///شموخ ///
بقلمي ...رونق السلطاني
✨✨✨✨✨✨✨✨
ما همّني ما قـد يُقـالُ لمسمَعـي
أحببتُ كفّي أن يُلامسَ كفّه
فيكونُ حَظي أن تُحسّ أصَابعي
قَال وقال وما وعيتُ لقـولِه
أُصغي لبـوح ِأنامـلٍ تَحكي معي
الحمدلله على عام مضى من عمرنا ونحن بصحه وعافيه
الحمدلله على كرمة وفضله وافضل النعم هي الستر يارب
استرنا بسترك الجميل بدنيا والاخره
سنة سعيده عالجميع ان شاءالله
راسي عالحايط وكلبي ينبض بقوه مغمضه عيوني وادعي
بكلبي يارب يطلع منها بسلامه ما اتحمل يصيبه شي موزين اموت بدونه
شربت مي كتلها... يمه وين تلفونج بس اخابر شروق
صاحت بوجهي .... احجي عليش هيج صاير بيج عجل امين
وين وله راح اموت ناقصه عمر من وراكم ومن ورا مصايبكم
- يمه عفيه ماكو شي بس انطيني تلفونج
طلعت التلفون كطته عليا وكامت اخذت عموري وطلعت
بالحديقه وعايشه راح وراها
دكيت على شروق وكلبي يدك الف ويه كل دكه ...
الووو وين قدوري اي شكالج امانة الله لضمين عليا ما بيه حيل اتحمل بعد
تلفون امي عندي انتظر منج خبر سديت التلفون
وكلبي نارر ما عدها خبر بس ماخذي للمستشفى
دخت حيل مددت ودموعي تصب يا ربي منو يطمني كمت
من مكاني افتر بالبيت الوب طلعت برا رجعت طبيت صعدت فوك
كعدت ايدي على راسي ما اعرف شسوي اخاف اتصل بعمه
عاليه خاف ينهبطون يمكن ماعدهم خبر
حدرت جوى غسلت وجهي صار الليل واي خبر ماكو
طلعت برا بالحديقه ادحك للسما وابجي يارب احفظه
من شر لأمه وخواته ماعدهم غير يارب اجبر بخاطري
واجمعني بالحلال
سمعت صوت سياره وكفت يم بابنا كمت ركض طبيت جوى
غسلت وجهي واكفه ارشك مي على وجهي وادحك بالمرايه
مبينه باجيه وجهي ورام وخشمي منفوخ فركته بالصابون
واغسل اشيل مي واكب على وجهي انظربت بظهري وكفت
ايدي مكدر افتح اخاف صابون يطب بعيوني
انجر شعري قوي صحت اااخ ول منهو هذا يا زمال
- وجع يازماله انكشط لحم وجهج وانتي تغسلين بي
ارحمي وجهج يستغيث منج بيضه وهيج عجل لو
سمره جان بشنهو تغسلي بقاصر
- اهووو امين وخرر ظربتني حيل على ظهري شطفت
وجهي بسع ونشفته ادحك عليه شكله عادي ما بي شي
يسولف ويضحك
شنون اسأله استحي كعدت بالهول واكلب بالقنوات
اشغل نفسي تا ما يبين عليا شي بس شنهو من داخلي
اغلي ناررر
امين ... كومن سون عشى قدوري راح يجيب شروق
كطيت الريمونت من يدي وكمت عايشه متبله دجاج للشوي
طلعت كبه وسويت زلاطه وكليت بتيته اشتغل وراسي
مسطور اهجس ما اتحمل بعد اريد انفجر عيني عالباب
كملت كل شي وحضرت المواعين واكفه باب المطبخ افرك
بيدي التوتر ذبحني
بس سمعت صوت السياره طلعت اركض فتحت الباب
قدوري سلم وفات وشروق ورا تدعبل هي وبطنها توها
طبت بالشهر الخامس
سحبتها من اديها كبل للمطبخ
شروق ... شبيج هايشه مخبله جان وكعت خفت هالجهره
- ميخالف هايشه صخله نعجه عادي بس ريحي كلبي غالي
شبي كلبي راح ينفجر جاي تحسين بيا دنجت نزلت دموعي
شروق ... عضت شفايفه وتتلفت خاف احد يسمعها
- امسحي دموعج لتفضحينا مابي شي بس جتفه مرضوض هم
