/// شموخ ///
بقلمي ....رونق السلطاني
✨✨✨✨✨✨✨
الك گلبي يحن بس الك بذات
لان طبعك حنين وموش بذات
تظل بالروح عايش دوم باذات
شلون أنساك يل روحك وفيه
💔
فتحت عيوني ادحك بالغرفه امين نايم عالكرسي وامي خطيه
نايمه
وين اني شجابني هين شصار البارحه الطلقه الثارت ضربت
منو اتلمس بجسمي مابيه شي كانونه بيدي تحركت عدلت
نفسي
فز امين فرك وجهه كال ... هااا شنونج شتهجسين خوما بيج
شي احجي نبلع لسانج شموخ انتي زينه
مخنوكه حيل بلعت ريكي تكلمت بصوت يرجف
شصار منهو المات الطلقه ضربت منو
امين .... محد مات الله ستر الطلقه ضربت الشباك وتنثر الجام
كعدت امي عدلت فوطته والعبايه كالت ... هااا يمه شنونج
- زينه يمه لو مو ابنج فهموني شسويت اني وجى يريد يذبحني
هااا شسويت تا يحط السجينه على ركبتي يمه اني مو بنتج
كمت ارجف وابجي والمنظر جدام عيوني حطيت ايدي على
ركبتي كزبر جلدي جسمي كله ينفض اهجس شي ياكل بيه
بجيت حيل ولطمت على وجهي شسويت اني شسويت
هااا كضب اديه امين يهدي بيا كال ... كل شي ما سويتي
اسكتي هسه ترجع عليج الحال ويتيبس جسمج البارحه
طلعتي من الموت
حضني حيل راسي على صدره وابجي ... جان خليتني اموت
بلجي ارتاح ما صارت خطبه كل العيوب الشرع خليتوها بيا
من دون هالبنوات يوميه مكتوله يوميه تهمه خلوني اموت واخلص
- اشششش اسكتي شنون تموتين منهو بعد يحضرلي الحمام
منهو يكعدني من النوم ويخبث عليا ويخلص المي حار واسبح
بمي بارد يولي مشاكلج ومشتاك لسوالفج ضحكتج وركضتج
ورايه كافي تبجين بداعت سحيلان مشتاكلج الليل كله يمعمع عليج
رفع راسي كال وخري دموعج والخن كله مسحتي بدشداشتي
فرك خشمي حيل يبوووو حنفيات مفتوحه دموعج والخن سوى
ضربته على صدره ... جذاب خشمي ناشف هاي بس دموعي
رعشه بجسمي وگلبي يدك سريع وانهت عبالك جاي اركض
تنفسي صار سريع ما اكدر اسيطر امي ادحك على امين
نومني عدل المخده ورا راسي ... انتي ارتاحي هسه اجي
طلع وامي كاعده يمي وكاضبه ايدي تقرا عليا
جى الدكتور وامين ورا
قاس النبض كال ... عدها خفقان اثر الصدمه لمتعرضتلها
جابولي حبوب اخذتها وكتب الدكتور على علاج
خلوها للعصر نطمن اكثر على حالتها ولتخلوها تتعرض لصدمات بعد لان بعدها منعرف شيصير بيها ديرو بالكم عليها خلوها تاكل علمود العلاج لان بي منوم تا ترتخي اعصابها
تلفون امين ما سكت مكالمه ورا مكالمه يطلع برا يحجي
ويرجع يمنا
امي مرتين دك تلفونها عرفتها عمه عاليه كالتها توها كعدت جى الدكتور شافها وانطوها علاج لا لا مو هسه نطلع للعصر ايديكول تا نطمن على گلبها مابي شي بس صاير طبل يدك حتى صدرها ينفض اي يكول جريان مدري شنهو يسمو خفكعان
امين ... يالسموات خفقان خفقان مو خفكعان
- اي شمدري شنون يحجون هل الاطباء اي هلا بيكم هله
سدته حطته بجيبها كالت ... هاي عاليه تريد تجي تشوف
شموخ روح جيب علبة جكليت شي عيب هسه على جيه
امين ... اي هسه اروح منهو جاي وياها
- ما كالت خمو اسألها خلف الله عليهم جاين امشي بساع جيب
شي وتعال
ايدي على راسي مكدر اغمض اخاف كل ساع اتخيل نزال
يطب عليا ويذبحني لافه نفسي بالبطانيه وعيني عالباب
بس انفتح الباب كبل فزيت خفت حيل طب امين وعاليه وام غالي وجده شيخه وزلم تلاثه بالباب وكمال وياهم وغالي انترست الغرفه
عدلت حجابي خجلانه ميته خجل مدنجه راسي ما رفعته
حضنتني عاليه وتبوس بيا ... غداج الشر بنيتي عندج العافيه
ام غالي بوستني وتحمدتلي بالسلامه
جده شيخه ... يمه بنيتنا يمه وليدي وريتي گلبي هاليل صار
شطوله علينا ما كدرنا نام يمه عساها بحض وبخت لسواها
