السلام عليكم
هذيان بين جمر وجليد
التكملة قبل الاخيرة
نورا ناصر
******************
الرحمة لشهداء ساحة الطيران والصبر والسلوان لاهاليهم والشفاء للجرحى ..
سلاماً يا بغداد السلام سلاماً يا عراق .. 💔
قتلوا اولادُكِ يا بغداد
قتلوا الفقراء والكادحين 💔😔
لعنة من الله على من قتلكم وحسبنا االله ونعم الوكيل ..
**********
ﺗﺪﺭﻱ شگيت ﺍلمكاﺗﻴﺐ ﺍﻟﻘﺪيمة
ﻭ ﺷﻜﻮ ﺫﻛﺮﻯ ﺑـ راسي ﻣﻦ ﺷﻔﺘﻚ ﺍﺟﻴﺖ
ﻭ ﺗﺪﺭﻱ ﻟﻤﻴﺖ ﺍﻟﻬﻼ ﻭ ﺍﻟﻜﻠﺸﻲ ﺑﻴﻪ
ﺷﮕﺪ ملاﻣﺢ ﺑﻴﻚ ﺍحبها ﻭ ﻣﺎ ﺣﭽﻴﺖ
ﺧﻞ ﺍﺣﺴﺒﻚ ﺍﻧﺖَ ﻭ ﻋﻴﻮﻧﻚ ﻭ ﺷﻌﺮﻙ
والبعد ﻭ ﺍﻟـ مدﺭﻱ ﻳﻤﺘﻪ ﺷﮕﺪ ﺗﺼﻴﺮ
ﻻ تخاف ﺍﺣﭽﻴﻠﻲ ﻛﻠﺸﻲ
ﺍﺣﭽﻲ ﻭ ﺍنطيني ﺍﻋﻠﻪ مآﻳﻲ
ﺑﻠﻜﻲ ﭼﻢ احچاية ﺧﺪﺭانة
ﺍﻋﻠﻪ عرفك بيها ﺍﻃﻴﺮ
ﺗﺪﺭﻱ ﺟﻴﺘﻚ آﻧﻪ ﻭ ﻋﻴﻮﻧﻲ ﻭ سماري
ﻻ ﺗﮕﻠﻲ شجابكم حبك ﺍﺗﺴﻮﺩﻥ ﺑـ رآﺳﻲ
ﻭ ﮔﻤﺖ ﺍغاﺭ ﻣﻦ ﺍلعصاﻓﻴﺮ ﺍﻟـ تحط ابـ باﺑﻜﻢ
تستاهلني بس بعديش..؟
لا مرخوصلي أشتم بيك گدام ألخلگ كلها
وأگلهم حضنك أفيشي
ولا عشگي غلط وأنساك..
وأحسبنك ضمن طيشي....
********
... تفاجئت بي شفته فاتح باب السيارة كاعد يباوع ومبتسم ..صفن بوجهي ثواني .
رمشت بعيوني وهو نزل من السيارة
_ شلونج موج ..
تمتمت بفتور :- هلو .... شلونك زياد ...
بقيت ساكتة وهو يحجي كال ترى صدفة شفتج بالكراج واني طالع وباوعتلج متغيرة وظليت اكول بداخلي هيه لا موو هيه
وكمل بعد ضحكة قصيرة :'- بعدها فكرت ادز عليج اجرب حظي طلعتي انتِ خير على خير مو انتِ اعتذر واروح
ابتسمت ودنكت :- لا هاي اني وبما انو انته هنانه حخلي اخويه يتواصل وياك عمود فلوسك ضروري تاخذهن
رد باحتجاج :- يمعودة بيننا فلوس احنه شنوو ميصير واحد يسوي زين ؟
بلعت ريك ورديت عليه بتوتر :- لا طبعا مقصرت والله بس هذا حقك .. اني ما احب ابقى مديونة لأحد ..
كال بعد تنهيدة :- سمعت رافعة دعوة طلاق وزوجج ماكو ممبين ومختفي بداخل روسيا ، تحبين ادور عليه ؟ اني رجعت للعراق من خلصت دراستي بس اكدر ابحث عنه واجيبلج اخباره ..
هزيت راسي برفض واني مدنكة وعيوني ع الكاع
_ لا تسلم متقصر انته ، هو اهله هم يدورون عليه مستمرين
بتساؤول:- شكد صار على اختفاءه ؟
حاولت ابلع الغصة بس مكدرت بينت الغصة بصوتي
وجاوبت بدون ما اباوع له :- حيصير اله سنة ..
