الاشاوس و الشقراء

البارت الثـالث و الأربعون

فاگدينك !!
احنه كلش فاگدينك ؟
من غبت ما گمنه نلتم
واعتزلنه الگعده ذيج
ومره اذكر !!
بيك نحجي ومن
وصلنه لحرف اسمك ..
هب حنينك !
انت وينك ..
لا قريب ونعتنيلك
لا تجي ونلمحها عينك
راح نمشي ..
ولان ماكو انت بعد المن ندوم
هيه ظلت ذگرياتك
وانت ..
وشوية سوالف
وانت وينك ..
فاگدينك ..!!

شمم :

صارت عيني بعينه كال

- هالحجي هذا ميصرفلي انه

ضربته ع صدره ودفعته مني

- شيصرفلكك چااا ؟! شنيي اليصرفلك ابو صگر

ضحك وصعد خصلة شعري النازله خلاها ورا اذني وكال

- انه اذا اريد اتمم زواجنه هساع اتممه ما تمنعيني انتي

تسودنت من كلامه

- شنيي ما اكدرر امنعك تفتهم انت هاااا بويه تفتهم داكلك ماريدك ماحبك انت خالي انظرلك بنظرة خال وبس احس بلقرف من تتقربلي انه كلت هيج لو اهو صارت عيونه براسه دفعني ع الفراش وصار فوكي

- تتقرفين مني

صديت منه رجع وجهه يعاين عليه بخزر

- موو داحجيي وياج

زهكت وعطت بي

- اييي وخر مني داكلك انت خالي ما اكبلك بعد والله

دار وجهي عليه وبدون سابق انذار طبك شفته على شفتي سحب وجهي عليه وانه ادفع بي احساس بداخلي ينفره ما اريده واريد قربه شاد على خصري وماخذ شفتي بين شفايفه وانه متصنمه لحد ما نزلت الدمعه تحسسهه يلا وخر مني خله راسه بركبتي شمهه وهمس قريب من اذني

- لا تعيدين هالكلمه مره لاخ لو تردين هيج عقاب مني بعد احسن ترا انه اكيف

دفعته وصديت منه مسحت دمعتي النزلت ومسحت شفتي بقووا عاينت عليه وخزرته

- لا تضغط عليه بهيج امور انت من اخذتني شمترجي مني من البدايه كلتلك انت خالي ابو صگر افتهم

- شقصدج يعني انه مافتهم؟ شمم اكص لسانج اذا تتطاولين عليه ورب العزه نطيتج مجال جثيرر

دخلت للحمام قفلت الباب رجيت ظهري عليه ونزلت دموعي بقهر بظيم كمت غسلت وجهي وكعدت

من خررب بهيج زواجه كشره بلا لو اخوي موجود انه اكو احد يكدر يسوي بيه هيج بوجوده شحده اليتكرب صوبي وهو موجود بس من بعد ما غاب صرت شي عادي ياهو اليجي شيريد يسوي بيه شكد بينت شخصيتي شكد ظهرتهه وسكتتهن وخليتهم يعرفون اخت الياس منو بس ع هل زلمه ما اكدر اقواا مني وشكد ما ابينله انه قويه وما يكدرلي افشل كل ما اتقدم خطوه يرجعني خطوتين لورا مجاي افهمه ومجاي اعرف اليريده مني شني ؟!

صادق :

كضت الايام بيناتنه مشاحنات بس اغلبهن انه متجاهلها كلياً وما اعير الها أي اهتمام وما احاجيها الا بوكت محاظرتها والشرح

بيوم جنت متاخر بلنومه وبسرعه بسرعه طلعت وصلت للجامعه متاخر جانت النه اول محاظره هي وصلت للقسم وللقاعه جاي ادخل صارت كدامي لكيتها داخله وتسئل ع الحظور والغياب

