آسميتها جارية

بارت 23

بارت 23

&
•
•
•

البارحه مگابل حنيني وماعرفته ! شگد كٌبر
اني والشباج نگعد نحچي بيك
ويگعد ويانه مطر
تدري اذكرك وابچي واركض
حتى احط راسي اعلى چتفك بالصور

باهر الجنديل

•
•
•
&
............
( نور )

دخلت المصعد واحس بي اجه ورايه اول ماانسد باب المصعد انحفرت اصابعه بخصري ..

حطيت ايدي على حلگي اصرخ من الالم واني احاول اخلص نفسي من ايده وكلما اتحرك كلما يضغط اكثر ..

قرب شفته يم اذني وگال بصوت يشبه فحيح الافعى :- گلتلچ احترميني وتعاملي ويايه عدل حتى ماائذيچ اشتري سلامتچ بابا وصيري عاقله .

ادفع بيده واني اون من الالم :- الله يخليك كافي كاافي .

وگف المصعد جبره يعوفني رجع سحب ايدي اليمنى بس انتبه الها بيها زراگ گال بتعجب :- هاي شنو شبيها ايدچ !!

رفعت حاجبي بقهر والم :- حقك من گد الاضرار والكدمات اللي بيه بسببك گمت تنسه .

بقه لازمها يتفحصها :- شدعوه جسمچ هالگد حساس شبسرعه صارت زرگه ؟!

عقدت حاجبني :- يعني تخيل ايد صخر لازمه ايد ناعمه شتسوي بيها تطحنها طحن مو بس تصير زرگه .

سحبت ايدي منه وسبقته سمعته يحچي من ورايه ومبين من نبرة صوته مبتسم :- انتي ماتتوبين من العناد .

مااهتميت ووگفت يم السويت انتظره يفتحه فتح الباب وفتت بسرعه للغرفه وقفلت الباب عليه قبل لايفكر يفتحها ..

سندت ظهري ع الباب وگعدت خاله ايدي على حلگي وابچي بحرگه وقهر ..

صعبه من تنهانين وتنذلين وماتگدرين تحچين مو لأن ماعندچ كرامه لا بس خوف ..

خوف من ناس ماترحم ومؤذيه اخاف على نفسي وعلى اهلي منهم اتحمل كلشي هنا واصبر بس المهم هم مرتاحين وبخير واكيد بعدين يعذروني على غيابي كل هذي الفتره عنهم ..

اكيد هسه امي زعلانه مني لأن مااسأل عليها ولا اتصل واكيد صرت بعينهم موزينه وماصدگت شفت الحرية والدراسه ..

مايدرون اني اصلاً چنت يمهم بحرية وهسه اني مسجونه ..

مسحت دموعي وگمت طلعت ملابس بيت تراك طويل وقطني مستور ورحت توضيت وصليت ..

خلصت صلاتي وقريت اية الكرسي كلش ارتاح من اقراها بعد الصلاة لأن مره قريت قراءة اية الكرسي بعد الصلاة تجعل بينك وبين الجنة الموت فقط ..

خلصت ودا الم مصلايتي سمعته دگ الباب وحچه بهدوء عبالك يدري اني قريبه من الباب :- تعاي تعشي ..

رديت عليه نفس نبرة صوته :- تمام جاية ..

رحت سحبت حجابي ولفيته عدل وفتحت باب الغرفه وطلعت يمه شفته جايب سلطة تونا لأن اللي بالمطعم ماخلوني اتهنى بيها ..

گعدت اكل بهدوء واني عيني بماعوني سمعته سألني :- هم اكو شي اثار فضولچ بالمتحف ؟!

نسيت شگد مقهوره منه وكارهته لأن بصراحه چان فضولي اقوى وماعندي نت ابحث جاوبته بهدوء :- اي ..

سحب گلاص المي وقبل لا يشرب سألني :- شنو هو ؟

رفعت راسي بحماس :- اكو منحوته نصف جسم بشري بس الراس رأس ثور وايده مگطوعه !!.

رجع الگلاص ع الطاوله وهو يبتسم :- هذا مينوتور نصفي .

عقدت حاجبي :- شنو يعني مينوتور !؟

هز راسه واسترسل بالشرح :- المينوتور ب الاغريقيه اسمه مينوتوروس هو مخلوق عباره عن نصف رجل ونصف ثور ابيض مثل الثلج يسمونه الثور الكريتي .

