ڤيلا عدنان
لوؤي جاي عندها بشوية كيحاول يهدنها وحيد ليها داك ديكور من يديها ضاحك عليها و باس ليها راسها
لوؤي : ديري عقققلك ... ضربي ولدك وهو قد هاكا محشمتيش
رتاج : ونتا محشمتيش ماشي عند بنت عمك
لوؤي : وراه باغيييها الوالدة .... ( بحب كبير فعينيه ) والله تااااباااغييييها ....
رتاج بدات كترمش فيه وهي كتوشف فعينيه شحال فرحانين وهو كيقولها ! ميخفاوش عليها نظرات الحب وهي عاشتو ! ... عارفة ولعة الحب وشحال كتخلي من اثار على الواحد ، عارفة مزيان نظرات الرغبة القوية فشي شخص كيفاش دايرين ، للحظة ردها لماضيها وأيامو مع عدنان ....... ورجعات تنهدات ...
رتاج : شوف اولدي .. انا ماشي مبغيتش .... انا اراه قدس بنتي ...و بالفرحات عليا ولدي بتزوج بوحدة باغاها قلبو ... حيت انا عارفة معنى تتزوج بواحد كتبغيه ... كتولي مدوز حياتك كولها ونتا كتعيش معاه كل نهار بحالا نهار جديد ( لؤي تبسم ليها ) ..... ولكن اولدي باقيا البنت صغيييرة بزاف ... على الاقل تاتكمل قرايتها
لوؤي : تانا ماقلت واالو الواليدة .. بششششوية علينا مازربانيينش ....
رتاج : لاااا .. ملي بشوية علينا متقربش ليها تاتكبر البنت تبغي نتا تكون عندك ختك صغيرة ويقرب ليها ولد عمك !
اوؤي : ( كيحك فشعرو ) : وصاافي صافي .... سيري عند راجلك تنعسي بعدي مني .. عارف اش كنديرررر ....
رتاح : فخبار ماماها !
لؤوي : منضنش ...
رتاج : اممممم .... ورد بااااالك .. ماخصنا مشاكيل اولدي ... ها جود قدام عينيك شفتي اش طرا
لوؤي : هو بوحدو وانا بوحدي الوالدة .. جود كون ماشي لاكسيدون كان غيكون قد هضضرتو .... ( تنهد ) وصافي دابا هنينا ماعندك مناش تخافي سيييري تنعسي وغذا نهضرررو ... ( شافها باقا واقفة ) ماتخافي من حتى حااااجة .... راني بعقلي وعارف اش كندير ...
رتاج تنهدات ونزلات راسها ومشات لجناحها وهو سد موراها لباب ودار يديه فجيابو وبقى كيشوف قدامو مدة .... ورجع تبسم بشوية ملي تفكرها .... تاقاطعو تيليفون من خدمتو ومشا كمل كانو كيعلموه ان ايمايلات ومعلومات جداد وصلوه ..... ومشا يكمل خدمتو لي هملها هاد اليومين بسبب الانشغالات العائلية .. ولقى راسو ملف جديد اخر كيتسناه من غير ملف سلفادور ...
∆ قصر الاسماعيلي ...
جود جالس على كرسي فالبيرو دأسد والطبيب حداه وهو معلي راسو وكيشوف فالسقف وباينة من عينيه طالع ليه الدم .. حيد ليه واحد الطربوش من راسو كان عبارة على قبعة بلاستيكية عامرة اسلاك ... حيدها ليه وبدا يقيد فالورقة كيهضر مع اسد بالانجيليزي بحكم جنسيتو الامريكية ..
- ماعندكش مناش تخاف .. كخيز كيف ديما .. غير يرد البااال لنفسو وميعاودش يتعرض لتوترات و ( قاطعو جود بحدة ) ..
جود : تقدر تمشي ....
اسد غير شاف فجود ورجع شاف فالدكتور وما ليه بعينيه ... عارفينو مكيحملش يسمع تشخيص على مرضو ....والدكتور هز ماطيريالو وعطاه للممرض لي معاه وخرج من البيرو واسد تبعو ... لامار كانت باقا فالجناح شافتهم خرجو وهي تقرب عند الطبيب لايحة شالها فوق راسها
لامار: صافي فاتو الحاااال !
دكتور : لااا راه رد وعيو ... متخافوش ... كخيييز عادية غير ردو بالكم تقدر تحول لشي حاجة اخطر .... من صغرو وحنا كنعلموكم ونحذروكم يبعد على التوترات والاعصاب .. مامزيانينش ليه فالحالة ديالو .... والمرض ديالو مزال ماتعالجش كليا ودماغو باقي مثابتش فالجمجمة . .. حاولو تبعدووووه ما امكن على التوترات باش ميعرضوهش لشي كخيز خطيرة .....
خلاهم وخرج واسد سد باب الجناح وضار عند لامار لي باقا مخلوعة ... فاش كيجيوه هاد لي كخيز مكتقدرش حتى تشوف فيه ولا تهضر معاه بالخلعة ..
لامار : ( شادة على قلبها ) واش فاتو الحااال !! تفكر كولشي صااافي ؟؟؟؟؟
اسد : يمكن .. ماهضرش بزاف ( لامار جات داخلة عندو هو يشدها ) خليييه شوية ونمشي عندو .... خليه شوية مع راسو ....
لامار :واش نمشي نجيب دواه ؟
اسد : سيري .. وجيبي ليا حتى ديال النعاس ....
لامار : تنعسو ؟
اسد : مكاينش شي طريقة اخرى باش يتكالما دابا من غير هادي .... ماشي وقت الهضرة وهو كايحكر ..... ( كايدوز يدو على وجهو بعياء)
جود غير جالس ومطلع راسو لفوق ويدو فوق البيرو كتلعب بأقراص معلقين فاسلاك رقاق محطوطين ديكور فوق البيرو دباباه .... كيضرب وحدة بيديه وكاتصطدم بلوخرين وتصدر اصوات بنسبة ليه كيريحوه شوية ! ....
هاد المرة نسى كاع أنه خاطب ومخبين عليه .... بقدر ما كيفكر غير فحالتو ... فلحظة كولشي بياض قدام عينيه .... وغير بشوية بشوية عاد بدا يشوف فبيت باه بطريقة كتخليه يحس بحال شي بيت كان كيعرفو شحااااال هادي وشحال هادي مشاافو ! تماما بحال احساس الانسان العاقل وهو كيشوف صور لشي دار قديمة عاش فيها طفولتو ... ويبدا يقول ! هادا بيتنا،!!! وهنا كانت تلفازة وهنا ترية ...... كذالك جود ملي كيفقد ذاكرتو من بعد النوبة ..... كايدا يتفكر غير جرعة جرعة ....ملي كان كايشوف كان كيحس بجناح واليديه مألوف ليه ولكن امتى شافو ؟ ... شوية بشوية ذاكرتو عاد تقادات ولكن كترد ليه الذكريات دفعة واحدة حتى كيتلخبطو فدماغو ويحاول يقادهم حاجة حاجة ..... كانت فوضى عاااارمة فراسو .. الارتجاج ديما مخلف ليه فوضى كبيرة ..... الفوضى لي ديما كاتهربو انه يخشي راسو فالمسؤوليات ويبقى عايش غير على اهوائو و نزواتو ... هو ماشي ديال للالتزام لي يقظر ينساه !
كيشوف حاليا فالسقف وكيفكر فحالتو دابا ! ديما كتجيه هاد النوبة .... ولكن ليوما غييير ! ليوم كيشوفها غييير .... حيتاش شحال هادي كتجيه وكتفوتو وعادي كيقول كيف نسيت كيف تذكرت .. عادي ..... ولكن باش تجيه نوبة وهو شخص خاطب ! كيغايدير مستقبلا ؟ كيغايدير يتحمل مسؤولية هاد الخطوبة والزواج و الاسرة لي غايبني ..و لي فاي لحظة يقدر ينساهم ؟ شكون غايصبر على هاد الحالة من غير واليديه ؟ زعما كاينة لي تصبر انه كل صباح ينساها !!! كاينة لي متحرجوش ؟ ولي،متحسسوش بمرضو لي مكيحملش حتى يسمع عليه !!!
وهاد البنت واش هدا هو السبب لي خلاها تمشي فحالها ؟ حيت كون كانت باغاه دبصح كان يلقاها واقفة معاه !!!
هبط راسو بين يديه كيتنهد شادو .... عارف راسو ثقييل فشي حاجة سميتها الذاكرة .. ديما ذكرياتو مخربقين وماعندو تاحاجة تابتة .. مسستحيل يقدررر يتحمل شي حاجة سميتها مسؤولية بحال هادي ..... ولكن باقين الاسئلة فراسو باقي مخربق باقي مرووون باقي بزاااف دالحوايج مامستفينش فراسو ... كايقول مستحيل انا نكون خطبت غير هاكاك وفهاد السن ! كايحس كانت شي حاجة اخرى ......
حتى دخل عليه أسد ... علا عينيه للباب وبانت ليه حتى لامار معاه لي ملامحها حزان وشفارها فازكين ... مل وعيا من انه يشوف والديه بحال هااكا ... كيزيد يكره راسو ومكيبينش .. كابتها فلداخل ديالو فقط .....
اسد : جود ؟ رتاحيتي شوية !....
جود تنهد وناض وقف شاد على البيرو بجوج يديه كيشوف فيهم ...
جود : معرفتش علاش جبتو داك خينا ... حالة ديما كتوقع ماشي جديدة عليا ....
اسد : حتى دابا ماوقع والو ..... هاهو مشى ....
لامار : جود ... حبيبي ( مشات باتجاهو وشدات فوجهو وهو كيشوف فيها واضح مزال معصب واسد كيحل القرعة دالما خوا فالكاس ولاح فيه الحبة دالمنوم ) سير اولدي ترتاح شوية مشا الحال .. وغدا والله حتى نهضرو فكولشي ونعاودو ليك كولشي ...وتفهم كولشي غيييير بشوووية عليك .. رد البال احبيبي لصحتك راك مرييض متخلعناش عليييك
جود : انا ببيخير ... ( حيد ليها يدييها من وجهو و بعّد كيتمشى فالبيرو كيحك مور عنقو ) ماعرفتش علاش درتو هاد الحالة على كحيز كتجيني ديما .. ياك كنفيق ناسيك كل صباح ... ماشي حاجة جديدة عليكم هادي .... ( وقف قدام اسد وشاف فيه ) خلينا نكملو هضرتنا .. باقي بزاف دالحوايج مزال باغي نعرفهم .....
اسد : لي باغي تعرفو كولو غنعاودوه ليك ... ( هز داك الكاس ) شرب بعدا ونخرجو من هنا ونهضرو ....
جود : ( بعصبية ) واش وقت الما الواليييد .. هضرووو قولو كاع لي معارفوش .. بلا منسوووول نتوما عاودو ليا من لووووول .. ومن الاححححسن ماتخبييييو والووو .. حتى حاجة اخرى ... كلشي من حقي نعرفو ... ( ضار شاف لامار ) راه برب تعالى ونعرف مزال شي حاجة اخرى مخبيينها عليييييا كمارتي مغتشوفوهاش
لامار شافت فاسد بخلعة كتررحاه بتدخل باش مايتعاود الامر تااني ... كايتعاملو معاه بحالا كاتعاملو مع شي قنبلة ......واسد كايعضر معاه مهدن .... حيت من صغرو هو لي كايعرف ليه ويعرف يتعامل مع مرضو بعقلانية اما لامار كتغلبها العاطفة ......
