هذيانٌ بين جمرٍ وجليد ..(ارملة اخي المجنونة)

68//

السلام عليكم ..
هذيان بين جمر وجليد
الفصل ٦٦ الاخير (١)
نورا ناصر ...

اصبحتي هذياني .. فلا ذنب اذا اخذتك بين احضاني ..
ولا تسألي عن الشيب في شعري فالله يعلم كيف كان بعدك عني كان كاللهب يحرق اغصاني ..

فأنظري الى جدران مكتبي كم لوحة رسمت لكِ ، كنت أخطها بقلم من رصاص ولا أضع فيها ألواني ، وانظري الي قصائدي التي كتبتها ليس بقلمي ولكن ببن فنجاني
كان طعمه كالعلقم اجرعه في سبيل نسياني ..

فارجعي الى حياتي وسميني كما تشائين علي ام العرندس وفي لسانكِ جميل لو قلتي شيطاني ..
((بقلم سكون))

فرح ...

حجيت بنبرة اقرب للصياح والنتر والعصبية . والتليفون كل شويه احوله على غير اذن وارجف بانفعال

اي اي تزوج الف مبرووك شعلية اني تزووج بالعافية والفين مبرووك مو بس الف واحد

عود لا تنسى تصبغ شيبات شعرك ..

كال لا هيه تريدني مثل ما انه عاجبتهه شيباتي تكول الشيب وقار

كتله اي بدت اللواكة هجم بيتهه اللوكية من هسه تتلوك يمكن اخذتك عمود فلوس هسه تطلع فكر بت فكر

كال شبييج سويتيني طايح من السطح ولج انه بس أشر عشرة عشرة يوكعن بس بعض الناس متعافيين

كتله اي اي خل يوكعن شعليه دتكولي !!

كال لا تصيحين ولج و يا ام جاسم انه مو ذنبي انت طرشة صايرة مدري شبييج ..

لالا اكيد انت دوم تفكرين وخايفة لا اتزوج وعقلج الباطن اوحالج انو انه كتلج عمهم بس بالحقيقة انه كتلج ابن عمهم ..

عزااا اجه يوكف كلبي والله ..

هههه بالعافية عليه كلبج ليحبني ..

هيه هاي سوايه تسويها بيه الله يخليك ماتخاف عليه انته ؟

وخرت التليفون وصكيت سنوني وظليت ادردم
- : شويب بيك كل البلى والصخام واللطام هيج تسوي بيه هيييج مايخاف عليه ولايكول فريحة كلبها يووكف اخخخ مع عضة الاصبع ..

واسمعه ضحك ضحكته الي تغازل مشاعري وتلامس شغاف قلبي وروحي .. وكال احبج من تجفصين واموت عليج من تطلعين الي بكلبج وماتضمينه

واعشكج لان الي بكلبج على لسانج واذا ترجعين يرد عمري الي والله ..

كتله بتوتر .. هاا اي اي اجي اني بحفلة مهيب بس لحظة خطب منو ؟؟

ريلام ....

جنت كاعدة بالصالة وهيام كاعدة مقابيلي .. بطنها شكبرها ومخليه ايدها عليها ..

هالايام وعدني مهيب يجي يخطبني واني كولش خايفة ومتوترة .. وبس اعصر باصابعي وحتى بدراستي ممركزة

كامت هيام تتمشى وراحت يم باب الاستقبال واشرتلي بسرعة بيدها عود تعالي ..

رحت بسرعة وكفت يم الباب .. واسمع جدو يكول لماما
اي راح يجي هو وولده الليلة بالليل ... يخطبون ريلام لمهيب ..

ماما كلتله جان كتله ما ننطيكم اني ماانطيهم بنتي حرام عليه هيه ربت عند امه ورضعت منهه ...

بيبي جاوبتخا بنرفزة :- عيب عليج هالحجي مهما يكون هو اخوج واحنه مانطرد خطارنا هلا بيهم ..

_ اي بس يا عمة انتي تعرفين شي واني اعرف شي مو كتلج هيه راضعة من امه شون انطيهه اله ..

_ وهو رجال حگاني واكيد عنده غير هالحچي هذا خل نسمع شيگول وبعدين عود نتصرف وانتي وين تلگين مثلهم تنطين بتج وهمينه بتج مو گاصرة عمر جبيرة وتفتهم وتعرف مصلحتها واكيد اول وتالي الراي رايها ..

شويه كلام بيبي حسسني بالامان والاطمئنان وجدو جان مستمع الهن ..

ماما جاوبتها لبيبي وهو حگاني لعد واني شنوو عمة ترى دتظلميني ..

جرتني هيام من يم الاستقبال وشوشت باذني
على عناد ماما واصرارها لوو تمووتين متتزوجين مهيب لج هاي زواجه محرمة ومستحيل تتم احسلج تزوجي سمير خهه لايگلچ

كتلها متروحين لبيتج وخرري عني اروح اخابر رحاب بلكي تحاجي ماما تغير رأيها لا تفشلنه ويه خالو والله عيب

كالت مارووح داانتظر صديقتي نطلع اني وياهه وماما متغير رأيها راسها والف سيف ومستحيل تنطيج لمهيب خليها ابالج هاي ..

قلصت عيوني بشك واني اباوع عليها : وليش صديقتج متجيج لبيت رجلج ليش تجي تاخذج منا تطلعين من وراه محمد انتي ؟ ووين حترووحين انت ووياهه

راحت كعدت على التخم ودارت وجهه عني
و كالت بلعثمة للسووك بعد ووين !!

رحت يمها بنبرة هجومية : انت بعدج على هاي سوالفج ولج ؟؟ مو زوجج وحملتي كافي كافي حتجيبين اخرتج هيج عقلي شجاااج ؟

كالت بانفعال اشش وسم وكبرر ان شاءالله سكتي ليسمعوووج وبعدين لتدخلين ملج علاقة انتي عود لمن تتزوجين لاتسوين سحورة من زوجج مايطيعج ومياخذ
كلامج ويخوونج ظلي تفرجي ع الوضع

كتلها انتي شمتوقعة من واحد متزوجته بالسحورة ؟؟ حيبقى الوضع هيج ؟ شبيج انتي شغلي عقلج وين ذكائج ؟

ررن موبايلها ، اخذت شالها لفته بسرعة وكامت اخذت جنطتها
كالت بعصبية ... كولي لماما اني رايحة خوش ؟

هيام اني اريد مصلحتج كافي يمعودة بطلي هالسوالف التعبانة وانتبهي لنفسج انت حامل لتدخلين لهيج اماكن مو زين عليج متخافين على طفلج انتي؟

دفعتني وهيه تلبس جنطتها وطلعت من البيت ..

هزيت راسي وانتظرت ماما تطلع من يم جدو او بيبي واحاجيهم والله ميتة من القلق والخوف ..

ومهيب احبه ورايدته وماريد اصير لغيره لوو أمووت ..
ظليت ادعي تعدي على خير واصير اله

طلعت ماما وهيه تكول وين تليفون وكفت مقابيلها
حاجيتها :- ماما عفية لا تفشلينه كدام خالو الله يخليج!!!

ردت ولي ولج شوفيلي تليفوني خلي اخابر عمج هو يتصرف ترديني ادخل للنار من وراج لج هذا اخوج ...

