أنا المسجُونُ في حُلمي
وَفي مَنفى انڪساراتي
أنا في الڪون عصفورٌ
بلا وطن أسَافِرُ فِي صَباباتي
أنا المجْنونُ فِي زَمن ٍبلا ليلى
فأيْنَ تڪونُ ليْلاتي
يَضيقُ الڪونُ في عيني
فتغريني خَيالاتِي أنا وطنٌ
بلا زَمن وَ أنتِ زَمانِي الآتِي."
نـاز :
دموعي تنزل وهو ضاغط على نفسه ويحجي بقهر وخنكه ويغمض عيونه بقوه ويشد بقبضة ايده ويحجي الله يساعده على هالحياة المـر بيهه وينتقم من كلمن اذا وساهم بأذيته واذية خواته حسبي الله ونعم الوكيل
كمل كلامه..
- اهدئ بحوراء وشَمم اسكت بيهن ظليت وانه اريد احد يهديني ويسكني اريد حظن امي وادور عليه بس مالكيته جن عماتي خالده وخلود يم حوراء وشَمم وانه نزلت سمعتهن بيهن يرحون لوادي السلام اصريت وياهم رحت وانه صح جنت 14 سنه بس خشن تابوتهه بهذا عمري نسند على جتافي
بيدي طوفت الجنازه بظريح الامير علي ( عليه السلام ) وبهاي ادي التمنيتهه تنكسر ولا تتجرأ وتذب تراب على كبر امي انه دفنتهه ونزلتهه لان انه ابنهه الوحيد والباقين حرام يلمسوهه ما خليتهم وانه النزلتهه لان لا خوانهه موجودين ولا شي من ساعتهه كلبي مات من نزلت امي وشمرت عليهه تراب ودفنتهه دفنت كلبي وياهه
واخوتهه ماكو خوالي هہ بحياتي ماكلت هالكلمه من وعيت ع الدنيا وانه ماعرف خوالي وينهم او بيت اهل امي وين و وين هاجين رجعت مرت ايام الفاتحه وانه مصفن بيهه اكول بلكي ترجع بلكي اعاين لمكان كعدتهه اشم بملابسهه اكلهه وينج احاجيهه بلصور واكول بلكي يطلع هالشي حلم بس ماگـوو امـي راحـت
من خلص الثالث كلهه رجعت لبيوتهه وبقينه احنه لجن مرت ابوي شاده ويانه وخاصه ويه اختي حوراء مره عاينتلهه رادت تضربهه ولزمت ايدهه ولويتهه وعطت بوجهه يلا جازت منهه
بس من جوه لجوه تشتغل حوراء اخيتي نظامت وانه الاصبـر عليهه واسكتهه من تبجي وابوسهه وهي رغم جبيره بس جنت من اطلع من شغلي كذالك اجمع اليوميات وانطيهن الهه ومن ارجع اجيبلهه نستله لو كيكه تطير بيهن وتحسبهن جن جايبلهه شي جبير وشَمم اللي تلوعت بغياب امي لو ما انه و حوراء وياهه افرحهه بلعبه وهيج اشياء تحبهن بعد كل بجيه الهه يلا تسكت بيهن وتلتهي بلعب كثرت مشاكلي ويه مـرت ابوي ظليت اتعارك وياهه بس تحاجي خواتي لو تندك بيهن واهج عليهه وهي تصيحلي الصلف ابن الغريبه يلتمن عليه اهي وحبوبتي وتطردني وعمامي يوكفون وياهه وما يدخلوني للبيت واظل ليله كامله انه نايم بلشارع وخواتي ماعرف شيسولهن جوه
مـرت شهور وانه هيج دايم اتعارك وياهه وتطردني من كثر الشارع و وحشته بليل وانه بهالعمر المفروض عايش رغد ومن بين ام اب مرتاح بس لا عشت ونمت بلشارع بهذن الايام وصرت اقسه من الصخر البعمري يخافون من الضلام ويلبدون بسد اهلهم بس انه اظل مفتح عيوني بلضلام واتمشه بلشارع
اجت فتره صارو يتوددولي وحته مرت ابوي كامت كله لحوراء وحبيبتي وبنيتي حبهه البين وخذاها جان بودي بس اكضهه وادكهه بالعباس
