عند اصيل ...
جالس فالصالون والتلفازة مشعولة حداه وهو عقلو غاااايب .... عينيه فيها ودماغو مسافر
سلمى كاتحط العشا فوق الطبلة وكل مرة تتطل عليه كتسائل : مالو ؟ واش تكون قسم هي سبب ؟ .... حيت من قبيلة كتسناه يدخل تعرف شي خبار وواش قسم قدات تقنعو .... ولكن من هاد تغوبيشة لي داخل بها قطعات الامل بمرة ..
اما اصيل غير تنهيدة وراء الاخرى و عينيه فالمجهول ما واضحة تاحاجة عليه من برا ، ولكن من داخل راه كايبني ويريب ويهرس ويصلح ... تاسمع سلمى
سلمى : خوويا .... زيييد ، العشا غايبرد ...
فيقاتو من سهتو وشاف لطبلة بانليه طاجين دجاج بصلة و زييب وشلايض ... عض على شفتو كايشوف لداكشي ... فيناهي الشهية ! ... مقادرش حتى ياكل ... خلا طبلة هاكاك وناض طلع وهي بقات غير كاتشوف متبعاه ...
سلمى : اويلي مال هدا !
رجعات كاتشوف لداك طابلة ... وقطعات الخبر تاكل .. حطات دغمة ففمها وبقات كتمضغها كيف التراب بسبب الجو المكهرب لي خلق ليها فالدار والطاقة السليبة لي عطاها.... وهي تلوح الخبز وسدات طاجين ورداتو لكوزينة بالزعفة ..
سلمى : تفووو على حيااااة تفوو ..... ( رجعات تكات على الكونطوار كتفكر ) واش نعيط لسيدة نشوف شنو واقع !!!!؟ و الا كان الموضوع مكيخصهاش ؟؟ ويكون معصب على شي حاجة اخرى !!! ف5 غانحماق بالفضول ... اويلي لا حشوما نعيط ليها فهاد الوقت اصلا عذبتها معاياا كتر من لقياس .. لا لاااا منضسرش عليها بزاف
تقلبات كتغسل المواعن لي كانو تما ...
واصيل طلع لبيتو هز كارو وخرج للسطح واقف علا راسور كايشوف فالاضواء ديال الدار البيضاء وكايكمي ويخرج همو دخان .... هضرة دوك العيلات فالجمعية ماابغاااااتش تخرج من بالو بمرة .. يلاه كايبغي ينساها ، كاتجي هضرتو لي قال لقسم فالباب ... وملامحها كيفاش كانو كايبنو والخيبة لي كانت فنظراتها وهو كايغوت عليها .... عيا يسوط عيا يحك فراسو والا هادشي بغا يبعد منو ... كارو مور كارو غايييتسطى ..... هضرة العيالات لي فالجمعية بحالا وراتو الطريق لي غادي فيها فين كاي
توصل... عمرو فكر فالمستقبل ديما،
كايفكر غير فالنهار بنهارو .... هاهو كايحميها او غدا ؟ ويلا مكانش معاها ؟ ....
رجع تتنهد شاد على راسو كايكمي تاسمع شي رجلين طالعين .... وقربات عندو جامعة شجاعتها
سلمى : خووويا .. ياك لاباس كاعما تعشيتي ..... واش كاين شي مشككككل ؟؟؟
اصيل حدو ضور ليها راسو بلا وتاهي بقات غير واقفة حداه كاتشوف من سطح حتى سمعاتو نطق
اصيل : سلمى ..
سلمى : نعام اخويا
اصيل : الى شي نهار ...مابقيتش معاك انا .. باش غاتسلكي راسك
سلمى : هاااء !!! أعوذ بالله من الشيطان الرجيم اش هاااد السؤال لله يححححفظك ....علاش مغتبقاش معايا ؟؟؟
اصيل : دنيا مكنعرفوش اش كتجيب ، لنفترض مبقيتش انا معاك ..... اش غاديري
سلمى : ك كيفاش اش غندير .... انا راه عندي غير نتا .. ر راه لاخطيتني غانحماق
اصيل : علاش !
سلمى : كيغاندير فهاد الحياة بوحدي ونتا عارفني خرجت الدرب مرة وحدة هي فاش طلعتيني للشمال .... مكنعرف تاااحد منغير صاحبتي حسنى ... ماعندي باش نسلك راسي
اصيل : عندك دارك ، عندك فلوسك .... علاش ماعندك باش تسلكي راسك !
سلمى : شحال كاع عندي فالبنكة ... داك سبعين ؟ شحال غاتبقى ليا شحال غادوم كاع ..مالها مغتتساليش .. زايدون ماشي غير فلوس ... انا منقدرش نعيش بلا بيك .... ماتعاودش تقول هاد الكلام
اصيل : كون كنتي خدامة مثثلا .... وانا مكاينش ... شنو كان غايفرق
سلمى : ك كان غايفرق فقط انه مغاديش ندل راسي عند شي حد وغانصرف على راسي وعلى الاقل منتخصش من ناحية المصروف .. و ولكن واخا هاكاك منقدرش نعيش ونتاا مكاينش ..... مغانقدرش نعييش بوووحدي ... عندي غير نتا فهاد دنيا .. تخطاني نتا مكنعرف نقطع تا شاريع بوحدي ... ماعندي تااحجة مسخنة كتافي راه غايضربني الخلا ....