انت شمدريج اخووويه وخالو يعرف كولش زين الحقيقة حرام عليج امي حرام

راحت هيه واني ظليت ابجي ، طلعت بيبي ركضت عليها حضنتها وطمنتني كالت معليج بأمج وخالج يحلها أكيد ..

لليل اني ماظلت دموع بعيني ومحتارة وماما تغم بيه وتهدد بيه وتكولي بس تقبلين اتبرى منج

اني احسها ماتحبني ابد ... واني اصلا عايشة بجحيم وياهه .. مهيب يحبني ويمووت عليه ادري بي مستحيل افرط بي وماما بمرور الوقت بلكي راح ترضى عليه ..

اجوي بالليل خالو ومهيب ولهيب .. فتت سلمت عليهم وكعدت يمهم وماما هماتين جانت كاعدة وبيبي وعمو ابو سمير وسمير ..

خالو علي الـدر وجه كلامه لجدو :- حجي احنه جايين اليوم نخطب بنيتنا ريلام لمهيب ...

جاوبه جدو بعد ماباو؏ لماما : والله طلبك علىٰ عيني وراسي بس يا شيخ ترىٰ ريلام ابن عمها يريدها وهو أولىٰ بيها ..

انفعل مهيب ويريد يجاوب بس خالو علي ماخلاہ
ورد .. اي وهيه شنو رأيهه موافقة لو لا ؟

جاوبہ جدوو .. احنه نعرف وين مصلحتها ماحاجۃ ناخذ رأيہا ..

عگدت حواجبي وگلبي صارت دگاته ألف والغصۃ ترست روحي .. باوعت لمہيب ثواني شفته معصب حيل وعيونہ بهہامته

خالو جاوبه : الزواج عرض وقبول لا ضرر ولا اجبار للعروسة وان كان ابوها او وولي امرها فقط القاصر يكون إله الامر الكامل بالرفض او القبول

وهيه ريلام كاملة العقل والعمر وانه ما أقبل أحد يجبرها اذا مجانت قابلة بي ...

شتگولين بوويه ريلام.. ؟ انتِ موافقة تتزوجين إبن عمج احجي ولا تخافين من شي

هزيت راسي برفض واني مدنكة وغمضت عيوني بقووة ..

ماما بسرعۃ گالت :- بس يا خويه ريلام ربتها المرحومۃ مرتك ورضعتہا وهسه هيه ومہيب بحسبة الاخوان ..

خالو جاوبہا بنبرة انفعالية :- ام رحاب اريد اسألج سؤال واحد وجوابه يمج انتِ شفتيها المرحومة رضعت ريلام لوو لا ؟ واذا صدك شايفتها كولي شكم مرة شفتيہا

تريد تجاوب كللها خليني أكمل كلامي ..
واذا جان جوابج اي نعم شايفتها انت مستعدة تدگين الـقرآن لـو لا ؟ واذا دگيتي وثبتي صدق كلامج بيدي ازوجها لأبن عمها وازفهم همين ..

سكتت ماما ومدنگۃ ..

هو كالها ها ام رحاب شوو ساكتة جاوبيني !!

هيه تنهدت وكالت بجفاف :- لا خوية ماشفتہه بس هيه گالت رضعتہا

اي صح رضعتهه اول يوم الي اخذناهه منج رضعة وحدة ومو مشبعة ... وهذا الشي معناه هم مو أخوان وهذا شرع الله ..

بعدها تدخلوا عمي وسمير ويكولون لخالو احنه نريدها .. وخالو ومهيب لبكوهم تلبك بالحجي ..

خو مهيب كووة على اعصابه كاعد ، ولو عيونه تطلع نار جان حرك سمير حرك بنظراته النارية .. عيونه مليانة عزم وتصميم ومبين الليلة شاد حيله ومستحيل يتنازل

كال لسمير انته وين رجولتك وين كرامتك من تتزوج وحدة ماتريدك ..

سمير دار وجهه متفشل ويتمتم بطرف شفايفه
بت عمي واريدها والحب يجي ورى الزواج ...

خالو رد عليه : لا بويه هذا الحجي مايصرف النه ، ريلام بنيتي انه ربيتها وما اخليها تتزوج غصب

واني كاعدة هم على اعصابي واليأس يغلف قلبي ...

نوعا ما جدو اقتنع بكلام خالو لا والله غصبا عليهم اقتنعوا وماما كاعدة تنفخ وتأفأف .. وماصدكت لمن سألوني موافقة على مهيب لو لاء ..

ابتسمت وكلت موافقة بحماس وبعدهه خجلت من روحي ..

رحت بوست خالو وطلعت من الاستقبال بسرعة خجلانة .. وهم كعدوا يتفقون على كل شي

بقيت كاعدة بالصالۃ وخابرت رحاب كتلها
وهيام بعد ما إجتي .. يمكن رجعت لبيتها هي كاعدة ويه اهل زوجهہ

بعدهه جتي بيبي باركت الي بوستهه وحظنتها .. ووراهه ماما رحت دا ابوسها دفعتني وخر متبرية منج ليوم الدين

ليش ماما هيج تسوين بيه ماريد سمير هيه موو كوووة ..

بيبي كالتلها ترى سمير مو حمل زواج وبعده ياخذ مصرفه من ابووه خلي البنية تشوف نصيبها وهيه تحبه لابن الشيخ وهو يحبها ليش توكفين بطريقهم بعد

هيه خلت وراحت بس عيونها براسها ومعصبة .. جيت اروح وراهه بس بيبي كلتلي خليها على راحتها احسن فترة وترضى

صعدت لغرفتي وبيدي تليفوني ، اكيد هسه يخابرني مہيب ... وفعلا بس وصل لـلبيت هو خابر ..

وجان فرحان طاير من الفرح .. كال مااضمن امج خاف كل شي تسوي هالاسبوع المشية والعقد وورى دوران سنوية حبوبتي الـعرس واجيييبج يمي احطج بكلبي واقفل عليج

ضحكت وهو نزل على سمير ولج هذا ذيل البشة اجيت اجعصه بأديه والله بس احتراماً لأبوي الگاعد مو احترام لجدج لو لعمج لان حجاية تجيبهم وحجاية توديهم

كتله اي والله وانتوا مقصرتوا وياهم ، بس مهيب ماما زعلانة عليه

هيه كضت عمرها زعلانة عليج بعدين نراضيها عود ولا يهمج خل نعقد هسه خاف يصير شي يفشكل كل شي

لا اسم الله بس كول لخالو يراضيها فدوووة ..

الله كريم حبي وحضري نفسج هالاسبوع اوكي ..

فرح ..

خابرني علي كال جاي اخذكم راح نسوي مشية وعقد وورى السنوية نسوي حفلة وعرس ..

كتله اني ما اكدر احضر ، انوب العقد يم بلقيس ماريد اسمع حجاية وبعدين انته مطلكني زحمة اجي شتكول عليه الناس ماعدها كرامة ؟

كال ترى محد يدري مطلكج هاي شغلة بيناتنه احنه

وليش محد يدري ليش ماتعلنها شكو بيها قابل مسوين شي غلط احنه هو الكل يتطلك والعراق كله مطلك طلاك بالجملة ديصير

من تصير صدك عوود ومن نطلك بالمحكمة نعلنها ..