اسد : من حقك تعرف ... ( مساير معاه مخلوعين عليه ) كوووولشي نعاودوه ليك ... ششرب دابا ...دير ليا خاطري ...... وزيد نخرجو من هنا ونهضرو
جود : ( شد عليه داك الكاس شربو دقة حطو على البيرو وخرج للجناح واسد تنهد تبعو ) هااانا ..... ( جلس على الفوتوي ) هانا كنسمع
لامار : ( كتشوف فاسد وفيه وجلسات تاهي قدامو شابكة يديها مع بعضياتهم ) ااا .. جود ... دابا نتاا ملي فقتي ... يااااك .. ه هادي ربع سنين .. ففقتي ... ووو داك ساع (قاطعها)
جود : ( بحدة ) ماباااغيش الاماااار نعررررف اش وقع ملي فقت ... باغي نعرف قبببببل ماانفيييق ......
لامار شافت فاسد بمعنى كيغانديرو نهدنوه حتى يسرى فيه مفعول المنوم واسد تدخل ....
اسد : فخبارك الى بقيتي هاكا راه مغنعرفوووش نهضرو ! ....
جود نزل راسو لتحت كيحاول يتحكم فرااااسووو ورجع علاه فيهم عينيه حوومر وبداو يثقالو
جود : واش عارفين على موقف حطيتوني فيه دابا
أسد : كانت رغبتها هاديك ورغبة عمك ومراتو و ولادو .. هوما لي مبغاوكش تعرف . ماشي حنا .. يعني رخف فيك النفس راه ماعندك علاش تحس براسك بلا كلمة حداهم ...
لامار : باباك عندو الحق . هوما كلهم عارفينك نتا ناسي ومفخباركش ..... متعصبش اولدي ....
جود : انا الى مفخباريش هوما فخبارهم والى نسييت هوما عاقيلن .... ( رجع سكت مدة كيتفكرها رجع شاف فيهم ) واش كانت علاقة كبيرة و لا غير نزوة ؟ هاديك البنت واش كانت باغا الزواج بصح ؟ ولا انا ولا شكووون !!!
لامار : ( كتحنحن وترد شعرها لور ماعارفة ماتقول ) ا .. ا اه .. و ولكن كنتوو صغاااررر اولدي .. زعما مزال بلا عقل ..
جود حس بالدوخة وراسو بدا يديه ويجيبو تاني وشد عليه ظنها شي كريز ومبغاش يبين ليهم ووقف باش يطرد هادشي واسد حاضي معاه لا يطيح ....
اسد : جود !
جود : والو .. ا انا . ( بانفاعل ) انا بييييخير ..... نتوما باش عرفتو هادشي .. انا لي جيت قلتها ليكم ولا كيفاش .... ب ... باش ( داخ ) باش عرفتونا ... مع بعضياتنا
اسد : نتوما قلتوها ( تابعو خايف يطيح يشدو حيت بدا يختل توازنو ) جود كتبان ليا ديخان .... جلس لهيه ...
جود شاف على السرير بدا يبان ليه منو جوج .. ومشا بشوية جلس ..... وشاف فاسد وعينيه كيتسدو واسد غير مسايرو فوقاش ينعس
جود : و ..... فوقااش .... ف .. فوقاش د ....
راسو بدا يتقال وعينيه تسدو حيت الكينة لي عطاه اسد فعاااااالة بحال البنج يلاه تگر فيه وخصيصا خرجها الطبيب للحالة ديالو ... طاح راسو على السرير واسد عاد رخف فيه النفس وشاف عند لامار لي كتشوف بملامح متأسفة على حالة ولدها فين وصلات .... ... وهو رجع شاف فولدو كايحمد الله لي سالات هاد الليلة بيخير .. وكايحاول يستعد لالحرب لي كتسناه غدا معاه ملي يرد وعيو نيشان .....
ڤيلا يونس
جالسة على السرير ببيجامتها دالنعاس .. حاطة يديها على السرير كارزة على الكوفرلي وكتشوف فنقطة وحدة قدامها سااااهية حتى كتسمع الباب كيتدق ... وموراها سمعات صوتو
اياد : پيلي ... نقدر ندخل !
بيلي غير سمعات صوتو علات عينيها بزربة ووقفات شافت مباشرة للمراية وبدات تمسح دموعها وتنش على وجهها وحاولات تتبسم بصعوبة وقالت بصوت كتحاول ما امكن تخفي منو نبرة الانكسار
بيلي : د ...خل ا اياد ....
اياد حل الباب وطل عليها براسو وتبسم
اياد : مزال ماجاكش النعاس
بيلي : ( كتحاول تبتسم بسيف ) لا ... فيا ... لقيتيني غندخل اصلا نعس ... زيد دخل ...
مشات للفوتوي جلسات وهو سد الباب ودخل وشاف لركن البيت بانو ليه كاع ليكادو ديالها وكمش ملامحو مستغرب !! مستحيل بيلي تتاجهل لي كادو !!!!!
اياد : مازال محليتيهمش !
بيلي : ( شافت لجنب البيت بانو ليها كادوياتها تما نساتهم كاع ورجعات تنهدات وشافت فيه ) ا . للا .. غ غير ... ( كتحك فشعرها ) عييت شوية فسواغي .. و وقلت تالغدا
اياد : ( علا حجابو ونزل راسو نعاها ) نت تخلي لي كادو حتى لغدا ؟ .... ( باستغراب كتر ) پبلي ! دو يو هاف ا بروبلم ! "عندك شي مشكل"
بيلي : ( سرطات ريقها وضحكات ) نوووو .. غير عييت اخويا ( بغات تقلب ليه الجو ) اصلاااا انا كبرت على نتحمس للكادويات هاكا .. وقلت غدا ونحلهم حداكم .....
أياد قاد وقفتو حيت كان محنى لعندها كيوشف معاها كيفاش متوترة واااااضح وضوح الشمس انها ماشي فالمود .. وكان غيستغرب لو لقاها فالمود ... ميمكنش بعد داكشي دقبيلة تكون صافا .. وهو اصلا مجيتو لهنا غير باش،يشوفها كيبقات .... واش تعدات .. ساعة غير من لي شاف كادوياتها لي تتموت باش تحلهم ماداتهاش،فيهم عرف المووووضوع مهرسها بالبيان ....
اياد : وشنو خلا البرانسيس تكبر لهاد درجة كاملة فنهار واحد !!!!
بيلي شافت فيه كاتفكر شنو لي هلاها تكبر بالضبط !! جود ! حبو ليها،؟ نسيانو و لا رجوعو ولا الرفض دعائلتها ..... ورجعات تبسمات بانكسار ونزلات راسها .....وهو مشا جلس حداها وهي كحزات باش دير ليه بلاصة وكتشوف لعندو وتبسم وترجع تشوف قدامها وهو طلق يدو موراها فالفوطوي ... طول فييها الشوفة عاد هضر ....
اياد : ملي كنت صغيرة ... وكنت كاتقراي فالبريمار .... وكانو كيسولوك علاش نت عينيك زرقين وخوتك لا ....عاقلة اش كنتي كتقولي ليهم !
بيلسان تفكرات هادوك ليام وضحكات وسط بؤسها ، كانت ابتسامة حسرة على شفايفها على دوك ليام دالبراءة ونطقات وهي حابسة غيمة من الدموع تزل
بيلسان : كنت .... كنت كنقول ليهم .. اياد وزياد كيديرو البسالة بزاف وكيضربهم بابا وديما كيبكيو ... داكشي علاش عينيهم كحالو .... وانا .. مكيضربنيش ومكنبكيش .. داكشي علاش بقاو زرقين ونقييين ..... ( هبطات راسها كضورو على افكارها الطفولية كيفاش كانو )
اياد : ( تبسم ونطق ) داكشي علاش .... باغين نبقاو ديما نشوفو عينيك زرقين آپيلي ( بليي شافت قدامها وعلات راسها فيه وتاهو شاف فيها وتبسم ) مغيجيوش معاك الى كحالو .... ( وسع ابتسامتو بحنية كتر ) خليهم ديما زرقييين .....
بيلي زيرات على شفايفها وجمعاتهم حابسة داك البكية حتى تلاحت فحضنو وعنقاتو وهو كيطبطب على ظهرها مخليها تاخد رااااحتها حيت عارف مزيان قلبها شنو هاز ...بلا ميسولها وبلا مايهضر معاها خلاها على خاطرها حتى كملااااات بكاها وشهيقها .... حيت هو عارف السبب اذن علاش غيحرجها ! .... وبدات تبعد منو باقي كتنخصص وكتحاول تجمع راسها و هو تقلب لجنب وبدا كيرد شعرها لور ...
اياد : راك باقا صغيرة .... الحياة كلها قدامك .. نت يلاه دخلتي للعشرينية ... يلاه دخلتي للسن لي غتقدري تقرري فيه حياتك كيغادا تمشي ... ما تخلي تاحاجة تفسد عليك قراراتك .... نت غتقرري حياة تليق بعينيك الزرقين وحياة لي غتخليهم ديما زرقين .... الحياة لي غاتكحل ليك عينيك .. .بعدي منها .... حتى لاكان صعيب تبعدي منها حاااولي ... زطمي على اي حااااجة غادي ضرك .... واخا يكون قلبك ... وزيدي لقدام .. تاحاجة ما تستاهل .... الحياة الجديدة الا بغينا نبداوها .. صعيبة فيها غير الخطوة لولا .. منبعد كولشي كيسهال ( شد ليها وجهها ) مفهوم برينسيس !
پيلي نزلات راسها وحركاتو بآه وكلام خوها كان بحال بلسم على جروحها وهو باس راسها وناض وصل تالباب وقاليها " تصبحي عىى خير " ومشا وهي بقات متبعاه حتى مشا وعلات راسها لفووووق كتنفس ....
ماعارفاش راسها علاش كتبكي ومالها وعلاش كتحس بهاد القهرة واش واقع ليها ... هاهو رجع عندها هاهو باغي يبدا معاها حياة اخرى ... علاش كتحس كولشي غيتعكس وعلاش كتحس هي برااااسسسها مامستعداش تعاود هادشي من جديد ... علاش ملي كتبعد عليه كدير عقلها وملي كتقرب ليه ويكون حداها كتضعاف ويتخربقو وراقها وتلقى راسها فحضنو ! ....
صباح جديد ....
حل صباح جديد كيف العادة على قلعة الروكان ... صباح صيفي مرافقاه شميشة سخونة كداعبها ضبابة البحر ...
الساعة العاشرة ....
رقية مانزلاتش من جناحها وفطرات فيه بحكم احمد صبح عيان ...
القصر كان خاوي من الافراد لان كولشي باتو فديورهم من غير احمد ورقية ومروان لي رجعو للقصر ..
قسم فاقت بكري وشدات الطريق لطنجة لاجتماع د لي كابيطين بخصوص برامج الرحلات الصيفية لي غينضمها الميناء الشهر الجاي لا فتجارة لا فسياحية ....
اسد ولامار كانو فايقين او بالاحرى مزال منعسوش بسبب الهم .... اسد بات فالبيرو ديالو ولامار مرة تنعس حدا ولدها مرة تجي تقصر معاه حتى طلع الصباح ونزلات صاوبات الفطور وطلعاتو للبيرو....
هادو هوما الوالدين ... الولاد يعشيو المشاكل وهوما لي يهزو الهم كامل ..
