفين كلش زين ويه غيرج ماعندي صبر وحتى ابوية ما اعرفه.

لزمت وجهه متوسلته بنظراتي وبنبرة صوتي وحتى طريقة كلامه كأنما كاعد اساير طفل بيدي.

ايفين : حبيبي انت انسان راقي ومثقف وتعبان على نفسك وذكي وتأذيت هواي بحياتك والصارلك مو قليل الله يساعدك الف مرة ، ويجمعك بعائلتك من جديد ، بس الكاعد تاخذه يدمرك ويخليك انسان ثاني تختلف عن فهد البارحة وفهد الصبح لخاطري عوف العلاج اتركه الله يخليك..

اخر كلمة ما كملتها والضرب اجاني بكل مكان لدرجة فقدت نفسي بين ايديه وكطعت النفس ما لحكت حتى اعيط لأن ضرباته يركزها بمكان يخلي الضحية يوكع بين ايديه بدون مقاومة منه ،

اغمى علية ماحسيت غير عمتي وعمي يكعدون بيه ويمسحون بوجهي فتحت عيني غرفتي مو نفسها متكسرة مابيها شي صاحي ،

عمي يوسف عيونه دم ، وشاد راسه ، ومن بعيد عمو ادهم واكف بعيونه حقد يباوعلي بغضب حقه على الصار بسيلين ما يسامحني بس هو ما يعرف كل الحقيقة يعرف جزء مجزء منها..

عرفت عمو ادهم هو ناقذني منه ومطلعين فهد برة البيت وسادين الباب، حجه عمو ادهم بهدوء..

أدهم : هذا الصار بيها صار برواية ولأن خلصتها منه عاداني وقلب حياتي كلها ..

بعدها اجه كعد يم راسي مسد شعري جر نفس وكال..

أدهم : باباتي انه مستعد اخذج منه وأعيشج احسن حياة بجانب اختج وحتى اكدر اسفرج بس انطيني الاوك وخلص انه اتصرف..

يوسف : وتعيد المأساة مال رواية كل عقلك؟

عاط عمو ادهم ..

أدهم : وننتظر ضحية جديدة من ضحايا ابنك والله شنو نخاف منه.

يوسف : الراح يسويه بيك هالمرة ما يتسولف ويمكن حتى تنقتل ..

أدهم : اعلى ما بخيله يركبه ، ايفين تطلع ويايه ما اروح لبيتي اذا ما أخذها.

فردوس : لك يمه انت شلون تسولف هذا فهد تعرف شنو..

أدهم : هو لأن أعرف هذا فهد أريد اخلصها منه وياريت أنتوا هم تعرفون بنت العالم ويه منو عايشة وتحكمون ضميركم صح..

يوسف : ايفين ما تطلع برة البيت بدون علم زوجها..

أدهم : هسه ماخذها لأقرب مستشفى واسوي تقرير طبي ضده وأشتكي عليه واريد اشوف انه لو هو..

يوسف : وتعرف كلش زين فهد هسه مو مثل فهد قبل وشنو يكدر يسوي؟

أدهم : وتعرف بأدهم شنو يكدر يسوي بتقرير واحد أعممه على دكاترة واخذ توقيعهم ، واقدمه للمحكمة العسكرية ، هم يخسر وظيفته وهم يتحاكم.

حجيت بصوت ضعيف..

أيفين : عمو اني شاكرة مساعدتك اليه وكل محاولاتك بس ما اطلع ولا راح أعوفه..

صفن علية عاقد حاجبه بعدين كال..

أدهم : مهددج بشي فهميني ؟

أيفين : لا

أدهم : عليش باقية؟

أيفين : ما اريد تصيرلكم مشاكل بسببي .

أدهم: ما عليج ولا تخافين اذا حابه تخلصين من الوضع الأنتِ بيه بس كولي والتريديه يجرالج ...

ايفين : عمو ما اكدر ..

حجيتها وبجيت..

أدهم : حبيبتي عليش خايفة انه وياج ما يكفي لو مو رجال وأكدر احميج ؟

ايفين : العفو عمو حشاك بس اني هذه حياتي وأريد اكملها..

شنو سبب رفض ايفين تترك فهد وليش هالكد خايفة منه وشلون راح تكمل وياه ، كل هذه الاسئلة تركتها بداخل كل فرد من أفراد ال عمران..