شنونج يجده شسولج
ما اكدر ارد بس ابجي وامسح بدموعي حيل مقهوره ومهضومه
ابو ادهام ... شنونج بنيتي عندج العافيه
بالكوه رديت عليه ... الله يسلمك عموو حتى ما اعرفه
سعد ... اني ابو غالي شنونج وليدي ترا الي صار ما سكتنا
عنه ماطر الصبح علينا الا واخذنا حگج نعرفج بنيه اصيله
وما تطلع منج العيبه بس هذا ملعوب من ناس اغبياء
ما حسبوها زين
جاوبته صوتي يرجف من البجي ... تسلم عموو ما گصرت
امين فتح علبة الجكليت وقدملهم كالهم ... ونعم منكم مشهودتلكم
تفضل عمي ابو ادهام انت الخير والبركه
امي كالت ... ونعم منكم فشلانه منكم هذا نزال دومه مفشلنا مثل العربانه ام الجروخ بساع بندفع جان ذبح اخته وفضحنا
سعدون ... سدو السالفه ولتحجون بيها البارحه راح وله احنى نعرف وليدنا شنهو ما تطلع منه العيبه
غالي ... تجيك التهايم واني بغداد حتى مو هين عمي خلاص
جاهل خلها تولي طايشه
يول امين جايبلنا جكليت يابس من زمن العصملي
كلهم ضحكو صديت بصفحه وابتسمت هم زين حجيت تا اسمع صوتك وارتاح
امين ... مو يابس يمصگوع علبه جديده توى جبته عجل جيبها
وهاك اشرب هذا المي عبيته من بوري المستشفى انت مو مال
جكليت مال طاست شلغم
عاليه ... يبووو يكرهه الشلغم يموت منه تلعب نفسه بس يشوفه
كمال ... عجل ادلل بجدر شلغم يوصلك للبيت
غالي ... هااا عاليه ما وراكم بس الفضايح عمي خوش
جكليت ونعم الله عليكم
ابوادهام ... يابه تريدون شي محتاجين شي اني بحسبت
ابوكم ما يردكم الا لسانكم
كمال ... ونعم منك على راسي ابو ادهام
سعدون ... يابه تكاليف المستشفى كله عليه ولا دكولون لا هاي
هم بنيتنا والي صار بيها شده وتزول ما ناخذها بذنب اخوها
امي كالت ... مخبل وابتلينا بي شنسوي مكثورين الخير
امين ما قبل حيل فشلان شنون يدفعون تكاليف المستشفى
اخذه ابو ادهام برا مدري شحجى ويا
كلهم سلمو علينا وراحو
كمت اغفي يمكن العلاج ينوم نمت العصر كعدت
جتي الممرضه شالت الكانونه
ادحك على امي خطيه حيل تعبانه وجها اصفر
كمت من فراشي يمه شنون اطلع هيج بثوب البيت وحافيه
- هسه يجي امين راح يجيبلج جبه ونعال خمو دايخه
- لا زينه عجل نزال وين يمه اخاف ارجع للبيت
- ولى لبغداد من الصبح
دخل امين شايل علاكه كطه عليا ... هاج البسي تا نطلع
لبست وطلعنا دايخه حيل وراسي يوجعني
يم باب المستشفى صاح امين تعال هين منا منا
التفت امين علينا كال امشو راح جدامنا
واكف يم سيارته ومجتف اديه دحكت عليه شكثر متغير وجهه
جثير تعبان وجوى عيونه اسود بشرته صايره سمره جانت
بشرته بيضه وصافيه لون لحيته وتحديدها يعكس عليه تزيده
هيبه ورجوله
سلم على امي ... هاا عمه شنونج مبين جثير تعبانه
امي كالت ... شسوي يمه هذا من يوميه متعبني
دحك عليا عيونه ذبلانه مبين علي مو نايم كال ... شنونج يالروح
- بشوفتك اصير زينه
دنجت وسحبت نفس اشم عطره ولا يغيره
فتحت الباب وركبت جى امين بيده بطلين مي وباكيت جكاير
اخذ الباكيت من امين ورث جكاره
امين ... يابه طفيها مو زين عليك شكالك الدكتور البارحه لتنجلط من ورا هالزيجه عمي ضل عزابي احسلك
ما رد بس جرها حسره ووياها شهكت الجكاره
انخمش گلبي شبي ضليت بقلق ادحك علي اريد اشبع شوف منه
جنت كاعد ورا امين وادحك عليه براحتي وامي راسه عالكشن ومغمضه
لابس نظاره شمسيه رفعه على راسه وعينه عليه بالمرايه
امين مشغول بتلفون نصيت راسي مقهوره وكلبي معصور
لتفت ادحك عالشارع من الجامه وصلنا للبيت حدرت بساع
شروق فاتحه الباب واكفه بطرمه حضنتني وتبجي امي
