وذاتُ خدر يروق السمع منطقها
كما يروقُ انسيابُ الماء في النهَرِ
ألقت جلالةَ صوتٍ من فصاحته
تلقفته عيونُ الناس بالبَصر
ما مرّ في الأذن إلا ظن سامِعُه
نفثٌ لهاروتَ منثور على البَشر
يزين منها رديء الشعر تُنشدُهُ
في نفحةٍ من سليم النُطقِ والخَبَر
لارين :
سمعته هيج كال سكتت باوع عليه وعكد حاجبه ديحجي سبقته من تقربت عليه لزمت ايده تحمحمت وكتله
- اني اقبل اكمل وياك
باوع عليه
- لله بالله
- اكيد بدون مصلحه بدون عطف بدون كلشي من هذن الامور لارين موافقه تعيش ويه قَسْوَر وتكمل كل حياتها ويا بس بتفاهم بحب باخلاص بوفاء بعيده عن الشك والكره والغضب والعنف بعيده عن الغصب والاجبار بالتفاني بالود بكلشي حلو بعيد عن الاشياء المحلوه نعيش سوا بالمُره قبل الحلوه تشاركني بشغلات حياتك بمواجعك باذيتك بمشاكلك بكلشي يأذيك ويفرحك بنفس الوقت لانو انت شريك حياتي وتشاركني واشاركك بكلشي موافق لو لاا وهاااا بعيداً عن حُب غيري لو تدور وتراسل بنات ترا ما يخفى عليه شي طول ما احجي هو يباوع عليه كملت ايده بايدي باسها وشمها وابتسم وسحبني طلعني رجع قفل الغرفه وراح لغرفته تمدد ونام
سحبت الغطه و غطيته وكعدت كباله لعبت بشعره باوع عليه
- نامي اذا تردين
- لا خليني كاعده هيج
ما جاوبني غمض مشيت ايدي على شعره وهمست
- لا تفكر بشي انت ما دخلك بكلشي وما راح ينذكر هذا الموضوع ابد اوعدك هاي اخر مره راح ينطرح هالموضوع واخر مره اجيب طارييه او اسئل بي انت مادخلك بكلشي صار خلي هالشي ببالك لا تفكر بغير هالكلام ابعده من بالك ابعد كل الافكار المشؤومه من بالك فكر بيه وبيك فكر بمستقبلنه الحلو فكر باوقات حلوه راح نكضيها سوه نضحك سوه لزمت ايده وكتله
- ايدي بايدك كل صعب نتحملى ونتعدى سوه اني ما اعوفك وحدك ابد اني دوم وياك لا تنسى هالشي اني مو بس شريكة حياتك شتحسبني احسبني وشتريد اصيرلك مره وحبيبه وصديقه واخت فتح عينه وباوعلي
- لارين انه شني بنظرج
- ثالث والديني
تقرب عليه همس بأذني كلام فتحت عيوني مصدومه فزيت و ضربته على ايده وطفرت
- قَسْوَررررر شنو هاااي
- قابل مجذب انه
استغفرالله شلون فززني باوعت عليه
- تدري والله عمري وحياتي ما تخيلت ابو خزره يضحك عبالي متعرف
عكد حاجبه
- ولج منو ابو خزره
- فد واحد غثيث كمت من يمه وهو كام تقرب عليه
- اهاااا وبعد
- وعصبي ومغرور وشرس و وحش و معقد و غريب الاطوار وو...
