الذنب 32
رواية...ذنب عينيك...سلالة العنفوان
بقلمي...نور سمو العراق
💔💔💔💔💔💔💔💔💔
ترا الما عنده حظ يموت
گبل ميموت موت الله
يظل يتعثر بممشاه
محد گاله "اسم الله"
................................
سوزان...
فتحت الباب دا اشوفها وين راحت خطيه تكسر خاطري ودا احاول افهم شنو الي بيها
اول ما فتحت الباب واني انصدمت صدمة عمري لا مستحيل هاي شنوو شمسويه بحالها...
باوعتلي بنظرات مكسورة وذايبه والمقص بيدها وشعرها الكثيف يوكع علئ اكتافها مثل الريش المنثور
سديت الباب بس خفت منها اخاف تضربني بالمقص فحبيت اتعامل وياها مثل الطفل لما نخاف عليه ونطمنه وبعدها ناخذ منه الحاجه
كلتلها ببتسامه...الله هاي شنو ؟ شكد حلو كاصه شعرج ..بس ليش كصيتي ؟
كعدت يمها وسحبت المقص من ايدها ببرود ردت عليه بانزعاج...ما احبه احسه ياكل براسي واني راسي يوجعني
بلعت ريكي واني اباوعلها مشيت خطوات وشمرت المقص من الشباك وتخلصت منه رجعت الها كلتلها بحزن...بس خربتي شكلج وشعرج كان كولش لايگ علئ وجهج وطويل
حطت اديها على راسها وصرخت بوجهي...اسكتي اسكتي لا تحجين راسي يوجعني راسي رااااح اموت
انقهرت عليها واحتاريت شنو اسوي لزمت اديه بتوسل كالت ...عفيه خليني اطلع منا اني لازم اروح
تنهدت ولزمت اديها...تمام هسه حخليج تطلعين لان شنو فاروق كاعد هياته فلازم يطلع يله لان يرجعج ويكول لذياب عليج...
بلعت ريكها...شوكت يطلع جسمي موتني اريد علاج..
همست بصوت ناصي...شويه ويطلع
ضلت كاعده وحاضنه نفسها وشعرها مكرطفته ونص طويل ونص كصير واصل لرقبتها ...
حرامات لو هي عاجبها تكص شعرها كان اخذتها للصالون لصديقة ماما تكص لشعر كولش حلو بس تهورت هي بعد هماتين مريضه
وعدتها من يطلع فاروق اطلعها واول ما طلعت قفلت الغرفه عليها بالقفل وانوب شسويت رحت الفاروق
لكيته متمدد علئ السرير ويدخن ويفكر بشنو ما اعرف فيقته من سباته وصحت بصوت عالي...فاروق هياته المفتاح هاي زوجة اخوك ناويه تنهزم تريد تجيب حبوب واني مالي شغل لا تورطوني معايزه مشاكل...
عدل كعدته كال...بله جيبي
تقدمت منه خطوات وتقربت منه مديت اله المفتاح وهو سحبني ومددني بحضنه
عطت بصوت وضربته...عزا بعينك شدتسوي والله انت ابد ما عندك تربية
باس خدي كال...لا اريد اتشكر منج لان اصيله ما رحتي وانهزمتي انتي ومرة ذياب وخليتي الجنوب والغربية والوسط ياكلون وجهنه وعلئ ابو شني نسوان ولد الشامخ مهزومات الحمد لله من فكرتي بسمعتنه...
رديت عليه بغرور...مفكرت بسمعتك ابد بس فكرت اذا هيانه البنيه اذا انهزمت وهي مريضه وعقلها مو براسها وين تروح خطيه هنا اامن الها واني من هذا لباب لا حبا بيك ولا حباب اخوك تمام يا امي؟
هز راسه...تمام يمه
بلعت ريكي بخوف من لمساته الجريئة بس سويت نفسي مفاهمه باوعتله ...اكولك فاروق اشو مشفت باجي
ضحك...ههههههههههه ولج مو اسمها باجي اسمها باجله ان شاء الله اجيبلج تتدللين
استغربت... باجله شنو ؟ امك اسمها باجله مو اسمها جميلة
رد عليه مستغرب اكثر مني...شجاب امي علئ الباجله ؟
افتهمت قصده كتله بعتب...دا اكولك باجي باجي يعني عمتي امك دا اقصد مو باقلاء...