ورايه كالت سون جاي بالعجل وافتحي باب الدوانيه
طب امين وغالي طلع عليهم كمال
كعدت بالمطبخ جتي عايشه سلمت اخذت عموري ابوس بي
حبيبي عجل سميه وين شو ساره ماكو خافت البارحه حبيبتي
عايشه ... راحت الصبح لأهلها ونزال حدر لبغداد شنونج انتي
زينه الحمدلله
جى قدوري سلم عليا كال ... عمي غاليه ما عبالنا هيج
احتركت الدنيا باليل ما طر الصبح الا حگج انوخذ شتريدين
بعد حتى نزال هججنا لبغداد وما يجي بعد شيوخ وكفتلج هيج الهوايش حضن جاعد
ابتسمت على سوالفه مابيه احجي اهجس ما عندي طاقه ومابيه حيل
طبت خالتي تبجي حلا وياها ونوفل احمد وابوهم جده سنيه
خالتي تعبانه وحالته حاله كمت وكفت سألته بخوف
خير خاله شبيج حلا شبيكم
حضنتني وتبجي امسحيها بوجهي ي خاله هالجلبه موتناها
البارحه حبسها ابوها ونوفل لا اكل ولا شرب
- منهو خاله شبيكم
دخل رجل خالتي ونوفل يتعذر وما يعرف شيحجي باسني من
راسي انتي بينتي شكثر تجين علينا واني اشهد ما يوم طلعت
منج العيبه حگج عليا وليدي اخذت حگها باجر ابن عمها
ياخذها واخلص منها
سكتت ما ادري على شنهو يحجون اخذهم امين الدوانيه
نسمع حسهم عالي يحجون ويتعذرون
بس ادحك بالوجوه وما مفتهمه شي طلعو كلهم امي نامت
من التعب كمال بغرفته امين وقدوري بعدهم كاعدين
شروق جابتلي اكل وعلاجي كعدت اكل بدون نفس سألتها شصار البارحه خالتي ورجلها على شنهو يتعذرون مثل الاطرش بالزفه
شروق ... من تخربطتي ركض بيج امين غالي كضب نزال وين اليوجع خله الدم من خشمه وحلكه لو ما الشيخ ابو ادهام وكف
بوجهه جان كسر اعضامه الرساله جايه من تلفون جعيفص الخط طلع بأسمه احمد وحيد الحسن ركبو سياراتهم وراحو لبيت خالتي
نزال ضل هينه مدد بالكاع ما بي يجر النفس
ساعتين او اكثر وهمه هناك من رجعو سألت قدوري
كال من وصلنا يمهم غالي طب عليهم وشايل تلفون نزال يابه شتريدون مني كاطين عليه هيج تهمه اني رجال طبني مرض
ما يهمني شي بس هاي همات بنتكم وعرضكم والعار يلاحكم
احمد تخبل يحلف بالقران ما مسوي شي كال اني احب
شموخ شنون اتهمها
اكمز عليه غالي وضربه على حلكه شنون دكول احبها
احمد... ترا هي اختي وبنت خالتي حتى انت احبك ما شفنا
منك شي يحلف هو ما مسوي كال كبل جم يوم نسيت تلفوني
من رجعت جان عد نغم مخلصه الرصيد وتكاونت وياها
غالي ... جيبولي نغم الرساله طالعه من عدكم ما اطلع من
هينه الا اعرف منهو سوى هيج لو مذبوحه البنيه ومبتلين
بيها شدكولون للوادم
دخل نوفل عليها دفرتين خرطت كلشي
ابوها دنج راسه خش بنص هدومه وتعذر منهم شتريدون
اني حاضر يسواد وجهي منكم بذات انت غالي عمي تاج
وعلم بديره كله تحلف براسك وافضالك علينا ما ننسى وكفاتك
ابو ادهام ... يله يابه غيرة بنوات ومبين بيناتهن
مشاحنه هاي هيه مدام عرفنا نعتبر الموضوع خلص انت
ابوها واخوها موجود علموها وفهموها الي سوته غلط
جان انذبحت بنت خالته
طلعنا منهم غالي تخربط خشمه طك دم ركضنا بي للمستشفى
ظغطه صاعد وابر ومغذيات يله نزل شوي حتى تخطيط قلب
اخذوله كاله الدكتور اذا ضليت هيج تنجلط والساعه اربعه
الفجر يله طلعو
رجعو على نزال كضبه غالي من زياكه كاله ... بنت خالتك
عندك علم بيها هي هيج مسويه
نزال يدفع بي يكوله هاي سوالفك تا تحصل الي تريده
خنكه ولزكه بالحايط كاله ،.. ياعار مافكرت اذا ذبحت اختك تدري شيصير عار يلاحكك ويلاحك بنواتك وعيشرتك مافكرت وتأكدت هالرساله مبينه ملعوب مال جهال لو الحقد عامي عيونك وحك هذا الله بعد تمد ايدك عليها الا اكسرها واخلي عاها بوجهك طول عمرك