شفته طغت ملامحه ونظرته حدت بدلت
- حلو وكلش ثكيل و مؤدب حيل و مثقف و صاك و حنين بوووياي شكد حنين
حظني جسمي رجف ردت اطفر بس ماكدرت
- حنيين موو
- ايي كلشش
- اي من هيج تكيفين على حظني وتدوري دواره دفعته
- وخرر ما اريد حظنك
- لا بربج معوزه حنان انه اعوضج ولا يهمج ضحكت
- لا معوزه حنان ولا همم يحزنووون انت المعوز حنان وتريد حظني ضحك
- بعد عيني لا معوز حنان ولا شي مليون وحده اكو تعوض حنان
شهكت ودفعته من صدره
- وتعتررررف وتكولهااااا كدامي انيي مرتك اكو واحد هيج يكول كدام مرته الله واكبرررر
سوه نفسه مصدوم عود
- يبوي ترا قصدي شريف انه صفي النيه شني هاي شبيج هيج مستقتله وتفكيرج بيهاا ديكمل قاطعته
- عزه كافي كافي قَسْوَر نوب تبليها براسي وانت الحجيت كلشي
- شحجيت انه بكلامي اقصد عماتي وحبوبتي وخالاتي وخير من الله نسوان موجوده ويحبني مو الشغله اللي ببالج صفي النيه لارين ردت ابجي الا شويه تقرب عليه اكثر حظني وباس راسي خزرته
- انت شو اخذت ميانه وتحظن وهاي
- مريتي حلالييي بلشرع وبلقانون واكبر راس ما يمنعج عني
- مممممممم
باسني من خدي
- من تكولين هالكلمه معناها تعال بوسني هالمره زين مره لاخ بغير مكان
سكتت والضحكه مرسومه على وجهي باوع عليه مسح على وجهي نظري بنظره راد يحجي عرفت قصده
- قَسْوَر اني مو ياهو الجان لا تظن مجرد ظن انو يصير اللي ببالك اذا كان هسه ببالك او لا خلي ثقتك بيه جبيره انه مرتك سندك تجايتك كلشي تريده بحياتك اصيرلك بس لا تاذيني ولا تجرحني
مرر ايده على خدي وگال
- انتي مو مثلهن انتي مَثل الهن انه الاعرفج زين لارين اشك بروحي وما اشك بيج اتطمني من هاي الناحيه ناطيج كل الثقه واعرفج كدهه بس انه بيه طبع اضوج اذا شفتج تحاجين غيري كائن من يكون اضوج
- تغار عليه يعني
- شي طبيعي زلمه يغار على مريته
رفعت اديه لفيتهن حول ركبته رفعت حاجبي وكتله
- الديم تحبك يبعد عيوني
- شني الجديد كل البنات يحبني
- ايباااه الثقه تقره مليون
- بصراوي بعد
- والنعم ياب اي لا تحاول تبدل موضوع ليش تحبك
- المحبه من الله مو من عبدالله
- اهاااا
- اكلج انه محيرني شي بيوم المطر مو جانت رجلج توجعج وداكه اليتيمه و ما اكدر امشي و ما اكدر و انكسرت وخليتيني اشيلج وتاليها كمتي تراكضين و وكفتي يم النخله المايله اللي من كبت العاصفه والهوى الا شويه توكع وتكسر ظهرج ما خفتي صلافتج شلون وياها ونرجع لنقطة البدايه وجع رجلج وين راح
باوعتله صفح وعظيت شفتي فشلني
- يعني انت هذا الهامك جي شلتني تتعاجز مني
- مو هيج وانما لو كايلتلي من البدايه احظني لو شيلني وفضيها شهالعياره رجلي انكسرت و اخ و اخ
ضحكت وابتعدت عنه
- عزززا والله مو هيج جانت توجعني ومن وكعت وجعتني رجلي نوب اني حبيت جو المطر تقدمت شويه مشيت عادي ماكو وجع مدري اختفه وفجأه صار هوا وحظي وداني يم النخله المايله شمدريني اني هاي المايله وبلعاصفه القويه توكع صابني سعف منها ما وكعت كلها موزين
- والحظن؟!!!!
