الاشاوس و الشقراء

البارت السـابع و العشـرون

تغثني الدنيه والبيهآ
ومن النآس آنعزل وآبعد ،
وتصير عيونك بـ بآلي ،
وبگد حرگتي آنه آبرد ،
وآگول لـ روحي مآ تسوه
يجي يوم وحيآتي تصير
مثل عيونك الحلوه !!

نـاز : 

عفتهه نايمه دا اطلع اكل لالياس يشوفلهه دكتور زين يوديهه شني سبب هالخنكه وهالزراك معقوله قسم من الاعراض لا ما اتصور شدخل الادمان بلزراك والخنكه

فزت تكح بخنكه ركضت عليهه لحد ما شوي سحبت نفس براحه شربتهه ماي

- جمره حبيبتي شبيك شتحسين

ما ردت عليه رجعت وجهه للفراش بجمود مفتحه عيونهه اديهه على صدرهه وصافنه طلعت لكيت الياس كاعد ع الدرج وثاني ركبته ويدخن

- كواك الله

- كوه حيلج يبعد حيلي

دحكني مخطوف لوني

- شكو ناز شصايبج

- جمره ابد مو زينه اليااس اخذهه لدكتور شوفلهه واحد زين ترا البت جاي تنتهي شوي شوي

- شنيي يعني شبيهاا

- والله مو زينه اثار بجسمها كلها زراك جاي تطلع وتختنك كل شوي وهي نايمه

- مساع مابيهه شي

- هساع اختنكت والله

- بدليلهة ولحكيني لفوك

دخلت للغرفه واسمعه يصيح لشمم كعدتهه لبستهه عباه خليجيه مو مالت تبديل هساع وبنطرون وكذاا لميت شعرهه دا البسهه شاال 

 دفعته وهفت لوجهه مخنوكه

يبوو هساع الياس يكلب الدنيا اذا متلبس ظليت حايره بعدهه لميت شعرهه ضبيته ولبستهه توربان جاهز بس ع الشعر احسن من ماكو

- وين ناز شكو ملبستني

ابتسمت

- شويه اطلعي وي الياس اتنفهي وغيري جوو البيت خنكه

- مالي خلك والله

- لا لا انتظري هساع ينزل وترحون

عفتهه وطلعت كتلها هيج احسن حته لا تتأزم لو تتأثر من تسمع ماخذهه للدكتور

 صعدت لالياس لكيته ماكو بس صوت الماي والدوش بلحمام ديغسل يعني

فتحت كنتوره كفخ بيه عطره يا ربي دخيلك شكد يحب العطور هالزلمه 

دحكت على الميز وضحكت عطور كلهه مسطره توم فورد بلاك ، توم فور بلاك اوركيد ، بلو شانيل ، بلاك شانيل ، ساڤاچ ، افشان ، الشيخ زايـد ،الخ .........

ماشاء الله عائلة البلاك كلهه عنده عطور غاليه بس قووويه يربي جثيرر قويه ومن هاي التلزك وتطش تضوج يخنكني لان قويات حيل بس مرات استنشقهن بعد ما يهدئن يصير عطرهن طيب بعد ما تمر مده

طلع والمنشفه على راسه طلعتله ملابس

بنطرون جينز اسود بدي بيج ويا ستره سوده وحذاء بيج دحك عليهن وضحك

- بدليهن طلعي كله اسود بس الستره لا هاي ماريدهه طلعي اللي حافتهه بيج والحذاء الاسود اللي ايضا الحافه مالته بيج

- عجل بدي اسود ساده البس لا تلبس مشطب لو بي كتابه

- اي يمج كم واحد شوفي واحد منهن طلعي

طلعتله واحد اسود كعد يلبس كال

- عطر من يمج والساعه والسبحه

- يا عطر يا ساعه يا سبحه

- توم فورد بلاك اوركيد ، ساعه رولكس ، وسبحه الكهرب يمج

طلعت السبحه عليك يا الله ظل يرزل بيه لان مو هيه هساع انه شمعرفني بلسبحه كهرب يو لا

