دارت الدنيا لتدق طبول قلبي

البارت السابع

شكول عليك اكول انساك
روحي وياك
شكول عليك اظل زعلان
مر فركاك...
__________

لكل بداية نهاية
ولكل نهاية بداية
وياليت النهايات كالبدايات !!

وربي لم اكن انوي الغياب
واعيش بألف مزاج والف عذاب والاَف من الخيبات ..

متي يأتي صباحك وينير ايامي ؟
اتصدق ان قلت لك بأن الليل ماعاد يحتملني ولايرغب في سماع صوتي ؟
متعطشة للأرتواء بك ومنك .
ايها الحنين اتسمع هذا الانين؟
_____

دخل فهد وتبعته ايفين ...

فهد : حمد لله على سلامتك ذيب.

ماجاوبه صعب تقدمت ايفين تسلم..

ايفين: السلام عليكم حمدلله على سلامتك..

تجاهلهم ثنينهم عافهم ودخل للبيت سديت البردة وطلعت للهول لكيت ادهم متمدد على القنفة وعينه على السكف..

ملاك : صباح الخير ابو مريم..

جاوبني بهدوء وصوت بارد..
ادهم : صباح العافيه يابه.

ملاك : فزيت على صوت الباب مو بله هذا فهد الخبل اجه..

التفت عليه وكال .
ادهم : مانايم وسمعته ..

ملاك : يعني ابد مانمت؟

ادهم : النوم يرادلة راحة بال يا ملاك ومن وين تجي راحة البال وتشوفين اعز انسان على كلبج متعذب وياريت اكدر اساعده بشي انتِ ماتعرفين شبيه شنو الصار حتى اكدر اقدم شي ...

ملاك : لا ما اعرف شعجب انت ماتعرف الاعرفة انتوا اصدقاء مقربين..

ادهم : صح صداقتي قويه بيه بس مو للحد النطرح اسرارنا لبعض ولاتنسين جنت كاضيها سفر ورجعت لكيت ياسة الله يرحمها مريضه التهيت بمرضها وبعدها وفاتها ومسؤولية بنات اخوها صارت بذمتي بعد وين الحك اسأل واتواصل ويه هجان او اي احد من بيت جدي..

فهد : ولاتنسى اهم فقرة زواج سيلين القريب طير عقلك دكتورنا الغالي .

ملاك : ليش تدخل بحوار مايعنيك شوكت تبطل طبعك هذا..

ضحك واجه كعد خله رجل على رجل وكال..

فهد: لا صدك يعني اليحجي الحق مكروه وبعدين معقولة انتِ ماتعرفين صعب شبيه سولفي اذا تعرفين بلكت نكدر نخفف عنه..

ردت اجاوب سكتني صوت صعب هو ونازل من الدرج كال..

هجان : ماكو داعي تحجي شي لان ماتعرف بس تعال انت احجيلي سبب فراقك عن ابنك كل هاي السنين وشايل ايدك عنه صدك تعرف هسه عمره شكد؟ طوله سمين ضعيف ؟
منو متكفل بمسؤوليته ؟
يعرف ابوه عايش لو عباله ميت ويقراله الفاتحه ويثوبله كل خميس؟
لو اكلك يمكن عنده اب بيه حظ وكل يوم يصيحله بابا ويروح وياه يشتري العاب ومن كبر كام يشتريله اجهزة الكترونيه ويكفي انت ما شهدت احلى فترات عمره هو ويكبر كدام عينك.

ادهم : لا هجان ما اقبل منك هذا الاسلوب كل شي ولا هاي النقطة تستفز بيها اي انسان حتى وان كان عدو الك..

فهد جر نفس قوي  وحك خشمه بأصبعه ضرب على رجله بصورة خفيفه ضربات متفرقه كأنما يهدأ نفسه بعدين التفت لجهة المطبخ وصاح..

فهد : ففه تعاي هنا وينج طولتي هاي كله تبوسين بناهد هيج بيها حنان امومه وما ادري..

عكد حاجبه ادهم والتفت على فهد بعدين التفت جهة باب المطبخ يباوع بنضرات مستفسرة..