وشوكت نطلك بالمحكمة ترى طولت حييل

نطلك نطلك لاتستعجلين هسه انتي تجين لعقد مهيب لو لا ؟

لا ع العرس ابيتكم اجي اي بس هسه يم بلقيس لا ماريد تعذرني ..

جا خوش حضري الجهال اخذهم خل يتونسوون انت ركعي راسج بالحايط
وسده بوجهي

شدعوة العرندس شصار عليك كنالك مانجي ...

بعدين جان احمد بالشغل وانين هالايام كولش قليل تجي وصار الها كم يوم خاتلة ماكو مشايفتها ابد بس اخابرها وتكول دراسة وشغل مالحك عفتها على راحتها....

وذيج موج هماتين بالي يمها شكلها مو تمام مدري شبيها جانت كلها طاقة ايجابية هسه صايرة كئيبة حيل...

يمكن تأثير البرد بروسيا مخليها هيج مدري مكافش هيه والروسية .. ومتقبل تحجي ..

بس اني منهن حرة طليقة ، واحمد هماتين حر طليق وميقبل يتزوج يكول عقدتوني ..

بعدها بأيام ، جان الجو حلو واحتاجيت شغلات للكيك واحمد مخبلته اني جيب ذاك ودي هذا وخطية انقهر عليه ابتلى بيه

قررت اني انزل واتسوك واخذ زعاطيطي ويايه ... رحنه نتمشى اجيبهم منا يروحون منا خبلووني

دخلت لمحل اخذت شغلاتي الي احتاجها وطلعت .. وبعدين شفنا محل مال موطة اشتهيتها رحت دااشتري

بهالاثناء واني واكفة دااريد اشتري رن تليفوني طلعته علي يخابر ..

جاوبته الوو ؟ رد : انتي وين هسه ؟ واكف يم باب الشقة ادك الباب محد يفتح

ياا عزاا العزااني سوودة عليه صخام بووجهي نسيت راح يجي راح عن بالي شكد فاهية اني !

جاوبته بتوتر : ها اني هنا بالسووك انت ابقى فد شويه واجي

بالسووك وين ومنو وياج ؟

ها اني والزعاطيط يم ابو الموطة نشتري ونجيبلك ويانه ونجي شوويه انتظر بس دقايق

سأل بنفاذ صبر : ووين صاير هذا ؟ واحمد شون يخليج تطلعين وحدج

رديت بتبرير : ها هاي اول مرة وهو موو بعيد هنا قريب ع العمارة ..

رد يله يله الله وياج ..

رحت اشتريت موطة واباوعلها تشهي بالوانها وشكلها .. خاف منا لم نرجع تذوب واني مشتهيتها هيج

كعدت ع الرصيف وانطيت للجهال كل واحد كبوس مالته واني كاسة واكل منها بالخاشوكة

هو اكو كراسي وطاولات يم المحل بس كاعدين عليها ماكو مجال وكعدة الرصيف شبيها صح الناس تباوع علينا بس ميهم عادي هو شمسوين احنه حناكل ونكوم قابل مأجرين الرصيف!!

وكفت يمنه بنية وامها راحت تشتري هيه مبينة من عمري وظلت تباوع علينا كتلها تردين واشرت الها بالموطة!

هزت راسها وضحكت وراحت تقربت من امها واني كملت اكل موطة

واني على كعدتي ، وكفت يمنه سيارة بيضه عالية لكزز باوعت عليها جني مشبهة عليها او اعرفها وجان ينزل منها العرندس

اني يارصيف انشكع وابلعني .. وكف كبالي وظل يباوعلي وملامحه منزعجة ..

والجهال شمروا الموطة عليه وكاموا اله ومجلبين بالبشت مالته ويمكن صار كله دبك وموطة ..

يمكن هسه يتمنى يلزمني ويخلي وجهي بكاسة الموطة ينفس عن غضبه

هسه هو شكوو اجه وراي والله ما ادري ..

كمت على حيلي هلاهاا الحمدلله ع السلامة ..

كال وهو صاك اسنونه الله يسلمج يله صعدي ..

وظل يمسح ادين ااجهال بالكلينس الي بيده وصعدهم بالسيارة ..

واني احتاريت بالموطة هم مشتهيتها وهم ذابت بيدي ..

ظل يأشرلي ع الحاوية رحت ركض شمرتها بس مالتي لا والله بعدها بحيلها تنوكل مو مثل مالة فطومة وداني ذابت ع الكبوس مالتهه

وانطاني بطل مي و كلينكس غسلت مسحت ايدي ..

واريد افوت بالسيارة واجاني صوته ..
هاي الجنطة والعلاكة الي ع الرصيف الج ؟

باوعتلهم اي ياا مالتي مالتي خل اروح اجيبهم

لزمني من زندي وفوتني بالسيارة وراح جابهم وخلاهم يمي وسد الباب وراح صعد يم السايق

واني انشغلت اكل الموطة بالسيارة شوون طيبة سهمكم العافية

هو مبين ضاج كولش ومبين من حسراته بس يله ميخالف نوصل للشقة وانطي الموطة الي اشتريتها اله
وهو يفك الطنكورة مالته ..

وصلنا للعمارة ونزلنا كلنا وهو صعد ويانه وكفت يم الباب مال الشقة اريد افتح الباب اديه ترجف خجلانة منه كولش شون حفوت ويا وحدنه بالشقة

هو اخذ المفتاح من ايدي وفتح الباب ودخلنا كلنه وهو سداه .. كال هاي من شوكت تطلعين وحدج انتي ؟ واحمد شون يقبل تطلعين انه مو منبه عليه يدير باله عليج

شنوو علي اني واذا طلعت ترى هيه خطوتين هنا هنا اشتريت احتياجاتي واحمد ممقصر خطية وياي لتلوومه بس اني هم اختنكت ترى وصار فوك الشهر ممعتبة باب العمارة

تقرب مني وكال بعد تنهيدة .. :- اخاف عليج ياعيني والدنيا موو امان ..

تملصت منه بسرعة ورحت وكفت بعيد عنه .. لتخاف اني اعرف اتصرف ترى ..

كال اي من كعدتج ع الرصيف وناس رايحة جاية تباوع عليج ..

رحت طلعت الموطة واخليتها كدامه هاي تنقصتلك اكل خاف گلبك حار ..

كال فديت ام گلب الطيب ونفس الحلوة ..

ابتسمت ورحت للمطبخ همين خليتله كيك وعصير خاف جوعان خطية جاي من طريق طوويل ..

خليته كدامه هو باو؏ عليه كال اليوم ناوية تصعدين السكر ..

هاا ماتريد خلي اشيله ودنكت على الطبلة داشيل الصينية

دانيال كاله هاي ماما مسويتهه الكيكة ..

هو ترك الموطة ولزمني من ايدي كال خليها مدام انتي مسويتها انعل ابو السكر خل يصعد شكوو بيها ..

ضحكت واني بعدني لازمة الصينية لالا نخاف عليك شيخ والله

كال والله فدوة الج انه ..