انه تعودت اجي من الدوام بلمدرسه اذا اعاين وحده من خواتي تبجي لو متأذيه اتعارك وياهه وانطرد وامشي للشغل تعودت منهه ومن عمامي اللي صايرين خدم جواهه وجوه نسوانهم بس بهالفتره كلهم تغيرو انه كضيت كلبي منهم اكعد يمهم يسكتون انه اكوم وارد ادخل الكاهم يحجون وهي مترأستهم بس فجأه يسكتون
لحد ما بيوم رجعت من المدرسه جنت ثالث متوسط باخير امتحان تأخرت اخر واحد طلعت لان اسئله جانت صعبه ساعه وبعدهه اصدقائي وشويه طوبه بلشارع كملت ورجعت هاللحظه للساتني اذكرهه وما راح انساهه طول حياتي وصلت لباب الحوش صريخ شَمم للباب وصلني دشيت ركض وانه اشوفهه بلكاع شلتهه وطبع اصابع على خدودهه صحت بيهه
- هاااي ليش ماده ايدج على اختي
- بكيفي
- بالعباس اجي اكسرهه الج هالايد النمدت على اختي
اجت عليه دتضربني كضيت ايدهه ولويتهه وخنكتهه خنست لان هي مسلوعه وانه اطول واضخم منهه
- لا تندكين بيه بالعباس اكسر اديج وظهرج بت الكلب اذا تمدين اديج عليهه بعد تعرفين شسوي بيج دفعتهه وصحت لحوراء ماكو عاينتلهه
- وين حوراء ؟!
هي سمعتني وطكتهه بضحكه مالت گ*** استغفرالله ربي وراهه طلع عمي طالب وهم ضحك بوجهي وكال
- حوراء ماكووو بعد
نزلت شَمم بلكاع وانه مستغرب
- شنيي ماكـوو
- حوراء تزوجت كبل شوي وطارت طيارتهه متشوفهه بعد و الله الاعلم وين راحو عيالهه وخذوهه
طفرت عليه خنكته وصحت بوجهه
- ولككككك اخيتيييييي وين وديتهه
كال بخنكه
- تزوجت وعقدت اليوم
دفعني وكال
- لبيت ام احمد هي ابن الكلب رادو مره لابنهم ونطيتهم اختك شني ظاله علينه حمل مره شكدهه 19 سنه شتنتضر خل تتزوج وهم خافو من الاوضاع وكالو راح نسافر بس ما رضو يكولون لوين
انه سمعت هيج تهسترت وتسودنت سحبت عوجية حبوبتي كضيتهه وصكعته بيهه
- لككك شنييييي اختي تايهه وتنطيهه من كيفك
كام دفرني رديت ضربته عاطت حبوبتي
- اييييي متفرعن تربات الغريبه الگ*****
- بسسسسس لا تجيبين طاري امي اك
در اردج واتجاوز عليج بس محترم شيباتج لا تشوفيني صغير بلعباس اهجج منا
اهي حجت لجن سكتهه واحد اول مره اشوفه وهو يصيح بيه ويكلهه
- كااااااافيييي يمه بسسسس بسج طغيان حرام عليج انتي مره جبيرره عاينو شسويتوو بهالطفل من ورا عذابكم وطيحان الحظ هيج صـاررر صخرر وحجر بس احييكم انه احييكم خليتو يطلع زلمه ويدافع لخواته ويوكفكم عد حدكم هيج بس من بعد حقد كثير شاله عليكم
- انت اسكت زوج الانباريه ردت ردت ردت جبرتنه وخذيتنه نخطبهه وكم مره رفضوك يلا قنعوو وخذيتهه كعدتهه يمنه جم شهر والغريبات ثنينهن دكن ميانه سوه لجن بعدهه خذيتهه انت وشردت بحجة شغلك انقل بس انه صوجي من البدايه الماخليتك بجامعة البصره ورحت للانبار جان ماشفت هالشكولات العاجر لهسه بلا خلفه
- هااي الانباريه والغريبه الله يرحمهه التحجين عليهن يشرفن كل بنات عمامي وعماتي وخواتج واخووتج ماشيي ابد انتي لا تحسبين نفسج ام مو كل ام ام وانتي زرعتي الحقد وربيتي الكره ببين ولدج على تفرقتج وحقه مازن من كال مينعاش هنا وهج منج وطلع للخارج وانه هم عايش ملك بعيد عنكم بس جيت اخذ ولد اخوي واخلصهم منكم وخلهه ببالج مو كلشي بلخلفه انه ماريد المهم عندي هيه والمهم احبهه وبس الاطفال مو كلشي بالدنيا
