هذيانٌ بين جمرٍ وجليد ..(ارملة اخي المجنونة)

64//

السلام عليكم
هذيان بين جمر وجليد
الفصل ثلاثة وستون
نورا ناصر

**

أحبّك أكثر، في كل مرة نوشك على الإنتهاء و لا ننتهي، أحبّك بقدر هذا التشبث، بقدر رغبتي في البقاء معك رغمًا عن كل هذه الكوارث و كلّ الأسى .

**

وگعت بالكاع منهارة ، تحولت صلابتي الى سائل كرفصت وايد على بطني وايد ع الگع أُسند بيها جسمي .وجبيني على ركبي . واشهك وابجي ..

سمعته تحسر ..وكال بنبرة هدوء هذا هو لتبجين ... على راحتج شنو تردين انه حاضر بس انت صيري واقعية ماتشوفين حالتي شلونهه ..

امي ماصار ايام من دفنتهه ، الناس للفجر يجوني جايين من مكان بعيد ولازم اطلع واقابلهم راسي ماجاي الحك احكه ..

وانت جايتني طلكني ومدري شنو عليش مستعجلة بالله العريس يتانيج اباب البيت لو شنو السالفة

بقيت على وضعي وابجي ورجعت اللثام على وجهي .. يحجي ببرود ولا يهمه نيالك ع برودك اي والله نيالك والله يعيني على جمري وناري ..

رفعت راسي باوعت بعيونه هو واكف واني انتحب كتله اريييد اعيشش حياتي وماريد شي يربطني بيييك وقابل اني كل يوم جاية لبغداد هيه بس هالمرة ...

خزرني وادار وجهه تحسر ..

و بعد ثواني مد ايده گومني .. ادري بي هو من نوع مايقبل يذل روحه لمرة ابد ولا يتوسل بيها ترجع اله

لزمني كومني من الكاع ، نفضت روحي منه ، وانطيته ظهري وخليت وجهي بالحايط وبعدني اناشغ مثل طفلة زعلانة

جان قريب مني وقربه هذا حسسني انو بس يريد يريد يضمني يريد يشفي شقاء اشهر من الجفاء والبعد ..

حسيت بدفئ قربه ، لا مو دفئ وانما كان جسمه نار مشتعلة وملتهبة ، وهو يحتظن ضعفي وألمي ..

بينما اني احاول اسيطر على مشاعري الي تحارب حتى تظهر كدامه ...حاولت اقاوم هالمشاعر الخاينة الي تهدد بالاستجابة اله ..

ظل يهمس يم إذني ...
اي ليش البجي يا بوويه!!! ... تردين ترجعين ارجعي والله اعوضج عن كل شي .

نسافر للخارج تتعالجين باسرع وقت اعرضج على احسن الاطباء بالعالم

التفتت ووسحبت نفسي منه وابتعدت عنه .. واني امسح دموعي بقوة وبنبرة ثقة واصرار وحزم رديت عليه ..

_ لاء ما اريد ارجع ولا اريد منك اي شيء .

عندي خيبة امل منك كافية لحتى تخليني مارجع وثقتي بيك معدومة واريد اشوف حياتي بعيد عنك احسن

واني متأكدة انو حياتي بدونك احلى بهواي

تحسر حك لحيته وبعدها بنبرة هدوء وروية سألني : جا ليش بجيتي !

رحت كعدت ع الكرسي وهو اجه وكف يم راسي ، جاوبته واني امسح دموعي .
_ تذكرت شيء ..

_ شنو الي تذكرتي !

بغصة رديت ... تذكرت بنتي ..

كرفص كدامي ولزم جوانب الكرسي الي كاعدة عليه ..
_ ارجعي واعوضج ..

باوعتله باستهزاء وارتفعت جانب شفتي بسخرية ..
_ اني مو شالعة قلبك ليش تريد ترجعني !

ابتسم ابتسامة حلوة "عيونه تنبض بالحب"
رد : - حتى شلعان گلبي منج هم احبه ..

باوعتله بضعف وشحيت نظراتي بسرعة منه ، دنكت اعصر باديه -: لا تغازل حرام انت طليقي هسه واني محرمة عليك ..

سمعت صوت ضحكته .. وهو يكوم .. جاا شون نشوفلنه وحدة نتغزل بيها ..

صكيت سنوني ثواني .. يعزف ع الوتر الحسساس العرندس صاير .. تدفقت نار الغيرة بداخلي ..

وحجيت ويا اتصنع البرود فشلت بي ورافعة تك حاجيبي .. شووفلك وحدة قابل لازمتك اني ؟ واني هم اشووفلي واحد ..

ضغط على ايدي حييل ونظراته تحرقني بنار غيرته االمشتعلة .. :- افگسسسس عيونج والله .. ولسانج اكصه اذا حجيتي هيج مرة ثانية ..

فلتت ايدي منه وگمت وبعده محاصرني بجسمه ..واني صايرة بينه وبين الكرسي ، عيوني بعيونه تنهدت
وكلت : صار فيها فكس عيون ووگص لسانات اني اترخص واروح ....