طولت ايده وهيه لازمة ايدي واني مثل كهرباء سرت بجسمي من لمسته وخرت

كتله انطيني البشت مالتك اغسله خاف دبگوا الجهال ..

هو كام وكف واني اخذته من جتافه وعيوني بعيونه ..
هو مبتسم .. ابتسامته تشق طريقها لصدري وتخلي يضرب مثل المطارق ..

دنكت وابتعدت بسرعة وبيدي البشت مالته ، فتت للحمام وخليته على انفاسي استنشق عطره واني مغمضة وبعدين كعدت غسلته ونشفته ورحت كويته ..

ورحت للصالة كال عاشت ايدج ع الكيكة بس الباجة من ايدج تسوى الف كيكة ..

ضحكت بصوت عالي كتله والله جان سويتلك هسه بس ماتلحك تستوي ..

بنبرة اقرب للتوسل كلي : امشي وياي لبغداد وسويها الي على راحتج ..

هزيت راسي برفض لالا عندي شغل .. وهماتين عندي موعد ويه الطبيبة مال جلدية عندي جلسة علاج ..

كال بانفعال :- جاا يله حضري الجهال خل اخذهم

ليش مستعجل ابقى ع الغدة .

السايق ينتظرني فضيها ..

حسيته عصب .. رحت حضرت الجهال ، هو طلكني واني كرامتي متسمحلي ارجع وياه بعد وممرتاحة للرجعة الي صار بيه كولش كافي ..

اخذ الجهال وراح ..

وريلام خطية زعلت عليه شويه لان ماحضرت ..

كتلها على العرس اجي واركص همين ..

هيه فكتهه شويه وظلت تبعثلي صور وفديوات عن حفلتها وجانت كولش حلوة طالعة وفرحاانة حييل ..

كولش فرحت الها هيه ومهيب وخابرته وباركت اله هو هم زعل لان ماحضرت بس كال ع العرس بيدي اجي اخذج لبغداد وغصب عنج تحضرين ..

ضحكت وكتله تدلل كم مهيب و ريلام عندي والله فرحت الهم من كل قلبي ..

وراها بايام رجعوا الجهال ويه مهيب وهو ما اجه اكيد زعلان ..

هدئ...

جنت استمع الكلامهم واني احس بصخره جاثمه علئ صدري واحس الحروف متقيده باللساني..

خوف متربص باعضامي اريد انطق بس شلون ولمنو اكوول الصار اني اخاف اكول الهيب ولهيب اعرفه يتهور واخاف عليه يدخل سجن...

وعمي الشيخ صح يجي يشوفني بس ما اعرف ما حبيت احجي اله عن الي صار لان حسيته حيلوم لهيب ويحمله السبب...

اني انضربت من السكران الي تعارك وياه لهيب،من قبل فتره وهو ضمها للهيب لان هو لا اخذ فصل ولا دخل لهيب سجن وجان معترض علئ عمامه ومتعارك وياهم لان ما اخذوا فصل ...

وجان يتهدد يكتل لهيب بس هو مو رجال اخذ حيفه من النسوان...

حسيت بأيد بارده احتضنت كف ايدي الدافي باوعتله وهو يبتسم...هااا هدهد وين صافنه احجيلي اريد اسمع صوتج ما صدكت صرتي زينه

ابتسمت ببتسامه متعوبه وجريت نفس قوي بلعت ريكي الجاف...شلونها ديمه اخويه علي شلونه؟

تقرب مني،وطبع بوسه عميقه ودافيه علئ خدي كال ببتسامه...الحمد لله ديمه وعلي بخير ومنتظرين شوكت تطلعين وتنورين البيت ولو احنه راح نرجع للقصر...

ما اعرف ليش من كال راح نرجع للقصر ضجت ما اعرف يمكن يكون سبب بلي،اني،بي لان انطردنه منه من زمان ونهنه وتشتتنه وتعرفنه علئ السكارئ والمجرمين

درت وجهي بدون ما اجاوبه وهو عرف الاجابه مني عدم القبول

تسللت ايده علئ خدي ودارني عليه باوعلي بتردد...انتي ما تردين نرجع للقصر ؟

هزين راسي بنفي...

تنهد ورجع ضهره علئ الكرسي كال...حقج بس هذا هم حقنا مثل ما هم عايشين مرتاحين هناك احنه هم لازم نعيش هناك ونرتاح حالنه من حالهم

وترئ هذا ورثنا وقصرنا ومكانه وابوي،من طردنا لان احنه قصرنه بحقه وما اعترفنا بي،وهو رادني اعتمد علئ نفسي لا تضنين ابوي يضلمني او يضلمج لا بالعكس ابوي مو هييج

ما شفتي شلون تخبل عليج من انضربتي وحتئ راد يسفرج للخارج بس الدكتور ما سمح بهذا الشئ لان جانت حالتج ما تسمح...

بس هو جان عقاب النه من قبل ابوي حتئ نعرف شلون نعتمد علئ نفسنا وشلون الحياة تعلمنا ونستفاد من اخطائنا صدكيني الما يتعاقب ما ينصلح ويضل اعوج طول عمره

اني هسه من هذا الصار كله استفاديت شغلات وفتحت عيني علئ شغلات حسستني ان اني صدك رجال وصاحب مسؤؤليه وعندي عائله معتمده عليه مو علئ ابوي

ضحك بحزن كال...رب ضاره نافعه

ابتسمت بذبول...ما عندي طاقه للجواب واكفيت بهل ابتسامه

تقرب مني اكثر كال بجديه...هدئ احجيلي منو الضربج؟

حطيت ايدي علئ العمليه بوجع بمجرد من اتذكرت القاتل انزعجت ملامحي وبين الألم عليه

هو من شافني هيج ارتبك وكف بقلق وخوف ولزمني يهديني...يالله هدئ لا تخافين وانسي الصار ان شاء الله كل شئ ينحل لا تفكرين...

ضلينه كم يوم بالمستشفئ وخطيه جابو اليه ديمه وعلي شفتهم جنت حييل خايفه ان ديمه ميته او انقتلت وما يكولون الي بس الحمد لله ربي حفظها

تقريبا وقت طويل مر عليه واني اخذ علاجات وابر وتداوي وكل ما يسألني لهيب عن الي تعرض اليه جنت اتردد وما احجي اكوله ما شفته جان ملثم ما اعرف ليش خفت علئ لهيب منه...

رجعنه للقصر بس بصراحه مجنت حابه ارجع بس عمو علي اصر ولهيب كذلك واني حيل أخجل من عمو استسلمت للامر الواقع ورجعت...

جنت كاعده علئ السرير ولابسه تراك نيلي هم من انضربت خطيه نزعوا مني الأسود كالو ما يصلح

جنت العب اني وديمه دخل لهيب باوعتله ضحكت ورجعت العب ويه ديمه

حسيت ببوسه دافيه علئ،كتفي ونفس،عميق كأن يشبع انفاسه بيه

صار مقابيلنه علئ السرير وتمدد وهو يباوعلي وحاط ايده علئ خده

كال بحب...صايره صاكه شتاكلين

ضحكت ...ههههههههههه اكل حلقوم

كرص خدي...اكو حلقوم ياكل حلقوم

تقرب مني وهو يكول بلهفه...ترئ اشتهيت حلقوم

حطيت ايدي علئ صدره واني ابتسم ...لهيب اكعد راحه لا تصير وكيح بلا حلقوم بلا بطيخ..