- تروح وترجع ع الحظن قَسْوَرررررر
ما حسيت الا سحبني عليه وباسني بشفتي رجفت ردت ابتعد منعني شعور اول مره يداهمني فصلها بلعت ريكي حظني اخذ نفس من ركبتي وكال
- تدرين ليش مرات اتقبل اسمي منج
مسحت وجهي وباوعتله
- اي لييش
- لان نطقج اله يختلف غير عن الكل حتى بنطق اسمي تميزتي عن الباقين ولهذا مرات اتقبله منج
ابتسمت
- لازم تتعود تتقبله مني دائماً لان ماعرف اصيحلك بغير اسم ماشي حبيبي ابتعدت منه اجه عليه باس خدي دفعته
- قَسْوَر شنووو هاي كافي
- لا مو كافي تعالييي
كمت من يمه فتحت الباب اخذت الدرج بركضه لجوا صديت لكيته وراي شاف الخبصه كلب وجهه رحت يمه
- يلا حبيبي روح اكعد يمهم واتحمل انت قوي ومايصير هيج تسوي بنفسك وتاذيها احظر هو ثواب كم ساعه يخلص وكلشي يفض بعدها واني الاعرفه عن قَسْوَر قوي ضحك وحظن خصري شهكت
- عززا بعيني وخرررر
فجأه اجانه صوت مرت خالو
- ولكم هاي شدتسوووون لارين يبت
فد خجلت خزرها هو سكتها لزم ايدي رفعها وكال
- اضن ما لبسنه حلقات وعقدنه سيد ومحكمه من عبث عافته وراحت واني كتله
- قَسْوَرررر عيب وربك عييب
- وربج مو عيب مريتي حلالي محد اله حق يمنعني عنج
مشينه هو طلع يم خالو وانه يم النسوان سمعت كلام بس تحاشيتهن وما هتميت لحد الليل كمل كلشي دخلنا جوا كاعدين بلصاله وقسور حجه
- بويه بعد يومين السنه مالت عمي نفضها بلخير ونهاية الاسبوع الجاي زواجنه بعد هذا هو انتضرنه كثيرر كام من يمهم اجه عليه سحبني من ايدي
- امشينه احجي وياج لارين كمت ويا اجانه صوت خالو
- لارين خل تحضر نفسها ترجع ويه عمتك ابو عون ابتسمت وهو خزرني وكال
- اي بويه تأمر
- ما يأمر عليك ظالم وليدي
سحبني للصاله دخل وسدها
- ماكو تاجيل لارين لا تناقشيني بهالموضوع بسج عاد خل تمشي حياتنا دنكت راسي مهضومه من كلامه اجه كعد كدامي رفع راسي
- لارين تعبت بالعباس اريدج يمي ابتسمت وبلعت العبره
- براحتك اليحلالك ويريحك سوي ضحك
- زعلت حبيبتي
- ع اساس يفرق عندك
- انه اريدج تزعلين حتى اراضيج واظهر حبي البداخلي الج
- ايباااه قَسْوَر العاشق الولهان غمزلي
- اراويج العاشق شلون يراضي عندي طرق تفلش تقرب عليه طفرت منه كعدت على حافة التخم
- حبيبي هاي شبيك اخذ النقاش بروح رياضيه اصلاً منو كالك اني زعلت منك مستحيل ازعل منك انت زوجي العزيز
- راح توكعين تعالي كمت من يمه
- عمري روح ترا الديييم تسئل عليك هواي
- بت عمي يعني اخيتي الديم
باوعت عليه صفح كعدت والعب بميدالية الفون وادندن بصوت عن قصد اريده يسمع
- حبيبي على نياتو كِل البنات اخواتو .... قاطعني
- استقري نانسي عجرم اذا تسمعج تغنين اغنيتها تعتزل
ابتسمت وباوعت عليه
- ليش عمري رفع شعره
- اشتعل عمرج بنار ونفط لارين ليش تثيرين شيطاني
- اعوذ بالله من الشيطان الرجيم حرام هالكلام حبيبي احنه بشر مو شياطين انت منيلك شيطان
سحبني اله وضحك
- لا بويه هسه شيطاني جاي يكلي اهجم على لارين وصخم الشرايع بلكوا حبست الضحكه
- ميصير حرام عليك عزيزي ديوسوس الك بلسوء يلا كدامي كول اعوذ بالله من الشيطان الرجيم
- مو جدي اشتعل وحك ربج الخلقج كاعده بحظني ونصها عليه وتكلي كول اعوذ بالله من الشيطان الرجيم
عظيت شفتي وابتعدت منه كام عليه
- يعني انتي تجين تكحليها نوب تعميها
- حباب لا كافي ضحك وكال
- راح اروح عندي واجب ليلي هالاسبوع كله انه راح اخذه حتى بعدين تجيني اجازه هم اخذ لزواجي وامددها ويه اجازتي اللي ورا الواجب
