_
_
عِــشق فـي بِـلاد حُـروُبِهـــا لا تنتّٰــهي 5 ( شهيـد الـواجب )
في البارت السابق
وقف رواد علي حيله بـ صعوبه وهوا يتمتم بـ السب والشتم علي الافندي علي لـ قعد يشبحله لين ختفي من تحت انظارة وتلفت لـ العساكر وقال :اول مايكمل جيبوه لـ الشيلات
ضربوله العساكر التحيه وتلفتو ضربو التحيه لـ الملازم جبر الله لـ ضربله الافندي علي التحيه وقال بـ اعتدال في وقفته :سيدي
الملازم جبر الله :بدو في التجنيد
هز الافندي علي راسه وقبل مايتكلم وفي لحظه اسرع من رمش العين سمعو صوت قصف انتج عن أثرة انفجار قوي هز الكليه ومافيها وما حولها .
تحرك من اترها كل العساكر والضباظ الافندية وباقي الطلبة لـ طلعو لـ الساحة بـ قلب مفزوع زي فزعة العاصمة.
قراءة ممتعة 💛
البـــ الرابع عشر والأخيــر ـــارتب
.
.
بـ عَفاويـــة حَــديث قربنـــا المـــوت منَّـا ، فـ أتت وأخدتنَــا ســـالِمين أحيـــاء مُعـــفين من مشـــاق بَـــاقي الحيـــاة 🥀
.
.
💔
الــــــســـبت
2020 / 1 / 4
كنت نبي ناخد نفسي ، لكن ماعاش قدرت ، حاس بدموعي يسيلو بدون شعور مني ، حاس بنار تبشر فيا انها حـ تحرق قلبي وروحي لا اخر يوم في حياتي ، قلبي يدق بـ اسرع دقات دقهم في حياته ، وكل دقه توجع بـ قسوة اكتر من الدقه لـ قبلها ، عقلي توقف وماعاش فكر الا فيهم هما ، صحابي ، خوتي ، رفاقي ، رافق عمري ودربي ، والشريط لي مالي ذكراياتنا بدي يمر ، ويعيد ، ويتكرر قدام عيوني ...
سكر مصعب التليفون واول ماتلفت انخلع من رواد لـ واقف وراه وهوا حاط يديه في جيوبه بـ ضحك :ياحبيب الماما انت ههههه اني شكلي غالط جاي للحضانه مش لـ كلية عسكريه ههههههه
رفع مصعب حاجبه :خير خونا فيه حاجه
ضيق رواد عيونه وخبط علي كتف هارون بـ القوه :هي انت حول مكاني
تلفتله هارون بـ رفعت حاجب وقال :مكتوب بـ اسمك
ضحك رواد بـ ستهزاء :ايه مكتوب بـ اسمي
طبس هارون لوطه وهوا يرفع في رجله ليسار بشويه ورجع حطها علي الارض ورفع رجله الايمين ورجع حطها علي الارض وبعدها رفع راسه وشبح لـ رواد وقال بـ رفعت كتاف :وينه اسمك ماشفتاش
قرن رواد حواجبه وقرب من هارون بـ اعصاب :تستزرف انت ، حول خير تو مانفسدلك خريطة وجهك
هارون زاد قرب وتكي جبهته علي جبهت رواد وقال بـ تهديد :فسد هي وشوف شن يصيرلك
رفع رواد يده لـ جابر وقرب الخطوه لبعدها مصعب وقال :باللهي من لكادب عليك ومقايلك خش الكليه العسكريه
وقبل مايتكلم مصعب خش هارون وقف بينهم وقال :نفسه لكادب عليك ومقايلك خش
قرن رواد حواجبه وقال :حول انت ماخصكش
هارون :وشني بدير كان ماحولتش
رفع رواد يده وضربه بوكس علي وجهه بـ قوة قوته خلا هارون يطيح علي مصعب لطاح علي الدولاب بتقربيع علي صوت جابر لـ شد رواد بصيحه :تي خيرك ياراجل شني دارولك
دفه رواد من عليه وهوا يقرب من هارون لوقف بغضب عارم خلاه يجبد طاسة لميه من علي كمادينو مصعب ويتلفت بيها لرواد ويضربه علي راسه بيها بكل جهده
جابر :تعرفو وقسم بالله جعااان
غمظ قاسم عيونه بـ القوه وقال :مبها الجوع علي خشوش الحمام ماعاش فيا كيف نتحمل
ضحك مصعب وخبط علي الحاجز اللي بينه وبين قاسم لـ انخلع ورجع عيط :تي لا ياراجل ره نفخت ريح نديرها تحتي
تعلت ضحكت مصعب لـ خلت منذر يفكها ويضحك :ههههه عادي ديرها في جيها من جيهات الشيلا وخلاص
قاسم :هوا هدا لبصير شكله
هارون صيح :امك مش اديرها الشيلا مفتوحه من لوطه تلتخني معاك
مصعب :وقسما عضما اديرها نكون مظهرك اليوم
منذر :هههههههههههه بطني ياعن فيتكم بطني ههههههه
جابر :هههههه ياكلاب نقصو صوتكم تو يجونا
شد قاسم بطنه وقال :اسمعو ماعاش فيها سكرو ودانكم شويه
صيح هارون :لا يا....... وربي اديرها لما ننقز لـ .....
جبد رواد البطنيه من علي مصعب وقال :تي نوض بلا نفخ
تلفت هارون هجم علي رواد لشده من ياقة تشرته وقبل مايضربه ستغرب من ضحكته لـ تعلت مع صوته :لا حولي ولا قوة الا بالله هههههههههه
ضيق هارون عيونه وهوا يتلفت لـ مصعب لـ غمط عيونه بـ خجل حد الموت وهوا متربع علي السرير لـ شرشافه ابيض ومبين دائرة لميه المبلوله لخلت منذر يوقف تابت بصدمه وهوا يشبحله لـ لحظات قبل مايتلفت يشبح لجيها التانيه علي صوت جابر لقال وهوا يقص علي رواد لكان بيتكلم :هيا رواد هيا
نفخ رواد وهوا يحول في طاقيته وحك صلعته وقال :ياعليك فندي مزبر جابلي الجلطه والقداد والبغدد في المصارين
طبس منذر لبس البوتيل :غر كان يسمعك بس يوريك البغدد والقداد لما يجي في البنكرياس
واول مارفع منذر راسه شبح الافندي سامي يأشرله بصبعه بمعني اسكت وهوا واقف ورا رواد اللي لبس طاقيته وقال :ونبي ياعند....
وقعد شاد علي الداال اول ماشاف منذر اللي يفنص فيه ، وحول عيونه لـ الروشن لعكس صورة الافندي سامي لواقف وراه وكمل بسرعه دوته :عندي ليك خلقت تمرينات ياراجل اطلع طول تعلمتهم من الافندي سامي تي اطلق افندي في العسكريه كلها
تلفت رواد لـ هارون لـ قعده ابتسامة الاستفزاز علي مبسمه وقال :ماتصليش وراي انت
ضحك هارون وقبل مايتكلم سكرله منذر فمه بـ يد وبـ يده التانيه جبد البطانية من علي مصعب وصيح :سكر فمك وانت نوض هيا
نفخ مصعب وناض ساوى روحه وقرب وقف جنب منذر لـ ينخس في هارون لـ قعد يضحك وقال :اخر عمري نوقف نصلي ورا مستارضي
ضربه منذر علي بطنه بـ مرفقه بـ تفنيصه وهوا يلصق في رجله الايمين في رجل مصعب ورجله الإيسار في رجل هارون لـ مسح علي بطنه بـ ألم من ضربة منذر ويستقيم بـ وقفته ، وشبح قدامه لـ قاسم وجابر لـ ستقامو في وقفتهم علي صوت رواد لـ رفع يديه وبدي يقيم في الصلاة:الــــلّٰــــه أكــــبــــر الــــلّٰــــة أكــــبــــر ، أشــــهــــد أن لا إلــــه إلا الــــلّٰــــه ، أشــــهــــد أن مــــحــــمــــد رســــول الــــلّٰــــه ، حــــي عــــلــــي الــــصــــلاة ، حــــي عــــلــــي الــــفــــلاح ، قــــد قــــامــــة الــــصــــلاة ، قــــد قــــامــــة الــــصــــلاة ، الــــلّٰــــه أكــــبــــر الــــلّٰــــه أكــــبــــر ، لا إلــــه الا الــــلّٰــــه ، الــــلّٰــــه أكــــبــــر .