غمزلي...اوووف لو ما مريضه جان زيدنه الحلقووم

ابتسمت وتقربت منه بسته بخده وهو حضني،بحضنه باسني،بخدي وشفايفي وكل شويه ويعتذر مني عن الماضي وحسيت بي شكد مجروح لان هو اذاني واني هماتين اذيته من قبل...

احتضن وجهي بكفوف اديه كال باسف...هدئ اني جنت ناوي افاجئج بشغله بس للاسف هل شغله ما كدرت افاجئج بيها لان القدر جان اقوئ مني ..

عقدت حواجبي باستغراب...شنو المفاجئة ليكون انت الضربتني وتطلع هاي مفاجئتك ههههههههههه

ضرب خدي علئ كيف وهو يبتسم...لا تصيرين خبله هاي المفاجئه تخصج تخص الموضوع البهذلتي نفسج عليه تخص هدئ الضاعت وضيعت نفسها والحمد لله الله وكف وياها...

جنت اباوعله مستغربه ومتفاجئه ما اعرف شنو يحجي،كمل بهدوء كال...هسه اجيج ثواني

راح بسرعه واجه وهو جايب بيده ورقه خلاها بيدي كتله باندهاش...شنو هاي؟

ابتسم بحزن كال...هذا دليل برائتج هذا تقرير علئ وجود عذريتج لان جنتي بغشاء مطاط

رمشت بعيوني مصدومه من كلامه اخذت الورقه واني باوه بيها وعيوني تدمع وتشكي حالي ما شفت شئ،ولا قريت بس تقربت منه بالم

لهييب شش شنوو هذا لهيب طمني حسره ضاله بصدري من زمان حتئ لو محد شكك بيه بس اني موجوعه متعذبه اريد اعرف اني شنو

حضني بحب...انتي مرتي وحبيبتي وعمري انتي طاهره ومجد لمسج غيري انتي جنتي طفله ما تفهمين وربج ما خيب ضنج

بجيت بصمت قاطع واني ممصدكه الي ديصير معقوله معقوله دليل برائتي جان بيدي واني ما اعرف بي وتعذبت ونهنت واني بيدي الدليل شكد غبيه لعد ...

هو سحبني وحضني بجيت بحضنه واني اشكي من الماضي والصار والعذاب و ولادتي بديمه ومن يتمي ومن كوولشي ومنه هو شكيت منه واله...

هو مجان اله رد غير ان هو يطمني ويحضني ويبوسني للامانه هو طول فترة مرضي ابد ما قصر وياي وجان مخليني مثل المي بالصينيه

وهذا الي خلاني اتعلق بلهيب شويه شويه واتغاضئ عن أخطاء الماضي...

جان دائما يسأل عن الضربني واني اتردد وذاك اليوم قررت احجي هل موضوع للشخص المناسب...

وفعلا لبست حجابي ولبست روب قطني ثخين فوك التراك ورحت ادور علئ مهيب اي مهيب هو الي يكدر يساعدني وينصفني بدون ما اضيع لهيب

لان اذا حجيت للهيب اكيد حيقتله ويدخل سجن وحتعذب اذا راح زوجي

بس مهيب اصلا هو ضابط بالشرطه وهو يعرف شلون يدير الامور ويلقي القبض علئ السكران

استحيت اروح الغرفته لذلك جنت منتظرته بالصاله تقريبا ساعه وطلع وهو يلبس بساعته

حجيت بهدوء...هاا مهيب شلونك

باوع عليه بتفاجئ كال...هلا بهدئ شلونج ان شاء الله عمليتج زينه ؟

رديت عليه ببتسامه وايدي علئ بطني...لا الحمد لله تمام شويه احسن..

واردفت بتنهيده...بس اني يا مهيب عندي موضوع وياك اذا اكدر اخذ من وقتك شويه

رفع حاجب باستغراب كال...اي شنو احجي ؟

جريت نفس عميق ورجف جسمي كله ...اني اعرف القاتل

تقرب مني مفزوع وفاتح عيونه مصدووم كال ...شنوو تعرفي لعد ليش ما تحجيين منووو احجي منو الي يتجرء يمد ايده علئ وحده ترجع لعائلة علي الدر...

غمضت عيوني بقهر واني اذكر الحادث حجيت اله عن كل الي صار وعنه شلون من دخل وشلون ضربني اني جنت احجي وهو اعصابه تشتد وقابض علئ ايده بتوتر ...

كال بهمه...لازم انسجل دعوه قضائيه ضده ونلقي القبض عليه ومن بعدها يصعد محكمه وياخذ جزاءه هالكلب السگط النعال المكطع

رمشت بعيوني...يعني شنو اروح وياك واسجل دعوه

ابتسم بوجهي واني نزلت وجهي خجلانه كال...لا يابه اني راح ارفع دعوه وانتي الج الصافي ست هدئ حرم لهيب المصون

باوعتله بعيون دامعه ورجاء حزين...اريد تاخذ حقي منه مهيب ترئ هذا شوفني المووت بعيوني

تنهد باسف...اكيد ام ديمه انتي اختي ومرة اخووي اذا ما خليت صريخه يوصل للداخلية فلا اطلع مهيب

ابتسمت بحزن...اني ما كلت للهيب عنه كلت اخاف يتهور وانوب ينسجن ويقتله كلت انت رجل قانون وتعرف بهل امور

رد عليه ببتسامه...عفيه عاشت ايدج خوش سويتي مدام صار بيدي اله اخلي يعرف ان الله حق والله اله اطلع حليب امه من خشمه ...

ضل يحجي ويايه وكذا وبعدها خله وراح واني حسيت مي بارد ونزل علئ اكتافي وتطمنت شويه وريحت ضميري

هو مشه بالإجراءات بدون علم لهيب طبعا وثاني يوم القو القبض عليه...

من سمع لهيب تخبل تخبببل شلون ما كتله وشلون وشلون انوب خله وراح زعلان ويتهدد لا انوب يتهدد علئ مهيب يكول هذا اخوي عار ما يكلي منو ضرب مرتي اليوم اطيح حظه...

يبووو بس لا يتعاركون...

...................

لهيب

من كالت هدئ ان الضربها هو السكران تخبلت رسمي منو الي ينطينياه والزمه اشرب من دمه واكله بسنوني

ركضت علئ الكنتور اخذت المسدس وردت اطلع واني ملهوف ومتحمس اشرب من دمه

لزمتني هدئ بتعب وهي تبجي...لهييب لهيب هو بالسجن اني كلت المهيب ومهيب سجنه

انصدمت وتلاشت الكلمات عندي يعني هيج مستغفليني ولا مهتمين الي ومرتي الي جانت بين الحياة والموت واني ما اعرف منو سوه بيها هيج تاليها يعرفون وضامين عليه

هزيت راسي بقهر وجاوبتها بوعيد...بسيطه هدئ بسيطه يصير خير

عفتها تبجي وخليت ورحت بس انقهرت عليها اعرف ما تريدني اتورط بس اني مقهور من هل كلب

رحت للمركز ودخلت واني بقمة عصبيتي حجيت ويه الشرطي وكتله اريد غرفة الضابط مهيب وصلني الها...