سكتت هيه اجه لعمي طالب وخره وكاله
- وخررر منا انت بزر الدلال والطيحان حظ جان استحيت على شيباتك صخايمك وعمايلك كلهه توصلني
انه يحجون ما هتميتلهم سكتت شَمه بعدهه عفتهم وطفرت من الباب طلعت لبيت ابو احمد هجمت عليهم الباب لحد ما فتح من كيفه دخلت البيت فارغ طلعت واسئل بلجوارين كل اليكولو الي سافروو سافروو بس محد يدري لوين وهذا الزلمه يركض وراي جرني وكعدني وكلي
- ولك كطعت كلبي ما تكعد انت بس تزاكط
خزرته وعكدت حواجبي
- وياهو انت بويه وشتريد مني تلحك وراي
- انه عمك حسين
لا ارادي طلعت من حلكي كتله
- اهااا انت زوج نوال
ضحك بصوت وكلي :
- لا يالما تستحي شلون تكولهه هيج
- چا انه احبهه لمرتك لتخاف ماكرهه
- شعجب يبعدي
- لان امي جانت تحبهه كثيرر هنه مثل الخوات ودايم تحجيلي عنكم
- الله يرحمهه اخيتي الغاليه
- انت روح انه ظال انتظر اخيتي هسه تجي
- حبيبي امشينه اخيتك بعد ما ترجع تزوجت وسافرت ومحد يدري وين
- ترررجع هذا بيتهم
عفته وظليت انتظر لليل وماكوو حوراء هنا انه تدمرت للمره الثانيه فكدت امي للمره الثانيه من ورا بيت جدي حقدت عليهم حقد مو طبيعي كرهتكم وكرهت كلشي حته نفسي كرهتهه رجعت للبيت وتعاركت ويا واهو يغلط وانه ارده بأكثر ويكلي
- لكك كلك 16 سنه شهالسان وشهالكوه الشايلهه
ويظل يغلط على اهلي ما يدريني انه بهالعمرر المجرد رقم بس المواقف والشي الشفته كبر كلبي دهر وسنين كثيره
مرت ايام عمي نقلني لمدرسه للانبار وخذانه انه وشَمم لبيتهم اللي بي اهو ومرته عايشه بي داومت و وياي اخو مرته زلمه اكبر مني بسنه اسمه اياد هو نفسه ابو صكر جان يشوفني احجي بغير لهجه وهو يضحك ويعلمني على لهجتهم كلمه كلمه لحد ما حفظتهه كلشش وصرت وياا اصدقاء حيل بعدهه بسنين تعرفت على معتز اهو اصغر مني صرنه اصدقاء سوه ارجع للبيت عمي ومرت عمي ما مقصرين ويانه والمهونلي دنيتي ومحليهه من ريحة امي وابوي واختي البقالي شمتي شمه اخيتي اقصر على نفسي وماقصر عليهه هيج لو بيدي امشيهه عالورد والكطن وماخلهه تجيس الكاع كد ماحبهه واخاف عليهه من كلشي
كملت سادس ومثل حنية مرت عمي وطبايعهه الحلوه ماكو حنينه عليه وعلى اختي اللي اعتبرتهه بتهه وانه ابنهه وكله تصيحلي يمه بس انه ماكدر انطق كلمه يمه الهه لساني ماخذ بس على امي لحد ما جنت سادس علمي وباول يوم امتحان مرتني امي بحلم لاول مره وجن اهي وانه كاعدين سوه واضحك وياهه بعدهه كامت راحت مني صحتهه
- يمه وين ما شبعت منج انه
- لازم اروح عينك على خواتك انه مرتاحه حبيبي ودير بالك على نفسك
- يمه انه احبج
جرت ايدي كضتهه وباستهه مثل كل مره تسويهه لجن ردت ابتعدت كالت
- فرح مرت عمك بكلمة يمه يبعد امك واهلها
- بس انتي امي