وكفت وهي عاينت عليه ورفعت حاجبها تقدمت عليه

- المن التأخير هذا تدري انو انت متاخر ع المحاظره ربع ساعه

تجتفت وخزرتهاا

- ايي ادري والمطلوب هسه شنيي اذا ماعندج شي بعدي عن طريقي خل ادش داخل ماظل وكت

- دكتورتك انه تراا انتقي الفاظك وكلامك شويه

- مو انتي اللي تعلميني هذن الاشيااء دكتوره لارين انه فاهم ومتعلم و ناسي اعرفهم

فتحت عيونها وكالت

- متدخل للمحاظره اتفضل برا بلا زحمه عليك

سدت باب القاعه ودخلت

روحي فارت واعصابي تلفت كبل لكفت الفون اتصلت ع فارس كتله

- فارس تخابر العميد هسه تخلي يجيني ان ما دخلتني هذي للمحاظره اكلب الجامعه على راسهاا

- هيوو هيووو هدي شبيك

- يا هيوو يمعود تاخرت ع المحاظره والدكتوره ما تقبل تدخلني وهالمحاظره مهمه كثير ماريد افوتها خويه دبرهااا لو دزلي رقم العميد

- انه احاجي الك الصافي بس يا صادق ان وصلني شي وجان الغلط منك يا ويلك وعلي انهيك خليك رافع راسي بين الوادم

- واثق خويه راسك دومه مرفوع

- خوش الله يعليهه

نهيته ويا وظليت انتظرر مر شويه وقت وما حسيت الا العميد كدامي سلمت عليه وشرحتله الموضوع وانبني ع التاخير وهذن السوالف بعدها دك الباب ودشينه داخل

عاينت عليها بابتسامه جانبيه ورفعتلها حاجبي مشيت من كدامهاا وكعدت ع الستيج مالتي

عاندت والعميد انبها ع تصرفها وعنادها وانو تتركه حته تكدر تستمر وتتعامل ويه الطلاب بحسنى وبتفاهم هالشي جانو يحجون كدامي بصوت ناصي يتفاهمون بس انه ستيجي امامي لهذا سمعت كلشي

طلع العميد وهي اديها ترجف صدت عليه صارت عينهه اللي الدمعه بطارفها بعيني الجامده الخاليه من كل شي وكل تعبير صدت وانه دنكت ع الملازم افرزهن ضربات وجع بكلبي صارت اضعف كدام عيونها واتمنى الموت ولا توكع دمعه من عينها

كملت المحاظره تحجي واحسها مخنوكه طلعت ماكو محاظرات مهمه دا ارجع صار العميد بوجهي بحديه كال

- مشاكلك ويه الدكتوره لارين تنتهي منها يا صادق دكتوره نبهه وذكيه ومحاظراتها الطلاب حبتها وتعاملها حلو لا توصلنه لغير مواصيل حاول تتفاهم وياها

- وينهاا

- بمكتبها عدها محاظره ثانيه ب 11:30 لهذا ماطلعت

- مشكور حظرة العميد الذهب

ضحك تسالمت ويا ومشيت توجهت ع المكتب مالتها دكيته ماكوو اخر شي فتحته دخلت قفلته وصديت

لكيتها دايرا وجهها وناطيه ظهرها للمكتب وكاعده ع الكرسي وتفتر بي ومرجعه راسها لورا سديت الباب وتقدمت عليها صرت كبالهاا صافنه ع السكف ودموعها تنزل بخفوت واديها ترجف ولا حاسه بيه

رحت يمها كضيت ايدها كبل فزت بفزع جان فايل يمها شمرته عليه وحطت ايدها ع كلبهاا اجتني الضحكه بس ماضحكت دموعها مردت كلبي شويه وبجت بصوت بعدها مسحت دموعها وظلت تهفي على وجهها سحبت كرسي وكعدت كدامها مديت ايدي مسحت دموعها

- المن هالدموع يابويه ماعاش الينزل دموعج يبعد كلبي كلبج

عاينت اديها كضيتها ترجف وصافنه ع الفراغ ما تأثرت بيه هزيتها

- هاااي شبيج لخاطر ربج شصايبج انتي

نهارت بلبجي وكالت

- ابويه مات وعافني بخلافه يتيمة ام ويتيمة اب ومحد يرحمني ويهتم لامري بعده وكضت كلبها

