آسميتها جارية

البارت الثاني

البارت الثاني

وانا ادري باجر لو طحت
تجفي وبعد ما تريدني
هو انا ما فادوني اهل
انته الغريب تفيدني
#🥀

.
..........
ابو علي :- مافهمت شتريد من نور يعني تتزوجها
ابو رائد :- بس شلون تتزوجها وهيه اخت قاتل اخوك
... :- ومنو گاللكم اتزوجها ؟!
ابو رائد :- لعد شتريد منها
... :- اريدها جارية ملك يمين
ابو علي :- تخسه ياخسيس لو تموت مارخصت بنتي الك ياللي ماعندك اخلاق ولا شرف
" طلع من المضيف بعصبيه وقهر شلون يتجرأ يطلب هيج طلب
... :- ابو رائد اني اعرف مكان اولادكم واگدر ب اي لحظه اگص راسهم وادزه الكم بس هسه انطيتكم اقتراح اذا تردون اولادكم الكم مهله يومين تجيبون البنيه وتجوني
ابو رائد :- طلبك صعب وماينحجي وينزل راسنه بين الناس شلون تطلب هيج طلب حرام
... :- مو حرام طلبي اخذ شوف هذني صور اولادكم ب الاردن من اول يوم اني اعرف مكانهم ولتتصور بعيدين عن ايدي ممكن اقتلهم ب اي لحظه
" اخذ الظرف ابو رائد وجان بي صور ل انور وحسام
... :- فكرو زين بحياة اولادكم انطيتكم اسهل شرط .
اخذ الظرف وطلع بدون مايرد عليه
.
.
.......
غدير :- نور ليش بابا صار ساعه يباوع عليج
نور :- شبيج غدير اكيد يشوف انور بيه عادي اصلاً تعودت مرات اتخيل نفسي مخفيه وبس انور موجود
غدير :- لا والله نظراته مو طبيعيه اول مره اشوف ابويه هيج
محمد :- صحيح اليوم هو وعمي علي تصرفاتهم غريبه كله سرحانين وعيونهم تدمع
" گامت گعدت يم ابوها
نور :- شبيك بابا عمري شنو اللي قاهرك مشتاق ل انور اروح فدوه الك ول انور
اختنگ حيل من كلمتها " تردين تروحين فدوه ل انور لا والله ماارخصج لو ياخذون ولدي كلهم "
سحبها لحضنه كأنه يحاول يضمها بگلبه ويخفيها من الدنيا وبلاويها
خافت من شكل ابوها گوه يجر النفس وعيونه تدمع
صارت تصرخ
نور :- علي محمد علييي تعالو شوفو بابا ماادري شبي
اخذو ابوهم طلعو للحديقه وصارو يقرون على گلبه ويغسلون بوجهه
ابو علي :- بويه علي اريد عمك علي خابره يجي بسرعه اريده
علي :- اي بويه صار انته بس اهدء وصلي ع النبي
ابو علي :- اللهم صل على محمد وال محمد

.
.
........
ام حسين :- شگلتي ل ابوچ يابومه يا وجه الفگر شگلتيله
نور :- والله بيبي ماگلتله شي ومااعرف ابويه شبي
محمد :- بيبي نور معليها اصلاً ابويه من العصر هو وعمي تصرفاتهم غريبه
ام علي :- عمه الله يخليج كافي لتضغطين ع نور اللي بيها كافيها
ام حسين :- مااريد اشوفها گبالي هاي البومه كله بسببها
ام علي :- حرام عليج عمه اللي صار ل انور قضاء وقدر هيه اخته التؤام من اول مااجوي للدنيا سوه ماالها دخل بشي
ام حسين ماعجبها الحجي :- محمد وين جان ابوك ؟
محمد :- ماادري بيبي ميقبلون يحجون وكاعدين بالمضيف هو وعمو علي
نور " شبيهم بابا وعمو معقوله وصلهم خبر عن انور معقوله انور مات " طلعت تركض من البيت بدون وعي واتجهت للمضيف الخارجي شافت اخوها علي ورائد بالباب
رائد دار وجهه لان نور بدون حجاب وراحلها علي يحجي بعصبيه
علي :- شمطلعج هيج ولج انتي ماتستحين بلا اكو زلم بالمضيف امشي ولي للبيت حسابج هناك
نور :- علي الله يخليك اريد ابويه بس اريد احجي ويا
طلع ابو رائد على صوتهم وسحب نور دخلها للمضيف تحت انظار علي ورائد المصدومه لان صار ساعه يردون يكعدون يمهم ميخلوهم وبس اجتي نور دخلوها يمهم
.
