سلالة العنفوان ..(ذنب عيناك)

الذنب الواحد و اربعون

الذنب 41

رواية...ذنب عينيك..سلالة العنفوان
منقوله للكاتبه...نور سمو العراق

💔💔💔💔💔💔💔💔💔💔

.....................

قربئ...

من سمعت اسم يوسف فياض،عرفت هو مطلوب بس ليش يطلبو هو لا فار من الجيش ولا عنده امور ضد النظام

رجعت اركض بسرعه كتله..يوسف الحزبيه اجو عليك الحك يمعود

هو من كتله هيج ارتعب وفتح عيونه مصدوم بس ما جان عنده وقت للمناقشه بسرعه لبس نعاله وركض علئ السطح

هم ويه ما دخلو شافو صعد علئ السطح واحد منهم صاح بصوت عالي...اركض وراه اركض لكم يله بسرررعه

ركضو بيهم خمسه علئ السطح اني جفلت بمكاني لزمت بطني بوجع انمغصت حييل ألم مو طبيعي

انعاد عليه شريط حياتي اتذكرتهم من اخذو اهلي ولحد الان اني محرومه منهم

وكفت بصف الحايط من دون اي حركه وسوزان واكفه بهدوء يمي وتحجي ويه الضابط...سيدي احجيلنه شنو الاخ فرار من الجيش

باوعلها وخزرها رد عليها...لا تتدخلين

رفعت حاجب بس محلو هيج تدخلون علئ بيتنه واحنه هيانه بنات وحده منه يجوز ملابسه شئ البيت اله حرمته شلون هي تدفعون زوجي وتدخلون

فاروق كلها...سوزان اسكتي اني اتفاهم وياهم

اردف بقهر...اي صح انتم شلون هيج تقتحمون بيتي وتدخلون لا تنسون انه ابن شيوخ واخوي رائد بالجيش واحنه ما نلفي الفراريه انت سالتني واني جاوبت ماعندي اي واحد فرار

سوزان...اي فعلا احنه ممدخلين اي ناس فراريه وبعدين احنه ناس معروفين زوج خالتي كبير بالدوله ومن اهالي تكريت وجدو خادم بالعسكريه وابن خالو رائد الحمد لله كلنه من اصل عسكري كان احترمتو تقديرنه وحبنه الوطنه

ما نسمع بس الرمي كمزت من مكاني ولزمت بايد سوزان وكوه مصبره نفسي ما انهار وافقد اعصابي واوكع مغمي عليه ...

حطيت ايدي علئ شفايفي...يوسف يوسف بس لا مات بس لا كتلو

فاروق بعصبية...ليش ترمون عليه ليش هذا ضيف عندي مو من حقكم اني راح اقدم بلاغ ضدكم

ضحك الضابط...هههه احنه اصلا راح ناخذك ويانه لان انت متستر علئ،وأحد حرامي سارق ابو مليون دينار عراقي ويريد يشرد بيهن واكيد هسه تطلعون انتم متفقين وياه

فاروق بصدمه...شنييي شني متفقين وياه يابه علئ كيفك سيدي شني السالفه هو كتلك مجرد ضيف واخوي هو الخلا عندي

رد علئ فاروق بغرور....هااا يله يعني لازم ناخذك انت منا لما يوسف يسلم نفسه

فاروق...اني شعليييه علئ شنو تعتقلوني شنو اني كايله يروح يبوك ابو ويصير حرامي ترا هذا مو حجي

الضابط...هذا الكلام تروح تحجي بالمركز مو كدامي،المهم اجه بلاغ ضدكم انتم متسترين علئ واحد حرامي والضاهر متففين ويا

فاروق ضل يحجي ورفض ان يروح وياهم بس هم جبرو واخذو غصبا عنه

ضلينه بس اني وسوزان وحده تواسي الثانيه ونبجي حسينه بخووف ماكو رجال بالبيت

رحت قفلت الباب واجيت نمت بصف سوزان كالت هي بخوف...خايفه سوزان البيت محد بي،اخاف واحد يدخل لبيت ويسوي،بينه شئ

حضنته....لا حبيبتي لا تخافين ان شاء الله ماكو شئ يا ما ويا ما نمت الوحدي،قبل من دون اهلي،واخواني،

رمشت سوزان بعيونها...اكول قربئ انتي اهلج مسجونين مو صح

جاوبتها بتنهيده...اي حبيبتي ولحد الان ما طلعو من السجن واني ما اعرف اذا هم بخير او لا بس الي اعرفه كلبي ابد ما متطمن ويوجعني عليهم

كالت...الله يرجعهم بالسلامه بس شنو السبب الي يخلي الدوله تعتقلهم...