- انه ما عفتك هيج والله ماعفتك هيج روحي انت بس ابويه هذا ابويه مات تعرف شنو احساس البنت من يموت ابوها ومن تكون رابيه حياتها كلها بدون ام وابوها هو كلشي بحياتها وبعدها فجأه يموت وتحين ساعته اكعد بي اكله بابا يلا اكعد دنتريك ونطلع للدوام ميكعد تاليها يطلع ميت الموت المفاجئ بدون اي سبب موت الله بليل انه ويا نحجي مثل الورد صبحت الصبح ابوي ميت

اختفيت كمت اكوم واوكع اخر ايام كلش تدمرت سويت فحوصات طلع عندي خفقان ومريضه من الضغوط والنفسيه التعبانه كلبي تأذه وعايشه ع الله هسه امرار تجي تنمرد روحي واغمى وعايشه تحت رحمة العلاج انه ماريدك ترتبط بمرا مريضه انت تستحق احسن مني 

ابتسمت 

- انت تستحق بنيه حلوه ما متعوبه مثلي ما رايحه روحها من القهر والظيم ومضلمه انت تستحق بنيه اصغر منك وتعيش وياها حياة حلوه مو مثلي انه لا تكول ما تحبني وتركتني لغايه والله ما تلكه اي بشر مثلي يحبك بس انه مريضه

اعاينلها وكل كلمه تكولها تدك براسي وبكلبي كملت دنكت على اديها بستها مديت ايدي مسحت دموعهاا

- اطلع كلب ابن سطعش كلب اذا اخذ مرا غيرج واذا احب مرا غيرج انتي كلشي بحياتي انتي المضويه دنيتي انتي جنة ايامي لارين انه بدونج انتهيت تدمرت انه اعشكج عشك مو طبيعي ما جذبت بيوم من كتلج عافيتي بعدج تراها العافيه انعدمت وعايش على ذگراج ومالت مرض شنيي مرض لخاطر دينج لا تصيرين هيج مهووسه من يوم يومج توهسين يا فلان يا علان هو خفقان وخفيف وجي نفسيتج تعبانه ومتدمره بس تجين يمي تتعدل نفسيتج ومزاجج روحج مضلمه انه اضويها روحج صحراء انه اخضرها يكليبي والعمر مو مقياس ابد واذا اكبر مني سنه او سنتين ما تفرق دام احنه متفاهمين هذاهو لا يهمج هالاشياء حبنا اقوا من هالشي كله

ردت معارضه

- صادق بس

قاطعتها

- بداعة صادق وحبه بكلبج كافي بلا بس بلا بطيخ تعبتيني لاريني الفاينل قرب يخلص واعرس عليج بس متاني صار 5 سنوات ابويه احترك بحبج

ابتسمت

- لاريني

- ايي لاريني يبعد شيب اهلي يروحلج فدوه هشيم

ضحكت

- ترا مشتاقه لسوالفه كلش

خزرتها سكتت

- ترا مشتاكلج ماكو حضنه بـ.

- هووب هووب وين وصلت (واتو البيوت من ابوابها) اصير حلالك والله كريم

- شجابج للبصره

- بعد موت ابوي وبما انو ماعندي عمام اجيت ليم خوالي ولبيت اختي هي متزوجه ابن خالي

- افاا وعفتي جامعة بغداد وجيتي لاحضاني

- صااااااادق

- عيونه وكلبه

خجلت والخدود وردن

- كافي حباب

- شلون حصلتي نقله من بغداد للبصره بويه

- ازيدك من الشعر بيت ترا الباشا اللي هو صديقكم ما تركني لحظه وحده بموت ابويه بمواساتي بكلشي هو اول الناس وكف وياي وطبطب على جتفي وسندني ولو يدري اني احبك يعدمني ترا كتله لا اعرفه ولا يعرفني بس هو لازك بيه يكلي شو مجاي اصدك بيج كتله لا يالغاليي صدكني وبرد كلبك ماحبه جذبت عليه من وراك

احس عقلي راح يطير من الصدمه

- الباشا اليااااس عباس لو غيره ؟!

