هذيانٌ بين جمرٍ وجليد ..(ارملة اخي المجنونة)

موج ...💔...شرار//67

السلام عليكم
هذيان بين جمر وجليد ..
نورا ناصر

موج ...

- يالمامقيمني عدل يالمامثمن افعالي
تدري شكبرها مگابلك وادري الفراگ احلالي !

انتبهت عليه خفت منها ، فعلا اني خفت ، صح اشهر وياهم بس ابقى غريبة وبغربة والوضع الي هيه بي أول مرة اشوفها هيجي

خلت اديها كبالي تهدأني مدري تهدأ نفسها .. وراحت كعدت على القنفة تبجي واديها على وجهه وعيونها وتشهك ..

رحت كعدت يمها يائسة اني وكارهة نفسي ، داحس خدعناهه وهالمسرحية ملازم تستمر انعل ابو الحب لا ابو الزواج ....

خلت راسها على كتفي وظلت تحجيلي عن ابنها وشون تعذب من جانت علاقتهم هيه وشرار متوترة

الى ان شرار صلح علاقتهم لخاطر ابنه لان متعلق بيهم اثنينهم ومايريدهم ينفصلون

وظلت تحجيلي ليش انتكس هسه ..
كالت صار ينزف من خشمه ووكع ..

وقبلها يكول الها بابا راح يتركج عمود البنية السمراء .. وراح يتركني

خليت ايدي على قلبي واحسه حيووكف متت من القهر معناهه سبب انتكاسته لان شافنا هذاك اليوم

وديتها لغرفتها وساعدتها تنام ، ظلت تتشكر مني .. ورحت للغرفة اتصلت على شرار جاوبني بسرعة

كال انتي وين واني اتصل عليج ؟
جاوبته جنت نايمة شلوونه حمودي
_ كل هذا نوم لخاطر الله ..

_ ليش شتريد مني ؟
- ولج بالي يمج شريد مثلا ، نيفرا يمج ؟؟

هاا اي موجودة وهسه راحت نامت ..

خو ما شربت؟

احتاريت شنوو اجاوبه خاف اكوله جانت دتشرب انوب يجي يتعارك وياهه ..

كتله ما ادري بس جانت تعبانة حيل وتبجي ، حمودي شبي ؟؟

رد ... انتكس صار ينزف من خشمه والدكتور مالته كال خلي يبقى بالمستشفى هاي الفترة .. واحتمال يحتاج جولة ثانية من العلاج الكيمياوي

ظليت ادعيله يصير زين ..

شرار خاف محمد انتكس بسببي لمن شافنا سوى قبل كم يوم

لالاء معليج لتكولين هيج اش ..

لتسكتني ولتكول اشش شبيك الطفل كايل لأمه بابا حيتركنا عمود بنية سمرا معناهه اني ونيفرا ذكية وتفتهم بس مماعرف شنو الي مسكتها واكيد تعرف بعلاقتنا

اني بعد ابد ماتحمل ابد ولازم ارجع للعراق وجودي بينكم غلط

عاط اشش سكتي شكد تحجين طفل هو شفهمه

لاء يفتهم وكبير مو كتلي انته عمره ٨ سنوات بس ممبين عليه بسبب المرض كولشي يفتهم وامه اكيد هماتين تعلمه

مووج دخيلج رووحي طافرة ضيم الدنيا على راسي لا تصيرين انتي همين وياهه روحه للعراق مااكو مفهوم ....

شنوو سجن خماا سجن شرار اني ممرتاحة هنااا دخيلك ترة دااختنك والله مخنووكة اريد ارجع بعد ما ااتحمل ابد .....

بعصبية رد .. اگُلج وكتج هسه انتي؟؟ مدتشووفين الي اني بي ؟ ماتحسين ؟ ولج مووصوجج صوجي اني اخابرج واسألج عليج وبالي مشغول بيج وابني بين الحياة والموت وانت تنكدين عليه ولي يللله ..

سد المكالمة بوجهي ، تأفأفت ، احس روحي تايهة احس نفسي بدوامة من ظلام محاوطني ..
غفيت ودمعتي على خدودي والقهر تارس روحي ..

كعدت على صوت بللغرفة وخرت الغطى واشوفه شرار جاي يدور بالجرارات والكنتور ومدري شيخبص

كعدت اباوعله ثواني هو منطيني ظهره ويدور بالميز ..
تمططت والنومة بعدهه بعيوني .. كتله هاي شكووو شرار شعندك وعلى شنو جاي تدور ؟

التفت عليه بسرعة وكال وين جوازج كومي طلعي يله بسرعة ..