.
.......
گعدت يم ابوها اللي موجه نظره للگاع مايگدر يباوع بوجهه يحس بقهر بس يتذكر طلبه القاسي منهم
نور :- بويه حبيبي شنو قاهرك احچيلي
گام وطلع من المضيف بدون مايرد عليها
وجهت نظراتها لعمها اللي حجه وياها
ابو رائد بتهور :- تردين تعرفين شنو مضوج ابوچ
نور بتردد :- اي عمو اخويه بي شي ؟
انطاها الظرف وفتحته شافت اخوها حبيبها " شگد اشتاقيت لوجهك سنه كامله لا شايفتك ولا سامعه صوتك ليش هيج انور شلون متغير وكبران حبيب اخته "
نور :- عمو همه بخير ؟
ابو رائد :- همه هسه بخير بس بعدين مااگدر اضمن الچ سلامتهم
نور :- لا عمو الله يخليك لتخوفني ماكو حل يخلصوهم ؟!
ابو رائد :- الحل بيدج
نور :- بيدي ؟!
ابو رائد :- اي
نور :- بس اني شنو اگدر اسوي علمود انقذهم
ابو رائد :- تگدرين .........
حچالها كلامه الهم وطلبه
نور :- شنو يريدني يعني يتزوجني ؟ خلي يتزوجني قابله بس المهم يرجع اخويه
ابو رائد :- لا احنه هم مثلج فكرنه يتزوجج بس هو طلبه يختلف
نور :- شلون يعني مختلف ؟!
ابو رائد :- يريدچ جاريه
"جاريه ؟! شنو يعني جاريه واصلاً هذا الطلب حلال لو حرام معقوله رجعنه لزمن الجاهليه شبيج نور جاريه يعني خادمه قبلي تصيرين خادمه اكيد ترجعين غصباً عليه بعدين بس المهم انور وحسام يرجعون "
انتبهت لكلام عمها
ابو رائد :- لتخافين عمو احنه رفضنه طلبه لو يموت ماياخذج
نور فزت برعب وصرخت :- ليش ترفضون ليش اني مفروض تسألوني اني قابله
ابو رائد عله صوته مثلها :- بويه انتي مخبله شلون تردين تروحين جاريه عنده فكري بنفسج معليج بيهم يتحملون نتيجة غلطهم
نور صرخت بقهر :- مو بكيفكم ترفضون عمو افهم الله يخليك
دخلو علي ورائد ع صوتهم
علي :- شبيج تصيحين على عمي ادبسز
ابو رائد :- معليكم وامشو طلعو بره بسرعه
علي :- بس عمي ل.....
ابو رائد :- برررررره
گعدها يمه وحچه وياها بهدوء
ابو رائد :- حبيبتي فكري زين عندج يومين فكري بيهم لتتسرعين بقرارچ علاء انسان قاسي ومايرحم .
نور :- علاء ؟!
ابو رائد :- اي اسمه علاء
.
.
.........
الفجر قبل الاذان بربع ساعه جانت گاعده بغرفتها وتتذكر اليوم اللي راح بي اخوها سفره ل اربيل هو وجماعته وثاني يوم اجه عمها يصرخ
ابو رائد :- الحگ ياحسين ولدنه راحو الحگ
ابو علي :- شكو علي شصاير شبيهم ولدنه
ابو رائد :- ابنك كتله واحد وشامره من فوگ الجبل من عشيرة ال....... وهذولي مايسكتون الا بدم ولدنه راحو ولدنه راحو
ابو علي :- لا اله الا الله منين اجتنه هاي ليش كاتلي ليش
ام علي :- يمه ابني راح والله ابني مايسويها والله انور مايأذي نمله فدوه اروحلك ابو علي روح جيب ابني ليكتلو والله مايسويها
"فزت من سرحانها على صوت الاذان راحت صلت وانتظرت ابوها يكمل صلاته حتى تحجي ويا
ابو علي :- ها حبيبتي شعندچ  گاعده لهسه
نور :- بابا عادي تجي لغرفتي اريد احجي وياك بموضوع
ابو علي :- اي بويه جاي
راح وراها لغرفتها وگعدو ع الچربايه
ابو علي :- خير بويه شبيج ؟!
نور :- اني عرفت شصار وياكم اليوم وشنو طلبهم منكم
ابو علي بعصبيه :- منو حچالچ اكيد عمچ علي ؟!