خذتله الساعه مد ايده بضوجه لبستهه الو رحت دا اجيب العطر فتحه وحط منه شميته نفسوو اليحطو دائما خررب شكد قوي تكلط عليه رشلي منوو وضحك

- چاا اليوم انه ما موجود بس عطري يمج يبقه شمي عود وخلي دايم يمج

- ليش يعني ما راح ترجعون

- بويه رايحين لبغداد باجر لو البعده نرجع هناك الدكاتره احسن صح غله بس يفتهمون ومثل حالتهه نلكه كثير اختصاص هناك

- ترجعون بلسلامه

دحكتله تأنق على اخر حبه واكف يعدل بشعره كمل وحط ايده على شواربه عدلهه 

ضحكت ميجوز من هاي العاده كمل كلشي سحب سلاحه حطه بحزامه

- تريدين شي اجيبلج

- لا سلامتك

تكلط عليه

- يعني ما محتاجه شي

- لا

وصل يمي جثير دنك عليه نفسه صار يضرب بوجهي همس

- بس انه محتاج

رفعت راسي الو بستغراب دحكت عليه كلشي مكمل ما ناقصه شي

- شمحتاج ؟!

كضب حنجي وقرب شفته لمكان الشامه وباسهه

جاي ابتعد ثبتني

وصعد باس طارف شفتي

من شفتي لخدي لكصتي باسهه بشمه

... بعد شعري وحظني خلاني بين ضلوعه

بادلته وغمرت راسي بحظنه شميته

احس بالحب والامان من يكون قريب مني ...

حظنه حظن ابو واخو وحبيب...حنين جثيرر ودافي

باس ركبتي رفعت جتفي جسمي اقشعر همست

- الياس راح تتأخرون وبغداد بعيده

طنشني وظل حاظني ابتعد وغنه الاغنيه اليحبهه گلبه

- اجيتك من بعد غربه اجيت بليله گمريه

هذاك انه نبع صافي يخايب دغش مابيه

اجيت انثر عتب بلعين عتب عاشك بحنيه

واكلك هجرك شسووه

لون فلاا اهوه

ادحك عليه مبتسمه شلون يغني وشحلاته من يصير هيج احلا من العصبيه والعياط شحلاته هادئ ويغني 

ظل يكرر بلاخير ضحكت

- هااا مو يوم العلم تحبهه ستة سنوات وهالله هالله

- احترك جدهه نعلت شيب اهلي بت الخوش ناس

دحكتله ضحك

- من اجي اخذج تخطبيهه الي اريدهه انه واحبهه واهي تحبني بعد شكـو

بلعت ريك ودحكتله هذا صدك ناوي يسويهه مو ضحك يحجي بجديه شنيي راح يتزوج عليه يبووو عليج ناز

- زين منو يكول هي تحبك وتوافق عليك

- افااااا عليج ياهو المتقبل بيه بت ال14 هسه اذا اتقدملهه تقبل

بويه هذي انه احبهه ومتأكد من هالشي مثل ماجاي اشوفج كدامي

متأكد من هالبت الاحبهه تبادلني الشعور....غمزلي وكمل كلامه

جي تذووب بأيدي و تييه دنياهه واهلهه من تصير بأحضاني

تروحين تخطبيهه الي موو

- بصفتي شنيي

دحكلي صفح

- بصفتج امي

ضحكت 

- اوي فدوه لوليدي

ودحكتله بضوجه

- چا غير مريتي

- واكو مره تخطب لرجلهه صدك تحجي

- اي عادي شكو بيهه الشرع حلل اربعه

سكتت دخلت عليه شمم شوي ونزلو نزلت وراهم راح لابو صكر مدري شحجه ويا بعدهه طلعو ظليت يم خاله كعدت يمهه وهي تسولف ويه امهه ومرت اخوهه صدت عليه