نزلت من السرير وكفت مقابيله وكتله شنوو تريد من عنده ؟؟

رد .. كتلج طلعي ومالج شغل ..

وكفت اباوعله باستغراب .. شنوو ما الك ثقة بيه انته ؟؟عبالك انهزم منك لوو شنووو

كال بعصبية طللللعي يلله لا اطلع رووحج ..

فتحت عيوني مصدوومة منه .. كتله واني رافعة اصبع السبابة بووجهه . شبييك تخبلت لا تعاملني هيييج ترة طكت رووحي منك ..

دفعني على السرير وراح ينبش ويدور .. سحب جنطتي من الكنتور وفرغ كولشي بيها على الكاع ووكع منها الجواز ومستمسكاتي اخذ الجواز وديطلع من الغرفة ..

رحت لزمته من ظهره كمشت طرف قميصه وسحبته بعصبية

هو التاف عليه عيونه حمررة من الغضب .. حتى اني خفت وتراجعت ...

خزرني .. كال لتلحييين!! مووج لا لتخليني أذيج هسه ..

صكيت اسناني ، وتصلبت بوكفتي
كتله مدااا اتحمللللك ..

تنهد ونكت اديه كال لازم تتحملين انت مرتي لعد منو يتحملني غيرج منوو يوكف ويايه بهالظرووف الصعبة ..

نيفرا موجودة وهيه امه لأبنك اني وجودي يزيد المشاكل وبس ماله قيمة وجودي ابد

تقرب مني بخطوات واسعة .كال بنبرة توسل
.... اني اريدج انتي انتي مااكدر على بعدج ، شبيج اني زوجج قابل خاطفج اني ؟؟

احتظني وخله حنجه على ككتفي واني اديه معلكة بالهوا ثواني وبعدهه حظنته وامرر ايدي على ظهره ..
اني احبه بس داتعب ويا واحس وجودي هنانه بس للمشاكل

بعدته عني ، خليت اديه على وجهه واحتظنته وامرر اصتبعي على لحيته . احاجي بنبرة اقرب للرجاء .
شرار اني اريد ارجع للعراق فدوة ..

هز راسه برفض ..

خليت عيوني بعيونه بقووة .. وثبته باديه
بس اسمعني عفية اني ارجع للعراق ابقى يم اهلك والله ارجع للقصر ولغرفتنا انتظرك عادي شوكت متتحسن ظروفك بس هنا مدااكدر اعيش بهالوضع عفية ..

هز راسه كال بتعب ... تؤ تؤؤ واخذ اديه بوسهم .. اروحلج فدوة لتكولين هيج بعد لتكوولين ماكدر على بعدج والله امووت ولج ترضين امووت

هزيت راسي برفض لاء لاء اسم الله لتكوول هيج شجاااك .

لعد ابقي واوعدج هاي الظروف كلها راح تمر .. مووج صدكيني تعبان اني تعبااان مدتشوفيني شحالي ، فووك تعبي انتي هميين ؟

والله احبج ورووح امي اعشكككج ، الظروف هاي اني مجبوور عليها مجبوور واريدج وياي ، اريدج سند الي لا تتركيني

والله مااتركك والنبي اني همين احبك ، ماحبيت غيرك ابد انت اول حب بحياتي .. بس احس وجودي غلط هنا ودانخدع نيفرا ميصير هيه هماتين بشر من دم ولحم حرام الي دنسوي بيها

غمض عيونه وتنهد بتعب وحسررة ..
كال اعرف اعرفج اني انتي متحبين تأذين احد اعرفج طيبة گلب ولهذا السبب اني احبج اعشكج احب روحج واحب كلشي بيج
لا تتخلين عني بهالظروف موج ووجودج قووة بالنسبة الي

هزيت راسي بموافقة ....اووكي اني باقية بس الي يحب يثق موو رجعلي جوازي شرار ميصير تاخذه مني وين الثقة ..

ظل يباوع للجواز ويضرب بي على ايده ..
كال عندي وياج تجربة مرة ماريدها تتكرر موج بقي عندي احسن ...

بقيت اباوعله بعدم رضى .. هو باسني بخدي وابتسملي بتعب وراح ..

واني بدلت ملابسي وداومت بس جانت الدنيا طالعة من عيني .. وميتة قهر ..