نور :- اي بابا عمو علي واني موافقه ع الطلب
ابو علي :- شنوووو ؟ شنو موافقه بكيفج هيه
نور :- بس بابا افهمني اني اذا رحت جاريه راح يرجع اخويه وراح ترجع الضحكه والفرحه لبيتنه
ابو علي :- والله لويموت ماياخذج والله
نور :- بابا حبيبي هذا القانون مرفوض عدنه اني اذا رحت راح يرجع اخويه وراح يفشل هو لان غصباً عليه ارجعلكم ومايربح شي
ابو علي :- كافي سدي الموضوع اني انطيته جواب وانتهينه
نور :- لا بابا فدوه اروحلك احلفك بالله العظيم تخليني اروح بس خلي افهمك
ابو علي :- شتفهميني هو انتي مافاهمه شي ترحين جاريه عيب اگول هاي الكلمه اصلاً اختنگ اموت من احچيها
نور :- بابا شوف احنه جان قبل قانون الفصليه واصلاً لغو وماكو شي اسمه جاريه من صار العصر الاسلامي انلغه خلي اروح وبس يرجع اخويه قدمو بلاغ ورجعوني وراح يخسر كلشي
ابو علي :- انطيني مهله افكر
نور :- بابا مابقه وقت بقه يوم واحد
ابو علي :- هسه نامي حبيبتي وباجر اردلج خبر
نور :- لا بابا الله يخليك عليك الله وافق هسه والله مااگدر انام ولا ارتاح
ابو علي :- ماشي موافق بس اوعدج مايتهنه بيج وارجعج منه لو يموت مايربح الخسيس بس اخوانج وعمامي مستحيل يقبلون
نور :- مالازم يدرون
ابو علي :- شلون مايدرون لعد شلون تردين تروحين
نور :- اي گوللهم طلعت البعثه ووديتها وخفت ترفضون گلت تروح بدون ماتدرون
ابو علي :- بنيتي والله صعب اخليج تروحين
نور :- بابا فدوه لعينك والله ارجع
ابو علي ب انكسار :- الله كريم بويه
.
.
........
فزت على صوت تلفونها يرن برقم غريب ماردت بس رن اكثر من مره وانجبرت ترد
نور :- الوووو
...... :- الوووو السلام عليكم
نور :- وعليكم السلام منو ويايه ؟
صابرين :- اني صابرين
نور :- عفواً بس ماعرفتج منو ؟
صابرين :- اني من طرف اخوج انور
نور :- انور ! منين تعرفين انور ؟؟
صابرين :- اخوج يصير صديق اخويه وهو يمهم ب الاردن اتصل بيه ووصاني اوصلچ هذا الكلام
نور :- اي احچي عفيه اسمعچ
صابرين :- انور يگولچ وافقي ع الطلب واني بس ارجع الغي
نور :- يعني انور يعرف بالطلب ؟
صابرين :- والله مااعرف بس اني هذا الكلام اللي وصلني وطلبو اگوله الچ وهواي حاولت اوصلچ بالجامعه بس طلعتي من وكت
نور :- هواي مشكوره حبيبتي ابد ماانسالچ هذا المعروف ماتعرفين شگد ريحني اتصالچ
صابرين :- تدللين عمري يلا هسه اخليج براحتچ مع السلامه
نور :- مع السلامه
.
.
...........
فاتت على غرفة بيبيتها وگعدت يمها وحضنتها وماگدرت تسيطر على دموعها
ام حسين :- ها شبيج البومه تتلوگيلي شتردين ؟!
نور :- بيبي مخنوگه گلبي يوجعني
ام حسين :- شبيج يمه حبيبتي شيوجعج شبي گلبچ بعد گلبي
نور :- بيبي اني ادري بنفسي فگرت اخويه بس والله اني احبكم وماعندي غيركم
ام حسين :- يمه والله مو قصدي من اگلچ بومه چا انه اشاقيچ  شني ماتتحملين شقاي بعد روحي لا تبچين انور الله يرده بالسلامه دموعچ غاليه يبعد امچ
نور :- بيبي اقري على راسي احب صوتج بالقرآن
گامت بيبيتها تقره على راسها لحد ماغفت على رجليها
.
.
.........
