تكملة البارت السابق
💔💔💔💔💔💔💔💔
و
جود الأخ في حياة الفتاة هو حضور لصديق أبدي، ورفيق أول للطفولة، وصخرة تستند إليها عندما تكبر
................
ق
ربئ
من حجت هيج حفصه ارتعد كل جسمي معقوله اخويه من بعد سنين اشوفه التقي بي احضنه اشمه احس لاكيه اهلي كلهم اهلي الفاقدتهم معقولة بعد ما انكطع عندي الامل بعد ما انسدت الدنيا بوجهي الله فتحلي باب وراح ارجع الخويه
تركت حفصه واكفه بمكانها ورحت للاستقبال وكفت واني اسمع كلامهم واحد منهم كال. .اي احنه من طرف سليم هو جان بالجبال باربيل وبعدها انتقل علئ ايران...
وتزوج هناك وحده ايرانيه وعنده منها بس ثنين بنات وحده اسمها فاطمه والثانيه زهراء...
دز سلام خاص الاخته وعرف بزوجها انسجن لهذا السبب هو يريدها يمه يكول هي اختي واتكفل بيها هي واطفالها ...
رد عليه الشامخ...ول شهل كلام عجل احنه هينا شنو مقصرين ويه ويلادنا ؟ بويه كول لاخو حرمتنا اختك بالحفظ والصون وابو محمد زعلان عليك علئ هل كلام
احنه وادم ما متعاجزين من بزرنه وما نريدو يكون بعيد عنه وندري بيها هي اختو ودمو ولحمو بس هي،صارت بنيتنا واحنه ما نتخلئ عنها...
شكد ذقت من مر الحياة بس ماكو امر من هل موقف مسحت دمعتي اليتيمه الحزينه الممزوجه بالحسرة ومليانه بالقهر والفقد...
اي فعلا مليانه فقد واراده فاقده احبابي اني فاقده اهلي وناسي فاقده ذيبي واهلي احس،بالوحده والحزن يكسرني...
رد عليه واحد منهم...ميخالف اذا هاي خليها تجي زياره كم شهر وبعدها ترجع عندكم لان هو رايدها ومتعذب الخاطرها خلي يكفر عن ذنبه لان عافها هنا
الشامخ جر نفس وتنهد كله..بس بنيتنا هساع ولاده جديد مو زين عليها السفر الطفله شويه صحتها مو تمام لان جابتها بالثامن لحد هساع ما مكتمل نموها مو مال سفر
ان شاء اللة بس البنيه تصير بصحه وعافيه انه اجيب اختو بيدي وهااا ليكون بعلمكم انه لحد هساع ما مأمن بيكم
لهذا السبب انه اخذها بيدي واجيبها بيدي،ما اامنها عند اي واحد هي امانة ذيبي ما اكدر افرط بيها و اخليها تروح من كيفها...لو ويه اي شخص انه المسؤؤل عنها وانه الاخذها واردها..
رد عليه...وسفه عليك ابو محمد احنه جايين من طرف سليم ابو فاطمه وكطعنه مسافه طويله من ايران للغربية ونسمع منك هذا الكلام لا والله وسفه
ضحك...ول بويه عليش زعلتو بالعكس لازم تفرحون انه محافظ علئ صديقكم وما مامن حتئ علئ ربعه وبعدين ذيب عندو اعداء جثيره يجوز يكون ملعوب من واحد بيهم مع احترامي الكم بس الاحتياط واجب...
ردو عليه...اي هم صدك بس تكدر تتواصل ويه سليم وتتأكد منه
رد عليهم...الله كريم بويه انه هم استشير حرمة ذياب واذا حابه تروح اخذها بيدي ما امنها عند اي شخص ومشكورين ما قصرتو تعبتو واجيتو الله يكثر من امثالكم
جاوبو...لا احنه اجينه الخاطر سليم وجنه ناوين نفرحه وناخذها ويانه ونسويها الا مفاجأة رغم هو كال ما تجي وتعوف جهالها...
