"أغارُ مِن قلبي إذا هَامَ بِلُقياكِ.
وأنتِ المُنى والروح فكيفَ أنساكِ؟
اني بشوق متى الأيام تجمعنا !
واسعد فؤادي بقربي من محياكِ
والطيرُ يشدو بهمسٍ حينَ يسمعُنا
وجاوب الدمعُ من عينيّ عيناكِ
اهيمُ فيكِ ونار البُعد تؤلمني
وقلبي الخفاقُ بالاشواقِ ناداك ِ
لارين :
اباوع عليه وهو اعصابه نار يحجي ويصيح وما افتهم عليه شي احس نفسي فاصله عنه ما خله شي ما كلبه بلغرفه واني واكفه صافنه عليه اخاف اتقدم عليه وياذيني اخير شي كعد باوعت لايده ترجف عبالك عنده خلل بلاعصاب شوي شوي مشيت لاتجاهه هو كعد وخلا اديه على وجهه كعدت گباله هستوني كلت
- قَسْوَر
عاط بيه
- لجج لتكووولين هالاسم لتكولي لا اكوم اكفر بيج
- خلصص خلص بعد ماكوله اباوع لايديه ترجف لزمتهن وادعي بداخلي كلشي ولا يدفرني
تقربت عليه شويه حظني ظليت امسح على ظهره وكتله
- اهدئ اهدئ ميصير تسوي بنفسك هيج
ظل يتنفس بقوه نفس واحد متعوب فجأه وحسيت رطوبه صارت بركبتي تصنمت عزه بعين بيبيتي هاي شنوو
ظليت على حطتي ما حركت ساكن شويه ووخر مني تلمست ركبتي كلشي ما بيها غميت روحي هاي شبيه كمت اتخايل باوعت عليه مسحت وجهي وابتسمت
- اهدئ وكلشي ينحل لا تعصب وتأذي نفسك
سكتت وكام من يمي اخذ ملابس ودخل للحمام كمت جاي انزل كبل لا انزل اجاني صوته
- لا تنزلين خل تفض المهزله الجوا يلا تنزلين
سكتت وكعدت حايره بامره يعني اليوم سنة امه يعني امه ميته يعني هاي مرت خالو مو امه بلعت ريكي احس نفسي عايشه بغابه ولا كأن هالعالم خوالي وكرايبي وكلشي ما اعرف عليهم ولا يرضى احد يكلي شويه وطلع كعد كدامي رفع نظره الي وكال
- شبيج هيج صافنه
- جاي افكر عايشه بنصكم وكلشي ما اعرف عليكم احس نفسي عايشه بغابه وماكو احد يرضى يكلي شبيك
- البيه محد يعرفه بس الله وابوي
- انه مرتك من حقي اعرف كلشي عليك
- شي ماله لزوم ماكو داعي تعرفي
- لا اله لزم اني اريد اعرف كلشي عليك
- مثلاً
- حياتك عيشتك طفولتك كلشي تكوله الي باوع عليه وضحك باستهزاء
- ههه طفولتي طفولة ايش لخاطر ربج
- حتلو اريد اعرف
- سدي الموضوع لارين
- ما اسده هسه تحجيلي كلشي .. صار عصبي وصاح بوجهي
- كتلجج سدددي شحجيلج شتردين احجيلج ..