ادهم : جايب ايفين وياك ؟

فهد ضرب على رجله وكال..

فهد : ضايج طريق طويل وكلتلها تعاي ويايه خاف انام انه واسوق تقبل مروتك تتركني وحداني الله..

حجاها وضحك..

ملاك : الله يتمم عليك العقل ..

حجه صعب من يمه.

هجان : من وين يجيه العقل هذا.

التفت فهد على صعب وبعدين باوعلي ضحك وكال..

فهد : والله كيميا بينكم تلوكون لبعض بس يله كل شي قسمه ونصيب.

ادهم : عوف المداهر وجاوبني شلون تجيب البنيه وتجي وحدكم من بغداد لهنا شلون فهمني.

فهد : ماكو ابسط منها طلعت بره شغلت سيارتي بالسويج خاف تسألني شلون  وبعدين طبيت جوه اقترحت على ففه تشاركني الرحلة لبست عبايتها وجتي دست بانزين برجلي ومارفعتها الأ وانه كبال بيت جدي.

ادهم بده يعصب جر نفس واستغفر  كام وكف راح يم ايفين..

ادهم : اختج تدري بيج اجيتي لو هم ماتدري ضاربتها عرض الحايط..

نط فهد من يمه.

فهد :وهي وينها سيلي من الصبح اخذها الحب وطلعوا لا كالت ولاحجت طراطير عدها بالبيت..

تجاهله ادهم وسأل ايفين.

ادهم : وين راحت ماكالتلج ؟

ايفين : لا ماكالت ..

ادهم : وشلون اجيتي انتِ وياه وحدكم؟

ايفين : عمو مو وحدنا ابوك وامك ويانه وايمن كال اجي العصر .

ادهم : هلو وراح يفرغ البيت وسيلين وين تضل..

فهد : بيت خطيبها غير تره عاقدين عادي يعني..

التفت عليه ونتر بعصبيه..

ادهم : سد حلكك انت ولاتحجي زايد ..

طلع سريع من المطبخ طلعت وراه عبالي راح يرجع لبغداد كلت اقنعه يتريك اول وراه طريق طويل ، فجأه وكف طلع الموبايل وخابر تراجعت وكفت على صفحه ...

وره شويه سمعته يحجي ويه نفسه..

ادهم : ماتجاوب شلون تريح كلبي وتجاوبني ، استغفر الله ربي واتوب اليه..

ضم موبايله بجيب البنطرون مشى لباب الشارع دك الموبايل طلعه باوع على الشاشه غضب حاجبه وجاوب..

ادهم : وين انتِ ، صباح النور ، اي وشنو ؟ ساعة سبعة طالعه من البيت شنو عندج،
وين اكو هيج حجي ،
وشنو بكيفه قابل ، لا مو عصبي  ، وليش ماخابرتي لو اطلع من البيت بعد ما اصير عمج ، لا تبررين سيلين تعبت من تبريراتج انتِ لا ابالي وبعدين تدرين بأختج جايه ويه اهلي للبصره طبعا ماعندج علم اذا اختها الكبيرة ما تستأذن من الكبير هي عليمن تطلع ،
مره ثانية حسبي حساب للجبير حتى لاتضطرين تعتذرين مثل هسه ، رايح انه ورجعي من وكت اخابر ساعه خمسه انتِ بالبيت ..

سده ورجع خابر ..

ادهم : ايمن انت وين ؟ لاتجي اليوم تضل بغداد ارجع انه انت تجي يله حبيبي عينك على سيلين اذا ساعة خمسه ما رجعت خابرني ، الله وياك..

ضم موبايله بجيب بنطرونه خصر ايده ورفع راسه للسما مغمض عينه ..

عفته ودخلت جوه شهدت نهايه حرب كلاميه بين صعب وفهد انتهت من هجان هدد بصوت عالي..

هجان : والله اذا حجيت شي لأدهم اشوفك نجوم الظهر واشوفك شلون احبك صاير .

ضحك فهد والتفت عليه.

فهد : تره جوعانين ريوك ماكو شنو سالفتكم نسوان كومه بلا نفع .

بعدها صاح بصوت عالي بأتجاه الدرج ..