ضحكو الشباب علي فتحت باب الدار لـ خلت رواد ينوض يقعمز وقال :تي ناشيد ز...
واول ماشاف الافندي علي سكت في نص الكلمه وتلكمس في بعضه وناض وقف مع الشباب وضربوله التحيه .
قرب الافندي علي من رواد وقال :ايه كمل تي ناشيد ززززز شني
حس رواد بـ قرصت منذر لـ كان بيتكلم بس سبقه رواد وقال :زوييين ناشيد تبارك الله قداش اللي مألفه انسان راقي مرتقي مترقرق ان شاءالله ربي يحفظه يافندي ويحفظك حتي انت
وقف مصعب مع قاسم وجرو لـ باب صالة الاكل لـ سكروها قبل مايجي حد ويمشي يقول لـ العسكر ، وخلو جابر لـ يبي يجبد سيف من تحت يدين منذر بس منعه هارون لـ قال :فكك خير مايولي عليك حتي انت خليه يربيه
وتلفت لـ منذر لـ بعد من سيف اللي متكمش في روحه علي الارض متألم وهوا مش قادر يرفع راسه لـ منذر لـ نزل كمام بدلته وقال بـ تنهيده :اوووووه هكي نقدر نكمل عقاب يومي بسلام
هارون:اميمتك عايشه
رواد :ايه
رفع هارون عيونه بـ لمعة دموع :ربي يحفظهالك ان شاءالله
ونزل عيونه بـ دمعة كسراته ونزلت وخلاته يمسحها خطف بـ اطراف صوابعه :تراهو ديما شادتها في جرتك وتكلم فيك حتي اني امي كانت هكي كنت نكشخ عليها ومرات مانردش علي مكالماتها
وضرب بـ يده علي صدره وعطي بـ ضهره لـ رواد وكمل بـ عبرة حاول كتمها :غصه يارواد غصه في قلبي كل ماندكر في المواقف لـ عليت صوتي عليها فيهم مانحسابش روحي بنفقد اتصالاتها واسألتها ونشدتها عليا مانحسابش روحي كنت في نعمة وعز ماحسيتش بيهم لين فقدتهم مع فقدها
تحمحم رواد ونزل عيونه وهوا حاس بـ وجع في قلبه حس بـ شوق لـ امه ولـ اتصالاتها ولـ صوتها ، خدي نفسه وهوا يرجع يشبح لـ هارون لـ كان شاد صوت شهقاته بسيف وبـ وجع خلت رواد يقرب وهوا يلفت فيه ليه ويحضن فيه بـ كل قوته
مسح قاسم دموعه بـ كف يده وهوا يرفع في راسه بـ صدمه اول ماجاه صوت هارون :عظم الله اجرك ياخوي
رجعو الدموع ملو دموع قاسم وسالو علي خدوده اول ماشاف الشباب لـ واقفين قدامه
جابر :الله يرحمها هدا حال الدنيا صدقني فقد الام والاب كسره كان انكسرتها ماعاش يكسرك شي من بعده
ملو عيون قاسم بـ الدموع وقال بـ ابتسامة :نحسابها هكي حتي اني ياصاحبي لكن انكسرت تاني
ورفع عيونه في جابر وكمل :امي الحقيقيه توفت وهيا تجيب فيا وهدي مرت بوي
سكتو الشباب فجأة علي كلام قاسم لـ كمل وهوا يمسح في دمعه سالت علي خده :الله يرحمها ماعمرها حسستني انها مرت بوي طول عمري حاسبها امي لـ ربي خداها مني عطتني حضنها وحنها وحبها كـ اني ولدها حق
وماقدرش يشد عبرته ودموعه لـ سالو وكمل بـ شهقات قطعت صوته :ربي كاتبلي نعيش من غير ام
ضحك منذر بـ عيطه وهوا ينزل علي ركابه ويحط في يديه علي راسه بـ قرف من الدحي لـ ينحذف عليه من جابر و رواد لـ حدف عليه اخر دحيه في يده بـ القوة وغل وقال :اندمك في اليوم لـ خطبت فيه قبلي يامعفن ههههههه
خبط قاسم علي ضهر رواد :ههههه كان بيستناك لين تخطب عنس الراجل هههههه
رفع رواد حاجبه ورجعله الضربه بـ خفه علي راسه :احمد ربك جيت قاسم
ضحك قاسم ولف يديه علي رقبت رواد وركب علي ضهره
زاد رواد حضن الحديده وغمظ عيونه وصيح بـ صوت رقيق مخنوق :ماتجي تستهداء بالله يافندي ياجميل يابطل وتجي تنزلني من الصراط المستقيم هدا قعد مش لام حسانات راني
شد جابر ضحكته مع الافندي سامي لـ صيح :قتلك تحرك
صيح رواد بـ صوت مخنوق يضحك اعلا من صوت الافندي سامي :تي شن بنتحرك ياسوسو شن بنتحرك وووووووه عليا زودولي جسمي حساس وربي كان طحت نتفترش وووووووه يافندي علي يافندي جبر الله زودولي ياهاااارون زودولي وووووووووه
وقفو الشباب وهما يضربو في التحيه لـ الملازم جبر الله لقعد يشبحلهم واحد واحد بصمت لاحظات وبعدها قال :وين زميلكم السادس
تحمحم قاسم وشبح لـ مصعب لشبحله ورجع شبح لـ الملازم جبر الله وكيف بيتكلم سكت وهوا يشبح لـ منذر لـ خش من بين العسكر بـ طريقه مضحكه خلت الشباب يشدو ضحكتهم وهما يشبحوله كيف نقز ووقف قدام الملازم جبر الله وضرب التحيه :سيدي
الملازم جبر الله :وين كنت ياعسكري
منذر :حشاك سيدي نقضي في حاجتي
ضحك مصعب اللي كمد ضحكته اول ماضربه جابر علي بطنه بشويه وهوا يفنص في رواد لـ حط يده علي عيونه وهوا يحاول يشد ضحكته .
قدم جابر خطوة وقبل مايتكلم سمع صوت رواد لـ قال :امتعي اني
تلفتو الشباب لـ رواد بـ صدمة خلت هارون يفك يديه من منذر وجابر وقال :لا يافندي متعي
رفع الملازم جبر الله حواجبه فيهم وهوا يشبح لـ رواد لقال :كذاب يافندي تو واحد شلتت عيل زي هدا بيقدر يدخل دخان للكليه تي متعي يافندي خلاص هي افصلني
منذر :اني مش عارف كيف لقو واحد بس
جابر :شكلكم جايبين ستيكات وربي انكم كمشة كلاب
قاسم وقف وقال :الصبح شبحت واحد محطوط بين حوايج مصعب بالك هدا لـ القوه
خبط مصعب علي خدوده :شن جابه بين حوايجي يرزيني فيكم
منذر شد ضحكته وقال :المبارح خديت منك تشرت ولقيت دولابك زي المزبلة دسيته بين حوايجك اكيد مش حـ يلقوه بينهم اصلا اللي بيفتح دولابك يتعود من بليس ويولي يسكره
ضحك قاسم :هههههههه وحقربي لا حق
مصعب:ياحيوانات مالكم ومال دولابي علي الاقل نظيف مش زي دواليبكم معبيين بـ الدخاخيين
قاسم :لمية بردت
منذر :برا بدلها بسرعه قبل مايجي مصعب
واول ماوقف قاسم انفتح الباب الصاله وخلعه وسيب الصونيه لـ طاحت من يدين قاسم وقعدت تتقربع بـ القوة ذبت الرعب في قلوب الشباب لـ قعدو يشبحو لـ بعض ونقز هما التلاته نزلو شدوها بـ شدان نفس وصمت دام لـ لحظات وهما يراجو العسكر يخشو عليهم بس اول ماأظمنو شبحو منذر ومصعب لـ قاسم لـ بتسم بـ براءة وقال :سامحوني بروات
منذر :يستر ربي منك تو بعد ماعرفت مادير فالطه باش يلزوك
تلفتله رواد بـ راسه وقال :فكره والله
ضربه هارون علي جبهته :هههه فكرت امك مش فكره رد بالك من توا
رواد :رجليا يابرو رجليا ماعاش تضرب
وتنهد وهوا يشبح لـ مصعب وقاسم لـ لفوله رجليه بـ الفوط وناضو قعمزو علي الاسرة وقال :غريبة طلعوكم
جابر :ايه حتي اني قلت تلاته ايام ويالله يطلعونا
رواد :باش تعرفو صاحبكم كان مش مني
بتسم هارون ولف يده علي رقبت رواد وتكي راسه علي راس رواد لين خلاه يعيط :شن ادير في بروفات عليا يامتلي يانجس حول
ضحك هارون وهمس :ههههه انت خوي مش صاحبي يارواد ره
هارون :مدامك خشيت العسكريه بطاقة المدانيه نسحبت منك حتي كان تطلع من بلادك مش تروح لحوشك بس
منذر :والفرق حني خشينا لـ كليه ادربنا تدريب يأهلنا لـ الحرب والجبهات وتعسكرنا بـ انضباطات عسكريه وقرينا مفاهيم الحرب لـ حني نبو نمشولها ، لكن هما الحرب هيا لجتهم وخلتهم عسكريين بدون ارادة منهم وخشو يحاربو من غير تدريب ولا فهم مفاهيم الحرب اللي حني تعلمناها اطرو يحاربو ويدافعو باش يحمو وطنهم وحياتهم وعائلاتهم
جابر :هما افضل منا نحس
هارون :لا الاتنين زي بعض لكن هما مسيرتهم اصعب منا
قاسم :اول مره نعرف هدي المعلومة
لف جابر يده علي رواد السارح في كلامهم وقال :تسهوك تسهوك ماتخليهاش في خاطرك هههه
ضحك رواد بـ خفه وقال :العسكر المدني ختاراته بلاده لكن حني خترنا بلادنا هدا الفرق لـ بينا
زعما نحلم ، اني نحلم ، يارب حلم ، خليه يطلع كابوس ، ياربي خليه كابوس ياربي خليه ضيق حلم ، ولا ضيق واقع ، خليه ضيق نفس ياربي ، خليه ضيق نفس ياربي ، اقطع عليا نفسي ياربي ، اقطع عليا نفسي ياربي ...