ضحك بصوت عالي وضربني علئ كتفي نحنيت بضربته حسيت فطست مكد ما يرفس بيه
كال...هههههه خرب غيرتج سوزان طلعت امي اسمها باجيه مدري باجله بقاموسج ولج منين تجيبن هل كلام انتي
واردف وهو مختنك بضحكته واني اتمنئ اضربه ...كال ولج عليج سوالف مع احتراماتي الج بس تدرين شوهتي اللغه العربية نعلتي والديها كولي عمه باجله شني
صحت بي متعصبه...جاوبني علئ سؤالي لويش مدا تعرفني عليها ترئ مراح احسدها هي وبيبتك وجدك
رد عليه...لا ان شاء الله اعرفج عليهم بس يجي ذياب من بغداد يضل يم قربى...
جاوبته...خلي نعزمهم ونتعرف عليهم افضل مو صح ؟
جاوبني باستنكار...لا يبا انوب ترحين تموتينهم انتي ومركتج الوردية وتمنج يكرط والبيتنجان مستوي من صفحه وحده...
رديت عليه بغرور...هذا الموجود عاجبك عاجبك معاجبك الطخ راسك بالحايط
لزمني من شعري وهزني...شلون راح الطخ راسج بالحايط ولج انتي ليش لسانج طويل
لزمت ايده بتوسل...ونبي ونبي ما قصدي يعني كلامي مؤول بمعنئ اذا معجبك اكل بالمطعم
تركني و وكف عدل قميصه كال..اكل بشيب الخلفج احسن...وبعدين عندي مره معتبره شكو اروح اكل بالمطاعم...طالع محتاجه شئ ؟
جاوبته واني اباوع لاضافري...اي اريد مبرد اضافر اضافري طولانات وحابه ارتبهن وهماتين اريد تروح لبغداد تجيب ملابسي من بيتنه وتجيب بطبوط مشتاقتله لا ونبي اصعد فوك بثوب بيبيتك الي من دون ردن وافضحك وقد اعذر من انذر...
باوعلي بطرف عينه وهز ايده واني مشيت كدامه متعصبه اكو طماطه وخبز بالمطبخ خلي اضمهن لا ياكلهن واني جوعانه كلت اضمهن بالگدر...
صاح ورايه...سمنانه والله ال....سمنانه
فتحت عيوني مصدومه من جرأته...عيب عليك ما عندك اخوات
رد عليه...لا والله بس فلفلة والهرمون الذكري صاعد عندها اكثر مني...
خليت ورحت كعدت بالمطبخ وهو طلع وقفل الباب اتذكرت من جان موجود عند بيت جدو الشامخ وهو شاب مراهق
دوم امي تتهمه بالتحرش بينه جنسيا رغم اني ابد ما فديوم حسيت من خلال كلامه او تصرفاته ان هو يتحرش بينه...
بالعكس اصلا كان مبتعد كل البعد عن الكل .اختلاطه قليل ويه بيت جدو...
هسه هو اصلا صار سخيف قبل ابد مو سخيف مشكله ماما ليش تحجي عنه
هو مو مجرم ولا سادي ولا حقير بس امي ليش تكرهه وما تحبه شنو السبب...
طولت هوايه هنا اني لازم احجي ويه ذياب يرجعني لاهلي لان حرامات دوامي...
............
قربى...
قربى...
بقيت اصارع واصارع قدري
ماعندي غير احاول اتحمل بكل ماعندي من قوة احتمال ..
لحد ما يأست وتعبت وتحطمت احس عندي رغبه كبيره اتخلص بيها من حياتي اقتل نفسي واخلص من عذابي
مادا اتأمل بشي حلوو ابد كل الي حولي عذاب بألم بمرض بموت بفرااك واذية ...اريد شي حلو يأملني ماكو كلشي حلو اندفن وبقى بس الالم
ذياب راح ولحد الان ما رجع وراسي موتني اريد دقيقة بس دقيقة بلا هذا العذاب الي ينهش بجسمي...لدرجة اتمنى ابقى بلا راس ولا هذا الدمار
كل شويه اخلي اديه على راسي واكمش شعري واعت بي ليفوك عسى ولعل اتخلص من هذا الوجع الي يجتاحني بكل جزء من ثاني ماتركني ولا ربع ثانية مااتصور حياتي بدون هذا الالم شون راح تكوون يائسة يائسة واحس راح يبقى يلازمني طول حياتي ...
فكرت اروح اسبح بلكي اخلص من هالوجع ... رحت سبحت وجيت بس هو الوجع هوو ماخلصت منه بعده راسي يريد ينفجر ...
وكفت كدام المراية ماشوف كبالي غير جثة تنتظر الدفن وجهي تعبان وشااحب ومابي ذرة حياة ...