اجه عليه سحبني من ايدي ويحجي بعصبيه وهو صاك على اسنانه
- شكلج امي خانت ابووي ويه غير زلمه واهيه على ذمته شكلجج نتر ايدي وراح لغاد
- هذا التردي كلته يلا جفيني شرج
بلعت ريكي وكعدت بصدمه شنو امه خانت ابو باوعت عليه كتله
- ترا كلشي ما فتهمت , كعد كدامي وكال
- قسماً عظماً برب الكعبه يا لارين ان حجيتي هالشي لبشر او اذا حجيتي لنفسج ادفنج وانتي عدله , كعدت يمه و وجهت نظري اله
- دامك ما واثق بيه لا تحجي
- انه واثق بيج اكثر من ما تتصورين لارين
الابتسامه شكت حلكي والفضول كتلني كتله
- لعد احجيلي
باوع عليه سحب جكاره اخذ نفس منها اتنهد وبده يحجي
- عايش حيالله حياة عاديه من ام واب الي ابوي عمره ما كان ابو عادي بنظري كلشي بحياتي اهوا هسه والبعد روحي تفدا وترخصله ابوي اللي عمره ما مخليني بوجه زعلان اهو السند اهو حزام ظهري تجايتي وكلشي حنين كثيرر عليه
اما امي جانت عكس كلياً الام اللي مفروض تكون حنينه وتحتوي ابنها وهي تصير مثل الطير المذبوح اذا ابتعد ابنها ثواني عنها انه معاين كثير امهات هيج روحها تفرفرح على وليدها بس امي غير امي جانت هاملتني كلياً ما تهتم الي ما تريدني احجيها تجاوب بنتر من وعيت ع الدنيا هيج تعاملها وياي ما يوم سئلتني على اكل على لبس على درجة امتحان حته الاكل نوبات اذا طخ براسها ما تسوي النا تعوفنه وتطلع من البيت تكعد بلكاع اللي هي جانت مطوقه كِل بيتنا ارض جبيره وبيها زرع واشجار وكلشي تعوفنه وهناك تكعد
علاقتها ويه ابوي مادري بيها شني لان عمره ابوي ما تعارك او تجاوز عليها كدامي جان دومه وياي ومعوضني على كلشي ياخذني ويا للصيد يعلمني طبيعة شغله كلشي خلاني اسوي اكدر اكول رغم صُغر سني خلاني اصير زلمه حوك وسوالفي كِلها خشنه بحيث من احجي واناقش الوادم تصفن
ابوي متزوج على امي الثانيه لان امي ما قايمه باي واجب اتجاها امي كانها عايشه بعالم وحدها تتصفن وتشرد بحالها وحته انه ما تهتملي مرت ابوي بيتها هم بلكاع لجن ليغاد بمسافه علينه خواني علي ومرتضى كثير علاقتنه قويه انه وياهم اما مرت ابوي وجهها ثكيل عليه وتشد وياي تخلي عقلها بعقلي لهذا ما اتقربلها
بلثالث متوسط جنت اخر يوم امتحانات رجعت نوعاً ما مرتاح كملت دراسه رجعت وصلت للبيت فتحت الباب شمرت الكتاب وصديت طلعت سديت الباب وتوجهت ع الكاع كِلها كلت افتر بيها حافظها وما اتيه بطريق الكاع ابد وكل بالي هالعطله اريد ابوي يطلعني ويه هذولي اللي يشتغلون بيها هم اتعلم بعد هذا الشغل جنت كثير احب الشغل ياهو اليعايني يكله لابوي هنيالك على هيج ولد حَرك وشاغول
المهم ظليت اتمشه بين الزرع وصلت تقريباً لنهايه بان بنظري الورد كل انواع الورود مزروعه بي بهذا الجانب والكباله كِلها اشجار فواكه ونخل وسدر توجهت ع النخل والاشجار حته اعاين فيايهن كثير جنت احب اكعد يم الاشجار ويغطيني الفياي بعدني ما واصل يمهن كثير اجاني صوت كلام لهل ساعه هل كلام محفور حفر بعقلي
- سعد يمتى تلكي حل ترا طفح الگيل احنه نضل هيجي بلختلات كم سنه صارلنه هيج اطلك انه وانت عوف الشغل وخلنه نروح نعيش حياتنه بعيد عن هنا
- بس اصبريلي يا عيني خل اكمل هل سنه واخذ حصتي منها ويصير خير