فهد : لج ريري تعاي فهود هنا وعايفيه بدون اكل ...

عفتهم وصعدت فوك اعرف راح يضل يذب بسامير لصعب وهذا ما يسكت كاعدله ركبه ونص واساسا اني ما نايمه زين وصلت باب غرفتي التفتت على جهة غرفته صار عندي فضول اشوفها مشيت بأتجاه الباب فتحتها ودخلت جانت هوسه وملابسه مطشرة على السرير مديت ايدي شلت قطعةمن ملابسه حضنتها وشميتها فزيت من سمعت صوت الباب انسدت خفت التفت عرفته هو ...

هجان : شتسوين هنا؟

ماكدرت انطق حرف ظليت ساكته عرفته اقترب من عطره حسيته ورايه مسافه خطوة وحده..

انداريت وصارت عيوني بعيونه عاكد حاجبه ومنتظرني اجاوبه.

اخذت نفس قوي وحجيت بهدوء سيطرت على اعصابي نوعا ما بس داخلي نار اريد احجي وياه اريد افهمه الصار غير عن الواصله ردت اوضح هواي امور بس ملامحه ماتساعد افتح هيج موضوع وياه هسه يفضحني بالصياح وبنفس الوقت ما اريد أأمله بشي مستحيل يصير بينا...

ملاك : على شنو ناوي هجان؟

هجان : هجان ؟

استغرب لان كلتله هجان عمري ماصايحته بهذا الاسم كله صعب.

ملاك : على شنو ناوي ليش اجيت هنا..

هجان : اكدر اكلج ليش عايشه بيت جدج؟ الي حق اتدخل بخصوصياتج ؟
اخر كلمه حجاها بنتره..

ملاك : وانت منو متدخل بخصوصياتك وبعدين بابا ماعنده بيت غير بيت جدو لهذا معتبرين بيت جدو بيتنا..

مد ايده وسحب التيشيرت مالته من ايدي بقوة وحجه من بين اسنانه..

هجان : لعد هاي مو خصوصيه من تدخلين غرفتي وتاخذين ملابسي وتشمشمين بيها وبعدين انتِ مو على ذمه رجال شكو جايه بغرفتي ؟

ملاك : اسفه ماجان قصدي شي بس ردت اعرف وجودك مؤقت لو دائم ، من رخصتك اروح اتريك..

ردت افوت سد الطريق عليه..

هجان : مو بكيفج تفوتين لغرفتي وتطلعين بسهوله ..

رفعت عيني باوعت بعيونه وخزرته تجاهلت كلامه وسألته...

ملاك : شنو ناوي تستقر هنا وشنو الهدف من جيتك هنا؟ وخلي ابالك وجودي مؤقت مجرد ضيغم يكمل الاجراءات اني اسافرله..

خزرني وكال..

هجان : هذا مكاني وبيتي مثل ما بيتج
وللأسف راح تشوفيني هنا كل يوم..

ملاك : بس خلي شي ابالك اني زوجه ابن عمك ومستحيل ننجمع لهذا لاتعشم نفسك هواي..

ردت اطلع سحب ايدي حيل التفتت عليه عطت ..

ملاك : وخر ايدك اني محرمه عليك مو ملاكك مال قبل هد ايدي يله ..

هجان : جذابه تحجين هيج حتى تحركين كلبي مو ؟

حجاها ونضراته تتوزع على وجهي بترقب منتظر مني جواب يبرد كلبه..

ملاك : انت ماعاجبك تصدك براحتك ظل عايش بالوهم وعوف ايدي اذتيتني تره..

شدد لزمته على ايدي ولزم كف ايدي اليسره باوع لاصابعي وكال..

هجان : وين حلقتج ؟ وليش عافج وسافر هاا ؟؟؟
شنو الكاعد يصير احجيلي تره اخبلج..

ملاك : مايخصك اي شي يخص حياتي لاتدخل بيه..

هد ايدي خازرني عفته وطلعت مجرد عبرت الباب دموعي كامت تنزل وحدها دخلت لغرفتي ابجي بحركه كلب ورة شويه اجتي اريام  شافتي ابجي ..