- ايي هوا

- شني العلاقه التربطكم ولج شجابج عليه شعرفج بي

- شنوو شبيك ترا ابو وابويه ولد عم

- عليج العبااااس الباشاا كرايبج

- ايي والله

- صدك جذب وانه رايح راد اجرش بيج حجي يمه واحبها واعشكها واريد اخطبها بس

- الله ربك لا يعرفني ولا اعرفه من البدايه خوالي يكولون هم كرابه بس ما متقاربين من زمان وبوكتها اول مره عازمي ومتخلصين من كطعهم ومعرفي بنفسهم لان ماما بت عم بابا تصير وهو بيومهه جان يمهم ومن وصلهم خبر موت بابا سوده عليه اصر الا يتعنى وياهم واجه وماعرفته وعرفني الا بلفاتحه هو ما شايفني بس من سمع باسمي لارين حسين وبعد ما خلصت الفاتحه 

باوع عليه ورافع حاجبه كال

- لارين بويه

نداريت عليه وكتله

- ها خويه

- صادق علي ال ** هالزلمه تعرفي

- هااااه لل لااا

خزرني وكال

- شنيي لا اطكها طك بوجهج هالزلمه اعرفه انه يحبج

سكتت نخلست وكمت ارجف وكتله

- ايي اعرفه يحبني جان بلجامعه يجي ويتوددلي بس اني لا احبه ولا شي ودوم اصده

خزرني بوكتها ظليت اطكطك منه حنين كلش وسندني سند الاخو لاخته ما يسندها هيج يواسيني وحته الاكل بـ اديه يجيبه الي بس رغم كل هالشي عصبي نارر اذا عاط بيه اسكت صمٌ بكمٌ

ظليت اتهرب منه ما اجاوبه لو اختصرله لحد ما كله لخالو

- تاخذها للبصره بعد مالها ظله هنا ونقلتهه خلوها عليه تكعد يمكم معززه مكرمه انتم خوالها كلشي تحتاجها يوصلها مني ودوامها ما تمنعوها منه

اله مكان كلش راكز وشخصيه تصفن الكل من يحجي حسيتهم حته اكبر واحد بخوالي يهابه ويحترمه

ظليت صافن بحجيها دخيلك يا علي شني هاي وطول هالسنين انه ما ادري وما الي علم

- انه ماعرفته وعرفني من موت ابوي يلا بس انت شعرفك بي؟

- لج بويه عائلته وعائلتنه الروح بلروح من صغيرنه لجبيرنه من الصغر اصدقاء وخوان واكثر بعد

- صدفه حلوه كلش مشتاقتله بس هو كطع بينه الاشهر المضت ومن اسئل خوالي يكلولي عسكري طالع بواجب

- افااااا الباشا والكطع ابد ما ينجمعون

- لعد وينه

- الباشا مات لارين يكولون بواجب هناك وكبل تحرير الموصل لازم يحين نزوله بس ما نزل وستفسرنه عليه يكولون داخلين بكمين ومتفجر بيهم البيت مفخخ وحته جثه ما لكو اله

نزلت دمعتهه مسحتهه بعدهه ضحكت وكالت

- تؤؤ تؤؤ ميموت اشاوسي بطل هسه كم يوم ويرجع واذكرك بهاي الكلمه

كامت دتطلع كتلها

- رقمج الجديد بويه

ضحكت وكالت

- ماكوو صير زوجي وانطي الك

- يا ظالمة النفس سنه مشت ع الطاير بين ماعرفت نفسي احبج واربعة سنوات حركتي جدي بحبج يلا كدرت اكسبج حبيتيني بس حارمتني من كلشي حصلت رقمج يادوب كم شهر تواصلت وياج وبس كتابه وبلشافعات يلا اتصل واسمع صوتج متقبلين حظرة جنابج نوب كطعتي وهسه رديتي واريد رقمج متنطي افااا عليج يبت ... الحلووو