ردت امشط شعري شفت نفسي ما عندي اي قابليه ان امشطه فمن طلعت شفت مقص مخلينه علئ الدرج الطين اخذته بخفاء من الكل ودخلت للغرفه سديت الباب ولزمت خصلاته وكصيته كله
وكع بحضني غمضت عيوني واني اتذكر ذياب من جان يتغزل بشعري ويحبه واني اليوم تخليت عن اكثر شئ هو يحبه
بس مو بيدي اني اتمنئ اكتل روحي كلها مو بس اكص شعري اتمنى اكص راسي همين ... ورغم مشتاقه اله واحبه بس اكو اشياء بداخلي تضج برغبه كبيره ان اتخلص من كل شئ حلو يخصني...
تخليت عن شعري وبقيت الوب من الالم وشي بداخلي يريد ينفجر مثل بركان يريد يتخلص من حممه صرت ماعرف شنوو اريد هواي اشياء مزدحمة بيه ...
دخلت سوزان حاولت تطمني وبعدها طلبت مني اطلع اروح اجيب حبوب لان بعد مستحيل اصبر...
بعد ما طلعت وتركتني رحت وراها افتح الباب لكيتها قافلته ضربت الباب بيدي ياااا حيوانه جذابه قفلت عليه الباب...
لميت شعري المكصوص وخليته بوصله ولفيته حضنت شعري المغدور وبجيت بصمت علئ حالي وحاله
ذياب تاخر و وهو وعدني ياخذني لاهله وراح وبعد ما اجه وكال راح اجيب حبوب وماكو. ..
كحيت حييل واشوف الدم طلع من حلكي وطعم الدم لوث لساني مسحت شفايفي بخوف واحس بشئ من بين المريئ للمعده مثل الشيش الحديد وداخل بمعدتي...وراسي صداع مو طبيعي وكل اسناني توجعني...
نمت تعبانه وافكار تجول براسي شلون احصل علئ الحبوب وانتصر على هذا االالم
......... ......
فاروق...
رحت اشوف امي خطيه صايره تغار عليه من سوزان عبالها طايح بالعسل ما تدري مخلصها نواشف محتركه...
المهم رحت الها كعدت يمها وبست ايدها سألتها عن احوالها وهي ردت بخير بس جان من وره خشمها...
كلتلها...خير يمه شو احسج زعلانه
ردت عليه...روح روح لبت صبيحه نستك حتئ امك صرت بالسنه حسنه يله تجي
ضحكت وحضنتها...ههههه والله عليج سوالف ما تدرين شصار يمه جااا غير اخوي ذيب طلع متزوج بسر ومرته مريضه وهو راح لبغداد وعافها عندي وراح واني محتار بيها
عقدت حواجبها وبهتت ملامحها..وشني اخوك متزوجها بالسر ليش يريد مصير لبت مثل مثلي وهو مثل ابو
جاوبتها...لا ذيب مو مثل ابو ذيب يختلف ومبين يحبها للبنية وذياب ما متزوج وان شاء الله يكون ضد الشامخ
اصلا اني فرحان بزواجه لان راح يكسر خشم لشامخ
ما عجبها كلامي لان هي ضايگه اللوعه بس سكتت وبعدها كالت ...شوكت تجيب سوزان اريد اشوفها
رديت عليها...ان شاء الله اعزمج انتي وبيت جدي وتشفونها لان بصراحه ما مشتريلها ملابس طلعه بس ملابس جدتي متكدر تطلع بيهن مصدكه روحها لابسه اتك جدتي هههههه
ضحكت بحزن...تضل بت صبيحه ما احبها هه
جريت نفس...تعرفين يمه سوزان تختلف عن امها هواي تشبهه ابوها هواي من ناحية الشخصيه والتصرفات وما تحب الغلط
سألتني...تحبك
تنهدت...لا واصلا اني نويت بس تطيب قربى ارجعها هذا هو اني مشيت كلامي علئ الشامخ وصبيحه والبنيه ما الها ذنب
خليت ورحت واني يعز عليه افارك سوزان بس ميخالف عينا لاجل عين تكرمون هي حبابه ما اريد اكسرها اكثر من هيج
واشوفها ما تحبني خليها تحقق احلامها بعيد عني لبنيه ما طلع منها ذنب أو غلط غير انها ركعتني بطابوكه...
كلت خلي اروح اخابر علئ عمر خطيب اختي فلفله اطيح حضه اذا ماذيها بس فلفله تاذي بلد كامل ما اعتقد بس ميخالف الاحتياط واجب وامي وصتني...
والله صدك خابرت طلعتلي عمتي كالت...منو وياي
جاوبتها بثقل ..اني فاروق
انصدمت كالت...شنو فاروق لك عمه شلونك سوزي.وينها امها متخبله عنها خطيه جيبها
رديت عليها بغرور...ان شاء الله يصير خير عمر موجود
كالت...اي موجود يصبغ بغرفته.راح يعرس بعد اسبوع
انصدمت...شني شبسرعه لهل درجه متفاهم هو وئام
ضحكت....هههههه يموت عليها وتموت عليه هاك هذا عمر وياك...