الشامخ...اي ما تعوفهم بس انه هم احجي وياها وان شاء اللة ارد الكم خبر وتاخدونه الهم بحيل الله
اني خليت ورحت كلبي طاير علئ اخويه سليم حبيبي بعدك تتذكرني يا روح اختك وعقلها حبيبي والله اتمنئ احضنك انت الوحيد الئ ضليت الي من عائلتي انت الوحيد الي تحتويني من بعد ما راحو اهلي انت سندي من بعد ذياب الحمد لله يارب
شكد مشتاقتله شكد اتمنئ اشوفه شكد ببالي احضنه واضمه اكعد مثل قبل واكابله علئ الاكل ناكل سوه نضحك سوه نسولف ونحجي يرزلني من ما يعجبه وضعي...ومن اسوي،فد شئ غلط
بجيت وشهكت بالم وقهر تزوج واني تزوجت لا اني حضرت عرسه الي جنت اتمنئ اشوفه وافرح بي واركص مثل كل وحده تفرح باخوها...
ولا هو شاف عرسي وسلمني بيده الزوجي مرفوعه راس وفرحانه بوجوده ثنينه ما تهنينه ولا فرحنه
ومشت السنين وصار عنده اطفال ومحد شاف اطفال الثاني عشنه غربه رغم احنه اخوان عشنه ببعد رغم قربنه من بعض...
همست الله يسعدك يا سليم وين ما تكون ويحفظ بناتك يا رب شكد اتمنئ اشوفهن يصيحلي عمه فدوه الكلبهن فاقده لهل كلمة والله يا خال علاوي ...
بس تعذرني والله تعذرني يا خووي ما اكدر اجيك ما اكدر اجازف روحي هنا مربوطه عند ذياب ما اكدر اتركه واسافر واعيش حياتئ
اني ضاله علئ العهد عاهدته و وعدته ما اتركه وانتظره عشرين سنه هنا موتي يا سليم هنا اضل طول عمري ما اطلع من هذا المكان ما اطلع الا ويه ذياب منتظرته منتظرة عشرين سنه من يطلع ارجع طفله بوجوده
تنتعش عندي الحياة اعتذر يا ابو فاطمه ما اعوف بيتي ورجلي واجي البلد ما بي بس انت نفسي هنا متعلكه ويه ذياب ما اكدر اجيك واخون ثقة ذياب بيه
الحمد لله عايشه بنعمه ومحد مقصر وياي ما عندي عذر اطلع بي من بيت جد اطفالي ما عندي اي عذر
هذا وطنهم هذا بيتهم ذول أهلهم هم ..هماتين مثلي منتظرين ابوهم منتظرين طلعة ابوهم من السجن تتكحل عيونهم بي...
مسحت دموعي ودخل الشامخ بعد ما راحو كال...ها بويخ قربان ان شاء اللة بخير هينا
هزيت راسي بقبول ...
جر نفس كال...ذول الجماعه اجو عليج انتي بالذات هم من طرف اخوج سليم ويردون ياخذونج اخوج سليم يكول زلمتها محكوم عشرين سنه وهل عشرين جثيره اختي لازم تكون عندي...
بعدها اردف بهدوء وهو يقبض علئ سبحته كال...بويه انه ما اريد احرمج من شئ انتي اذا تردين ترحين روحي بس انه اخذج بيدي
هزيت راسي،بنفي كال...هااا ما تردين ترحين ؟
هزيت راسي بقبول...والدمعه سالكة وماخذه مسار علئ خدي...
هويت راسي بدموع ونفي وكلبي يصرررخ ما اريد اروح ما اريد اروووح المكان ما بي ذياب ما بي الانسان الي يعشگني ما بي الانسان الي انتشلني من كل شئ ما اكدر اعيش بمكان ما بي نفس ذياب
هنا اتنفس وياه نفس النفس بايران شتنفس هنا اسمع اخباره واترقب وضعه هناك شسمع ما اريد ما اريد اكون ببلد ما بي روح ذياب ولا نفسه...