اريام : ياستار ياربي هاي شكو ؟ شبيج تبجين ؟
فهد مو ؟

هزيت راسي ب لا واشهك..

اريام : غير تحجي شكو شنو صاير..

حجيت والشكهة ملازمتني.
ملاك : صعب، قسيت عليه اذيته ولج اذيته..
اريام : شنو سويتي يامصخمه وين شفتيه ..

سولفت الها الصار كله ضربت على صدرها وكالت..

اريام : يا ولج ليش هيج شلون كلب قاسي عندج اكو وحده تسوي سوايتج..

ملاك : ما اريده يرجع يتأمل ويحارب من جديد ويرجعون يأذوه اريد يقتنع بالواقع ويصدك اني مو اله .

اريام : بس انتِ تحبيه مثل ماهو يحبج واكثر ليش تمثلين على نفسج.

ملاك : اني على ذمه رجال يا اريام وطريقنا اني وياه مسدود ليش اجازف بشي اعرف بنهايته نفق مظلم يستحيل اشوف نور بيه..

اريام : بس انتِ كلتيلي صار بينكم اتفاق وضيغم سافر وزواجكم على ورق والاهم وعدج فتره ويطلكج بعد ليش تخسرين صعب بهاي سوالفج ..

اريد اسيطر على دموعي وشهكاتي ما اكدر غطيت وجهي وبجيت لحد ما ارتاحيت فرغت الهم كله من يوم زواجي لهذا اليوم..

اريام : هاج شربي مي ارتاحي وغسلي وجهج صرتي جنج قرده مطلعيها بالشمس عقاب ..

ملاك : ثول ههههه.
اريام : كومي نتريك هسه الجاي برد وفهد ينتظرج ههههه.

ملاك : عوع هذا مدري منين اجاني صفح.

اريام : كومي ياعيني احنا بنات ناهد ولا وحده بينا عدها حظ وارتاحت ظلت عليج ...

ملاك : الحمدلله والشكر على كل حال..

اريام : تعاملي ويه صعب مثل الباقين عادي سولفي واكعدي لاتبقين متجنبته وتصير بينكم حزازيه.

ملاك : شبيج انتِ اقل حجايه او تصرف مني ينزرع الامل بكلبه ويرجع يتعلق من جديد وارجع اتأمل عوفينه هيج افضل..

اريام : براحتج بس صعب لاتعاديه ديري بالج تره يخبلج.

ملاك : الله كريم خليها هي تنحل وحدها..

اريام : يله نزلي تريكي حتى نحضر الغده ويه ماما خطيه وحدها..

هزيت راسي بأي كمت لبست حجابي ونزلت وراها دخلت للمطبخ لكيت فهد وايفين كاعدين سوه سوالف واكو ميانه بينهم استغربت كلت احتمال لان عايشين بيت واحد ، كعدت اكل بهدوء ..

فهد : ففتي .
ايفين : نعم

فهد : شنو المميزات اليشوفها الرجال بوحده متزوجه ..

رفعت عيني باوعتله لكيته يباوعلي ومبتسم خزرته ودنكت اكل..

استرسل بكلامه السخيف..
فهد : تره الدنيا ماتسوه كلها كم يوم وميتين وتالي نندفن بحفره حجمها شبر واربع اصابع..

اني ومدنكه حجيت ..
ملاك : هاي اذا لكيت كبر يلمك.

فهد : اي طبعا انه كبل للجنه اصلا محد يدفني جسدي طاهر.

صدك ضحكت على كميه التفاهة البيها بهاي الاثناء فات صعب ويه حظي مشى من يم الكرسي مالتي دفره حيل برجله وطلع...

بدون وعي صحت اخ هاي ليش ، لان صدك تأذيت التفتت على فهد لكيته خربان ضحك..

ملاك : شكو تضحك مسرحيه كدامك؟

فهد : يغار عليج لان تحجين ويايه .

دنك راسه ياكل بعدين رفع راسه وكال...
فهد : هو هذا الجان محتويج وترجفين عليه كلتلج بوكتها ضيغم انسب الج ما صدكتي ..