حجيت وياه...شلونك وشالة الزلم نسيبي العار
رد عليه ...هلا والله ذكرنا ال...طوف هسه جنت بطاريك
جريت نفس...يكولون راح تتزوج اكلك شلونك ويه اختي بس لا مزعلها حتئ اجيبك سحل من بغداد للبصرا
تنهدت...ولك اختك كارثه شلون محبوبه ولسانها عسل ولا جنها اختك متسامحه وتسمع الكلمة حبيت اسلوبها الصراحه
جاوبته بشك...تحجي صدك هي وئام ادري بيها عاقله تربيتي اخت البصراوي بعد بس مدري احس تضحك عليه
عمر...لا هي شويه عصبية بس جاي أسايسها اعمالها مثل الطفل وجدي شامخ شاهد عليه
فاروق...اي خوش جااا عبالي مضوجها ومبروك ان شاء الله اجيبلك درزن استكاين هديه
ضحك ...وياهن صحونه وصينية
سديت المكالمه هذا ابو الدكان
يحسب عليه دقايق واخاف اضل شويه وعمر يطلب جاي وصينية بعد...
والله اخذت فواكهه من الطريق ورجعت للبيت لكيت سيارة ذياب طابكه
دخلت لكيته يم مرته اني هم رحت يم مرتي جاا وحد
...................
..................واني بعز نومتي كعدني الوجع ورجعت الوب مرة اروح تكعد بركن الغرفة اكرفص مثل الطفل وايديه على بطني
واتنفس سريع وارتجي على الحايط واخلي مؤخرة راسي عليه واباوع للسكف احس الدنيا تدور بيه مثل الدوامة
وارجع انصي راسي عسى ولعل يخف بس ماكو فايدة عبالك ملكني هالوجع ومايريد يفاركني
كمت من مكاني وكعدت بنص الغرفة ونطيت ظهري للباب ..وحضنت رجليه وخليت راسي على ركبي حسيت الباب انفتحت يمكن سوزان اجتي مهتميت الها شراح تسويلي قابل لو جايبه اكل لو جايبه مي لو تطمن عليه ياريت لو تخلصني من هالالم
حسيت بخطوات ورايه توقفت شويه وبعدها استمرت تأكدت هاي مو سوزان ، التافيت واباوع اشوفه ذيب يباوعلي مصدوم ..
تعلكت عيوني بي واتأمل منه جاي وجايب علاجي .. باوعتله بنظرة تووسل وعيني اجت ع العلاكة الي شايلها
وكف باوعلي مصدوم وهمس قربى ليش ؟
اني اصلا حتى ناسية موضوع شعري ...
خمطت العلاكة منه .. جبتلي علاج ذياب راسي راااسي راح ينفخر
كعد كبالي وسند جسمه بركبه ولزم وجهي باثنين اديه
ويباوع على شعري
هزيت راسي وهو ثبت وجهي قوي وكال دحكي قربان عليش هيج مسويه بنفسج ليش وين شعرج ؟
تذكرت شعري وشكد هو يحبه ، شهكت شهكة طلعت كل الالم المحبوس بداخلي ...ظليت اتمتم ذيااب ماكدرت ذياااب مااكدر اتحمل ماااااكدرت والله
هو حس بيه شكد متوجعة ، خله راسي على صدره ويمسح على راسي ، استمرت الشهكات تطلع مثل طفل يبجي ويجر نفسه وكوة يكمل البجية اني هيج واني على صدره
كعد بالكاع ووسحبني عليه اكثر ، لملمني كُلي ويمكن يتمنى بهاللحظة يحجزني بداخل ظلوعه ...
رفعت راسي ليفوك ومن بين شهكاتي سألته
جبتلي علاج بعد ما اتحمل ذياب ...
لزمني من معصم ايدي وبعده راسي على صدره وهو حنجه خلاه على راسي من فوك
كال اي اي جبتلج هساع تاخذينها وتصيرين زينة
ظل ينثر بخصلات شعري بين اصابعه ويباوعلي بعتب ...
همس جنت احبه جثير ياقربان جثير
تمتمت سامحني انته مادري على شنو متحملني اشمرني بشط العرب واخلص مني وخلصني
لزم وجهي باثنين اديه وقرب وجهي على وجهه
كال حشوة افادي انتي لج انه لكيت الدنيا كلها بيج وبحضنج شون اتخلص منج لا تكولينهه هاي قربان
ان شاءالله تعدي هاي الايام وتصير سوالف وذكريات نسولف بيهه ويطول هل شعر لحلو ويرجع يورني ويشعل شيب الشامخ
هزيت راسي ونشغت وهو لزم اديه
واني اكوله من بين شهكاتي وبچــاي
مادري شوون سويتها ذيب بس مدااتحمل والله مدااتحمللللل
مددني وظل يفرك براسي باصابعه الابهام على كصتي يضغط على راسي حسيت براحة للمساته
وعيوني تغمض لا ارادي
بعدها حسيت نعست هو دنك باسني فتحت عيوني فزيت ...