هذا الكلام جان يدور بعقلي وگلبي بس للاسف ما كدرت اعبر عنه واترجمه بصوتي ضل مدفون بصدري محد يحس بي غيري
حط ايده علئ جتفي كال..نروح زياره شهر شهرين سنه ضلي يمه وتعاي هينا اخليج عنده وارجع وبعدها اجي اخذج
رحت بسرعه جبت ورقه وقلم وكتبت...لا جدي ما اروح لا يوم ولا يومين ولا دقيقه اذا طلع ذياب نروح اني،وياه ما اكدر اروح واعوف ذياب هنا احس نفسي تاركه اطفالي هنا مو ابوهم
حط ايده علئ جتفي وكص الورقه اخذها خلاها بجيب دشداشته كال..ونعم منج بنت اصول وزين ما اختار ذيب والله وحده غيرج عافته وراحت من يوم الانحكم
ابتسمت علئ كلامه ما يدري اني محكومه بي مؤبد واحبها اكثر من روحي. .
...................
سوزان...
دا اريد اروح للجامعه بس البنات اخاف عليهن ولو اني متفقه ويه فاروق هو مسائي،واني صباحي يعني من اجي هو يروح للجامعه يضلن يمه الصبح
وهو يحجي ويدرم شكد ما عنده اتكيت يعني هن غير هماتين بناتك شكد اناني
يكول حارماتني من نوم الصبح ميت علئ النوم شكد ينام هو النوم شيفيد اكعد وصبح بوجهه علئ ملائكه البريئة ونبي تنسئ ابو النوم
بس مرات هماتين انقهر عليه يخبط مميات ويغسل الهن ...بس يعني شسوي هذا هم مستقبلي يعني هماتين اني باجر عكبه افيدهن واكيد راتبي حيكون الهم وادرسهن ..يعني اامن مستقبلهن هماتين اني بجهدي وتعبي محيكونن محتاجات بوجودي وبوجود ابوهن اكيد...
عفته يحجي ويدردم وخليت وطلع اوووع شنو هاي ما عنده اتكيت شكد يحجي جنه بيبته صالحه...
ركبت بالخط بعد ما بوستهن باوعت من الجام واني مبتسمه شكد فرحانه بيهن وشكد احبهن وصورتهن الحلوه ما تروح من خيالي فدوه العمرهن اروح اني ..
دخلت للمحاضره هناك الطلاب والاساتذه كلها تعرفني وهماتين شنو متعاطفين ويايه كوني ام التوأم ومجتهده وطالعه الاولئ علئ القسم فإني قدوه الهم طبعا...
كملت المحاضره واني سرحت بخيالي بعد ما كعدت بالكافتيريا اتذكرت امي من اجتني...
حضنتني،حييل وهي تبجي،بصوت عالي تبجي من اعماق روحها تبجي وتنوح وترجف وتبوس بيه تبوس براسي وخدي تشمني،مثل الام الفاقده طفلها وشافته من بعد سنين
واني جنت جامده بمكاني ما عرفت شلون اتصرف ما عرفت شنو حتكون ردة فعلي...
رغم كولش مشتاقه الها مشتاقه اسمع كلامها احضنها احس بوجودها بس كان عندي خوف منها خوف لا يطاق
مر عليه شريط من حياتي حاولت اجتازه وارجع اوكف علئ رجليه من جديد
سنين وصلت بيها للموت وحسيت بالموت مطوقني رجفه معتليه كل جسمي ما ضل دكتور يعتب عليه ما ضل شيخ ما رحتله وبعد ما اجتازيت العظم الحاز نحري راجعت دكتور نفسي لان صارت عندي اثار جانبية من بعد ما تعبت نفسيتي وما كنت اتوقع ان امي بيوم من الايام تضرني وهيج يصير ويايه
هي مو قصدها تضرني اني ما ابرر الها الا بالله الكريم بس اعرفها تحبني وتموت عليه وتتمنئ اكون احسن البنات
بس هي كانت تريد تبعدني عن فاروق بكل طريقه بكل لذلك التجئت للشعوذه...رغم هي تعرف اني احب فاروق واموت عليه وسعادتي ما تكمن الا وياه وهي ما افتهمت شعوري ولااحترمت احساسي ومشاعري تجاه فاروق
الحمد لله هو ممقصر ويايه وديبذل جهد في سبيل يسعدني ويريحني اني وبناتي...