زين لابس الحزام ولا جان نظرب راسه خطيه سيارته مضروبه حيل من ورا متفلشه عبالك احد متقصد يضربه
- يايمه سوده عليه زين قدوري شمدري هو مخابره
- لا يولي توه واصل من بغداد بشارع السوك وقدوري جان
هناك وشايفه ورايح علي يركض من شايفه كاضب جتفه
ويتوجع خابر على امين اي عاد جارين السياره على
صفحه واخذو للمستشفى بس جتفه مرضوض ودوخه براسه
يكول قدوري حرامات سيارته تفلشت
- طبه طوب بالحديد ولا بي حبيبي اهل يدرون وهسه هو وين
- اي امه جايه للمستشفى تبجي متخبله عليه خطيه جان ماتت من الهبطه ابوه وعمامه كلهم اجوي وراح وياهم لان مابي شي
وين عشاج ابني جوعان خوش اخبار جبتلج شتنطيني
- تعالي ابوسج من راسج يبعد كلبي انتي هاي الخوات
الحنينات يخسى الجوع عنج وعن هذا مديت ايدي على
بطنه مدري ليش كشت روحي
- اكلج تلفونج وياج موو
تخوصرت ورفعت حواجبها ... اي هذا شسوين بي
- بس اخابر عمه عاليه تلفون امي مابي رصيد
- عشيته تلفون امي مابي رصيد مدري عليش شايلته اسم تلفون
- دحكي انطيني تلفونج راح اصعد فوك وانتي وعايشه اخذو
العشى امانه ما اطول خمس دقايق
اخذت التلفون وصعدت ركض طبيت بالغرفه وقفلت الباب
ارجف ارجف كتبت رساله (اني شموخ )
شوي واتصلت بلعت ريكي بخوف وتوتر ... الوو شنونج عمه
-هلا هلا الحمدلله شنونج شخبارج
- الحمدلله زينه استحيت اعض على شفايفي وامسح بوجهي
- عمه شنونه غالي ، كلته بصوت يرجف خنكتني العبره
- زين يمه الحمدلله اصبري لحضه لتسدي
ضليت انتظر وكلبي يخفگ اسحب نفس وازفره تا اهده شوي
سمعت صوته كال ... هلا بغزالتي هلا بضوه العين
شهكت ايدي على حلكي ... يفدوه لصوتك الحمد لله على
سلامتك خوفتني عليك بغلاتي عندك خومابيك شي
- مابيه شي اطمني شنون خابرتي عليش هيج اسوين
- ما اكدر تعبت من العصر الى هسه انتظر كلم
اطمني عنك
- ما اقبل هيج اسوين وليدي زين اني مابيه شي روحي ارتاحي ولتجازفين هيج بعد
- ما تريد تسمع صوتي
- لا لا مو هيج خايف عليج اني وما احب لتختل تدرين
بيا فهمتيني يگلبي
- اوك فهمتك
سديت التلفون وگلبي يركص فرح ردت الروح بيا مسحت
المكالمه والرساله حطيت التلفون بصدري حدرت اركض
صاح امين ... يول يهايشه وينج خلصنا العشى
هياني جيت مو جنت اصلي العشى شبيك
قدوري ... شصلين يمعثوره صارلج ساعه صلاتيش هاي
- مو البارحه نمت وماصليت العشى وهسه صليت قضى
شروق تضحك بسكته كالت ... تقبل الله اعمالج تلفوني
عالكاونتر روحي جيبي وتعالي تعشي ما جعتي
دزيتله بوسه بالهوى رحت للمطبخ ورجعت انطيتها التلفون
ضلو كاعدين يتعللون قدوري خابر على غالي يطمن عليه
وعينه عليا جنت اكرز حب دحكت عليه وصديت بصفحه
ارتبكت وجهي نارر
سد التلفون وكال ... يابه تروحون باجر عليهم ترا حگ واجب
كمال ... اي نروح قابل شعدنا وياهم يمه تروحين مو
امي كالت ... اي نروح يستاهل وكفاته ما تنسي عود العصر نروح
قدروي ... عجل خوش العصر امر عليكم ونروح
بعدها اخذ شروق وراحو
نمت مرتاحه ثاني يوم العصر مر عليهم قدوري وراحو