خدي رواد نفسه بـ شهقه خلت نخصه ترتشق في نص قلبه لـ وعي مع بصرة لـ فاق من غيبوبته وشبح المسعيفين والافندية لـ يتحايسو مع اصوات الاسعاف وانذارات الحريق لـ خلاته يستوعب الموقف ، الموقف لـ خلا رجليه يخونوه و يتعترو في خطواتهم بـ رؤية مشوشة وهوا يشبح في الضحايا لـ يتجارو ويطيحو مغمي عليهم من لدعة الموت .
زمط رواد ريقه بـ دموع نزلت علي خدوده بدون سابق انذار وهوا يحاول يقاوم عدم اتزانه بـ خطوات متعترة ويتخطا في الجتت والجرحة ويدور في الشباب بـ عيونه بـ هستيريه جنونيه خلت قلبه يموت ومايحسش ومايهتمش بـ جتت الغير ، وماهتمش بـ اجزاء الاجسام المتناتره ، ومايهتمش بـ الدم ، ولا يهتم بـ اصوات انين الجرحة ونجدتهم .
قلبه مات علي الكل ومش قادر يحس إلا بـ صحابه ، بـ خوته لـ اول ماجت عينه في جابر لـ غارق في دمه طلعت منه صيحة وجع فضيعه من وسط قلبه وهوا يقرب منه بـ صياح :جـ جـابر جابر نوض جابر لالالالالا جابر ياهارون يااا
وسكت اول مارفع راسه وشاف واحد من الافنديه واقف علي منذر لـ يشبح مباشرتاً لـ عيون رواد لـ ضحك بـ فرحة ورجع شبح لـ جابر لـ أن بـ صوت خافض وقال :جايك باهي جايك ياجابر جايك
وناض رواد وهوا يتعتر ويطيح من بين خطواته وقرب من منذر:منذر الحمدالله منذر تسمع فيا وله
حط الافندي علي يده علي كتف رواد بـ صوت متأثر وعيون مدمعة:ان لله وان اليه راجعون ، حسبي الله ونعم الوكيل ، ان لله وان اليه راجعون
بعد رواد كتفه من قبضه الافندي وصيح بـ سبه وهوا يضرب في منذر علي خدوده :لالالالا منذر تي تشبحلي انت تشبحلي منذر خيرنا ازح خيرنا لا يامنذر ازح علاش علااااااااش لا باللهي عليك لالا لا
وغمظ عيونه وهوا يحاول ياخد نفسه وحط راسه علي صدر منذر :لا يامنذر لا باللهي عليك لا ياخوي باللهي عليك ياخوي
ورجع رفع راسه مع يده لـ حطها علي عيون منذر وقرب باسه علي جبهته بـ صوت شهقاته لـ تعلت بـ صوت عالي ، وسحب يده وهوا يسكر في عيون منذر ورفع يده مسح دموعه بـ كم بدلته ، و وقف بـ تعتر وهوا يبي يولي لـ جابر وقعد مستمر يمسح في دموعه لـ ينزلو كـ السيل الفايج ، يمسح فيهم بـ عبت محاول ينظف الدموع منهم بـ امل يلقا هارون ولا يسمع صوت قاسم او ....
مافيش او ، للاسف مافيش مصعب لـ شاف المسعفين يغطو فيه بـ الشرشاف الابيض لـ خلت اتزان رواد يختل وهوا ياحاول يمشيله بـ دموع متخاصم هوا وياها يمسح وهيا ترجع تشوشله في نظره لـ بعده من مصعب اول ماشاف المسعفين واقفين علي هارون وقاسم .
تلفت رواد وهوا يسترجع في اتزانه بـ خطوات رجعت لـ اتزانها ومشي لـ هارون لـ قعمز جنبه وشد يده وقال من بين دموعه :هـ هـ ـارون
فتح هارون عيونه من بين الدم لـ يسيل من جبهته وهمس :مـ ـصـ ـ ـعب
زاد رواد ضغظ علي يد هارون وتلفت وهوا يشبح في المسعفين لـ بعدو من علي قاسم وهما يرددو في كلمة ، ان لله وان اليه راجعون ، لـ خلت صوت رواد يطلع بـ نبرة مخنوقه ويرجع يشبح لـ هارون وصيح :زودي يا...... زودو اسعفوه زودوووو
ورفع يده التانيه وحطها علي راس هارون لـ حطه علي صدره وقال :اصبر شوي اصبري ياخوي اصبر اهو بجوك باللهي عليك اصبر
نزلو دموع هارون من عيونه لـ متعلقات في عيون رواد وبتسمله بـ خفه تبتت علي مبسمة بـ حركة عيون تبتت مع اختفاء شهيق نفسه العالي لـ توقف فجأة وخلا رواد يهز بـ راسه :ها لا ياكلب لا حي عليك ياهارون حي ، حي عليك تموت حي لا ياكلب لا ونبي لا ونبي لا ياهارون فكنا من لبصارة ياخوي باللهي عليك ياهارون ماتقتلنيش باللهي عليكم ماتقتلونيش باللهي عليكم ماتخلونيش بروحي باللهي عليكم خودوني معااااااااكم
وضم شفايفها بـ وجع وهوا يلف في يديه علي هارون وحضنه ليه بـ القوة وعيونه في قاسم لـ غطوه بـ بطانيه تحت نظر رواد لـ صيح صيحة شق بيها عنان السماء وصعدت مع ارواح رفاقة لـ سابع سماء ...
.
بـ اأرواح شَــاهقه لَعنــة فاجِعينهــا صَعدت لـ ربِهــا مُستشهـدة 🕊🎈
.
.
وفـي رمشــة عيـن ضَـاع إِستبـراق حيــاتي ومُلهمهــا 💔
.
.
فتحت سما عيونها بـ ضيق وهيا تسمع في دوشة البرا خلتها تتنهد وهيا تنوض تقعمز وتمسح علي عيونها النعسانات وخدت تليفونها شبحت الساعه لـ كانت متأخرة ، خشت لـ الرسائل وبعتت رسالة لـ منذر بـ ابتسامة رتسمت علي شفايفها (حبيبي كملتو تدريب )
وسكرت التليفون لـ رجعت حطاته علي السرير لـ ناضت منه وطلعت وهيا تسمع في دوشه في الصاله لـ مشتلها وهيا تشبح في امها مقعمزه وتهز في مكانها وشارقه في بكاها وبوها شاد راسه بين يديه و وسام يتكلم في التليفون وهوا واقف قدام شاشة التلفزيون العالي لـ مانتبهتش علي الاخبار لـ يبث فيها وقالت :خيركم شن فيه
تلفتولها وساموبوها لـ ناض وقرب حضنها بـ عدم فهم منها خلاها ترتبك والخوف يتسلل لـ قلبها .