كتله اريد علاج ذياب اريد حبوب ..
كال وهو ياخذ العلاكة ويفتحها جبتلج والله انطيج بس بشرط تسوين الي اكلج عليه
بتساؤول كتله شنوو هو شنوو اسوي ؟؟
كال راح اجيبلج كلاص عصير تشربينه كله مفهوم ووراه تاخذين العلاج ...
هو كام على حيله جلبت برجليه وهو واكف واني رافعة راسي عليه لا فدوى انطيني وشتريد مني اسوي والله
دنك وكرفص كبالي بعد خصلات شعري الملفوفة والقصيرة والمبعثرة على جوانب وجهي
وكال لا تعذبيني وياج قربان ساعديني اخلصج من الي انتي بي
ظليت اتنفس سريع لمساته ابهامه على خدي مثل مفعول السحر بس حاجتي للحبوب اقوى بهواي من السحر
كام واخذ العلاكة وياه ، جلبت بيها وشكيتها وكع منها علاجات شرايط حبوب اخذت واحد بسرعة وفتحته بيدي وكعت منه كم حبابه اريد اللتهمها
بس هو جان اقوى مني لزم ايدي حييل عصرها واني ظليت اتحرك بحركات عشوائية ، لزمني حيل يريد يثبتني واني احاول اوصل كف ايدي الي بي الحبوب والمقيد من رسغي من يم ايده احاول اوصله لحلكي
من بين قواي المنهكة استسلمت لقوووته ورفعت راسي خليت عيني بعيوني اتوسل بنظراتي
بس وحدة ذيب عفية بس وحدة وعد بس اريد ارتاح
جانت ملامح وجهه ماتتفسر غضب على انزعاج على يأس ...
تنفس بعصبية واخذ كل الحبوب الي جانت بيدي ووكف على حيله
قربااان ساعديني حبيبتي تره كلبي جاي يتكطع من اشووفج هيج ماتهونيين عليه وحق هو الله بس هذا كلو علمودج انت دقايق اجيب العصير تشربي وانطيج بس حبه وحدة تمام
كال هيج ترك ايدي وخله كفه على جانب وجهي ...
ظليت اناشغ وابجي ...
رجع حضني بكل قوووته ...وباس راسي حييييل
سمعته يكوول بقلة حيلة ياارب ياااارب
وخلاني وكام وكف على حيله ..
فتح الباب وكف يمها واني جنت اناشغ وابجي سمعت صوت حسرته وتنهيدته وبعدها سد الباب
اني كمت على حييلي وكفت يم الحايط وظليت اركع كصتي بالحايط
عسى ولعل اخلص من الم راسي
فتح الباب وصاااح قربااان
جان بيده عصير خلاه على الارض واجاني لزمني من خصري وسحبني بقوووته الرجووليه وبعدني عن الحايط
كعدني بالكاع واني اناشغ وابجي واتمتم
وهو يبوس بكتفي ويهديني مخليني بحضنه مثل طفلة
قرب مني العصير قربه من حلكي هزيت راسي بقووة ماريد
وهو ظل يحاول ويايه يهمس بأذني يتوسل بيه يرفع كفوف اديه لشفايفه و يبوس بأديه
الى ان واني بنص هالالم ماكدرت اكسر خاطره تعب هواي وياي وحبي اله جبرني استسلم
شربت كلاص العصير ... انطاني حبة التهمتها كل ظني هيه حبة مخدرة
بقيت الوب وبعدها استسلمت لكلامه وحسيته تمدد بصفي وحضني وضلينه هيج ودموعي تنزل واكح حييل...
.................
سوزان...
طلع ذياب من غرفته واجه فاروق جان يرش بالحديقه حط ايده علئ كتفه وفاروق باوعله شمر الصونده وتحاضنوا
ضلو يسولفون شويه كال فاروق...اي شسويت علئ علاج قربى
رد عليه بتنهيده...رحت وعرضته علئ الدكتور هو صديقي وكتلو لحاله سريه والناس ما يردون بنتهم يفتضح سرها لذلك اني جبتها...
شاف الحبوب والابر الماخذتها كال...هذا اسمه ترياك وبعد الابر ما عرف نوعهن لان ما عندي فد معلومه عنهن علئ اثرهن انطاني علاج وفيتامينات
اني انطيتهن الها وكلتلها هاي الحبوب المخدره...وان شاء الله بس يخلص جسمها من هل سموم اخذها دكتور نفساني..