دخلت بعصبية هو جان يكتب من شافني باوعلي وعقد حاجب كال بعصبية مصطنعه...هاي شنو ؟ شنو هل مهزله انت منو سمح الك تدخل وينك ابو خليل تعال اشمره بالسجن

باوعتله باستهزاء وغضب...لا والله

رد عليه ببرود...وروح حبوبتي

دخلت وسديت الباب بكل قووه كتله...وانت ما صدكت ماتت حبوبتي حتئ تكعد تحلف بيها

رد عليه بعدم اهتمام ورجع يسجل...شنسوي هذا حالنا العراقيين منصدك نلكه واحد نحلف بي

ضحك كال...ليش هيج اقتحمت الغرفه

جاوبته بغضب...ليش ولك ما كتلي هل كو...هو الي ضرب هدئ

أنين ...

من ضربني عمر كرهته كره المووت .. وكرهت كل حياتي وروحي بعمري ممضرووبة هيج ابد

شكد احتاجيت بابا بهاللحظة احظنه وابجي واطلب منه يحميني وياخذلي حقي ..

اخذوني عمي وعمة بعدوني عنه وودوني لغرفة البنات
جان حلكي ومورم وكصتي معنجرة لأن طخت بتاج الجرباية

البنات بدل ميهدأن بيه ظلن يلومن بيه ، شدعوة لسانج شطوله وياه وصوتج عالي وصل لحد غرفتنا صوتج طالع اكو بنية محترمة مترباية هيج تصيح ع زوجها

اني سكتت عنهن وبس ابجي ووجهي كله يوجعني ..

فرشولي بالكاع تمددت ونمت وتغطيت بس بقيت كاعدة ودموعي على خدي تجري وكاتمة اوجاعي وصراخي بداخلي واحس بعذاب

سكتت ولا خابرت احمد ولا اخواتي ، قررت اتكتم على الموضوع وعمي وعمتي ينطوني محاضراتي زوجج وعادي ولازم تتحملين وشتكول عنج الناس توكم مصار سنة من متزوجين تنفصلون

اني مجبت طاري الانفصال ولا الزعل ولا نويت اشتكي عند اهلي بس هم يترجمون افكارهم عبالهم حروح اشتكي او اسوي شي اصلا اني جنت بس ملتزمة الصمت وبس

بقبت بغرفة البنات لمن هو يجي للبيت اتوارى عن انظاره وماريد اشووفه مجروحة منه ..

بس ماريد اتطلك خاف صدك الناس تحجي علينا واحنه شونه مجتمعنا ، خاف يكولون عرمات ومايسلكن ..

موج انخطبت وانفصلت وفرح تطلكت وانوب اني هم اكملها عليهن ...

قررت اسكت وحتى مرحت لاهلي واحمد خطية مشغول بس هو خابرني وسأل عني

حاولت اسيطر على نبرة صوتي لان جنت على طول ابجي ومخنوكة ..

ورى يوم من ضربه اليه اجه للغرفة ، اني جان عندي امتحان وجنت اقرا وجنت مبللة صفحات كتابي بدموعي

لان جنت ماكدر اركز ابد ... ومتأكدة راح ارسب وحتى ممداومة البارحة لان وجهي مشوه من الضرب

بس صديقتي كلتلي عدنا امتحان وكعدت احاول اقرأ .

دخل عليه وطلع اخواته من الغرفة واني عدلت كعدتي واباوعله بكره وحقد

هو يباوع بنظرات حزن وندم ، كرفص كدامي ، اخذ الكتاب وطبكه وخلاه على صفحة واخذ ايدي

سحبتها بسرعة منه .. وخزرته ..

كال انين اني احبج والله وانت كلش خوش بنية صح غلطتي وتجاوزتي عليه واني ردة فعلي جانت قاسية وندمان والله لتزعلين مني وخلي نبدي من جديد ..
ورجع لزم ايدي

سحبت ايدي منه بقووة وعصبية ..
كتله مو بهالسهوولة هاي اني مقصرت وياك بشي انته مو بس ضربتني انته خنتني ولا احترمتني ولا قدرت مشاعري وياك بالغرفة وتخابر صاحبتك اني اكرررهك امووت منك ع سويته بيه

يباوع مصدوم على كلامي وبعدها كال بتهكم
؏ ااالاساس چنتي تحبيني من قبل ، ترىٰ الگدامچ مو غشيم وادري بيج ماتحبيني والله يعلم شنوو عندج يمكن اكو احد بحياتج شمدريني بيج

باوعت عليه مصدومۃ گتلہ :- يلـہ خلصت العندك اتركني بحالي وروح يلـہ ..

كام على حيله كال والله اني بس لخاطر اخوج ساكت والا انتِ بزعت منج ولا تنطاقين ابد سهلة اني اعلمج اله اخليج تندمين على هاي سوالفج الطايح حظها ولازم اعرف شنوو عندج وليش هيج تتصرفين وياي تليفوونج وين ولج

گتلـہ بإنفعال :- بقىٰ بالغرفۃ روح اخذه ودور بي وهو حتىٰ بدون رمز اريد اعرف شنو راح تلـگىٰ بالـلـہ ..

خزرني وطلع .. واني ظليت اتأفأف ورجعت ابچي ، اخذت الكتاب أريد بس اقرأ ما گدرت ، طبگت الكتاب مرة لُخ وخليت راسي على ركبي وظليت ابچي ..

بعدها لازم اداوم حتى لو وجهي مشوهه بالضرب شسوي ؏ الاقل ادير بالي على مستقبلي .. وحتى لو يباوعولي او يسألوني مراح اهتم ..

الصبح طلعت من الغرفة غرفة البنات صار يومين بيها
واني لابسۃ ملابس المدرسة ..
شافني عمو خطية انطاني فلوس مصرف ..

وظل يطمني بكلامه ويمدح بأبنه يكول هو طيب وان شاءالله تنحل مشاكلكم بس شوية صبر وهيه مصارين البطن تتعارك وعادي ..

اني بس اهز براسي وساكتة ومدنكة ..

وكالي اتريكي اني جنت نفسي تلعب وما اشتهي اكل مدري شبيہ ، گتلـہ شبعانۃ عمو ما اشتهي ..

وطلعت للمدرسۃ ، فتحت باب الشقۃ ، سمعت صوت خطوات وراية عرفته أحمد ، لزمت قلبي بيدي شجاه اليوم ليش متأخر عن دوامه عزااا بس لايشوفني ..

نزلت الدرج بسررعة واسمع صوته ورايه يصيح عليه
انين انووونه اووكفي لج شبيييج ..

وكفت ودنكت وبقيت بمكاني هوو اجه يمي حضني ع درج العمارة وباس راسي ..
حبيبتي شوونج مقصر وياج اني هالايام ما ازورج سامحيني بس مشغوول شوية

اني بسرعة بجيت وغصب عني شهكت وبقيت مدنكة ..

وهو رفع راسي ويحجي بخووف وقلق
. انوو .. نونو شبييج ليش تبجين

هزيت راسي وخرت ايده وكتله واني احاول اشررد منه ..