بعدين باوعلي بتساؤل :- تحبين تعرفين الاسطوره مالته .

اول مره بحياتي ابتسم بوجهه بس اني مو اله ابتسمت للثور ولو اثنينهم حيوانات :- ياريت .

شبك ايده وخلاها على الطاوله وقدم جزئه العلوي عليها وهو يحچي :- تگول الاسطوره تم ارسال ثور ابيض الى مينوس (ملك كريت جزيرة يونانيه ) كتضحية من قبل بوسيدون ( إله البحر والعواصف والزلال والخيول ) .

هزيت راسي بتساؤل :- لعد شلون تحول الى نصف رجل ونصف ثور !!؟

اشرلي بيده اصبر وكمل كلامه :- باسيفاي زوجة مينوس انعجبت بالثور ومارست الحب ويا وحبلت وجابت مسخ اللي هو المينوتور ..

باوعتله بصدمه وهو كمل كلامه :- بوسيدون عاقب المينوتور وخله المصمم المعماري دايدالوس يبني متاهه احتجز بيها المينوتور ..

سويت مثل حركته وثنيت بجسمي العلوي على الطاوله واني اسأله :- ليش عاقبه وهو مااله ذنب يعني چان عاقب باسيفاي زوجة مينوس هي اللي ارتكبت الرذيله ؟؟

هز راسه بتأييد :- صح بس هم مايعترفون بهذا الشي وميگدرون يحاچوها لأن هي ابنة اله الشمس والمينوتور چان متوحش اي احد يقترب منه يقتله .

حچيت بخوف :- يمه لعد حقهم يحتجزو .!!

هز راسه بتأييد :- چان متوحش لدرجة مينوس من احتل اثينا فرض عليهم إتاوة ( ضريبة ) كل 9 سنوات يأخذ سبع شبان وسبع عذارى حتى يأكلهم المينوتور واكو مصادر تگول كل سنة ..

خليت ايدي على خدي واني بعدني على نفس الحركة على الطاوله :- بهذي الحاله خلصو اليونانيين .

ضحك :- بس گدرو يقتلو بالنهاية .

عدلت گعدتي بحماس :- صحيح انتبهت ايده مگطوعه شلون گدرو يقتلو ؟!

ابتسم على حماسي :- انقتل بالنهاية على ايد ثيسيوس ( شخصية من الاساطير اليونانية ) بن ايغيوس ( شخصية من الاساطير الاغريقية ) وساعدته اريادني بنت مينوس وباسيفاي .

فتحت عيني بصدمة :- يعني اخت المينوتور من امه ساعدت بقتله زين شلون گدرو يدخلون المتاهه ويطلعون منها ؟

ابتسم :- هي بهاي ساعدته انطته خيط ربطه ببداية المتاهه وسحبه ويا ومن قتله مشه على اثر الخيط وطلع منه ..

حچيت بتوسل :- زين ولو هواي سألت  ؟!

صفن بوجهي وگال بهدوء غريب :- ضلي طول العمر سألي .

سألته بـ ارتباك من نظرته :- شنو معنى اسمه ؟

شتت نظري عنه وهو حك خشمه وعدل گعدته وكمل كلامة :- اسمه مشتق من كلمة ماينوتوروس الاغريقية مكونه من مقطعين ماينو نسبة الى الملك ماينوس وتوروس معناها الثور يعني اسمه ثور ماينوس .

هزيت راسي بتفهم وهو ابتسم :- عندچ سؤال بعد .

گلتله :- لا هذهو .

عفته وگمت للغرفه وقفلتها حتى بدون مااشكره ولا اساعده بتعزيل السويت لأن ميستاهل ..

بدلت ملابسي بشي خفيف بعدين تذكرت الحشرات اللي هنا ورجعت على ملابسي القديمه ومددت واستسلمت للنوم من التعب ..

............
(( منى ))

رحت وراها للغرفه وهيه رأسن مددت بفراشها وغطت نفسها وحتى راسها وهي تبچي ..

سحبت الغطه منها وهي صاحت :- عوووفيني عووفيني يضربني علمود هاي الجارية الگ..... ..

فاتت امي على صوتها سألت بقلق :- شكو شبيها ساره ؟

حچيتلها ع الموقف اللي صار وماچذبت عليها حتى كلامنه على نور گلته ..