كان اسد جالس قدام البيرو وهي فالكرسي كتشرب قهوتها حداه ...
لامار : غير قوليه كولشي متخبع والو ....
اسد : مناويش نخبع اصلا ... ونت عارفاني من لول مكنتش باغي هادشي يتخبع عليه ... داكشي علاش البارح ماقديت نقول والو ... حيت عندو الحق .... ميمكنش نتجابه معاه وحنا لي غالطين فحقو ...
لامار : كون غير سولنا اياد وبيلي بعدا ...
اسد : ياك هي لي قالتها ليه ....
لامار غير طلعات راسها لفوق كتنهد على هاد الحالة وساكتة واسد كيشوف قدامو فالبيسي وكيحاول يلقى واحد الضوسيي لي كانو مجموعين عندو فيه جميع الصور والفيديوهات لي فيهم جود وبيلي ولي كان خداهم من الپيسي الشخصي ديالو لي خبعوه عليه فاش فاق .... وبدا يحولهم لواحد الكلي USБ
جود كان ناعس فسريرهم على ضهرو ومعنكش حيت اول مرة ينعس بحوايجو و غير لامار لي حيدات لي السبادري ... ناعس بوضعية الجنين على غير عادتو ... نعسة هااادئة جامع رجليه عندو وهااادئ ......
بدا يحل عينيه بشوية ... رمشة رمشة هما كيتحلو ليه فسقف الجناح ... بحركة لا ارادية هز يدو مسد جبهتو بعياء من هاد النعسة لي حاس براسو نعسها رغما عليه ! ... ناض تكا على السرير وهو كيحك على وجهو ويحاول يتذكر تاني و يستف فراسو افكارو وشنو اخر حاجة عاشها قبل ماينعس وهوما يندفعو الاحداث كيف العادة لراسو بفوضوية عاد كيبداو يتقادو .... كيعوج عنقو ويطرطقو وشاف قدامو لقا راسو باقي فجناح واليديه .... وشاف لحالتو باقي لابس حوايجو وبدا يرمش .... كيفاش نعس هاكا ! هو ماشي خفيف النعاس لهاد الدرجة ! .... بدا كيفكر اسد وهو كيقوليه " شرب غير هاد الكاس دالما ونهضرو " .... غير تفكرها بدا يضور فراسو بالنفي ، عاد عرف شنو نعسو ..... تنهد وحيد عليه الغطا ونزل من السرير .... شاف لطابل دونوي بانت ليه قرعة دالما وكاس خوا لراسو يشرب .... فايق وحاس براسو عطشاااااان ....
لامار غير سمعات حس الما كيتخوا وتقرقيب القرعة والكاس وناضت بالزربة خرجات من البيرو وهي تشوفو جالس على جنب السرير كيشرب .. طلع فيها عينيه و حط الكاس على الطابل دونوي وهو كييدوز يدو عل شعرو كيرجعو لور وملامحو مبوقين ... كيف نعس كيف صبح باقي بنفس الملامح المعصبين
لامار : جووود ... حبيبي صباح الخير ( مشات باتجاهو ) كيف صبحتي شوية .. مكيضركش راسك ...
جود : ( علا راسو فيها ) تنعسوني گولوهالي نمشي لبيتي ونعس .... ماباغيش تهضرو گولوها .. متبقاوش ديرو ليا كي شي ولد عشر سنين بيناتكم .....
لامار : لا اولدي ماشي هاكاك ... حنا غير بغيناك ترتاح وخييفاانيييين عليييك .... راه خوفنا عليك هو لي كيخلينا نديرو هادشي
جود غير شاف فيها وتنهد ورجع ناض مشا لبيتو
غير وصل ديريكت دخل الدوش .. نصل حوايجو دخل تحت الرشاشة يلاه حس برااااسسسو توگد ملي نزل عليه الما .... حط يديه على الحيط قدامو والرشاش كينزل عليه مخلي شعرو كولو يسرد وينزل على عينيه وهو مهبط راسو لتحت مخلي سيالة ديال لما نازلة من شعرو للتحت .... يديه فالحيييط واااضح انه مززيرر عليهم غير من داك العروق لي برزووو ...
هضرتهم وحديثهم ديال ليلة البارح بدا يتسرب لودنيه ولكن قبل مايكمل قاطعو مشهد القبلة لي جمعاتو ببيلي .... ورجع تاني زير على عينيه كتر وصوتها كيطرق فراسو وهي كتقوليه " حيت عمرك بغيتي شي وحدة كيف بغييتيني انا ...... وحيت مكاينش شي وحدة كتعرفك كيف كنعرفك انا .... " " شي حاجة ! هه ! ( بانكسار ) كان بيناتنا كولشي ...... " زاد غمض على عينيه وكيزيد فوتيرة انفاسو تحت الما .... ميمكنش يكون هادشي صحيح ! الى كان هادا كامل حب بيناتهم علاش ماحس بوالو نهار شافها ! هو فعلا حس انها مألوفة ... حس بالاعجاب الشديد جيهتها ولكن ماتحركش قلبو .. هو مزال عمرو جرب احساس قلبو يتحرك .. معارفوش واش ميت ولا جامد ولا ميكعرفش يحس ! علاش كيبغي غير من عينيه ! علاش كيحس براسو مزال ماجربش يبغي من قلبو ... علاش احساسو اتجاهها نهار شافها اول مرة نفس الاحساس نهار تلاقى الروسية اول مرة ونهار تلاقى كاع دوك لي تعحب بيهم .. علاش كيحس انه غير يلقى وحدة ماحسن منها يقلب عليها !!!! علاش مكيحس تاحاجة من شعور الحب تجاهها !!!!!! واش حيت عاد عرفها و لا مزال ما ولفها ولا مزال ماتفكرها ! ولكن هو فاقد غير ذاكرة الذكريات ... ماشي مشاعرو ؟ حتى الى رجعات ذاكرتو غاترجع ليه غير الذكريات !!! ...والمشاعر شكون يرجعهم ! شكون يأكد ليه انهم كانو !!!!! واش المشكل فيه ؟ واش هو مكيسواش لهاد الدرجة !!! .... وكيزيد يقهرو كتر هو خاطبها ! بيناتهم علاقة رسمية والطريقة باش هضرات معاه كتوضح انها كتبغيه ! ....
رجع تاني علا راسو لفوق و حل فمو بشهقة كيتنفس بقوة مكان حابس نفسو تحت لما بتفكير ......
ورجع كيشوف للجنب كايحاول يفكر بطريقة اخرى .... علاش القبلة معاها مكانتش بحال القبل دالبناات لخرين مدام الاحساس نفسو ! علاش القبلة كانت جديدة عليه .... الا كانت بحال البنات لخرين علاش حس براسو مستمتع كتر ... علاش شوفتو فوجهها خلاتو يكون ضعيييييف ! عمرو تغزل ولا قال لشي بنت من البنات لي كيكونو معاه " ضحكتك زوينة " وماحس براسو مع بيلي كيفاش خرجها ! .... اذن فعلا هاد البنت غايكون كان كايبغيها !!! واش هاكدا داير الحب ؟
روينة كبيرة وفوضى عارمة فالداخل ديالو ما عارف ليها حتى شي تفسير مد يدو بعنف وهز الشومبوان ديالو وخواه فوق راسو وبدا كيرغويه بيدووو ببقققسوة كيحاول يطرد معاه دوك الافكارر ويرتاح شوية ... مرضو مامساعدوش انه يفكر مزيان حيت غير كيزيد فوتيرة التفكير كتحاصرو الدوووخة و الحريق دالراس .....
مرضو ماقاد يجيب ليه ذكريات وحتى الى قالوهم ليه مقاداش حتى يحللهم .... لهاد درجة هو مريض !
سالا الدوش ديالو وخرج لجناحو لاوي عليه فوطة ولاخرى كينشف بيها شعرو السارد ... ريحة الباندوش والشومبوان ملات الجناح ودخل لدريسينغ شاف السيريات لي محطوطين لهاد اليومين لي عطلة بنسبة ليهم .... هز شورط بيض نايك بسيرور وتيشورط ديالو كحلة .... هز سيشوار صغير معلق تما نشف بيه شعرو وردو لبلاصتو ... وركب ساعتو ....
معارفش راسو اصلا فين غيمشي حاجة وحدة لي باغي هو يخرج من هنا ... كيحس براسو مخنووووق .... ما باغي يعرف والو بعد ماكان مرون الدنيا باش يعرف ويعاودو ليه دابا مابقى باغي يعرف واااللللووووو ... غيري بمشي لشي بلاصة لي يقدر يحط فيها بيلسان فشي خانة مناسبة فيه لداخل عاد يقدر يقرر ....
يلاه غيخرج من الدريسينغ هو يسمع الباب تحلات ... من بارفانو و مشيتو عرفو بلا مايضور كان واقف وداير يدو فجيبو كتبشوف فيه
اسد : باش كتعجبني ... كتعرف تبدا نهار جديد .....
جود : ( ضار عندو ولبس كاسكيطتو ) هادشي باش كيفيدني مرضي .... ساهل ننسى .....
اسد : ( مطول الشوفة فملامحو المعصبين والتالفين ) مكنشوفكش ناسي .....
جود : حيت ولدك منحوس .... لي مكيبغيش ينساها كينساها ... ولي كيبغي ينساها ... ( ضور راسو بالنفي ) والله لاتنسات ليه ....
اسد تنهد وحيد يدو من جيبو ومشا لعندو وقف قدامو .... كانو تقريبا بنفس الطولة .. ونفس الكتاف ونفس النظرااات .... واسد هز يديه لي وحطهم على كتافووو كأنو كيعطيه قوووة ....
اسد : ملي كنديماريو الطموبيل ... وكنعمرو الموطور ... خاصنا نكونو عارفين فين غادييين ... اما الا بقينا كنضورو غير فبلاصتنا وحنا معارفينش فين غنمشيو ... راه غيضيع لينا غير الگازوال ..... اولا لا آلميكانسان ! ....
جود : ماعارفش الطريق ....
أسد : مغتعرفش الطريق ونتا مزال مامقررش فين غتمشي ....
جود : كيفاش غاندير ننقرر !
اسد : كنمشيو لبلاصة لي كنعرفو راسنا غنكونوو مرتاحين فيها .....
جود : مكاينش شي حاجة كنرتاح فيها من غير نعيش نهار بنهارو ....
اسد : داكشي علاش الطرقان غيبقاو ديما قدامك مشتتين
جود : كنرتاح فيهم وهوما مشتتين .... وحتى الى بغيت نقادهم مغانعرفش .....
اسد : ماشي نتا لي غتقاد هاد الطرقان ... هاد الطرقان غيتقادو راسهم .... نهار يدخل ليهم الشخص المناسب ...
جود : مادامهم باقين مشتتين قدامي .. اذن مزال مدخلش ....
ايد : إگزاكتلي ...
تنهد وطلق منو وضار كيحك تحت لحيتو حتى سمعو
جود : كنت مواعدها الواليد !
اسد : ( ضار عندو )وباغي توفي بوعدك !
جود : مكاينش شي حل اخر .. خاصني ( قاطعو )
اسد : واش نتا .. باغي توفي بيه ؟ ..
