الذنب الثامن
رواية...ذنب عينيك...سلالة العنفوان
بقلمي...نور سمو العراق
💔💔💔💔💔💔💔💔💔
يالمعوضني كل تعبي
شجازي عيونك الحلوه ؟
شجازي الگبل لا اعثر يگلي اندارلك فدوه !
...............................
ام خمائل سمعت صوت النقيب يصيحني ركضت اني وابو خليل بسرعه
شفت قربى واكعه وهو كاعد ركبه ونص يمها ويضرب بخدها ويناديها بقلق...قربااان قربانه بووويه اصحي ام خمااااائل وين صرتي
فزيت بخوووف...عزا سيدي شبيها قربى
صاح بيه...جيبيلي مي بسررعه
رفعها الصدره وهو يفتح بعيونها بس هي جانت لا حياة لمن تنادي رحت جبت المي وهو رشه باطراف اصابعه علئ وجهها ورقبتها وصدرها...
لزم خدودها حييل وعصرهن بيده ...قررربان اصحي دخييلج
رجع صاح...ابو خليل اتصل بالاسعاف بسرعه كلهم عدنه مريضه بالسجن
خطيه ابو خليل توتر ضل يروح ويجي وبعدها راح اتصل بالاسعاف والنقيب شال قربئ وكعدها علئ الكرسي جان راسها واكع وجسمها ميت
هو حط ايده علئ كتفها حتئ يثبتها واخذ سماعة التليفون واتصل ضل يحجي وبعدها قفل الخط
شالها بين اديه مثل الطفل كال...احتمال تسممت من الحقنه الله يهلكم يا حقراء ناوين علئ موتها لهل مسكينه...
طلعنه اني وياه وهو شايل قربى وابو خليل ورانه شفت ملازم سعيد واكف يم باب غرفتة وهو يرسم ابتسامه خبيثه علئ شفايفه...
شكيت للحضات ان الملازم اله ايد بالحقنه بس مستحيل تدخل هاي الحقنه اذا ما اكو راس كبير يدعم الملازم وهو الي دخلها...
صرت اخاف علئ نفسي من هاي العالم
نقلناها للمستشفئ وهناك اسعفوها هو شوفهم الحقنه الي تعرضت الها
والدكتور انجن من عرف هاي حقنة السيانيد...كال اذا هي فعلا ماخذتها لا تترجون تطول لان هاي الحقنه بس تتدخل للجسم تهلك كل الاعضاء وتسبب تسمم وتقتل ...
توترنا حييل والنقيب جن جنونه رد عليه بخوف...زين بس فهمني دكتور ماكو فد مضاد يقاتل هل تسمم اذا فعلا دخل جسمها وشلون اعرف اذا هي اخذت من هل حقنه لو لا لان الي ضربتها كالت ما لحكت اضربها ؟
الدكتور بتفهم...خلينه نسويلها تحليل دم واشعة وسونار ونشوف اذا الدم تسمم او لا ونخليها تحت المراقبه يوم كامل
النقيب...عجل اذا هي ما اخذت من هل حقنة ليش تدهورت صحتها واغمه عليها
الدكتور باوع الاوراقها...حاليا بالفحص المبدئي طلع عندها نزول حاااد بالضغط وارتفاع بالسكر
حطيت ايدي علئ صدري خايفه...سكرررر يبووو بعدها صغيره وينها وين السكر
رد عليه...لا احتمال يكون سكر كاذب يعني هي متعرضه لهبطه او خوووفه سببت عندها بارتفاع السكر لهذا احنه نحاول نوازن بين سكرها وضغطها ونجري بعض التحليلات....
تركنا وراح واحنه كعدنه بالانتظار شفت النقيب حالته مو طبيعية حييل متوتر وخايف عليها عبالك مثل اب وراح يفقد بنته
استغربت يكون التعاطف قليل دائما بس هنا زاد عن حده معقوله يحبها !!!!!
لا مستحيل صح البنيه حلوه وهادئه ولطيفه بس ابد مو مال يحبها ما صار اله اشهر من انقل هنا وحتئ لقاءاتهم قليله معقوله بهل سرعه
او يمكن يعرفها واله معرفه بيها لان هو من يتصرف عبالك يعرفها احتمال وارد ليش لا بس وين يعرفها هي من بغداد وهو انباري غريبه والله...
ضلينه تقريبا للصبح هو النقيب خله ثنين من ازلامه علئ باب غرفتها اكثر شئ يثق بيهم ومنع اي واحد يدخل عليها...
ضلينه علئ هل حاله والنقيب ضل وياها بالغرفه حتئ يتفاده اي واحد يريد بيها السوء
بعدها طلعت التحليلات كال الدكتور...التحليلات ايجابية خلوها تحت انظاركم مدة اربعين يوم وان شاء الله يصير خير...
......................
قربان...
فزيت والدمعه باهدابي ليش ابجي حتئ واني فاقده ابجي اي اي تذكرت اني جنت احلم بامي
امي الحضن الحنون الي فقدته ومن فقدته فقدت الامان والراحة اريد اشكيلها لان هي الوحيده الي اشكيلها بدون خوف اشكيلها واني مطمئنه واعرف هي الوحيده الي تمسح علئ شعري وتنصحني وتضمني الصدرها
اني يتيمه من صغري ابجي بدل الدموع دمع وكلبي كله حسره واااه
يمه كلبي يعتصر من الوجع والفقدان خلي تتهنه الدنيا بكل ما بيها واني ما اتهنه اله بيج يارب اخذ امانتك ورجعني لحضن امي
شهكت من البجي ورفعت عيوني شفته كاعد علئ الكرسي وحاط ايده علئ خده ونايم كعده
صفنت عليه وبالحضات حسيت دخلت فرحة الصدري تذكرت الحركة السواها اليه بالسجن غمزة الخشم...