ملاك : حياتي خط احمر واي شي بيها مايخصك فهمت..

فهد : هذا نفسه راح يبجيج دم صبري وتذكريني عود..

ملاك : معليك انت حير بنفسك  ..
حجيتها وكمت صاح وين..
ملاك : شبعت سديت نفسي.

فهد : ففتي صدك انه اسد النفس ..
حجاها وظل يضحك طلعت من المطبخ ماتحملت استفزازه يعني صدك مستفز..

رحت للهول ردت اصعد شفت ادهم يريد يدخل للأستقبال رحت يمه دخلت وراه وسديت الباب .

ملاك : ابو مريم بس سؤال عفيه.

التفت عليه وكال.
ادهم : اسمع..

ملاك : اكو اشياء بالحياة صعب نغيرها وحتى اذا غيرناها صعب ترجعلنا حياتنا القديمه بمثل هيج حاله الواحد شلون يكمل حياته ويعيش مرتاح..

كعد على القنفه واشرلي اكعد كعدت ابتسم بتعب وكال..

ادهم : لازم تتحملين مسؤولياتج وتحتاطين من الاسوء وتخلين ابالج رغم كل هاي المساوىء حياتج ماراح تنتهي بكل الاحوال انتِ عايشتها سواء بحزنها لاسامح الله او بفرحها وهذا املنا بالحياه..

ملاك : ماريد تحجيلي هذا الشي من باب الموساة اريد حل..

ادهم : انه مو احرص  منج على مواسات نفسج المفروض انتِ احرص مني بهذا الشي ، راح اكلج شغله وحده الحياة مليئه بهواي امور تكدرين تشغلين روحج بيها بعيدا عن الشي المتعبج شويه شويه راح يصير تعود بعدها تأقلم ومتأكد اذا سويتي هذا الشي راح تكدرين تحبين حياتج الجديده..

ملاك : بس اني مو سعيده رغم تعينت وتزوجت بس ما مرتاحه ابد وماكاعد اكدر اكمل حياتي ولا اكدر اعيش تخيل ادعي الايام تنقضي وتخلص ..

ادهم : معناها رابطة سعادتج بشغلة معينه وهذه الشغلة صعب تحصلين عليها على الاقل بالوقت الحالي مو صح.

ملاك : صحيح..

ادهم : هذا اسمه تعلق اي انسان يتعلق بشي يفشل بحياته سواء تعلقه بأنسان ثاني يحبه او بوظيفه او بأشياء اخرى ومن يتعلق بشي وما يحصله او يروح من عنده يفشل بحياته وماراح يشوف اي جزء ثاني حلو عنده .

ملاك : شنو اسوي الله يخليك اني فعلا سعادتي مرتبطه بشغله معينه بس ما اكدر اكول شنو اريد احتفظ بيها لنفسي..

ادهم : لازم تفكين هذا التعلق .

ملاك : شلون مافهمت.

ادهم : انتِ تكولين سعادتي مرتبطة بشغله معينه حتى تفكين التعلق بطلي تفكرين بيها وكولي يارب اسعدني وريحني ونور طريقي وامشي كبل لاتربطين الدعاء لسعادتج وراحتج بهاي الشغله او هذا الانسان لان احتمال بيها تعاستج ومجرد تفكين تعلقج بهذه الشغله وتخلين قلبج يتعلق بالله سبحانه وتعالى لا ارادياً راح تنسعدين سواء ويه الشغله الأنتي متمنيتها او بشي احسن منها ..

ملاك : شكرا راح احاول هيج اسوي وادعيلي يارب اكدر اجتاز هاي المرحله بسهوله..

ادهم : الارادة بمثل هيج حالات تسبق الدعاء اراده ثم دعاء ويامحلى الحياة يا بنت العم اذا عرفنا نعيشها صح..

ابتسمت وتشكرت منه هواي لان صدك من حجيت وياه ارتاحيت استأذنته وطلعت..

للعصر اجوي عمي يوسف وزوجته رحبنا بيهم وظلوا يسولفون واني بالي يم صعب من طلع بعد مارجع للبيت اكيد بسبب الموقف الصار جان صعب عليه وما تحمله..