عقدت امي حاجبها بغضب حسيتها راح تروح تتعارك وي علاء وترزله بس فاجئتني من صاحت علينه :- انتو بـ اي حق تحچون وياها بهذي الطريقه .

ساره بعدت الغطه عن وجها وباوعت بصدمه عليه انوب باوعت على امي وحچت من بين دموعها :- يعني انتي ماهامچ الراجدي اللي حصلته من علاء همچ الكلام اللي گلنا ..

ردت امي بقسوه اول مره اشوفها على ساره :- علاء مااكولج ماغلطانه بالعكس غلطان وبس اشوفه احاسبه على ضربته الچ بس القسم الاكبر من الحساب عليچن شلون هيچ تجرحن البنيه .

صحت عليها بقهر :- يمه هاي اخت قاتل اخويه شلون تگولين لتجرحنها .

عصبت امي اكثر احسها تريد تاكلني بسنونها :- اي ماتجرحيها ولچ خلي نفسج بمكانها بدوله غريبه ويم ناس غرب ويذبون عليج كلام شيصير بيچ وفوگ كل هذا يحرموچ من امچ .

انقهرت لأن قارنتني بيها :- لتقارنيني بز....... عساها ماترتاح ابد وعساها ماتشوف امها طول عمرها .

عفتها ورحت للحمام ابچي ومقهوره معقوله امي وعلاء بهاي السهوله نسو دم فؤاد ومايهمهم بعد من شاف هذي ال..... يمه نسه كلشي وگام يباوع لحلگها وهسه امي صارت مثله

والله مااخليچ ترتاحين واليوم اسوي بيچ مصيبه اندمچ عليها ..

طلعت شفت ايناس ماكو ولا امي ...

گعدت ساره اللي بعدها تبچي ومقهوره من امي وعلاء سولفت الها كل الخطه وگلتلها :- ويايه ؟!

ابتسمت بخبث :- وياچ طبعاً المهم اشوفها تبچي دم .

.............
(( ايناس ))

اني ايناس اخت علاء بالرضاعة وبنت خالة منى لأن علاء من چان صغير امي رضعته فصار اخويه ..

امي توفت وربتني خالتي ام علاء وگمت اصيح الها ماما ..

من كبرت زوجوني لفؤاد واني ادري بي مجبور عليه بس چان تعامله ويايه زين ويحترمني ورزقت منه بولد سميته علاء ..

اتوفه وعافني اربي ابني وحدي رغم علاء مامقصر ويايه ابد ..

بيوم تفاجأت بخالتي دخلت عليه الغرفه وگالتلي كلام رعبني :- بنيتي انتي صح ربيتي يمنه وانتي بنيتنه بس انتي بعدچ صغيره وحليوه واخاف بيوم تفكرين تتزوجين ويضل ابن فؤاد بعيد عليه وتدرين اني روحي بي .

هزيت راسي واني احضن ابني بخوف :- لا لا هذا ابني اني ربيته وتعبت عليه مستحيل اعوفه ولا اتزوج ولا اعوفه بس هو عندي بهاي الدنيا ..

لزمت ايدي بحنان :- حبيبتي محد ياخذه منچ لتخافين احنه اهلچ اني عندي اقتراح الچ حتى يبقه ابنه عندچ ومتخسري .

هزيت راسي بتساؤل واني امسح بدموعي :- شنو الاقتراح .

ابتسمت بحسره :- عصام اتقدملچ على سنة الله ورسوله اني وعلاء مبدئياً موافقين بس ننتظر موافقتچ ..

ردت ارد بس اشرتلي ب ايدها حتى تكمل كلامها :- هو قابل بكل شروطچ بس همه الوحيد ابنه يبقه بينه .

طلبت منها افكر كم يوم وره يومين رحت الها وگلتلها واني ارجف :- اني موافقه بس بشرط هو ببيته واني ببيتكم ومايعاملني كزوجه ابد .

هزت راسها بحيره وگالت :- مثل ماتحبين .

تمت الخطوبه بهدوء وحتى ماشفته وانقطع عني بس يودي مصرف بيد خالتي وانجبر اخذه لأن يگول هذني لعلاء الصغير ...

مرت الايام وسافرنه اول يوم النه بالفندق طلب يشوفني ورفضت رفض قاطع انو اشوفه ..

واحترم رفضي ومالح اكثر ..

اليوم جنت اسبح وطلعت من الحمام ادور ابني ماكو تخبلت تهسترت واني ادوره صارت بوجهي خالتي رأسن گلتلها :- يمه لحگيني ابني انخطف .