فركت اديه بتوتر وقلق...والله ما اعرف شنو القضيه بس الي اعرفه هم انغدرو لحد الان الي اعرفه ان اهل ابويه هم السبب بلي احنه بي

جان بخاطري أسأل يوسف هواية اسأله لان يوسف كنز من الأسرار بس للاسف مدا اكدر اساله اخاف من الاجوبه اخاف يطلع كل توقعاتي صح

سوزان ..مو عندج اخ طلع لايران

سرحت بخيالي لاخويه حبيبي سليم...اي سليم اخويه راح لايران هو هرب من الحكومه ولحد الان ما اعرف وين بايران اخر شئ رسلي رساله من الشمال وهسه ماكو خبر عنه بس عرفت ان هو سافر

ضلينه نسولف اني وياها هي كالت اني باجر ان شاء الله بس تجي،بيبته فاروق اروح واتصل بذياب لبيت جدو بالغربية حتئ يعرف ذياب ان فاروق اعتقلو بسبب يوسف

والله كعدنه الصبح اجت ام فاروق وبيبته وجده كالو...جااا فاروق وين

كلنالهم...والله اعتقلو الجيش

وام فاروق تخبلت...يممممه يمممه فاروق اخذو الجيش احوووي احووي راح وليدج يا جميله راح سندج يجميله وين تلكينه بعد ضاع حزامج يجميله

وجدته ضلت تلطم...مضيعه لولد وتريد حك رباها مضيعه الولد ...بعد وين تلكينه يجميله وين تلكين وليدج راح اعدام

ياولد ياسباح كلبي
عيني عمت ماشوف دربي
بكاس القهر ياروح شربي

جد فاروق عاط بيهن...اشش اسكتن يا مدهورات ما تعرفن تتفائلن اله انعل الخلفجن ولجن خلنه نفهم شني السالفه

اشر علئ مرته بعصبية...خووو انتي ما تصدكين واحد يموت حتئ تدكين وتلطمين ياللطامه يا الجاسوحه امشن امشن ولن من جهرتي

سوزان طلعت لابسه تنوره وقميص ولابسه كعبها كلتلها ام فاروق...هله هله ..هله بمرة فاروق عيني يالمعلمه يالمدرسه وين موليه تطكين بكعبج جنج حصيني ما صدكتي فاروق انسجن

عدلت تنورتها سوزان ورفعتها للخصر...باجي دا اروح اشوف حل لفاروق قابل شنو تردين بس نبجي وهو حيخلصها بالسجن لازم نطلعه من السجن

حركت اصابعها جميلة مستهزئه بكلام سوزان...عشتو تطلعه هي انوب من معلمه المحامية

حركت شعرها بغرور واستفزاز...والله يا باجي فاروق شنو يريد اصيرله اصير..محاميه ..مدرسه ..شرطيه كيفه والله هو

جميلة بعصبية...بوية وخرها من وجهي لا اطلع حركة فاروق بيها

ابو جميلة بغضب...ولج جميله شلون بيج انه خلينه نشوف لبت شسوي كولي جدي شني ناويه عليه

ابتسمت سوزان..جدو دا اريد اروح لصاحب المحل حتئ شنو اتصل بذياب بالغربيه يجي بسرعه اريده يجي يطلع فاروق من السجن ويندمهم لان هيج سوو بفاروق

لزم عصتها كلها...خوش جدي خلينه اروح وياج وانتي خابري بعد جدج

خلت وراحت هي وياه وجميلة تصيح وراها...خوش والله رايحه تخابر لابسه تنوره جااا من تروحين تتونسين شتلبسين المنيجوب..

عافته وراحت من دون ما تجاوبها طبعا سوزان عندها برود بحياتها مو طبيعي ما تحب تعارك ولا ترد هل صفه بيها كولش حلوة ما تحرك اعصابها مطنشه الدنيا...

ضلت تقريبا ربع ساعه واجت تطك بكعبها كالت ...خابرت ذياب كال ان شاء الله راجع اليوم واروح لسجن البصرا اشوف شنو القضيه...

....................

وئام...

مرة الايام طبيعيه كل واحد يحاول يسوي شي معاكس للثاني

اني مبتعده عن عمر كل البعد بس هو لا يحاول يروضني ويسترضيني ..

حياتنا هادئة الحمد لله ودا اقري بحمودي لان حيدخل مدرسه...وهو متلهف يقره ...

عمر جان نايم علئ القنفه بالاستقبال واني كاعده كاضبة القراءة واقري بمحمد

اجه ابو النفط يصيح...نفوووط نفوووط هههه

عمر كعد بانزعاج وفرك وجهه...اهووو والله دخنا واحد ما ينطمر ساعه اذا طباخات للبيع قنادر للبيع مدري شني للبيع انوب نفط عساكم احتركتو بنار جهنم

سديت القراءة ودحكت الو...اي باب دار داران دور مو صح لو اني غلطانه

ابتسم...لا ما غلطانه اني جنت مركز بالسيمفونية الجميله ومستمتع بيها عبالك مو دار ودور عبالك احبك واموت عليك بس ذول خربو عليه الاستمتاع بالصوت الشجن ...