فلاش باك للماضي..

فهد ظل يومين يم دولار بعدها رجع للبيت بعدما تأكد برجوع ادهم و وجوده بالعراق..

راح للبيت واجتمعوا سوية ، يوسف واولاده والجد عمران وباقي الأعمام اتفقوا على قرار واحد من بعد نزاع كبير..

وهو يدزون أدهم على عمهم هاشم وهو يحل الموضوع ..

أدهم من بعد صراع كبير بينه وبين نفسه ، وكلام واتفاقيات ويه فهد قرر يروح..

وفعلاً راح لعمه هاشم ، جان استقبالهم اله بارد وجاف وبيه ضيقة خلك ، بلش حديثهم بتصعيد عالي واراء مختلفة اغلبها جانت عبارة عن تهديد

أدهم : حقكم بكلشي تسووه وانه وياكم بس الذنب والخطأ الاثنين مشتركين بيه ما ننكر فهد ومساوءه بس بنفس الوقت غلط رواية جبير من طاوعته ، ياعمي اجيت اليوم حتى ابينلك حجم الكارثة الإحنا بيها يعني اذا رواية ما كملت زواجها من فهد معناها راح تظل طول عمرها بدون زواج لانه يكول ما اطلكها لو شما يصير..

هاشم : اعرف شلون اطلكها منه وغصب عليه وعلى اكبر راس..

ادهم : ياعمي هذه الأمور ما تنحل هيج والكلام اخذ وعطى وأتمنى تتفهم موقفهم وتدرسه من كل الجوانب وتشوف اللي الكم واللي عليكم ونحاول نحله بهدوء وبدون مشاكل وعداوات..

هاشم : لو أعرف اذبح بنتي واشمرها للجلاب ولا انطيها لفهد الخايس.

صار حجي هواي ومناوشات وتدخل صعب تأزم الموقف بشكل اكبر ، بالنهاية وقبل لا يطلع ادهم اقترح عليهم مقترح وعلى اثره راح يكون التصرف النهائي ..

أدهم : عمي نشوف رأي البنية شنو تكول انه أول واحد مأيد قرارها بس بشرط ما نظلم بختنا ..

هاشم : ماكو هيج حجي اخذت قرار عنها وانتهى وما اعتقد بنتي تعارضني.

هجان : ورأيي من رأيي الوالد.

أدهم : واذا كلتلكم لخاطري وخاطر العشرة الطويلة بيننا هم راح ترفضون؟

هجان : خاطرك وحد وموضوع رواية وحد..

كام ادهم وكال ..

أدهم : مادام ماعندي خاطر يمكم ولا جيتي من اخر الدنيا وكفت بعينكم هذا هو سووا اللي يعجبكم واعتبروني ما اجيت وما يربطني بيكم غير صلة الدم وماعندي شي وياكم بعد..

جان يحجي بعصبية ويرجف كام راد يطلع ، وصل للباب كام صعب وراه سحبه من ايديه وكال .

هجان : افهمني يا ادهم اخوك مو خوش ادمي مو مال انطيه اختي والله يموتها..

ادهم : وهذا انه دكيت صدري الكم اي شي يمسها ركبتي سدادة ما اكفي ضمان لبنتكم..

هاشم : واذا ماتت بنتي وين الكاك وانت مسافر طول عمرك كاضيه بره.

ادهم : شنو تريد نسويه بس خلي نجمعهم وما ندخل بخطيتهم.

هاشم : بس انت راح تدخل بخطية بنتي

هجان : نسأل رواية ونشوف ومتأكد راح يكون قرارها من قرارنا..

صعد هجان صاح رواية ونزلوا ثنينهم ، سألها ابوها عن رأيها ، والكل تفاجئ من بجت وكالت.

رواية : بابا اني اريده..

هاشم : شنو شنو عيدي ما سمعت زين.

هجان : لحظة يابه انه احاجيها..

حجاها والتفت على رواية ، لزمها من كتفها وحجى بهدوء..

هجان : رواية شنو هذا الحجي انه وياج على شنو اتفقنا قبل

باوعتله وخلت ايديها على وجها وبجت، وخر ايديها ورفع راسها بكف ايديه.

هجان : باوعيلي بدون بجي واحجي وياية لا تخافين..