اصيل تننهد مطول وسلمى عاد سرا معاها الموضوع وبدات تفهم فين غادي بهضرتو ... عاد فهمات ان قسم واقلة لي دخلات ليه هادشي للراس ورجعات عاد حلات عينيها و بدات كتهضر
سلمى : ااه .. ص صاارحة .... صراحة صعيب تواجه الحياة بلا تاحد فنفس الوقت بلا حتى ديبلوم .. بلا تاخدمة بلا تا إنجاز حققتي فحياتك ... شحال غاتدوم ليا الفلوس ... داك فلوس لاتزوجت شي واحد من غدا غايمشي يهرف ليا عليها ويخليني ..
اصيل : واكلة التبن نتي كاااع لهاااد الدرررجة متعرفيش تسكلي راسك ... اش هي الخدمة كاع
سلمى : الخدمة هي كولشي كون مكنتيش خدام باش كنا غانسلكو راسنا دابا ؟ ها ؟ ... شكون غايصرف علينا ؟ عماماتنا ولا خواالنا لي عمرهوم باركو لينا تاللعيد ؟ شكون غايععععقل علينا .... كون مكنتيش خدام انا ملي نمرض فين غالقا تا دوا لي نشرييو ... الخدمة هي كولشي اخويا .... مكتخليش الواحد غشيم ... كتخليه كاپابل ومايقدر تاحد يديرها به حيت كايتلاقى ناس و كياخد تجارب ماشي بحالي انا غير الدار و الكوزينة وزيدها تخطاني نتا ؟ راااه الموووت بعيينييها ....
اصيل بقى غير ساكت وكايشوف لسما فنقطة بعيييييييدة حتى لواحد اللحظة هضر بحسرة وانكسار ...
اصيل : الوالييد الله يرحمو ... كان باغيك تقراي
سلمى طلعات فيه عينيها كترمش ، اول مرة تسمع منو هاد الهضرة واول مرة يهضر على واحد فوالديهم ...
سلمى : ب .. بابا الله يرحمو ( سرطات ريقها وقالتها بشبه ضحكة انها اول مرة تعرف شي حاجة على باباها ) ك كان ... كان باغيني نقرا ؟؟؟؟
اصيل : ( شاف لعندها ) شكون مايبغيش ولادو يقراو ....
سلمى : ون . نتا علاش .. ما( قاطعها )
اصيل : حيت كان كايوصيني نرد ليك لبال كتر مكايوصني على قرايتك .... امينتو تبقاي حداه ماطاري ليك والو كانت اهم من امنيتو تقراي .....
سلمى : و ولكن .. اش فيها لاحققنا ليه امانيه بجوج ؟؟
اصيل تنهد ورجع كايشوف لسما ساكت وهي كاتنسى جواب ....
اصيل : علاش الطب بالضبط ...
سلمى : ( بضحكة بلهاء وهي كتذكر) اول سؤال تطرح عليا فالابتدائية شنو بغيت نولي فاش نكبر ، توترت حدا المعلمة وماعرفت مانقول ... وانا نقول بغيت نكون طبيبة .... من داك الوقت وانا باغا نكون طبيبة ..
اصيل : ( ضار لعندها ) قاد نقريك من جيبي ... هضري مع داك البنت وقولي ليها حنا مامحتاجينهاش ... لا هي لا المنحة ديالها ... والكلية الواعرة .. نقريك فيها بجيبي ..... ومنعاودش نشوفك معاها ولا نشوفها هنا مزال ...
خلاها ودخل وسلمى واقفة فبلاصتها مصدومة حالة فمها مامتيقااااش شنو سمعات ... كضور ببطئ تتبع اثرو وباقين ملامحها مصدومين ... واش غي كاتخيااال !!!! واش قال غايقريهاا؟؟؟ فلحظة ماقداراتش تمالك نفسها وغوتااات بججججهد تابعاه كتجري بالفرحة
سلمى : اصييييييييل ....
عند العائلة
كالسين كلهم مجموووعين من غير قدس لي واضح شي حاجة مبرزطاها كل مرة تطرطق فصبعانها ومحتاحة لتيليفون فيديها بحال شي مخدر مدمنة عليه ... وقسم فبلاصتها غير ساهية وشااااردة ماعندهاش الخاطر وهضرة اصيل الجارحة كل مرة تتعاود فمسامعها .. كتعيا ماتطرد الصوت وكايرجع تاني ....