- دير بالك على نفسك اهم شي
اجه عليه مسح على شعري وحجه وياي بحنيه وخوف عليه
- انه ما راح اكدر اروح وياكم للمقبره ولا راح اكدر احضر الثواب الاريده منج كِله القوه لاريني تذكري دوم هالشي ابوج الله يرحمه ما رباج ع الضعف ما رباج ع الاهتزاز والزعزعه فراك الابو يهدم ويكسر وحكج هذا بس كوني قويه هذا الاريده منج وانه بكلشي وياج
سمعت كلامه دمعت عيوني ضحك وكال
- احظنيني لتستحين
- ماميته على حظنك عيناي
- لا بلا ,, حظنته وكتله
- كـ شُكر لكلامك الحلو هذا يعني
- ايباااه كولي حبيته لحظنك بويه واريد اظل بي دايم رفعت راسي باوعتله و رفعت حاجبي
- مثلاً نكول حبيته عندك اعتراض
- افااااا الج هو وصاحبه ثنينهن حبيهن لو انتي تطربين بس ع الحظن صاحب الحظن ما تريدي
- شلون لعد هو الاصل
ركز على كلامي نوب ابتسم وكال
- تطيح بيوتنه كون ولا تطيح الـ لعد من لسانج بيوم
خجلت مسحت وجهي شربت مي وكتله
- على كيفك ويه كلبي
- شبي كلبج شمسويله انه
- هو صوجه صار ينبض باسمك وتعود عليك عشتوو
سمعها وطكها بضحكه خلاني اعيد حساباتي واتذكر كلامي صايره كلش اني يمه اخرط الاول والتالي على كولته استغفرالله العظيم من كل ذنب عظيم شويه وطلع للعصر راح للدوام واحنه ظلينه ورا يومين طلعنه من الصبح للنجف لمقبرة وادي السلام خالو كايدني يمشي واني احس خطواتي ثكيله والدمعه بطارف عيني
نهاريت على كبر ابوي من شفته وشفت اسمه وبصف كبر امي كعدت بينهم واذنت لدموعي بلنزول ظليت احجي ويا واشكيله كلشي اذاني تاليها خالو سحبني من الكبر باس راسي وكال
- انه ابوج بعد المرحوم يالغاليه
شويه وطلعنه واني اريد التفت على كبر ابوي وارجعله ماخلاني زرنه باقي القبور وطلعنه زرنه الامير علي ( عليه السلام ) ارتاحيت بحظرته وتنفست هواها تاليها رجعنه بس غصه وعبره بداخلي كل ما اغمض عيني يجيني وجع يهشم روحي كعدت بين كبر امي وابوي اني عايشه وهم جوا التراب رجعت غسلت و ذبيت روحي ع الفراش بجيت نوب نمت تعبانه من الطريق
صحيت على لمسات بوجهي فتحت غواش غمضت فتحت نوبه لاخ اتضحت الرؤيه قَسْوَر كدامي تعدلت وكعدت باوع عليه وكال
- صدك السمعته
- شنوو
- سابيه الامه سبايه وبجي و تصيحين جيبولي زلمتي مشتاكتله ضحك وباس خدي
- بويه العشك بويه هاي هيج تحبيني وانه ما ادري ويلاه على كلبي
ضحكت من تمثيله حظنته وكتله
- يعني على الرغم من هذا الكلام ما صاير بس جَد احبك قَسْوَر انت شي كلش عظيم ومقدس وغالي بالنسبه الي
وخرر من يمي مدد ع الفراش وخله راسه على رجلي
- وبعد كملي خل اخذلي غفوه على هالكلام الحلو ورايه واجب بنص الليل
اخذ ايدي خلاها بشعره وخرتها رجع سحبها رجعها ضحكت وكمت العب بشعره
- اي عيني شخبار معجباتك
ضحك وكال
- شمي عطرهن هذا تارس البدله تروح وحده تجي الثانيه
- ايبااااااه صدك
- تاكدي بنفسج
رفعت حاجبي نوب دنكت جاي اشم بدلته ما حسيت الا عضني طفرت منه باوعتله صفح متألمه
- هاااي ليش هييج قَسْوَرررر
- اشتعلو واحتركو بنار ونفط وتيزاب
- منو هما
- الباليييي اخخ بويه اذا اكضهم اجرم بيهم جُرم من نوع خاص بس عندي مُتاح ضحكت
- الله يا اعمالك الاجراميه فلا تتوب منها طوق خصري وكال
- تردين تجربيها ضحكت
- لا حبيبي لا احتفظ بيها الك
عافني وراح شمر روحه ع الفراش وكال
- ايباااه ليش بويه احتفظ بيها لنفسي اكو مليون وحده تتمناها