نزلت راسي واني اخفي ابتسامتي رفعت راسي وحجيت ببراءة..حبيت افهمه الدروس قبل لا يدخل مدرسه حتئ يحب المدرسه وما يتعذب بعدم الفهم واني اسفه اجيت هينا قريتو بس هو ما قبل اله يقره هينا ما يحب بالغرفه

عدل كعدته وكتف اديه...عادي بابا اقرو بأي مكان اني اتواجد بي وجودكم مهم بحياتي

نزلت راسي ورجعت اقري بمحمد متوترة ااشر علئ الدار اكوله قدوري

كال بعصبية...ماما تقرين غلط انتي هذا مو قدوري هذا دار انتي ما تفهمين متعرفين تقرين وريتي راسي ور..

انتبهت علئ الكتاب وبفشلة...هااا اي صح لا ادحك هذا دار مو قدوري

دحكت لعمر كال...ركزي ركزي لا ترسبين الولد بتفكيرج بيه

رفعت حاجب...ول ول ول واثق ما شاء الله

ابتسم...اكيد كلي ثقه بنفسي و واثق من نفسي احب ام حمودي كلش هواي

محمد دحك الو بعتب...عيب تحب امي اني هسه هم احب امك ؟

ضحك عمر وشالو فرو بين اديه ...اي حب امي وشبيها يعني ترا امي تصير بيبتك

حمودي بعناد...وامي عليش ما تصير بيبيتك ؟

دحك الي وغمزلي كال...لان هي زوجتي اني مزوجها

محمد ببراءه...عجل زوجني امك

اني ضحك بصوت عالي و عمر ضحك ...ولك عيب عليك شلون ازوجك امي امي تصير بيبيتك وبعدين شلك بامي ما بيها شئ صاحي طلعت تقاعد من الزواج اني بس تكبر ازوجك وحده حلوه بس ما اضمنها احلئ من امك

محمد..خوش عجل من اكبر لازم اتزوج مو صح

عمر...عفيه صح بطل طالع علئ امك

نزلو علئ الارض وضل يلعب وياه ويتضاربون جنت صافنه وابتسم عليهم جريت نفس حزين لو محمد ابو عمر شنو جان صار

طردت الافكار السلبيه من دماغي ورحت للمطبخ اسوي لفه لمحمد لان هو يحب ياكل العصر اجبان وحليب

سويتلو لفه خليتها بالصحن والحليب حضرتو دخل عمر من شفتو توترت چثير

همست...عمر تريد شئ اسويلك وياي

سحب خصري بيد وحده وجهي صار گريب من صدرو بلعت ريكي بتوتر همست بخوف...عمر شبيك ايمت تروح تجيب عمتي من بيت عمي ابو فريال

همس عند اذني بذوبان...اششش عوفينه من بيت الشامخ يالغربية الحلوه خلينه بس بنفسنا

هاجست ببوستو علئ اذاني واني بطني اهاجس تكطعت من الخوف والرهبه

رفع راسي وابتسم...بعدج زعلانه مني

نزلت عيوني وما جاوبتو همس عند شفايفي ...باوعيلي

رفعت عيوني بقلق جانت ملامحمه متعصبه وجامده وعاقد حواجبو من دحكت الو لانت ملامحو وضحك كل وجهو

عض شفته كال...جنت اسمع يكولون حمرت من خجلها صارت حمرها اشتعلن خدودها بس وروح ابوي ما جنت اصدك ولا شايف بحياتي وحده حمرت من الخجل اكول شنو هل كلاوات وين اكو وحده يتغير لون بشرتها من الخجل

بس هسه لا بشرفي اكدتي الي كل كلام انگال بحق الخجل وتغير لون البشره هو صحيح قبل شويه بشرتج مثل الكطن الابيض شبسرعه وبهل ثواني انگلب وجهج مثل لون الدم

بللت شفايفي بحيرة وخجل وارجف ما اعرف شنو الي صار بيه دمعت عيوني من خجلي...عمر عوفني حمودي جوعان

حضني بقسوة...ولججج احتركووو عشيرة حمودي بنار ونفط تعاي اسولفلج عن هواجسي

رفعت اصابعي ترجف مسحت دمعتي بتوتر ضحك كال...ادري شكو ترجفين جاي اكلج

بلعت ريكي بصعوبه...هاااا لااا

تقرب مني اكبر وشفايفو احتضنت شفايفي،بادلتو بحب ناسيه نفسي ناسيه زعلي متذكره شغله وحده بس عمر يحبني من طفولتي مثل ما اني جنت اتمنئ اجتمع بي من طفولتي

استوعبت الي دا اسوي سحبت شفايفي وابتعد عنو بسرعه ...