ضحكت ورجعت قلدته واني اتذكر معالم وجهه وكل شويه وعفست وجهي واني اباوعله
فتح عيونه بسرعه واني من فشلتي احتاريت شسوي شافني واني اقلد حركته خليت ايدي علئ خشمي وبلعت ريكي
ابتسمت وعدل كعدته كال...الحمد لله علئ السلامه قربانه يله لا تتدلعين ما بيج شئ اصحه مني
عدلت كعدتي واني اباوع الايدي مشكل بيها الكانوله جاوبته بعد ما حطيت ايدي علئ شعري الم الكفشه...اءء شش شكرا سيدي الله يسلمك
بلعت ريكي..عبالي متت طلعت بزون بسبع ارواح
رد عليه...لا لا اسم الله عليج ان شاء الله عمرج طويل بس عليش خوفتينه عليج اذبحج هل حزه
شهكت بخوف...لا سيدي فدوه لا تذبحني والله كولش اعتذر ان شاء الله ما تنعاد
تقرب مني اكثر وسند اديه علئ السرير واني خفت بعدت شويه كال بتركيز...هو بكيفج ما تنعاد انتي انهاريتي و وكعتي شئ مو ارادي الحمد لله من طلعتي سلامة عجل لو ميته احنه شنكول
ابتسمت...سيدي انت ليش حباب
غمزلي...لان انتي حبابه
ضحكت بخجل...لا والله صدك سيدي اشو انت الوحيد الي تعاطفت ويايه دا احس اكو شئ غريب انت تعرفني شنو السبب الي يخليك تضحي لخاطري
ابتعد شويه وجر نفس كال...اعرفج اكييد من قبل لا انقل لهينا لهذا السجن قصدي
عدلت كعدتي بتفاجئ...صدك سيدي شلون تعرفني احجيلي
حط اصبعه علئ شفايفه كال...اشششش لا تسالين ولا تحجين اعرفج وخلاص ما اريد اسببلج ضرر اكثر ما انتي متضرره
هزيت راسي بقلق...لا سيدي ما اسأل بعد
صفن عليه ثواني كال ...چلابكم منكم وبيكم يا قربان بس اذا حجيت راح اسببلج ضرر ان شاء الله تطلعين من السجن والله ياخذ حقكم
رمشت بعيوني ممستوعه...منو چلابنه سيدي؟
وكف وعدل مسدسه بحزام البطلون كال بغضب مصطنع...قربان اذا حجيتي بعد كلمة او سالتي اللسانج اكصوو والله
ضحكت...لا متسويها انت حباب ههه
باوعلي وعيونه تلمع..وانه حباب بس وياج ترئ غيرج ما اعترف بي
خفت من كلامه شويه كتله...سيدي اني بس لا اموت مثل اخت هاي السجينه الي ويانه هماتين هيج ضاربيها ابره
رد عليه...لا تحجين هذا الكلام يم اي وحده هينا بالسجن ...وبعدين لا تخافين ما تموتين لان انتي ما اخذتي من الحقنه والدم سليم
وخرت شعري المعطب من وجهي ورديت...لا سيدي ما احجي ابببد بس اني دا احجيلك لان شويه عندي ثقه بيك
باوعلي متفاجئ...شوووويه؟
رديت...اي سيدي مو هوا....لا لا قصدي يعني عندي هوايه ثقه بيك اصلا انت احسن واحد مر عليه ربي يوفقك
تقدم خطوات وكعد يمي واني لزكت روحي بالسرير وخفت رد عليه كال...هو حقج ما تامنين وما تثقين بووويه بس صدكيني انه مو بس كدامج جاي ادافعلح انه جاي اشتغل بكل طاقتي تا اطلعج براءه رخصت الروح لخاطرج
حسرتي العبره جاوبته والدمعه بعيني...هاي عوايد اهل النخوه والمروه سيدي
ضحك كال...والله ردج چثير حلووو فشلتيني وما عندي جواب ارده عليج صدك صغيره بس ما شاء الله عقلج جبير...
اردف بتنهيده طالعه من اعماق صدره...انتي مو بنية عادية انتي اندهاشية
ابتسمت ونزلت عيوني ورغم كووولشي شرهان واكف بنصنه مو قصة حب وغباء بس اضل علئ ذمته وحرام افكر بغيره حتئ وان كان عار بس اضل علئ ذمته من افسخ منه لو يعوفني ذيج الساعه الي الحق افكر بغيره...
نزلت عيوني...شكرا سيدي
اردفت بتفكير وترقب...سيدي اكولك شغله بس متتعصب؟
هز راسه بتفهم...اي كولي
جريت نفس.. سيدي ماكو هاي ابتهال جابتلي حبابه قبل كم يوووم كالت هاي مسكن اشربيها بس اني مشربتها
رد عليه بعصبية..تحجين صدك؟
خفت منه عبالي صدك هو دازها وتعصب رديت....لا لا شربتها وسكن الوجع
فتحت عيونه بغضب...شربتيها ؟
بلعت ريكي بخوف...سيدي هو الاحسن اشربها لو ما اشربها
جاوبني بقهر...اكيد متشربيها
تنفست بارتياح...لا سيدي مشربتها لان جنت شاكه مو منك
رد عليه براحه...اي مو مني اي واحد ينطيج شئ وانتي شاكه لا تاخذي مفهوم وانه ان شاء الله احاسب الكل واعرف منو وره كل هل عمايل
هزيت راسي بقبول ضحك عود يلاطفني كال...انتي دحكتي لروحج شلون كفشتج واكفه عبالك مثل المكناسه
جاوبته باستنكار...يا سيدي اشو تقلد علئ شعري انت شايف شواربك جنهن مكنا...
كطعت كلامي عزا جان جفصت جفصه شكبرها تمتمت بفشلة ...جنهن جنهن جنهن هذا يوكف عليهن الصكر مدري شلون توصفهن بيبي البصراويه
ضحك وهز ايده وطلع واني من طلعت اتنفست بارتياح همزين طلع رغم كلامه عادي بس اخااف مدري شبيه...
....................
وئام...