بعدها صار صوت ضحك تقربت عليهم اكثر عاينت منظر تمنيت الموت بوكتها ولا معاينه ومار بي امي وصديق ابوي اللي ابوي مشغله بكاعنه ومتولي امرها يزرع ويحصد وكلشي هو المسؤؤل عليها والوارد ع اساس يجيبه لابوي بمنظر يخزي حاظنها ويضحك وياها اثاري جانو يتمعشكون هو وامي سوه نصدمت من المنظر زمخت بيها وحجيت بصوت عالي
- هاي شنيي هالمهزله
هي كبل طفرت منه وعاينت عليه صحت بيها
- هاااااي شنييييي شجنتي تسوين انتي اجتي عليه كضت ايدي
- ما مسويه شي امشي للبيت دفعت ايدها وصحت بيها
- شنييي ما مسويه شي مو طفل انه مو طفل افتهم كلشي شني هذا جان حاظنج وخاتلين هناا حجه
- ابني ما مسوين شي امك جانت هنا يم الزرع و وكعت وانه ساعدتها
- اسكتتتت انت لا تبيع براسي هالحجي جنت تساعدها واهيه تكلك اتطلك ونعيش سوه مدري ايش وانت تكللها خل يطلع الوارد صديت عليها وكتلها
- عار ع الامهات و عار ع الزوجات كِلهن انتي اثاري كطعج وجفاج عنه كله سببه هذا والله خووش احييج ع هالخيانه مالتج جماله انتي مسلمه شخليتي للكافر رحمه لربج شخليتي دفعتني وكالتلي
- امشي معليك انت بعدك طفل شكدك وهيج تحجي
انه جنت صح عمري تقريب 16 سنه بس بنيتي خشنه وهي انعم مني بحركه مني جريتها ونفرتها
- مو طفل انه او حكج يمكن حتى عمري وانه شدرس ووين واصل ما تدرين ملتهيه بالحرام وربج الخلقج حتى نفسي تلعب كامت من كضيتج عبنج هسه من ساسج لراسج غاطه بلحرام اكول لابوي واعرف شلون اتصرف وياج امشييي
ظلت تصيح عليه على حس الصياح لكيت ابوي بسدنه بملابس البيت واكف باين جان يم مرته الثانيه وعلى حس الصياح اجه
كال
- هاي شديصير هناا شكو بويه قسور عاينت عليه وكتله
- بويه انه ما اريد اخليك غافل وتجيك حجايه بس هذولي جاي يخونوك ويطعنون بظهرك عاين عليه وعلى امي وكال
- شنيي !؟؟
- ابووي تراها امي دتخونك ويه هالزلمه
هذاك سمع هيج كلت عافنه ومشه بركضه وامي ظلت لا اي ولا لا
ظل ابوي يحجي وياها وهي تكله
- جذذب انت تصدك بابنك الجاهل
- مو جاهل زلمه شكده وتكليلي جاهل واذا جاهل ليش هذا شرد وما برر ولا حجه
دفعته وكالت
- عوفني ابو قسور هدني واخلي سبيلي لوجه الله علاقتنه من زمن معدومه لا تجي هسه وتحاسبني
ظلو يتجادلون وصافن على جرائة امي بلحوار ولا عبالك هي الغلطانه سحلها للبيت وانه ورا وطلع وعافها جوه دشيت يمها هي كاعده وخازرتني دمعه ما نزلت من عينها لا اعتذار ولا شي للعصر جوي خوالي كلهم يردون يغسلون عارهم بعد ما ابويه حجالهم وصارت هوسات بس كلها على نطاق بيتنه ابوي بس اليدري تفاهم وياهم وما قبل على كتلها يكلهم لخاطر ابنها لجن هما علنو تبرئهم منها ومن هيج اخت وطلعو كل هالاحداث صارت واهيه صامده وانه كاعد كدامها اعاين عليها واتمنى تحجي تبرر تعتذر لو يطلع سوء تفاهم بس هي اكدت هالشي من جانت تكوم ع الباب تتسمع اذا يجيبون طاريي