- عبالييي تكول شي غير الحلوو ضحكت و طلعت برد كلبي وارتاحيت طلعت من الجامعه مستانس خذيت شغلات ل آن ورجعت للبيت دشيت لكيتها بوجهي 

- هلاووووو

قلدت صوتها

- هلاوووو بيج

- الوجه منور داده لازم متصالح ويه ذولاك العالم

ضحكت 

- يي والله انوته عقدنه هدنة صلح اليوم

كالت بفرح

- ايي مبروك يديمكم ربي ان شاء الله

- هاج هذن السوالف الج ام سبع اعرفج تحبيهن وذكرتج

نطيتهن الهاا

- يااا خويه ليش تعبت نفسك فارس يجيبلي والله

- افاا عليج هذي بيها غير طعم من الاخوو

- ربي يحفظك خويه

- ويحفظج يالغاليه مرت الغالي

آن : 

طلعنه من الجامعه اني و فارس صعدت بلسياره وصديت عليه

- اكووووول وين ماخذني

- مفاجئه بويه

- فارس ماتحمل والله

- نامي الطريق طويل

صد مني ركز نظره ع السياقه ملامحه الحاده عكدة حاجبه شعره المائل للشكار بلشمس صاير بي لمعه طاغيه لحيته وشواربه المحدده وزايدته جاذبيه وشامه تحت حاجبه كلش تعتبر وسمة جمال كبيره سمار بشرته ضخامته ايده اللي وحده يسوق بيها وحده شابك بيها سبحه وخواتم ولازم جكاره مورثها بيهاا

اخذ نفس من الجكاره و زفره برا صد عليه وكال

- خوما مختنكه

- لا حلوو الجو

- هسه اكمل واشغلج تبريد

- لااا ابد ماريد بداية شتا تراها وخلينه ع هال هوى احلا

ابتسم

- ايي على هوى رب العالمين

ابتسمت وصديت تسللت ايدي لركبتي تلمست الصليب اخر ذكرى من ابويه غمضت ونزلت دمعه من عيني نعصر كلبي ونكبتت روحي من حظرني كلشي صار بذاك اليوم وبذيج الحادثه !!!!

صحيت ع صوته وهوا يكلي

- خيرج هيله شبيج

- مابيه شي والله لا يظل بالك

سكت كمل جكارته طفاها كال

- شنو معنى هالاسم آن الاسم اسلامي وانتي مسيحيه شغلتج مجاي تدخل بعقلي

اخذت نفس وكتله

- عمامي كلهم اعتنقو الاسلام بس ابويه ظل معاند ومتمسك بدينه

بيوم اللي جابتني امي ابويه جان حاطني بحظنه يفكرلي بـ أسم يسميني بي وفجأه جان يكعد رجل جبير يمه مسلم بلمستشفى من شاف الصليب بركبته ل ابويه ظل يحاجي وينصحه ع السلام وانو يعتنقه ودين حلو بس كلمة ابويه المعتاده

- لكم دين ولنا دين وكلمن مُحب ومتمسك بدينه

بوكتها الشخص مبتسم بوجه ابويه وماخذني من حظنه وكال ابويه بيوم سولفلي مادري شنو حجه بأذني الرجال وسماني آن ورجعني لابويه

ابويه معصب عليه وكايله

- هذي بنتي وبس اني الي الحق اسميها شلون تسوي هيج انت وبيا حق ... وهذن الامور

هو مبتسم بوجه ابويه بوجها الكبير النوراني وكايله

- بنتك حلوه طفله بريئه وطاهره وهالبراءه طول عمرها راح تضل بيها و سميتها آن معنى الطهر والبرائه و صاحبة هالاسم راح تكون داخلها شراسه وقوه بوجه كلمن يأذيها وهالبت راح تجسد معنى الاسم القوه والشراسه وبنفس الوقت تمتلك البرائه والطهر