ما طولو ساعتين ورجعو امي ساكته ما حجت شي ولا اني اكدر اسأل
مرت الايام وبيوم منهن جتي سميه تبجي ومقهوره
كعدت تبجي كالت ... ترضوها يعمه صارله اشهر بغداد
كاطني يم اهلي وبشهر مره يخابر يسأل دقيقه ويسده
ومصرفي على ابويه وامين
اذا ميريدنا خلي يطلكني وياخذ البنوات اني بعد ما اتحمل هيج
هاج دحكي سرور كامت تحبي ودكول بابا وهو ما يدري بيها
رغم كل شي قهرتني خطيه البنوات شنهو ذنبهم
امي كالت ... شبيدي عليكم شوفت عينج حتى احنى ما ندري بي وين ما وين اذا انتي يخابرج احنى هينوب لا يخابر لا يكول يمه شنونج خاف محتاجه شي راح وذاك الوجهه اتحملي والله كريم
اخذت سرور وساره كعدتهم بحضني العب وياهم
امي جلبت بيها ما خلتها تروح كالتها ... ضلي هين عليش
رايحه يم اهلج بس يجون الولد يخابرون علي احجي ويا
ضليت يمنا خلصنا عشى
كمال شال التلفون وخابر على نزال وفتح السماعه
كمال ...هاي اهلك هينه يمنا شوكت تجي عيب عليك صارلك
اشهر لا انت جاي شايفهم ولا انت جاي ما خذهم يمك ومستقر
بغداد اذا عيشتك هناك
نزال ... شبيهم راح يموتون شكو عليهم مصرف وجاي ادزلهم
بيد امين بعد عليش هالحجي الزايد
امي كالت ... يول انت اضل دايح هناك مادكول
يمه شنونج شسوينالك فوك فواينك وسواد وجهك انوب انت الزعلان
وزعلت طوكان وعساك ما رضيت
نزال ... مو زعلان بعد جم يوم اجي جان عندي شغل
وخلصته ول يسميه بس اجي افرك حلكج جايه تشكين
وتتبجبجين
سميه ... هاي عبن نريدك صارلك مدري جم شهر عايفنا
نزال ... هين يول بسيطه وكبل جم يوم مو دازه ابوج عليا
سميه ... هو خابر عليك من شاف سرور مريضه اني ما حجيت
سمعنا صوت يمه وكبل كطع الخط
مر الاسبوع وسميه يمنا كالت ... راح اروح اجيب غراضي
بيت اهلي واجي خلي البنوات عندج ما اتأخر
خلصت عشى وراحت جى ثامر اخذها من الباب
كمت غسلتهم وبدلت ملابس كاعده امشط بشعرات ساره
اندك الباب اكثر مره طلع امين يصيح ... اي وجعت ابويه
على هالدك شبيكم مجلوبين
طب علينا نزال ويا بنيه حلوه كطيت المشط من ايدي وكمت
ضليت واكفه ادحك عليهم
امي كاعده وادحك عليهم وتعمص بعيونها كالت ... منهي
هاي يول شجايب علينا
نزال ... يمه هاي مرتي دحك عالبنيه كالها هاي امي سلمي عليها
تقدمت مستحيه دنجت على امي كالت بصوت ناصي ... شلونج خاله
امي كالت ... وخل خاله تنخل عظامك يا سربوت يا سريري
من شوكت انت متزوج هاا اللطم اشك ثوبي من وراك
نزال ... يمه بله كافي كلتلج هاي مرتي متزوجه ما اجرمت
البنيه اسلم عليج رديلها السلام وبعدين افهمج
امين مجتف اديه واكف يضحك وكمال وعايشه صافنين
اني ضليت على وكفتي ساره خاتله ورايه وسرور بيدي
ضامه راسها بركبتي
والبنيه واكفه مستحيه ومرتبكه وادحك علينا
كتلها تفضلي اكعدي تعالي هين اشرتلها تكعد
نزال يدحك عليه ويصد بصفحه كال ... شنونج
ما رديت عليه طلعت من الهول مخنوكه وكفت بالمطبخ
ابجي اتذكرت الموقف والي صار كله مو كادره انسى
جتي سميه فتحلها الباب امين كالها ... خشي كلهم جوى
صحت علي امين تعال ... تدري بي متزوج موو