اخذت لفة حمودي والحليب وخليت ورحت كعدتو بحضني لمحمد وهو ياكل ويحجي ماما...اليشرب حليب يصير بطل لان البطل مال حليب يعني بطل وقوي والياكل جبن جبان مو صح

مسحت وجهي بتوتر وبالي،مو عندو...هااا اي صح

صاح عليه عمر خليت ورحت عليه كتلو...هااا عمر محتاج شئ ؟

جر نفس كال...اي اريد تحضريلي ملابسي اريد اسبح واريد اروح عندي شغله

خليت ورحت حضرت ملابسو كتلو...عمر تريد قميص جوزي ويه البنطلون الاسود لو ابيض

رد عليه...البس علئ ذوقج حبيبتي كيفج انتي

ابتسمت...لعد الجوزي احلئ لان الابيض عبالك رايح للمدرسه مو صح

ضحك...اي صح انتي علئ ذوقج كتلج

كمل سبح واخذت ملابسو تا انطيهم الو اول ما مديت ايدي سحب ايدي بقووه وجرني الو صرخت بصوت وكضبت باب الحمام حيل...

عمر عيب عليك عوفني ترا هااا لهساع اني زعلانه منك مو من حقك تدخلني وياك للحمام

رد بذوبان...غسلي شعري

جاوبتو بنفس...لا امشط شعرك ولا اغسل شعرك عوفني

جنت ساحبه نفسي قووووي منا وهو الخبيث ترك ايدي واني من قوة تركتو الايدي وسحبني النفسي وكعت علئ،وجهي وكعه تكسرت تكسر ...

تركتو وطلعت اركض همزين ما دخلني وياه بالحمام جان هساع اني مجلوطه من خجلي

كعدت يم محمد كاضب قراءتو ويقره وفرحان بروحو

اندك الباب رحت وكفت وره الباب،اخاف من عمر اخاف افتح الباب ويهجم عليه بس توقعت عمتي

كلت...منووو

ردت عليه...اني خاله افتحي الباب

فتحت الباب دحكت الها ما عرفتها كالت...السلام عليكم

جاوبتها...اهلا خاله وعليكم السلام تفضلي محتاجه شئ

دحكتلي من فوك ليجوه وعيونها متعصبه كالت...انتي مرة عمر مو ؟

هزيت راسي بأي...اي اني زوجة عمر تفضلي خاله رايده شئ

جرت نفس وزفرتو كالت...اريد احجي ويه عمر شويه

عقدت حواجبي...انتي منو بلا صغرا بيج

ركزت بملامح وجهي وردت علية...اني ام سهام زوجة عمر السابقه

فتحت عيوني مصدومه من كلامه وانلجم عندي الكلام ويبست بمكاني،هي بدورها دفعتني،ودخلت...

.............. .........

فاروق...

اخذوني وخلوني بالسجن بالبصرا ابو الخصيب سجن حمدان...

واني المكرود لا بيها ولا عليها المهم دخلت للسجن كلها خوشيه وعفطيه ومدكدكين ...

واحد اسمه طارق هو لازم السجن الي يحجي وياه يشك حلكه وكلها خادمته وكلها دكله عد عيناك ...

هو بي طبيعه من واحد يدخل للسجن بسرعه يسويله عركه وياه حتئ شني يسيطر عليه ومحد ياخذ مكانته بالسجن

اول ما دخلت كعدت علئ الكاع وحطيت راسي علئ الحايط هو صاح علئ واحد...هييي انت كوم هفي عليه

خطيه ولد كام وضل يهفي عليه وهو يباوعلي،ويخوز بيه اشرتله براسي،بمعنئ...خير شكو ابو الشباب شو تخوزر

ضل هو يخزر بيه واني اخزر بي انوب صاح علئ واحد ثاني...هي انت كوم فرج رجلية

كعد الولد يفرج برجليه مبين واحد مجرم وقاسي و وجهه كله شخوط

صاح عليه...هييي انت شسمك

اشرت علئ نفسي ...تقصدني ؟

كال بعصبية...اي انت قابل اكو واحد غيرك

ضحكت باستهزاء...اسمي فاروق

كال بعد ما طك ركبته...اهااا يله فاروق افندي كوم فرج رجليه لا اجي اكسر راسك

ضحكت ببرود...خفت ضليت ارجف خاب ما تطير من يمي لا اطلع قهر يوسف كله بيك

دفع الولد لزكه بالحايط و وكف كال..لك ابن ال....انت تغلط عليه اليوم اخلي السجن كله ينوح عليك

وكفت وانصدمت بويه شني هذا شكبره شكده شطوله شياكل ياكل بيوت وهل ضخمه

شسويله يا ربي حركة جاكي شان لو بروسلي والله فلك بعد اني من غلط علئامي تخبلت كتله بغضب...ولك ابن الزفره انت تغلط علئ امي اليوم اشك الخلفك

هجم عليه واني مدري شلون الله قواني رغم رجعت خطوتين واجيبه ببوكس علئ وجهه شو هذا وكع طب علئ وجهه

من شفته وكع انصدمت لا ممتوقع وارجع والزمه بخوف مبطن من داخلي،بس ضاهر قوه من الخارج واهز بيه...ولك انت تغلط علئ ام فاروق البصراوي ولك شويمخ ما غلط عليها تجي انت العار تغلط عليها

واطيحله رفس وهو يصيح خويه دخيلك وخشمه يصب دم والسجناء يفارغون بينه ويدخلون الشرطه وياخذوني

طاحو بيه وشمروني بالانفرادي خلوني كاتلني الضيم يوم كامل ورجعوني كلت اني ما دام رجعت خلي اخوفه لطارق حتئ بعد ما يعيدها...