فاروق...اي وهذا عمها الكلب ما رحت وشوهت وجهه وسويته خارطه علئ سوايتها هاي ؟
جر نفس...والله رحت لشغلو ما لگيتو الكلب العار كالو ماخذ اجازه رحت علئ بيتو لكيت منصوب جادر بباب بيتهم
من سألت كالو الجيران ضيدان ابو بثينه هو المات بسرعه بسرعه من دون اي اعراض بس صايره عندو جلطه وميت
وما اعرف شنو الاسباب الي ادت للجلطه بس استبعد يمون چتلو اخو هو صح عار بس هل مره ما اعرف عليش استبعدتو...
فاروق باستغراب...اي بس شني ليش مات معقوله يومه هو هم عار مثل اخو بس غريبه
ذياب...انه حجيتلك من قبل وانت تعرف عندو علاقه غير شرعية بحرمة اخو انه افكر احتمال يكون كضبهم سوه وانجلط علئ اثر الصدمه ؟
فاروق...زين منه وما كتلهم والله اني منه قبل لا انجلط اكتله هو وياها واشرب من دمهم عائله سز ما بيهم واحد خير كلهم ....
ذياب..ههه يووول لا تفشر عجل انت بفشارك صرت مثلهم
فاروق...هههه يبا شسوي يحجون الواحد گوة صدك صرت مثلهم
ذياب باستنكار...يخسوون والله يرحولك فدوه لا يوم حطيت عينك علئ عرض غيرك ولا فد يوم ضلمت واحد غير سوزان
رد عليه بصدمه...افااا انه ضالم اليابسه بالعكس مدللها دلال حتئ زاد وزنها جانت يابسه وضلوعها مبينه وهسه صارت تتبطح جنها بطيخه مدعبله...
ضحك ذياب...هههههه دريت عرس وئام الاسبوع الجاي
فاروق...اي بعد جدك شموخي ما ينطي مجال هسه ابوك بكبره يصيح يوول بويه بعدني حتئ ما متعرف علئ الموته اعزمهم بعرس بنيتي وانت عرستلها ..
ضربه ذياب بضحكة...يووول انت ما تتوب من سوالفك حتئ لموته ما خلصت منك
ضلوا يسولفون شويه واني خليت ودخلت جوه شويه ودخل فاروق وراي كال...سوزان تعاي شويه عندي كلام وياج
خليت ورحت يمه كعدت كتله بهدوء...هاااا تريد اسويلك مرگ باذنجان لو اگلي
رد عليه...لا لا تعاي اريد اسولف وياج
كعدت يمه واني افرك باديه اول مره يحجي بجديه كال...اني قررت ارجعج لاهلج تكملين دراستج واطلكج وره عرس وئام
كمزت عليه من فرحتي وحضنته من دون سابق انذار وبسته بخده...صدك لااا عفيه لا دكول مقلب ونبي ما اتحمل عفيه فاروق حباب احجي لصدك
مسح خده بانزعاج...بت الشحاطه ليش تخبليني وتخليني أتراجع عن قراري اي قررت ارجعج بس اذا ضلت هيج ردة فعلج لو يجي شويمخ وشيوخ الغربية ما ارجعج
ابتعدت عنه بفشلة...لا لا ونبي اكعد عاقله محسوي اي شئ واتشكر منك بطريقه ثانية
لزم اديه...شني الطريقه الثانيه بس لا تغتصبيني
نزلت راسي بفشله...لا لا بس مثلا اكولك شكرا فاروق واني اسفه اذا بدر مني اي غلط ومسامحتك لان خربت استايلي ومعدتي وهذا هو
تقرب مني اكثر وعيونه تلمع كال...سوزان تدرين انتي من خربت معدتج واستايلج صرتي احله
ابتسمت بخجل وهو جر نفس وطلع درت وجهي عليه ضايجه رغم سلبياته بس بي جانب ايجابي وما كرهتو صح جنت اتمنئ يتعرض لواحد ببداية الامر بس ندمت بعدين
شكد حلو حرجع لماما ياااااي ممصدكه انام بغرفتي والبس ملابس واكل من ايد ماما واعتزل عن طبخ الباذنجان
.......................
فلفله...
جدي قرر الزواج الاسبوع الجاي واني حالتي حيل مستعصيه وضايجه چثير ...
قررت افسخ العقد بس فتحت ثمي بكلمة وجدي خبص الدنيا وسواله كونه شكبرها
وكال ..افسخ العقد منا ازوجج لسيف منا
عاد انه سكتت والله احب عليه اتزوج عمر واتحمل خبالو وعصبيتو ولا اتزوج سيف واتحمل مغثتو...