جود نزل راسو مدة ... عاد هضر
جود : من نهار عقلت على راسي وانا كندير فالعلاقات .... وعمرني فحيااااتي وهمت ولا واعدت شي وحدة بالدوام .... وكندير جهدي كامل باش حتى ضعف مايديني نواعد شي وحدة .... كنآمن ان نجيها فاص ..سهل من نخليها عايشة على شي حلم مغنحققوش ليها ... سهل مانعطيها كلمة ونخليها .... باش فلخر نلقى راسي عاطي ديجا كلمة هادي ربع سنين ومعاقلش .... منقدرش
أسد : نفهم منك .. غتكمل على هادشي غير حيت عندك هاد المبدأ .. ماشي حيت نتا باغي ( جود نزل راسو ) دابا نتا .... خايف متوفيش بكلمتك باش متعذبهاش .... على اساس الا عاشت مع واحد ماباغيهاش .. ماشي عداب !
جود : يمكن مع الوقت نبغي ....
اسد : هاد يمكن مكنبنيوش عليها قرارات كيخصو حياتنا .... أي قرار كيخص حياتنا تكون فيه كلمة يمكن كنلغيوه .... مكنخاطروش .. حياتنا مكنقمروش عليها ....اما آه ...اما لا .... من غير هادشي راه كتحكم على راسك وعليها بحياة كحلة ....
حود : منقدرش نعيش حياتي مزال وانا مواعد بنت اخرى !! ماتربيناش على هادشي آلوليد
أسد : تعذبها مرة ماشي هي تعدبها حياتها كاملة .. البنت ربع سنين هادي وهي كتحاول تنسى .. مغتجيش نتا دابا تفتح ليها داك الجرحة لي بدات تبرا باااش تزيد تمرضها ! ..... يااا داويها ليها نيشان .. يا خليها تدواي راسها ....( جبد من جيبو لور يو اس بي ومدو ليه ) شد هدا شوف اش فيه .... قلت ليك من قبل الى مكانتش عندك ذاكرة نصنعوها ... هاهوما ذكرياتك لي نسيتي هنايا ... سير لشي قنت وتفرج فيه .... لقيتي راسك قااادر تبغي هاد البنت من جديد .... أجي كمل على مابديتي .. لقيتي راسك غير ما غتزيد ترونها ومغتبغيش هاد البنت ... حرق هدا وخلي البنت تكمل حياتها ... راها وحدة من بناتي تاهي .....
خلاه وخرج
جود نزل عينيه ليديه وحلها ، كان وسطها داك لكلي يو اس بي كيشوف فيه ... أو ذاكرتو الاصطناعية كيف سماه باه ! ....
كيشوف الى ذكرياتو محطوطين فقطعة معدنية صغيرة قد هاكا .... علاش راسو ماقادش يهزهم .... واش قطعة معدنية بحال هادي فيها الفائدة عليه هو ! لهاد الدرجة هو ماصالح لوالو ! ...
كيفاش غيقدر يعيش علاقة لحظاتها خاصو يحطهم فكلي يو اس بي باش يبقى عاقل عليهم !!!!
غمض عينيه بقوة مزير على داك الكلي فيديه حتى تطراسا ورجع حلهم حوووومرررر .... صدرو كيطلع وينزل فلخر نفخووو بتنهيدة قوية و هز سوارتو وخرج من جناحو ...نزل فالدروج بالزررربة ومشا ديريكت لطموبيلتو ... حلها وركب .. حل الپوش لاح فيه داك الكلي وسدو وديمارا مكسيري بقوة ... معارفش الى داك الفوضى لي فلداخل ديالو ودوك الاعصاب لي كيظن راه كابتهم كولهم كايخرجو رغما عليه فحركاتو . . وباينة غير من خلال الحكة دروايض لي دار لطموبيل ..
حلو ليه البيبان وخرج منيير مكسيري والسرعة الموري ديالها كيطلع من 200 ل 280 و مزال مكيسيري ... وانذار السرعة شاعل ليه بالحمر فالطابلو مامسوقش ليه .... هو عند بالو راه صايك عادي وكيتصرف عادي معارفش الى حركاتو كلها كتخرج مطرجمة داك الروينة لي عندو لداخل .....
شاد الطريق معارفش فين يمشي حتى تفكرو !!!!! ..... غير تفكرو هو يقلب الفولووون بقوووة حتى تسمع صوت الروايض مع الطريق و قلب الوجهة ديالو .......
اما اسد كان فجناحو وشاد التيليفون كيشوف السرعة لي كيعطيه ماشي بيها ويد كتمسد على جبهتو ....
هو كيعرف جود ... ولدو ... يعيى يعرفو شي حد مغيعرفوش بحالو .....
عارف الى تصرفاتو من الخارج يقدر اي واحد يشوفو داك الشاب الطايش .. هاداك المغرور لي مضارب حساب لوالو .. هاداك لي باغي غير يعيش .. اناني ونرجسي وكيبغي غير الزهو والنشاط ... مكيعرفش يهز المسؤوولية .....كل الصفااات دالطيش تقدر تنعت فيه ....
أسد بوحدو لي عارف جود هو اكثر واحد يقدر يثيق فيه ... اكثر واحد يقدر يعول عليه ...
وعارف هادشي كامل لي وصل ليه كان فقط بسبب مرضو ... مرضو لي كسر ليه جناحو وكسر ليه جميع طموحاتو ....
جود مكانش هاكا ... جود كان طموح .. كانو عندو احلام ... كان تلميذ مجد ومجتهد ...حتى لنهار لي غيفقد فيه الذاكرة .... ورالي موناكو خلا ليه مخلفات كانو على شكل " ارتجاج فالدماغ " "صدمة فالشق الايسر" "كسر فالجمجمة" ..
جود هو واحد الانسان لي كيحتاج لغرفة باردة بيضاااء يجلس فيها 24 ساعة مرة فكل ست أشهر من اجل الشبكة دالدماغ ... مرض لي كيخليه يكون مهدد بفقدان الذاكرة فأي لحظة .. مهدد لسكتة دماغية فككككل لحظة .... كايخليه يتحرم انه يكونو عندو احلام بلليل بحال شخص طبيعي لانه مستحيل يتذكرهم ... كايخليه فاي لحظة يقدر يولي صفحة بيضة بلا سابق انذار مدة عاد يسترجع ذاكرتو خصوصا لادار شي حركة قوية براسو ... مرض لي كيخليه مغيقدرش يعيش انسان طبيعي ... وكيهرب من جميع المسؤووليات ....
هوعارف ولدو كيشوف حياتو ضاعت ... ولكن داير جهدو باش يوريه انه ماضاع والو ....
اسد بحال الشخص لي عطاوه ولد وقالو ليه راه ولا آنية فارغة .. غير خليه محطوط حتى يموت حيت مستحيل دماغو يهز شي حاجة دائمة ..... ومع ذلك اسد داير جهدو كامل باش يرجع ليه حياتو و يخشيه فالمود ديالها .... ومايخليهش يحس براسو آنية فارغة ... باغيه يحس براسو انسان طبيعي بحالو بحال الجميييع ....
رغم هادشي كامل عارف جود باقي محافض على الجوهر ديالو ... عارف مبادئو .... ميقدرش يعطي كلمة ويتخلى عليها ... مايقدرش يجرح قلب تاحد .. ميقدر يعدب تاحد .... حتى لاغلط مع شي حد كيندم فالبلاااااصة ... بيض من قلبو مكاينش مكيعرفش شنو هو يحقد شنو هو يهز فقلبو ... سريع التسامح كيفما سريع النسياااان ... مكيحسد حتى حد ومكيغير من حتى حد .. كيعرف غير يعيش حياتو لنفسو .... عارف من بعد هادشي لي عرف وسمع مستحيل يتخلى عليها لو تنطبق السما مع الارض .. وحتى قلبو يرفضها و مايبغاهاش ... عارفو يقدر يشق اسمها على قلبو بالعاااافية و يبغيييها بزز على قلبو غير يوفي بوعدو و ميتخلااااش وميبانش شماتة قدام عمو .....
ايه هو كيهرب من المسؤولية .. ولكن نهار كيلقى راسو أمامها ... كيتحملها بكل ما فيها .......
ڤيلا عدنان
غرفة لوؤي ....
الريدوات كانو نازلين .. سرير كان فمنتصف الغرفة ... ناعس على كرشو و ايزار كحل مغطي غير نصو ... وكيف العادة مخاد ضايرين بيه وحدة معنقها تحتو وناعس عليها ولوخرين مشندرين حداه .. يديه طايحة لتحت واليد لخرى معنق بيها امخدة ..
ظهرو فوق السرير كيبان كولو مفتووووول ومعضل سمرر و خششن ...
بدا كيكسر هدوء الغرفة و صوت انفاسو صوت التيليفون .. كان غير صوت اهتزازو على طابل دونووي لي كانت كلها زاج وصوتو كان قوووي ديال الفيبرور ... بدا كيحل عينيه بشوووية مخسر وعلا راسو حال عينيه بغممزة وشعرو مربل فوق جبهتو ... شاف لساعة الالكترونية لي محطوطة بانت ليه تقريبا الطناش .... ومد يدو بعكز هز تيليفونو ورجع نعس على ظهرو شاد عل راسو كيحك فجبهتو وبصوت مبحوووح جاوب
لوؤي : آلو ... ( حل عينيه وتوكض مزيان وقال بتحية رسمية ) آجون لؤي .... ( كمش عينيه من شنو سمع ناض كامل من الفراش كيرمش بعينيه النعاس طيروه عليه ) كيفاش !!!!! لا ميمكنش ليا ..... واش ضروووري !!!! ( تنهد بعنف وشد على راسو ) راه ميمكنش ليا نسافر .... وااات !!!!! فففففففففف ....
قطع التيليفون ولاحو على سرير ونزل راسو بين يديه .... اجتماع طارئ واجباري الحضور ديالو مدة ثلاثة ايام ... وهو هاد السيمانة كلها مدكسة عليه بالخدمة فالمتحف لي كلفو به عدنان والافتتاح نورمالمو خصو يكون فنهاية هاد الاسبوع ميمكنش يسافر !!!! باه ينحرو ؟؟؟؟؟؟ هاد تمارة كلها لي دوز فداك المتحف غيضربها ليه فالزيرو بحالا عمرو دار شي حاجة الا مشا وخلا ليه هاد سيمانة لخرا .....
وهو كعميل جديد فالخدمة ماخصوش يتهاون .. الى ماحضرش الاجتماعات كينقص فالرتبة ديالو لي كيبني فيها ....
تنهد بقوة تعكسات عليه من جوج جوايه ... واش يتبع مستقبلو واحلامو والكاغياغ لي كايبني فيها ولا رضى باه ...
فلخررر لاح داك الغطا وناض لدوش .. طار عليه النعاس فمرة ......
اما عدنان كان فاق ... رتاج لابد عليها تمشي لاكلينيك .. يوماين ديالها سالات كوحدة خدامة فالقطاع الصحي .. وعدنان خاصو يمشي يشوف الاشغال فالمتحف ... لابسين وواجدين ونازلين فدروج هي وياه مناقشين كيف العادة برنامجهم اليومي حتى وصلو لتحت ورتاج شافت لساعتها
رتاج : هدا هو الوقت ... أنا غنتعطل مغنتسناهش يفيق ... تسناه نتا
عدنان : فيقتيه !
رتاج : مافييقتووش ... صونيت عليه مجاوبنيش
يلاه كيهضرو سمعو حس شي طموبيل داخلة و رتاج عوجات راسها للزاج بنت ليها و عدنان كان مشا حدا صال امونجي كيشرب الما ...