دخلت متعصب رفست الچربايه برجلي هم كمزو وكعدت اباوعلهم وطارق خانس كتله...طارق مي بسرعه

رد عليه...تدلل ابو حفصه تأمر امر

جابلي مي خزرته وهو راح كعد بمكانه صاح علئ واحد تعال ولك...روح اغسل ملابسي

ذاك جاوبه...خاب
"هو تخبل وكف كله...مو اجي اشك حكك شك

رد عليه...دروح لو ما البارحه فاروق خبزك خبز بيك خير تسبع علئ فاروق

كتله...شوفو كل واحد هنا يخدم نفسه بنفسه وبلا اكلان نعل مفهوم

هم سكتو والله ضليت ليلة بيوم واجاني الشرطي صاح باسمي خليت وطلعت اول ما دخلت غرفة الضابط واشوف ذياب ملهوف عليه

ابتسمت عليه وهو تقرب مني حضني حييل باسني وهمس...هااا خويه فاروق شلونك اجيت من الغربية تا اطلعك من السجن

جاوبته بحيرة...لا عادي مرتاح بس يوسف خطية وين صار بيه الدهر انهزم وما اعرف اذا صوبو او لا لان من طلع هم رمو عليه

رد عليه...لا يووول لتخاف علئ يوسف يوسف سبع وبطل ان شاء الله ما بي شئ وانه اجيت وهساع راح تطلع افراج لان اطلقو سراحك

استغربت...منو كلك اني بالسجن ؟ شبسرعه وصلت الاخبار بعدين انت بالغربية واني بالبصرة...

ضحك كال...اي سوزان هي خابرت وكالت لك يعني ذياب فدوه اروحلك دادا فاروق اخذو الامن الحك عليه ديسجنو واخاف يعدمو واني مدا اتخيل حياتي من دون فاروق

عاد اني يووول فزعت لاخوي واجيت ركض

ضحكت...هههههه ادري سوزان خابرتك رائد شكبرك شكدك تقلد صوت سوزان بله ما تستحي علئ رتبتك

رد عليه...شسوي يوول اذا هي سوزان تحجي الواحد گوة

...هههههه اي بس ترا احبها

خلينه وطلعنه من السجن جنه بالسياره كال ذياب...فاروق تعرف جدك أجل عرس حفصه وقجم عرس قتيبه اشنو السر ما اعرف

ان شاء الله خلال هل اشهر العرس واني حجيت ويه جدي بموضوعك وهو كال...خلي يرجع ويحضر عرس اخو هو ومرتو سوزان

ضحكت...هههه شنو بيت الشامخ ناصبيلي كمين واني ما ادري بروحي

رد عليه بصدق...لا يول بس اني حجيت ويه جدي وكتلو البنت تحبو وهو يحبو الغلط الاساسي من امها لسوزان هي لشبكت لحيه بالحيه

كعدت وياه وفهمتو ان انت ما الك ذنب بلي صار هو كال...ما عندي شئ وياه واذا حاب يحضر عرس اخو هو ومرتو خل يحضر عرس اخو

جاوبته بتنهيده...لااا ما احضر اكيد اني علاقتي انتهت ببيت الشامخ

رد عليه...لا لا ترا حذيفه فقير ويحبك ويتمنئ تحضر عرسه انت تعرف حذيفه مو يم بيت الشامخ وبعدين ترا هو هم اخوك مالك شغل بيهم اخذ مرتك وروح

صفنت وسكتت ما جاوبته جريت نفس...صار هواي مشايفه حذيفه تدري حتئ ناسي ما اتذكر وجهه حذيفه وهو لو فعلا حلسبني اخو جان سأل عني مو ناكرني ولا فد يوم حسيت بي اخ اليه...

ذياب بتنهيده...ميخالف فاروق كتلك يول حذيفه فقير وعلئ نيتو واني وانت اخوانو لازم نقربو منه و
نشجعو يحبنا تا نخلصو من الشامخ ونلم شملنا

ارا حذيفه هم مضلوم تصور راد يبجي علئ جثتة ابوي جدي ضربو بوكس يكلو الرجال ما يبجي بله هذا شتحجي وياه

اردف بحزن...حذيفه مثل ابني اعتبرو صغير واذا لگه ضهر يسند روحو عليه ما راح يهتم لأوامر الشامخ واكيد يلتجئ النه احنه اخوانو لهذا السبب احنه لازم نسايسو ونحببو بينه نخلي يحبنه اكثر من الشامخ

يهاجس نفسو احنه اهله وناسو ومن الدنيا تميل بيه احنه نميل وياه واكيد ما راح نخسر وحتئ وئام لازم نقربها منه بدون صياح وغلط ومكاون حتئ ما نضعف من كرامتها وشخصيتها جدام رجلها

انت ما تدري بيها شلون فرحت من رحنه زرنا رجلها وهو بالمستشفئ هاجست نفسها عندها اهل عندها اخوه تشد ظهرها بيهم