وبعد من صار عندي بنات احس حياتي صارت ملك لفاروق ومن سابع المستحيلات ابتعد عنه...
دخلتها بس كنت مرتبكه حيل وأمسح دموعي بغزارة كعدت علئ قنفه كالت...صدك سوزان ولدتي توم بنات وما تكليلي ولا حضرت ولادتج ولا كلتي اريد امي ما وكفت بعينج امج ما وكف بعين تربيتي الج ولج دم كلبي انطيته الج ربيتج وكبرتج و وصلتج هيج بعد ما الي قيمه عندج
كعدت ونزلت دموعي جاوبتها...وانتي تعرفين شكد احبج اموت عليج بس السويتي،ويايه لا يغتفر ليش عدمتي ثقتي بيج ليش صرت اخاف منج ترا عشت بماساة والله
جرت نفس كالت...ما ردتج الفاروق ردتج تكونين الشخص احسن منه
رديت عليها بحزم ...بس ماكو احسن من فاروق بالنسبه الية...
كالت...سدي هل موضوع خسرت بي هواي اجيت اشوفج واشوف البنات حفيداتي
عضيت شفايفي وكنت خايفه لا تكون لعبه منهن ويسولي سحر ثاني
مشيت خطوات وضليت اراقب بيهن شفتهن كاعدات ما تحركن واستغلن عدم وجودي
خليت للبنات بودره واخذتهن الها هي من شافتهن فرحتهن باستهم وحضنتهن وحتئ بجت كالت ...حلوات يشبهنج مثلج من جنتي طفله همزين مو علئ فاروق
تنهدت...هم خليتي فاروق بالنص ترا فاروق ما يكرهج ولا فد يوم حجه عنج ماما كافي عوفي فاروق بحاله اذا حابه نعيش بسلام لا تحجين علئ فاروق
ضحكت كالت...سكتت سكتت لا بس قصدي انتي حلوه فاروق جان اسمر
ابتسمت...لا مو اسمر برونزي لونه يجنن
فريال كالت...اي بس لو نرجع للحقيقه انتي زياده علئ فاروق
رفعت حاجب ...شنو هل كلام شنو زياده علئ فاروق عيب هل كلام هسه انتي لاكيه مثله حتئ تحجين عليه بله خلي نشوف زوجج عشتو اوووع ما عندج اتكيت
وبعدين لا تحجين علئ ابو شيفو وديلان لا يزعلن عليج ما يقبلن علئ ابوهن هههههه
ضحكت كالت...ترا هاي الحقيقه
جاوبتها بملل...دنجبي انتي،والحقيقه
رفعت حاجب...وين الاتكيت الجنتي تحجين عنه
ضحكت...راح ويه تربية فاروق ههههههههههه
امي كالت...كافي،بلا هل كلام ...تعاي احجيلي عن ابوج شصار وياه ما صار مرته العكربه ما جابت
رديت عليها...لا هذا شهرها وبيها بنيه ههههههههههه لج ماما احس الشعب العراقي كوله جاب بنات ولا وحده جابت ولد هل سنه ما اعرف شنو الوضع ارتفع عدد الإناث علئ عدد الذكور...
كالت...اي هسه تجي وتاخذ معزتج من ابوج مثل ما امها اخذت معزتي منه
رديت عليها بتنهيده...ماما انتي غلطتي انتي استفزيتي بابا هوايه وعدمتي شخصيه ترا نادين تختلف عنج حسست بابا من صدك رجال تشوره بكل شئ عكسج انتي كنتي تمشين كوله ضده ومزاجج
جرت نفس كالت...اي،صح اني صوجي يوم جبتها وحطيتها ببيتي عود ردت اساعدها وانتشلها من مزبلتها شمدريني بيها حاطه عينها علئ رجلي
سكتت ما جاوبتها شجاوب اذا هي مقتنعه بكلامها بعدها كالت...حبيبتي اطلب منج طلب
رديت عليها ...اي اطلبي
كالت...احجي ويه ابوج ودخليله بفد دربونه خلي يرجعني الذمته حتئ لو علئ ضره اني،ببيت وهي بيت وحتئ لو ما يكعد يمي المهم المكم من جديد انتي واخوج واحس نفسي كاعده ببيت احسن ما ماخذه البيوت
وكفت متعصبه والدمعه بعيني...غير كوله بسببج انتي انتي وصلتينه لهذا الحال لو عايفه الناس بحاله ومهتمه بس بينه وبنفسج مجال صار الي صار
مسحت دموعها كالت...بعد هذا حضي شسوي ما عندي حظ هسه كليله ولا تعاتبيني...
