“ ဟားဟား… စိတ်ပူတတ်ရန်ကော ကိုကိုရာ ကြံဖန်ပြီးတော့… ကဲပါ စားရအောင် ‘’
“ ကိုယ် လုပ်ပေးမယ် ‘’
သျှံမင်းဆက်က ပုဇွန်ကင်များကို အခွံချွတ်ပေးကာ သွင်မှူးအိမ်၏ ပန်းကန်ထဲသို့ ထည့်ပေးလေသည် ။ ခက်ရင်းလေးနှင့်ထိုးပြီးစားလိုက် သျှံမင်းဆက်အားခွံကျွေးလိုက်ဖြင့် အကောင်းဆုံးအချိန်လေးကို ဖြတ်သန်းနေကြသည် ။
“ ဒါလေး လုပ်ဦး ‘’
ဂဏန်းဟင်းလျာအား လက်ညှိုးထိုးရင်းပြောလာတော့ သျှံမင်းဆက်က ခေါင်းခါလိုက်သည် ။
“ မရဘူး ဂဏန်းက ကိုယ့်အမျိုးဂဏန်းကို ပြန်စားမလို့လား ‘’
သျှံမင်းဆက်က စနောက်လိုက်တော့ သွင်မှူးအိမ်မှာ မျက်မှောင်ကြုတ်ကာ အော်လေသည် ။
“ ဟာ… ကိုကိုနော် ‘’
“ ဟဟ… အေးပါကွာ ကိုယ်ခွံကျွေးမယ် ပါးစပ်ဟ ‘’
ပါးစပ်လေးဟလာတော့ တူလေးဖြင့်ညှပ်ထားသည့် ဂဏန်းအသားလွှာလေးအား ခွံကျွေးလိုက်သည် ။
“ ကောင်းလား ‘’
ပြန်မထူးနိုင်ဘဲ ခေါင်းသာညိတ်ပြမိသည် ။
“ စားတာတွေများနေပြီဆိုတော့ ဒီတစ်ကောင်ပြီးရင် တော်ပြီနော် တော်ကြာ အစာမကြေဖြစ်နေမယ် ‘’
“ အင်းပါ… ’’
စားသောက်ပြီးချိန်နှင့် ကွက်တိဆိုသလိုပင် ကျွန်းစုတစ်စုသို့ အရင်ရောက်လာခဲ့ပြီး ထိုကျွန်း၏ကမ်းခြေတွင် လည်ပတ်ခဲ့ကြသည် ။ သည်ကျွန်းလေးက ရှူခင်းများ အရမ်းလှသောကြောင့် နာမည်ကြီးသည့်နေရာတစ်ခုဖြစ်သလို ညွှန်းကြသည့်အတိုင်း ဘယ်အရပ်ကြည့်ကြည့် အလှတရားကို တွေ့နေရသည် ။
ထိုမှဆက်၍ အရှေ့မြောက်အရပ် ငါးကီလိုမီတာအကွာရှိ ကျွန်းတစ်ခုသို့ ဆက်သွားကာ လှေကိုတည်ဆောက်ပြုလုပ်ပုံများ လေ့လာဖြစ်ကြသည် ။ သည်နေရာက ငါးဖမ်းခြင်းအများစုကို လုပ်ကိုင်ကြသည်မို့ ကမ်းခြေတစ်လျှောက်ဝယ် ငါးဖမ်းစက်လှေငယ်များ စီရီကာရပ်ထားသည်ကို တွေ့ရသည် ။
ထိုနှစ်နေရာကိုပင် စိတ်ကြိုက်လည်ပတ်ခဲ့ကြပြီး နေဝင်ချိန်လည်းနီးသဖြင့် တည်းသည့်နေရာသို့သာ ပြန်လာလိုက်ကြသည် ။ ကျန်သည့်နေရာတွေကတော့ နောက်တစ်ရက်မှ ဆက်လည်ကြမည်ပေ ။
YOU ARE READING
A Love Like No Other [Completed]
Romance💕Sweet love always touches the softest part of our hearts💕 Own Creation , Own Characters. This story is belong with both unicode & zawgyi.
Sequel (2)
Start from the beginning