وحذيفه و وئام نفس الضعف ولازم يلتجون النه تنسوي عشيرة احنه سوه ونلم شملنا بدل ما مطشر هيج والشامخ ضال يفرض بقوانينو علينه احنا اذا تكتفنا وصرنا ايد واحده اكيد راح نشد عزمنا ولا الشامخ ولا الاكبر منه يكدر يلوي ذراعنا لهذا السبب اني انصحك تروح العرس حذيفه

وهل خطوه شوكه بعيون بيت الشامخ كلهم فاروق جاي بعرس اخو لا خايف ولا خجلام لان ما مسوي شئ غلط ولي يريد يتگاون وياك انه قبلك اتكاون وياه واكص راسو وراس الخلفو...

جريت نفس...تمام اخذ سوزان واروح ولي،يحاول ياخذ سوزان مني اني اكص راسه وراس الخلفه اني ما عندي شئ اخسره غير سوزان وامي،امي،بالحفظ والصون بس،سوزان ما دام وراها صبيحه ما اعتقد ارتاح

جاوبني...لا سوزان تحبك ما اعتقد تهتم لكلام امها...

همست ان شاء الله

رجعت للبيت وتلكتني امي وجدتي يطشرن علئ راسي جكليت يابس جنه حصو مال الحصار بعد بعد ضحكت...ادري شنو ماخذ الدكتوراه تطشرن علئ راسي جكليت لو محرر فلسطين هو كله يوم واحد انسجنت ...

المهم شفت سوزان تباوعلي تضحك فرحانه يا الله هاي بنت الكلب شكد احبها انوب ضحكتها دكول مدري شني مو ضحكه مصاص الحصار

انوب من اشوفها اتحمس اتمنئ اخذها بالاحضان ونخلف نونو نازك صغيروني مثلها بس وين احنه حاليا بس مخطوبين خخخخخ

اول مره اشوف هيج ناس مخطوبه الخطيبه كاعده ببيت خطيبها جنهم معرسين مدري شني،من مله اني وسوزان

والله واسحبها للمطبخ و رويت عطشي منها انوب بت الحيوانه ولا ينشبع منها

بعدها كعدت وياها وفهمتها كلتلها راح نروح لعرس حذيفه اخوي هي خطيه فرحت ما صدكت هي سوزان مسكينه كل شئ يفرحها كالت...صدك حشوف ماما وبنات عمو...اووه اقصد خالو ياااااااي ممصدكة

رفعت اصبعي بتهديد...بس شوفي سوزان اني كتلج ترحين بس ما اريد وحده تلعب بعقلج او وحده تقشمرج انتي عقلج براسج وتعرفين منو يريد علاقتنا تستمر ومنو لا فانتي لا تتاثرين بالكلام

حطت ايدها علئ خدي بحنان...لا حبيبي اكيد مراح اتاثر وبعدي اني قراري حاسم ما اعتقد اكو واحد يكدر يغيره يروحي المهم اني احبك متأكده من مشاعري

ضحكت... هذا هو بعد بيتي انتي محبوبتي اموت عليج

حضنتني ودخلت امي بسرعه واحد ابتعد عن الثاني هي كالت...هااا العفو ما ادري

سوزان خلت خصلة شعرها وره اذنها بخجل ...لا عادي باجي

المهم احنه قررنا نروح للعرس قبل العرس بكم يوم رحت شتريت ملابس لسوزي اريدها تطلع كشخه ههه ولو هي كشخه من زمان واشتريت الي ملابس ولله الحمد....

........... . . .....
سوزان ....

وصلنا للأنبار وتحديداً لبيت جدو الشامخ ، قبل لننزل من السيارة .. فاروق لزمني من أيدي وكال بنبرة تحذير ..

_ سمعي سوزي انت روحي سلمي عليهم وطلعي بسرعة انه انتظرج ابيت ذياب ماشي ؟

عكدت حواحبي وسألته : ليش اطلع بسرعة ؟
رد ببرود .. وهو يخلي ايده على ذقنه ويحركها ..
_ احسن ...

كتله عبالك ماما تأثر عليه ؟؟
كال بسرعة : لا يبا مووو هيج يله يله نزلي هسه راح نبقى بالسيارة إحنة ؟

نزلت وهو نزل ، اخذنا الجنط ومشينه بالكراج .. ومن بعيد نشوف جدو وماما وحذيفة اخو فاروق كاعدين بالحديقة ...

اجاني صوت فاروق وهو يكول اووو باعي الثنائي الغثيث .. خو الصبووحة الحية ترفعلها القبعة وتاخذلها تحية
وخو شمخي ابليس يدكله صدر ويكله استادي

كوة كتمت عصبيتي وكتله فااارروق اش ليسمعوك ...وهم لتحجي على ماما ونبي حجايه ثانيه علئ ماما بعد ما احجي وياك

رد هو شكايل انه ماكلت غير الحقيقة دنطيني جنطتج سلمي ولحكيني لبيت ذياب ؟

شنو مراح تسلم عليهم انت هماتين ؟

رد ارفع ايدي من مكاني كلش كافي ..