ما تخلص منها وغصبناً عنك تنجب وتسكت دفعه وكومه بالكاع
جى قدوري نكضان من التعب فرشتله بدوانيه جلب بيا ضليت
افرك براسه يون من التعب
عاد نزال الصبح اخذ سميه كطها يم اهلها وهو حدر لبغداد وجهه مورم وعينه زركه دكول وحده كاتلها رجلها باليل ومصبحه مزوركه
وهذا الحبيب اخذ حگج مربع وزياده تدرين يخبل يولي جنت واكفه وادحك عليه ومن ضرب نزال يبووو مي ثلج ونزل على گلبي
- اوووف بله اني شسويتلها خطيه خالتي متستاهل
- خلي تولي يمعوده هي من يومها حقوده متحب الخير ًفوكاها
غبيه بسع انكشفت
- ما عرفتي شمسوين بيها
- امبله خابرتني حلا الصبح كالت ... موتوها كتل احمد من
شعرها مسح بيها الكاع حتى سنها مكسور وحابسيها بالمخزن
- جيبيلي مي خلي اخذ الدوا وانام تعبانه حيل
مرت الايام هدوء عمه عاليه يوميه تخابر تطمن عليا
ونزال ما شفنا كرب عرس شروق اخذنا غراضها ورحت
وياها رتبناها ورتبنا الغرفه وقدوري خطيه فرحان جثير
حضرت فستان طويل مستر ويا حجاب بيوم العرس لبسته حطيت بس كحل قدوري صعدني وياهم هو وشروق جدام واني وحدي ورا
زفتهم حلوه كاضب ابد شروق ويبوس بيها كل شوي يصد
عليا غمضي عيونج لدحكين
عابت وين مدحكه مو دايره وجهي ادحك عالشارع شفت
سيارته يأشر ل قدوري ويضحكون
يبووووه گلبي من صدك راح انجلط
وصلنا ذبحو جوه رجليهم ذبيحه وطبينا هوسه وخبصه
عمه عاليه حضنتني تفاجأة بيها
ضحكت كالت ... عزمنا قدوري خطيه جى بنفسه هاي
امي ورضيه تعالي سلمي عليهم
رحت وياها سلمت عليهم كعد يمهم شوي وكمت وكفت يم شروق
يجرون بيا البنات تا اركص تعالي يولي ركصج حلو بكل عرس
تعلكيها هالمره عبن عرس اختج متقبلين تركصين
كتلهم مريضه وما اكدر رحت عاونت البنات ومرت عمي نعيمه خطيه فرحانه وتحير شتقدم مره تهلهل ومره تفوت تركص شوي
ما خلصت من الحجي كرايبنا كل اثنين سوى ما عدهم سالفه
غير شموخ خطبها ابن سعد ورادها ومن وراها صار مجاتل
ام غالي كالت ... راح ازوجه خوما يضل هيج خطبتله
بنت اختي منال تخبل بس هو ما قبل هالاسبوع اروح اخطبله بنت عمته نوفه
سمره كالت ... خوش بنيه وحلو هو ما شايفه من كبرت يمه بس يشوفها راح تعجبه ويوافق
يا يابه سمعتهم وتخبلت نارر تسعر بيا
وكفت يم عمه عاليه سألتها صحيح هالحجي
ضربتني على راسي ول خبله كل هالمجاتل وتالي يروح
يخطب مخبله انتي اصدكين كل شي ينكال
دخلو شروق لغرفته وصارت الزفه الناس الغربه والجيران
كله راحت ضلينا بس الكرايب اخذت عاليه ورحت للمطبخ
الخارجي عمه هسه ادزين عليه يجي تعبت اني ما عاد اتحمل سمعتي الحجي كل اثنين يتهامسون ماعدهم غيري هسه
خلي يجي هين
- يول مخبله ماكو هيج حجي اسمعي مني
- لا عمه خلي يجي احاجي دزي عليه گلبي يوجعني
- اوف منكم موتوني وشلعتو گلبي اكفي هين لتطلعين
هسه ادز علاوي يصيحه تعال روح على عمك غالي كوله
عمه عاليه تريدك وجيبه هين لتخلي احد يشوفك يله بساع
- هاا يعمه دازه عليه خو ما بيج شي
- يول روح للمطبخ ورا البيت واكفه ترعد تنتظرك
امشي امشي شمفين يول شحاجي
- كل شي ما مفين شبيكم وينها ضوه العين
- لا يشوفك احد يوليد راح امشي جدامك
- وما يشوفون ...خلك الله والعرب كلها تدري بيا
طبيت للمطبخ ادحك عليها .. مكفاها للباب ومتخوصره
مثل ما كالت عمتي ترعد .. ضحكت
احححمم شبيها شمس نهاري وگمرة ليلي منهو مزعلها
التفت ادحك بي وعيوني تريد تطك
- منهو لخاطبها هااا وعليش ادحك عليه وتضحك
لا دكولي جذب وحجي مثل كل مره كلهم يسولفون
بالعرس خاطب بنت خالتك تا ترضي امك واني شنهو ؟
- كملتي رعيد ... يولي شو صاير عگلج هالكبر