لزمني من ساعد ايدي وهمس بنبرة مخدرة ..
_ شبيها ام جاسم چنها خافت!

سحبت ايدي منه .. وخليتها ع لثام وجهي
وحجيت :- لا ام جاسم ما تخاف بس من الي خلقها بس اشوف ابد ما لها داعي كعدتي هنانه مدام ماعندك عقد الطلاق وناس تنتظرك برة وبس مأخرتك عن شغلك اني بلا فايدة وهمين ماريد ندخل بالممنوع ..

كال بجدية وحزن :- فرح ما طاب جرحج هاي اشهر انت زعلانة كافي عاد رجعي ونصلح كل شي ..

باوعتله واني متوجهة للباب : لاء ما ارجع علي ما ارجع ابقى ارتاح مني احسن

تقرب مني بخطوات واسعة :- مو حتى الراحة كرهتها ببعدج والله ..

_ انت مو طلكتني بعد شنو هالكلام ؟

تقرب مني اكثر .. ارجعج على ذمتي شكوو بيها يا بوية ؟ قابل اول اثنين يتطلكون ويرجعون وبقت يمج بعد

بس أني مصرة علي لتحاول وياي ، أريد اشوف حياتي
بعيد عنك لان ماشفت شي حلو وياك

كال براحتج بهدوء وراح كعد ورى مكتبه بكل برود وبدون مايلقي اي نظرة عليه واني اتابعه بصمت وقهر

كعد ع الكرسي ولبس نظارته الطبية وظل يقلب بالاوروق كدامه ..

بيوم من الايام راح يقتلني برودك يا علي مو من شي ثاني اموت ..

كتله بتحدي .. ودين دفنت بنتي! اريد اروح ازور قبرهه ..

رفع راسه وثبت اديه ع الميز .. كال انت شوكت ترحين ترجعين لكركوك ؟
جاوبته ... ما ادري بس مبقى شي وارجع ..

كال قبل لتروحين بيوم كليلي اني اجي عليج لبيت خالج واوديج واذا تحبين تبقين هنا ابقي هذا هم بيتج وبيت ابنج

رديت انت بس انطيني العنوان اني احتار بروحي انته لا تاكل همي

رد بعصبية .... ولج يا عنوان الي انطي الج هيه الگبور الهه عنواوين مگبرة شگدها وشكبرها اذا انطيج العنوان وين تطيحين بالكبر كتلج انه اوديج

تنفست بملل وهزيت راسي وطلعت من بيتهم ورحت لبيت خالي .. ويه مرة خالي . ..

هم الفاتحة عبالك مستمرة عدهم ومر اسبوع قررت اروح اله حتى يوديني لقبر بنتي لان بعدها لازم ارجع لكركوك منكدر نبقى اكثر

كعدت الصبح ورحت اغسل وكفت مقابيل المراية .. باوعت على رقبتي .. وخليت ايدي على اثار الحروق الي واضحة بيها .. تذكرت بيومها جنت لابسة كلادة

هالكلادة كولش احبها سلسلة ايطالي ومدالية على شكل دمعة وبيهه لؤلؤة ناعمة حيل جانت

ولمن حصرتني النار صار حارة تجوووي حييل حسيتها تذووب بجلدي الي احترك ، بسرعة مديت ايدي وكطعتها وشمرتها بالغرفة وللنار الي التهمتها وبقى اثرها بركبتي ..

غمضت عيوني ووياهه سالت دموعي .. ذيج الليلة مستحيل انساهه بعمري وراح تبقى تحاصرني ذكرياتها طول ما اني عايشة

غسلت وطلعت شفت ابن خالي ينتظرني خطية .. كتله وليد بس لحظة خاف اخرتك عن شغلك ..

رد لا اخذي راحتج فرووحة بعد وكت ..

رحت للغرفة نايمين خالة وانين والجهال لبست صاية سودة وشال اسود وطرفه لفيته على وجهي وخليت دبوس وطلعت ويه وليد وصلني للبيتهم وراح

اني من دربي من باب الحديقة وراسا لباب المكتب الخارجي دكيته واجاني صوته يأذنلي بالدخول .

ولمن فتحتها شويه شفتها كاعدة يمه على الكرسي الي يصير بجانب المكتب .. وهو ورى المكتب وجانت تسولف ختام وفتحت حلكها ..

حسيت بانار تجتاح كل اوردتي ... كبريائي ماسمح الي افوت عليهم خايفة لا انهان ، سديت الباب بسرعة وفتت للبيت ..

اسمع الصوت يجي من المطبخ ، جان الوقت صبح
وبعد هواي اكو ناس بالبيت ، رحت طليت ع االمطبخ اريد موج مشفتهه وياهم صعدت الدرج ورحت لغرفتها دكيت الباب ثواني وطلع شرار

باوعلي شويه بس اني ما اكدر حتى احجي غصة ببلعومي احسها تمنعني وتفضح المي وقهري ..