تمشيت حول الغرفه وصلت لجهته كعدت وكتله
- قَسْوَر انت عندك بنات وهاي السوالف؟
- شترديني اكلج هسه ابتسمت بغيض
- شتكلي عمري انت اكيد ما مخلي بنيه تعتب عليك
- احنه بخدمة الشعب
- ايباااااه بخدمة الشعب لووووو
- من هسه اكلج انه متعود عليج دومه بالج شاطح ع الترابي انه قصدي شريف بس انتي تاخذين الامور بغير نظره
- عززه وين اكو هيج شي اصلاً تفكيري كلش نظيف انت اللي تكلب الامور باوع عليه وكال
- اجذب عليج اذا اكلج ما جانت عندي علاقات يعني موجوده صداقات وكذا بس ما تعديت الحدود وداعتج لان انه جنت نفسي لعبانه من النسوان وداخل نطاق المهنه اتعامل وياهن فقط عسكريات اغلبهن
ضحكت
- اي ليش لا تطرب ع العسكريات
- اي ترا هنه حلوات يعني انه لو مزاجي جان يتعدل ويلااه بس وين اهججهن بس يوصلن يمي حتى مرا وحده كلتلي سيدي باين انت عندك حساسيه من النسوان ضحكت
- شكتلها بلااا
- شكلها يعني زمخت بيها وكتلها متشوقه تشوفين ورقة الفصل لو النقل حظرتج هي كبل طفرت من يمي بس وعلي بويه تطك بلكاع عيونهاا كزازز
- لاااا مبين هواي تلعب نفسك من النسوان هلي هيج مركز بخلقتها وعيونها فد مره جان ركزت على اديها مخطوبه لا
- لا بوويه ما مخطوبه اعرفها لحد هسه بسجن النساء صارت اظنها صارلها فتره كاطعه مجاي تخابر
- اروح اخطبها الك دامها هيج عاجبتك
- عندي انتي تسويهن وتسوين بنات ولايتي كِلهن
ابتسمت ومسحت على شعره كتله
- ما تروح لغرفتك ترتاح كبل لا ترجع
- مالي خلك اصعد فوك خليني هنا بس ظلميلي الغرفه
- تدلل حبيبي نوم العافيه غطيته وظلمت الغرفه بقت اناره خفيفه شفته غفى تقربت عليه ابتسمت ما جنت متخيله بيوم راح احبك بست خده وطلعت من الغرفه
مرت ايام واجه يوم العرس واجت الهوسات وكلش حلوو صار العرس كقاعه وجلسة تصوير ومعازيم وتمم على اكمل وجه لحد ما زفونه للفندق توترت وكلش خفت بهاللحظه من هوا فات كمت من يمه كتله
- نصلي
- نصلي ليش لا
رحت بدلت وكملت توضيت وطلعنه صلينه سوا ودعيت الله يوفقني ويسعدني بحياتي الجديده كملت وكمت دا اطلع بحجة جوعانه بس هوا بسرعه لكفني توترت مانعت بس ما نطاني مجال ابد احتلني بحنيته وحبه الي واخفى توتري كله وخلى يكون هباء
اظهرلي كامل حبه وحنيته ويا وصرت ملك قَسْوَر بكل جوارحي وبكل مابيه حبيته وحبني وعشنه حياة حلوه صح ما تخلى من المشاكل وعصبية قَسْوَر لكن اتحاشاهاا واعرف اتعامل ويا وامتص عصبيته منه لو اخلي يهدئ يلا احجي واتفاهم ويا بكلشي يصير
و بعد شهر من زواجنه اكتشفت انو اني حامل وعدت الاشهر كلها بالنسبه اليه بدلال منه كلش يخاف عليه جان واني اتدلع عليه لحد ما ولدت حبيبي عون اللي سما قَسْوَر وصدك صار ابو عون
ورا الاربعين رأساً اكتشفت اني حامل مره لاخ فرحت بس بنفس الوقت دخلت بفترة كئابه لانو عون بعده صغير ومنا لتسعة اشعر بس يجيني طفل وثنينهم صغار بس كثير حجو وياي واولهم ناز صارت الصديقه الصدوقه الي وشجعتني وقنعتني بكلامها وبعد فترة حملي اجاني ايضاً عهد وصرت مره لاحن وأَحب رجل وام لاجمل طفلين عون و عهد
والعين في الاعراب مخبرةٌ له
إن ّالجمال بخده لعجائبُ
أما عداها فليكن ماطاب له
تلك الخلايا للخلايا ترقب
ونسيجها بالشّعر إن هي أسدلت
كالليل ِمسوداً جميلاً يجذب
إني ّأراها كلها جُملٌ تنِثر حرفها
وأنا بحب النحو جئت لأعرب
ناز :
لم أتوقع أن نصل إلى هذا !؟
( تعوفني وأعوفك )
لكن أعلم مايدور في رأسك ..