وخرر مني عفية تأخرت اريد اداوم وعندي امتحان ..

هو جبرني اوكف ورفع راسي وظل يباوع بوجهي .. جان جوة عيوني زراك وشفتي مجروحة ويابس بيهه الدم

فتح عيونه بصدمة هااي منوووو مسووي بيج هيييج هااا منووو عمررر لوو منووو احجي

وركض سوة الدرج بايتين وظل يدك على باب الشقة

واني تبعته اجرجر بي واصيح : احمد عوفه احمد اريد ارووح للمدرسة فدوووة حباااااب عوووفه الله يخليك ..

عمو حسين فتح الباب لأحمد متفاجئ واحمد وكف بالباب يصيح وووينه عمر وينه منو سوى بأختي هييج منووو ..

طلع عمر منعس من الغرفة هو صار كم يوم كاعد ماكو شغل كاضيها نوم والعصر يطلع مدري وين يروح ويجي بالليل ..

وكف احمد كبال عمو وكاله بانفعال ليش هيج مسووين باختي شفتوها فقيرة ماتحجي استرجلتوا عليها اشفت عليها وضربتها

عمو كاله بس خلي افهمك موو هيج ياا ابني ..

اجه عمر يم احمد كاله فقيرة ؟؟ لسانها هالطووله ماضربتها بدون سبب اني اخذها ربيها ورجعها

احمد بغضب اني مخبل ارجعها الك ولك تتمرجل عليها وتضربها واسكت الك لا اليوم اطيح حظك والله

رفع ايده احمد وضرب عمر على وجهه ..

عمر انصدم ولزم وجهه وظل يصيح عليه انته ابيتي ودايس ابساطي وتضربني .. دفعه برة الشقة وتلازموا على الدرج

احمد جان حيل معصب .وعمو يفارغ بينهم وعمة والبنات يصرخن وفرح طلعت من الشقة على الصوووت واهل العمارة هماتين

احمد ضرب عمر ووكع من فوك درج العمارة وظل يصرخ من الالم ..

وكف احمد مصدوم واهله راحوا اله وعمة تدعي عليه وعلى احمد

اخذنا احمد اني وفرح وصعدنه للشقة وعمر اخذوا للمستشفى ..

ظل احمد يلوم بيه واني ابجي وفرح حاضنتني ..
ولج انتي من شوكت يضربج وساكتة هاا من شووكت والله الي سويته بي مايشفي غليلي هذا شمسوي بيج شمسسسوي .

اني بس ابجي ومخلية ايدي على حلكي دايخة ولعبانة نفسي حيييل وخايفة ....

كمت على جيلي كووة وداوكع وفرح واحمد سندوني ..
احجي وابجي .. عفية احمد هسه شحيصير بي عمر خاف يمووت تبتلي بي انته احنه منوو النا غييرك عفية ليش هيج صااار عفية ..

حظني وباسني على راسي ويهدي بيه ..

وراها اندكت الباب وراح احمد فتحها ونشوف الشرطة ووياهم حسين اخو عمر الكبير وهو يأشر على أحمد ..

احنه انصدمنا واني رحت اتوسل بحسين بس هو ولا سمعني وفرح تجرجر بأحمد ..

هو كال فوتوا وقفلوا الباب عليكم ولا تفتحوا لأي احد مفهووووم ..

واخذوا وراحوا واحنه كعدنا نبجي ، والجهال صافنين علينا .

فرح كالت وهيه تلطم على وجهه ولج ليش ضربج عمر ليش شسوويتي هاا شسويتي شصخمتي حسان وبالسجن اكول خاف تواصلتي ويا ولكفج

رمشت بعيوني والدموع المتجمعة بيهم كلها صارت خدي كتلها بذهول :- حسان بالسجن من شوكت وليش ؟؟

كالت هو يكعد طووول عمره متهوور وميحسب حساب لأفعاله ..

ابتسمت باستهزاء وتسأليني ليش عمر ضربني ؟ هو هذا حظي أني لو متزوجة حسان هم جان مرتاحيت ..

اجت كعدت يمي تمسح دموعها ودموعي ..
كالت لأ مو حظج انتي تسرعتي مو كتلج لتتسرعين ليش تسرعتي ؟؟

سألته ليش انسجن حسان ؟

دارت وجهه كالت متضارب ويه اوس وذاك مشتكي عليه وهماتين عليه دعاوي تجارة بالسلاح ..

وعمو الشيخ ليش ماطلعه هو مو محامي ..

ولج تجارة بالسلاح تهمة خطرة شتحجين انتي وبعدين هم ختصير جرة اذن اله وشويه يتأدب واكيد يسعى اله ويطلعه ميتخلى عنه ..

جرة اذن تأديب شنوو ؟ ترة هو مو جاهل كبير هو ..

صيحت عليه عووفينا من حسان شتحجين انتي خلينا بمصيبة اخوج خلي اروح اخابر عمي يلحكنا ..

...

فرح ....

رحت خابرت عمي ابو سالم وحجيت اله على الي صار بأحمد ...

رد ناركم تاكل حطبكم حيل بيكم من كتله اخوج الشفية لاتنطيها الهم يوولون مااخذ حجي وراح بعنادي انطاهه اله خل ياكلها هسه والله لو يتعفن بالسجن ماطلعه

كتله وانته عمو شدعواك ؟ واصلا انته شنوو وتطلعه محامي قاضي ولا منتك الناس الخيرة هواي ويطلعوونه

كال والله ماصيرلج جارة ولسانج اطول منج ...
وسداه بوجهي .. يوم الي يسدون كبرك عليك يا عمو يا خبيث لا والله صوجي انتي هو انته ابنك منوو سالم الحثالة ...

اني ردت اخابر علي بس تذكرت من ردنا نشرد وهو ذكر احمد بأفضاله ووكفاته ضجت وترددت ..

رحت خابرت خالو وخطية هو احتار .. وخابرت عمو ابو امال رجل عمتي وبلغتهم وبقينا كاعدين على نار متوقعناها منهم بيت عمو ابو حسين هيج يسوون بينه ..

وظلينه مانعرف حالة عمر شونها . وهيه انو كعدت تحجيلي شلون عمر خانها وضربها هم نفس حظي كعدت ابجي وياهه وهم انعادت الخيانة والله حرام يربي ليش هيج احنه وخواتي ممرتاحين والله تدمرنا ...

للعصر محتارين ولا لكمة بحلكنا وايدي متاخذ شغل شنو ذنبه احمد هيج يصير بي لا هو مرتاح ولا احنه مرتاحين

خو انين منتهية وهم بس لا حامل بس تتقيء وتخربطت عليه وتبجي ومنهارة وفاقدة وتحمل نفسها الذنب ...

تكول كله مني اني والله مردت اكول واحجي شافني صدفة هو لمن جنت اريد اروح للمدرسة ..

كوة كدرت اقنعها تنام وترتاح ..

قريب العصر اندكت الباب واني خايفة شون افتحها خاف هجموا علينا عزااا ..

رحت وكفت وصحت منوووو ..

سمعت صوت انه فتحي ام جاسم ..

عزااا شجابك !!