هو كال بعد ما عرفني من عيوني عفية فرح ترة تخوفين هيج وماله داعي تلبسينها هايه

كتله وين موج .. ؟ اريدها صيحها ..
كال بالحمام هسه تطلع روحي جوه انتظريها اني نازل ..

نزل واني فتت جووه بغرفة موج كعدت على السرير وخرت اللثمة وكعدت صافنة على وجهي بمراية الكنتور

هاي شسوي ختام جايه هنانه !! اي جايه تعزي بس هو شون يستقبلها بعد كل الي سوته بيه ! لو اني خلص صرت ماضي

ظليت ارجف كلي رغم الجو حار هسه .. وشبكت اصابعي وعصرتهم ..

طلعت موج من الحمام لافة راسها تفاجئت بيه .
ها فرح اشو مكلتي راح تجين ..

فركت وجهي وكلت اي نسيت اخابرج واكلج جايه ..

اجت كعدت يمي شكوو شبيج وضعج معاجبني ؟

التفتت عليها .. كتلها هاي شسوي جايه يم علي ...
كالت متعجبة .. منو تقصدين ؟
رفعت ايدي ونزلتها كتلها ختام بعد منوو ؟

ردت ها اجت تعزيهم لان بالفاتحة جانت هيه ماكو مسوية عملية قبل فترة ومكدرت تجي ..

سكتت وبقيت مدنكة وهيه لزمتني كتفي
كالت .. وين شفتيها ؟ رحتي لعلي لمكتبه وشفتيها ..

رفعت راسي .. لعد هيه من شوكت يمه ؟
كامت على حيلها ما ادري واالله .. فتحت الخاولي من راسها وتنشف بشعرها ..

كمت على حيلي ... موج اني رايحة للبيت
التفتت عليه متفاجئة .. ليش تروحين ابقي ؟
هزيت راسي برفض ...
اجت يمي هو شكو احجي وليش رحتي لعلي للمكتب شنو تردين منه ؟

جيته حتى ياخذني ازور قبر بنتي لان مبقى وقت باجر نرجع لكركوك بس الظاهر ممقسومه ..

ياااعمري انتي وحضنتني لتضوجين متوصل لاضفرج والله لمكانتج عنده والله ليش تقهرين روحج ، امشي نفوت عليها للمكتب نسحلها سحل ونطلعها من عنده

وخرت منها واباوعلها مصدومة صدك موج نروح نكتلها ؟ ونطلعها صدك هيه شعدها باقية تعزي وتطلع شكو مشلغمة ..

ضحكت ولج لا عيب قابل بيتنا هو حتى نكتلها ونطلعها بس نروح نفوت عليها ونسلم على الشيخ ونحسسها بوجودج

هزيت راسي بحزن .. لو مو بهذا وضعي جان رحت بس اني مكسورة هسه ..

ردت وشبيج مكسورة ليش هيج فرح انعدمت ثقتج بنفسج حبيبي بعدج حلوة وتخبلين وكلها مسالة وقت وعلاج وترجعين تخبلين والله والي صار مو بأيدج ليش هيج فد نوب ضايجة ..

بعد حسيت رجليه ماتحملني حملتني هواي وتعبت بسبب كمية الالم الي بيه .. رحت كعدت مرة لخ
كتلها بس بصفتي شنوو وافوت عليه وازعجه واقتحم خلوته الظاهر هو يريد يعدل علاقاته الي خربتهه اني بعد ما طلكني مووج طلكني ..

هزت راسها وكالت تؤؤ شنوو هالحجي وراحت طلعتلها ملابس من الكنتور وتوجهت للحمام كالت طلكج لان انتي ردتي هالشي وكل شي صار كدامي اني هو راد راحتج وتنفيذ طلباتج .. هسه اللبس وننزل سوى ماشي ..

هزيت راسي ، ردت اضيع حزني ..
غمزتلها :- شعندج سابحة من الصبح مو عمتج بعده ترابها اخضر ..

ردت :- لا ولج والله كعدت من الفجر ساعدتهم بالطبخ والجو حار عركت .. تتذكرين من جنت اكعد من الصبح اسوي رياضة هسه اكعد من الصبح اطبخ .. اصلا حتى الرياضة ناسيتها صار اشهر ..

_ هسه تروحين لروسيا ولعبي هناك على راحتج ..
طبت للحمام ومناك تحاجيني ولج انتوا بكركوك وميتة عليكم وماحمل فراككم بعد بروسيا والله ما اعتقد راح ارتاح واني بعيدة

رحت وكفت يم الباب الحمام لاتكولين هيج وتخوفيني عليج .. طلعت لابسة ثوب وتعدل بي .. بوستني بخدي
لتخافين عليه حياتي بس اني ما ابقى هناك ارجع بس اكمل دراسة

وشرار شلون لعد ؟ وخاصة امه توفت هسه جياته راح تقل لهنانه اكيد

تحسرت كالت نحلها بعدين الله كريم هسه ..

يعني انتوا ما تناقشتوا بهذا الموضوع ؟ جاي اشوف الحيرة بعيونج !

تناقشنا بس كل مرة مانوصل لنتيجة .. خليناهه للوقت ..