جاوب :- بس يصير سنتين يفرقكم القاضي واي شي تحتاجيه كولي زين ليش ماجربتي تخلعيه ؟ بس بهالحالة تتنازلين عن كل حقوقج
ظليت اعصر بأصابعي ومدنكة عليهم ..
تسلم متقصر .. والله مصارت ..
كال احتمال المحامي مالتج متواطئ واحتمال حتى القاضي بايعيين ضميرهم
باوعتله متعجبة ... وهو رجع عرض مساعدته .. احسه يريد يطلكني بالكوة .. هزيت راسي ..
لا اني اريد احل مشاكلي وياه بالتفاهم افضل .
اني ابد ما اتواصل ويه زياد حتى طلب المراسلة باقي معلك بس عندي تواصل ويه حنان وشيرين وهو اكيد توصله اخباري منهن ..
بعدها سلم وصعد بسيارته واني احس بعيون شرار تراقبني هنانه بس مجانت عيونه لا جانت عيون واحد غيره
بابتسامة مستفزة ومرتجي على حايط واحد من المحلات القريبة وعيونه تراقب كال رجلج يدري بيج ؟؟
عبالك القدر يعاود اختباري ويقيس مدى صلابتي وحدود صبري
تجمد الشعور عندي وكنت على وشك الاغماء ... من فرط الصدمة ..
اوس شجابه وشوكت طلع من السجن!!
زين زياد كال صدفة شفتج اووس هم صدفة لو مراقبني لو جاي عليه لوو شنو!! يربي احتاريت ...
واحد هناك وواحد منا وناقصهم بس شرار... وتكمل السبحة
تجاهلت اووس وركضت ع القاعة داافتح الباب مالتها اديه ترجف والمفتاح كل شوي يريد يتزحلك من ايدي ، اديه مو راضيه تثبت
التفتت لاوس اشوفه راح يمشي ويعرج باوعت عليه يمكن هاي الضربة مالة حسان خلاه هيج وعوقه
دخلت للقاعة قلبي يضرب باضلاعي وميتة خووف ..
تنفست بعمق ، مديت ايدي نزعت الحجاب احس مخنووكة
احس روحي تايهة شنو من طعم خلالي القدر هالمرة ..
خايفة لا اوس وزياد يعرفون بعض ومتفقين عليه !!
هذا ابوه مسؤول وهذا هماتين وكل شيء يصير .. يمكن معرفة بيناتهم
ۆ هسه شسوي ياربي ... !! وينك شرار ۆينك... ليش هيچ مختفي ليش !!! ليش تركتني ريشة بمهب الريح
فقدت الأمان وما اعرف شمضموم الي ...
اجن البنات وبلشنا تمارين ... بس احس شاردة وكل شويه اصفن وارجع اطرد الأفكار الي استولت عليه ..
من خلصنا تمرين طلعن كل البنات بس أني بقيت خايفة اطلع لا انوب اوس بعده موجود بالمنطقة ومترصدلي..
طلعت تليفوني خابرت على احمد جاوبني سألته انت وين هسه؟
رد .. اني بالكوفي يم اصدقائي ليش شبيج محتاجة شيء!!
رديت بسرعة : تكدر تجي عليه..
_أي اكدر طبعا بس شكو شبيج وسيارتج وين ؟
_ ماكو شي ليظل بالك بس شفت أوس اليوم واشو خايفة
جاوب: بقلق .. وين شفتي!!! هو و ما تعرضلج؟؟ وسمعته يكول لأصدقائه من رخصتكم شباب أني طالع ..
لتخاف أحمد ماكو شي بس شفته وخفت منه انت تعال ومن تجي احجيلك كل شي..
رد :- يله جاي لتطلعين خليج بمكانج تمام ..
رديت: تمام وختمت المكالمة وياه وبقيت كاعدة بالقاعة انتظره .. بس أكذب إذا كلت مخايفة واباوع للباب اكول خاف يقتحمه ويخطفني كولشي يصير رحت قفلتها
بعدها خابر احمد عليه، طفيت الاجهزة كلها وااالاضوية وطلعت وقفلت الباب شفته واكف يم الباب يباوعلي بتفحص اقترب مني ويحاجيني بنبرة قلق
ها موووجة خو ماصارلج شي مبينة خايفة شبيج..
ماكو شي أ حمد والله بس كتلك لان شفته خفت ..
كال دييله امشي للبيت وين سويج سيارتج؟
انطيته اله وتوجهنا للكراج وهو ساق ورحنه للبيت ..