رفعت سما يداها وحطتهم علي صدر بوها وقالت:شني فيه يابابا شن صاير من مات
زاد رجب حضنها اكتر لـ صدره وقال بـ عيون مدمعة متأثرة :ان لله وان اليه راجعون يابنتي ، ان لله وان اليه راجعون ، منذر استشهد منذر مشي لدار خير من دارنا ومكانا
رفعت سما حواجبها بعدم استوعاب وحاولت تتقلص من يدين بوها لـ ارتخو من عليها وهوا يشبحلها كيف شبحتله وتلفتت شبحت لـ وسام وقالت :شـ شن تقولو من ساعتين ولا تلاته كنت نكلم فيه شن تقولو انتم
ورجعت شبحت لـ بوها :بابا
تحمحم وسام وقرب باس جبهتها وقال :ماتبكيش راهو بـ اذن الله شهيد ابكي علي روحك ياوخيتي
وبعد طلع وخلاها تحط في يدها علي قلبها بـ دموع تجمعو في مدمعها وهيا تشبح في امها لـ وقفت قربت منها بـ دموع شارقه بيهم :ربي يرحمة يابنتي ربي يصبر اميمته ربي يصبرك يابنتي ربي يرحمة
ختل توازن سما لـ قبل ماطيح شدها رجب بين يديه بـ صيحة منها وهيا مش مستوعبه ومش فاهمة ومش قادرة لا تفهم ولا تستوعب ، كيف الموت قريبه منا كيف ، من ساعات كلمته ، وتوا عند ربه ، واحلامنا من بحققها ، وزواجنا لـ حلمنا بيه شـن بصير فيه ، وحبي ليه شن بيطفيه ، وجهه كيف ماعاش بنشبحه ، ضحكته صوته كيف ماعاش بنسمعهم ، هدا حلم ، اني قعده راقدة ، اني في كابوس ، وبنوض منه ، وحـ نلقا منذر متصل بيا ، يراجي فيا انوض باش نكلمه قبل مانمشي الجامعة ، حبيبي قعد عايش .
غمظت سما عيونها بـ شهقه رشفتها بـ شهيق وطلعتها مع صوتها:ااااااااه ياربي اااااااه ياربي اااااه ياقلبي ااااه يابابا منذر يابابا لا يابابااااااااااااااا
.
حِينهــا أدركـت أنَ المَـوت أقـرب إلينــا من أنفُسنــا 🍂
.
.
ويَــاليت لم أقتًَرب ، يَــاليت لم أتَعلـق ، و يَــاليت أللّـيت تَتحقـق 🥀
.
.
حطت مـريم يدها علي فمها بـ شهقه خلت السِـيفاو يطلع من المطبخ :خيرك
تلفتت مـريم خدت تليفونها وحطت يدها علي قلبها :قصفو الكلية العسكريه ولد عمي ياسِـيفاو ولد عمي يقرا غادي
لف السِـيفاو لـ التلفزيون لـ قواه وهوا يقرا في الاخبار العاجله لـ ملت كل القنوات الليبية :لا حولا ولا قوة الا بالله حسبي الله ونعم الوكيل في اللي كان السبب ان شاءالله غير مافيش موته هلبا
خدت مـريم تليفونها بـ رعشت يد وتصلت بـ رانيا لـكيف خشت دارها ، بتسمت بـ فرحة وقربت خدت تليفونها لـ اول ماشافت اسم مـريم انطفت ابتسامتها وردت :نحسابك هارون
خدت مـريم نفسها وقبل ماتتكلم سمعت رانيا صوت صيحة سامح وبوها البرا بـ عياط خلعها وخلاها ترد علي مـريم :سكري سكري تو نكلمك ابصر شن فيه برا
مـريم :ستني
لوحت رانيا التليفون علي سريرها وطلعت وهيا تشبح في سامح لـ يلبس في جيبوطيه وطلع يجري وخلا بوه لـ رجليه ماعاش حملوه وقعمز علي الارض وهوا شاد راسه بين يديه بـ طريقه خلت رانيا تقرب منه بـ خوف :بابا خيرك بابا نوض خيرك
ورجعت رانيا تلفتت لـ امها لـ تبكي بـ العبرة وزادت شتاتت افكار رانيا لـ عيطت :تي شن فيه حنينه فيها حاجه حنينه ماتت
حسين :ولد عمك جمال توفي هارون توفي قصفو العسكريه الله ينتقم منهم قتلو الولد الله ينتقم منهم
بعدت رانيا من بوها ولصقت بـ ضهرها علي الحيط بـ عدم استوعاب خلاها تشبحلهم لـ لحظات وهيا تستوعب في كلام بوها لـ ناض بـ حيل مهدود ودموع سالو علي خدوده بـ ألم علي ولد خوه وقال :وتو روحكم هيا يابنتي هي
نزلت رانيا نظرها من بوها بـ تكذيب بـ اصوات غابت عليها زي ماغابت عليها الرؤيه مع الدنيا لـ لفت بيها وطاحت من بين صياح بوها و امها لـ جوها يجرو ...
.
كُنت أعلـم بـ فُــراقنا ولكِـن لم أعلـم أن المـوت هي التــي سـ تُفرقنــا 🍁
.
.
وبـ الرغـــم علمنــا بـ المـــوت إلا أن كُـلما يـأخُذ أحــداً منــا ننكسـر ونتَــوجع 💔
.
.
يارب مايموتش ، يارب مايموتش ، يارب نموت ، يارب نموت ، يارب مايموتش ، يارب نموت .
فتح رواد عيونه علي صوت الملازم جبر الله اللي قرب من الدكتور لـ طلع من غرفة الطوارئ بـ تأثر وقال :للاسف تلاته توفو وستة حالتهم حرجه
وقف رواد بـ دموع ماليات عيونه الحمر المرهقه وقال : و وجابر الولد لـ جيت معاه شن حاله
تنهد الدكتور وقرب طبطب علي كتف رواد :ربي كاتبله الشهادة ربي يرحمة ويتقبله من الشهداء
غمظ رواد عيونه بـ دموع سالو علي خدوده ونزل راسه لـ شده بين يديه وعيط بـ صوت عالي :لاااااااااا لاااا كيف لااا ياربي لااا
قرب الملازم جبر الله منه :حرام عليك يارواد حرام هدا قدر وقضاء ربي حرام لدير فيه
زاد رواد عيط بـ هستيريه وتلفت لـ الحيط وخبط راسه بـ دون شعور بـ ألم :هما لحرام عليهم هما ، علاش صحابي علاش شنو دارو صحابي خوتي شن داااارو علاش قتلوهم علاااش علاااش ياربي علاش قتلوهم علاش
شده الملازم جبر الله والدكتور لـ صيح علي الممريضين لـ جوه شدو معاهم رواد لـ جبهته نجرحت من الخبط علي الحيط وصوته زاد تعلا مع دموعه وهوا يحاول يفك روحه من الممرضين لـ دخلوه لـ الاسعافات وعطوه مهدئ باش هدي ورقد بدموع لازالت تسيل وكـ انه عقله غاب عن الوعي لكن قلبه قعد فايق و واعي بـ اللي صار .
وحتي واني راقد نبكي ، بنجو تفكيري ، لكن قلبي قعد يحتضر ، عارف ومستوعب فراقكم ، مافقدتش واحد ولا تنين ، فقدتكم الخمسة ، وقعدت بروحي ، خليتوني بروحي ، ربي فضلكم عليا ، ربي حبكم اكتر مني ، ربي رادكم اكتر مني ، وهدا مش حظ انه اني قعدت وانتم متم ، هدا قلت حظ ، قلت بخث ، قلت بخث ياصحابي قلت حظ ياخوتي ، مش عارف نفرحلكم ولا نبكي علي روحي ، مش عارف ندعيلكم ولا ندعي لـ روحي ، مش عارف نسعي ننتقملكم ولا نسعي نحصل لـ كسبتوه .
.
المحظُـًوظ لـيس من كــسب في دنيــــاه ، المحظُــوظ من كـسب في أخــــرتـه 💛🍃
.
.
سلامــــاً من حبـــاهُ الســــلام بـ فَــردوسِــه ومســكـ الخِيتـــام 🏳️
.
.
عَلـم يرفرف أحمر أسود أخضر ، وبـ النَجمة وهلال متزين .
وفي ميدآن الشُهداء بين حمــام الساجِل عرسان قبُور حـاضرين .