وين خاطب اني ومنهو لكالج ؟
- خواتك يحجن وامك وكل اثنين يتاهمس عليه
- وعمتي شكالتلج ؟
- دنجت راسي
- احجي عليش دنجتي راسج .. جم مره كايلج الحجي لا
تاخذي الا من عمتي وجدتي شلون اروح اطرو وصلتين واخلص
- مو تعبت وطكت مرارتي وين ما اروح ماعدهم سالفه غيري
- بس انتي لتعبانه يضوه العين وصباها لعمر واحد ما يرهم
بس وياج يشيبي
- ماعندك شيب
- من عشگج طك الشيب بگلبي مو براسي هاج دحكي
سحب الغتره والعگال .. دحكي هذا شيب عشگج
هديت شوي ادحك شيبات متفرقه بشعره دنجت استحيت
ماسلمت عليك شنونك
- شلوني عيونج كتلتني وما خلت شي يالروح والعمر
خجلت وجهي اهجس نارر تطلع منه شابكه اديه ارجف
- شموخ ارفعي راسج يفي يگلبي
رفعت راسي عيني بعينه جثير مشتاكتله دمعت عيوني
- ما اريد هالعيون تبجي غزالتي مايلوكلج الحزن يضوه العين
- مشتاكتلك جثير وگلبي يوجعني
- اااااخ ربي رحمتك مربط مكدر اسوي شي ول حتى الكلمه
محسوبه عليه خاف احجي وما اسيطر على نفسي
فرك وجهه بيده صار احمر دم وعيونه حمر جر حسره من
كلبه حتى عمه عاليه جانت واكفه برا سمعته وفاتت تحجي ويا
- روح عمه تأخرت كافي تقهر بنفسك ما يصيبك الا نصيبك
- راح اطلع يله تهيرين تا نرجع وانتي تبقين هين لو تروحين
منهو وياج
- مرت كمال ويايه بعد شوي يجي امين ياخذنا
طلعت من المطبخ امين خابر على تلفون عايشه كال يله
اطلعن اني بالباب
رجعت للبيت شروق مكانه خالي وموحش صعدت للغرفه
فتحت الكنتور فارغ بس ملابسها القديمه مالت البيت
غيرت هدومي كعدت عالسريروحشه الغرفه انفجرت بالبجي
ماكدرت اضل بالغرفه اخذت فراش وحدرت فرشت بالهول
امين ... هااا خير شعندج اهينه
- امداك يالعفن متستقبل خطار
- شبيها عيونج يمعثوره خشمج احمر خشم حكيم الاقزام
- مالي خلك مشتاكه لشروق وبجيت
- ياهل المكر والفنك يوميه متكاونات وبنعل ومن الروس
مكافش هسه صارت غاليه ومشتاكتلها ايابه منجن
لفيت راسي ونمت
شنون غاطه بنومه وحلمانه اني وغالي بسياره كاضب
ايدي ومبتسم
مي بارد ينكط على وجهي جلفت وفركت وجهي امين فوك راسي
هاي عليش شكد نذل هيج تضيف خطارك
- خطار ام وجهه المجعبر كومي سويلي ريوك بيض عيون رشي عليها فلفل اسود وجبن وگيمر وجاي وبتيته وبيض وخبز حار
- شبيج مفجوع لو كايم من وجعه تا تتريك كل هذا
- انتي شعليج سوي واسكتي عجل نايمه اهينه بلاش
- اي مو على اساس حاجزلي بفندق خمس نجوم امشي
روح من هين ما اكوم بعدني نعسانه وراسي يوجعني
- اي مو تدللين يا بعد رويحتي
كضبني من اديه وسحلني بالهول ... ول امين بروح ابويه
عوفني هسه اسويلك كل شي ول يمه وينج ما هدني يفر
بيه وطلعني للمطبخ
ضحكت من خاطري صارلي شكثر ما ضاحكه هيج
تريكنا باب المطبخ مفتوح والجو حلو
امين شايفه الحديقه صايره مو حلوه واني ما عندي شي شدكول لو اجيبلي شتلات ورد ونزعها ونرتب الثيل تصير الكعده بيها باليل تخبل ونجيب ميز وكراسي نتعشى هين واعمرلك النركيله شدكول
- اهااا ويكولون الهوايش بس يعلفن
صحت بي نرفزني .... اميييين احجي صدك وياك
- عجل اني احجي جذب هايشه بس ذكيه
جره حسره كال ... اييييي اجيبلج بذور تزرعين فجل وكرفس وكراث وتصيرين فلاحه وتفتحين بسطيه ... يابه عشره بالف خضره طازجه ول يعيني عشره بالف
ركضت ورا وضربته صوجي اني واكفه احجي وياك
ومضيعه وكتي الثمين
طلع من البيت يضحك
خابرتنه شروق كالت راح نروح لبغداد ومناك نطلع الاربيل
نضل اسبوعين ونرجع
وحدي بهالبيت اخلص شغل واكعد العب ويه عموري سميه
ما جتي ونزال ما عنه شي ابد ما جى وهيج مرتاحه منه كل