رتاج : جود اش جابو على الصباح !!!!!!
عدنان علا حجبانو باستغراب ! جود مامولفش يجي حتى بالعراضة بقى غا على صباح !!! وجا حدا رتاج كيشوف من زاج كيزيد يتأكد الى راه هو !!!!! ....
باركا طموبيل وداخل وباينة فيه كايتمشى بعصبية ...... ورتاج وعدنان زادو قربو لباب وهو دخل شافهم و حياهم غير براااسو كايضرو سوارتو فيدو
جود،: صباح الخير ... لوؤي فايق !
رتاح : لا مزال ولكن راه كـ....
خلا كلامها فنص وطلع بزززربة فالدروج و رتاج شافت فعدنان
رتاج : هدا مالو !!!!
عدنان هز لافيست ديالو وزاد
عدنان : بيناتهم .....
طلع لشومبر ديالو حل الباب بزربة كيقلب عليه بعينيه وهو يخرج من الدريسينغ كان شعرو فازك ويلاه طلع الشورط ....
باقي مزال ماستوعب اش كيدير عندو تما تاكان هبط عليه ببونية تاكان غيطيح وشد فالحيييط وهز يدو شد على جنب شفتو لي سالت بدم ... وجود واقف عليه مزير على قبضة يدو لي ضربو بيها .... يلاه غيهضر تاني هو يهبط عليه بوحدة اخرى لجنب لاخور تاطيحو للارض .... وعوج معاه راسو كيطل عليه ملفوق ...
لوؤي علا فيه عينيه شاد على بلاصة البونية و عاض على جنب شفتو المجروحة هو ينوض بزززربة لعندو شدو من حوايجو كمش عليهم ودفعووو
لوؤي : مريييييض ا*بي ولاااا مالك !!!!!!
جود : علاش معارفنيييش مريض !!!!!
يلاه غيجاوب لوؤي مشا باتجاهو جود بزربة وشدو من عنقو مزيررر على قرفادتو وجبهتو لاصقة على جبهة جود
جود : شحااال من مررررة سولتك .. شحال من مرة قلت لك الكدوووب لااا .. شحال من مرة قلت ليك نعرف ديلمك مخبي عليا شي حاجة راه ن*ويك ....
لوؤي دفع ليه يدو وبعد منو زاد معاه الزايد
لوؤي : اشمن كدوب اصاحبي !!!!!
جود : عارفني خاااااطب ومتگولهالييش !!!!!
لوؤي علا حجبانو لفوق وبدا يرمش بيعينه ماعرف مايقول
لوؤي : كيفاش هاد خاطب !
جود : ( نظرة دمنيتك ) انا لي نگوليك كييييفااااش !!!!!!!
لوؤي : وداباااا غابشوووية جاي هاجم على الصباح مالك خاطبني انا .... اش واقع شكون خاطب !
جود : باقي كدخل وتخرج عليا فالضهررررة !!!!
مشا باتجاهو بزربة ولوؤي شد ليه يدييييه
لوؤي : تااا رييييح اصااااحبي راني بصح مافهم والوووو
جود : شحال من مرة سولتك داك البنت اش بيني وبينها ..... علااااش لي متهههضرش علاش لي متقولش ليا اش كاين .. مضوريني بيناتكم !!!!!
لوؤي : اشششمن بنت !!!!!!!
جود : ( علا يدو وكمش عليها ) وااابرررررربي تاااانصيييفطك تغررررز ليووووم
لوؤي : ( بعد منو ) وغاااصبر .. صبر ابنادم . بشششوية وفهمني ... اشمن بنت علامن داوي تاهضر بفمك اصااااحبي مالك سوفاجي ....
جود : ررربع سنينن وانا گدامك آلبگري خااااطب .. وكتشوف ديلمي زااااهي مع كري وساااكت !!!! عمرني خبيت عليك انا شي حاجة !!!!! ماتعرفش تجي تقول ليا راك كنتي خاطب بنت عمك
لوؤي دوز لسانو على شفتوووو وبدا يحك فراسو عرف القضية تفضحت .. غير معارفش كيدارت تفضضحت ورجع شاف فيه ماعارف مايقول
لوؤي : ششوف .. انا .. ر راك عارف اصاحبي الكبار هما لي كيتصرفو .... حنا قالو لينا ضربو الطم ضربنااااه .... نجي نقول شي حاجة نولي فالمشاكييييل وراك عارف
جود : وعطاتك خاطرك ربع سنين ونتا كاذب فوجهي ؟ وكنسوووولك فااااص وكتكككذب .... مزال نتيق بيك انا دابا ! .... نتا وداك ليي*يهوووودي لاخور ...
لوؤي : برررد اصاحبي .. والله تاكنا باغين نگولو ليك ... ولكن باك راه مابغاش اش غنديرو حنا .. ودير راسك بلاصتنا ....
مشا للمراية كيشوف جنب شفتو مخسر سيفتو باينة الجرحة .... وجود دار يديه فجيابو كيشوف معاه
جود : كانت شي حاجة سيكسيال !
لوؤي : قالو ليك انا لي كنت نشري ليك البروطيكس ولا ! اش عرفني انا .... ( ضار عندو ) دابا شكون گاليك هادشي باش نفهم
جود : هي لي گالتها ليا
لوؤي : غا جات وگالتها !
جود : واش انا بنت ليك بالگرون ! مكنفهمش !!!!
لوؤي : نتا لي طلعتيها على هاد الحساب !
جود : ( اشار للفوطوي ) رييييح هنا .... عاود ليا الواليد اش طاري ولكن شي حوايج راه ماصلاحش نسولو هو .... داكشي علاش جلس هنا قدامي عاود ليا ....
لوؤي : دابا باك فخبارو !
حود : منيتك !
لوؤي : تا لا .. زعما واش فخبارو بلي نتا فخباااارررك وماشي واش فخباررو على هاد الخراااا كامل .... وهانا بدينا ندخلو ونخرجو فالهضرة معاك دابا ...... رعدتيناااا
جود : ( مشا جلس على الفوطوي واشار ليه يجلس قدامو ) رييييح ....
لوؤي : ( تنهد ) واشتي دابا .. بناااادم ناااعس ماعليه مابيه يفيق على مونتيف .. نتا وياها يز•مل على ديلمكم الضمييير انا ناكل العصا ..... ( مشا جلس حداه ) خليني غانفطر
جود :ملي نسالي هضرتي ونق•ود فحااالي فططر ولا تغدا ....
لوؤي : دابا اش بغيتي تعرف ! ... هانا معاك .... شوووف والله تاااانگوليك اش عارف انا اصلا ماحملتش يخبعو عليك ... انا معااااك ولي ليييها لييييها ( قاد جلستو ) آمر اولد عمي ..... مالها كاع يخلعونا حنا ....نمووووت انا معاك
جود : كيفاش تاخطبتها ! مافهمتش كيفاش درت ليها ! خطبتها وانا عندي 22 ولا 23 راه ميمكنش !!!! شي حاجة ماهياش
لوؤي : شوف دابا زگي معايا .... باش تانا نعرف نهضر ونعرف اش نگول .... دابا شنو قالت ليك هي ....
جود : ماادخلكش نتا فشنو گالت هي .. گوليا نتا اش كتعرف ....
لوؤي : ( عض على شفتو وحك فلحيتو ) طوووولانطي ابنعمي .....ماااعليكش
لوؤي قاد جلستو وهضر
لوؤي : شوف داك الوقيتة انا مكنتش .... كنت عاد كنقرا على برا .... دويتي معايا واحد نهار فتيليفون كنتي ضااااارب الكاو سكرااان بقيتي دخل وتخرج فالهضرة كتقول ليا كتبغي بنت عمي يونس .... تما انا عرفت بيناتكم شي حاجة ... وملي جيت فالعيييد ... كنتو مع بعضياتكم ولكن مكانت فخبار حد ... انا راه غا حليت عليك البيت ولقيتها معاك عاطيينها للبوسان ماحكرتش شغلك هاداك حدي كنت قلت ليك العائلة لا وخليها موقرة قلتي ليا باغيها للدوام مكنضحكش عليها
جود : هاكداااك !! ...
لوؤي : رجعت فحالي و مابقيتش جبدت معاك الموضوع نتا عارف مكندخلوش فهادشي حياتك هاديك .... حتال نهار لي وصلني فيه الخبار بلي هرستيي ليه ضهرو و ( قاطعو )
جود : ( قرب ليه ودنو بذهول ) نعااام !!!!!!
لوؤي : ( علا حجبانو هو براسو ماعارفش علاش تصدم جود ) ه ... هر ...هرستي ليه ظهرو !!!!!
جود : ظهر شكون !
لوؤي : ( سرط ريقو ) ااا .... ( كيحك فشعرو ) مم .. مفخباركش هادي !!!!!!
جود : ( بالعصصصبية بجههد ) ظهههر شكووووون !!!!!!!
لوؤي : ( خلعو و بزززربة جاوبو ) ايااااد
جود : ( وقف وهبط راسو محني لعندو مطرطق عينيه) شنوووو درت ليييييه !!!!!!!!
لوؤي : ( حال فمو ) ها ! ااء .... ا انا .....ظهري .. ظهري انا . م ماشي د اياد ... انا ( ناض وقف ) اناااا مااااااولد عم حد .. انا ماااااغنموت مع حد ..... خرج اخويا تق•ووود عليا انا ماعارف واااالو ..... أنا لي فيا زهااااايمر هاد الساعة معاقلش معاررررفش ... مننننعرررررف ....
جود : ( بصدمة ) انا هرست لاياد ظهرو ؟؟؟؟؟؟؟
لوؤي : لاااا ...اناااا .. انا لي هررستو انا .... شكون كذب عليك شكون قال هاد الهضرة الخاااااوية !!!! ...... ( جاتو الفقصة ) كان كيحسابتني غير سلطان لي كيطير صدق هادشي عندنا بالوراثة ، راضعينو .....
.جود : (ضرب الطبلة برجلو تاشخشخها بعععصبية كيهضر) دااباا واااااش غتكول اش كاااااين ولا ندير شي موووووصيبة
لوؤي : ( شافو شششعل دبصح ) ألاااا .. جود ... دير عقلك اصاحبي صافي ... دابا علاش شااااعل انا غااانگوليييك صافي .. كلس ... ( مشا كلسو ) كلس اصاحبي راك مريض تسكت لينا القلب بالخلعة ... صافي انا نعاود ليك كولشي ... بالله تعالى مغنخبي عليك شي حاجة صافي ريح لارض ...
جود كلس كيتنساه يهضر شابك يديه بتوتررر من هادشي لي سمع ولوؤي كلس حداه عارف باش كيحس دابا وتاهو مكرهش يعاود ليه كولشي ويتهنى ويهنييييه .. وقال يطرا لي بغا يطرا غنقوليه اش كاين من حقو يعرف .... وتنهد وجلس حداه
لوؤي : انا غنهضر معاك دابا مزيان .... ولي غنقولو ليك هو لي كاااااين .... كيف قلت ليك كنتو صغار .. ولكن لي عارف ومتأكد منو لاني هضرت معاها هي يعني هادي عاودات ليا شوية منو هي ... راكم مارتابطتوش بزاف ... يعني العلاقة ديالكم كان عمرها غير شي عام ولا قل .... نتا عارفها ملي كنا صغار عاشت فكندا ... و فاش طلعات للكوليج باها بغاها تقرا فالمغرب باش طلع كتعرف شويية للاسلام وتهضر العربية زيد عليها عمي يونس واريج داك الوقيتة كانو مزيريييين بالخدمة بزاف وخافو يغفلو عليها ضيع تربييتها وحتى مع خوتها كانو كايدابزو .... صيفطوها للمغرب عند عمي اسد ... وقرات معاكم و كانت ساكنة معاكم فالدار .... داك العام نيت لي غادير فيه لاكسيدون نتا .. هو لي رتابطتو فيه .. حيت نهار عيطتي ليا ونتا سكران راه غير شي شهر قبل من لاكسيدون ماشي بزااااف ... كنقوليك غير قل من عام لي كنتو مع بعضياتكم ...