رحت علئ الشغل شفتوا بصراحه ما عجبني احنه الله ناعم علينه الحمد لله بس انه ما احب امد ايدي لا لاخو ولا الجدي
انه اذا رضيت اخذ منهم يوم يومين تلاثه شهر شهرين سنه بعدها الكل ينساني وانه مدام رفضت ابن عمي لازم اشد حيلي واساعد نفسي واشتغل
هينا بالمستشفئ حرمه عجوز كالت ...يمه اذا انتي بحاجة الشغل اشتغلي وان شاء الله يخلونج اداريه بمرور الوقت
انه هم فكرت الشغل مو عيب احسن ما امد ايدي لغيري
الشامخ اذا حجه وكال عليش تشتغلين وبطلي انه صدك هل مره انتفض ضدو عجل مخلي المسعدات ببغداد يدرسن ويتوضن ويمشن علئ حل شعرهن وانه لاااا عليش لان انه بنت الغريبه
حتئ اختي حفصه تدرس اله انه بطلني وزوجني وكسرو الضهري بهل طفل اليتيم...
والله عاد بديت اشتغل استصعبتها اول شئ بس بعدها تعودت من سالني احد انه اجاوب اشتغل اداريه
لحد الان ذيب ما يدري ولا فاروق بس اكيد اذا عرفوا ما اضن يرضون
انه من گلت للشامخ انه اشتغل واعينو الابني هو ضحك عليه واستهزء بيه علئ بالو انه ما راح الگه شغل وانه عاندت وقبلت اشتغل منظفه ودخل شوكة بعيون الشامخ وحفيدو سياف علئ حد كلامو
بس جان عندنا دكتور شايفو حالو چثير الي يدحكلو يكول بس هو ماخذ شهادة الدكتوراة ودائما يتهمنه بالإهمال وااحنه صابرين ومحتسبين
رجعت من شغلي كاشخه ومهندمه واشوف ذياب نزل من سيارتو الكابرس بباب بيت عمي
حز بخاطري هل منظر اختك يا ذياب تشتغل منظفه وانت صاعد كابرس والله اذا عرف الدكتور والله يدكلي التحيه....
من شافني انصدم وعقد حواجبوا تقرب مني وكضب ايدي بعنف ودخلني للبيت بالحديقة كال بغضب...وئااام وين جنتي بهل حزززه هاااا
رديت عليه بهدوء...ذياب اي صدك انت ما دريت انه تعينت
فتح عيونو مصدوم...تعيني؟ شلون بله تعينتي وانتي لا شهاده ولا مستقبل من الي عينج يووول
لزمت ايدو بخوف...اداريه !! اي ادرايه بالمستشفئ
زكح بوجهي بعصبية...ما عدنه حرمه تشتغل وتبطلين وانه الاصرف عليج
قهرني بكلامو...لا ما ابطل وعليش ما عندكم حرمة تشتغل عجل مو خطيبتك مستقبلا تشتغل محاميه وله انه غلطانه
غمض عيونو وهو يهدي نفسو...تشتغل بشهادتها انتي شنو تشتغلين وبعدين شنو اداريه
كضبتو من قميصو بتوسل...ولي يسلمك ذيب ابوس ايدك لا توكف بشغلي انه من ايمت وانه اتمنئ اشتغل واكون نفسي وان شاء الله تصير عندي شهاده حالي حال بنات عمي...
دحكت لوجهو بقهر...ذيب انت ما تعرف شصار بيه انت جانت عندك دورة تدريب والشامخ استغل عدم وجودكم انت وفاروق وزوجني وانه طفله وبطلني من مدرستي وكسر ضهري بهل طفل
وهساع يريد يزوجني لاخو شاهين الله يرحمو وانه ما احبووو ما اكدر اجبر نفسي هل شغل بمثابة تمرد وتحدي للشامخ انه اول وحده توكف ضد قوانينو الطاغيه فدوه لا تاذيني مثل جدك
جر نفس كال...والله ما يهون عليه اشوفج تشتغلين وانه الله موكلني اذا تردين اقسم راتبي بالنص انه وياج بس لا تتعبين نفسج
حضنته حييل وبستو بصدرو...لا ادري بيك ما تقصر ولا تقصر بس انه حابه اشتغل هم ارفهه عن نفسي واسليها وهم استفاد وافيد ابني
كضب وجهي بثنين اديه وباس راسي كال...اريدج توعديني وعد اذا الشغل ما عجبج تبطلين
ضحكت وانه حاضنتو ...ووووعد
التفت علئ الصوت الانثوي الحاد وهي دكول...هلوو والله ذيب واخته متحاضنين
ذيب ضمني لكتفه الايسر كلها...عجل غير اختي شلون ما احضنها واحتويها
ابتسمت مجامله...وئام ممكن تتركينه شويه عندي كلام ويه ذيب..
دحكت لاخوي كالت...يله انه اروح اشوف حمودي
رد عليها...اذا حابه تحجين احجي وئام اختي مو غريبه
كتله...لا لا اصلا انه اريد اشوف محمد
مشيت وهي وكفت يمه ضلت تسولف وياه وحركاتها كلها دلع وتلزم طرف القميص مالتو باصابعها...
ما فهمت من كلامهم شئ بس سمعت اسم حمزيه احتمال جانوا يتناقشون بسالفة حمزية....
...........................
جريتها نومة للصبح تعبان هلكان .. بس جنت احس على امي تجي توعيني بالليل ويوصلني صوتهه الحنون
يمه فاروق ماتكعد تاكلك لگيمه ...
وخرت لمخدة من راسي ورفعت راسي لايمه ماريد نعسان اريد انام
ايبلك ( اجيبلك ) كلاص ماي تشرب خاف عطشان
كلبت روحي ونمت على غير جهة وجاوبتها وانه اخلي المخدة على راسي اي والله وليرحم والديج ولو هم تلكوني البارحه دكول عزراييل طاب عليهم مو ابو الفوارق
لايمه لاتكول هيج جا خطية يحبونك همه بس انته مدري شونك وياهم
اجت ناوشتني كلاص ماي ستيل شربته
كتلها يمه شنو هالمخاد هايه شنو محشينهن طابوك شوو عاصيات ليكول نايم على بلوكة
ضحكت ضحكتها الهادئة والحنون لايمه هاي بيهه هدوم مشككة قديمة حتى تعلى المخدة شوية عمن نزلت ماينام عليهه ناصية
هاي اكيد جدتي رسومه سوتهن فد عليها سوالف تجيب وتعبي شكو زبايل حطتهن وسوتهن مخده
يماا لا تحجي عليها لاتسمعك تاخذ على خاطرهه خطية
خليتهه طلعت ورديت نمت ...