- انتي مرتو لـ الياس

- ايي

ابتسمت 

- حليوه هالبت نويله وين لكيتوهه

- من هين من الديره يمه هو حبها وخذاها والحمدلله خوش بنيه نادره وشاطره وياي وياي

- ما حبلت صارلهم جثير من تزوجو والياس كبر 30 سنه وماله ويلاد يشيلون اسمو

- لا يمه بعد وكت عليهم الياس مايريد هساع

- هذذي البت المشؤومه جميره شجابهه عدكم

- لا يمه جمره خوش بت

- لا تعارضيني نويله هالبت طلعيهه من بيتكم فكر هذي بصغرهه موتت امهه ومن كبرت موتت ابوهه وعمهه تخوف فالهه مشؤومه وفكر

حز بنفسي كلامهه اريد اردهه بس خاف تضوج خاله فزعت من حسيت بصوت ابو صكر رج المكان وهو يزمخ بأمو

- ااااانه شكايل شكااايلج مو كلت وعدت متجيبين طاريهه بيش ضارتج ومأذيتج شايلتهه وكاطتهه بحجيج البراسج سويتي بس بعد اتقي الله ولا تجيبين طاريهه عووفيهه

- تعليييي صوتك عليه علمود هذي البت ايااد تعلي صوتك على امك

- ايي لانج جاي تحجين كلام مو حلو وتذمين ببت مالهه غرض بيج ولا مأذيتج ولا واصله يمج يمه من ماتت ابوهه وامهه مو معناتهه هي فكر وهي موتتهم لا هذا كله قضاء الله وقدره هو كاتب هيج يصير وصار بعد شكو كلشي ذابته براس البت

صدت عليه مرتو كالتلو

- وانت شعليك بيهه ان حجت او لا اياد ليش هيج كبيت

خزرهه 

- انتي محد كلج ابدي رأيج واحجي انه وامي وانتي لا تتدخلين ببينه

سكتت وهو هم سكت كمت من يمهم حظرت الغدا وصبيته كعدنه بس الكل مالو نفس ياكل كملنه

لميت كلشي ونظفت تنظيف سريع صديت ولكيت ام خاله نوال تدحك عليه كالت

- ماشالله حركه بالشغل بوكت قليل تكفين البيت وخالته يلج لج كلو يلمع

- شكرا بيبي

كتلهه هيج عكنشت عفتهه ومشيت لخاله عجل شكلهه والله مادري هي مره جبيره واكبر من امي ف كتلهه بيبي المهم رحت لخاله كعدت يمهه كالت

- يمه كومي خابري الياس من تلفوني شوفي وتطمني عليه كمت خذيت الموبايل ودكيتلو رن شوي وجاوب

- هلا يمه

- انه ناز

- هلا بمريتي شعجب دكيتي

- حته نطمئن عليكم وصلتو لا

- لا يابه شني السالفه كبل شوي طلعنه بعد كدامنه طريق

- الله يسهللكم

- من اوصل عود اخابركم

- ان شااء الله

نها وياي طمنت خاله وصعدت فوك ابلبش بالغراض افك واصفطهن من جديد كلهن من كد ما ضايجه اريد بس شي التهي بي

مرت هاليومين بصعوبه والياس بعد ما حاجيته وابو صكر ومرتو وام خاله نوال بعدهم يمنه

نمت من وكت وكعدت من الصبح شبعانه نوم بدلت وغسلت نزلت للمطبخ لكيت عمو خطيه كاعد ديروح للدوام للشركه

- صباح الخير عمـو

- هلا بعد عمج صبحج الله بلخير بنيتي

- اسويلك ريوك

- لا بويه هسه تكعد خالتج تسوي

- لا عمو خلهه نايمه خطيه انه اسويلك

سويتله ريوك سريع وهو ما يحب الريوك الثكيل وكذا يكتفي بلقليل والخفيف واهم شي يكون عندو الجاي والخبز او الصمون حارر مثل طبع الياس يحب الاكل حار والجاي هم جثير حار يلا يشربو