جود : قل من عام غنبغي نتزوج !
لوؤي : انا جاي ليك بالهضرة .. ملي كنتو اونسومبل مكان عارف تاشي حد من غيري انا ومن غير ختك قسم حتى هي كانت حصلاتكم راه كنتو فينما لقيتو شي حيييط تكالاو حداه كي بوبريص .... داك العيد لي كنت جيت تانا و جا تاعمي يونس وولادو ... داك الوقيتة كنت نتا واياد صحااااب بزااااف حيت قريتو بجوج ... كنت صاحبو كترر مني انا ...
جود : فين قرينا بجوج
لوؤي : ثانوية راكم قريتوها برا نتا وياه ... وكنتو كتجيو فالعطلة بجوج للمغرب ... والعام لي رجعتي فيه كومپليطمون للمغرب وهو رجع لكندا هو العام لي وليتي فيه نتا وبيلي مع بعضياتكم ... هي كانت سبقاتك للمغرب عامين قبل .... وفعامها الثالت وهي فالمغرب جيتي نتا وارتبطتو ....
جود : يعني ماشي شي علاقة لي كنت نشوفها ملي كانت صغيييرة وبغيتها من الصغر ! تالداك العام لي كنجي فيه !
لوؤي : هاااكداك ... حيت فالصغر ماتلاقيتوش بزاف من غير المناسبات والعطل .. ولكن ملي رجعتي للمغرب فاش ساليتي كانت عايشة معاكم .... داك العام نفسو هو لي بدا فيه كولشي وسالا فيه كولشي ....كيف قلت ليك كان العيييد جيت حتى انا وسلطان .. كنا كلنا فالمغرب من بعد تلتيام انا وسلطان رجعنا حيت كانو عندنا باقين الامتحانات .... واياد بقى فالمغرب .. واحد سيمانة كنتي عاطيها نتا وياه غير للقصاير
جود : وانا كنت مع ختو !
لوؤي : على نتا كنتي كتحشم !!!!! الزهو عندك فالدم خااطب ولا مخاطبش ...
جود : هو كان عارف !
لوؤي : تاا لااا اشمن عارف .. قلت ليك عارف غير انا وقسم .... واحد الليلة ... بررررب اجود تاتمنييت كون مت داك الليلة ولانصيفط ليك داك ضوسي ... كنتي محتاج نتا واحد ضوسي ماعقلتش ديالاش وصيفطتو ليك ولكن ماشفتيهش وعيطت لاياد باش يقولها ليك ومشا يقلب عليك ... نتا كنت مقنت ختو عند الخييل .... و ... وراك عااارف ...
جود : ( علا حجبانو بجوج مامستوعبش هادشي ) شافنا !
لوؤي : ( باسف) واييييه
جود : اش شاف !
لوؤي : وانا عرفت .. اش شاف راه عارفو غا نتا وهي وهو .... ولكن منضنش شي حاجة سيكسيال .. كنعرفك زهواني ولكن ماشي تاااالداك درجة .. مغاتسخاش بيك بنت عمك .....
جود : اهاه !
لوؤي : ناضت الحيحة داك النهار فالدار عندكم و تقلبات الدنيا ... باك والواليد و عمي سفيان ويونس كانو فالمؤتمر .. كانو غير العيالات فالدار وضاربتو نتا واياد بالبيااااان .. مهم على ماعاودو لييا شديتي معاه العكس هو تيقول ليك غدرتيني ودزتي لختي ونتا كتقوليه غنديها بزز عليك ..... وضربك لنيفك كان هرسو ليك ... وملي شفتيه ضرب ختو ضربتيه بداك الكرسي دالحديد لي كان عندنا حدا شوميني .... وهرستيه من ضهرو ..... ( جود دفن راسو بين يديه ) ودابا داكشي داااااز ... جابو الاسعاف وهزاتو حيت كان ممنوع يقيسو ولا يهزو شي حد يقدر يتشلل فيها ...وديتيه نتا براسك للكلينيك ... دار جوج عمليات وركبو ليه الحديد فظهرو ...مهم كانت ترونات شوية القضية على ماكانت تعاود ليا الوليدة عمي اسد وعمي يونس كانو دابزو كاع .. ونتا عمي اسد كان حبسك وحيد ليك كولشي فلوس تيليفون .. اي حاجة ... مهم كانت ترونااااات نيشان ..... من بعد راه الدم كايغلب بدات تصلح الامور ومي يونس رغب عليك باش يطلقك .... موراها نتا مشيتي عندهم وطلبتي السماحة من ماماها وباباها .... ولكن لاخور مكانش بغا يشوفك وطلبتي من عمي يونس يد ينتو وقلتيي ليه بغيتها للزواج ... فلخر درتو عشا وناقشتو هادشي و قالو ليك حتى تكبرو .. يعني هدا هو القرار لي كانو عطاو .. حتى تكمل نتا وتخدم خدمة مستقرة وبيلي تتخرج عاد تتخطبو رسميا .....
جود : اذن ماكانتش خطوبة رسمية !
لوؤي : لاااا ... كنتو صغار ... كانت غير هضرة بين العائلة وكانو قالو الخطوبة بالخواتم حتى للعطلة دبيلي .... ألوغ ملي برا اياد وقدر يوقف شوية مشا رجع فحالو لكندا وشرط على باه باش بيلي متجيش لعندهم ولا غيقتلها ...
جود : علاش !
لوؤي : حيت قالها تبعيني وهي بغات تگلس معاك ... يعني اختارتك نتا عليه هو لي خوها ..... راه واخا العائلة وافقات ولكن هو مبغاش ... حيت مجاتش غا ليلة قبل نعستي مع وحدة وغدا يلقاك مع ختو جات قاسحة ... كون غا شافك قطعتي البنات وكتصون ختو فغيابها يمكن
جود : واقلة كانت عندي 23 عام !!!!! انا مزال مافهمتش اصلا كيفاش نبغي بنت 16 عام ! وفاميليا ملفوق .....
لوؤي : واعقل الصغر راه نتا كنت صغير .. من مور داك البلان دارو عليكم الرقابة ديال بصح خصوصا عمي اسد راه حلف ليك ماتقيسها ولا تقرب ليها موراها مشاو دارهم تلتيام مور مامشا ا اياد وهي بقات على اساس غتكمل القراية عادي كيف كانت وينساو كولشي .... وعمي اسد كان واقف على مرض اياد حتى حيدو الحديد من ظهرو وراه دابا كيتحسن .... ونتا مور مامشاو عمي يونس لكندا غير بشوية مشيتي لموناكو تما فين طرات داك الكارثة .... ملي فقتي راك فقتي ناسيها وناسي كولشي .... تاداك الضربة لي كانت فنيفك راه ماشي ديال لاكسيدون ... هاديك كانت فاش نوضتيها مع اياد .... وهذا هو علاش باقي قالب عليك ... راه هادا هو السبب مكاين لا خيل لا والو ... وتا داركم راه ماشي غير جاو وكذبو عليك ...راه هو و بيلي لي مابغاوش ... فاش كنتي درتي لاكسيدون اياد بنفسو كان هضر مع عمي اسد ورغبو باش مايقول والو وحتى لا نسى هو شي نهار يبدا معاك صفحة جديدة وصافي ..... وتاهي مابغاتش داكشي علاش سكتو ماشي حيت خباو عليك .. مالين المشكل هوما لي مابغاوش .. داكشي كان صعيب شوية وقالو يتجمع ويتطوى ويتنسى حسن ...
جود غير غارس راسو بين يديه كيسمع .. كيجيب ليه الله بحالا كيهضر على شي واحد اخر ماشي عليه !!! مستحيل يكون هو هاداك ؟ فاقد غير الذاكرة ميمكنش تكون تاشخصيتو تبدلات ... عاد بدات كتوضح ليه الصورة وعلاش اياد تعامل معاه هاكاك ... وعلاش بيلي تاهي كانت كتشوف بداك الطريقة ..... وعلاش قالت ليه كنت كولشي ... ورجع علا راسو فلوؤي وملامحو ترخاااااووووو وعينيه حمارو
جود : أنا .... واش كنت باغي هاد البنت للزواج دبصح ... ولا غير حيت طرات هاد الكارتة بغيت نصلح !
لوؤي : وااا تالهنا هذا عليا را قلت ليك مكنتش .. ومكاينش لي يجاوبك على هاد السؤال لان علاقتكم مادخل فيها حد ... معارفينكمش كيفاش كنتو مع بعضياتكم .... ربما هي تقدر تفيدك كتر مني .. ... ولكن مادام بغيتي بنت عمك ودرتو علاقة ميمكنش تكون باغي تلعب عليها .. العائلة مكنقربوش ليها باش نضحكو ..... عندنا فين كنضحكو .. يعني غالبا راه غتكون باغي الحلال
جود : راه كتهضر ليا على واحد صغير فعمرو !
لوؤي : انا لي عارف هو هذا .... وهادشي مابقاش كيهم أصلا ... شوف نتا ديال دابا .. اما شحال هادي غير بقى ناااسيه ... انا معااااك من حقك تعرف هادشي كلنا بغيناك تعرف راه هوما لي مبغاوش ...... ما تلوم حتى شي حد .... تكون فبلاصتهم تتصرف بنفس التصرف ......
جود : مزال ماتسرطش ليا خبيتو عليا هادشي واخا تگول لي گلتي ....
لوؤي : ودابا نتا تعرف ... لي كاين هو هذا يشهد عليا الله ماخبعت عليييك حتى شي حاجة من غير لي معارفوش ... انا جيت للمغرب ملي درتي لاكسيدون راك جبتي شحال ونتا مغيب من عملية لعملية ... ومليي فقتي راك مكنتيش عاقل .... وهي فاش شافت ماعقلتيش عليها شبعاااات بكا على برا كنا معاها حنا .. فلخر هزات راسها ومشات وقالت ليهم متقولو ليه والو ....... خليوه ناسيني .. هادشي لي كانت قالت
جود : ودابا فنظرك نتا ... هادشي كايدار !
لوؤي : غنعاود نقولها ليك .. اش كان بيناتكم معارفش .. يعني الدرجة لي كتبغيو بيها بعضياتكم انا كاع ما عارفها باش نحكم .. بالنسبة ليا انا لا .... كان عليها تبقى وتوقف معاك .. و لكن عاوتاني الامور من منظورها هي كانو مختلفين .... يعني بصح هي ولفاتك كتعرفها جاتها فشكل تكمل معاك ونتا كتقوليها شكون نت .... انا هادشي ديال الدراما ديال البنات راه منفهمش فيه ..
جود تنهد معمق معلي راسو لفوق غير ساكت كيفكر
لوؤي : والله ماعندك علاش تهرس راسك دابا .. لي طرا طراااا .. ونسييينا هادشي ...