استغربت ضحكتها :- لا يمه ماانخطف بس عصام اخذه شويه يمه بالسويت مالته .

عقدت حاجبي بغضب :- على اي اساس ياخذه هذا ابني فدوه يمه روحي جيبي .

شهگت بصدمه :- لااا يمه شنو اروحله وهو وحده بالغرفه استحي انتي مرته وروحي جيبي ابنچ منه .

اتقربت سحبت ايدها بستها :- الله يخليچ ماما فدوه اروحلچ ادري بي اخذ علاء حتى انجبر اروح اجيبه اني روحي دگي الباب جيبي وتعاي .

دفعت ايدي :- ماكو ابد لتحاولين هو رجلچ وروحيله .

استغفرت ربي واني امرر اصابيعي بين خصلات شعري بعدين التفتت عليها :- زين خلي تروح منى او ساره تجيبه فدوه يمه حبابه .

هز راسها بموافقه :- ماشي لعد انتظري يرجعن وادززهن راحن ويه علاء يفترون .

اشرت بيدي رفضت بخوف :- لا لا يمه شيصبرني ابني اريده فدوه يمه اخاف افارگه هواي الله يخليچ .

اشرت بيدها على الباب بعصبيه مصطنعه :- ايناس هذاك عصام بغرفته روحي انتي جيبي ابنچ كافي اني دايخه .

بقيت واگفه محتاره والله استحي منه مستحيل اتقبل فكرة هو زوجي حياتي كلها چنت اشوفه عم اليه وربيت جوه ايده حالي حال منى وهو رجال ابد مامتزوج شنو اللي يخلي يضيع حياته ويايه ..

مشيت بتردد واني افرك ب ايدي طلعت من السويت الخاص بينه وگفت بمكاني احتاريت ارجع لو اكمل ..

شجعت نفسي بصعوبه يلا قابل هو شراح يسويلي ياكلني ..

وصلت للسويت الخاص بي بعد عذذاب نفسي وتردد دگيت الباب واني متأكده حتى اني ماسمعت صوت الدگه شلون هو سمعها ماادري ..

وبسرعه فتحلي الباب عبالك چان واگف ورا ردت ارجع بس لزم ايدي وسحبني لداخل الغرفه وقفل الباب ..

سألته بخوف :- وين ابني !؟

جاوب بهدوء ونظراته تتوزع على وجهي :- بالحفظ والصون .

فقدت اعصابي وگمت ارجف بخوف :- اريد ابني وينه انطينيا بأي حق تاخذ ابني وين ابني وينه هو ابني اني .

اجه يحاول يلزمني واني ابتعد بخوف :- شبيج بس اهدئي ابنچ مابي شي هذاك نايم جوه .

فتت ركض على الغرفه شلت علاء وحضنته وهو نايم واني ابوس بي يخوف ورعب ..

وهو فات وقفل بغرفه وواگف يتأملنه ..

گلتله بخوف :- افتح الباب اريد اطلع .

عقد حاجبه :- اذا تطلعين علاء يبقه هنا .

هزيت راسي برفض واني احضن علاء اكثر اريد اضمه بگلبي من الخوف .

كمل ببرود :- لعد نامي هنا يم ابنچ وسكتي .

وراح تمدد على القنفه استسلمت لكلامه وعدلت الفراش وخليت ابني بحضني وبقيت سهرانه اباوع على وجهه وادعي ربي مايحرمني من ابني ..

..............
(( غدير ))

بدلت ملابسي ونزلت شفت ابويه گاعد ابتسملي وصاحني اگعد يمه ..

رحت گعدت حاوط چتفي ب ايده وباسني براسي اني متعوده على حركات ابويه وحنيته علينه عنده اني ونور اهم شي بالكون يتخبل علينه ..

بس اليوم گلبي انقبض احس يريد يگولي شي وخايفه اسمعه ..

لزم ايدي بحنيه وهو باقي محاوط چتفي ب ايده اليسرى ..

گال بهدوء :- بنيتي غدورتي العاقله الرزنه كبرت بس اني بعدني اشوفچ طفله بعيني انتي اصغر من عبودي ابن علي ..

ابتسمت اله بحب وهو كمل كلامه بكل حنيه :- بابا انتي روحي من الدنيا انتي عيني اللي اشوف بيها دائماً اگول انتي عين ونور عين ( گالها بغصه )

دنگت راسي واني ابلع ريگي :- الله يرحمها ..