خليته يتواصل ويه زياد ويلتقي بي واعتقد زياد انحرج منه وقبل ياخذ فلوس التكت الي اجيت بيها لبغداد وحتى مصاريف المستشفى أني جنت مجمعتها ومخليتها على صفحة ..
وقررت ما احجي عن كل شي يخصني واللتزم الصمت وكلامي يكون محدود ويه شيرين وحنان ، خاف يوصلون اخباري لزياد ...
أنين:
بيوم الي انطتني الرسالة ريلام اني جنت اريد فرصة اقراها وحدي وخايفة كلش عبالك مسوية جريمة ..
خليت الكل ناموا بالليل ورحت للمطبخ فتحتها وقلبي يخفق بعنف غريب ..
وصارت عيوني تلتهم الاحرف والكلمات ، رغم الخط جان يشبه خط الدكاترة من يكتبوا بالراجيتة بس جانت الكلمات يترجمها قلبي بكل سهولة ..
كاتب الي : انين ، توصلني اخبارج واني بسجني ..
اريد اعترف لج بشغلة اني انسان سيءء ووكعت بشر اعمالي ومستاهل الي صار وياي
جنت حاقد على اخوي علي الدر وتايه بانتقامي
وردت اشووه سمعته ووكعت نفسي ووكعت اخوي وما صحيت اله بعد فوات الاوان
انين ... اني اشوف نظرات الحب بعيونج بكل مرة اشوفج بيها بس جنت خايف عليج مني ومحتار وممتأكد من مشاعري
خايف اكون ماحبيتج وانما حبيت حبج الي وجنت بعدني بثورة حقدي على فرح ..
الي اريده منج تصيرين قوية وتواجهين الحياة ، تديرين بالج على نفسج وعلى طفلج وابد لا تتسرعين باتخاذ قرارات مصيرية تخص حياتج وابد لا تسوين شي ونفسج تريد شي ثاني عقدي اتفاق مابين قلبج وعقلج
دائما بقراراتج .
ادعيلي ، اتمنالج كل التوفيق ..
شهكت واني اقرا اخر كلامه ، والتفتت ورايه واني اترقب خاف وصل صوت شهكتي الهم ويجون يسألون شكو
مسحت دموعي بسرعة بسرعة واشتميت الرسالة واني مغمضة عيوني ثواني ... وبعدها رجعتها وخليتها بصدري
ورحت غسلت وجهي بمي بارد وكعدت بالحمام واني سرحانة بكلامه وكل شوي ارجع اطلع الرسالة واقراها وارجع اضمها ...
اني ميهمني يحبني او لا بس حبيت اهتمامه بيه اكثر ..
سمعت صوت حسوني يبجي .. ركضت للغرفة واني اللهث ، شفت موج منعسة وشايلته تسكت بي ..
تجنبت اباوع لعيونها ورحت اخذته منها ..
سألتني :- وين جنتي ، ابنج صار ساعة يبجي والممة مالته وينها ؟
هزيت راسي ومرتبكة ، هاا لا جنت بالحمام والممة بالمطبخ غسلتها نسيت اجيبها واخذت حسن منها وطلعت رحت للصالة..
رضعت حسوني وبيدي الورقة ، اعيد قراءتها عشرات المرات .. ما ادري بنفسي من غفيت والورقة بيدي وحسون خليت بالمحمل مالته وهو هماتين نام
الصبح حسيت الرسالة تنسحب من ايدي ، فتحت عيوني موج تاخذها ، بسرعة استوعبت وجريتها من ايدها
هيه بقت مصرة وتباوعلي عاكدة حواجبها اخذتها مني فتحتها وقرأتها ..
واني اراقبها محتارة واعض بشفتي .. وهيه تقرا وتباوع الي .. خلصت واجت كعدت يمي واني اخذت حسوني لان كعد من النوم واريد اطلع من الصالة
وهيه سحبتني وكعدتني
كعدي احجي وياج هاي شنو تتواصلين ويا انتي ؟؟
اشرتلها بيدي برفض :- لالا والله هاي اول رسالة توصلني منه
يعني انت نايمة هنا ومكيفة مخليتها بيدج بالله شافها احمد ؟؟
تنهدت بحيرة والله اخذتني نومة ... اجتي كعدت يمي ..
انين هو كلامه صح ديوصلج رسالة انو ميفيدج احسان مجرم دتعرفين شنو يعني وهو ديتعرف .. انت تسرعتي من قبلتي بعمر واحنه كلنه قسمتها اجت وعمر واهله خوش ناس ، شمدرينا بلي راح يصير
هسه انت توج طالعة من تجربة زواج فاشلة ابد لا تخلين على بالج زواج وارتباط عفية فكري بنفسج وبس
لالا ابد والله ما اتزوج انوب عمر ياخذ ابني مني ...