ومرته شلون ؟ عرفت تزوج لو لا ؟

لا ماعرفت بس عرفني عليها وكاللها بنت عمي حتجي تدرس يمنه .. بس مرته شكلها يخوف شكلها ذكية ومراح تعبر عليها

شلون يعني شكلها يخوف قبيحة يعني ؟

ولج لا مو قبيحة عيونها ملونة وشكرة بس باردة ملامحها باردة حيييل ..

كملت :- اتركيني هسه وامشي ننزل جوة للشيخ بلكي ختام راحت هسه ..

لزمت ايدي تسحبني وراها سحب ونزلنا ، اني مجنت رايدة اروح يمه بعد ماشفت ختام وياه ، ضجت منه وماريد شي بعد غير اختفي منانه بس موج اصرت ..

وصلنا لباب المكتب الي يطل على البيت انفتحت الباب مالته وطلعت ختام وسدت وراها الباب .. ظلت تباوعلي خليت عيوني بعيونها مخلية لاصقة على خشمها واكو شويه زراك جوة عيونها ولابسة اسود ..

هيه سألت موج هاي فرح ؟
جاوبتها موج بلي .. ممكن بلا زحمة تسوين مجال نريد نروح يم الشيخ عدنا موضوع وياه قبل لا يطلع

تجاهلت موج ووجهت كلامها الي فرح الحمدلله على السلامة سمعت حركتي روحج يمعودة محد يستاهل شون هيج سويتي بنفسج!
تحجي هيج ومبتسمة بشماتة وتشفي

شهكت اني وموج عاطت بيها شنو شنو هالحجي هذا منين جايبته حضرتج ؟ لو انتي مألفته حتى تغثين اختي لوو شنو مووضوعج ؟ جاهلة انتي ؟ جااهلة

ضحكت لا يمعودة شنو ائلف مواضيع اني غير سمعت الناس تحجي واني حال هاي الناس

موج ردت بعصبية ولازمة ايدي :- الناس تافهة يشمرون تهم على العالم بلا ميتأكدون انتي هم تافهة مثلهم ؟ هاي عود انت المثقفة الدارسة ..

بنتر :- على كيفج شنو كلت هسه اني هو منكم وبيكم الي كال ..

فتح الباب مال المكتب وطلع الشيخ وكال شكوو شصاير شنو هالصياح شبيجن تصيحن ؟؟

ردت موج .. بدون نفس وبعدها معصبة ...
الست ختام مدري منين سامعة فرح حاركة روحهه ودتنطيها دروس ومواعض وتنصح ..

باوع لختام بعصبية .. وهيه تلاشت ابتسامتها .
كاللها شنوو هالحجي هذا منين سمعتي ؟

ردت اني بس دا اتحمد الهه بالسلامة ماعرف شنو صار الها ومجرد سمعت ..

هو رد سمعتي سمعتي ختاام ؟ وانتي شنوو بوية ببغاء وتكررين شكوو تسمعيه؟ وبعدين احنه ليش ما سمعنه بس حضرتج

الي صار حادث وقدر وفرح عاقلة ماتسويهه بنفسهه واذا سمعت احد يحجي بي هذا الموضوع راح احملج انتي مسؤؤليته

لان اول وحدة سمعته منج انتي ، محد حجه بالموضوع غيرج وراح يصير تعاملي وياج غير شكل ..

هيه اعتذرت واجت بوستني وتحمدت السلامة مرة ثانية واني واكفة بدون حركة وخلت وراحت ..

ظليت ارجف معقوولة معقوولة يكولون عني حركت روحهه؟ بعد كل الي صارلي شفت الموت بعيني وفقدت بنتي وابني لهسه يعاني من الالتهاب الي صار لرئاته وتالي اسمع يكولون هيج عني صدك ناس ماترحم ..

طلعت تليفوني وانطيته لموج وشمرته عليها
واحجي وارجف وصوتي كوة يطلع ..
هاج خابري وليد خلي يجي عليه بسرعة يله

هو اخذ الموبايل من ايد موج وسحبني اني همين وسط مقاومتي وكال لموج روحي على شغلج بوويه ..

دخلني للمكتب وسد الباب كتله وخر وخررر علي بعد شنوو الي اريد اشووفه واسمعه من اهلك مطلعيني حااركة رووحي انووب ليييش لييش ..

اريد اطلع من الغرفة اختنكت اريد اشم هوا .. هو محاصرني وميخليني اطلع الى ان اخر شي احتضني

انهاريت بالبجي .. تركت وجعي على صدره وبللت ملابسه بدموعي الغزيرة .. وهو يزيد ضمي اله وبشدة .. حتى حسيت بي يريد يخبئني داخل ضلوعه ويبعدني عن حزن العالم اجمع

وخرت عنه بسررعة ونترت بي وخرر عني علي بعد شنوو اريد اشووف منكم شنووو حظي هذااا حظييي اخخخ ياابه اخخخ يتريتمي سمعت كلامك وماقبلت اتزوج يااررييت

بس ابويه وافق يزوجني الك وماعارض عكس لمن خطبني حمدان وشوف انته شسويت بيه شسسيوويت ..