- اي ييمه انه امك الاولى الجبتك وربيتك ومرت عمك امك الثانيه الدارتك ودارت اختك بعدي وحطتكم بعيونهه وانه احبهه واعتبرهه اخيتي
وصدت ومشت مني انه بيومهه كعدت مرتاح واول ما شفت مرت عمي حظنتهه وبست ايدهه وكتلهه يمه وهي طارت من الفرح مـرت ايام كملت السادس بمعدل 86 عمي جان رايدني ادخل جامعه وادرس ادارة اعمال وهذن السوالف بس انه غافلتهم وسجلت كلية عسكريه بجامعة بغداد طلع قبولي فاجئتهم بيهه بلبدايه عمي زعل بس بعدهه رضه رحت سكنت اتدرب ببغداد تدريب قاسي كل الانواع تعلمت بيهه ان تخص السلاح تركيبه وفكه والرمي والانضباظ دراسه وكلشي واهم شي قسه كلبي صار صخر وكمت احس كأني مجرد من شي اسمه روح لان شفت الظيم والاظى كله بلعسكريه
بعدهه وره ماتخرجت تعينت برتبة ضابط والنجمه بجتفي ببغداد وعمي على معارفه نقلني للانبار ومنهه بدت مسيرتي ظليت كل فتره انتقل لمنطقه ومن منطقه لمنطقه من محافظه لمحافظه لحد ما كونت اسمي ومعارفي وسمعتي العاليه والطيبه وحب الكل الي ومعرفتهم الي وبيه وصارو عمامي يتمنون لفته مني وان اروح واسلم عليهم انه اللي جانو مأذيني ويطردون بيه كامو يتوسلون وييتوسطون بأسمي علابو الضابط او الملازم او النقيب الياس ابن اخونه وويتحركون ويزامطون بيه وانه ما معاين وجوهم ولا اريدهه ومن ذاك اليوم انه ما دخلت للجنوب بعد لحد ما صارت اوضاع داعش وانه ناوي اجيبهم لبغداد بس عمي مارضه
وبلنسبه لأملاكي ولكلشي الي بورث امي واملاك اابوي كلهااا اللي جانت بسمه من بيوت شركات املاك صارت بأسمي لان ابوي جان بوكتهه حاط القسم الاكبر بلاملاك الي وساهر وازهر و سمرا حاطلهم كل واحد بيت والولد ضامنلهم حياتهم بمعامل تحت ادارة عمي ومن كبرو تسلموهه
وشمم و حوراء كذالك كلمن الهه كاع مبنيه وباقي املاكه من الشركه اللي ببغداد واللي بلبصره بأسمي والعماره اللي باسمه بلبصره محولهه بأسمي اضافه لهذا البيت وبعد كم بيت ايضاً باسمي مسجله بأسمي والسبب مجهول وابوي ليش سوه هالشي مادري وهالشي انه ماجان الي علم بي ابد بس عمي اهو اللي طلعه من عيونهم بعد موت حبوبتي وجدي لان بوكتهه مشوو بسالفة تزوير وهذن السوالف يريدون يخلون اسمائهم بدل اسمي وياخذوهه ببينهم بس عمي بوكتهه رفض ومنعهم من كل هالشي ومن لعبتهم الجانو يكديوهه
انه مالي نفس بي وبأملاكه وبكلشي وما درتلهن بال لان منهم كلشي منهم كرهته ومقته وهو تصرف بيهن وخلاهن بأسمي الاملاك وانه ما هاويهن
ما مشيت بيهن ولا تسلمتهن بنيت نفسي بنفسي مشيت بشهادتي وبشغلي وكونتلي اسم بين الوادم كلهه تعرفني وسمعتي طيبه بينهم كلهم ان جانت بلانبار او بغداد او بلجنوب كلها تعرفلي وتشهدلي شلون انضباطي ونظامي والشين والظلم ما ارضه بي هذا انه الباشا البنيت نفسي بنفسي بعيد كل البعد عن املاك ابوي
و ورث امي ايضا ما لعبت بي عمي بوكتهه فتح حساب بلبنك وأمنهن بي بأسمي وارباح الشركات وكلشي الي كام ينزله بلحساب اما هو اله شركه خاصه بي بلانبار مالت عقارات فرع من فروعهه بلاردن