مرت ايام واني على هذا الحال تعبانة حيل ومالي خلك وكله وحيدة .. بس اشوف زياد عينه عليه من بعيد ...

مااعرف شنو سر نظراته شفقة فضوول ماعرف بس بقى بعيد عني بس نظراته البعيدة محاوطتني ..

وبيوم اجت يمي بنية طالبة اردنية او فلسطينية ماعرفت لهجتها اول شي .. اسمها شيرين كعدت يمي وكلتلي .. زياد يقول اذا بدك إشي مساعدة بس احكي هو بيساعدك على طول عندو اقارب بالقنصلية العراقية وابو مسؤؤل حكومي انت بس احكي هو بيتصرف

باوعت لبعيد شفته يباوع عليه وبعدها يرجع يباوع لصديقه ..

معقولة هيج فاضحني التعب الي بملامحي ومبين عليه محتاجة مساعدة!!

بس اني مسجوونة شلوون؟؟؟ سجينة حب اني ومداكدر افك وثاقي منه ..

كتلهة شكرا كوليله ماتقصر ..

مرت الايام تحسنت حالة محمد .. بس زادت حالتي سوء .. جان شرار ملتهي وياه وممنتبه عليه .

سوو حفلة وجانت المناسبة عيد زواجهم حجزوا مطعم .. وعزموا اصدقائهم واهلها واني غريبة ابينهم جنت ...

وهيه لازمته وتبوس بي وابنهم بينهم يلزم اديهم ويخلي ايد امه على ايد شرار ..

اباوع الهم عائلة سعيدة بالظاهر شدخلني بينهم اني!!

ليش دمرت حياتي .. وحياتهم ؟

جانت نظراته عليه نظرات أسى .. ماارضى بأساك اني ولا بفتاتك شرار .. مااقبل بالفتات منك

جنت ابتسم اله ابتسامة قهر .. وادير وجهي هو يحس بيه وياريته مايحس احساسه بيه يجرح كبريائي ..

احس بغربة قاتلة وجعها مثل نصل وبنص رووحي ..

ماتحمل احس ضااك الكون بيه واحس كاعدة بكبر ..

جنت اقاوم مثل مايقاوم الفقراء الجووع ..

خليت الكل ملتهي وديقطعون الكيكة .. غافلتهم و طلعت من المطعم وجانت الدنيا ليل

البرد يكص كص احس اتنفس برد وترجف اعضائي وتتجمد .. رووسيا بعد وماادراك مابرد رووسيا ..

يمكن الدرجتين تحت الصفر جانت .. مشيت هووايه
ومااحس بس بالوجع متملكني كلي ..

وكفت يم كوفي دخلت بي وكعدت ومقابيلي جام يطل
؏ ﭑلشارع اباوع للرايح والجاي وحتى مارحت طلبت شي

تقدمت الي كهوة ساخنة باوعت للنادلة واشرتلي على طاولة جان كاعد عليها زياد ووياه ولد هم شكله عراقي ..

بقيت اباوع عليه بشروود وهو رفع ايده الي بابتسامة ...

ماتجاوبت ويا ولا بديت اي رد فعل ، درت وجهي ع الجام وبقيت اباوع وشاردة

واديه الباردة محاوطة كوب الكهوة الساخن والتمس من الدفئ واتدفى بيها

اجه زياد وبنفس الجرأة الي اول مرة كعد بيها يمي بالجامعة وهم سحب الكرسي وكعد ..

وكال ممكن تكليلي شبيج ؟

باوعتله بعدم رضى ...

كال شنوو ناقصج؟

عكدت حواجبي وبتساؤل كتله نعم ؟

جاوب ... يعني الي اعرفه شرار متزوج روسية وعنده طفل مريض صح لو اني غلطان

اباو؏ اله بإنصات اي وكمل بالله ..

اي وفد واحد مغرووور وشايف نفسه

مااسمح الك الي دتحجي عنه زووجي هذا

زوجج سبب بؤسج وحزنج ؟؟ لمن شفتج اول مرة جنتي كلش حلوة هسه دتذبلين ..

انت مالك شغل لاتتدخل شكد وووقح ..

كمت وكفت ومن الدووخة اجيت دااوكع واظلمت الدنيا بعيني ..

هو لزمني واني ادفع بي بقوة منهكة وكعدني على الكرسي انجبرت اكعد لان كولش دايخة جنت ..