اما آية شادة تيليفون وعينيها كايلمعو تاهي كاتطلع وتهبط فالانستكرام د وسيم وتشوف سطورياتو وتعاود تصاورو للمرة الالف .. والإبتسامات لي كايترسمو عليها مخلطين بالحسرة تجاه ولد عمها لي عمرو غايشوف لعندها بسبب إعاقتها .. اما سلطان جاتو الجلسة ناقصة بلا جود وبلا لوؤي غير جالس وكايضور تيل فيديه بملل ....
و لامار كل مرة تنغز لحياة تتشجع تهضر و ان هادي هي الفرصة وهي مترردة ومخلوعة ...وكتهضر مع لامار بالحس
حياة : خلي تالدار ونهضر معاه
لامار : ماتبقايش تأجلي عارفاك مغاتهضريش ... واش حماقيتي ولا مالك .. الحمالة دسلطان واية طرتي بالفرحة باش تقوليها ليه وهادا ساكتة بحالا حملك فالحرام
حياة : ماشي هاكاك ... قلت زعما يقول كبرنا ... زعما مكنفكروش فالولاد دابا ، دابا كنفكروا نزوجو ولادنا ماشي نولدوهم
لامار : ودابا سيري قوووليها ليه وشوفي كيف غايدير الى فررح هاذا مابغيينا .. الى شتيه بحالا تقلق ومابغاش قوليليه غانعطيه لختي ... واصلا الاختيار الثاني غير نسااااايه ...
حياة : ففففف.. ماعرفاش علاش مخلوعة هاكا
لامار : حيت حمقة .. يلاااه سيري جريه دغياااا
.
حياة : لا لااا .... غير خليني ... صافي تالدار
لامار عيات تشوف وهي تجرها من يديها وناضو وقفو .. ورجال متبعينهم بعينيهم وهي جراتها لبعيييد ووقفات بيها
حياة : اويلي ماااالكي ...
بامار : ( بصوت مرتفع كاتشوف فيها ) سفيااااااان ...
حياة : لاااااامار .. حمااقيتي كايشوفو فينا اويلي على شوووووهة اويلي
سفيان ناض لعندهم مافاهمش وعدنان واسد كايشوفو
سفيان : اش واقع مالكم
لامار : غير الخييير... مراتك بغات تقوليك شي حاجة ....
ضحكات ليه وشافت عند حياة لي كتحلف فيها غمزاتها ومشات وسفيان شاف لعند حياة
سفيان : اش كاين ؟ ياك لاباس
حياة : (كتغزز فشفايفها .. وكتشوف لعندهم واش باقين كايشوفو لعندها لقاتهوم ضورو راسهم وشافت فسفيان ) اااء . غ غير لامار ... فففف
سفيان : هضري خلعتيني .. واقعة شي حاجة ؟؟؟؟ ... واا فكينا
حياة : س س.. سفيان . د دابا ... انا صباح مشيت لطبيب
سفيان : (قاد وقفتو ) اهاه ؟ علاااش كضرك شي حاجة ؟؟؟؟؟؟
حياة : اه . آه . بغيت نقول لااا
سفيان : حياااة متجهليش ديلمي دابا تهضري طلقييينا شواقع بلا ما( قاطعاتو )
حياة : انا حااااااملة ( قالتها مغمضة على عينيها بحال شي قنبولة غاتنفاجر )
سفيان بقى واقف بنفس وضعيتو كايرمش فيها ويعاود .. ورجع قاد وقفتو وملامحو وحك تحت لحيتو وشاف فيها
سفيان : نعام !!!!
حياة : ح .. حاااملة ...
سفيان : كي ( جاتو الضحكة ) كيفاش حاملة
حياة : سفيان منيتك ؟؟؟
سفيان : ياك كنتي كتاخدي لي پيليل ... داكشي علاش كنسول كيفاش ...
حياة : حتى انا ماعرفتش ... مدرتش بحسابو كاع
سفيان : ( تبسم بغرابة ) واااايلي .... خبار جديد هذا ...... فوقاش عرفتيها
حياة : صباح مشيت طبيب
سفيان : طبيب كاااع .. بلا بيا ؟
حياة : كنت باغا حتى نتأكد ... ( قادات وقفتها ) شوووف ... حتى لاا مكنتيش باغيه ولا ( قاطعها )
سفيان : واش نتي مريضة فكرك ولا مالك... كاين شي واحد مكيبغيش ولادو ؟ استغربت حيت مدايرينش بحسابو كنشوفك كتاخدي الپيليل ... وماباين عليك والو حتى صرفقتيني دابا ....
حياة : وراه تانا تصرفقت .... تعطلو عليا ليغيكل ملي درت طيست طلع بوزيتيف
سفيان : ومافهمتكش علاش ساااكتة .... قلتيها لامار !