لزمني من معاصم اديه وقربني اله وسط رفضي ومقاومتي وخلاني على صدره واني ادفع بي وهو يهمس شنو تردين هسه يجراللج شنوو تردين

نترت واني ابتعد عنه كوولشي ماريد بس عووفني ارجع واني اعرف شوون اتخلص منك والله اعرف مو صعبة عليه تحلم تشوف خيالي بعد

لزمني من كتفي ومشى بيه وكعدني على القنفة
وبعده لازمني من اكتافي قوي ، مشيت وياه مرغمة ، فعلا اريد اكعد لان تعبت رجلية من الوكفة والقهر وماعادت تكدر تحملني

بقيت على هالحال ابجي .. هو يهدي بيه ويهمس يم اذني .. كال شنو تردين تسوين سوي بس لا تحرميني منج

_ انته متستاهلني ابد اذيتني علي اذيتني .. حياتي بعيد عنك احسن ..

ابتعد عني وتنهد .. امشي تروحين تزورين بنتنا هسه ؟

باوعت عليه وامسح بدموعي هو جان يباوع بعصبية وغضب مكتوم ..

كام من مكانه وراح جاب بطل مي وانطاه الي ..

نترته منه كتله مااشرب وراها اني ..

شمره بقووة وكع ع الكاع ، جفلت اني وكمت على حيلي بس ما صمدت هواي رجعت كعدت مرة ثانية ..

هو راح ظل يخابر والتليفون على ايده واسمع يكللهم طلعولي السيارة برة ولزموا مكاني اروح وارجع .. بس جان يحجي بعصبية ..

خفت منه اني .. اجه لزمني من ذراعي .. لزمته من زنده كتله وين موديني ..

كال بنفاذ صبر .. انتي شوكت ترجعين لكركوك ؟

رديت .. بعد مابلعت ريك بقلق .. با بجر ارجع من الفجر ..

كال وهو يسحبني امشي زووري بنتج ..

واخذني للسيارة صعدني كدام وهو صعد يسووق ..

جان معصب وهو يسووق .. ويتأفأف واني ظليت ساكتة بس دموعي تجري ، وخايفة منه حيل

باوعت للسما اناجي ربي
مراح اشوف يوم حلو بحياتي حتبقى حياتي هيج ؟ بين الم وتعب وعذاب ! اوف ..

باوعتله وين موديني ..

كال وهو ينفخ دخان جكارته مادري من شوكت يدخن ... كم سنة وياه ماشفته يدخن هيج وبشراهة ..
كال شنوو مو كتلج للمقبرة شبيج مالج ثقة بيه ؟

كتله لاء ..

باوعلي وتنهد بخشونة .. ودار وجهه ع طريق ..

وصلنا المقبرة ونزلنا منها وظليت امشي وراه واتعثر هو رجع لزمني من ايدي ، الجو حار كلش والشمس تصكع

حسيت بجسمي يحكني .. بس تحملت كووة وهو لازم كف ايدي وشابك اصابعه باصابعي قوي عبالك راح اطير .. واني لابسة جفوف سود وصاية فضفاضة وشحاطة سودة ام الاصبع فلات وتزحلك كل شويه وتفلت من رجلي وارجع اللبسها وهو يوكف ينتظرني اللبسها بس مايترك ايدي ..
اني اموت من الاحذية هذا طبعي اللبس كله شحاطات

وصلنا لقبر بنتي هو مسميها فاطمة ع القبر مكتوب اسمها كعدت بالكاع وانهاريت بالبجي واخلي ايدي ع القبر الي يحتضن جسمها

ماكدرت مااشكيله هو كتله علي جنت رايدتها جنت فرحانة بيها جان هسه هيه بحضني تلعب تضحك ليش ماتت ليش

تقرب مني قدر ربج هذا فرح مو احسن اخذها من بطنج وماشفتيها ولا متعلقة بيها واخذني لقبر ثاني بصف قبر بنتي كال هاي بنتي شوفي تعلقت بيها شفتها شفت ضحكتها وكبرت بين اديه وفجأة الموت خطفها مني ..

باوعتله بحزن ... واني هم تعلقت بيها وهيه ببطني جنت احاجيهه اناغيهه اغنيلها احسها تستجيب الي

خله ايده على راسي من ورى وسحبه اله .. وباس راسي .. كال يله نروح راسج صار حار الشمس حركتج مو زين عليج ..

كمت وياه وتوجهنا للسيارة .. وانطلقنا .. ظل يسووق ويدخن واحس الطريق صار طويل باوع عليه
كال جعتي انزل اجيبلج غدة ..

ماريد وديني لبيت خالي ..

منو راح يوديكم باجر لكركوك ؟

احمد راح يجي علينا ونروح ....

هز راسه ورجع يسوق ، انطاني مي كال اشربي عندج كليتج تعبانة دوم اشربي مي

اخذته منه وشربته .. ورجع يسووق .

علي الطريق موو جنه صار طويل وين مووديني!!!!