خليت وجهي على الطاولة واديه على راسي ، غمضت عيوني وشكد وكعت دموع مني وهم كاعدين يمي يحجون وياي

انجبرت اشرب الكهوة لان مماكلة شي ولا شاربة واريد بس ارجع للشقة واعرف حتقووم القيامة على راسي وشرار حيجيب اخرتي لان طلعت بدون ما اكوله

طلعت من الكوفي وزياد ورايه .. موج اوصلج ؟

باوعتله واني الف اديه على جسمي بررد حيل واني لابسة بس فستان صوف لحد الركبة وجينز .. البالطو مالتي بقى بالمطعم

جاوبته واني ارجف .. اني اروح

كال اوكي راح اطلبلج تكسي لعد متروحين هيج انت اكيد راح توكعين حالتج ابد متسمح ترحين مشي والمسافة طويلة

كتله معليك بيه .. والتافيت داروح انصدمت بعمود ولزمت بي وتسرسحت كعدت على الرصيف وأني أبجي ..

اجه وكرفص كدامي .. واني ايدي على وجهي .. واتنفس سريع واحس محتاجة اتقيء نفسي لعبانة .

كال زياد بررد تردين الكووت مالتي ؟ هيج راح تتمرضين؟ انت شون تطلعين هيجي من البيت بدون متلبسين قمصلة او كوت ..

شكد حشري وشكد يتدخل هسه انته شعليك بيه .. ظل يلح اطلبلج تكسي ؟

هزيت راسي بقوة وبرفض لاء عندي فوبيا

هو كام على حيله كال اي حقج ضعاف النفوس بكل مكان ...

باوعتله بخووف وماكدر اسيطر على رجفة جسمي من البرد وحاظنة نفسي باديه

شفته نزع الكوت مالته ومده الي ، اخذته بتردد وخليته على جسمي كتله باجر ارجعه الك ..

وكف كبالي مراح تغيرين رأيج ؟ وتخلينا نوصلج ؟

هزيت راسي برفض .. العمارة قريبة هنا وهذا الكوفي دائما نجي بي اني وشرار واندل ارجع

ورجعت مشي للعمارة .. ودموعي شكد حارة احسها تتجمد على خدي

شكلت الدكم مالة الكوت وخليت الكبوس على راسي وهو بي فروو وجبير غصت بي اني ..

وكفت كبال المصعد انفتحت الباب مالته وطلع منه شرار عيونه براسه ومعصب ونظراته يريد ياكلني بيها

تصنمت بمكاني خفت كولش طلع هو من المصعد واجاني لزمني من زنودي ويهز بيه شسووويتي بيه ؟ ووولج ووين وين جنتي وووين ؟؟

دخت مرة ثانية ماسيطرت على نفسي منا تعبااانة ودايخة وهمين خفت ذبت بايده وهو سندني

فوتني للمصعد لازمني قووي حتى لا اوگع .. ويهز بيه ويستجوبني ويسأل بيه واني بس عيووني مفتووحة
جسمي متصلب ..

خله ايده على كصتي ويباوع بعيوني وووين رحتي شبيج ولج شاربة انتي رحتي شربتي ؟؟ وووين ووليتي وووين ؟؟

ظليت اهززز راسي برفض واريد بس اشهنگ واحجي مدا ﭑگدر .....

وكف المصعد بالطابق الي بي الشقة ، طلعني لازم ايدي قووي ويسحب بيه ..

اجااه اتصال جاوبه بسرعة وسداه الظاهر نيفرا تسأله عني ..

فوتني للشقة ، اني شووية صارت عندي قوة خوفي انطاني القوة للدفاع عن نفسي ..

ركضت للغرفة ودااسد الباب بووجهه ، دفعه بقووة
واجه باتجاهي معصب وبتهديد يحاجيني ...
_ ديري بالج تسدين الباب بوجهي مرة ثانية اذا صار وسويتيها اكسر راسج والله

صيحت عليه اااااﭑطلع شرار اطللع ماريد اشووفك وﭑسفۃ خررربت عليك حفلة عيد زواجك ااااﭑسفۃ

فتح عيوونه يباوع ؏ البالطو واجه قرب مني يتلمس بي ويعت بالكبوس مالته مصدووووم

كال بخفوت وذهوول هذااا مال منووووو؟

ابتعدت عنه خطوات ورحت كعدت ع السرير ..