ابوي بعد ما دور المنطقه كِلها ما لكه الزلمه لم عمامي كلهم وحجالهم عليه بس مو بصيغة جانت امي تخونه ويا على كالهم انو بايكه فد مبلغ جبير ونهب من السلف وبدت سالفة العشاير ولحد ما صارت كعده ولكو عشيرته وجبرو يكعد بيها ويحظرها وطولها هو مدنك راسه ابوي عود هناك خلافاً للمشاكل كام كدام العشيرتين تنازل عن المبلغ الباگه بس نهى دخوله للسلف على نطاق المحافظه اذا يعاينه بمكان ويطلع كدامه ينهي وينكتل لانه صاحب نفوذ وكلمته بينهم الها هيبتها وفضت الكعده بينهم هيج وره يومين مو اكثر سمعنه بي اهله زوجو وسفرو خارج العراق
المشاكل بين امي وابوي صارت علنيه كدامي يتناكرون ويتعاركون ويوصل يريد يضربها ويعاين عليه ويبطل وهي هالكلام ما يطيح من لسانها
- ما اريدكم اكرهكم انت وابنك حلو عني هدوني اخلو سبيلي ماريدكم
كل هالفتره جانت عمتي يمنه الصغيره وحاظره وياي وتكعد يمي تحجي وتكلي
- لا تهتم كلشي يهون
وحتى اهيه ما تدري امي خانت ابوي تدري امي من سمعت بصديق ابوي باك مبلغ جبير من عنده كلبت عليه وضاجت منه هيج واصلتلها الفكره استمرت المشاكل يومين لحد ما ابوي طفح الكيل عنده وضربها راشدي وجان اول مره يمد ايده عليها كدامي وكالها
- وين تولين تردين تطلعين من البيت زينيه مني انه بعد كلشي عاينته منج مبقيج هنا غيري واحد يغسل عارج ويدفنج بدم بارد بس انه عايفج لجل عين ابنج ما اريده يتاذه خوانج واهلج تبرو منج بعد ما درو بعامايلج وشنايعج وكرت عينج اللي بعتينه علموده وخنتيني ورحتي الله اعلم شمسويه ويا بلحرام راح تزوج وطلع خارج العراق لذالك احترمي نفسج وانعدلي يا مره وعافها وطلع لثاني يوم ما طلعت من الغرفه انه اجاني شعور خفت لا تكون مسويه بنفسها شي دخلت عليها لكيتها تبجي ومقوسه نفسها وتحجي
- حبيته وسحبني اله وخلاني اسوي شغلات حرام ويا وانحسبت زانيه خنت اهلي و زوجي وكلشي عفت لجله تالي هيج عافني وتخلا عني تزوج غيري و راح و ما ذكرني ولا رادني ليش انه جنت كل ما اسمعها هيج تحجي ومنظرها وهي بحظنه كل ما اغمض يحظرني يكطع كلبي ويدب رب الاذى بروحي امي واعاينها بهيج منظر ويه زلمه غريب تخون ابوي كلبي بده يموت ويحقد ويكره
- لان اللي تخون زوجها وهي على ذمته ويه غيره هاي ما يتأمن بيها بعد
كامت عليه دفعتني وكعت عاينت عليه ولهل ساعه اتذكر نظرتها يغلفها الكره كالت
- قسور كله من وراك انت شمستفااااده منك هيج اذيتني انه امك المفروض توكف وياي
- شنييييي امي اوكف وياج وانتي تخونين ابوووي وعلى فكره انتي يا يوم حسبتيني ابنج يا يوم سئلتي عليه حظنتيني تلكيتيني ما تحسسيني عندي ام ابد دومج خازرتني وعايفتني وصاده عني كمت طلعت بره كعدت بلباب اجه ابوي كال
- بويه انه هسه دقايق واجي اعاين خوانك خاف محتاجين شي
- براحتك بويه
ظليت كاعد بلباب صافن بدنياتي احس نفسي كبرت فوك عمري عمر ع اللي عاينته بهالايام واسمعها تصيح هي ما خلت شي بلبيت ما كسرته لحد ما كمت بعدني هستوني دخلت للبيت جانت واكفه بلحوش وتدير نفط على نفسها شمرته ليغاد عاينت عليه وكالت
- قسور كله من وراك
- هااي شجاي تسوين انتي بعدني هستوني تقربتلها وجت نفسها بنار وكامت تتطافر وتصيح باسمي وتكلي
- كله من وراك الصار بيه قسور وتنادي باسمي تقربت عليها اكثر اريد اطفيها لاحني وياها وحرك جتفي الايسر من فوك اخير شي وكعت بلكاع وهي تصيح
- ذمه بركبتك الصار بيه قسور منا ليوم القيامه انت كتلت امك بايدك