سكت بس يتنهد .. واني نهاريت ضربت على وجهي عزااا علي بس لا موديني لبيت المزرعة مرة ثانية صخاام بوووجهي ..

رجعني لااا والله اشمر رووحي من السيارة والله .. تريد تحبسني لا والله هالمرة من صدك احرك روحي وانتحر واخلص منك ....

موج ..

دخلت للغرفة ركعت الباب ركع من العصبية ، شفت شرار ع الجرباية ويخابر ...

هو من شافني هيج معصبة نهى المكالمة وكام اجه باتجاهي ..

واني بس انفخ ونزعت الشال شمرته هو ابتسم
كال اول مرة اشوفج هيج عصبية شبيج منو مزعلج يا روحي ..

صكيت اسناني هاي هاي ختام الادبسز استغفر الله ورفعت شعري ليفوك بعصبية

هو لزم ايدي وكال شكوو شبيهه شسوتلج ارووح ازينها كرعة والله ..

سحبت ايدي منه كتله تكول لفرح انتي حاركة روحج قهرت اختي الله يحركها بنار جهنم ان شاءالله ..

كال تولي حاقدة ماحققت غايتها ظلت تطلع اشاعات وينها فرح هسه ؟

اخذها اخوك فوتها وياه للمكتب ...

كال الله يهديهم بلكي يتصالحون ..

رحت كعدت على السرير .. كتله ميتصالحون اصلا فرح منهارة وما اعتقد هو راح يتحملها ..

اجه يمي كعد كال لا تخافين على علي الدر يعرف شلون يسايسهاا لتهتمين ..

رحت للحمام غسلت وجهي .. ورجعت للغرفة نشفته .. كعدت يمه وهو لازم موبايله .. جنت تخابر نيفرا ؟

رد اي عمود موعد الطبيب مال حمودي جنه نتناقش ..

خليت ايدي على صدره فركته كتله اسفة حبيبي بس قطعت عليك مكالمتك بس عصبت كولش ..

سحبني كال ولا يهمج فدوة الج ..

كتله بنبرة مترددة .. شوكت ترجع انته ..

رد .. ما ارجع هسه اخذج وياي لمن ارجع .. ورى اربعين الحجية تكون الجامعات فتحت .. اخذج ونروح ..

أنين ...

لمن شفته بعزااء زوجة ابوه ، قررت ما اروح ولا اوصل بعد .. احاول انسى

خابرني عمر ظلينا نحجي ضوجني بكلامه هواي يعتب ويلوم واحسج ماتحبيني ومن هالكلام ما اعرف شنو ارد عليه ... احتار وياه ..

كتله .. لا بالعكس بس بعدني مماخذة عليك ان شاءالله اتعود عليك ويتغير كل شي ..

رد ... شتتعودين عليه يمعودة مو راح نتزوج وانتي بعدج تصيحين اتعود واتعود ..

بصدمة جاوبته : نتزوج شووكت ؟

كال شبيج انصدمتي خو منبقى هيج العمر كله مخطوبين ..

لا عمر مقصدت هيج والله بس زحمة من اختي وعيالها هستوها ام رجلها توفت وعيب منهم

رد ... ترى اعرف اني بس الزواج يتأجل لبعد الاربعين وبس ، بعدها نتزوج ماعندج عذر

كتله بارتباك .. مادري اشوف احمد واخواتي ..

كال .. هم راح يتزوجون لوو احنه شبيج انتِ أنين؟؟

_ افتهم عليك بس لازم نشاورهم ، هسه انته ماكلت لعمو وعمة ؟

_ اي طبعا كتلهم .. بس القرار راجع الي اني احدد الموعد بالشهر واليوم تمام هيج

_ تمام واني هم لازم اشاور اهلي واخذ رأيهم ويصير خير .

_ شوكت ترجعين لبغداد انت مو جنه طولتي هيه الفاتحة تلث ايام وانتي صار اسبوع !

رديت بهدوء -: باجر نرجع عمر حيجي علينا احمد ونرجع ..

_ اوكي واني يمكن هم اجي وياه ..

ريلام ..

بعد ما مر اسبوع على وفاة بيبي رجعنه للبيت مال بيت جدو ، جنه باقين بيت خالو ..

لمن رجعنه صعدت فوك للغرفة اخذت ملابس ورحت سبحت ويوصلني صوت ماما من الصالة تبجي على بيبي وبيبي مكابلتها وكلام ماما ما يخلى من كلام اللوم والعتاب ...

وتكول حرمووني منها وطردووني حركوا كلبي عليها خلوهه بيد الغريبة وموتتها طول عمري مداريتها واني يمها ما ماتت من صارت يم الغريبة ماتت

هزيت راسي واستغفرت ربي خطية لو ما بيبي خابرتها من تليفون موج ووصتها على موج وكالتها ترة دارتني بس شسوي امي حاقدة عليهم ..

بيبي جانت تجاوبها كلنا نموت كولي يا الله ولا تهمين بختج ..

فتت سبحت وطلعت ، دا امشط شعري اجتني رسالة من مهيب .. فتحتها كاتب هاا رحتوا ؟ منو وصلكم ؟

جاوبته اي رحنه خالو شرار وصلنا ..