حضرت كل أغراضي و رحنه علئ بغداد لان العرس راح يكون من بغداد لان بعيد الزفه تكون من الانبار لبغداد...
وصلنه علئ بيت عمي وتلكتنه فريال جانت لابسه تراك احمر ومخصر علئ جسمها وفاتحه شعرها ركضت بدلع وحضنت جدي
وهو ضحك وحضنها وباس راسها ...جدي با زينة البنات يرحلج بنات الشامخ كلهن فدوه
حطت راسها علئ صدره وباست ايده ...احبك جدي وعندي موضوع وياك ضروري...
اخذته وراحت واني فلفل صار بيه خليت ورحت وراهم سمعتها تحجي وياه...
دكله...ذيب حيل متغير جدو دا احس بي عنده وحده واكيد حيصير مثل ما صار بعمو من تزوج ام قاروق النذل
رد عليها الشامخ...يخسااا والله اذبحوو واذبحها هل مره انع الشامخ ما انلدغ من نفس الحجر مرتين واذا عندو وحده والله اندمو علئ سالفتو
فريال بتمسكن...بس انت يا جدو لازم تسوي شئ،وتعجل بزواجنه لان والله دا احس ذياب حتئ ما كاعد ومستقر بمكان وقبل كان يبات عدنه هسه لاا اكيد لگاله وحده...
الشامخ قبض علئ سبحتو وضرب عصاتو بالارض ...بسيطه يصير خيير ان شاء الله بعرس عمر من تجتمع عشيرتنا اخلي امام الامر الواقع وافشلو جدام العشيرة واخلي غصبا عنو يوافق...
دحكتهم جانوا ناويين يدخلون جوه وحدرو وانه خليت ورجعت بسرعه وكعدت وحضنت محمد ابني
وبعدها تهيرت وخليت ورحت اني وعمتي ام عمر اشتريت بدلات وحجزت صالون لان ما ضل للعرس شئ وعمر لهل حزة زعلان شلون راح نعرس ما أعرف...
...........
" أأعودُ منتصِرا بكل معاركي
وأمام عَيْنيها البريئة أُهْزَمُ !
لي ألف بيتٍ بالفصيح أجدْتُها
لكنني في حبها أتلعثمُ ♥️"
قربى...
جنت باليل نايمه وهو طلع ما اعرف وين راح فركت عيوني بنعاس وضليت كاعده ما اريد انام ...
اريد اضل كاعده حتئ من يجي اشوفه مدا اشبع منه شوف احبه هو ملجئ من بعد الله...
شويه ودخل وهو لازم علبه من شفته ابتسمت وعدلت كعدتي كتله.. وين رحت منتظرتك
رد عليه ببتسامه حلوة...اي بويه رحت لجدتج طمنتها عنج روحها ذايبه بفاركج ومناك رحت لنهر خوز جبتلج حلاوه مو تحبينها...
وكفت بفرح...اي وبيبي شلونها مشتاقتلها ليش مجبتها يولو
رد عليه...ول بويه وين اجيبها بهل ليل وبعدين اريدج تصيرين زينه واوعدج اجيبها عجل من تدحك وجهج هيج راح تزعل وتمرض وتموت
حطيت ايدي علئ شفته...اسم الله اسم الله
ضحك ونزل ايدي وباسها...عجل طيبي يبووي وخليني اجيبها اوعديني تصيرين زينه
رفعت اصبعي ...ووووعد
اخذت الحلاوه من ايده شويه دا احس احسن من قبل اكلت منها شويه و وكلته وهو يعضعض باصابعي...شبيك جوعان تعض بيه
رد عليه بحب...اصابعج اطيب من حلاوة نهر خوز وسرها الا انتي يووول شنو سرج عليش وراتني اني وعشيرتي ور ؟
ضحكت...محد يعرف سر حلاوة نهر خوز لذلك محد حيعرف سري
باس خدي ...سرج عجيب ما يعرفه بس خالقج مدري بشنو خالقج ضايف ويه طينتج عسل لو ذهب
تقربت منه وهمست ...تريد تعرف السر ؟
ركز بعيوني ورد بخدر...اييييي
رجعت بنفس الهمس ...خلط ويه طينتي ضلع من ضلوعك يا ذيبي وهاي سر الخلطه مخلوقه من ضلعك الذهب...
سحبني حيييل ودخل اصابعه بشعري القصير رد عليه بتنهيده...الله يلوم الي يلومني والله اچتلو عجل هذا كلامج ويردون اعوفج والله اخذج باخر الديره وانهزم بيج احبببج عثرة گلبي احببج يا قرباني...انت فعلا قربان الذيب واطهر ذنب ارتكبته...