ولج شبيج مياخذة حتى لو تزوجتي تبقى الحضانة الج شرط زوجج يتعهد بطفلج بالمحكمة ، ابنج محد ياخذه منج محد دتفهمين عليه ؟ وهسه يله كومي نامي بالغرفة ومنا وجاي تقرين بكتب السادس ومن يجي احمد خلي يجيب نقلج من كركوك نريد معدل قووي نرفع راسنا بيج
ابتسمت وتنهدت بيأس : سنتين واني اوصل لنص الدوام وابطل حتى الكتب حفظتها حفظ على قلبي على كد ما اعيدها ...
ميخالف هذا كله بي صالح الج يا عمري متعرفين الله شنو مخبيلج من ايام ومستقبل حلوو ان شاءالله ، شدي حيلج هالسنة واحنه كلنا وياج
وحسووني شلون ؟
معليج بي حسووني احنه وين رحنا لعد موجودين واحنا نساندج كم انونه عندنا ..
وشغلج شلون ...
نخلي عند فرح عود نكملها عليها حيصير بيتها رووضة ...
ضحكت وحضنتها .. دااكوم انطيني الورقة موج حبابة ..
انين كافي تفكرين بي ميفيدج والله وهو من خلال رسالته هم يكولج اني ماافيدج
بنبرة حزن :- ميخالف موج بس انطيني الرسالة احب احتفظ بيها ..
مدت ايدها الي بيدها الورقة اخذتها منها بسرعة وطررت للغرفة ، حتى حسوني بيدي يضحك عباله دالعب وياه
وموج تصيح وراي على كيفج ولج ..
التهمت خده ببوسه واني اضحك ويااه .. ضميت الرسالة
ورجعت داومت سادس شديت حيلي وحاولت اعوض الراح من عمري ، اهلي وكفوا وياي وكفة متنوصف ، احمد شافني مهتمة بدروسي حيل حتى مدرسين خصوصيين ودورات اخذلي...
فترة الامتحانات حتى حسوني اخذوا مني ، اغلب الاوقات يم فرح
جنت اشتاقله اطلع من المدرسة اروح عليه اشوفه يلعب ويه الجهال وهو استوى يمشي يجيني يمشي مثل البطريق ..
شعره مي وواكع على وجهه يضحك واسنانه تبين مثل اللؤلؤ تلمع بحلكه
اخذته وصارت دموعي على خدي ، صرت احاجي حبيبي خلصت الامتحانات اليوم اخر يوم وبعد منا وجاي دقيقة ما اخليك تبتعد عني ..
اجتي فرح خطية حامل وبطنها مدعبلة
كالت حرامات واالله تعودت عليه ، يله اخذه منج من تداومين كلية ...
ضحكت بوستها والله تعبتج اني فرح ...
كالت انجبي احنا لبعض ..
حضنتها كتلها من اداوم كلية انتي جايبة وملتهية ببنتج ..
كالت ميخالف هو ابنج هم ديكبر ومايتعب واني تعودت ع الجهال ..
هيه هالمرة تتوحم ع الشلغم والشونذر تكشرهم وتقطعم وتخليهم بكاسة وتكعد تكرط بيهم على طول اليوم هيجي بدون ماتسلكهم ولا حتى تخليهم بالطرشي ...
بقيت للظهر يم فرح ، احنه نفس المنطقة قريبين على بعض وانتظرت احمد اجه عليه الظهر ورجعت للشقة ...
وبعدها طلعت النتائج وجانت الفرحة الكبيرة متنوصل من طلعت المعدل الي يأهلني لدخول كلية الصيدلة الي صارت حلم بالنسبة الي وتحقق ...
مهيب :
نزلت من الدرج مبدل داروح لدوامي ، طلع لهيب من المطبخ اشرلي براسه وانطاني ظهره وداير عليه وجهه
كال تعال للسيارة عندي موضوع وياك ..
استغربت عكدت حواجبي وتبعته واني ساكت ، دخل بسيارته واني هم صعدت ...
سديته الباب وباوعتله
شكوو من الصبح خو ما مسويلك مصيبة!!
فرك وجهه وتنهد : مووو اني شرار ..
فتحت عيوني على اوسعها وكلت بصدمة : شبي؟ تواصل وياك!!
بصراحة اي من مدة هو يتواصل وياي ....