اي ادري بي ما صارله فتره يول راح تعلك كف ردانه اروح
افازع بيهن راح اتصير من الروس
واكفين بالهول وسميه مصدومه سألت ... منهو هاي وتأشر
نزال واكفه بكل ثقه واديه بجيب البنطرون ... هاي مرتي
صاحت سميه مزوج عليه يانذل واني اكول عليش ساكن بغداد
طلكني اليوم ما ابقى هين هساع اخابر ابوي يجي يشوفلك
صرفه موتتني ساعة السوده لشفتك بيها
امين واكف ويأشر بأصابعه لحن موسيقى
نزال برود... انجي وانلصمي متخوفيني بأبوج انكلعي لغرفتج
البنيه كالت ... هاي مرتك ليش ماكلت انت متزوج يعني ضحكت عليه مثل ما ضحكت عليها رجعني منين ما جبتني اني مستحيل ارضى بهذا الوضع
انت خدعتني حرام عليك... دحكت على امي خاله ما كالي
متزوج ولو ادري بي ما ارضى اتزوجه
امي كالت ... هذني بنواته يبعد گلبي جان متدرين
كطت نفسه عالقنفه كعدت مصدومه تبجي وترجف
وسميه مستمره بالصياح والبجي
البنوات خافن اخذتهم عايشه بغرفتها
واكفه ادحك عليهن هاي مصدومه وتبجي
وهاي منهاره ومصدومه محروك كلبها تلطم وتصيح
نزال واكف بكل برود يدحك عليهن
جبتلهم مي يشربن البنيه شربت شويه وتمسح بدموعها
شربت سميه صاحت .. ما اريد سم كله من وراج من يوم
انخطبتي تخبل عليه بريد يتزوج الله لا ينطيكم
امين ... وجع صوتج شموخ ضرتج خمو ضرتج هي شعليها
كمال ... صرعتونا يله اخذ نسوانك وشوفلك صورة حال
امي ... وين ياخذهن يول من يومه اعوج ومابي خير شنون بلى
بنت العالم ويانا يول هاي سالفه بله باجر شدكول لعمامك همات اتصير مجاتل
نزال ... محد اله شي عندي لمو عاجبه يلطخ راسه بالحايط
كومي انتي اخذي بناتج وانكلعي بغرفتج ولتضلين تلطمين
سميه ... اخذها الغرفه الك انطيها للمحروسه مرتك هسه
رايحه لأهلنا من يومك شالع گلبي
نزال ... بس تطلعين بعد مترجعين لو تموتين والبنوات
متشوفيهن طول عمرج
البنيه بعدها تبجي دكوله انت ضحكت عليه صاح بيها
كافي تبجي شموخ اخذيها فوك بغرفتج هسه اصعد افهمج
اخذتها فوك كتلها كطي حجابج محد يجي هين ارتاحي
كعدت خطيه مسحت وجها فتحت حجابها خجلانه تفرك بيدها
صعد نزال بيده الجنطه من طب للغرفه اني بسرعه طلعت
ما اريد احجي ويا
حدرت جوى كعدنا وسميه بعدها تحجي وكلبه محروك
بجيت على حالها وحسيت بيها
امين اخذ صينية الجاي ويدك بيها ويغني
تزوج وخلاني وجاني الخبر عالحاره
ياربي بجاه النبي ادوس بكلبو سياره
كلي شيفت مني ول عيفتني يا خاين
ياريت جانك مرضان وانت طبيب تعاين
كل الهلا بالمجبل شايل والد بحضينو
لمن يدبج بالدبجه مثل الغزاله عينو
ول كالو عيونو حمره ياحسرتي شكد باجي
ول يمه لمع خديدو مضيع لمع التراجي
فطيم فطيم شلج بالكرايب
مثل العلوج دمهم جالعكارب
كمال يصفك ويطك اصبع حطيت الشال على حلكي
ما اريد اضحك جدامها خطيه صعبه جثير شنون راح
تتحمل وانوب صعد فوك وهي الصعده ولا شفنا
عايشه من يمها تخبلت وتجي وتكاونت ويه كمال انت همات
يجي يوم وطب عليه بيدك وحده
امين ... اثنين مو وحده اعرفه ادروبه هالخانس
كمال ... انجب لا الطك على حلكك وانتي امشي ولي لغرفتج