( تفكر بيه بس مـ تلوحنيٰ)
تندم كثيراً
( بس متگدر تحصل عليه )
تود أن تُصلح كل شيء ،،
( بس إنتهى وراح بعد )
تود كثيراً معانقتي وتحدثني عن شوقك لي
( بـس آنه ماسمعك )
تود آن تعتذر لـي "
( بس آنه ماآقبل )
تود آن نكون سوياً مرة آُخرى ؛
( بس ما آرجعلك )
- هَـل تَركتِني !؟
( تركتك وتركت آيـامك )
- هَـل تمسكين يدي مرة آخرى !؟
( مآريـد ألزم إيد راح تتركني )
-هـل ستقولين أُحبك كثيراً مرة آُخرى ؟
(لا ، مابيـه بعد آتحمل أنعاف...)
واكفه وادحك عليه شلون كعد وحجه ويه الدكتوره هيه تلعثمت بعدها حجت
- عيب هالكلام من حضرتك انت جاي تتهمني زوجتك كل هالاشياء صايره بيها وانه اللي كلته هو الصح اجه عليه كضب ايدي نفرته رجع شد عليها وخزرني صد عليها وكال
- چا خوش هسه حمايتي راح تبقه يمج انه ماخذ مرتي لغير دكتوره اذا ايدت كلامج هذا خيرٌ على خير اما اذا گذبت كلامج عيادتج تنسد وشهادتج تروح هباء لان هذا الشي يعتبر استغلال لمهنتج وخيانه الها وما مقبول بيها سحبني ومشه جاي نطلع فجأه حجت
- ام ساهر تصير خالتي اخت امي وهي الطلبت مني اكول هالشي واخلي البت تنزل الطفل
انصدمت وانصعقت من كلامها كبل صد عليها
- استغلال وخيانه لأمانة مهنتج هذي اقوالج يا دكتوره لو ما انه جاي بالوقت المناسب شجان صار برئيج جان كتلتي روح طفل بدون ذنب و دمرتي امه
بجت ودموعها ظلت تنزل وكالتله
- انجبرت اسفه والله هاي اول مره واخر مره اسويها
- شترجه منج وهذيج المره خالتج ماعندي كلام وياج انه عيادتج تنسد وتتصدر شكوى عليج على صوت بجيها اجتي عليه دنكت لرجله وكالتله
- اترجاك لا والله العظيم هددتني وجبرتني على هالشي وانت شهدت على وضعي وحالتي وشلون جنت مرتبكه وخايفه كله تحت اجبار ما ردت تتهدم حياتي لهذا كلت هيج اترجاك لا تسد العياده اتوسل بيك انه وصدكني ما عندي هيج اشياء بس نجبرت ابتعد منها وحجه بثبات
- كلمتي وحده ما تتثنه قسماً عظماً اسبوع واحد وراح ارجع لهذا المكان اذا الكاج هنا راح تتصدر شكوه عليج افتهمي مغزى كلامي ولا تخليني اعاين وجهج مره ثانيه النيه جانت غير شكل بس لخاطر زلمتج ما اريد اكسره وادخلج مراكز ومحاكم لهذا هالشي افضلج اذا عاينتج كبالي راح يختلف الكلام وياج
كامت بلعت ريكها ومسحت دموعها
- حاظر حاظر اهم شي ما تشتكي عليه وان شاء الله خلال هالاسبوع انتقل من هالبنايه شكراً لتفهمك وصدكني ما راح تنعاد هالسالفه ابد
مشه وسحبني ويا وانه صافنه بافعال واصناف البشر وين توصل بينه المواصيل بعد وشراح تخليني ادحك الدنيا غير هيج شي غصه بداخلي وايدي ما نزلت من بطني اخاف من شعور الفقدان ما اريده يتكرر ما اريد اعيشه مره لاخ