رواية : هجان اني اريده لفهد.

صفن عليها وابوها عاط..

هاشم : لك موتها لبنت الكلب هاي.

ادهم : عمي على كيفك وياها احنا مو اتفقنا نحلها بهدوء..

هاشم : ياهدوء هذا التريده احلها بيه ،، بله لو اختك تمر بهيج موقف تمررها عادي.

ادهم : طبعاً لا وبعدين رواية شنو مو اختي وما خايف عليها ؟ خلي ابالك ترى رواية ما تفرق معزتها عن نرمان ولا باقي البنات..

تقرب ابوها منها وكال..

هاشم : بنتي عوفيه وارجعي لدراستج و وعد مني انسى كلشي سويتيه وارجع ابوج حبيبج ، ها بابا شنو كلتي..

رواية : بابا اريده..

هاشم : لا اله الا الله.

ادهم : عمي ثنينهم واحد يريد الثاني ليش نحرمهم من بعض وبعدين تصير شغلة ما تعجبنا كلنا..

هاشم : تهددني انت لو شنو؟

ادهم : العفو عمي ماعاش اليهددك بس هذا واقع حال قابل راح تظل حابسها طول العمر وبنفس الوقت لا هي راح تقبل تنفصل عن فهد ولا هو يقبل يطلكها..

من بعد حديث عميق ومتعب قرر هاشم بقرارات مجحفة بحق ادهم ، لو غيره واحد مستحيل يقبل.

واحد منهن...

اذا تعرضت لاي شي أدهم المسؤول وهو يتحساب ، ويتنازل عن كلشي يملكه بالعراق لهاشم ويتعهد بتعهد خطي ويوقع عليه كدام محامين .

تفاجئنا من وافق الأدهم ، ثاني يوم حضروا محامين العائلة ،هجان وكلهم ،

ادهم جان كاعد قراها كلها و وقع ،

من طلعوا عمي هاشم انهارت اعصابه وظل يصيح فهد لوى ايدي وعرف شلون ياخذ بنتي مني ، واذا طلعت رواية منا ، اني ما راضي عليها واي شي يصير بيها ما راح اتدخل..

بعد اسبوع بالضبط اخذوا رواية لبيت جدي عمران ومناك طلعت زفتها .

المضحك بالموضوع فهد سوه زفة وعزم كل جماعته واهلنا وحتى لرواية لبسها بدلة وجبرها تروح صالون.

زفتهم صارت بسيارته والطريق كله مشغل اغاني ويركص ولا كأنما مسوي كل هذه البلاوي ..

اخذها للشمال اسبوع ورجعوا اول ما فات صاح..

فهد : وينها فردوسة ؟ فردوس وينج تعاي تلكي جنتج..

طلعت ماما من غرفتها شافتهم وكامت تهلهل ، كعدوا شوية يمنا وبعدها اخذ زوجته وصعدوا.

ومن هذا اليوم رواية تنزل بس من يرجع فهد للبيت ومن يطلع هي تظل فوك ، ومحذر الكل يحجي وياها..

ومرت الأيام هيج واذا حجت ماما تصير مصيبة بالبيت ، بس رواية جانت تضعف وتتغير وما نعرف شنو بيها ، مرة بابا اصر ياخذها للدكتورة وهي رفضت كالت .

رواية : مابية شي ..

يوسف : ليش هيج ضعفانة ؟

رواية : مقهورة لأن بابا ما يقبل يحاجيني..

كنا نعتقد هذا السبب بس صار موقف غير رأينا ..

من بعد شهرين زواج جانت جوة كاعدة وعجبها تساعد ماما وكفت ويانه بالمطبخ غسلت ماعونين وبعدها وكعت ، ركضنا عليها لا ايد ولا رجل ، فهد جان فوك و نزل على الصوت شالها وركض بيها للهول ، خبصنا خبص جيبوا عطر جيبوا مي عدا هذا الحجي والملامة علية وعلى ماما..

بعدها صحت وقسنا ضغطها طلع نازل شويه..

كعد وخله راسها بحضنه عاكد حاجبه، و وجه الكلام لماما كال.

فهد : انه مو حذرت محد يشغلها عليش خالتها تغسل مواعين.

فردوس : ديله بله مرتك أول مرة تفوت المطبخ وهي عجبها تغسلهن.