ما اذاني حرك جتفي اللي لاهبه بي النار بكد ما اذاني حجيها غمضت عيوني وما حسيت بعدها الا انه بحظن ابوي كعدت لكيت جتفي ملفوف بشاش ومضمد كله مسح على راسي كتله
- ماتت
- الله يرحمها ويغفرلها
تكئبت بهالفتره وما ببالي بس كلامها لا بجيت لا صرخت ولا نعيت فصلت عن العالم كله وببالي كلامها تحملني كل المسؤوليه انه السبب بموت امي انه الكتلتها ظلت تتردد ببالي كرهت اسمي لان جانت تنادي بي كرهت روحي بذيج الساعه ظليت شهور وايام كثيره منعزل وياهو اليدش يمي يصيحلي باسمي اكرهه بعيشته واتعارك ويا واتنرفز منه لابعد حد تتصوري
ابوي تفهمني وياهو اليكله شني هالوحشيه الصار بيها قَسْوَر يكلهم مصدوم كرهت كلشي بدنيتي كرهت روحي كمت احس بنفسي انسان من حجر من كد ما حسيت بوجع كمت لو انطبر طبر ما اتاذه ولا اكول اخ
ابوي الوحيد اللي متفهمني وبوسط عركاتي بكره اسمي وياهو أأذي جدي كالهم يصيحولي ابو عون بعدها ارتاحيت من هالناحيه بس ما يوم نمت مرتاح من يومها لحد هسه اول ما اغمض عيوني تحظرني وهي واجه بنار وتطافر وتصيح قسور انت السبب قسور انت الكتلت امك و وديتها للموت بايدك انت مو ابن انت عدو ذمتي بركبتك ويحظرني موقفها مره ثانيه وهي بحظن الزلمه ويغازلها من اتذكرها خانت ابوي واكرها واكره روحي اكره نفسي لاني ابنها وصلت لمرحله بلكليه العسكريه مرات اخالفهم لا ادري بعذابهم كافر اتمنى اموت جوه ايدهم بس ربج ما قاسملي يموتني ويريحني قسملي اعيش واتعذب بحياتي
اما سالفة امي بين الوادم ابوي مادري شدبر كلام وحجه للناس ولكرايبنه وخلاهم يصدكون انو هذا الشي قضاء وقدر ومو فعل معتمد انه من يومها اعتزلت النسوان كلهن ما كمت اتقرب يم اي بت ولا مره جبيره وحتى حبوبتي الله يرحمها بعد ما تقربت يمها الا عمتي جانت كأنما اخيتي وكثير احبها بس مرات اكعد يمها واحجي وياها من شبيت وتخرجت من العسكريه ابويه ضل يلح وياي وذكرني بموضوع انه اصلاً ناسي وهو انو انتي محجوزه الي من صغرج
بوكتها جنت رافض الزواج كلياً ولا بنفسي اتزوج ما عندي ثقه بكل جنس حواء وكاره الزواج وحتى انتي من كد ما كامو يلحون عليه ويذكرون طاريج كرهتج بوكتها اهلي سوللكم زياره ومرتضى شاف اختج ورادها انه ارتاحيت من هالسالفه صح صار نقاش ليش علي ومرتضى تزوجو وانه اكبر منهم ما متزوج بس جنت اتلافى هالنقاش لابعد حد اكضي ايامي كِلها برا بلدوام لو ببيتي البعيد عن هنا ما ادش للبيت لو مره لو مرتين بلشهر ومرات اكطع شهور يلا ارد للبيت كضيت حياتي كِلها هيج تواصلي ويه ابوج وسؤالي عنكم انه جان دائم اكثر من مره كتله لابويه انه ما ببالي اتزوج لا توكف قسمتها للبت وبلغهم بس دومه جان يقاطعني ويكلي
- البت ما ببالها زواج هسه همها دراستها لبين ما تكمل وتقرر تكمل حياتها وتتزوج بلكت الله هاديك
كل ما يتقدملج شخص يخابرني يكوم يحجي ويكلي استعجل لا تخلي البت تروح من ايدك
وصراحه انه اكثر من مره عاينتج بيها بس ما خالج ببالي ولا ناوي الزواج من توفه ابوج وجيتي ايضاً ما شفتج لحد جيتي من الواجب بيوم الجبت وياي k9 ومن تعاركت وياج وخليتج تسوين كهوا يعني جنت اضحك عليج بداخلي انتي مرا رغم عمرج بس بلبيت عقل طفله عكس دوامج وعكس ما انتي بلجامعه مره مواضبه ورزنه وثكيله وكلامج حلو وموزون