جود : ( هبط عينو لعندو وراسو باقي معليه لفوق ) على هاد الحساب كون خليتوني ناسي ... دابا راه فخباري .. يعني لااااابد نكمل على هادشي
لوؤي : هاء ! اش غتكمل ! هادشي راه سالا ربع سنين هادي
جود : ( قاد جلستو ) كون كان سالا مانلقاش تصويرتي فتيليفونها ... مغنلقاهاش دخلات لعندي و هزات ريحتي ونشمها فيها .. كون كان سالا مغنلقاهاش كتشوف فيا فينما نضور ... السييدة اصاااحبي كتبكي ... واش عرفتي على قهرة كانت فعينيها ... اول مرة نحس براسي مكنسوااااش واخا مدرت والو .... السييدة معذبة ونوض انا نكمل حياتي عادي ! واش عارف اش طاح على راسي دابا ! بحال شي وااااحد كان أنااا ... دار غلط فالماضي وجيت انا ديال دابا ... نخلص .. كنحس براسي ماعنديش علاااااقة ...ولكن لاااابد نخلص
لوؤي : فهمتك .. ولكن دابا نتا زعما ملي كتكون حداها ولا ملي كتكون واقفة حداك ولا ملي شفتيها ماحسيتي بوالو ؟ هاد البنت ماحركات فيك والو !
جود : سي حركااات ... حركات شي حاجة سميتها الاعجاب لبنت واااعرة واش غنكذب عليك ؟ زويييينة واااعرة كولشي فيها زوييين عجبااااتني ... ولكن اعجاب وبوان فينال .. صافي مغنزيدش عاد .... ماشي الغلط فيها ؟ لااا .. الغلط فيااااا .. حيت كون كنت فشي ضروف اخرى مكانش غيكون عندي مشكل انني نكمل معاها .. نمشي دابا نشري خاتم ونكمل على مابديت .. مالها بنت عمي وزوينة وواعرة وكان بيناتنا هادشي كامل .. ولكن انا دابا لا ... كيغاندير لهاد زواج هذا !! ارتبطت بيها عام نسيتها .... و نتزوجو العام لول نساها تاني واش نتا مريض واش معارفنيش كيف كنصبح .. نتزوج باش ملي نفيق نقولها شكون نت ! نتزوج باش نولد الولاد ونسا فين حطيتهم ! نسا كاع واش انا وااالد ... واش عارف على موقف راني فيه ؟؟؟؟ انا ماباغيش زواج .. حييييت انا ( كيضرب لصدرو ) انا لي فيااا الموشكييييل .. انا لي مصالحش للزوااااج .. انا ماباغيش نتزوج
لوؤي : ودابا برررد .. برررد السوق ... هي راه عارفة هادشي ماشي عاد غتوريه ليها مرضك كولنا كنعرفوه .. وتاحد فيما ماكامل كل واحد واش سلط عليه الله وكل واحد فاش جاتو ... ماتبقاش تقول بحال هاكا ...المرض كنتعايشو معاه واش صافيي مريض وغتسالي حياتك ؟ تانتا من حقك تزوج ومن حقك دير اسرة ... الحمد لله ربع سنين هادي ماعمرك تعرضتي لشي فقدان داكرة كتر من نهار .. دغيا كتفكر ... والمراة لي غتزوج راه غتكون عارفة هادشي وغتوقف معاك ... لغي هادشي من دماغك ...
جود غير نزل راسو كيمسد على جبهتو ويتنهد وحدة مور وحدة ...
لوؤي : جود .. راه والله اخويا تاكتمرض راسك على واااالو ... حناا كااااملين هنا عارفين اش طاري ليك وعااارفينك ولي مكيقدرش المرض ديالك غير يدووورر يتقوووود .. بالنسبة لاياد راه ماشي قلب عليك حيتاش ماوفيتيش بوعدك مع ختو ... اياد جاتو الضربة شوية قاسحة حيت كنتي عندو عزيز و كنتو قراب لبعضياتكم ... اياد لي كتشوف دابا راه مكانش هاكا كان عزيز عليه زهو كتر منك وديما ضاحك و وناشط وطانز ... ومن نهار لي طرا داكشي راه مابقى كيتيق فحتى واحد انا وسلطان قلب علينا ماشي غير نتا .. ولا عايش فواحد العالم بوحدو .. مور عام تلاقيتو صدمني .. تبدددل كاغييييمووون اصاحبي ... بحال شي واحد غارق مشاكيييل ...حتى هو راه مشا تصدم بحياة اخرى وباه عطاه كرسي الادارة هو باقي صغييرر وهو مكيحملش الادارة .. تاهو كانو عندو احلام خازنهم حيت مالقاش معامن يحققهم .. راه تاهو واحد بحالنا قلبو بيض ودغيا كيرجع غير دابا نتوما قضيتكم كانت صعيييبة شوووية فهمتي ..
جود : ( تنهد ) فهمت ... وعندو الحق .... راه انا حطيت راس فبلاصتو مغيعجبنيش الحال ... ولد عمي يزها معايا بليل نلقاه مع ختي فالصباح راه غنقلب الدنيااا
لوؤي : هاااانتا قلتيها .. يززهاااا بليل .. ماشي تشوفو بلبييل دااااخل سوق راسو وتشوفو غدا مع ختك راه يعجججبك الحال اولا !!!!! يعني راه باغييها .... (جود طلع فيه عينيه ) ولكن باش يكون مامسوقش وناعس مع وحدة اخرى واخا ...
جود : ( ناض وقف وهز سوارتو وكاسكيطتو وملامحو مكتئبين ) نوض تفطر نوض ... ( شاف لطبلة مشخشخة ) اصلا مكانتش جات مزيانة هنايا
لوؤي : فين غادي
جود : ( ماشي لجهة لباب ) لجهنم
لوؤي : اشوووووف اه .. ( ضار عندو ) أنا عارفك فينما يتپلونطاو ليك السلوكا كطج لشي قرينة ترتاح .. غير هو اولد عمي ملي تكون طاااج هاد المرة عيط لعمك عدنان وقوليه غايمشي معايا لوؤي يوااااااسيني .... ضروووري خاصني نخرج لبلاد ومعارفش كيغاندير هاد المرة ..... نفعنا بعدا فشي حاااااجة ماشي مشحفني على الصباح ومانطلع بوالو ...
جود غير شاف فيه بمعنى واش نوض نقتلك ولا نعلقك ولا نذبحك رجع تنهد ونعل الشيطان باش مايعطب ولاد عمامو كاملين سد لباب ومشا ولوؤي تكا لور داير يديه مور راسو مهني لي فركعو هاد الرمانة كان ديما مخلوع حداه
لوؤي : مصائب قوم عند قوم فوائد .....
جود نزل من الدروووج عقلو مسسافر كيحلل ويعاود ويبني ويريب تاوصل لطموبيلتو حل لباب وبقى واقف مدة شاد فيها كيفكر فلخر حلها نيشان ودخل كسيرا ومشا .... ولوؤي كان فالبالكون كيطل عليه ... عارف حالتو كيغاتكون دابا وكيحس براسو مكرهش يعاونو بشي حاجة ولكن ماعندوش باش ... معزة جود فقلبو استثنائية .. كيحس لي كيربطهم كبر من ولاد العم كيحسو قريب ليه كتر من كولشي هو وسلطان .. تمنى ليه فالداخل ديالو تفك الكربة عليه و دخل ييكمل اللبس ديالو ينزل .....
أما بيلي كيف نعسات البارح كيف باقا .... مكمشة فوق سريرها و مكمشة حتى ملامحها فالنعاس ... اريج فاقت ولبسات وجمعات حوايج لي تحتاج حيتاش مسافرة لفاس ... دازت حلات عليها الباب بانت ليها ناعسة .. تنهدات على حالها حيت غير من نعستها واضح شحال مكتئبة ... ومشات لعندها باستها مطولة على راسها وقلبها كيتقطع على بنتها .... كتشوف فيها نفس الملامح ديالها فالماضي ... وشحال من نعسة نعساتها تاهي هاكا بسبب القلب ملي كيطيح حبو على حجرة .. تنهدات ودعات فخاطرها انه هادشي الى فيه خير يبقى ... ولا مافيهش الخير .. غير يمشي .... وخلاتها وخرجات عارفاها مغتبغيش تمشي معاهم لفاس .... دخلات لبيت اياد لقاتو باقي متكي شاد تيليفونو فالفراش وتبسمات شادة فالباب
اريج : صياااح الخييير... كيصبحتي ؟
اياد : بييخير ( طلعها وهبطها بانتليه لابسة ومقادة ) غاديين !
اريج : اه .. غنمشيو .. راه تاخوك ومراتو سافرو بكري... ها بيلسان معاك رد ليها البال .... راه مغنتعطلوش يوماين ولا ثلثيام وهاحنا هنا راك عاراف جدك عيان
اياد : غيمشي تاهو
اريج : مكنتش باغاه يمشي .. ولكن قالك والو يمشي يشوفهم معارفش شحال بقى ليه فالعمر كتعرف هضرة جدك .. غنمشي انا وباباك وجدك وجداتك .. ونتا وختك آلمساخط راه مكتبغيوش ههه
اياد : هه نتوما فيكم الكفاية ... سلمو عليهم ..طريق السلامة
اريج : امين .. يلاه نوصلو نعيط ليك .... فيق وفيق ختك ...
خلاتو وخرجات لطموبيل كان يونس كيتسناها ... ركبات ودازو للقصر هزو رقية واحمد لي نازل غير معكز وعيااااان.... ركباتو اريج القدام وهي ركبات مع رقية لور وانطالقو ....
جناح وسيم ...
لابس شورط دجين وتقاشر و سبادري وكيمشي ويجي متوتر ويحك فشعررو ... كل مرة يشوف للساعة الالكترونية لي فيديه ... غير سمع الدقان فالباب هو يتخطف وتحل دخلات المساعدة ديالو
- موسيو وسيم ... عندك ضيف ...
وسيم : ( تنهد تنهيدة الفاينالي ) طلعيه عندي لهنا ....
الخادمة اشارت ليه براسها وهو مشا للدريسينغ هز بيل ديالو لبسو كيتسناه تاحل الباب ودخل سلم عليه وجلس .....
ايوب : ياكما صبحتي ناعس .. مجاوبتينيش فالتيليفون !
وسيم : من داك الميساج لي كتبتي ترفعت نسيت كاع فين حطيت تيليفون .. ( شاف موراه ورجع شاف فيه) حلف بالله تاتقضى الغراااااض !!!
أيوب : تقضى .... قضاه ليا واحد دري ... ماعلينا انا راني غنسافر ... الولد راه جابلي غير حبة ..
وسيم : منييتك اصاححبي !!!!!
ايوب : انا لي قلت ليه جيب حبة .... باركا اوسيم ... صافي خود هادي وباااااررركا
وسيم : صافي غااانقطع غير هنيننا ...
ايوب : ياك مكاينينش امتحانات دابا اش غادير بالمنشطات ... وسيم راه هادشي ولا عندك ادمان ...