حياة : اااه فخبارها هي ورتاج ... و .. واش زعما .. نقدرو على التربية ؟ زعما .. ( قاطعها )
سفيان : وعلاش لي منقدوش ؟ بنتليك كنتمشى على العكاز ولا .... ولدي هدا ومزال أبنتي تولدي واحد اخر غاهني مخك .... ( جاتو ضحكة ) والله تاافشكل ههه .. قلتيها لدراري ؟
حياة : لا ... قلت تانقولها ليك
سفيان : سلطان غايططنز بالمعقول ... ( شاف لكرشها ) مرحباا بيييك اولدي .... داير لينا سوربرايييز ولا كييييفاش ... ( شاف فيها ) شحال عندك !!!
حياة : باقي يلاه خمسة دسيمانات
سفيان : ( جبدها لعندو معنقها ) أجي عندي اجي .... والله تاخبااار زوييين ... مكنتش داير بحسابو ...
حياة : ( طلعات راسها ) كان يحسابتني مغايعجبكش لحال
سفيان : علااااش !!!
حياة : حيت ولادنا كبرو ... و ...فف ماعرفتش كيف ندير نشرح ليك
سفيان : يياك انا وياك نهار تزوجنا خططنا باش نديررو إسباس بين هدا وهدا .... وكل واحد ياخد حقو فالتربية ،بالعكس كنشوفو جا فوقتو المناسب .... عمرك تفكري بهاد الطريقة ، هدا ولدك وخصك تفرحي بيه وتسنايه كيف تسنيتي سلطان و آية ... ( بضحكة ) نشوفو تاني هاد الخنييفيييش كيف غايخرج تاهو ....
حياة : ( ابتسمات ) فرحت حيت عجبك الحال ...
سفيان : ها باش قتليك مرييييضة فراسك ... واش انا نكره تولدي ليا تا عشرة ! ( دوز صبعو على حنكها ) راك مكتبريش فعينيا يا هاد المخلوقة ... مزال كنشوفك عمو الصغيورة ديالي .... مدخليش هاد اافكار لراسك ( باس راسها ) ... زيدي يلاه نمشيو غايحسابتهم غير اش واقع ..
شدها من يديها و لامار كانت كتهضر مع رتاج عاودات ليها غير شافتهم جاين ضاحكين عرفات الامور مشات مزيااان وهوما يضضحكو ليهم و جلسو ...
لامار كتتشوف فيهم وتشوف فحياة بمعنى ها لي قتليك وكتشوف عند اسد ضااااحكة
لامار : اساااااد
حياة : ( تحت سنانها ) لااااامار
كتومي ليها بمعنى تهضري غاندبحك وسفيان ضاحك عليهم ...
اسد : ممم !!!
لامار : نگووووول ...
حياة : ( تحت سنانها ) لاماررر الدراري ...
لامار : ( ضارت موراها ) ااااه نسيييييتهم .. اجي اولدي اجي ... جر ختك واجي ...
سفيان : اودي مايقد عليك غير لي خلقك ....
عدنان : اش واقع ؟؟؟؟
رتاج : خسارة مكنعرفش نززززغرت .... هاد الخبار خصو الحاجة تكون هنا ....
اسد وعدنان غير كالسين باستغراب و سلطان جر كرسي دآية وقربو لعندهم وتاقدس علات راسها تشوف شنو الموضوع وحياة شادة على راسسسها ....
لامار : آلوووووغ ..... ( شافت عند سلطان واية ) واش مستعدين تقسمو محبتكم مع واحد خييينا آخوور
اسد غير شاد كاسو دالقهوة مستغرب و عدنان دغيا طيرها وشاف عند حياة هي لي ولات كي مطيييييشة بالحشمة
سلطان : نعاام !!
آية : كيفاش آمرات عمو ؟ هههه مافهمتش
لامار : ( شافت فالعائلة ) جااااينا بيبي جديييييد فطرييييق
اسد بزززق دالقهوة كااااملة من فمو وعلا فيها عينيه بصصصصدمة وسفيان كايضرب ليه على ضضهرو
سفيان : ابببسم الله .. ماشي نتااا ابنادم مااااشي نتاااا ... اناا لي جاايني فالطريق ماشي نتاااا غير بشوية عليك ...
اسد : ( شاف فيه و رجع شاف فيها كيتأكد) ياااك ماشي نتي ؟؟؟؟؟؟
لامار : اويييلي وحدي ... وهانا اسيدي كاااع مالها شنو فيها
اسد : انا نگولهاليييك من دابا ... شتي غير نتي تزيدي ... انا نزييييد ....
لامار : فين غاتزيد !
اسد : مع الطرييق ...
سلطان : اصصبرو دابا صبرو .... دابا هدا ولد من
رتاج : ولد الجيران .. اويلي على ولد من ... ولللد بااااك
سلطان : ( شاف عند سفيان ) ومعااامن ؟؟؟؟
حياة : سسلطاااااان ... ( جاتها البكية ) أويييلي
اية : ممم .. م .. ممماافهمتش ... شكون ليي حااامل ؟ ...