سكتت وهي صدك ما مال معاتب الصار الصار قنعتني اروح احجي ويه بابا ويخليهاببيت وحدها هي،واخويه بعيدا عن نادين...
رجعت الواقعي محتارع احجي ويه بابا لو لا بس كلت احجي ويه فاروق هو يحجي ويه بابا ويقنعه يرجعها لان ما اكدر اقابل بابا واحجي وياه بهيج موضوع واشوفه هو مرتاح ويه نادين ويعرف ماما شسوت بي...
رجعت للبيت ملهوفه علئ بناتي ولكيت هناك بيبي صالحه اليوم تكتلني
...................
قربئ...
سبحت علاوي وبدلت اله مشطته وطلعته يم جده والبنات هماتين غسلتلهن غدير تموت علئ حفصه وتحبها راحت وياها...
وهدير نامت رضعتها ونامت...
احب الهدوء صايره رسالة ذياب قريتها الف مره وما اشبع منها وكل ما اختلي بنفسي اكعد اقراها واحس بي يحجي ويايه احساسه عندي حسيت بكل كلمة كاتبه حسيت بمشاعره وحبه اليه
طلعت الرساله وقفلت الباب وكعدت اقره بيها والدموع حجبت عندي الرؤية...
مسحت دموعي ابعدهن عن وجهي وا وضح الصوره عندي...
من احس اني المقصوده بكل حرف بهل رساله افتخر بي وافتخر بنفسي
اكدر اكول وبكل فخر انه ملكة گلبه واحساسه احس نفسي ملهمتة ومسببه جنون لهذا الشخص
الي كاتب هل كلمات بكل حب يا سعادتي بهذا الحب
كاتب...
انتي نغمه من بين نغمات كلماتي انتي اغنيتي من دون كل النساء
انه اتباهه بيج جدام نفسي وجدام كل الخلق احبج جثير يوولو احب اسمع كل تفاصيلج اكتب كل موقف بينه واخطو بجنون
انتي منحة سعادتي انتي الي اشوف العالم بيج السجن ما هو الا عتمه تغتال مداخل روحي ومخارجها لكن ذكرياتي وياج تزيل عني هاي العتمه
انتي كوكب غامض محرم علئ،كل البشر بس،حلال عليه
حبيتج من دون سبب وتنازلت عن گلبي ومنحته لگلبج الابيض
لان انتي الوحيده الي خليتي ذياب مثل الطير الطاير والي يحس بنفسه مو بسجن وهو عايش علئ ذكرياتج
احركيني بحبج يا ام علي،ولا تطفيني انتي قصة حب متوحشة من خلالها دخلنه العالم مزهر رغم الظروف
احببج يا ام علي ذيبج العاشك والواكع بذنب عيونج..ول يابه احبج
حضنت رسالته الصدري وعبالك حاضنته واني ابجي واردد بداخلي الله يرجعك الگلبي المهموم الحزين من بعدك يا ذيبي..احبك والله اموت عليك
ياربي والله ما اتحمل شوكت يطلع ذياب من السجن احسب البعده ليالي وايام احسب الثانيه وطول عليه الفراك والله هواي عشرين سنه وين الكاه بعد يارب قر عيني برجعته يا حبيبي يا ربي...
....................
فاروق ...