يصـلو علينا باكيين زعلانين ونَحن فرحانين وبعُون الله مُـستشهدين .
نوينَــا نكُـونو حُمــات الوطن وصرنــا بـ إذن الله أبطال لـ المجد حاملين .
وداع يــالوالدين بالله ماتحزنـو علينا و وداع يــالوطن وسْماحنا ليكـ عطينا .
لا اله الا الله محمد رسول الله ، لا اله الا الله محمد رسول الله .
حضن رواد بوه لـ رجليه ماعاش حملوه وطاح هو ورواد علي الارض من بين الناس ومن بين دموعهم المتبادله ، واحد يبكي حامد ربي علي نجاة ولده ، والتاني يبكي يناجي في ربه ياخده مع صحابه .
باس عبدالقادر علي راس رواد وبعد باسه علي خدوده المبتدلا بـ الدموع وقال :الحمدالله الحمدالله ياولدي الحمدالله سامحني ياولدي سامحني
نزل رواد راسه وحطه علي كتف بوه :صحابي يابوي اللي عشت معهم وضحكت معهم ماتو يابوي قلبي يوجع فيا ادعيلي ربي يخفف عليا ادعيلي يابوي
شد عبدالقادر راس رواد بين يديه ومسحله دموعه :حسبي الله في اللي كان السبب حسبي الله ونعم الوكيل فيهم نوض ياولدي نوض ماتبكي نوض هدو بعون الله شهداء نوض ماتبكيش ربي عطاهم من خيره
مسح رواد وجهه بـ يديه الزوز وشبح لـ بوه لـ طلع التليفون لـ علن عن مكالمة من فرملة السوريه العربيه ومده لـ رواد :هدي امك رد عليها
خدي رواد التليفون من بوه و وقف وهوا يساعد في بوه يوقف وتلفت رد علي امه لـ جاه صوتها لـ رافعاته العبرة :اعطيني رواد اعطيني ولدي
رواد :نعم ياامي
خدت نعيمة نفسها بـ راحة و وجع في نفس الوقت :وااااه ياوليدي واااااه ياكبدي فيا ولا فيك يومي قبل يومك ياكبيدتي وينك وينك تعالالي يارواد تعالالي
مسح رواد دموعه بـ كم بدلته العسكريه وسكت لـ دقايق وهوا يسمع في بكي امه لـ تترجا فيه يجيها بصمت طال عنده وهوا يحاول يطلع الكليمات لـ بقولهم لـ امه لـ واخيرا طلعهم بـ عبرة وغصة قلب :نـ نـ ـدفن صحابي ياأمي ونجيك
هزت نعيمة راسها من بين دموعها :باهي ياوليدي باهي ياكبيدتي اهو نراجي فيك ياقليبي اراجي فيك
سكر رواد الخط وتلفت علي صوت سيارات الاسعاف لـ وقفو في وسط الساحة بين اصوات عياط الأهالي وتكبير الناس لـ نزلو الجتث الشهداء بـ عون الله في نص الميدان تحت عيون رواد لـ ختل توازنه بـ قلت حيله وهوا يحس بـ يدين سندوه لـ اول ماتلفت وشاف صالح خو هارون لـ دموعه مالين خدوده لف رواد يديه وحضنه بدون مايتكلم وهوا يشم في ريحة صالح بالك يلقا فيه ريحة هارون لو حتي شوي يطفي بيها نار شوقه .
بعد رواد من علي صالح وهوا يتلفت علي صوت الملازم جبر الله لـ ناداه :روااااد هيا تعالا عسكري
زمط رواد ريقه ومسح دموعه بـ كمام بدلته العسكريه بـ عبت وقرب وقف قدام التوابيت جنب زملائه الناجيين ، وعيونه مافارقوش توابيت الشباب لـ حطوهم جنب بعض وأقامو صلاة الجنازه عليهم بدموع مكسورة مجروحة .
امس كانت نصلي بيهم ، واليوم نصلي عليهم ، امبارح واقفين عليا ، واليوم هما في كفنهم ، قبل 15 الساعه بس كنت نتكلم ونضحك ونتعارك معاهم ، وتوا واقف مشتاق لـ كلمة منهم متمني نشوف وجوهم ، ونحط عيني في عينهم ونحضنهم ، في لحظه خسرتهم ، في رمشت عين الموت خطفتهم مني ، الله يلعن لـ فرقنا ، الله يلعن من قتلكم وبعدكم عليا ، حسبي الله فيهم الي يوم ابعت ويباعون وتبعتون
لعنتِـي علـي من قتــل قلبــي 🩸
.
.
خوفــي عـلـيـكـ ليس فقـط في الحيــاة ، خوفي عـلـيـكـ سـ يُـرافقكـ حتي وأنتَ عند الدَّي لا تضيـع ودائعــه 💔🍂
.
.
خدت جنات نفسها من بين بكاها وقالت بـ صوت متقطع وهيا حاضنه رانيا :كـ كـ .... كلم بابا عليك ، كلمه بـ ـاش يخطبك ليـ ـه ، مات قبل مـ مـ ـايفرح بيك وياخـ ـدك مات حتي قبل ماتـ تـ ـتسمي ليه مات يارانيـ ـا خوي مات ولحـ ـق ماما
زاد صوت بكي رانيا لـ حضنت جنات اكتر وهيا تغمظ في عيونها بـ كل قوتها ، وهيا متمنيه لما تفتحهم تنوض من الكابوس لـ عايشه فيه ، تنوض من الكابوس لـ ذمر قلبها ، وروحها ، تنوض وتتصل بـ هارون ويرد عليها وتسمع صوته لـ تموت وتسمعه لـ تانيه وحدة .
بعدت رانيا وهيا تسمع في صوت الزغاريط تعلت مع الباب الدار لـ انفتح عليهم وخشو لبنات ومريم لـ قالت من بين دموعها لـ مسحتهم :نوضي جنات جابوه نوضي شوفيه ونوضي يارانيا عمامي نادو عليك باش تشوفيه
تلفتت جنات لـ رانيا لـ هزت راسها بـ عبرة بـ النفي لين خلت مـريم تقرب :نوضي يارانيا عمي قال قبل مايتوفي كلمه عليك ، وتراهو متعشم فيك حرام ماتشوفيشي وتخليه يسمع صوتك قبل مايندفن
شدت جنات يد رانيا ووقفت :نوضي هيا
فكت رانيا يدها وقالت من بين دموعها :لا لا حرام ، حرام اني مش محرم ، حرام اني مانبيش انركبله لحرام وهوا ماشي عند ربي ، لا مانبيش لعذاب يمسه مانبيش لحرام يمسه يامـريم
ضمت مـريم شفايفها مانعه انين صوتها يعلا وهيا تقرب تحضن في رانيا لـ صوت بكاها تعلا اكتر بـ هستيريا علي قلبها علي حبها اللي بعد ماضنت انه مستحيل ربي قربه منها ، ولما قرب و ولا واقع انسحب منها في غمضت عين ...
.
لم أتـوقع حُبـكـ لـي ، وحيــن تحقـق فَقدتــكـ 🥀
.
.
اللّٰهـم بــرداً وسلامــاً عـلي قُبــور من أندفــن القلـب معهــم ☁️🤲🏻
.
.
فــــي اللــــــــيل
نزلو دموع رواد لـ رفع يده بـ رعشه ومسح علي القبر وبـ يده التانيه حاطها علي القبر التاني وهمس:خنتو العهد مش علي اساس بنموتو مع بعض مش صحاب للاخير
ومسح دموعه بـ عبره :كيف تموتو شهداء وانتم ماعندكم الدنوب لعندي كيف المفروض اني الشهيد من لعمايل لمدايرها ههههه
وتعلت ضحكته لبعد لحظات تحولت لـ بكي بصوت تعلا مع صوته العالي وهوا يشبح لـ السماء :علااااش ياربي علاااش ، علااش ماخديتنيش معاهم علاش خليتني بروحي اني بنهبل ياربي اني بننجن مش قادر نعيش ياربي مش قادر نتنفس مش عارف شن ندير في حياتي لخي
ونزل راسه وقعد يشبح لـ لوحت القبر لمكتوب عليها ( مصعب محمد الـ ### )
مسح رواد بـ عبث :ستاحشتك ياعيل متت قبل مانقولك نحبك هههه
وضحك بدموع حارقت جفونه وكمل :عارف تسمع فيا الشهداء احياء وله اهو بنقولهالك توا نحبك ههههه نحبك ياكلب وبنقولك سر تاني
وطلع سنسله من جيبه لـ علاها حرف مصعب وقال من بين بكاه:اني لخانب السنسله تي كسرتلي رقبتي بيها مشي خنبتها ههه
ووقف علي ركابه وحفر علي تراب قبره حفره صغيره وحط فيها السنسله وحط فوقها التراب وقال :كنت بنذلك بيها مانحسابش اني لـ بنندل قدام قبرك ماكنتش نحساب بنقعد اني بينكم نتنفس في الهواء وانتم تحت التراب
وغمظ عيونه ونزل ركع بين قبر مصعب و هارون وهوا يبكي بـ هستيريا ردد بين نوبات بكاه :خليتوني بروحي ياصحابي خليتنوني موعر فراقكم موعرة ياربي موعرة
.