رد ... عبالي وجه البشة سمير وصلكم جان عرفت شون اطيح حظج وحظه ..

كتبت اله واني شعليه وبعدين حتى لو هو يوصلنا قابل وحدي وياه ويه ماما وبيبي وهيام ...

رد ... معليه اني متصعدين وياه تخابريني واني اجي اوصلكم ..

كتبت اله .. عاد شلون تحبك ماما وتخليك توصلنا هههه ..

رد .... معليج معليج تحبني مو اني راح اصير زوج بنتها ..

... غصباً عليها موو ؟

... غصباً عن العالم كله مفهووم ..

ضحكت وكملت تمشيط شعري .. فاتت هيام متخصرة امشي نزلي جوه للحديقة سمير يريدج ..

رديت عليها خلي يوولي شنوو يريد مني ؟

كالت مادري نزلي شوفي مدري شنو عنده وشغلة تخص مهيب يريد يكولها الج ..

تفاجئت شغلة شنو هاي الي تخص مهيب !!!

لفيت شعري ولبست شال ونزلت جوا فتحت الباب مال الاستقبال شفت سمير واكف تذكرت مهيب يسمي وجه البشة عنده ذيل من ورى بشعره ضحكت ..

هو التفتتلي مبتسم بخبث .. كتله خيرك شكوو شتريد ؟

كال تعالي اشوفج شي يخص الي تكولين عليه ارجل مني عبالج الرجولة بالكلام المعسول مووو؟ تعالي عندي شي يفيدج ..

فتحت الباب وطلعت .. وكفت يمه ..
هاا شكوو ؟
فتح تليفونه وطلع فديو وخلاه بوجهي وكبال عيوني ..

جان الفديو بعيد شويه بس كاميرا تليفون ويسوي زووم ومهيب كاعد ويمه بنية وجانوا يسولفون ومندمجين

المكان جان مطعم والبنية اتذكر شايفتها بس وين ما ادري شكلها مو غريب ابد ..

نترت التليفون بأيدي .. كتله شنووو هاي .. ماصدك جذب ...

رفع حواجبه تردين تعرفين شنوو السالفة ريلام ؟

كتله بانفعال :- لااء ماريد اعرف ووخر عني يله اصلا مهيب صارله كم يوم بالفاتحة ماشايف دربه انته جذاب ..

رد .... ولج هذا الفديو قبل ما تموت الحجية شبييج حمارة وهاي صاحبته لمهيب طبات وطلعات وشقق وغمزلي ....

كتله بعصبية جذاب جذااااب ما اصدككك وخر عني ..

رد كيفج اني باعي خلي اكوولج ترة هاي البنية خطية مطلقة وهيه صغيرة وهذا مهيب يستغلها واكو فديو ثاني يتخذها لشقة بس المطي الي كلفته يراقبه حذفه بالغلط

اني جيت اكولج من قبل بس راعيت مشاعرج خطية بيبيتج توهه متوفية كلت بعدين اصدمها

وبعدين ليش تنصدمين شتتوقعين من واحد ضابط هم كلهم هيج ترى دينهم ومذهبهم النسوان والسوالف المسقطة وانتي فرحانة . ارجل منك ارررجل منك ننننن كبر لفج شكد مطية

خلي تفيدج رجولته وهو يخونج ويلعب لعب من وراج ..

كتله ارسلي الفديوو بسرعة يله ..

تدللين بنت عمي ثواني بس..

عفته وصعدت فووك .. رحت لتليفوني جيكته شفته راسله الي ..

رسلته لمهيب بسرعة .. وبقيت على نار واعصر بأصابعي ومتوترة

هيام كاعدة ع الجرباية .. شبيج ولج جنج وحدة تطلك تريد تجيب كعدي وترتيني ..

اشرت الها باصبعي معلييج انتي سكتي عني .. غمتني واخذت تليفونها وطلعت ..

واني ظليت كل شويه اخابر على مهيب بس موبايله مغلق ..

سووينا عشى واني لكمة مخليت بحلكي ميتة قهر وكل شويه افتح التليفون والفديو مااستلمه هو شمرت الفون ونزلت جوة يم بيبي وجدو ..

وبعدها صعدت سمعت صوت موبايلي يرن بس ملحكت على المكالمة قبل لا اخذ الفون خلصت ..

اخذته شفته مهيب .. فتحت الفون راسلي رسائل
كاتبلي هااي شنوو هذا يا كلب ابن كلب مصورني!! لايكون ابن عمج وجه البشة ؟

بين ما دااقرا رسالته هو اتصل ، فتحت خط اجاني صوته .. مبين كاعد من النوم ..

كتله منوو هاي مهيب ؟

رد بكسل هاي جمانة ..

كتله باع مهيب بعد تنسى وحدة اسمها ريلام عسى ما احترك امووت اتزووج معلييييك بيه افتهمت!

لهيب...