الصبح كعدت شفت امي بالحوش جاي تسف مهفة خوص وبيبيتي تسوي مكناسة ...
كعدت بعتبة الباب مال الغرفة حر كلش وعطشان وجوعان
امي شافتني كالت إصباح الخير يمه ها كعدت
لا والله يمه بعدني نايم فد شوية كعديني
ظلت تضحك وحاجت بيبيتي يمه مازاد ريوك من ابوي خل احط لفاروق يفچ ريجه ؟
بيبيتي كالت لاع ماكو ابوج خطية لهط الاكل كله عمن كاعد هرفي يجوع ويشتقل ويعليه ( سودة عليه) روحي للبارگه( بيت الدجاج والحلال) شوفي الدياية و تانيهه تدحري ( تبيض ) وسويله دحرويه ( بيضة)
جاوبتها وانه اتاني الدجاجة تبيض سوولي شي مو كتلني الجوع كلاص ماي كلاص جاي
كامت امي چــنك على جاي جنك على ماي هسه
راحت جابت ماي واجت شربته كتلها شو مايكم حار شسالفة ؟
كالت اي ييمه الثلاجة عطلانة هاي جبتلك ماي من الحب ( إناء من الفخار)
يمه ماي من الحب لا تجيبيلي ماحبه وشبيها الثلاجة عطلانه
بيبيتي كالت من دور يدي( قديمة) حگها تعطل
گتلها وجدج يمته لحك على الثلاجة جدج مات من كبل لايزفونج على جدي على البعير
كالت ....هه سليمة يابت رگه ( سلحفاة) كون ولا يابتك على هالحجي .
كتلها..... ها رسومتي تدورين مشاكل من الصبح انه اكوم اروح اطلع بالبستان احسن واذا بيضت الدجاجة سويلي ريوك يمه
صاحت وراي امي.... يمه انطيك ماي لگاح يرويك
( طلع النخل) ؟؟
لالا يممه تدرين بيه ماحب طعم بالماي .
طلعت برا البيت سمعت صوت ابو االثلج يصيح
ثللليييييج ثلييييييج ...
طلعت ركض فتحت الباب وشفته جاي بعربانته شادهه على حمار ويصيح .. كتله الله يساعدك انطيني نص ربع ثلج ..
هو وكف العربانة يم الباب وخر وصلة جتري مخليها فوك الثلج عن لا يذوب ..
وطلع منشارة وظل يكص ثلج وانه طبيت خذيت فلوس وحطيت بيده شفته مزهبلي الثلج خذيته ودخلت جوا
انطيته لامي غسلته وخلته بالفلينه علما يبرد اجي اشرب منه ماي بارد مايفيد ويه جو البصرة اله كلاص ماي بارد ثلج يله يبرد الفاد ( الفؤاد)
طلعت شفت المشاريب تجري بيها الماي والزرع مبلل وصوت مكينة السگي من بعيد
جدي كاعد ومنبت االمسحاة بالارض كاعد بصفها ويشد بالفروند ( يستخدم لصعود النخل) ...
شافني جاي من بعيد لمحت نظرة عطف بعيونه وندم اشرلي اكعد يمه رحت عليه وكعدت بصفه الارض الي وراي معمورة كلها
كال ...ها يبا فكيت ريجك خلولك لكمة تاكلها لو بعدك على لحم بطنك
جاوبته... لا جدي اتاني الدجاجة تحن عليه وتبيضلي بيضه حتى امي تسويهه الي
كال وهو يأشر... شوف ذيج البشتگه زرعتها كلها طرح وطماطة منا وياي بس يطلع ييب خبزتك واحوي( اقطع) طرح واكل الف عافية
ضحكت انه وهزيت راسي... اي شخبار عنكود العنب مال امس جدي ..
هو تحسر وكمل
بويه فاروغ انته خو مازعلان مني من امس ؟
لا منين انه ازعل لا تخلي ابالك جدي ...يروحلك فدوه شمخي
انه احبك يا جدي انت وليدي مالي غيرك خالك اخذته حرب ايران كل بيت عراقي تلكه واحد منهم شهيد واحد اسير واحد مفقود مايندرى عنه وبس انت الي وهاي عينك تشوف من تروح لبقداد روحي تروح وياك ومن اقسه عليك لمصلحتك انت مو كد الشامخ
اني يا جدي اعرف الي يحبني من اليكرهني بس بيت شمخي حسابهم وياي ومثل ما ذياب اله حق هم الي حق
واني مااسكت عن حقي ياجدي ابنهم غلط هم يتحملون نتيجة اخطائهم لا يحملونه السبب احنه ما غلطنه ولا كلنه لابنهم يتزوج امي.
بوويه شحجي وياك انه اسمع مني لمصلحتك ها
انه تدريني يفاروغ انه ريال فغير على كد حالي لا سلطة لا جاه لا مال بس بطرك رويحتي وانتوا وهالكويعة هاي
اريدنك تشد حيلك تكف روحك عن بيت يدك مو كدهم انته وشكل دشيديشتك وتعزّم واعمر هالكويعة اسكيها وازرعها تاكل من خيرها بعد جمن يوم لكمة بهني تسوى الدنيه ومابيه
ولك يبا فاروغ هاي لكاع ذهب ذهب يابوك ذذهب
وشال تراب صمه بيده حيل وفتته وشمره بالكاع ..