وكـ إنــه الألــم أنتشــر بِـي وأصبح مرض خبيـث ليـس له عِـلاج 💔⚡️
.
.
ونطفــأت جَماليــات حياتـي بـ رحيــلكـ 🍂
.
.
تـــاني يــــوم
قعمزت سما علي سرير منذر وتلفتت شبحت لـ مخدته لـ خدتها وحضنتها لـ صدرها مع استنشاق ريحته لـ عالقه في داره وفي فراشه ومخدتة وهمساته في مسمعها يرنو ...
:اني مستحيل نفكر نسيبك ياسما اني روحي فيك
:مش طالب من ربي غير يكمل فرحتي ونتزوجك وتولي ليا طول العمر
:اني فرحان بيك هلبا ياسما
غمظت سما عيونها بـ كل قوتها بـ غصه مع فتحت الباب لـ انفتح عليها وخشت بُـتول لـ الارهاق والتعب والألم واضح في ملامحها وحركتها .
قربت قعمزت جنب سما لـ رفعت عيونها الحمر وقالت :نبكي عليه ولا مانبكيش اه نبكي ونتوجع ولا مانبكيش ونفرح انه بـ اذن الله شهيد قوليلي يابُـتول
نزلو دموع بتول لـ نزلت عيونها بـ وجع وقالت :ابكي علي روحك زي مانبكي علي روحي ابكي لانه هوا في مكان احسن من مكانا خوي شهيد قعد حي يرزق عند ربي
سما رفعت كتافها :قلبي لكن يوجع مزال نبيه مزال ماشبعتش منه ومن حبه فرحتنا بـ بعض قعده ماكملتش
وخدت نفسها لطلعاته وكـ انه النفس صعب عليها وكملت :قالي خديتلك هديه وحطيتها عند بهار قالي ، قالي لما تعطيهالك كلميني ونفتحوها مع بعض ، توا كيف بنفتحها كيف يابتول مانقدرش نكسر كلمته مانقدرش نفتحها بروحي من غيره
شرقت بُـتول بدموعها من كلام سما اللي الدموع يلمعو في عيونها ومش راضيات ينزلو مش راضيات برغم شبحت دموع الكل نزلو عليه بس هما كـ انهم يكدبو ويقولو منذر عايش منذر قعد حي منذر حـ يجيك منذر لما حـ تتصلي بيه حـ يرد عليك حـ يضحكلك .
وقفت بُـتول بـ نفس غاب عليها بسبب دموعها من كلام سما لـ قعدت تشبحلها لين طلعت من الدار وخلتها بروحها وهيا تسيب في المخده وتوقف تقرب من دولاب منذر لـ فتحاته وقعدت تشبح لـ حوايجه .
مدت يده قعدت تمسح عليهم وخدت من بينهم تيشرت وقرباته لـ حضنها وغمظت عيونها علي صوته لـ جي في مسمعها ...
:حبيبي بعيد الشر عليك من الكسره ومستحيل نكسرك اني ورد بالك تتوقعي الكسرة مني لانه نحبك اضعاف حبك ليا حطها في راسك اني ميت فيك ياسما
فتحت سما عيونها بشهقه خلت عيونها يملو بـ الدموع موجعات قلبها ، و نبضاتها ، و روحها لـ حاستها تبي تطلع وتبي تمشيله .
نزلت قعمزت علي الارض وهيا تتكي علي الدولاب بـ شهقات تعلو اكتر مع همسها لـ روحها :مانويتليش الكسره لكن كسرتني ياقلبي كسرتني يامنذر وكسرتك وااااعره ياريت كسرتني بـ خيانتك ليا ياريت كسرتك جتني بـ فراقك عايش ياريت سيبتني وقعدت حي يامحلا لفراق لعيشو فيه ندادي يامحلاه يامنذر يامحلاه علاش ياربي علاش واللهي ماقدره نتحمل مش قادره كسرته ليا قويه قويه هلبااااا ياربي اه ياربي اه قلبي مات معاه مات
واستسلمت لـ دموعها لـ منزلوش من سمعها لـ خبر وفاته ، مانزلوش مقاومات ، ومصرات انه عايش ، او مصرات انه يفرحو لانه شهيد ، بس مقاومتهم وصبرهم بأت بـ الفشل المحتوم وهيا تنزل بـ غزارة مع صوت سما لـ تعلا اكتر وخلاها تصيح بـكل قوتها مع دموعها ، تصيح بـ اسمه وتناجي لـ ربي يرجعه وياخدها مكانه .
تعلا صوت صياحها لـ درجة خلت كل اللي برا يخشولها بـ خلعه وبكسرة وشفقه من البعض لـ منظرها لـ يوجع القلب ...
.
بـ صــرخــة أستنجـد بِهــا خــالِقـي بـ الــرأفـة بـ حــالتـي وهـوا الــرؤوف الغفــور 💥
.
.
ضننت بـ أنــي من الفــاعل لـ الخيـر ولكن أكتشفت أنـكـ أنـتَ الـدَّي فعلـت الخيـر بِـي بدخولـكـ لـ حيــاتي 🍃✨
.
.
باس القَـاسي راس حسناء لـ ضامة شفايفها بـ حسرة وكتم لـ دموعها وبعد بـ دموع بين رموشه وقعمز علي ركابه قدامها :مش انتي بس خسرتي ولدك ياعمتي ، حتي اني خسرت ولدي
هزت حسناء راسها بـ دموع سالو من عيونها المتورمات وهمست بـ صوت مبحوح :كان يحبك
نزلت دمعة القَـاسي لـ نزل راسه وقال :وربنا شاهد علي حتي اني نحبه ، وحاسبه قطعه من قلبي خسارته واعرة لكن بـ اذن الله شهيد ، والمفروض نفرحوله مش نبكو عليه ، اني فرحانله ياعمتي ، مصعب
وشد علي سنونه بـ بوجع وكمل :مصعب اطيب من قلبه مافيش وربي رزقه علي قيس طيبت قلبه وخلاه يموت موتة الشهادة
زادو سيل دموع حسناء لـ تعلا صوت انينها :اااااه كبدي يابالقاسم كبدي ينحرق علي وليدي قعد صغير ، مش قادرة نقول شهيد ونصبر ، مش قادره ، اللهم لا اعتراض علي قضاءك ، اللهم لا اعتراض ، اعطيني من صبرك ياربي اعطيني من صبرك علي كبدي ااااه ياوليدي من بينا من بعدك من بينا يابالقاسم من بعده هوا يديا هوا رجليا هوا حياتي كلها ياوليدي وينك ياوليدي وينك ياحبيبي
خدي القَـاسي نفسه من بين دموعه لـ ماقاومهمش وخلاهم ينزلو بـ وجع كبير علي الشخص لـ خش حياته وذكره في طفولته ، الشخص اللي علمة الطيبه والبرائة والنية الصافيه هبة من عند الله سبحانه ، وماتنقاسش بـ عمر معين ابداً ، الشخص لـ فعلا صار جزء من روحة ومن قلبه .
مسح القَـاسي دموعه ورجع باس راس حسناء وقال :خسارتنا في مصعب كبيرة وماحد يقدر يسد مكانه لا في قلبك ياميمتي ولا في قليبي ، لكن اني من اليوم وجاي جنبك زي ماكنت جنبكم و في حسبت والدك ، وانتي اميمتي وبنياتك وخياتي ، واللي بيا بيكم ربي ماينسي حد واني مستحيل ننساكم .
وناض وقف طلع من خيمة العزاء حابس دموعه وهوا مايبيش يبكي اكتر ، مايبيش ينزل دموعه عليه ، هوا شهيد ، هوا بـ عون الله شهيد ، البسمة والفرحة هيا المفروض لـ تزين وجوه الكل ، مش الحزن ولا الدموع ...