بكل ثانيه تمر احمد الله واشكره انو طلع كلامها كلو كذب وابني مابي شي ما هتميت الها ولا حقدت عليها بكد فرحتي من طلع كلامها كذب ومابيه شي اني وابني وراح يجي للدنيا
دحكت ع الممر عمتي وين ماكوو يمشي وساحبني ورا اسحب ايدي انفره بس شاد عليها طلعنه لبرا وكف كبال سيارته دحك على اديه الشاده على ايدي كبل فتح ايده وهدها
- عمتي وين
جاوب وكأنو هو مو طايق يحجي وياي اصلاً
- رجعت انه كتلها ترجع
طلعت الفون حتى اتصل على فارس يجي
- انه اوصلج اصعدي
- ماكو داعي توصلني شكراً الك هساع اخابر على اخويه يجي ياخذني ديحجي قاطعته
- ماكو كلام ببينه الياس رجائاً عوفني
- ما ميت ع الحجي وياج ومو طايقج اصلاً
دحگت عليه غرغرت عيني من كلامو بس ما نزلت دموع ابد ابتسمت نص ابتسامه وكتله
- بكل سهوله تگدر تطلكني تريحني من هالعذاب وتريح نفسك مني ضحك باستهزاء
- اي اكيد بكل سهوله فجأه خزرني وكال
- صعدي يلا داوصلج وراي شغل ظليت واكفه زمخ بيه
- بلا عناد صعدي لا تخليني اعلي صوتي عليج بلشارع وببين الناس
مشيت ونهضمت منه فتحت الباب وصعدت بلسياره سديتها وصديت وجهي ع الجامه صعد هو حرك ومشه كفخ الهوا بوجهي وبآن واحد نزلت دموعي ويا مسحتهن بس بقن ينزلن لحد ما شهگت بوجع بأذى بخذلان بانكسار كلها ضكتهن من حبه
دحكت ع الطريق صَف بمكان شبه مهجور وكف السياره وسمعت طكة الجداحه ورث جكاره ظليت اسمعه ياخذ نفس من الجكاره ويزفره صديت عليه التقت نظراتنه مد ايده لوجهي انتبهت عليها كلها مضمده ومشدوده مبين شو شبي مجروح ومتاذي غمضت عيني نعصر كلبي
ديمسح دموعي بعدها ما لامست ايده لخدي فجأه سحبها غمض عيونه بقوه وركع الدشبول بايده جفلت زمخ بيه
- ليييش بس فهميني ولجج ليش حبيتج اكثر من روحي بعلي عشگتج و الياس كله صار بيج انتي ما جذبت بكلمة حُب نطقتها الج وباسمج ولج انه الكتلج خااتون ، خاتوون الباشاا انتي ، خاتونتي ، ختمت كلبي اول واخر ختم بأسمج بـ اسم ناز ، خاتون ، مريتي ، عشكي ، ضواي .... بس انتي ذره من حبي الج ما تستاهلين
- رجائاً لا تگوول هيج وتذب الصوج هساع كله بيه الياس هوو منو الضرب منو الغلط منو الطرد منو الاذى ونكر منو اللي طلعت مشاعره مزيفه وكلها عطف
- اششش لج انتي اخر من يحجي اشششش كلمه وحده ما اريد اسمع منج نزل وركع باب السياره بقوه دحكت عليه كام يدخن وحده ورا الثانيه ادحگ عليه وافكر بكلامه شسويت انه شني البدر مني غلط؟؟؟؟ هو الغلط بحقي مو انه اللي غلطت ،، هو الاذاني مو انه اللي اذيته هو الكسرني وخذلني مو انه اللي خذلته
صعد للسياره شغلها ومشه وصلنه للبيت هستوني جاي انزل مد ايده لكدامي فتح الجكمجه طلع منها ضرف رفع نفسه مدري شطلع من جيبه شمرهن بحظني وكال
- هذني من حبيب گلبج رايد نوصلهن الج اخذيهن ويلا نزلي وجفيني شرج...
يتبع في البارت القادم