جدي الله يخليك انته تفكيرك وحد واني وحد انت بس اصبر عليه وشوف شراح اسوي
جاوب بقهر بويه انه خايف لا اخسرنك خاف الشامخ يشوف متنك وطولك وشواربك ويستعز بيك وياخذك مني انه منو الي غيرك امك منو الها فكر بيها خو ما خالك العار الي مايدري وين الله ذابه حتى مايسأل عني
حاولت اغير الموضوع : اكلك جدي ماتريد اساعدك بشي
دفع الفروند صوبي وكال بلكي تصعد ذيج النخلة بس هيه بعد مالكحته ظهري ظل يعورني
منو منهم جدي
ظل يأشر ذيج ذيج الحلاوية
جدي هاي شطولها شيعصدها
كال بوويه انته ذيب ذيييب كدها ان شاءالله
نكتت الفروند كتله كلي عتوي فار ولا تكوول ذييب
رد كال لا أفاااااا
باوعت للفروند كتله هذا خو مو بايد ويطيح بيه
كال لا لا توني شديته و سنعته ..
اخذته لفيته على خصري وداير مداير النخلة صعدتها نظفتها ولكحتها ونزلت
توجهت للبيت باوعت للفلينه فوكاهه لكلاص الستيل وانه ميت عطش بللت شفايفي رحت فتحت الفلينه شفت بيها الطماطة مسيسة ظليت اصييييح
هذا منووو مخلي الطماطة ويه الماي منووو شووون نشرب زقوووم بارد هسسسسه شلووون
اجت امي ها يمه اسم الله شبيك
كتلها ....يمه صدك جذب اجي ميت عطش الكه تارسات الفلينه طمامه مسويات الماي مركة طماطه بارده..هاي سوالف جدتي والله
ردت اي يمه امي خطية خلتها هنا عن لا تخيس وهاي شوفة عينك الثلاجة عطلانة
دخل جدي كال...وينه رسميه وينها اليوم اهبدها بالمسحاة شلون تخلي الطماطه ويه الثلج ما تكول ذول المطايه يجون من الزرع تعبانين
يوو شمالك يبا راحت امي للسوك تبيع المهاف ولمكانيس
كعد جدي مقهور علئ الكرسي....هاي يدتك مصيبه وطاحت علئ راسي من تزوجتها لهذا يومك وانه ما شفت يوم بي وناسه
كعدت قريب منه...جدي طلكها وازوجك حمزيه
رد عليه بفرح...ياهي هاي حمزيه حلوه لااا؟ شكد عمرها والله يا يدي محتاج انه الحمزيه حتئ يصير حمزية ورسميه
دخلت جدتي وهي تصيح...ولكم يايه تعبانة تلكوني بكلاص الماي سألوني شلونج جويدة تعبانة حسرة اسمع حجي سنع منكم
كرصني جدي كال...اسكت لا تسمع نحجي بحمزيه وتخرب علينه الخطوبه
عاد اني سكتت بس شو صدك حمزية لا حس ولا خبر واروح اخابر عليها وما ترفع عليه السماعه بس لا تجذب عليه حتئ والله صدك ما اخطبها لجدي
قررت اروح البغداد واشوف وين صارت ومناك نتفقد أحوال بيت الشامخ...
فات تقريبا اسبوع وخليت ورحت لبغداد
لهسه المحبس يدك بكلبي كون اكطم اصبع ذياب ولا اشوفه لابسه
والله رحت البغداد واشوف البار مسدود خليت ورحت البيت عمي لكيت جدتي وبحضنها حمودي ابن فلفله توكل بيه
استغربت كلتلها...شنو وئام هنا
ضحكت كالت...يااا من زمان وهسه تشتغل بالمستشفئ
هي كالت تشتغل واني تخبلت هلا هلا اختي تشتغل واني كاعد بالبيت اليوم صدك اذبحها
اخذت عنوان المستشفئ وشليع وراها....اليوم فلفه اذبحج بيدي وارجعج للبصرا غصب عنج
تريد تصير مثل سوزان المعصعصه وفريال مدري تفال
.......................
قربئ...
طلعت من المستشفئ شويه صرت زينه الحمد لله ورجعت للسجن
بس لحد الان الحزن يهمش بداخلي
اول ما دخلت وتلكتني حمزيه ...هله هله يمه فدووه بالمريضه
لزمتني طن بوس ...شلونج الحمد لله على السلامه بالي ضل عندج ولو معرفتي قليله بيج
تشكرت منها وخطيه السجينات تحمدن الي بالسلامه وكعدنه نسولف...
كالت حمزية...اني شلون بله ما اطلع اووف يا فاروق يمن كون فرقوا راسك من جسمك يا جذاب شلون ورطني ورطه ...
كلتلها باستغراب.. هو فاروق منو
هزت ايدها وتطك بالعلج...اندري خييه اجاني لا علئ البال ولا علئ الخاطر وقشمرني بس هو يشبه النقيب يمممماي مملوح بصراوي اسمر والعيون منعسه وعسلية يذذذبح انه احب هل شكول كلهم رجوووله يمه انوووب الشوارب يمممممماي ليلة وحده تكفي وياه
انصدمت من جرئتها والسجينات مسجونات بغباء ضلن يضحكن شوقتهن علئ فاروق
جرت نفس كالت...بس هذا النقيب ضيم فلك ومعبه بتنك بعد احله من فاروق هذا بس كون حضنه وحده يطلع حليب امي من خشمي بووويه شحلاتهم الزلم احله من النسوان...
ضلت تعد وتصفط وتسولف بس بالزلم ذكرتني ببثينه بس هاي بفطارية
باوعتلي كالت...اذا تطلعين من السجن خلي انطيج عنواني تعاليلي حتئ اذا هاي اشغلج وياي رقاصه
فتحت عيوني مصدومه...ياااا اني اشتغل رقاصه والزلم تباوع عليه يبووو لا استغفر الله
ضربتني.. دولي غير ونسه
ضحكت وعفتها تحجي وحدها رحت توضيت واخذت حجاب وصليت ودعيت ربي اخلص من هل هم...
.....................
وئام...
باحد مستشفيات بغداد دا انضف بالممر ولابسه البدلة الزرگه مال المستشفيات طالعه اشبهه سطل الزباله...
دخل هذا الدكتور المغرور شايف حالووو جثير وما اعرف علئ شنوو...