.
لــوعة فراقــكـ قتالــة وصعيبــه ، عَـطيب حالهــا لا ينشفـــي منهــا لا تتناســا 🥀💔
.
.
وبِــرغم البُعـد تبقــي فـي القَــلب ســاكن 🎈
.
.
نزلو دموع رانيا لـ حطت راسها علي لمخده وغمظت عيونها وهيا تحضن في جيبوطي هارون لـ لابساته ...
هارون :اني انـ اني
وخدي نفسه وطلعه علي وجها وهمس :مش تحبيني حتي اني نحبك يارانيا
ضمت رانيا شفايفها بـ غصه وزادت حضنت روحها وهيا تشم في ريحة الجيبوطي ...
هارون :ستاااااااااحشتك لا المليونات ياقلبي
هارون :حبي
شبحتله راينا بـ هزت راس وهيا تاكل من الكيكه :عيونها
هارون بتسم :نحبك
خدت نفسها بـ دموع حاستهم زي الجمر علي خدودها وهمست :حـ حـتي اني نحبك ياقلـ ـبي حتي اني ياهـ ـارون نحبك هلـ ـبا نحبك ياحبيبي الله يرحمـ ـك ياقلبي الله يرحمك ياقلبي
وزاد صوت بكاها اكتر وهيا تردد ، الله يرحمك ياحبيبي ، تردد فيها وقلبها يوجعها اكتر ، تردد بـ غصب باش تقتنع بـ الحقيقيه المرة ، تبكي وتدعي بـ ألم من الفراق لجي بعد قرب ماكانتش متوقعاته ، من قال حبيبها هارون ، حبيب الطفوله ، اللي ماكانش عاطيها وجه ، يحبها ، ويحبها بجنون لدرجة خلا بوه يجي يطلبها باش تكون ملكه ، بس لما نوي لحلال ، ربي نواله الشهادة ...
.
حينمـــا أردتــكـ ، أردتنــي الوطــن 🩸🍂
.
.
ومهمـــا مرت السِنيــن ذكــراكم لا تُنســي 💛🍃
.
.
بـــــــــــــــــعد مرور سنــــــــــــــنة
باس رواد علي راس حسناء لـ بتسمت وقالت :ربي يحفظك ياوليدي ومايغيبك علينا سلملي علي امك هلبااا
بتسم رواد :يوصل ياأمي وزي ماقتلك تبي حاجه اتصلي بيا طول
هزت حسناء راسها بـ امتنان لـ رواد لـ تلفت طلع من باب الجنان لـ ردة وراه وهوا يرد علي تليفونه لـ علن عن مكالمة من بو قاسم الله يرحمة :ايوا عمي سعد
جاه صوت جود :مش قتلي اليوم بتجي نطلعو مع بعض ونمشو لـ قاسم
ضحك رواد :حي علي امها نسيتك يافرخ ههههههه
قرن جود حواجبه وعيط :برااااا ماعاش تكلمني بكل
رواد :ههههههه غير اسمع من غير عياط ، خليها الخميس الجاي نجي نطلعك من الصبح ونمشو وين ماتبي تمام
جود :وعد
رفع رواد حاجبه :من وعد هدي
ضحك جود وخلا رواد يكمل بـ ضحكة :هي انتلف توا وماعاش تكلمني لا الخميس الجاي
جود :لا غدوة بنكلمك باي
وسكر الخط في وجه رواد لـ ضحك عليه بـ تنهيده وتلفت ركب سيارته ...
.
.
مــايُهم فعــلا هوا التفَــاهُم والإهتمــام والسعــادة وليس ليلـة تصرُوفيــن فيهـا كُـل مــاتملكِين فـ كتـرة تلكـ المصَـريف لن تضمـن لكـ زواج نــاجح 💛👌🏻
.
.
بتسم فَـاتح لـ وقف اول ماخشت بُـتول لـ لابسة الليباس الشرعي وقربت وقفت قدامة بـ ضحكة خلت فَـاتح يقرب يطبع بوسه علي جبهتها وبعد قال :و وليتي حلالي واخيرا
هزت بُـتول راسها :واخيرا
مسح فَـاتح علي خدها وقال :في جميع حلاتك حلوة لكن الحجاب زادك علي جمالك جمال
نزلت بُـتول عيونها من عيونه بـ خجل وخلت فَـاتح يتنهد وكمل :ياريت درتي حتي حفلة بسيطة بينك وبين صاحباتك علي الاقل دكرة تقعد ليك
رجعت بُـتول شبحتله :مش مهم المهم الراحة واني هكي مرتاحة كلها شكليات لا غير المهم وليت ليك و وليت ليا ومش هدا كلامك
ضحك فَـاتح :انتي تغيرتي هلباا
قرنت بُـتول حواجبها :والتغير حلو ولا مش حلو
قرب فَـاتح منها وباسها علي خدها :اكيد حلو زيك
ولف يديه حولين خصرها وحضنها :نحبك يانور عيوني نحبك موت ياحلالي
ضحكت بُـتول ولفت يداها حولين رقبته وحضناته بـ فرحة ورضي علي نفسها وهيا تدكر في كلام منذر .
منذر :اسمعي
بُـتول :نعم
منذر :الحجاب مش سنة ، الحجاب فرض ولازم علي كل بنت ، حطيها في راسك يااختي زي مانخاف عليك في الدنيا نخاف عليك في الاخرة
غمظت بُـتول عيونها وهمست بـ دموع سالو علي خدودها :نحبك
.
الخُــوف مـن الله فـي كُـل قَـلب مُـأمن بِـه ، ولكـن اذا فهمتــه غَمارتكـ تَــوبة الإصــلاح 💛🍃
.
.
.
تلفتت مـريم لـ ساجدة لـ تلبس في عبايتها :بتروحي
هزت ساجدة راسها :ايه سامح جي
بهار :حي مزال خيرك حتي العرسان قعدين ماروحوش
ساجدة :سامح يراجي ماعاش نقدر
خشت عليهم رنيم لـ لابسه عبايتها :مه حتي هيا عوسه خيوكم خلوها تمشي تتفوهد قبل ماتجيب الفوخ وتقعد زي حالتي
نفخت مـريم بـ تذمر :وحالتي اني
بهار :ههههه ماتقوليش حتي انتي بتروحي
هزت رنيم راسها :ايه ياحنه وواي مفرخ و واجل يبو شغالة وواهم ياكبدي
ضحكو عليها لبنات لـ خشو عليهم سمية وحنين وأحلام لـ قالت :تي اطلعي يارنيم رعد بدي يصيح ره
نفخت رنيم وقربت سلمت عليهم بسرعه وطلعت تجري لـ رعد لـ اول ماركبت تلفتلها بـ تكشيرة :عام باش تطلعي عام
رنيم :ماتؤفوهاش عاد هما خمسه دقيق ايوا وهيا بوا بوا بسوعة تواهو مفوخك مشيبين واس أيه
تحرك رعد بـ السيارة وقال :رفعتهم لـ نور
رنيم قرنت حواجبها :علاش
رعد :ارتاحي في يوم عيد ميلادك شوي
بتسمت رنيم وشبحتله وهيا تمد في يداها حوطت وجهه وباساته علي خده :ياوخيتي محلاك مدكر عيد ميلادي ناعليا حبيبي ياوخيتي سلمة
عيط رعد :اهفتي ازح اهفتي خير ماننزلك بـ الشبشب
ضرباته رنيم علي كتفه :اااااه ياربي ااااه من وين بنلقاها الواحة اني وين
تلفتلها رعد بـ رفعة حاجب :قصدك راحة مش واحة
ضيقت رنيم عيونها فيه لين خلت رعد يضحك وهوا يلف في يده علي رقبتها وقربها باس راسها بـ عيطه من رنيم لـ دفاته بـ نفخة :اووووف ياوبي اااااوف منك يارعد
زادت ضحكت رعد علي رنيم لـ تنهدت وهيا تشبح قدامها وتحاول تمنع ابتسامتها تبان علي صوت ضحكته لـ دائماً تحسس فيها بـ الأمان والحب والراحة ...
.
ولــيس بِــي راحــة في بُعــدكـ 💛
.
ركبت ساجدة السياره وعيونها في سامح لـ استأذن من السِـيفاو وعبدالقادر بو منذر الله يرحمة وجي ركب السياره وهوا يتلفت لـ ساجده لـ قالت :تعطلت
هز سامح راسه وهوا يولع في السياره وتحرك :هلبااااااا
ساجدة :حقاااا مش قصدي هدو نساوين خوتي دوتهـ...