كملت وحطيتو كدامـو كعد وانه صبيت عصير احب اشربو الصبح كمل تحمد وكال

- بويه نازه

- ها عمـو محتاج شي

- لا بويه بس جاي ابلغج انه ان كلهه كم اسبوع وننتقل للبصره كلياً ما نرد للانبار بعد الا للزياره وبين فتره وفتره نرد للبيت يبقه النه بس الاقامه الدائمه راح تكون بلبصره خوما عندج شي او ما تقبلين

- لا عمو عادي بكيفكم ليش ما اقبل بالعكس اللي انتو تقروو انه امشي بي بس الياس شلون

- لا الياس قنعته انه وهو هم جايتو نقله للبصره احسن هناك اهلنه واملاك الياس كلهن انه ماخذهن اله بالبصره وقسم قليل هنا ينباعن وهالشركه مالت العقار العدنه بلانبار هم راح تنتقل للبصره احسن وكلشي يصفه

- هاهيه عمو بكيفك التشوفه انت صح احنه نمشي بي

- الله يرضى عليج بنيتي

طلع للدوام وانه ظليت كاعده ارتب واعدل بلبيت لحد ما كعدت خاله واجت تريكنه سوه وكعدنه

- يمه البارحه الياس سئل عليج وانه ماكدرت اصعدلج فـ خابري شوفي خاف رايدج بشغله

كمت من يمهه دحكت الساعه ب 11 ايي زين يعني كاعد دكيتلو رن شوي وجاوب

- هلا

- هلا الياس شلونك

- هلا بويه عاش من سمع صوتج شتاكيتلج كلبي

- نحن الاشوق

ما حجه وانه هم ظليت ساكته بعدهه كال

- شلونج

- زينه الحمدلله وانت

- الحمدلله بخير من سمعت صوتج

- جمره شمم شلونهن

- شمم زينه وجمره هم كثير تحسنت من بعد جلستين يوم وره يوم يم الدكتور صارت احسن بقت بس العلاجات تستمر عليهه ستة اشهر

- الحمدلله

ظلينه نحجي شوي بس يمو هوسه صوت هوا يمكن طالع سمعته زمخ

- هاي شبيج هسه دقايق ونوصل شهالملحه

استغربت

- هاي ويامن تحجي الياس اذا وي البنات نطيني شمم خل احاجيهه

- لا البنات مو وياي

- عجل وينهن وهذي منو الحجيت وياهه

- ناز ارجع واحاجيج سدي من يمج

حسيت بلطخة الموبايل عبالي انسد وخرته بس فجأه اجاني صوته

- تسووودنتي انتي السوادين اي والله

صوت بنيه يمه حجت

- شسويت هسه قابل جرمت

- شلون تخليني اسبهه واسب الخلفوهه هسه خبصتينه يا طريق يا **** شصير صاروخ من انتي هيج مستعجله اجريلج هليكوبتر ونكلعي بيها

- بكيفك احجي بس ابوي سيد يشور بيك

- فلك كون يطرج ويطر ابوج ويخلصنه منه ومنج كثيرر رجفتيني من جبتي طاريه ...... هم حاسبه نفسهه مره وتداوملي بجامعه تلبس وتتأنق والله يالله

- يااااااا باشا اني شنو لعد

- زلمه والله تصرفات وكلشي حته من تمشين نافخه روحج ليكول زلمه ناقصج بس عضلات وتكصين شعر وتربين الشوارب اضبط زلمه تصيرين

- رجعني للبيت

- باعي لج روزه لتتمضيكين براسي ترا هسه اشمرج من السياره بالعباس سايق الخلفوج انـهه وهيج تحاجيني