ما اتذكر الي صار ارتعش واخاف
باليل جى امين وجايب شتلات اشكال ... شهكت حطيت
ايدي على وجهي مو ضحكت عليا الصبح وقهرتني
ضحك كال ... يعني جنتي مقهوره وهساع فرحتي يافرحتي بيج
- امشي جدامي روحي احرثي التربه واكلبيها
- وين احرث بهاليل مو هيج عاد باجر الصبح
وثاني يوم من الصبح نشتغل بالحديقه وكل يوم نعدل ونرتب
بيها جبنا حصو ابيض وجره فخار سويتها بزاويه والورد
وزعنا بالاطراف والثيل عدلنا صارت تخبل حطينا
ميز وكراسي
يوميه باليل نطلع نتعشى و نتعلل بيها
جتي شروق شافته وقدوري تعجب بيها ويوميه باليل يجون
شروق ... شفنا الحبيب بغداد ضيفنا بشقته يومين خطيه طار بينا يحير شيسوي كط السويج على قدوري كاله اخذ السياره واطلع تونس انت وحرمتك واخذو راحتكم وهذا مفتاح الشقه ارتاحو بيها
اتسوك اشكال عبه الثلاجه شكثر نفسه طيبه وكريم حلف على قدوري فلس ما خلاه يدفع عاد ثالث يوم وصلنا للمطار
- جريت حسره شفتي شنونه
- شحاله يولي مو ذاك غالي ليخبل الوجهه ذبلان عيونه حمر
وسواد جوه عينه مبين عليه يسهر وما ينام شكثر يدخن قدوري
جثير حجى عليه لو يسكت لو يغير الموضوع ويجيبها بضحك قهرني خطيه
هي تحجي عنه واني اتخيل شكله وابجي شسوي شنهو بيدي
مرت الايام ثكيله والشوك والوحده تكتل افرغ قهري بالكتابه
اكتب مشاعري ولهفتي واحساسي
شروق حبلت من ثاني شهر
وشهر يجر شهر واني على وضعي ونزال ما شفنا سميه
تجي يمنا يومين وترجع لأهلها
العصر بالحديقه ارتب بالوردات وعموري يلعب يمي
نغزت اصبعي شوكة جنها بكلبي انغزت مو بأصبعي
امسح بالدم وابجي حيل صاير اتحسس وما اتحمل شي
وامين جان يقلم بالشجره دك تلفونه رد عليه ... ول هاا
شتريد يجدي لااا وين الله عليج خوما بيه شي يله يله جايك
انخمش كلبي ركضت يمه شكوش شبيك منهو هذا
- قدوري يكول غالي ضاربته سياره وجتفه متعور مدري
شي اركضي جيبي دشداشتي بالعجل ول شبيج صافنه
بلعت ريكي بخوف بالكوه امشي انطيته الدشداشه لبسها وطلع
كلبي يدك ما اكدر اسيطر جسمي كله يرتعش كعدت بالكاع
وراسي عالحايط
امي شافتني صاحت بوجهي ... ول شبيج يمعثوره شفايفج
بيض هاج عليج گلبج مدري هذا الخفكعان ول عايشه جيبي
علاجها
شربت الحبايه غمضت عيوني خايفه لا اخسره ما اتحمل بعد
جثير عليا الي جاي يصيرلي
____________
مياده ... دخلت خالتي كعدت
كالت... شبيج ولج مريضه عيونج منفخه شو هسه كاعده
بدون مقدمات سألته ... خاله انتي شنو شغلج وليش باليل الناس يجون عليج نسوان وزلم
ارتبكت تحجي وتمتمت ... شنو دا تراقبيني مو كلتلج ناس كباريه يجون يمي يقضون اجتماعاتهم واقوم بواجبهم ومستفاده منهم
لعد شلون خلصت قضيتج
خاله اني البارحه جنت جوى بالمطبخ وسمعت وشفت كلشي باعي اطلع وانام بشوراع ولا ابقى هنا يمج ما عندي استعداد بعد يصير بي شي لو تبيعيني للزباله هذولا
انفعلت حيل كمت اعيط وارجف
- انجبي واكعدي شنو ابيعج لو اريد جان نزلتج جوى وبعتج الهم باعي مياده حبيبتي بس انتي بقيتي اليه ما عدي استعداد افرط بيج تعيشين معززه مكرمه هنا احركه ليجي يمج لو يمسج بحجايه انتي بتي لما ولدتها لج انتي على ايدي انولدتي شلون ابيعج ابيع روحي وافديج بيها حبيبتي
- خاله لتضحكين عليه بسوالفج اني هسه اطلع منا انتي عيشتج حرام واني اكلت من هذا الحرام يعني ما اخلص اتشبعت بالحرام وين اروح فهميني ويييييييين
- لج اسكتي لتعيطين وعيونج وغلاتج عدي ما وكلت حرام ولا صرفت عليج فلس واحد حرام اني عدي بيوت مأجره من ورث المرحوم وجنت اجمعهم بالبنك ومن عدها اطيج واصرف عليج