يوميه علئ هل وضع سوزان تروح للدوام الصبح وانه يم دريه ونفيسه اه قصدي شيفان وديلان تعودت بعد شسوي
طلعت سوزان تطكطك بكعبها وبيدها ملازمها وكتبها تكلب بيهن وانه شايل هالمكاميع وحدة منا ووحدة منا وكل شوي اخمطلي بوسة من خد وحدة منهن خدودهن الموردة يشجعن الواحد يبوس بيهن ومايشبع شكد حلو احساس الابوة فعلا فد شي ماينوصف
انه صح ارزل بسوزان واحب نومتة الصبح بس شسوي هم. احبهن واحب امهن ام الاتكيت
سمعت صوت الشفطة مال خد وحدة من البنات رفعت راسها تكوول فاروووق شنوو كتلك موو هيج دخيلك والله بشرتها تتحسس
جاوبتها احاول اغير الموضوع : يله يا يبا يله مو السايق استلك جد جده وهو يتانيج جوه
سفطت ملازمها وكالت اي بلي يله رايحة بس لتنسى المي سوي لا حار ولا بارد
جاوبتها ادري ادري مِليل كولة جدتي صالحة شوكت يكبرن وانام واشبع من نوم الصبح
كالت والحليب بالكاونتر بالخانة
ماكملت كلامها عطت بيها سوزان تاخذين فروخج لو تولين لجامعتج
كالت لالا اخذ فروخي ااءءاقصد
وكملت بنبرة بكاء مصطنعة اروح للجامعة فارووق عفية شلون حفاركهم
تحجي وتضرب برجلها على الكاع
كتلها بتوسل يله عيني لا تخلين الرجال يسبج هسه
هزت راسها كالت بامتعاض يله حروح
باستني بخدي ودنكت باست البنات
تريد تروح
كتلها وين بوستي ؟
قربتلي خدها ... انه ماكدر الزمها البنات اثنينهن شاغلين ايديه ..." /> قربتلي خدها ... انه ماكدر الزمها البنات اثنينهن شاغلين ايديه ..."
">قربتلي خدها ... انه ماكدر الزمها البنات اثنينهن شاغلين ايديه ... خليت خدي على خدها ودرت وجهه
صدر منها صوت تأوه اممم لحيتي بززتها
بستها على شفايفها .. كتلها منا بوستي اريدها
ضحكت وهمست احبك ... باوعت للبنات نظرة اخيرة بحزن وتوجهت للباب وطلعت وهي مستمرة توصي وتنطي نصايح
احتاريت ويه البناات لااافعلا الابوة صعبة رجعوني اعزب دخيلك ... نامن البنات ورى ما استلكت عشيرتي من وراهن
اباوعلهن نايمات شكد حلوين يبتسمن وهن نايمات مدري بشنو يحلمن .. وشفايفهن مشتغلات يمطكن حتى وهن نايمات يمكن جاي يحلمن بممة جبيرة عملاقة متروسة حليب وماتخلص
ضحكت وسديت عليهن باب الغرفة ورحت كعدت بالصالة ارتاح لزمت راسي وعصرته حيييل الله يساعد سوزان وكل الامهات من صدك صعبة هاي المسؤولية
صار الظهر .. سمعت صوت الجرس يندك رحت بسرعة اريد افتحه لا صوت الجرس راح يكعدهن وانه ماعولت انيمهن ..
فتحت الباب صارت كبالي جدتي صالحة خاله ايدها ع الجرس هسه غير توخره
خليت ايدي على راسها وسحبتها عليه وابوس براسها واسلم عليها اريدها بس توخر عن الجرس
ووياها جدي وامي سلمت عليهم ودخلتهم ... ووياهم طيبة بت وئام
جدتي سألت على سوزان كالت جاا وينها وزويزو مالها حس قير تيي تسلم على عيالها ولك انت قير تعلمها تفهمهه ع الصح ع القلط
جدي استلمها : شبيج زايرة شبيج ... القايب عذره وياه يمكن يم بنياتها بعدنه يالله تونه دشينالهم صبري
جاوبتهم لا ترة سوزان بالكلية عدها امتحان اليوم واضطرت تروح ...
جدتي كالت اييه همزين حتى احجي عليهه براحتي ...
جدي كلها عاد هسه انت مقصرة كدامها شو تدشين بنص عينهه يزايرة
امي سألت على البنات كالت وينهن البنيات عنن عليه اريد اشوفنهنن ...