- حشه حشه اسفه والله باشا مو بقصدي ماحجي بعد والله لحد ما نوصل

اسمع ومصفنه شنيي من هاي خاف هذي حبيبتو ام ستة سنوات اوو لا هاي ننبر من حبيباته استغفرالله يجي يمي ساعات يوكعلي غلط وحجي وساعات حب و رومانس 

وهساع ماخذ راحته وشلون يضحك وياهه كلبي احترك حرك خبلني والله راح يخليني ادخل للشماعيه لمستشفى المجانين هالزلمه ليش هيج يتعامل وياي يحرك كلبي ويضهرلي الحب اويلي عليه وعلى حركان كلبي احس اشتعلت بغيرتي عجل شبي وياي لا يضحك جماله يكلهه يدلل الحلوووو

استغفرالله ربي واتوب اليك الشي الوحيد الزين راح يدخلني الجنه كد ما استغفر من ورا ومن وره تصرفاته 

ضحكت الله شكد حلوو ادخل الجنه من ورا راح تنمحي كل السيئات المرتكبتهه ولو صغيره يلا نازز ظلي استغفري من ورا تصرفاته وشوفي تاليتهه ويا والله كريم

صاحتني خاله سديته ورحتلهه الدمعه بعيني بس اضحك من كل كلبي مدري ليش والله تخبلت انه اليوم دحكتلي خاله وضحكت

- يولي شبيج تضحكين ويه نفسج عجل يعني الياس وكع بيج غزل

ضحكت 

 اييي خاله جثير غزل سمعت منوو جثير تغزل بيه -

ظلينه نسولف ونحجي بعدهه اجن يمهه امهه ومرت ابو صكر وظلن يسولفن سوه مشه هالليوم عادي

كضه الوكت واليوم كله تالي صعدت فوك ظليت كاعده الهي نفسي قريت قران وصليت صلاة الليل ونمت لنص الليل حسيت واحد حظني وحوط خصري فزيت وطفرت رجع سحبني وهمس قريب من اذني

- الياس انه يبعد حيلي

رجعت راسي نعسانه حسيت بي سحبني لحظنه صار راسي على صدره رفعت ادي لوجهه دفنت راسي بركبته شميته وغمضت عطره صار بوسط روحي وسيطر النوم عليه

كعدت الصبح وانه لساتني بحظنه كمت منوو فز

- شبيج متكليلي هو هيج

- شكوو حاظني

تململ بنومته

- مرتي وبكيفي هم فاهيه وهم مطفيه وكلشي متفتهمين وهم حارمتني من النوم دخيل ربي الخلقني يم هيج وادم

- وهذيج اللي البارحه تحجي وياهه وضحك وسوالف وتدلل الحلوه

ابتسم

- بوويه سمعتيي موو ؟؟؟

صدك واذا سمعتيهه انتي شدخلج بيهه

- شنيي شدخلني هساااع كلت انتي مرتي عجل شلوون ما اسئلك اليااس تعبت ورب العزه مجاي افهمك انه

- شمسويلج انه

خزرته وكمت جرني عليه

- شو كايمه تخوزرين ولج

- ايي عجل بس انت تخوزر

- انه من اخوزر وحد

سكتت

- صدك تعيي اكلج انتي ليش موجر كلبج من هالبت شني تغارين

رفعتلو حاجبي

- عليمن اغار

- عليه بويه لا تكابرين طايحه انتي بعشكي

ضحكت

- اووووو شكد مغرور وواثق من كلامك

سحبني عليه وگـال

- احبج خاتونه

كلبي رف وصفنت عليه هذا المن يقصد انه انه معقوله الي هالكلام جاي يكلي لو مشتبه اكيد مشتبهه الياس يكلي احبج لا لا ممعقوله والله

- هاي شبيج داكلج احبج ما مسويلج فلم رعب لو كايدج للمشانق وهيج صوفرتي

- اااا لا ماكو شي بس يمكن انت مشتبه

ضحك 

- لا بالعباس اعرفج مو لهلدرجه تسودنت واتخايل انتي نازز خاتون انه احبج الج كلج بس شعرج لا