كومي اخذج للبنك واشوفج شكد ساحبه اني وشكد بحسابي
- وشمدريني مو فلوس الحرام حاطته وياهم
- لج انتي حمار براسج مو دا احلفلج لج اني مو غبيه لهدرجه اني صح شغلي موزين واعترف ما خايفه من احد بس ما وكلتج حرام غير الزمن الاغبر خلاني هيج اشتغل لتشوفيني هيج تلطشت لين كال الزمن كافي تعرضت الاشكال العذاب ونتفمت من كل واحد اذاني اني مريت بالي مريتي بي انتي واكثرر وبهاي شغلتي
وصلت وصعدت وانتقمت لتعبيني ماما اني روحي بيج ما اذيج
دشوفي هذا الباب الحديد والقفل شكبره خالته بي غير دا احافظ عليج
ما اريديج تنزلين بعد ما اريد احد يشوفج ويلوون ايدي بيج افهمي
ضليت ابجي ومحتاره ما اعرف اصدكها او لا
حضنتني وتبجي ويايه كالت ... بكد ماعدي قوه راح احافظ عليج
لما تكملين دراسه وتوكفين على رجليج وازوجج لرجال يعرف قيمتج ويحافظ عليج ما اريد احد يشوفج دتفهميني معليج بيه اني شنو المهم عدي انتي غسلي وبدلي امشي نطلع مخنوكه وضايجه
غسلت وبدلت وطلعنا اباوع لشوارع وابجي على روحي
دخلنا لمنطقه اشرتلي ... باعي هذا البيت وهذاك
- اي شبيهم همات دعاره
جرة حسره واردفت بقهر ... لا مأجرتهم عوائل
حركت السياره ومشت طلعنا من المنطقه
باوعتلي كالت ... من باجر احولهم بأسمج ضمان الج مو دايمتلج
اني وهذاك اخوج العار لتترجين منه خير لباعج مره يبيعيج الف مره ولتأمين لبشر صيري قويه ولتخافين
ضلينا نفتر تعشينا واشتريت كم شغله محتاجتهم ورجعنا صعدت وقفلت الباب الليل كله كاعده افكر بدون جدوا صابني ارهاق
وتعب وما اعرف شصرف حضرت ملابس الدوام نمت قريبا ساعتين وكعدت رحت للمعهد وهيج مرت الايام صار عدي
اصرار اريد اكون نفسي واعتمد عليها
هذا بعده يراقبني مره يم باب المعهد واكف ينتظرني بسياره
من طلعت لزم ايدي اتخبلت دفعته وعيطت بوجهه ودفعته
بيوم منهن طلعت العصر ويه خالتي صعدنا بسياره دك الجامه
خاله تفاجأة بي تباوعلي وتباوع عليه عاطت بي لك انتي منين
طلعت شسوي هناااا شوكت اجيت
نزال ... شبيج تكهربتي لتعلين صوتج حدري اني اسوق بمكانج
- لا بله صدك تحجي شو فارض نفسك زياده عن اللزوم
- هسه حدري اريد اتفاهم وياج قابل اريد اخطفج يله ياعيني
كولش ضجت منه هذا شيريد ملاحكنا نزلت صعدت ورا وخاله صعدت بصدر وهو ساق السياره وطلعنا بينا يسوق وعينه عليه يباوعلي بالمرايه خزرته حيل ودرت وجهي اباوع عالشارع
وكف يم كوفي كال يله حدري ست انصاف
جاوبته خاله ... شوف اني مسايرتك حتى اعرف شنو تاليته وياك
نزلنا كعدنا بمكان بعيد اول مره اشوف خاله بعيونها الخوف والقلق
بدون مقدمات كال ... انصاف اني اريد مياده
وكفت بغضب ومخنزره عيونها ... انجب لا اشمرك ورا الشمس
وما يلكولك اثر فهمت انت منين تعرفها
- اكعدي لتفضحينا اكعدي مو لبالج اكمع نظر عيني
كعدت تنافخ بغضب وشابكه اصابعها
- اني صارلي جثير مراقبها واعرف هي بنت اختج اني اريد اتزوجها
واخذها ويايه تعيش يم اهلي ومتشوفيني بعد من يوم اشفتها واني دايخ بيها وحبيتها
- انت راعي مكسرات ومومال مسؤليه وهيج زواج ما ازوجها
كمت من مكاني عيطت بوجهه ... انت شو بكيفك تحجي وتخطب وانتي خاله شسالفتج منو كاللكم ازوج تلعب روحي من الرجال والزواج كومي نروح بعد ما اتحمل
نزال ... اكعدي بعد ما تفاهمنا
انصاف ... شتتفاهم عيني دا دكولك تلعب روحها انت متعرف شي
- خاله كافي وامشي نروح لو اروح وحدي
- كال يابه بس نتفاهم غير اعرف شنهو شروطكم وشنهو تريدو
مني يابه صارلي كم شهر اني ما اجي عليج ولا متكلط للحرام