لامار : ياااربي على كلاخ نزل عليهوم هاد نهار ابنتي ماماك .. لي حاااملة
اية : وعلاااش ؟
لامار : وايااالاااااه ...
رتاج : واشنو مافرحاناش حيت جاياك فطريق ختك ولا خوك
اؤة : اييه يعني صاافي دابا حملاااااات ..
لامار : ( شدات على راسها ) لااا حول ولا قوة الا بالله ....
سلطان : دابا كيدرتو ليها .... ( حمر فيه سفيان هو يفهم راسو ) آلاااا ياااااه . . زعما كيدرتو ليها راني عارفها .. لي ماعارفش هي كيييفاش غاتاجيييتووو سلاااام مك حاملة .... ماكانش فخبارنا كتخططو لشي حححمل .... دابا من لخر الله يجعل كولشي مبارك ومسعود اسيدي واخا ماشاورتوناش ماشي مشكيل .... بنت ولد ولد بعدا
لامار : طوووبة ... تشاورك علاش غاتشاااورك ؟ نتا غاتشاوررها نهار تبغي تولد
سلطان : ( طانز عليهم ) على انا لي غانولد ...
لامار : نوووض تكععد عليا ... بنادم كايقول مبروك كايييفرح . هادو قالك كيفاش وعلاش .... بحالا مقراوكمش كثافة النسل شنو هي ...
سلطان : لا قراوها لينا امرات عمي .. غا هو النسل ديالنا ديجا البولة الحمرة ديال السطوكاج ديالو شعلاااات ماعندو فين يتأنسطالا شي برهوش اخر عاد .. خصنا تانمسحو شي حد عاد يدخل هو ...
لامار : ونبداو بيك نتا نيت .. منين كاديزانسطالا هدا ...
سلطان : لقاي ليه الفيروس ديالو مايضورش قدامك .....
لامار : واش مك يلاه غاتولد نتا باغي تجيب ليها لعروسة !
سلطان :مالها اش فيها تربيهم بجوج ....
اية وسط داك الطنز كااامل عاد هي نزلات عليها الهيييستيرييية ديال الضحك جاها الامر غريب غيولي عندها خوها صغيير
اية : هههههههه دباا غاتولي ماما عندها فنكوشة صغييرة ولا فنييييكيش يفيقنا بالصداع فالداااار يييغوت نشريو ليه لي جوي ههههههه وتكبر ليها كريييشة ههههه وااااو آيلااايكيييت ....
قدس قربات لوذن ماماها كانت جالسة وراها
قدس : ماما ... واش خالتو حياة حاملة ؟؟؟؟؟؟
لامار : ( ضارت عندها ) نشرح ليييك حتى نتي بالخشيييبات .. اويلي شنو جاكوم غريب فالامر ( ضارت عندهم ) مرا حاااملة ... نووووغمال مالكم على هاد الاستغراب كامل
عدنان : ممبرووك عليكم .... ان شاء الله يكون ذرية صالحة
اسد : اااه ... راه مناقصينش حنا المعكسين ...( ضربو عدنان ) مبروك مبرووك ...
قسم كانت فالدار لداخل عاد جاية بانو ليها مجموعين ضاحكين وجات متسائلة بملامحها
قسم : مااالكم !!!
اية : جاااي خوووويا فطريق
قسم : ( شافت عند سلطان ) وهداك شكووون ؟؟؟؟
اية : الااااا ماشي هدا واحد خويااا اخر جاي
قسم : ( شافت عند سفيان ) اويييييييلي ..... فوقاش غاايجي ؟
لامار : عندو الطيارة مع الستة ... لؤي شوا ليكم الكلاخ فهاد البارببيكيو يمكن ....نتي مولات العقل زعما
قسم : ( جلسات ) كيييفاااش ؟؟؟؟؟
رتاج : حيااااة جايها بيبي فطريق ... سيطاديغ حياة اونسانت
قسم : ( ضارت عندها ) حححححلفي ... يااااااااي .. ( عنقاتها) ألللللف مبرووك وااو على خباااااار .. مرحبا بالإسمااعيلي الصغييييور
لامار : ( شافت عند سلطان وقدس واية ) تعلمو الصوااااب تعلموووو
قسم : ( علات فيها راسها ) ولكن كيييفاااش !!! سوبرايز زوينة زعما كيدرتو ليها ...
سلطان : ( شاف عند لامار ) تلگاااي
سلطان رغم الطنز ديالو الى ان فنظراتو واضحة فرحة غريييبة ماعارفش يبينها وسفيان حتى هو ... تبدل ليهم الجو ديال الجلسة .. واستملحوه بالضحك والحديث حتى حاولو يقلبو الموضوع ملي شافو حرجو حياة لي عاد ارتاحت ملي شافت كولشي فرحان وتاحد ما اكترررث ان ولادهم كبار .. بالعكس هي وسط محيط مكيهتمش بهاد التفاصيل ولي ريحها كتر ان سفيان وولادها فرحو فنفس الوقت مزيرة كيفاش غاتقول هاد الخبار لختها و فرحتها ديماااا ناااقصة كتخاف تجرحها واخا ماشي بيديها هااادشي لان نفسية شيماء تجاه هاد الموضوع ولات حساسة بزااف واي حاجة كتبكيها .... ورجعات نفضات هاد الأفكار من راسها وكملو الحديث ...