- اهووو لجيت ويه شعري

- دوولي مو وجه حب انتي اكلهه احبج تعوف كل الحجي وتركز ع الاخير صوجي انه

- يعني انت تحبني الي مو لغير وحده

- لا احب ابوي

- عجل وام ستة سنوات

- انتيي

نصدمت لا شجابه عليه كبل ست سنوات

- الياسسس لا تلوفهه عليه وتطلعهه انه ام ستة سنوات مو لهلدرجه يعني جان عمرك 25 سنه وانه 17 وين دحكتني شعرفك بيه

- بالعبااس انتي بوكتهه جنت كبل يجي سنه متخرج من العسكريه واداوم ببغداد بعدهه ابوي نقلني للانبار اول ما نقلت وداومت صارت عركه بلمنطقه الغاد من منطقتنه

وانه جان عندي واجب يمهه وتدخلت بلعركه اللي جانت بين اهلج وبين الشيخ راشد اول عركه تنشأ بيناتهم المهم بوسط العركه والطيحان حظ

انه شفتج جنتي جايه من المدرسه بس بالعباس اخخخ لو طيحه بايدي بذيج الساعه جان طريتج وصلتين حقدت عليج الصدريه ضيكه واللبس والشعر الاشكر يتطاير وراج مدري كرهتج مدري لا بس الادري بي ضوجتيني جان بودي اكضج واطيح حظج خاف عبالج حبيتج من اول نظره تؤؤ انه باول نظره كرهتج كلت شلون تلبس هيج وشلون وشني هالاستهتار وطيحان الحظ واهي بت شيوخ واهيي واهيي واهيي ظلت الحسبات ببالي مرت الايام اكدر اكول نسيتج بس صدفه تمرين ببالي

صرتي جامعه وانه هناك اغلب واجباتي بديت اعاينلج وانتي تترددين صح لبسج مستور ومحتشم بس الشعر وراج والوادم تاكلج اكل بعيونهه وانه نار تشب بكلبي كرهتج مادري وماعرف شني شعوري الصار تجاهج بس عذاب

اخزرج هيج ما اطيق اشوفج بس اريدج توخرين من كدامي والحجي الاسمعه عليج ومعتز والامه العربيه كرهتج وحسيت ب نار وشابه بكلبي بكل كلمه اسمعهه تنحجي عليج

مـرت ايام ومن طحتي بأديه وصرتي ع ذمتي مريتي صح طكيتج واذيتج بكلامي وبأفعالي بس كرهي الج تبدل لحب بالعباس بس قسوتي وحركاني عليج طاغي اظنج مستهتره ومو مؤدبه والحجي السمعته من معتز عنج كرهني بيج كثيرر لان كلامه جان يثبت انج انتي تركضين ورا وذابه نفسج عليه كلهن غرزن قهر واذى بكلبي ونتقمت منج وردت اطلعه بيج

اما بلنسبه لشعرج تعرفين ليش اكرهه بس بعدهه ومن حجيتيلي وكلتي كلشي لمحت بيج الصدك وانه اعرف الصادك واليكذب وافهمه زين وحبيتج وتربعتي بوسط كليبي يحيلي يبويه 

بس انتي يناز وراج سر بالعباس

ستغربت

- سر ايشش انه مضامه شي عنك

سحبني عليه وكلبني

- هسه انتي عفتي كلشي وركزتي ع الاخير شلون وياج انه داكلج احبببج بويه احبنج اعشكنج

ضحكت

- ماجاي اسمعك

دحك عليه بخبث

- ول يااب وريتي كلبي ور ورب العزه

طفرت منوو

- لااا اليااس

- شكووو شبيج

- اخاف منك من تحجي انباري ورب العزه احسك ناويلي على نيه كشره شحلاتك بلجنوبي

اجه عليه سحب راسي وطبك شفتو على شفتي فجأه نصدمت ورجفت جوه ايده ظل يتفنن بيهه بكل حنيه وبحب وانه جامده مصدومه من ردة فعلوو وكلشي ماعرف بس كلبي كام يدك بقوه 