كالت جدتي يا جا وين بعد قير ويه امهن خو ما يظلن يم فاروغ خو ما فاروغ ماما انيسة حتى يظلن عنده
كحيت وكتلهها هاا توهه نومتهن ماما انيسة .. قصدي انه نومتهن هي سوزان نومتهن كبل لا تروح ... لا تره هنه بناتي وشنو يعني واذا ظلن يمي
جدتي كالت ياااااع فارووغ الحيد صكد جذب كاعد مكابل هالمكاميع وتخضلهن مميات اول تالي
جاوبها جدي ... كولي يالله جاا وين تاخذهن امهن وهيه رايحة تدرس ؟ وين تخليهن بالرحلة يا ام جميلة
سمعت صوت وحدة منهن كعدت واكيد راح تكعد الثانية ع الصوت البجي مال الاولى
كتلهم وانه وكفت على حيلي المكاميع كعدن اروح اجيبهن واجي ...
رحت جبتهن واجيت امي خذت وحدة وجدتي الثانية ...ظلت جدتي تباوع كالت ياهي منهن ستيان وياهي دمغان ؟ شني جا ماينعرفن وحدة من الثانية
ظليت اضحك وكتلها شسالفة جده مخلف محل ملابس داخلية اشتعلت امج صبيحة بكاز ونفط يا سوزان هنه ذن هم اسماء
احتارت جدتي شتسويلهه نوب تدحس ايدها بحلكها وتكول بلاعيمها نوب تغركها دهن وتكول مملوعة نوب تشربها ماي بي هيل وعلج مر وتكول متفوخة .... حسب مصطلحاتها دكتورة صالحة جاي تطلع خبرتها على بناتي والله اليستر
وانه اكللها والله لو تشوفج سوزان
كالت هيه وينها ام ارگيگو يمته تيي
باوعت للساعة كتلها هسه على جيه ..
كمت على حيلي كتلهن رايح اسبح ديرن بالجن على البنات
كالت جا يا چنتنا تره متنه من اليوع ماناويه تسويلنه غديوه لگيمه ناكلها ؟ شو من الظهر لهسه بس تخض مميات وهاي بتك ناصت تعال اخذها يمكن دكت براسها الجكارة
رحت اخذتها منها كتلها جكارتيش صدك جذب خو ماخليتي بحلكها جكارة انوب
كالت لاااع شبيك انته الجكارة هي مو ترضع من امها ؟ هسه تريد ترضع خايب شبيك هذا غصدي
كتلها هااا .... رحت خليتها على السرير مال غرفة النوم واريد اطلع دخلت طيبة للغرفة ... سالتني نامت النية ؟
جاوبتها بصوت ناصي اي نامت تعاي يله طلعي وياي من تكعد لعبي وياها ...
طلعت طيبة ورحت اسبح فد شويه عندي شغلة اريد اطلع ...
طلعت شفت طيبة كاعدة يمها فوك الجرباية وذيج كاعدة وتباوع عليها ...
اخذتها وديتها يم امي شفت جدتي مسويتلها لفة خضرة وجاي تاكل خطية حقها جاعت رغم من اجو خليت يمهم جبن وجاي وطماطة وخيار
وهم طلعت اكل من الفريز وحميته وكلينه ..
وجدي متمدد ونايم ...شالتها جدتي ونومتها على الكاع كالت لاتتعود ع الحضن ... وكالت شوي كصر التلفزيون خلي ادكها نومة على ماتيي ست الحسن تقصد سوزان
دخلت للغرفة تمددت على السرير هم اريد اغفى شويه والبنات يم امي تداريهن ... غفيت يمكن دقايق مو اكثر
وكعدت على صوت هوسه كمت واشوف سوزان جايه ومخبوصين
اجتني سوزان كالت فارووق ووين ديلان ؟ شيلان ماكو عفية عبالي يمك ويينها فارووق وين بنتي ؟
كتلها غير خليتهن يم امي وفتت انام شويه
امي كالت هاي الزقيرة وصخت كمت اقسللها اييت ماشفت الثانية
شنوو هي قابل تمشي ؟؟ توها اشهر عمرها ظليت اباوع واتلفت وادور ...