بداو الخادمات كايحطو العشا وعدنان كل مرة يشوف للساعة والباب كايبان ليه لؤي باقي ماجاش ... تابانت ليه رتاج بعيد كاتصوني ومقلقة عرف راه كتصوني عليه ومابغى يبين والو حداهم ....
بداو كاينزلو العشاء فالسفرة لي فجردة واسد كل مرة يطلع عينو فقسم كتبان ليه شحال مكتئبة وطااااالع ليها الخز للراس ....
ناضو كلهم لطابلة وكل واحد شد الكرسي ديالو والخادمات كايخويو ليهم لاسوپ قدامهم ... العيالات عاطينها لضحك فرحانين بحياة ..والرجال فمواضيعهم لي ملاهين بها الوقت اما كل واحد عقلو فين غايب مع ولادو ... وقدس كتاكل و عينيها على الباب كتسائل فين غايكون مشا ؟ حداش دليل هادي علاش ماجاش ..... فلخر كتنفض راسها وتشوف قدامها تاكل وتصطنع انها مامسوقاش .... وسلطان ديريكت حط صورة ماماه فاانستگرام كايعبر على فرحتو بالبيبي الجديد لي جاي فطريق ولاايكات انهالو عليه والمباراكات
اما قسم غير كضور بملعقتها بشهية مسدوووووودة حتى كولشي رد ليها لباال .. كل مرة يسولها واحد مالكي وهي كتجاوب غير بابتسامة صفرة ....
كتحاول تاكل بزز باش متلفتش الأنظار بزااااف حتى كتسمع صوت الڤيپ فجيبها وحطات الملعقة مسحات فمها بمنديل وهزات تيل لقات ميساج من سلمى .. تنهدات حيت تخيلات محتوى الميساج كيغايكون حيت ماقداتش توفي بوعدها ... وحلاتو وهي توسع عينيها مع كل كلمة كتقراها كتزييييد تحلهم ... الميساج كان كلو عبارة على شكر على مجهوداتها لي قدرات تقنعو يخليها تقرا وانه وااافق على قرايتها وقريب غايبدا فوثائق تسجيييلها و هي تغووت بجججججهد تاقلبااات ليهوم طبلة كلللهم تخلعووو
قسم : اوووووماايكااااااااااد ....
لامار : اش واااااقع
رتاج : بااااسم الله علييك ابنتي .. ياااك لاااباس
سفيان : قسوووم !!!!
قسم : وااااو مااااامتيقااااااش .... ( طارت من الكرسي مشات عنقات باباها لي حال عينو ماافهم والو ) وااااافق ابابااااا وااااافق .. وااااافق يخليييييها تقرااااا ماااامتيقاااااش غااااانطير بالفررررحة
اسد : ( كايبعدها عليه بشوية و هو كيرمش فييييهااا ) شششششش .. بشوووية عليك ( عطاها الما ) شششربي ....
قسم : ( كتتتشررب وغاطير بالفرحة كتضحك تقلب ليها المورال فثاانية ) كنت عاارفاها كنت عارفة داك الهضرة مغاااادوزش عليه بالساااااهل
عدنان : شكون هدا ... فهمونا أش واقع
قسم : اااحم ... ( قادات وقفتها عاد ردات لبااال لراسها الى غوتات فالوسط بدون شعور منها بسبب لفرحة ) اا غير ... فرررحانة بزاف و ماارديييتش لبال ..... فففف سمحوووليا خللعتكم .. ( رجعات للكرسي ديالها) كككملو كملو ماكلتكم مديوش عليا
سفيان : وا فرحينا معاك
قسم : لا دابا غير واحد البنيتة كانت طلبات منحة دراسية ... وخوها كان رافض وانا تكلفت نقنعو يخليها تقرا و من بعد بزاف دالمحاولات وافق
عدنان : هادشي وكااان ؟؟؟
قسم : ااه .. موهيم يقدر يجيكم الأمر عادي ولكن انا كيعني ليا بزااااف
اسد غير كايشوف فيها وسلطان كايضور راسو ولامار حالة فمها فيها كيفاش تبدلات البنت تسعين درجة ....
قسم : كملو كملو ماكلتكم ماديوش عليا هههه .... ( بدات تاكل ) مممم بنينة هاد لاسوووووپ ..... ( شافت عند الخادمات ) كولو للشاف الله يعطييييك الصحة ....