التفتت على صوت ادهم وهو يكول..
ادهم : يله ايفين كملتي ؟

ايفين : اي عمو ماعندي شي.
ادهم : يله لان يادوب نلحك نوصل قبل ساعه ١٢ ...

يوسف : باتوا اليوم وباجر من الصبح اطلعوا متوازين يايابه.

ادهم : حجي تعبان وايفين لازم ارجعها يم اختها ..

يوسف : مو ايمن بالبيت على شنو خايف..

فهد : ماتعرفه كلبه يرفرف مثل الطير على ذولاك الناس..

ادهم باوعله نظره فاتره سلم وطلع...

المغرب جدي خابر على عمو يوسف كللهم تعالوا لبيت عقيل وراحوا كلهم ظلينا بس اني واريام ، صلينا المغرب وتعشينا ، اريام اخذت ابنها وصعدت فوك واني رحت للمطبخ اغسل المواعين لان هي سوت العشا..

مندمجه اجلف بيهن وفكري سارح سمعت صوت موبايلي يدك اخذته من على الميز استغربت الاتصال من ضيغم ضحكت شنو ذكره بيه اليوم فتحت خط وجاوبته..

ملاك : شنو ذكرك بيه اليوم..

حجيتها وضحكت اجاني صوته يضحك..

ضيغم : والله يابه حقج عليه بس تدرين شنو صار..
ملاك : ان شاءالله خير ظل بالي؟

ضيغم : لاتخافين صبري احجي هههه .

ملاك : يله احجي سكتت.

ضيغم : جانت عندي مسابقة وهاي المسابقة كلش مهمه كضيتها  دورات تدريب والحمدلله اجتازيتها بسهوله واخذت المركز الرابع.

ملاك : يله زين  مبروك ههههه.

ضيغم : شو تضحكين انتِ شايفتهم هنا شلونهم بالسرعة موزين اخذت الرابع اكو متسابقين من دول عربيه خيرهم ماخذ مركز العشرين..

ضحكت وكلتله..

ملاك : يله تعيش وتاخذ المركز الاول ان شاءالله..

ضيغم : بدعائج اخذه ، عوفج مني انتِ شلونج خوما احد مضوجج مصرفج مكفيج لو ادزلج..

ملاك : اني زينه الحمدلله وفلوسك بعدهن صرفت شي قليل والحمدلله تعينت وقريبا استلم راتبي ...

ضيغم : اي على الخير غير تبشريني لعد ، طكو المعدان باعي اول راتب تشتريلي شي مو تغلسين تره ازعل..

ملاك : لا ما اغلس اتذكرك عود ..

ضيغم : يله زروك اروح اني محتاجه شي؟

ضحكت بصوت عالي على طريقته بالكلام كلها تصنيف..

هو هم ضحك وكال..

ضيغم : والله وكت اكلج زركه وتضحكين..

ملاك : لان عرفت مو من كلبك تحجيها.

ضيغم : محتاجة شي عيني ؟

ملاك : يعني اذا محتاجه شغله راح تجيبها مثلا؟

ضيغم : احجي وشوفي اذا مو باجر تجي يمج..

ملاك : تسلم ماتقصر ربي يحفظك.

ضيغم : ويحفظج ان شاءالله تصبحين على خير روحي نامي وانه راح اطلع توه بلش اليوم عندي..

ملاك : شويه وانام تصبح على خير..

ضيغم : وانتِ من اهله..

سديته والأبتسامه مرسومه على وجهي فرحت لان العداوة البينا اختفت واذا احتاج شي بالمستقبل اكدر الجئ اله مو مثل قبل جان يصدني واسلوبه ابد محلو ويايه خصوصا بدايه زواجنا اول شهرين شوفني المر ، خليت الموبايل على الميز والتفتت حتى اروح اكمل غسل مواعين وجان اشوف صعب واكف باب المطبخ وعيونه مدمعه ملامحه كلها عتب حسيته يريد ينفجر بسرعه اختفت الابتسامه على وجهي خصوصاً من كال بصوت مبحوح مليان حزن...

هجان : شلون نطاج كلبج تغدريني ؟

يتبع....