ثاني يوم الصبح حدر نزال سابح وكاشخ ولا يمه جن ما مسوي شي
سميه بغرفة امي ما طلعت اخذت البنوات منها ريكتهن
سارة راحت على ابوها كعدت بحضنه سرور مستغربه
طبت البنيه كالت ... صباح الخير اساعدج
صباح النور تعالي طكي البيض سوي هين بيض عيون
حضرنا الريوك وهي ويايه تساعدني كعدنا كلنا عالسفره
نزال ... وين سميه بعدها نايمه
امين ... مستحيه بالغرفه كوم جيبها هسه تيبس مصارينها
من الجوع ويسولها عمليه تبديل مصارين ب صوندات
كمال ... الله يلعب نفسك من الصبح
نزال ... ول سميه سمسم مطشر تعالي يمعثوره راح
يحطولج صوندات
امي كالت ... بيك خير كوم جيبها لتصير اعوج من هسه
اتزوجت عاد اعدل بينهن لو هم هاي متكدر تسويها
كام راح للغرفه وطبك الباب بس نسمع المصايح اخر شي
كتلها وطلع من البيت
هاي البنيه ساكته ماحجت شي ابد نظفت ويايه المطبخ
وامي ركبت الغدا
طلعت سميه من الغرفه ترعد وينها هاي جرتها من
شعرها وضربتها كضبت سميه افازع بينهم وامي
تصيح عليها شبيج تخبلتي انجلبتي عوفي البنيه هاي شعليها
سميه ...من هسه حبيتوها ودافعولها جذابه تدري بي مزوج
اليوم لو اني لو هي بالبيت طلعوها برا
طبو الولد كلهم وعمامي وصار حجي ومصايح وثامر
يتهدد تلاوه ويه نزال كضبه امين وكرضه كرضه خلاه
يصيح التوبه
مافضت الكونه وبينا دم راحت سميه وضلن بناتهن
يتباجن بالكوه غديتهن ونامن
نزال ومرته بغرفة امي تحجي ويا وتبجي وهو يرضي
بيها باسها من راسها ومسح دموعها ويعدل بحجابها
تعجبت قادر ربي نزال يعرف يحب وهماتين يبوس !
المغرب خابرت شروق تضحك وترجف
- ول شبيج احجي راح يكف كلبج شكو شصاير
- راح اجي عليكم هسه امشي فوتي اسبحي بساع يولي
عندي الج بشاره الا بشده
- وهالبشاره ما ترهم الا اسبح امشي انكلعي بيا حال
اني تعالي دكحي المعركه بيتنا من البارحه واليوم
ناس هطت ناس
- خلي يولون ينجاز بنفسه طول عمره اعوج هساع
عود تا يتعدل ماضل وكت امشي اسبحي يله هياني
راح راجي
صدك اني من الصبح وجهي ما شفته بالمرايه التهيت
تكحلت وطبيت سبحت بسع وطلعت شغلت الشسوار
انشف شعري ساره يمي كل ساع واشرت على كفشته
اكرب الهوى عليها تمغض عيونها وتضحك وكل ساع
اسويلها تشهك وتضحك
طبت شروق تنافخ ... هيوو وينج يااا هاي شلابسه
- اكلج انتي شبيج خبصتيني لا بسه هدوم قابل لابسه كونيه
- جبتلج هذا القفطان البسي يطلع يخبل عليج ما لبسته غير
مره وحده
- وعليش البسه قابل راح يزفوني امشي ولي من هين بله
طبو الولد كلهم وعمامي وحياة وعفاف وزلمهم
وجهالهم ول هاي شكو كلهم جاين يباركون نزال شبيكم يولو
ادحك مرة نزال مستحيه ودمعه بعينها خطيه ومتعرف
شسوي لبسه جان حلو ومرتب ولفة الشال حلوه حاطه
كحل وحمره وردي فاتح بلون الشفه حلوه طالعه اخذها
نزال بالمطبخ يحجي وياها بعدين طلعو عرفه عالبنوات
وسلمت عليهم
طب امين كالها ... يمكروده هذا الجيش عليج راح يمرعدوج تمرع
ادحك عليها خطيه صفرت وتفرك بديها
نزال حاوطه كال ... شحدهه ليتكلط يمها هذا يجذب عليج