قدس : دابا عاد بانت ليك لاسوب تاقربنا نساليوها
قسم : عاد تبننتها ههه
كتاككل ضاااحكة مكرهاتش تنققز من فوق الكرسي واسد حس بالخنقة تقلب ليه الجو كامل كيدير جهدو كولو مايبانش عليه التوتر قدام خوتو والعائلة يكمل هاد العشا دون ماينفجرر .... ولامار غير مستغغررربة وسلطان دغيا طير الامر مغايدوزش عليه هاد الاعجاب لي باين للعمى...
حتى ساالاااو عشاااهم وناضو يستأذنوو يمشيييو ..... ودعوهم وكل واحد ركب فطموبيلتو ... وشدو طريق ... غير هوما خرجو وعدنان شاف عند رتاج
عدنان : مكيجاااوبش ياك
رتاج : طافيه ... مافهمتش أش واقع؟ واش تناقشتو ؟
عدنان : هنا باش تعرفي بلي العُقد لي عند ولدك ماشي ديما سبابها انا ..... كاتقولي ليا نتا لي كتتتعصبو حتى كايمشي ... هانا دابا مابيني وبينو والو .. يلاه فين مشا هم ؟؟؟
رتاج : صااافي أعدنان متكملش عليا ...( كترد شعرها لور بتوتر) ففففف .... مااافهمتش علاش تيدير هاكا والله مافهمت اش فيها لاقال مع راسو عندي والدين تيتخلعو عليا .. غير يععععلمني فييين ماااشي كاع لايجيييش ...
عدنان : نهار كامل وهو صافا ضاحك ناشط ... تبدل ليه المود فدقيقة وحدة ... اش واقع الله واعلم والكااارثة لي مرضااااني انا فراسي أنو ولدي معاااارف عليه والو.. ولدي انا لي قريتو وكبرتوو ...منعرفش اش كيدير .....
لتخ لفيست ديالو ودخل ورتاج شافت عندو و عند ولادها وتنهدات
رتاج : دخلو اولادي دخلو.... دخلو خودو دوش ونعسو داباااا يجي ..
فيصل : نحاول اماما نعيط ليه انا !
رتاج : صافي غيييير خليوه ... دابا يرجع ونفهمو اش واقع ...
دخلاتهم للدار ....
اما فسيارة اسد قدس غير زادت بيها الطموبيل غفاااات .. هاد نهار دوزاتو غير نعاس .. اما قسم كتهز بالفرحة الإبتسامة مابغاتش تحيد على فمهااا واسد مراقبها من المراية ومرة مرة كيشوف للشاشة لي قداموو فيها gps دجود .. بان ليه من قبيلة باقي واقف فنفس النقطة وواضح تما غايبات .. وضار شاف فلامار لي كتشوف من الزاج ... ديما منظرها الهااادئ وخصلات شعرها لي كايطيرهم الريح لي داخل كايقضضيو عليه ويجيبو ليه تمامو.. وهز يدها عندو باسها تاشافت فيه مبتسمة وخلاها فيديه ..... وعينيه كل مرة تطلع تشوف فقسم بعد ماكان راد لبال غير لوحدة ولا راد لبال لخمسة ...
اما سفيان طريق كلها شاد فحياة هو وسلطان واية كدافع عليها وفرحااانة بالبيبي ......
وصلو لديورهم سفيان و حياة طلعو ديريكت لبيتهم مخليين اية هاد المرة لسلطان مكلف بها دخلها لبيتها كلسها على سرير كايحيد ليها فالكونفيرس تادخلات المساعدة ديالهم
مريم : بونسواغ موسيو سلطان مادموزيل آية .... محتاحين شي حاجة قبل منعس
اية: لا اخالتي غير نعسي تاحنا غانعسو
سلطان : ( بابتسامة) شكرا غير تصبحي على خير ..
مشات وسلطان شاف عند اية
سلطان : هدا غير مزال ماتزاد...وسمحو فيك ابنتي ... ملي يتزاد منعرفت اش ... ( كيحيد ليها تقاشر ) اوودي راه مايدوم ليك غييييير خووووك ...انا نبدلك ب ببيبي انا ؟؟؟؟
اية : ( عنقاااتو ) اللله يخلبيييييك ليااااا ( شافت فيه ) زعما نتا مافرحااانش ..
سلطان : ( خربق ليها فشعرها ) لاكانت شي فنكوشة بحالك علاش لي منفرحش ...
باسها فراسها وداز لبلاكار كايوريها تختار بيجامات لي تلبس جبد ليها كاع اش تحتاج وحطهم ليها على السرير وخرج البالكون مخليها تلبس على خاطرها ... لبسات عاد عيطات عليه .... مشط ليها شعرها الحريري لور وقادها فبلاصتها ....
سلطان : ( باسها ) كود نايت ماي برانسيس ....
طفا عليها الضو وخرج ..
وسيارة اسد يلاه وصلات للمنطقتو حلو ليه الابواب وباركا فبلاصتو .. نزلات لامار كتكسل وتفوه اما قسم كلها نشاط وحيوية طلعات بزربة للدار ... و أسد حل الباب لور على قدس هزها عندو فيديه وشد الباب برجليه مدخلها ناعسة عندو ولامار تابعاه ... حطها فبيتها يلاه بغا يتلفت لبيت قسم فلخر تنهد .. اش غايقول ليها كاع !! ...