ابتسم ابويه على كلامه

بس الرجل اردف

- و أسم بنتك مشتق من الآية الكريمة "هَذِهِ جَهَنَّمُ الَّتِي يُكَذِّبُ بِهَا الْمُجْرِمُونَ* يَطُوفُونَ بَيْنَهَا وَبَيْنَ حَمِيمٍ آنٍ"

اسمها يوصف الك جهنم وعذابها للانسان اللي ما يدخل الدين الاسلامي واللي يعصي الله وما يعمل باوامره وينهى بنواهيه الدين مو اكراه لهذا جاي ارشدك للطريق الصحيح

بس ابويه ما سمعله وما سمع لاي احد وجهه ع الاسلام وظل رافض ومتمسك بدينه

ابتسم بوجهي وكمل الطريق بعدها صد عليه

- گل آن خلقها ربي هيج حلووه ؟ كل آن مجسده معنى اسمها وبرائه وطُهر بيها وبنفس الوكت قوه هم وشايله شخصيه حلوه ... يا ويلي على كلبك فارس وين الكاها هسه بويه دورولي وحده اسمها آن اطلبها للزواج حالاً وهاا شرط من هالشروط جمالها بغدادي كون 

بلعت ريكي من سمعته شلون يوصف شيقصد هذا ؟!

- وشمعنى تريد جمال بغدادي

تنهد وسحب نفس من الجكاره و زفره

- بغداديه بعد كلبي يعني الجمال والدلع والدلال منفردات ونادرات يابويه نادرات بس وين اطيحلي بـ بت بغداديه انه

- تريدها تدلل عليك حيل

ضحك وغمزلي

- افاااااا عليج اذا الكالي وحده اسمها آن وحلوه امشيها على الورد مو على الكاع و داعة عيونج الخضر المهيله

صديت منه احس نفسي ضجت حجيت ويه نفسي بصوت ناصي واعد بأصابعي

- اني منو لعد بت البطه السوده مو زوجتك واسمي آن وحلوه وعايشه ببغداد من زمان

- وعيونج خُضر مهيله توگع من اول نظره وحنطاويه تسبين العگل وترفه ونازكه ونادره وشعرج بوياااي اسود بسواد ليل الله مابي لوله وصاير مثل الطوك لركبتج ومخليج تطكين بلكاع

اندمجت ويااا

- ايي وخشمي حلوو منمنم وجرة عيوني تجنن گحيلات ورموش كثيفه يحتاج شويه تعديل لحاجبي واصير توب اني حلوه ترااا حته مرت الباشاا كالتلي تجننين

ضحك بقواا وانه فزيت وحسيت على نفسي شجنت احجيييي يبووووو عليه ما اجوز من هاي السالفه انسه نفسي واندمج اشرح واوصف ويااا ويليي شيكول عليه

صديت منه وجهت نظري ع الشارع تحسست وجهي صخنت من الخجل وهو بس يضحك

ما حسيت الا مد ايده وسحب وجهي باسني من خدي ورجع للسياقه وكال

- اموت عليج و رب الحسين ،اعشكج و دين العباس ،اتنفسج وحك جدنا علي وحك رسول الله واهل بيته ( عليهم السلام ) ادمنتج انه يالحنطاويه المهيله

سكتت وصديت منه خجلانه , اباوع للطريق واحس وجهي يطلع منه نار وكلبي دكاته تقرا الف بلثانيه 

فارس يحبني انيي يا ربي دخيلك يعني تصرفاته وياي كلهن حب مو عطف لو شفقه

ما انكر انه حبيته من يوم اللي اخذ بايدي وطلعني من الخرابه واسسلي حياة حلوه حبيته ودخل كلبي بس ابتعدت منه ما ردت اتئمل بي اكثر واوصل لمراحل بلحب وتااليها يتركني ويتخله عني بس طلع يحبني والله نصدمت ونبهتت