وصلنا مسافة قريبة عليهم واجه حذيفة سلم علينا وحظن فاروق وبوسه .. واني سلمت عليه وباركتله ..

بعدها فاروق رفع ايده عود يسلم على جدوو
وجدو همين بس كال هلا ومرحبا من بين شواربه ..

وماما انخبطت ملامحها ، بين الانزعاج والصدمة ..

راح فاروق لبيت ذياب واني سلمت على جدو بوسته
وحضنت ماما حيييل وهيه هم حضنتني ..

صار فترة طويلة مشايفتها مااعرف شون تحملت جنت ماافاركها ابد شون كدرت هاي المدة كلها ما ادري ..

جانت بعيونها نظرات العتاب .. والفرح بنفس الوقت ...

اخذتني وفتنا على البيت .. وكفتني بالاستقبال
ولزمتني من زنودي وتباوع على كل انش بيه
ماما سووزي شلونج مرتاحة ؟ ويه هذا المهتلف ؟

حررت نفسي منها وجاوبتها بعدم رضى ماااااما هذا الي تحجين عنه زوووجي رجاءً رجاءً بلا هالالفااااظ بحقه تره مااقبل وين الاتكيت

صكت على اسنانها وكالت متقبلين متقبلين وولج عليمن عليمن على هالطايح الحظ هذا ؟ السااقط هذا الفكر المهتلف المجرم ولج خطفج خطفج بعد شيسووي أكثر ؟

جاوبتها : ماما حجاية زايدة على فارووق والله يحرم لساني يجي على لسانج !! هاي شنو يعني اني جايه حتئ تغلطين علئ فاروق ترا ميصير هيج

عفتها وطلعت كعدت يم البنات اني ما احب هيج لعبو نفسي ثنينهم محد ديتنازل واحد يغلط علئ اللخ ماكو اي احترام واتكيت

........... .........

قربى...

سوزان راحت هي وفاروق للانبار واني كاعده هنا ذياب جان موجود

سبح وبدل كال...قربى يله حضري نفسج تنروح

وكفت بفرح ...محضره نفسي حتئ جبت ملابس وفساتين كولش حلوه جبتها من بنت خالو عسوله مو هي هسه عرست

عقد حواجبو...فساتين لشنو يابه ؟

بهتت ملامحي وفشلت...غغ غير كلت راح اخذج وياي للغربية بعرس اخوي انت مو كلت

دار ضهره بملل...اهو قربان انتي تحجين صدك ما تخافين علئ نفسج بويه شلون اخذج للغربية وانتي حامل والطريق وعر

فتحت عيوني مصدومه...شنووو انت شدتحجي لعد مو كلت اخذج وانت تعرف بيه حامل وهسه دكول طريق وعر

رد عليه...اي انتي هسه ببداية حملج والاشهر الاولئ خطره لازم راحه عبالي تولدين او تدخلين بالاشهر الي ما تضر بالجنين

ضربت رجلي بالارض متعصبه...لا انت ما فديوم كلتلي كلام ونفذته دومك تجذب عليه وتخليني اتحمس وافرح وتالي تكسر بخاطري وتحطم امالي اذا انت ما ناوي تاخذني وياك شكو دكول

اني ما احب هاي الطبيعه هيجي طبعي اني امي من جانت دكول حاخذج للسوك وما تاخذني ازعل واطنكر واضل ابجي احسها غدرت بيه وما انطتني كلمة صحيحه

تقرب مني راد لزمني كال...ول بويه شبيج عليش تعصبتي

ابتعدت عنه بسرعه ورفعت اصبعي بتهديد والدمعه بكرف عيني...لا الضاهر انت بس ناوي تلعب عليه ولا كلتلي كلمة ونفذتها كلت استقيل وجذبت عليه وفرحان صاير رائد اترقيت بعد

ركز بوجهي كال...تحجين صدك يول هيج عندج الاستقاله سهله شبيج بابا

صحت بوجهه بغضب والدموع ملت وجهي...لعد شكو تجذب عليه ليش تنطيني امل ليييييش اكرهك والله كرهتك ليش تستغلني هيج الئ متئ انت هيج

كول ما اريد اخذج لعرس اخوي لان استنكف منج واستحي منج انتي كلج خلك زوجه سريه باجر عكبه اتزوجج غيرج وبالعلن وانتي ترحين بستين داهيه ما راح اعترف بيج

فتح عيونه مصدوم...شنوو يول شبيج تخبلتي انتي شلون هيج تضنين بيه

تخصرت بغضب والدموع بعيني...والله هذا الواضح

بلع ريكه وتقرب مني كال...الواضح شنو اني خايف عليج

صرخت بيه بانهيار...ملييت من هذا الكلام ملييت اني خايف عليج اني واني انت ما خايف من شئ انت بس خايف شلون تتخلص مني