دخت راسي فتر ونفسي ضاك خنكني وخرته حظني وتنفس من ركبتي وانه خجلانه

رفع راسي من حنجي وباس الشامه تلمسهه وكال

- بالعباس ماكو غيرهه طيحت حظي هالشامه الجوه شفتج

ابتسمت ودحكت عليه داخلي فرحانه واحس كأنـو فراشات ديطيرن بداخلي

- عيونج يشكن شك بعلي

وخرت منو واحس نفسي دخنت ظليت اهفي على وجهي ضحك بقوه

- شبيج هيج نصبغتي حمره شمسوي انه ترا بعدنه بسم الله

- لا الياس

سحبني عليه شبك اديه بأيدي وكال

- ناز ابوج ليش هيج كارهج

دنكت راسي بحزن والدمعه حزت بطرف عيني رد رفعه وكال

- خلي راسج مرفوع دوم انتي مريتي مرت الباشا وهسه كليلي

- مادري ليش انه والله كضيت عمري كلو اتمنى حبو وحنانو اتمنه اكلو يابه ويكلي ها بويه ويحظني ويحبني مثل ما يحب بسمه بس انه لا دومه كارهني يزمخ بيه وبودو يكتلني ويشرب من دمي وانه هالشي ياكل بيه اكل من وعيت للدنيا لحد هساع انه اتحسر على اب صح عندي بس ما محسسني انه بنتو ومن جنت اكول لامي الله يرحمهه شني السبب تكلي لان انتي شبه خالتج وابوج يكرهه لان حبهه وما رادته وو

سكتت استصعبت اكولهه الوو

- انه ادري بخالتج نهبت بيوم مهرهه وعافت اهلهه لجل شخص مجهول

دحكتله متفاجئه

- شدراك انت

- اعرف بسالفتهه كلش زين

- خالتي ماتت الله يرحمهه امي تكول وره سنوات جثيره رجعت وحدهه ويمكن كالت وياهه بت وخذوهه من امي بس هي خالتي جانت مقهوره و واكعه ماخذيهه للمستشفى وضاله ثلاث ايام وماتت

سكتت عنهه رفع ادي باس باطنهه ودحك عليه بحنيه وكال

- انه ابوج واخوج وامج وشتردين انه موجود انتي بنيتي وحبيبتي وكلشي بحياتي يبعد حيلي خاتونه

حظنته وغمرت راسي بحظنه وغمضت عيوني بادلني ابتسمت وكتلو

- احبك باشا

ضحك كضبني من حنجي وباسني بشفتي خطف

- يبعد الباشا وهله خاتونتي

دا احجي ودك موبايله دحك عليه و رد

- هـاا ابشـر بويه ......

دحكت عليه كبل وخر مني وراح لغاد كلو

- عليييك ابو فاضل صدك .... چا شلون هيج صار احلف ما جاي تتقشمر وياي .... ياهو مهدد وطاك الاخ ... يخوي عدل بدل معقوله زين تأكدت ...... يعني هالشغله منتهين منهه كبل شهور صايره لا اله الا الله بالعباس انصدمت ... وهالناس الجابولك اخبارهم ياهوو ... اهاا انت رحت وسئلت يعني مليون بلميه ... خوش بويه كفيت ووفيت مشكور ...... بعد حيلي ما تقصر ... اودعناكم

كعد ورث جكاره ودحك عليه بنظره مدري شلونهه ماعرفت افسرهه وفرك راسه واستغفر كلبي وجعني شبي هيج نكلب فجأه

- تعالي بويه ناز احجي وياج

يتبع في البارت القادم...

البارت الجاي ويه ناز والياس

يحياتي الكم ام اسد