فتحي ولج

هو اني اكدر ماافتح ، فتحت الباب بسرعة واشوف علي الدر واكف بكل ثقة وعلى يمنته مهيب واكف مبتسم وعلى يسرته لهيب مدنك على تليفونه ويطكطك بي ..

جفلت منهم جنهم دنك تلاثتهم واكفين وسادين فتحة الباب وكلشي ماشوف وراهم بقيت صافنة وجافلة ..

علي كال راح نبقى واكفين بالباب لو ندخل ..

سويتلهم مجال وانه متوترة ومرتبكة هاا لالا تفضلوا تفضلوا ..

ودخلوا جوى ..

رحت للمطبخ اجه وراي كال شنوو صار ؟

ظليت ا احجيله على الي صار ويه احمد بتوتر ودموعي تجري ..

وهو عاتبني ليش مكتله هو وليش سمع من خالي ..

دنكت وكتله مادري ...

تقرب مني: شنوو ما اجيت على بالج انه فرح ؟؟

رفعت راسي وبلعت ريك وعيوني بعيونه
: لا شلوون ماجيت على بالي .. بس مردت اتعبك ..

تنهد .. كال انه رايح للمركز الموقوف بي احمد وراح يبقى لهيب يمكم خاف كل شي يصير مو أمان تبقون وحدكم ..

كتله بقهر مشكور ماتقصر راح اتعبك اني والله ..

خله ايده على حلكي كال اششش لاتكولين هيج وراح
اخذ مهيب وطلع بقى بس لهيب يمنه ..

رحت يم انين جانت فاتحة عيونها وخايفة كلش
كالت شنو منوو اجه شنوو صار ها ؟

وخرت شعرها من على وجهه .. وبستها على راسها
كتلها لتخافين ماكو شي عمري ، اجه علي وولده وان شاءالله راح يحلون المشكلة ..

ورى ساعتين ... رجع علي وحده بدون مهيب
.. وكال حضري نفسج انتي واختج والجهال ويله على بغداد ..

رحت وكفت يمه بلهفة وتوسل : واحمد اخوويه علي شحيصير بي ؟؟

رد ... بعد تنهيدة .. ماقبلوا يتنازلون عن الدعوة ابنهم حالته خطرة شووية وممعروفة راح تستقر او لا وانه خايف عليج ماكدر ابقيج هنا .. ومهيب راح يبقى يم احمد يتابع حالته

ظليت ابجي وهو كال يله عجلي .. ركضت كعدت انين وجمعت اغراضنه شلون مجان وطلعت وهيه حالتها حالة ..

لهيب اخذ الجهال واني علي سندنا انين ..
سألها علي .. تردين نوديج لمستشفى ؟

هيه هزت راسها بقهر وباوعتلي ورجعت باوعتله
.. لا عمو اني هسه اصير زينة

كللها ماعندج غير العافية .. واخذنا وانطلقنا لبغداد ..

وانين طول الطريق متخربطة خطية وصلنا لبغداد ، لهيب اخذ الجهال وعلي ودانه للمستشفى سوو تحاليل لأنو وطلعت حامل خطية ..

كتبولها علاج وطلعنا .. ودانه للبيت الي بناه الي ، لمن دخلت جان نظيف حيل ومأثث ومرتب ، استغربت
هو ممسكون شلون هيج نظيف ومابي ذرة تراب!!!

ارتاحينا بي وانين من التعب نامت ، حتى مافرحانة بحملها ابد مقهورة حيل والقهر ماخذ كل ملامحها ..

نامت بغرفة جانت مخصصة للجهال بيها سريرين .. ابو نفر هيه نامت عليه ..

واني بقيت كاعدة .. لليل واني كاعدة ، خابرت علي عمود الجهال كال لتخافين عليهم بالقصر .. يمهم هدى وام حسام ارتاحي انتي اكيد تعبانة هسه ..

تمددت على القنفة وغفيت .. حسيت على حركات اصابعه بشعري .. جفلت وكعدت اباوع عليه ..

هو بسرعة اخذني لحظنه واحتظنني وباسني بشفايفي ..

دفعته بقووة .. كتله شجاااك ماتعرف الحرام انته مو مطلكني ...

قرب وجهه عليه مبتسم كال وانت مصدكة انه مطلكج ...!!!!

موج ...

خليت ايدي على بطني أصرخ ومنهارة .. على امومتي المفقودة .. وطفلي االي انقتل بداخل رحمي بدون ذنب ..

وبعدها شكل عندي نزف ، رحمي مفتوح والنزف غركني ، اخذوني لصالة وسوولي عملية وطلعوني منهارة ..

بعد مافتحني البنج وكفت زميليتي يم راسي تريد تخابر على احد يجي الي للمستشفى

ماريد شرار بعد ماااريده ومستحيل ارجع اله واني موو بأمان عنده بعد ولا عمري جنت بأمان ويااه ..

كتلها بتعب وارجف .. تعرفين زياد ؟؟

كالت لا مااعرفه ..

تعرفين شيرين طالبة اردنية هيج مواصفاتها ..

هزت راسها منوو هذول وشيصيرون منج ..

بس دبريلياهم فدوة اريد ارجع للعراق ..

انت شون تأمنين نفسج على اشخاص متعرفيهم ؟؟

اني خسرت كل شي كللل شي بعد ماا اخااف من شي ابد

هيه من واحد لواحد ودبرتلي ارقامهم .. حاجيت زياد
واني ارجف ... زياد انته موو كلت تساعدني ؟ فدوة محتاجتك ..

كال شصاير بيج شبيج انتي وين كولي اطلب الشرطة ..؟؟

اني بالمستشفى عفية اريد ارجع للعراق تكدر ترجعني ؟

بس ماعندي جواز جوازي اخذه ؟

رد اي اي اكدر اطلعلج جواز مرور من السفارة وهسه جايج اني ..

غلق المكالمة ، بقيت اني بالمستشفى .. وتليفوني سديته ماريد شرار يعرف اني وين ولا اريده يعرف عني شي ..

اجاني زياد للمستشفى ، ودفع الفلوس مال فاتورة المستشفى

واخذوني هو وشيرين وزميلتي حنان اسمها عراقية ومأجرين شقة وكاعدين

وزياد اخذ بطاقتي ووعدني يطلعلي جواز ، وبقى شيرين يمي لان هو يثق بيها ..

بقيت بشقتهم غالقة تليفوني وحتى اهلي ماخبرتهم .. كلت بس اطلع من موسكو اخابرهم يجوني للمطار ..

مكدرت حتى انام وهواس سيطر عليه ، مرة اتهم شرار هو قتل ابني لان مجان رايدة يجي للدنيا هسه ..

ومرة اتهم نيفرا قتلت ابني وحرمتني امومتي حتى تنقذ زواجها وابنها وتنتقم مني لأن خدعتها واني بنص بيتها ..

غفيت واحلم بشرار كاعد يمي على السرير ويباوعلي وعيونه حمرة

كعدت على صوت صياح بالشقة ، صوت شرار اكدر اميزه من بين الف واحد ..

بس ماعرف الي اني بي حلم لو حقيقة ...

للحكاية بقية ....

اسفة ماكدرت اكمله كله وصار حيل طويل وبعد بي احداث رغم من البارحة اكتب بي والله .... 😢