ضربته على صدره بقبضة ايدي طاح حظك اي والله وليش ماحجيت ليش ماصخمت وجهك واحنه ميتين من القلق عليه ....
رد وهو يردلي الضربة على زندي .. دنجب شدعوة ميت قلق وانته تدري بشرار ياكل الجلب من ذيله ....
لزمته من قميصه وعتيته وسحبته عليه بعصبية
لك انته من رحت لروسيا تدري بمكانه وساكت متحجي ؟
دفعني مووو هذا موضوعنا اسمع خلي اكل خ***** لا تقاطعني ..
تركته :- اكل خ**** وكمل يله ..
كال احم تفضل اكل وياي ...
لا اكل وحدك ديله فضها اريد ولي للشغل ..
دفعني وفتح الباب ومد ايده فتح الباب الي يمي ...
انزل بعدين اكمل الك اني هم تأخرت على شغلي ..
عطت عليه بعصبية :- انججججب وكمل هسه تحجي لا حلكك افركه لووو وينه مسدسي وظليت ادوره بحزامي وكملت اصبر اصعد اجيبه واجي ..
عاط تعااااال غيررر تنطي مجال احجي انوب يهدد بمسدسه صخوونة مال حصوونة كوون ..
ديله كمل يالحصان كمل مو تاخرنا ورانا شغل ..
اسمع لك شرار يريد يجي للعراق ومفرفح الظاهر واصله خبر ويخص موج مرته ويريد يجي بسكوت ويرجع ويريد اني اروح ابقى يم ابنه افتهمت هسه ؟
امشي اطلع من سيارتي يله
هزبت راسي وصافن عليه والله انته وعمك حرامات الله خلقكم زلم .... لو خالقكم حمير جان تفيدونه شويه ..
كملت كوول لابويه مو تنسى .. داا انزل لزمني من ايدي
وكال لاء ميقبل والله يريد يجي بسكوت ويرجع بسكوت الظاهر موضوع مهم
والله مايطلع منا الا يحضر عرسي ويخلصني من لسان اخته
اي هو انته هذا الهامك ضايج لان اختفاءه مأجل عرسك يمعود اصبر ملحك على شلعان الگلب ....
اسمع لهيب اذا انته ماتكول لابوي انه اكله لو هو راح يعرف بطريقته ترى بس كلي هو ماكلك ليش يريد يجي ؟
لاء ما كال
احجي الصدك ولك ولا تتعلم تتجذب عليه ...
اكلك شنوو اصغر جهالك اني وتحجي وياي بهالطريقة دااكلك ماكال ماااكال وداعة ديما ماا كال بس اني متأكد جيته هاي علمود مرته ماااكو غيرها
شوكت تسافر ؟؟
تنهد:- فد عشر ايام هيج هو حيل مستعجل ...
لتنسى تبلغ ابوي لاتسويلك سالفة نفس ذيج المرة من انطردت منا احذرك لهيب ترى شرار وراه سالفة ومخبل ومايفكر بعقل وابوي لازم يدري حتى يتصرف
تنهد بحيرة وخله قبضة ايده على حلكه يباوع كدامه ومحتار واني عفته ونزلت من سيارته وتوجهت للبيت اخذت تليفوني واتصلت بريلام اجاني صوتها الاحبه منعسة عضيت شفتييييي يلعب بيه لعب صوتها وهيه نعسانة
كتلها افرحي حبيبتي وهلهلي من الصبح شرار الجلب بيّن ...
وراح نتزوج ..بس ها هلهلي على كيف مو تسمعج امج انوب تسويلنه سالفة
خاف تعقد اتفاق ويه اختج ام السحورة وطكنه بسحر اعرفها امج مركبتلها راس شيطان
كالت هاي شبيك مهيب ليش تحجي على خالي وماما واختي ؟
قابل حاجي غلط اني ؟ شرار صدك جلب وامج مرته لابليس واختج ام السحورة ، حاجي عليج لوو عليهم اشبيج انغثيتي
لا والله بمكان منفرح خالو بيّنت اخباره كاعد تسب بي وبعدين ترا جاي شتاء اني انوب تعاي لبسي بدلة وصلوخ واني بالشته اللزك بالصوبة وحتى بجامتي تحترك وماحس بيها والبس تلث زواجه جواريب وادخلهم بالبجاما
هاي انتي ناقصج بس عصا وتطلعين تسرحين بالطليان وبعدين اطيح حظج اذا لبستي بجاما يمي؟
لعد شنو تريدني امووت من البرد والله ولا اتزووجك بالشتا ولااتزوج انتظر الصيف نتزوج بي صبرت انته بعد اصبر بعد
هسه اخاف احجي وتكولين عليه هذا ما عنده اخلاق واني اخلاقي يدرسونها بالجامعات والمعاهد..