قص سامح علي كلامها بـ يده لـ رفعها وشدها من دقنها وقربها منه وباسها علي خدها وعيونه في الطريق وقال بـ ضحكة :نبصر ياقلبي عليك عارفتيني كان نلقاك ماتتحركيش من جنبي
زمطت ساجدة ريقها وهيا تشد في يده لـ علي دقنها بـ خجل حجر الكليمات في حنجرتها وخلت سامح يضحك عليها وهوا يدخل في صوابعه بين صوابع ايدها ورفعها باسها بـ خفه وقال :شن رايك نفوتو اليوم ادهوير
بتسمت ساجدة :عادي
بتسم سامح ورجع باس يدها وهوا متمسك بـ يدها بـ قوة بين قبضة يده بـ إحساس السعادة والفرح والحمد زي حمدها لـ ربها علي المكفأة لـ تحصلت عليها من سعادة وراحة وحب وعشق بعد معانات سنين طوال مع خوتها في تجارة المخدرات ، سنين مليانين سواد وظلام وتعب ودموع وحرمان ...
.
عشقـــي لــي مَـن شَــالَنــي من الظــلام إلــي نُـور قلبِـه الدَّي عشقتَــه ✨
.
،
وَفِـي لـي صداقتنَــا لـ درجـــة لم أتقبـٌل صـداقــة أحد من بَعدكُــم وبقيـت وحيـد 🥀
.
.
تـــــــاني يوم الصبح وبين ظلام الفجر وشروقه خش رواد المتهندم بـ الباس العسكريه لـ المقبرة بـ خطوات تابته وفي نفس الوقت مجروحة و وحيدة اللي برغم فات علي فرقه ليهم شهور طوال الا انه قعد وحيد ، قعد متقوقع بينه وبين نفسه ، ومحافظ علي صحبتهم في قلبه ومختلط بـ عائلاتهم وكـ أنه يحذر في نفسه لما تسهي علي عدم نسيانهم وتخطي ذكراهم .
وقف رواد قدام القبور الخمسة وضرب التحية بـ بتسامة وعيون مليانة دموع وقال بـ بتسامة :افنديا هههه
وضحك بـ دموع ماقدرش يقاومها :هههه كلاب عارفكم اني متو باش توصلو بسرعة ههه اهو عطوكم رواتب ملازم واني زي الكلب قعد نجاهد ههههه قصدي نعافر
وتحولت ملامحه المبتسمة لـ ملامح وجع مع دموعه لـ زادو من سيلهم ونزل قعمز لوطه وهوا يحاوط وجهه بـ يديه الزوز ومسح دموعه ورجع رفع راسه وخدي نفسه وطلعه :غرت منكم حسستوني عايش علي الفاضي ياصحابي حتي اني نبي نموت ، نبي نموت موته تشرف وتشهد عليها ليبيا كلها وتفتخر بيا زي مامفتخريين بيكم
وفتح يديه وقال :واهو وليت لبست البدلة العسكريه ، لكن بـ فرق
ونزل يديه ومسح دموعه بـ كم جيبوطي العسكريه وكمل :اول مره خشيت غصب خشيت من غير نيا لكن المره هدي خاش علي خاطر بلادي علي خاطر لستشهاد وعلي خاطركم ياصحابي ، نبي نلحقكم نبي نموت موتة الحياة نبي نجيكم ونفددكم حتي في جنتكم ههههههه
وخفت ضحكته :ستاحشتكم مش عارف كيف بنخش للكلية وبنكمل من غيركم
وخدي نفسه وطلعه ووقف وهوا يمسح في دموعه بـ عبث واول مارفع راسه شبحهم هما الخمسه يشبحوله بـ بتسامة ، شبحهم واقفين جنب بعض ويضحكوا ، يشبحوله ويشبحلهم كيف النور طالع منهم ، فرحانين ، مبسوطين ، ومرتاحين ، نالو مبتغاهم ، والمبتغا نالهم .
ضحك رواد بـ دموع سالو علي خدوده وضربلهم التحيه لـ ردوهاله طول بـ ضحكه منهم علت من ضحكته وهوا ياخد في نفسه وتلفت بضهره طلع من المقبرة ، طلع وهوا ناوي لما يرجعلها يرجعلها بـ كفنه ، لما يرجع لـ صحابه ، يتلاقا بيهم ، يرجعلهم شهيد ، يرجعلهم راضي ومرضي لـ ربه ، طالع بـ يخطي خطوة ينال منها درجات الرضي وأعلا درجات الجنة .
﴿ وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ * فَرِحِينَ بِمَا آتَاهُمُ اللَّهُ مِنْ فَضْلِهِ وَيَسْتَبْشِرُونَ بِالَّذِينَ لَمْ يَلْحَقُوا بِهِمْ مِنْ خَلْفِهِمْ أَلَّا خَوْفٌ عَلَيْهِمْ وَلَا هُمْ يَحْزَنُونَ ﴾ [آل عمران: 169 - 170]...
عسكَــري حَــامي لـ بِــلادي بــاغي الشهـــادة وشهــادة بغتنــي 🕊
ولعنتي علي من كان السبب في قتل ابرياء النفس ، ولعنتي من كان له يد في خراب بلادي 🥀
وقد ماتوجعنا عليهم وبكينا عليهم وتألمنا مستحيل حـ نحسو بـ نار عائلاتهم ، لوعت امهاتهم وأبئهم .
ضضوقد ماتوجعو عائلاتهم مستحيل حـ يحسو بـ نار زملائهم لـ كانو معاهم في نفس لاحظة القصف وشافو رفاق عاشو معاهم ايام وشهور وسنين يموتو قدام عيونهم 💔
اللهم ارحمهم وأغفر لهم واعفو عنهم وأبدلهم داراً خيرا من دارهم وتقبلهم عندك شهداء وأجعلهم من الراضيين المرضيين 🤲🏻
حسيبي ربي في الظالم ...
ســــــلامـاً عـلـي مـن يـجُـوب الـسمــــــــاء
مـــــــــع الـصـالِـحـيـن مـع الـأتـقـيــــــــــاء
نــــــــــداه الـإلـه فَـ لـابَـى النِـــــــــــــــــــداء
ســـــــــلامـاً ســــلامـاً ســــــلامـاً ســــــلام
ســـــــــلامـاً عـلـي مـن حَـبـاهُ الـســـــــــلام
بِـــــــــ فَـردُوسِـه ومـسـك الـخِيـتـــــــــــــام
مــــــــع الـأنـبـيـاء الـتُـقـاة الـكِـــــــــــــــرام
ســـــــلامـاً ســــــلامـاً ســــــلامـاً ســــــلام
ســـــــلامـاً عـلـي مـن حَـبـاهُ الإلـــــــــــــــه
بـــــــــــمـوتـاً كَـريـمـاً بـطـعـم الـحَيــٌــــــــاة
وحَــــــــــــــــقـق لـهُ رَبَـهُ مُـبـتَـغَــــــــــــــاه
ســـــــلامـاً ســــــلامـاً ســــــلامـاً ســــــلام
ســــــــلامـاً عـلـي ضَـيـف ربّ الـوجـٌــــــود
وضَـــــــــيـف الـحَـلـيـم الـلـطِـيـف الـــــودود
سَــــــــــيـبـقـا يـاقِـيـنـاً بِـكـرم الـوجُـــــــــــود
ســـــــلامـاً ســــــلامـاً ســــــلامـاً ســــــلام
ســـــــلامـاً عـلـي الـغَـائِـيـبـيـن الـحُـظـــــــور
ســـــــلامـاً عـلـي كُـل أهـل الـقُبـــــــــــــــــور
ومــــــــسـكـاً وطِـيـبـاً وحُـور الـــــــــــــــودود
ســـــــلامـاً ســــــلامـاً ســــــلامـاً ســــــلام
.
.
.
.
#قفلة_الرواية
إلـي الليقاء إلي جزء اخر ...
#عشق_في_بلاد_حروبها_لا_تنتهي
#لـيبيـا_وطني🇱🇾
____________________________________
عِــشق فـي بِـلاد حُـروُبِهـــا لا تنتّٰــهي 5
بداء كتابه الروايـة في 19 /أغســ8ٰـــطس/ 2020
تم أنها كتابة الـرواية في 1 / إبريــــ4ــــل / 2021
عدد كلمات الـبارت 7068
من كتــابة #اليَــاقُــوت