الهضرة ماشي معاها .. خاص يعرف هاد السيد شكون واش يطمن من جيهتو ولا لا .. وتبع لامار لجناحهم ...
اما هي كدوش وتغني تحت الرشاش وترقص فررررحانة ... خرجات بفوطة على نصها و شعرها فاززك كاضور فالبيت و تشطح بيديها ممتيقاش الى نجحااات و أثرات عليه .. حسات براسها دارت انجااز كبيييير انها قنعات واحد بحااااالو ينحرف على قرارو لي كان مفيييكسيه فرااااسو ... والاهم فهادشي كاااامل هو انه مدامو وافق وسمع لهضرتها اذن كاتعني ليييه ....تلاحت على سرير ناعسة على ظهرها وطالقة يديها كاتشوف فالسقف ضااااحكة فلحظة نسات كولشي ونسات اي حاجة قالها ليها قبيلة .. فكرة انه وافق كانت اكبر من كولشي ... سهات وهي كتخيلووو كيفاش كان كايشوف فدوك العيالات فالجمعية فاش كانو كيهضرو كيفاش كانو عينيه متأثريييين معاهم .. دوك العينين تخيلاتهوم بكل تفاااصيلهم .. تلون قدام عينيها داك اللون الاززززرق الجميييييل ... لي فداك اللحظة كان كايشبه للزرقة ديال البحر الصاااااافي منعكسة عليه زرقة السمااااء لي بداااات كتظلااام شوية ... وسعات عينيها فاش تخيلات درجة داك اللون فدماغها وهي تنووض بزززززربة لاطولي ديال الررسم وجبدات لباليط لي كتخلط فيها الالوان وبدات تجبد فصبايغ وتحاول توصل لداك الدرجة دلاالون لي تخيلاتوم فدماغها حتى لقات راسها حصلات عليها وهي تببببتسسسسم عاضة على شفتها وحطات داكشي ومشات ل داك اللوحة لي كان ناقصها تفصيييييل واحد وتكمل ..وهو لون العينييين .... علات عليها الورقة البيضاء وبانت للوحة لي كان فيها وجه أصيل بالتعبيسة و التخنزييرة دييييالو .. كأنو مصور ماشي مررسوم ... كانت حايرة فقط فلللون العينين .. ربما كان خاصها فقط فررررحة تجاهو ... رغبة تجاااهو باش تتخيلو بصورة اوووضح لدماغها ويبان ليها مزياااان قدام عينيها كيف بان دابا كانو واقف حداها .... بدات كتلون فعينيه بداك اللون لي حصلات عليه ولي كان طبق الاصل للون عينيه .... وهي وعاضة على شفتها كتحاول تلونهوم بعناية .... وتحاول تضيف فيهم لمعااان كيف اللمعان لي فعينيه .... بلا شعور منها رسمات هاد اللوحة وبلا شعور منها خطات هاد الوجه .... مولفة ملي كتحط يديها على ريشة وتمررها فوق الورق كتلغي استخدام عقلها و كتخلي قلبها يحرك يديها ... لي قال ليها قلبها كترسمو .. هو لي كايحرك الريشة فوق القماش الابيض .... حتى تفاجآت فاللوحة انه ترسم وجه اصصيل بكل تفاصيلو .. ثم كملات عليه تاولات لوووحة متااااااكملة .... طبق الاصل ......
جا صباااح جديد ... قسم اول واااحد غاييييفيق ... كانت الخمسة ديال الصباح او بالاحرى ماقداتش تنعس ... بدات كتحسب الدقائق امتى يصبح عليها الحااال وتمشي لعندو
بغات تسمع داك الموافقة وهي واقفة حدااه .... فاقت مع الخمسة دصباح لبسات سيرفيت وخدات قررعة دالما ومشااات كتجري على جنب البببحر حتى قربات السبعة دصباح عاد رجعات للدار .....
خدات دوش و لبسات ملابس رياضية مريييحة ... شعرها مطلوق لواحد الجنب على راحتو مع الكاسكيط ... وهزات داك القماش لي راسمة فيه وجهو ولواتو على شكل اسطوانة طوييلة و شداتو بخيط أحمر .... هزات سوارتها وتيليفونها ونظاظرها وخرجات من الدار للطموبيل .. يلاه كتركب واسد فالبالكون مربع يديه على الحديدة وكايشوف فيها مصغر عينيه فشنو هازة فيديها .... هو يتنهد وخرج من البالكون هز لفيست ديالو وسوارتو .. لامار كانت باااقااا ناعسة ماحساتش بيه وخرج موراها .. غير هي خرجات من البوابة وهو عطا الإشارة للكارد بيديه بمعنى متبعوهاش ... وركب هو فطموبيل وتبعها ......