روحي ويه البنوات ساعديهم شوفيهم ندارتج بعد بيتي
امين ... يولو هذا اخونا او مبدلي خاف مبدلين لسانك
بغداد قادر ربي سبحان مغير الاحوال يله ياب شوفينا
ندارتج خلصن بسع الوادم على جيه
طيبت للغرفه ورديت الباب اذان العشى والهوسه بالبيت
فرشت السجاده صليت وخلصت شو صارت رجفه
بجسمي وبكلبي وبردت هي الدنيا حاره موت كمت كملت صلاه
صارت هوسه وطربكه برا واصوات زلم وضحك فتحت الباب وطلعت ادحك شكوش شجبيهم
دفعتني شروق للغرفه ... وجع شبلاج هاي شبيكم صارلي
ساعه مثل الاطرش بالزفه ذبحتوني
- حماره تعاي بدلي الوادم وصلت من ساع كلتلج بدلي هي هايشه
- هايشه بعينج وخري من وجهي خلي اطلع ادحك شكو يولي
- بدلي واطلعي وانتي تعرفين شكو مو هسه بنعال يله
- كبر لفج يا مجعبره خشمج بي جدر تشريب وبلاجمج ماعون ثريد
مو راح انعل شيب عشيرتج ... شلحتني الثوب وتضرب بيا
بدلت واني اضحك عليها سمعت اصوات مو غريبه عليا
فتحت الباب حياة كالت ... امداج بعدج امشي اطلعي الوام
تسأل عليج
شروق رتبت شعري ضل مفتوح على طوله كطيت ملفع
اسود شفاف على شعري حطيت مسكاره ومرطب وردي
حجيت بصوت يرجف ... شروق هذا صوت عاليه وجده
شيجه لو اني اسمع غلط
دفعتني وطلعتني من الغرفه كاضبه ايدي كبل
اخذتي للهول وانصدم اهل غالي موجودين الحمدلله
ما انجلطت وعدت سلامات
ارجف ارجف خوف وارتباك مشاعر متضاربه مخربطه
روحي ترجف وخنكتني العبره احساس قليله كل كلمات
الوصف بحقه
سلمت عليهم وبوستهم
عاليه كالت ... هلا بغزالتنا هلا بعروستنا تعالي يهين اكعدي
كعدت يمهم افرك بيدي الي صارت ثلج ما اعرف شسوي
دحكت على شروق وخزرتها
سوت حركات بوجها عود خافت من خزرتي وتأشر على
بطنها توجعها من الخوف الجذابه الا اطلعها منها هالعوبه
من كثر ما بردت ورجفت انحصرت هاي شنون شغله بله
هسه شنون اطلع للحمام تخسون محصوره
اشرت لشروق على بطني وعضيت اصبعي ووأشر لها تا تفهم
تكربت مني شاورتني وكمت وياها طلعت ركض
- هاا شبيج الله يفين حضج جاهل انتي
- ولي من وجهي محصوره بعد ما اتحمل طبيت للحمام
وطلعت المطبخ مليان صناديك فواكهه ومخضر دبات
حليب وزبد عرب
رجعت كعدت مكان بس نسمع اصوات الزلم واني
كلبي طبول حرب ادك
شاورتني عمه عاليه ... حتى الشيخ جايبي ويانا تا
نكطع مهركم ونرتاح منكم شلعتو كلبي وكلب الخلفني
- عمه ترا محد كالي شي مثل الاطرش بزفه مادري شكو
طبطبت على رجلي وابتسمت
مرت نزال كالت امين يريدج
كمت طلعت مستحيه منه جثير كلتله ... هااا شتريد
امين ... يبووووه عالهوايش من تستحي دحكي الشيخ
راح يكول منهو وكيل البنيه وجيت اسألج منهو توكلين
اذا دكولين نزال تا افصخ هالشحاطه وادكج بيها
مسحت كصتي ارجف كلتله ... لا لا ما اتفائل بي انت وكيلي
تحمحم وعدل دشداشته كال ... يله روحي هذا هو
رجعت لمكاني كعدت عاقله طفله بصف اول ابتدائي
اتذكر نفس الخوف والأ تباك والدمعه بعيني
النسوان تحجي واني فاصله عنهم سافرت بخيالي اتخيل
وجهه غالي بهالحضه
جى وليد وكف كال ... جده رضيه كطعو المهر ما تهلهلن