ضحكت باستهزاء...ههه علئ شنو لانو عندو شهادة دكتوراه...واذا يعني ما يشفعلو هل غرور...
اتبعته بنظراتي طول وهيبه وبشره حنطيه مايله للبياض شويه... ولابس قاط اسود وقميص ابيض وربطة عنق سوده وبيها متداخل اللون البنفسجي الغامق
كانو انا حشره حتئ ما دحك عليه ولا صبح عليه...ولا يصبح عساه دووم..
جريت نفس وتكلمت مع نفسي...والله انتي فارغه..يصبح علئ منظفه بالمستشفئ..؟ هو الدكتورات ما معترف بيهن
دحكت ابتعد عن انظاري وهو حامل حقيبتو الطبيه ....
رجعت امسح بالممر وبالي عند ابني...ياربي احبوو لهل طفل احفظو وقر عيني بسلامتوو..
ومن بين تفكيري وحزني رفعت راسي وشفتوو دخل للمستشفئ جكارتو بين شفايفو وما مشتغله ويتلفت يمنى ويسرى اكيد يدور عليه...
كطيت الماسحه بسرعه من ايدي وركضت دخلت بغرفة الممرضات وانا ارجف نزعت البدلة الزرگه لگحتهه علئ السديه
ضربت علئ جبيني...اووويلي اووويلي والله فاروق يگصو الراسي اذا عرف انا اشتغل منظفه
طلعت بسرعه كلت اروح اكضبو لا يروح يسأل عني ويكولون الو ان اني مو اداريه ...انا منظفه
اول ما طلعت هو دحكلي بقمة غضبو وانا تراجعت للخلف خايفه منووو
سرع بمشيتو وانا انهزمت بس هو اسرع مني وكضب ايدي بقوة ولگحني بغرفة الممرضات...
تكلم من بين اسنانو وهو كاتم غضبوو...ولج فلفله ولج احنه زلم وشواربنا تارسه وجهنا وانتي تفترين بالمستشفيات صدك ما تستحين تربية جدج ما عليج عتب
دفعته وزكحت بوجهو...فارووق لا تصير رجال براسي اني بحاجة هل شغل..
كضب شعري بقوه وعتني حييل...رجال وغصبا عن جدج وعن عشيرتج كلها يا بنت الكلب والله اذا ما كصيت اللسانج مااطلع فاروق
كضبت ايدو ودفعتها بغضب...كصوو كصوو
دفعني بقووه...ولج انتي ما تستحين ما تخافين من احد اخوج الذيب ما يخوفج بس وين اخوج ملتهي ويه امهات الملاهي وعايفج علئ حل شعرج هل ساقط الكو...
وجدج ملتهي يطبق قوانين واحكام اتفهه من هيج عائلة ما شفت بس هااا ترئ انتي اختي من امي يعني ما الي شغل بيهم اذا ما انطوج تربية اني انطيج ولج ارمله وعندج ولد وضاله تفترين بالمستشفيات ...
زكحت بوجهو...لا اخوي ذيب اشرف منك لا تجيب سيرتو
ضحك باستهزاء...اي ما شاء الله الشرف معبي جيوبه..امشي امشي لا تخليني اسلگ عشيرتج انتي وذيبكم وياكم
امشي ولي كدامي الله يهلكج انتي وعشيرتج ...
دفعتوو بغضب واني اجمع بشعري ...ما اروح هذا شغلي وما اروووح لا تاخذني بصياحك وصوتك العالي وبعدين شنو طالعه بموعد غرامي ؟ ترئ طالعه علئ باب الله
جر نفس بغضب...لا شافج الله امشي ولي كدامي لا اكسر رجليج...
سحبني من ايدي واني احجي وياه بصوت ناصي...فارووق فضحتنا رووح منا رووح وانا بس ارجع اتركو للشغل
ضربني علئ كتفي بغضب وسحبني يريد يطلعني من المستشفئ...
كضبت ايدي بتوسل...فاروق حباب بس اروح اجيب اغراضي وجنطتي من الدولاب والله
دفعني ..يله بسرعه منتظرج هنا والله اذا ما اجيتي افضحج هنا بالمستشفئ واخلي الما يشتري يتفرج...
تعرفيني لا خجل ولا مستحه واحب الضجه والهوووسه اسهل شئ عندي الفضايح...
دفعتو بعصبية ومشيت واني ادحك للممرضات وهن يدحكولي وكأن مسويه جريمه اخذت جنطتي ورحت وراه
طلعنه سوه ركبت بسيارتو وهو صعد بالصدر
همست بكلبي...بسيييطه اذا ما قدمت عليك شكوه عند ذيب وخلي يكضبك من كوانيگك ما اكون وئامه
صعدنه بالسياره وكان طول الطريق يزكح بوجهي وانا اردولو الكلمه عشرة
كضبني من شعري وضربني بجام سيارتو بالشباك وزكح بوجهي...انلصمممي الله يطيح حضج ما عندج تربية اني ليش ما اريد اتزوج لان انتي كرهتيني بالنسوان ولج جنج ديج احجيلي كلمه تردين عشرة
سكتت ما حاجيتو بس كان بداخلي بركان من نار وكلبي يهوجس
كال...شوفي راح انزلج يم بيت عمج وباجر بالخمسه الفجر نرجع للبصرة
فرحت بداخلي تا اخلص منو واروح الذيب يسجنو وارجع الشغلي ...
وصلنه عند باب بيت عمي وادحك عمتي صبحه حدرت هي،وبنتها الدلوعه سوزانا...طبعا سوزان هي بنت عمتي وكل تجي علئ بيت عمو ابو فريال تا تتونس
جانت لابسه تنوره كبس كصيره سوده ولابسه قميص ابيض وشعرها فاتحتو ومشسورتوا جانت جثييير حلوووه تور الگلب ور
دحكت عمتي صبحه علينا وابتسمت تگلطت منه وانا نزلت من السياره سلمت عليها وعلئ سوزانا بفشله
وفاروق عيونو ما نزلهن من سوزانا وعمتي
رمشت بعيونها العسليه بدلع وهي تلعب بخصلات شعرها لشگره ...
