ضابط عشق الترفه (مكتملة)

البارت التاسع عشر

سرى....
وكعت نرجس.. وكلنه نضربنه ع راسنه...
لان لزمت كلبها قبل لا توكع.

اني دكتوره سويتلها الإسعافات الاوليه
بس اديه ترجف...

دوم عندي سماعات طبيه ما اتركهن..

فحصتها نبضات قلبها ضعيفه...

يعني ممكن نصابت بأزمه قلبيه...

كتلهم لازم. ننقلها... اني بوقتها ما اعرف شتصرف..
.
بس منظر نرجس يكسر الخاطر
..
مغمضه عيونها... شعرها نازل ع وجها..
وجها اصفر وغايبه عن الوعي...

ركضنه بيها للمستشفى الخاص...

ومثل ما توقعت... لو ما ملحكين چان راح النبض...

بوقتها الدكتور كال صاير عدها نهيار عصبي..

وتشنجات بالقلب وضعف ضخ الدم للدماغ ممكن تبقى غايبه عن الوعي لفترة...

بوقتها كولش نقهرت.. جانت ماما وبابا وجعفر اخويه
.. كلهم باين عليهم القلق.. والندم..

كلهم وققو ضد نرجس...
اعرف هي مظلومه.

بس لازم اوقف نهاد عد حدها...

.......
رجعت للبيت... واني كولش عصبيه
صح. نهاد اختي الجبيره وواجب احترامها..

بس من حرقه كلبي... اجيت تهجمت عليها...

هيه لكيتها بالغرفه... كتلها..

_انتي شنوووووو يا اخت هاي اللي تذب اختها بفراش الموت...
.

لج بس كوليلي شنو سوتلج نرجس...
ليش تكرهيها..
وين عطفج علينه.. وين حنيتج.. ليش تغيرتي...

من جنه زغار اذا وكعت نرجس بالكاع انتي تركضين تشيليها...

من مره بت خالتي ضربت نرجس بسطتيها...

من نرجس تتمرض انتي جنتي تسهرين وياها...

ليش تغيرتي... شنو نرجس سوته احجي...

انتي تعرفين نرجس بريئه ليش هيج سويتي بس فهميني...

نهاد...
اعرف كلكم تلوموني بس مو ذنبي... اني اخاف

عليها... نرجس مو بس اختي الزغيره نرجس بنتي..
اني اللي ربيتها ويه امي وتعبت عليها...

اني اللي جنت ادرسها واساعدها
....

بس ما اريدها تتأذى.... نرجس زغيره... وحلوه

ممكن ينضحك عليها... وممكن يتأذى كلبها...

لو اجيت وكتلها هذا صح وهذا غلط مراح تسمع..

مني... كل همي تدرس وتنجح... اريدها تصير بأعلى مرتبه...

كل اللي سويته قبل حتى تنتبه لدراستها...

بس ما جنت اعرف شكد هيه متعلقه بحمزه

... وهم حقي منو يكول حمزه صادق وياها...