احط بعكلي افكار وعندي امل يجي يوم والتقي بأمي الثانيه اخيتي حوريتي كل فتره اسافر لدوله اشوف عرف هناك واضل ابحث عن اسمهه ماگو مشتاكلهه انه بكد الكون واتمنه اسمع صوتهه واسمع اخبارهه منهه او اخبار عنهه بس ماكوو اخبارهه مقطوعه وانه وياهه جنه كراب حيل من بعض وهي اكرب الي من حبل الوريد بوجودي ماهدهه واظل يمهه ويم شَمم وهيه گذالك بس الدنيا بعدتهه عني وبعدتني عنهه بسبب كيد كادو عمامي ومرت ابوي الله ينتقم منهم
انه صرت 31 وفراكي ويه اختي هسه 15 سنه ما شايفهه ما سامع صوتهه وميت بشوكي الهه لجن كل كعده النه كل حجايه منهه مطبوعه ببالي
جدي وحبوبتي من زمان ماتو وره سنتين من جيتنه للانبار يمكن جدي بعدهه بسنه حبوبتي وماتو موت سريري ومحد وصلهم رادوني بس انه ما رحت ولا ردت شوفتهم شتسميهه سميهه قساوة كلب تجريد من روح ما يهمني بكثر ما اذوني ودمرو اهلي بحجيهم وبشيناتهم واذاهم لامي وشماتتهم بيهه كرهتهم كثيرر وما اطيقهم والاعاينه بيهم بودي اطلع روحه
وهذا انه ابن الجنوب اللي ما شفت منهه بس المرار والاذيه والتشرد والضياع وابن الانبار اللي احتوتني وروتني وسكت سنين حياتي وعوضتني عن العشته بأخيتي شمه اللي هي كل حياتي ولاجل عينهه عايش حته ماخلهه تحتاج لاحد لو تنذل دام انه موجود واشم الهوا لهيج انه اكره عمامي وما اطيقهم ولا اريدهم وحته ما اعترف بيهم وماريد شَمم تتخالط بيهم واهي انه ما ظام عليهه شي بس كبرت صارحتهه بكلشي حته لا من تكبر تعرف وتلومني كلشي كتلهه اجتهه فتره انعزلت وحدهه بس بعدهه تعودت وكالت
- انه يضلون بابا حسين ابوي وماما نوال امي واحبهم
اسمعو ومقهوره كل شخص من عدنه شايل بداخلو جثير وجع والم وهم وكاتمو بداخلو وماكو واحد بينه مرتاح بحياته بدون هم وغم يعكر عيشتو
- انت قوي صدكني الله راح يعوضك على كل هم واذى عشتو ودحكتو بحياتك ومواقفك كلهه حلوه وتدل على شهامتك من دفاعك على امك واخواتك ومشيئتك ومن صرت مسؤول عليهم بعد ما مات ابوك الله يرحمو ولا تهتم لأي شخص اذاك وسلم امرو ل الله وهو ما ينسى عبدو ولا يترك حك مظلوم وما يضرهه حاشا لابد ويجي للظالم يـوم ويبان بي ظلمو واذيتو للناس ويخلي يتندم
سكتت و حرك راسو بركبتي جكجكتني لحيتو ودغدتني ضحكت
رفع راسو الي ملامحو تعبانه مسحت على وجهوو
- الگوووه باشااا الگـووه شبيك هيج معكنش اضحك ارتاحيت من حجيت موو
ابتسم
- مسودنه انتي بويه شبيج تضحكين
- اغار من لحيتك
رفع حاجبو ودحك عليه ونص ابتسامه على وجهه
- شنييي تغارين
- لاااا تاخذهه بغير نظره اغارر يعني هيج طخت بركبتي وضحكتني لا اكثرر ولا اقل والله
- ايي ما ماخذهه بغير نظره لتخافين دماغج يتهيئلج
- اكول شي بس متزعل
- شنيي كولي
- انت من عصبيتك وصح معذور بس المفروض ما تعلي صوتك هيج على عمو خطيه هو علمودك وخايف عليك من يحجي هيج وهم رباك وداراك صارلو سنين وباعتبار هساع هـو مو بس عمك هـو ابوك الثاني والاب الو قدرو واحترامو والمفروض ما يعلى الصوت بحظورو ولا يجي الرد على كلمتو زلمه جبير وانته ابنو وخايف عليك من اي شخص يأذيك وهساع هو زعلان عليك المفروض تصالحو