سون درب خالي يريد يفوت
كامت امه تهلهل وعمته وجده شيخه وخواته منظرهم
كزبرجلدي شنون فرحانات ادحك على امه تهلهل
ودموعهاعشره عشره عمه عاليه عيونها مدمعه
فرحتهم جبيره وما تنوصف بكلام
واكفه لشتي كله ترعش حضنتني شروق وتبوس بيا
جرتني من ايدي عمه عاليه اخذتني للغرفه
كالت ... ضلي هين لتطلعين فتحت جنطته طلعت
عطر رشتلي هم زين ريحته حلوه
الباب مفتوح مديت راسي ادحك عليهم امه تبوس بي
وتهلهل حاضنه ويمسح بدموعها وعلى جدته نفس شي
رفع راسه يدحك يدور بعيونه
عاليه ...اعرفك شدور تعال ويايه
رديت الباب وكفت عدلت شعري مخبوصه ما اعرف شسوي
طب للغرفه رفعت راسي ادحك عليه عمه عاليه
ضحكت طلعت وطبكت الباب وراها
تكرب عليا وفتحلي ايديه كطيت نفسي بحضنه واتنفس
بقوه كضبت دشداشته من صدره حيل مغمضه عيوني
استنشق ريحة عطره اريد اشبع منه دكات كلبه هادئه
عكس دكات كلبي طبول ادك
محاوطني وايديه تظغط على ظهري يحضني حيل
رفع راسي بثنين اديه عيونه بعيوني باس راسي
جر حسره ورجع ضمني حيل على صدره ايد على
راسي وايد محاوطني بيها كل هذا بدون ما نطقنا كلمه
رجع باسني براسي وكضب اديه تلمس وجهي بأصبعه الابهام
يدحك بعيوني تلمس خدي وعيوني باسني منها
يدحك عليا عيونه تلمع وابتسم
دنجت راسي مثل الوعيت على نفسي ابتسمت خجلانه
كعدنا عالجربايه وايده محاوطتني
كال ...ما مصدك صرتي حلالي ينظر عيني
- ولا اني شنون هيج صار
- سالفه طويله مو مهم المهم انتي صرتي بحضني
مد ايده بجيبه طلع تلفون كال ... هذا خلي عندج مسجل
رقمي اخابرج مو تنامين
بكلبي كلت .. لا يا بوي وين يجيني نوم بعد
ضحك كام وكف وكمت ويا حضني حيل تلمس
شعري غمض عيونه وعض شفته رتب الملفع على راسي
- يله وليدي راح اروح بطيت عليهم كرص خدي بخفه
فتح الباب طلعنا سوى امه هلهلت وحضنتني بستها من راسها
خواته كلهن بوسوني ويباركون خطيه جثير فرحانات
امه فتحت علبه بيها حلقات كالت ... هاي عالسريع
اخذناها البسوها هساع وبعدين اشتري ليعجبج
خجلانه جدامهم كلهم لبسني ويبتسم
اخذت الحلقه ولبسته اديه ترجف ماكدرت البسه زين
كمل هو ويضحك
عمه عاليه كالت حبها ولك حبها ولتخاف من امه
كال.. هااا هيج مسموح ابوس
جده شيخه ... بوس من هين بس على كيفك وتأشر على خدها
عض شفته وغمزلها
باسني من خدي كزبر جسمي
صار الضحك والهلاهل بفلس يكوله خوش وكعه وكعت
راح وهن همات لبسن عبيهن كالو راح نروح
خواتي وراهم راحن ضلت بس شروق
ادحك خطيه مرت نزال وين يولي شروق البنيه وين
يمعوده فوك خابرها كالها راح يطب الزلمه كبل فوك لتنزلين
دروحي صيحيها خطيه كلهم راحو
شسمها هي شنون اصحيها اكولها مرت اخي وينج
مدري يولي حتى ما سألنها هو احنى شفنا دربنا
اصعدي صيحيها خطيه هسه يجوز كاعده تبجي
راحت شروق صاحته وحدرن سوى
تكربت مني باركتلي ادحك عليها خطيه باجيه
شروق ... اكول خيتي يمرت اخويه ما عرفنا شسمج
كالت اني اسمي مياده .......!
.
.
.
.
.
يتبع
🥀💙🥀
دمتم بأمان لله ورعايته
رونق السلطاني 😘❤️