هز راسه وعيونه امتلت دموع وكمل بصوت مخنوگ :- بويه اني اخاف عليج من الدنيا وبلاويها اخاف باچر تغمض عيني تره محد الچ وراي اخوانچ كلمن يلتهي بحياته .

حضنته واني ابچي :- بابا لتگول هيچ فدوه اروحلك اني الله يحفظك النه ياعمري انت .

وخرني من حضنه بهدوء ومسح دمعته شفت عيونه مدمعه روحي راحت على دمعته حچه ويايه بحنيه :- بنيتي رائد رجال ومشتريچ واني لو مازين واحترمه ماالح عليچ بزواجچ منه .

ردت احجي بس قاطعني وكمل كلامه :- ادري بيبتچ حچتلي كلشي واذا عندچ ثقه بـ ابوج وافقي ولا تفكرين بشي .

جاوبته بهدوء :- اللي تشوفه زين اليه سوي حبيبي يكفيني انت راضي عني .

حسيته گوه لازم دموعه ويريد بس يگوم من يمي باسني براسي وگام طلع من البيت اشوف ابويه يمشي ب انكسار وحزن ..

نور كسرتنه كل احنه الكل تعبان ومنتهي عليها ..

..........
(( ابو علي ))

طلعت من البيت حتى اگعد وحدي وافرغ حزني والوم نفسي على افعالي ببنيتي ..

شلون ماانطي غدير وهي انطلبت مني ملكه ..

واختها انطلبت جارية ووافقت انطيها ..

اتذكرت رائد من اجاني هو وامي للمضيف ..

گعد گبالي وعيونه حمر ومايگدر يحچي صحت عليه :- شبيك ولك ليش عيونك حمر !!

امي حچت بهدوء :- اني راح احچيلك وانت احكم .

هزيت راسي بأستماع وامي كملت :- يريد وحيده يموتن عليها وهيه ماتريد تگول ها چان يريد اخيتي وهو لا يعرف اخيتها ولا معاشرها وحتى سلام ماچان بينهم ترضاها يايمه بنيتك هيچ تذل ابن عمها !!

عقدت حاجبني واني اوجه كلامي لرائد :- وهذا انت كل عقلك تنوح على مره واني اگول عليك زلمه تاليها تهزك مره وتذلك ماارضاها منك حتى لو هاي المره بنتي .

حچه بصوت مخنوگ :- عمي اني اريدها والله اخليها تاج على راسي اسويها ملكه لو تطلب روحي ارخصها الها بس خلي توافق .

صحته يجي يمي حضنته وبسته براسه جاوبته بهدوء :- وهي الك يابويه ماتصير لغيرك روح واتطمن .

شفت الفرحه انرسمت على وجهه ورجع الدم بي گام يبوس براسي وايدي وهو يضحك وگام مني راح حضن بيبيته ويبوس براسها وايدها وهي تضحك عليه ..

صفنت عليه شلون فرحان لا ارادي گمت اقارن ..

هنه اخوات ونفس المعزه بگلبي والحب كله الهن وحده انطلبت جارية ووحده انطلب ملكه وشگد فرق بين الاثنين ..

واني انطيت الجارية ورضيت الها الذل والله اعلم شگاعد تشوف بحياتها ..

رجعت للواقع مسحت دموعي واني استغفر رحت توضيت ورجعت اصلي وادعي ربي يجمعني ببنيتي ..

............
(( نور ))

گعدني من النوم وهو يدگ باب الغرفه يسوي صوت مثل الطبل ازعجني بحركته صحت :- ايييي اييي گعدت والله گعدت .

سمعته ضحك وصاح :- الچ خمس دقايق ماتگعدين اقفل السويت عليچ واروح .

گمت بسرعه للحمام لأن ادري بي هذا حقير يسويها ويحبسني هنا دخلت سبحت وطلعت بسرعه بدلت وردت الف حجابي وهو يلح عليه ..

طلعت وگلتله :- زين شبيك تره مطايرين بس الف الحجاب ماصارت هاي .

اندگ باب السويت فتحه طلعت ساره وهي ترجف گالتله :- علاء الحگ حباب منى مدري شبيها .

عاف الباب مفتوح وطلع بسرعه راح يشوف اخته واني طبگت الباب ورا ورجعت الف بحجابي ..