لا احجي عليك الله احجي خلي اتعرف على وجهك الجديد قبل لا اتورط بيك
اي ليش لا احجي بس انت متفرعنة وطالعة عينج
تربيتك حبي
اي مو هيه المشكلة تربيتي شحجي شكوول وانت ناسية اهم فقرة بالزواج وهيه السبح وتفكرين بس ببدلة الزواج الصلوووخ دفكري بغير شي حتى اني اتأمل ......
ظلت تكح عرفتها خجلت كالت صدك عليك النبي مهيب خالو شرار بينت اخباره وينه هو وشخباره عفية ؟
باعي اني وين وانتي ووين ؟ اني فرحان شرار بين حتى نتزوج وانتي فرحانة لان عرفتي اخباره
لتفرح حبيبي بعد وراك خالو حسان بالسجن وماما متزوجني اذا ميطلع
بعياط :- هذا شغلته ميؤؤس منها شلوون بالله ؟
ماما تكول هو خالو علي الدر ابوك يعني يكدر يطلعه بكفالة
اي ميطلعه يريده يتأدب وهم ائمن اله يبقى بالسجن لان هو متهور ميكعد راحة ومينلزم واذا طلع هم يسويله بلاوي ........
حبيبيتي لعبتي نفسي بطلت اتزوج رجعي نامي احسن .....
لا حبي اشاقة وياك والله احبك والنبي ااااحبك
ديله صالحيني .....بعد الظهر اجي لبيتكم وصالحيني وها تعالي مو ترحين تكولين لامج على شرار
ليش ؟
بعدين اكولج ليش لتحجين لاي احد ابد مفهووم ؟
اي تمام تمام ......
فرح :
خلصنه عشى .. شلت المواعين وخليتهم على السنك غسلتهم وسويت صينية حبشكلات جاي وجرزات وفواكه ورحت يم الشيخ كاعد بالهول ..
اشرلي :- تعاي بويه كعدي ارتاحي كافي تفترين ...
وكام اخذ الصينية مني وخلاها ع الطبلة
واني كعدت ومددت رجليه وخليت راسي على رجليه
هو باسني على راسي واخذ اديه يبوس بيهم
شبيها فرحتي تعبانة ؟
رفعت راسي اباوع بعيونه ...
خايفة علي خايفة خاف اولد بالسابع لو يصير ببنتي شي
دكولي يا الله بوويه شلج بهاي السالفة مو جنتي مرتاحة جلبتي اله تحبلين
ليش ماتريد جاهل مني علي !!!
ولج لاء بووويه لااا مو مااريد بس ماريدج تتعبين واخاف عليج
عدلت كعدتي واباو؏ عليه بقهر اي والله علي خايفة حيل خاف هايه الطفلة هم تموت نفس ذيجة واني والله رايدتها رايدها لان هيه بنتك اكثر مما هيه بنتي ...
ابتسم واحتظن وجهي بين اديه وابهامه على بشرة خدي يحركه ويتحسس بشرتي ...
كال هاي لآي مرحلة وصلتي بحبج الي ؟
خليت اديه على اديه واباوع بعيونه بعمق...
كتله اني تخطيت كل المراحل بحبك كلهاااا ...
ضحك بصوت والفرحة غامرته وطبع بوسة على راسي وخدودي وشفايفي وخلاني على صدره ..
ولازمني قوي كال بعدج خايفة ...
حكيت راسي على صدره
كتله يمك اني انسى الخوف والله
كال الدكتورة مو كلتلج الطفلة مابيها شي وضعها زين وانت هم زين كلها كم شهر تولدين بالسلامة وتملي حضنج ليش تخافين وتخوفيني عليج ممطمئنة لحجي الدكتورة انتِ ؟ من باجر اوديج لغير وحدة ..
_ اي صح كالت هيج بس اني خايفة من القدر ...
_ اسم الله لا تخلين ابالج هيج ان شاءالله تولدينها وتكحلين عيونج وعيوني بشوفتها ...
همست ان شاءالله ...
موج ...
عدت فترة كدرت انسى الخوف شويه وبعد ابد ما صادفت لا اوس ولا زياد اطمنت شويه ورجعت لحياتي الطبيعية صرت اروح لوحدي لشغلي قبلها جان كله احمد يوصلني ..