علاقتي تحسنت ويه هدى من راضيتها وراضييت نفسي شفت بيها جانب مشرق وحلوو

شفت بيها انثى هااادئه وحلوه ورقيقه عكس هدى الوكحه ام اللسان

جانت لبوه مفترسه ومتوحشه وهسه صارت قطه اليفه وبريئه باحضاني

اليوم اني مقرر اسوي الها مفاجئه وهل مفاجئه حتكون ذكرى عيد زواجنا اني وياها...

اخذت اخوها كلت اخلي عند مهيب بس تخلص المفاجئه ارجعه...لان قررت نطلع اليوم وقررت احجز بالفندق ونقضي ليله رمانسيه

وبهالليله احجي الها عن الي،صار من قبل وعن برائتها وطهارتها...

وحبيت اختار هاليوم حتى تكون الفرحه فرحتيين ويكون يوم مميز ينذكر بي تاريخ زواجنا وبراءة هدى...

رحت حجزت بالفندق غرفه مرتبه وحلوه ..وحجزت كيكه كتبت عليها اسمائنا ومناسبة زواجنا...

مريت على الموول اثار انتباهي فستان قصير لنص الفخذ لونه اسوود وبما ان هدى لابسه اسود قررت اخذه الها واشوفها بي ...

باوعتله واني اتخيلها لابسته وخجلانه مني ضحكت على تفكيري ورحت اشتريته...

خابرتها كلتلها تحضر نفسها مسويلها مفاجئة وهي لزكت اله تعرف شنو المفاجئة..

هزيت راسي بنفي...لا بابا ماكو ما اكلج اذا كلتلج مراح تكون مفاجئة خليني افاجئج وبله لغوووه..

ضحكت وكالت...يله تمام ننتظر مفجئاتك ليش لا

همست بهدوء...هدهد احبببج

سكتت مجاوبت واني جنت راضي بسكوتها لان اني اعرفها واشوف اللهفه بعيونها...واحس بحبها تجاهي..

جنت اسوق بالسياره واني متجه البيتي بعد ما خلصت كل الي عندي و التحضيرات...

جنت اتذكر سوالفها وابتسم لا ارادي...

تذكرت قبل فتره جانت نايمه واني نمت بصفها وحضنتها وهي فزت كالت بندهاش : ...يااا لهيب بس لا سكران انوب هم تعالي يهدى احبلي وانوب هم روح يلهيب انهزم للخارج

ضحكت ...ههههههه طاح حظج شنو سكران هي مره بحياتي وبالغلط

تقربت منها بلهفه وشميت شعرها بذوبان ورجعت بستها خدها وتعمقت بقبلاتي الحاره...

سحبت روحها مني بخووف وانزعاج...اووو لهيب شبييك ؟

سحبت ايدها بقوه...شبيه؟؟ مشتاق بعد

تنهدت...تشتاقلك العافيه ...بس انت اشتياقك بالليل؟

شميت خدها الاحبه واني ذايب ...مو هو لازم باليل اليل ستر واحنه ناس مستورين وذايبين ومنحرفين

ضحكت ..يااا عزا ونبي مو صاحي

غمضت عيوني واني استنشق عطرها ودافن راسي بشعرها...ابببد والله مو صاحي خبلتيني هديوتي

دارتت وجهها وهي تبتسم سحبت وجهها ناحيتي وبستها وبست شفايفها تجاوبت وياي وبعدها ابتعدت

سحبتها الصدري واني اهمس الها عن حبي الها واشتياقي ما اسمع بس شهكاتها ودموعها البللت قميصي وهي تشكي من أيامها السود وياي...

مسحت دموعها وحضنتها اكثر شفت منها استجابه الاحضاني...

طلبت قربها اول مره خافت وترددت وما قبلت بس كدرت اقنعها واخذت منها ليله رومانسية ولا بالاحلام ونامت باحضاني واني خلصت ليلي كله اباوع الملامحها وكلبي يرجف عليها...

وصلت للبيت باوعت الباب بيتنا الي يجمعني بمحبوبتي هدى

فتحت الباب واني كلي لهفه افرحها واسعدها واخبرها عن الموضوع الصار قبل.

صحت بصوت عالي ...هدى هدهد هدهودتي

مجان اكوو رد دخلت للمطبخ ماكو بالصاله ماكو كلت اكيد بالغرفه

رحت للغرفه واني امشي ببطئ اريد افاجئها بجيتي واكمزها

شفت باب عرفتها مفتووح وشفتها مطروووحه على الارض والدم مغطيها وسابحه بي و وجهها شاحب مثل الاموات وعيونها مفتوحه بقووه...

انصدمت وكل اعضائي تجمدت اريد احجي ماكوو بس اسمع صوت الطفله تصررخ بصوت عالي ..

زحفت على ركبي وحضنتها هي ودمها اباوعلها ما بيها حياة همست بصوت مبحوح كوه يطلع ..هه هدى

ضمتها الصدري ضربت على خدها ماكو ما بيها رووح صرخت بصوت عالي رج اركان الغرفه...هددددددددى

يتبع ..

الغلاف تصميم Talha-25-3 عاشت الايادي