حطيت راسي علئ صدره وبسته بعنقه العاري وضميت روحي بحضنه همست....احبببك يا ذيبي انت كلشي حلو بحياتي وكل الاشياء المستحيله انت حنيتك عليه مثل حنينة ام سليم اني فعلا محضوضه بيك واذا سولفو عن الحظ الحلو حسولفلهم عنك
رد عليه...لا بوويه لا تسولفين اخاف يحسدونه
بسته مره ثانيه وهو باس راسي ويمسح على شعري القصير وكل شويه وجر نفس عميق اعرف معذبته وجرحته لان عبثت بأحد ممتلكاته الي هو شعري
نمت بين احضانه واني فاصله عن الدنيا واهلها هو ادماني من بعد ذيج الحبوب...
بس قبل لا انام حجالي عن زواج اخته وكال ما ضل شئ وراح يرجع لبغداد بصراحه بالبداية ضجت لان مصار هواية من اجه
بس بعدين عذرته ما ردت اصير انانيه لان خطيه لاخت ما تفرح بعرسها اله بوجود اخوانها واهلها
ان شاء الله يارب يفرحها وينور طريقها اخت ذيبي هاي تستاهل...
......................
وئام...
اليوم الحنه لبست بدله ذهبيه بيها كراكش من اردانها ومنفوخه واردان وسويت شعري تسريحه وخلتلي اكليل ورد ومكياج حلوو...
جانت الحنه عند بيت عمي امي ما اجت امي هاي عرسين ما تجي ولا تفرح بيه رغم خابرتها وباركتلي بس كالت ما اكدر اجي واشوف بيت جدج واعرف ما يحبوني واخاف يطردوني وانوب تصيرين بينهم وبين اخوج فاروق عركه ويخرب عرسج
وبعدها كالت...ان شاء الله من يخلص العرس اجي لبيت عيالج واجيبلج هديه حلوه مثلج هي تحب عمر
حبيت اخليها علئ راحتها رغم احتاجي لوجودها وعمتي صبيحه تلح عليه خلي تجي وخلي تجي تريد تعرف وين سوزان صارت
شويه واجه العريس هو واخته وامه واقاربه الي هم نفس اقاربنه بس هو لان ابو ابن عم جدي اكو عوائل منعرفهم...
دخل كاشخ ومزين طالع چثير حلو بس وجهو ما يكصو السيف زعلان عشتو شلون سلمت علئ الشايب...
انه هم ما اعرتو اي اهتمام وضليت كاعده وابتسمت للناس لمحدره عدنا وابني حمودي ما خله شئ بصينية الحنا ما اكلو
ذياب اجه من الصبح وسلم عليه باركلي وانطاني فلوس اذا محتاجه شئ وحرمة ابوي واختي فحصه جانن وياي وما قصرن ابد
عمر جان عاقد حواجبو وداير وجهو بعيد عني مثل طفل عنيد وزعلان ابتسمت علئ زعلو رغم كنت اتمنئ الطخ وجهو بالحنه واريح نفسي
كلوله لبسها الحلقه لبسها اليه وابتعد عبالك مجبور وكل الذهب لبسنياه نفس لحاله اتعس عرسان علئ وجهه الكرة الارضيه
كلوله شربها الشربت اخذ كلاص الشربت وشربني حطيت عيوني بعيونو وهو دحكلي وضل مركز بعيوني وما اشوف اله العصير نزل علئ صدري ودمر بدلتي
عمر نسه نفسو وبعد العصير من شفايفي وكبو عليه كلو صار الضحك واني فشلت وهو اخذ منديل وضل يمسح بصدري وبدلتي
زعلت منو ودرت وجهي تقرب مني وهمس...مجان قصدي كله بسبب عيونج
خزرتو وبعدها نزلت عيوني ضلوا البنات يركصون وفريال كل شويه دخلت وتطلع تا يشوفها ذياب وتغري بلبسها...
خلصت الحنه وجدي جان مسوي وليمه وعازم شيوخ الغربية وعشيرتنه
تاخروا بالكلام وبعدها اجه قتيبه ابن عمي يركض وفرحان صاح علئ فريال
وهي اجت تركض كلها...ابشرج تمت العملية بنجاح
هي عقدت حواجبها وابتسمت...اي عملية شنو دتحجي
غمزلها...جدي والشيوخ قربوا زواجج من ذياب
ردت عليه بفرحه ونشوه...ايييي
ضحك...وافق اكيد بس تعبهم
حركت شعرها بغرور...المهم وصلت للي اريده وتعبهم فدوه الي
نهاية البارت...يتبع
كونوا انتم كونوا بخير...احبكم 💔
نور سمو العراق 🍂
لا تنسوا التصويت و المشاركه بكم نكتمل 😘