نرمان : ترى محد جبرها وهذا حجيك مابيه داعي .

من سمعنا هيج حجينا سكت ، رحت سويتلها عصير شربته تعدلت نفسيتها وصارت احسن..

للعصر أخذها للدكتورة ، ساعتين ونسمع مزايق بباب البيت طلعنا لكينه فهد برة فرحان ويركص ورواية بالسيارة كاعدة وتضحك ، شاف بابا صاح.

فهد : يوسف راح تصير جدو .

ضحك بابا وركض حضنه .

يوسف : مبروك حبيبي يتربى بعزك ..

فهد : الله يبارك بيك يوم الك..

يوسف: اسكت يمعود لا تزعل الحجية خليها فرحانة بيك..

ضحك فهد وراح حضن ماما ، باركناله كلنا وبعدما راحوا اهل المزايق نزلت رواية وباركنا الها ، بابا كال..

يوسف : عرفت بيج شي لان وجهج مو طبيعي ودائما تعبانه وضعفتي.

فهد : هاي شنو دكتور يوسف شخصت حالتها وانه ما ادري لو كايلي ومختصر علية روحة الدكتورة والمصاريف..

يوسف : مبين مرتك بيها شي مو شرط اصير دكتور واعرف.

ضحكنا ، وبيومها العشا والسهرة جانت على حساب فهد.

ورة اسبوع بابا وجدو وعمامي وباقي الولد كلهم راحوا لبيت عمي هاشم وأخذوا وياهم فهد ، خلوه يوكع على عمو ويعتذر منه وتصالح ويه هجان ، صح الوجوه بعدها ثكيلة بس ذاب الجليد شوية شوية بينهم ورجعنا نختلط ونلتم بالمناسبات والجمع..

مرت الأيام وفهد طاير من الفرح وكل شهر ماخذ روايته ويراجع بيها ، وكل يوم يجيبلها شي ، والاكل اللي يعجبها يوصل يمها..

وبيوم الصار عندها وجع دخلنا بأنذار عبالك كلنا حوامل بسبب فهد ، جابت ولي العهد المنتظر والذبايح جوة رجليها مجرد دخولها للبيت وبحضنها علي..

مرت الأيام وأول اشهر من سنة ٢٠٠٣ جانت كلش حلوة ومرتاحين بيها لا مشاكل ولا ضيقة خلك..

مر أسبوع وسوينا حفلة لعلاوي وعزمنا الأقارب كلهم من بعد هذا اليوم ، حسيت بملاك تغيرت وصارت تهتم بنفسها أكثر وكلما ييجي هجان وجهها يتغير وهو هم ، حسيت بينهم شي ، كثرت جيات هجان للبيت والكل متفاجئ شلون هجان نسى الصار ويه رواية وسامح فهد ، حتى علاقتهم رجعت ورجع سهرهم ، بالاخص من انجمعنا ببيت جدي بعدما كعدنا على خبر سقوط بغداد بطلب من جدو رجعوا بيت عمي هاشم ويانه ..

وعمي هاشم بوقتها التحق ودخلنا كلنا بانذار خفنا عليه وتوتر البيت ، بس فهد خفف علينا التوتر كلما جدي يحجي يكول.

فهد : يابه عليش خايفين ترى العار ما يموت.

وقسم يضحك وقسم يرزله ما يقبل عليه..

ضحكنا من فهد شال علي وكال..

فهد : لك بابا علي انت اجيت وجبت كل الخير وياك ماتكلي شسويت هجمت العراق لو حررته...

ضحكنا وهجان اجه اخذ علي منه وكال..

هجان : لك حبيبي خالو شوكت كبرت ولك راح تصير رجال.

نط فهد كال..

فهد : غير خاله عار ولاهي بالملاهي..

هجان : هاا بدينا.

فهد : اهووو جدي وينك جدو جدي ..

عمران : وسم شبيك .

فهد : شنو القصة جدي اربطوا هوايشكم..

لزمه هجان وظل يضرب بيه وفهد يضحك.

هجان : نذل منو ذوله الهوايش؟

فهد : عليش أخذت على نفسك؟

التفتوا ثنينهم من ملاك كالت.

ملاك : هجان هذا الجاي..

يتبع.

مساء الخير عذروني على التأخير والله يساعدكم على التراب مال البارحة والتعزيل😬