اعرف هاي فرصه اليه اشرد من عنده بس جماعته بكل مكان يعني بس اطلع يشوفوني وهو دائماً يحذرني ..

سمعت الباب رجع اندگ فكرت هو ناسي شي شفته واحد من خدمة الغرف ..

گالي ب الانگليزي :- عفواً سيدتي هناك شخص في الاسفل يريد رؤيتك يقول ان اسمه انور .

جمدت بمكاني معقوله اللي اسمعه صحيح طلبت منه يعيد كلامه حتى اتأكد هو اكدلي انور اجه اندل مكاني وراح ياخذني عفت الباب مفتوح ونزلت اركض حتى مااستخدمت المصعد ..

من فرحتي مااتحمل الانتظار على باب المصعد استخدمت الدرج واني اركض مافكرت اوكع لو يصير بيه شي اريد بس اوصل و وصلت لصالة الفندق ادور بعيوني على وجوه الحاظرين ..

لمحت نفسه اللي اجاني للغرفه سألته واني ارجف  :- لقد قلت لي ان هناك شخص ينتظرني اين هو .

اشرلي على خارج الفندق واني حتى ماانطيته مجال يحچي طلعت اركض واحس رجلي تسابقني بس حتى توصل اله ..

شفته واگف ومنطيني ظهره وگفت واحس دموع الدنيا كلها تجمعت بعيني هذا اخويه انور والله عرفته من هيئة جسمه صح مندار بس گلبي عرفه .

عيوني الخاينه غوشت عليه شوفت وجهه بس حتى لو المهم احضنه صحتله بصوت كسير :- انور .

التفت عليه حتى ماانطيته مجال يشوفني لو يحاچيني رأسن حضنته واني ابچي واصرخ :- وين چنت عني ليش مادورت عليه ليش عفتني بيد هذا الظالم .

قطع عليه بكائي الايد القاسيه اللي سحبتني من حجابي ولمت شعري ويه الحجاب ..

استغربت انور شلون سمحله يسحبني بهاي الطريقه  رفعت راسي وشفت اللي اتمنيت اموت وماشايفته ..

موقف لا احسد عليه اني حضنت شخص غريب واني اعتقد هذا اخويه حبيبي اجاني مااهتميت للراجديات اللي انطبعت بوجهي ولا حسيت بيهم ..

چنت مثل الفاقده بين ايده الصدمه خلتني اصير صنم ويحركني بيده ..

حسيت بي من دفعني بداخل السياره وانضرب راسي بالباب ..

وعيت على نفسي واني اسمعه يسب ويغلط عليه ويتوعدلي بس نوصل للمزرعه يذبحني :- بسيطه راح نوصل يابنت الكلب هسه نوصل والله اليوم اخليچ تتمنين الموت ومتشوفي ولچ ادبسز گ...... امنت بيچ وترحين تحضنين بالزلم من ورايه .

بالي كله مو يم كلامه افكر بالموقف شلون هذا مو انور درت راسي اشوفه صارت عيني بعين منى اللي صعدت ويانه بالسياره هي وساره من اول مادفعني بيها ..

شفت بعيونها نظرة انتصار وشماته گلبي گلي هذا ملعوب منها واذا صار بيه شي كله بسببها وبسبب حقدها ..

اتملكني الخوف واني اسمعه يتوعدلي بالموت والذبح والضرب ماعندي احد يدافع عليه ويخلصني من ايده رجفت من راسي لرجلي وبس دموعي تنزل بصمت ..

بهاي اللحظه اتمنيت ابويه ويايه بس يجي حتى لو  ما ينقذني اعرف نهايتي قربت بس على الاقل قبل لا اموت بس خلي يجي اشوفه ..

مررت ببالي قصيدة باسم الكربلائي :- ارجعلي بس يوم ارجع واخذ عمري مااعرف النوم من فرگتك تدري عذبني الغياب يااغلى الاحباب .

والله مااستاهل اللي يصيرلي خلي اموت احسن يمكن الموت انصاف بحقي لأن اللي جاي يصير هواي حيل هواي واني مااتحمل كل هذا ..

...........
صباح/ مساء الخير .

حبيت اشكر الكل على كلامكم العسل وتشجيعكم ..
وان شاء الله استمر بالرواية ومااخيب ضنكم .

رأيكم بالبارت ؟

احبكم ❤️💔