عمتي دحكت الفاروق...ما تنزل تسلم يول الكلب العضك قتلناه
رد عليها بغرور...لابعده عايش وينبح
سوزان لزمت امها...ماما اني حدخل جوووه موعتني الشمس
تنهدت عمتي...ادخلي ماما ادخلي هسه اجي وراج
هو بكل صلافه عيونو تدحك السوزانا وهي مجانت مهتمه الوو ودخلت وهي تمشي بدلع وتفر بجنطتها...
رجع باوع العمتي كلها...هاي اليابسه بنتج ؟
عمتي زكحت بوجهو...احترم نفسك شنو اليابسه هاي سوزانه تسوالها عشر نسوان مدللة ابوها
رد عليها ببرود...اي صح ان شاء الله خير
عمتي ضاجت وراحت دخلت جوه دحكلي كال...عود ليش مسميه بنتها سوزان والله عليكم سوالف بيت الشامخ هههه
ضحك باستهزاء وانه تنهدت وجاوبتو...بنتها حلوه ومن حقها تشوف الها اسم حلو تسميها بيه ...
رد عليه بغرور...بس مو مال تسميها سوزان جان سمتها دريه نفيسه حمدية مديحة مو مال سوزان انتم من الغربية شجابكم علئ الأكراد لو تفيكون...
رفعت عيوني لفوگ ودحكت للسما بملل...سمتها علئ اسم جارتها الكرديه لانو حلووه الحرمة جانت
هز ايدو...وشذنب المره الحلوه عمتي تسمي بنتها اليابسه عليها وتخرب اسم المره
اردف بتنهيده...يله يبه باجر انه عندج مفهوم
هزيت راسي بقبول وهو تركني وراح شفتو ابتعد مسافه وانه رحت فورتات وكبل علئ السجن اليشتغل بي ذياب...
......................
قربى...
جنت واكفه بباب غرفته ودگات گلبي تتسارع بشده دب الخوف بداخلي رغم مساندي بس عندي شك
دكت الشرطيه الباب وهو سمح الها بالدخول دخلتني واني اديه مکبله بهاي الحديد...
هو رفع عيونه بدون ما يرفع راسه ويكتب بسرعه كال للشرطيه واشر الها تطلع...تفضلي ...
خلت وراحت واني ضليت واكفه رجع باوعلي كال...ول بعدج واكفه تعالي اكعدي هينه علئ كرسي...
عضيت علئ شفايفي بخوف وبلعت الغصه وكعدت علئ الكرسي واديه المربوطه بحضني...
رجليه ترجف ترجف واديه صارت ثلج عبالك كاعده بالقطب الشمالي...
كل شويه وارفع راسي اباوعله وعيوني تتامله برعب وارجع اشتت نظري...
جان لابس الزي العسكري الزيتوني...ولابس
محبس فضه والشذره مالتها حمرة وداخل بيها اللون الذهبي...جنت مركزه بتفاصيله و وجهه المحتقن وهو يدقق بالملفات ويرجع يكتب بالسجل...شواربه الكثيفه الترعب عيونه الحاده مثل نظرات الذيب ...كل شئ بي غير ويرهب عكس شرهان
وبأثناء ما ديكتب باوعلي بنظرات غاضبه سوت ضجه عارمه داخل گلبي انتفض جسمي كله بخووف ونزلت راسي...
رجعت باوعتله وهو ضحك وهز راسه باسئ ورجع يكتب...
تنهدت ..اني صار نص ساعة كاعده هنا وهو بس يكتب حسيت بملل وخوف
عضيت علئ شفتي خلي اسكت لا يقره افكاري واروح بيها جنه نخاف حتئ من التفكير...ضباط قبل الهم هيبه
رن التليفون الأرضي وهو سحب السماعه ورخه ضهره علئ الكرسي المتحرك واستدار شويه...
رد علئ الشخص المتصل كال...نعم انه النقيب ذيب الشامخ
بعدها عقد حواجبه بتفهم...دحكت كل الملفات وما توصلت لنتيجه... الاريدو منك هو تشوف بالجنايات وتبحثلي بجرائم القصاص وتبعثلي كتاب مفصل تمام ؟
رجع القه بنظره عليه كال...تميم يعقوب..وسليم يعقوب...وقربان يعقوب..ويعقوب سلمان
من سمعت الاسماء فز گلبي من بين ضلوعي...
قفل الخط ورجع يقلب بالملفات والأوراق المركونه علئ المكتب
همست بداخلي بعبره ...يارب فك اسري من هل سجن..والله ما الي ذنب
ياربي من ماتت امي واني الفرح اغتصب بداخلي وين جنت و وين صرت صدك لو كالو ان دوام الحال من المحال..
امي جانت تنشر الفرحه علئ وجوهنه الحزينه ومن ماتت نسينه طعم الفرح
ارجع واكول الحمد لله يا ماما من متي ولا شفتي الصار بتميم وبابا امووت وما انسه منظرهم ...
تمييييم ....اااااااه عذابك هو عذابي يا حبيبي ما اكدر اغمض عيوني واتذكرك من فقدت من ضربوك
اااه يا خووويه سوده عليه شلون تحملت هل ضرب ضليت ما تحس لحد الان اتذكرك ضليت كاعد بدون حركه وهم يضربون بيك فقدت وعييك لاي درجة وصل بيك العذاب حتئ خلايا الوجع ماتت عندك واستسلمت الضربهم...
الدموع جيوش تجيشت بعيوني وحجبت عندي الرؤيه بحيث حسيت بدوخه وغثيان وكلبي يرررجف والدموع تتساقط بدون سابق إنذار...
فزيت مرعوووبه من صاح عليه...قربانه
باوعتله وكلبي رجف...هاااا سيدي والله ما سويت شئ
جر نفس عميق و وكف مشئ خطوتين بطوله الفارع وصار مقابيلي وكفت ونزلت واديه ترجف...