بيوم فتت للقاعة اني اجي قبل الكُل وااليوم مبين جايه على وقت .. لبست ملابسي الرياضية ، كيمونه سودة وستريج اسود وحذاء سبورت وردي
وداارفع شعري ليفوك سمعت صوت الباب تنطخ ، عفت شعري مفتوح ورحت داافتحها توقعت اجت وحدة من البنات او اجتي ام القاعة الي اني اشتغل بيها
فتحت الباب شوية وجان تندفع بكل قوووتها ..
من الخووف رجعت بخطوات وصلت لنص القاعة .....
ارجف واديه على حلكي مرة وعلى رأسي من فرط الصدمة الي اني بيها من شوفته
جان شكله كله على بعضه مهووس شعره مكفش ونازل ع نص كصته ، التعب مهلك كل ملامحه وعيونه جمر
قميصه مفتوحات دكمه الاثنين الفوووك وطالع صدره ..
شفايفي ترجف احتاريت شنوو اكوول وشنوو احجي الصدمة لجمتني وسكتتني ، اندار قفل الباب خوفني منه ..
إلتقينا جان لقاء كولشي بي ينطق
عيونه تحچي گلوبنا تحچي
وكلشي يحچي بينا ..
تقرب مني وبيده علاكة طلع منها ظرف ، شكاه وشمره عليه وتبعثر كله يمي وكع ع الارض وكعت منه صور
باوعت ع الصور وباوعت عليه بقووة زائفة وملامحي تناقض دقات قلبي الي في جوفي ...
نظراته شيطانية رعبتني ، الرحمة مختفية من ملامحه لدرجة خفت على نفسي منه واني فاقدة ثقتي بي من زمان ...
لزمني من ايدي دايقربني اله تمزقت بين شعورين .. الاول هو رغبتي بالتحرر من لمسته والثاني هو حنيني للمساته
شافني اقاومه وماريد قربه ، جنت خايفة ..
خله ايده على كفى ركبتي ، عطت من الخوف بلا وعي ..
هو واني بيده دنج اخذ صورة من الكاع وخلاها قريب على عيوني
ويهز بيه بعنف ولازمني بقسووة وجعتني ، صاك سنونه ويسأل بيه ...
هذا شيسووي يمج هاا ؟؟ شيسسوي احجي مووت احجي لا صدك امووتج ....
فتحت عيوني انتبهت ع الصورة بيها اني وزياد من اجه هذاكه اليوم ووكفت حجيت ووياه ، انصعقت !!!
طخيت الصورة بعصبية وهو شمره ع الكاع بغضب دفعته مني واصيح اطلع برااا شرار اطلللع ماعندي حجي وياااك اطللع
دفعني لزكني بالمراية الي وراي وتقرب مني
كال شنوو ولج تتواعدون ابغداد من شووكت ولج من شووكت احجي شنو عندج وياااه هنااا
دفعته من صدره ، لزم اديه قيدهم ...
واتي احاول اتملص من قبضته كتله بانفعال
هذاااا منو الي مصورتي هاااا منووو انته مخلي مراقب يراقبني هاا شراررر وانت مهزووم مثل الجبناء
لزمني من زندي وايده الثانية خنكني بيهااا
انجبي لج وجاوبي على اسئلتي شعنده يمج ااااحجي!!!
واني ارجف بين اديه كتله هذااا اووس صورني مووو ؟؟ هوو انت تصالحت ويا وخليته يراقبني يعني معندك غيره ؟؟
جان ذكر اسم اوس كدامه مثل التلويح بقماش احمر كدام ثور هايج ...
ملامحه تهووست اكثر ، وجهه صارر كله احمررررر
تخبل اكثرررر ويضرب بيه ع المراية حتتكسر بظهررري .. هو انتبه واني عطت اصرررخ ...
امخبل انت وخر عني ..
صااح بانفعال :- اي مخبل مخبببل
وفتح اديه على وسعهااااا ....
ورجع يمي ... ولج شنو اله علاقة هو موو بالسجن ..
نااايم انته نااايم رووح كمل نوووومتك شمدريك ...
صك سنووونه بسييييطة اوووس بسيييطة ..
ودنك يجمع بالصور من الارض ..
وكفت يمه منوو صورني ..
رفع راسه موو انتي دتكولين اوس معناهه صدك هو ...
يعني انته متعرف منوو ؟
رفع تك حاجبه يباوعلي بقووة وحقد ...
وديريد يطلع من القاعة وصل للباب ...