اجه رفعني ولازمني بقوة طخيت بجسمه وهوضاغط على أسنانه بعصبية وعيونه مشتعلة بنار غيرته ..

وظل يهز بيه احجي مال منو هذا ؟

باوعت لعيونه بخوف وتمتمت مالة زميلي شفته صدفة وانطاه الي والله ...

كال بسرعة منووو هذا زميلچ؟؟

سكتت .. ظل يحركني بقوووة اكثرررر ولج داااكلج منووو احجيي منووو ؟

بارتعاشة شفايفي جاووبته :- ز ز زياد ..

رخَ قبضة اديه من عليه ويباوع عليه بغضب وبضحكة عصبية گال :- شنوو چنتي متواعدة وياه ؟

عضيت شفتي وفتخت عيوني على أوسعها ورفعت ايدي دا اصفگه رااشدي

لزم ايدي قوي ولواهه ودفعني على الگااا؏ ...

افترت بيه الدنيه واسمعه يكسر كولشي من ورايه ..
ويسب ويغلط ويلعن

خليت ايدي على حلگي وگمت أزحف گوة عليه وركضت للحمام وصرت اتقيء

وهو وراكف على راسي يدردم ..

خلصت وغسلت وجهي وكفت اباوع عليه واتنفس بلهاث ولازمة بطني صارت تووجعني .. وسانده نفسي بالمغسلة ..

كال شبيج سكرتي واجيتي ليش دتتقيئيين ؟ ولج احجي ..

اجه قربني منه ويتفحصني .. حاجيته بتعب وانفاسي سريعة : ليش ؟ بس الي يشرب يتقيء دكتور شرار ؟ لو يمكن يكون شي ثاني ؟

صفن بوجهي وكال بشرود شتقصدين ؟

صرت كوه واكفة ؏ رجليه ، قوست رجليه ودنكت راسي دا اوگع .. لزمني من خصري واخذني للغرفة شايلني

خلاني ؏ سرير مددني ، وفجأة صرخ بوجهي
نزعي هذا نززززعي ...
يقصد البالطو

من الخوف منه ، نبرة صوته جانت فعلا قاسية نزعته بسرعة وهو اخذه وشمره ع الگع ....

اجه يمي وكعد .. باوعلي بقلق كال شبيج ماخذة برد ؟؟ اكيد لان طلعتي من المطعم بطرك روحج لا البالطو لا جنطتج لا تليفونج وصخامج شبيج طلعتي تدرعمين هاا شبييج ؟

انت كلش زين تعرفين هذا الحفل بس عمود نفسيۃ حمودي تتحسن

التفتت عليه ... شرار اني يمكن حامل !

عكد حواجبه ثواني ..

واني جنت متمددة كعدت كتله بانفعال وممسيطرة على رجفة جسمي :- شبيك ضجت ؟ ها .. انت مو كل ذيج الاشهر ماخذ احتياطاتك واخر فترة تخبلت

بعدني ممكملة لزمني ومددني ومدد يمي وهو يكلي اشش اسكتي ... منو كال ضايج أني

مبين عليك ترة اني هم عندي احساس

اعرف افتهم باجر اخذج سوي تحاليل ونتأكد ..

ولزم ايدي الي رفعتها بوجهه .. لزمها قووي
كال بعد اذا مديتيها عليه اكسرهه الج لاتسترجلين الزمي حدودج

انت جبرتني شنوو متواعدة متعرفني انته اني شفته صدفة .. خله ايده على حلگي .. مخلاني أكمل ..

امتدت ايده خلاهه على بطني .. حكيت راسي بصدره
كتله وين راح اجيبه ؟

رد .. هنا حتى تاخذين الجنسية ...

جاوبته ماريدها اريد اجيبه ابغداد يم أهلي وأخواتي واخويه ..واصلا اني ماريد ابقى هنا ابد اذا مااموت من ضيمك امووت من البرد شهالبرد هذا يموت يكص كص

كال وهو يسحبني عليه ويحضني بقووة
انجبي اني ابووه واريده يصير هنانه يمي..

طخيته على صدره بقبضة ايدي على صدره
كتله لتكوول انجبي واذا تريده تجي لبغداد

لزم ايدي الي ضربته بيها .. كال طبعا اريده شون ماريده موو ابني وبعدين اكولج انجبي لأن متعرفين تحجين تخيطين وتخربطين ..

كتله انت والله مبين ضايج ومتريده مبينه من حسرتك هاي وعكدة حواجبك ..