اسمع بكلامه ومن حجه بداية حياته وشصار بي وبامه غرغرت عيني وكلش نقهرت ونكسر كلبي على طفولته ومراهقته وعلى حالته حتى بعد شبابه اللي مر بيها بسبب ام مهمله وما تهتم منعت دموعي من النزول قويت نفسي اخذت نفس وظليت مستمره استمع لكلامه بدون ما انطق بحرف واحد بس باوع عليه بتركيز وكال
- صح البالج بعد ما انتقلتي للبصره انه اكثر من مره اجيت راقبتج عاينت اسلوبج كلامج حوارج فنون الرد عندج وما ثار انتباهي اي شي منج لان كل ردودج جانت بثكل وبادب وبرزانه بعد ما مرت فتره سئلت العميد على ادائج وتصرفاتج وظل يحمد بيج وانج ما تسببتي او تعرضتي لأي مشكله ورغم تواجدج بمكان مختلط ومكان عام وبي اجناس مختلفه لجن ما جان شي من هذن الافكار براسج كل همج دوامج ودراستج انه هذا اللي عجبني بيج ما تهتمين لاي زلمه ترباتج خشنه لهيج دخلتي لبالي باوعت عليه وكتله
- انت كل اللي مريت بي بحياتك مو ذنبك ولا انت السبب بموت امك هذا قدرها وهي بايدها اذت نفسها الله يرحمها ويغفرلها مو انت اللي حركتها بايدك واذا تلوم نفسك ف مع احتراماتي الك بس انت غلطان المفروض ما تلوم نفسك ابد انت جنت ك اي شخص مراهق وعمرك مو صغير ونكول تسكت وكذا لا جنت زلمه عمرك 16 سنه وشايل غيره على اهلك واكيد من شفت امك بهيج منظر احتركت وما تقبلتها واي شخص ما يتقبلها وعلى صوتك اجه ابوك ونكشف الموضوع وحتلو انت نكول سكتت واتغضيت وصرفت امر هذا الموضوع لابد يجي يوم وينكشف المضموم لابد يجي يوم ويبان كلشي ف لا تلوم نفسك ابد وتحس بلذنب اللي صار صار ومضى خلي الماضي ورا ظهرك و عيش حياتك كافي هدمت سنين هواي بتمسكك بهالذكرى اباوع عليه شابك ايد بايد وراجيهن على ركبة رجله تاره هيج يسوي تاره يهز برجله التفت عليه وكال بصمود
- لارين انه غلطت والانسان ما معصوم من الغلط وجاي اعترفلج بغلطي انه السويته ويه صادق غلط بس تندمت لان اول شي جان استغلال لمنصبي وانه مو من شيمي ابد متملك متسلط وعصبي بس مو استغلالي ابد والسويته جان غلط وبلحظة عصبيه صار وحتى لو جان صاير الشي اللي ببالي انه ما اسوي الكلته لفارس لان الباشا ببين عيوني ما اكدر بي على كص ركبتي .... بس انه بعد ما لكيتج وحبيت اطباعج ما ردت اخسرج صح تصرفت بانانيه وتسلط بس فكرة حبج لغيري وانتي محجوزه الي ضنيت بي اذاني حسيتج شي خاص ب ابو عون بس وتصرفت تصرف بتسرع هذا اول شي
اما ثانياً انه اذيتج و ضريتج كثيرر وحكج عليه بت عمتي وجبرتج عليه هذا الاهم شي وخليتج تقبلين بيه غصب عنج لهذا هسه انه احاجيج وكلمتي وحده وما تتثنه
اذا ما تردين واذا ما متقبله وجودي يمج وما تنظريلي كنظرة زوج و شريك حياة كليلي الغي كلشي من هسه وافصخ واطلعج من السالفه كلها واكول انه الما اريد اتزوج وما يلوحج كلشي لان ما اريد اعيد الكره انه وما اريد اخذ مره ما تتقبلني ولا تحبني غصب عنها احجرها يمي وانه ما اريد اظلمج لارين اذا ما تردين كولي ما دامنه ع البر يبت العمه حتى اذا ما تردين انهي كلشي..
يتبع في البارت القادم
لا تنسون التصويت والتعليقات ع الفقرات
تحياتي الكم ام اسد