كال تعالي خيتي فوتي ارتاحي والصبح الله كريم نشوف شنون نتصرف
طبيت والخوف والتعب مسيطر عليه.... الشقه واسعه بيها غرفتين
وصاله جبيره والمطبخ وحمامين واحد مشترك بين الغرف واحد
بدايه مدخل الشقه جانت حلوه نظيفه ومرتبه والاثاث جديد
اشرلي كال فوتي ارتاحي ونامي بهاي الغرفه
عينه بالكاع ولا باوعلي ابد
الا هذاك يخزر بي ويأشرله بيده ... بمعنى وين تدخل
طبيت للغرفه وطبكت الباب .. اكو سرير نفر واحد وكنتور بالحايط وميز عليه عطورات رجاليه وفرشه شعر وعلبه اعتقد كريم شعر او جل هيج شي ومرايه بالحايط
كعدت على طارف السرير حايره والدنيا بكبره احسها بكد الكشايه ضاق بيه الحال وضاق نفسي وگلبي ينزف دم وروحي مطعونه
شمنتظرني شراح اشوف بعد وين اروح ... مددت وغمضت عيوني معدتي احس سكين يمر عليها يكصها كص
حطيت ايدي عليها وظغطت بلكي تهود عليه
من التعب اغفى وارجع افز اتخيلهم اثنينهم لازميني مجرد ما اغمض عيوني ينعاد عليه الي صار وجسمي كله يكوم يرجف حتى دموعي حجرت بعيوني الليل كله ما كدرت انام وارتاح وجع معدتي وبطني موتني
استحي افتح الباب واطلع اريد ماي شي اشربه
عدلت نفسي وتغطيت راسي بين رجليه ... اندك باب الغرفه واسمع صوته يبنيه يبنيه اذا كاعده تعالي اخذي اكل
كمت فتحت الباب جان شايله بيده لفه وباكيت عصير اخذتهم منه سديت الباب ورجعت كعدت اسمع كلامهم يكوله
- ابو خطيه ما عرفتك هيج جايبله عشى ومبيتها هين ليكون حب من اول بريك
- اسكت مهند لتلغي زايد بنيه واستنجدت بينا مو من طبعنا نرد ليطلبنا كوم انطمر واني راح انام هين
- روح انت لغرفتك ارتاح ادري بيك تحسس وتكش روحك الرقيقه اني عندي عادي واني ما اجي اكط نفسي وانام لو الك مآرب اخرى وتريد تنام هين
- راح الخمك على حلكك لتضل تنعثل بسوالفك كوم انطمر يله دوختني
افتح الكنتور بي بطانيه جديده ومخاد جيبهن اريد انام
اسمع كلامه وعبالك خناجر ادك بگلبي
شيصير هسه لو اخويه هيج يحميني هذا الرجال غريب وكسرت خاطره ورغم الخطوره والمجازفه وكلام صاحبه صح ما الومه بس هو ما تركني الله يوفقه ويستر على خواته
بارت 8
Start from the beginning