ضليت ساكته لحد ما وصلنه ركن السياره بكراج واشرلي انزل نزلت اخذ بايدي ومشينه بطريق صار بوجهي گبه ومناير ابتسمت شايفته ببغداد هذا المنظر كبل كتله

- هاي احنه ببغداد

ابتسم

- احنه يم الامام علي يم امير المؤمنين ( سلام الله عليه )

سكتت ما اعرفهم كلهم محد حاجيلي عنهم ولا متطرقه لهيج موضوع من قبل وصح عشت ببغداد عمري كله وجنت اشوف هالمنظر مالت الامام ولا بحياتي زايرتهم شافني ساكته كال

- تعرفيهم ؟

باوعت عليه

- لا والله ما اعرفهم اتمنى ما تفهمني غلط او تحسبها اسائه مني بس محد حاجيلي عليهم ولا كايلي لهذا ما اعرفهم

- بويه ليش افهمج غلط انه افهمج واحجيلج عليهم كلشي ترديي

مشه واني ورا اشترالي عبايه زينبيه خلاها ع راسي بعدها مشينه دخلت للحمامات توضيت وطلعت كعدنه بلضريح گبال الامام وبده يحجيلي عن اهل البيت كلهم وعن الصبر و الاحداث والمواقف و واقعة الطف وسبي السيده زينب ( عليها السلام )

وحجيه عليها من يكول جبل الصبر الحوراء زينب يحجي عن اهل البيت وتعابير وجها ويا اي موقف محزن يحزن ويبين الانكسار بي بس يحجي وكله فخر وهو يوصف بيهن وعيونه تلمع ونظره يوجها ع الامام ويبتسم بحب حسيته انسان مؤمن بأهل البيت ( عليه السلام) الى ابعد واقصى درجه 

- اشفاعنه عند الله هم اهل بيت رسول الله ( صلى الله عليه واله وسلم ) حبهم من حب جدهم عدنه ومكانتهم عظيمه ارواحنا الهم الفداء خدامهم بكل وكت وبكل يوم احنه ما من شخص طلبهم وتعنالهم و رد خايب ينطون المراد بلايد بجاهم وبجاه جدهم ومكانتهم العظيمه عند الله

- محرم ويوم عاشوراء اللي عشته عندكم والمواكب والطبخ والمشي اللي شوفته الي كلها الهم

- اي سلام الله عليهم ملايين العالم تتعنالهم وما يهمها كلشي حر برد قتل انفجارات حته الموت ما يوكف بوجهم من يجي وكت الزياره كل اللي بنيتهم يكابلون الامام الحسين والعباس بزيارتهم ويواسون الامام الحجه (عجل الله فرجه) بهاي المصيبه والفاجعه الرزيه والمجالس اللي تنقام كلها عزاء لاهل البيت لامير المؤمنين لسيدتنا الزهراء ولسيدتنا ام البنين ولكل اهل البيت والائئمه الاطهار ( عليهم السلام)

دموعي جانت تنزل وهو يحجي وموجهه نظره للامام كبال عطر الحظره يكفخ بوجهي وشعور تسلسل لداخلي ماعرف افسره بس حلو

حوادث مؤلمه ومفجعه قابلوها بحياتهم لتبليغ الرساله للاسلام فقط من النبي محمد ( صلى الله عليه واله وسلم ) الى الامام الحسين ( عليه السلام ) ورحلة سبي السيده زينب وحادثة السيده رقيه اثرن بيه كلش ونحفرن بكلبي وترسخن براسي واخذت منهن هواي عبر وهواي مواعض

تقربت عليه مبتسمه لزمت ايده وباوعت للامام ورجعت نظري اله

- اريد ادخل للدين الاسلامي من كل كلبي بدون غصب وبدون اكراه اريد اليوم اعتنق الاسلام واصير انسانه مسلمه واعبد الله عز وجل واقتدي بأهل البيت ( عليهم السلام )

يتبع في البارت القادم

تحياتي الكم ام اسد