سحبني الحضنه واني ادفع بي وابجي وخر عووفني لا تكعد تحضن وتبوس حضنك ما يجبر الخاطر ولا يصلح الي صار تفهم شنو انت جبرتني اتزوجك وتالي شوف اغلاطك ويايه

انت شنو بس كولي انت شنو حبيتك وحملت منك مرتين وكل هذا وانت مخلصها ويايه اسوي هذا الشئ ومتسوي ذياب تعبتني وشغلت تفكيري متت واني اصلا ميته واريد احيي بيك

اني وراي شمات يا ذياب لا تخدعني ولا تكسرني لا تخليني علج بحلك عمامي اريد من تحجي كلمة توفي بيها اليه مو تقشمرني ترا ما استاهل والله

كعد علئ الجربايه ونفخ بقهر كال...واني شنو الي خدعتج بي اني رجال اخاف عليج

اذا علئ اهلي من باجر اني عالن عن زواجنا بس شلون اني رائد وانتي سجينه بتهمة معارضة النظام شلون

اني اذا مكدرت اسيطر من ناحية الحكومه مراح اكدر اسيطر من ناحية اهلي تعرفين شلون لو لا ...

الحكومه تلوي ذراعي بيج والشامخ يقدم بلاغ ضدي حتئ لو صرت رائد اطلع اسباب صحيه كتلج من قبل بس مجاي تصير انطي صبر

مسحت دموعي حيل...لعد ليش دكول اخذج بعرس اخويه انت لو تعرف نفسك ما تكدر لا تخليني ابني أمل...

ضحك كال...شبيج بويه جنج طفله ماخذين لعابتها عليش هل بجي تردين اشيل ذنب هل عيون

صحت بوجهه...لا تتغزل حتئ غزلك كرهته اييع

عفته وطلعت محروك كلبي منا هرمونات الحمب ومنا خابت امالي وما رحت لعرس اخو واني جنت اتمنئ اروح للانبار واشوف عرس اخو واحس نفسي منهم وبيهم ...

رخيت ضهري علئ جذع الشجره وكطعت شويه من العشب ودموعي،بعيني

حسيت كعد يمي وسحبني باس راسي وحضني لصدره واني اطلقت العنان لدموعي وبجيت بصمت مريب

كال بحزن...راح اخذج وياي تتدللين وانعل حتئ بيت الشامخ

جاوبته بهدوء....لا ما اروح

ضحك وضمني لصدره اقوئ...لا ترحين وغصبا عنج

مسحت دموعي بباطن كفي وهو سحب ايدي وباسها كتله...لا فكرت وشفت كلامك صحيح بصفتي شنو رايحه وبعدين اخاف تصير مشاكل وننفصل انوب

رد عليه وهو يبوس براسي...لا ما ننفصل وترحين وغصبا وهساع نروح نشتري ملابس تا تطلعين احلئ وحده بالعرس وتشوفين هينا الچوبي الانباري شلون حلو

جريت نفس...بس اذا انت ما متطمن من ناحية جدك شلون لازم ما دكول اني زوجتك افضل ما اروح

كال بهدوء...راح اخذج انتي والسجانه العدنه ام خمائل تعرفينا وابو خليل واكلهم انه عزمت اصدقائي وانتي بنت ام خمائل

ضحكت ومسحت دموعي...يعني اني خمائل قصدك

ضحك كال...اي وحده بس امشي ويله تهيري ماكو وكت لازم اروح علئ بغداد اخذ وياي ام خمائل وابو خليل ومناك نطلع

حاولت اني فعلا ما اروح اني بعدين فكرت بكلامه شفته صح بس اني ضجت لان جذب عليه خلي لا يكول اخذج بس ما احب يكول وينطيني وعد...

والله صدك رحنه البغداد ضلينه يوم وهو خابر جده من الفندق كله راح اجيب وياي ضيوف وجده كله اهلا وسهلا بيك وبضيوفك

وانوب اخذني اشترالي فساتين ثنين من شارع النهر لان ما عجبه ملابس عسوله يكول هوسه مع العلم اني عجبني

وبعدها رحنه اني وياه وام خمائل وابو خليل دخلنه بطريق صحراوي وفعلا وعر وجان يسوق بهدوء خايف علئ ابنه مو عليه هههه

واني كلبي يدك بالثانية الف دكه خوف ورعب وقلق راح التقي باهله واخيرا اتعرف عنهم اشوف اطباعم

جانت ام خمائل تحجي وياي بس اني ابد مو يمها افكر بيهم ...

وصلنه لمنطقتهم جانت كلش حلوه ومزارع زاهيه وريحة الريحان تجنن جنت امشي،واتلفت بيها وعيوني تنبض بالفرح...

فتح باب الحديقه الواسع كال ..ادخلو تفضلو يا اهلا وسهلا بيكم...

دخلنه وطلع رجال ضخم لابس دشداشه بيضه وعركيشنه ومبين عليه الترف والبذخ كال ...هلا وچثير الهلا هلا بذياب وضيوفو...

نهاية البارت....يتبع