تنهد بهدوء وهمس...شبيج يوول ان شاء الله ما ضل شئ وتخلصين من هل سجن لا تخافين انا اسناد الج هينه
رفعت عيوني واني اباوعله...شكرا سيدي الله يحفظك ويخليك الاهلك ويحفظ امك واخواتك ما انسئ فضل والله
باوع لاديه بصدمه كال...ول ول ول ناسي افتح الكلبچات من ايدج عجل هاي مو سالفه ضال اخابر وانتي مربوطه هين...
ابتسمت بفشله اريد امسح دموعي ما اكدر استحيت منه ومن اديه لان مربوطه
هو باوع بعيوني واني نزلت راسي باحراج مد ايده يمسح دموعي واني ابتعدت خطوات وبعدت راسي عنه
هو تنهد و قبض علئ ايده بعدها سحب اديه ديفتح الكلبشات
وما نشوف اله الباب انهطر وانفتح بهجوم مباغت وما اشوف اله ذيج الشوفه بنيه شكد حلوه
هي شعرها كصير ولونه اسود وثخين وحواجبها مرسومه بابداع الخالق وسود ثخان وعيونها حلوه ولونهن متداخل بي اللون الجوزي...وشويه عندها شفايف مدبدبه...
هو من شافها انصدم بسرعه عاف اديه وهم عليها قفل الباب وركعها بي كلها بغضب....وئاااااام شجابج
ردت عليه بسرعه...السلام عليكم سيدي
عاد هو رجع ركعها بالباب بغضب خطيه ضاعت البنيه بطوله وضخامته لزمت كتفها وهي تمسح عليه...سيدي بس افهمني
خزرها بغضب...امشي جدااااامي
رجعت لزمت ايده وهي تتوسل...سيدي بس خليني افهمك انه جايه بس تا تسجن فاروق مو الشرطه بخدمة الشعب
واردفت بحزن...سيدي انت الشرطه واني الشعب ولازم تكون بخدمتي
نبت اصابعه بقساوة بكتفها وهي نزلت نفسها ولازمه ايده متوجعه ...ااااه اااه علئ كيفك سيدي كسرتو الچتفي..
تكلم من بين اسنانه...ول ول انتي ما تستحين ما عندج حيا انه لو اكصو الراسج هل حزه اكو احد يلومني شلون تجين هينه للمركز...
مسحت دموعها وهي تبجي ...سيدي انت غير ما تعرف شصار بيه اعتقل فاروق وخلصني منو ولي يسلمك
صاح بيها بغضب...سدي حلكج انتي تمردتي چثير الضاهر احنه مخلينج علئ حل شعرج
اني جنت بس صافنه ساعه اباوعلها وساعه اباوع اله وهي اصلا ممهتمه الوجودي وتحجي وتبجي وهو متعصب نار وفاير عليها...
شهكت ورجعت مسحت دموعها...انت ما تدري شسوه بيه فاروق اجاني للمستشفى وضل معرت بزياگي « مجلب برقبتي » وفضحني جدام وادم چثير انه استحيت
ويلعن بيه ويكول...كله بسبب ذيب هو المنطيج مجال ومخليج علئ حل شعرج وانتي ما عندج تربية وتتركي الشغل وغصبا عن الكل
رجعت لزمت اديه بتوسل وترجي...انه مو حجيت وياك وانت وافقت اشتغل انت الجبير مو فاروق ليش هو يتدخل
وهااا يكول اني دحكت ذيب بالملاهي وانه ما اقبل اختي تعيش عند واحد الملاهي اكبر هموو
وحجه كلام چثير وحتئ لعن جدي وتقاليدو ويكول انتي مسؤؤله مني لا ذيب ولا بطيخ لان هذا مخلصها ويه الگح...وما يشرفني
اني جنت مصدومه وخفت اكثر معقوله النقيب ذيب يطلع هيج ويجمل بروحه يمممه بس لا يريد يستغلني
هي جانت تحجي هيج وهو دار وجهه عليه وباوعلي شاف نظرة خوف ورعب بعيوني ...
رجع باوع لهاي الحلوه ولزمها من ايدها حييل وهزها...يووولي اكضبي السانج فضحتينه...
نزلت راسها بانكسار...يكول انه فاروق اشرفهم والكل يهابني وانتي ما تهابيني
اردف بضحكه...ههههه غيبة الذيب سوت للخرفان هيبه ..ما شاء الله فاروق استغل عدم وجودي ويريد يسيطر بسيطه ؟
جاوبت بفرحه...هاااا يعني اعتبر فاروق انسجن
جر نفس ورجع الكرسيه كعد عليه كلها بامر...حدري هين سجلي دعوه
نطت من فرحتها واستبشرت ملامحها اجت تركض سجلت دعوه وكمزت عليه باسته حييل بخده...شكرا ذيب شكرا
هو باوعلها وخزرها وهي فشلت ورجعت باوعتلي...العفو شكرا سيدي...
جر نفس وهو يباوعلها كلها...لا ترجعين الوحدج انه بس اخلص شغلي اخذج وياي روحي اكعدي عند ام خمائل اسالي عنها وهم الشرطي الواكف بالباب وهو ياخذج
هي باوعتلي صفنت وبعدها باوعتله كلتله...سيدي هاي عيون الغزال مووو؟
رد عليه بقهر...اطلعي برااا بسرعه
خلت وطلعت تركض وهو رجع يكتب وبعدها اتصل ضل يحجي ويدقق غلق السماعه وباوعلي
كال...قربى نقلوج المحكمة الثورة وان شاء الله القاضي ينطق الحكم
نهاية البارت ...يتبع
كونوا انتم كونوا بخير ...احبكم💔
نور سمو العراق..😘
لا تنسوا التصويت والمشاركه بكم نكتمل ❤
تنوية...هذا حساب بنيه ياريت تتابعوا وتعلقون الها بكد ما تكدرون مسويه ختمه قرانية تخص الشهداء وتريد فزعتكم وياها...Hashimia_
وكذلك طلب اخوي بداعة حمزية...تابعوا قصة الكاتبه حنين العلي قصة جدا جميلة من كاتبه اجمل..😍😍
haneenali422