ركضت لزمته من تشيرته من ورى وسحبته بقووة
وحاجيته شراررر بلا خبال انت على شنوو ناوي!! خلينا نتفاهم انته ليش منهزم ؟
اندار عليه وبعده معصب ، لزم ايدي ودفعني .. امشي لللج ع اساس يهمج لوو خايفة عليه انتي مووو ..
ترى اني الي سلطة عليج واكدر اكسر راسج واطيح حظج على سواياتج الي ماتتسولف بس متهميني انت لا شيء بالنسبة الي ...
سألته بأنفاس لاهثة بسبب ضربات قلبي العنيفة
_ لعد ليش اجيت ...
: مو علموودج لاء .... ومراح انسى جرحج وكسرتج بعمري ....من خليتيني وراج ومشيتي بشور واحد غريب والله يعلم بعد شسوويتي
هزيت راسي بأسف :- ياريتني ماعرفتك ... شراررر يارررريتني .. مشايفتك بعمري ..
ابتسم باستهزاء .. وطلع ..
بطلعته فاتت ام القاعة وظلت تباوعله الى ان راح واجت عليه .. ولج هذا منوو ؟
عدلت شعري وبعدته عن وجهي ..
هذا زوجي ، اقصد طليقي هفففف اقصد احنه ناووين ع الانفصال يعني ..
عزااا بعينج اي والله ولج هذا مززز الف رحمه ع روح امه على هاي الخلفة البيها حظ هاي الزلم المعدلة بشرفج موج اذا طلكتي اشمري عليه
اختها كالتلها ولج عيب خاف تحبه بعدها شهالحجي ..
تنهدت ولزمن كصتي لا بس يتعبج .. وانطيتها ظهري داروح اشرب مي ريكي يبسسس
هيه كالت بحماس اي والله اني غاوية تعب ميخالف اتحمل ....
ابتسمت مجاملة وبس افكر شحيسوي اني مطية كتله على اوس لعد هو منو الي مصورني هو مستحيل يسويها يربي احتاريت كوة خلصت تمرين وطلع للبيت
حاجيت احمد بالموضوع خابر على االشيخ وحجه وياه بالموضوع ...
بالليل اجه الشيخ وظل يحجي وياي وكال جان جاي همينه من بيت اوس والظاهر صدك اوس االي مصورني ..
كال اريدج تفكرين ترجعين لشرار احسن ولا تفكرين بالطلاك...
بس اني رفضت ارجع اله بعد كل االي صار وكل الي سواه هو ...
ورى يومين اجانه هو للشقة هم معصب او بالاحرى مخبل مخبل وتعارك ويه احمد عمود موضوع لقائي بزياد بالشارع ..
احمد كاله ترى هاي انته كلتها واكفة باالشارع هيه وكدام الناس ممسوية شي غلط
كال اي خوش عليك مابيها شي غلط خو خلي نشد النه كرون اني وياك
كاله احمد بانفعال : احترم نفسك كول هالحجي لرووحك خليني محترمك انت ابيتي
كتله اي شووفوا منوو يحجي شنوو نسيت نفسك من تبوس بمرتك بالمطعم كدام كل الناس لو شرقيتك هاي بس عليه اني ..
كال ديللله امشييي انتييي تحاسبيني .. وشوفيلي شووكت موعد المرافعة الجاية مال المحكمة خلي اطلكج ونفض السالفة ..... وكلمن يروح بطريقه
صفنت بوجهه ... وهو تأمل التعبير الي بدا على ملامحي بسخرية ...
حجيت بداخلي ... الا اخليك تاكل كلبك على خسارتي مو بس اصابعك .. هينة شرار هينة ...
يتبع ...
بقت التكملة ااالاخيرة اعرف تعبتكم اعرف والله بس هاي اخر مرة والله واخرر بارت ومراح اطول عليكم ابد ...
اكو غموض همينه هم حكتبه بلسان شرار الي يخص زوجته الروسية وابنه وسر اختفاءه وشون وصلته هاي الصور هم حكتبه بالبارت الجاي ❤
وايضا هيام وزواجها ونهايتها والاسرار الي تخصها ...
واي شي تحبون يتوضح اكتبوا بهاي الفقرة خاف ناسية اوضحه واكتبه .. ❤
غير شوكت علي حبها لفرح 🤣سؤال هواي يتكرر وهواي يكولون حباهه قبل متتزوج حمدان واكثر من مرة نوهت انو هو مجان يعرفها قبل حمدان حتى يحبها .....
احبكم 😘
اذا ممكن متابعة لحساب الكاتبة Jaymin_Jaymin