جدتي كالت يبوووي بس لا بيتكم بي يني وخذاها يني مايخلف مابي فروخ وباكها تصير ترى تصير مو جميلة مو صارت ابت ابو مكي ؟
عاطت سوزان عزااااا
جدي كال ياامرة لو تحجين شي بي خير لو تسكتين احسن شلج بهالحج
بهالحجي
انه انتبهت طيبة ماكو ؟؟
سألتهم وين طيبة ؟
دورنه ونشوفهه ورى القنفة خاتلة ... ونسمع صوت بجي جاي من داخل المعرض ... ركضت فتحت باب الدولاب مال المعرض واشوف ديلان بالمعرض وكوة تتنفس ركض طلعتهه منه واخذتها سوزان مني وحضنتها وتبجي وياهه ..
هزيت ايدي علئ طيبه جااا امها فلفله شتطلع
والله واخذها وابوسها ونطلع اني وياها بنت فليفله لا تروح تسوي كارثه رحت تسوكت واجيت مو فرخه مشعوذه اخوها محمد وامها فلفله وابوها عمر عوذه عائلة إجرامية
.....................
قربئ...
يوم 16 اكتوبر عام 2002 صارت انتخابات رئاسيه هاي للمره الثانيه قبل هماتين صارت 95
هي انتخابات كانت استفتاء للشعب العراقي منو ينتخب بيها...
تتصورون جان يوم حلو العالم كلها راحت تتنتخب مرشح واحد ههههه الي هو صدام حسين ماكو وياه مرشحين ابد...
جانت الشوارع العراقية مزدحمه والناس تهتف بالروح بالدم نفديك يا صدام ...
جان الشعب ما اعرف شلون اوصفه يصفكون وفرحانين رغم جان اكو ضلم اكو طغاة اكو دكتاتوريه بس ادو الولاء للرئيس
والشامخ راح انتخب بالدم ههههههه اي والله صدك انتخب بالدم واكثر الناس خطو التصويت بالدم...
اني هم اخذوني انتخبت وما ضل واحد بالبيت ما انتخب ما جان اكو امن وحراسه وما اعرف شنو لا عادي مو مثل هسه جان اكو امان للامانه طبعا...
اخذونه للمدارس ننتخب وندور اسامينه صدك بيومها تونسنا وضحكنه من كل كلبنه جانت الموسيقئ تدك والطبل والعالم تركص ذابه لحم كلها تتراكص وتهز جتف
واللافتات مكتوب نعم نعم للقائد الحبيب،صدام حسين ...
اثارت انتباهي لافته مكتوب عليها...العراق مصنع الحريه والديمقراطيه انتخبو صدام حسين...نعم نعم للقائد المجاهد صدام حسين
ابتسمت...وين الديمقراطيه بالموضوع هو مرشح واحد وغصبا علئ خشومنه ننتخب الما ينتخبه يشكون حلكه وحلك الخلفه كلها كتبت نعم وناس خطت بالدم كتبت صح علئ المربع البي نعم بالدم خطو
وجانت ام شاهين مرة عم ذياب جايبه موسيقئ،وتركص وتهلهل والبنات يصفكن عبالك عرس شكد حلو ههههههههههه
بعدها علن نائب رئيس مجلس قياده الثورة عزة ابراهيم الدوري بأن الرئيس صدام حسين حصل علئ 100/100 من الاصوات وتجددت اله الولايه سبع سنوات يعني يحكم ل 2009
بيوم 20/10/2002 جنه كاعدين وفاتحين التليفزيون وطلع محمد الصحاف الي نطق العفو العام
كال...سيطلق السجناء الهاربين والمحكومين اعدام عفو شامل لكل السجناء ...والهاربين من الخدمه العسكريه
من سمعو العفو الكل ضل يبجي وخالتي ام ذياب ضلت تهلهل وتصرخ وتبجي وحاضنتها حفصه
وكفت من سمعت العفو عن السجناء وصرخت بصووووت عالي...ذيااااااااااااااب ذياااااااااب حبيبي الحمد لله يارب الحمد لله العفو شمل ذياب
صدام انطانه العفو علئ عناد أمريكا....
نهاية
لا تنسوا التصويت و المشاركه بكم نكتمل ❤