قرب حلكه يم إذني وكال ا ن چ ب ي من اكولج انجبي يعني تنجبين ......

اني صح ماريده هسه يجي بهالظروف هاي وانتي متوترة على طول ومخبلة حرفيا

بس والله اريد منج طفل لأن احبج هواي وادعي الله يطلع صاحي

لان تعذبت بمحمد هاي سنوات اني اعالج بي وكل مرة ينتكس تعذب كلش هالطفل واني هم تعذبت وياه

غمضت عيوني بحزن واسمع كلامه .. كمت كعدت كتله صدك روح جيبهم خطية لهسه كاعدين بالمطعم !

سحبني من ايدي ونزلني على الفراش .. كال حمودي حيروح ويه بيبيته ونيفرا تجي ويه صديقاتها

مملاحظ هالفترة ابنك كله يم بيبيته .. مرتك مدتخلي هنا ابد ..

سكت واني كملت كلامي ... الظاهر تخاف ليشوفنا بوضع نفس ذيج المرة وينتكس نيفرا خايفة عليه مني وحتى لمن تشوفني يمه تاخذه

ذاك اليوم ديشوفني رسوماته اجت اخذته وكالت موعد الدواء

لتخلين ببالج ولا كلشي تظلين تفكرين وتحسبيله حساب ..

شرار مرتك تخوف ، هادئة زيادة عن اللزوم باردة ابرد من برد مووسكو والله تخوفني احسها تعرف بينه علاقة بس مدري شنو الي مسكتها وجودي خطر ع ابنها ورغم هذا ماتخذت اي اجراء

احسها الهدوء االي يسبق العاصفة ماعرف شنو الي ضامتلي!!

كال تتصرف هيج لان تعرف علاقتنا اني وياهه منتهية لاتخلين ابالج ولتخافين ..

كلامه طمأني شوية .. نمت .. وبعدها حجز لي عند دكتورة .. وراها رحنه سويت تحاليل وطلعت حامل فعلا وكتبت الي مقويات وعلاجات ..

وبيوم فتت للغرفة شفت نيفرا بغرفتي ولازمة علبة الفولك اسيد .. بيدها

ولمن شافتني بقت لازمتها وكالت انتِ حامل اذاً ؟

اخذتها من ايدها وخليتها على الميز .. واني اباوع لعيونها بتحدي ..

رفعت تك حاجب وهزت راسها وطلعت ..

كعدت على االسرير .. شوكت يخلص الدوام وانقلع منا والله ما ابقى دقيقة حمووت والله ما اتحمل بعد هاي نيفرا تخووفني والله ممرتاحة الها ..

مرة دخت يم باب الحمام ووكعت ، جانت تجيني آلام ابطني ويوكع عليه دم .. وجنت حاجزة عند الطبيبة بس بعده الموعد

وكعت وبين الوعي واللاوعي حسيت بنيفرا تحقني بس مجنت متأكدة جنت دايخة حييل ...

ومن كعدت شفتها كاعدة يم السرير على كرسي وتدخن

رعبني شكلها حييل .. متت من الخووف ، كعدت واحاول اتذكر شنوو صار ..

طفت الجكارة وكالت اهتميت بيج ..
وكملت بالروسية .. يبدو انكِ تعانين من حمل متعب ..

ابتسمت وطلعت ..

وراها صرت احسن الالم يروح ويجي والنزيف انقطع ..

داومت بالكلية بس هناك حيل تأذيت زاد النزف والم ابطني وظهري زاد بشكل ماينطاق ولا ينحمل ابد ..

مقصرن زميلاتي البنات اخذوني للحمام واهتموا بس اني ماكدرت اتحمل اكثر نقاوني للمستشفى ..

اخذوني وهناك بعد الفحص والتحاليل .. الطبيب كلي ..
للاسف العقاقير المستخدمة للمساعدة على الاجهاض قووووية جدا ...

وهي بذلك تهدد امومتكِ برمتها ومن الصعب عليكِ الحصول على طفل مرة أخرى ..

انصدمت وانهاريت و صررخت واني حاظنة بطني الي بيها طفلي الي ماعرف عدل لو ميت ...

لاااا مستحيل اني مااخذت شي حتى اجهض ابني جنت اريد احتفظ بطفلي مستحيل اقتلللله مستتتتحييييللللل ..

يتبع ...

اعتذر ع تأخير 😁تحملتوني اشهر تحملوني ايام ..

احبكم 😘