انطيني فرصه اثبتلج حسن نيتي اني جايداخطبها احبها واريدها
مره بيتي
انصاف ... ما اثق بيك هسه عوف الموضوع
سكت ما علق ولا حجى كلمه
خاله اخذت منه السويج وطلعنا صعدت بسياره متوتره
- اكلج هذا وين شافج وشوكت عرف اسمج ليش مكتيلي عليه اطيح حضه هااا من شوكت مراقبج احجي ليش ساكته
- مره طلعت ويه سماهر باليل اشتريت غراض من رجعنا هو
جان واكف اني دخلت وهو يسأل بسماهر منو هاي
يوميه اطلع للمعهد يراقبني بروحه وبرجعه
- ديري بالج على نفسج وانتبهي منه اذا تعرضلج بلغيني واني
اصرف ويا واعلمه بمنو يندك
دوامي مستمر وكل مره اشوفه ما اديرله بال اروح واجي
مر تقريبا شهرين وكل مره يحجي ويه خاله واني ارفض
يصيبني رعب بس اسمع بسيرة الزواج ويجيني غثيان ما اكدر
اتقبل الموضوع
راجعت طبيب نفساني اربع جلسات وتركت ما كملت ويا
هوايه اتعب وتتعب نفسيتي
خلص دوامي وطلعت من المعهد وكف كدامي
- كال بس احجي وياج ما طول عليج
رفضت وتعديته
وكف كدامي كال ... ارجوج بس احجي وياج
وكفت بعيد كلتله تفضل احجي اسمعك
- اكدر اعرف عليش رافضتني
- لان اكره الزواج والرجال كلهم
- اي عليش غير اكو سبب غير افتهم
- اني مطلقه وتوه طلعت من تجربه فاشله زواجي ما طول غير
شهرين وانهزمت منه لانه مثلك سكير ويدور عارات ودعاره
ويله امشي منا وبعد ما اريد اباوع بوجهك
مشيت بسرعه واني منهاره ولعبانه روحي وصلت البيت
جتي خاله كعدت تحجي وتقنعني
- يمه توافقين عليه بشروطج تريدين هنا ويأجرلج شقه لو تروحين
ويا وتتعرفين على اهله وتشوفيهم رغم مكسراته بس هو ابن
ناس وعيشره وعدهم غير عالعرض فكري بالموضوع اني اريدلج الستر مو دايمتلج اني واخاف عليج هنا يوميه ميت تفكير يجي بالي
- خاله مثل هيج واحد تتوقعين اعيش مرتاحه وياااا وهو بنص الزباله ومتعلم عالحرام هذولا ابد ميعجبهم الحلال،الحرام يمشي بدمهم
- انتي اهدئي وفكر وبعدين هو من يوم لشافج بي لليوم ماوصل يمنا لج اني مخليه واحد يراقبه هوايه متغير موذاك نزال اني اعرفه من
زمان وميفوتني شي لو ما واثقه من كلامي ما اجي احجي وياج
- ما اريد تعبت ما مستعده افشل مره ثانيه اكمل المعهد واتوضف
اعيش لنفسي وبسسس
- لج حماره الزواج ستر الج حلوه هسه كله تدري بيج مطلقه وانتي بهذا العمر وبعدين خمو راح نوافق بهالسرعه اراقبه زين واعصره عصر يله انطيج الاوكي وبالمناسبه ترا حلو ما يتعيب بس شعره خفيف ههه
- كافي خاله احس راح اتقيء عوفيني راسي حينفجر من التفكير
راحت خالتي واني كعدت ضجيج براسي افكار متضاربه ومتزاحمه ما اكدر اقرر ماعدي قدره اتخذ اي قرار ولو بسيط ايدي على راسي كعدت بس صافنه وكلامها يرن براسي كلامه هو وشكله ونظراته من يتوسل ما اعرف شصرف تعبت حيل
باليل اندكت الباب بقوه فزيت من مكاني خفت منو اجى عليه
لبست حجابي وكفت ورا الباب
- اني سماهرر افتحي الباب مياده ادري بيج كاعده
فتحت الباب اباوع عليه ميته بجي وترجف ... شبيج تعالي ادخلي
دفعتني ودخلت تعيط ... كله من وراج انتي منين اجيتي بعد ما
يباوع بوجهي ولا يتقرب يمي كله منج من شافج تخبل كرهني
بسببج اطلعي منا ارجعي منين ما جيتي شجابج علينا
- انت شتخربطين وانتي شعليه بيكم اطلعي برا اطلعي وبعد ممنوع توصلين هنا فهمتي
نزلت تبجي وتتوعدلي بصراحه خفت منها
قفلت الباب كعدت مرعوبه اني لازم اطلع منا .......!
.
.
.
.
.
. ....... يتبع
💙🥀💙
قد لا نستطيع اصلاح كل شي لكننا نستطيع
الابتعاد عن كل ما يعكر مزاجنا ويؤذينا
دمتم بخير احبتي بالله
رونق السلطاني 😘
جاري البحث عن شبيهة الهايشه اااا اقصد شموخ 😁