دحكت على اديه مندمجه ويا جثير وحاظنه وجهوو عززا يربي هساع شيكول عليه استخفيت جثير هاي شبيج نازز شصابج
رفعت عيوني لعيونو لكيتو يدحكلي وصافن بيه عيون لوو شنيي هذن شهلا ومعسولات واحس بيهن سحر خاص بي ونظراتو تصوب وتجذب اكبر بت
استغفرالله استغفرالله ضحكت على نفسي انه شداحجي شبيه تخبلت دحك عليه وكال :
- مسودنه انتي بويه لو شنيي
ضحكت وكتلو
- لاا ابد شبيه
ابتسم ودحك عليه شرد بوجهي وانه هم رفع نظره لشعري وغمض عيونو بقوه فتح ونظرو صار على ركبتي عكد حاجبه وضغط على ايدي بقوه تأذيت جثيرر حاولت اتملص منو بس گال وهو صاك سنونو
- شني هذي الاثار اللي بركبتج
كضبت ركبتي عرفت الاثـار الدحكهن مالت الجكايرر اللي اذني بيهن محمد كتلو
- ماكـو شي مجرد اثار قديمات
خزرني ودفعني منو وكام طلع عدلت شالي وطلعت ورا وصل للدرج دينزل ودحك شَمم كاعده على اول بايه وكاضبه راسهه دنك عليه وحجه وياها بنبرة خووف
- هاا خويه شبيج
- اليااس ليش جنت معصب ماما نوال كالت تعاركت انت وبابا حسين
- ماكو شي عادي سوء تفاهم ببينه وهسه احله بس انتي شبيج
- مابيه شي بس ردت انزل ودخت لان من الصبح ما ماكله لا انه ولا ناز ولا امي من انتو ماجيتو ما كلينه وانه هسه دخت من ردت انزل شفت الدراج ودخت فـ كعدت
- من انتي دايخه بعد لا تتحركين حته لا توكعين وتتأذين ولا توصلين للدرج
- الياس مابيه شي
- سكتيي واذا انه ما موجود شعليج بيه حتلوو انه ميت هم تكعدين وتاكلين مو تمرضين نفسج انه ماريدج تتأذين شَمم وانتي بسرعه توكعين ياخويه
- ابوسك لو متقبل
ضحك هو وهي باسته وكالت
- مابيه حيل انزل جوعانه
كعد يمهه وشالهه
- كضي بعد اخوج كضي
شهكت وكالتله
- اليااس لا اوكع
- افاااا عليج انه شايلج وتوكعين ما مقبوله منج هالحجايه
نزلهه نزلت وراهم دحكت عليهه ضحكت وكالت
- ييويلييي نيالج على اليااس يلا خل يشيلج انتي هم
ابتسمت وهو دحكلي بغضب وخزر مدري ليش فجأه نكلب رحت حظرتلها اكل وجبتو يمهه كعدت تاكل وتحجي وياي لحد ما كملت خذيتهن غسلتهن وبديت احظر بلعشا كملته وخليته رجعت يمهم كعدت وخاله هم جت وراي كعدت دحكت على الياس وكالتلو
- يمه الياس ابوك من يحجي علمودك يمه لا تضوج وتاخذ على خاطرك منو هو يخاف عليك
- لا يمه يهون بس انه ما تحمل يمر طاريهم وما تحمل اشوفهم بالعباس كارههم
- حقك وليدي حقك الله يريحك ويبرد كلبك
شوي ودخل عمو بس ويا زلمه ثاني شاب شايب ما دحكتو بس لمحتو انه كبل طفرت منهم للمطبخ خفت لا الياس يكب عليه هو بلا شي يدورلي الزله
كعدت شويه واجتني شَمم وجهه مصوفر دحكت لأديهه ترجف كمت عليهه كبل وكعت وظلت تبجي وجسمهه كلو يختض من الرجفه خفت عليهه جثير حاجيتهه ماردت بس تبجي يالله شصاير وياهه هبطتني..
يتبع في البارت القادم ..
تحياتي الكم ام اسـد .