فزت من النوم بسرعه تريد تشبع من اهلها ماتريد تفارگهم ولا لحظه قبل لا تروح والله اعلم شوكت ترجع بعد
نور :- مساء الخير
الجميع :- مساء النور
ام علي :- شنو تصالحتو انتي وعمتي شو نايمه يمها شعجب
كعدت يم بيبيتها وحضنتها :- اساساً اني بيبي نحب البعض ماعدنه شي مو صح بيبي
ام حسين :- اگول وخري من يمي
نور :- ها بيبي تردين تشمتيهم بينه
ام علي :- ولج منو يتشمت بيج
نور گامت گعدت يم امها وحضنتها :- طبعاً مو انتي ياعمري
ام حسين :- ماوليتي اليوم للجامعه البومه
نور :- اريد اشبع منكم بيبي
ام حسين :- شبيج بيبي وين احنه رايحين قابل
نور :- ماادري بيبي احبكم اريد ابقه يمكم دائماً
غدير :- شبيج نونه عمري
نور :- حلمت حلم يخوف .. ماما وين اخواني ؟
ام علي :- علي بالدوام هسه على جيه ومحمد نايم
.
.
.......
گاعده ومجمعه اخوانها يمها ومگعده عبد الله ابن علي بحضنها وماتسمح ل احد يگوم من يمها بس واحد يحاول يگوم ترجع تسحبه وهيه تبچي
عبد الله :- نونه الله يخليج اريد اروح العب عوفيني
علي :- شبيج نور گلبي ليش تردينه يمج
نور وهيه تبچي :- لان احبكم مااريدكم تعوفوني
علي :- فدوه لدموعج مانعوفج ابد
محمد :- فدوه ل اختي الدلوعه تتدلع علينه حتى تعرف شگد نحبها
نور گامت تبچي بصوت عالي :- والله احبكم
غدير :- اسم الله عمري كل هذا من حلم لتخافين حياتي اضغاث احلام هذي
نور حضنتها بقوه تحبهم ماتگدر تعوفهم صح قنعت ابوها وگالتله ترجع بس هيه خايفه ماتعرفه ولا تعرف طبعه وممكن يحرمها منهم للأبد
.
.
.........
ثاني يوم الصبح ابوها وعمها گالولهم راح ياخذوها لسيد معروف بالنجف يقره عليها اتوسلت بيهم غدير تروح وياهم وحتى بيبتها توسلت تروح وماقبلو  گالولهم رايحين ناخذها بس هيه ونرجع
چانو واگفين عند الباب يودعون نور اللي مانشفت عيونها من البچي
غدير :- بابا الله يخليك خلي اجي وياكم ع الاقل اگعد ويه نور ماتبقه وحدها
ابو علي :- گلت لا ويامن رايحه ويه ابوها قابل غريب لو صغير اني
غدير :- لا بابا اسفه موقصدي
ام حسين :- ليش ماتريد تاخذون مره وياكم ياحسين
ابو علي :- يمه الله يخليج اني عندي شغل هناك وراح اخذها ويايه للسيد يقره عليها ونرجع باجر من الصبح عود غير مره اخذكم تزورون كلكم
" تقدمت من امها وحضنتها بقوه
نور :- ماما دائماً ادعيلي ولتنسيني ابد
ام علي :- دائماً ادعيلكم ياعمري لتخافين هسه السيد يقره عليج وترتاحين من هاي الاحلام طول الطريق استغفري وصلي ع النبي
نور :- راح ارجع مو ؟
ام علي :- اي يابعد روحي باجر من الصبح تجون وانتي مرتاحه
ابو علي :- يلا بويه تأخرنه
حضنتهم واحد واحد وراحت ويه ابوها وعمها لمصيرها المجهول بدون علم اهلها فقط ابوها وعمها يدرون
.
.
........
وصلو لبيت عشيرة ال...... نزلو ابوها وعمها من السياره وطلب ابوها منها تبقه بالسياره
گامت تتأمل البيت بعيونها المليانه دموع اتقدمت مره من السياره طلبت منها تفتح الجامه
مدت الها ورقه وقلم اخذتها ب ايدها اللي ترجع حاولت تقره المكتوب ماگدرت عيونها مغطيها الدمع والخوف مسيطر عليها
سألت بصوت يرجف :- شنو هذا ؟!
المره :- وقعي عليها
نور :- بس هيه شنو ؟!
المره :- ورقه تثبت انتي موافقه ع الشرط
گامت تبچي اكثر وقعت ب ايدها اللي ترجف
اول مارجعت الورقه للمره اجتي وحده ثانيه فتحت الباب وسحبت نور بقوه
نور :- ..........