وسيم : واااش مريض ولا مالك .. راه هاد الكينات كنت كناخدهم من الفارماسي عاااادي ... راه غير فلخر مابقاوش كيعطيوهم ليا بلا طبيب وكنشريهم من النوار
ايوب : هادوك د لافاغماسي ماشي بحال هادو اوسيم واش عارف راسك اش كادير.. هادو راه صعاب .. راه بحال لادرووگ . وماشي بحال .. راه لادروگ نييييت ....حبوب مخدرة ....راه ممنوع يتباعو كيتعطاو غير فحالات النااااذرة والجرعات كيكونو منظمين .. نتا عارف مجالي هذا و راه كنقرا عليه .. هادشي لي كتاخد راه صعييييب .. راك بحالا ولفتي دماغك مينشطش وميخدمش الى مكانوش ... اش داك لهادشي ملووووول بناقص كاع من هاد الامتحانات
وسيم : ( جلس مقابل معاه ) نتا معارفش الضغط لي كان داير ليا الواليد ... راه كان كيقول الى مافاليديتش كاع ليمووووديل وبمونسيو راه غترجع للمغرب.... واش عارف على ستريس كنت كنعيش فالامتحانات .... كون مكانوش هاد المنشطات راه كنت غنحماق
أيوب : هو راه بغا غير يزييرك فالقراية ماشي بغا يخرج عليك .. كون عرفك غتمشي لهادشي يخرجك من هاد القراية كاع بناقص .... وسيم سمع ليا انا صاحبك من القديم ومغنديكش للخطر ... ( جبد الكينة من جيبو ) هاااادي راه خطررر ... راك وصلتي لمرحلة الادمان وهاد المرحلة صعييييبة ... راه الى منظمتيش لادوز فهادشي راه غيجيك نزيف فالدماغ ويقدر يوقع ليك كخيز كاغدياك كااااع اصاحبي رد البااااال .... قطع عليك هادشي صبرررر وشغل راسك بشي حاجة ولا قولها لواليديك يعاونونك
وسيم : ( نترها من يدييه ) طلق لهنا داكشي ... نتا راه بديتي تحماق ... قلنا ليييك موصلتش للادمااان .... صافي راه عارف اش كندير ...
ايوب : ملي باغي غير المنشطات كنتي تاخد غير دوك لي كنت تاخد فلول ولب كان خرج ليك طبيب ... علاش مشيتي لهاد النوع .. هذا راه لادروگ
وسيم : ماگروش فيا هادوك ماكانو كيديرو والو ... وفلافلغماسي مكيبغيوش يعطيوهم بزاف تما ... واحد صاحبي كان باعهم لي فالنوار و هو لي عطاني هاد النوع وقاليا حسن ... هادو حسسسن كيقادو الدماغ
أيوب : كيخرجو عللييييه ماشي كيقادوه ..... ( ناض وقف ) موهيم انا غنشمي عندي طيارة فالعشية ..... رد بالك اوسيم .... ماتخرجش على حياتك بسبب نزوة ..... رد لبال .....
وسيم تنهد ومشا عندو عنقو بالكتاف ومشا جلس كيحل فالباكية و ايوب شاف فيه نظرة متحسرة وحل لباب خرج يلاه نازل هو يتلاقا مع لامار شافتو وتبسمات
لامار :ايوووب !!! مرحبا بيك اولدي
ايوب : ( سلم عليها) مدام لامااار ... جيت غير على ود نگول بسلامة لوسيم حيت مسافر ليوم
لامار : ااااه .. الله يوصلك اولدي على خير .. بلغ السلااام للفامي ....
ايوب : اكييد ...
استسمح ونزل وهي متبعاه بعينيها ... ورجعات مشات لجناح وسيم يالاه غتحل الباب هو يخبع داكشي مور المخدة وتبسم ليها
لامار : وسييم ... فايق ! نوض لبس حوايجك غانزلو للبحر
ويبم : لا لااااا لا اماما مافياش والله
لامار : غاتبقى بوحدك ! انا وباباك دماغنا مرون شوية بغينا نزلو رتاحو .. تا قدس غتمشي معانا .. نوض
وسيم : لا والله مافيا بالله . .صافي غيرر سيرو نقدر نلحق عليكم ....
لامار : واخا ....
خلاتو وخرجات .. ماعندهاش الخاطر بمرة لي تلاج فالهضرة .. ورجعات لجناحها لقات اسد لبس جوايجو وتاهو ملامحو باقين مجموعييين ومعصبييين
لامار : مغينزلش وسيم .. وقدس راه غتمشي ...( تكات على الحيط وربعات يديها ) قوليا ا اسد اش بانلك نعيط على بيلي واياد لببحر ... ونهضرو معاهم
اسد : لا .... ياك هي لي بغات نخبيو عليه ؟ وهي لي بغات تقوليه ! دونك يحلو هادشي بيناتهم انا هادشي راه طلع لياااا فراسي ومرضني ...مامساليش انا لهاد التخربيق ديالهم
لامار : اشمن تخربيق ا اسد .. راه حياة ولدنا هادي
اسد : وهاد ولدنا راه فعمرو 27 عام .. قاد براسو ...ماشي واحد كتافو قد ديالي ندخل ليه فحياتو الشخصية ! راه مابقاش عندي داك الحق .... لي عليا هو نوصل ليه الفكرة ونرجع لور ... خليه يعرف الطريق راسو واش باغي يدير ....
لامار : و بيلي !
اسد : تصرفات بلا ما تشاور ... تحل هادشي راسها ....
لامار : راه اياد تلقى مافخباروش
اسد : شغلهم هاداك الامااااررر .. .راسي راه طااايب مغنزيدش هادشي تاهو .. هادشي فضيناه هادي ربع سنين ملي كانو صغار دابا كبرو وعارفين اش كيديرو .... يعومو بحرهم ... واجدة !
لامار : ( تنهدات ) واجدة ... وااااجدة ....
أسد : ديها نت غير فصحتك هادو رااااه يهبلو قوووم .....
خلاها وخرج وهي بقات كضور راسها .. معندهمش الخاطر بجوج بيهم حسو بالخنقة فالدار ... ومشات هزات صاكها وتبعاتو تسناو قدس فالطموبيل حتى جات ومشاو ....
وسيم جالس فوق الفوطوي ولايح يديه بجوج على جناب الفوطوي ... كانت داك الحبة ففمووو كيتنغمها تحت لساااانووو لي كتولي رغوة بيييضة ... معلي راسو لفوق مغمض عينييييه كيترررخى .. كيحس براسو جسدو كيتفرق على روووحو ... بحال شي يوغاا بحال شي سفر روووحي ... كيمشي لبعيييد .. كيحس براسو بحالا كيطير وسط الغيوووم و وسط الوان باااااررردة .... كيحس الوزن ديالو بحال الريشة خفييييييف ومامثقل بحتى حااااجة ... عينيه كيتقلبووووو وهو كيتنغم فداك الحبة ...
المنشطات لي بداهم غير باش يتوگض ويحفض مزيان ويقدر يبقى ديما صاحي وميديهش النعاس و الخمول فالامتحانات باش ميرجعش للمغرب . تالقى راسو مدمن علييييهم ...
اسد بلا ميحس دا ولدو للادماااان بسبب الضغط لي دارليه وبسبب التحدي ديال ترجع للمغرب .... كان باغي فقط يزيرو فقرايتو .. معمرو ظن ولا غيظن ان الامر ... يقدر يخرج على حياة ولدو .....
النهار بدا كايدوز ....
كان كئييب .... خصوصا عند بيلي وجود ....
بيلي فيقها اياد وخرجها بزز يفطرو على برا باش ينسيها شوية ولكن كيلقى راسو كيتعامل مع الجماد .... كل ماتلقى الغفلة تسهى ! كتقول علاش مارجعش اتصل ! علاش مكاين تاخبار ؟ واش الهضرة لي قلت ليه ماحركات فيه والو ؟؟؟ فين هو ....
الهم والتفكير كياكلو فيها من داخل وكتحاول متبينش تارجعو للدار وبدات تفتح معاه ليكادو ... كيشوف معاها كاع مافرحاااانة وغير دايرة ليه خاطرو هو يحيدهم من يديها بحجة من بعد حيت شافها عقلها مكاينش تما .. جاتها من الجنة والناس وطلعات فوق ناموسيتها وتكمشات تاني .... وهو شاف تاعيا فلخر خلاها وخرج ....
غير خرج هو ...طموبيل اخرى دخلات كانت ديال مروان پاركا نزل ودخل لدار ....وفالباب تلاقاتو المساعدة
- موسيو مروان .. نعاونك فشي حاجة !
مروان : بيلسان هنا !
- وي موسيو كاينة فبيتها ...
خلاها وطلع فالدروج مخلوع .. حيت النهار كامل كيصوني عليها ومكتجاوبش .. حل الباب عليها . هي غير سمعات حس الباب عرفات اياد رجع وضارت بشوية تقوليه راني لاباس هو يبان ليها مروان ... شافتو بحالا شاااافت فوهة دالاوكسيجيييين .... لطلقات شهههقة كانت عندها مخنوووقة لداخل وهو غير شافها هاكاك ومشا بزربة عندها وهي تعنقوووو
بيلي : تتخنننقت ... تخخخنقت امرواااان ... تخخخنقت .....
عند جود ...
وصلات طموبيل ديالو قدام الگاراج .... لي معارفش اصلا كيفاش دار حتى وصلها لتما .... غلطة اربع سنوات حتى كولشي نساها تجبدات من جديد باش ترجع تعيشهم فداك الهم ... وهاد المرة الهم ديالها كان اكبر .. لانهم دابا ناس راشدين وعارفين شنو هي المسؤولية ... ماشي دوك المراهقيين الطايشين ... شاف للپوش مددة شاد على الفولون كيضور كاع هادشي لي داز فراسو هو يحل داك البوش وجبد اليو ايس بي ونزل من الطموبيل ...
قرب للگاراج وحل القفل ديالو ودخل .... كان لداخل عامر بسطولا دالصباغة والكرررااطن و الخشب .. كانو هاد نهار ماخداميينش ... سد موراه الباب وحل السرااجم باش متخنقوش ريحة الصباغة وطلع فالدروج للطابق الفوقاني .... كان مسالي من الصباغة ولكن باقي مفرش بالاوراق .. الكراطن فكل بلاصة والسطولا ومواد البناء .. واخا المكان مرون مالقاش شي بلاصة غيرتاح فيها كتر من هادي .... مشا باتجاه واحد الطبللة كانت تما ومعاها كرسي .. طابلة فين كيقاد مسائلو مع المهندسين ... جر الكرسي وجلس كان تما بيسي صغير بيض .... حلو قدامو ودخل الباسوورد ... هو يتشعل ليه وصورة السيارات فليكخون ....
ملي عقل على راسو و هو العشق ديالو غير السيارات ... امتى كان عندو عشق اخر ! ... مكيعرفش راسو واش كيبغي شي حاجة اخرى من غير طموبيلات ومجال الميكانيك ... ميمكنش يقدر يتيق راه غيولي عندو عشق واحد اخر ! تولي عندو بنت كيبغيها !!! كتجيه شي حاجة مكدخلش للعقل ... الحب كيجي حيت نتا اختارتيه ولكن فحالة حود جا رغما علييه ومفروووض عليييه ... طلع راسو للفوق كيمص شفايفو .. واش يبرونشيه !.. واش يشوف ! واش يعطي مجال لهادشي ! واش يعطيه فرصة !!!! واش هو فعلا خاصو يهز هاد المسؤولية !!! ... واش هادشي لي غيشوف فهاد اليو اس بي .. غيخليه يبدل رأيو !
برونشا داك اليو اس بي هو يتلاح ليه قدامو فالشاشة .. خدا نفس عمييييييق ..... وضغط عليه .....